منتديات غرام روايات غرام أرشيف الروايات المغلقة - لعدم إكتمالها رواية تاهت أقداري بحبك و الهوى بحره عميق / للكاتبة : روح قلبي
بنوتة إماراتية ©؛°¨غرامي مشارك¨°؛©

للكاتبة: روح قلبي..
حبيت أكتب هذي الرواية الصراحة ياني الإلهام فجأة طبعـ [ن] الرواية لا تخلو من الحياة الواقعية اللي نحن نعيشها..
حب×خيانة
غدر×وفا
صدق×جذب
رحمة×قسوة
تآلف×تشتت
روايتي مقتبسة من الحياة الواقعية من خلال مشاهدتي لمشاكل ربيعاتي أو لوناستهم بالمقابل أكيييييييد فيها شي من الخيال مستحيل تكون واقعية واقعية لا عالعموم ما راااح أطول عليكم هذي روايتي ساعدتني في كتابتها عضوة من أعضاء المنتدى كلي ذوق و أشكرها الصراحة ^^


بسم الله الرحمن الرحيم

Part 1
كانت يالسة ف حجرتها تفكر بدراستها و بحياتها و بكل شي..
....تصارخ: فوااااااغي..
نقزت من ع الشبرية: يا ماامي شو السالفة..نزلت تحت و جافت أمها..هلا أماايه شو بغيتي..؟؟
.....يعيب عليها يقلدها: أمااايه شو بغيتي..يرد لصوته الطبيعي..مو جنه الحين وقت العشا..
فواغي: سعود انته تنجب أنا ما رمستك..
سعود: ما عرفت شو تقول قالت جب وااكككككك..
أم سعود: بسكم هذرة عنوبكم ريحوا حلوجكم شوي و يلا تعالوا العشا زاهب..
Stoooooooop
خراح أعرفكم ع بيت بو سعود..
بو سعود: اسمه سيف عمره 47 سنة طيب لأبعد الحدود بس يوم يعصب لاحد يقرب صوبه و يشتغل ف شركة هو نائب المدير..
أم سعود: اسمها عاشه تحب عيالها لأبعد الحدود بس اسمنها عصبية و معقدة شوي و عمرها 45..
سعود: البجر عمره 22 سنة 4 آخر سنة ف الجامعة و يدرس بزنس عسب يسند أبوه ف المستقبل و ملامحه حلوه بشرته حنطيه شعره أسود سواد الليل عيونه كبار بس ناعسات> ياعيني..و خشمه سييف..
مريوم: عمرها 202 سنة ف الجامعة تخصصها هندسه الكترونية و هي حلوة بس مب شرات سعود بشرتها بيضه و شعرها أشقر لنص الظهر و هي شوي شوي متينة..
فواغي: عمرها 18 ثانوية عامة علمي امم تشبه سعود واايد شعرها سواد الليل الين ركبها و عيونها أكبر و جسمها حلو يعني متناسب و يا طولها و عندها غمازة وحدة صوب اليسار..
عقب رشود: عمره 15 سنة مسوي عمره ريال هو كوبي بيست من مريوم و هو صف تاسع..
زيود: آخر العنقود عمره 5 سنين ثاني روضة..
اليده: تسكن عند ولدها بو سعود 2 و 24 ساعة بالعه فلفل بس تحب عيالها و احفادها وااااايد و اليد راشد متوفي..
Back..
بعد ما خلصوا العشا كانوا فواغي,سعود,الأم ف الصالة يالسين لأن البقيه رقود..
أم سعود: يلا فواغي ع الحجرة باجر أول يوم للمدرسه الله يعيني عليج..
فواغي: ماامي حياتو قلبو انتي بس خليني شوي يالسه..
أم سعود: هيه انتي قردني بس ما في يلا سيري نامي..
فواغي: مابي مابي مابي مو لازم أنام..
سعود: انا أخاف أخاف أخاف لحالي أخاف أنام..
فواغي تمد ييدها: كفك كفك أخوي..
سعود: نعم أختي وين تبين.! و يلس يضحك..
فواغي: ما عليه مردوده..
أم سعود: بس انتي وياه كله مناجر ما عندكم شي ثاني..
سعود: حلاته لااه..
فواغي: هي لااه..
سعود: مال شارجة لااه..
فواغي: كشخه لااه..
سعود: سخافه لااه..
فواغي: تحسيس لااه..
سعود: وايد لااه.
أم سعود بعصبيه: بس لااه كل واحد ع غرفته أجوف..
سعود وفواغي طالعوا بعض:ههههههههاااي عاديناج..
أم سعود: بتسيرون و لا تجوفون الوييه الثاني..؟
و ماجافت إلا غبرتهم سعود راح غرفته يرقد الحين ساعه 1:15بس هو كان تعبان وايد فعسب جذيه> و لا مو من عوايد الشباب..>3
و فواغي و هي رايحة حجرتها سمعت صوت ضحكف حجرة مريووم و راحت تسمع شو السالفه> الفضول و ما يفعله من نتائج..
مريوم: لا حبيبي لا..ما أقدر..أوك بحاول..أفا كل و لا زعلك..ممدري بجوف..يلا حبي بااي نوم العوافي..
بطلت فواغي الباب بسرعه و طاح الفون من ييد مريوم..
يا ترى شو بيصير و فواغي بتخبر حد.؟؟

بنوتة إماراتية ©؛°¨غرامي مشارك¨°؛©

Part2
مريوم: لا حبيبي لا..ما أقدر..أوك بحاول..أفا كل و لا زعلك..ممدري بجوف..يلا حبي بااي نوم العوافي..


بطلت فواغي الباب بسرعه و طاح الفون من ييد مريوم..


فواغي: مريوم انتي كنتي ترمسين منو.؟؟


مريوم: أ..أن.ا..مم..ا كنت أرمس حد و ثانياً بخصوصج داشه حجرتي جذي صج الدفاشة منج و فيج..


فواغي يلست حذالها ع الشبرية: امم مريووم سمعيني و قولي الصراحه أنا اختج و راح أسترج قولي الصدق لأني و الله إذا عرفت عقب صدقيني ما راح تعينين خير..


مريوم خافت من التهديد بس حبت تبين: و الله سمعي لا تمين تتفلسفين ع راسي..


فواغي: عالعموم بسوي عمري و لا جني سمعت شي يلا بسير أرقد..


و ظهرت من الغرفة و راحت تنام>نوم الهنا..


مريوم حطت راسها ع الشبريه: أوف الحمد لله شوي وكنت بروح فيها..سكتت شوي..خليها تولي أنا بيلس أفكر فيها مااالت..


اليوم الثاني..

7الصبح..


راحت أم سعود غرفة فواغي عسب توعيها لللمدرسه دقت الباب> لا رد:فواغي و يهد يلا نشي بسرعه ورااج مدرسه..


فواغي من داخل الحجره تصارخ و تتحرطم: أوف ردينا ع المدرسه يلعن شكل المدرسة..عقب ما هدت.. استغفر الله أنا شو يالسة أقول..


راحت تتلبس و تتجهز و تتكشخ و تتعطر>لزوم رايحة عرس..
ــــــــــــــــــــــــــــــــــــــــــ



ف بيت ثاني و بعيد عنهم بيت خليفة ال.....


.....:علايه سلامه يلا بسرعه ناني تترياكم برع>ناني الدريوليه اللي توديهم المدرسة و تردهم..


نزلت علايه و سلمت ع أمها و حبتها ع راسها: صباح الخير أم منصور..


أم منصور: صباح النور حبيبتي و ين أختج ناني تترياكم بررع..؟!


سلامه و هيه نازله: صباح الخير أماايه..و حبتها ع راسها..


أم منصور: صباح النور ها متأخرة مو من عوايدج تتأخرين..


سلامه: أماايه ليش انتقلنا هني يوم كنا ف الخور أريح ليش انتقلتوا هني خليتوني اهد ربيعاتي..؟!


أم منصور بطيبه قلب: يا أمايه شو نسوي أبوج اضطر انه يي هني عسب الختلاس اللي صار ف الشركه و راح تتعرفين ع بنات يدد و تتعودين عليهم..


علايه:أتتتتتف جلبتوا المود يلا بسرعه الحين هذيج الفلبينية بتيلس تتحرط و ممدري شو..


أم منصور: هه يلا..


و روحوا و يا ناني اللي يلست تتحرطم عليهم أونهم متأخرين عاد> صج دريوليات آخر زمن..


Stooooooop


راح أعرفكم ع عايلة بو منصور..


بو منصور: اسمه خليفه عمره 49 سنه رجل أعمال ناجح جداً طيب وااااااايد و أكره شي عنده حد يضر عياله..


أم منصور: اسمها روضه عمرها 44 سنه طيبه واايد و تحب ريلها و عيالها واايد و أي شي ممكن تسوي عسب راحتهم..


منصور: البجر عمره 22 آخر سنه ف الجامعه و يد\رس بزنس عسب يشتغل ف شركة أبوه و هو حللليو بمعنى الكلمه عيونه كباار و هو حنطي و خشمه سيييف و حياته محدده و جسمه رياضي و بنظره وحده منه خشه 100 بنت>هههه لاازم عاد هالسوالف ويا الشباب..


علايه + سلامه: أعمارهم 18 ثانويه عامه علمي كوبي بيست من بعض بس علايه حنطيه و سلامه بيضه ف التصرفات تناقض تااااااام ملامحهم حلوه و هاديه..


سيف: عمره 16 صف 10 يشبه منصور بس هو بشرته بيضه و شعره مايل للاشقر> يا سلاام..


back..

أم منصور يلست تتريق نزل بو منصور و يا صوبها: السلا م عليكم..


أم منصور: و عليكم السلام و الرحمه يلا تعاال تريق..

بوم نور يلس مجابلها يتريق عقب نزل منصور و يا سلم عليهم و حبهم ع راسهم..


منصور: يا الله صباح الخير..


