غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات كامله - يتم نقل الرواية هنا بعد اكتمالها
الإشعارات
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 23-12-2013, 03:36 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي حياة ملونة الكاتبة / أميرة الوهج؛كاملة




ـــ




السلام عليكم ورحمة الله وبركاته

صبحكم ربي بالخير والمغفره

كيفكم مع الاجواء الحلوه هادي

ان شاء الله مو تعبانين ولا فيكم سخونه ربي يبعدها عنكم وعن احبابكم بإذن الله

حابه انقلكم رواية حلوه عجبني عنوانها وان شاء الله تعجبكم

تفضلوا الفصول الاولى

قراءة ممتعة




ـــ


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 23-12-2013, 03:37 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج







اليوم بإذن الله راح أبدأ معاكم بروايتي الجديدة تحت عنوان " حياة ملونة"..فيها المتعة وفيها المغثة..فيها الزين وفيها الشين..فيها الطيب وفيها الخبيث..فيها مشاكل وفيها بلاوي..فيها محاسن وفيها مساوئ..فيها شخصيات أشكال وألوان..بإختلاف الاعمار..وكل بيت يعيش حياة وطريقة مختلفة عن غيره..كل شخصية لها شخصيتها وتختلف عن غيرها..بتشوفون شخصيات تضحك..شخصيات تبكي..شخصيات تقهر..شخصيات حلوة..ممكن تحبون بعضهم وتكرهون البعض..
أبيكم كلكم تعيشون ويااأحداث هذي الرواية..واللي ابيه منكم انكم تناقشوني بكل حدث او موقف قريتوه..ان كان هذا الشي ايجابي او سلبي..انا مستعدة أقرأ نقشااتكم وتعليقاتكم..وأتمنى لكل من يقرأ روايتي هذي يكتب تعليقه ويكون معاي فصل بفصل..
والشي الاهم اني لايمكن أبدأ بكتابة رواية واتركها من غير نهاية..الكل يتطمن بإن روايتي هذي لها نهاية..وبإذن الله راح انزل الفصول كلها..وعلى فكرة راح تصاحب الفصول بعض الصور والاناشيد اللي بتعيشكم الجو أكثر وأكثر..
ونقطة مهمة حابة أذكرها لكم..ان قريتوا اي موقف او اسم تشابه مع موقف او اسم حقيقي فعرفوا انها صدفة..لإن هذي الرواية ماهي تقليد لأي حدث صار..هذي كلها من بنات افكاري..
ولاتنسوني من دعواتكم..


أختكم/ أميرة الوهج


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 23-12-2013, 03:40 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج



" الفصل الأول "

في بيت بوسلمان..

