غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 17-05-2013, 06:36 PM
صورة الليدي أريام الرمزية
الليدي أريام الليدي أريام غير متصل
لا شئ يصــفني سوى أحرف إسمي ..
 
الافتراضي أنا حستقيل من البيت


.
تحيه من القلب مني لكم !
أول موضوع لي بهالقسم ويناقش قضيه داخل المنازل السعوديه بس طبعاً بدون حلول !!
انا مدري وش ابي من الحياه اطرح قضيه اصور معه ولااحله ...
معلينا ,
نتحمل المصاله شوي , واقروا الموضوع وعطون رايكم بَ السرد :$


بسم الله ، وصلى الله على محمد ، اذكروا الله ياجماعه
بالنسبه للاوضاع السياسه داخل المنازل السعوديه تستاء يوم بعض يوم * متعوب على اللغه*
الوضع مزري ولايطاق صار فيه حروب داخليه بالبيوت ..
عادي وانتي قاعده قدام التلفزيون يجيتس صحن طاير يشطب الجبهه ولا ملاس ينشب بالبلعوم ولا زبوريات وانتم بكرامه تشخط من قدامك

يعني نعطي مثال : تسبع المواعين والسماعات ب اذانتس والكلوركس مفتوح والصابون نصه رايح والمواعين ماشاء الله قمه افرست بس على شكل مواعين
فجاءه ينكسر كاس وماتسمعين الا حطام الزجاج ياألهي انها تتحطم * فيستس حاط ايدينه على خدوده من هول الصدمه*
خمس ثواني الا الوزاره الداخليه والخارجيه والصحه والاعلام * عشان تنزل بالانستقرام ولا التويتر* كلهم قلبت وجيههم هالفيس
طبعاً انتي بهاللحظه تتقمصين شخصيه سالي عشان يرحمونتس بس مابوش فايده
الام تصارخ من جهه ، الاب من جهه ثانيه ، البزر يهايط ، والثانيه جو لحاله وتصور ماتشوفين الا الفلاش يلمع وانتي بتس الصيحه
طبعا تتدخل وزاره العدل , المحكمه تستدعي حضره سموتس الى طاوله النقاش العائلي
واخوتس الصغير حاط قدر فوق راسه وماسك ملاس بحكم ان القضيه مطبخيه طبعاً حارس امني هالبزر

يلا ماعلينا ، تلتفتين لاامتس وابوتس ماسكين قلم وكرتون مناديل مقلوب يكتبون به

تلتفتين لاختس الكبيره طاقه لتس النظارات ومسويه الفاهمه والعقل ، واخوتس الكبير يحتري القضيه تقضي لانه مواعد العيال بالاستراحه
تبدا الجلسه والنقاش الحاد والمعارضات تبي تبررين موقفتس بالسالفه مستحيل تلقين فرصه طبعا لانتس الجاني
ابوتس يلتفت لاامتس :افتحي ملف قضيه لهالوغده واكتبي تعاقب اسبوع حرمان من الجوال او اي وسيله ترفيه
واي احد يتعاطف معه نبي نستوقفه ويعاقب حسب القوانين الخاصه وحطي محل توقع تعهد وعطيه نسخه من المكتوب *الله واكبر ياهالنسخه *!!
ثواني الا ويصبختس كرتون المناديل طبعاً هذي النسخه توقعين وتسلمين روحتس للحكومه وتخضعين للاوامر
وترجعين للمطبخ وتضفين الكاس تناضرين العلامه *بوك* حلو يعني السالفه الماصله اللي صارت عشان كاس جبن بوك
انا بسوي حمله مقاطعه لهالجبن دينماركي لا بعد فتح لي قضيه وهذي القضيه الثالثه والرابعه سجن* وش هالقوانين *


يمر اسبوع وينفك الحصار وترجعين للبي بي تحدثين وتكتبين *ولكم باك بعد احلى سفره شكرا دادي شكرا مامي على الهديه
وين ياعين امتس ممسوح بتس الارض صار وجهتس مستطيل من الكرف * ماله دخل الوجهه صح يلا معليه نكمل *
والله لو يدرون اللسته انتس معاقبه عشان كاس جبن كسرتيه ان ماتلقين احد باللسته الا انتي تهشين ذبان !!
طبعا تدخل عليتس صديقتس : فلانه وينك وحشششتيني يادوبا
تردين: ياقلبي انتي تعرفين الوالد عطانا اجازه ترفيه ورحنا دبي نغير جو وكذا
وترد صديقتس: واو .. يالحقيره وين هديتي !!
يلا هناا عاد ابلشي ودوري لتس اقرب مخرج : ههههههه انا هديه اكفي * مصالة بنات امنت بالله*
وترجع تقرق : طيب وش شفتي بدبي هناك قابلتي مين وين رحتي وش شريتي !
طبعا انتي هنا تحكين راستس من قوه الورطه: شوشو ماما تصوت لي شوي وارجع لك برب
وتمسح المحادثه ، وتطير تغير الحاله وتكتب برب عشان تصدق

تدخل عليه صديقته الثانيه اللي مسويه فاهمه : يؤ يؤ يؤ وانا اقول منين النور اثرك فعلتي وحشتينا يالمعفنه *معفننننه *
بحكم انه صديقتس عادي هالمصطلحات تردين : ههههههه حياتي مافعلت كنت مسافره والخدمه ماعممته * واو *
ترد : جججد وين رايحه !
تردين : الوالد عنده شغل بقطر وقال امشوا نغير جوو مع بعض * شخبار كاس الجبن *
ترد : صصدق ياحظك رحتي سوق واقف كل من راح قطر لازم يروح له
طبعا تردين بثقه : ايه بس كان ممل مرره مررره
ترصد لتس شباكه : وريني صوررركم !
هنا انتي تبلشين يلا دوري لتس ارنب يمشي عليه : والله كلها بكام اختي اذا فضت وريتك
يلا عن اذنك بروح اخذ لي شاور