أم منصور + بومنصور: صباح النور..


أم منصور: نعال حبيبي ايلس يمي و تريق..


منصور: من عيوني..


أم منصور: تسلم عيونك..


بو منصور: هيييهاأ عيل تقولين لمنصور حبيبي و ممدري شو و أنا الفقير مو جني ريلج ها ر
روضه أجوف الكلام الحلو لناس و ناس..


أم منصور مبققه عيونها و مستغربه و منصور يالس يضحك: هههه أبويه إنت خلص دورك كفاايه
أياام الخواالي شبعتك من هالكلام و زيدت بعد..


بو منصور: يا هي من أيااام اسمييها ما تنسي..


أم منصور من الفشلة نشت و منصور و بو منصور يالسين يضحكون عليها
ـــــــــــــــــــــــــــــــــــــــــــ


ف مدرسة.......لثانوية البنات..


علايه و سلامه ساروا يجوفون وين كلاسهمو هالخربطان..و روحوا لكلاسهم طبعاً سلامه
يالسه مكانها هي و العدم وااحد و علاايه ناويه تتعرف ع وحده وحده جافت ثنتيين يالسين حذال بعض قررت تبدي فيهم..


علايه: السلام عليكم..


.......+........: و عليكم السلام و الرحمه..


علايه: أنا علايه..و أشرت ع سلامه.. و هذي سلاموه my twin نحن يدد ف هالمدرسه انتقلنا من الخور..


.....: يا حيا الله الغاليه أنا فواغي و هذي موزان بنت خالتي و بنت عمي ف نفس الوقت و فوق كل هذا توأم روحي..


موزان: و جان أثتحي..


فواغي+علايه:مالت..


موزان: خلوني شوي أصدق روحي ما في مجال يعين هذ و أنا بنت أمون و حمود جذي عيل لو كن بنت john&krestin شو بتسون ..؟!


علايه: ها منو أمون و حمود..؟؟


فواغي: ما عليج منها قصدها خالتي و عمي..


علايه: اسمنج تحفه..


موزان: لا جره..


علايه: ها ها ها ما يضحك..


موزان: يضحك و لا يبجي..


علايه بس عاد..


موزان: عاد و لا لوط..


علايه: انتي ايه..


موزان: ايه و لا بي..


علايه تنرفزت: انتي ما تفهمين..


موزان: أفهم و لا أستوعب..


فواغي: صج بقره..


موزان: بقره و لا حماره ها ها ها.. و فجاه صرخت.. هىىىىىىىىىىىئ خليتوني أسب عمري..


فواغي+علايه:ههههههههههههههههههههههه عمرج و لا روحج..


عقب دقيقه تموا ساكتين شوي..


فوااغي: امممممم أقوول علايه..


علايه: هلا..


فواغي: اممممممم سلامه أختج..


علايه: هيه أختي و الله العظيم أعرف..


فواغي: فقدتج أنا قصدي يعني ليش يالسه روحها.؟؟!


موزان: هيه صح ليش يالسه روحها ما تي تيلس ويانا..؟!


علايه: هييييييييييييه هي بروحها جذ انطوائية يعني ما تندمج و يا البنات بسرعه و إذا سألتيها تجاوب بكلمه و لا كلمتين ف المدرسه القبلانيه شوي اندمج و يا البنات بس اضطرينا ني هني الشارجه عسب شركه أبوي صار فيها اختلاس و لازم يجابلها و لو الله ثم ربيعه جان أبوي خسر من الخاطر أظن اسم ربيعه كان سيف ال.....


موزان+فواغي شهقوا مره وحده..


علايه: بلاكم..؟!


موزان: رقدتوا ويددي..


فواغي: استغفر الله انتي شاربه شي اليوم صح..؟؟


موزان: والله شاربه كوفي جان الشغاله محطيه شي فيه أنا ممدري..


علايه: طع التفكير المهم ليش شهقتوا..؟؟!


فواغي: الله يسلمج و يعافيج سيف ال...... باباتي..



علايه: حلفي.؟؟


فواغي: والله..


علايه: يا عن عن عيني طلعنا نعارف و أنا ممدري..


و دق الجرس و و كملوا يومهم إلا يعلقون ع هالأبله و لا الحصه ..................إلخ>سوالف البنات ما تخلص..

Stoooooooooop


خلوني أعرفكم ع عايلة موزان..


بو حمدان: أحمد عمره 42 سنه ما خذ الحياه so easy بس وقت الشدايد ينشد فيه الظهر و هو أخو بو سعود..


أم حمدان: آمنه عمرها 42 سنه طيوبه واايد و تدش القلب بسرعه و هي أخت أم سعود..


حمدان: 20 سنه هذا جميل كلمه قليله ف حقه جماله مب طبيعي وجسمه رياضي بس خقاق و أكبر مغازلجي و صايع ضايع و هثاني سنه من الجامهع يدرس إعلام..


موزان: 18 سنه كيوت و حلوه و تاخذ من ملامح حمدان شوي و هي شوي خريش وين شوي إلا وايد بس حساسه لدرجه فضييييييعه..



نجود: 14 سنه هذي ثعلوبه من تحت لتحت تحب تجرج حد عسب يهزب موزان بس مع ذلك تحب موزان وايد و حلوه و ملامحها هاديه..

شرايكم بالعايله اليديده..؟؟
أتمنى إنها عيبتكم..^^

بنوتة إماراتية ©؛°¨غرامي مشارك¨°؛©

Part3

ساعه 2.30 ف المدرسه..

دق الجرس و حان موعد الرحيل إلى المنزل> هه عاشت الفصحه..

فواغي+موزان+علايه+سلامه يتريون سياييرهم عسب يردون..

موزان:فواغي عنبوا خسنا من الحر أخوج وينه.؟؟>ترى موزان ترد ويا فواغي لأن بيوتهم حذال بعض..

فواغي: ممدري والله..!!

علايه+سلامه يتهم ناني عسب تردهم..

علايه: و أخير[ن] يت يلا بنات سيااب..

فواغي+موزان: مي تو..

علايه+سلامه ركبوا السياره بعد ما علايه احتشرت ع ناني ليش متأخره و هي راكبه جافت واحد و ف خاطرها:يالله محلاه والله و لا بعد لابس نظاره شمسيه و سفرته حمدانيه لا بالله رقدت اليوم..

فواغي جافت سارة سعود راحت ركبت يداام و موزان وراها..

فواغي: اسمني انصهرت جاان ما ييت بعد>,<..

سعود: والله الود ودي و الهوى ضدي..

موزان اتنرفزت: نعم نعم شقصدك يوم عرفت اني اليوم بتغدى ف بيتكم ما تبغي تي..

سعود: الحمد لله اللبيب بالإشارة يفهم..

موزان: جب جب أقول أوقف هني أنا بنزل..

سعود وقف ع اليم موزان ف خاطرها: هذا من صدقه وقف أوففففف محد يقوله شي..

سعود: يلا نزلي..

موزان: أأأنااااااا.؟؟؟؟؟؟؟؟؟؟؟؟!!

سعود: لا عيل أنا هي أنتي..

فواغي فداخلها ميته من الضحك بس ما تضحك عسب لا تحرج موزان..

موزان: اقولك يالله امش و لا بخبر خالو عنك..
سعود: و الله ماعرفنا لج توج تحتشرين و تقولين أوقف أنا بنزل و الحين تقولين بخبر خالو عنك [ و بنبره أونه عااد معصب ] يلا نزلي أجوف..

موزان خلاص ما رامت صاحت: جب هىئ ما توقعتها منك هىىىىئ أنا حسبت أختك وتسوي فيني جذيه هىىىىىىىىىىىئ >و تشاهق و دموعها 4×4 و الله تقطع القلب من الخاطر..

سعود: اييه موزو و الله يالس أستهبل ويااج ما عرفت انج بتاخذين ف خاطرج ع طوول والله إن معزتج من معزة فواغي إنتي حسبة أختي اللي أخاف عليها..

موزان من بين دموعها: أولـ[ن] لا تقولي موزو ثانيـ[ن] أنا أدرري إني حسبت أختك جنك قلت شي يدييد..

فواغي خلاص وصلت حدها ما رامت تستحمل:ههههههههههههههههههآاآاي..

موزان+سعود أكبر علامة استفهام ع روسهم..

سعود: انتي ايه شفيج.؟؟!

موزان: اللهم سكنهم ف مساكنهم..

سعود: و احفظهم ف مزارعهم..

فواغي: هههههههههههأإأإأإأإي..

موزان: أختك شكلها استخفت..

سعود: شكلها..

فواغي: ههههه و الل ههههههه و الله إنكم تح هههههههه تحفه..

سعود+موزان: ههههههههههههههههههههه..

فواغي جافتهم و هيه مستغربه: بلاكم.؟؟!

موزان: رقدتوا ويدي..

فواغي: لا حول و لا قوة إلا بالله..

سعود: صج مينونه بشغل لي شي أسمعه..

و شغل:,

**


شعلومه وينه الحلو من يومه
متعبني ليه حارمني نومت
عيني وهو بسابع نومه
مشتاك اله ومو داري
مشتعله من الحب ناري سهران
انا مخليني حاير واعد نجومه

**

ملهوفه روحي عليه مااعوفه
اليوم ماابد وعيوني وده
تشوفه من عنده ليه محرومه
مايصحه من احلامه وانا احترك
كدامه ليلي ابد مانامه زادت عليه هومه

**

يفهمني ياريته بس يحضني محتاج
اله بس ردته يسال عني ماعاتبه ولا لومه
لو يعرف الحب كلبه ماكان يترك حبه
هذا الذي عشك ذنبه تنطر دموع غيومه


نخليهم شوي يسمعون ع راحتهم بدون تدخل..

ــــــــــــــــــــــــــــــــــــــــــــــــــ

ف بيت خليفه ال......

