حتى جرحه كآن ذوق : ) ©؛°¨غرامي مشارك¨°؛©

السلآم عليكم ورحمة الله وبركآته ..

هذي أول روآيه لي .. تحكي عن وآقع عآئله إمآرآتيه مرّت عليهم لحظآت فرح ؛ حزن ؛ سعآده ؛ تعآسه . . قدّ يرآهآ البعض تآفهه ولآ تحمل أي معنى ! لكنّهآ بالنسبه لنآ غير ذلك ..
جميع آحدآثهآ وآقيه وجميع شخصيآتهآ من الوآقع .. جسّدنآ جميع الشخصيّـآت بطبيعتهآ شكلآ وصفآت ..
ربّمآ يكون الحوآر هُو الشّيء الوحيد غير الحقيقي لكنّه آقرب للوآقع .. ب معنى آخِر . . لقد قمنآ بِ حبك الحوآر التقريبيُ للوآقع قدر المُستطآع ..
هي مزيج من 4 سنوآت مرّت علينآ بكآمل تفآصيلهآ .. عشنآ حلوهآ ومرّهآ كَ قدر محتّم علينآ .. قد يكون الفرق وآضح بين بـآرت وآخر .. لأنهآ كتبت بِ 6 أنآمل جميله من شخصيآت الروآيه ..
والبعض الآخر سآعـد فيهـآ
. .


البدآيـــــــه ::

وسط ذاك القصر الكبير ، الي حديقته ماخذه نص مساحة فريجهم ، بالتحديد في الصالة الي ف الطابق الثاني .. رفعت راسها وعلامات الصدمه مبينه في ويهها ، تناظر أمها بعيون كلها صدمه وحيره كأنها تبي تقولها " قوليلي إن كل الي قاعد يصير جذب وما في شي منّه ! يُمه دخيلج قوليلي انج تتغشمرين وياي بس تبين تجوفين ردة فعلي !! يُمه تكلممممي ليش ساكته ؟؟ " بس ما حصلت ولا جواب من أمها غير الصمت وعيون كلها حزن ..


هذآ كَ بدآيه فقط .. لُو رأينـآ تشجيع القُرّآء على إكمآلهآ قمنآ ب إكمآلهآ .. ولو لم نلقى آي تشجيع سنتوقّف عن إكمآلهـآ ..

تحيّـآتنآ . . .


أنثى سموها شامخ ©؛°¨غرامي مشارك¨°؛©

مرآآحب
نزلي بارت طويل يكون مليء بالاحداث
من البدايه منزله سطريين ولا احداث ولاشي وتبين تعرفين
رأي القاري وبتكمليين او لا غريب امر بعض الكاتبات ~

miss sleeping ©؛°¨غرامي جديد¨°؛©

هلـوين ؛
العنواان جذبني حييل ، وفكرتها رووعة / لآهنتي نزلي البارت لجل نشوف الآبدااع ^^

Ms.hajar ©؛°¨غرامي متألق ¨°؛©

شكله حلوه بس المفروض منزله بارات كامل عشان تشوفين تفاعل كثير ع عموم واصلي ابداعك

عےـزف آلـهےـدووء ©؛°¨غرامي مشارك¨°؛©

مرحباا
نزلي باارت ولي عودا
موووفقه بطرحكك ..


حتى جرحه كآن ذوق : ) ©؛°¨غرامي مشارك¨°؛©

والله كنت نآيمه والآيفون ف إيدي ..
من جفت الردود تحمست آحط البآرت ..
ثوآني ويكون عندكم 3>

