غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 31
قديم(ـة) 09-06-2012, 07:26 PM
صورة همس الغلآا الرمزية
همس الغلآا همس الغلآا غير متصل
©؛°¨غرامي مجتهد¨°؛©
 
الافتراضي رد: رواية تيارات الحب / بقلمي


العفوو
ومتى راح تكمل الروايه

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 32
قديم(ـة) 09-06-2012, 10:47 PM
OmanI-CooL OmanI-CooL غير متصل
©؛°¨غرامي جديد¨°؛©
 
الافتراضي رد: رواية تيارات الحب / بقلمي


أذن الصبح ونهض علي يصلي بعد الصلاة رجع البيت جلس يذاكر كم كلمة وبعدها طلع مسقط في حدود الثمانية دخل عيسى عند أمه المطبخ ...

عيسى : صباح الخير
أم سلطان : صبحك الله بالخير
عيسى : جاهزين نروح عند ندى
أم سلطان : نحرصك من الصبح
عيسى : الوالده باغنك في موضوع خاص
أم سلطان : مو عندك من صلاة الصبح
عيسى : خير ... أنا باغي أتزوج
أم سلطان : الزواج ما لعبه يبغاله مصاريف وجهوزيه
عيسى : أنا مستعد بس باقيه بنت الحلال
أم سلطان : أي جاهز إذا أنا مك ما عارفه مو تشتغل وهين كنت
عيسى : هذي كلها شكليات لكني أنا أقولك أن كل شيء متوفر باقيه البنت وبصراحه أنا في بالي وحده

سيف نهض الصبح أو بصحيح العبارة نزل من سريره لأنه ما نام طول الليل تسبح وطلع على الشغل على طول دون ما يكلم حد من البيت وصل شغله وهو خايف من ردة المدير لكن ردة فعلة كانت مفاجئة ما صار اي شيء لأن ببساطه في البنك كمبيوتر مركزي كل ملف يدخل البنك أي كان في نسخة ثانيه تتخزن سيف يعرف هذا الشيء بس يلعن بليس الملعون ما جت هذي الفكره على باله أبدا ...

في حدود التسع وربع وصل علي الجامعة وحصل فاتك ينتظره عند البوابه كان باقيه كم ورقه يخلصوها في عمادة شؤن الطلاب خلصوها وبعدين رجعوا السكن يذاكروا لأمتحان باكر كذا مر وقتهم لحد العصر خرج علي في الموعد مع لطيفه وكانت تنتظره في مقهى في سيتي سنتر مسقط وصل جلس عندها وشكلها كانت تنتظره ...

علي : هلا لطيفه عساك بخير
لطيفه : فوق النخل ((بابتسامه))
علي : الحمد لله
لطيفه : آسفه أني شاغله وقتك وخصوصا أن بكره أمتحان
علي : لا عادي الأمتحان سهل
لطيفه : صح سهل

سكتت وطلعت كيس كان على الأرض وعطيته علي ...

لطيفه : خذ هذي هديه
علي : شكرا بس أيش المناسبه
لطيفه : أنت شوفها وبتعرف

فتحها حصلها تلفون نقال نوكيا أي66 ...

علي : ما عرفت
لطيفه : دايما أتصلبك وتقول بطارية التلفون خربانه
علي : لطيفه دون مقدمات أنتي أيش هدفك من هذا كله
لطيفه : أنته
علي : ما فهمتك
لطيفه : دايما أشوف اللي حولي يهتمو فيني ويحاولوا يتقربوا مني لأسبابهم المعروفه اللي ما طمع في مكانتي الأجتماعية والمادية طمع في جمالي إلا شخص واحد هوه أنته من كثر ما تجاهلتني كنت أظن نفسي عادية مثل كل البنات

علي : ...

لطيفه : علي أنا أحبك

أيش فيها هذي البنت أحنا في عمان ترى ما في نيويرك ستي علي كان متفاجئ منها حتى أن عيونه مفتوحه على الآخر ...

