غفران* ©؛°¨غرامي فعال ¨°؛©

ان شاء الله باجر راح انزل بارت جديد
ودمتم ...

غفران* ©؛°¨غرامي فعال ¨°؛©

( الجزء 4 )
,,
,
شادن : يما ردي علي .. يمااااااااااا .. اشفيج حبيبتي يماا ,,,
ابوها مو في البيت ولا عنده موبايل تكلمه .. وهو طالع بسيارته يترزق الله .. حطت لفتها على شعرها وركضت بيت
الجيران تستغيث .. وبعشر دقايق شادن مع امها واختها مع تاكسي بطريقهم للمستشفى ,,,
دخلت ام شادن قسم الطواريء وتمت شادن مع اختها بغرفة الانتظار تحاتي امها وبقلبها تدعي لها بالشفا والعافيه ,,,
شادن قاعده على الكرسي واوراد بحضنها لامتها وعيونها ما نشفت من الدموع ... نص ساعه ,, ساعه ,, وشادن تنطر
وما سمعت أي خبر عن امها .. مشت مع اوراد وراحت طقت الباب ودخلت : لو سمحت
رفع الدكتور عينه عن الاوراق اللي يقراها والتقت بعين شادن الخايفه والمتورمه من البجي .. طربت اذنه بسماع
صوتها المبحوح وعينه بشوفة وجهها البريء ,, تموا ثواني كل واحد يطالع الثاني ,,,
د. شاهين : نعم .. تفضلي
شادن دخلت متردده مستحيه وبنفس الوقت خايفه على امها : لو سمحت بسأل عن امي شصار عليها
د. شاهين : منو امج ؟
شادن : فضه مبارك
د. شاهين : المريضه بالقلب الـ
وقبل لا يكمل الدكتور شادن صرخت : قلب ؟!!! امي مريضه بالقلب !!! ونزلت دموعها ,, متأكد دكتور .. امي عمرها ما اشتكت من قلبها !
عرف د. شاهين انها ما تدري عن مرض امها : انتي معاج احد والا يايه بروحج ؟
شادن تبجي : امي يوم طاحت ابوي ماكان بالبيت
د. شاهين مد لها التليفون : دقي عليه خليه يجي المستشفى
شادن نزلت راسها وبصوت واطي : ما عنده موبايل
د. شاهين : ما فيه أي وسيلة اتصال يمكن تلقينه ؟
وقبل لا ترد شادن انفتح الباب ودخل بو شادن ,, شادن من شافت ابوها بجت
بصوت واوراد بجت معاها
ابو شادن يمسح على راس بنته ويسمي عليها : اخذي اوراد وروحي انطريني بره
شادن بصوت متقطع : يبا الدكتور يقول امي معاها القلب
ابو شادن : روحي يبا وانا بعدين افهمج على كل شي
طلعت شادن تمسح دموعها وقعد بو شادن عند الدكتور والخوف بعيونه يسأل عن زوجته
د. شاهين : مثل ماانت عارف ان زوجتك معاها مرض اعتلال عضلة القلب
ابو شادن : عارف دكتور ... شصار عليها ؟؟ هي من زمان ما طاحت والدوا تاخذه بانتظام
د. شاهين : ازمه قلبيه والحمد لله لحقنا عليها .. راح تنام بالمستشفى علشان نتابع حالتها
ابو شادن : وجم يوم بتنام بالمستشفى ؟
د. شاهين : لما تستقر حالتها وتنتظم ضربات القلب ويعتدل التنفس
ابو شادن : ممكن اشوفها دكتور
د. شاهين : هي الحين بالملاحظه .. ان شاء الله بس تروح الغرفه ابلغك
ابو شادن : جزاك الله خير يا ولدي وكثر الله خيرك وعساك ما تشوف مكروه ابد
د. شاهين : الله يسلمك .. واجبي عمي .. سلامتها وما تشوفون شر
ابو شادن : الشر ما يجيك .. استأذن
د. شاهين : حياك الله
طلع بو شادن وشاف شادن قاعده عالكرسي ولامه اوراد وتبجي
شادن : يبا شلون امي ؟ ابي اشوفها .. صج يبا امي فيها القلب ؟
ابو شادن : شوي شوي يبا اذكري الله
شادن : لا اله الا الله محمد رسول الله .. ابي اشوف امي يبا
ابو شادن : ان شاء الله بس يودونها الغرفه نروح نشوفها
شادن : يبا امي فيها القلب ؟
ابو شادن يتنهد ويذكر الله : ايه يبا .. امج قلبها ضعيف والحمد لله على كل حال
شادن تمسح دموعها : بس امي عمرها ما اشتكت من قلبها ,, بس ساعات صدرها يعورها تقول ما اقدر اتنفس وتاخذ علاج الربو
ابو شادن : ما بغينا نخوفج يابوج وامج هي اللي قالت لي ما اقول لج عن مرضها علشان لا تحاتين وتهملين دراستج
