ميرة الدلوعة ©؛°¨غرامي مشارك¨°؛©

السلام عليكم وشخباركم

انا عضوه جديمة ومنزله في ها الموقع روايتين من تاليفي خيوط الماضي وقناع الحب والحين بين ايديكم ((الحب المدفون))

وان شاء الله تعجبكم بنزل جزء واحد واذا شفت فيه تفاعل ولو من عضو واحد راح انزل الباقي


بسم الله الرحمن الرحيم


الفصل الاول

في ساحة مدرسة البنات الثانوية
الطالبات يذاكرن كم كلمة للامتحان
اللي تشيك على اقلامها
واللي تعبانة من السهر
واللي تسولف عن المسلسل التركي
واللي تجهز براشيمها
واللي تقرا القرآن
والمعلمات ماسكين ظروف اوراق الامتحان
يدق الجرس
وخمس دقايق الكل دخل قاعة الامتحان
والساحة فاضية
تسمع صوت الهوا اللي يطير بعض الاوراق اللي كانوا يراجعوا منها الطالبات
وبعد مرور ساعتين
في مدرسة الاولاد الثانوية
الساحة مليانة اوراق
واللي يضحك ويشرب عصير
واللي يلعب بموبايله
واللي يضرب راس ربيعه


و...
منصور يلبس نظارته الشمسية
ويبطل سيارته
خالد يربع وراه : منصور منصور
يوقف يطالعه
خالد : شوبلاك عصبت
منصور يمد صبعه : خل ابراهيموا ينفعك
خالد : هو عزمني على بارد من الكفتريا
منصور : سير له مايهمني
خالد : بروح بسيارته
منصور يركب سيارته ويصكر الباب ويشخطه
خالد واقف ويهز راسه



وفي مدرسة البنات
اللي تكلم ربيعتها عن الامتحان
واللي تصيح علشان ماحلت زين
واللي تكلم امها علشان توصلها البيت
و...
روضة تراجع المذكرات وتهز راسها
جواهر: شوبلاج روضة
روضة : كنت متاكدة اني بخربط بالسنة
جواهر تفتح الكاكو : اي سنة؟
روضة تاشر على المذكرة : سنة وفاة عمر المختار
جواهر تسحب المذكرة : بس عاد ما مليتي من المراجعة
روضة تلبس نظارتها الشمسية وتمشي معصبة
جواهر تربع وراها : اتريني روضة
روضة تدق على درويلهم
جواهر : اليوم اخر يوم بالامتحانات
روضة مطنشتها: الو صلاح وينك؟ يالله تعال بسرعه
وتصكره بويهه
جواهر : وين بتروحين بالاجازة؟
روضة مندمجة بالموبايل
جواهر تطالع ورا : خلاص باصنا بيتحرك بسير عنج
روضة تمسك ايدها : جواهر اسفة بس عن جد انا مضايجة
جواهر تبتسم : ماعليه برمسج عقب بايووو
روضة تطالع الشارع وتنفخ بضيج


