غفران* ©؛°¨غرامي فعال ¨°؛©



عدت لكم من جديد ,,,,,,
لم يكن في الحسبان ان القاكم مجددا .. وان اقوم بكتابة رواية اخرى غير روايتي الأولى
<< أيام من حياتي >>
الحمد لله روايتي الأولى لاقت اعجاب الكثيرين ... واتمنى ان تكون روايتي الثانية تلاقي نفس
الاعجاب والحماس والتشجيع ,,,
الذي قرأ << أيام من حياتي >> سيلاحظ الفرق بينها وبين روايتي الثانية ...
في أيام من حياتي كانت هناك بطله واحده وبطل واحد وعشنا مع بعض مغامرات واحداث أيامهم
اما روايتي الثانيه << رجفة قلوب العذارى >> ففيها من الاحداث والمغامرات الكثير لأنها
تحتوي على ثلاث بطلات وكل بطله لها قصه ومغامره ...
ردودكم تسعدني وتحمسني على تكملة الرواية واضافة فقرات قد سقطت سهوا من مخيلتي
ارحب بمشاركتكم وآرائكم ,,,
محبتكم ( غفران* )

وردة الزيزفون
✿ إدارة الإقسام ✿

مساء الخير ... ياهلا فيك عزيزتي مرة ثانية ... موفقة بطرحك ... بس حبوبة ياليت تنزلي البارت بسرعة حتى لايكون في ردود مخالفة وحتى تلاقي تفاعل من القراء

القوانين / الإطلاع هام و الإلتزام ضروري


وهذا الموضوع راح يفيدك ياليت تطلعي عليه

قضايا

غفران* ©؛°¨غرامي فعال ¨°؛©

المشاركة الأساسية كتبها وردة الزيزفون اقتباس :
مساء الخير ... ياهلا فيك عزيزتي مرة ثانية ... موفقة بطرحك ... بس حبوبة ياليت تنزلي البارت بسرعة حتى لايكون في ردود مخالفة وحتى تلاقي تفاعل من القراء

القوانين / الإطلاع هام و الإلتزام ضروري


وهذا الموضوع راح يفيدك ياليت تطلعي عليه

قضايا
هلا وغلا فيج اختي وشكرا لج على مرورج وردج .. ان شاء الله اليوم راح احط الجزء الاول من الروايه وان شاء الله تعجبكم .. ودمتي بخير

االمهره ©؛°¨غرامي فعال ¨°؛©

لا اله الا الله

ياهلا ياهلا بالاخت غفران

كنت في انتظاااااااااااار روايتك ،، وان شاء الله تلاقين نجاح اكثر واكثر واكثر من الرواية الاولى الجممميله

وفي انتظارك

غفران* ©؛°¨غرامي فعال ¨°؛©

المشاركة الأساسية كتبها االمهره اقتباس :
لا اله الا الله

ياهلا ياهلا بالاخت غفران

كنت في انتظاااااااااااار روايتك ،، وان شاء الله تلاقين نجاح اكثر واكثر واكثر من الرواية الاولى الجممميله

وفي انتظارك
هلا وغلا فيج يا المهره شلونج يا قلبي عساج بخير يا رب

غفران* ©؛°¨غرامي فعال ¨°؛©

يا هلا ويا مسهلا باللي حضر
الى عشاق الروايات ....
الى ضيوف منتدى غرام ....
ابدأ معكم أول اجزاء روايتي المتواضعه واتمنى ان تعجبكم
الرجاء من يريد نقل الرواية ذكر اسمي ( غفران*)
فعلى بركة الله ابدأ ...
اتمنى لكم قراءة ممتعة مع
*
*
<<< رجفة قلوب العذارى >>>
*
*
( الجزء الأول )
*
** قلوب صغيرة كبرتها آهات الزمن **
*
** شادن ** أسيل ** عذوب

