غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 21
قديم(ـة) 03-11-2013, 10:20 PM
صورة wala.a" الرمزية
wala.a" wala.a" غير متصل
©؛°¨غرامي جديد¨°؛©
 
الافتراضي رد: موعدنا على كف الأمل /بقلمي


ههههه تسلمي .... بدري عليكي تكرهيهم لسا المشوار طويل معاهم ... وهادا البارت :)

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 22
قديم(ـة) 03-11-2013, 10:31 PM
صورة wala.a" الرمزية
wala.a" wala.a" غير متصل
©؛°¨غرامي جديد¨°؛©
 
الافتراضي رد: موعدنا على كف الأمل /بقلمي


جانا واحد مسرع وقال : ياعيال الحقو يقولو طارق مات – وراح جري للإدارة
كانت الصدمة الي رماها قوية كلنا قمنا جري وراه الموضوع مشي بسرعة فجاءة نحن في الأدارة واخو طارق الي سنة اولى ثانوي جالس على الكنبة يبكي و المدير يحاول يهديه كان في عيال كثير في الأدارة طارق محبوب و اجتماعي و الصدمة قوية
رحت له سريع مسكته من اكتافه وقلت بسرعة : ايش صار؟ محمد ايش صار؟
رفع راسو وهوا يشهق وقال : لقيوه فطريق الرياض من اسبوع مالقيو اهلو فدفنوه .... ماعرفو اننا اهلو
انا بخوف: حادث؟
قال بعد مامسح دموعه : ما ادري ... ما ادري بس قالوا لي مات
حضنتو وقلت: ربك كريم .... الله يهون عليك
شد فحظنه عليا ورجع يبكي بقوة حتى الوقت ما اسعفنا نبكي عليه ما استوعبنا انو مات الا فصلاة الغايب الي صليناها بعد الظهر هناك كلنا ابتلت اشمغتنا بكاء عزينا اهله في المسجد وعرفنا انو العزاء حيبدأ من اليوم فبيتهم
خرجت من المسجد وعيوني بحمار الدم رفعت راسي للسماء وكان الجو غيم قلت بهمس: يارب اغفر له ورحمتك واسعة --- وانرمت دمعة من عيني جديدة
مسحتها وكملت مشي للبيت وانا داخل سمعت صوت يضحك و يقول: واول واحد مين؟
ردو البقية : طروق ههههه
إلتفت وكانو جالسين يطالعو فيا دخلت البيت وسكيت الباب .... هم الي قتلوه او هما لهم يد في موتو دخلت البيت ونادتني ستي شافت عيني وقالت: الله يعطي والله ياخد ..... عظم الله اجرك ياعيني
انا بهمس: الحمدلله .... اجرنا واجرك
حطت يدها على كتفي وقالت : اثبت هادي هيا الدنيا
قلت بصوت هامس: والله ياستي تعبنا
حظنتي وقالت وانا اسمع صوتها المكتوم من حظنها: كانت دنيا لأنها تتعبنا الله يجعل بعد التعب راحة طويلة تنسينا تعبنا
غمضت عيني بقوة وانرمت دمعة من عيني مرة انطفت في حضنها واختفت
في الليل وانا مقهور والنار في قلبي قايدة من الي سار لطارق .... ولأنهم يمعيروني بقتلهم ليه بخطوة متهورة وبلا حساب دقيت على الشرطة
الشرطي: الو السلام عليكم معاك الأمن العام
انا: وعليك السلام يا عم انا بأبلغ عن عمارة مخدرات
سكت وقال بعدها : متأكد من هادا البلاغ
انا: زي ما انا متأكد اني بأكلمك
الشرطي: ممكن نحصل معلوماتك؟
سكت وقلت بتردد: وهادا الشيء محا يضرني؟
قال بسرعة: لا احنا نحافظ على سرية البلاغ وصدقني محد حيعرف بدي المعلومات غيري
بديت املي عليه اسمي الكامل والحي الي انا فيه وعمري وبعدها قفلت بعد عشرة دقايق تقريباً سمعت سيارات الشرطة في المكان طالعت من طرف خفي وكانوا الي طلعو خمسة ومن ضمنهم كتكوت وبس .... محد غيرهم لا خالد ولا سلطان والعشرة الباقيين يعني .... رمو فتات الشلة و هربو انقهرت
ورجعت قعدت على سريري وما انشفى فقلبي شيء الصباح صحيت وانا رايح للصلاة العمارة كانت فاضية وحتى الأنوار مطفاية ولسا فيه كم واحد من الشرطة ورجال الحي يستفسرو عن الموضوع رحت المسجد و سحبني الشيخ بكر على جنب وقال: انت الي بلغت؟
انا بقوة: ايوة انا؟
الشيخ بكر عصب وقال : ياغبي ايش استفدت ؟
انا: استفدت انهم طلعو من الحارة
الشيخ بكر بهمس : انت الي رميت نفسك في النار فأ
قاطعته بألم : ياشيخ ان كان نار عليا وجنة لمية واحد غيري فيا مرحبا بها
الشيخ بكر: الناس مي دارية عنك لو ذبحوك بكرة النهار الناس حتقول ذبحو ولد العجوزة هو الي اتورط معاهم محد حيعرف انك البطل ولا احد داري عنك
انا بهمس: ربك يعرف اني بطل
الشيخ بكر: وربك قال (ولا تلقوا بأيديكم الى التهلكة) ..... ترمي نفسك في دوامة منت داري ايش اخرتها؟
انا بهمس: محد يدري انو انا الي مبلغ الشرطة قال حنحافظ على سرية البلاغ فــ
قاطعني الشيخ بكر بتريقة : وانت متأكد انو شرطي و بس ؟ الناس لها مليون وجه ووجه قلت لك دول خيط من مخيط يشنقك
اقام المؤذن الصلاة فراح الشيخ بكر واتقدم المصلين وصلينا بعد الصلاة طلعت راجع البيت وانا خايف من كلام الشيخ .... لو انا رحت ستي مين يبقا لها من الخلق محد داري عنها ولا احد يقدر يداريها غيري... الله يعين
دخلت البيت ورحت لغرفة وانا هلكان البارح كل الليلة قضيتها مابين مراقبة وتفكير رميت نفسي على السرير ونمت وانا مقرر اغيب عن المدرسة ..... صحيت قبل صلاة الظهر على ستي الي تمسد شعري بيدها المتحنية الحنون صحيت بهدوء بعكس الفوضى الي فحياتي طالعتها بنظرة متألمة وهادية كانت ديك اللحظة بين الخيال والحقيقة
ابتسمت لي وقالت : كيفك اليوم ياسيد الرجال
انا بهمس: الحمدلله
قالت بإبتسامة: هاه فازت عليك الدنيا ولا فزت عليها
انا بضحكة وصوت ناعس : مابين وبين والحرب قايدة
ستي: الله ينصرك فكل خطوة يانور عيني
ابتسمت وقلت: امين ياستي
