bant _co0ol ©؛°¨غرامي مشارك¨°؛©

السلام عليكم ورحمه الله وبركاته

اخباركم حبايبي .. هذي ثاني روايات اختي انت الغلا

حبيت انزلها في منتداكم مثل ما نزلت اول قصه لها " دموع عذراء " والحمدالله انها نالت على اعجابكم

اتمنى هذي بعد تعجبكم

تفضلوااااااااااااااااااا


اطعني لعنبو خنجر ما يحقق مرادك

الفصل الأول


مسكته بـ يمنته وجريته ,, وناظرت بعيونه وفتني ما حسيت إلا ... بـ دمي ملا ثوبه !!! أثأري وانأ أضمه (طعني )


زمن الأول وزمن جدي وجدك زمن الشجاعة والمراجل زمانا ما تقدر تحصي أفعاله.. زمن البنات لا من كبر(ن) وزان(ن) وقدر(ن) على شغل البيت من أوله لتاليه أخطبوهـ (ن) الحريم اللي تقدر البنت حق قدرها ولزواج اطلبوهـ (ن) ..

زمن مضى على العالم بهدوء العواصف والرياحين بـ طيب الرجال وقوة سماهـ (ن) ..

... : يبه انا كبرت والشورى لي .. الزواج بالشورى ما هو بالغصيبه .. يبه انا وحيدتك ليه ترميني كذا !؟
...: لا حول الله والا قوة الا بالله العلي العظيم .. يا يبه الرجل ما به قصور مصلي وخايف الله وله أفعال مسموعة ومدسوسة .. يا بنتي اذكري الله واستخيري بـ ليل والجواب الأكيد عنده .. لا تخطين وترفضين ترى العمر فاني وأنا رجال ما أني بقادر .. وإلا تنسين انج بروحج بهالدنيا وأخاف عليج من غدرها ..
بكيت دموع ابوي " بو سالم " اللي تشكي حالي وحال دنيتي صار له على هالموال اسبوع .. وقفت على حيلي وجلست جنبه ويدي على كتفه وابتسمت له ومن دخلي جرح ما هدا ..
...: ربي يعطيك طولت العمر ويخليك لي بس!ما قد فكرت بـ حمد زوج؟ والا خطر في بالي ؟
مسح دمعته بطرف غترته ورفع راسه حزين ورد على ابتسامتي بابتسامه بو سالم : يا يبه البنت من تصير بالـ 14 سنه تزوجت وانتي الحين 19 سنه .. ليه يا يبه ما فكرتي انك كبيرة ..؟
تنهد وهو يمسح على راسي ويكمل بو سالم : يا يبه ابيج تفرحين والا تفكرين انه كفيف .. معدنه ذهب اصلي ما يصدا وراح تقولين بو سالم قال! قلبي موجوع من كلام ابوي بس وش الحيله هو الصادق كبرت وكل ما خطبني رجال من الأجاويد رديته .. هزيت لابوي راسي وقفت وساعدته على الوقفه لاجل يروح داره هدوء افكاري وكلام ابوي المتواصل عن حمد مخوفني وصلته ورتبت وسادته ودو شقه " الفراش او السرير " بست جبينه ومسيت عليه بالخير وطلعت من عنده ..وعند باب داره وقفت اشوف بيتنا الصغير اللي جمعني باغلى ناسي تنهدت وعيوني على البناء اللي من طين والحاله لله بس الحمدالله على كل حال مشيت لداري وتفكيري مازال بـ حمد الزوج الكفيف ؟



************


الله اكبر الله اكبر
الله اكبر الله اكبر
اشهد ان لا اله إلا الله
اشهد ان لا اله إلا الله
اشهد ان محمدا رسول الله
اشهد ان محمدا رسول الله
حي على الصلاة
حي على الصلاة
حي على الفلاح
حي على الفلاح
الصلاة خيرا من النوم
الصلاة خيرا من النوم
الله اكبر الله اكبر
لا اله إلا الله

رفع الاذان على مسامع المسلمين بدار الخير والفخر .. دار العزه والكرامه ارض الخير قطر .. اصبحوا المسلمين على خير باذن الله الواحد الاحد ..
... : يا الغالي قوم للصلاه ..!
صوت الطق على الباب خلاني اصحى وان اسمع كلمه صلاه .. ابتسمت وبخاطري اتفدى الغاليه امي اللي دووم توعيني من بعد ما يوقف الاذان علشان الحق اصلي مع الجماعه .. ربي يجزاها خير ويحفظها ويخليها لي طول العمر ..
... : ان شاء الله يا ام حمد هذاني وعيت ..؟
صوت الهدوء خبرني انها راحت تجهز لي الحمام " عزكم الله " فديتها ابتسمت وحركت يدي جهه اليمين ادور عصاتي القريبه من الدوشق! هي عيوني اللي تشوف دربي من صغري لين مماتي ..! رددت الدعاء بداخلي ومشيت بخطوات ثابته متوجه للحمام .. دخلت اسبح واطهر جسمي وانوي للصلاه طلعت بعد ما لبست لبسي وحسيت اني نشيط وعقلي صاحي رفعت صوتي اخبر الغاليه اني طلعت من الدار متوجه للمسجد القريب من عندنا .. كل ما مشيت سمعت احد يمر من جنبي ويسلم علي وينشد عن حالي .. هم كذا من وعيت على الدنيا والناس تمر وتسوالف وتسلم وتضحك لي بس ما اشوفهم من الصوت ارسم لهم صورة براسي واحافظ عليها .. صرت خبير بالاصوات واميز بين الطيب والخبيث العطوف والشرير صرت احسب لهم الف حساب لاجل ما اطيح بالغلط وانا كفيف! وصلت للمسجد وصفيت مع المسلمين وصوت المطوع " الشيخ " يردد : نظموا الصف الله يجزاكم خير .. بعد ما هدا المكان سمعنا التكبير وبدت الصلاه والكل كان خاشع لله الواحد الاحد ..