شادن تبجي : يا حبيبتي يماااا
ابو شادن : ادعي لها يبا ما لنا غير الدعاء والله يلطف فيها وفينا ,,,
ام شادن نامت بالمستشفى 5 أيام .. وبهالأيام شادن كل يوم تروح عند امها وما تطلع الا لما تخلص الزياره ,, اوراد كل ما شافت د. شاهين راحت له علشان يشيلها .. وهو كل
ما شافها عطاها حلاوه ,, وبآخر يوم وقبل لا تطلع ام شادن من المستشفى دخل د. شاهين
وشاف شادن وبحضنها اوراد
د. شاهين : شلونج الحين خاله ان شاء الله احسن
ام شادن : الحمد لله وجزاك الله خير تعبتك معاي
د. شاهين : واجبي يا خاله
اوراد : ماما ابي عتيل
شادن بصوت واطي : بعدين ماما
د. شاهين ( بنتها !! توها صغيره على انه يكون عندها بنت )
اوراد : ماما ابي معتوت
مدت ام شادن ايدها وراحت لها اوراد وحطت راسها على صدر امها
اوراد : يما انتي فيت دودو
ام شادن : لا يما ما فيني الا العافيه .. انتي ما تغديتي ؟
اوراد : ماما ما عتتني معتوت بث بتاتا
شادن افتشلت من الدكتور : اوراد بعدين حبيبتي اذا رحنا البيت اعطيج تاكلين
ارواد : ابي عتيل وبفت
د. شاهين ضحك ومد ايده لأوراد وهي قامت راحت له : عن اذنج خاله بآخذ الصغيره شوي
اوراد خافت : ابي ماما تادن
د. شاهين نزل لمستواها : ما تبين عصير وبطاط
اوراد التفتت لأمها وامها ابتسمت لها وهزت راسها يعني روحي معاه ,, طلعت اوراد ايدها بإيد الدكتور .. وبعد ربع ساعه رجع وشاف ابو شادن بالغرفه ...
ابو شادن : الله يعطيك العافيه يا ولدي ليش كلفت على نفسك
د. شاهين : يعافيك عمي .. شدعوه ما من كلافه بنتك ما شاء الله مؤدبه وقنوعه
اوراد : بابا توف الاوه وااااااااااايد .. بابا تاهين تلالي
ابو شادن : عليج بالعافيه يبا
د. شاهين : ههههههه كل اللي يشوفني يقول لي متى ياتك بنت وما قلت لنا ..
واللي يقول لي متى تزوجت , من سمعوا ورده تناديني بابا
ابو شادن وام شادن ضحكوا وشادن ابتسمت
اوراد : ماما تادن هات الاوه اتنينه
شادن مستحيه وبصوت واطي : بعدين ماما بالبيت
د. شاهين : استأذن .. والحمد لله على السلامه يا خاله وما تشوفين شر ,,, وقبل لا يطلع التفت على شادن والتقت عينه بعينها .. دق قلبها وحمرت خدودها .. نزلت عينها
بالأرض خجلانه من نفسها ...
,,
,
الصبح الساعه 5.30
بو فايز بصوت عالي : يا مره .. انتي يا مره
الكل نايم ومحد سمع بو فايز
بو فايز : يا بنات .. وجع وينكم
ام فايز : بسم الله الرحمن الرحيم .. هذا جنه بو فايز ! الله يستر
بو فايز يفتح الباب : يا مره
ام فايز : هلا بو فايز .. متى جيت ؟
بو فايز : عجزت وانا اصرخ انادي .. احد ينام لي هالحزه !!
ام فايز : ما نمنا الا بعد الصلاة .. انت اول مره تجي هالوقت
ابو فايز يجر شعرها : بعد بتحاسبيني متى اجي ومتى اطلع
ام فايز تدز ايده ( وسكران بعد !! يا رب ارحمني )
بو فايز : روحي سوي لي عشى جوعان من اصبحت ما كلت
ام فايز : حنا الصبح يا بو فايز .. الساعه خمس الصبح
بو فايز ينسدح وبلسان ثقيل : الدنيا ظلمه يا المهبوله الناس الليل انتي اكيد سكرانه هههههههههههه
ام فايز ( استغفر الله يا رب صبرني )
بو فايز غمض عينه ونام ! وام فايز شالت ولدها وراحت عند البنات وفرشت كمبل ونامت
مع ولدها بعد ما لحفته عن البرد
الساعه 9 الصبح وعت ام فايز وشافت الكل نايم ! راحت غرفتها وشافت بو فايز نايم ويشخر !
ام فايز : الله يهديك ويصلحك
راحت ام فايز المطبخ وسوت شوربة عدس وعيش مشخول .. وعلى الساعه 12 الكل قعد الا بو فايز