وفي بيت بو حسن
يدخل منصور سيارته الكراج
طبعا الفيلا راهية
وجدا راقية
الحوش كبير فيه ملعب لكرة الطائرة
والحديقة فيها قعدة مع كراسي
وبنص الحوش نافورة
منصور ينزل من السيارة
ويدخل باب الصالة
الوالد قاعد يلاعب بنت ولده العود
الوالد : عطيني الكورة
حور تهز راسها : مابعطيك
الوالد : عطيني ولا بصيح
حور تضحك : مابعطيك
وتركض وتنخش ورا عمها منصور
منصور : السلام
الوالد يقوم من مكانه : وعليكم السلام
منصور يمشي
الوالد يطالعه : ها شو سويت بالامتحان
منصور : الحمدلله
الوالد : هاي 3 سنة وانت تعيد الثانوية شد حيلك
منصور يطالعه ويمشي
ويركب الدري
حور تركض ليدها : يدي عمي فيه شي
الوالد يطالعه وهو يركب : شكله ما حل بالامتحان زين
واشوي يسحب الكورة ويركض : خذيتها منج هههههه
وهي تركض وراه
وفوق امها تراقبهم وتضحك
تشوف منصور
عبير: هلا منصور
يطالعها ويمشي
تطالعه وهي مكتفة ايدها وتبتسم
يدخل داخل حجرته
يفصخ دشداشته ويعلقها داخل الكبت
يلبس لبس سبورتي
الفانيلا بيضة والجاكيت اسود مخطط بالابيض
والبنطلون ابيض
تدق الباب وتدخل
يصد ورا
عبير :ممكن ادخل
منصور معصب: ما سمحت لج تدخلين
عبير تبتسم وتقترب منه : خايف مني
منصور ياشر على الباب : لوسمحتي طلعي برع
عبير : احب عصبيتك احب رجولتك احبك لما تلبس سبورتي
منصور : ابوي تحت وعادي يدخل اي لحظة
عبير : لاتخاف يلعب مع حوري
منصور: انتي ماتستحين على ويهج
عبير تهز راسها وتبتسم : لا هههه
منصور يروح يفتح الباب : طلعي برع
عبير تشيل عطره من التسريحة
منصور صاد الجهة الثانية
عبير:احب ريحتك ابي احتفظ فيها في ملابسي
تطلع وهي تضحك
يرقع الباب معصب


منصور : شو ها المريضة



وفي بيت بو بدر
تنزل من السيارة
تدخل الصالة
الوالدة ترمس بالتلفون وتضحك
روضة توقف عندها : اماية !اماية
الوالدة تاشر بايدها لحظة
روضة ترفع عينها فوق وتعصب وتمشي
تدخل حجرتها
تفصخ شيلتها وتفرها على الشبرية
وتنام على ظهرها وتغمض عينها
سماح تبطل الباب
تنقز على الشبرية : روضو
روضة تيود قلبها : امييي خرعتيني
سماح تطالعها : ماسمعتي اخر الاخبار
روضة تقعد : شو بعد
سماح : في خطار يايين
روضة : منو؟
سماح : ناس ياين يخطبون
روضة : انا بعدي صغيرة
سماح ترفع ايدها فوق : ان شاء الله انا
روضة : ليش واختج الكبيرة ماتدعي لها؟!
سماح : شيخة اكبر من المعرس وهو يبي صغيرة
روضة : منو خبرج؟
سماح : سمعت امي ترمس وتقول البيت بيتكم وبنتي مثل بنتكم
روضة : اسميج انتي متى بتيوزين من ها العادة
سماح تضحك وتركض
روضة تهز راسها : شو ها المينونة


وفي المسا
وفي بيت جاسم
جاسم يلبس الغترة ويتعطر
والام ماسكة المدخن وتصهل : لووووووولوج
جاسم يبتسم وهو يطالع امه
الام : مو مصدقة ولدي العود بيعرس
جاسم : بعده توها الناس يمكن البنت ما تبيني
الام تحطي المدخن على التسريحة : خسي من عينها ماتبيك
تدخل لطيفة الحجرة : يا سلام جسوم صرت ريال
جاسم يطالعها : اصغر عيالج جسوم
لطيفة تقترب منه تبتسم : لا بصراحة لو ما كنت اخوي كنت تزوجتك
الام : كل اخت تتمنى ريلها يكون شرات اخوها
جاسم : يعني اليوم اشوف البنت
لطيفة :الحبيب مستعيل ههههههه
الام : اليوم تعرف على اهلها ومرة ثانية تشوفها
جاسم يطالع نفسه بالمنظرة مبتسم