الأختبارات النهائية على الأبواب مابقي لها الا اسبوع وانا طبعاً ومستحيل اخلي زياد يطب حينا فإذا انا اباه اروح له عدى اول اسبوع اختبارات والحمدلله كلو تمام يوم السبت في الأسبوع التاني كان عندي فيزياء ومكتبة خرجت من المدرسة وانا مرتاح نسبياً يعني ماخبصت مرة قلت لزياد: هاه كيف؟
زياد:انا معروف ماشاء الله عليا ممتاز انت الي كيف؟
انا بضحكة: لا والله الحمدلله مابدعت لدي الدرجة
زياد: والله مايندري عنك .... المهم بكرة فقة لا اشوف وجهك فبيتنا عاد هادا دينك لو تلخبط فيه .... الله يعوض الشيخ بكر
انا بضحكة : لا خلاص حترتاح مني اليوم
زياد بضحكة: كويس مانوينا
قلت وانا رايح البيت : يالله سلام نشوفك
زياد: وعليك السلام ... حأدق عليك ترا
انا : حياك يانشبة
رحت جهة بيتنا وكان قدام البيت موقفة سيارة مظللة أستغربت بس مريت من جنبها ولا كأنو شيء جيت احط المفتاح الا بشيء يسحبني وفجاءة انا جوا السيارة وهيا ماشية
كان واحد ضخم ماسك فمي بقوة ومثبتني على المقعدة قوتو حسيت انها بتهشم اكتافي وفكي
قال صوت هادئ من الجنب: صقر وخر عنو
فك عني وألتفت للي لابس بذلة وجالس بغرور وقلت بصدمة: مين انت وايش تبا مني؟ سلامات صارت الناس تنسحب من الشارع زي البهايم
فصخ الولد نظارتو وكان خالد قال بضحكة: وانت اكبر بهيمة؟
انا بعصبية: خالد فكني ولا مايجيك شيء طيب مني
قال ببرود: خوفتني ..... انت الي محا تشوف شيء طيب مننا ..... الكبارية مبيتين عليك نية يا ايمن
قلت بعصبية: وانت زي الجزمة فرجلهم لاتهش ولا تنش
ماحسيت الا ببكس من صقر خلاني احس الدنيا تدور
قال خالد بضحكة: ان كنت انا الجزمة فأنت الحصى الي حتتفتت تحت رجولنا
بعد دقايق قال: صقر غمض عيونو
إلتفت لصقر وبكس تاني ينومني
صحيت على اصوات واصوات وظلام مغمم على المكان الا من ضوء الشمس الكسول وقت الغروب هو الي يضوي ذيك الغرفة المعتمة وكل اطرافي مسلسلة ماشوف القيد بس احس فيه
صرخت: يا انذال
دقايق وانفتح الباب وكان اول الداخلين خالد وفيدو عصاية : هلا ..... ناديتنا ... لحظة ايش هيا الكلمة الي يقولها دايماً
سلطان بضحكة وهو يحرك العصاية في الهواء : ياعيني
خالد: ههههه ياعيني والله الولد مرة اتكيت
سلطان:ههههه تخيل اقولك ياعيني والله احس مرة ماتجي يابويا حقك هيه وانتهينا
خالد بضحكة: خلي الأتكيت لأهلو – إلتفت لي وقال بإبتسامة – صح ياعيني
دخل وراهم صقر وكم واحد ضخم زيو
سلطان: والله الكتكوت حق البارح كسر لي يدي
خالد: داك بيضة مو كتكوت والله حتى انا مافيا حيل اضرب
سلطان: نفلت عليه الصقور وخلاص
خالد: الكبارية قالو
ماكمل كلمتو الا بسلطان يضرب ضربة على وجهي من اليمين اتكسرت منها العصاية ونزفت اذني صرت اصرخ بألم وانحنيت وراسي لتحت احاول استوعب صدمة الألم القوية
خالد بضحكة: وااااو لا انت صدمتني
سلطان : جيب احسن منها
خالد: بسيطة ياعيني بسيطة – وضربني بأقوى من الي قبلو على قفايا ضربة حسيت الدم اتجمع فحلقي منها
قال بنبرة استعراضية : واحدة لخالد وصفر لسلطعون
ضرب سلطان بقوة مرة ثانية مرتين على بطني وبعدها بدأ خالد وكلهم بنفس الإيقاع وبقوا مختلفة لكن الألم واحد وقفو دقيقة وانا راسي لتحت والأرض تحتي انفرشت بدمي سمعت صوت الولاعة وخالد يقول والسجارة ففمو: نفلت عليه الصقور؟
سلطان بتعب: ايوة خلاص .... يالله تشرب كوفي ؟
خالد : يالله
سمعت اصوات العصايتين تنرمي على الأرض وبعدها سكة الباب ويمكن ليلتها ذيك اخر مرة عرفت فيها الضرب الخفيف بعد ليلة التعذيب بالضرب والكهرباء و حتى اشياء مقدر اذكرها صحيت فحوش بيتنا وانا مو قادر اصلب طولي باين انهم رموني من فوق السور عشان لحد من الجيران يشوفني وينفضحو زحفت إلين البيت ودقيت الباب وانا ابكي من الألم الي فكل ناحية
ذاك اليوم رغم انهم ضربوني الا انو ضربهم مدروس ماكان في طعنات او طلقات او أي شيء يستدعي اني اروح المستشفى ماكان في شيء ينزف مني بس الألم فكل مكان
فتحت ستي الباب وشهقت بصدمة وقالت: حسبي الله ....... مين سوا فيك كدا
اسندتني للمجلس انرميت على الكنبة والدم الي فبلوزتي وصخها اول ما انرميت عليها نمت من الراحة الي غزتني راحة ماشافها ظهري طول الليلة ديك
بعدها بساعة ونص صحتني ستي وسندتني لغرفتي دخلت الحمام وغسلت وجهي وانا انصب طولي على المغسلة رفعت راسي وكان مكتوب على البلوزة بشيء اسود : بداية .....
رن جوالي فجيبي فتحته وكانت رسالة من رقم غريب : عارفين وصلت البيت بالسلامة معليه ماعرفنا نفتح الباب رميناك من السور آوه الظاهر فجعنا ستك ههه .. المهم ياكتكوتنا الجديد هذه زي ماقلنا لك بداية كل ما قلت لواحد من اصحابك عننا خليناه فديرتنا والدور جاي عليه .... حنعرف مين الي يعرف عننا ومين الي لا يسير المرة الجاية الي تشتكي عند الحكومة تشتكي وعيونك مفتحة
..... يالله ما اطول عليك وراك اختبار فقه بلا مزاكرة سلام ياعيني
.... خالد
غمضت عيوني وانا ادعي فنفسي عليهم استحميت رغم الكدامات والجروح الخفيفة الي فجسمي وطلعت وانا اتسند على الجدار لبست ثوبي بمساعدة ستي لأني ما اقدر افوت اختبار الفقه اروح وايشمنو حضرت كان وجهي مفقع وحالتي حالة اخدت كتابي و دقيت على سراج يمرني لأني محا اقدر اوصل المدرسة
دخلت الأختبار والحمدلله رغم التعب حليت شيء من الشيء ونمت في القاعة صحيت وطبعاً العيال ماسابوني استجواب زحلقتلهم هرجة مالها اساس ومشو لي هيا