وقت الغدى الكل متيمع..^^

بو منصور: ها حبايبي شو سويتوا ف المدرسه تعرفتوا ع بنات يدد..؟؟

سيف: هي و الله المدرسه رووووووووعه و تعرفت ع شباب اسمنهم سوالف يا عيني عليهم..

منصور ضربه ع راسه: قالوا بنات مب شباب من وين تسمع.؟؟

علايه: يا إخواني خلوني أعبر ممكن و لا..؟؟

منصور: و لا يهمج يا أختي عبري ..و حط ايده ع حلجها مثل المايك فاهمين قصدي صح..

علايه: احم احم..

سيف: يا عمي خلصينا..

علايه: أولـ[ن] أنا مب عمك..

سيف: انزين خلصينا..

علايه: اوك خلاص احم في الحقيقه كان يومـ[ن] رائعـ[ن] و ممتعـ[ن] للغايه حيث تعرفت على بنات يديدات و سولفت معهم و أحببتهم وأإأإأإأإيد..

منصور: لا بالله اللغه العربه ف خطر..و ضرب كفوفه ف بعض..

علايه: لا جد باباتي ف وحده تعرفت عليها و جيه و سولفت وياها هيه و بنت خالتها ممدري
عمها تدري طلعت بنت منو.؟؟ طلعت بنت سيف ال......

بو منصور: لا مشا الله هذيلا ناس و النعم فيهم و أبوها رفيج عزيز و لو لا الله ثم هو جاان الشركه راحت فيها..

منصور: أبويه قصدها بو رفيجي سعود صح.؟؟

بو منصور: هييه نعم..

منصور: لا مشالله سعود ريال و النعم ما يعيبه شي..

علايه: انزين خلاص خلونا نتغدى من متى داقينها سوالف..
نخليهم يتغدون ع راحتهم شوي..
ــــــــــــــــــــــــــــــــــــــــــــــــــ ـــــــــ

ف بيت سيف ال........

دخلوا الثلاثي البيت و سلمت موزان ع خالتها و يلسوا يتغدون الكل كان موجود يتغدى ما عدا أم سعود و بو سعود و زيودي..

سعود: مريووم انتي أبد ما تبينين انتي و الطوفه شي واحد ف هالبيت..

مريوم بنبره تستفز الواحد: شو جايفني شفافه مثلـ[ن] و رفعت حياتها ..

رشود: ها ها ها نكت القرد عطوه موز..

موزان: ههههههههههه..

مريوم بقهر: ما أتوقع قال شي يضحك..

سعود: بس عاد يلا تغدوا أجوف..

فواغي تساسره: أونك عاد تحسسني إنك تخوف..

سعود ع نفس النبره: انجبي أقول بتغدى خلاص..

عقب فترة هدوء..

سعود: الحين عااد برقد تعباان حدي..

فواغي: سلامات من شو تعبان.؟؟

سعود: تعبان من الجامعه.. و بعدين حد يجابل هالويوه..و يأشر ع فواغي و موزان.. و ما يتعب..

موزان: واكككككككككك لقطوا يلا لقطوا..

سعود بغى يقفط مريوم: قصدي من الجمال آه من جمالهم ..و بنبره أونه عاد رايح فيها..ذبااح..

موزان: وااااكككككككككك أقول يلا لقطي قالت شو قالت أونه لقطوا ويييييييو..

مريوم اتنرفزت و راحت فوق و سمعت يدتها ترمس روحها و تقول........................................


يا ترى شو تقول.؟؟
و ممكن يكون شي سر اليده مخبيتنه عن عيالها.؟؟
و مريوم بتعرف شنو هو السر.؟؟؟
و علايه جافت من.؟؟
أتريا ردودكم دخيلكم لا تحرموني عنها..^^

بنوتة إماراتية ©؛°¨غرامي مشارك¨°؛©

Part4
مريوم اتنرفزت و راحت فوق و سمعت يدتها ترمس روحها و تقول

اليده مجابله صورة اليد: يالله يا راشد طول هالسنين شايله الحمل روحي هييهاأ الله

المستعان بس إذا دروا إنه عندهم ... الله يعيني..

مريوم و لا جنها سمعت شي عادي عنده take it easy و دشت غرفتها عسب ترمس حبيب

القلب و اليده مب حاسه إنه كان معاها شخص ثاني بس غير مريوم كان ف شخص ثالث

موجود ف الصاله عاد هالشخص محد حس فيه موليه..

ف غرفة مريوم ترمس ال......

مريوم: ألو..

....:وا فوديت هالألو يا عالم رحموني..

مريوم يقال إنها مستحيه: سلوووووووووووم..

سالم: عيون سلووم و طوايفه كلهم إننتي..

مريوم: اممممم..

سالم: قولي حبيبي لا تستحين..

Stooooooooooop

خلوني أعرفكم بسالم..

سالم: عمره 23 هو حليو بشرته حلوه اليي يجوفه يعطيه 17 أو 16 سنه ما جنه يشتغل و هيه هو يشتغل ف شركة أبووه غني واايد بس شفايدة هالغنى بدون أخلاق لعاب درجه فضييييييعه و مدمر وااايد بناات..

Back..

مريوم: أحبك يا غلاي انته>و سكرت الفون أنها ما تبغي تعرف ردت فعله> ههه اسمنها تضحك..

سالم: هههههههههههه والله إنكم مصخرره..

أم سعود: موزان فواغي أنا رايحه عند خالتكم وديمه بتيون..

موزان: هيه بنيي بنتخبر عن شجون..

أم سعود: هه ok

موزان: أوب أوب خالتي تطورتي..

أم سعود: انتي محد يعطيج ويه و روحوا بيت خالتهم وديمه..

ــــــــــــــــــــــــــــــــــــــــــــــــــ ــ

ف بيت وديمه و تحديدـ[ن]..

شجون: امااااايه..

وديمه: هلا أمي شو بغيتي..؟؟

شجون بغبنه: اشتقت لأبوي..

وديمه حالها ما هوب أحسن من بنتها: يا أمي كل شي قدر و نصيب هذا اللي ربج كاتبه و لا رد لقضاء ربج..

شجون: أدرري بس غصبـ[ن] عني..

وديمه: يلا أنا بخليج بسير أجابل الشغالات..

و دق الجرس و سمعت شجون صوت مب غرييب علييها..

Stooooooop

خلوني أعرفكم ع عايلة شجون..


الأب: اسمه عبد الله توفى قبل سنتين ف حادث سياره و هو أخو بو سعود..

اللأم: اسمها وديمه عمرها 42 تحب عيالها وايد عوضتهم عن الابو اللي فقدوه و هي أخت أم
سعود..

مايد: عمره 21 سنه ثالث سنه ف الجامعه تخصصه هندسة ديكور هو ذوقه طررررررطررررريشن و ستايله روعه و فوق هذا حلييو و أحلى شي فيه خشمه..

شجون: عمرها 16 سنه صف 10 حلوه بمعنى الكلمه تاخذ من ملامح أبوها شوي و لا باقي الملامح تشبه خالتها آمنه> أم موزان.. و رقتها و دلعها طبيعي و الكل يتحسب إنها مغروره بس هي مب جذي..

طلال: عمره 15 سنه صف 9 هذا إنسان ف عالم ثاني ترمس عن سالفه و يجاوب لك بشي ثاني بس و الله عجيب و حليو ياخذ من ملامح أمه شوي و من ملامح ماايد..

ــــــــــــــــــــــــــــــــــــــــــــــــــ


و دق الجرس و سمعت شجون صوت مب غرييب علييها و لبست وقايتها و تغطت..

......: هلا و الله ببنت العم..

شجون: أهلين أوب أوب حمود و عبود عندنا له له له الشمس اليوم من وين ظاهره.؟؟!

عبود: من الشرق بعد من وين..؟؟..و يرفع حياته بحركة مغايظه..

حمود: يمكن بعد شمسهم متطور..

عبود: كفك كفك يا خوي..

و يضربون بييد بعض..

شجون: استغفر الله صج غن دمكم ثجيل..>,<

حمود: هي والله إن دمنا ثجيل و أنا أقول ليش أنا بطيئ يوم أمشي أثاريه دمي هو السبب

مشكوره بنت عمي ع المعلومه..

عبود: هييييييه الحييييين فهمت ليش..

شجون: الحمد لله ع نعمة العقل..

عبود+حمود: الحمد لله..

عبود: إلا صج ميود وينه.؟؟

شجون: أظن راح المول و يا ربعه..

حمود: حسستينا عاد ربعه تراهم ربعنا..

شجون: انزين انا شدراني..!!

عبود: اسكت عنها لا تبجي الحين....جوفها جوفها بجت........لا لا يا بنت عمي ما عاش من يبجيج..

شجون: منو قص عليك و قالك إني يالسه أبجي أنا شجون بنت عبد الله ال...... انتوا تبجوني..

عبود+حمود: ع راسنا و الله بنت عبد الله..

سمعوا الجرس يدق..

حمود: لا شكله اليوم بيت عمي الكل معزوم..

شجون: هه اللي ييه بيتنا حياه الله ع راسنا و الله..

وحدروا........

Stoooooooooop

خلوني أعرفكم عن عبود و حمود[بيت عمهم]

بو صقر: عبد الرحمن طيب و مقصه و ع نياته و رايته بيضه و عمره 44 يحب عياله واايد و أكثر شي حمدوه لأنها ما حصلت حنان كافي من أمها لأن عمرها كان 4 سنين يوم أمها توفت..

أم صقر: اسمها صوغه توفت من 15 سنه و السبب كان ورم ف الدم> اللهم عافنا منه..

صقر: عمره 24 سنه يشتغل ف قطاع من القطاعات الحكوميه يشبه عمه سيف شوي و ياخذ من امه بعد شوي هو حليو وايد و جسمه رياضي بس مب واايد بس عيبه الوحيد عصبي لدرجه فضييييييعه> الله يعين مرته عليه..