ياربيه شهالعالم المتخلف البيت تعاقبين عشان كاس جبن البنات يحجرن لتس !!
وانتي تحلطمين يجونتس المبزره صراخ يتهاوشون على ريموت التلفزيون !!
انتي قاعده ومالتس دخل باللي يصير مواطن غير فعال ، تصرخ امتس :فلانه وصصمخ فكي اخوانتس لايتذابحون
لاحول ذولا ثيران شلون افكهم تصرخين من قوه الصرخه تحسين انه طالعه من قاع معدتس والدخان يطلع مع اذانتس والشعر منتفش تقولين اثيوبيه
تاخذين الريموت وترفعينه ويرجعون يتهاوشون بالالسن
: فلاااانه يمال الصمخ اخوانتس اخوانتس
طيب ياامي ذولا عيالتس تعالي تفاهمي معهم انا شدخلي
تذكرين كاس الجبن وتصيرين شغاله وتهدين الوضع وتحاولين تجين باللين

يعم الهدوء وترجعين للجوال تذكرين انتس مصرفه كم بنت تدخلين التويتر وتغردين : اهلي هم سعادتي وراحتي وانسي وفرحي ابتسامتي وبقلبتس تقولين : حزني ومحطميني ومعاقبيني وووووو *طبعا تحتكين ب رشاد وشلته اقالتس موت وراعيه كتابه وفن ، ترسلين التغريده
ثواني الا جوالتس بنقااات تحسين انه جاه صرع من قوه البنقات اللي وراء بعض
تفتحين المحادثات : واوك ذي انه اللي صرفته قلت شاور ، وذي اللي قلت امي تنادين ،
وذي اللي قلت له بنطلع نتعشى وذي اللي قلت له بطلع السوق ، وذي اللي قلت له عندي صديقاتي *طبعا كل ذا لانهم شافوتس مغرده بالتويتر ، مادروا انتس تماعطينن انتي واخوانتس وتهاوشون * احسن طريقه قفل الجوال واقول يؤؤؤ خلصت البطاريه سورري *
تبي تغيرين جو وتشمين هواء تطلعين للحوش وتاخذين كاس بلاستيك بحكم انتس لتس سوابق بتكسير الكيسان وتعبينه ماء ، وتقعدين على اول بلاطه بالدرج والدنيا غبار
ماتشوفين االا شئ يشخخط من عندتس بسرعه ويطير شعرتس * ماودي اقول يطيرتس تسذبه كبيره * تصرخين: وججججع
طبعا اختس اللي اصغر منتس تنافخ * لااله الا الله ياكثر هالعايله* : اش امي تقول اكنسي الحوش كله غبار
تردين : طيب ياحماره اندزلعي عن اكنسي زين موب تسذا الكنس
تناظرتس بطرف عين وتوقف وتتكي عاى العصى: لاتخلينن اعلم امي انتس كاسره مرايه المغسله اللي فوق عند باب الغرفه * واوك لتس سوابق ب قضايا الشغب *
هنا انتي ماتقدرين تنطقين بحرف تشربين الماء : الا اقول به سهره اليوم تسد جوعنا بالليل * تضيعين السالفه *
ترد عليتس اختس وهي تكمل كنس : ايه اظن به ليز ماكس له ثلاث ايام بالدولاب اكل منه فلان وغبا الباقي ونساه ، وبه عصير سن توب بالثلاجه
تشربين اخر قطره من الكاس : حلوو يلا بدخل
تناديتس : تعالي تعالي وش انتي قايله ل فلانه :|
ترفعؤن حاجبتس: منهي فلانه
تقولتس : فلانه الفلاني بنت خال عم جد خال مرت ام صالح ام جيراننا
تشنجين وتصيرين كتله ثلج ، تسطرتس اختس : هيه وشبتس
تخنقتس العبره وتقولؤن بنبره خوف : شقالت لتس !
: تقول ورين الصور ان اختس تقول انه بكامتس ، واني قلت وش صوره قالت صور قطر ، قلت قطر !! وش قطره !!
قالت ان اختس تقول اننا رايحين قطر ، واني زبدت لتس وقلت ايه ايه بس الكام طافيه لاشحنته وريتس
تنفسين ويطلع منتس دخان من اثمتس زي حركات افلام كرتون* الله ياخذه هالبجيحه ياربيه منه شرروف توحش طالعه على ام صالح *
تقولين لاختس :..لا سألتس لا تردين عليها
تدخلين البيت وتناظرين كنب الصاله وتشتهين الغفوه شوي تريحين ، ترتبين المساند وتتطلعين لوحه مكتوب به بيزززي بترحين شوي
اول ماتمددين ماتسمعين الا غسالتكم بدت تلعب بالثياب تغيرين الوضعيه تشوفين اخوانتس راعين الريموت يتلاحقون بالتفيخ وبهن ماء
يالله وش هالحياااه تصرخين لاحياه لمن تنادي ، تستعينين بالاسلحه الموجوده عندتس وتصوبين عليهم لامروا وخذ من الوسايد الطايره

