يا ما بكيت على الاطلال ©؛°¨غرامي جديد¨°؛©

السلام عليكم ورحمة الله وبركاته
معاكم الكاتبة يا ما بكيت على الاطلال تطل عليكم بروايه جديده اسمها :
تركني حبيبي وزوجوني اياك غصب
اتمنى ان تنال اعجابكم
اتركم الآن مع البارت الاول


البارت الاول

: ما بتزوجه ما ابيه ما احبه ما تدرين يعني أني أنا احب سعيد
: وبعدين وياج خلاص أنسيه أبويه اموافق ولو شو سيويتي ما بيغير رايه
: هب بكيفكم ما بتزوجه يعني ما بتزوجه
: انتي الكلام وياج ضايع ، تخيلي حد يسمعج تقولين احب فلان واحب علان
منصدمه من أختها : انتي تعرفين ترمسين عن منووو ، انتي ترمسين عن سعيييد ، هذا سعيييد مب أي احد هااااااااذاااااااا سعيييييييييييد
: أدويييين خلاص اعقلي والله لو يسمعج نايف ليكسر راسج
الدانه : سلاااااموه فيكني من سخاافتج أنا ما عليه من نايف منوو أصلاً هذا نايف ولا تيلسين تهدديني وكل وشويه تقوليلي ياويلج وياويلج ولو سمعج مدري منو ، بيصير مدري شنوو
سلامه : أنزين هذا الي بيصيير
الدانه : اطلعيييي بررررع
سلامه وعلامات اصدمه ع ويهاا : تطردييني ؟!
الدانه : برررررررع
سلامه طلعت من الحجره وسكرت الباب بقووووه
يلست الدانه تبجي

الدانه و سلامه خوات بالرضاعه أعمارهن 20 ، سنه ثالثه جامعه ، الدانه تدرس هندسه ديكور أما سلامه فتدرس إخراج ، الدانه دلوعة أبوها لكن ليش غصبها على الزواج ،،، التفاصيل بتوضح من خلال الأحداث

سلامه نازله من الدري معصبه وتتحرطم
: هلا بالحب هلااا ، بلاااه الحب امطنقر اقصد امعصب
سلامه : مرياانووه حل عني مالي خلقك
مروان : بصي حضرتك يا استازه اسمي مروااااان ، اسمي اييييييه؟! مروااان المروان الي امووه قابتو وسمتو مروان وطلع أخو اختك إلا انتي هي أختها وأنا أخوها ابن أمي وأبوي الي سموه مروان
سلامه : بس خلاص الله يخليك والله معصبه ومالي خلقك
مروان : ترا احين أنا اسئلج ليش معصبه ؟!
سلامه : هذي أدويييين طردتني من الحجره
مروان يسوي عمره منصدم : اووييييييه لا مووو من صج
سلامه : كرووووان لا تيلس تستهبل وخلاص عاد ذليتني يعني الواحد مايقدر يرمس باللهجه الي يبيها
مرواان مخلي عمره معصب : لا عاااد جي مصخت مرياانووه وعديتها لج لكن كرووووان اذبحج وأعلقج بدال هذي المروحه الي فوق راسج ، وبعدين تعالي كل يووم ومقطعتلنا أنا وأختيه اسامي ، بديت أعصب ترا ، يعني الواحد بيعدي مره مرتين ثلاث بس خلاص الشي زاد عن حده، والشي الي يزيد عن حده ينقلب ضده
سلامه "حطت فخاطرها عبالها من صج عصب" ، اول شي اخته وبعدين اهو ، شكلهم خلاص طفح الكيل مني : اوك الشيخ مروان على راسي ما بتكلم خلاص وما بزقرك غير بمروان "خلته وراحت عنه"
مروان : بلاها هذي لايكون من صجها ، خ تول زين
سلامه ماره من الصاله
ام عبدالعزيز : سلاااامي
سلامه : هلا اميييه
ام عبدالعزيز : وين رايحة ياميييه
سلامه : بروح اشم هواء برع ضايق خلقي
ام عبدالعزيز : عيل وين هي الدانه عنج
سلامه بحره : فووووق ماتبي تنزل
ام عبدالعزيز : اهااا اوك يالغالية برايج عيل
سلاامه راحت بس تذكرت شي ورجعت : اميييه تراني يعني اذا ما حصلتوني تراني يعني تعرفين كيف يعني عند يدي يعني بكون
ام عبدالعزيز : برايج امييه
: انزين وبعدين
: يعني كيف بعدين خلاص ترا انتهت السالفة
: يعني جذي بس السالفه
: نااايف عاااد خلاص لا تيلس تستهبل , انا من الصبح ارمسك جد , يعني من الصبح شاد حيلي واقولك السالفه اخر شي تقولي يعني جذي السالفه
نايف يضحك عشان يقهر الي راشد : ههههههههههه
راشد بعصبيه نش بيروح
نايف : ههه خلاص رشوود ههه اتمصخر وياك ياااخي
راشد بقهر : انا الغلطان الي ياي واشكيلك السالفه
نايف : يااارياال لا تقلبها جد ترااا انا من الصبح اسمعلك بس بغيت شوي اطفربك مايسوى علينا يا ريال
راشد : اووووف خلاص خلاص فكنا من حشترك يلا انا بروح البيت
نايف : وانا بدش دااخل
في غرفة الدانه
الدانه : الله يلعن الساعه الي رحت فيها بيتهم , الله يلعن ذااج اليوم الي طلعت فيه برع , الله يلعن اليوم الي وطت ريلي بييييتهم , يلعن ذيييج اللحظة الي سلمت ع امهم , ماااااابي ماااابي مااابي الا سعيييد , اناااا احب سعيد وابيييه واهو بيعد يحبني , مااا راح اتزوج لوو شو يستوي , ااااااااااااااااااااااااااااااااااااااااااه , وين تلفوني وين تلفوني
خربت غرفتها وكبت كل ملابسها وفرت كتبها ونثرت اوراقها واهي بعدها ادور الفون لين ما حصلته معقوق تحت الطاوله ,, مسكته بسرعه ويلست ادور بين الارقام ع الرقم الي تبي ادقله , ضعطت ع زر الارسال
الدانه : اوووف رد رد اوووف رد يااا
بصوت باين عليه التعب : الوو
الدانه بصوت امبين عليه البجى : الو سعيد الحق علي
سعيد بخرعه : الدااانه ؟! شبلاج غناتي
الدانه تبجي بصوت عااالي : سعييييد تعااال احين ابيييك سعيييد انا احبك , احبك يا سعييد
سعيد : بلاج غناااتي اناا احبج بعد تدرين ما اقدر اعيش بدون ما اتنفس هواج
الدانه بجت اكثر من سمعت كلاامه "وانا بعد ما اقدر اعيش بدوونك يا سعيد امووت لو ما اجوفك لحظة وحده " : ااااخ يا سعيد ابويه جاابرني يبي يغصني ع الزواااج
سعيد كانه حد جب عليه سطل ماي حار ع ويهه "بصدمه" : شوووو كيف وليش ومتى صار هاشي
الدانه : سعيد انا مااا ابااه قوله مااا ابيه لا يخطبني انا احبك وما ابي احد غيرك
سعيد بعصبيه : يخسي والله ياخذج مني منوو هذا قوليلي بس وانا اروح اذبحه بايدينه وبعدين انا ولد عمج اول لج من الغريب وبيرد غصبن عن الي يبي والي ما يبي
الدانه : سعيد ابويه معزم تخيل حت عطاانيه كف يوم قلت ما ابيه وما راح اتزوجه
سعيد بصدمه : كيف جي يمد ايده علييج وانتي بنته الدلوعه الي من يقولج كلمه يوقفه عند حده
الدانه : جفت يا سعيد جفت وصلت لهدرجه
سعيد : خلاص غناتيي لا تبجين انا بشوف شو السالفه وصدقيني ماراح يتم هالزواج
الدانه : سعيد اوعدني انه ما تتخلا عني لو شو ما كانت النتيجه
سعيد : انتي خبله !! مايخذج احد مني الا الموت
الدانه : ااااخ يا سعيد شكثر اني اتمنى اكوون بحضنك تمسح ع رااسي واتهديني
سعيد : وانا يا غناتي اكثر منج
الدانه توها تحس ان سعيد من صوته تعبان : حبيبي سعيد بلاه صوتك تعبان
سعيد : مافيني شي بس شوي حراتي مرتفعه وراسي مصدع ومزكم
الدانه شهقت : كل هذا ومافيك شي
سعيد يصحك بتعب : ههههههه انزين غناتي بخليج احين وبشوف شو بيصير وبرد عليج
الدانه : احبك
سعيد : وانا اهواج
الدانه : فمان الله ياغناتي
سعيد : الله وياج يا روح سعيد
تنهد سعيد ويلس يفكر منو هذا الي خطب الدانه و ليش عمه غصب الدانه انها توافق لدرجة انه ضربها ,, استغفر ربه وصلى ركعتين وفر عمره ع الشبريه وهو يحس بصداع فضيع وماحس بعمره الا واهو نايم