صديقات من الابتدائي .. سبحان من جمعهم .. كل وحده تختلف عن الثانية من كل الجوانب ,,,
كيف اجتمعوا ؟؟ كيف اجتمع الثراء والدلع .. والعيشه المتوسطه .. والفقر مع عزة النفس ...
كيف رجفت قلوب بطلاتي ؟؟ ومتى ؟؟
*
*
<< عذوب >>
*
بنت من الطبقة المخملية .. طويلة وجسمها لايق على طولها .. مهتمه بنفسها وبأناقتها .. بشرتها
حلوه وصافيه ..سمارها سمار الكويتيين الحلو ( حنطاوية ) مو متحجبه وشعرها دايما تسويه
كيرلي ..متفوقه دراسيا ذكيه وطموحه .. دلوعة امها وابوها ,,,
اختها الكبيره مشاعرعمرها 27سنه متزوجه وعندها ولد وبنت ,
اخوها خالد عمره 24 سنه يدرس بلندن مخلص الجامعه وياخذ الماجستير ذكي وطموح ...
ضاري عمره 22 سنه ولد يحب المظاهر والكشخه ! كسلان وياما سقط وعاد
السنه بمراحل دراسته ! الحين هو برابعه ثانوي ! مهمل ما يحب يدرس !
* بدر .. اخو عذوب من ابوها عمره 30 سنه << راح تعرفون قصته مع احداث الروايه >>
عذوب على ثراءها الا انها متواضعه وحبوبه وما عندها غرور وتكبر .. واثقه من نفسها ..
وشخصيتها مميزه .. احلى ما في حياتها صديقاتها اسيل وشادن
*
*
<< اسيل >>
*
دبدوبه ملامحها ناعمه واللي يميزها عينها الصغيرة وحواجبها الطويلة ..
شعرها طويل لآخر ظهرها .. دمها خفيف وغشمرجيه ..
تحب الأكل وخاصة الحلويات .. حالتهم الماديه متوسطه .. عايشه في بيت خالها مع امها
ويدتها وزوجة خالها وبناته الاربعه.
ام اسيل مطلقه وتشتغل اخصائية اجتماعية بمدرسه متوسطه ,, وابو اسيل متزوج وعنده 4
اولاد .. كل يوم خميس اسيل تزور ابوها وتنام عنده الويك اند ..
اسيل اللي امتنها الكاكاو والبيبسي ,, لأنها قبل لا تنام متعوده تاكل كاكاو مع بيبسي
وتسمع لها جم كلمة تهزيء من امها ...
اسيل على شكلها وجسمها الممتليء الا انها خفيفة بالركض .. ويا ويل ان احد قال لها يا دبه والا يا بطه ,,,
*
*
<< شادن >>
*
بنت ناعمه وحساسه .. تمتلك وجه طفولي ناصع البياض .. وشخصيه محببه للكل .. لها ضحكه مميزه ..
وابتسامه تتكلم عن غمازتين زادتها حلاة ..
ملامحها وعيونها السود تتكلم عن عزة نفسها وتحملها وتنازلها عن كثير من الأشياء
اللي تحتاجها بنت بسنها تقديرا لظروف ابوها وامها واختها ذات الثلاث سنوات ...
معاش ابوها بالكاد يكفي .. ولولا مساعدة ام شادن لزوجها من عملها وشغلها من عمل
الخياطه والربح القليل اللي يجي من وراه كانوا ناموا ايام من غير اكل ..
ولا عرف بو شادن كيف يوفر علاج لزوجته المريضه بالقلب ...
*
*
عائلة عبد العزيز < ابو احمد >
ابو احمد عمره 53 سنه ويشتغل في وزارة الداخليه
ام احمد 50 سنه متقاعده من 3 سنوات
نوريه 29 سنه وعندها بنتين وولد
احمد 26 سنه جامعي وضابط بالسلك العسكري
محمد 24 سنه متخرج من الجامعه
بدريه 21 سنه بالجامعه
فوزيه 18 سنه آخر سنه بالثانويه
*
عائلة يعقوب < بو يوسف >
بو يوسف عمره 46 سنه ويشتغل بنفس الوزاره مع اخوه
بنته الكبيره اسيل من زوجته الاولى امنه .. وبعد طلاقها تزوج من هدى وعنده 4 أولاد
يوسف 14 سنه .. حسين .. 11 سنه .. فيصل 7 سنوات .. عبد الله 4 سنوات
*
سالم الاخ الاصغر لعبد العزيز ويعقوب .. عمره 32 سنه .. يشتغل في وزارة الكهرباء والماء
ارمل وما تزوج عقب وفاة زوجته
*
عائلة غانم < بو بدر >