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 23
قديم(ـة) 05-11-2013, 08:16 PM
قلب مربع قلب مربع غير متصل
©؛°¨غرامي مشارك¨°؛©
 
الافتراضي رد: موعدنا على كف الأمل /بقلمي


:|
الله يااااااااااااخذذذذهم
يوووه الله يعين يامن < مدري هو اسمه كذا او لا

اعذريني عالرد المتاخر بس كان عندي اختبارات !!

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 24
قديم(ـة) 06-11-2013, 07:13 PM
صورة wala.a" الرمزية
wala.a" wala.a" غير متصل
©؛°¨غرامي جديد¨°؛©
 
الافتراضي رد: موعدنا على كف الأمل /بقلمي


ههههه الا صحيح اسمه ايمن يامن زي الدلع .... :| حتى انا عندي اختبارات الله يوفق الجميع

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 25
قديم(ـة) 06-11-2013, 07:21 PM
صورة wala.a" الرمزية
wala.a" wala.a" غير متصل
©؛°¨غرامي جديد¨°؛©
 
الافتراضي رد: موعدنا على كف الأمل /بقلمي


دخلت الأختبار والحمدلله رغم التعب حليت شيء من الشيء ونمت في القاعة صحيت وطبعاً العيال ماسابوني استجواب زحلقتلهم هرجة مالها اساس ومشو لي هيا
رحت للمسجد صلاة الظهر وماكان الإمام بكر موجود كان المؤذن العم صالح هوا الإمام بعد ماخلصنا الصلاة رحت له وقال لي : سلامات ... سلامات عسى خير
قلت له نفس الكلام الي قلتو للشباب انو عيال خالتي بيني وبينهم خلاف قبل لايروحو فلما راحو ارسلو اصحابهم يضربوني عشان هما ضامنين العقاب مايوصل لهم
الشيخ صالح: الله يهديهم ماهي حالة دي
انا: الله يعين ... الا ياعم الشيخ بكر فينو؟
سكت دقايق وقال: الشيخ بكر يقولك سامحني وهوا راح للمدينة دور عليك الصباح يودعك بس مالقيك فراح
انا بصدمة: بس.... بس البارح كان
قاطعني: كل شيء سار سريع , وانت عارف من البداية هما شاكين انو هوا الي بلغ فا انا الصراحة شاورتو يروح بأسرع وقت وانا اتكفلت انقل باقي عفشو ....
انا بصدمة: لدي الدرجة ياعم
العم صالح: ايوة يا ايمن ترا دول مو قليل صحيح لسا ماشفنا منهم شيء بس بما اننا ماندري مين الي بلغ فأكيد حيشكو في الشيخ بكر الأسبوع الفايت كلو قضاه وهوا ينقل عفشو المهم بسكات و في الليل عشان مايسوو شيء يمنعو
انا بصدمة: بس يا عمي صالح
قاطعني وقال: شكلنا ساير ريبة ... يالله سلام عليك
ومشي عني ... حتى هوا خايف منهم ... اصلاً مين هما
بعدها خلصت الإختبارات وانا ماسمعت عنهم شيء نجحت وسرت سنة ثالث ولله الحمد , بس للأسف معد حيكون معايا سراج في المدرسة خلاص صار جامعي وحاجة ترفع الراس يالله عقبالي انا وزياد كانت حفلة التخرج حقتهم جميلة واستمتعنا فيها رغم ان الجو حزين من دون طارق بس الوصخين حيوحشوني في المدرسة عبود و سعد و سراج كويس زاهر قدنا ومو رايح مكان ... بس على قولة ستي مصير كل حي يفارق
في الأجازة كنا مرتاحين من عمارة الفساد بعد ماضربوني خلاص ارتاحت الحارة من شرهم قالوا لي لهم مكان برا الحارة بس ما اهتميت كل ليلة زي زمان نطلع ونسهر على ريحة الشواء الي تزين ملامح الهواء بس ناقصنا طارق مافي احد يعزمنا على اربعة صحن سيريه .... خلاص طارق راح
كنا انا وزياد وسراج و سعد
حولين الفريرة متحمسين في اللعب
سراج: عليهم يا سعد عليهم
زياد: هههاي والله بنأكلكم اهداف وصخة خليك ساكت
ماكمل كلمتو الا دخل في مرمانا ممايعني فوزهم صرخ سعد وسراج بحماس
قلت لزياد بقهر: الشماتة مي طيبة حط لسانك فحنكك
سعد: و غلبتكم السينات ياواد
سراج: وسين يعني ايه
انا: سنقحة وقلة ادب
سعد: من القهر
زياد: اصلاً هادي الأمور التافهة ماتهمني
سعد: سراج يالله عازمك على اتنين صحن سيريه
سكتنا على الذكرى بألم كمل سعد يصرف : يالله انا رايح اجيبها
انا: الا سراج سجلت في الجامعة ولا كيف
اتنهد بزهق وقال: قبلتني جامعة في لندن بس بأستنا رد ام القرى ازا ماقبلتني حأسافر
شهقنا انا وزياد بصدمة وقال زياد: من جدك ياصرمة تسافر
ابتسم بألم وقال: ايوة اروح اشوف وجوه جديدة .... تفتح النفس
انا بضيق: لاياشيخ بلا بهللة ان شاء الله يقبلوك هنا مالك ومال الغربة