وفي بيت بو بدر
روضة تلبس عدساتها
سماح تدخل : روضو لاتكشخي وايد اخاف يختاروج بالنومنيه
روضة تفرها بعلبة الكلينكس: ذلفي برع
شيخة توقف عند الباب
شيخة : شو بلاكم انتوا؟
سماح : شوفي روضوا تلبس العدسات وبتكحل عيونها الكبار وهي بيضة وحلوة
وبيختاروها اكيد
شيخة تبتسم وتقرص خد سماح : حتى السمر حلوات
سماح تبوز: خلها هي تظهر للناس
روضة : شو بلاج انتي انا بيلس مع اخته مو مع الحريم
شيخة : سماح سيري تبخري
سماح : وانتي
شيخة : بروح اشوف الخدامات شو جهزوا للفواله
سماح تضحك وتركض
روضة تهز راسها : هاي بتعرس الحين!
شيخة تضحك : عقبالج
روضة تيود قلبها : وه بسم الله علي
تقوم وتوقف يم اختها : انا بتزوج عن حب شراتج
شيخة تطالعها بضيق
روضة تعض شفايفها : شويخ موب قصدي
شيخة تنزل لها دمعة وتطلع
روضة تضرب راسها : انا شو قلت


وفي بيت بو حسن
عبير تلبس روبها
تلبس الشبشب
وتطالع الدريشة
تشوف الباب الكبير مبطل
تلحف بنتها وتطلع من الحجرة
تقعد بالصالة اللي فوق
الوالد يطالع تلفزيون
عبير : بعدك عمي ماتحركت من مكانك
الوالد : والله مسرحية باي باي لندن تعجبني ماتنمل
عبير تطالع الساعه
الوالد : انتي تترين حسن
عبير توقف عند الدريشة : كل يوم على ها الحالة
الوالد : حطي راسج ونامي احسن
عبير تبتسم : من الحين ؟ دياية شو هههه
يطلع منصور من حجرته
وعبير تراقبه
يقعد معاهم
منصور : ابويا تبا مكسرات
الوالد : لا بتعشى الحين
عبير تطالعه : انا ابا
منصور ياكل ويطالع التلفزيون : ما احد عزمج
تضحك عبير : هههههههههه
منصور : ابويا انا بظهر مع خالد
الوالد : لا تتاخر تراني بعد العشا بسير المقهى
منصور : وليش ارجع
الوالد : مرت اخوك وبنتها بروحهم بالبيت وتعرف حسون ماله وقت يرجع
منصور يقوم من مكانه : حرمتي ولا حرمته
ويمشي عنهم
عبير بقلبها : ياريتني حرمتك
يدخل منصور حجرته ويصكر الباب


وفي بيت بو بدر
ام بدر : توه نور البيت
ام جاسم : منور باهله
ام بدر : بخبر ولدي بدر يدخل ولدج ويشوف العروس
ام جاسم : على بركة الله
وفي غرفة البنات
لطيفة تطالع سماح مبتسمة
روضة تبتسم : سماح اختي وايد هادية
سماح يوصلها مسج وتصرخ : الوحدة فاز بالدوري
شيخة تطالع سماح وروضة فاتحة عينها
ولطيفة تضحك : خوش هدوء هههههههه
والكل يضحك وما حسوا بالباب يدق
ام بدر : يالله سماح الريال تحت
سماح تيود روضة :تعالي معاي
روضة : وين اي معاج
سماح : بنخش وراج
روضة تضحك : سيري لا تستهبلي
شيخة : يالله كلنا بننزل معاج
روضة : لحظة خلونا نلبس العباية
وينزلون من الدري كلهم
وام جاسم تدزه علشان يطالع
وجاسم اول مارفع عينه شاف روضة
جذبته ابتسامتها وعيونها الكبار
وهو ينزل راسه ويرفعه
وسماح مو قادرة تشيل عينها من الارض
يقعدون على الغنفة
ام جاسم : ها شو رايك بالبنت
وجاسم عينه على روضة
وروضة تلعب بالمخدة الصغيرة مال الغنفة
جاسم يطالع بدر : يالله سرينا
بدر : خلاص
جاسم يقوم ويطلع من الصالة