*************

... : اصبحنا واصبح الملك لله .. انتي ليش كذا شريرة ؟!
... : هذا حقي والساكت عن الحق شيطان اخرس ..!
نفخت الهواء اللي في جوفي وحطيت القلاص " كوب" الشاي على السفره " مكان الطعام " وانا اشاهد اختي الكبيرة اللي طار عقلها من عرفت ان حمد ناوي يعرس ؟ وقفت على حيلي وبديت معاها الكلام اللي يكسر الصخر ..
... : العنود خلي عنج الكلام اللي ما يدخل عقل البزر .. وانتي فاهمه ايش اقصد؟ حمد اللي تعب لاجل ارضاج ما هو حمد اللي تسمعين عنه اليوم خلي الرجال بحاله وخلي عنج السوالف المايله اللي ما تجيب الا الشقى والمشاكل تسمعين ؟
طالعتني بنظره كلها غضب وشر وهي ترد علي بكل غرور وحقد وحسد ..
العنود : اسمعي يا سلمى الكلام الزين .. حمد لي انا وبس وراح تشوفين وتسمعين قريب! واللي ما يعجبه يدل البحر وين!
مسكت يدها ولفيتها صوبي وبديت معاها بالتهديد اللي تعرفه زين وهي خابرته " سلمى" : هالكلام راح اقوله لابوي واشوف من اللي راح يشرب من البحر يا بنت ابليس!
سحبت يدها من يدي وطالعتني بكل حقد وبعدت عني وهي تمشي بكل ثقه وغرور اختي العنود من ابوي عنيده ما تجي الا بالمشاكل مثل امها !! الله يستر بس قعدت واخذت قلاص الشاي وسرحت بعيد .. تذكرت يوم حمد خطبها بدل المرة الف لانها بنت عمه وهي ترفض لانه كفيف .. تذكرت يوم يرسل لها الهدايا وهي تصده لانه كفيف .. تذكرت يوم تجرحه بالكلام ورده كان ابستامه لانه كفيف .. تذكرت حسرت امه يوم تشوف حزنه وتشكي حاله للعنود وهي تضحك عليه لانه كفيف .. بس حمد اليوم غير عن حمد الامس ! يمكن اختي العنود نست او تناست بس ما اعتقد ان حمد نسى اللي سوته من جرح وصد وتعذيب ..


**************

... : صكر الدكان يا ابراهيم وخلنا نمشي واخذ المقسوم " جزء من المال " من شغل اليوم وتوكل على بيتك وشوف اهلك ..
رد ابراهيم وهو يصارخ من الجهه الثانيه : ان شاء الله يا بو سالم وجزاك الله خير .. مع السلامه !
وقفت على حيلي اشوف العالم تطلع من دكاكينها " محلاتهم " وتوقف شغلها علشان ترتاح بعد عناء اليوم من الصبح لين بعد صلاة الظهر وهم يشتغلون ربي يجزاهم خير ويعيطهم على قد نيتهم ..
... : السلاااام عليكم ورحمه الله وبركاته .. شلونك يا بو سالم ؟
الصوت اللي وارء ظهري فرح قلبي وارجع الشباب بدمي لفيت عليه وابتسمت له ومديت يدي ليده الممدوه وسحبته لصدري اضمه .. من عرفت هالولد وحبه بقلبي يكبر .. صوت ضحكته العاليه تريحني دوم بعدته عني ورديت السلام بو سالم : وعليكم السلام ورحمه الله وبركاته .. الحمدالله طيب بشوفتك .. انت شلونك يا ولدي ..؟
حسيته انحرج وهو يهز كتفه ويرد علي ... : طيب اذا سمعت منك الخبر اللي يسر بشرني .. يا بو سالم تراني داخل على الله ثم عليك ..؟
تنهدت ومسكت يده وخليته يمشي معاي طريق البيت بو سالم : انت تعال معاي اليوم للغدى .. وراح تعرف جواب سؤالك بدون ما اقوله انا !
حسيت به تردد من كلامي بس ابتسم لي وهو يمشي جنبي ومعتمد على عصاه اللي بيده ترويه طريقه وين وهو واثق من خطاه .. يا رب اجعله من نصيب بنتي وريح قلبها وارشدها للصواب .. وصلنا الدار ودخلت ومن بعدي دخل وهو صاد للجهه الثانيه سبحان الله هذا هو كفيف يقدر حرمه البيت..