طالع فيا بنظرة فيها حسرة وقال : الله يعين – ورجع يطالع في البعيد
بعد دقايق جا عبيد وكملنا سهرتنا مابين وبين خالاتي ولله الحمد ماجونا في الأجازة ولا عماني ماشفناهم وعدت ايام الأجازة هادية واحلى ايام كل مشاكلي ماخدة اجازة معايا كل ايامي في البقالة ولا عند ستي ولا مع الشباب ما افرق عن دول التلاتة ايام حلوة وهادية كأنها انفاس ماقبل الغرق ...... جات الدراسة وجا موعد سفر سراج كان صعبان عليا وبقوة يوخر عني واني استوعب ايامي بدونو
قلت بإبتسامة حزينة: يالله .... الله يجمعنا على خير
سراج وعينه ماسكة الدمعة: امين – طلع من جيبه مبلغ وقال – امسك هادي فلوس دواء ستي تكفيك لسنة لا تصرفها على شيء غير الدواء وحتكفيك تفهم ولا لا؟
قلت وانا اطالعه بإبتسامة حزن: ايوة اكيد .... والله ياصرمة حأفقدك... مين يراعيني دحين؟
طاحت دمعة من عينه مسحها وهوا يطالع في البعيد وقال يصرف: فين باقي العيال
انا: زياد شكلو في الحمام .... اصلاً ايشبنا نودع بعض لسا ما اعلنو الطيارة
ضحك وقال: نتدرب عشين يكون المشهد خفيف فهمت كيف؟
انا: على زفت .... يالله حافظ على صلاتك مو تطلع برا وتسيب دينك هنا
ضحك قال: لا توصي حريص
انا: وايش بأقولك ..... ايوة! غض بصرك الحريم هناك مو زي هنا والنظرة تجي وراها حسرة وعوار قلب
سراج: ابشر ياسيدي
جا زياد مسرع وقال: هاه ؟ خلاص حينقلع دحين
الكل:ههههه
سراج: تبا تفتك مني؟ ياولد الرمة
زياد: لا افا والله عزيز وغالي وحتسيب وراك فقدة كبيرة ياعمنا
سراج: اخيراً طلعت من واحد فيكم
انا: والله لو تبيض عظم ما اناديك عمي
سراج: اهوه ناديتني يا اهبل
الكل:هههههه
انا بضحكة: ماتعتبر يا -- قاطعني صوت نداء طيارتو
طالعنا فيه وقال زياد : هادي طيارتك ولا؟
سراج بضيق : الا هيا طيارتي .... يالله نشوفكم على خير
حضن زياد وقال له : نشوفك بعد سنة يارمة
زياد: ان شاء الله على خير يا رخمة
طول حضنهم وقال سراج: يالله وخر عاد حتفوتني الطيارة
ضحك زياد وعينه للبعيد يخفي دمعة جاني وحضنته وقلت: يالله سراج عيني نشوفك على خير
سراج: يالله ياصرمة راعي العجوزة وانتبه لنفسك
انا: لاتوصي حريص
مشي عننا وبعدها لما وصل للبوابة التفت لنا ولوح لنا
لوحنا له الأثنين وبعدها اختفى في الزحام مرت لحظة سكوت ثقيلة تعبتنا قلت بضيق: يالله مكة ياهوه
زياد: امشي نمر البحر
انا: السيارة سيارتك ياعيني
زياد بضحكة: احم ايوة اكيد يالله قدامي
رحنا البحر و بعدها نزلنا على مكة طلعنا بسراج ورجعنا بظلام غيابو حتى الحارة اتغيرت ملامحها اول شيء طارق وبعدين سراج الحارة سارت مملة وماتنطاق من بعد دول الأتنين بدأت الدراسة وكالعادة اول اسبوع تقيل وماشي على مهلو ومر الشهر والشهرين وكل شيء في الحارة اتغير مافي الشيخ بكر ولا طارق ولا سراج بالنسبة ليا دا التغير خلا الحارة تعتم في عيني و حتى طلعة الشارع اكرهها عشان لا افقدهم خلصت اختبارات الترم الأول والحال على ماهو عليه مافي شيء جديد صحيح ان الهدوء فحياتنا حلو والمشاكل الصغيرة تخلينا نحس اننا بخير وان الألم سار ورانا وانتهى .... بس بالنسبة ليا وقتها دوبو ابتدى



تعديل wala.a"; بتاريخ 06-11-2013 الساعة 07:27 PM.
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 26
قديم(ـة) 06-11-2013, 10:04 PM
قلب مربع قلب مربع غير متصل
©؛°¨غرامي مشارك¨°؛©
 
الافتراضي رد: موعدنا على كف الأمل /بقلمي


لااا مررره قصصير
والاحداث مرت بسسرعه
بدأ الحمماس :*
ابي بارت طويل :$
بعد اذنك ، انتظرك

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 27
قديم(ـة) 08-11-2013, 04:58 AM
صورة wala.a" الرمزية
wala.a" wala.a" غير متصل
©؛°¨غرامي جديد¨°؛©
 
الافتراضي رد: موعدنا على كف الأمل /بقلمي


ههههه ايوة سريعة عشان اتحمست بأقرب للأحداث المهمة ....... معليه ع قصر البارت بأطول دا البارت ببارتين كتعويض :)

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 28
قديم(ـة) 08-11-2013, 05:03 AM
صورة wala.a" الرمزية
wala.a" wala.a" غير متصل
©؛°¨غرامي جديد¨°؛©
 