حتى جرحه كآن ذوق : ) ©؛°¨غرامي مشارك¨°؛©

وسط ذاك القصر الكبير ، الي حديقته ماخذه نص مساحة فريجهم ، بالتحديد في الصالة الي ف الطابق الثاني .. رفعت راسها وعلامات الصدمه مبينه في ويهها ، تناظر أمها بعيون كلها صدمه وحيره كأنها تبي تقولها " قوليلي إن كل الي قاعد يصير جذب وما في شي منّه ! يُمه دخيلج قوليلي انج تتغشمرين وياي بس تبين تجوفين ردة فعلي !! يُمه تكلممممي ليش ساكته ؟؟ " بس ما حصلت ولا جواب من أمها غير الصمت وعيون كلها حزن ..
أم سعود : جوري إفهميني ، البيت فظى علينا وما في أحد غيري انا وياج ، فكري عدل يُمه ترا كل هذا لمصلحتج انتي قبل أي أحد !!
جوري والدموع بدت تنزل على ويهها : لمصلحتي ؟ كيف لمصلحتي كيف ؟ كيف تبيني أسمع كلامج هذا واقتنع فيه ! لا وبعد تبيني أستانس وأقوم أرقص ؟ تبين تتزوجين ؟؟ هذا وأبوي ما كمل إلا 6 شهور من توفى !!!!
أم سعود " وبدت دموعها تنزل على ويهها من تذكرت زوجها المرحوم " : يُمه قلتيها أبوج توفى .. والحي أبقى من الميت وصدقيني لو ما كنت جايفه هالشي لصالحج انتي ما كنت بسويه وانتي تجوفي إن البيت ما فيه أحد غيري أنا وياج ، صدقيني ما بيتغير شي ، بس بيكون ريال ويانا ف البيت وهذا بس الي بيتغير ..
جوري : إيه صح ! بس هذا الي بيتغير .. بياخذ مكان أبوي ! بيقعد مكانه على طاولة الطعام ، بيرقد في غرفته وفي مكانه ! بيتحكم في كل قراراتنا ، واكيد بيجبرني اسميه أبوي !! كل هذا بيتغير وانتي تقولين لي ما بيتغير شي ؟
أم سعود وهيه تتقرب من بنتها : جوري فديتج إسمعيني .. انا وياج بروحنا ف البيت وأبوج الله يرحمه راح عنا ، نبي سند لنا ف هالزمن الي ما يرحم .. والله يا جوري ثم والله لو ما كنت جايفه هالشي فيه خير لج ما كنت بسويه ولا أفكر فيه ..
جوري وهيه تقوم : بس نحن مو بروحنا يا يمه والله مو بروحنا ! خوالي وعمومتي بيوتهم كاهي ما تبعد عن بيتنا غير خطوتين ! وبيت يدي بعد ملاصق في بيتنا ! وأمي العوده بعد موجوده ما راحت ! أهلنا كلهم حولنا يا يمه وانتي تقوليلي بروحنا ؟ بعدين نسيتي أخوي سعود ؟
أم سعود : لا ما نسيت سعود ، بس يا يمه انتي تجوفي وضع أخوج كيف ، دراسته برع الإمارات ماخذه كل وقته ! حتى عزا أبوج منعته دراسته من حضوره ، تبيه يلحق علينا لا صار فينا شي لا سمح الله ؟
جوري وهيه تصييييح بحرقه : يمه انا عندججج ما بروح مكان وسعود كلها سنتين بالكثير ويكون عندنا .. ليش تبين تتزوجين ليش ؟ لهالدرجه نسيتي أبوي وما عدتي تذكرينه ؟ يمه أبوي ما صار له 10 سنين من توفى ، أبوي كمل بسس 6 شهور ..
أم سعود وبدا قلبها يعورها من يابت طاري المرحوم وفي خاطرها " آآآآه يا جوري والله ما تدرين إن جرحي للحين طاب ، أبوج في حياتي كلها ما راح أنساه ، كيف تبيني أنساه وهو أول حب ف حياتي ، كيف تبيني أنساه وما جفت منه إلا كل شي طيب ؟ الله يرحمكك يا أحمد ويغمد روحك الجنه ، والله لو ما كانت وصيتك إني أتزوج ما كنت بفكر في السالفه أصلا ، بس ماقدر أقولها إن هذي كانت وصيتك والله ماقدر "
مسحت أم سعود دموعها وراحت توقف حذال جوري إلي صدمتها للحين مبينه عليها : جوري ، صدقيني انتي بترتاحين أول وحده ، وبعدين ليش خايفه يا يُمه ؟ هذا وإنتي ما عرفتي إلي راح أتزوجه !
جوري : ما أريد أععععرفه ولا أريد أجوفه ولا حتى أريد أعرف إسمه ، إنتي كيف تسوين جي كيف ؟ كيف طاوعج قلبج تنسين أبوي بهالسرعه ؟
أم سعود وقلبها مجروح من كلام بنتها : خلاص يا جوري أنا خذت قراري ومستحيل أتراجع عنه لو شو يصير ، وخذت موافقة الكل ، خذت راي خوالج وعمومتج ويدج ويدتج وأمج العوده وسعود أولهم كلهم ..