ام عبدالعزيز : طيبة وحنونه ,عندها 4 اولاد ,و2 بنتين والثالثه بالرضاعه
عبدالعزيز : عمره 30 ومتزوج من برع العايله وحده اسمها ريما , عنده ولدين : احمد ومحمد , 8 ,4 سنوات , وبنتين : غلا وحلا : 11, 6 سنوات
دلال : متزوجه ولد عمها اسمه خالد , عمرها 26 سنه , عندها بنوته اسمها جود
نايف : عزابي , عمره 24 سنه , دارس اداره واعمال ويشتغل مدير شركة للالكترونيا
مروان : اخو الدانه عمره 21 يدرس هندسة كيميائية
الدانه : 20 سنه
مايد : عمره 17 , سنه اولى جامعه يدرس طب عيون

سلامة : يتيمة الابوين شلها عمها ابو عبدالعزيز يوم كان عمرها 5 شهور , ابوها وامها كانوا بعز شبابهم اتوفوا بحادث اليم ما مر ع زواجهم الا سنه ونص , كانوا مضطرين يروحون المستشفى 12 بالليل لكن للاسف واهم بطريجهم للمشفى استوا الحادث


مايد كان توه راد من الدوام وهلكان مايشوف جدامه شي
غلا بنت اخوه عبدالعزيز ادور حوليه : عميه يااا عميه ياااا , حمود تعال عميه يا
مايد يوم يطالع غلا يدور راسه : غلوووي قومي عني لا دورين دورتي براسي دااار راسج قولي ااامين
غلا : عميه انته ليش جي دووم اتنازعني , انا فرحانه اني جفتك
مايد : وانا الحيوان الغبي منحوس الحظ الي جافج ,, قومي عني لا اصكج احين ع راسج
غلا : اوووووف عميه ما عليه عند ابويه
مايد معصب : عما بعينج قولي امين , هاكي الدرب جدامج
غلا تتحرطم : حيواان وااحد
مايد : نعــــــــــــم انتي يا الطمه اتسبيني يعلج الحووم قولي امين , وين بتسيرييين عنيه والله لأراويج "وركض ورها يبي يزخها"