الافتراضي رد: موعدنا على كف الأمل /بقلمي


مافي شيء جديد صحيح ان الهدوء فحياتنا حلو والمشاكل الصغيرة تخلينا نحس اننا بخير وان الألم سار ورانا وانتهى .... بس بالنسبة ليا وقتها دوبو ابتدى
صحيت الساعة ثلاثة الليل على المنبه حق دواء جدتي رحت لها ودقيت الباب وبعدما اذنت لي دخلت
كانت جالسة على سجادتها تصلي الليل جبت لها دواها وهيا تطالعني وتبتسم ضحكت لها وقلت : ان شاء الله دايم ضحكتك يا ستي
ستي بإبتسامة: اليوم دعيت الله يزوجك ببنت الحلال و حسيت فقلبي ان ربي قبل دعوتي
انا بإبتسامة: بدري ياستي
ستي: ليه بدري اهوه صاحبك زياد حيتزوج
انا بضحكة: الله يعين .. خير اصلا مين المسطولة الي بتاخد واحد فقير ومنتف زيي
ستي : ياولدي الفقر مايعيب الرجال ..... يعيبو ان المسجد مايعرف صوت دعساتو
# ياولدي الفقر مايعيب الرجال ..... يعيبو ان المسجد مايعرف صوت دعساتو
انا بخجل من الموضوع : الله يعين
ستي بإبتسامة: انا عمري ماهرجتك في دا الموضوع ؟
قلت وانا اطالع في البعيد بحيا مخفي : لا.... هرجيني فيه ازا جا وقته
قالت: وايش يعرفك ازا جا وقتو اكون فيه ؟
رفعت راسي بصدمة وقلت مستنكر: ستي؟! الله يطول فعمرك ليه دا الكلام
ابتسمت ستي وقالت: اهم شيء راعيها .... وراعي حق الله فيها منة ماربت رجال يمد يدو على حرمة ولا يقسى عليها عاملها باللين الحرمة مهما قست تجي باللين
انا بضحكة: ان شاء الله ابشري
ستي : و اصحك فيوم تفلت عينك لغيرها الحرمة ازا شافت زوجها يطالع في غيرها تقدر تشوفو ابو عيالها و حبيبها و صاحبها بس مستحيل تشوفو رجال بحق وحقيقي لا تطيح من عين حرمتك
قلت وانا احك راسي بخجل: يسير خير
حطت يدها على رجلي بحنان وقالت : عاونها.... الحرمة يكبر زوجها فعينها كتير لما يعاونها ..... سيدك الله يرحمو كان يعاوني فكل صغيرة وكبير ازا عن الغسيل ولا شيل البنات و انا زي ماشفتوا يعاوني سرت احاول اعاونو قد ما اقدر فهمت يانور عيني
انا : هاه؟ ايوة فهمت فهمت
ابتسمت وقالت: قوم ارجع ارقد .... فداك عيني
انا بإبتسامة: تصبحي على خير
ستي : تلاقي الخير
دخلت غرفتي ورنت نغمة رسالة رفعت الجوال وطالعت وكانت من رقم غريب ومكتوب : الكورة دائرة ماتنسى تدور
ضحك وعرفت ان واحد من العيال يستهبل كتبت : والمربع ماينسى يتربع .... يا فضاوتك
بعدها ما انرسل شيء رميت الجوال وطفيت النور ورجعت رقدت
في الصباح لبست توبي ورحت المسجد كان عمي منير واقف في الصف قلت يمكن ربي هداه مالحقت اسلم عليه لأنهم اقامو الصلاة ماسرت اجي بدري مرة لأن الشيخ صالح قال انه خايف يسير شبهة عند شلة المخدرات .... رغم انهم راحو من شهور الا انو لسا خايف منهم ... مو راضي يستوعب اني فزت عليهم – كبرت لصلاة الفجر لما انتهينا من الصلاة رحت بأسلم على عمي منير
قلت: السلام عليك ياعم
قال العم منير: قول لستك انا مسافر ... عشان لاتقول ماقلت لها
انا : طيب حياك افطر معانا عشان تودعها
منير: وانت مالك ؟ ..... خليك فنفسك وبلا لقافة
انا: ابشر
ابتسم نص ابتسامة بتريقة وقال : يبشرك بالخير .... يا .... عيني --- ومشي عني وانا مو فاهم شيء
رجعت البيت وفطرت مع ستي وبعدها طلعت المدرسة قابلت زياد و زاهر عند الباب قلت : السلام عليكم
الكل: وعليك السلام
زياد بسرعة : سمعت ايش سار؟
انا: ايش؟
زاهر: البارح سارت حريقة اخر الحارة اخدت اربعة بيوت
انا بصدمة : بالله ...... لاحول ولا قوة الا بالله ... مرة ماسمعت
زياد: ايش ماسمعت البارح الصوت واصل الين حارتنا هادا وانتو اقرب لنا منهم
انا: ايوة صوت المطافي واصل بس مرة ماجا فبالي قد كدا كبيرة الحريقة يالله .. الله يعوضهم
زاهر: والله مرة مساكين البيوت انعدمت الظاهر انبوبة وانفجرت وكم واحد منهم مات والي انحرق ..... الله يعينهم ويكفينا
انا: لاحول ولا قوة الا بالله
زياد: يالله ترا عندنا دحين فيزياء لايوقف فحلوقنا
زاهر: هانت خلاص اخر ترم ونفتك
انا: يالله ترا منجد حننطرد
دخلنا الحصة والحمدلله ماكلمنا الأستاذ رجعت البيت و على الغداء قالت ستي
ستي: كيف حال سراج على حسك؟
انا: والله الحمدلله طيب مبسوط بلندن وجوها
ستي بضيق: والله انا ماحبيت له الغربة بس عاد الواحد ايش بيدو يسوي
انا: الله يعين
بعد العصر خرجت لبقالة العم عبدالقادر
ليلتها وانا راجع البيت بعد العشاء كان قدام البيت سيارة كبيرة مظللة انزويت بسرعة لزقاق اكيد هادول هما يبو يبهدلوني اليوم كمان .... يعني متى نرتاح منهم حسبت انها صفحة وانطوت بعد دقايق مشيت السيارة سرعت خطاويا للبيت جيت افتح الباب الا بضربة على قفايا ماشفت غير الظلام بعدها
صحيت على اصوات ونور قوي بعدها فتحت عيني كنت في مجلس فيه خمسة اشخاص من ظمنهم خالد و ستة من الرجال الضخام واقفين