لطيفه : متفاجئ ؟؟
علي : متفاجئ قليله أنتي أيش شفتي فيي ...مئة واحد أحسن عني مال ونسب وحسب
لطيفه : أنا أريدك لأنك أنسان طبيعي ما تعرف خش ودس العاصمه وولادها
علي : واجدين مثلي من حيت جاي أما أنا آسف ما أقدر
لطيفه : ما تقدر تحبني ؟؟؟ لهذي الدرجة أنا مرفوضه
علي : كل شيء يقول لا الواقع الحاضر والمستقبل رحم الله أمرء عرف قدر نفسه ووقف عنده أنتي يابنت في السماوات وأني في الأرض
لطيفه : ما يهم كل شيء أنته حبني وارفعك لعندي
علي : شفتي أنتي تريديني فوق ما تحبي تنزلي تحت عندي
لطيفه : علي الحب كافي يقربنا
علي : بغض النظر عن كل شيء قلبي ما يميل لك أبد
لطيفه : مع الوقت بتتعود
علي : مستحيل لأني قربت أخطب بنت الحلال اللي تناسبني وتحبني واحبها
لطيفه : وأنا
علي : أنتي أيش ؟؟ ...أنتي اليوم بتزعلي لكن بكره في مية شيء يشغلك وينسيك وفيه آلاف يتمنيوا كلمه منك
لطيفه : بس أنا أترجاك فكر أنا مستعده أصبر
علي : صدقيني ما أقصد أكسر قلبك بس بجد أنا ما أقدر
لطيفه : علي أنا أترجاك لا تذلني اكثر
علي : آسف

وقف علي بس مسكته من يده وعيونها تلمع ...

لطيفه : أرجوك
علي : والله ما أقدر
لطيفه : تذكر علي أنته تكسرني ودموعي غاليه ما تقدر تدفع ثمنها
علي : عمره الحب ما كان بالغصب
لطيفه : علي أجلس أرجوك
علي : أنتي أرجوك بطلي أيدي الكل يشوف علينا أنا قلت اللي عندي وبعدين أنا ما وعدتك بشيء

بطل أصابعها من أيده وراح على سيارته وطلع شارد الذهن كأنه أول مره يمشي في شوارع مسقط أتصل فاتك يشوفه وين وما رد عليه راح صوب السكن القريب من الجامعه ووقف في البراح الليي بين البيوت والجامعه ...

أما عيسى كان غير اليوم يعني بدى يتغير هذي المرة للأحسن يضحك ويسولف مع أهله لكن الحاجز الخفي اللي بينه وبين أهله كان موجود كلهم متوجسين خوف منه وكلهم يسئلوا هين كان وهذي السيارة الغالية من وين جاب فلوسها وأما أمه تفكر وتقيس في أمر زواجه تخاف تظلم البنت إذا زوجته ...

ندى مثل ما قال الدكتور أمس ما فيها إلا الخير هذا اللي وضحته الفحوصات كتبلها على كم دواء وكتبلها خروج من المستشفى مع النصيحه لها بعدم التفاعل في مشاكل أو التوترات ...

سيف كان جالس فغرفته من يوم جى من الشغل حتى الغدى ما تغدى وفي حدود الخمسه أتصل على كوثر ...

كوثر : أنا في بيت عمي عند ندى
سيف : كيفها الحين عساها بخير
كوثر : بخير وعافيه بس محتاجه ترتاح
سيف :الحمد لله

سكر المكالمة وفي هذي اللحظة كان يكلم علي صفيه في الساعة خمس وأربعين ...

صفيه : أيش فيك حبيبي متغير صوتك أنته مريض
علي : شويه ((ما حب يخبرها إذا المرة الماضيه كان يمزح وزعلت كيف إذا كان الأمر صدق ))
صفيه : ما عليه عليان اصبر وركز في المذاكره ما باقي إلا بكره
علي : حاضر
صفيه : أنا بسكر الحين وبكره بعد ما تخلص الأمتحان كلمني لا تشتغل بغير مذاكرتك لساعتها
علي : طيب ... صافي
صفيه : هلا بعيونها
علي : مهما صار أنا أحبك لزم تكوني متأكده من صدق شعوري نحوك
صفيه : ليش هذا الكلام الحين أنته صايرلك شيء
علي : ما شيء بس أنتي توعديني
صفيه : أوعدك ... يالله الحين دربك تراجع
علي : حاضر
صفيه : أنا ما مصدقه أنك مريض وبس لكن الوقت ما مناسب أنته لازم تستعد للأمتحان بعدين بنتكلم

في بيت جيرانهم صفيه في بنت تسمى ندى نايمه على السرير وجنبها بنت تسمى كوثر كانت جالسها جنبها ...

كوثر : بسك دلع قومي تراه المرض ما زاهي عليك
ندى : تواسيني ولا تخبريني أني قريعه ؟؟
كوثر : ليش هذا الكلام أنتي حبوت البنات يا قمر ...بلا دلع أيش فيك
ندى : أعاني من أكبر غلطه في حياتي أني ما كملت دراستي يمكن لو كملت كنت أكون بنت ثانيه
كوثر : ماراح تكوني أي أحد ثاني أنتي مثل ما أنتي ندى اللي أعرفها ما عليش زود
ندى : هذا رئيك لأنك بنت عمي وأختي وصديقتي بس ما حد يشوف هذا الشيء
كوثر : من بتحديد ؟؟
ندى : كل الناس ...الفراغ صعب يخليك تفكرين في أشياء صعبه ما شرط تكون حقيقية
كوثر : أنتي لازم تخرجي من هذي الحالة لازم تكوني أقوى
ندى : صح لازم أكون أقوى لما أصحى وأنا ما أنتظر شيء لازم لما تدق الساعة وحده ظهر وأنا ما عندي شيء لازم أكون أقوى لما تدق الساعة سته المغرب وما صار جديد فحياتي لازم أكون أقوى قبل لا أنام ويومي كان أعادة لليوم السابق وبروفه لليوم التالي
كوثر : هذي الأفكار ما تساعدك هذي تزيدك هم ووجع