أسمه: مرت عبد الله عمرها 22 حلوه و جمييله جميله حساسه واايد و رقيقه و أي شي ينطلب
منها تسوي ما تعرف تقول لا و هي من معارف اليده> أم بو صقر يدة فواغي و موزان...إلخ و هي حامل بشهرها الثاني و متحمله صقر الله أعلم إذا يستمرون ع هالحال..

عااااد عقب حمود+عبود: أعمارهم 21 سنه يدرسون هندسة ديكور و يا ميود هذيلا توأم عسل ع القلب محد ياخذ بخاطره من هالشخصين ملامحهم شيوخيه شوي العيون كبيره و الحيات محدده و الشعر أسود ليلي و شوي شوي طويل و يتشابهون وايد بس الفرق حمود عنده حبة خال خفيفه ع خده اليسار بس طالعه عليه روعه و هم ويا ماايد واايد و يعتبرون شجون أختهم الثانيه..

و آخر وحده حمدوه: هذي اللي يجوفها يقول هاديه و رقيقه بس هي تناقض تااااام>مو من شي عايشه بين شباب.. هي عمرها 19 سنه اول سنه ف الجامعه تدرس طب الاطفال لانها تحب اليهال بشكل فضييييع..

ـــــــــــــــــــــــــــــــــــــــــــــــ

Back..

حدروا: فواغي..أم سعود..زيودي..موزان..نجود>من عرفت انه موزان بتروح اتلبست عسب تروح..

سلموا ع شجون و حمود و عبود>طبعـ[ن] بس رمسه..

فواغي: عيل ما يبتوا حمدوه وياكم..؟!

موزان: هيه غريبه هذي ما تصدق تطلع من البيت..!!

عبود: لا بس عسب عندها جمن شغله و طلعت و يا صقر و مرته..

موزان+فواغي: آها..

و يجوفون بعض و يتراكضون ف الصاله و يضربون ايدهم بالطاوله ويلسوا يتراكضون يدورون ع
شي..

الكل يطلعهم مستغربين هذيله ميانين..!!

فواغي+موزان: هههههههههههههههههه..

حمود: شو السالفه.؟؟!

فواغي: الله يسلمك و يعافيك هذي خرافه تقول إنه أي شخصين قالوا نفس الكلمه فأول واحد يضرب خشب يتزوج قبل هههههه..

موزان: و اللي يضرب الحديده أونه ريلها أحلى..

الكل: ههههههههههههههههههههههههههههههههههههه..

نجود: أخخخخ عليكم مستلغثين ع العرس

شجون: صج إنكم فشله..

أم سعود: خلاااص انا تبريت منكم..

فواغي: نحن ما ناخذها صدق يعني العلم عند ربي بس جي استهبال نغير الموووود شوووي..

أم سعود: إلا شجون أمج وينها.؟؟!

أم مايد توها يت: السلام عليكم..

اليميع: و عليكم السلام و الرحمه..

موزان: لو طرينا مليون جاان أحسن..

حمود+عبود: هي والله..

جاااان يدش مايد: مرحبا مرحبا هلا بخالتي..وحبها ع راسها..

أم سعود: مرحبتين ولدييه شحالك..؟؟

مايد: تمام..

و سلم ع فواغي و موزان> بس رمسه..

و سار صوب حمود و عبود: أنا أقول ليش بيتنا مظلم أثاريكم انتوا يايين..

حمود: أقول إنت جايف ليتات بيتكم كيف محترقه..

عبود: بس من جافوني أنا و أخي العزيز قاموا يتراقصون و يقولون لا ايش الجمال دهه حنمووت الليله..

مايد: يااا حرااااام..

الكل: ههههههههههههههههههههههههههههههههههههههههههه..

نخلييهم ياخذون راحتهم شوي..

ــــــــــــــــــــــــــــــــــــــــــــــــــ ــــــــــــــــــ

.....:هلا بقلبي أنا تولهت عيج يا حياتي..

.....: حتى أنا..

.....: مريوومه..؟؟

مريوم: هلا قلببي..

سالم: أبغي أجوفج..

مريوم: ما أقدر..

سالم أونه يقال بأنه زعلان: يعني لمتى من 4 شهور و أقولج أبي أجوفج تقولين ممقدر و أهلي و ممدري شو الحين اكتشفت إنه مالي معزه ف قلبج..

مريوم: يا حياتي و الله إنته تدرري هلييه معقدين و متخلفيين مستحييل يخلوني أظهر من البييت روحي..

سالم بنبرة خبث: انزين انتي ما قلتي إنه أختج تدري قوليلها و جذييييه تعاااالي..

مريوم: أختيي لو دررت بنواياي بتسويها سالفه إلا للوويه عوده أونها عاد الفتاه المثاليه..

سالم ف خاطره[ ع الأقل أحسن عنج ياللوث]:اممممممم عندي فكره........................

بنوتة إماراتية ©؛°¨غرامي مشارك¨°؛©

Part 5..


مريوم: أختيي لو دررت بنواياي بتسويها سالفه إلا للوويه عوده أونها عاد الفتاه المثاليه..

سالم ف خاطره[ ع الأقل أحسن عنج ياللوث]:اممممممم عندي فكره........................


سالم: الله يسلمج مو إنتي تقولين يوم اليمعه تروحون المزرعه جي العصر و تردون اليوم الثاني..؟؟

مريوم: هيه..

سالم: انزين قوليلهم إنج بتسيـ

و لا بدشة سعود الحجره..

سعود بعصبيه: إنتي 24 ساعه ع هالتلفون تبربريين جنج سيلانيه أختج و أمج يطلعون يجوفون

الناس و انتي هني آنسه مريم شو حجتج اليوم مرييضه و لا تعبانه و لا شو..؟؟

مريوم: ان..انزين..أ..أ..نا ..ك..كنت ..عن.د.منا.. ياخي عندي بروجكت و يالسه أتناقش ويا ربيعتي حرام يعني..

سعود: لا مشا الله مسوينها مصطفى من أول يوم تذاكرين..

مريوم: انزين ابي أفتك ما بي يتراكم علي..

سعود: انزين باجر كملي مناقشتج الحيين سكري الفوون..

مريوم: سلامه حبيبتي أرمسج عقب بسكر الحين... يلا بااي.. هيه أكييد..

سعود طالعها بنظره و ظهر..

ــــــــــــــــــــــــــــــــــــــــــــــــــ ـــ

مر اليوم ع خير و كل واحد ف بيته و حديد[ن] فحجرته ع الشبريه و المكيف باااااااارد و الليت خفييف>والله ياني رقااد..

إلا وحده يالسه تفكر باللي جاافته اليووم تفكر بشخص مجهول احتاارت إذا حبته من أول نظره و لا إعجاب بشخصيه أكييد عرفتوا منو..

علايه: الله و الله محلاته خشمه جسمه هو بكبره حلييو شخصيته حسيته جي يعني رززه لا لا مستحيل أكيد إعجاب أووووووووووووووف خلني أرقد أحسن من التفكيير فييييه يمكن أحلم فييه و رقدت>نومة العوافي..^^

ــــــــــــــــــــــــــــــــــــــــــــــــــ ــــــــ

مر الأسبوع ع خير

منهم ضحك..

منهم بجى..
منهم فكر..

هذي هي الدنيا..

ــــــــــــــــــــــــــــــــــــــــــــــــــ ــــــ

يوم اليمعه طبعـ[ن] الكل يتيمع ف بيت بو سعود عسب اليده موجوده..

[عايلة بوحمدان,بوصقر,بو مايد]

اليده: أقولكم بنياات سيروا المطبخ جابلوا الغدى..

حمدوه: هييهاأ يدو هذاك أول الحين شي خدم يكفون و يوفون..

اليده: بنات آخر زمن..

موزان: ييدات آخر زمن تصدقين يدو أحسج ساعات فيج شوي شوي من التخلف الحضاري..

اليده بعصبيه: يا الهرمه إنتي أنا متخلفه صج ما انتي لسانج متبري منج..

موزان: مو أنا سميتج طالعه عليج يعني حتى انتي لسانج متبري منج..

اليده: هدوني عليها لا أمرغها الحين بالعصاه..

فواغي: انزين يدو محد ميودنج..

اليده: أخخخخخخ عليكم من بنات و ينا زماان أوول لقالوا كلمه قلنا حاضر و ع أمركم و لهزبونا أبد عيونا بالقاع مب أنتوا..

دخل راشد و طلال..

اليده: هلا بشيخهم هلا بالغالي..

راشد راح حبها ع راسها و عقبه طلال..

اليده: ها راشد مرتاح و شو مسوي حد مضايجنك..؟؟

راشد: لا يدو الحمدلله ما شكي من شي..

طلال: و أنا شو البطه السوده ما تتخبرين عني..؟؟

اليده: هلا طلال شخبارك..؟؟

طلال: الحمد لله انج عرفتي اني موجود و الله أنا تمام..

اليده: ها راشد شو مسوي ف المدرسه..؟؟

شجون: يدوه أنا امووت و اعررف إنتي ليش تفضليين راشد علينا..؟!

موزان: بلاج ما عرفتي ترااه سمي حبيب القلب أكييد معزته غيير..

اليميع:هههههههههههههههههههههههههه..

اليده: يا مسودة الويه..

و طلعوا راشد و طلال..

و لا بدشة الحريم >الامهات..

و قلبوها سوالف و حش>لزوم حريم ما ينلامون..
نخليهم يسولفون ع راحتهم..

ــــــــــــــــــــــــــــــــــــــــــــــــــ ـــــــــــ

نروح لوحده ف عالم ثاني>مصدقه حالها الأخت..

سالم: حبيبي عااد متى بجوفج خلاااص ما يخصني اليوم لاازم اجوفج..

مريوم: ما أقدر والله لو يوم ثاني أهون اليوم الكل بيروح المزرعه..


