غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 131
قديم(ـة) 31-12-2013, 12:57 PM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج


متابعة فصل الـ 63


وراحوا..دشت هبة وسلمت على ام فهد وسارة...
سارة:خير ايش تبين؟؟مو كفاية اللي سويتيه ولا تبين تسوين ازود من جذي؟؟؟
هبة:ادري انكم ماتبون تشوفوني..بس تكفون بس هالمرة..ابي اتكلم معاكم..تكفين يامرت عمي..الله يخليج..
بوفهد طلع من المجلس وبغى يروح فوق شافته هبة..وراحت له وهي تصيح...
هبة:تكفى ياعمي الله يخليك اسمعني ولو شوي..
بوفهد:اللي سمعته منج كفاية يابنت اخوي..
هبة:عمي الله يخليك..عطني فرصة اتكلم..
بوفهد:عطيناج فرص مب فرصة وحده..
هبة:ادري ياعمي..بس هالمرة ابيكم تسامحوني على كل اللي سويته..انا من عقب ماتزوجت فهد وعلومي ضاعت..ولاتوفقت بحياتي..
بوفهد:اكيد ماراح توفقين وانت نواياج كلها تبين تضرين غيرج..
الكل يطلع ويوقف ويسمعهم...
هبة:ادري..معاك حق..الدنيا هي اللي غرتني..وفلوسك ياعمي هي اللي خلتني اسوي هالشي بفهد وزوجته..بغيته لي انا وبس..علشان العب بالفلوس لعب حالي حالكم..
بوفهد:مااذكر ان يوم ابوج قصر عليكم بشي..واللي عنده ابوج خير كثييير..
هبة:صح..بس دوم ابوي كان يقولنا ابيكم تشتغلون معاي علشان نصير مثل مستوى عمكم وعياله..عمي تكفى..انا ماابي اتكلم عن اللي راح..بس انا ابي منكم تسامحوني على كل شي سويته في حقكم..تكفى سامحني ياعمي..فهد سامحني..انا غلطت بحقك واايد..وماتركت تتهنى بحياتك..تكفى سامحني..وانت ياوديمة..تكفيين سامحيني..انا والله ماادري اشلون سويت اللي سويته..وديمة انت بالذات ابيج تسامحيني..انا اخطيت بحقج وسويت شي كبير بحياتج انت ماتدرين عنه..
وديمة(تناظر فهد وهي مستغربة)
فهد:شي سويتيه بحياة وديمة!! شنو؟؟
هبة:انا بقول خلاص..لإن مابقى شي اخشه عنكم..خلاص كل شي انتهى..انا اللي طرشت حد يذبح خالد اخوج ياوديمة..علشان اتهمج بالقتل ويطلقج فهد والكل يبتعد عنج..
الكل مصدوم....
وديمة(ماقدرت تقاوم الكلام اللي سمعته)
هبة:واتفقت على هالشي ويازوجة خالد..من غير ماتدري زوجته..
سارة:انت ايش قاعدة تقولين؟؟
هبة:انا كنت انتظر اتصال من نوف بس علشان تقولي ان وديمة عندهم وابدأ بخطتي والقي الاتهام على وديمة..ويوم اتصلت فيني نوف ان وديمة بتزورهم فرتبت كل الامور علشان هالشي..
فهد:انت شنو من الاوادم؟؟؟
هبة:حاولت اكره مرت خالد بوديمة.. وصار اللي صار..
وديمة(ماقدرت تحمل):انت شنو من البشر؟!!..قولي لي انت شنو؟؟..دمرتي حياتي وخربتي كل شي بنيته علشان حقد وكره بقلبج؟!!!
هبة:ادري اني غلطانة..واللي سويته كبير..بس انا اعترف بغلطتي..سامحيني..
وديمة:عقب شنو..عقب ماعشت اصعب ايام عمري من غير اهلي..خليتي الكل يتخلى عني..عقب شنو اسامحج؟؟(ماتحملت وراحت تقعد لحقها فهد)
فهد:وديمة انت بخير؟
وديمة:انا بخير..
هبة:تكفين وديمة سامحيني..انا خطيت واعترفت..تكفوون كلكم سامحوني..انا خلاص انتهيت مابقى لي شي بهالدنيا اقدر اعيش علشانه..كل شي انتهى واختفى من حياتي..ماابي شي..بس ابي اموت وانا مرتاحة من هالدنيا..سامحوني..تكفون ماابي اطلع من هني الا وانتوا راضيين..
بوفهد:روحي يابنت اخوي..روحي..
هبة:عمي لاتطردني..تكفى سامحني..انا خلاص ضعت ضعت..
بوفهد:تحملي ضياعج بنفسج..لاتنتظرين حد يسامحج عقب اللي سويتيه فيهم..
هبة:عمي..
بوفهد:طلعي من بيتي..
هبة:مرت عمي..سارة..راكان..تكفون قولوا شي..
سارة:مالنا كلمة عقب ابوي..
هبة(تضايقت):انا استاهل..
طلعت من البيت...الكل التم حول وديمة...
سارة:وديمة حبيبتي تكلمي قولي شي..
وديمة:مافيني شي..(تقوم)..ابي ارد بيتي..
فهد:مثل ماتبين..موزة..موزة..
تيي المدبرة...
المدبرة:سير موزة تلعب بالحديقة..
فهد:قولي لها رادين البيت..
المدبرة:حاضر..
فهد:ياللا وديمة خلينا نمشي..
طلعوا من البيت...والباقي قعدوا...
ام فهد:مسكينة وديمة..الله يعينها على اللي سمعته..
راكان:توها حست بالذنب وجات تستسمح من الناس..عقب شنو؟ عقب مادمرت بيوت..
ام فهد:الله يعينها..
راكان:اشوفك ساكت يبه..
بوفهد(قام):بروح ارتاح بغرفتي..
وراحت وراه ام فهد..
راكان:ابوي اشفيه؟
سارة:اشفيه يعني..تبيه اشلون يكون عقب اللي سمعاه من بنت اخوه..
شمة:راكان ليش ماتكلم الدكتور يي ويشوف ابوك..مب احسن؟
سارة:اي صح راكان شمة معاها حق..ابوي اليوم كان تعبان..خل الدكتور يي ويشوفه..
راكان:اخاف بس مايرضى..
سارة:انت ماعليك منه..انت اتصل بالدكتور والباقي خله علي..
شمة:عمي اليوم كان تعبان وايد..ولازم نتطمن عليه..
راكان(يطلع تليفون):خلاص الحين بتصل..
يردون البيت ويقعدون...وتقعد موزة جنب امها...
موزة:ماما تعالي معاي الغرفة..
فهد:موزة حبيبتي خلي ماما..شنو تبين؟
موزة:ابي ابدل ملابسي..
فهد:بخلي سوسن تجي معاج..
موزة:ماابي..ابي ماما..
فهد:ماما شوي تعبانة..
وديمة:لا فهد انا بخير..(تقوم)..ياللا حبيبتي خلنا نروح فوق..
وراحت وياها..وتم فهد يحاتيها..راح مكتبه وتم يفكر بأشياء كثيرة..كلام ابوه وجية هبة وكلامها..وموقف وديمة من اللي صار..جات وديمة...
وديمة:فهد ابي اروح بيت اخوي خالد..
فهد:ليش؟
وديمة:ابي اتكلم شوي ويازوجته..
فهد:في شي مهم تبين تقولينه؟
وديمة:اي..
فهد:وخالد؟
وديمة:خالد مو في البيت..
فهد(قام):انزين ياللا اوصلج..
وديمة:وموزة؟
فهد:بخليها معاي بالسيارة..احنا بندور لين انت ماتخلصين..
دخلت وديمة بيت خالد..وجات نوف ومعاها عصير....
وديمة:نوف ابي اكلمج بسالفة بس ابيها بيني وبينج..ماابي خالد يدري عنها..بس الاهم ابيج تصارحيني..وصدقيني مابزعل منج..
نوف:خير وديمة..خليتني احاتي..
وديمة:شالي كان بينج وبين هبة بنت عم فهد؟
نوف(سكتت ثواني):انت سمعتي شي؟
وديمة:انا سمعت اشياء..بس ابي اسمع منج..تكفين قولي لي الصج..
نوف:بصراحة ياوديمة انا كنت ابي اكلمج بهالسالفة من قبل بس كنت مترددة وخايفة من ردة فعلج..خفت تزعلين وتاخذين مني موقف..
وديمة:قولي..ابي اسمع كل شي..
نوف:ومابتزعلين مني؟
وديمة:لا..بس تكلمي..
نوف:انا تعرفت على هبة عقب ماتزوجت..وصرنا ربع وصارت تزورني دوم وبينا تليفونات ومسجات..وكانت تحاول تكرهني فيج..وتبين لي انج انسانة سيئة وانج ماتستاهلين الواحد يكون علاقة وياج..ومثل ماانت تذكرين اشلون كانت علاقتي وياج..وعقب ماصار اللي صار في خالد كانت هبة تقولي تمي على رايج بإتهامج لوديمة..كنت افكر وايد اني اسحب اتهامي بس كلام هبة خلاني اصر على رايي..كان صعب علي..بس عقب صار اللي صار..
وديمة:وتعرفين من اللي حاول قتل خالد؟
نوف:لا..بس سمعت من خالد ان المجرم صادوه..بس طلع وازيينه ناس..ليش تسألين؟
وديمة(تضايقت):لا ولاشي..
نوف:تكفين وديمة لاتزعلين مني..
وديمة:لاتفكرين يانوف..انا مب زعلانة..بس تضايقت على اللي صار..انا بس حبيت اتأكد من الكلام اللي سمعته..
نوف:وارتحتي؟
وديمة:اي الحمدلله..(تطلع تليفونها)......مرحبا فهد....تعال...اي خلصت......اوكي مع السلامة..
نوف:وين تو الناس..
وديمة:لا انا تعبانة شوي وابي ارد البيت..
نوف:سلامتج..
وديمة:الله يسلمج..
نوف:وديمة حبيبتي لاتزعلين مني..
وديمة:نوف..(تبتسم لها)..ترى انا مب زعلانة منج..لإن الماضي يعتبر ماضي..
نوف:انزين ماقلتي لي حد قالج شي؟
وديمة:اي سمعت كلام وعلشان جي جيت اتأكد منج..
نوف:من من سمعتي؟
وديمة:مو مهم من من..(يرن تليفونها)..هذا فهد..(تقوم)..ياللا انا ماشية..وأشوفج عن قريب ان شاء الله..
نوف:انزين قعدي..
وديمة:لا حبيبتي مااقدر..لازم ارد البيت..(تسلم عليها)..ياللا مع السلامة..
ركبت السيارة...
موزة:ماما شوفي بابا شنو شرى لي..
وديمة:الله وااايد حلو..
فهد:هاا بشري ايش صار؟
وديمة:طلع كلامها صح..
فهد:صج؟
وديمة:اي..ياللا سوق قبل ليرد خالد البيت..
فهد(وهو يسوق):وشالي صار؟
وديمة:طلع كلام هبة صح..بس الشي اللي ماتعرفه نوف ان هبة هي اللي كانت لها يد بقتل خالد..
فهد:وهي درت بهالشي؟
وديمة:لا ماقلت لها شي..
فهد:وشنهي النتيجة؟
وديمة:ولاشي..
فهد:عيل شنو كان هدفج من روحتج عند مرت خالد؟
وديمة:رحت أتأكد علشان يرتاح قلبي..
فهد:والحين ارتاح قلبج؟
وديمة:اي..
فهد:وكلام هبة؟
وديمة:هالشي انتهى صار له سنين..واعتراف هبة في هالوقت مايغير شي يافهد..تظل هي هبة اللي تعرفت عليها من بداية زواجنا..يعني صورتها مابتغير بحياتي..
فهد:تعجبيني ياوديمة..انت رووووعة..
وديمة:تعلمنا منك يااستاذي..
فهد:فديت تلميذتي..
يدخلون البيت...ويحطون الاغراض على الطاولة...
شيماء:تكفى تركي خذ سارونة وبدل ملابسها وحفاضتها..لين ماادخل الاغراض بالمطبخ..
تركي:نعم؟!!..من يغير سارة؟
شيماء:انت..
تركي:لاحبيبتي..انا بدخل الاغراض وانت غيري سارة..
شيماء:تركي!
تركي:لا تركي ولا هندي..قومي انت غيري البنية..