************

... : ما احب زيارات اخر الليل تو صلاة العشاء مخلصه وجاءت تركض عندنا .. اووووف ناس ما تستحي ؟
... : ههههههههههههههههههههههههههههه وانتي ليه زعلانه ؟
رديت وانا منقهره من كل قلبي على الخراط " الكذب " اللي ينقال برع على امي ومرت عمي! يالله من طلقها رجلها وهي مش صاحيه الله يعين اللي عندها لفيت على سلمى اللي تضحك وميته من الضحك على شكلي وانا معصبه!
... : سلوووم ليش تضحكين ترى الوضع ما يساعد للضحك ابي اركض بالحوش واستمتع برع الجو حلو ..؟
ردت سلمى وهي ميته ضحك : اطلعي ليش حابسه عمرج يا الخبله .. اممم اقول مريم صج اللي سمعناه ..؟
ركضت جنبها بسرعه وجلست ابي اسمع السوالف على قولت اخوي حمد قعدت على الارض جنب سلمى وبطلت عيوني على كبرها " مريم ": أي سالفه .. ايش صار وانا مدري عنه ..؟
تنهدت سلمى وهي متردده بالكلام وبعد وقت قصير قالت " سلمى ": حمد ولد عمي ناوي يعرس ..؟
ههههههههههههههههههههههههه ضحكت من قلب على كلامها وقفت وركضت صوب الدريشه ورديت عليها " مريم " : ان شاء الله قريب .. بس والله ضحكتيني حسبت عندج موضوع .. وبعدين امي تنطر رد البنت !
سكت بعد ما استوعبت تردد سلمى وسؤالها عن حمد اخوي وتذكرت العنود لفيت راسي اشوفها لقيتها اطالعني نظرة تعني شي .. تقربت منها ورفعت يدي احركها قدام وجهها " مريم " : سلمى ليش تسالين .. وين سرحتي ..؟
تنهدت وهي توقف وتمسك يدي " سلمى " : اختي العنود من عرفت وهي تخطط على شي .. انا خايفه لا تسوي شي بالبنت ترى اختي مجنونه ..؟ رفعت راسي وانا ارد عليها وكلي غضب من هالانسانه اللي كسرت بخاطر حمد اخوي لمده 5 سنين الفترة اللي كسرت مجاديفه وقرر ما يتزوج الا بعد حنه ورنه من امي ومرت عمي الله يجزاها خير ..
مريم : قولي لاختج لا تفكر او تحاول تقرب من العروس ترى وراءها رجال يحميها وخوات ما يسكتون عن الخطا واذا جاءت هالبيت تدخله صاحبه مكان مو حرمه اخوي وبس ..!

***************

طلعت الشمس على الديره وتباشير الخير بهاليوم كبيرة .. كنت احس احساس غير عن الايام اللي راحت مدري ليه بس شعور حلو بعد ما قلت كل اللي بخاطري وعبرت عنه بشكل صح .. كنت اراقب الشمس بنص الحوش ودموعي ترقص معاها .. راح اكون زوجه وعروس هالتفكير في راسي من امس من يوم رديت على ابوي بالموافقه وانا مش قادره اوقف تفكيري بـ حمد .. اليوم راح تجي امه ومرت عمه علشان الدزه " المهر " وبعدها بيومين بكون في بيته وحرمته وام عياله! يالله احسه كلام كبير بس هذي الدنيا كل بنت مصيرها بيت زوجها على قولت الوالد الله يحفظه ويخليه لي .. تنهدت ورجعت اقعد على الدكه " مكان للجلوس مرتفع قليلا عن الارض " ورتبت دلال الشاي والقهوه وسحبت التمر جنبي وحطيت الخبز الحار على الصحن انطر ابوي يجي من صلاة الفجر .. كنت اسرح " امشط " شعري وسرحانه بكلامي امس لابوي علشان يسمعه حمد اللي كان ينطر جوابي وهو جالس على نفس الدكه ..
... : يبه انا مواقفه على حمد ولد سلطان زوج لي بس عندي شرط واحد ..؟
بو سالم : قولي يا يبه وهذا حمد جنبي يسمعج ..؟
تنهدت وانا اسحب الملفع " الشيله " على وجهي علشان اغطيه زين واخذت كميه هواء وقلت ... : ما اني للمال طلابه والا للغنى حبابه ..! ابوي علمني من عطى الحب والوفا والاخلاص لقى رد يبرد بخاطره طول العمر .. وان بعطيك اللي تبيه مني بس ما تخليني بدون ابوي .. تراه دنيتي وراس مالي !
صوت حمد القوي وهو يرد على كلامي خلاني ارتجف وانا بـ داري : اسمعي يا شيخه بنت سلمان .. ما جيت اخطبج للغنج والدلال والا حطيت انج للغنى رايده .. واذا عن الغالي بو سالم اخليج تجينه كل يوم من تصبحين لين تمسين واذا احد ضايقج بالكلام ترى والله ما يرده عنج بعد الله غيري وراح تشوفين مني الخير اذا الله راد لنا الزواج ..
وعيت من افكاري بصوت الباب رفعت عيني وشفت ابوي يبتسم لي وهو يقرب من مكاني بخطوات صغيره وقفت وركضت صوبه مشتاقه لحضنه وحنانه مسح على راسي وتنهد " بوسالم ": اليوم شيخه بحضني .. وباجر بحضن زوجها ..
ما اعرف ليش ارتبكت ودمعه الفراق بـ عيني .. صعب ابعد عن ابوي صعب بس الدنيا تمشي كذا ولازم نمشي معاها والا ضعنا ..