رجع عيسى البيت بعد مشوار خارج البيت وراح لعند أمه يسألها عن موضوعه خبرته أنها ما موافقه على البنت لأنها ما تستحق تتعذب معه قالها أنه أنسان جديد بالكامل تغير وصار غير عن الأول وجلس فوق راسه ساعه يقتعها بفكرته بس أمه كانت رافضه توافقه قبل لا يخبرها وين يشتغل وهين كان طوال السنين الماضية ...

عيسى : الظاهر أنك لازم تعرفي السالفه
أم سلطان : إلي تشوفه أنته مثل ما أنته يا أبو زيد كأنك ما غزيت
عيسى : يوم أنقطعت أخباري كنت في زنجبار
أم سلطان : ولدي تراني ما مخرفه زمان سفرات زنجبار ولا دهرها
عيسى : كنت في زنجبار ...أول ما سرت كنت رايح مع مجموعه من طلبة العلم عند شيخ دين هناك
نتعلم عنده بس بعد مده ما ناسبتني حياة العلم بديت أشتغل مع واحد تعرفت عليه في التجاره ومن شيء لشيء لين صرت تاجر والحمد لله ربي رزقني
أم سلطان : وموه مانعنك عن تقول من أول ما سألناك
عيسى : كان ما وقته والحين وقته أرجوك أمي خطبيلي ياها
أم سلطان : ما أقدر هذي البنت بذات ما تصلحلك
عيسى : لهذي الدرجه أنا طايح من عين الكل

نرجع عند سيف اللي كان يفكر بشكل غير طبيعي حتى أنك تقدر تقول أن مخه هنج
ما عاد يفكر في شيء محدد أو شيء معروف لتسألوه في أي شيء سارح أيقولكم ما عارف((هذي شيء دايم يصيرلي تحصلني أفكر في شيء ما عرفه )) ...

في حدود العشرة ونص ليل كانت ندى على حالها نايمه في سريرها وكوثر نايمه جنبها كانت باغيه تآخذ أجازه لكن ندى ما وافقت تكون السبب في هذي الإجازة أما علي كان يحاول يركز في مراجعاته ويبعد عن باله كل الأفكار الثانيه كان يشوف مستقبله قدام عيونه وما شي قوه يمكن تخليه يغمض عينه عن هذا المستقبل زمان أول لما كان حد من ربعه في المدرسه يسأله عن حلمه كان يقول أي كلام وما يعبر عن حلمه بصراحه مرات يسأل نفسه ليش ويجاوب أنه حلم ما أعتيادي يمكن يجيبله السخرية ...

صحيت ندى وكانت أحسن خذت دش ساخن وصلت الفجر وجلست شكلها يقول أنها أحسن من أمس بكثير كوثر نزلت الشغل وما نيتها ترجع عند عمها كانت قايله لندى أنها أتروح بيتهم على طول أما سيف أتصل على الشغل وطلب أجازة وعطيوه لذلك ما راح يداوم إلين بعد العيد لأن بكره الأثنين إجازة يوم تاسع مثل ما يسموه العمانيه في بعض الأحيان تكون الأجازة أطول قبل العيد لكن هذي المره كانت الأمور مضغوطه لان السنة الدراسية على آخرها والصيف على الأبواب ...

علي نزل وأمتحن وشال من باله كل اللي صار أمس مع لطيفه قال أنها نزوه من بنت معتاده تدخل وتخرج من مثل هذي المواقف ما يستحق يتوقف عنده أكثر أى الأمتحان بثقه وكانت أجاباته كلها صح أو أغلبها صح ...

أول ما خرج من قاعة الأمتحان أتصل على صفيه ...

صفيه : طمني الأمتحان سهل
علي : سهل بس غلط كم غلطه
صفيه : كم غلطه أو معفس كل الأمتحان
علي : ههههه كم غلطه
صفيه : متى بترجع اليوم ولا بكره
علي : اليوم والحين
صفيه : لا تسرع في الشارع
علي : حاضر أي أوامر ثانيه مولاتي
صفيه : أكذب عليي عطيني من الرخيص
علي : أنا لو في الهند كنت عبدتك يا شيخه
صفيه : أكون ساعتها بقره يالغبي
علي : عارف أحلى بقرة في العالم حتى أنك أحلى من بقرات لورباك
صفيه : أنته مشوط عندك فيوز ولا أيش

من وراه يد ما سكتنه من كتفه تفاجئبها لما دور راسه كان وجهه منور بس ملامحه تغيرت لما شاف لطيفه ...