سالم: اوك انا بقولج شو تسويت..

مريوم: اسمعك..

سالم: جوفي .................................................. .................................................. .................................................. .................................................. ............................

الله يعين من هالخطط..

ــــــــــــــــــــــــــــــــــــــــــــــــــ ــــــــــــ

دش بو سيف الصاله: يلا بنات بنروح..

طبعـ[ن] خلاجينهم ف المزرعه عسب لا يتعبون أعمارهم..

روحوا الكل صوب السيايير..

أم سعود: راشد أختك وينها..؟؟

راشد يأشر ع فواغي: هذي موجوده..

أم سعود: أختك الثانيه..

راشد ياشر بجتوفه:ممدري..!!

أم سعود: سير جوفها..

راشد: ان شا الله..

ـــــــــــــــــــــــــــــــــــــــ

راشد اتصل ف مريوم يسألها>هيازه ف الكل ف هالجيل..هه

مريوم: هلا راشششد بغييت شييي..؟؟

راشد: هيه امي تتخبر عنج ليش بعدج مب نازله.؟؟!

مريوم: لا بس أنا عندي بروجكت و لازم الأحد أسلمه ف عسب جذذذي..

راشد: آهاا يلاا أووك بااي..

مريوم: بااايااات..

ــــــــــــــــــــــــــــــــــــــــــــــــــ ـ

راشد:أماايه..

أم سعود: هلا راشد..

راشد: مريوم عندها بروجكت لاازم تسلمه يووم الأحد ما بتقدر تيي..

أم سعود: شهالخربطان بروجكت و ين الجامعه ع أيامنا لا بروجكت و لاشياته..

راشد: هههه أميه أيامكم تبخرت من زماان..

ــــــــــــــــــــــــــــــــــــــــــــــــــ ــــ

سالم و بنبره خبث: و أخير[ن] بجوفج..

مريوم يقال عنها إنها مستحيه: هه تصدق حتى أنا بس أجوف هالصور و جي ع الطبيعة أكيييد شي ثاني..

سالم بخاطره[ ما في حيا و هه هالأشكال فيها حيا ]: أكييدين بعد بس أنا الله يعلم بحالي شو راح يصير به إذا الصور جذيه عيل يدامي صج شو بسوي..؟؟

مريوم:.......................

سالم:ههههههههه..

ــــــــــــــــــــــــــــــــــــــــــــــــــ

ف بيت خليفه ال.......

علايه: أوووف ملل..

سيف: إلا أم الملل..

منصور: زهقان تعبان سهران ولهان..>ع فكره منصور صوته واايد حلو..

علايه+سيف: الليله كله عشان الحلو..

سيف: تصدق من قلت تعبان أحس عمري من الملل أنا تعبان..

علايه+منصور: أنا ولهان زدت القلب عله فوق عله..

سيف: خيبه الحين كل كلمه صارت أغنيه..

منصور: حسيت..

علايه: أوفففففف ملللل..

منصور: سلامه تصدقين لو أقولج شي ما تزعليين..

سلامه ابتسمت: قول عادي..

منصور: لو سنه ما جوفج ما حس بشي متغير يعني وجودج و العدم واااحد..

علايه+سيف يطالعون بعض يعني بخصوص الكلام اللي قاله ترررى وااايد يجرح..

سلامه حزت ف حاطرها واايد بس ما حبت تبين: هذا طبعي..

منصور: الله يهديج..

ــــــــــــــــــــــــــــــــــــــــــــــ

طبعـ[ن] العوايل وصلو المزرعه بالسللامه..

المزرعه وايد عوده هي عباره عن 4 فلل يم بعض و فيه فله عوده ف النص لليمعه هم عاد 24
ساعه فهالفله بس ال4 فلل للنووم..

الفله الأولى: بو حمدان..

الفله الثانيه: بو سعود..

الفله الثالثه: عيال بو مايد..

الفله الرابعه: بو صقر..

وشي مسبببببببح عووووود بس الأشجار مغطيه علييه محد يجوف اللي يسبح و يدام المدخل شي نافورة الدرجات و شي النافوره العاديه و محاطه ب 5 أشجار ع شكل نعامه يعني بالمختصر رووعه و بعد مخليين مكاان للهوش و البوش عسب اليده تتونس..
نزلوا الكل من السيايير..

فواغي: يالله اشتقت للمزرعه..

موزان: حسستيني مو جنه الأسبوع الفايت كنا موجودين..

نجود: يا عمي خليها تعبر شوي..

حمدوه: ما أظن هي عمج لو عمتج قلنا يعني شووي أهوون..

شجون: عادي ياهل لا تحسبون برمستها..

نجود: أنا ياهل يا العيوز..

سعود: صج بنات لا اجتمعوا محد ييودهم..

حمود: عادي سيلانيات شو تتريون منهم..؟؟

عبود: أتريا منهم ينظفون و يكوون و يغسلوون..

ماايد: هذا من ساابع المستحيلات هالأشكال تسوي جي..؟!

حمدان: بس جوفوهم حلاتهم و الله..

الكل طالعه بنظرات حتى الشرار يطلع من عيونهم و لو النظرات ذبااحه جاان هو من زمان الله أعللم ف اي قبررر..

حمدان: أعوذ بالله يا كلمه ردي مكانج ما قلت شي .. و دق فونه .. احم أنا بسير بكلم بعض الناس..

عبود: منو هم..؟؟

مايد: حمدان لا ييكون حبيت وحده من هالمرغدات..

حمدان: و لو حبيت إنت شو يخصك..؟؟

سعود: صج لا قالوا العيب ما يظهر إلا من هل العيب..

حمدان: شو قصدك..؟؟

حمود: ع قولة إخوانا المصريين اللي ع راسوه بطحه بيتحسسها..

حمدان ما سوى لهم سالفه وراح..

ــــــــــــــــــــــــــــــــــــــــــــــــــ ـــــــــــــــــــــــــــــ


يا ترى شو بيصير ف المزرعه..؟؟

و السر بينكشف هناك..؟؟

و مريوم شو نهايتها..؟؟

ف حد بيساعدها و لا بتروح فيها..؟؟

راح تعرفون كل هذا ف البارت الياي إن شالله..^^

وردة الزيزفون
✿ إدارة الإقسام ✿

صباح الخير ..........ياهلا فيك بنوتة بغرام ..........بداية جميلة موفقة بنقلك ان شاء الله

القوانين / الإطلاع هام و الإلتزام ضروري

روح قلبي.. ©؛°¨غرامي متألق ¨°؛©

رووووووووووووووووووووووووووووووووووووووووووووووووو وووووووووووووووووووووووووووووووووووووووووووووووووو وووووووووووووووووووووووووووووووووووووووووووووووووو وووووووووووووووووووووووووووووووووووووووووووووووووو وووووووووووووووووووووووووووووووووووووووووووعه

روح قلبي.. ©؛°¨غرامي متألق ¨°؛©

راح انزل بدال بنوته اماراتيه و و أنقل البارتات لكم..

روح قلبي.. ©؛°¨غرامي متألق ¨°؛©

part6

سالم: يلا حبي أتريااج بررع

مريوم: ان انزين ياايه..

سالم سكر عنها: هههه بتزيد الشلله..

مريوم طلعت و ركبت السياره وسالم حررك..

مريوم: يمه يمه يمه ميته خوف..

سالم ف خاطره ..ههه بعد ما ييتي..: أفاأ و هذ و أنا ويااج و تخافين.. و بنظرات أونه عااد زعلان..

مريوم مسكت ايده: لا فديتك مب قصدي جي .. و تلتفت.. إنت ويين ساير..؟؟

سالم: ساير الموول..

مريوم: لا اليووم الموول ممقدر..

سالم: انزين لييش..؟؟

مريوم: لأن اليوم اليمعه و زحمه مالي خلق حد يجوفني..

سالم: انزين أنا عندي سويت ف فندق.............. شرايج نسيير..

مريوم: ها لا لا لا مابي..

سالم: تخاين مني..؟!

مريوم: لا ما أخااف بس بععد يعني الحين هذي أول طلعه عقب يصيير خيير ف الطلعات اليايه..

سالم ف خاطره..بعد اليايات..: انزيين شرايج نسير مطعم ....؟؟
مريوم: اوك بس ما نتأخر لأن هلي لو درا بيسوون مصييبه..

سالم: اوك من عيوني..و حط ايد ع ايدها و ابتسم..

ــــــــــــــــــــــــــــــــــــــــــ

في المزرعه الشباب يالسين بررع و البقييه يالسين ف الفله العوده الحريم و الشياب و اليده
بصوب و البنات بصوب..

موزان: تدرون شو بخاطري..؟؟

نجود: شو..؟؟

موزان: بخاطري أقص شعور الشباب و أحطي كل حرتي عليهم..

نجود: تصدقين أنا بخاطري: أسوي شي أكششن اممم مثلـ[ن] ممم ممدري..

موزان: يا حبج للتقلييد..

نجود: من حلاتج عسب أقلدج..

فواغي: هههه جوفوني الحيين شو بسوي..

الكل يطالعها شو بتسوي..

راحت فواغي و يلست يم أابووها و تهزه بشويش و بصوت خفيف: أبوويه..

بو سعود ع نفس النبره: هلا فديتج شو بغيتي..؟؟

فواغي: اممم..

بو سعود: عادي فديتج قولي أنا أبوج..

فواغي: آآ إنت تعرف خلييفه ال......

بو سعود: هييه نعم هذا رفيج و أخو عزييز بس ليش تتخبريين عننه..؟!

فواغي: انزيين شرايك تعزمه هو و مرته و عياله ييون عندنا تراني ملييت أبي علايه تيي هه تربشنا شوي و بعدين يعني زيين نتعرف علييهم..

بو سعود: غالي و طلب رخيص..

فواغي ابتسمت و حبته ع راسه: تسلم لي يا بو فواغي عسى عمرك طوييل..