حمد يرد البيت..يحصل خواته الصغار قاعدين في وسط الصالة يحلون واجباتهم..
حمد:وين أمي؟
مريم:مااعرف..
حمد(يقعد):يعني في البيت ولا طالعة؟
عائشة:طالعة..
حمد:مع من طلعت؟
عائشة:مانعرف..
حمد:حمدلله والشكر قاعدين في البيت وماتعرفون شي..وبعدين هني مب مكان دراسة..روحوا قعدوا بغرفكم..(طلع تليفونه)
مريم:أمي قالت عادي..
حمد:جاهزة للرد انت..آلو..يمه وينج فيه؟.........ليش؟............من متى؟...........وانا ايش دراني...........انزين.....مااعتقد اييكم........ايش تبون؟............بحاول..
ام سلمان:مافي شي اسمه بحاول..الحين تيي وتييب معاك الاغراض..........حمد لاتأذيني.........مع السلامة..من أمس ماراد البيت..أنا أدري هالولد وين يروح..
وديمة:ماعليج منه..خلي ربعه ينفعونه..شنو قالج بيي؟
ام سلمان:غصب عنه لازم يي..مسكي شربي العصير..
وديمة:ماابي ماما ماني مشتهية..
ام سلمان:لازم تشربين..لاتقعدين تتدلعين عندي..نبي نطلع من هني..تراني مااحب قعدة المستشفى..يودي..
وديمة(قعدت تشرب العصير شوي شوي)
ام سلمان قعدت تطالع تلفزيون..لين مااندق الباب..ودخل خالد....
خالد:السلام عليكم..
الجميع:وعليكم السلام..
خالد:حمدلله على السلامة..ايش صار فيج؟
وديمة:ماادري والله هالمرض من وين طلع لي..
خالد:أخبارج الحين؟
وديمة:الحمدلله..اقولهم ابي اطلع بس مايخلوني..
ام سلمان:ماتقدر توقف على ريولها وتبي تطلع..
خالد:لازم تديرين بالج على نفسج..
ام سلمان:اخبارك يمه؟
خالد:الحمدلله..بغيت اييكم امس..بس ماقدرت رديت من الشغل تعبان ونمت..
ام سلمان:يعطيك العافية..والله مشتاقين لك..مكانك يبين في البيت..
خالد:هذا انتوا تشوفوني من وقت لوقت..
ام سلمان:انا ابيك تكون جدام عيني..
خالد:الدكتور ايش قالها؟
ام سلمان:ايش قالها؟..قال لازم تهتم بصحتها وتاكل اكل صحي..
وديمة:انا دايما اكلي صحي..
ام سلمان:أي باين..ماادري من ياكل هالاشباس والحلويات الملونة..
خالد:انت صغيرة علشان تاكلين هالاشياء..
وديمة:شسوي احبهم..
خالد:مب زين لج علشان السكر..
ام سلمان:عيزت وانا اقولها..ماتسمع الحجي..والله لو ابوها يدري عن هالحلويات ليسنعها عدل..
وديمة:شنو مسوية جريمة!!
ام سلمان:أي جريمة..كل جم يوم طايحة علينا ياالسكر عندج مرتفع ولا نازل..ولا فيج فقر دم..
وديمة:اشوف مليتوا مني..
ام سلمان:اقول الزمينا بسكوتج..
خالد:وامي صاجة..اخبار ليلى؟
ام سلمان:الحمدلله..ماجاتنا من يومين..خالد وايد مأذيها..
خالد:الله يعينها..ابوي في الدوام؟
ام سلمان:أي في الدوام..
وقعدوا يسولفون لي مااندق الباب...ويدخل حمد...يحصل خالد قاعد..يحط الاكياس ويطلع...
ام سلمان:لاحول ولاقوة الا بالله..ماادري هالولد متى بيعقل..
خالد(قام):انا ماشي..
وديمة:بدري..
خالد:ماعليه اييكم مرات ثانية..
ام سلمان:الحين انت بتحط عقلك بعقل ياهل..اقعد وماعليك منه..
خالد:انا اصلا عندي شغل..ياللا اشوفكم على خير..سلموا على ابوي..وانت يامسطرة اهتمي بصحتج..
وديمة:مسطرة؟!!..انت مانسيتها؟
خالد:لا ليش انساها يوم اشوفها مثل ماهي ماتتغير.
وديمة:الله يسامحك..
خالد(ابتسم):مع السلامة..
الجميع:مع السلامة..
عقب خمس دقايق...يدخل حمد...عقب السلام......
ام سلمان:انت ماتستحي تشوف اخوك وتطلع من الغرفة تقول شايف عدو..
حمد:ليش انا شايف من شايف عدو..
ام سلمان(عصبت):صج ماتستحي على وجهك..قوم روح..انا الغلطانة اللي قايلة لك تعال..
حمد:ياسلام..اشوف صرتي تعطينه وجه زيادة عن اللزوم..
ام سلمان:ليش ان شاء الله..هو ولد الجيران؟
حمد:والله ياليت..
وديمة:حمد اشفيك انت؟
حمد:انتوا اللي اشفيكم علي..
ام سلمان:قوم اطلع برع..
حمد(قام):طالع..بس باجر بتتحسفين لأنج عطيتيه وجه..(طلع)
وديمة:ماعليج منه..صار عمره 24 سنة كأنه واحد مراهق..
ام سلمان:الله يسامحه على كل اللي سواه فينا..
وديمة:ادعي له بالهداية..
ام سلمان:دوم ادعي له..والله مشتاقة لخالد..لضحكته وسوالفه..حتى يوم يعصب..
بوسلمان يدخل...
بوسلمان:السلام عليكم..
الجميع:وعليكم السلام..
بوسلمان:أخبارج وديمة؟
وديمة:الحمدلله..
بوسلمان:الممرضة عطيتج ابرة الانسولين؟
وديمة:لا ليحين..
بوسلمان(دق على الممرضة)
وديمة:بابا يعني لازم آخذها؟
بوسلمان:ردينا على نفس السالفة..
وديمة:بابا والله العظيم تعبت..
بوسلمان:تحملي..
الممرضة(تدخل):نعم؟
بوسلمان:وين ابرة الانسولين؟
الممرضة:الحين بجيبها..
بوسلمان:المفروض تعودتي..صار لج سنتين تاخذينها..
ام سلمان:خالد جى وسلم عليك..
بوسلمان:الله يسلمه..
في بيت ليلى...خالد يكون عندها....
ليلى(تضيفه الشاي):أخبارها وديمة؟
خالد:الحمدلله..
ليلى:ماقالوا متى بيطلعونها؟