خالد: ياحيا الله الجار ....
إلتفتو لي كلهم
قال واحد ثاني : حسبتنا نسيناك؟
خالد بضحكة: ما اقدر انساك ياخي مسهرني الليالي
غنى ثالث : اهواك واتمنى لو بنساك تيرا را را
ضحكو الخمسة وقال خالد : اعرفك علينا محسوبك خالد طبعا- كمل وهوا يأشر – وليد . كامل . عدنان و هههه طارق
طالعت في طارق الي ماكان يشبه صاحبي ابداً قلت وانا احس اني مكسر و مخدر من شيء .... قلت بتعب : والمطلوب؟! اصفق ؟!
ضحك وليد وقال: والله خفيف دم
خالد: قايل لكم ... يالله شباب ايش تشربو
طارق: هات الشيشة ياعيني
الخمسة:ههههه
كامل وباين انه اهداهم وارزهم: هات كل الي ينهات بس خلينا نخلص من دا
وليد بزهق: ياخي دا الكتكوت مدري ليش الكبارية يبغوه ..... بس يتعبونا
خالد: وانت ايش وراك اسبوع وهما معطليننا لا مهمات ولا أي زفت بس قاعدين نتمنقل فوجوه بعض ونذبح في الكيتا
كنت اسمع كلامهم وكل مالها الدوخة تزيد
طارق: بس ترا ذا مايبغوه ميت
خالد بملل: الكبارية دي اليومين هاجدين الظاهر السقف موطي عليهم
عدنان: مالك ومال ياخالد لسانك حيوديك فدهية
انا بتعب: دهية تاخدكم كلكم
ضحك خالد وقال: معليه نسيناك اخدتنا السوالف ياعيني ..... آه قبل لا أنسى يعني اذا بتشتكي .... ترا لا تقول دي الأسماء ماهي اسماءنا الحقيقية دور غيرها
ضحك طارق وقال: انا الين نسيت اسمي الحقيقي كل يوم بواحد جديد
الكل:هههه
كامل: انا البارح كان اسمي رواد
خالد: لا انا ليا سنتين خالد
عدنان: حتى انا سنتين عدنان
كنت خايف ومتوتر من الي جاي اشكالهم ماتبشر بالخير وكل واحد مسدسو على حزامو والرجال الضخام بيدهم عصي الكهرباء الحالة كلها ماتبشر بالخير كأني اخدع نفسي لو قلت حأطلع حي
دقايق وحسيت بألم مر زي الكهرباء لعقلي خلاني اصرخ بقوة سمعت خالد يقول: اخيراً مانويت
وقفو وقال كامل: هات العصاية يا صقر
بعدها حسيت بضربة لكن الضربة كانت تقرب توقف قلبي من الألم وضربة ورا ضربة والألم فوق العقل لدرجة ان جاتني صدمة ألم ودخت ... فهمت انو العقار الي شربوني هوا عقار يستخدم في التعذيب لمضاعفة الألم .... صحيت على رشة موية باردة شهقت وكان خالد ماسك كوب قهوة وفيدو التانية عصاية ويسولف مع كامل
اشر له كامل وقال ببرود : صحصح الرخمة --- ومشي عننا
ابتسم لي وقال: صح النوم ياعيني --- وجهو الوسيم يحسسك انو البسمة صادقة رغم انو انسان حقير وابعد مايكون عن الصدق
قرب مني خالد وقال في اذني بهمس : واحد من الكبارية حن عليك
قال بكل برود: اضربوه كم ضربة ورجعوه البيت
عدنان بقهر: لاتقول
خالد: والله!
عدنان: ايش الهبل دا؟
كامل بضحكة: وانت ايش عليك يعيش ولا يموت ؟
عدنان: انا زهقت من مهزلة الكبارية دي
طارق وهوا جالس بعيد ومعاه بنت : الزبدة قاتلينو ولا لا؟
رفع خالد الأمان عن مسدسو وقال: والله هيا الأوامر جات بالقتل
عدنان بتعجب: قتل ميـ
ماكمل كلامو الا والرصاصة فراسو فزيت خايف ومصدوم وانا اشوفو يطيح من طوله والدم بدأ ينفرش حوليه ...... اول مرة شخص ينقتل قدامي طالعت فيهم ومحد في الغرفة اصلاً التفت كامل راح يشرب من المشروب الي على الطاولة و طارق ما التفت جهتنا و و ليد ماكان موجود
قال كامل : اتوقعت انو وليد الي حينقتل
رخى خالد مسدسو وقال: اتوقعت يخلونا نقتل الكيتا بس شكلو يكبر ويبيض دهب
كامل: حتى انا ...... ترا فيه شبه من الكبير
طالع خالد فيا وقال: يب ..... إستنساخ
هما يتكلمو وانا عيني على الميت مصدوم لدي الدرجة ميتة قلوبهم لدي الدرجة مافي عواطف الدم قرب يعبي الغرفة وهما يمشو عليه ولا كأنو شيء
جات لخالد رسالة فجواله طالع في الرجال الضخام وقال: سوو الي قلتو
انا عيني خلاص ترمي دموع من الخوف والمذلة والصدمة اول مرة اشوف انسان ميت فحياتي وينقتل قدامي وشكلي دقايق وحألحقو
ابتسم كامل على جنب ودق خالد دقة خفيفة يعني طالع إلتفت لي خالد وضحك بصوت عالي بشماتة ومسك كامل من ذراعه وقال : تعال عندي لك هرجة برا هههه والله حالة
كان شعور المذلة مر شعور اني ضعيف قدامهم ومالي قوة عليهم .... شعور المهانة أسوء شعور ممكن يمر على الأنسان ... البكا قدام العدو مهانة لكل رجال لا والله مهانة لكل انسان
بعدها حسيت بضربات الصقور القوية الي غيبتني في الظلام صحيت زي المرة الماضية جوا حوش بيتنا لكن دي المرة اخف صحيح الألم قوي لكن اخف اسندت نفسي بالقوة وطلعت غرفتي الظاهر ستي نامت تحسبني مع العيال في الشارع انرميت على السرير بتعب وانا مكسر ... وانا أسأل نفس سؤال , متى ارتاح؟ليلتها بكيت مقهور وخايف من الي شفتو بكيت تعبان وهلكان من الشوق والحرمان والخوف و الضياع بكيت اشياء و اشياء ومافي غير ربي يسمعني