**************



شخصيات اطعني لعنبو خنجر ما يحقق مرادكـ ..

اطعني .. عائله بو سالم ..
الاب : سلمان الـ ...... !
العمر : 69 سنه
المهنه : صاحب دكان للذهب ..
الام : المرحومه حصه الـ .... !
العمر : متوفيه من 19 سنه ..
الابن : سالم بن سلمان ..
العمر : 24 سنه
المهنه : طالب يدرس بالهند " محامي "
الابنه : شيخه بنت سلمان
العمر : 19 سنه
المهنه : ربه بيت ..

************

اطعني .. عائله بو حمد ..
الاب : المرحوم سلطان الـ .... !
العمر : متوفى من 5 سنين
الام : جميله الـ .... !
العمر : 61 سنه
المهنه : ربه بيت
الابن : حمد بن سلطان
العمر : 28 سنه
المهنه : صاحب دكاكين وسفن مثل " الجالبوت "
الابنه : مريم بنت سلطان
العمر : 18 سنه
المهنه : ربه بيت

**************
اطعني .. عائله بو سيف ..
الاب : علي الـ .... !
العمر : 66 سنه
المهنه : نوخذه
الزوجه الاولى : عائشه الـ ... !
العمر :62 سنه
المهنه : ربه بيت
الابن : سيف بن علي
العمر : 28 سنه
المهنه : يهتم بشؤون التجارة لابوه
الابنه : العنود بنت علي
العمر : 22 سنه
المهنه : ربه بيت
الزوجه الثانيه لـ بو سيف ..
الام : لطيفه الـ ... !
العمر :52 سنه
المهنه : ربه بيت
الابنه : سلمى بنت علي
العمر : 18 سنه
المهنه : وربه بيت
الابن : محمد واحمد " توام "
العمر : 16 سنه
المهنه : طلاب

***********
اطعني .. عائله بو ابراهيم ..
الاب : المرحوم غريب الـ ..... !
العمر : متوفي ..
الام : منيرة الـ .... !
العمر : 43 سنه
المهنه : ربه بيت
الابن : ابراهيم بن غريب
العمر : 26 سنه
المهنه : عامل في دكان بو سالم
الابنه : فاطمه بنت غريب
العمر : 14 سنه
المهنه : ربه بيت

************

اطعني .. عائله بو خميس ..
الاب : سعد الـ .... !
العمر : 63 سنه
المهنه : سكير وراعي مشاكل ..
الام : سعاد الـ ....... !
العمر : 54 سنه
المهنه : نقالت حجي " سوالف "
الابن : خميس بن سعد
العمر : 24 سنه
المهنه : طالب ويدرس بالهند " محامي "



اتمنى ينال على اعجابكم


انت الغلا

كيوتـ.-*-. ©؛°¨غرامي مشارك¨°؛©

مشكورة على الرواية متحمسة بقوووة وش بيصير
حبي كملي الرواية وسجليني من متابعاتك
سؤال :- متى مواعيد تنزيل البارتات
:)

خـ ج ـل ©؛°¨غرامي مشارك¨°؛©

شكل الرواية وايد حلوة
أتمنى تكملينها بأسرع وقت
يعطيج العافية

looOoolwa ©؛°¨غرامي جديد¨°؛©

اولا : يعطيج العافية بداية مختلفةعن اغلب الروايات ........


ثانيا : اتمنى تحددين متى تنزلين الرواية ..................

وتقبلي مرورى ,,,,,,,,,,, و متشوقة اشوف البارت القادم

dazy ©؛°¨غرامي مشارك¨°؛©

بدايتها رووووووووووووووووووعه
ننتظرك ياالغلا بالبارت
^________________^

bant _co0ol ©؛°¨غرامي مشارك¨°؛©

يسلموا حبايبي على مروركم الطيب و ان شاء الله البارت الثاني قريب جدا

مع ان العدد قليل بردود بس لعيونكم يسهل الصعب

بنت كووووووووووووووووووووووووووووووووول

dazy ©؛°¨غرامي مشارك¨°؛©

وااااااااااااااااااو
ننتظرك
واصلي لاتوقفي وان شاء الله بتشوفي الردود

خـ ج ـل ©؛°¨غرامي مشارك¨°؛©

شفيج عيوني
عسا ماشر وين البارت
أنتظرك

bant _co0ol ©؛°¨غرامي مشارك¨°؛©


السموحه على التاخير ظروف خارجه عن ارادتي ...

تفضلوووووووووووووا الجزء الثاني ...