هذا البارت الاول من روايتي ,, اذا نالت على اعجابكم بكملها ان شاء الله


السموحه منكم على الاخطاء الاملائية ان وجدت



يا ما بكيت على الاطلال ©؛°¨غرامي جديد¨°؛©

البارت الــ2ــاني :
مسك غلا وكفخها
غلا وهي تبجي : حمااار والله حمار
مايد بعصبيه : انتي جليلة حيا , امج ما عرفت اتربيج عدل
ريما كانت ادور ع بنتها وسمعت الي قاله مايد وحز في خاطرها : غلا تعالي
غلا : ماما جوفي عميه مايد كله يضربني ويقولي انتي جليلة حيا كله كله يضاربني انا ماسويتله شي
ريما : ما عليه ماما تعالي بابا يدورج
غلا راحت ويا امه
مااايد : اووووف والله اني غبي ما كان يحتاي اقوول هالكلام ,, يوووه وبعدني انا ماكنت اقصده حرفي خ تولي زيين , صعد لداره نزل الستاير وفج المكيف , قفل باب غرفته ورقد
ريما وغلا عند عبدالعزيز :
غلا اتصيح ع كتف ابوها : بابا ليش عميه ميوود يكرهني ؟!
عبدالعزيز انصدم من كلام بنته : من يقول بابا
غلا : انا اعرف عميه ميوود ما يحبني كله يضربني وقالي بعد انتي جليلة حيا امج ما عرفت اتربيج
عبدالعزيز : انزين بابا يمكن مو قصده , يمكن انتي يتيه في وقت غلط
غلا وعلامات الاستفهام : ما فهمت كيف يعني
عبدالعزيز : عمج ميود يحبج يمكن انتي رحتي لعنده واهو كان معصب عشان جذي عصب عليه ,, مو اهو توه ياي من الدوام
غلا : هيه
عبدالعزيز : جفتي اهو ياي تعبان عشان جذي يوم ايي من الدوام لا ترمسين وياه اوك بابا , لان يكون تعبان ويعصب فهمتي احين
غلا : هيه خلاص ما بكلمه ابدا
عبدالعزيز : يلا احين يا شطوره روحي بدلي وسيري ذاكري عند المدرس ,, ترا من الصبح يترياج والي يخلي المدرس يتريا شنو اهو ؟!
غلا بدلع : مو شاطر
عبدالعزيز : يلا يا حلوه سرعه خلي ميري اتلبسج
راحت غلا فووق ,, اما ريما كانت طول الوقت واقفه واتشوف كيف زوجها وحبيها يعامل بنتها
عبدالعزيز جاف ريما اتجوفه واهي مبتسمه ابتسم وعرف شنو قاعده اتفكر فيه : يلا ريمااني انا حدي تعبان ما ودج ترقدين
ردت له الابتسامه : يلا حبيبي
واهما صاعدين فوق : زعلتي من الكلام الي قاله مايد
ريما بزعل : انت دايم تبررله
عبدالعزيز رافع حياته : وانتي بتصغرين عقلج
ريما : يعني انت تجوف البنت دايما ترجع من عنده اتصيح وكل مره ادقولي عميه مايد يكرهني وانا دووم اطلع الحجج والاعذار بس لين متى يعني والله استويت ما عرف شو اقول حق البنت
عبدالعزيز : يا ريما يا حبيبت قلبي اهو ما يقصد وبعدين مثل ما يقولون الي يضربك دووم اهو الي يحبك من صج وبعدين ليش يرد حاله حال ياهل , عشان شو بيكرها ياهل هذي الله يهديج بس
ريما : لانها بنتي
عبدالعزيز مستغرب : وليش يعني مثل ما اهي بنتج اهي بنتي
ريما : اهو يكرهني ما يحبني كان يبي بنت عمه هدى تكون ام عيالك "اسرعت بمشتها وسبقته للغرفه"
عبدالعزيز تنهد : من وين اتيبين هالكلام يا ريما ,, الله يهديك يا ميود بعد انته الثاني

في بيت يخلو من الهدوء تماما
: ابويه شصار ع الموضوع
: كلمة ابوها واهو اموافق بس بياخذ شور البنت
: بعد ليش ياخذ شورها واهو موافق
: الله يهديك يا عمار انته تبي تتزوج ولا تبي تلعب ع البنت
عمار : ابويه لو ابي العب ع البنت كاان ما قلتلك اخطبها لي
ابو عامر : عيل ليش جذي ادقول هب لازم ياخذ شورها
عمار : انا ما اقصد شي بس يعني انا اخاف البنت ترفض وانا ابيها
ابو عامر : وليش ترفض شيخ ارياييل عمار الـــ **
ابتسم ابتسامه صفراء : يعني خلاص اخذ بكلامك
ابو عامر : يلا فاارج عااد صج ما تنعطا ويه
عمار كشر : ابويه انا شو قلت عشان ادقول جذي وشدخل يلا فارج بالموضوع
ابو عامر : الباب
عمار : ها هوو هيي هااا يعني صدقني صدقني , بعد الوالد هب هين يحاول ينكت
ابو عامر : لا تخليني اهون واقول لريال خلاص ما نبي بنتك هونا
عمار فااج عيوونه : لا عااد ابويه كلا ولا هالموضوع
ابو عامر : عيل اصطلب وخلك ريال
عماار : اوك اوك خلاص

ابو عامر : صديق ابو عبدالعزيز الروح بالروح , متزوج وعنده 3 اولاد و 4 بنات
ام عامر : حنونه وطيوبه لكن مزااجيه احيانا ,, يعني جذي تقلب فجاه
عامر : البجر عمره 26 عزابي يشتغل فالشرطة
بثينه : عمرها 25 متزوجه ولد عمها اسمه جااسم وعندها ولد اسمه حمد عمره 5 سنوات
عمار : عمره 23 يشتغل مهندس معماري , حلو بمعنى الكلمة واتييه حركاات جذي يغازل وجذي يعني تعرفوون حركات شباب العزووبيه
جواهر : عمرها 20 دلوعت ابوها تدرس جغرافيا كونية
عمر : 18 يدرس في الخارج وبيتخصص مترجم للايطاليه
نوره : 16 سنه في الثانويه
نوال : 13 سنه واخر العنقود

في مكان يطل ع الشارع العام
: اميييه انا مليت بروح عند ربعي
: حد زخك انزين
: اميييه عاااد انزين ليش جذي ترمسيني
: سلطااان خلااص حل عني
سلطان : اوووف يعني الواحد ما يرتااح فالقعده
ام علي : سلطووون اطلع برع رووح عند ربعك فكني بس من صدعتك
سلطان : افااا بس افاا يبنت حموود تبين الفكه مني
ام علي اتزاعج : سلطاااان قلت لك حل عني
سلطان منصدم من ردت فعل امه وحطا بخاطره : ان شاء الله يا بنت حموووود بحل عنج يالله يعلني ما عدي شارع بيتنا الا وسياره دااعمتني وتفتكين مني وطلع بسرعه قبل لا يسمع كلام امه
ام علي دموعها ينزلن : آآآآآآآآآآخ يا ربي ليش جي انا سويت الولد مااله دخل , سلطاان سلطاان تعال يا ولدي لا دقوول هالكلام , سلطاااااااااان
راشد سمع الزعييج بالصاله : هااا امييه شووو صاير اهنيه "انتبه لدموع امه" اميييه شووو صااير ليش تبجين سلطاانوه الجلب شي قاالج
ام علي : الحق ياراشد الحق اخوووك لا يصيير فيه شي
راشد : ليش شو مستوي اهنيه
ام علي : كنت معصبه وهو يرمسني وعصبت عليه وطلع برع وهو يدعي ع نفسه بالموت
راشد : لاااا حووول يااامييه السالفه مايبيلها صياااح احين برووح ايبه بس لا تبجين
ام علي : سلطااان بذمتك يا راااشد بذمتك
طلع راشد وهو يتحرطم : هيه احييين بذمتيه انا شو سويتله عشان يكووون في ذمتيه اذا صارله شي ,, ويييه رااااشد لا تتفاول ع اخوووك وقعد يهدي نفسه