خالد:لا والله ماسألت..عيل وين ريلج؟
ليلى:ليحين مارد..
خالد:قولي لي مب ناوية تضعفين؟
ليلى:ايش تبي فيني انت؟
خالد:شنو شاابي فيج..باجر ليى ريلج يبي يتزوج عليج انا مايخصني..
ليلى:خالد!!
خالد(يضحك):أحسن علشان تضعفين..
ليلى:والله ريلي عمره مايفكر ياخذ علي وحده..وين يحصل وحده أحسن مني..
خالد:بيحصل لاتخافين انا بساعده..
ليلى:خالد عاد عن السخافة..
خالد:الله يذكر ذيج الايام اللي ليلى بجسمها الرشيق..والكل عينه عليها..راحت ذيج الايام..
ليلى:لاتحسب مااسوي رجيم..
خالد:لا بحسب..والله مااشوف شي تغير فيج..
خالد الصغير يركض اول ماشاف خالد...
خالد الصغير:خالي خالي..
خالد:فديت خلودي..تعال حبيبي..(ويلمه)..اشلونك؟
خالد الصغير:بخير انا..وينك؟
خالد:كاني عندك؟
خالد الصغير:دورت عليك وايد وايد..وماتجي بيتنا..
خالد:كنت مشغول شوي..قولي اخبار الروضة؟
خالد الصغير:زينة..بس الابلة اليوم هاوشتني..
خالد:أفا ليش؟
خالد الصغير:علشان طقيت بنية..
خالد:وليش طقيتها؟
خالد الصغير:انت انت ماشفت شعرها..صايره كأنها أسد..خفت منها انا..عطيتها كف على طول..
خالد:هذا ولدج خطير..ماعنده يمين يسار على طول اللي في خاطره يسويه..وبعدين شنو صار؟
خالد الصغير(يضحك بإنتصار):صاحت..
خالد:لا والله..وانت ايش تبي في شعرها؟
خالد الصغير:هي قعدت عندي..وانا ابي آكل ساندويتشي شعرها يروح في حلجي..
خالد:قرفتني الله يقرف اليهود..
ليلى(تضحك)
خالد:في هذي معاك حق..
بوخالد يدخل البيت...
بوخالد:السلام عليكم..
الجميع:وعليكم السلام..
بوخالد(يسلم على خالد):حيالله خالد..اشلونك؟
خالد:الحمدلله..انت شاخبارك؟
بوخالد:بخير الحمدلله..حياك تفضل..
عقب اسبوع من هالاحداث...في بيت بوسلمان...يدخل بوسلمان البيت...وعقب السلام والكلام...
بوسلمان:وين بنتج؟
ام سلمان:أي وحده فيهم؟
بوسلمان:وديمة؟
ام سلمان:فوق بدارها..
بوسلمان:خذت الابرة؟
ام سلمان:ماادري عنها من العصر ماانزلت..بس تكفى ياعبدالرحمن شوي شوي عليها..
وديمة قاعدة تسولف مع رفيجتها في التليفون...يدخل بوسلمان...
وديمة:باتصل فيج عقب..مع السلامة..(قامت)..
بوسلمان(قرب منها):خذتي ابرتج؟
وديمة(بخوف):لا..
بوسلمان:وبعدين معاج؟..تراج تعبتيني..
وديمة:بابا ماابيها..تعبت منها..
بوسلمان:وديمة حجي ياهلو ماابيه..الابرة بتاخذينها يعني بتاخذينها..لاتناقشيني..قومي عطيني اياها..
وديمة:خلاص باخذها..
بوسلمان:اليوم انا بعطيج اياها بنفسي..قومي جيبيها بسرعة..
وعقب ماجابتها...
وديمة:بابا تكفى شوي شوي علي..لاتعورني..
بوسلمان:ماني معورج..بس لاتحركين..
تحت...حمد ينزل ويروح المطبخ...
حمد: انا جوعان في عشاء؟
ام سلمان:هذا اللي انت فالح فيه..الهياته والاكل..حتى الدراسة مايندرى وين واصل فيها..الناس كلهم تخرجوا اللي في عمرك وانت بعدك قاعد..
حمد:كل واحد حر بحياته..
عقب العشاء...
ام سلمان:عبدالرحمن شمسوي في البنت؟
بوسلمان:ولاشي..
ام سلمان:عيل اشفيها؟
بوسلمان:بنتج وانت تعرفينها..
ام سلمان:خلك من وديمة وروح شوف ولدك حمد..
بوسلمان:اشفيه حمد بعد؟
ام سلمان:شنو اشفيه..ماتسأل عن دراسته ولا عن هياته..انت ماتدري ان اول امس ماكان بايت في البيت..
بوسلمان:تعبت من حمد..
ام سلمان:لازم تتفيج له..
بوسلمان:ووديمة بعد لازم اتفيج لها..لو تركتها بدلعها بتروح منا..
ام سلمان:الله يصبرنا..
في بيت خالد...قاعد مع واحد من ربعه....
خالد:ايش تشرب؟
عبدالله:نسكافيه..وحط فيه حليب..
خالد راح المطبخ..وتم عبدالله يقرأ الجريدة...خالد جى وفتح التلفزيون...
عبدالله:وين النسكافيه؟
خالد:انتظر الماي يسخن..(يقعد)
عبدالله:اشفيك؟
خالد:ولاشي..(قام وراح المطبخ)
عبدالله(حس ان خالد فيه شي راح المطبخ):اخبار أهلك؟
خالد:الحمدلله..
عبدالله:اختك اشلونها صارت احسن؟
خالد:ماادري عنها..ماكلمتها ولاشفتها..
عبدالله:قوم روح اتصل فيها وانا بسوي النسكافيه..
خالد:ماله داعي اتصل..
عبدالله:قلت لك روح..هذي اختك اشلون ماتسأل عنها..
خالد(هد اللي بيده وراح قعد في الصالة)
عبدالله خلص وراح له..شافه قاعد يقرأ الجريدة..
عبدالله:احلف ان مافيك شي..
خالد:ماابي احلف بس مافيني شي..قولي شنو مشتهي تتعشى؟
عبدالله:خلني اشرب النسكافيه وعقب بقرر..
وديمة تكون زاهبه وقاعدة بالصالة...ام سلمان تيي من المطبخ...
ام سلمان:عيل وين اخوج؟
وديمة:معرس ساعة لين مايتزهب..
ام سلمان:الله يهديه..
حمد ينزل...
ام سلمان:خذ راحتك يمه..بقى وقت..
حمد:شسوي يعني ماارقد..مااتزهب..ولا تبوني اطلع جدام الناس متبهدل..
وديمة(قامت):تكفى لاتعصب ماابي يصير فيني شي وانا في الطريج..
حمد:امشي وانت ساكتة..
في بيت بوفهد...
فهد يرد البيت مع ابوه...