حنين وهي تتثاوب : شمنيم فوازي عندنا يما ؟
ام فايز : ابوج هني
حنين : ما شاء الله شرف الذيب
ام فايز : حنين وبعدين
حنين : وينه ماله حس غريبه !!
ام فايز : نايم
حنين : لقعد من النوم طلبي منه فلوس نبي نشتري للمدرسه اغراض ضروريه
ام فايز : ان شاء الله يما .. انا قلت ما راح يطلع الا وانا ماخذه منه فلوس
فايز : ماما دوعان
حنين شالته : دوعان شنو تبي ؟
فايز يبتسم : عيت
حنين تبوس خده : وانت تعرف غيره يا قلبي
ام فايز : نعمه فضيله الله يديمها
حنين : الحمد لله .. يما فوازي لازم ياكل لحم وسمج ودجاج وفواكه .. اهو في طور النمو
الحين ولازم يتغذى عدل .. بعد عمري جسمه ضعيف واجد ووجهه شاحب
ام فايز : وشنسوي يما هذا حال الفقاره والله كريم
حنين : ما حنا فقاره بدام عندنا ابو يشتغل وعنده معاش ! قولي محرومين لأنه عندنا ابو
بخيل ما يفكر الا بنفسه ووناسته وحارمنا من العيشه
ام فايز : ارد واقول الحمد لله على كل حال واحنا احسن من غيرنا
,,,,,,,,,,,,,,,,,,,,,,,,,,,,,,,,
خلصت العطله .. وبدت المدارس .. وكل وحده من البنات عندها سوالف .. وكل وحده
سالفتها غير .. سوالف فيها الضحك وفيها الدموع .. فيها راحة البال وفيها المحاتاة ..
فيها الأكشن والمواقف الطريفه
وفيها التفكير والهموم ...
** دق الجرس ...
الحب .. لحظات اللعب
الجد .. بسمات الشغب
واجمل امانينا ... **
,,
بالمدرسه توه داق جرس انتهاء الطابور والبنات بطريقهم للصف
اسيل تغني : في شارع المدرسه صادفوني ... ثلاثه رايحين الثانويه
مشت يمهم ابلة العربي : اللي حتدخل بعدي مش حتحضغ الحصه
اسيل تمشي بسرعه وتغني بالمصري : يا حضرة العمده ابنك حميده حدفني بالسفنديه
وأعت على سدري وضحكوا عليه زملاتو الأفنديه
يرضيك يا عمده ... عشان ابن عمده ... يعمل كده كده كده فيييه
صديقاتها والأبله يضحكون عليها,,,
بالصف ,,,
ابلة العربي : يا بنات كل وحده تعمل لي تقغيغ عن البغ
اسيل فاتحه عيونها : البغ ؟!! ابله شنو البغ ؟
الأبله : يا اسيل ما تستعبطيش وانتي اول وحده حتعملي التقغيغ ويوم الحد تسلميه
اسيل : يا بنات انا من الحين اقول لكم ترى حجزت الضب والخنفسانه والباقي عليكم
كل الصف ضحك واولهم الابله : لو ما كانش دمك شغبات يا بت كان ليا معاكي كلام تاني
اسيل : حتى انتي ابله دمج فيمتو
الأبله : فيمتو يعني ايه ؟!
اسيل : شربتنا ابله .. انتوا شربات واحنا فيمتو
ضحكت الأبله
اسيل : ابله عفيه لا ندرس اليوم خلينا نسولف شوي
الأبله : نسولف ايه يا بنت هو احنا آعدبن عالبحغ
اسيل : لا ابله بس شوي خمس دقايق فرفشه .. ابله ماعندج مواقف صارت لج وانتي طالبه
الأبله ابتسمت : اكيد .. وكانت ايام جميله ما تتنسيش
اسيل : شنو ابله
الأبله : لما تبدا الفسحه كنا بنتجمع انا وصحباتي وكانت كل وحده معاها السندويتش
بتاعها .. وما كناش زيكو تحطوا الاكل كلوا وتاكلو لأ .. كنا كل وحده تفتح السندويتش
بتاعتها وتأسمها علينا احنا التلاته .. وكنت انا اخغ وحده فيهم .. ولما جه دوغي علشان
أأسم عملت فيهم مألب .. خدت السندويتش بتاعي وجغيت والبنات وغايا بيصغخو
وانا اجغي واكل .. اجغي واكل لحد ما خلصت السندويتش هههههههههههههه
كانت ايام والله حلوه
البنات ضحكوا
اسيل : ابله وعليه على صديقاتج اهم على صمونه وانتي ثنتين
ضحكت الابله : فكغتيني يا اسيل بالزي مضى .. واللي مضى ما بيغجعشي
,
حنين
,
حنين : يما دوامنا اليوم وما خذتي فلوس من ابوي !
ام فايز : شسوي يا بنتي من يجيني وهو مو بوعيه وبس يصرخ بوجهي