تدخل امتس ويطلع اللسان ياصل ام صالح ويرجع وتقومين ترتبين الحوسه وتصرخ لاقضيتي روحي روشي اخوانتس
بتجي ام صالح وبنته ومرت ولده واخته المغرب ، تناظرين امتس *يمه ارجوتس لا ام صالح لالا *
وهي ماشيه تقولتس : لاقضيتي شبي على القهوه وترا اختس زينت حلا شوفيه بالثلاجه لاجمد قطعيه وصفيه بصينيه زينه
وخلي اختس تقلي القيمات وقولي لاختس الثانيه تزين شاهي وحطن فناجيل وبيالات وسكر ترا اخت مرت ولدهم تحب السكر * وانا وش دخلي به جعله بقلعه ودرين *
وتبدا العفاريت تناقز براستس وتشيلين اخوانتس مع شعرهم تسنهم حزمه جزر وهم يلعبون ويتضاربون وانتي بالعه العافيه
تدخلين الاول تبي تروشينه والثاني واقف يضحك ويدخل يزحلق وتصرخين ويهج تسنه بطريق
واللي يتروش ويصرخ حار الماء :انطمم يالتسذوب لااخليه حار صدز ، ويسكت المسكين لين يفرجه ربي
تطلعينه وتدخلين الثاني * حشا صواني كيك موب اوادم* وتملين شعره شامبو ويدخل بعيونه ويصايح وتعطينه ذيك القبصه اللي تخليه يبلع لسانه
يطيح الشامبو وتنزين تحسبينه قزاز خلاص جتس عقده عقب كاس الجبن

يذن العصر وتخترش البيت وابوتس يطلع من البيت بيروح للمسجد وهو عند باب الشارع قوموا فلان يصلي وفلان اطلع لاتفوتك الركعه الاولى ان فاتك موب ازين لك
يبدا التخميس والتفحيط بالبيت والترتيب والتمسيح والمطبخ يعج بالحوسه
تدخل اختس الكبيره هي ونظاراته : وش هالزحمه !! تدخلينه وتعطينه سكين وتمدين الحلا قطعي ياأفلاطون انتي ونظاراتس
تحط السكينه وتناتظرتس : هكذا تتعاملين مع الادوات الحاده سحقاً لكي -_- !!
تمسك السكينه برقه وتقطع ، تجي اختس طيران وين وين المكنسسه به تراب عند الباب من نعال فلان الله يحبطه طالع للبر ونعاله تراب *تحلطم الاندونسيه*

يرجع ابوتس من الصلاه: وين امتسس !!
:فووق تصلي ولانزلت
: روحي ناديه تجي تشرف على المواد الغذائيه بروح للسوق اتقضى *مواد غذائيه ياوالدي , يابابا موب وقت السسوق ابببد*
تنزل الام وتصرخ فلانه جيبي قلم و ورقه وتعالي اكتبي المقاضي لابوتس دامه يشرب الشاهي تجي اختس وتكتب وتناظرينهم وبقلبتس *واسفاه*
تطيح بتس امتس : يمال العرس تلفزيون قدامتس كملي شغلتس لاتجي المره وحنا ماقضينا
تتدخل افلاطون : اماه انا برايئ ان نقدم العصائر قبل ان نقدم الشاهي ف الاتكيت يقول هكذا ياامي
طبعا هذي ذراع امتس اليمين اي شئ تقوله يتم
تناظرتس اختس: اذاً اخرجي اكواب العصائر وضعيها في صينيه التقديم واطلبي من المحل عصير الليمون والمشكل *كاس لابعد قزاز *
: انا عندي شغل انتي زيني حفلتس يالاتكيت
تضحك ضحكه سيلفر: هء هء هء نسيت ان لكي سوابق في تحطيم الزجاج *زجاج زجججاج *
تكملين شغلتس وتصفين الدنيا وتشبين البخور وتروحين تملحين وتغيرين وتفتحين البي بي تطقطقين شوي
يذن المغرب وتكتبين الحاله : وذ قيلز * اي قيرزه ياعمي ام صالح وبنته العجوز ومرت ولده النقاده واخته اللي مدري وش تبي وين القيلز بالسالفه *

تمر الدقايق وتدخل ام صالح ومعه كراث وصحن فطاير وزمزميه زنجبيل * والله من زين المزاج شكل الليله صباحي مع ام صالح الله يعيننا *

وضعيه القعده المجامليه التسليكيه انتي وخواتس الا افلاطون تتفلسف معهم
يعم الصمت وتنطق مرت ولدهم : الا ماشاء الله يقولون انكم جايين من قطر وراه ماعلمتونا انكم راحين
امتس : قطررر !! *فوق راسه علامه تعجب كبر برج المملكه *
وتكمل : هاه بشروا وش زينه ولالا نروح ولا لا اسواقهم زينه ولالا حريمهم متغطيات ولالا
هنا انتي تشرقين بالفنجال !!
ترقع لتس اختس باقرب مفر : اييييه يمه شفتي صديقتي تقول ان عنده ثوب ودي اخيطه لعرس فلانه
وتلتفت اختس على اخت مرت ولدهم : ماخبرتي لنا فساتين بما انتس راقيه وكشخه !
تعطيتس الضحكه اللي اقاله جويل على غفله : اي عندي طبي واختاري

تنهدين وتناظرين امتس اثره تساسر مع ام صالح شكل فيه سواليف مشفره ولاحش
تمر الساعات يدخلون اخوانتس الصغيرين يركضون معهم اكياس بقدونس وخس وجرجير
وابوتس عند الباب يصوت ياولللد فلانه تعالي ودي المقاضي للمطبخ
يقومون خواتس لابوتس وانتي تبتسمين للحريم *وكان شئ لم يحدث *وتطلعين اخوانتس وكم كف على الطاير

تدخلين المطبخ وتحلطمين انتي وخواتس وتحشن وتنقدن وتناقش الوضع اللي بالغرفه *داود الشريان *
تسمعين اللي يتنحنح الا تدخل بنت ام صالح ، طبعاً تمون الاخت تحس انه ببيتهم واقاله موت وفله : طححت بكم شتسسسوون !!
انتي وخواتس وجيهكن تسذا -_-"
تجلدينه ولا تذبحينه ولا وش تسوين بعمرتس قفطتنا
تبدا الميانه صدز تشوف صينيه ولا قدر ولا ملعقه تبدا تسال منين لكم وشوله شارينه وش تحطون به
هالصينيه عند حماتي مثله تحط ورق عنب وان ورق العنب حقه يفتن ماتملين منه وانتي تاكلين ودتس مايقضي , انتم حطوا بهالصينيه ورق عنب مثله !!
* نعم نعم نعمممم وجيهكن تسليك طبعاً وتبتسمن *
شوي الا الاخت تعمق وتبدا عمليه البحث والتحري وتفتح بهالدوالايب وتفرج لين تاصل الثلاجه : ترفع حواجبه : وش جاب ابوكم توو
طبعا انتي تصيحين اختس يغمى عليه والثالثه تزحلق على الجدار والرابعه بتشق ثيابه