ام فهد:يعطيكم العافية..
الجميع:الله يعافيج..
ام فهد:اكيد يواعه..
بوفهد:أي والله يواعه..نجبوا العشاء..انا رايح ابدل..
فهد:اشلونها الغالية؟
ام فهد:فديت الغالي انا..بخير دامي اشوفك بخير..
فهد:والله شوفتج يايمه تسوى عندي الدنيا كلها..
ام فهد:يابعد عمري..ترى انا وخالتك قاعدين اندور لك على عروس..
فهد:صج..وحصلتوها؟
ام فهد:يعني انت تبي تتزوج؟
فهد:وليش مااتزوج..
ام فهد:والله هذي الاخبار الطيبة..عيل خلاص من باجر بروح مع خالتك وبنختار لك زينة البنات..الله لايحرمني منك يافهد..
فهد:ولامنكم..توج تقولين ندور لك على عروس!
ام فهد:قاعدين نفكر بجم وحده بس مادريت انك تفكر بالزواج..دام تفكر خلاص من باجر على طول بنتحرك..
فهد(قام):انا رايح ابدل..
الساعة 10 في الليل...يرجع البيت بوسلمان..وأول مايقعد...
بوسلمان:وين العيال؟
ام سلمان:راقدين..
بوسلمان:ووديمة وين؟
ام سلمان:ليحين مارجعت..راحت بيت عمتها تذاكر مع شيخة..
بوسلمان:الله يوفقهم..وحمد وينه؟
ام سلمان:ماادري عنه..
بوسلمان:عيل من بيرجع وديمة؟
ام سلمان:حمد..
في بيت العمة ام فيصل...في غرفة شيخة...
شيخة:وديمة مافهمت هالمسألة..
وديمة:كم مرة لازم اشرح لج..
يرن تليفونها...
وديمة:شيخو هذا ابوي..
شيخة:انزين ردي..
وديمة:ماابي ارد..
شيخة:ردي وعن الدلع..
وديمة:آلو..وعليكم السلام......انا بخير.......اي قاعدة ادرس مع شيخة.......لا ماخذتها.....اي تعشيت معاهم.........لا ماجبت الادوية معاي.........ماادري متى بيي بياخذني.....هو خبرني انه بيتأخر......لا بابا ماابي اتعبك....باتصل فيه وبشوف........ان شاء الله اكيد باخذها........ان شاء الله ماراح انسى...مع السلامة..
شيخة:أكيد يوصيج على الابرة والادوية..
وديمة:أف أف من المرض..تعبت..ولا بعد انا وايد محظوظة ابوي دكتور..يعني ابوي مالقى تخصص غير الطب!!
شيخة:صج ماعندج سالفة..ايش حلاته ان ابوج دكتور وله هيبه..
وديمة:انت ماتتخيلين ابوي ايش كثر يحاتيني..وايد يراقبني..تعبت من المرض ياشيخة..
شيخة:حمدي ربج واشكريه..غيرج عنده مرض مايندرى اشلون حالهم..انتي على الاقل تقدرين تسوين كل شي مع مرضج..لكن غيرج لا..
وديمة:الحمدلله على كل حال..
شيخة:وديمة ماقلتي اخبار اخوج خالد؟
وديمة:وعليه خالد كاسر خاطري..عايش بروحه بين اربع حيطان..
شيخة:انزين اقنعوه يرد البيت..
وديمة:امي حاولت وياه بس ماكو فايدة..
شيخة:وابوج؟
وديمة:ابوي مو ذاك الزود وياه..
شيخة:انزين انا عندي لج فكرة..
وديمة:شنهي؟
شيخة:ايش رايج تروحين تعيشين معاه..
وديمة:اعيش معاه؟؟..ليش؟
شيخة:مو انت تقولين انه كاسر خاطرج وعايش بروحه..
وديمة:أي..
شيخة:انزين خلج معاه..كسبي اخوج..حتى لو عنده ربع بعد غير يوم ان هله يكونون عنده..
وديمة:بس ابوي ماراح يوافق..
شيخة:اقنعي امج وامج بتقنعه..
وديمة:مستحيل ابوي يوافق..
شيخة:جربي ماانت خسرانه..
وديمة:ابوي عصبي بشكل ماتتصورين..وهالفكرة بتخليه يعصب اكثر ولا بعد وانا مريضة اكملت..خليني اتصل في حمد قبل ليعصب ابوي..
حمد كان قاعد مع ربعه....واول مارن تليفونه راح بعيد....
حمد:خير ايش تبين؟......انا مااقدر امرج........باتي في بيت عمتي اشفيها........واذا ماخذتيها ايش بيصير........والله ابتلشنا فيج انت بعد.......وليش ماخذتي ادويتج معاج؟.......خلاص بشوف......(سك التليفون)..دريولهم انا!!
باجر العصر...في بيت خالد....ليلى قاعدة ترتب البيت مع الخدامة...يدخل خالد البيت...
خالد:السلام عليكم..
ليلى:وعليكم السلام..
خالد:يعطيج العافية..
ليلى:الله يعافيك..بيتك وايد مغبر وحالته حاله..وملابسك مابقى شي منهم نظيف..
خالد:شاسوي..هذي حياة العزوبية..
ليلى:ليش ماترد البيت ياخالد؟
خالد:لاتناقشيني في الموضوع..
ليلى:ليش؟
خالد:وين خلّود؟
ليلى:ماجبته معاي..وديته بيت ابوي..
خالد:الله يسامحج..انت تعرفين اني متعلق فيه وايد..
ليلى:خفت يلعوزني وانا اشتغل..قولي ايش تبي اسويلك عشاء؟
خالد:والله في خاطري محاشي..
ليلى:من عيوني الثنتين..
يوم ان الساعة صارت 10 ونص..في بيت بوفهد...يرن تليفون البيت...تروح الخادمة وترد.....
بوفهد:يبه فهد باجر بييك بو جاسم الشركة واتفق معاه على المشروع علشان نخلص..
فهد:يعني انت خلاص موافق على المشروع؟
بوفهد:والله انا درست المشروع مع المهندس والمحامي وطلع كل شي قانوني ومافيه مشاكل..وبعدين هالمشروع له ارباح كثيرة..ولا انت ايش رايك؟
الخادمة:مدام..تليفون..
ام فهد:من؟
الخادمة:ام سعد..
ام فهد:عطيني التليفون..
فهد:والله ماادري يايبه..انا ماخلصت دراستي للمشروع..والمهندس مبارك مسافر..وانا اعتمد عليه بهالشغلات..
بوفهد:ومتى بيرجع مبارك؟