يقعد الكل يسولف ويضحك
لحد ماروحوا
وفي سيارة جاسم
لطيفة : ها شو رايك بسماح
جاسم يبتسم : اسمها سماح؟
الام : هيه
لطيفة : هي مخلصة تقنيا بس تحس تصرفاتها مثل اليهال
جاسم : باين عليها
الام : ها نحدد الخطوبة؟
جاسم : ملجة مو خطوبة
لطيفة : اوووووه يا خطير انته
جاسم يبتسم بس هو مايعرف منو اللي اختار
ياترى شو بيستوي جدام
تابعوني

s5s5 ©؛°¨غرامي مجتهد¨°؛©

مشاء الله .. بدايه جدا جميله .. الروايه مرررا جممميلله .. لي،الشرف اني اول وحده ارد..اعتبريني من متابعيكي .. تقبلي نروري .. فاتنه ك امي ..

ميرة الدلوعة ©؛°¨غرامي مشارك¨°؛©

تسلمين حبيبتي على الرد

Black ! ©؛°¨غرامي مشارك¨°؛©

يآآآآآآآآآآقلبببي ياسموحةة :(


رووضة :)) حبيتها بسس فيها دفرة :)

ميرة الدلوعة ©؛°¨غرامي مشارك¨°؛©

ان شاء الله بتقتربون من شخصياتي الثانين

تسلمون والله

وردة الزيزفون
✿ إدارة الإقسام ✿

صباح الخير .... ياهلا فيك بغرام ....موفقة بطرحك ... بداية جميلة مع انو البارت قصير ....بس الرواية مشوقة

سماح مااحسها تنفع للزواج وحدة ماعندها جدية وتصرفاتها تصرفات اطفال ماادري كيف جاسم بيتقبلها خصوصا انو انعجب في اختها بصراحة الغلطة غلطة الكل هو جاي يشوف العروس يااما انهم قالو له هذي العروس او خواتها مالهم داعي يدخلون اصلا ماله داعي دخلتهم الشوفة للعروس بس جاسم ماراح يتقبلها وهالشي هو الي بيعقلها وبيركدها

اما منصور ماادري ايش قصته مع الثانوية بس حاسة انو روضة بتكون من نصيبه والله يعينها على المريضة الخاينة عبيروه .......وقحة وقليلة ادب والمصيبة انها متزوجة وعندها بنت مو صغيرة يعني شكلها حتى اكبر من منصور وعينها عليه صدق مريضة وزواج منصور بيحرق قلبها ومابيسلمون من شرها بس الشرهة على الثور الي متزوجها وتركها على حل شعرها

شيخة ماعرفنا سالفتها .....وليش ماتزوجت وهي كانت تحب الا اذا هي ارملة

القوانين / الإطلاع هام و الإلتزام ضروري

ميرة الدلوعة ©؛°¨غرامي مشارك¨°؛©

تسلمين مشرفتنا على المرور العطر

ميرة الدلوعة ©؛°¨غرامي مشارك¨°؛©

الجزء الثاني
في بيت بو بدر

منتصف الليل
روضة تلعب باللاب
رافعه شعرها ولابسة نظارتها الطبية
تشرب كوفي
تدخل سماح لابسة بجامتها وشعرها مفتوح
تقعد يمها
روضة تطالعها : ها مانمتي
سماح : افكر بالمعرس
روضة : شو بلاه
سماح : ما اعرف احسه خاف مني
روضة تضحك : ليش ههه
سماح : ماسمعتيه قال لبدر يالله نسير بسرعه ما شفته زين
روضة تفصخ نظارتها : شورايج فيه ؟
سماح تستحي : حليو واحسه شخصية
روضة : باجر بنرد عليهم
سماح تقوم : عقبالج
روضة : انا بتريا اللي يحبني واحبه
سماح : الحب بس بالافلام
روضة : وانا احب الافلام وعندي احساس اني بتزوج عن حب
سماح : بسير انام وخلج بفارس احلامج
روضة تبتسم وتهز راسها