نرجع لبيت ابو عبدالعزيز :
ابو عبدالعزيز توه داش البيت : السلام عليكم
كان في الصاله ام عبدالعزيز ونايف : وعليكم السلام
ام عبدالعزيز : توك ياي
نايف : لا امييييه تصدقين بعده مايااا
ابو عبدالعزيز : هيه
ام عبدالعزيز تضرب كتف نايف : عن المصااخه
نايف يضحك : هههههه امييه الله يهداج اي مصااخه هذي
ابو عبدالعزيز : نجبتوا الغدا ؟!
ام عبدالعزيز : لا احين بسير انجبه
ابو عبدالعزيز : عيل وين العيال ما اجوووف حد
نايف : والله كل وااحده منزبر في مكان
ابو عبدالعزيز : قصدك منزرب
نايف : هييييه تراني اناا قلت جي بعده , بس ابويه الله يهديك انت ما تسمع " منزرب كلمة مأخوذه من زرب الهووش << المكان الي محاوط الهوش , الغنم ، الي هووو "
ابو عبدالعزيز : عبدالعزيز وين ؟!
نايف " احين بيسألني عن كل واااحد , الي يقوول راادار البيت انا " : عبدالعزيز في بيتهم , تراا قالولي ما يبون غدا < جذااب بس عشان ما يزقرهم " يعني اهم بينشوون العصر ومنو يتغدا العصر , استغفر الله يارب سامحني ع هذي الجذبه خخخ "
ابو عبدالعزيز : اا
نايف يقاطعه : مروان فووق في غرفته , ميوود منخمد كلـ عاده , سلامووه الزقه مادري وين رااحت , الدانه في غرفتها ماظهرت من بعد السالفه ,, وهيه صح دلوول بيت ريلهاا
ابو عبدالعزيز : خلاص خلاص ما يحتااي اتكمل , بعديين تعاال اشعنه ادقول عن سلااامي الزقه , عيييب عليييك
نايف : اسفيين اسفييين ما بنعيدها مره ثااانيه
ابو عبدالعزيز : رووح ازقر خواانك ولا خل البشكاره تزقرهم
نايف : خلاص بخلي البشكاره تزقرهم
ابو عبدالعزيز : خل البشكاره تزقر البناات , اما العيال انته سير ازقرهم
نايف حااس بووزه : ان شاء الله

في بيت "ام" ابو عبدالعزيز ( اليده )
سلااامه "اووف ولا وااحد سأل عننيه "
اليده : سلاامه غنااتيه تعالي اتغدي ويانا
سلامه : يلا يدييده احين بيي , بغسل ايدي بالاول
في بيت اليده : يعيش ابو سعيد وسعيد واليده
ابو سعيد : اسمه علي عمره 32 وعنده ولد وااحد الي اهوو "سعيد" متزوج بس حرمته مطلقه, متزوج وهو عمره صغيير عشان جي ماشي فرق امبينهم امبين علي وسعيد , رافض الزوااج من بعد الطلاق
سعيد "حبيب الدانه" : عزاابي , عمره 23 سنه , يدرس مهندس طيران ، باقيله سنه وبيتخرج
سلامه : يدييده وين عيل عميه علي
اليده : والله بتاخر بيرد العصر
سلامه : وسعيد عيل وين ؟!
اليده : فووق ف غرفته كان تعبان احين اكييد نايم ,, سلاامه غناتيه اذا ما عليج اماره ازقريه ايي يتغدا ويانا
سلاامه : مايشوف شر, افاا عليج يا الغاليه ما طلبتي شي " ورحت تزقر سعيد"
دقيت الباب لكن محد يرد , دقيت مره ثانيه وانا اقوول : سعيييد سعييد يدييده تبييك ع الغدا "لكن للاسف مافي اي رد منه" يتني افكاار وااايد , لايكوون عرف بالخطووبه , قلت خلني ازقره مره ثاانيه : سعيييييد سعييييد "سمعت صوت خفيف يدل على ان صاحبه تعباان" خفت ودشييت الغرفه , تقربت من شبريته , جفته متغطي باللحاف , هزيت جسمه وانا اقوول : سعييد سعييد انته مريض
سعيد بصوت تعبان : هاااا سلاامه شو بغيتي
سلاامه : يديييده ماا طايعه تتغدا الا وانته وياها "جذبت علييه لان من شكله تعبان ولازم ياكل شي , هب زين يتم بالمرض جي"
سعيد : سلاامه ماالي خاطر تعباان وابا ارقد
سلااامه : لاااا شو جي سعييد هب زييين لازم تتغدا
سعيد بعصبيه : سلااامه فااارجي
سلامه "خفت من صووته" : سعيد والله احين بفاارج بس تعال كل كم من لقمه ويا يدييده عشان تااكل , تدري يدييده كبيره فــ "قاطعني سعيد"
سعيد : خلااص خلاااص فكيني من حشرتج احيين بنزل
سلامه "كنت بطلع من الغرفه الا وحسييت بيد تمسك ايدي وتلفني الجهه المعاكسه"
سعيد : مره ثاانيه هب تدخليين غرفتيه واناا ناايم
سلامه "بلعت ريجي من الخووف وقلت بصوت مرتجف" : اننن ان شاء الله "لفيت بروح, لفني لجهته مره ثانيه"
سعيد : بعدني ما خلصت كلاميه , بعد الغدا ابييج في ساالفه , لا ترديين بييتكم الا يوم اقوولج خلااص اذلفي ,, وشي ثاااني بعد لو اتصلج منو ماا يكون ويقولج تعاالي البيت تعرفين شو ادقولين
سلامه "اووف انزين بطل يدي تعورني, وليش جي معصب , خفت اقوله شبلاك معصب اخااف يردنيه بكف : ان شاء الله
ظهرت من غرفته وانا نازله من الدري افكر شو يبيني سعييد , اول مره في حياتي اجوفه معصب , الله يستر بس