تطلع ام صالح هي والحموله اللي معه وتبدا التسبيع والترتيب عقب العزيمه تصير الساع 10 خلاص يصير بيتكم مهجور كلن ينام
تجتمعين انتي وخواتس على الليز وسن توب تقاسمنه ولاقضيتي اشربي ماء مددي وارجعي للبي بي والتويتر وطقطقي وارنبي على صديقاتس
لين يحلها ربي


*بنص الحلم وانتي مستمتعه بحلمتس وعايشه عالم وردي وريحه ياسمين وهدوء* فجاءه تسمعين قنبله ويرجع عالمتس الاسود وترجعين لحياتكم الحقيقيه *
صبخ اخوتس بالباب : هيه هيه هيه فلانه فلانه فلانه وينغزتس هيه هيه قومي فلانه
: همممم شتيي
: تقول امي قومي لا اكب عليتس ماء صلي الظهر الساعه 3
تنقزين بتصلين تقومين توضين وتعوذين من بليس تصلين وانتي بالتحيات الركعه الاخيره تسمعين * الله واكبر...*
انتي تحسبين العصر ياعمري ولا توه يذن الظهر خدعوتس
تعضين الجلال وتصيحين بكل قهر وتقومين تعيدين الصلاه
تنزلين وام العبيد زايرتس اليوم ولاتهرجين وتصبخين باللي قدامتس تناظرتس امتس: صباحح الخير بدري
طبعا انتي شايشه ماتهرجين
تقولتس امتس : كملي الغداء بسرعه لاننا العصر بنطلع نتمشى
*فيستس يتنهد ويناظر امتس بكسل * يمه اًرحمين
يجيتس عزم انتس تواجهين امتس بكل قوه
ترزين عنقتس: يمه
ترد امتس وهي تقطع البقدونس : وصمه !!
*هذي اوله يااميمتي* تبلعين ريقتس وتاخذين نفس : ابي اجازه
تشهق امتس: يمال اللي مانب قايله اجازه عن وش !!
يتعبر وجهتس ويتجعد من العبره : يمه موب معقوله حياتي كله شغل شغل فوق راسي قسم بالله ولا شغل شغاله ورا بعض ترا ان اغمى علي باتسر انتي اللي بتندمين ياخي خلي افلاطون تشتغل معنا
موب حاله ترتز بغرفته وتقلب بهالكتب اللي يشوفه يقول تحضر دكتوراه وهي شهاده ثالث ثانوي وتخب عليه
ترا صدز مصخت يمه باخذ اجازه ولا وقسم بالله لااصك على روحي بالغرفه شهر مااكل ولا اشرب *طبعا تهرجين باندفاع وقوه*
وجهه امتس بدون انفعال ، تناظر اللي ب ايده وترجع تناظرتس وتضحك : انتي تبين تعهد يطيرتس ورا الشمس
هنا القمطه عاد
تاشر لتس ب اصبعه : تعالي تعالي ياقليله الخاتمه قطعي ذا اشوف وكملي الغداء وزيني قهوه وطلعي التمر ورتبي السله حقت الطلعه وتطلع وتخليتس
تناقزين بالارض من القهر : مممممانب طالعه طلعت روحححي ، الله ياخذ افلاطون هي وكتبه
يدخل اخوتس : افاا وشبتس
تردين : ياخي ماخبرت لي رجل بعرس بعرس وضع بيت اهلك لايطاق ياخي عندك ام بتله تخلين اشتغغل طقت تسبدي
يناظرتس : طيب لاتنافخين وجع واش هذا شغلتس كلنا نكرف عطين ماء اقول
تعصبين ودتس باقرب ساطور مع دميجته تاشرين على الدولاب : شف هناا الكاس والبراده شفه ورجلينك بك قم انت الله لايبارك بعدوك * وتقطعين وحايمه تسبدتس *
تصفون الغداء وتغدون وتعينون من الله خير

بعد الغداء ...
تقولين لاختي: قومي تكفين تكفين كملي عن قسم تعبت
تطقطق بجواله : شزين !!!
: زيني تورته واطبعي صورتي شتزينين يعني اهلتس بيطلعون لحديقه تسننا مصاريا ولمي قشهم
ومازالت تتطقطق : من بيروح !!!
: حنا وشعب البحرين الا اثنين
ترد : ايه سلميلي عليهم
: تسستهبلين قومي
تاكل علك وتتفخ بوجهتس: امي من موجهه الامر له ! لتس صح! خلاص انتي زينيه !