وفي بيت بوحسن


منصور ينزل من السيارة
يسمع صوت صراخ داخل
يركض
يفتح باب صاله
يشوف حسن يضرب حرمته
يتدخل ويوقف قبال اخوه
وعبير منخشة وراه وتصيح
حسن : وخر مناك لا اذبحك
منصور يمسك ايده : انت سكران ؟
حسن : انت شو يخصك
منصور يطالع عبير : سيري حجرتج وقفلي الباب
عبير ماسكة ذراعه: بس
منصور يصرخ : سيري فوق
تركض عبير تركب الدري
وتدخل حجرتها وتقفل الباب
ومنصور يودي اخوه الحمام ويغسل ويهه
وحسن : هدني مو ياهل انا
منصور يمسكه ويدخله الحجرة اللي تحت
منصور : نام هني وياويلك لو صعدت فوق وانت بها الحاله
يطيح حسن على الارض وينام
منصور يطف الليت ويصكر الباب
يركب الدري وهو مضايق
وعبير تبطل الباب اشوي تطالع منصور وهو يدخل حجرته
وتقعد ورا الباب وتصيح


وفي اليوم الثاني

وفي المول
روضة تجرب الارواج بايدها
جواهر : البنكي احلى
روضة : احس فيه لمعه
جواهر : بس احلى على شفايفج
روضة تبتسم : خلاص واحد لي واحد لج
جواهر : مشكورة حبي
يطلعون من المحل
روضة : ابغي اشتري لي ايفون اليديد
جواهر : في شركة اتصالات داخل المول
روضة : يالله عيل
وفي نفس المكان بالكوفي
خالد : انت الغلطان
منصور يهز راسه : غصبن عني
خالد : اي وحدة مكانها بتحبك
منصور: انا ماتحملت قاعد يضربها باالعقال
خالد : الحين حبها زاد لك
منصور : اسكت الله يخليك
خالد : تزوج وافتك منها
منصور : بعدي صغير خلني استانس يا ريال
خالد : سجل بعثة ببريطانيا احسن لك
منصور : شكلي جي بسوي
وعند الاتصالات
روضة : لو سمحتي اختي
......: يس
روضة : شوها الوهقة في احد يرمس عربي
......: ويت
جواهر تضحك : فشلتينا
روضة تطالع جواهر : انا اعرف بس ابي اسالهم بالمميزات والباقات
جاسم : هلا اختي
روضة تطالعه : مرحبا
جاسم يبتسم : هلا شحالج
روضة تستغرب : نعم!
جاسم : ماعرفتيني
روضة تدقق : لا
جاسم : البارحة كنت في بيتكم
روضة تفتح عينها : ايواه المعرس
جاسم يستحي : هيه طال عمرج
جواهر تدزها : منو المعرس
روضة تساسرها: خطيب سماحو
جاسم : شخبار الاهل ان شاء الله بخير
روضة تعدل شيلتها : الحمدلله
جاسم : ها تامرين بشي
روضة : والله خاطري بايفون اليديد وابغي اعرف مميزاته وعيوبه
جاسم يعطيها ورقة : تقدرين تعرفين عنه كل شي من هني
روضة تمسك الورقة وتشاور جواهر
وجاسم يراقبها باعجاب
يشوف كيف ابتسامتها طفولية
عيونها تغوص داخل جفونها كلما ابتسمت
وهو قلبه يدق بسرعه يحس انه بيطلع من صدره
يطلبونه عملاء ثانيين
جاسم : عن اذنج
روضة تبتسم
جواهر : شوبلاه شاق الويه
روضة : يمكن علشان اني اخت العروس
جواهر : والله انه كيوت
روضة ترفع عينها فوق : متى بشوف فارس احلامي
منصور : لوسمحت الطيب
روضة تطالعه باستغراب
جاسم يقترب : هلا اخوي
منصور : ابغي ايفون اليديد وابغي اعرف مميزاته وعيوبه
جاسم يبتسم : تفضل ها الورقة وبتعرف كل شي عنه هني
منصور يقرا على السريع : انا قريت عنه بالنت اوكي بشتري لي واحد
روضة تطالع جواهر : صدق ماتستحين على ويهج جواهر يعني تشوفيني واقفة قبلج
منصور يطالع خالد : والله يا خالد عبالي ماعندك فلوس وكنت تبي تسوي عمرك شي
روضة تعصب : سمعي جواهر معروفة هاي حركتج تشترين الحين وتبيعنها لربعج اغلى وجي انتي الرابحة
جاسم يتدخل : اسمحولي الكمية نفذت بس اذا تبون طلبيه ماعندنا اي مانع
روضة بغرور: اكيد ابي واحد وانت تدل عنوان بيتنا
تطالع منصور
منصور : وانا بعد بعطيك عنوان بيتنا ودزه لي هناك
جاسم : شو وين قاعدين بكفتريا ؟
جواهر وخالد يضحكون
جاسم : احنا بنيبه هني وبنحجز لكم وانتوا تعالوا خذوه
روضة : مشكور مانبي منك شي
تمشي معصبة وجواهر تربع وراها
منصور يضحك : ههههههههههههه
خالد : زين كسرت خشمها ههههههه
جاسم : لو سمحتوا لا ترمسون عنها بها الاسلوب
منصور : ليش ؟ اختك وانا ما ادري
جاسم : هاي خطيبتي
منصور يطالع خالد مستغرب