علي : بكلمك بعد شويه

سكر المكالمه وشافها بس هذي المره بنظرة تحدي شكل البنت تشوفه على أنه حاجه من أغراضها ما أنسان ...

علي : لطيفه وخاطر الأربع سنوات اللي مرت بينا خليني فحالي
لطيفه : أنا جايه أقولك كلام حطه في بالك ... شكر أنك علمتني درس في حياتي

صمت بين الأثنين ...

كملت لطيفه كلامها : بس هذا الدرس مردود صدقني بخليك تتعلم من أنا ومن أنته يا ود البيدار
علي : شكرا لك أهلي في البيت يقولوا أني ما فالح في الزراعة الحمد لله سمعت حد يقولي بيدار هذي شهادة أعتزبها أكثر مما تتصوري أنا بيدار ولد بيدار ما أخجل لو تحبي أنزل هذا الخبر خبر عاجل في الجزيرة
((وهوه يبتسم بسمه ساخرة تحتقر أسلوب تفكيرها السطحي يعني البيدار يعيبه التراب والماي ؟!؟...))

لطيفه : روح يا علي بس مصيرك تذكر دموعي وتدفع ثمنها أغلى من عمرك
علي : لحد الحين أنا ساكت لأني عرفتك لمدة أربع سنين وما أريد أغلط وما محتاج أقول كلام ما متعود أقوله فهميني يا بنت أنتي ما تنعابي لكن أنا خلاص حياتي فيها حد ثان ما أقدر أتنازل عنه
لطيفه : خذ هديتك شكلك نسيتها أمس راح تكلمني عليه في يوم من الأيام أنا مخزنه في أسمي لأنك راح تحتاج الرقم بكل تأكيد

مد علي يده وتناول الجهاز منها ...

علي : شكرا وبالمناسبه أنا مراح أمسح الرقم بكل تأكيد

وراح دربه صوب الكانتين كان فاتك سبقه ...

عيسى جى لعند أمه وسألها إذا قاصر شيء للعيد من السوق أو باغيه تسير مكان هذا مخلوق عجيب كل يوم هو في شأن مرة يكون اللي مطنش ومرة يكون المهتم ومرة يكون الحبوب ومرة يكون الجاف هذا أيش فيه حتى وأنا أكتب حواراته أتعب الله يعين اللي عايشين معه ...

أم سلطان تشوف تغير ولدها مجرد دهان سير لموضوع زواجه لكن على مين يا عيسى حبيبي العجايز ما تمر عليهم هذي الحركات الأبتادئي ...

وصل علي عند فاتك في الكانتين ورسل رساله لصفيه يخبرها أنه عنده شغل بعدين يكلمها ...

أنا أقدر أحلف أن أغلبكم يتسائل هيه ناديه اللي طلعت في أول الفلم وين الحين ولدها أيش صار فيه زوجها كيف حاله الحين بعد الحادث أقولكم كل أمورها طيبه توها خارجه من عند أختها وتو جالسه مع أمها تتقهوى وكانت ربى معهم يتكلمن في تجهيزات العيد وانا ما جبت في سيرتها قبل لأن وبساطه ما صار معه شيء يستحق الذكر ...

في ذات الوقت طلعت صفيه من غرفتها اللي صارت تجلس فيها وقت أطول من العادة ويا حسرة مع من بتجلس ما في حد يونس أمها وسوالفها عن القال والقيل مثل باقي الحريم في سنها ولا مع فتحيه الله لا قالها بتصير خناقات مثل ميقولوا أخونا المصريين وهوايل خليهم بعيدين
خرجت تشوف أمها أيش تسوي غدى قالتلها طلعي سمك لأن الأيام الجاية بتترس الكروش من اللحم وخصوصا مع الثور الهامه اللي مربوط في الدرس يجي وزنة ستين منّ ((الدرس:زريبه...منّ:وحده وزنية يستعملها لعمانيين تساوي كم كيلو جرام ))...

في الظهر وصل علي البيت وتغدى ونام وكذلك صفيه دخلت ونامت وندى نفس الشيء نامت أيش حاصل
أنا بكتب عن من الحين آه بعدها كوثر كانت جالسه تريض سيف يجي ياخذها من الشغل أكثر من مرة قالتلها ندى تقص ليسن وتخرج سيارة بدل هذي المرمطه بس دايما كانت ترد أنها تخاف من السواقه ومن المضحك أنها تخاف حد يسرع وهيه جالسه سكند سيت ...