خواتس مابهن بركه ولااحد ييعاونتس ، باقي على الاذان نص ساعه تقومين ترتبين القش وتحطينه عند الباب من العجله
تدخلين التويتر * يابيتنا يابيتنا فيك السعاده والهناا * ووجهتس مثل القصبي لاصاح

الحمدلله تلبيس البزران وطاح عنتس
يلا عاد يقوم ابوتس بيطلع للمسجد: تراي من المسجد للسياره اللي بنروح عنه موب راجعين * لاه لاه على اساس ميتين على روحتكم بتروحون تهاوشون وترجعون *
تلبسون عبيكم وترتزون عند الباب تسنكن طرارات
يطنب ابوتس وطررقن طررقن سباق فروسيه تهاوشون من يقعد عند الدريشه
طبعا عشان اخوانتس كثارين تسنكم باص بمزدلفه فوق بعض لاحول ولاقوه
تمشون : هييييه قومي عن عباتي
والثانيه : اااي وطيتي رججلي
والبزران يتهاووشون على المكيف كلن بيحطه عليه
وابوتس وامتس تسنهم بسياره لحالهم مالهم دخل بالوضع

تاصل عائله السيد شحاته للحديقه تنزلون تسنكم غنم كلن بجهه ، يصفر ابوتس تسنه ببيته يلا تعااالوا تقهوا بنمشي * تونا واصلين يايبه وش تمشون*
تجمعون وتبدا اللمه العائليه اللي ايدينهم على بعض وسواليف وهدوء وجو فخم
شوي الا يجي اخوتس الصغير مفلوق !!!!
تشهق امتس : بسم الله على جنيني وش هاللي بك
يصيح واخوتس الثاني ماسكه اقاله فزعه وجايين ركض .. : يمه به ولد جدع عليه حصاته واني حلته وضربت اخته وصاحت
واسمع ابوهم يصارخ ويدورناا يبه يبه لايضربنا
يفزع ابوتس : وينه مسود الوجهه امسح به هالثيل عيال الناس لعبه يفلقهمم * يشيل زبوريه ويمشي والشر يتطايرر ، يقومون اخوانتس معه *الجيش العثماني *
وامتس بلشه ب اخوتس تمسح جبهته اللي به جرح كبر النمله
شوي الا تشوفين من بعيد غبار يرقى السماء ونعله تطير وشماغ وطاقيه وعقال اها الحرب العالميه الثالثه
تحطين ايدتس على خدتس لين تقضي الهوشه ، يجي اخوتس طاير يركض مثل عبسي وطرف ثوبه من تحت ب اثمه ويصرخ : قوموا قوموا حريمهم جو لمكم بيجلدونكككم * وش هالهوشه :| *
تناقزون وتضفضفون وتشوفين الجيش الحر متوجه لكم *صوت ركض خيول*
تصرخ اختس : هجججججججججوم ومعه سله الترامس
يمسكه اخوتس وجججع موب وقتس ارركبي
تركبين السياره : فلان فلانه وينههه ماركبت
افلاطون : شوفوه تصورر امعطه مع شوشته * طلعت حقيقتس *
تجي نعله طايره على سيارتكم وابوتس واخوانتس يجون ركض تركبون السياره وتهجون
: هاه يبه من الفايززز
: افا عليتس يابنتي هالشنب مايفوز جلدناهم جلد ، لين تراجعوا
وجهتس انتي تسذا -_-'
وش هالعائله ياربيه اقالهم طالعين يغيرون جو على العموم ماعلينا تواسين تاخذين غفوه

تمر ايام ويقرر اخوتس انه يعرس ويبي بنت بيضاء ، شعره طويل واسود ، نحيفه ، طوله متوسط ، مزيونه ، خشمه سله سيف ,
عيونه زرقاء اليمامه ، دلوعه ، طباخه ، تحب البزران ، تستحي ، ويبي عمره 21 * ياعمي وش هالطلبات التعجيزيه اللي تبيه ، وين نلقى لك هاللي تبي *
يقول : خلاص موب لازم تصير نحيفه بس مابي دبيه !!
طيب على اساس هذا الشرط الوحيد اللي عايقنا !!
تجي امتس معه كاتلوج بعد ماجمعت كم بنت : شف ياوليدي فلانه الفلاني ... مزيونه وطباخه وطويله رموشه طوال اصابع رجله طول بعض بس عيبه الوحيد انه سمرا
يرد اخوتس : امممممم لا لا مابيه حطي عليه اكس
* ياشيخ احلف بسس*
تكمل امتس : فلانه الفلاني عمره 23 بيضاء قصيره عيونه كبار خشمه زين دلوعه وكشخه واهله راقين بس عيبه ماتعرف تطبخ عيشتهم متكلين على الشغالات
يشرب اخوتس الفنجال : وذي حطي عليه اكس بعد مابي طمله
تفتح امتس الصفحه : شف شف ذي متاكده بتعجبك : فلانه الفلاني ابوه طبيب امه مدرسه متواضعين مزيونه وبشرته حنطيه
وهي بكر امه وراعين واجب ويقدرون الواحد وتعرف تطبخ و و و و
يضحك اخوتس : واوك حطي حطي عليه صح ذي خليه بقائمه الانتظار
* قائمه انتظار والله ياقرد حظه اللي بتاخذك انت وخشك اللي تسنه وجهه تيس *
يقولتس : قلتي شئ
: لا لا سلامك
اقاله مستانس : وش رايتس بسس

امتس بحماس : شف شف ذي والله ياهي تنااسبلك قوه : فلانه الفلاني سمينه شوي قصيره ناعمه مملوحه اخطبوه ثلاثه
وعيت تعرس توه بثالث ثانوي طباخه بدرجه اولى
امه مربيته صح ومايهمه هرج الناس وووووو
* احس انهم يقبلون متقدمات موب خطبه *
يرد اخوتس : هلا هلا , حطي حطي صح

تمر نص ساعه ووقع الخيار على ثلاثه من 313142525141 بنت
الحمدلله المرحله الاولى تخطيناه بسلام
تصك امتس الكاتلوج وتقول خلاص باتسر الجلسه الثانيه * قضيه موب خطبه ياقرد مرت ولدنا *