يا ما بكيت على الاطلال ©؛°¨غرامي جديد¨°؛©

ارجو من الادارة حذف الموضوع

حـلـم الأمـل ©؛°¨غرامي متألق ¨°؛©

ممم المشرفـآت هـم اللي يحـذوفـون الروآيـة
بس ليـش الروآيـة مـآ شـآء الله حلوة


مملوحة ـنجد ©؛°¨غرامي متألق ¨°؛©

السلام عليكم

موفقه بطرحك بداية جميلة ..
لكن ليش تبين تحذفينهآإ؟
اذا ع الردود البدايه كذا ..
انشريها في بروفيلآإت قراء روايات غرآم+المجلس المثبت بهالقسم ...
وان شاءالله تلاقين تفاعل يعجبك =)

شامخه وراسي مرفوع ©؛°¨غرامي مشارك¨°؛©

روايتك روووووووووووووووعه وعجبتني حيل واتمنى منك انك تكملينها للاخير

هذيان الروح** ©؛°¨غرامي متألق ¨°؛©

هلا وغلا
ليش تحذفينا كبدايه جميله
بس يالغلا ياليت تستعملي الفاظ جميله وتتقبل
زيدي بالوصف والسرد ولا تخلين الحوار يسيطر على ابوآيه
امممم انتبهي على الاغلاط الاملائيه تراها تخرب الروايه
خالتي عندج تفائل قلبي وإن شاء الله تلاقين تفاعل
اممم. فكره الروايه انها تتزوج واحد ماتبيه واهي تحب واحد فكره مستخدمه
حاولي تجددين بالفكره
اسفه على الأنتقاداات الوايد بس هذا حتى يزيد جمال الروايه
انتظرك بشووق

يا ما بكيت على الاطلال ©؛°¨غرامي جديد¨°؛©

مشكورين على الردود , انا جفت ماشي تفاعل مع الرواية , عبالي جذي بس انزل الرواية ومحد يقراها
لا بالعكس اتقبل النقد , ان شاء الله بحاول اطبق النصائح , بس شوي تصحيح الاخطاء الاملائية صعب لان يوم اكتب البارتات ما انتبه اذا في حرف ناقص او زايد , اما بخصوص محور الرواية معظم احداث الروايات متكرره بشكل شاسع , الي يميزها اسلوب الكاتب , طبعا اكيد بيكون في فرق بين الاحداث من رواية الى اخرى , بس ع العموم مشكورين , وانا سعيده ان الرواية عجبتكم


يا ما بكيت على الاطلال ©؛°¨غرامي جديد¨°؛©

البارت الثالث :
يدووه : ها سلامه وينه ؟!
سلامي : هلا يدووه , احين نازل
بعد الغدا
سعيد يجوفني بنظرات يعني اصرفي يدووه باي طريقه , قاعده ءأشرله ما عرف كيف , طالعني بنظره من بعدها قلت : يدووه انتي شكلج تعبانه سيري ارقدي فديت روحج
يدووه : هب تعبانه ولا عندج خبر
سلامي واا فشيلتي : يدووه ما اقصد شي بس سيري ارقدي والله شكلج تعبانه وبعدين انا بسير البيت بعد شويه بتيلسين مع منووه
يدووه : ادريبج امييه بس انا اتريا هالشيبه المخرف
سلامي وعلامات استغرااب !! : يدوه يديي شيييبه اهنيه , تراه امطلقنج من سنة يدي
يدووه : وااايه يا سلامه شبلاااج عليه اليووم لا اذكريني بالمواجع ,, اهووو بي اليوم يبي اوراق مهمه وبيلتعن فـ ارض الله
سلاامي : يدووه خلاص خلاص هب زين ادقولين يلتعن
يدووه : يا ربي يا سلاامه انتي يالسته اتواجعيني بين كلمه وكلمه
سلامي بقهر : يدووه الله يهدييج احين منو الي يواجع الثاني
حسيت ان النار بتشتعل بين يدوه وسلاامي فتدخلت بسرعه : يدوووه امسات ياي يدي وخذ الاوراق من عند ابويه , خلاص ما بي , سيري ارقدي شكلج تعبانه وانا بوصل سلامي بيتهم وبرد اذااكر وراي امتحانات
يدووه : يلا عيل انا بروح ارقدلي ساعتيين
تجدمت من سلامي وانا ابتسم مجامله , مدري ليش احس اني ودي اصفعها , مدري ليش معصب جذي فجأه , هل من الدانه الي فاجئتني بخطوبتها ولا من سلامه الي دشت غرفتيه وانا راقد : سلامه بسألج وجاوبيني بصراحه
سلامي "جاوبته وانا ابلع ريجي" : اسأل
سعيد : منو الحيوان الي خطب الدانه ؟!
سلامي : م مدري
سعيد " الشرار يتناطر من عيوني , حسيت ان سلامه تعرف بس ما تبي ادقولي " : سلاامه اسألج وانا متأكد انج اتعرفين الاجابه وبعدين ما يبيلها شي كلمتين بس
سلامي : مب جذي السالفه بس انا هب متأكده اخاف اقولك شي ويطلع شي ثاني
سعيد : ع ضمانتيه ان طلع الريال غلط , انا الي بتفشل هب انتي
سلامي : ولد ربيع ابويه اضن اسمه عمار الـ ***
سعيد " صرخت صرخه هزت البيت " : عماار الـ*** الجلب مااغيييره ؟؟؟؟
سلامي " انصدمت من ردت فعله " : هيه
سعيد : بأي حق يخطبها , اصلن كيف تجرأ ويت الفكره في بااله
سلامي " قلت هالكلام وانا حااسه انه سعيد بيجتلني , بس لازم اقول لان من ردت فعل عميه مستحيل يرفض ولو ع حساب سعادة بنته " : سعيد خلااص انسى الموضوع الدانه هب من نصيبك وعمي مستحيل يتراجع في كلامه عطى الريال " ماكملت كلامي الا ونا طايحه ع الارض "
سعيد " ماحسيت بعمري الا اني اعفد ع سلامه واعطيها طراق من قوته طاحت ع الارض وما كفاني هذا , لاا ومسكتها من كندورتها وقلت وانا ضاغط ع ضروسي لدرجه اني حسيت شويه وبيتكسرن " : انتي ينيتي ولا شوو ؟! تبغيني ادفنج في هالصاله احين , والله ان سمعتج ادقولين هالكلام مره ثانيه ما تلومين الا نفسج , من وين يبتي هالوقاحه وانتي تعرفين ان بيني وبين الدانه مو شي عادي
فجأه دش ابويه الصاله وجافني شو مسوي بسلامه ركض صوبي وقعد يحايز بيني وبينها : سعيييد انته غبيي؟! شو مسوي ببنت عمك ؟!
سعيد : ابويه انته مالك شغل خلني اتفاهم وياها
ابو سعيد : سعيييد بطلها احييين ؟! انته ينيت ولا شوو ؟! كيف تسمح لنفسك اتمد يدك ع بنت عمك ," لفيت وجفت ويه سلامه احمر كأن سعيد عاطنها كف " انته ضربتها ؟!
سعيد : تستاهل الذبح بعد
ابو سعيد بجديه : انت كيف تتجرأ تضرب هاليتيمه , كيف تسمح لنفسك تسويبها جذي , انته ما تخاف من ربك ؟! الله موصنى ع اليتيم ما يصيير جذي
سلامي " تيمعت الدموع في عيوني من سمعت كلمة يتيمه اتذكرت كلام يدتي عن اهلي الله يرحمهم , ودي لو اجوف اشكالهم في المنام , بس ابي اسمع حس امييه وابوويه ما ابي شي ثاني"
سعيد " من قال ابويه كلمة يتيمه انرخت يدي , حسيت ان حيلي انهد بالكامل , ما قدرت امسك نفسي , طحت ع الارض وانا مغمض عيوني ومحطي ايدي ع قلبي حسيت بشعور غريب وكآبه اول مره اتيني , انقطعت انفاسي وحسيت بروحي قاعده تطلع : اشهد ان لا إله الا الله واشهد ان محمد رسول الله , ماحست الا وانا فاقد وعي
ابو سعيد " انصدمت من سعيد , استغربت منه شياه فجأه , انقبض قلبي من سمعته واهو يستشهد , طار عقلي من جفته يطيح ع الارض , نزلت لمستواه وهزيته , خفت انه راح من هالدنيا , الي خلاني ءأكد شعوري اني سمعته يستشهد : سعيد يا ولدي , شبلاك ؟! سعيد ابويه نش الله يخليك " ما حسيت بدموعي وهن ينزلن " سعيد مالي غيرك في هالدنيا , سعيد الله يخليك نش , كل الي حولي ما يغنوني عنك , ما اقدر اعيش بدونك , انت ولد وسندي الوحيد , ما اقدر اتخيل الدنيا ابدونك , سعيد نش الله يخليك
سلامه " تجمدت في مكاني , تلخبطت افكاري , تفكيري بين اهلي وسعيد الي فجأه طاح علينا , تذكرت قبل سنه , يوم كنت واقفه اسولف ويا سعيد وفجأه صار لسعيد الي قبل شويه صار جدامي "