جوري : حتى سعود موافق ؟ حححتى سعود ؟
أم سعود وهيه تهز راسها : إي حتى سعود ، ولو هالشي جافوا إنه بيضرج وبيضر أخوج ما كانوا وافقوا من البدايه ، وأنا ما راح اروح بعيد ، انا راح أخذ عمّج فيصل ..
عطت أمها ظهرها وحسّت الدنيا بدت تدور فيها وإن ريولها إنشلت وما عادت قادره تشيلها ، عمي فيصل ؟ أخو أبوي ورفيج عمره الروح بالروح ؟ جي تسوي يا عمي ؟ كيف ترضاها على عمرك تسوي هالشي ؟ كيف ترضى تاخذ أمي بعد أبوي ؟ كيف يا عمي كيف ؟
قطع عليها حبل أفكارها صوت أمها من وراها : جوري حبيبتي قتلج إنتي أول وحده بترتاحي من هالشي ، انا أعرف شكثر إنتي تحبي عمج ، وحطي ف بالج إنه مستحيل ف يوم يفكر يأذيج ولا يسويلج شي ، وأبوج أكيد راح يكون مرتاح فـ.....
بس ما قدرت تكمل كلامها وهيه تجوف جوري تركض نازله من الدري " السلم " للطابق الأول والدموع مغطيه ويهها ..
أم سعود : جوووووووووري وين رايحه ؟
بس جوري ما كانت تسمع أمها ولا تجوف أي شي جدامها ، كانت تركض وتصيح بشكل هستيري ، ما تدري كيف وصلت لعند باب الصاله إلا وهيه صادمه ف شي خلاها ترجع على ورا وكانت شوي وبطيح بس إيده كانت أسرع ومسكها من جتوفها ..
سيف وهو ماسكها وبصوت كله خوف من الي يجوفه : جوري بلاج ليش تبجين ؟ شو صاير لج ؟
هنيه جوري ما قدرت تتحمل أكثر ، تعلقت ف إيده أكثر وكانت تصيح ب شكل أقوى .. وما قدر يفهم كلامها المتقطع من صياحها المتواصل غير هالجمله " الله يخليك طلعني من هنيه مابي أبقى أكثر " ، طلعها من البيت وركبها سيارته وانطلق فيها وهو ما يدري وين بيروح ..
أعرفكم بالشخصيات [ أم سعود عمرها 34 سنه متزوجه صغيره وهيه عمرها 14 سنه ، إنسانه جدا طيبه وهمها الوحيد هو عيالها ، تزوجت ولد عمها " أبو سعود " وعمره 17 سنه بحكم عاداتهم الـ شبه جاهليه زمان أول ، بس سرعان ما تعلقت ف أبو سعود لسبب طيبته وحنانه ..
جوري : بنت يعجز اللسان عن وصفها ، جميله بشكل ما ينوصف ، عيونها ناعسه ولونهم عسلي فاتح ورموشها طوال وكثاف ، خشمها طويل مثل السيف وشفايفها مليانه ولونهم وردي طبيعي ، شعرها حرير يوصل ل خصرها وبيضا بياض الثلج ، بإختصار كانت ملكة جمال ، عمرها 17 سنه ، هذي آخر سنه لها ف المدرسه " ثنويه عامه " متعلقه ف خوالها وعمومتها وأخوها سعود بشكل كبير ، تعشق عمها حمد بشكل فضيع ، وهو بعد وايد يحبها ، غمازتها الي على خدها اليسار تزيدها جمال ونعومه ..
سعود : أخو جوري عمره 20 سنه يدرس ف لندن تخصص بزنس ، وايد يشبه أخته جوري وعلى طول يعرفوا إنهم أخوان ، ما كان أقل عن جوري جمال ، بالعكس وسامته تعق الطير من السما ، غمازاته الـ2 كانوا يحلونه أكثر وأكثر ، مالج على بنت عمته " عليا " ..
سيف خال جوري ، عمره 24 سنه ، طوله متناسق مع جسمه ، رياضي درجة أولى ، وسيم وأحلى شي فيه عيونه .. يدرس في جامعة دبي تخصص محاماة ..
ف السياره كان الصمت هو سيد الموقف ، كان ينتظر منها تكلمه تقوله أي شي ، أو إنها ع الأقل تقوله وين تبي تروح ، بس ما كان يسمع منها غير شهقاتها وهالشي إلي مقطع قلبه عليها ،
سيف بحنان : جوري حبيبي فهميني شصاير لج ؟ ليش جي حالج غناتي والله ماحب اجوفج جي ..
جوري وسط دموعها : سـ..ـيف صـ..ـج إنـ..ـه أمـ.ـي راح تتزوج عمـ...ـي فيصـ.ـل ؟
تنهد سيف وهو كان متوقع إن زواج أخته " أم سعود " بيسبب لجوري هالشي ، راح ع طول للبحر ونزلها معاه ، تجدّمت جوري شوي وكان نسيم البحر البارد يلفح على ويهها ويطيّر خصلات شعرها على ويهها ، أما سيف راح ناحية جوري وحضنها من ورا بس صدمته بردة فعلها ، لفّت صوبه وحضنته بكل قوتها ويلست تصيح ، كان يربّت على ظهرها وكأنه يبي يخفف عنها ، إنتظر ربع ساعه لين هدت شوي ، إبتعدت عنه شوي وقالت . .