فهد:يمكن عقب جم يوم..
بوفهد:ليش طول هناك؟
فهد:يقول في أخطاء وايد مسويينها..وقاعد وياهم علشان يمشون على المخطط..
بوفهد:قوله خله يستعجل..وانا بطرش مهندس من المهندسين اللي عندنا..
فهد:ان شاء الله..
ام فهد:خلاص اتفقنا..ان شاء الله....الله يسمع منج......تسلمين وسلمي على البنات..مع السلامة..هذي اختي تسلم عليكم..
الجميع:الله يسلمها..
بوفهد:خير ياام فهد ايش عندها اختج متصلة هالحزة؟
ام فهد:عندها كل خير..متصلة تخبرني عن ناس علشان نروح نخطب بنتهم حق فهد..
بوفهد:ومن بنته؟
الصبح..على الساعة 6 الكل قاعد يتزهب علشان يروح الدوام...في بيت بوسلمان....
وديمة قاعدة تلبس عباتها...
ام سلمان:ياللا وديمة تعالي تريقي بتتأخرين على شيخة..
وديمة:ماني مشتهية يمه..لرحت الجامعة بتريق مع شيخة..
ام سلمان:ويمكن شيخة متريقة..
وديمة:لا ماهي متريقة..
بوسلمان:وديمة..
وديمة:لبيه بابا..
بوسلمان:تعالي هني..
وديمة(تقول في بالها:الله ياستر):نعم بابا..
بوسلمان:كلي هالبيض وعقب روحي الجامعة..
وديمة:بس انا....
بوسلمان:كلي وعقب تريقي مع شيخة..
وديمة:بس...
بوسلمان(شوي ويعصب):وديمة..
وديمة(بلعت ريقها):ان شاء الله..(قعدت)
بوسلمان(قام):بروح اشغل السيارة..مريم عائشة لاتأخرون..
ام سلمان:يعني لازم تردين على ابوج علشان تزعلين..انت تعرفين ابوج..
وديمة(شوي وبتصيح):يعني حتى الاكل غصب..حرام عليكم..
ام سلمان:كلي بسرعة ليي ابوج ويشوفج ماكلتي..
وديمة:مريوم ايش رايج تاكلين هالبيضة؟
مريم:ماابي..شبعت..
ام سلمان:وديمة كلي وانت ساكتة..
وديمة:ماما انت تعرفين اني مااحب البيض..
ام سلمان:هذا ابوج قاعد يي..كلي بسرعة..مريم تعالي خذي فطورج وحطيه بشنطة الاكل..وانت بعد عائشة..
وفي هالوقت من الصبح..فهد ينزل تحت ويقعد يتريق...ام فهد تنزل تحت....
ام فهد:صباح الخير..
فهد:صباح الورد يالغالية..
ام فهد:أحلى صباح عندي يوم اشوف ابتسامتك..
فهد:ليش قايمة بدري؟
ام فهد:قولي انت شالي مقعدك هالحزة؟
فهد:عندي شوية شغل في الشركة ..
ام فهد:الله يعطيك العافية..عاد اليوم انا وخالتك بنروح نشوف البنت..
فهد:يمه تكفين ابيها مثل المواصفات اللي قلت لج عنها..
ام فهد:ان شاء الله..
الخادمة:استاذ فهد..
فهد:نعم..
المربية:السايق بيسأل..اي سيارة تبيها..
فهد:مرسيدس البيضة..انزين يمه..
ام فهد:ان شاء الله..
في سيارة شيخة....
وديمة:مع وجهج انت ليش متأخرة اليوم؟
شيخة:لامتأخرة ولا شي..الا مثل كل مرة..انت اشفيج معصبة علي؟
وديمة:أبوي اكو غيره..
شيخة:حسبتج متهاوشة وياحمد..
وديمة:حمد وين اشوفه من صباح الله خير..
شيخة:ماقلتي لي ليش معصبة؟
وديمة:ابوي الا ملزم علي آكل بيض..
شيخة:ماحصل الا انت تاكلين بيض؟
وديمة:شفتي حظي..
شيخة:وايش سويتي؟
وديمة:ولاشي كلته غصب..بغيت ارجع..
شيخة:يعني متريقة؟
وديمة:لاحبيبتي بتريق معاج علشان اغير طعم البيض..
في بيت بوسلمان...تروح ام سلمان غرفة حمد....
ام سلمان:حمد..حمد قوم..
حمد(من تحت اللحاف):خير..ايش تبون فيني؟
ام سلمان:قوم.
حمد(يقعد):ماادريت اني اشتغل علشان مقعديني هالوقت؟
ام سلمان:والله اعتقد ان وراك جامعة..
حمد:بس انا ماطلبت من حد يقعدني..
ام سلمان:ليش ماانت رايح الجامعة؟
حمد:لا مب الحين..
ام سلمان:انزين قوم ابيك توصلني بيت امي..
حمد:وجدتي شالي مقعدها هالحزة علشان تروحين لها؟
ام سلمان:حمد لاتقعد ترادد..انزل وصلني..
حمد:زين..
وراحت ام سلمان بيت امها..وحصلتها قاعدة تشرب شاي والتلفزيون شغال..
ام سلمان:اشلونج يمه؟
الجدة:الحمدلله بخير..انتوا اخباركم؟
ام سلمان:شاقولج يايمه..تعبت من العيال..ماادري الحق على من ولا من..
الجدة:خير يمه ايش صاير؟
ام سلمان:حمد من صوب..ووديمة من صوب..وخالد من صوب ثاني..مااعرف شاسوي..
الجدة:خالد ليحين مارد البيت؟
ام سلمان:لا يمه مارد..
الجدة:الله يهداه..قومي اتصلي فيه وعطيني احاجيه..
ام سلمان:ايش تبين تقولين له؟
الجدة:انت عطيني التليفون..
ام سلمان:ان شاء الله..(واتصلت فيه)..
الجدة:وعليكم السلام اشلونك يمه خالد؟
خالد:هلا جدتي..انا بخير انت اشلونج واشلون صحتج؟
الجدة:عايشين..الحمدلله..وينك فيه؟
خالد:في الدوام..
الجدة:انزين اسمع تعال تغدى معاي اليوم انزين..قاعدة بروحي وماعندي حد..
خالد:ان شاء الله جدتي..تامرين امر...مع السلامة..
الجدة:هذا خالد وخلاص..وبعد من بقى؟
ام سلمان:خالد راسه يابس ماراح يقتنع بكلامج..
الجدة:انت ماعليج انا بتصرف..وبعد من متعبج؟
ام سلمان:حمد..ياليت يايمه لو تاخذينه عندج وتعلمينه السنع..
الجدة:اعلمه ليش مااعلمه..جيبيه عندي..قومي اتصلي فيه..
ام سلمان:يمه إذا خالد عندج حمد ماراح يي..