غانم 54 سنه يمتلك شركة استيراد وتصدير
ام خالد .. عواطف 49 سنه متخرجه من الجامعه تخصص محاسبه وماسكه حسابات الشركه
بدر 30 سنه يشتغل مع ابوه .. امه توفت من كان عمره سنتين وربته ام خالد
مشاعر 27 سنه عندها ولد وبنت
خالد 24 سنه يدرس ماجستير في لندن
ضاري 22 سنه برابعه ثانوي
عذوب 18 سنه برابعه ثانوي
*
*
** دق الجرس يلا زوايا المدرسه كلها تنادينا
دق الجرس يلا على السبوره نكتب كل حكاوينا **
,,
,
ثانوية البنات ,,, الساعه 7,15 صباحا ...
شادن قاعده على احد الكراسي اللي بالساحة وتدندن بصوت واطي :
يا طير يا طاير على طراف الدني
لو فيك تحكي للحبايب شو بني
يا طير .. يا طير
روح اسألون ع اللي وليفو مش معو
مجروح ما بيقول ع اللي بيوجعوا
وتحن عابالوا ليالي الولدني
يا طير .. يا طير
... وما حست الا بالإيد اللي تنحط على عينها ,,,
اسيل : منو انا ؟
شادن مبتسمه : اسوله حبيبة قلبي
لفت اسيل وقعدت يمها : صباح الخير
شادن : صباح النور
اسيل : دايما اول وحده .. ودي بيوم اسبقج واكون اول وحده
شادن : قومي مبجر وانتي توصلين اول وحده ,, مو عاضه المخده لي قريب ال7
اسيل بدفاشه : يا معوده حمدي ربج ما اوصل مع دقة الجرس وإلا لي خلص الطابور
شادن : جنج ناويه تسوينها
اسيل : شرايج شدون يلا نسويها ونكشت بالطابور ونيي الساعه 8
شادن : حلفي ؟!!! حبيبتي خليج على وقتج احسن ,, مو كفايه عذوب ما توصل إلا حده حده ما باقي عالجرس غير ثواني
عذوب من وراهم : من اللي يحش فيني ؟
اسيل : بسم الله الرحمن الرحيم .. انتي متى ييتي ؟
شادن تلمس جبهة عذوب : مو مسخنه !! عسى ما شر يايه مبجر اليوم !!
عذوب : تبوني اطلع ؟؟ عادي ترى اسويها
اسيل بطفاقه : لا لا الله يخليج هاذي تنكتب بالتاريخ ,, عذوب اليوم الساعه 7,20 دقيقه واصله المدرسه
عذوب تضحك وتقعد يمهم : اسول دني شوي تقلقصت
اسيل كاشته فيها وتاكل كتكات وتغني : في شارع المدرسه صادفوني ثلاثه رايحين الثانويه
عذوب : اسول وصمخ ,, دني شوي يا الدبه
اسيل : دبه بعينج يا النخله .. حاصل لج جسم نفسي يا الزرافه
شادن : بدينا
اسيل تاكل وتكلم شادن : هي اللي بدت
عذوب : بس صكي حلجج وانتي تاكلين ,, عفيه جبد كاكاو على الريج
شادن تضحك واسيل تطالعها : وانتي على شنو تضحكين يا الخبله !! وتلتفت لعذوب : ومن قالج اني
ماكله كاكاوعلى الريج ؟ حبيبتي انا ما اطلع الا لما اتريق مو مثلكم انتي وياها
عذوب : انا ما اشتهي آكل من الصبح
شادن : انا اشرب حليب قبل لا ايي المدرسه
اسيل تغني : يا اطفال يا حلوين اشربوا الحليب
عذوب : بالصحه والقوه اسألوا الطبيب
شادن : اشرب على مهلك واشكر الإله
كلهم مع بعض : لازم تشكر ربك ابدا ما تنساه
ضحكوا البنات ,, ومروا يمهم مجموعة بنات ...
وداد : الحمد لله والشكر قاعدين بروضه احنا
امل : هههههههههه تخلف
اسيل : تسكتين والا اعلمج التخلف عدل
حنان : انتي من كلمج
اسيل : انتي اكلي تبن وصكي حلجج .. ما بقى الا العصي تتكلم
حنان : عصايه بعينج يا الفيله
اسيل قامت لها ومسكتها من شعرها وهزت راسها وبصوت واطي ومن بين اسنانها : الحين دبه ما افوتها
من اعز صديقاتي ,, تيين انتي يا النعيه وتقولين لي يا فيله !! تبين الحين ايرج من قذلتج يا الصخله لي المديره
حنان خافت : وخري عني .. هدي شعري