جوري : آسفه سيف أدري إني خرعتك بس ( وسكتت شوي )
مسكها سيف من إيدها ومشاها لين الصخر الكبير إلي على البحر ويلس معاها : جوري حبيبتي قدري وضع أمج وتأكدي إنج لو كنتي مكانها بتسوي هالشي وأكثر بعد ..
جوري : بس مستحيل أتزوج بعد هالفتره القصيره ! طيب ليش بس فهموني ليش ؟
سيف وهو يتنهد : جوري حياتي إنتي على بالج أمج مستانسه على هالوضع ولا مرتاحه ؟ إنتي أكثر وحده تعرفي شكثر أمج كانت تحب أبوج الله يرحمه ..
جوري بانفعال : ودام انها تحبه ليش تبي تتزوج ؟
سيف بانفعال أكثر : لأن هذي ( سكت شوي وهو يتذكر كم مره أكدت عليهم أم سعود ما يقولوا لها إن هذي وصية أبوها ) آآآآه يا جوري والله اني مب عارف ليش سويتي كل هالحفله ؟ أنا أعرف إنج تحبي عمج فيصل وما توقعت إنج ترفضي هالشي أبدن ..
جوري بإنكسار : أحس أمي قاعدة تخون أبوي ، صح إنه توفى بس بعد آسميها خيانه ! والله ما صار له فتره من توفى غير 6 شهور وأمي تبي تتزوج ؟
سيف : إحترمي رغبة أمج يَ جوري ، تذكري كل شي حلو سوّته عشانج وعشان سعود وأبوج ! جم ضحت عشانكم جم ؟
جوري : خل تسوي إلي يريحها ..
سيف بفرح : يعني ما عندج أي إعتراض ؟
جوري وهيه تهز راسها : ما عندي شي أقوله ، لاني بموافقه ولاني برافضه ، بس عندي شرط ..
سيف : إلي هو ؟
جوري : ما ارجع البيت لو شو صار ، ولا يطيح لساني لسان أمي وعمي فيصل ..
سيف والصدمه ماليه ويهه : بس هذي أمج !! جنتج ونارج !! كيف جي ما بتكلمينها ؟
جوري والدموع ف محجر عينها : هذا شرطي ولو وافقت عليه ما عندي أي مانع ، بيت يدي مفتوح " قصدها بيت أبو أمها وأبو خالها سيف " وإذا ما تبوني ترا بيت أمي العودة بعد ما يقصر " أمها العودة إلي هيه يدتها أم أبوها بحكم إن يد جوري متوفي " ..
سيف : شو هالكلام ؟ نحن ما نباج ؟ انتي تدرين إن أمي وأبوي بيستانسوا لو ييتي عندنا ، بس أمج كيـ.....
جوري وهيه تقاطع خالها : سيف خلاص .. أمي بتتزوج وأبدن مب بحاجتي ولا بحاجة وجودي ف البيت ..
سيف : الله يهديج مادري من وين هالراس اليابس !
جوري : ممكن طلب ؟
سيف : آمري فديتج !!
جوري : أبغي عمي حمد ، دخيلك دق عليه نسيت فوني ف السياره ..
سيف وهو يبتسم : إن شآلله ما طلبتي .. وعلى طول ظهر فونه من مخباة كندورته ودق على حمد وبعد ثواني .. مرححبا الساع يَ النسيب ، ههه خلآص ولآ يهمك ، يا نسيبي ويا ولد عمي ، الحمدلله يسرك الحال شحالك إنت ؟ هههه دوم إن شآلله تستاهل كل خير ، أفأأأأ ألحين أنا مال مصالح ؟ مالت على هالويه والله لو مب جوري قالتلي تبيك ما كنت داق عليك أصلا ، إجلب ويهك يلا باي .. صج إنك ماصخ سيفو ها ؟ رووح يلا ، هههههه هيه ألحين سيف حبيبي ! كل ها عشان جوري ؟ زين إسمع هالدلوعه تراها بهدلتني تعال لها لا أفرها ف البحر وأروح عنها ، ههههه وأنا أقدر أصلأ ؟ مممم هيه بحر إلي حذالنا بوديها الفجيره يعني ؟ ههههه نترياك ، الرب حافظ .. وسكّر عنه وعيونه على جوري : الحين بيوصل عمج الخبل ..
إبتسمت جوري إبتسامة إرتياح وهيه تناظر خالها : سيف فديتك والله لو مو إنت ما كنت أدري شو بسوي ..
سيف وهو يغطي ويهه ب إيده : إستحيت ترا ..
جوري : هههه خل عنك عاد ..
سكتوا فتره وبعدين . . .
سيف وهو يبتسم : تدرين إشتقت لضحكج ، تذكرين أيام أول يوم أصيدج أنا ونواف " نواف هذا أخو سيف التوأم " وإنتي متعلقه ف سيارة الماي من ورا عسب تحوطين ع الفريج ؟
جوري والخجل واضح عليها : جب لا تذكرني ب الماضي السخيف ..