سبحان الله .... الحمدالله .... لا اله الله .... الله اكبر



تعديل wala.a"; بتاريخ 08-11-2013 الساعة 05:10 AM.
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 29
قديم(ـة) 08-11-2013, 05:05 AM
صورة wala.a" الرمزية
wala.a" wala.a" غير متصل
©؛°¨غرامي جديد¨°؛©
 
الافتراضي رد: موعدنا على كف الأمل /بقلمي


غفيت على دي الحالة وصحيت على المنبه قبل صلاة الفجر رحت الحمام اتروشت و لبست ثوبي ورحت الصلاة
بعد اسبوع الشيخ صالح سار يتجنبني ويتجاهلني وكثير من رجال الحي نفس الشيء كأنهم خايفين لا وابو عبيد يقول لعبيد بعد عن ايمن ترا وراه مشاكل ونفس الشيء ابو زياد سار المسجد مكان ماينطاق بسببهم , لولا الشرع كان يمكن خلوني فصف لحالي بعيد عنهم طلعت من صلاة الظهر وانا منكد رحت الدكان وجلست متضايق استنى الزباين
دخل زياد ووجهو جاب البسمة معاه قال : هلا
انا: دوبي مفتك منك في المدرسة ايش جابك
زياد بملل: جيت اشتري عوايز للأهل
انا: ويعني اني مافي بقالة فحارتكم وانت جاي في تلاتة بقايل قدامك
زياد وهو يفتح تلاجة العصير : يوه يعني لازم اقول جيت اشوفك ...... شكلك ماكان عاجبني في المدرسة
انا: ايش اسوي لك اتمكيج ولا اغير التسريحة
زياد بضحكة: بلا بهللة .... ايشبك ؟
جيت اقولو عن الي سار خفت عليه وقلت : رجال الحي متوهمين بأوهام عني مدري مين معبي ادانيهم عليا
زياد بلا مبالة: يووووه من الحساس يابويا بكيفهم اهم شيء مين الي بيسمع لهم
انا: والله مدري بس مو مرتاح
زياد: خليها على ربك – حاسب على الي اشتراه وسحب الكرسي وقعد
انا: قوم انقلع على بيتكم
زياد: ياخي والله ابا اجلس معاك
انا: طيب اقعد يا نكبة
قعدنا نسمر الين العصرية وقفلت الدكان ورحنا نصلي العصر واحنا راجعين كان في سيارة واقفة في الشارع قبال البقالة ما اهتمينا لها وكملنا راح هوا بيتو ورحت بيتي
بعد المغرب سويت شاهيا انا وستي وقعدنا في الحوش ومعانا المنفوش والمكسرات كانت ليلة جميلة مو قصدي شيء بس تسوى الف ليلة رومنسية هبات الهواء والهلال وكل ملامح ديك الجلسة المغربية والطريحة مفروشة على الأرض وكل شيء فيها جميل ليلة كاملة وندية
ستي: وبعدين سيدك قال بلكي البنت شردت من البيت ويالله قوام قوام قمنا خايفين وهيصة وكل البيت اتكركب
انا بضحكة: وفين طلعت في الأخير؟
ستي: طلعت نايمة مع الشغالة في غرفتها
انا:هههه ولا على قد القروشة
ستي: امك كانت هادية ومصايبها بسكات .... كل كيد النسا كان يندر من تحت راسها
انا بضحكة: وابويا؟
ستي: فين ما سألت عنو قالو لك رجال بستين ألف رجال
اخذت قطعة من المنفوش وقلت وانا اطالع في الهلال الي مزين السماء : ياريت اسير رجال زيو
ستي ضحكت بتريقة وقالت : لاصدقني انت رجال اشكل منو
انا بضحكة: وليه؟ عشينك ربيتيني ؟
ستي بإبتسامة وهيا تسبح : ايوة عشيني ربيتك وكمان لأنو ماعندك شيء تخسرو
انا بعدم فهم : كيف ياستي؟
ستي: ياواد يا ايمن مايخوف الملوك والرؤسا وكل الكبارية الا رجال ماعندو شيء يخسرو لانو يرمي نفسو للموت مغمض ماوراه شيء ..... الرجال لما يسير ماعندو شيء يخسرو مافي شيء غير الله يوقف فوجهو
انا : بس ياستي ممكن الرجال يكون ضعف وانكسر من كتر الي سابوه
ستي: الرجال لما ينكسر يحمق – يغضب - واذا حمق يسير اقوى .... زي النار والقهر حطبها
انا ما اقتنعت : بس ياستي كيف وهو مكسور و موجوع من الفقد
ستي: محا تفهم يا ايمن .... الين تحس
فهمت قصدها لما تروح عني قلت بلهفة: لا الله يكفينا الشر
ستي بإبتسامة: ياخوفي يوم يجي داك اليوم كل المرجلة تروح بلاش ياولدي الدنيا كدا وكل حي مفارق
انا بضيق: خلاص ياستي ..... – واخذت من صحن المكسرات حبة وقلت : شوفي هادي الي تحبيها
ابتسمت على التصريفة واخدتها وقالت: طيب صب لي شاهي
انا: تبشر تاج الحريم
بعدها بتلات ايام صحينا في الليل على اصوات صريخ و دوشة من الشارع فزيت ولبست ثوبي سريع ونزلت الشارع اتصنمت لما شفت النار تاكل بقالة عمي عبدالقادر واهل الحارة يجرو بدلات الموية رحت لهم سريع و خشيت احاول اساعدهم نطفي النار كان القزاز القدامي مكسور والنار تاكل البضايع جوا وتاكل قلبي معاها من القهر وانا اجري احاول الحق شيء من الشيء والدخان مالي المكان والأصوات داخلة فبعضها ..... دقينا على الدفاع المدني بس قبل مايوصلو قيد طفينا النار ومابقي في المحل شيء ما انحرق منها وقفت انا وعم عبدالقادر نطالع المحل بحسرة
وهوا يقول: لاحول ولا قوة الا بالله ..... حسبي الله ونعم الوكيل
انا لساني انربط من الصدمة مو قادر اقول أي شيء
قال العم عبدالقادر بقهر: حسبي الله عليهم مايسيبو الواحد يتهنى بحياتو
انا حسيت اني انسطلت من الصدمة مشيت عنهم للبعيد وانا افكر ... وذحين؟ من فين نلاقي اللقمة من فين ادبر الوظيفة هادي باليالله لقيتها ودحين؟
جلست في زقاق بتعب وانا خلاص طقيت واحس روحي بتتأكل جوتي من القهر اكيد هما وراها مايبوني اعيش دول؟ طيب لو قتلوني ليه العذاب يعذبوني ويعذبو خلق ربي معايا عم عبدالقادر يترزق من الدكان ودحين حرقو له دكانو طيب لو حرقوني دحين مو بس انا وستي نتنكب انا وستي وعيلة عم عبدالقادر كلها والسبب انا لأني حمار... ولأني بلغت
رن جوالي فجيبي فتحت وانا ابصم بالعشرة انها من خالد
: النار ماتحرق الا رجل واطيها........ هاه! كيف بس؟
رخيت راسي وشديت شعري بأقوى ماعندي بقهر وألم وانكسار رجعت مرة تانية ابكي بهداوة وسكات دول محا يسيبوني عايش صادق الشيخ بكر لما قال مخيط يشنقك دول يبوني اشنق نفسي بنفسي
بعدها بتلاتة ايام نقل العم عبدالقادر من الحارة راح محل تاني بعيد عن مشاكلي ماقال لي كدا بس انا فهمتها ..... شال عيلتو زي الشيخ بكر وراح ودحين اتأكدت شكوك رجال الحي وسار كل ابو يمسك ولدو بأقوى ماعندو لا يكلمني او حتى يسلم عليا من حقهم خايفين على عيالهم .... والمشكلة ان ابو زياد منهم
لدرجة انو اخو زياد يقول لي سارت مضاربة كبيرة بين ابو زياد وزياد انتهت بأنو ابوه قال لو: لو تبا صاحبك دا اطلع من بيتي مالك ابو .... انت واحد اناني تبغا تجر المصايب لنا كلنا
قلت فنفسي صادق..... يعني طارق مات من شلة مخدرات وانا دحين ملاحقيني اكيد بتدور البرجونة وتجي عند زياد فأحسن له يسحب بس مين يفهم اللصقة دي الكلام دا
: والله ما اسيبك .... اهبل انت ولا حمار ... تحسب الي بيننا قليل حتى لو انت ماتباني والله لا امشي وراك ياواد لو تقول رايح لحارة المجانين وراك
انا في الجوال: زياد شوفني بأكلمك جوال يعني مو ضروري نتقابل برا المدرسة
قاطعني: على زفت وليه ان شاء الله عشيـ
قاطعته: عشان ابوك يازياد ...... ربك وصاك بأبوك وامك لاتضيع الوصاية على صاحبك الي حتى مو رايح بعيد عنك يعني معاك معاك بس اللهم برا المدرسة
سكت لوقت طويل وقال: لا هوا كمان في المدرسة مايباني اكلمك
انا: في المدرسة محد حيقولو ولا حيدري والجوال بيننا يعني لاتكبر الهرجة وهيا ماتستاهل
زياد : خلاص طيب .... بس يعني الين متى؟
انا: الين ربك يفرجها واصلا خير شر انا محا اطلع الشارع بعد كدا
زياد: دول ايش يفهمهم ان الحريقة حادث من بزارين الحي وانتهى لا لازم شلة المخدرات وراء كل شيء
انا فنفسي: والله ماتدري - قلت له : من حقهم شياب وشافو من الدنيا كتير
سكت فترة وقال: ياواد الله يكملك بعقلك اول مرة اكتشف انك عاقل
انا بضحكة : لا بدري الصراحة عاقل من قبل لا اعرفك
زياد: المهم ماحكيتك
انا بضحكة: مدام جبت دا الصوت الهرجة فيها بنت سمير
ضحك وقال بخجل: الا فيها بس محا اكلمك عنها عن اخوها
انا بضحكة: هات هات
زياد: نبيك وصلي عليه
انا: اللهم صلي وسلم عليه
مر شهر واحنا على دا الحال واشياء البيت بدأت تفضى .... اول مرة اعرف قد ايش الأسعار غالية وتفلق يحليلو العم عبدالقادر كان سادنا من دي الجهة بعد الله ... الحمدلله على كل حال فكرت اخد من فلوس سراج بس كل مرة اقنع نفسي ان هادي للأدوية وبس وان صحة ستي اهم شيء