مريم : يما نبي مراييل جديده مرايلنا ذابت وتفشل من الشقوق اللي فيها صار لنا سنتين لابسينها !!
حنين باصرار : باجر الصبح بروح له الشركه اللي يشتغل فيها
ام فايز بخوف : انتي انجنيتي ؟!!
حنين : يعني عاجبج حالنا يما !
ام فايز : اخاف يضربج جدام الناس والا يفشلج
حنين : لا تخافين يما انا اعرف شلون اكلمه .. من اجيب له طاري فايز يخق
مريم : يعني بتغيبين باجر من المدرسه ؟
حنين : بروح لابوي مبجر وبعدين بروح المدرسه
ام فايز : الشركه بعيده وبالسوق .. شلون بتروحين ؟
حنين : بركب باص
ام فايز : وانتي شعرفج أي باص يروح السوق ؟
حنين : بسأل كريم راعي البقاله اكيد يعرف
ام فايز : حسبي الله ونعم الوكيل .. ديري بالج على روحج يما
حنين : لا تخافين يما الله يحفظني
مريم : حنونه من تاخذين من ابوي فلوس اشتري لي مريول جديد وجوتي
ام فايز : حنين يما
حنين : هلا يما آمري
ام فايز : لعطاج ابوج فلوس وبدامج بالسوق تقضي لج ولأختج ومتى ما خلصتي تعالي
مريم : والمدرسه يما ؟
حنين : مو لازم اروح باجر .. وبعدين هذا اول غياب لي
ام فايز : الله يسهل الأمور .. وما اوصيج على نفسج يما
حنين : لا توصين يما بنتج سبع
مريم : انتي بنت يعني سبعه
حنين وام فايز ضحكوا
الصبح الساعه 6
حنين : يلا يما انا طالعه
ام فايز : تو الناس يما
حنين : يما على ما اسأل كريم عن الباص وعلى ما ادل الطريج يبيلي وقت
ام فايز مدت لها ربع دينار : خذي يما هذا كل اللي عندي
حنين خذت الربع : يلا يما انا رايحه دعواتج لي
ام فايز ترفع ايدها : الله يسهل دربج يا بنتي ويحنن قلب ابوج علينا ويهديه ويصلحه والله
يرزقج من رزقه الواسع يا رب .. ويرزقج بالزوج الصالح اللي يريحج اللهم آمين ,,,,
دلاني كريم مكان الباص , ورحت اركض لمكان الباص علشان الحق عليه والحمد لله
لحقت عليه وركبت وقعدت جدام يم الدريشه وقعدت يمي وحده هنديه ! التفت عليها وفتحت
عيوني !! شهالهنديه الكشخه ! تنوره سوده وقميص مشجر بألوان وحاطه ورده بشعرها
جنها مزهريه !! والحمره تقول عاضه فار ! والحواجب سوووووده ! والاهم من هذا لابسه
سلسله وخاتم !! شكلهم ذهب !! منين لها ؟ شكل حالتها احسن منا ! بدامها لابسه ذهب يعني
ضامنه اكلها وسكنها ! والا يمكن زوجها كويتي ؟ انا اشفيني قمت اخربط ؟ استغفر الله
اشفيني فصلت هالهنديه الحين ! خليني بهمي احسن
العامل : مين ما خدش تزكره ؟
الهنديه مدت له 100 فلس : انا ما ياخد تزكره
العامل يكلم حنين : وانتي يا آنسه ؟
حنين بلعت ريجها : ها
العامل : معاكي تزكره ؟
حنين : لأ
العامل يمد لها التذكره : 100 فلس لو سمحتي
حنين مدت له الربع : الباقي لو سمحت
العامل : اتفضلي 150
حنين ( انا قاعده بهالباص ومادري وين بيروح فيني ! ماكو الا اسألأ هاللي يمي ) : انتي تدلين السوق ؟
الهنديه : وين يبي مباركيه والا مهاميد ؟
حنين : انا ابي مكان فيه شركه
الهنديه : سركه مال سنو
حنين : مادري مال شنو بس انا اعرف اسمها
الهنديه : فيه واجد سركه جنب سوق
حنين : انزين تعرفين وين انزل .. يعني ابي انزل مكان قريب يم الشركه
الهنديه : انزل عند مهطه تاني
حنين : وبعدين ؟
الهنديه : ختري اسنين سارع بعدين اسأل فيه واجد سركات هناك
حنين : مشكوره
نزلت وتميت ساعه ونص امشي واسأل لين لقيت الشركه .. قعدت على الدرج ارتاح
رجولي عورتني من المشي .. شفت ناس واجد اللي داخله واللي طالعه ! قمت ونفضت
عباتي ودخلت شفت اثنين قاعدين على مكتب طويل ومعاهم تليفونات وجدامهم اوراق !
حنين : لو سمحت وين القى بو فايز ؟