سيف : ههههههههههههههه والله إن نواف كل ما يتذكر شكلج يروح ف خرايطها من الضحك ، زين تذكرين سعود وعبدالله يوم يسرقوا صحون بيت أم عايشه ويبيعونها على سيارة الصحون كل جمعه ؟
جوري : هههههههههههههههههه والله ماحد مخبّل ف سعود غير عبّود ولد عمي الله يهديه ..
سيف : لا والله سعود إلي مخبل فيه وإنتي الصاجّه ..
تفاجؤوا بصوت حمد من وراهم : وتذكرون يوم عايشه بنت أم عايشه تظهر لهم بالمخمّه تبي ترد صحونهم ؟
سيف : هههههههههههههههههههههههه والله أيام حلوه ..
قرّب حمد من سيف وقاموا يسلمون على بعض ،
سيف كان يبي يخليهم بروحهم لأنه يدري جوري كيف ترتاح لحمد : أنا بروح أييب بارد وبرجع .. وراح عنهم ..
حمد : بلاه الحلو جي ؟ ليش عيونج منتفخه وخشمج أحمر صاروخ ؟
جوري وهيه تبتسم : إنت ليش ما قلت لي عن أمي و( بلعت ريجها بغصه ) وعمي فيصل ؟
تنهد حمد وهو يقعد حذال جوري : حياتي ما كنت أنا إلي أبغي أخبرج ، كنت أبغي أمج تقولج وهذي رغبتها ، صدقيني يا جوري فيصل ما في منه وإنتي تدرين كيف يحبج إنتي وسعود ، وكيف يحترم أمج ، أنا أدري شو إلي جارحنج ، تفكرين السالفه كلها خيانه من أمج لأبوج ، انا متأكد من هالشي لأني أكثر واحد فاهمج .. جوري فديتج قالوها الحب للحبيب الأول ، مستحيل أمج تحب واحد غير أبوج حتى لو تزوجت مليون ريال بعده صدقيني ، سوت كل ها عسب تضمن حياتج انتي قبل سعود ، سعود ماشالله عليها صار ريال وكلها جم سنه وبيتخرج وبيدبّر عمره ، بس إنتي بنت محتاجه من هو يوقف وياج ويكون حسبة أبوج صح ولا ؟
جوري : مستحيل أحد يكون مكان أبوي مستحيل ، إنت فاهم شنو يعني أبوي ؟ يعني لو أموت وأحيا ما ألاقي واحد شرات طيبته وحنانه .. بعدين ليش عمي فيصل ليش ؟ ليش تتزوج رفيج أبوي الروح بالروح قبل لا يكون أخوه ليش ؟
حمد وهو يبتسم : تتزوج واحد جريب ولا وواحد غريب ؟ أنا أبيج تقوليلي بتكوني مرتاحه أكثر ويا فيصل ولا ويا واحد غريب ؟
جوري : ف الحالتين ما بكون مرتاحه ..
حمد : أنا أدري وفاهم هالشي ، بس راحتج أكثر وين بتكون ؟ ويا فيصل ولا الغريب ؟
جوري وهيه تتنهد : أكيد عمي فيصل ..
حمد : وهذا هو ، تتزوج واحد جريب والكل يعرفه ولا تروح للغريب ، بعدين أمج بعدها صغيره ما وصلت 40 سنه ! ليش تحرميها من شي من حقها ليش ؟ ألحين بعد كل هالتعب والتضحيه والتربيه مستكثره عليها فرحه بسيطه ؟ بعد ماقدر اقول عنها فرحه لأنها بالنسبه لأمج ما هي بفرحه أبدن ، أنا فاهم أمج وعارفنها ويا غير أبوج ما ترتاح ..
جوري : عيل ليش تتزوج وهيه تعرف إنها ما بترتاح إلا ويا أبوي ؟
حمد : ضمان لج ولحياتج يا جوري ، من ساعه شقول أنا ؟
جوري : خلاص سكر السالفه ، فهمت ..
ابتسم حمد ب ارتياح مع انه عارف بنت أخوه إنها للحين تفكر فالسالفه ومستحيل تخوز عن بالها دقيقه وحده ..
سمعوا صوت سيف من بعيد وهو يصارخ عليهم : ها خلصتوا كلام ولا أروح أألف لي شغله وأخلصها ؟
حمد : ههههههه لا تقول لي مسويلي فيها ومخلينا بروحنا ؟
سيف : هيه عيل شو ؟ ها ولد عمي اروح ولا ؟
جوري : تعال حبيبي تعالي .. مافي شي نرمس عنه مهم ..
تقرّب سيف صوبهم ومد لهم ب جيس البارد والحلاوه والجبس ..
حمد وهو يناظر الجيس وإلي فيه : من متى صرت كريم سيفو ؟
سيف وهو يمط عن حمد الجيس ويعطيها جوري : ومنو قالك إن هذا لك ؟ هذا لبنت أختي ، ماشي شغله أخذ لكك إنت ؟
حمد : هيه والله ؟ زين ما عليه خل أجوف منو بيزوجك سارة ..
سيف وهو يرجع ياخذ الجيس من إيد جوري ويعطيها حمد : ها خذها كلهههها لك تامر إنت .. شو تبي بعد ؟
جوري : هههههههههههههههههه والله وعرفت عوقك يا خالي ، عمتي ساره ها ؟