الفصل الثاني

... : يالله يا يمه .. الناس تروح بيت العروس من الضحى وانتي لين الحين ما قضيتي " جهزتي " ..؟
... : ان شاء الله يالغاليه الحين جايه ..
لبست البخنق وحطيت المكاحل على الطاوله القريبه من الدوشق وطلعت بسرعه قبل لا يجي حمد ويهزني .. عند باب الحوش لقيت اغراض العروس جاهزة ويرتبونها في دار الزوجيه ! ابتسمت اليوم راح اشوف شيخه البنات واخيراااااا اخوي حمد راح يصير زوج ..
... : مريوم يالله ليش واقفه مثل اللوح عند الباب ..؟
لفيت جهه امي والابتسامه على وجهي واعتقد انها فهمت احساسي لانها ردت علي ابتسامتي وهي تلبس العبايه وتعدلها على راسها .. امي حالفه تروح وتعدل العروس بنفسها خصوصا انها يتيمه ومالها الا ابوها شفت منيرة وبنتها فطوم عند الباب وهم يحطون البقشه " الاغراض " على الحمار اللي ماسكه ابراهيم كان يسحبه صوب بيت العروس وامي وراهم كنت اشوف الحب من نظرات اهل بو غريب لبعض احبهم ناس طيبين ولهم سمعه طيبه مع انهم على قد حالهم بس الكل يحبهم .. سمعت امي تنادي علي تبيني امشي بسرعه واقرب منها ركضت شوي علشان الحق عليهم كنت اشوف البزران واقفين ويصفقون ومستانسين عندهم عرس باجر! أي احد يتزوج عندنا كل الديره تحتفل وترتب مع اهل المعرس واهل العروس بينهم حب والفه جميله جدا.. صوت ابراهيم وهو يصارخ بعد ما وصلنا خلاني التفت عليه ..
ابراهيم : درب درب يا ابو سالم .. امي وخالتي وخواتي عند الباب ..
صوت بو سالم وهو يقربنا ويطلب منا ندخل ذكرني بالوالد الله يرحمه ابتسمت لهم واحنا ندخل الحوش اللي كان مليان حريم في كل صوب وزوايه وكانوا يغنون اغنيه الحنى لنا اليوم ليله الحنى للعروس المفروض العروس تتجهز لمده طويله بس اخوي الله يهداه مستعجل .. كانت اسمع الاغنيه وابتسم وابتسامتي زادت يوم شفت امي تفصخ عبايتها وهي تغني معاهم بعد ما طلع بو سالم وابراهيم وصكروا الباب وراهم :

حناج عجين يا بنيه حناج عجين
لا زفوج على المعرس لازم تستحين
حناج ورق يا بنيه حناج ورق
لا زفوج على المعرس زخج العرق



*************

... : يمه تاخرنا الوقت المغرب واكيد الحريم جوعاه الحين والا تنسين انهم ما تغدوا وطول الوقت يشتغلون ؟
... : يا سلمى شبلاج كلتي قلبي بالحنه .. ما اخبرج جذي ..
ردت امي وهي تضحك علي مو مني واخيرا جاءنا فرح وعرس في عايلتنا من زمان واحنا ننطر شي يوسع صدورنا .. صوت ركض بالحوش خلاني الف اشوف من ما لقيت اللي التوام المجانين احمد ومحمد!! دوم مشاكل ودوم يتهاوشون تكلم احمد وهو يركض بسرعه قبل محمد وهو ماسك ثوبه على فوق : يمه يمه .. ترى حمود كسر السيكل ..؟
رد محمد وصوته مخنوق من الركض ورابط ثوبه على بطنه : كذاب يمه كذاب ..؟
وقفت امي بنص الحوش وبعيونها نظرت غضب خلتهم يسكتون ويطالعون بعض وهم حاسين بالغلط اللي سوه والخوف اللي فيهم احترام للكبير .. تكلمت امي وهي تحط عبايتها عليها "ام محمد" : اذا جاء اخوكم الكبير سيف راح اخليه يتصرف معاكم .. والحين كل واحد داره ويمسك كتابه ..
طبعا بدون أي كلمه نفذوا الكلام وراحوا يسون اللي امي قالته كنت اضحك بيني وبين نفسي عليهم طلعنا وطول السكه " الطريق " ساكتين لين قربنا من بيت العروس وصوت الاغاني والتصفيق عالي شعر جسمي وقف مادري ليش فرحت ركضت بسرعه للبيت فتحت الباب وانا اسمعهم يقولون:

على العين والرأس جينا نبارك لج على العين والرأس
لو زعلت الناس واحنا بنات العم ولو زعلت الناس
يبايع الحنا على الفين وقياس على الفين وقياس
البنت ما تتخذ إلا بشور الناس إلا بشور الناس
والولد ما يتخذ إلا بأول ساس إلا بأول ساس
كلكم باركوا له ولد الحمولة كلكم باركوا له
عشرة دولة ابدولة كلكم باركوا له