الموظف : بو فايز مين ؟
حنين : فهد فايز ال......
الموظف : اه عرفتوا تلقيه بالدور التالت
حنين : شكرا
صعدت الدور الثالث وانبهرت من الأثاث والديكورات والترتيب .. شفت وحده لابسه
تنوره قصيره وقميص ضيق وشعرها بني قصير وماسكه بايدها ملف
حنين : لو سمحتي
الموظفه : نعم
حنين : وين القى بو فايز
الموظفه : هلأ شفتوا عند المدير بيقدم له القهوه
حنين : وين مكانه علشان انطره لين يخلص
الموظفه : اتفضلي اوعدي هون
حنين استحت من لبسها وعباتها القديمه : لآ مشكوره ابي انطره بمكانه وين لو سمحتي
الموظفه : روحي سيدا آخر باب على الشمال
حنين : مشكوره
مشيت مكان ما دلتني ودخلت لقيت مطبخ وشفت واحد هندي واقف يم المغسله يغسل قلاصات
حنين : اهني بو فايز
الهندي : الهين يجي .. تبي يشرب شي
حنين : ابي ماي
الهندي : ما يبي قهوه والا شاي
حنين : شاي
الهندي : وين مكتب انت ؟ روه مكتب انا يجيب
حنين : انا ما عندي مكتب انا بقعد هني انطر بو فايز
الهندي : انت يعرف بو فايز ؟
حنين : ايه .. اهو بابا مال انا
الهندي فتح عيونه : بابا مال انتي ؟
حنين : ايه اشفيك مستغرب
الهندي : انا فكر بس فيه بجا فايز
حنين : لا بعد فيه بجتين ثنتين
الهندي عطاها صحن فيه توست وجبن وعطاها كوب شاي : تفزل
حنين دمعت عينها ( الهندي حن علي ! اكيد عرف اني ميته من الجوع ! باين على وجهي )
طلع الهندي من المطبخ وانا ماصدقت كلت التوست بسرعه وتوني بشرب الشاي دخل ابوي
بو فايز : حنين ؟!!!!!!!!!!!!!
حنين : شلونك يبا
بو فايز يطالع صوب الباب : شجيبج الشركه ؟ ومتى جيتي وشلون ؟
حنين : جيت بالباص وتوني واصله
بو فايز : ليش جايه وشتبين ؟
حنين : جايه ابي فلوس انت صار لك قريب اسبوعين ما جيتنا والبيت فاضي
بو فايز : وانا منين لي فلوس ؟ ما عندي
حنين : يبا فايز صار له يومين ما اكل ومريض بس يصيح من عوار بطنه
بو فايز : فايز ؟
حنين : والله يبا يكسر الخاطر حتى ملابس ما عنده
بو فايز : خلاص ارجعي البيت وانا اليوم اجيكم
حنين ( ما نبيك تجينا وتغث امي وتنكد عليها ) : يبا عطني فلوس انا بشتري له اكل الحين
انت على ما تجي الا هو ميت من الجوع
بو فايز يفتح بوكه : اسم الله عليه من الموت لا تفاولين على اخوج .. خذي
حنين : يبا ما يكفي
دخل الهندي ومعاه علبه فيها فطاير : بو فايز هازا جيب ام منصور
بو فايز : نعم الله عليها ام منصور ما تقصر
حنين تطالع ابوها وبصوت واطي : عطني يبا زياده ما يكفي وانا ومريم نبي اغراض للمدرسه
بو فايز : ما عندي منين اجيب لج
حنين : تكفى يبا علشان فايز
بوفايز طلع 30 دينار وعطاهم حنين : خذي هذا كل اللي بالبوك
حنين : مشكور يبا
بو فايز : يلا روحي جيبي اكل لأخوج ولا تتأخرين
حنين : ان شاء الله
بو فايز : تعالي خذي هالعلبه معاج
دخل ضاري المطبخ معصب : انت ما تسمع الجرس ؟ انصمخت ؟
بو فايز : آسف طال عمرك .. آمرني شبغيت
ضاري : ود شاي لمكتب بدر وبسرعه
بو فايز : ان شاء الله
ضاري : منو انتي ؟ وشحقه قاعده هني ؟
حنين انخشت ورا ابوها !
بو فايز : هاذي بنتي .. والحين بتطلع .. يلا روحي ولا تتأخرين
طلعت حنين وهي منزله راسها وبايدها علبة الفطاير !
طلعت من الشركه وانا في بالي اشياء واجد ودي اشتريها واهم شي ملابس للمدرسه لي ولمريم
وجواتي ودلاقات .. وجم دراعه لأمي بدال هالذايبات اللي عندها .. واكل يكفينا عالاقل هالاسبوع
وانا امشي وسرحانه مرت جنبي سياره فيها شباب
الشاب : حياج نوصلج
حنين : ...................................