سيف وهو حاط إيده على قلبه : آآآآآه من عمتج آه ، معذبتني يا جوري وماحد حاس ..
حمد وهو يضرب سيف ع راسه : قسم بالله يا سيفو إن ما لمّيت ثمك لـ أتواطى بطنك وأعقّك هناك " وأشر ع البحر " ، يرمس عن أختي جدامي بعد الله يعلم من وراي شو يقول ..
سيف : بل بل بل ! مثل ماهي أختك تراها خطيبتي وبنت عمي ، خلني أعبر عن حبي لها جدامك إنت وجوري ، خخخووو ما أقدر أعبر إلآ عندكم ..
جوري : ههههه بس بس والله لو يلست أكثر بتخبل .. يلا خل نروح ..
حمد : يلا قومي بوصلج البيت ، بتمرضين بهالملابس ..
سيف : لا خلها انا بوصلها على دربي .. وإبتسم ..
حمد : عادي يا سيف فريجنا وفريجكم واحد وبيوتنا حذال بعض .. ما بتأثر دقيقتين أردها بيتها وأروح بيتنا ..
جوري وهيه تبلع ريجها : لا عميم ، أنا بروح ويا سيف ، آآقصد بروح بيت يدي هناك برقد ..
حمد وهو عاقد حواجبه : ولين متى ؟
جوري : ما راح أرجع البيت أبد ، بسكن ف بيت يدي ..
إنصدم حمد فالبدايه بس ما جادلها لأنه يعرف إنه ماشي فايده ، لو حطت شي ف بالها بتسويه يعني بتسويه ..
حمد : أفاااا وبيتنا من شو يشكي ؟
جوري وهيه تبتسم : ما يشكي من شي فديتك بس بروح بيت يدي أحسن ..
فهم حمد إنها ما تبي تجوف فيصل : خلاص على راحتج .. وإلتفت على سيف .. سُوق عدل لا قسم بالله أعطيك راشدي ..
سيف : طاااعععععع منو يرمس أنتوا ، روح روح الله يهديك ..
حمد : ههههه بس انا لو مركّب أحد عندي بعقل شوي مب شراتك إنت الميانه عندك ما فحد .. الله يعين أختي عليك ..
سيف وهو خاق : فديت هالطاري ، لا تحاتي ما بسوي شي لا ف جوري ولا ف أختك ، أنا أقدر أصلا ؟ يلا فارج راسي عورني منك ..
حمد : عنلات صداك .. مادري منو داق علي يبيني أيي .. " وهو يناظر جوري " حبيبي تبين شي ؟
جوري ب إبتسامه : لا عميم سلامتك .. إنتبه ف الدرب ..
حمد : على راسي .. يلا أترخص أنا ، مع السلامه ..
جوري وسيف : ف أمان الله ..
سيف : تبين مكان ثاني ولا ؟
جوري : لا بس بيتكم ، تصدق سيفو وناسه من زمان ما نمت ويا ميره وموزي " ميره وموزه هآييلا خالات جوري إلي هم خوات سيف ، ميره عمرها 19 سنه أكبر عن جوري ب سنتين وتدرس ف جامعة زايد تخصص بزنس وموزي عمرها 22 سنه تدرس ف جامعة الامارات تخصص خدمة اجتماعية .. ماشالله عليهن قمةةةة ف الجمال " ..
سيف : يالله لا تذكريني ف هاييلا المخبل ..
جوري : ههههه ليش شو مسويات ؟
سيف : اليوم عيد ميلاد موزي والحبيبه ماخذه لها كيكه وكاتبه عليها كل عام وانا بخير .. ويايبه اليهال كلهم يغنولها هابي بيرث دي تو موزي .. عاد ميره قامت وجمّعت اليهال قبل موزي وقالت لهم غنولها هابي بيرث دي تو ميااااااااااو .. هنيه موزي عصبت ومسكت ياهل ياهل وقامت تضربه ع الخفيف وإلي تطلعه من الصاله تقول له ماشي حفله يلا آآآآآآآآآآآوت ..
ماتت جوري من الضحك وهيه تذكر إن موزي تعصب لمّا احد يقولها مياو ، خاصه وإن مياو لقبها من كانت بيبي ..
سيف إبتسم ع ضحك جوري : ويا هالتقويم الأحمر ، متى ناويه تشيليه ؟
جوري : وإنت ليش مقهور ؟ خلّه برايه يزيدني جمال ..
سيف : إي والله جمال ، قولي يزيدج إنقراض ، يزيدج إختفاء ، يزيدج تحلّل .. موو جمال ..
جوري : هههههههههههههه ليش عاد ؟
سيف : إنتي بروحج ضعيفه ناقضه أحد يزيدج ضعف ؟
جوري : يلا قم قم إنت وصلني حدي تعبانه ..
مشوا للسياره وإنطلقوا لبيت يدّ جوري " إلي هو بيت أبو سيف "
نسيت أعرفكم على حمد .. ولد عم سيف ويصير عم جوري .. عمره 24 سنه يشتغل ضابط ف الشرطه ، مب طويل شرات سيف وبعد مب قصير ، كان طوله جدا عادي يناسب جسمه الضعيف .. وسيم وإلي يميزه هو بياضه ، كان غير عن أخوانه وعيال عمّه السمر !! وهذا الشي إلي يميزه عنهم ،