سبحان الله وبحمده سبحان الله العظيم



تعديل wala.a"; بتاريخ 08-11-2013 الساعة 05:11 AM.
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 30
قديم(ـة) 09-11-2013, 10:48 AM
قلب مربع قلب مربع غير متصل
©؛°¨غرامي مشارك¨°؛©
 
الافتراضي رد: موعدنا على كف الأمل /بقلمي


ياعمممري
حياته كل مالها وتكون صعبه
الحين عمه منير ساكن معهم بنفس الحاره ولا

تسلم يدك

موعدنا على كف الأمل /بقلمي

الوسوم
........ , موعدنا , الأمل , حجازية , رواية
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
لم تذوقي الألم لذا لم انفاس مكتوبه خواطر - نثر - عذب الكلام 2 02-02-2013 01:15 AM
عندما نفقد الأمل في كل شيء... asom@ مواضيع عامة - غرام 10 30-04-2012 12:12 AM
اسباب الملل الجنسي لدى المتزوجات انفاس الغرام الحياة الزوجية - الحمل - مشاكل الزواج - خاص بالمتزوجين 7 12-05-2010 01:13 PM
الألم عند الرضع إشاراته وأسبابه وأساليب تخفيفه rada الطفل - الرضاعة - التربية 5 22-09-2008 11:42 AM
أنشودة لولا الأمل 0 ريم الغلا ارشيف غرام 4 02-09-2008 01:56 AM

الساعة الآن +3: 11:23 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1