الشاب : حرام تحترقين بهالشمس
حنين : محد شكى لك
الشاب : قلبي يعورني وانا اشوفج تمشين بهالحر
حنين : نار جهنم احر
الشاب : اقول .. ما ودج بعصير عوار قلب
حنين : اقول ما تنقلع احسن لك لأخلي اهلك يجيهم عوار قلب
الشاب : لسانج شكله طويل
حنين : وايدي اطول .. ويلا روح عطني مقفاك والا ما راح تشوف ولا جامه بسيارتك
الشاب : سويها وشوفي شيجيج
وقفت حنين وخذت حصاة من الارض وقبل لا تحذفها سرع الشاب بالسياره وعفر عليها
حنين : كح كح كح وجع عما بشكلك شباب ما لقى من يلمه
مشيت لين وصلت عند المحلات , دخلت وشفت السمج واللحم والخضره والفواكه ! نسيت
الملابس وشريت لحم ودجاج وفواكه , ورحت صوب السمج وشريت سمج صغار ما اعرف اسمه
خذت كيلوين بدينار .. حطيت اغراضي كلها بجيس واحد علشان اقدر اشيله , وشريت لأمي
دراعتين وشريت حجابين لي ولمريم .. وسألت واحد من العمال عن الوقت قال لي الساعه 12 ..
الحمد لله فيه وقت امشي لي محطة الباص !
وانا امشي رايحه المحطه شفت محل يبيع العاب وشفت كوره اخذتها لفوازي .. وشفت فلوسي اللي
بقت والحمد لله معاي دينار و750 فلس !
وصلت البيت بالسلامه .. وصلت وانا رجولي تعورني من المشي وشيل الجيس ,, بس كل هذا راح
لما شفت الابتسامه بوجه امي ومريم وفرحة فوازي بالكوره ...
,
ثانوية البنات بالفرصه ,,,
قاعدين البنات وكل وحده معاها اكلها ...
شادن صمونه جبن مع عصير برتقال ,, وعذوب كرواسونه مع عصير اناناس ,, واسيل فطيرة جبن وبيتزا وبطاط برينجلز وبيبسي وسنيكرز وكتكات ...
شادن تاكل وسرحانه ويا في بالها د. شاهين ,, عذوب تكلم اسيل واسيل لاهيه بالاكل وما ترد عليها ...
عذوب : اسول وعافيه .. شوي شوي لا تقصين وتموتين علينا
اسيل : كح كح كح .. ول ول يا عينج
عذوب : الحين عيني !! يعني مو منج لقمه ورا الثانيه .. شنو منو لاحقج ؟!!
شادن : والا امج مو مسويه غدا اليوم ؟
اسيل : بعد عمري امون .. لا تذكريني خليني اتناسى واتهنى بأكلي اليوم الخميس يوم النكد
عذوب : استغفر الله .. وبعدين معاج اسول .. المفروض تتأقلمين على الوضع
شادن : اسيل صار لج سنين وانتي كل خميس عند ابوج .. خلاص ما تعودتي ؟؟
اسيل ضاق خلقها : شي مفروض علي .. مالي خلق اجابلهم اليوم واهم شي مالي خلق مناجر احمدوه
عذوب : ههههههههه والله اسول انتي وولد عمج احس انكم اكشن
شادن تنغز عذوب وتغمز لها
اسيل : تبينه حلال عليج ... والا اقول لج حرام اغشج فيه واحد دمه ثقيل وكريه
عذوب : هههههه لا حبيبتي خليه لج .. شبي بواحد كريه على قولتج
اسيل : عذبه بليز خليني اتهنى بأكلي لا تييبين طاريه لا تنسد نفسي
شادن : اسول خلاص لقيت لج خوش ريجيم .. كل ما بغيتي تاكلين تذكري احمد
عذوب تضحك : شهر شهرين ثلاثه الا انتي رشيقه
اسيل بصوت عالي : مالت عليكم انتي وياها واهو معاكم بعد ,,,,,
شادن ضحكت ومروا بنتين ,,
البنت (1) : ياحلو هالضحكه
البنت (2) : شهالحلاوه والغمازات اموت انا فيهم
اسيل : نعم انتي وياها .. الله بالخير
البنت (1) : انتي من كلمج
عذوب : لو سمحتي عن هالحركات الماصخه
البنت (1) : ما ماصخه الا انتي
اسيل : هي انتي وياها يا اللي ما فيكم ولا ذرة انوثه يلا بعيد بعيد
البنت (2) : انتي ما تصكين حلجج احسن
اسيل : لا ماني صاكته .. شبتسوين يا عنتر زمانج
البنت (1) : احنا مو يايين نتهاوش ,, وتلتفت على شادن : احنا يايين نشوف القمر
شادن بهدوء : تشوفج العافيه .. الله يهديكم ويصلحكم
البنت (2) : شدعوه عاد احنا شمسوين