بين سيف وكوثر في السيارة ...

كوثر : سيف أوقف على صوب اريد أكلمك في موضوع
سيف : في البيت تراني زهقان على الآخر
كوثر : وقف أنته ما عليك ما راح أضايقك
سيف : على مسؤليتك تراني ما عرف ايش بسوي

وقف على صوب ...

كوثر : أيش فيك ما من العادة تكون كاك((كاك:كذاك بدارجة قريتنا))
سيف : هذا اللي موقفتني عشانه
كوثر : أنته تفكر أنك غلطان في حق ندى صح
سيف : أكيد ما صح أنا أيش سويتلها
كوثر : لا تكابر واضح عليك
سيف : بعدين الزبده ولا خلصتي
كوثر : أنته ما تفكر تتزوج ما شاء الله تشتغل من مدة وأمورك ماشيه في السليم
سيف : لا ما فكر بعدني في الزواج وهمه
كوثر : أنا أفكر عنك ما مشكله
سيف : تراني ما ناقص دمك الخفيف
كوثر : أنا من الآخر لاقتلك بنت الحلال
سيف : خطابه وأنا ما عارف ؟؟؟
كوثر : أيش رئيك في ندى
سيف : ندى مالها
كوثر : ما تناسب تتزوجها صح مناسبه
سيف : أنتي مجنونه ندى عمرها أصغر مني وبعدين أنا ما أفكر في الزواج
كوثر : فكر في الزواج وفكر فندى العمر ما كان مشكله يعني أنته بكم أكبر عنها بسنتين ما بمليون سنة ويصير معكم صراع أجيال

عيسى كان في بيتهم فاتح كمبيوتره وشكله داخل النت أو ما شابه بكل تأكيد هوه الحين يسبح في دائرة الغموض اللي تجرنا معاه لفين هذا اللي حتى أنا المؤلف ما عرف عنها شيء
((حد يقولي سكت الشيمه أحس نفسي بديت أخربط يمكن يحتاجلي إستراحه)) ...

سيف وكوثر تحركوا من مكانهم واصلوا للبيت سيف كان منشغل باله بهذا الموضوع الجديد ::يعني معقول أنا أتزوج ندى مستحيل هذي أختي واتزوجها أنته مجنون ولا كيف الله يخسك من كوثر أنا أيش حاجتي في الزواج وبمن بندى هذي اعرفها من يوم ما نولدت هذا شيء في صالحها ما ضدها بس صعبة تتزوج بنت أنته معها اربعة وعشرين في أربعة وعشرين وخصوصا إذا تعتبرك وتعتبرها أخوه لكن ما مستحيل وما شرط الفشل تكون النتيجه ...

أذن العصر وصحى كل النايمين لصلاة إلا علي كان مصلي سفر وراجع تعبان لذلك كمل نومه صفيه أول ما صحيت صلت جلست شويه ترتب أغراض العيد الجديده وشافت الخاتم الفضة مسكته بين يديها وباسته وخلته على صوب قامت شغلت المسجل ألبوم الوسمي اللي فيه أغنية اللي يديه بنار راحت بعدها تفتح كراسها وكتبت ...

((يبدو أني لن أكتب التاريخ في أعلى الصفحة من جديد
أيامي كلها احسها خارج التاريخ شيء خيالي جدا
في أكثر أحلامي تطرفا ومغالاة لم أكن أحلم بالذي يحصل معي الآن
اتمنى ألا تكون أبتساماتي هيه الأبتسامات التي تسبق الدموع الغزار
هذا ليس وهما هذا حقيقة أنا مؤمنة به كأيماني بوجودي هو من أعطى وجودي
طعما آخر وأعطى لحياتي نكهة ولون يعجباني جدا ...
أحبك يا من تحبني مثل ما تحبني وأكثر فقط لا تتأخر فحياة الظلام لا تناسبني ))

مر العصر وجى المغرب وكل بيت تحصله اليوم العوائل مجتمعين فيه قبل العيد وبداية الأجازة يعني الجو عائلي واليوم الشباب عندهم نشاط في التهليل شالين البلاد شل بصوتهم أزعاجهم من النوع المحبوب في بيتهم علي الكل مجتمع في الصاله من كبير وصغير ...