اسيل : يلا انتي وياها تت تت لا اييكم شي ما شفتوه
راحوا البنات معصبين ويتحلطمون .. واسيل رجعت قعدت يم عذوب
شادن : اسيل حرام عليج هزأتي البنت
اسيل : خل تاكل تبن .. تحمد ربها ما كفختها والا سحبتها للمديره
عذوب تضحك : حشى صبي مو بنيه
اسيل : تدرين اللي يدوس جسمي على طرف يا ويله
شادن ببراءة : ما سمعت البنت قالت دبه
اسيل بنرفزه : شدون وعافيه .. قالت اخس من دبه .. قالت لي يا الفيله يا عل الفيل يهرسها بريوله
عذوب وشادن يضحكون
اسيل: ايه ضحكوا شعليكم ما حاشكم اللي حاشني
عذوب : سوي ريجيم وفكي عمرج
اسيل : ما اقدر الأكل يكسر خاطري .. لي شفته يناديني وانا ما اقدر ارد لأحد طلب
شادن : هههههههههه والله انج تحفه اسول
اسيل : شدون اهم شي يبتي من صمون امج اللذيذ
شادن : لا تحاتين يبته وزايده الجيله بعد
عذوب : يا حبي لها خالتي الله يخليها لكم
شادن : تسلمين ويخليلج ماماتج ,,,,,,,
دق الجرس معلن ابتداء طابور الصباح وقراءة سورة من القرآن الكريم وتحية العلم ...
تحيا الكويت .... تحيا الكويت .... تحيا الكويت
عاش الأمير .... عاش الأمير .... عاش الأمير
تحيا الأمه العربية
وطني الكويت سلمت للمجد ... وعلى جبينك طالع السعد
وطني الكويت ... وطني الكويت ... وطني الكويت سلمت للمجد
,,,,,,,,,,,,,,,,,,,,,,,
خلص الطابور وكل الطالبات راحوا لفصولهم
عذوب : الله يعينا على القثا .. اول حصه فيزياء
اسيل : والثانيه رياضيات
شادن : والثالثة بدنية
اسيل : اخ بس لو يعطوني اسوي لهم الجدول
عذوب : شبتخلينه ست اسيل
اسيل : فنيه .. فنيه .. موسيقى .. حاسوب .. حاسوب .. بدنيه بس ويخب عليهم بعد
عذوب وشادن يضحكون ,,, قربت يمهم ابله مصريه : يلا يا بنات تحركوا
اسيل بالمصري : هوب هوب واحد اتنين .. هوب هوب يا محمدين
,,,,,,,,,,,,,,,,,,,,,,,,,,,,,,,,
انتهى اليوم الدراسي وحان وقت خروج الطالبات من المدرسه .. عذوب واسيل توجهوا للبوابه الاماميه وكل
وحده ركبت مع سايقها .. اما شادن فتوجهت للباب الخلفي لوجود الباصات ,, ونفس كل يوم ما توصل شادن
الا قريب الساعه 2,30 بسبب زحمة الشوارع وتوصيل كل طالبه لبيتها ,,,
,
<< شادن >>
,
شادن تطق الباب واوراد فتحته لها ...
شادن لمتها وشالتها : هلا بالقمر هلا بوردة حياتي
اوراد : ماما تادن وين هلاوه
شادن : هههههههه تعالي الحين اعطيج حلاوه .. وين يما
اوراد : يما بالمتبخ توي عيت
مشت شادن وهي شايله اوراد ودخلت المطبخ على امها سلمت عليها وحبتها على راسها
ام شادن : هلا يما شلونج وشلون المدرسه اليوم
شادن بابتسامه : الحمد لله يما , والمدرسه مثل كل يوم ...
اوراد : انا لوح مدثه
شادن ضحكت وباستها : انتي اول دخلي الروضه ولاحقه على المدثه يا حلوه
اوراد : لوح لوده اللآب وااااااااايد
شادن : هههههههههه يا حياتي .. يما ابوي ما رد ليلحين ؟!
ام شادن : لا ليلحين .. بس ان شاء الله على وصول اهو ما يتأخر لي هالوقت
ابو شادن : السلام عليكم
ام شادن وشادن : وعليكم السلام ورحمة الله
ام شادن : الطيب عند ذكره
شادن حبت راس ابوها : شلونك يبا
ابو شادن : بخير يا بوج نحمد الله
راحت اوراد رفعت ايدها لأبوها وابوها شالها وحبت راسه تقلد شادن : تلونك يوباااا
ابو شادن يضحك : بخير يوم شفت وردتي طيبه
ام شادن مبتسمه : الله يخليك لهم