بو سعود ابتسم و بصووت عالي شوي: أقووول..

الكل صد صوبه..

بو سعود: أنا رااح أعزم بو منصور المزرعه و بخليهم ف فلتي و أنا و عيالي بني عندكم يا بو
حمدان منها العيال يتونسون و نحن نستانس معاهم..


بو حمدان: حياك بو سعود و زين ما تسوي..

بو صقر: و نعم الشوور..> ع فكره ترى الكل يعرف بو منصور..

سارت فواغي و يلست يم البنات..

شجون: منو بو منصور..؟؟

فواغي: بو علايه ربيعتي..

حمدوه: علايه..؟؟

فواغي: هييه..

موزان: اسمنج داهيه..

فواغي: أعيبج.. و غمزت لها..

ــــــــــــــــــــــــــــــــــــــــــــــــــ ــــــــــــ

ف بيت خليفه ال.....

علايه: مللللللللللللللل ملللللللل ملـ

قاطعها: سيف: انزين نعرف إنه ملل والله بس ممكن تكرمينا بسكوتج..

بو منصور: ترى قلنا لكم سيروا الموول سيروا الحدايق بس انتوا مب راضيين..

علايه: ملينا من الموول..

سيف: و من الحدايق..

منصور: و من البنات اللي نجوفهم هناك..

أم منصور: لا يكون ترابع هالبنات..

منصور: ها لا أمايه الله يهديج أنا منصور خليفه ال...... أرابع هالبنات..

علاايه: هئ مبين..

منصور: انتي انجبي..

أم منصور: هيه أتحسب بعد تراك حتى انته عندك خوات..

منصور يأشر ع سلامه و علايه: لو بس فكروا إنهم يسوونها و الله لذبحهم و أقطعهم قطعه قطعه..

علايه: ليش نحن قلنا بنسير نغازل بنرمس أونه..تقلد صوته.. بقعهم قطعه قطعه..

منصور: خيبه خيبه خيبه انزين أنا قلت لوو صج انج بقررررره..

رن فون بو منصور: خلاص سكتوا شوي..

الكل سكت..

......: هلا بو منصور..

بو منصور: هلا بو عبيد..

بو عبيد: شخبارك..؟؟

بو منصور: يسرك الحال و من صوبك..

بو عبيد: مدييم الحال و الله نحن ما نشكي باس..

بو منصور: غرييبه انته متصل مو من عوايدك..

بو عبيد: ما شي بس أتخبر عنك..

بو منصوور: ههه..

بو عبيد: يلا عيل فداعة الله..

بو منصور: فداعة الرحمن..

و رن الفوون مره ثانيه..

سيف: شكلنا اليوم مب ناويين نخلص..

.......: مرحبا بو منصور..

بو منصور: مرحبتين و لا بسدن..

.......: شخبارك..

بو منصور: يسرك حالي و من صوبك..

......: عسى دووم يا ربي و الله أنا الحمد لله بخبير ..

بو منصور: الحمدلله..

......: إلأا طلبتك..

.......: آمر بو سعود ما يرك إلا لسانك..

بو سعود: شرفنا إنت و عيالك عدنا ف المزرعه..

بو منصور: لا ما يصيير و الله..

بو سعود: إذا ما ييت ترى راح أزعل..

بو منصور: ممدري بجوف الحرمه و العيال..

بو سعود: لا لازم تي و و الله إذا ما ييت راح أزعل عنك و بتبات عندنا الليله..

بو منصور: و اللله فشلتني يا بو سعود..

بو سعود: لا فشله و لا شياته نحن حسبة أهل و بعدين أمي تبي تجوفك..

بو منصور: خلاص إن شالله ساعه و نص بإذن الله نكون موجودين عندكم..

بو سعود: يالله عيل أخليك..

بو منصور: فداعة الله..

بو سعود: فداعة الرحمن..

سكر بو منصور..

بو منصور: أقوول عيال اليوم بنروح المزرعه..

علايه: مزرعتنا..؟؟

بو منصور: لا مزرعة ربيعي سيف ال....عازمنا هناك..

علايه: الله بسير عند فواغي و موزان سلامي يلا قومي نجهز أغراضنا..

و راحوا..

منصور: أبويه أنا ما بي..

بو منصور: شعنه ماتي..

منصور: أنا بس أعرف سعود معررف حد ثاني..

بو منصور: لا لازم تيي فشله الريال عازمنا و انته ماتي و بعدين تعرف عليهم هناك..

ــــــــــــــــــــــــــــــــــــــــــــــــــ ــ

بو سعود: ها قلنا لهم بعد شو تبين..؟؟

فواغي راحت حبته ع راسه: أبد غير سلامتك يا رووح قلبي..

بو سعود: و الله إنج إنتي و خوانج رووح قلبي..

فواغي غمزت له: و أمي..؟؟

بو سعود: لا هذي خليها ع صوب..

فواغي: ههههههههههههه علينا يا بو سعود..

ــــــــــــــــــــــــــــــــــــــــــــــــــ ـــــــــــ

صوب الشباب يالسين بررع ع الطاولات و الكراسي و يسولفون..

سعود: أقول شرايكم نروح المسبح..؟؟

عبود: يالله..

حمود بغى يشل الكندوره..

راشد: نعم الأخو وين تبغي..؟!

طلال: لا خله مشتط..

و لا برنة فوون مايد..

......: أهلين بو خليفه ها مب ناوي تيي صوبنا..

مايد: هلا و الله بو عسكور لا اليوم نحن صوب المزرعه ويا الأهل..

سعيد: إنت دومك ويا هلك تعال اليوم صوبنا..

مايد: لا لا ممقدر..

سعيد: انزين شوي و بعدين رد لهم..

مايد: اوك انتوا وينكم..؟؟

سعيد: نحن ف .......

مايد: خلاص الحين ياي..

سعيد: يالله مع السلامه..

مايد: بااي ..و صد صوب الشباب..أقول يالربع أنا ساير عقب بي..

سعود: انزين و انته ياي ييب فوني ويااك ناسينه أنا ف البيت..

مايد: أشتغل عندك..

سعود: غصبن عنك..

مايد: احلم اني ايبه..

سعود: أستهبل معاك..

مايد و هو رايح: يلا يلا يلا يلا..

و رح عنهم ووصل المكان و يلس و يا ربعه و فلها من الخاطر..

ــــــــــــــــــــــــــــــــــــــــــــــ

صوب مريوم و سالم..

نزلوا المطعم و راحوا يلسوا هناك..

مريوم بعدها متغشيه..

سالم: يعني مب ناويه تشيلين الغشوه..؟؟

مريوم: ليش ما خذت كبينه الكل بيطالعني هنيه..

سالم: محد يعرفج هنييه شيليها..

مريوم شلت الغشوه و سالم حط ايده ع ويها و قرب منها..

مريوم: سالم بعد..

سالم: وشو بتسويين..؟؟

مريوم بلعت ريجها..

سالم باسها ع خدها..

مريوم انصدمت: سالم..

سالم: نعم..

مريوم: كل شي له حد لا تتوقع إني طلعت معاك معناته عادي أسوي أي شي تراني متربيه..

سالم: ههههههههههه عيدي حبيبتي ما سمعتج انتي طلعتي معاي برضاج و طرشتي صورج لي برضاج و اللي ابييه بتسوينه ..وبنبره حاده.. فاهمه..

مريوم انصدمت: ما توقعتك بهالنذاله و هالحقاره يعني طول هالمده كنت تجذب علي..؟!

سالم: ههههههههههه وشو أبا ف وحده بايعه شرفها..؟؟

مريوم وقفت و عطته كف محترم..

ــــــــــــــــــــــــــ

سعيد: مايد مايد..

مايد: هلا..

سعيد: جوف الفيلم اللي هناك..

مايد صد و ياليته ما جاف اللي جافه و ف خاطره: معقوله لا أنا أتخيل مستحيل الإنسانه اللي ...

راح صوب ..... و عطاها كف قوي..

.... متشنجه من قوة الكف: م مايد..

مايد: هييه مايد و لا ما أعيبج يا مريم خانوم طبعـ[ن] أكييد ما بغيتيني أخرب لحظة االرومانسيه
اللي انتي عايشتنها .. و لف لسالم.. تف عليك و ع شكالك..

سالم: احترم نفسك..

مايد: انت اللي احترم نفسك قال احترم قال انت ويه احترام تلعب ع بنات الناس..

سالم: والله هي بنفسها يت لي و برضاها طلعت وياي و لا أزيدك من الشعر بيت و بششورها طرشت لي صورها يعني بالمختصر هي بروحها ضيعت شرفها و لوثته هي بكبرها لوث يعني باخذ منها اللي ابيه..

مايد صفع سالم و ضربه و سالم رد له الضربه و تموا يضاربون و سعيد و ربعه يحاولون يفججونهم..

مايد: تف عليك و ع مريلتك و احلم انك تحصل شي منها..وصد صوب مريوم وصارخ.. و انتي يلي ما تستحين يلا يدمي أجوف..

و طلعوا بررع المطعم و ماايد ركب السياره و مريوم ركبت ورى..

مايد: ركبي يدام يالله هييه مو من شي راني مب أنا اللي بغيتيه..

مريوم تشاهق من البجي و راحت ركبت يدام..

ــــــــــــــــــــــــــــــــــــــــــــــــــ ـــــــــــــــــــــــــــــــ

ف المزرعه صوب المسبح كل واحد يستعرض بحركاته و ساروا لبنات صوبهم و يصوتون أي واحد

سوى أحلى حركه..

1عبود سوى حركة الدولفين لفه وحده..

2 حمود سوى شرات حركة عبود بس لفتين..

عبود: لازم يعني تسوي أحسن عني..

حمود: احم شو اسوي أنا دووم أحسن عنك..

شجون: انزين خلاص يلا كملوا..