الجدة:لاحول ولاقوة الا بالله..وغير حمد من؟
ام سلمان:وديمة يايمه..
الجدة:اشفيها بنتي؟
ام سلمان:من يوم مامرضت وهي نفسيتها رايحة فيها..كل جم يوم تتزاعل مع ابوها..
الجدة:ليش؟
في الجامعة...شيخة ووديمة طالعين من المحاضرة...
شيخة:وديمة ياللا نمشي..ماابي أتأخر..
وديمة:يعني انا اللي ابي أتأخر..امشي..
وهم يتمشون..
شيخة:ايش رايج وديمة تيين تتغدين عندنا؟
وديمة:والله ياليت علشان ارتاح من مراقبة ابوي..ايش عندكم على الغداء؟
شيخة:بيض..
وديمة:شنو؟؟
شيخة(تضحك):اتغشمر..ماادري..الحين باتصل في امي وبسألها..وانت اتصلي في امج وخبريها..
على الغداء في بيت بوفهد..الخدم يروحون..ويظلون بوفهد وام فهد وفهد يتغدون....
فهد:يمه تراني مسافر الليلة..
ام فهد:وين؟
فهد:رايح لبنان..
ام فهد:وشموديك هناك؟
فهد:عندنا شغل..
ام فهد:والبنت؟
فهد:انتوا روحوا شوفوها وعقب يصير خير..
بوفهد:اتصلت في مبارك؟
فهد:أي يبه..وقال باجر بيرد..
بوفهد:وانت مب موجود؟
فهد:اتفقت معاه يلحقني في لبنان..نستغل الوقت..
ام فهد:وايشقد بتم هناك؟
فهد:احتمال اسبوع..
ام فهد:كل هذا؟
فهد:لولا الشغل جان مااطلع من عندكم..
بوفهد:خله يسافر..ويدير حلال ابوه..
في بيت بوسلمان...بوسلمان يقعد...
بوسلمان:عيل وين وديمة؟
ام سلمان:راحت تتغدى في بيت عمتها..
بوسلمان:اشفيها زعلانة مني؟
ام سلمان:لا شنو زعلانة..شيخة عزمتها وهي راحت..
بوسلمان:منيرة..ديري بالج عليها وايد..تراها ماتتبع وصفة الدكتور..وهذا مب زين لها..
ام سلمان:ان شاء الله..لاتحاتي وديمة تسمع الحجي..
بوسلمان:والله مااعتقد..مايندرى عنادها لوين بيوصلها..حمد وين؟
في بيت الجدة..قاعدة تاكل مع خالد....
خالد:الحمدلله..الغداء كان لذيذ..
الجدة:عليك بالعافيه يمه..قوم روح غسل ايدينك علشان ناكل فواكه..
خالد:ان شاء الله..
وهم ياكلون فواكه...
الجدة:تعزني ياخالد؟
خالد:اكيد..وهذا يبيله حجي؟
الجدة:ابيك تتزوج..
خالد:اتزوج؟؟
الجدة:أي يمه..تزوج..انت مب صغير..عمرك شوي وبيوصل 30..
خالد:مالي خاطر بالزواج..
الجدة:يايمه انسى سالفتك مع اخوك..تحصله هو مستانس ولاعلى باله..وانت ليحين قاعد بهمومك..
خالد:ماني مهموم..
الجدة:الا مهموم..عيل ليش عايش بروحك؟
خالد:جدتي هالبيت معطيني اياه من الشغل..وليش اخليه فاضي ومااسكن فيه..
الجدة:هذا عذر من اعذارك..روح عند امك وقولها ابي اتزوج..وعيش مع زوجتك..
في بيت العمة...في غرفة شيخة....
وديمة:شيخة عندج كافي..
شيخة:وإذا عندي ايش تبين؟
وديمة:عطيني اياه تكفين..والله في خاطري..
شيخة:روحي زين علشان ابوج يهاوشني..
وديمة:تكفين شيخة..ماراح اعلم حد ان انت اللي عطيتني اياه..بقول انا شريته..
شيخة:علشان تيين باجر وانت تصيحين ابوي زفني..
وديمة:ماراح يعرف..بعدين انا السكر عندي مضبوط وصار لي فترة احافظ عليه..
شيخة:الا قولي ابوج اللي يحافظ عليه..
وديمة:اللي هو..قومي جيبيه..
شيخة:وديمة والله اخاف..
وديمة:على مسؤوليتي..قومي..
في لبنان...في الفندق...فهد يكلم امه....
فهد:شفتوها؟
ام فهد:أي يايمه شفتها..
فهد:بشري..
ام فهد:البنت حلوة وعليها طول..وشعرها ناعم..وحليوة..بس وايد تستحي..
فهد:يعني ماكلمتيها؟
ام فهد:بلا بس ماتتحجي وايد تدري البنت تستحي..
فهد:يعني تحسين انها تنفعني؟
ام فهد:والله يايمه البنت مافيها عيب..ان شاء الله انت لرديت تعال بنفسك وشوفها..
فهد:على خير ان شاء الله..شاسمها يمه؟
باجر الصبح يصادف يوم الاربعاء...وديمة تنزل تحط كتبها على الكنب مع عباتها وشنطتها..
وتروح تقعد على طاولة الاكل....
وديمة:صباح الخير..
الجميع:صباح الخير..
بوسلمان:استعجلي وديمة علشان مانتأخر على خواتج..
وديمة(فاجه عينها مستغربة):وين؟
بوسلمان:ناسية ان اليوم عندج موعد..
وديمة:موعد!!
بوسلمان:أي موعد..علشان السكر..
وديمة(منصدمة..وتفكر بشي واحد..بالكافي اللي كلته امس):بس انا عندي محاضرات..
ام سلمان:مب اول مرة لج تروحين مواعيد..
وديمة:وشيخة جايه بالطريج..
بوسلمان:لاتأخرون بروح اشغل السيارة..
ام سلمان:اتصلي فيها ماتمرج..
وديمة:ماما ماابي اروح الموعد..
ام سلمان:ليش؟
وديمة:هاا..ماابي خايفة..
ام سلمان:ليش تخافين ابوج وياج..
وديمة:ليش ابوي مو دكتور..ماما تكفين تعالي معاي..
ام سلمان:مااقدر..عقب ماتخلصون من المستشفى ابوج بيوصلج الجامعة وانا وين اروح..
عرفت وديمة انها بتحصل زفة محترمة اليوم..وراحت الموعد مع ابوها..
فهد يقوم من النوم...ويتصل على الفندق يزهبون له الريوق..وراح ياخذ له شاور..ولبس ونزل تحت..حصل المهندس مبارك ينتظره..وعقب السلام....
فهد:ياسلام على ريوق لبنان..خلنا نتريق وعقب نتكلم في الشغل..