عذوب : شمسوين !! لا ما سويتوا شي .. بس نظرتكم مو حلوه واسلوبكم مقزز ومنظركم مقرف
اسيل : عدلي القوله ونزلي جمومج وبدال ساعة اخوج اللي لابستها لبسي ساعة نسائيه
البنت (2) : هاذي الموضه .. شنو ما تشوفين الناس شتلبس
اسيل : اشوفهم وللأسف النماين اللي نفسكم زادوا
البنت (1) بوقاحه : ليش اشفينا احنا
عذوب : الصراحه انتوا بصوب والأنوثه بصوب
اسيل : يعني بالعربي ردوا لعقولكم وشوفوا اللي مسوينا بنفسكم
شادن : حلاة البنت بحياها وبرقتها وانوثتها
البنت (2) : كفاية نشوف حلاج ورقتج يا حلوه
اسيل بصوت عالي : بس عاد مصختوها .. قطيعه تقطعكم وتقطع اللي نفسكم .. شوهتوا سمعة بنات
الكويت واسأتوا حق كل وحده فينا !! قطيعه صرتوا وصمة عار على اهلكم وعلى الديره بعد ,,,
شادن : قولي الله يهديهم ويصلحهم ويردون لطبيعتهم اللي الله خلقهم عليها ..
اللي ما يدرون عنه البنات ان المشرفه كانت واقفه وسمعت كل الكلام اللي انقال
وشافت البنتين وهم يغمزون لشادن
المشرفه : منى .. اسماء .. جدامي عالإدارة
منى : ابله ما سوينا شي
المشرفه : كل هالكلام وما سويتي شي .. يعني انطرج تسحبينها أي مكان علشان يثبت انج سويتي شي
اسيل : ابله اذا تبين شاهد حياج بدال الوحده ثلاثه
المشرفه : مشكوره اسيل والله يثبتكم للعمل الصالح
اسيل : تسلمين ابله والله يعينكم على هالبلاوي
اسماء : البلاوي ويهج يا الدبه
المشرفه : اسماء .. خلاص ما فيه احترام !!
شادن مسكت ايد اسيل علشان لا تقوم للبنت وبصوت واطي : جنج ما سمعتيها خليها تولي
اسيل : ابله سجلي انها تلفظت علي بالفاظ بذيئه جارحه مدميه
عذوب وشادن ابتسموا على كلام اسيل
المشرفه : جدامي انتي وياها
راحت المشرفه وقامت اسيل تطق باصابعها وتهز : يحيا العدل .. يحيا العدل ...
وتغني : في شارع المدرسه صادفوني حثالتين رايحين الإدارة
عذوب وشادن يضحكون عليها
اسيل : صدقوني راح آخذ حقي من هالكلبه اسماءو وعلمها شلون تقول لي يا دبه
شادن خافت : شبتسوين اسول
اسيل تبتسم : كل شي بوقته حلو
الحصه الأخيره والبنات متمللين يبون يطلعون واسيل ما ودها يدق الجرس ...
يوم الخميس فرحه لكل البنات الا هي !
دق الجرس وطلعت اسيل تمشي مع عذوب وشادن راحت عند الباصات ,,,
عذوب : اسيل لا يكون خذتي بخاطرج منا لما يبنا طاري ولد عمج
اسيل : لا عذبه شدعوه ... آآآآآآآآآه شر لا بد منه
عذوب : استغفري ربج اسيل شهالكلام اهلج شر !!! اتعوذي من الشيطان
اسيل : استغفر الله .. اعوذ بالله من الشيطان
عذوب : اسول حبيبتي .. روحي استانسي مع اخوانج وبنات عمج وما عليج منه ...
اسيل : عذبه اهو اللي يتحرش ويدور اي شي بس علشان يقثني
عذوب : حقريه لا تردين عليه ولا تطالعينه .. يلا حبيبتي كاهو السايق واقف مع السلامه
اسيل : تعالي بوسيني ما راح اشوفج يومين
عذوب تضحك وتبوسها على خدها : لا تغسلين علشان لا تروح بوستي
اسيل : ههههههه بقطن ...يلا مع السلامه وسلمي على الماما
ركبت عذوب مع سايقها واسيل تدور سيارة عمها سالم ( وينك عمي الله يهداك )
,
** لا خطاوينا وراها لقى .. وانت تلاقينا انتلاقى بشقى ... **
,
عينها تدور على السيارات وتشوف البنات كل وحده رايحه مع اهلها .. مرت 5 دقايق وهي واقفه تنطر
وتطالع السيايير وتغني ( في شارع المدرسه صادفوني ثلاثه رايحين الثانويه .. ووحده منهم
ملطوعه ومحد يا خذاها )
احمد بصوت واطي : ساعه ناطر .. شنو عميه ما تشوفين سيارتي ؟!!
،،
احداث شيقه بانتظاركم .. كونوا قريبين
<< لا اله الا انت سبحانك اني كنت من الظالمين >>