روضة وهي تنزل من الدري المتحرك: كريه والله انه كريه
جواهر : ابيه صدق احراج
روضة : وهذا اللي مسوي عمره خطيب اختي دواه عندي
جواهر : انتي اللي بديتي بالرمسة
روضة : عيل ماشفتيه كيف يطلب ويتامر ولكنه نحن موجودين
جواهر : خلاص عاد
منصور وهو ينزل من الدري : شو فاكرة نفسها هاي
خالد : فشلتنا
منصور : اونه انت تدل بيتنا خقاقة وحدة
خالد : بس في شي مستغربنه
منصور : شو
خالد : دام خطيبها ليش مايهديها واحد
منصور : شكله شذاب شافها حلوة وقال عنها جي
خالد يبتسم : تشوفها حلوة!
منصور يطالعه : يالله عاد وين الاستيشن وقفتها
روضة تصغر عينها: صلاح يقول وقفها عند الباركن 3
يفتح منصور السيارة بالريموت
جواهر : شكله شافنا صلاح
روضة تركب ورا وجواهر يمها
يوقف منصور يطالعهم
وروضة تدور موبايلها بالجنطة
جواهر تدزها: روضو ها يلاحقنا
روضة ترفع راسها : منو
يركب منصور جدام
روضة بعصبية : صدق انك قليل ادب الحين تاكدت انك تتعمد تلاحقنا من مكان لمكان
منصور يبتسم : شو اسوي حبيتج من اول نظرة
روضة تفتح عينها: بلا مصاخة وانزل من السيارة
منصور: مابنزل
جواهر : روضة خلينا ننزل عن يشخطه بالسيارة ويخطفنا
منصور يضحك : ههههههههههههه
روضة تدور موبايلها : وين راح بطلب له الشرطة
منصور : بذمتج ماتعرفين تميزين بين سيارتكم وسيارتي
جواهر تطالع روضة
روضة تطالع ا لدريشة
يفتح منصور جامتها
صلاح : مس روضة اكو سيارة مناك
روضة تعض على شفايفها وتنزل راسها
منصور يبتسم : حصل خير نورتي موتري
روضة تفتح الباب وتنزل
وجواهر تنزل : متاسفين
خالد يصعد جدام : شو السالفة
منصور يبتسم : شدراني
جواهر تركب السيارة : امبيه فشلة
روضة : سكتي الله يخليج لازم اسبوع ما اطلع من البيت
جواهر تضحك وروضة مغطيه ويهها من الفشلة