وصلوا جوري وسيف ل فلة يدها ، نزلوا وكانت الساعه 10 وربع فليل ، دخلوا داخل وجافوا نواف يرمس بالفون ف الصاله الزجاجيه الموجوده برع البيت ، دخلت عليه بس هو ما انتبه عليها ، سمعته قاعد يرمس عنود " عنود هاي توأم عليا خطيبة سعود وتصير بنت بنت عم نواف وبنت عمةة سعود وجوري "
سيف وهو يهمس ل جوري : يوميآ على هالحال ، البنت المسكينه تترجاه تقوله أبي أنام باجر عندي مدرسه بس هو لا حياه لمن تنادي ..
جوري : إييييه وأنا أقول ليش أجوف عنّوده الصبح مفهيه تبي ترقد ! والله خالي نواف معذب بنت عمتي وايد ،
** ملاحظه : عندنا ف دبي عادي البنت تملج وهيه ف المدرسه يعني ما يطلعونها من المدرسه ، بعكس الإمارات الثأنيه ^_^
سيف : يا بخته والله ، خليني بس أملج على ساروه بتجوفين الفون 27 سآعه ف آذني ..
جوري : بس اليوم 24 سآعه شدخّل 27 ؟
سيف وهو يضربها على راسها : تعبير مجازي شفيج إنتي ؟
جوري : إيييه هههه يآ زين تعآبيرك إنت بس ..
بعد ما إنتهى نواف من مكالمته سكر عن عنود ورجع براسه لورآ يتسآند على الكرسي وهو مو منتبه لجوري وسيف .. وتنهد تنهيدة طلعت من خاطررر خخخخاطره ..
سيف : لا والله ؟ لهالدرجه عنود معذبتنك ؟
فز نواف من مكانه ولف براسه لسيف وهو حاط إيده على قلبه : بسم الله من متى وإنت هنيه ؟
سيف وهو يقلد صوته : من حبيبي تعبآنه ؟
جوري : هههههههههههههههههههههههه ..
نواف : هههه هذا خالج قليل أدب ، بنجوفك شو تسوي ويا ساروه ..
سيف وهو يرمي بنفسه على الكنبه : روح لاه ما بيلس أتميلح لها ، ما عندي أنا هالحركات لو تسمع صوتي ف الشهر مره تحمد ربها ..
جوري والصدمه على ويهها : أياااا العيار ! توك حاط إيدك على قلبك وتتفدّى من ياب عميم حمد طاريها ..
نواف وهو يضحك : قلتيها عيار ما عليج منه ، هذا ويهي لو ما خق ذيج الساع .. كنتوا ويا حمد وانا أدق له من ساعه ؟
جوري : هيه كنا وياه ع البحر .. راح يرقد باجر عليه دوام ..
سيف : شدراج ؟
جوري وهيه تبتسم : حافظه جدوله 100% ..
نواف : إسمآآآآآآآع ! مممم يوم الخميس آخر حصه شو عليج ؟
جوري وهيه شآقه الحلج : آآآآآي تي ..
نواف : هههه قفطتني كنت ناوي عليها لو ما ظهرت حافظه جدولها وحافظه لنا جدول حمد ..
سيف : صج إنك غبي ! قلتها يوم الخميس وآخر حصه ! كل طالب بيحفظ هالحصه صصصصم .. بعدها ويك إند لاه ..
جوري : هذا لو ما حافظنّه كامل ..
نواف : يييييييييييييييهآآآآ ، أيام المدرسه والله ..
جوري : هيه خخخالي نواف ، تذكر يوم أستاذ الدين يشتكي عليك عند يدي ؟
نواف ب غباء وهو يحك شعره : متى هذا صار ؟
جوري : يوم كان يشرح الدرس وإنت تكتب ع الطاوله أغاني ..
سيف : الله يذكره بالخير أستاذ وحيد .. " وهو يقلّد صوت أستاذه يوم يكلم أبوه " ده الولد نواف هيطلعني من طوري ، أنا أشرح الدرس للحيط وهوّه آآعد " قاعد " ويكتب لي أغاني متحت حمد ده " ميحد حمد "
جوري : هههههههههههههههههههههههههه آسميك متخشع يا خالي ..
نواف : هاي بنت عمتج كانت مخبله فيني شسوي ؟
سيف : قسم بالله كنت كل يوم آروح ل آبوي أصيييح أقوله روح إخخخطب عنود بنت روضه بنت عمي لولدك تراه ذبحنننني حاط لي أغاني مال أول قوم أبيض وأسود ..
نواف : هذا فلم يوم إنه أبيض وأسود موو أغأني !
سيف : إلي هو ، ذبحتني يا أخي ما يسوى عليك ..
جوري وهيه تقوم : عيل وين ميره وموزي ؟
نواف : أحيد ميره تطفح جبس وموزي فديتها يالسه تدرس ..
جوري : تدرس ؟ بس الدراسه باجي عليها أسبوعين لين تبدي !
نواف وهو يهز راسه : مادري تقول عندها أول أسبوع إمتحان وتبي تفتك منه ..
جوري : بروح أجوفها عيل ..