تقهوين وانتي تفكيرين يعني لهالدرجه الناس تسذا تخطب .. يلا ماعلينا اهم شئ الراحه النفسيه * راحه نفسيه :| وين الراحه وراي تسبيع مواعين اليوم علي
وتنقزين ذيك النقزه للمطبخ , وتدخلين وتشوفين جبال السروات * اول الحتسي كان افرست بس هاللحين اقل *
تفسرين وتبدين تشتغلين بتوخي وحذر لاينكسر شئ وتصير لتس سالفه وتعهد وتضطرين تدورين تسذبه عشان صديقاتس و و و و و
وانتي تسبعين يدخلون اخوانتس عندهم ولد جيرانكم ويصبصبون ماء ويشربون وذا يحوس بالثلاجه يدورعصير ويطلعه ويصب وينكب نصه بالارض
تعصبين : طيب انااا اصب لك جب الله يقلع خشمك
تصبين له ويحتريتس وتمدينه : امسسك
تلتفتين اثرتس بالمطبخ لحالتس
* طيب ياعممي والعصير وشوله تخلين اصبه *!
وتضطرين انتس تشربينه وتكملين شغلتس وتمسيحن المطبخ وترتبينه ويصير يلمع زي الدعايات
يدخلون البزران مره ثانيه يشربون ماء ورجلينهم غبار ويوصخون الارض ويطلعون !!
انتي طبعا جدار !! من قال انتس منظفه لا لا مانظفتي اصلن عادي مايهم ولايشب التسبد
تخلين الوضع كما هو وتروحين تسردين على امتس : سويت وسويت وسويت وسويت وسويت وصار اللي صار
امتس لابسه نظارات وتفرج على الكاتلوج تراجع يمكن تلقى احد ناسيته : ارجعي وامسيحه
: يمه وش امسح مسحت ووصخوه عيالتس شزين
وامتس موب لمتس : لاتناقشين روحي سوي اللي قلت لتس وزيني لي شاهي غجر مرتفع ضغطتس * مالومتس يمه ضغطتس صار على الـ e *
انا اللي ضغطي بعد كم يوم بيصير *game over*
ترجعين وتمسحين الارض بسرعه عشان ماتجي القروده وتحوس عليتس , وتصكين النور وتطلعين لغرفتس تريحين

ينتهي اليوم والحروب داخل دولتكم هاديه ولافيه اصابات ولاحصار ولامسك * متاثره من سوريا الله يفرجه لهم *

تقومين من باتسر وتلقين اهلتس مجتمعين على طاوله النقاش واخوتس متكي ويناقشون اختيار البنات الثلاثه !!
حقرا بقرا ويلا اختاروا البنت وفكوناا
ساعه ونقاش ويطلعون عيوب هالثلاثه وذي تزين وذي تحط ذي كثيره طلعاته وذي ماتفيض الباب وذي امه تعبانه وذي ابوه مدري وشبه
* اموت وادري منين جايبين كل هالمعلومات بتدخلون موسوعه غينيس على هالانجاز العضيم *!!
الحمدلله وقع الخيار على وحده من هالثلاثه اللي بدائره الخطر وياقرد الحظ اللي حنا حمولتس واخوي رجلتس والله يعينتس علينا
امتس تصك الكاتلوج اللي له ثلاث ايام تنقله : خلاص المغرب ادق على امه ونشوف والله يكتب اللي به الخير , انت خلك العصر بذا عشان بطلع للسوق اشري كم غرض
يرد اخوتس : يمه العصر مواعد واححد !!
: ترا والله مادق على المره واخطب لك البنت * شغل تهديد متكتك ياحبيبي *
يحمق اخوتس : خخلاص خلاص ان شاء الله اوديتس للي تبين بس زوجين
يقوم ابوتس ويحط ايده على كتف اخوتس : كفو ياوليدي هذا تربيتي تبي تكمل نص دينك , الله يفتحه بوجهك وتصير اسعد من , ويفرحك انت وياه
*يبه تراك قبل كم يوم مسوي مصارعه بالحديقه نسيت ولااذكرك *
يناظرتس ابوتس : زيني لي قهوه اليوم الطلعه علي ابي قهوه مضبوطه !!
توجهين تحيه عسكريه : حاضر سيدي


الحمدلله اهل البنت ووافقوا على اخووتس المقرود , وحددوا موعد تروح امتس تشوفه * شايفته من قبل بس لازم تشوفه ثانيه *
وتروح امتس وتاخذ افلاطون عشان يشوفون مرت اخوتس الجديده
ويرجعون : شفناه تهههبل صايره وصايره مره وسنعه ومسويه حلا طعمه بالررراس , بس انه موب كشخه قوه قوه لبسه قوه عادي
ويتشقق اخوتس من الوناسه ويحس انه افخم شئ

بعد يومين بيروحون يخطبون رسمي .. ويبدا التولم واخوتس يروح يفصل ثوب ويشري شماغ ويشري عطر وكبك وكل لوازم الكشخه
ويستاجر سياره تواجهه اهل العريسه

تخطب البنت رسمي وتبدا عاد تجهيزات البيت والعرس وشغل الى راستس وكل يوم طالعين للسوق ويجي اخوتس شوفي ذا زين , وذا طيب , طيب طيب شوفي ذاا ,
شهرين واسبوعين وثلاث ايام و15 ساعه مرت وجاء يوم العرس اليوم الموعوود

الظهر :
امتس تلج بالصاله عليه عباته بتروح للمشغل : يلااا لايصير زحمه المشغل ومتى نقضي عاد يامجموعه بن لادن
اللي تدور عباته , واللي تبحث بالنت عن تسريحه * توه تستوعب * واللي تركض تروح وتجي , واللي ضايع نقابه
تنزلين وتقولتس امتس : صيفنا يلاا انجزن
: انا قاضيه بس بناتتس باردات
تلبس عباته : انا بطلع مع ابوتس وانتن الحقنن لاقضيتن وراي جنب انا والناس بتحترينا
: طيب طيب بروحح معتس