شيماء:تركي انت من صجك؟
تركي:اي من صجي..انا مااعرف بشغلات الياهال..
شيماء:تركي عاد لاتمصخها..
تركي:لا عاد ولاثمود..(يقعد)..صدقيني انا مالي بهالشغلات..
شيماء:اي انتوا الرياييل بس تبون الياهال نظاف ويضحكون لكم..ومن يوصخ نفسه ولا يصيح تقطونه علينا..انزين ماعليه ياتركي..
تركي:زعلتي؟
شيماء:لا ابد..اصلا انا انسانة ماعندي احساس..وماازعل..خذ راحتك بالحجي..(ومشت عنه)
تركي:شيماء..(يرن تليفونه)
وراحت شيماء تغير سارة..وعقب حاولت ترقدها..وعقب دشت المطبخ تدخل الاغراض..جاها تركي...
تركي:بعض الناس زعلانين..
شيماء:قلعتهم بعض الناس..ليش اول مرة يزعلون؟!
تركي:أفااا بس..ليش تقولين عنهم قلعتهم..ترى ماارضى..
شيماء:اي بس هذا اللي انت فالح فيه..تزعلني وعقب تجي تقولي هالكلام..على بالك انا قوطي..ماعندي مخ ولا قلب؟
تركي:انت ملكة الجمال..محد بهالكون مثلج..
شيماء:اي بس هذا اللي تعرفه..وخر بس..
تركي:شيماء عاد..
شيماء:عاد ولا ثمود..وخر عن دربي..
تركي:اشوف تعلمتي مني هالاسلوب..
شيماء:اي انت ماشاء الله مدرسة بالاشياء..
تركي:شيماء!
شيماء:شيماء ولا شمة..تركي تكفى وخر عني..ترى صج صج مالي خلقك..لإن لو صار شي بالياهل اللي في بطني انت تحمل المسؤولية..زين..
تركي:شيوم عاد لاتزعلين مني..ترى والله مو قصدي..
شيماء:لاتحاول..انا محاربتك لين باجر..
تركي:أفااا..شوي لين باجر خليها اسبوع مب احسن؟
شيماء(تطالعه بنظرة):اي بلا معاك حق يبيله شهر بعد مب اسبوع..
تركي(يضحك):مااسرع ماتزعلين..يااخي احبج واحب العب على اعصابج..
شيماء:ياسلالام..انت تحب تلعب على احسابي؟؟
تركي:ياللا عاد انسي..بعدين انت تعرفيني زين مالي بشغل الياهال..
شيماء:عيل خلاص..انسى ان لك بنت اسمها سارة..ولاتلعب وياها..وزين قلت لي علشان مااحمل بعد..اكتفي بهالاثنين..
تركي:نعم؟!!..ايش هالكلام؟؟
شيماء:اللي سمعته..
تركي:ادري هالكلام مو من قلبج..
شيماء:لا حبيبي من قلبي..ومن اعماق قلبي بعد..
تركي(سو عمره زعلان وطلع من المطبخ)
شيماء:كللش يعني زعل..
وكملت شغلها...وكانت ترتب وعقب طلعت من المطبخ وقعدت بالصالة شوي..عرفت ان تركي زعل منها..قامت ودشت الغرفة..واول ماافتحت الباب الا الورد يتناثر عليها ويغني لها...
شيماء(مصدومة من اللي تشوفه ومستغربة)
تركي:كل عام وانت بخير حبيبتي..اليوم يوم ميلادج..
شيماء:كل هذا علشان يوم ميلادي؟
تركي:اي نعم..كم شيماء عندي؟
شيماء:ومن متى وانت تزهب بهالغرفة ومسوي كل هذا؟
الصبح...الساعة 6 ونص...تقوم وديمة وتروح الحمام تسبح..تطلع وتشوف فهد راقد...تقعد جنبه وتقعده..
وديمة:فهد..فهد حبيبي قوم..
فهد(يفتح عيونه):صباح الخير..
وديمة:صباح الخيرات..قوم حبيبي علشان يمديك تلعب رياضة وتزهب للدوام..
فهد:ان شاء الله..بس الساعة جم؟
وديمة:الساعة 7 الا عشر..
فهد(يقوم)
وقامت وديمة تمشط شعرها جدام التسريحة..وبدت تزهب عمرها للدوام بنفس الوقت كان فهد يلعب رياضة...لبست بنطلون أسود وبلوزة حرير بيج وحزام عريض اسود وذهب ابيض..ورفعت شعرها..ولبست جوتي فلات اسود..تمكيجت على الخفيف وراحت غرفة موزة...تروح موزة وتحضنها وتبوسها...
موزة:قود مورنينغ مامي..
وديمة:قود مورنينغ فديتج..جاهزة؟
موزة:يس..
وديمة:ياللا خلنا نروح نتريق..
موزة:بابا قام؟
وديمة:بابا توه راح يسبح..ياللا ننزل..
كانوا ينتظرون فهد ينزل..فهد عقب ماسبح وقف جدام المنظرة يترتب ويكشخ كعادته..لبس الازرة..خذ القلم وحطاه بمخباته..وحط بوكه بمخباته ويالمفاتيح..وحط نظارته عند قلمه..ولبس ساعته..وتعطر ونزل تحت...يشوف موزة قاعدة على طاولة الاكل..ووديمة تمشي رايحة صوب الطاولة...
فهد:قمر اللي تمشي..والله قمر..
وديمة(تلف تشوفه):حلوة؟
فهد:اكيد حلوة..واللي يقول مب حلوة ماعنده نظر..
موزة(تروح تحب ابوها):صباح الخير بابا..
فهد:صباح الورد بابا..اشلون حبيبة ابوها؟
موزة:زينة..
فهد:ياللا خلنا نتريق..
وقعدوا يتريقون....
فهد:على فكرة انت كاشخه زيادة عن اللزوم..
وديمة:انا؟ّّ...انا دوم البس جي واكشخ بهالطريقة..
فهد:ادري..بس خففي شوي يوم انج رايحة الشغل..اخاف بس حد يشوفج ولاشي..
وديمة:ايش دعوة عاد فهد..انا وين رايحة..وين ماابروح بيكونون حريم..بعدين انا عباتي علي وين مااروح..
فهد:حتى لو انا ماابي حد يشوفج بهالحلا كله وانحسد عليه..
وديمة:اوكي بسوي اللي تبيه..بس على شرط..
فهد:شنو؟
وديمة:هم انت تخفف هالكشخة شوي..اخاف بس وحده من هالحريم يشوفونك..
فهد(يبتسم):يعني شنو وحده بوحده؟
وديمة:لا..بس هم انا اغار عليك..اخاف بس وحده تخطفك بنظرة ولا شي..
فهد(يضحك):حلوة هذي تخطفني..لاتحاتين..من يتجرأ يخطفني منج..انت بتخلينهم؟
وديمة:مستحيل..بيكون آخر يوم بحياتها..
فهد:آخر يوم بحياتها!!..لا معناته انج تحبيني وايد..
وديمة(تطالعه بنظرة):ليش عندك شك؟
فهد:لا طبعا..بس يعني زيادة اطمئنان..(يقوم)..ياللا حبيبة ابوها خلينا نروح علشان مانتأخر..
موزة:اوكي..
فهد:اليوم آخر يوم دوام لج ياموزة وترتاحين من الروحة كل يوم..
يروحون بس فهد يرد مرة ثانية ويقرب من وديمة...
فهد:ماابي اوصيج..تديرين بالج على صحتج..سمعتي صحتج..
وديمة(تبتسم):ان شااااء الله..
فهد:ماابي حركة زيادة مني ولا مني..وماتمشين وايد..اللي تبينه ييبونه لج..
وديمة:ان شاء الله..
فهد:ماتشربين كوفي ولا نسكافيه ولا شي من هالشغلات..
وديمة:ان شاء الله..
فهد:ابي بس اشياء طبيعية..تقوين جسمج فيهم..
وديمة:ان شاء الله..
فهد:وبعد اذا حسيتي عمرج تعبانة تردين البيت على طول من غير تفكير..
وديمة:من عيوني..
فهد:اذا تذكرت شي بتصل فيج..
وديمة:كل هذا خوف علي؟
فهد:واكثر من جذي..
وديمة:الله لايحرمني هالقلب الطيب..
فهد:ولايحرمني هالجمال..ياللا مع السلامة..
في الدوام تدخل سارة مكتب وديمة وتسلم عليها...
سارة:اشلونها مرت اخوي؟
وديمة:بخير الحمدلله..انت اشلونج؟
سارة:تمام الحمدلله..واشلون اخوي؟
وديمة:بخير..
يرن تليفون سارة...
سارة:ياسبحان الله تونا بسيرتك..
فهد:ايش عندكم تحجون عني؟
سارة:ولاشي كنت أسأل زوجتك المصون عنك..
فهد:وايش قالت لج عني؟
سارة:ليحين ماتكلمت انت اتصلت..
فهد:اخبارج؟
سارة:الحمدلله بخير..أخبارك؟
فهد:خلي زوجتي تقولج اخباري..ابي اقولج شي..
سارة:قول..
فهد:ديري بالج على وديمة..تراها حامل واخاف تسوي شي ولاشي..انت تعرفين بحركاتها..
سارة:أي فهمت عليك..
فهد:انزين ماابي اوصيج..
سارة:ان شاء الله من عيوني..
فهد:شكرا..ياللا عيل سلمي عليها وسووا شغلكم..مع السلامة..
سارة:مع السلامة..يسلم عليج..
وديمة:الله يسلمه..
سارة:ماقلت لي اخبار ريلج؟
وديمة:توج تكلمينه..
سارة:يقول زوجتي بتقولج..
وديمة:بخير الحمدلله..
سارة:نبدأ شغل؟
وديمة:أي..
سارة:حلو..وياي خمس مشاريع..خلينا ندرس مشروع مشروع..
وديمة:ياللا..
تنزل شمة تحت وتسلم على ام فهد وتقعد وياها....
ام فهد:روحي يمه تريقي..
شمة:ان شاء الله..
ام فهد:لازم تاكلين عدل علشان تقوين..
شمة:ان شاء الله عمتي..
ام فهد:يااارب يتمم لج على خير ويقومج بالسلامة..
شمة:آآآمين..(تقوم)..بروح اتريق..
ام فهد:بالعافية حبيبتي..
يرن تليفون البيت.....
ام فهد:السلام عليكم.....هلا والله....بخير انت اشلونج؟......شنو؟......بالمبارك بالمبارك.......وايش جابت؟......يتربى بعزكم ان شاء الله.....اي الحين جايتج....مع السلامة..(تقوم وتروح عند شمة)...شمة يمه انا رايحة المستشفى عند اختي كاملة بنتها ربت..
شمة:مبروكين وايش جابت؟
ام فهد:الله يبارك فيج عقبالج يارب..جابت ولد..
شمة:يتربى بعزهم..
ام فهد:انزين حبيبتي انا رايحة..وان شاء الله العصر نروح جميع عندهم..
شمة:ان شاء الله..
ام فهد:اذا بغيتي شي ولا صار شي اتصلي فيني..
شمة:ان شاء الله..
وكملت ريوقها..وعقب ماخلصت راحت فوق بدارها واتصلت في شيماء وتموا يسولفون.....
شمة:انزين وايش صار عقب؟
شيماء:ولاشي تمينا ناكل ونحلي بهالكيك..استانسنا..ماتوقعت هالمفاجأة..
شمة:يحليله تركي..دوم ازقرد هالريال وعنده ذوق..
شيماء:أي بلا..
شمة:ليش اول مرة يسويها لج؟
شيماء:لا مب اول مرة..بس كل مرة يسويها بطريقة..بالاول يستفزني وعقب يفاجأني..
شمة(تضحك):يحليله هالتركي..ترى لايقين على بعض..كل واحد فيكم يكمل الثاني..
شيماء:مقبولة منج..قولي لي اخبارج ويالحمال؟
شمة:زين الحمدلله..بس ان شاء الله يكتمل واقوم بالسلامة..
شيماء:ان شاء الله..قولي لي في أي شهر وصلتي؟
شمة:وصلت الرابع..
شيماء:حلووو..انزين ماقالوا لج اذا بنت او ولد؟
شمة:لا..تو الناس..وانت اشلونج ويالحمال؟
شيماء:نمشي حالنا..مرات اتعب وايد وتجيني الالام بالظهر..وتركي حالف علي مااطبخ ومااسوي شي من شغل البيت..
شمة:زين يسوي فيج..دام عندج خدامة ليش تعبين روحج بالطباخ وشغل البيت..
شيماء:شسوي تعودت على الطبخ..