غفران* ©؛°¨غرامي فعال ¨°؛©

وينكم قرائي الاعزاء .. وين التفاعل !!

5o5ati ©؛°¨غرامي جديد¨°؛©

يعطيك العافية ع هالابداع
استمري ، وبانتظارك على أحر من الجمر
بالتوفيق

لامــارا ©؛°¨غرامي نشيط¨°؛©

صحيح يا الغلا وكل الحلا

ننتظرك

ونتظر جمال كلماتك وابداعاتك

لا تدعي قلة الردود تعرقل مسيرتك الادبية

نتظر البارت القادم بكل حب وشوق

غفران* ©؛°¨غرامي فعال ¨°؛©

المشاركة الأساسية كتبها لامــارا اقتباس :
صحيح يا الغلا وكل الحلا

ننتظرك

ونتظر جمال كلماتك وابداعاتك

لا تدعي قلة الردود تعرقل مسيرتك الادبية

نتظر البارت القادم بكل حب وشوق
شكرا حبيبتي على هالكلام الحلو والمشجع
جزاك الله خير

غفران* ©؛°¨غرامي فعال ¨°؛©

هلا وغلا في زوار هذا المنتدى الرائع .. كيفكم ان شاء الله طيبين

غفران* ©؛°¨غرامي فعال ¨°؛©

هلا وغلا في زوار هذا المنتدى الرائع .. كيفكم ان شاء الله طيبين

ملك جاسم ©؛°¨غرامي مشارك¨°؛©

مرحبا غفران عجبتني روايتك كثير ليه وقفتي وما كملتيها اتمنى تكمليها

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1