تطلعين مع امتس تروحون للمشغل وتمسكن سرا الى 3 ونص وتبدا امتس تزين وتملح وخواتس كل وحده بجهه واللي تستشور وذي تمكيج وذي تعدل و و و و
تجي خالتس وبناته وتبدا تكشخ , وتحترونه تقضي عشان ترجعون جميع لان الباقي يحترونكم عشان تمشون جميع للقصر
نص المغرب ترجعون للبيت واللي يتلبس واللي تمسح مكياجه لانه شين واللي تعدل و و و و و

فجاءه تسمعين زغاريط دخل العريس كاشخ , وتنزلين وماتشوفين الا فلاشات وتصوير وسلام وتبارك * يارب انه امس قاعد مع خالاتي واليوم يسلمن عليه اقالهن لهن سنه ماشافنه *
تباركين لاخوتس وتصورين معه وحبتين وحركات يذن العشاء ويروحون الرجال يصلون وبيتكم ماشاء الله كله لمبات تسنه القصر الابيض
تبدا تتوافد الناس لبيتكم عشان تمشون جنب وتروحون للقصر وتصيرون مرتبين وحركات
تدخلون القصر ويعرس اخوتس وترقصون بعرسه وينكسر ككعب اختس وتبلشون به , ولاطلعتوا فلانه ضايعه عباته وتلبس هي وثانيه عبايه وحده
وامتس ماتشوف الارض وبتكملون سهرتكم وعرسكم ببيتكم انتي والقيرز ....

من باتسر تروحون لصباحيه العريسه كل عائلتكم تروح البنت يجيه رعب منكم وتوحش وش هاللي دخلوا علي متى تقضي مسلمه عليكم
ويمر اليوم ويسافر اخوتس للطايف وابها ومكه شهر عسل


الحمدلله طاح من عائلتنا واحد باقي افلاطون وكم واحد
بعد اسبوعين يرجع اخوتس من شهر العسل وصاير رجل وراعي مسؤوليه وجاي هو ومرتته عندكم * ايه يافلان كل عمرك تدخل علينا بقميص جاي من الاستراحه , وريحتك مدوده عقب المبارات , وشاربك واصل ركبك وحالك حاله واللحين طلعت اتيكيت *
تسولفون على مرت اخوكم عشان تتاقلم عليكم * ياويلتس قدامتس مستقبل *
يدخل ابوتس ويقلب الموازين ويقعد يتقهوى ويقول : عاد الله الله بولدي وكليه وشربه وعطيه وحطي له وافطني له * اخذه رجل كبرك يايبه ولا بزر بالمهاد *
والله الله بالضنا نبي تضربين رقم قايسي * :| يبه يبه يبه توه معرسه وش جاب سالفه الضنا , بعدين وش تبي ضنا كثر عيالك بسه هي *
تضحك البنت مستحيه وتجامل ابوتس وشكله بقلبه تقول * متى هالخال يطلع *

تمر الايام وتبدا تمون وتصير مرت اخوتس وحده منكن
امتس وهي شاقه الخشه وفرحه جايبه له مرت اخوتس حلا : ونعمم ونعم بمرت وليدي السنعه ايه تعلمن السناعه منه بس جيدات بهالجوالات عساهن يعلقن
* يمه حنا نطبخ لتس ذبايح ومفاطيح وراه موب سناعه ذي *
تبدا تدخل بكم على شوي شوي لين تبدا تدخل المطبخ وتسبع بدالكن وترتب وتحوس صارت تجي لمكم اكثر من ماتروح لااهله
وامتس وابوتس ماغير مدح ويعطونه من هالرخيص , مرت ولدنا اسنع وحده , مرت ولدنا ذربه , و و و و و
صرتوا تشوفونه اكثر من اخوتس كل يوم حلا داخل حلا طالع صينيه فطاير , عشاء وهدايا لا امتس وابوتس
وانتي تكي وتفرجي ماتسن لتس والي ... !

_

قرروا اهلتس يسون عزيمه كبيره ببيتكم وبيعزمون كل من هب ودب موب تاركين احد
بالمطبخ .. وقهاوي وشواهي وبيلاات نصهم متكسره من الخرشه * بتحاسبين بعدين *
وبيتكم لجه وبزران وشغالات وحريم وحش وصراخ ولعب وتصبيخ وترجيف ...
يجي ابوتس يصوت : قههههوه
من قوه الصرخه يمشي الترمس هو برجلينه يروح يدخل على الرجال
وذي قهوه قضت يبون قهوه , والرجال جاء ابو فلان وابو فلان جيبوا لهم قهوه ,
وشغالات يتحلطمن وخواتس يهوشن عليتس وانتي مختس موب براستس ضاع من الربشه والحوسه والدنيا
تعشون والحمدلله بدت المعازيم تخف وكلن بدا يطلع * ملوا كروشهم يلا نرججع البيت *
بعد العزيمه يلا عاد رتبي الغرف مسحي اللي متنثر , دوري اللي ضايع , رتبي المطبخ , الرز اللي باقي اجمعيه ودخليه بالثلاجه تغدون منه باتسر
تقضين من شغلتس يذن الفجر !! وترقين لغرفتس وانتي شياطينتس هجت منتس من الشر اللي يتطاير من عيونتس

تطلعين ورقه وتكتبين

إلى والدي المحترم
تحية طيبة السلام عليكم ورحمه الله وبركاته و بعد :

الموضوع: تقديم استقالة

أرجو من حضرتكم الموافقة على قبول استقالتي و ذلك اعتبارا من تاريخ 12-3-1434هـ لظروف خاصة بي
واسمحوا لي بهذه المناسبة بأن أتقدم لشخصكم الكريم بخالص شكري و تقديري على ما لقيت خلال مدة خدمتي معكم مع عدم الاهتمام و التقدير
من ما اكسبني خبرة في عملي هذا راجيه لكم دوام التقدم و التوفيق

و تفضلوا بقبول فائق الشكر و الاحترام
ابنتك : .......