في بيت ابو خالد " اخو ابو عبدالعزيز و ابو سعيد و ابو علي "
خالد : عمره 28 سنه متزوج بنت عمه ابو عبدالعزيز " دلال " و يشتغل مذيع
حمد : عمره 25 سنه يشتغل في شركة ابوه نائب مدير
سياف : عمره 20 , يدرس طيران , حلمه يصير ممثل يمثل اجنبي , لدرجه انه كل صيف يسافر بريطانيا ياخذ كورس لغه انجليزية , لغته الانجليزيه بيرفكت , لكن للاسف ابوه وقف ضد احلامه لسببين , اولا ان التمثيل يخالف العادات والتقاليد الي تربوا اهله عليها ومن الناحية الدينيه يؤثم , ثانيا ابوه رافض التمثيل الاجنبي بسبب ان هناك خطوط حمراء بين الريال والحرمه وهذا ما يعاكسه المجتمع الاجنبي
مياسه : 18 سنه , تدرس تصميم ازياء , سنه اولى جامعه
وليد : عمره 14 سنه , في المدرسه , عليه حركات مقالب

في غرفة خالد و دلال :
خالد متسدح ع الشبريه : دلووول قلت لا يعني لا ومستحيل اغير رايي في الموضوع
دلال : خااااااااالد عااد ما يحقلك ترفض
خالد : نعم نعم نعااااام شو ؟!
دلال بقهر : ماااااااا يحقلك تررررررفض
خالد : حبيبتي ليش ما يحقلي ارفض منو ولي امرج ؟!
دلال : ابويه وامييه
خالد بضحكة استهزاء : هههههههه لا يعمري انااا ولي امرج , انتي احين ع ذمتيه وانا الي يرفض و يوافق وفي كل شي لازم تاخذين شوري او بالاحرى انا اتخذ القرار عنج
دلال " مقهوره لدرجه ودي اكفخه ع راسه " : على راسي والله بس بعد ما يحقلك ترفض انته تشتغل وشغلك تتعامل وياه مع حريم تقدم برامج مع حريم تتريق و تتغدا مع حريم واحيانا تتعشى مع حريم كل وقتك مع حريم
خالد يقاطعها : هذا والله طبيعة شغلي وانتي قبل ما تخذيني عارفه كيف شغلي ووافقتي وبعدين انا لو مب شغلي كان ما تعاملت مع حريم
دلال : بما ان طبيعة شغلك جذي انا تقبلت واحترم هذا الشي وفي المقابل لازم تحترم وتتقبل رغباتي
خالد " قمت من مكاني ورحتلها , قلت وانا في قمت القهر " : ماااااااا بتقبل هالشي ولو يلستي من اليوم لباجر اتزنين عليه مااا بغير راايي ومن سابع المستحيلات اغيره
دلال : انزين عطني سبب مقنع , بس سبب واااحد
خالد : لانج بتضطرين تتعاملين مع رياييل واكون وااضح اكثر بتيلسين بين ريااايييل شو سبب مقنع اكثر من جذي
دلال : بس انااا ملييت وابا اشتغل واكثر من عرض مغري رفضته وماا ابي ارفض هذا بعد
خالد : انا الحمدالله مب مقصر وياج في شي , تلبسين بنتج احسن الماركات وانتي كل يوم لابسه شي يدي وكل اسبوع تطلعين وعطلة الربيع والصيف تقضينها برع البلاد وعندج احدث التكنولوجيا تلفونات لابتوبات ايباد سامسونق , شنو تبين اكثر من جذي
دلال " والله شويه وبصيح ليش خالد مو راضي يفهمني , انا مو قصدي اي شي بكلامي " : انزين والله العظيم ما شكيتلك عن هالشي ادري انته هب مقصر ولا بتقصر بس افهمني شوي انا ملييت انته تفكريني مستانسه جذي , يعني خلاص عطيتني كل شي يعني لازم ما اشتكي , انا مليت من قعدت البيت ابي اشتغل , هذا الي ابيييه
خالد : طلعي عند اهلج , زوري ربيعاتج , اطلعي ويا خواتج , مياسه موجوده , امييه وخالاتي كلهم موجودين حولينج
دلال " بجيت من قهري " : اوووف خاللد اوووف ليش مو راضي تفهمني , افهمني شوي , عيش الي انا اعيشه لمدة اسبوع , لا ليش اسبوع , يومين بس يومين
خالد " الله يهديج يا دلال ليش انتي مب طايعه تفهمين " : اقولج من اخرتها
دلال : قوووووول
خالد : شغل مااااااااااافي
دلال : خاااااااالد
خالد : عووونه
دلال : الله يخليك
خالد : لاااااء
دلال : عطني سبب ثاني يقنعني وصدقني ماا بقول شي وبرضى بلي تبيه
خالد : اغاااار , امووت غيره , انتي تكلمين سطعووون ولد عمي احمد "ابو علي" لا ليش سطعون وليييد ولييد اخويه واتخبل من الغيره , كيف اذا بتشتغلين مع الف وااحد