حتى جرحه كآن ذوق : ) ©؛°¨غرامي مشارك¨°؛©

الصرآحـــــه إحبآآآآآآآآط ..
حمستوني آحط البآآآرت ومآ في ولآ رد ؟
88 مشآهده وولـآ رد ؟
آحبطتوووني ><


وردة الزيزفون
✿ إدارة الإقسام ✿

صباح الخير ........ياهلا فيك عزيزتي بغرام .......بداية جميلة .....لاتستعجلي عزيزتي انتي بأول المشوار ولسى الاحداث ماتوضحت اصبري وبتلاقي ردود ان شاء الله ........انا بصراحة مع الجوري في رفض زواج امها لانو الجوري مش طفلة وكلها سنة او يمكن اقل وتنخطب يعني عذر امها مو مقنع ابدا الوحدة مانسى زوجها بسهولة وهي ست شهور وتبغي تتزوج تنتظر شوي الدنيا مابتطير شراح تستفيد وبنتها الي على قولتها بتتزوج علشانها بتترك لها البيت ........ودام اخوانها قريبين منها مابتضيع .......وحتى لو وصية زوجها لو مالها رغبة ماتزوجت بهالسرعة ..


القوانين / الإطلاع هام و الإلتزام ضروري


وهذا الموضوع راح يفيدك ياليت تطلعي عليه

قضايا

حتى جرحه كآن ذوق : ) ©؛°¨غرامي مشارك¨°؛©

المشاركة الأساسية كتبها وردة الزيزفون اقتباس :
صباح الخير ........ياهلا فيك عزيزتي بغرام .......بداية جميلة .....لاتستعجلي عزيزتي انتي بأول المشوار ولسى الاحداث ماتوضحت اصبري وبتلاقي ردود ان شاء الله ........انا بصراحة مع الجوري في رفض زواج امها لانو الجوري مش طفلة وكلها سنة او يمكن اقل وتنخطب يعني عذر امها مو مقنع ابدا الوحدة مانسى زوجها بسهولة وهي ست شهور وتبغي تتزوج تنتظر شوي الدنيا مابتطير شراح تستفيد وبنتها الي على قولتها بتتزوج علشانها بتترك لها البيت ........ودام اخوانها قريبين منها مابتضيع .......وحتى لو وصية زوجها لو مالها رغبة ماتزوجت بهالسرعة ..


القوانين / الإطلاع هام و الإلتزام ضروري


وهذا الموضوع راح يفيدك ياليت تطلعي عليه

قضايا

صبآححّ الوردْ 3>
ممم آنآ ويآج .. المفرَوض مآ تتزوج آم سعود . .
بس بنعرف ليش سوّت كل جي ف البآرتآت اليآيه إن شآلله ..

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1