وتحطينه بظرف وترسلينه فيدكس الخاص ببيتكم لابوتس
يقراه بعد مايجي من الصلاه ويرد عليتس :انثبري وخلي عنتس الخربطه لاجي افتح راستس وادخل به ملف قضيه ماتطلعين منه ولايقدر ولامحامي يدافع عنتس وباتسر طلعوا اللحمه وبصل وطمام بزين عشاء لاصدقاي * جمعه شيبان *

ترددين هالبيت وتشقين الورقه : إن حظي كدقيق فوق شوك نثروه .... ثم قالوا لحفاة يوم ريح جمعوه

النهايه ....

منقووووووووووووووول

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 17-05-2013, 06:53 PM
صورة جروووح بلا دماااء الرمزية
جروووح بلا دماااء جروووح بلا دماااء غير متصل
كَيفَ أَمحُوكَ منّ أورَاقٍ ذَاكِرَتِيٍٍِ~ ...وَأَنتَ فِي الـقَلـبِ مِثلُ النّقشِ بِِالحَجَرِ..!!
 
الافتراضي رد: أنا حستقيل من البيت


هههههههه
فعلا لازم نستقيل من البيت

حقائق تصير معنا

ههههه
لما انكسر كاس الجبن
ههههه


هههههه

يعطيك العافية

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 17-05-2013, 09:28 PM
صورة كشوخه العيـن الرمزية
كشوخه العيـن كشوخه العيـن غير متصل
©؛°¨غرامي فعال ¨°؛©
 
الافتراضي رد: أنا حستقيل من البيت


هههههههههههههههه
الحياه صعبه
حبيت الموضوع ومشكوره علي الطرح المميز

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 18-05-2013, 06:36 PM
صورة وشوشه حنين الرمزية
وشوشه حنين وشوشه حنين غير متصل
©؛°¨غرامي مشارك¨°؛©
 
الافتراضي رد: أنا حستقيل من البيت


ههههههههههههههههههههه
ابدااع ياخي والله هذه حقائق في كل بيت

يسلموووووووووو على ذا الموضوع الاكثر من رائع

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 18-05-2013, 07:57 PM
صورة حكايتي انت الرمزية
حكايتي انت حكايتي انت غير متصل
هّمًسِ ♥ تٌوٌامً روٌحًي ♥ الَوٌروٌدٍ
 
الافتراضي رد: أنا حستقيل من البيت


هههههههههههههههههههههههههههههههههههههههههههههههههه ههههههههههههههههههه
معناتو انا بنعمه بعد ماسمعت كل هاد
يسلمو عالموضوع








|| لُگ آلُحٍمدِ رٍبْيَ حٍتٌے يَبْلُغ آلُحٍمدِ منْتٌہآه ツ



  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 18-05-2013, 07:59 PM
صورة هدير المطر .. الرمزية
هدير المطر .. هدير المطر .. غير متصل
©؛°¨غرامي مشارك¨°؛©
 
الافتراضي رد: أنا حستقيل من البيت


هههههههههههههههههههههههههههههههههههههه ..

شكررا لك ..

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 19-05-2013, 12:02 AM
miss silent miss silent غير متصل
©؛°¨غرامي جديد¨°؛©
 
الافتراضي رد: أنا حستقيل من البيت


قسم بالله من جدد
كل يوم كذاا بس ربك كريم ي اختي

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 19-05-2013, 08:17 PM
صورة احلام طفل الرمزية
احلام طفل احلام طفل غير متصل
©؛°¨غرامي مشارك¨°؛©
 
الافتراضي رد: أنا حستقيل من البيت


هههههههههههههههههههه
انا صراحه بعد اعاني ههههههههه
احلي شي لمن كسرت كاس الجبن
هههههههههههههههههههه
يسلموو علي الطرح
ودي

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 19-05-2013, 09:52 PM
صورة آآسسفه علے آآلوفآآءء الرمزية
آآسسفه علے آآلوفآآءء آآسسفه علے آآلوفآآءء غير متصل
©؛°¨غرامي فعال ¨°؛©
 
الافتراضي رد: أنا حستقيل من البيت


هههههههههههههههههههههههههههههه

الله يعين:$

يسلموو


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 20-05-2013, 11:24 AM
صورة *_^ امواج *_^ الرمزية
*_^ امواج *_^ *_^ امواج *_^ غير متصل
©؛°¨غرامي مجتهد¨°؛©
 
الافتراضي رد: أنا حستقيل من البيت


هههههههههههههههههههههههههههههههههههههه

هههههههههههههههههههههههههههههههههههه

هههههههههههههههههههههههههههههههههههههه

هههههههههههههههههههههههههههههههههههههه

ههههههههههههههههههههههههههههههههههههههههه

ابدداع ي خي استمتعت حييييل وأنا اقرأها والله يعطيك

ألف ألف ألف ألف ألف عااافيهه خيتووو وودي لسموك ^^


موضوع مغلق

أنا حستقيل من البيت

الوسوم
البيت , يستقدم
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
حامد زيد حلاتي بكل حلاتي منقولات أدبية 6 01-08-2012 10:29 PM
مآني بـ[مغروره] لكن ≈ فينيَ ثقه وξزة نفس,عآئلتي لـ ζ ــآلــهآ●¬» رتبـًه دبلـومآسه¬»الآ ζــمدي..~ اتحاديه لحد الجنون سكون الضجيج - مملكة العضو 534 21-01-2012 06:59 PM
شعر حامد زيد αωταя αlgиooи منقولات أدبية 14 30-06-2009 03:06 AM
قمر خالد / كاملة samt_alskooon روايات كامله - يتم نقل الرواية هنا بعد اكتمالها 149 04-11-2006 08:46 PM

الساعة الآن +3: 02:32 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1