دخلت بسرعه اشوف مريم وفطوم وين وما شفت امي وين راحت كنت مستانسه على الرقص والاغاني والتصفيق كل هذا فرحه الناس بالليله الحنا عجل يوم العرس ايش راح يسون غنيت معاهم يوم لقيت البنات وهم ينظفون المشموم ويحطونه على الحصير " بسطه من اعواد السعف " :


لا بسه الديباج الاخضر ها الله ها الله
ثوب بني ثوب أصفر ها الله ها الله
خدها كالورد أحمر ها الله ها الله
وردة شفناج احنه ها الله ها الله
خاضبه الكفين حنه ها الله ها الله
زهر وردي وماء وردي ها الله ها الله
قمر عندنا مثل شمس ها الله ها الله


************

افكر وتفكيري ذابحني مش قادر اعبر عن اللي احسه كل شي فوق بعض بس شعوري لين اليوم للعنود ما تغير .. الله يسامحها كيف تصدني وانا ولد عمها كل هذا علشاني كفيف او عندها سبب اقوى!! تذكرت كيف كنت اترجاها من دخلت العشرين اني ابيها لي زوجه بس الله يسامحها صدها لي اليوم وعن كل يوم يوجعني ويزيد من كسر قلبي ورحي .. صحيح اني ما شفت العنود لاني كفيف من الولاده بس صوتها وضحكتها من طفولتها لين ما كبرت وهي ترن باذوني وما يفارقني ابد! كيف لو تجي بنت جديده وتاخذ كل اللي احسه للعنود ؟ .. كنت اتقلب على الدوشق اللي حاضني وريحه عطر ملابس العروس بالدار مليانه لدرجه انها اخنقتني .. ما ابي اظلمها والا اجرحها ودامني اخترتها وفضلتها على بنات الجماعه لازم اصونها هذي يتيمه الله يعيني ويصبرني .. غمضت عيوني اول ما سمعت صوت اختي وامي يضحكون بالحوش دليل وصولهم ما حبيت انهم يجون ويسولفون علي ويقولون اللي صار ابي ارتاح وراسي يوقف تفكير .. حركه الباب حسستني ان الغاليه قريبه مني وحسيت بيدها تمسح على راسي واللي حزني اكثر يوم قالت " ام حمد " : ربي يوفقك ويعطيك الخير فيها وان شاء الله اشوف عيالك يالغالي قبل مماتي ..
تنهدت اول ما تصكر باب الدار من بعد ما غطتني امي زين تنهدت وانا اردد الله يعيني ويصبرني شكل الكل يحبها قبل لا اجيبها البيت .. تذكرت كلام مريم يوم قالت عنها اول ما شافتها " مريم ": انت محظوظ فيها .. ما راح اقول جمالها كيف لانك ما تهتم بس اللي راح اقوله انها اخلاق وادب ودين وكل شي بحياتها ابوها ..
ما اعرف كم خذت وانا على هالحاله لين نمت وعقلي بـ وادي وقلبي بـ وادي ..

*************

... : بموت يا يمه والله بموت .. ليه يتزوج ليه ياخذ غيري وانا ابيه .. ليه ما رجع لي من جديد والله راح اقول أي واني ابيه بس يرجع ؟
... : كان لج وانتي اللي صديته .. كان كنز يا العنود كنز محمول .. الله يا الدنيا شوفي ايش صار الحين والسبب عنادج ..؟
العنود : بس هو تسرع .. ليه مجرب معي من جديد .. يمه والله اني احبه ومشتاقه له ولصوته .. يمه قولي له اني احبه وابيه !!
... : يجرب .. الرجل تعب ..! من دخل العشرين وهو يخطبج من ابوج وانتي تصدينه .. حتى اخوج سيف وقف معاه وصف جنبه والسبب انتي .. والحين اسكتي وقصري من حسج " صوتج " لا يسمعج احد .. ترى الناس وقت صلاة الفجر لا يمر واحد من اخوانج وتصير علوم ؟
كنت اصيح قهر اليوم عرسه اليوم بيكون لحضن غيري زوج .. حمد ارجع لي ارجع للعنود ..! حضنتني امي وهي تشد على راسي وتمسح على شعري وصوتي من البكى يزيد !! كرهت بنت سلمان ايش فيها علشان يفضلها علي ليه يفكر فيها زوجه ؟
تكلمت وانا اوقف على حيلي " العنود" : يمه ساعديني .. لازم اوقف الزواج لازم اوقفه .. تكفين يا ام سيف ساعديني .. حمد لي ما ابي هـ الزواج يتم .. يمه ساعديني ؟
شفت امي اطالعني بـ حزن على حالي والا تعرف شلون تبرد بـ خاطري كنت اصيح وانا انطر منها حل يوقف الزواج .. وبدون مقدمات وقفت امي وهي تبتسم ومسكت يدي " ام سيف " : عندي الحل بس خلج ساكته واللي راح يصير تحطين نفسج ما تدرين عنه انتي فاهمه ..
هزيت راسي على اني فاهمه بس المشكله اني مش فاهمه شي طلعت امي من داري .. وقعدت على حيلي افكر باللي راح يصير حطيت راسي على الوساده وانا افكر بـ حمد .. حبيبي قلبي وروحي وشمعه حياتي ليه رفضته ليه ..! ليه خليته يتعذب حسيت اليوم باللي يحسه حسيت بعذبه يوم صديته مليون مرة .. حسيت لاني عشت صده لي ويوم قرر يتزوج غيري مستحيل اخسره مستحيل .. حمد لي انا وبس .. حمد للعنود بنت علي !!