ابو شادن : ويخليج يا شمعة هالبيت .. يلا غداكم خالص ؟
ام شادن : يلا على ما تغيرون هدومكم انت وشادن تلقون الغدا منجوب
اوراد : انا آكل انا آكل
ام شادن : ورده طلعي يما من المطبخ وروحي قعدي بالدار الحين انا اييب لج تاكلين
اوراد : يما ابي إيت واااااايد ودكوت
ام شادن : ههههههههههه ان شاء الله بس طلعي لا تطفريني
اوراد : لوح ماما تادن ؟
ام شادن : روحي يما
اوراد : لوح يوبااا ؟
ام شادن : ورده اللي بتروحين له روحي
اوراد : يما اتيني ديايه بلد
ام شادن : اذا حطيت الغدا اعطيج يلا طلعي
اوراد صاكه عيونها : يمااااا بث ذعنونه الله خليت
ام شادن ابتسمت وقطت ساق الديايه وعطت اوراد : هاج حبيبتي فيه العافيه
اوراد خذته وركضت راحت عند شادن : ماما تادن توفي ديايه بلد
شادن : عليج بالعافيه حبيبتي
اوراد : اممممم لديده
شادن : هههههههههههههههههههههه
اوراد : ماما تادن انا ابتي ابتي وااااااايد علتان ما قولي تدعدني من النوم
شادن : هههههههههههه انتي ما ييتي قعدتيني من النوم .. انا رحت المدرسه وانتي نايمه ..
يلا تعالي اقول لج الحين ,,,
شالتها شادن وغنت لها : تقعدني من النوم .. اشوفك وانسى الهموم
يصير شقد حلو اليوم .. اذا وجهك يصبحني
كل شي فيك معسول .. فديت الوجه والطول
صباح الخير اذا تقول .. احس صوتك يريحني
اوراد باستها : ثباح الخيييييييييييل
شادن : ههههههههههه الحين صرنا مسا الخير
,
<< اسيل >>
,
دخلت شايله قطوتها
اسيل : يمااااااااا انا يييييييييييييت
ام اسيل : وعليكم السلام ورحمة الله
اسيل : هع هع هع جنها نقزه امون
اليده : هلا ببنيتي
اسيل تحبها على راسها : هلا اديده
ام اسيل : استحي على ويهج حتى بنت خالج ام 5 سنين لي يات من الروضه تسلم
اسيل نزلت قطوتها ولمت امها وحبتها على خدودها وعلى راسها وخشمها
ام اسيل : اسول وعافية بس ذبحتيني
اسيل : ما عرفنا لج امون
ام اسيل : اسيل وعافيه استحي !!
اسيل باستهبال : وي وي وي يا حلو امون بنتي تينن ويا زين خدودها الحمر وشفايفها التوتي
وشعرها البريسم وعيونها المكحله واسنانها اللولي
اليده تضحك .. ام اسيل : بس يا بنت عقلي
دخل خال اسيل وسلم .. اسيل بصرخه : خاااااااااااااااااالي ابراهيييييييييييييييييييم
ابراهيم : بسم الله الرحمن الرحيم اشفيج تصرخين !!
اليده وام اسيل ردوا السلام
ام اسيل : هلا بو سلوى ما عليك من هالمطفوقه
اسيل : افاااااا انا مطفوقه ؟؟ خلاص انا زعلانه وصاعده داري
ام اسيل : يعني منتي متغديه ؟
اسيل : انا زعلانه عليج مو على الغدا .. يلا نجبوا يوعانه
اليده وام اسيل وابراهيم يضحكون
اسيل : لزهبتوا الغدا امون عطيني رنه على ما العب شوي مع درابيل
اليده : درابيلج لما هديتيها يتني وطردتها مادري وين راحت
اسيل : ليش اديده تطردينها .. مسكينه حبيبتي
اسيل بصوت عالي : اشوارياااااااا
الخادمه : نأم
اسيل : اشوه ان اشواريا مو ساكنه عندنا لشافتج تغير اسمها .. وين درابيل
الخامه : انا شوف الهين يروه فوق
اسيل : عطيتيها اكل
الخادمه : انا حطي اكل بس هو ما ياكل
ام اسيل : يمكن مسويه ريجيم
اسيل ضحكت
اليده : مو تنزلين وانتي مو غاسله ايدج وهدومج كلها شعر منها
اسيل : اديده قطوتي نظيفه
ام اسيل : يلا روحي بدلي وتعالي الكل وصل ويبي غدا .. بعدين لعبي مع قطوتج