تابعوني بأحداث أخيرة بآخر فصلين..

أحداث ممتعة مشوقة



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 132
قديم(ـة) 31-12-2013, 12:58 PM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج


" الفصل الـ 64 والأخير "

الجزئية الاولى





قررت وديمة ترد البيت بدري من الشغل..بس موزة ماكانت معاها..كانت عند جدتها ام فهد..دشت وديمة البيت..وسلمت عليها المدبرة وراحت الغرفة...فصخت عبايتها وقعدت مجابل المنظرة..حصلت بطاقة على التسريحة...فتحتها...
إلى زوجتي وحبيبتي..عندي لج هدية..تدرين بمناسبة شنو؟...مب قايلج الحين..روحي شوفيها بالدرج الاول صوبي..
هدت وديمة اللي بيدها وراحت..فتحت الدرج حصلت بطاقة...فتحتها....
تبين الهدية؟..امم مب هني..روحي مكتبي بتحصلينها على المكتب..
وراحت بسرعة المكتب..فتحت الليتات وحصلت بطاقة على المكتب..
هلا والله بحبي..
عسى بس ماتعبتي؟...امم اكيد تبين الهدية...مب هني..روحي المجلس القعدة الذهبية بتحصلين شي على الكنب..
ونزلت تحت وراحت المجلس...شافت بطاقة على الكنب...قعدت وفتحت تقراها....
مرحبا ملاييين..حيالله زوجتي..اكيد تبين الهديه..بس صدقيني مب في هالمكان..
وديمة:فهد حرام عليك لعبت بأعصابي..
روحي المسبح بتحصلين على طاولة الكنب شي..بس هااا ديري بالج على عمرج مب تركضين وتزحلقين..
راحت بسرعة المسبح..وشافت بطاقة كبيرة..قالت اكيد هذي هي النهاية...قعدت وهي تاخذ نفسها فتحت البطاقة...
اتمنى انج مشيتي بشويش وانت جايه لين هني..بس صدقيني ترى الهدية مب هني..
وديمة:يالله عليك يافهد..ذبحت وديمة..
روحي غرفتنا...وفتحي كبت الملابس اللي بالنص..في الدرج داخل بتحصلين شي..
راحت الغرفة..وهي تركض...دشت داخل وفتحت الكبت والدرج..حصلت صندوق صغير...
وديمة:واخيرا..مابغيت..(فتحت الصندوق..حصلت ورقة..مكتوب فيها...ياسلام على الحب اللي خلاج توصلين لهالمكان..بس ترى الهدية مب هني..)لا شكلي الليلة بسوي فيه شي..
نزلي تحت..في الحديقة..عند المرجيحة بتحصلين الهدية..
لبست شيلتها ونزلت تحت وراحت الحديقة...شافت فهد قاعد على المرجيحة وهو مبتسم...وهي يالله تاخذ نفسها تقعد على الارض وتقط البطايق على الارض..
فهد:اشفيج؟
وديمة:أسأل زوجي العزيز..
فهد(فيه الضحكة):وايش سوى فيج زوجج العزيز؟
وديمة:عندك اياه أسأله..لو صار فيني شي الليلة منه..
فهد(يقوم ويقعد عندها):بسم الله عليج..ان شاء الله عدوينج..
وديمة:حرام عليك مشيتني البيت كله..احس قلبي بيوقف..
فهد(يضحك):بغيت اتعبج اكثر بس خفت عليج..قلت خلني ارحم بالقوارير..
وديمة:أي زين جاتك الرحمة..ولا ماكنت بتحصل وديمة..
فهد:ايش هالكلام..قومي خلينا نقعد على المرجيحة..
وديمة:ماابي ماني قايمة..
فهد:ليش؟
وديمة:الحين هذي هي النهاية؟
فهد(يضحك):لا..
وديمة(قامت وقعدت جنبه):ياللا قول النهاية..
فهد(قام وعطاها صندوق كبير):تفضلي..
قامت وديمة وفتحت الصندوق...حصلت فيه طقم الماس..وبطاقة مكتوب فيها...احبك للأبد..
وديمة(ابتسمت):شالمناسبة؟
فهد:قعدي جنبي علشان اقولج المناسبة..
وديمة:قول..
فهد:المناسبة لأني احبج..اللي يحب ياوديمة ماينتظر مناسبة علشان يهدي حبيبه..الحبيب يهدي حبيبته بأي يوم واي وقت ومن غير مناسبة..صح ولا لا؟
وديمة:الا بلا صح..قوم نروح بيت ابوك اكيد ينتظرونا..
كل واحد يحاول ينجز اشياء بحياته..والايام تمر بسرعة وتصير تغييرات كثيرة بحياة الكثيرين...علاقة خالد بزوجته نوف صارت احسن من كل مرة..تغيير من شخصية نوف غيرت حياتهم للأفضل..وبنى بينهم جسر محبة ومودة..عبدالله كل ماله ويشعر بسعادة اكثر من اللي قبلها..وجود امه بحياته ورضاها..سعادته مع زوجته..عياله..واخته اللي قريب بتزوج..والترقية اللي يحصلها بين فترة وفترة من دعاوي امه ورضاها عليه..أحمد وحصة..الثنائي اللي كانت مشاعرهم متبادلة من سنين طويلة..وادفنوها لين ماكل واحد فيهم حصل الثاني بالصدفة..حطوا يد بيد علشان يعيشون احسن حياة بوجود عيالهم بينهم..يوسف يتزوج ويسافر مع زوجته شهر العسل..يقضون اول ايام حياتهم بسفرة تجمع قلوبهم وتزود محبتهم لبعض..حمد يترقب ليلة العرس بفارغ الصبر..مستانس من اختياره ويبي الايام تركض علشان يعرس ويعيش بالسعادة اللي يتنظرها..ونجلاء جاها بنت سموها حصة على ام حمدان..وهذا كان اول طفل لهم...شيماء وشمة الثنائي المرح...حوامل وكل وحده منهم تنتظر تولد بالسلامة..لكن انتظار شيماء للبيبي يختلف تماما عن انتظار شمة للبيبي....والموعد قرب.....
الساعة 2 ونص بالليل يدخلون....
ام سلمان:الحمدلله هذا حمد وتزوج..
بوسلمان:البيت قاعد يفضى علينا يامنيرة..
ام سلمان:الله يهنيهم..
بوسلمان:آآآمين..
ام سلمان:حتى مريم فديتها كلها شهر وبتروح بيت ريلها..وبتبقى عائشة..
بوسلمان:الحمدلله ان حمد تغير وغيّر حياته للأحسن..وعقل كمل دراسته واشتغل وتزوج..
ام سلمان:الحمدلله..مرينا بأيام صعبة..من وديمة اللي كانت تعبنا من مرضها..وحمد بطيشه..
بوسلمان:الحين الحمدلله كل واحد راح بيته وبيكون مسئول عن نفسه..
في الفندق....
حمد:تكفين حسنة..قولي شي..لاتظلين ساكته..
حسنة(مستحية وساكته)
حمد:لو ادري اني بشوف كل هالحلا جدامي جان عرسنا من زمان وماخليتج تأخرينا..ياحظ حمد والله..انزين انا جي بقعد اتحجى وياروحي؟؟..حسنة؟؟ وينج؟؟
حسنة:معاك..
حمد:اشك انج وياي..انزين قولي شي..
حسنة:شقول؟
حمد:قولي لي ايش رايج فيني؟؟
حسنة:......
حمد:انزين انا بقوم وبروح اقعد هناك لين ماتخلصين وتغيرين ملابسج..بس لاتطولين علشان نتعشى..قريب والاكل بيوصلنا..
حسنة:ان شاء الله..
صارت الساعة 3وربع...يرن تليفون فارس...يقوم من النوم.....
فارس:آلوو....وعليكم السلام هلا راكان..
راكان:اسمح لي يابوراشد قعدتك هالحزة..
فارس:لا عادي..قول خير؟
راكان:شمة تعبانة وايد واحنا الحين بالمستشفى وهي تبي امها..فقلت اكلمك علشان تجيبونها..
فارس:اشفيها شمة؟؟
راكان:ماادري..هي الحين داخل وامي وياها..
فارس:ياللا احنا جايين..مع السلامة..
شيخة:فارس ايش صاير؟؟
فارس:ماادري..(يقوم)..راكان يقول شمة تعبانة..بروح اقعد امي..
في الانتظار راكان قاعد وياابوه...ينتظرون ام فهد تيي وتطمنهم....
راكان:يبه جنهم طولوا..
بوفهد:يابوك اقعد..ان شاء الله هي بخير..الحين امك بتيي وبتطمنا..
يرن تليفون راكان...
راكان:يمه وينج؟...ياللا جايين..
بوفهد:شتقول؟
راكان:هي برع تقول تعالوا..
وراحوا لها....
راكان:يمه طمنيني..
ام فهد:زوجتك شوي تعبانة وبيرقدونها بالمستشفى..
راكان:ليش؟؟
ام فهد:لرحنا فوق بقولك ليش..
راكان:وهي وين؟
ام فهد:ودوها فوق..امشوا خلنا نروح..
وراحوا غرفة شمة حصلوها راقدة وهي تعبانة....راكان قعد جنبها وهو يمسح على راسها....
شمة:راكان تطمن ان شاء الله بكون بخير..
راكان:ابي اعرف السالفة ليش مرقدينج؟
ام فهد:لإن ياطويل العمر زوجتك حامل بتوم..وواحد منهم شوي تعبان وتعب زوجتك..
بوفهد:ماشاء الله توم!!
ام فهد:أي..
راكان:هااا؟!!
ام فهد:اشفيك تطالعني جذي..اللي يقول انك ماكنت تعرف انها حامل بتوم؟
راكان:بلا كنت اعرف..
ام فهد:ويوم انك تعرف ايش له ماتهتم فيها..انت تدري ان اللي حامل بتوم يبيلها مجابل اكثر من اللي في بطنها واحد..
شمة:سمحي لي عمتي لإن ماقلنا لكم..انا حبيت نسويها مفاجأة للكل..
ام فهد(تبتسم لها):فديتج شمة انا مب زعلانة ولاشي..بالعكس الا مستانسة بهالخبر والمفاجأة الحلوة..بس ابي العب شوي عليه..طلع مب هين يخش عن امه..
يرن تليفون راكان...
راكان:هلا فارس...لا والله رقدوها بالمستشفى....اي...تعالوا فوق..
فارس:بأي غرفة؟.....اوكي..مع السلامة..
ام راشد:شيقول؟
فارس:يقول بيرقدونها بالمستشفى..
ام راشد:ليش؟؟
فارس:ماادري..
الجوهرة:تطمني عمتي ان شاء الله شمة بتكون بخير..
بالغرفة عند شمة...
بوفهد(يشوف الساعة):ياللا انا رايح اصلي الفجر..قوم معاي راكان..
راكان:ان شاء الله يبه..تبون شي؟
شمة:انا ابي اغراضي..
راكان:من عيوني..نصلي وبروح البيت اييب اغراضج..
وراحوا...ودشوا فارس وام راشد والجوهرة.....
ام راشد:بسم الله عليج يمه ايش عندهم مرقدينج هالحزة؟؟تو الناس على الولادة..
ام فهد(تبتسم):مبروك ياام راشد..شمة حامل بتوم..
ام راشد:توم؟!!
ام فهد:أي..علشان جذي تعبت ورقدوها..
ام راشد:حامل بتوم وماتحجين؟؟
شمة:بغيت اسويها مفاجأة..
ام راشد:ايش هالمفاجأة..انت ماتدرين ان الوحده يوم تكون حامل لازم في من يجابلها ولا بعد توم!
الجوهرة:الف مبروك ان شاء الله تقومين بالسلامة وينورون الكتاكيت..
شمة:ان شاء الله..
فارس:انزين والدكاترة ماقالوا ليش مرقدينها؟
ام فهد:بلا قالت الدكتورة ان واحد منهم تعبان شوي علشان جذي يبون يكون تحت الملاحظة..
فارس:سلامتج ياشمة..
شمة:الله يسلمك..
فارس:انا بروح اصلي..
وطلع فارس...
ام راشد:وبس ماقالوا شي ثاني؟
ام فهد:قالت لها الدكتورة اذا لين باجر الظهر ماتحسن وضع البيبي بيولدونها قيصري..
ام راشد:ان شاء الله ماتحتاجينها..
الساعة 8 ونص تقوم وديمة من النوم ماتحصل فهد...تقوم وتغسل وجهها وتتعدل..وتنزل تحت...تحصل فهد قاعد يشرب قهوته المعتادة ويقرأ الجريدة....
وديمة:صباح الخير..
فهد:هلا والله صباح النور..
وديمة:من متى قاعد؟
فهد:من ساعة تقريبا..
وديمة:وليش ماقعدتني..
فهد:قلت اكيد تعبانة من لوية امس..ومحتاجة تنامين..
وديمة(تقعد):يعني تريقت؟
فهد:وانا اقدر اتريق من غيرج؟
وديمة(تبتسم له)
فهد:ماتبين تروحين عند المعاريس؟
وديمة(تشوف الساعة):لا..لإنهم عقب شوي بيروحون المطار..
فهد:الله يهنيهم..مو على اساس بيسافرون الاسبوع الجاي..
وديمة:حمد من وناسته قال ابي اتم في فرنسا ويازوجتي العزيزة ثلاث اسابيع..وعلى حظه حصل طيارة اليوم..
فهد:الله يهني سعيد بسعيدة..
وديمة(تقوم):بروح اشوف الريوق..
يرن تليفون البيت يرد فهد...
فهد:السلام عليكم..
ام فهد:وعليكم السلام..اشلونك فهد؟
فهد:بخير يمه انت اشلونج؟
ام فهد:الحمدلله..
فهد:اخبار ابوي؟
ام فهد:بخير..زوجتك قاعدة؟
فهد:أي..تبينها؟
ام فهد:أي..
فهد:ان شاء الله..(ينادي)..وديمة..ياوديمة..