**************

الكل متوجه للصلاة الفجر والظلام يخوف .. انا ليش وافقت اسوي اللي راح اسويه .. يا رب ساعدني اذا ما سويت اللي تبيه عمتي " لقب يطلق على السيده الغنيه " راح تقطع رزقي واذا سويته راح اجرح مشاعر بنت مسكينه مالها ذنب .. كنت اسولف مع نفسي بالظلام ما بين الدواعيس " المناطق الضيقه " انطر بس عمي حمد يطلع من بيتهم ! لكني مستغرب عمي ما يتاخر على الصلاة شسالفه لا يكون مريض والا ناوي يصلي بالبيت اليوم ؟! لا لا لا عمي ما يفرط ابد صلاة الجماعه ؟! غريبه اكيد في شي صاير ليش ما طلع !! راح اصبر شوي يمكن يطلع بس ما ارجع وانا ما وصلت الرساله له لازم اقوله اللي طلبته مني عمتي عائشه ..
... : مسعود .. شفيك واقف بالظلام ..؟
نقزت من مكاني ولصقت بالجدار اللي وراي بعد ما سمعت صوت عمي ابراهيم ودريت " مسعود ": هاا ااه ااي كنت رايح المسجد ..؟
لاحظت استغرابه وهو يعدل من وقفته ويشد بظهره .. يالله ايش كثر اخاف من عمي ابراهيم انسان بنيته قويه وشديد وشخصيته تخوف لانه صارم وما يحب الكذب والخداع .. ابتسمت له وانا ميت خوف وسلمت عليه وانا الف جهه المسجد علشان اصلي الفجر مع الناس وبراسي الف شي وشي يدور واولهم اني ما خبرت عمي حمد بالرساله .. دخلت وقفت بالصف بعد ما قريت دعاء دخول المسجد وكنت اتلفت يمين ويسار ادور يمكن القاه بين الجماعه بس للاسف مو موجود .. لفيت راسي اطلع من وراي وصدمتني عيوني الصقر اللي تراقب فريسته من بعد عمي ابراهيم شاك فيني والدليل عيونه اللي تراقبني .. صوت الشيخ نقزني يوم قال " المطوع " : اعتدلوا يا جماعه الخير .. وبدء بالتكبير هني نسيت عمي حمد وابراهيم وعمتي عائشه لاني كنت بين يد ربي خشعت ونسيت كل اللي حولي ...

**************

صوت الضحك والسوالف والعب اللي عند باب بيت خالتي ام حمد عاجبني لبست بخنقي وانا اركض صوب باب بيتهم ابي اروح وياهم !! لان امي ما خلصت واخوي ابراهيم طلع مع الرجاجيل للذباح من الفجر والا رجع يعني اتصرف من نفسي احسن .. وانا اركض ما انتبهت للشخص اللي واقف عند الباب بيت خالتي ودعمته بقوه على ظهره ..
... : اااخ راسي .. عمى ان شاء الله زين ...؟
لف علي وهو يتالم من الضربه مثلي واول ما شافني مسكني من عجايفي " الشعر " وقربني منه وهو معصب ويشد على عجفتي اليمين اكثر وانا اصارخ عليه يهدني ...
... : اااي أي هد راسي والله اعلم اخوي الكبير حمد يكسر راسك ..؟
... : فطوم انتي ما تستحين تركضين بالسكه وما في احد كبير معاج .. وبعدين لسانج طويل ويبيله قص ..؟
تكلمت بعد ما رفعت راسي وشفت اللي يكلمني " فطوم " : اااي ااي .. انت هيه .. أي يعور .. احمد ااو محمد .. هد عجفتي ..؟
... : اولا انا عمج محمد .. وما راح اهدج لين تقولين لي ليش تركضين ..؟
دمعت عيني وانا ماسكه يده وما اقدرت استحمل الالم كان ماسك راسي بقوه نزلت راسي من جديد للارض وانا اصيح والا رديت عليه وما قدرت اطلع الكلام اللي في خاطري حسيت انه خفف من الشد ورفع راسي بيده ويوم شاف دموعي بعد عني وهو منصدم شوي من اللي صار " محمد " : ليش تصيحين .. خلاص عاد .. فطوم لا تصحين !
دزيته عن طريق الباب وركضت بسرعه بعد ما حسيت بالاحراج اكثر ودخلت بيت خالتي ام حمد وللمرة الثانيه ادعم بس هالمرة كانت مريم اللي تعورت وقعدت تسبني وتدعي علي وانا اصيح .. ويوم انتبهت سكتت وقربت مني وحضنتني وهي تهديني وتقرى قران " مريم " : حبيبتي شفيج..؟ ليش الدموع هذي .. عادي ترى ما يسون عليج دعمتيني ..؟
هزيت راسي ابي اشرح لها ليش اصيح " فطوم ": محمد شد عجفتي وهاوشني لاني اركض ..؟
سكتت مريم وقعدت اطالعني وعقبها انفجرت من الضحك رفعت راسي وانا امسح دموعي مستغربه من ضحكها بس اول ما شفت وجهها وهي تضحك ضحكت معاها ونسيت الموقف اللي صار من كثر الضحك ..