*
,
<< عذوب >>
,
فترة الغدا والكل عند طاولة الطعام
ابو بدر : خالد دق علي اليوم ويسلم عليكم
ام خالد وعذوب : الله يسلمه
عذوب : ولهت عليه .. يبه شرايك نسافر له بعطلة الربيع
ضاري : احد يسافر لندن بهالوقت ! برد
ام خالد : عذوب سبقتني .. انا مفكره نسافر له بالعطله
عذوب : صج كل يوم نكلمه بس اشتقنا للقعده وياه
ابو بدر : يمكن ما اقدر اسافر معاكم .. اشوف جدولي اذا مو مرتبط بعمل راح اسافر وياكم
عذوب : يبا بس من الشغل ريح نفسك .. نبيك تسافر معانا وتغير جو
ابو بدر مبتسم : كاني انا كل ما تميت سافرت
ام خالد : انت تسافر لشغل يعني ما تريح نفسك الشغل لاحقك لاحقك ,, يا غانم العمر يخلص والشغل ما يخلص
عذوب : أي والله يبا .. بليز بليز نبيك تسافر ويانا
ابو بدر : ان شاء الله ما يصير خاطركم الا طيب وانا ما عندي اغلى منكم
ضاري : اذا بتسافرون انا مو وياكم .. مواعد الربع بنروح المخيم
ابو بدر باستهزاء : أي ربع هذول ؟ ربع الثانويه والا الجامعه ؟
ضاري بلامبالاه : كلهم
ابو بدر : جابل دروسك واطلع من رابعه
عذوب : هذا وانت بمدرسه خاصه
ضاري : انتي صكي حلجج محد كلمج
ابو بدر : ليش تصك حلجها ما قالت شي غلط .. كاهي ليلحين ما وصلت 18 سنه ووصلت لك ! نفس المرحله
انت وياها .. والا ناوي تروس هالسنه بعد ؟
ضاري يطالع اخته بغضب
ابو بدر : دوم مفشلني الله لا يبارك فيك .. كل محد سألني عنك انزل راسي مادري شرد عليه
ضاري : بدينا موال مال كل يوم .. شنو يبا انت ما عندك غيري تحط حرتك فيه
ابو بدر بصوت عالي : صج انك ما تستحي ومنت برجال .. تسنع يا ضاري لا تشوف وجهي الثاني
ام خالد : صلوا عالنبي .. هد يا غانم وضاري واعدني انه يشد حيله وينجح هالسنه
ابو بدر : الحق الجذاب على قولة المثل .. نشوف
قام ضاري معصب
ام خالد : اقعد يما كمل اكلك
ضاري : مالي نفس
مشى ضاري معصب ودعم باخوه : اوووووووف ما تشوف
بدر بهدوء : اتصدق لأ
ضاري : اووووووف
بدر : السلام عليكم
الكل : وعليكم السلام
قعد بدر عالقنفه وميل راسه لورا
ابو بدر : بدر
بدر : سم يبا
ابو بدر : ليش قعدت ؟ تعال تغدا
بدر : شبعان يبا متريق متأخر
عذوب راحت وقعدت يمه : بدر عندك شغل والا فاضي
بدر بابتسامه : رياضيات والا فيزيا
عذوب باسته على خده : ههههههههههه فاهمني اخوي
بدر يمسك يبهته : عذوب حبيبتي ييبيلي حبة بندول راسي يعورني وبعد ساعه تعالي افهمج اللي تبين
عذوب : اذا تعبان ارتاح اكلم شدون تشرح لي
بدر : لا مو تعبان مصدع شوي
ام خالد : بدر تبي اسوي لك ليمون ونعناع
بدر : لا خالتي تسلمين حبة بندول تكفي
ابو بدر : بدر ريح شوي ولا تنسى الاجتماع ورا المغرب
بدر : مو ناسي يبا ريح بالك
ابو بدر : انا بروح اقيل
ام خالد : نوم العوافي
,,,,,,,,,,,,,,,,,,,,,,,,,,
شادن بغرفتها بعد ما خلصت غسيل الصحون وتنظيف المطبخ ,,,
اوراد : ماما تادن
شادن : عيون ماما شادن
اوراد : بتي
شادن : منو عطاج بطاط ؟
اوراد : يما
شادن : وينها يما !! قاعده ؟
اوراد : يما نايم
شادن : ههههههه ورده قولي يما نايمه مو نايم
اوراد : هاااااات بتي لي