3 سعود سوى حركه وايد حلوه انه ينط و يغوص و ع طولل ينط>ممدري إذا فهمتوا..

4 طلال و راشد سووا حركه ثنائيه رووعه انه وحد يغوص و يطلع ينط و هو ينط الثاني يغوص و ينط فوقه..

سعود: ها بنات حركة منو أحلى شي..؟؟

البنات أونهم عاد يتشاورون..

حمود: ييلا عاد..

موزان: احم احم قررت لجنة التحكيم جعل المتنافسين طلال و راشد هم الفائزين..

عبود: ما يصير مصخره هي اليهال يفوزون علينا..

حمدوه: مشكلتكم..

فواغي : يلا طلعوا بسكم الحين ربيع أبويه بيي..


الشباب مستغربين: منو.؟؟!

فواغي: خليفه ال......

حمود: هيييييييييييه..

سعود: أكيد إنتي اللي قلتي له..؟؟

فواغي: احم أكييد..

و طلعوا الشباب من المسبح و البنات روحوا للفله..

ــــــــــــــــــــــــــــــــــــــــــــــــــ ـــــــــــــــ

بو منصور: هلا بو سعود نحن وصلنا..

بو سعود: يلا الحين بخبر الحارس يعلمكم..

بو منصور: أوك..

و سكروا عن بعض..

ــــــــــــــــــــــــــــــــــــــــــــــــ


مايد شو راح يسوي بمريوم..؟؟

و علايه متى بتعرف الشخص اللي جافته..؟؟

و باقي واايد ع انكشاف السر و لا..؟؟

أتريا ردودكم..^^

روح قلبي.. ©؛°¨غرامي متألق ¨°؛©

part7

بو سعود طلب من القارد يدلي عايله بو منصور للفله و يوصلهم ليييين صوووب المدخل و بعديين سكر عنه و اتصل لسعود..

سعود: هلا أبويه..

بو سعود: أقوول سعود سر هناك بو منصور و عياله وصلوا سير استقبلهم و أنا بلحقك..

سعود: إنشالله بس إنت قلت للشغالات يشلون الأغراض من فلتنا..

بو سعود: هييه قلتلهم و خلييت أمك تشرف عليهم لا ينسون شي بععد مب حلوه لا ف حقنا و لا ف حقهم..

سعود: هييه زين سويت يلوا عيل فمان االله بسير بجوفهم..

بو سعود: فمان الكرييم..

سعود راح صوب الشباب..

سعود: أقول شباب..


الشباب: هلا..

سعود: أنا بسير بستقبل الضيوف و بدلييهم انتوا سيروا الخيمه ترى نحن هناك بنتيمع..

حمود: إن شالله يالله سر و لا تتأخر عنهم..

سعود: هه إنشالله عمي..

و روح سعود..

_________________________________

عالعموم القارد دخل بو منصور ودلاهم ليين صوب المدخل..

نزل بو منصور و نزلوا عياله ورااه..

علايه: اممم مزرعتهم حلوه و كبيره بس مزرعتنا أكبر..

سيف: اللي يقول من كثرنا و لا شي..

منصور: خلاص سكتوا هاذو سعود يااي..

سعود تووه نزل من المدخل و يااي صوب بو منصور..

علايه: هئئئئئئ..

منصور يخزها بعيونه..

علايه: لا بس يشبه فواغي واايد..

منصور سكت عنها..

سعود يا ووايه بو منصور و سلم عليه..

سعود: شحالك عمي..؟؟

بو منصور: الحمدلله بخير و سهاله من صوبك..؟؟

سعود: ما نشكي بااس..

و عقبها سلم ع أم منصور بس كلام ويا صوب منصور..

جاف وحده بس ع طوول صد صوب منصور عسب لا يحس فييه..

سعود: هلا بو زايد..

منصور: هلا بو عبد العزيز شحالك..

سعود: تماام الحمدلله إلا إنت شخبارك..؟؟

منصور: بخير وسهاله..

و نزل بو سعود و سلم عليهم و جي بعد ما خلص من السلام..

بو سعود: يالله الفله جاهزه أنا بقول للشغالات يشيلون الحايات و انتوا سيروا هناك جان تبون ترتبون لكم حاياتكم و عقب تعالوا صوبنا و الحريم ف الفله العوده جاان الحرمه و العيال بيسيرون ونحن الريياييل ف الخيمه>ترى شي خيمه عوده برع عسب يمعه الريياييل و من هالسوالف..

بو منصور: والله ما تقصر يا بو سعود..

بو سعود: ولو يا بو منصور إنت حسبة أخوي العود و ع فكره أمايه من زمان تبغي تجوفك و تسلم علييه دومها تقول هذا حسبة ولدي اللي ما يبته..

بو منصور: يزاها الخير الوالده الله يطول بعمرها..

الكل: آميين..

ــــــــــــــــــــــــــــــــــــــــــــــــــ ــــــــــــ

و روحوا قوم بو منصور الفله اللي دلاهم القارد و الشغالات دخلوا أغراضهم..

بو منصور و أم منصور خذوا لهم الmain room ..

علايه و سلامه خذوا غرفة مريوم..

سيف خذ غرفة سعود..

منصور خذ غرفة فواغي كيف جيم مدري..

ــــــــــــــــــــــــــــــــــــــــــــــــــ ــــــــــ

صوب منصور: أوف أنا كييف نسييت الجراجه الحيين من ويين لي أوووف بدور لي هني يكن ألقى لي..

و يدور و يفتح سده سده ليين جااف......

ــــــــــــــــــــــــــــــــــــــــــــــــــ ـــــــــــــــــــــ

صوب علايه و سلامه..

علايه بخاطرها..معقووله اللي جفته يطلع سعود أخو فواغي معقوله ..وتنهدت.. خلاص أنا المفروض ما أفكر فيه..صدت صوب سلامه..خلصتي..؟؟

سلامه بهدوء: هييه..

علايه: يالله عيل بنسيير صوب أماايه بنجوفها خلصت و لا لا..؟؟

سلامه: يالله..

ــــــــــــــــــــــــــــــــــــــــــــــــــ ـــــ

منصور: يالله محلاها اسمنها ملااك و لا العيون الذباحه أنا شو يالس أسوي ..ورد الصوره مكانها و سكر السده..

علايه و سلامه نزلوا تحت..

جافوا أمهم و أبوهم و سييف..

بو منصور: ها خلصتوا..

علايه: هيييييه يالله أمايه سرينا..

أم منصور: تريي ليين منصور ينزل مرره وحده كلنا بنظهر..

علايه: لا أنا إذا بتريا منصور عز الله ما ظهرت..

سيف: أماايه سيروا وياها عسب نفتك من حنتها..

علايه: نننننننننننعم أنا حناانه..؟!

سيف: أمييه دخيلج سيروا..

أم منصور: يالله..

و ظهروا سلامه و علايه و أم منصور..

ــــــــــــــــــــــــــــــــــــــــــــــــــ ـــــــــــــــــــــ

صوب اثنيين الجو حده متوتر عندهم و الهدوء عام المكان غير صوت الشهقات و البجي..

مريوم: مااايد هئئ دخيلك اسمعني..

مايد: لييش أسمعج..صارخ.. قولي لي ليش أسمعج..؟؟ ليش أسمع لوحده كسرت قلبي..؟؟ ليش..؟؟

مريوم: أأنا كسرت قلبك..

مايد: هه و ليش ما تكسرينه مو انتي اللي احتليتيه أكييد انتي اللي راح تكسرينه..

مريوم: ماايد هئئ إنت تحبني..

مايد: للأسف كنت دخيلج سكري الموضوع..عينه تدمع.. لا تزيدين جروحي..

مايد حط له أغنيه بنغزه لمريوم..

مريوم يزدااد بجيها أضعاف أضعاف من قوة الكلمات..


خلاص اسكت و لا كلمة . .
و شللي بس تبي تبين . .
تخون الحب عليك الله . .
على بالك امر هين . .

تخيل لو اسسويها . .
تعديها و تسسامحني . .
لو بحلف ما تمششيها . .
و اأممام الناس تفضحني . .

جرح قلبي و انا احبه . .
جرحني و زادلي همومه . .
بعد مابي ادش قلبه . .
خلصنا قصه محسومه . .

مادام انه نكر قلبي . .
بذووقه اللي ما ذاااقه . .
ما يستتاهل خذا ححبي . .
و عطاني صده و فرااقه . .

ــــــــــــــــــــــــــــــــــــــــــــــــــ ـــــــــ

صوب منصور نزل تحت وجااف أبوه وسيف..

منصور: عيل أماايه و خواتي وينهم..؟!

سيف: علايه حشرتهم يالله بنسيرر و يالله بنسيير..

منصور: خخخخخ هذي الصراحه شي ثاني..

يو منصور: يالله نحن بعد بنسير صو الريياييل..

منصور وسيف: يالله..

ــــــــــــــــــــــــــــــــــــــــــــــــــ ـــــــــــــــــــــــ

المهم أم منصور و علايه و سلامه دشوا للفله العوده..

و سلموا ع الحريم و البنات وجي و إلخ............

موزان تصارخ: علاااااايتي..

علايه: بنااااااااانتي..

و يحضنون بعض..

فواغي: لا و الله أنا جي أزعل..

علايه: انتي غييييير عنهم كلهم و تحضنها..

شجون: مو جنكم البارحه جفتوا عماركم..

علايه: هه انتي حمده و لا شجون..

حمدو: مشالله بعد تعرفيين كل شي عنا..

علايه تغمز لها: هه أكييييييييد..

شجون: أنا شجون..

حمدو: و أنا حمده بس لا تقوليين لي ما أحب قولي حمدو..

علايه: أفاا عليج ما طليتي شي..

موزان: شرايكم نسير بررع نيلس أحسن من لنا من سوالف الحرييم و اللي ما تخلص..

البنات: هييه يالله..

حمدو: لحظه..تأشر ع سلامه.. الحين هذي منو علايه و عرفناها..