أبو سلطان : كيف جاهزة التبزيرة

((التبزيرة هذي خلطه عمانيه أصيله تتكون من الفلفل وبعض البهارات وملح وخلطتها كما قالت لي جدتي في العيد الماضي أن كل مكيال فلفل وبهارات يواجهه مكيالين من الملح ويخلط كل شيء بخل السح أو التمر الصنع المنزلي وهذا حكاية لحاله يحضر قبل العيد بأسابيع ويحضر خصيصا لتبزيرة ولا حد يفكر ان التبزيرة مالحه التبزيرة قريبه من مخلل الفلفل آخر حلاوة لما تبزربها لحم الشواء ونستخدمها في الأيام العادية لدجاج والسمك لما نحب نشوي يعني هيه رفيقت العمانيين في الشواء وإذا حصلت شيء حامض وغمسته فيها وكليته بيصير طعمه جنان ))

أم سلطان : سأل ربى يه اللي مسوتنها هذي السنه
سلطان : أكيد بنروح المستشفى جماعات
أبو سلطان : لا ربى واعيه ما شاء الله عليها صارت من بنات الداخليه
ربى : لا بعدني من طبايع حياني
عيسى : كيف طبايع أهل الداخليه مو فيها ؟؟
الكل شافه وفسر كلامه على أنه هجوم بس عيسى صدقا كان يمزح ..
محمد : هذي السنة بشتري يويو بعيديتي
ندى : عيديتك أنا بضمها بدل ما تشتريبها فتاك وقنابل
أم سلطان : هوه يجرب يشتري إذا ما ضربته إلين ما يشبع ما سادنه الدهداشة مال العيد الفايت محترقه
محمد : أشتري ... ياخي عيديتي أنا حر فيها

وراح لعند أبو سلطان المدلع الرسمي له محمد عمره توه يمشي في السته سنين ...

علي : ما عليك بنشتري أنا وياك ومرة وحده نفجر هذا البيت أفا عليك أبو حميد
أم سلطان : الله بالعقل
فاخره : أنا باغيه أشتري قشاط واجد واجد أضمه حال كل السنه

((القشاط حلو عماني أصيل يعني تقليدي يتكون على ما قالت أمي في أحد الأيام من مكسرات مطحونه وسكر يخلا السكر يتحول قطر وفي درجة حرارة عالية يضاف المكسرات وبعض المنكهات في بعض الأوقات وتصب على سطح بارد وتمد طبقة تنتظر إلين ما تجمد بعدين تقطع لما توكل قطعه منها تحس أنها تذوب في فمك من جمالها برسل للي يبا منكم))

عيسى : من زمان ما كليت قشاط بعطيك تشتريلي
فاخره : ما أشتريلك قبل أمس تذكر مو سويتلي
عيسى : هذي اللي تشوفوها جالسه تراد اللي أكبر منها
أبو سلطان : من ؟؟
عيسى : أمس لاقنها تناط كوثر لدرجة أنها قاصر تضربها
أبو سلطان : ما شيء جديد مثل العادة كأنهم جني وعطبه
سلطان : ذكرتني وأنته ما قاصد .. كيف علي الموضوع ما فكرت فيه تراني متكل الشله
ربى : أي شله هذي ؟؟
سلطان : الوالد والوالده
أبو سلطان : أنا وامك شله لسانك يبغاله قص
أم سلطان : إذا زواجة علي نسيوها خلاص
علي :((في باله))الحمد لله
أم سلطان : وهذا كلكم حاضرين أكلمك قدامهم يا عيسى هذا أبوك وهوه عارف بكل الموضوع أنا مايلي خص إذا هوه موافق تو أسير أخطبلك
سلطان : ما شاء الله الشباب بيتزوجوا ما غلط
ندى : حال من نقول مبروك
أبو سلطان : كوثر
ندى : كوثر بنت عمي ؟؟؟؟!!!!
علي : لا كوثر مستحيل
أبو سلطان : ليش مستحيل
علي : لأنها تستحق أفضل من
عيسى : مني صح ؟؟؟ ليش أنته شايفني نقصني رجل ولا يد
علي : أهم شيء في الأنسان العقل
أبو سلطان : بس خلاص أنتوه الثنينه مثل الدجاج تتناقبوا سويولي أحترام
عيسى : قول لولدك يحترم اللي أكبر منه بعدين هوه ما يله دخل
ندى : أنا مع علي ما موافقه على ذي الزواجه أي بنت إلا كوثر
عيسى : حتى أنتي مو أنا مسوبكم ؟؟؟
ندى : أنته ما سويت شيء بس كوثر ما تستحق تتعذب يوم واحد
أبو سلطان : خلصتوا كلام ...أنا كلمتي وحده وكل كم موافقين عليها قبل لا أقولها باكر العصر بروح أنا وسلطان وعيسى وعلي عند ياسر ونخطب لعيسى حد هنا ما موافق

علي قام من مكانه لأن الموضوع الظاهر أنه مترتب ومخلص ماشي مجال لرفض لحقته ندى وكانت أكثر وحده رافضه أما عيسى أول مره حس أنه ما جيد السمعه إذا أهله ورافضين زواجه كيف البنت ما أترفضه بس عجبه موقف أبوه كان في وقته حسسه أنه لسا من ذا البيت إلي يتجاهل نظراتهم وقطعهم للحوار أول ما يوصل عنده وغيرها من مظاهر النبذ ...