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 23-12-2013, 03:41 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج


في الجامعة...

تروح وديمة عند شيخة....
شيخة:طمنيني ايش صار؟
وديمة:ماادري ياشيخة شالسالفة..عقب ماطلعت من عند الدكتور ابوي ساكت ماتحجى ولاقال شي..لين مانزلني وراح..
شيخة:وايش طلعت نتيجة السكر..
وديمة:مرتفعة..
شيخة:من صجج انت؟؟
وديمة:أي..
شيخة:ياويل ويلاج ياشيخة..الظاهر ابوج خاش الزفة لي انا..
وديمة:لا عاد ابوي مايسويها..بس الله ياستر من سكوته..
شيخة:هذا الهدوء ماقبل العاصفة..امشي لنتأخر وننطرد..
على الغداء...خالد يروح يتغدى مع رفيجه عبدالله.....
خالد:اقولك امس تغديت عند جدتي..
عبدالله:انزين؟
خالد:وملزمة علي الا اتزوج..
عبدالله:وايش قلت لها؟
خالد:قلت لها مالي خاطر..
عبدالله:بقولك شي..
خالد:قول..
عبدالله:خلني اتغدى عدل انزين واشبع..وعقب نرد بيتك ونتحجى بهالموضوع على راحتنا..اوكي؟
خالد:اوكي..
الساعة صارت 3 ونص..توها ردت البيت وديمة وراحت غرفتها..بدلت ملابسها وشوي يندق الباب...
وديمة:منو؟
مريم:انا..
وديمة:دشي..ايش تبين؟
مريم(تفتح الباب):ابوي تحت يبيج..روحي له..
وديمة:هاا..يبيني انا؟
مريم:أي.(راحت)
وديمة:الله ياستر..شكلي رايحة فيها اليوم..
نزلت تحت..حصلت ابوها قاعد مع امها في الصالة....
وديمة:خير بابا؟
بوسلمان(عطاها ذيج النظرة اللي خلتها تخاف)
وديمة(بلعت ريقها وصار قلبها يدق بسرعة)
ام سلمان:قعدي وديمة..
وديمة(قعدت)
بوسلمان:كم مرة لازم اعيد الحجي..كم مرة لازم اقولج..صغيرة انت؟؟...ماتعرفين شي..ولامهتمة بصحتج..عاجبج بكرة تطيحين في المستشفى..ماتفهمين لما اقولج هذا ممنوع..ماتقولين من وين سكرج ارتفع؟؟
وديمة:...........
بوسلمان:ماتحجين..
وديمة(تصيح)
بوسلمان:شوفي وديمة..صياح عندي لاتصيحين..كلميني..شالي سويتيه؟؟
وديمة:ماسويت شي..حرام عليك..كل جم يوم تقعد تزفني..تعبت..
بوسلمان:وانا بعد تعبت..كم مرة لازم انبهج عن اللي يضرج..كم مرة؟؟؟؟
وديمة:خلاص ذبحوني علشان تفتكون مني ومن مرضي..
بوسلمان(قام لها وهو معصب)
ام سلمان(منعته):قومي روحي دارج قومي..
وديمة ركضت ركض وراحت غرفتها...وشوي يدخل حمد....
حمد:السلام عليكم..
بوسلمان(بعده معصب):وانت من وين جاي؟
حمد(مستغرب اسلوبه):من وين..كنت اتغدى مع ربعي..
بوسلمان:والجامعة؟
حمد:اشفيها؟
بوسلمان:مااشوفك تداوم..
حمد:مالي خاطر بالدوام..ابي اريح شوي..
بوسلمان:نعم؟؟..ليش من كثر الشغل؟؟؟
حمد:احسن من الرسوب..بعدين عادي لو اريح شوي..
بوسلمان:اسمعني ياحمد..كلمة وبقولها لك..تبات برع البيت مافي..ودراسة بترجع لها..سمعت..(وراح)
ام سلمان حمدت ربها ان خالد ماهو موجود ولا جان كان هو الثالث..
وديمة تمت تصيح...اتصلت على طول في خالد....
خالد:وديمة اشفيج تصيحين؟
وديمة:خالد تكفى تعال خذني..ماابي اقعد هني ولادقيقة..
خالد:ليش شالي صار؟
وديمة:ابوي زفني..وكل يوم هذا حالتنا..تكفى خالد خذني عندك..ماابي اقعد هني..تعبت والله العظيم تعبت..
خالد:هدي شوي..روحي غسلي وجهج وتعالي كلميني....سمعي الحجي...باسكر ولخلصتي اتصلي..مع السلامة..
عبدالله:ايش صاير؟
خالد:ماادري والله..الظاهر صايرة مشكلة في البيت..
عبدالله:عيل انا رايح..
خالد:لا عبدالله..خلك هني..يمكن احتاجك..
عبدالله(بغشمرة):كم تدفع؟
خالد:عيل روح..
عبدالله:صج رفيج على الفاضي..
خالد:انا الغلطان اللي قلت لك اقعد..
عبدالله:رايح..
راح المطبخ يسوي شاي..
يرن تليفون خالد...
خالد:هلا وديمة...قولي لي شالي صار؟
وديمة:خالد مااقدر اتحمل تصرفات ابوي..يراقبني وايد ويهاوشني..ويزفني..تعبت ياخالد..
خالد:هذا من حرصه وخوفه عليج..
وديمة:اللي يكون انا مااقدر اتحمل اكثر..تكفى خالد خذني عندك..تكفى..
خالد(انكسر خاطره على اخته):من عندكم؟
وديمة:محد..
خالد:خلاص لراح ابوي الدوام انا بييكم..علشان اقدر اتفاهم مع امي..ياللا الحين بسكر لأن رفيجي عندي..مع السلامة..
وديمة:مع السلامة..
يندق الباب....
وديمة:منو؟
بوسلمان:انا..
وديمة(خافت مسحت دموعها):تفضل..
بوسلمان(دخل ومعاه ابرة الانسولين)
وديمة:شنو ذي؟
بوسلمان:ابرة الانسولين..
وديمة:.........
بوسلمان:ماراح تعورين..ألم بسيط..
في بيت خالد...
خالد:انت ايش رايك؟
عبدالله:والله رايي من راي اختك..خذها عندك جم يوم لين ماتهدى الامور..وعقب يصير خير..هم تسليك وهم هي ترتاح نفسياً..ايش رايك؟
خالد:ماادري..
على الساعة 5 العصر...يدخل خالد البيت يحصل امه تسولف في التليفون....
ام سلمان:والله شاسوي ياام فهد..مشغولة بالعيال...كل واحد وله مشاكله...الحمدلله على كل حال...........كنت حابه ازورج اليوم بس انشغلت..ان شاء الله باجر..........سلمي علي اختج كاملة..ان شاء الله يوصل مع السلامة..
خالد:اشلونج يمه؟
ام سلمان:بخير..انت اخبارك؟
خالد:الحمدلله..عيل وين وديمة؟
ام سلمان:فوق بدارها..متزاعلة وياابوك..
خالد:ادري..
ام سلمان:من وين دريت؟
خالد:اتصلت فيني وهي تصيح ومتضايقة..
وديمة تنزل....تسلم وتقعد.....
وديمة:ماما انا بروح اسكن مع خالد..
ام سلمان:شنو؟؟
وديمة:ماما مااقدر اتحمل عقب اللي صار..
ام سلمان:انت الغلطانة..ليش تراددين ابوج..وماتسمعين الحجي..
وديمة:ماما انا مريضة بالسكر(دمعت عينها)..ووايد اشياء منعتوها عني..وابرة الانسولين بروحها طامة كبرى بالنسبة لي..ابي اريح ابوي مني ومن مشاكلي..
خالد:ايش قلتي يمه؟
ام سلمان:انت من صجك؟
خالد:أي من صجي..خلها تيي تقعد معاي فترة لين ماتهدى الامور..
ام سلمان:ابوك ماراح يرضى..
خالد:اقنعيه..على الاقل لين ماترتاح وديمة نفسيا..
وديمة(تقعد)
ام سلمان:ومن بيهتم فيها؟
خالد:انا موجود..وبعدين وديمة ماهي صغيرة هي تعرف اشلون تهتم بصحتها..والابرة بتاخذها في وقتها..صح وديمة؟
وديمة:ان شاء الله..
ام سلمان:مو كافي علي طلعتك من البيت هم تبي وديمة تروح..
خالد:يمه موضوعي انا لاتدخلينه في موضوع وديمة..
وديمة:ها ماما ايش قلتي؟
ام سلمان:خلوني اشوف ابوكم بالاول..
خالد(قام):عيل انا رايح..لصار شي خبروني..
حمد ينزل وهو لابس....شاف خالد..وقف جم ثانية يطالعه..وعقب طلع....
ام سلمان:الله يهديه..ماتدري ياخالد ايشقد اخوك مأذيني..
خالد:ماعليه يمه..فترة وتعدي..ياللا مع السلامة..
الجميع:مع السلامة..
وديمة قامت وراحت غرفتها..اتصلت في شيخة....
شيخة:انزين وايش صار عقب؟
وديمة:ولاشي امي قالت بتشوف ابوي..مع اني مااعتقد انه بيوافق..