وديمة(من فوق راسه):انا جنبك حياتي..آمرني..
فهد:امي تبيج..
وديمة:امك!..(تاخذ السماعة وتقعد)..السلام عليكم..
ام فهد:وعليكم السلام..اشلونج ؟
وديمة:بخير عمتي انت اشلونج؟
ام فهد:الحمدلله بخير..سمعي يمه وديمة ترى شمة تعبت علينا امس ووديناها المستشفى..
وديمة:سلامات اشفيها؟
ام فهد:طلعت حامل بتوم..
وديمة:والله؟؟..ماشاء الله..انزين وايش صار؟
ام فهد:واحد منهم تعبان شوي ورقدوها علشان تكون تحت الملاحظة..وقالوا لها اذا ماتحسن صحته بيضطرون يولدونها اليوم..
وديمة:وعليه تو الناس..
ام فهد:أي تو الناس..انا قلت اخبرج..
وديمة:تسلمين عمتي زين خبرتيني..وانت الحين وينج؟
ام فهد:انا بالبيت..عقب صلاة الفجر ردينا البيت نريح وناخذ لها اغراض والحين بنرد لها مرة ثانية..لإن اتصلت الجوهرة وتقول شمة تعبانة شوي..
وديمة:ماتشوف شر..انا ان شاء الله جايتكم...ان شاء الله مع السلامة..
فهد:ايش صاير؟
وديمة:قوم نتريق وبقولك..
فهد:انزين بالاول قولي لي وين موزة؟
وديمة:الحين بتنزل..
في المستشفى....
راكان(واقف جنبها وهو ماسك يدها ويمسح على راسها)
شمة(تصيح)
راكان:بس حبيبتي..تكفين لاتصيحين..
شمة:خايفة ياراكان..وتعبانة..
راكان:ياللا الحين الدكتورة بتيي وبتطمنا عليج..لاتحاتين انا وياج..
الجوهرة:ان شاء الله خير لاتخافين..
تيي الدكتورة ومعاها ممرضتين....
الدكتورة:لو سمحتوا ممكن تطلعون..
طلع راكان ويالجوهرة برع الغرفة....وجات ام راشد ومعاها شيخة وشيماء....
ام راشد:يمه طمنونا..
الجوهرة:الدكتورة عندها داخل..
شيماء:وهي تعبانة وايد؟
الجوهرة:شوي..تحس بالالام..
شيماء:حبيبتي شمة..
ام راشد:من متى تعبانة؟
الجوهرة:يعني من الصبح تقريبا..
شيخة:تطمني عمتي ان شاء الله شمة بتقوم بالسلامة ومافيها الا كل خير..
جى راشد وفارس وتميم...وجات ام فهد وبوفهد...والكل ينتظر الدكتورة تطلع....واول ماطلعت....الكل التم حولها....
الدكتورة:وين الزوج؟
راكان:انا زوجها..
الدكتورة:احنا بنسوي لها عملية قيصرية..
راكان:ليش دكتورة؟
الدكتورة:احنا بإمكانا ننتظر لإن توها بدري على الولادة..خاصة انها بالشهر الثامن وبقى لها اسبوع علشان تدخل التاسع..بس واحد من الببيات وضعه تعبان علشان جي احنا مضطرين نسوي لها العملية علشان ننقذ حالته..
راشد:ومتى بتسوون العملية؟
الدكتورة:الحين..بس انا سألتها اذا تبي البنج موضعي او كامل قالت ابيه كامل..
راشد:اي كامل احسن..
ام راشد:انزين بنيتي الحين بنتي شمة اشلونها اقدر اشوفها؟
الدكتورة:اي يمه تقدرين تشوفينها..
ودشوا داخل الحريم...وتم راكان ويااخوان شمة...
الدكتورة:بس على فكرة شمة شوي نفسيتها تعبانة..
فارس:ليش دكتورة؟
الدكتورة:شكلها خايفة..حاولوا وياها لين مانوديها العمليات..
راشد:ومتى بتودونها؟
الدكتورة:عقب شوي بييها دكتور البنج..وخلال نص ساعة بنبدأ العملية..عن اذنكم..
راكان:دكتورة..
الدكتورة:نعم؟
راكان:دكتورة يعني زوجتي بتكون بخير؟؟
الدكتورة:لاتحاتي..شمة امورها كلها بخير..وان شاء الله بتقوم بالسلامة..انا الحين بنزل تحت على قسم العمليات علشان نستعد للعملية..عن اذنكم..
ودشوا الغرفة حصلوا شمة تصيح....راح لها راكان..وقعد جنبها وهو ماسك يدها....
راكان:شمة يبه ليش تصيحين؟؟
شمة:خايفة..
راكان:لا تخافين..توكلي على الله..وان شاء الله تقومين بالسلامة..
شمة:خايفة وايد ياراكان..
راشد:من شنو خايفة؟
شمة:خايفة انام ومااقعد..ومااشوف عيالي اللي كنت انتظرهم من سنين..
البنات تأثروا..شيماء ماتحملت صاحت وطلعت من الغرفة لحقها تميم...
تميم:شيماء ليش تصيحين؟
شيماء:عورت قلبي ياتميم..مسكينة شمة..من متى وهي تنتظر الياهل..
تميم:شمة مافيها الا العافية..الحين بيسوون لها العملية وبتقوم بالسلامة..ياللا عاد مسحي دموعج..
شيماء:كلامها قطع قلبي..
تميم:شيماء احنا لازم نوقف معاها ونساعدها ونقويها مب نصيح معاها..ياللا مسحي دموعج علشان نروح لها..ياللا..
الكل واقف صوب قسم العمليات ينتظر حد يبشرهم...
ام فهد:وديمة..
وديمة:نعم عمتي..
ام فهد:قعدي مب زين لج الوقفة..
وديمة:ان شاء الله..
شيخة:تعالي ودوم قعدي مكاني..
وديمة:ان شاء الله..(قعدت)
وراحت شيخة عند فارس....
شيخة:فارس اشفيك؟
فارس:احاتي شمة..جنهم طولوا..
شيخة:لاتحاتي..ان شاء الله هي بخير..
فارس:ان شاء الله..
تطلع الممرضة وتنادي ....
الممرضة:شمة عيسى..
الكل قام وراح لها....
راكان:قولي..شنو؟؟
الممرضة:خلص عملية..
راكان:وهي اشلونها؟؟
الممرضة:الحمدلله شمة في زين..
راكان:الحمدلله..
راشد:انزين وايش جابت؟
الممرضة(تبتسم):جابت 2 بيبي..2 بويز..
ام فهد:والياهال بخير؟
الممرضة:اي كلو في بخير..
الكل استانس وصاروا يسلمون على بعض ويباركون حق بعض...
راكان:ابي اشوفها..
راشد:مااعتقد يخلونك الحين..لازم يودونها قسم العناية بعد العملية وترتاح هناك بعدين تقدر تشوفها..
راكان:شيصبرني؟
فهد(ينتبه شي على وديمة..يروح لها):وديمة..اشفيج؟
وديمة:هاا لا مافيني شي..
فهد:اشلون مافيج شي..ووجهج يقول فيج شي..تعبانة؟
وديمة:اي شوي..
فهد:من الوقفة..الله يهداج بس..امشي خلنا نروح البيت..
وديمة:لالا بالاول نتطمن على شمة وعقب نروح..
فهد:مافي الحين نروح امشي جدامي..
وديمة:تكفى فهد..
فهد:وديمة سمعي الحجي..(يروح عند امه)..يمه انا بودي وديمة البيت شكلها تعبانة..
ام فهد:خير اشفيها؟
فهد:ماادري بس شكلها تعبانة..
راحت لها ام فهد...
ام فهد:اشفيج يمه؟
وديمة:مافيني شي..
فهد:الا فيج..
ام فهد:اشفيج قولي..
وديمة:شوي تعبانة..
ام فهد:ايش حاسه فيه؟
وديمة:ظهري شوي يعورني..
ام فهد:من الوقفة اللي وقفتيها..انزين ودها فهد الطواري خلهم يشوفونها..
وديمة:لا ماابي اروح..بريح شوي وبصير زينة..
فهد:امي معاها حق امشي نروح نتطمن..
وديمة:فهد مايحتاي..صدقني لريحت بالبيت بصير زينة..
فهد:انا جي بالي مو مرتاح..امشي..
سارة(تيي صوبهم):اشفيكم؟
ام فهد:وديمة شوي تعبانة..
سارة:سلامات حبيبتي اشفيج؟
وديمة:ولاشي بس شوي ظهري يعورني..
فهد:امشي اوديج الطواري..
وديمة:ماابي..
فهد:مب على كيفج..
سارة:امشي تبين ايي معاج؟
فهد:اي تعالي معانا علشان ماتكون بروحها..
في بيت بوسلمان...قاعدين كلهم يسولفون....
ليلى:هاا يمه شالاخبار؟
ام سلمان:تقول وديمة ان شمة مرت راكان ربت..
ليلى:صج وايش جابت؟
ام سلمان:جابت توم ولدين..
نوف:ماشاء الله عليها صج كلش ماكان يبين عليها..
ليلى:ماشاء الله..انزين وودوم وينهي مب جاية صوبنا؟
ام سلمان:تقول لا..
خالد:ليش؟
ام سلمان:تقول تعبانة شوي..وتوها جاية من الطواري..
ليلى:ليش اشفيها؟
ام سلمان:تقول كانت تعبانة..الظاهر من الوقفة وهم ينتظرون..
ليلى:وديمة هي دوم جذي ماتهتم بصحتها..الله يهداها..
نوف:انزين عمتي ماقالت لج ايش قالوا لها؟
ام سلمان:بلا..الدكتورة قالت لها لازم ترتاحين..وايد مرهقة نفسها..
خليفة وعيسى كانوا بالحضانة..علشان بس يكتمل نموهم ويتطمنون على صحتهم..وراكان كان وياابوه وامه يشوفون الياهال..وعقب راحوا قسم العناية...ودشوا عند شمة..كانت راقدة ومحد كان وياها...
راكان:يمه يبين عليها تعبانة..
ام فهد:عادي يمه..هي تعبت وايد..الحمدلله انها قامت بالسلامة هي وعيالها بخير..
راكان:الحمدلله..
شمة(تفتح عيونها شوي شوي)
راكان:ألف الحمدلله على السلامة..
شمة:راكان!
راكان:اي راكان..اشلونج الحين؟
شمة:ابي ماي..عطشانة..
راكان:من عيوني..
ام فهد:خلك يمه وياها انا بروح اجيب لها ماي..
راكان:قولي لي حبيبتي اشلونج؟
شمة:زينة..شفتي الببيات؟
راكان:اي شفتهم..انت شفتيهم؟
شمة:لا..يشبهون من؟
راكان:حلوين على امهم..
شمة:ابي اشوفهم..
راكان:ان شاء الله..بس انت شدي حيلج علشان تطلعين من هني ويودنج غرفتج..
تيي ام فهد..
ام فهد:هاج يمه قومي شربي..
في بيت تركي وشيماء....قاعدين يسولفون....
شيماء:تركي تهقى متى اربي؟
تركي:ليش ناوية تلحقين شمة؟
شيماء:ماادري..اصلا بيني وبينها اسبوعين..
تركي:انت سابقتها؟
شيماء:اي..
تركي:ان شاء الله تولدين وترتاحين..
شيماء:آآآمين..اسمعني تركي اذا مت مو تزوج عقبي..
تركي:عيل ايش تبيني اسوي؟؟..اقعد اصيح مثل الحريم ان زوجتي ماتت واقعد طول عمري عزابي!!
شيماء:نعم نعم نعم؟؟؟؟!!!!..ايش قلت؟؟..يعني انت ناوي على غيري؟!
تركي:انا مو علشاني..علشان الياهال حرام مالهم ام تهتم فيه وداريهم..
شيماء(عصبت):وانت ليش تفاول علي؟؟؟
تركي(يضحك):حمدلله والشكر..انت اللي مفاولة على عمرج..حد يقول هالكلام اذا مت بتزوج علي؟؟
شيماء(هدت شوي):يعني ابي اعرف اشلون تفكر..بس صج قولي تاخذ وحده غيري؟؟
تركي:يمكن..
شيماء:تركي!!
تركي(يضحك):انت تسأليني وانا اجاوبج ليش تزعلين..بعدين تعالي انت بتكونين ميتة يعني مابتستفيدين شي ان كنت متزوج..
شيماء:لا حبيبي من الحين بنقهر..
تركي:حمدلله والشكر..اشفيج اليوم؟؟..ماكله شي؟؟
شيماء:اي..اللي ماكله انت..حد يي ويقول هالحجي حق زوجته وهي بالشهر التاسع؟؟؟
تركي:اشفيج يبه؟؟..الحين من اللي فتح السالفة وقال هالحجي كله؟؟
شيماء:على الاقل جامل انزين..
تركي(يبتسم):حبيبتي شيماء..انا ماابدل القمر بنجوم..ومافي اي حد يقدر ياخذ مكانج بقلبي..
شيماء:اي قص علي وجاملني..
تركي:لاحول ولاقوة الا بالله..اشفيج؟؟..مادرينا شنقولكم انتوا يالحريم..حبيبتي والله العظيم اني مااجامل..بعدين يالمجنونة انا لو مااحبج جان ماانتظرت سنين تخلصين من المدرسة علشان آخذج..(قام)..فهمي يالمجنونة احبج..(وراح)
شيماء(استانست على كلامه):تعال وين رايح يالمجنون..
تركي(من بعيد):انت المجنونة..بروح علشان ارتاح من مغثة بعض الناس..
شيماء(تقوم وتروح له الغرفة):نعم؟؟..من اللي غاثك؟؟
تركي:ناس يعرفون نفسهم..
شيماء:الله يسامحك..وين رايح؟
تركي:اقول حبي..ماتشوفين الساعة جم؟؟
شيماء(تشوف الساعة):انزين لاتأخر..ابي اروح عند شمة..
تركي:اخاف اوديج هناك وتولدين..
شيماء:احسن علشان اموت..
تركي(يطالعها بنظرة)
شيماء:اشفيك؟؟
تركي:شيماء رجاءا لاعاد تعديني هالكلام..مااحب اسمعه..
شيماء:يعني صج تركي انت تحبني؟؟
تركي:حمدلله والشكر..صج مجنونة..مع السلامة..
وطلع..