فواغي: هذي سلامه توأم علايه..

حمدو: يا عيني إخواني توم و ربعي توم شو أبا أكثر من جذي..

و ظهروا بررع يلسون..

ــــــــــــــــــــــــــــــــــــــــــــــــــ ــــــــــــــــــــــــــــ

صوب الرياييل..

دخلوا بو منصور و سيف و منصور و سلموا و تخبروا عن حالهم و ..................إلى ما نهايه بعد

ما خلصوا المشوار يلسوا الشياب ع اليم و الشباب ع اليم..

حمود: أووه الحيين انته منصور..؟؟

منصور: هييه و انته من..؟؟

حمود: أنا حمود و هذا توأمي عبود و هذا رشود و هذا طلول و هذا سعود رفيجك..

منصور: مشالله عرفتني ع الكل..

سعود: صدقني ينفع حق هالسوالف..

صوب الريياييل يرمسون عن الشركات و الصفقات خصوصـ[ن] شي صفقه كبيره من ألمانيا و اشتركوا فيها و يالسين يسولفون و جي..

عبود: الصراحه سوالف الشياب تملل الواحد..

طلال: واايد واايد بعد..

رشود: ليش ما نظهر بررع..

منصور: هييييه أحسن..

و ظهروا..

صوب الحرييم يرمسون عن هالحرمه و هذي ربت و هذي تتعالج و هذي وهذي و هذي..

اليده: الا ام منصور شخبار فريخاتج و ريلج..؟؟

أم منصور: الحمدالله بخيير و سهاله..

اليده: الحمدلله و ها شخبار الشركه..

أم منصور: الحمدلله بخيير بس الحيين هم مشتركيين ف صفقه ف ألمانيا و هو اشترك فيها لأنه يبي يضمن مستقبل العيال..

اليده: هييه شكله واايد يحب فريخاته..؟؟

أم منصور: واايد و هو مستعد يسوي أي شي عشانهم..

اليده: الحمدلله..و ف خاطرها و الله و طلعت أحسن عني يا ولد سهييل الله يسامح اللي بـ

و قطع عليها صوت زيود..

زيود: يدو يدو أبويه يقول متى بتجوفين صقيقه..؟؟

اليده: قول له بعد شوي..

زيود: انذين..

و روح زيود صوب أبووه..

زيود دش الخيمه و ع طوول سار عند ابوه..

بو سعود: ها شو قالت..؟؟

زيود: قالت بعد شوي..

ــــــــــــــــــــــــــــــــــــــــــــــــــ ـــــــــــ

صوب مرويم و مايد..
مايد: سمعي الحيين أنا بسيير بيتكم بييب فون سعود لأنه هو ناسينه و بودييج المزرعه بقولهم إني سرت اييب الفون وجفتج وفلتي لي انج خلصتي من شغلتج و ييتج ويااي انزيين..

مريوم هزت راسها ب هييييه و ف خاطرها.. وينك عني طوول هالوقت خليتني باييد واحد ما يعرف الحراام..

مايد روح صوب بيت بو سعود وسار غرفة سعود وشل فونه من ع الشبريه و روووح صوب المزرعه..

ــــــــــــــــــــــــــــــــــــــــــــــــــ ـــــــــــــــ

صوب الشباب ظهروا و جافوا البنات بس هم ما يجوفونهم..

عبود: شرايكم نسمع لسوالف البنات..؟؟

طلال: هييييه صح فكره حلوه و عقب انيين فيهم انقول لهم انتوا جي قلتوا و جي قلتوا..

الشباب مره وحده: اووك..

و تموا يجوفونهم و يسمعونهم بس البنات ما يجوفونهم..

ــــــــــــــــــــــــــــــــــــــــــــــــــ

عند البنات..

فواغي: امممممم شون سوي...؟؟

علايه: شرايكم نلعب تحدي و صراحه..؟؟

البنات: اوووك..

شجون: أنا بفر..وفرت و ظهر انه موزان تسأل سلامه..

موزان: و أخير[ن] بسألج نيهاهاهاها..

سلامه ابتسم ع الخفيف..

موزان: شو سبب هدؤج الغيير طبيعي..؟؟

سلامه طلعت عيونها و منصور وسيف يطالعون بعضهم و توتروا و علايه انصدمت من السؤال بس بغت تتدارك الموضوع..

علايه: شو هالسؤال يعني هي بروحها جي..

موزان: لا أنا ما يخصني سلامه و غلات والدينج تجاوبين علي بكل صراحه لاني احس في شي ثاني..

سلامه: لا عادي بقولج أنا قبل 6 شهور كن مخطوبه من ولد خالتي هو وحيد امه و أبوه بس للأسف ف نفس الوقت يتييم كنا مخططين انه العرس عقب سنتين و أنا تعلقت فييه و كنت اجوفه بنظره انه هو رياي و راح يشاركن ف حياتي بس عقب ..دموعها تتيمع.. شهرين من الخطبه سوى حادث و ماات و هو ماخذ لي ..دموعها تنجب.. هديه ليوم ميلادي..

ــــــــــــــــــــــــــــــــــــــــــــــــــ ـــــــــــــــــــ

سعود انصدم و فخاطره..معقوله البنت اللي انعيبت فيها من اول نظره جي كان ماضيها والشباب انصدموا بعد..
ــــــــــــــــــــــــــــــــــــــــــــــــــ ــــــ

أما موزان تلومت والبنات ما عرفوا شو يسون و فواغي بغت تغير الجو..

فواغي: يالله شجون فري..

شجون فرت وظهر إنه حمدو تسأل علايه..

حمدو: اوووه له له له أنا بسأل علايه..

علايه: يالله سأليني..

حمدو: شنو هو أكثر موقف محرج صار لج..؟؟

علايه: لازم يعني احرااج..

شجون: ههه يالله..

علايه: اوك لما كنت صف ثالث كنا مسافريين ماليزيا و هناك بدال لا أدش تكرمون حمام الحريم
دشيت الريياييل و لا أجوف ريياييل يدامي..

البنات: ههههههههههههههههههههههههههههه..

علايه: انزيين كنت صغيره..
ــــــــــــــــــــــــــــــــــــــــــــــــــ ــــــــ

عبود يرمس منصور: هذي صج شي صار لها..
منصور: دخيلك و لا طالعه تضحك..
عبود: ههههه..
ــــــــــــــــــــــــــــــــــــــــــــــــــ ـــــــــــــ

البنات بعدهم يضحكون..

علايه عصبت: شجون يالله بسرعه فري..

شجون فرت و ظهر علايه تسأل فواغي..

علايه: نيهاهاها..

فواغي: عادي سألي اللي تبينه أنا إنسانه واثقه من عمري و صريحه..

ــــــــــــــــــــــــــــــــــــــــــــــــــ ــــــــ

منصور فخاطره..يعيني ع الثقه..

علايه: اووك ف حد ساكن قلبج..؟؟

ــــــــــــــــــــــــــــــــــــــــــــــــــ ـــــــ

منصور فخاطره..دخيلج قولي لا..

فواغي: هييه..

الكل انصدم سواء من شباب و لا بنات و اولهم منصور و سعود عصب من الخاطر..
ــــــــــــــــــــــــــــــــــــــــــــــــــ ـــــــــــ

منصور رن فونه و روح عسب يرمس ربيعه..
ــــــــــــــــــــــــــــــــــــــــــــــــــ ـــــــــ

علايه: ممنو..؟؟

فواغي: ههه ربي بعد من غيره..

الكل ارتاح و حسوا ان تفكيرهم وااايد بعييد..

و جي جافوا مايد داخل و مريووم وياه عاد هني سعود صج عصب و سار صوبهم و منصور رد صوب الشباب..

سعود: انتي مب قلتي ان عندج بروجكت ومدرري شو..؟؟

مريوم: ان انزين ا

مايد عط الفون لسعود..

مايد: أنا رحت اييب فونك و جفت اختك قالت خلصت بروجكتها و يبتها ويااي قلت احسن بدال لاتم روحها هناك..

سعود تنهد براحه: زيين سوييت صج إنك ريال و النعم فيك..

مايد ابتسم مجامله بس هو يحس بسجاجيين بقلبه..

الشباب ردوا الخيمه و البنات ردوا الفله العوده..

مرييوم ع طوول دشت الفله و سلمت ع الحرييم و استغربت من وجود حرمه ما عرفتها و امها عرفتها و جي و يلست وياهم عسب لا تتذكر اللي صار..

ام سعود: انتي منو يابج..؟؟

مريوم: ها ممايد عسب يا ياخذ فون سعود وانا كنت مخلصه بروجكتي فييت وياه..

أم مايد: زيين سوى..

مريوم فخاطرها..بلاج ما عرفتي السبب..

اليده: أنا بروح بسلم ع بو منصور..

الكل: الله وياج..

ــــــــــــــــــــــــــــــــــــــــــــــــــ ــــــــ

اليده راحت و دشت الخيمه..

الكل وقف و سلمت ع الكل و يوم وصلت عند بو منصور..

بو منصور حبها ع راسها احترام لها..

بو منصور: شخبارج الوالده عساج بخيير..

اليده: بخيير يا ولد سهييل..و يلست تبجي و الكل استغرب..

بو حمدان: يمه شفيج..؟؟

بو سعود: بسرعه ايبوا مااي..

يابوا ماي و عطوا اليده ويلسوها..

بو صقر: أمييه شفييج..؟؟

اليده: هذا ولد سهيل..

بو سعود: انزيين نحن نعرف انه ولد سهييل..

اليده: بلاكم ما عرفتوا اللي أكبر من جذا..

الكل انصدم من رد اليده...

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــ


يا ترى شو بيصير ف البارت الياي..؟؟

وشو سبب معرفة اليده بسهيل..؟؟

وشو علاقته باليده..؟؟

أتريا ردودكم الغاويه..

^_^

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1