***************
... : كل اللي اقوله لك واضح ليه السالفه كبرت الحين ..؟
... : السالفه ما كبرت والا صغرت .. خذها مني وانا اخوك .. يوم انهم يبونك كان شروك من قبل مو الحين يوم نويت الزواج من بنت ابو سالم قالوا انهم يبونك ؟
... ؟ هالمشكله !! ليش الحين ؟ احس في شي ابي اعرفه ..؟
... ؟ انت ايش تقول توك تعرف انها تبيك ومرسله لك الخادم برساله علشان توقف عرسك؟! يا حمد .. اسمعني زين خل كلامي براسك بعد شوي راح نزفك على عروسك .. بنت مالها ذنب الا انها وافقت تكون زوجتك وام لعيالك .. واذا الكلام اللي سمعته راح ياثر فيك .. اسمحلي اقولك انك ما تستاهل طرف ظفر رجل بنت بو سالم ..
بعد كلمتي هذي حسيت بـ حرارة قويه بـ جسمي .. الحين يا بنت الناس والاصول تجين له بعد ما ذل عمره علشانج ااااخ .. كنت اكلم نفسي وانا منحرق من داخلي .. شفت بعيون حب حمد لها سنين بس بعد اليوم لا والف لا ما راح اخليه يخلي البنت اللي راح تصونه علشان انسانه ما تستاهل طرف ثوبه ..
تكلمت وعيون حمد حايره " ابراهيم ": شوف يا حمد احنا على البر اذا ما بغيت بنت بو سالم قول الحين .. وانا مستعد اني اعرس عليها اليوم ؟
التغير الغريب على ملامح حمد والعصبيه بين فكه اثبت لي انه ما راح يقبل الوضع .. " حمد ": مو حمد اللي يترك وحده ربي عطاها من الحشمه والطاعه علشان مرسال ؟ وانت تعرف يا ابراهيم بس الموضوع محيرني ؟ ومثل ما قلت العرس اليوم وما في غير بنت عمي بو سالم اللي تسكن بيتي! من كثر ما رقص قلبي من الفرحه ما قدرت ارد عليه بس هذا حمد اللي اعرفه ما يعطي موضوع صغير اكبرمن حجمه والا يخليه يشغل باله .. اما اللي صار اليوم ما يـ نسكت عنه لما يوصل عمي بو سيف راح يعرف اللي صار وهذا وعد. مشيت جنب حمد بعد ما سمعنا اذن العصر يرفع على المسلمين ..

*******************

...: يا مره وين رايحه ..؟
...: وانت ايش تبي تسال ؟
...: عايشه في بيتي ولازم اعرف وين رايحه وين جايه ,, والا شايفه البيت سبيل متى ما بغيت مسكتي الباب؟
اووووف اللهم طولك يا روح .. كنت مستعجله ابي اطلع بروح بيت ام سيف ابي اعرف ايش صار بـ العنود ..؟
...: اسمع يا سعد البيت هذا بيت ولدي خميس وانت مالك حق علي ؟!
رد على سعد وهو يتمايل بقعدته : بيت من ! ههههههههههههههههه ضحكتيني لا بارك الله فيج انتي و ولدج ؟
قبل لا اتكلم رد بسرعه وهو يجي صوبي وشكله سكران .. يالله هذا الرجال مو صاحي الناس تصلي العصر وداشين على المغرب وهو سكران ..
سعد: اسمعي يا سعاد هالبيت بيتي وانا راعيه لا انتي والا ولدج له حق فيه؟
ضحكت من خاطري ودزيته واستمتعت وهو يطيح على الارض مثل الخروف ..
سعاد: البيت بيتي وبيت ولدي والمطوع " شيخ المسجد" قال هالكلام البيت حق الزوجه والا تنسى انك مطلقني يا السكير ..
شفته وهو يفرك مكان الالم من الطيحه ويتاوه كسر خاطري بس ما يصير بذمتي رجال ما فيه ذروه شهامه ليش .. عايش على تكلاا الناس لولا اهل الخير كان حقي وحق ولدي ضاع ..
سعاد: اسمعني زين اذا حاولت تعترض طريقي ترى و الله الواحد الاحد لا اشكيك عند بو سيف ياخذ حقي وحق ولدي ..
طلعت من البيت مستعجله اشوف ايش سالفت عمتي العنود كنت افكر انها جنت كان قدامها طول العمر واختارت هاليوم علشان تخرب زواجه الصدق اني احب بيت شيخه بنت المرحومه حصه بس ايش اسوي ياالعقربه عمتي العنود و امها .. الله يستر بس الله يستر ..

************************


وان شاء الله الجزء الثالث على الطريج .. سووووووووووووووووووووووري على التاخير

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1