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 133
قديم(ـة) 31-12-2013, 12:58 PM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج


متابعة الفصل الـ 64 والأخير

الجزئية الثانية






تتحسن صحة شمة ويودونها جناحها الخاص..راكان اللي ماخلى باقة ورد الا وجابها ولا سلة شوكولاتة او فواكه وانواع التوزيع والديكور مزين الغرفة...كان مستانس وأخيرا جاه عيال..سنين وهو ينتظر..ينتظر هاليوم اللي كلهم يردون البيت ويسمع حسهم....اتم شمة بالمستشفى خمسة ايام..وعقب تروح بيت ابوها وتم هناك..لكن عيالها مازالوا بالمستشفى..وكان راكان كل يوم يروح يشوفهم ويتطمن عليهم..لكن شمة ماقدرت تشوفهم الا مرتين..وكل يوم يصورهم راكان ويرويها الصور...عقب اسبوع من ولادة شمة ربت شيماء وجابت يعقوب..ومر 50 يوم تقريبا على ولادة التوم..ردت شمة بيتها وياعيالها...وكان راكان وايد مستانس بوجودهم حوله وهو يسمع حسهم وصياحهم...يوم من الايام يرد فهد البيت....
فهد:مساء الخير حياتي..
وديمة: هلا حبي مساء الخير..
فهد:العشاء جاهز؟ انا ميت من الجوع..
وديمة:انت بس بدل ملابسك وكل شي بيكون زاهب..
فهد:موزة راقدة؟
وديمة:اي فديتها راقدة..خذت دواها ونامت..
فهد:بروح اشوفها..
وتمت وديمة قاعدة تنتظر فهد ينزل..كانت تحس بأشياء..بس قاومت وماتكلمت...نزل فهد عقب ماتطمن على موزة وبدل ملابسه...وبدوا يتعشون...فهد لاحظ شي غريب على وديمة....
فهد:وديمة فيج شي؟
وديمة:لا..
فهد:شكلج تعبانة..
وديمة:عادي فهد..لما اوصل بالشهور الاخيرة يصير فيني جذي..لاتحاتي..
فهد:اخبار الشغل وياج؟
وديمة:كلمت سارة اليوم وسألتها..قالت لي كل الامور ماشية اوكي..واليوم السايق جاب لي البريد..والحمدلله الشغل ماشي..
فهد:الحمدلله زين..واخبار المحل؟
وديمة:ماادري عنه..صار لي اسبوع مارحت له كلش مافضيت..
فهد:ولااتصلتي؟
وديمة:بلا اتصل فيهم..بس لازم اروح..وهالاسبوع مالحقت..وهم موزة مرضت وماقدرت اروح..
فهد:بس الحمدلله الحرارة نزلت..
وديمة:اي الحمدلله..
وتمت الليلة على خير..ووديمة ساكته وماتكلم وماتقول باللي تحس فيه..الجمعة..تروح وديمة ومعاها موزة بيت ابوها...وعقب مايتغدون كلهم...
ليلى(تساسر وديمة):اشفيج؟
وديمة:مافيني شي..
ليلى:شكلج تعبانة..
وديمة:لا عادي..
ليلى:حتى انج ماكليتي مثل كل مرة..
وديمة:مااشتهي وايد..
ليلى:ليش؟
وديمة:لإني تريقت متأخر..
ليلى:اهاا..
ام سلمان:وديمة اخبار التوم؟
وديمة:الحمدلله..ماشاء الله كبرانين..
مريم:يشبهون من؟
وديمة:امم ماكو حد معين..
ام سلمان:مو الياهل كل يوم شكل..
ليلى:ويلعوزونها؟
وديمة:وااايد..مسكينة شمة ماترقد الليل..اتم طول الليل سهرانة وعقب الصبح تاخذهم الخدامة وهي ترقد..
ام سلمان:يحليلها شمة..صبرت ونالت..
بوسلمان(يقوم):انا بروح اريح شوي قبل الصلاة..قعدوني قبل الصلاة بخمس دقايق..
ام سلمان:ان شاء الله..ها قولي اخبار عروستك؟
حمد:الحمدلله..
ام سلمان:مافي شي بالطريج؟
حمد:لا طبعا..احنا متفقين مانبي عيال حاليا..نبي نستانس ونغير جو ونسافر..وعقب يصير خير..
وديمة(تقوم):انا بروح ارقد..
خالد:غريبة مو من عادتج ترقدين..
وديمة:ماادري فيني نوم..عووش فديتج ديري بالج على موزة..
عائشة:اوكي..
وراحت....
حمد:اشفيها وديمة؟
ام سلمان:اشفيها؟؟
حمد:ماادري..بس شكلها غريب..يعني مو من عادتها تقعد من غير سوالف وضحك وغشمرة..
ام سلمان:عادي..البنية وصلت الشهور الاخيرة وتعبانة..
في بيت بوراشد...العصر الكل قاعد ويسولفون وهم ياكلون كيك ويشربون عصير....
شيماء:هاا متى ناوية على الثاني؟
شمة:والله اتمنى بس مب الحين..تو الناس خلني اعطي عيالي حقهم بالاول وعقب يصير خير..
تميم:تصدقين شمة انا استلطفت ولدج عيسى اكثر من خليفة..
شمة(تضحك):هناك يقولون العكس..
راشد:كل واحد ويرجع حق اسمه..
ام راشد:فديت عيالنا كلهم حلوين وزينين..
تميم:لا يمه عيسى غير..
عيسى:اكيد بيكون غير هذا سميي..
شمة:ياليت يطلع عليك..بعطيك اياه وخله معاك وعقب رده لي..
شيماء:مااسرع مااستغنيتي عنهم؟!
شمة:لا وين اقدر استغنى عنهم..
تميم:انزين تعالي خذي عيسى وعطيني خليفة..خلني اشوف اقدر عليه..
بوراشد:ايش عندك اليوم ويالياهال؟؟
تميم:مستانس عليهم..توم وشكلهم يضحك..
سلطان:اكو عندك توم كبار شوفهم واضحك عليهم..
شيماء:بسوي عمري ماسمعت شي..
في بيت بوسلمان.....
سلمان:وديمة ليحين راقدة؟؟
ام سلمان(تشوف الساعة):غريبة ماقعدت لين الحين..قومي مريوم يمه ناديها..
مريم(تقوم):ان شاء الله..
بوسلمان:ليلى صبي لي الشاي..
ليلى:ان شاء الله..
خالد:يبه دريت عن ولد خلفان؟
بوسلمان:لا..اشفيه؟
خالد:توني في المسجد يقولي مبارك ان ولد خلفان توفى..
بوسلمان:من متى هالحجي؟
خالد:يقول امس توفى كان رايح وياربعه السيلين وتوفى بحادث..
بوسلمان:لا حول ولاقوة الا بالله..عيل عقب المغرب لازم نروح لهم..
مرة وحده كلهم يسمعون صوت صراخ...الكل يقوم ومايدرون شالسالفة....
بوسلمان:من اللي يصارخ؟؟
ام سلمان:ماادري..
تركض مريم وتنزل تحت وهي تصيح.....
خالد:اشفيج؟؟؟
مريم:وديمة..
الكل متفاجأ....
بوسلمان:اشفيها؟؟؟
مريم(ماقدرت تكلم وهي تصيح)
الكل راح عند وديمة يبون يعرفون السالفة...
في بيت بوفهد....
راكان:تعال اكل هالكيك طعمه وايد لذيذ..
فهد:بسي حليت وايد..
ام فهد(تيي وتقعد):هاا يمه ردت عليك؟
فهد:لا..واي شي اتصل البيت محد يرد..
ام فهد:تحصلهم قاعدين برع بهالجو الحلو ومب سامعين التليفون..
يرن تليفون فهد....
ام فهد:اكيد هي..
فهد:لا مب هي..السلام عليكم..
خالد:وعليكم السلام..اشلونك فهد؟
فهد:بخير انت اشلونك؟
خالد:فهد انت وين؟
فهد:انا بالبيت ليش؟
خالد:انزين تعال احنا بالمستشفى..
فهد:نعم؟؟..بالمستشفى؟!!..ليش؟؟
خالد:وديمة شوي تعبانة وجبناها المستشفى..
فهد(حط ستكانة الشاي على الطاولة وقام):اشفيها؟؟
خالد:شوي تعبانة انت تعال..
فهد:انتوا بقسم طواري الولادة؟
خالد(توهق):لا..احنا بالطواري بس مب الولادة..
فهد:خالد وديمة اشفيها؟؟
خالد:قلت لك تعال وبتطمن عليها بنفسك..مع السلامة..
ام فهد:فهد اشفيك؟؟؟
فهد:ماادري..وديمة بالمستشفى..(مشى عنهم)
بوفهد:راكان قوم الحق اخوك مب زين يسوق وهو بهالحالة..
وراح وراه راكان...
ام فهد:قوم ياخليفة خلنا نروح نشوف البنية..
طول الوقت وراكان يسوق..وفهد ساكت ومايتكلم..بس يناظر الشوارع..راكان خاف عليه من سكوته...واول ماوصل الطواري...
فهد:نزلني بالاول..
راكان:ان شاء الله..
نزل فهد وهو يمشي بخطوات سريعة بس يبي يسمع كلمة وحده..ان وديمة بخير....شاف سلمان..قرب صوبه لين ماشاف الكل واقف وهو يصيح...فهد ماوده يسأل اشلونها وديمة..لإنها المفروض تكون بخير...خايف يسأل....
فهد:وين وديمة؟؟
كل واحد يناظر الثاني..والجواب صعب....
سلمان:وديمة داخل..
فهد:وين بأي غرفة؟؟؟؟
خالد:فهد مب مسموح لك تروح داخل..
فهد:يعني الدكتور ماطلع؟؟
الكل ساكت.....
فهد:اشفيكم؟؟؟؟
بوسلمان(وهو متضايق مسك كتفه):فهد..وديمة شوي تعبانة..والحين ودوها العناية المركزة..
فهد(انصدم):ليش؟؟؟
بوسلمان:السكر ارتفع عندها..وهي الحين وضعها صعب..ادعي لها الله يقومها بالسلامة..
فهد(حس ان الدنيا تدور فيه..مب قادر يستوعب آخر جملة سمعها)
جاهم راكان....
راكان:هاا بشروا اشفيها ام موزة؟؟
الكل ساكت..لإنهم يطالعون عيون فهد اللي كان مصدوم من الخبر..
بوسلمان:اقعد فهد..
فهد:رايح اشوفها..
ومشى عنهم كلهم....
راكان:شالسالفة؟؟
في بيت بوراشد...يرن تليفون فارس....
فارس:هلا حبيبتي....اشفيج؟.....شوي شوي تحجي ماني قادر افهم عليج..........اشفيها؟.......لاحول ولاقوة الا بالله.....من متى صار هالحجي؟......اوكي اوكي ياللا مع السلامة..
راشد:ايش صاير؟
فارس(يقوم):هذي شيخة تقول ان وديمة بنت خالها تعبانة وايد وحاطينها بالعناية..
راشد:ليش؟
فارس:ماادري..انا رايح لهم..
شمة:فارس ماقالت لك اشفيها بالضبط؟
فارس:لا كانت تصيح وماقدرت افهم عليها وايد..
شمة:انزين ودني معاك..شيماء ديري بالج على عيالي..
شيماء:اوكي..
والكل بالمستشفى عند قسم العناية...اللي متكتف وهو متضايق..واللي تصيح ومب قادرة تكلم...واللي تحضن الثانية...واللي عيونه مليانة دموع..واللي يستغفر...واللي يدعي ربه....يطلع فهد من العناية....الكل يلتم حوله.....
الكل يسأله....هو يطالعهم بس مايسمعهم..باله هناك داخل وياحبيبته..وياشريكة حياته...مايبي شي الا وجودها بحياته...
يطلع راشد وراه....والكل يسأله...
راشد:ياجماعة تطمنوا..ان شاء الله وديمة بتكون بخير..احنا بس ننتظر السكر عندها ينزل وتقوم من الغيبوبة..
بوسلمان:يعني ايش كثر؟
راشد:هي دشت بغيبوبة سكر..وماندري متى تقوم منها..وهم ماندري اذا جسمها بيستجيب للعلاج او لا..انتوا وكلوا امركم لله وادعوا لها..
بوسلمان:بس هي حامل..ويمكن....
راشد:لاتحاتي..في دكتورة عندها..وان شاء الله من تطلع بتطمنا عليها..
والكل ينتظر...وينتظر.....تطلع الدكتورة......
الدكتورة:حالة الجنين خطرة..وهالشي قاعد يأثر على صحة الام..
فهد(قالها من غير ماهو حاس ايش قاعد يقول):تخلصوا من الجنين..
الدكتورة:نعم؟
فهد:اللي سمعتيه..تخلصوا منه يوم انه يأثر على صحة زوجتي..
راشد:هدي بالك يافهد..ماعليه دكتورة هذا زوجها..
الدكتورة:انا اقدر وضعكم النفسي..بس انا بحاول ان ننقذ الاثنين الام والبيبي..
فهد(عصب):قلت لج ماابي الياهل..تخلصي منه وعطوني زوجتي..
بوفهد(مسك ولده):استهدي بالله يايبه..زوجتك ان شاء الله بخير..تطمن..
الدكتورة:اخوي..احنا لو شايفين ان الجنين ممكن يكون خطر على الام نتصرف على طول من غير ماناخذ شوركم..بس انا اقول بحاول اني انقذ الاثنين..
فهد:استغفر الله..يعني شنو؟؟..تبون تذبحون زوجتي على حساب الياهل؟؟؟
راكان:فهد هدي..
فهد(عصب ومشى عنهم وراح)
وراح وراه راكان...
بوسلمان:دكتورة يعني الحين ايش بتسوون؟؟
الدكتورة:احنا مضطرين اندخلها العمليات ونسوي لها عملية ونطلع البيبي..
بوسلمان:دكتورة اذا شايفه ان هذا احسن خيار خلاص سووه..اهم شي بنتا تقوم بالسلامة..
الدكتورة:ان شاء الله لاتحاتون..انا بس بغيت توقيع زوجها على العملية..
بوفهد:ماعليه يابنيتي..الظاهر زوجها متوتر وايد ويحاتيها..
الدكتورة:ياجماعة تطمنوا..صدقوني مع مرور الوقت بتتحسن صحة وديمة وبقوم بالسلامة وبتفرحون فيها وفي البيبي..
الجميع:آآآآمين..
بوفهد:انا الحين بتصل في فهد علشان يي ويوقع على الورقة..(يتصل..محد يرد..يتصل براكان).....وينك؟.....وين اخوك؟....شنو ماحصلته؟.....ايش دعوة ماقدرت تلحقه؟؟......دوره شوفه وينه فيه....مع السلامة..
بوسلمان:انزين دكتورة يصير اوقع عن زوجها..انا ابوها..
الدكتورة:اوكي مو مشكلة..
وصار راكان يدور بكل مكان على فهد..مامحصله..رد مرة ثانية عندهم...
بوفهد:اشلون ماحصلته؟؟
ام فهد:يمكن راح البيت..
راكان:مااعتقد لإني انا اللي جايبه..
ام فهد:يعني وين راح اخوك؟؟
بوسلمان:اكيد قعد بمكان..مابيروح بعيد..حاولوا تتصلون فيه..
بوفهد:اتصل فيه..
راكان:ان شاء الله..
لكن فهد سك تليفونه..أذن العشاء..والكل راح يصلي العشاء ويطلب من الله يشافي وديمة ويقومها بالسلامة...حصلوا فهد في المصلي..كان يصلي...وصلوا كلهم جماعة..وعقب ماخلصوا التموا حوله وهم قاعدين....
راشد:فهد قوي قلبك..احنا دوم نعرفك قوي وتحمل..بعدين وين ايمانك بالله؟؟؟...تقرب من الله واطلبه مرة ومرتين وثلاث واكثر بعد..وبيستجيب دعائك وبيعطيك اللي تبيه..بس لاتعطي للشيطان فرصة يلعب براسك ويعيشك بيأس..سامعني يافهد؟؟
بوفهد:جزاك الله خير على الكلام..سامع يافهد؟؟
راشد:فهد لاتسكت..تكلم..قول شي..تكلم وايد احسن من انك تكون ساكت وتخش بقلبك..
سلمان:انا من رايي نروح نتصدق..
راشد:احسن شي تسوونه..
سلمان:امش معاي حمد..
وراحوا....وقام بوسلمان...
بوسلمان:انا بروح لهم..تيي معاي خالد؟
خالد:اي يبه جاي معاك..
وراحوا...
راشد:فهد ماودك تقول شي؟
فهد:............
بوفهد:فهد يبه لاتسكت..انت جي تضايقني..تكلم..
راشد:انزين امش معانا نروح نتطمن على زوجتك الحين ودوها علشان يسوون لها العملية..ياللا..
وقاموا كلهم....وصاروا يمشون متجهين للعمليات....مرة وحده وقف فهد...
فهد:راكان عطني سويج سيارتك..
راكان:ليش؟
فهد:بروح مكان..
بوفهد:ماتسوق وانت بهالحالة..
فهد:ماني مسوي شي في عمري..عطني السويج..
راكان:انزين قولي وين رايح انا اوديك..
فهد:ابي اروح بروحي..
راشد:بس يافهد انت تعبان وماتقدر تسوق وانت جذي..
راكان:انا بروح معاك وين ماتبي..بس بروحك لا..
فهد:انزين امش معاي..
وطلعوا من المستشفى..والباقي ينتظرون حد يطلع من العمليات ويطمنهم على وديمة..
وهم بالسيارة....
راكان:وين تبينا نروح؟
فهد:روح بيت محمد..
راكان:اي محمد؟
فهد:محمد اللي يشتغل عندي بالمكتب..
راكان:انا ماادل بيته..
فهد:انا ادل..روح سيدة..وخذ الدوار يسار..
راكان:وايش تبي في محمد هالحزة؟؟
فهد:جدامك صراف آلي على اليمين وقف..
راكان:ان شاء الله..
فهد:تقدر تسحب مبلغ من بطاقتك وعقب ارد لك؟
راكان:اكيد اقدر..بس قولي بالاول ايش تبي بالفلوس؟؟
فهد:راكان بسك اسئلة..بعدين..
في المستشفى....
ام فهد:خليفة وين العيال؟؟
بوفهد:ماادري..
ام فهد:مايصير زوجته بالعمليات وهو ماادري وين رايح..
بوفهد:فهد ماطلع من المستشفى الا لإنه يبي يسوي شي علشان زوجته..لاتحاتين..فهد عاقل وعارف اشلون يتصرف..
الدكتورة تطلع من العمليات....
الدكتورة:وديمة عبدالرحمن..
الكل يقوم ويلتمون....
ام سلمان:طمنينا دكتورة..
الدكتورة(تبتسم):الحمدلله..قدرنا ننقذ البيبي..مبروك جاكم ولد..
خالد:دكتورة ووديمة اشلونها؟؟
الدكتورة:وديمة مثل ماهي..بس الحمدلله ان وضعها تم مثل ماهو وماصارت لها اي مضاعفات..وان شاء الله مع مرور الوقت بتتحسن وبتقوم..عن اذنكم..
الكل حزين ومتضايق..ومحد فيهم فكر يسأل عن الياهل او حتى يشوفه...
راشد:بوفهد..بوسلمان..ايش دعوة بنتكم تربي وماتسألون عن ولدكم؟؟..مهما صار ووديمة تعبانة هذا مايعني انكم ماتسألون عن الياهل..او حتى تشوفونه..صدقوني هي بتشافي ان شاء الله..الولد ماله ذنب..روحوا سألوا عنه وتطمنوا عليه..
سلمان:يبه كلام الدكتور راشد صحيح..
بوسلمان:انتوا روحوا شوفوه..
بوفهد:لا يابوسلمان..كلنا بنروح جميع..ياللا..
رد فهد المستشفى وياراكان..
راكان:وين رايح؟
فهد:ماادري..
راكان:انزين وقف خلني اتصل فيهم..اشوفهم وين..
وقفوا...
راكان(اتصل بخالد):السلام عليكم....وينكم؟......انزين وايش صار؟؟....صج زين الحمدلله....ياللا احنا جايينكم...مع السلامة..امش..
فهد ماسأل ايش صار؟ وين رايحين؟..مايبي شي الا بس يشوف وديمة بصحتها...
وصلوا..وحاولوا يغيرون نفسيتهم علشان فهد...وصاروا يباركون له على الياهل....لكن فهد ماكان يتكلم..كان ساكت..وتموا على هالحالة اكثر من نص ساعة...مرة وحده فهد تكلم....
فهد:وين الياهل؟؟
الكل يناظر الثاني..واخيرا فهد تكلم...
ام فهد:الياهل بالحضانة..
فهد:محد منكم شافه؟
بوفهد:لا ليحين..
فهد:ليش؟؟..انتوا ماتعرفون ان اول شي بتسأل عنه وديمة اول ماتقوم هو الياهل..
بوفهد:احنا كنا بنروح بس قالوا لنا صبروا شوي..
فهد:روحوا شوفوه..
ام فهد:وانت يمه؟
فهد:بعدين..بعدين اشوفه..




الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 134
قديم(ـة) 31-12-2013, 12:59 PM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج


متابعة الفصل الـ 64 والأخير

الجزئية الاخيرة






الكل رد البيت..تأخر الوقت..والكل أمله بالله كبير ان من يصبح الصبح بتقوم وديمة وبتكون بأحسن حال....الكل حاول يرقد...الا فهد..اللي مارد البيت من الاساس وتم بالمستشفى..يفكر بوديمة..تذكر الياهل..قام من مكانه وراح يشوفه...دق الباب في الحضانة وطلب من الممرضة يشوف ولده..دش داخل...وراح صوب ولده..وقف جنبه...شافه راقد..تذكر وديمة يوم كانت متضايقة لإنها ماحملت..والحين حملت وجابت ولد..لكن هي وين؟؟..فهد ماتحمل نزلت دمعته..يبي زوجته..يبي وديمة..وديمة هي شعوره بالسعادة..هي ابتسامته وراحة باله..هي ونسيته وحبيبته..يبيها..لإنه عارف ماكو حد يقدر يستغنى عن حبيبه مهما صار..جات عنده الممرضة...
الممرضة:what is happened?
فهد(مسح دمعته):nothing
وطلع من الحضانة ومشى صوب العناية...وطلب من الدكتور يشوف زوجته...دخلوه بالغصب..تم واقف فوق راسه وهو يقرأ قرآن..فهد وهو يقرأ القرآن حس بحركة..بس ماهو متأكد..وده يقولهم بس يمكن يتخيل..لف علشان يقولهم شاف راشد....
راشد(ابتسم له وعرف فهد ايش كان بيسوي)
فهد:يعني صج قامت؟؟
راشد:أي..انت اول واحد شفتها..
فهد(ماصدق..حب راسها):وديمة..وديمة تسمعيني؟؟
راشد:انا بروح انادي الممرضة..
فهد:وديمة يبه تسمعيني؟؟..وديمة..
جى راشد ومعاه الممرضة...ويشوفون وضع وديمة....
فهد:دكتور ليش ماترد علي؟؟
راشد:بترد عليك..بس هي شوي دايخة من العلاج وهم من العملية اللي سوتها..
فهد:يعني هي الحين بخير؟؟
راشد:أي..دام انها قامت من الغيبوبة الحمدلله بخير..
فهد:انزين ومتى بتطلعونها من هني؟
راشد:بالاول تقوم ونسمع حسها وعقب يصير خير..
فهد:وديمة..تسمعيني؟؟
وديمة(تطلع اصوات)
فهد(استانس):وديمة انا فهد..كلميني..قولي شي..
وديمة:ف..فهد..
فهد:عيون فهد..آمري..
وديمة(تحاول تفتح عيونها)
فهد:دكتور..
راشد:تطمن امورها بخير..
فهد:صحيح؟؟
راشد:أي الحمدلله..(يشوف الساعة)..الحين بيأذن الفجر..امش نروح نصلي..ولين مانخلص صلاتنا بتكون زوجتك بجناحها..
فهد:صج؟؟
راشد:أي..ياللا نمشي..
وراحوا يصلون...
بعد ماخلصوا صلاة...ردوا البيت....
بوفهد:راكان يبه اتصل في اخوك شوف وينه..
راكان:ان شاء الله..
تنزل شمة ومعاها تليفون راكان....
شمة:راكان تليفونك رن كم مرة..
راكان:من؟
شمة:فهد..
راكان:فهد!..(اتصل عليه)..السلام عليكم....هلا فهد....تونا رادين من الصلاة.......من صجك؟؟......زين زين...الحمدلله الله يبشرك بالخير.....اوكي مع السلامة..
بوفهد:ايش عنده اخوك؟
راكان:يقول زوجته قامت ودوها غرفتها..
بوفهد:الحمدلله..خلني اروح ابشر امك..
وانتشر الخبر بسلامة وديمة...فهد ظل قاعد وياها وهو يتأمل شكلها باين عليها التعب والارهاق...حاولت تقوم...
وديمة:فهد..
فهد:عيوني..
وديمة(تنتبه لشي غريب):فهد انا ولدت؟؟
فهد:أي حياتي..
وديمة:متى؟؟
فهد:أمس بالليل..
وديمة:ليش؟؟
فهد:كنتي تعبانة واضطروا يولدونج..
وديمة:وشنو جبت؟؟
فهد:انت قولي..
وديمة:منيرة؟؟
فهد:خليفة..
وديمة:صج؟؟..واشلونه؟؟
فهد:بخير..ويسلم عليج بعد..
وديمة:ابي اشوفه..جيبوه عندي..
فهد:ان شاء الله بتشوفينه..بس تتحسن صحتج شوي وبنوديج له..
وديمة:يشبه من؟؟
فهد:فيه من موزة..
وديمة:يعني انت شفته؟؟
فهد:أي شفته..لإني عارف اول شي بتسألين عنه هو الياهل..
وديمة:ابي اشوفه..تكفى فهد..
فهد:ان شاء الله..انت ارتاحي الحين وعقب نوديج له..
ودشت ام سلمان ومعاها بوسلمان والبنات....وعقبها جى خالد وحمد وسلمان...وام فهد وشمة والتموا كلهم حولها....وهم مستانسين ويضحكون...طلعوا الرياييل من عندها...وتموا الحريم..
خالد:فهد..انت لازم ترد البيت ترتاح..من امس انت هني..
بوسلمان:كلام خالد صح..روح ريح..
فهد:ان شاء الله..
وراح فهد يرقد وهو مرتاح البال...وتموا الحريم عند وديمة..بس وديمة نامت لإنها كانت تعبانة...
في بيت بوراشد....
شيخة:انا رايحة الحين..
ام راشد:عيل انا جايه وياج..
شيماء:انزين نشتري لها شي بالدرب..
ام راشد:أي مو مشكلة..(قامت)..بروح اتزهب..
شيماء:انت شيخة شنو بتشترين لها؟
شيخة:حاليا بودي لها باقة ورد للمستشفى..وعقب لما ترد البيت بروح ويافارس اشوف شي حلو للبيبي..
شيماء:عيل احنا بنشتري لها سلة جوكليت..
فهد يقوم ويشوف الساعة 5 ونص..يروح يسبح ويصلي ويتزهب..وينزل تحت ويركب سيارته...يرن تليفونه....
فهد:السلام عليكم..
ام فهد:وعليكم السلام..يمه وينك؟
فهد:في السيارة..
ام فهد:انزين يمه تعال عند وديمة شوي..
فهد:ليش صاير شي؟؟
ام فهد:قاعدة تصيح ومتضايقة..
فهد:ليش؟؟
ام فهد:تقول ابي اشوف الياهل..تقول اكيد تجذبون علي انه بخير..اكيد صار له شي..
فهد:انزين انا جاي بالدرب..مع السلامة..
جاتهم نجلاء...بعد السلام....
نجلاء:ودوم حبي الحين انت من صجج تصيحين علشان هالشي؟؟
ام سلمان:قولي لها يمكن تقتنع بكلامج..
نجلاء:ودوم ارمسي..
وديمة:ماابي..انتوا تقصون علي..اكيد ولدي فيه شي..او صار له شي وماتبون تقولون لي..
ام فهد:الولد بخير مافيه شي..
وديمة:ودوني له..
ام سلمان:مايصير يايمه..انت تعبانة..
وديمة:عيل جيبوه..
ام سلمان:هم مايصير..الياهل لازم يتم بالحضانة..
نجلاء:وديمة كبري عقلج..شو فيج..يقولون لج الياهل بخير..
يندق الباب...وتروح عائشة تفتح الباب...وتييهم...
عائشة:يمه هذا فهد..
ام سلمان:تغطوا يابنات..خله يي يشوف زوجته..
وتغطوا...ودش فهد....وقعد جنبها...
فهد:وديمة يبه اشفيج؟؟..ليش تصيحين؟؟
وديمة:وين ولدي؟؟
فهد:ولدج بالحضانة..
وديمة:انتوا تقصون علي..اكيد صار له شي وماتبون تقولون لي..
فهد:من قص عليج بهالكلام..
وديمة:عيل ليش ماتجيبونه؟؟؟
فهد:يايبه ياوديمة مايصير..الياهل لازم يتم بالحضانة..
وديمة:عيل ودوني له..
فهد:انت الحين تعبانة..
وديمة:لا انا مب تعبانة..
فهد:لا تعبانة..لاتكابرين..اصلا ماتقدري تقعدين تبين تقومين؟!!..هدي اعصابج..وان شاء الله خلال يومين تروحين وتشوفينه..
وديمة:ماابي..ابي اشوفه..
فهد(يمسح دموعها..ويرفع راسها):وديمة طالعيني..طالعيني..
وديمة(تحط عيونها بعيونه)
فهد:والله العظيم ان ولدنا بخير ومافيه الا العافية..
وديمة(هدت شوي من وجود فهد وكلامه)
فهد:اصلا تعالي..(طلع تليفونه)..انا الحين برويج صورته..علشان تصدقين بس..(يرويها)..شوفيه..
وديمة:هذا ولدي؟؟
فهد:أي.
وديمة:وااي حبيبي..(تصيح)
فهد:وديمة..ايش قلنا؟!!..خلاص..ياللا مسحي دموعج..
وديمة(تمسح دموعها)
وتمر أيااام..وفهد ينشغل واايد ويستغل وجود وديمة في بيت ابوها...كان يسوي مفاجأة للكل بمناسبة سلامة زوجته وولده..وفي يوم من الايام في الشركة...
راكان:هاا بشر وين وصلت؟؟
فهد:خلاص..كل شي صار جاهز..
راكان:صج؟
فهد:اي..ومابقى الا الناس تحضر..
راكان:حجزت الاكل؟؟
فهد:جهزت كل شي..بتشوف اشياء مابتخطر على بالك..
راكان:يعني المفاجأة للكل؟؟
فهد:اي..بتقضون احلى اجازة شتوية..
راكان:ان شاء الله..حمستني..انزين قول عزمتهم؟؟
فهد:لا ليحين..بروح عند زوجتي الحين وبتصل في الكل اعزمهم..
راكان:عيل قوم ايش تنتظر..علشان الناس يمديها ترتب امورها..
فهد:اوكي..(يقوم)..ياللا مع السلامة..
راكان:مع السلامة..
وهو قاعد وياوديمة ويتصل في الناس يعزمهم....
وديمة:ايش معنى اخترت نفس اليوم اللي برد البيت؟
فهد:جي..بخاطري اشوفج هناك..ونلقتي هناك..
وديمة:ليش؟
فهد:لإن هناك في اجواء خاصة..
وديمة:ياسلالام..متى يي الاسبوع الجاي..شوقتني..
فهد(يبتسم):انا اللي متشوق تردين البيت واشوفج كل يوم مثل قبل..
وديمة:لاتنسى تكلم عبدالله..ذولا بعد صاروا نسايبنا..
فهد:اكيد مب ناسيه..اولا عبدالله رفيجي قبل لتصيرون نسايب..
تيي موزة....
موزة:بابا وين بتودينا؟
فهد:مكان انت تحبينه وااايد..
موزة:وفي العاب؟
فهد:في كل شي..شنو تحب موزة هناك موجود..
موزة:وااااو..ونااسة..
فهد(يبوسها)
وديمة:فهد..متى بيي خليفة؟
فهد:تبينه؟؟
وديمة:اكيد..هذا سؤال تسألني؟؟
فهد:الدكتور قالي انتظروا عليه شوي..
وديمة:ليش كل هاي؟؟..وايد طولوا..
فهد:حبيبي انت ولدتي بدري..والياهل لازم ياخذ حقه..اشفيج..خله يرد لنا وهو بصحته..
وديمة:يعني بنتظر وايد؟
فهد:الدكتور قالي آخر مرة عقب اسبوعين..
وديمة:لاااااااااااا..انا كنت حاطة في بالي بيكون ويانا هناك..
فهد:ماعليه علشان مايتأثر بالجو البارد..
وصار الكل يزهب عمره للرحلة العائلية..تركي وشيماء وعيالهم بسيارتهم..راشد وعياله بسيارتهم..وعيسى وزوجته وعياله بسيارته..وفارس وشيخة وعيالهم بسيارتهم..وتميم وروضة وعيالهم وبوراشد وام راشد بسيارتهم...بوسلمان وزوجته وعائشة وحمد وزوجته بسيارة..وخالد وزوجته وعياله بسيارة..وسلمان وزوجته وعياله بسيارتهم..وليلى وريلها بسيارتهم..ومريم وريلها بسيارتهم..بوفهد وام فهد وياراكان وشمة وعيالهم بسيارة..أحمد وحصة وعيالهم بسيارة..يوسف وزوجته وياامه وابوه واخته بسيارة..عبدالله وامه وزوجته وعيالهم بسيارة..كاملة وريلها وعيالهم بسيارة..سارة وريلها وعيالهم بسيارة..فهد ووديمة وموزة كانوا قبل الكل هناك..وديمة ماصدقت يوم شافت كل الترتيبات اللي سواها فهد...
وديمة:بصراحة شي عجييييب..خيااالي..
فهد:عجباج؟؟
وديمة:بشكل ماتصور..وااايد حلو..