في بيت ابو عبدالعزيز :
ع المغرب الكل ميتمع في الصاله ما عدا سلامه و الدانه
ابو عبدالعزيز : عيل وين هي سلامه
ام عبدالعزيز : راحت عند عمتيه ولا ردت لين احين
نايف بقهر : تلقاها احين اتسولف ويا سعوود
مروان بخبث : وانته ليش مقهور ؟!
نايف : جب انته شو يخصك
مروان : ههههههه لا بس احسك شوي مقهور
نايف : وع سلاامووه
مروان " وانا اتصنع العصبيه " : وشو فيها سلاامي شيخة الحريم اصلن تمون انته
نايف : هدي يا بو الشباب ما قلنا شي
مروان : هي عبالي بعد " بغيت اجوف ردت فعل نايف وياليتني ما تكلمت " تراني ناوي اخطب سلامي وياريت يوم اتجوفها تحطي حدود بينك وبينها ما تتجاوزها , ومن اليوم ورايح لا اطول الكلام وياها واياني وياك اتلعوزها
نايف " انا ماسك اعصابي واترياه يخلص كلامه , كل كلمه يقولها احسها سنه لين ما تطلع " : نعم ؟! ومن متى ان شاء الله , لا حيااتو صك الدعنه انا محطي سلامه في بالي واياني وياك اتفج حلقك وادقول انا اباها
مروان " فيني الضحكه كنت بطلقها لكن كلمات العله ميود خلت الضحكه اتغص في مكانها "
مايد : لا انت ولا هوو , سلامه مخطوبه من ولد خالتها وكلنا نعرف هالشي
نايف و مروان نفس الافكار" كنت برد عليه لكن هيهااات هذا ميود العله اذا قلنا شي ابويه بيسكتنا هذا الدكتور مووو حي الله "
عبد العزيز : ههههههههههههههههههه شبلاكم سكتوا , ولا ميود سكتكم هههه
ريما : خيييبه من تكلم مايد اسكتوا
مايد " قلت هالكم كلمة من ورى خشمي " : وليش يسكتون , عادي ما فيها شي يمكن خلص الكلام
ريما " حسيت ان مايد وده يتناجر ويايه , صح ان اسلوبه حز في خاطري , لكن ضغطت يد عبدالعزيز الي معناها ما علي حبيبتي امسحيها في ويهه خلتني اسكت , بدقولون كيف عرفت انه يقصد هالشي , لان كل ما اضايق من مايد او حس اني تضايقت قالي حبيبتي امسحيها في ويهي هـ المره "
نايف " حسيت الجو بدا يتلطخ فكنت ابا اغير جو لكن سؤال ابويه وقفني "
ابو عبدالعزيز : وين الدانه عيل ؟!
مروان " على قسوة ابويه على غير العاده الا انه ما يتحمل اليلسه بلا الدانه , مهما كان ابويه يالس بين نارين , الاول حبه لبنته والثاني رفيج عمره الي مايقدر يرفضله طلب بحسب العشره الي بينهم "
عبدالعزيز : في غرفتها , رحت الها العصر وكانت ناويه ترقد , اكيد احين رقدت
ابو عبدالعزيز : تغدت ؟!
ام عبدالعزيز " عندي كم من كلمه يمكن اتخلي ابو عبدالعزيز ايغير رايه " : لا تريقت ولا تغدت , امره اليوم ما كلت شي , وما طلعت من غرفتها كله اتصيح وما تبي تظهر مكان
ابو عبد العزيز : خلها يوم بتمل بتنزل , وبعدين كلها يومين وبتتعود ع الموضوع
مايد " حسيت بقهر كان ودي اوقف في ويه ابويه واصرخ الدانه ما بتاخذ الا سعيد , بس للاسف اذا قلت هالشي بتتعقد الامور اكثر وبطيح الدانه في مشكله اكبر , طبعا انا اعرف الي بين الدانه وسعيد , تكلمت وفي صوتي باين القهر " : حتى لو كان اعز ربعك ما يحقلك تغصب اختيه ع شي ما تباه
ابو عبدالعزيز : كلمتي وما بتتغير
مروان " كان ودي اعطي ابويه كف من الخاطر , استغفر الله العظيم , بس جد قهرني , هب ابكيفه يغصبها ع شي ما تبيه وعلى شان منو ؟! عمااار الزق " : بس انا بوقف ضد هالزواج ومش موافق
ابو عبدالعزيز " قهروني عيالي كلهم واقفين ضدي , يعني هم يتحروني مستانس بلي قاعد اسويه " : هب مهم موافقتك المهم راي انااا وكلمتي هي الي بتمشي في هالبيت والي هب عايبنه يشل اغراضه ويطلع برع هالبيت وعتبت هالباب ما تقبله
عبدالعزيز " كلام مايد و مروان , 100% صحيح , انا بعد ضد هالزواج " : ابويه نحن وين عايشين , اي مسلسل هذا الي قاعد اتطبقه , شلو اغراضكم ومن هالكلام , كلام مايد ومروان انا ءأيده
ابو عبدالعزيز " كنت بتكلم لكن كلام نايف قاطعني "
نايف : والله عااد موافقين هب موافقيين مالكم شغل مادام ولي امرها بعده عايش وموجود مالكم كلمه
مايد " نشيت من هـ المكان الي يغث الواحد وطلعت برع , لان ما ودي اسمع كلام نايف , بالطقاق ما همني , الي تبيه الدانه بيصير "
مروان " نشيت من مكاني وتفاجأت بمايد و عبدالعزيز سوا نفس حركتي كلهم هب راضيين بهذا الشي , حسيت بسعاده مدري ليش , يمكن لان نقدر نسوي شي يغير مجرى القصه "
عبدالعزيز " مسكت ايد ريما ومشينا , استانست يوم جفت مايد ومروان نشوا في نفس الثانية واللحظة الي نشينا فيها , سوينا اكبر طاف لنايف , احين اكيد مقهور , بس نحن هب مضطرين نسمع كلامه , وهب من حقنا انسكته لان كل واحد فينا له حرية التعبير بما ان ما زلنا نعيش في الديمواقراطيه "
نايف " انقهرت من الحركه الي سوها , بس والله ان هالزواج بيستوي ما دام ابويه يبا هالشي "