شادن : ورده مو قويه ما تعرف تفتح جيس بطاط علشان ما تشرب حليب
اوراد : انا كويه بتله
شادن : قويه بطله فجيه يلا
اوراد بدلع : تبعي يعوني
شادن : اسم الله على صبعج يا العياره .. يلا هاج روحي شوفي توم وجيري
اوراد : انا اتوف ثاون ثيب
شادن : تعالي نشوف شنو فيه ولا تزعجيني وراي واجبات ودراسه
بعد نص ساعه رن التليفون وشالته اوراد : الو منووو
اسيل : هلا اوراد شلونج
اوراد : تيبه
اسيل : شلون ماما
اوراد ببراءه : ماما تادن تتب
اسيل : اووووه نسيت .. شلون يما
اوراد : يما نايم
اسيل : يما نايم عيل اكيد بابا نايمه ... اقول حبيبتي عطيني شادن
اوراد بصوت عالي : ماما تادن الووو ... ماما تادن
شادن : انزين ورده لا تصرخين يما نايمه ,,,, الو
اسيل : هلا ماما تادن
شادن تضحك
اسيل : يبا اختج هاذي لا تفضحج .. تو الناس على ماما
شادن : فديتها حبيبة قلبي
اسيل : ما علينا ,, حليتي الرياضيات
شادن : توني خلصته وباديه بالفيزيا
اسيل : روحي ييبي دفترج نقليني اختبص مخي وانا الف المسأله يمين شمال كل مره يطلع
لي جواب غير وكل ما خربطت بالاجابه ادعي الزفت اللي فبالي
شادن : يعني مو منج من احمد اللي مخربط الاجابه
اسيل بصرخه : شادن وضربه ,, لا تييبين طاريه يا عله الماحي
شادن : وي وي وي استغفر الله جنيت عالريال الله يقطع بليسج اسول
اسيل : خلاص مابي شي منج عقب ما يبتي طاري هالمعفن سديتي نفسي اروح العب مع درابيل
احسن ,,,,,, وسكرت السماعه
شادن : هههههههه الله يهديج اسول
,,
,
بعيد عن العاصمه .. هناك باطراف المدينه حيث البيوت والدخل المحدود جدا جدا !
بيت عربي متهالك تعيش فيه نفوس غاب عنها الاب متناسيا ومتولعا بزهو الدنيا وملذاتها !!
* حنين .. بنت جميله يختفي جمالها تحت طبقات من قذارة الفقر ! آخر سنه بالثانويه
* مريم :13 سنه نحيله جدا ذات وجه شاحب وعيون غائره من شدة الفقر متفوقه دراسيا
* فايز .. سنتين لا يختلف عن خواته وجه صغير وجسم ضئيل واكثر ما يميزه شعره الكثيف ...
* ام فايز امرأه صابره تزوجت في سن صغيره وتحملت اطباع زوجها ومشاكله وبخله وصبرت على عيشتها
وحياتها معاه يتيمة الاب والام .. لا اهل ولا عزوه ! جيرانها هم كل حياتها !! ولولاهم كانوا ماتوا من الجوع
والبرد والظلم !
ابو فايز .. رجل لا يفكر الا بنفسه ! بخيل سكير ! لا يهتم بعياله ولا زوجته ! يتركهم بالايام ولا يسأل عنهم !
مايدري ان كانوا ماكلين ولا جواعه .. نايمين مرتاحين والا الخوف متلحفهم !
حنين بصوت عالي : مريوووووم وجع شهالصراخ !!
مريم : حنونه تعالي شوفي فوازو جنني
دخلت حنين عليهم الحمام : شهالازعاج والصراخ ؟!
فايز يطالع حنين ويضحك : نونه ثابون واااااادد
حنين : هههههههههههه يا حلو الصابون واللي قاعد بين الصابون ... اقول مريوم امي وينها ؟
مريم : راحت بيت ام طلال تاخذ منها شوية عيش
حنين : لا حول ولا قوة الا بالله .. لي متى واحنا على هالحال ! الله يسامحك يا ابوي ...
مريم : حنونه تعالي شيلي فايز تعبانه
شالت حنين فايز ونشفته ولبسته ملابسه
حنين : هلا يما جيتي
ام فايز تتنهد : جيت يما .. اختك وين ؟
مريم : كاني يما .. يما مريولي انشق وابي مريول جديد