علي يكلم ندى ...

ندى : أنته دامك ما موافق ليش ما خطبتها
علي : أنا ما موافق لأني أشوفك فيها ...تصوري يجيك خطيب مثل عيسى على رقبتي بتتزوجيه هذا المعقد
ندى : الحين فهمتك صح ...الأول كنت أفكره مجرد كلام أنك تحسها مثل أختك بس موقفك بين حاجات كثير
علي : أنا أريد أفهم حاجات كثير الظاهر أن صايرلك شيء وما تريدي تخبري حد عنه
ندى : ليش ؟؟؟
علي : مرضك أمس كان سببه الظاهر نزول السكر لكن نزول السكر كما قال الدكتور أنه نفسي في الدرجة الأولى
ندى : دكتور ما يعرف شيء طلعنا السوق جوعانه ما فطرت ورجعت هلكانه وما تغديت يعني أكيد بمرض ما يبغالها بن سينا يحللها
علي : وليش ما كليتي صاير شيء
ندى :((بتلعثم))أبا أسوي روجيم لا أكثر
علي : يا الله بوادي عقول
ندى : علي في موضوع محيرني من زمان أظنه وقته جى الحين
علي : خير
ندى : الحين موضوع كوثر أنتهى بنسبه لك ... بقى سؤال واحد من البنت اللي قلتلي عنها المره الماضيه
علي : إذا خبرتك يكون بشروط آخذ عهد عليها
ندى : حشى هذي ولا شفرة البنك المركزي قول وخلصني
علي : توعديني أنك ما تخبري حد أبدا لحين الوقت المناسب
ندى : أوعدك
علي : هيه من هنا من جيرانا وتعرفيها
ندى : فاطمه
علي : أكيد لا ...أقرب
ندى : من قول بلا أعلانات الأم بي سي
علي : أقولك بلاش
ندى : لا قول

كان يبا يتأخر لكن شيء داخله قال خلاص أنا ما اسوي شيء غلط دام نيتي شريفه وعفيفه ...

علي : صفيه

كانت مفاجئة ...

ندى : من ؟ عيدلي الاسم أتأكد
علي : صفيه
ندى : تصدق أول وحده كنت لازم أفكر فيها بس عرفت بطرقك إذا هيه تبادلك الشعور((تتمصخر وما تعني اللي تقوله))
علي : مايلك خص هذا أنتي عرفتيها بس خلي نفسك ما عارفه شيء وبلعي لسانك ولا تفضحينا
ندى : برغم من كل شيء عرفت تختار بنت ما شاء الله جمال وأخلاق
علي : عسى ربك يجمع ويوفق
ندى : أيش رئيك تو تنزل تقول لأمك تخطبها وإذا ما باغي تدخل بس خليها خطبه

ودار حوار بينهم طويل المهم أن ندى كان لازم تفكر في صفيه بعد مارفض كوثر على طول يعني شوية تركيز وينعرف الموضوع هذا علي يتسمع من بعيد لبعيد أخبار صفيه يسأل أخته اليوم من كان على الفلج مثل ولما كانوا يتعلموا لما تريد صفيه شيء ينوجد
إذا ما موجود وغير النظرات على الجاي ورايح منه لها وجلست الظهر اللي يجلسها علي في الطريق بين بيتهم وبيت صفيه عشان يشوفها ووكانت الأمور ظاهره لكن عشان تشوفها كان يحتاج تركز أكثر من مجرد تكون أنسان عايش جنبهم ...


ــــــــــــيتبعـــــــــــــ



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 33
قديم(ـة) 10-06-2012, 09:06 AM
صورة Rere Mohammed الرمزية
Rere Mohammed Rere Mohammed غير متصل
©؛°¨غرامي مشارك¨°؛©
 
الافتراضي رد: رواية تيارات الحب / بقلمي


ششوف انا ماحكمل الروايه وبعطييك ردي في الخااصص

تححياتي لك :)

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 34
قديم(ـة) 10-06-2012, 09:25 AM
OmanI-CooL OmanI-CooL غير متصل
©؛°¨غرامي جديد¨°؛©
 
الافتراضي رد: رواية تيارات الحب / بقلمي


اقتباس:
المشاركة الأساسية كتبها بنت ابوها ومحد قدها مشاهدة المشاركة
ششوف انا ماحكمل الروايه وبعطييك ردي في الخااصص

تححياتي لك :)
ليش ؟؟
عسى المانع خير ؟؟

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 35
قديم(ـة) 10-06-2012, 02:40 PM
صورة همس الغلآا الرمزية
همس الغلآا همس الغلآا غير متصل
©؛°¨غرامي مجتهد¨°؛©
 