في بيت ابو عامر :
جواهر بملل : اميييه متى بي عموور ؟!
ام عامر : والله بي الاسبوع الياي
جواهر : الله عموور بي الاسبوع الياي , واخيييرا بنظهر من البيت
عمار " دخلت الصاله وانا اسمع كلام جواهر , انقهرت منها حسستني ان حابسينها طول الوقت فالبيت " : انتي اصلن لو اربع وعشرين ساعه فالمول بدقولين ما ظهرنا , محد يملي عينج غير عموور ان وداج العزبة مره وحده وبعدها ما طلعج قلتي عموور ودنا وعموور رجعنا ,, ابا اعرف شسالفة هالحب الي انبينكم , خبري انكم خواان هب حبايب
جواهر : تفو تفو تفو , عن الحسد , اخوي كييفي لو يابلي جبس من الدكان كأنه معشني في مطعم
عمار " كان ودي اكفخها " : اوووف متى بتعرسين وبنفتك منج , ويوم اتعرسن ما بتشوفين عمورج الا في السنه احسنه
جواهر : بسم الله عن هالفال , لا تتفاول علي بالزواج , ويااشينه هالحسد , استغفر ربك لا يصير لعموور شي
عمار : حشى حشى ما قلنا شي
جواهر " اوووف انا دومي غبيه جذي ليش ما عندي كلام قوي افجر راس عماار من العصبية "
عمار : اجوفج سكتي
جواهر : خلاص خلص الكلام
عمار : ههههههههههههه والله انج غبيه
جواهر : عاااااااااااااااااااااااااامر جوف اخووك سكته بليييز , وقوله لا يقول غبيه
عمار : طاااع الياهله , ليش ما تواجهيني وجه لوجه , ليش جذي خوافه وتحتمين بعامر
جواهر : جب جب لا ترمسني
عمار " ياخي هالبنت كم مره بعلمها , يعني لازم اصيحها عشان تحترمني " والله يا جواهر يقوم اصفعج كف ان ما حترمتيني مره ثانيه
جواهر : شو قلت انا
عمار : بس بس فكيني من حشرتج
جواهر : الله يعين الي بتاخذك يا النفسيه
عمار " عصبت وما حسيت بعمري الا اصفعها كف , كلمة نفسيه تغيضني يوم اسمعها منها , دايما ادقولي نفسية ومريض نفسي ومن هالقبيل , لدرجه اني شكيت في نفسي وقلت براجع طبيب نفسي " : هذا عشان تتأدبين مره ثانيه
جواهر " كان ودي ابجي بس رحت عند اميييه ودفنتن راسي ع جتفها , ما ابي اجوف عمار , تلومت يوم قلتله نفسي , انا دوم اقوله انسان نفسي , اخاف بعدين يتعقد من الكلمه , ما عدت افهم نفسي , يمكن انا اكون انسانه مريضه نفسيا , والي يثبت هالشي اني ارمس ويا نفسي واتخيل اشياء ما صارت والمشكله اني اشتط ويا السالفه "
عامر " حسيت الجو تكهرب , بثنيناتهم غلطانين " : امييه ما قالتلج بثينووه متى بتي ؟! ولهت ع حمووود
ام عامر : يمكن اتي بعد العشا
عامر " حسيت بكآبه , اهي بتي بعد العشا ما يمدي الوقت اقعد وياهم لان مستحيل تقعد اكثر من ساعه , الوقت متأخر وانا ولهان ع حموود من شهر ما جفته " : امييه ليش ما قلتيلها اتي امبجر , ما يمديني ايلس وياها , ولهان ع حموود , ابا اسوولف ويااهم واطفر بحموود , تدرين الوقت يطوف بسرعه
ام عامر : لا تخاف , اذا يت بتقعد اسبوعين , بتلعب ويا حموود لين ما تشبع لدرجه انك بدقول شلووه عني
عامر " طرت من الوناسه , واخييير بسولف ويا بثينووه وبلاعب حموود , بودييه الدكان , خخخخ انا اعتبر حموود شرات ولديه , واعبي الفراغ الي فداخله , ابووه ما يقعد وياهم واايد , ما يهتم في حمد ابدا " : ياااااا سلااااااااااااااااام واخيرا بترجع الحياه لهذا البيت
عمار " خخخ مادري ليش احيانا احس عقلية عامر عقلية يهال , دووم يتحمس لجوفت بثينوه وولدها , ودي اعرف شو سر تعلق عامر بـ بثينه و حموود " : هدي هدي يا بو الشباب , الا حموود بييك هب وزيير الداخلية
عامر : ياربيييه انته ليش جذي حاسدني على الفرحه , وااايه لا تحسدني واصير نفساني مثلك
عمار " قمت وانا حازه في خاطري هالكلمه , صراحه تعقدت منها وااايد , ما توقعت عامر العاجل يقول جذي , صدمني حيييل , احين تأكدت اني لازم اجوف طبيب نفسي "
عامر" والله مادري كيف ظهرت مني هالكلمة , والله مب قاصدنها , الله يغربل بليسج يا جوااهر من كثر ما دقولين هالكلمة علقت في لساني "

نهاية البارت الثالث
توقعاتكم لكل الشخصيات الي ذكرت في هذا البارت ؟!


شامخه وراسي مرفوع ©؛°¨غرامي مشارك¨°؛©

وييييييييييييييييييين البارت وسورررررررررررررررررري لاني قطعت

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1