فهد:العزيمة هذي على سلامتج انت وخليفة..
وديمة:الحمدلله..
فهد:هاا بابا موزة مستانسة؟؟
موزة:وااايد بابا..ابي اروح العب بالالعاب..
فهد:الحين بس ييون كلهم تروحين تلعبين مع ربعج..
(يشوفون سيارات داشه)
فهد:كاهم وصلوا..
وديمة:تصدق فهد..حلوة الفكرة حاط مجابل كل فيلا اسم العايلة..
فهد:علشان كل واحد يدل وين يروح..
وديمة:احسهم بيستانسون..
فهد:اي تغيير جو للكل..
الكل دش..وصفوا سياراتهم...وكل واحد فيهم دش فيلته...ودخلوا اغراضهم وصاروا يرتبون امورهم...والكل انبهر بالترتيبات اللي مجهزهم فهد...
حمد:ايش هذا ياعالم...شي خيالي..
فهد:ايش رايك؟
حمد:افف عجيييب..مدلعنا من قلب..مسوي لنا كشك الذرة..وشاورما..ومسابح والعاب..وملاعب كرة..
راشد:ماشاء الله تبارك الرحمن..وااايد حلو المكان..صج احنا محتاجين لهالمكان نغير فيه جو..
فهد:استانسوا واستمتعوا بوقتكم..سووا كل اللي في خاطركم..
راكان:بنستمتع بكل دقيقة..
فهد:عن اذنكم..(يروح بعيد ويتصل بسارة)...ها جاهزة؟؟...ياللا انا بروح اركب السيارة وانت تعالي...مع السلامة..
ويطلع فهد وياسارة بالسر..ومحد يعرف هم وين رايحين..وديمة كانت عند امها...
ليلى:ودوم شنو هاااي..صج ريلج رهييب..وااايد حلو المكان..من متى عنده هالمكان وخاشه عنا؟؟
وديمة:من زمان وهو يشتغل فيه..بس هذا اول مرة يستخدم المنتجع..
ام سلمان:ماشاء الله وااايد حلو..الله يزيده..
نجلاء:كل هذا على سلامتج..عيل انا لصار فيني شي حمدان شو بيسوي؟؟
ام سلمان:وانت ليش تفاولين على عمرج؟؟
نجلاء:لا يعني بس نفكر..
يضحكون....
وديمة:ويي عمووه الله لايعيدها من اياام..
ام سلمان:اي والله..الله لايعيدها..
وديمة:عاد هااا ..ابيكم تستانسون..وتسوون كل شي بخاطركم..
نجلاء:انا جلست ساعة ونص اترجى حمدان نيي هني ونتم اسبوع وياكم..مارضى..لكن يوم اتصل فيه راكان وقاله مو ماتيي..في دقيقة بس وافق..صج انقهرت عليه..
يضحكون...
ليلى:ماعندج اسلوب اقناع..
نجلاء:لا حبيبتي..الرياييل مايستحون..عند حريمهم لسانهم ايش طوله..بس يوم يي واحد من الربع ويطلب منه طلب..قال تم من اول مرة..
يرن تليفونها...
نجلاء:جبنا طاريه..مرحبا......انا عند بيت اخوي.....لا مب جايه..
حمدان:ياللا نجلاء تعالي..
نجلاء:مب جايه بتم هني وياهم..خلك انت وياربعك..اللي ماترفض لهم طلب..
حمدان:عندي لج مفاجأة..
نجلاء:شنو؟؟
حمدان:جبر جى..
نجلاء:من صجك؟؟
حمدان:هيه..
نجلاء:طيرااان عندك..بااااي..
وديمة:ايش صاير؟؟
نجلاء:جبر..جبر وصل..
وديمة:صج..وناااسة عمي جبر..
نجلاء(تقوم):انا بمشي..
ام سلمان:وبنتج ماتبينها؟
نجلاء:الا ابيها..اكيد جبر بيسأل عنها..عطيني اياها..
دش فهد المنتجع ومعاه سارة...واتصل في وديمة ترد فيلتهم...وردت الفيلا...وشافت شي بيد فهد.....مب مصدقة وهي واقفة مكانها....
وديمة:خليفة!!
فهد(يبتسم لها):اي خليفة..
وديمة(راحت له وخذته منه):حبيبي ماما..(تبوسه)
فهد:ماقدرت اخلي شي بخاطرج..
وديمة:أحبك فهد..الله لايحرمني منك..
فهد:ولامنج..
وديمة:حبيبي..فديت خليفة..
موزة:ماما انا ابي اشوفه..
وديمة:الحين حياتي..خلينا نقعد..
ويقعدون...ويلاعبون خليفة...
صوب بيت بوراشد....
ام راشد:اشفيج على البنية؟
شيماء:يمه اذتني..ماادري اشفيها..
الجوهرة:خليها تلعب ويالياهال..
شيماء:مب راضية..تصيح تبي ابوها..
ام راشد:انزين وديها عند ابوها..
شيماء:اتصل فيه ومايرد..ماادري من هذي اللي شاغلته عني..
شمة والجوهرة يضحكون عليها...
ام راشد:استحي على وجهج يابنت..تقولين هالكلام عن ريلج؟
شيماء:كل شي يجوز في هالايام يايمه..
ام راشد:صبري الحين اتصل فيه واقوله..
شيماء:لا تكفين يايمه كل شي ولايدري تركي بكلامي..بيعاقبني..
ام راشد:احسن زين يسوي فيج..
يرن تليفونها...
شيماء:هلا وغلا..هلا بالغالي..وينك فيه صرت احاتيك.........انا بعد كنت اقول اكيد قاعد تلعب ويالشباب وماتسمع التليفون..
ام راشد:يالجذابة..
يضحكون عليها...
تركي:اشفيها امج؟
شيماء:هاا ولاشي..مافيها شي تحاجي شمة..اقولك تعال خذ سارة..
ترد نجلاء عند ام سلمان وبناتها.....
ليلى:راضيتيه؟
نجلاء(تقعد):من؟
ليلى:بو الشباب..
نجلاء:لا طبعا..هو الغلطان هو اللي ويراضيني..هذا الناقص امشي ورى رجال..
تيي وديمة ومعاها خليفة..والكل يقوم ويتحمدلها بالسلامة....ويقعدون.....
ام سلمان:فديته ولدنا يهببببل ماشاء الله عليه..الله يحفظه ويخليه لكم..
وديمة:آآآمين..
نجلاء(تحاجي بنتها):شوفي ماما حصوه هذا خطيبج..من الحين حاجزينه لج..
وديمة:شنو عموه ماشيه بالعكس؟
نجلاء:هيه..ابى اختار ريلها من الحينا ومن غير شور ابوها..
ليلى:انت ليحين محترة منه؟
نجلاء:واااايد..
وديمة:افااا ليش؟
ليلى:علشان ذيج السالفة..
وديمة:وييي عاد عموه..وين قلبج الطيب؟؟
نجلاء:نسيته باابوظبي..انا اوريه..
ليلى:ليش تقسيين عليه؟
نجلاء:علشان يتعلم..الزوجة اولا ثم الباقي..
ليلى:الا في هالزمن..الباقي اولا ثم الزوجة..
وديمة:لاحبيبتي..عندي انا الزوجة اولا ثم الباقي..
ليلى:انت حالة خاصة..
ام سلمان:قولوا ماشاء الله.لاتسكونها بعين..ليش اللي صار لها بحياتها شوي علشان ماتكون اولا بحياة ريلها؟
وديمة:أي والله..فديت ريلي حبيبي..
نجلاء:اقول حبيبتي لاتمدحينه جدامي..لإن مابتستفيدين شي..لإن فديته ريلي محطني على كفوف الراحة..
ام سلمان:توج تقولين زعلانة منه..
نجلاء:نتدلع عليهم يامرت اخوي..بس علشان نسوي لنا قيمة..
ام سلمان:والله ماانتوا هينين..
تيي عائشة...
عائشة:يمه يمه جدتي جات..
الكل مستانس بهالطلعة..اللي يتمشى ويازوجته..واللي ياكل..واللي يلعب كرة..واللي يسبح..واللي يسولف ويالثاني...
وصارت الدنيا ليل..عقب مالكل تعشى من البوفيه الخاص اللي كان حاجزه فهد لهم..دشوا بيوتهم يريحون..علشان يقعدون من الصبح...وديمة رقدت موزة وخليفة..توه فهد دش الفيلا....
دخل البيت...شاف شموع..عرف ان في حركة مسويتها وديمة...شاف صندوق كبيييير على الطاولة وعليه ورود..فتح الصندوق...شم ريحة حلوة...حصل اغراض كثيرة في الصندوق...شاف بطاقة...
كل عام وأنت بخير حبيبي..
أحبك..
فهد(استانس)
وديمة(كانت واقفة وراه في الدري):كل عام وانت بخير..
فهد(لف صوبها):وانت بخير..كل هذا لي؟
وديمة:شوية صح؟
فهد:انت وجودج يغنيني عن هذا كله..تعالي..
وديمة:لا ماني جاية..
فهد:تعالي بقولج شي..
وديمة:لالا مب جاية..
فهد:ودوم تعالي..ولا صدقيني اييج على طول..
وديمة:لا ماابي ماابي..
فهد:صار عندنا موزة وخليفة وليحين على كلمة ماابي ماابي..ماكبرتي؟؟
وديمة:لا..
فهد(يبتسم):هذا اللي يعجبني فيج..تظلين ياهل في عيوني دوم..
وديمة:نعم؟؟..انا ياهل؟؟
فهد:اي مثل خليفة بالضبط..
وديمة:انزين ماعليه..مقبولة منك..مب قايلين شي..اليوم يومك..
فهد:اكيد اليوم يومي..يوم ميلادي..من قدي..
وديمة:استانس بروحك..وقطع الكيك بروحك..
فهد:فديت هالصوت الطفولي..تعالي..تعالي ياملونة..
وديمة:نعم؟؟..انا ملونة؟؟
فهد:اييه..الحياة كلها ملونة..بكل اللي صار لنا..وانت بروحج الوانج غير عن الحياة..تعالي..(يضحك)
وديمة:مستانس وتضحك..ماعليه يافهد..اعلم عليك..
فهد:عند ماما ولا عند بابا؟؟
وديمة:صدقني الحين اطلع من البيت..
فهد:اي سويها..لإنج ماتقدرين تطلعين..
وديمة:وليش واثق يعني؟
فهد:لإنج تحبيني..واللي يحب مايترك حبيبه..
وديمة(تنزل شوي شوي):وايد واثق من نفسك..
فهد:بالضبط مثل ماانت واثقة اني احبج..شكرا حبيبي انج تذكرتيني بهاليوم..
وديمة:تمنى امنية بهالليل..
فهد:اتمنى اني اتم معاج طول الدهر..واحنا بصحتنا وعافيتنا..وعيالنا حولنا..
وديمة:آآآآمين..
قطعوا الكيكة..وشربوا العصير...راحت وديمة تطل على الياهال...وردت....
وديمة:حياتي شتسوي؟
فهد:افكر..
وديمة:بشنو؟(تقعد)
فهد:بكل شي حلو..
وديمة:مثل..
فهد:انت..انت كل شي حلو بحياتي..عرفت معنى الحياة بوجود زوجة صادقة وامينة وتحب زوجها..عرفت معنى الحب ويااحبيبة خلصت حبنا لبعض..عرفت ان الدنيا حلوة بوجود زوجة وعيال يكونون حولي..نضحك جميع نستانس جميع..وان صادتنا مشكلة نحلها جميع..
وديمة:وانا بعد..قد ماكنت اكره الدنيا هذي لإني مريضة..حبيت الدنيا لإنك وياي..وصرت ماافكر بشي اسمه مرض..صرت امشي حياتي واعيش لحظة بلحظة وماافكر لا في باجر ولا امس..افكر بكل لحظة حلوة تجمعني فيك..عرفت يعني شنو الحب..عرفت يعني شنو الامل والتفاؤل..عرفت يعني شنو قوة وشجاعة..
فهد:يوم اللي تعبتي فيه..تعبت نفسيا وايد..حسيت الدنيا كانت تدور فيني وماادري ويني فيه..لاكنت اكلم حد ولا ارد على حد..بس كنت ابي اسمع انج بخير..كان اصعب يوم بحياتي..
وديمة:تدري فهد..لما تكون جنبي..احس براحة..تدري ليش؟..لإنك تمدني بطاقة..كل ماطاقتي تخلص..وجودك جنبي يزيد طاقتي..ويخليني اعيش من اول وجديد..
فهد:وانت وجودج جنبي يعطيني الراحة والسعادة..مهما صارت بينا مشاكل..نظل زوجين تحت سقف واحد..نحب بعض..وبينا كل شي حلو..تظل نبتة الحب اللي بينا تنبت..طول مااحنا نحب بعض..ونعاون بعض..ونبتسم لبعض بكل صدق..ونشجع بعض..تظل تنبت وتنبت..
وديمة:ماتوقف؟
فهد:لا..الوفي يظل وفي..واذا احنا اوفياء النبتة عمرها ماتوقف..
وديمة:وشنو تثمر؟
فهد:انت قولي..
وديمة:تثمر حبك لي..تثمر ابتسامتك لي..تثمر وجود عيالنا بينا..حتى هذا اللي سويته اليوم..هذا كله ثمار حبنا..
فهد:الحمدلله..الله يخلينا دوم لبعض..ولايحرمنا شوفة بعض..
وديمة:آآآمين..