ام فايز بحسره : ومنين اجيب لج مريول جديد !! خيطي مكان الشق
مريم اخنقتها العبره : يما الشق كبير ويبين لخيطته
حنين : هاتي انا اخيطه ماهو باحسن من مريولي كل مكان فيه غرزه ! صار خلية نحل مو مريول
ام فايز دمعت عينها ولاحظتها حنين
حنين : كفي دموعج يما هالحال تعودنا عليه
ام فايز : فايز يا قلبي صار له اسبوعين ما ذاق الحليب ولا الاكل الزين
حنين عورها قلبها .. تخيط مريول اختها وفكرها بهالعيشه اللي عايشينها ..
لا لبس ولا اكل ولا راحه ولا ابو يحس !!
مريم : يما الابله تبي دينار
ام فايز : وليش الدينار ؟!
مريم : حق المذكره
حنين : مريوم حبيبتي اخذي المذكره من صاحبتج وانا انقلها لج
مريم : وليش تتعبين وانتي تنقلينها ادفع الدينار وخلاص
ام فايز بحسره : ومنين الدينار ؟!! لو تنفضيني ما طاح مني 5 فلوس ! آآآآآه يا رب افرجها علينا يا كريم
مريم تمسح دموعها : انزين جوعانه
حنين : مريوم ترى طلباتج زايده اليوم !
مريم تبجي : شطلبت انا ! ما طلبت شي قلت جوعانه
حنين عطت اختها مريولها وقامت : بروح البقاله بجيب لنا شي ناكله
ام فايز : ومنين الفلوس !!
حنين : بقول له يسجلهم بالحساب على ما يتكرم بو فايز ويعطينا المقسوم
ام فايز : لا حول ولا قوة الا بالله
حنين : مريوم ديري بالج على فوازي لا يطلع بره
مريم : حنونه عفيه جيبي لي معاج كاكاو مشتهيه
حنين : من عيوني .. وانت فوازي ما تبي شي
ام فايز : جان قدرتي تجيبين له حليب جيبي
طلعت حنين للبقاله وبقلبها ضيقه .. مشت واستلموها الشباب كلام ومغازل !
الشاب 1 : هلا بالقمر
الشاب 2 : تامر شي يا حلو
حنين : استحوا على وجيهكم .. هذا وانا جارتكم !
ضحكوا الشباب لأن هالكلمه حافظينها من كثر ما تقولها ! وصلت حنين البقاله
حنين : السلام عليكم
كريم العامل : اوووووه انتي يجي ! سنو بأد سنو يبي
حنين : وجع شهالاستقبال جني جايه اطر منك
كريم : نأم تفزل برنسيس هنين
حنين ( الحمار يتطنز ) : عطني واحد حليب و3 بيبسي و4 بيضات وجيس خبز وجبن قلاص صغير
حط العامل الاغراض لها بالجيس وقبل لا يعطيها : وين فلوس ؟
حنين بلعت ريجها : بجم ؟
كريم : واحد دينار وخمسين فلس
حنين : عطني بعد 3 كاكاو
كريم : سنو كاكاو يبي ؟
حنين : كتكات
راح كريم يفتح علبة الكاكاو ودخلوا شباب البقاله وبدوا بكلامهم وطلباتهم وصوتهم العالي ,, حنين
بحركه سريعه وبغفله من كريم خذت دينارين من الصندوق ووقفت عند الباب !!
*
<< لا اله الا انت سبحانك اني كنت من الظالمين >>

غفران* ©؛°¨غرامي فعال ¨°؛©

الى محبين الروايات ....
ردودكم تسعدني ....
ودمتم بخير ....

أسيرهـ ©؛°¨غرامي مشارك¨°؛©

رووووعه البداايه
بس ماتوقعتها من حنونه بس حاسه انها بتسوي شي *ــ*
وبانتظارك بالبارت القادم
وياليت تخبريني متى موعد نزول البارتات
♥♥

_SY12 ©؛°¨غرامي مشارك¨°؛©

بدايه قممممممميله قدا
كمليها ولا تستسلمي وان شاء الله انا من متابعينك

غفران* ©؛°¨غرامي فعال ¨°؛©

اشكر كل من رد على الروايه
و آسفه للتاخير
و هذا بارت لعيونكم الحلوه

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1