الافتراضي رد: رواية تيارات الحب / بقلمي


ههههههه مسوي اعلان طبخات عمانيه هههههه
المهم انا كنت عارفه من قبل ان عيسى يبي يتزوج كوثر بس سكت
وقلت بعدين اعرف التفاصيل ما يحتاج العجله
وسيف بيفكر في ندى وبيتزوجها ليش حرام يتزوجو بنت العم <<<< عليه افكار غريبه
وأتوقع ندى بتتقرب من صفيه أكثر وبيصيرن حبايب
كوثر ان شاء الله توافق ويفتك علي
ما حبيت شخصيت لطيفه يعني هيه غنيه خلاص بتتحكم في الي تباه خسييييييييسه


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 36
قديم(ـة) 10-06-2012, 10:42 PM
OmanI-CooL OmanI-CooL غير متصل
©؛°¨غرامي جديد¨°؛©
 
الافتراضي رد: رواية تيارات الحب / بقلمي


اقتباس:
المشاركة الأساسية كتبها همس الغلاااا مشاهدة المشاركة
ههههههه مسوي اعلان طبخات عمانيه هههههه
المهم انا كنت عارفه من قبل ان عيسى يبي يتزوج كوثر بس سكت
وقلت بعدين اعرف التفاصيل ما يحتاج العجله
وسيف بيفكر في ندى وبيتزوجها ليش حرام يتزوجو بنت العم <<<< عليه افكار غريبه
وأتوقع ندى بتتقرب من صفيه أكثر وبيصيرن حبايب
كوثر ان شاء الله توافق ويفتك علي
ما حبيت شخصيت لطيفه يعني هيه غنيه خلاص بتتحكم في الي تباه خسييييييييسه

شكلك خطيرة انتي عارفة القصة من وين ؟؟

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 37
قديم(ـة) 10-06-2012, 10:47 PM
صورة همس الغلآا الرمزية
همس الغلآا همس الغلآا غير متصل
©؛°¨غرامي مجتهد¨°؛©
 
الافتراضي رد: رواية تيارات الحب / بقلمي


لااااااااااا بس توقعات لا غير هههههههه
يمكن ساحررههههه
لا أمزح

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 38
قديم(ـة) 10-06-2012, 11:06 PM
OmanI-CooL OmanI-CooL غير متصل
©؛°¨غرامي جديد¨°؛©
 
الافتراضي رد: رواية تيارات الحب / بقلمي


اقتباس:
المشاركة الأساسية كتبها همس الغلاااا مشاهدة المشاركة
لااااااااااا بس توقعات لا غير هههههههه
يمكن ساحررههههه
لا أمزح
من بهلاء؟؟

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 39
قديم(ـة) 10-06-2012, 11:16 PM
صورة همس الغلآا الرمزية
همس الغلآا همس الغلآا غير متصل
©؛°¨غرامي مجتهد¨°؛©
 
الافتراضي رد: رواية تيارات الحب / بقلمي


هههههههه لا من الشرقيه ههههههه

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 40
قديم(ـة) 12-06-2012, 08:59 PM
صورة همس الغلآا الرمزية
همس الغلآا همس الغلآا غير متصل
©؛°¨غرامي مجتهد¨°؛©
 
الافتراضي رد: رواية تيارات الحب / بقلمي


متى راح تكمل

الرد باقتباس
إضافة رد

رواية تيارات الحب / بقلمي , كاملة

الوسوم
الحب , تيارات , خليجية , رواية , عمانية , طويلة
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايتي الأولى : أبي أنام بحضنك و أصحيك بنص الليل و أقول ما كفاني حضنك ضمني لك حيل / كاملة ازهار الليل روايات كامله - يتم نقل الرواية هنا بعد اكتمالها 6835 28-05-2019 01:18 PM
مجلس الروايات للإستفسارات و الطلبات فقط [ الإقتراحات ممنوعة ] ؛ وردة الزيزفون روايات - طويلة 18339 04-08-2013 11:40 AM
مجلس الروايات للإستفسارات و الطلبات فقط [ الإقتراحات ممنوعة ] ؛ روح زايــــد روايات - طويلة 2003 07-01-2012 08:52 PM
مجلس الروايات للإستفسارات و الطلبات فقط [ الإقتراحات ممنوعة ] ؛ ضمني بين الاهداب روايات - طويلة 2005 23-06-2011 08:16 AM
مجلس الروايات للإستفسارات و الطلبات ؛ !! أنـثـى الـ خ ـيـآلـ !! روايات - طويلة 3973 07-10-2010 01:10 PM

الساعة الآن +3: 01:44 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1