تم بحمدلله



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 135
قديم(ـة) 31-12-2013, 01:00 PM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج


أتمنى إن الرواية حازت على إعجابكم ورضاكم..

أقولها بكل صراحة ومنكم من يدري بهالشي..كان جدا صعب بالنسبة لي اني اكتب نهاية الرواية..

لإني تعلقت فيها وايد..تعلقت بشخصيات كثيرة..تعلقت حتى بأحداثها..

استمتعت بكل موقف ان كان مبكي او مضحك..

يمكن تقولون كيف وانت اللي كاتبتها..بقولكم ماادري..

ماامدح في نفسي..بس انا طبعي جي اتعلق ببعض الشخصيات والمواقف..ومرات تصير اني أقرأ الموقف اكثر من مرة..

عانيت كثير وانا اكتب المواقف المبكية والحزينة..كانت من اصعب المواقف اللي تنكتب..لإن كان لازم اعيش جو حزين علشان اقدر اوصل الموقف بالطريقة الصحيحة..وماادري ان كان فعلا وصلت المواقف لكم او لا..

روايتي هذي كانت تحمل في طياتها الكثير من الرسائل..أتمنى إنها وصلت..

في شخصيات كثيرة استفدت منها بحياتي..حتى لو كنت انا من رسمها..


تعلمت اني اعطي من وقتي لغيري..واساعد غيري دام اني قادرة على المساعدة..وهالشي تعلمته من شخصية خالد..اني اعطي من غير مقابل..

شيماء..شخصية مرحة..عايشة حياتها بكل معانيها..حتى وان عانت بحياتها ببعض المشاكل..الا انها بسرعة ترد لحيويتها ونشاطها وابتسامتها وغشمرتها الدايمة..شخصية جدا ممتعة واحب وجود مثل هالشخصيات بحياتي..

شخصية قوية..جبل مايهزك ريح..عنده التفاهم والحوار اول الامور..وثم يستخدم الطرق الثانية..حنون بمعنى الكلمة..يعرف كيف يتصرف بإختلاف المواقف..حزة الشغل شغل..وحزة البيت بيت..بصراحة حبيت شخصية فهد جدا..تعلمت اني ادرس الموضوع من كل جوانبه ومااحكم على غيري..اتصرف بعقلانية..فهد انسان رائع واتمنى وجود مثل هالشخصية في مجتمعاتنا..

وديمة..الانسانة الحساسة..اللي فيها حياة ولكن مرضها طغى على حياتها الحلوة..شخصية دلوعة..تحب تمارس طفولتها بأي وقت..وان كانت في بيت ابوها او وزجها..او حتى وجود عيالها وياها..شخصية تكون ضعيفة في بعض المرات..لكنها اجذبت رجل بحركاتها وطفولتها وذوقها في لبسها..انسانة تهتم بمظهرها الخارجي جدا..اهتمامها بمظهرها وشكلها خلى زوجها يهتم فيها اكثر ويعتني فيها اكثر..كون انها تدلعه وتلبي طلباته..

شخصية جذبتني بطريقة تعامله مع الجميع..احترامه لأمه وابوه..حنيته لخواته واخوانه وعياله..تعامله الراقي ويامرضاه..نصايحه اللي تخلي الواحد غصب يسمع له وياخذ بالنصايح..نظرته وكلامه تساعد على الانسان يتعدى مرحلة الصعب ويوصل مرحلة السهل..كلامته ترن بإذني..تعلمت من نصايحه ان الانسان مهما واجهته مصاعب لازم يستمر لإن الحياة بعدها ماوقفت..طبعا عرفتوا اقصد من..الدكتور راشد..

الدكتور شاهين..استاذ بالجامعة..تعلمت منه اني مااحكم على شي قبل لأجربه..وماينفع اقول مستحيل ومايصير على شي بعدني ماجربته..لازم ماايأس من اول مرة..احاول واحاول علشان اوصل للي ابيه..

شخصية بوفهد..أب يحب عياله..شخص يحب زوجته..قدر يحافظ على عيلته بالطريقة الصحيحة اللي ترضى رب العالمين..حاول قدر مايقدر انه مايحط فلوسه بالحرام..علشان مايتعاقب..مااهتم لكلام الناس علشان بس يشوف سعادة عياله..لإنه دوم يقول ان كلام الناس لايودي ولايجيب ولامنه فايدة..كفاية ان نصايحه كانت مثل الذهب..

انسان مرح..شخصية حلوة..تركي..الزوج اللي يحب يلعب بأعصاب زوجته..يتستمتع يوم يتغشمر معاها..يحبها لكن بطريقة تختلف عن الباقي..شخصية مليانة حياة..مايفكر بأي هم..يفكر بس بالشي اللي يسعده..كفاية انه حصل من يكمله..

راكان..الزوج الصبور..اللي صبر ونال..ماقال اترك بنت الناس واتزوج غيرها علشان يجيني ولد..لإن مثل مالرجال يبي فالمرة تبي..حاول يتصبر ويصبر زوجته..حاول يعيشها بأمل وتفاؤل ان مازال جدامهم وقت لتحقيق حلمهم..وفعلا تحقق حلمهم..لإنهم حطوا يدهم بيدين بعض وتقربوا من الله اكثر فاكثر..ورب العالمين مارد دعوتهم..

شخصية راائعة..شخص بار بأمه درجة اولى..يحط امه بالمقام الاول..يهتم جدا فيها..ودوم يحب ان امه تكون راضية عليه..مستعد يضحي بأي شي مقابل يشوف امه مستانسة ومرتاحة البال..بره بأمه خلت علاقته فيها تكون قوية..كانت امه وصديقته بنفس الوقت..كانت من تداوي جروحه وتحل مشاكله وتهون عليه مصايبه..انسان رائع..ياليت ينوجد بهالزمن ناس يهتمون بوالدينهم مثل عبدالله..

حصة..علمتني ان اذا الشخص يحب حد لازم يقوله اني احبك..لإن مانعرف شيصير باجر..ويمكن يي باجر واحد منا مايكون موجود..وماقدرت اعبر له عن مشاعري..صرت لازم اعبر عن مشاعري اني احب كل اللي حولي..علشان مايي يوم واتحسف اني ماكشفت قلبي بحبي لهم..

وشخصيات كثييييييرة..محمد..احمد..حمد..شمة..الجوهرة..شيخة..ا م فيصل..الجدة..بوسلمان..ام سلمان..فارس..عيسى..تميم..نجلاء..جبر..حمدان..ام فهد..كاملة...وغيرهم........



أتمنى إني وصلت ولو الشي القليل لكم..

أشكركم من كل أعماق قلبي على المتابعة المستمرة..خاصة من كان يزودني بردوده الدائمة اللي كانت بالنسبة لي حافز كبييير للإستمرار..حتى اللي قيموني شكري واصلهم..أيضا من كان يساعدني خلف الكواليس..أشكرهم على انهم تحملوني فترة طويلة..واقولهم جزاكم الله خير وفي ميزان حسناتكم..

أختكم:
أميرة الوهج



^
^
^
الكلمة الاخيره للكاتبة

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 136
قديم(ـة) 02-01-2014, 05:42 AM
همس الامومه همس الامومه غير متصل
©؛°¨غرامي فعال ¨°؛©
 
الافتراضي رد: حياة ملونة الكاتبة / أميرة الوهج؛كاملة


شكككككككككككرا على الروايههههههههههههههه بصراحه اسلوبك جيد اتمنى للك التوفيق والى اللقاء

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 137
قديم(ـة) 02-01-2014, 05:47 AM
همس الامومه همس الامومه غير متصل
©؛°¨غرامي فعال ¨°؛©
 
الافتراضي رد: حياة ملونة الكاتبة / أميرة الوهج؛كاملة


شكككككككككككرا روعععععععععععه اسلوب ممتاز الروايه جدا مشششششششوقه يعطيك العافيه الى اللقاء وننتظر اجديد

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 138
قديم(ـة) 06-01-2014, 07:59 AM
صورة روح لكويت الرمزية
روح لكويت روح لكويت غير متصل
©؛°¨غرامي فعال ¨°؛©
 
الافتراضي رد: حياة ملونة الكاتبة / أميرة الوهج؛كاملة


يسلموووووو يسلمووووووووو روووووووعععه
يعطيج العافيه جد روعه

الرد باقتباس
إضافة رد

حياة ملونة الكاتبة / أميرة الوهج؛كاملة

الوسوم
أميرة , ملونه , النهي , الكاتبة , حياة
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
محطات (19)مع أبو رتيل صمت شامخ ديوانية الاعضاء - متنفس للجميع 1287 26-03-2017 05:50 PM
حياتي عذاب / الكاتبة : تكفيني العبرة ، كاملة sandybill روايات كامله - يتم نقل الرواية هنا بعد اكتمالها 59 05-04-2016 09:01 PM
هذا الغرام يا صاحبي اللي يقولون ؟ و إلا هذي لعبته ؟ / بقلمي ●• نورا بنت فهد •● أرشيف الروايات المغلقة - لعدم إكتمالها 537 30-07-2012 11:20 PM
رواية أميرتي / بقلمي , كامله *خجل* روايات كامله - يتم نقل الرواية هنا بعد اكتمالها 91 27-04-2012 02:43 AM
رواية إنت لمين ؟ / بقلمي قلب يآآسر أرشيف الروايات المغلقة - لعدم إكتمالها 8 31-07-2010 09:35 AM

الساعة الآن +3: 11:46 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1