وبعد مرور ساعتين

وفي بيت بو جااسم

جاسم ينزل من سيارته بسرعه
لطيفة تتغدا مع امها
جاسم : اماية عندج رقم نسايبنا
الوالدة : اي نسايب؟
جاسم : بنات بو بدر
لطيفة تبتسم : ها حلمت فيها ههههههههه
جاسم : مو متفيج لج
الوالدة : شو تبا فيهم
جاسم : خلي لطيفة تعتذر لسماح عن الموقف اللي صار
لطيفة :ليش ! شو صار

وفي بيت بوبدر

روضة تاكل : شوفي سماحوا اذا وافقتي على ها الريال لا انا اختج ولا انتي اختي
سماح خايفة : ليش
روضة : اقوله يب لي التلفون البيت وحضرته يقول ليش كفتريا نحن؟ كريه
شيخة تبتسم : انتي الغلطانة
روضة : لا والله دام خطيب اختي شوفيها لو يابة البيت
شيخة : تبينا يقول للعالم كله انه خطيب اختج
روضة : احرجني جدام واحد من الشباب
سماح : انزين انتي شو تبين منه

يرن تلفون البيت
سماح تقوم : انا برد على التلفون
سماح : الو
لطيفة: السلام عليكم
سماح : وعليكم السلام
لطيفة : انا لطيفة اخت جاسم , انتي سماح؟
سماح تستحي : ها ! هيه لحظة
تحطي التلفون وتركض
شيخة : شو بلاج
سماح : ابيه هاي لطيفه اخت خطيبي
شيخة : وليش ماتكلميها
سماح : استحي
روضة : انا اللي برمسها وبهزبها
روضة تشيل التلفون : الو
لطيفة : وين رحتي
روضة : موجودة
لطيفة : اخوي جاسم حاب يعتذر عن الموقف اللي صار اليوم بالمول
روضة : لا عادي بس احسه اسلوبه كان ماحلو جدام الناس ولا بعد ينكت يقول هاي كفتريا ؟
لطيفة تبتسم : ماعليج منه هو لانه بمكان عمله اذا احد سمعه يقول بوصله بيتكم بيفصلونه
روضة تفكر : امم حصل خير
لطيفة : هو من يا حاس بالذنب
روضة تبتسم : لا عادي بس قولي له مابرضى الا يحجز لي الموبايل
لطيفة : افا عليج اعتبريه هدية
روضة تستانس: صدق!
لطيفة : كم سماح عندنا
روضة تطالع سماح وترفع الحواجب: ياعيني
لطيفة : سلمي على الاهل
روضة : يوصل مع السلامة
روضة تصكر وتنقز من الفرح
ياترى
هل جاسم بيتزوج سماح؟
وهل روضة ومنصور بلتقون مرة ثانية ؟
تابعوني

ميرة الدلوعة ©؛°¨غرامي مشارك¨°؛©

للرفع للرفع للرفع

Black ! ©؛°¨غرامي مشارك¨°؛©

سمآآححح < حرآآآم :( وش بيسير فيها لادرت ان جاسم يحب روضة

روضة < مرجوجة :) اجل ماترضين الا بموبايل

جاسم < خبل صدق !! "تخيلت انه زووج روضةة < هو يستحي وهي تناقز >

منصور < :( وماااتبي عبير تحبك خله يضربها على عشقها المحرم

عبير < لو زووجك حرقك مووتك ماتحبينه مبب حرام عليك بنتك وين تروح

لطيفة < يعني ماتفررقين بين الاصووات

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1