شيخة:ان شاء الله يوافق..واشلون بتروحين الجامعة؟
وديمة:بخلي خالد يوصلني..وبعدين انا ليحين مادخلت تخصص علشان مواعيد محاضراتي مختلفة..توني بالتأسيسي والدوام عادي..
شيخة:آآآه من التأسيسي..ماادري متى أخلصه..
وديمة:لو شديتي حيلج بتخلصين..
شيخة:أقول ودوم..
وديمة:خير..
شيخة:يوم ان السكر كان مرتفع عندج..ماحسيتي بشي؟
وديمة:لا..بالعكس كنت طبيعية واستغربت يوم الدكتور قال انه مرتفع..بس تصدقين احرجت ابوي جدام الدكتور..
شيخة:تستاهلين لأنج ماتسمعين الحجي..مرة ثانية لو تصيحين مابعطيج..
ولما رد بوسلمان...بدل ملابسه وقعد يتعشى مع زوجته...وعقب ماتعشوا...راحت ام سلمان تجيب الشاي والقهوة..وقعدت تصب لبوسلمان...
بوسلمان:البنات راقدين؟
ام سلمان:أي..
بوسلمان:حمد مارد؟
ام سلمان:انت شفت سيارته؟
بوسلمان:لا..
ام سلمان:عيل مارد..
بوسلمان:قومي عطيني التليفون خلني اتصل فيه..
ام سلمان:انزين اسمع ابي اقولك شي قبل لتكلم حمد..
بوسلمان:خير؟
ام سلمان:بقولك بس خلك هادي ولاتعصب..
بوسلمان:صاير شي؟
ام سلمان:لا..بس اللي بقولك اياه..ان وديمة تبي تروح تعيش وياخالد..
بوسلمان(انصدم):نعم؟
ام سلمان:حاولت اقنعها لكن ماكو فايدة مصرة..وتبي تطلع من البيت..انا في رايي خلها تروح فترة بس..وعقب بتمل وبترجع البيت..يعني على الاقل نفسيتها تتحسن..
بوسلمان(عصب):هذا الناقص..تبين بنتي تطلع من البيت..ليش؟؟..من سوى لها شي؟
وديمة كانت واقفة في الدري وهي تسمع هالحوار...
ام سلمان:محد سوى لها شي..بس انت تدري من يوم مامرضت وهي تعبانة نفسيا..ومحتاجة راحة..
بوسلمان:قصدج تبي ترتاح مني..
ام سلمان:ايش هالحجي يابوسلمان..بس انت تدري البنت وايد حساسة..وتخاف وايد من المرض والعلاج..وانت مراقبتك لها في صالحها بس هي ياهل وماتعرف شي..بكرة لكبرت بتعرف قيمة تعبك عليها..خلها تروح فترة تعيش مع اخوها علشان تعرف ان مهما البنت فكرت مثل تفكيرها مردها بترد البيت بين ابوها وامها..
بوسلمان:يعني انت موافقة..
ام سلمان:والله ماني موافقة..اتضايق يوم اشوف عيالي يطلعون من البيت كل واحد ورى الثاني..ياليت طلعتهم كانت من زواج..لكن شاقول..انا قلت دام انها مصرة..خلها تروح..وبعدين هي مريضة ومحتاجة منا ان نحن ونعطف عليها اكثر..
بوسلمان:انا ماقصرت معاها يامنيرة..انت على بالج يوم اني اقولها سوي جذي ولاتسوين جذي ايش معناته..مو خوفي وحبي لها اسوي هذا كله..
ام سلمان:انا معاك..بس شسوي..البنت بعدها صغيرة وماهي متصورة ان فيها المرض..
بوسلمان:اخاف تروح عند اخوها وتتعب هناك..من بدير باله عليها..
ام سلمان:خالد معاها..خالد بيتحمل مسؤوليتها..
بوسلمان:يعني خالد يدري؟
ام سلمان:أي يدري..وينتظر موافقتك..
بوسلمان:بس خالد مايعرف يعطيها ابر الانسولين..
ام سلمان:بلا يعرف..تذكر يوم انك سافرت..علمت خالد اشلون يعطيها الابره..وبعدين انت علمتها..
بوسلمان:علمتها..بس هي ماتسوي..تخاف..
ام سلمان:خلاص لاتحاتي..خالد بيهتم فيها..ايش قلت؟
بوسلمان:ماادري..
ام سلمان:وافق وتوكل على الله..انا ابيك تتفرغ حق حمد شوي..
وديمة كانت تنتظر موافقة ابوها..بس ماتحجى ظل ساكت..
بوسلمان:روحي جيبي التليفون..خلني اتصل في حمد..
وديمة راحت غرفتها..وسكرت الباب..وقالت:الله لايحرمني منج ماما..
يرن تليفونها...
وديمة:هلا خالد...بلا ابوي تحت...امي كانت تكلمه....والله ماادري...مارد عليها...بس شكله بيوافق.....ان شاء الله..مع السلامة..
تحت....
بوسلمان:قومي اتصلي في خالد..وخله يي..
ام سلمان:ان شاء الله..
وجى خالد..وقعد معاهم.....
بوسلمان:خالد..وديمة بتيي تقعد معاك..وأبيك تدير بالك عليها وتهتم فيها وبصحتها..والادوية تاخذها اول بأول..والابر مو تنساها..أبيك انت اللي تعطيها اياها..
خالد:لاتحاتي يبه..اللي تبيه بيصير ان شاء الله..
ام سلمان تروح غرفة وديمة...
ام سلمان:استانسي ابوج وافق..
وديمة:صج ماما؟
ام سلمان:أي..قومي زهبي عمرج..
وديمة:خالد تحت؟
ام سلمان:أي..بس ماراح يمديج تشيلين اغراضج كلها الحين..روحي باجر عقب ماترجعين من الدوام..
وديمة:ان شاء الله..
ام سلمان:ترى ابوج بييج الحين علشان يعطيج الابرة..
وديمة:الحين؟؟
ام سلمان:أي..
وديمة:وخالد بيروح؟
ام سلمان:أي ..
خالد طلع وراح يتمشى مع عبدالله.....
عبدالله:ماقلت لي ايش سالفتك مع جدتك؟
خالد:ماادري عنها..الا تبي تزوجني..
عبدالله:واشفيها..تزوج..
خالد:عبدالله..
عبدالله(يقلده):عبدالله..تبي اجذب عليك واقولك لاتتزوج..مااقدر..
خالد:صدقني ياعبدالله..لو لي خاطر اني اتزوج..بتزوج على طول..بس صدقني هالفترة بالذات ماافكر بهالشي..
عبدالله:انت مب صغير..ومافي شي يمنعك..
خالد:حاليا راح اكون مشغول بأختي..خل مشكلتها تخلص وعقب يصير خير..
عبدالله:متى بتييك؟
خالد:باجر ان شاء الله..
عبدالله:علشان خلاص مااقدر ازورك..
خالد:انا عقب بتفق معاك على الطلعات..
عبدالله:ان شاء الله..
العصر...في بيت بوسلمان...ييهم خالد علشان ياخذ وديمة..لمت اغراضها ولبست وودعت امها وراحت مع خالد...وهم في السيارة.....
خالد:اشفيج تصيحين؟
وديمة:أمي..
خالد:إذا تبين برجع..
وديمة:لا خلاص..
خالد:مسحي دموعج..بعدين تعالي قولي لي انت ماسلمتي على ابوي؟
وديمة:لا..
خالد:ماشاء الله عليج..انت أخت ينرفع فيها الراس..ماتستحين ماتسلمين على ابوي..تبينه شيقول الحين..
وديمة:بصراحة خايفة منه..
خالد:انت اشفيج..ليكون على بالج ابوي يخرع..قد ماابوي يخاف عليج ويحبج ماكو حد مثله..
ودخلوا البيت....
خالد:تعالي ادليج غرفتج..ترى جات خدامة ليلى ورتبتها..
وراحوا يشوفونها..
خالد:ايش رايج؟
وديمة:حلوة..
خالد:الحين بييب شنطتج وقعدي رتبي اغراضج..وانا بروح..
وديمة:وين؟
خالد:بروح اشتري جم غرض للبيت..
وديمة:وانا؟
خالد:انت اشفيج؟
وديمة:بقعد بروحي؟
خالد:ليكون انا حاطج في غابة؟..اشفيها لو قعدتي بروحج؟
وديمة:ماابي اخاف..
خالد:شنو تخافين..ياللا انا ماعندي خوات يخافون..يعني باجر لتزوجتي وريلج بغى يطلع ايش بتسوين؟
وديمة:بروح معاه وين مايروح؟
خالد:حتى المسجد؟
وديمة:.......
خالد:اقول قعدي وخلج عاقلة..تبين شي؟
وديمة:لا..
وراح عنها..قعدت وديمة على السرير وهي تفكر باللي سويته...رن تليفونها...
وديمة:آلو..
شيخة:أخبارج؟
وديمة:بخير..
شيخة:وينج فيه؟
وديمة:في بيت خالد..
شيخة:صج؟..واشلون؟
وديمة:مافي شي مهم اقوله..بس ماادري ليش متضايقة..
شيخة:لاتخافين بتتعودين على الجو..
وديمة:شيخو تعالي عندي..
شيخة:حلفي..واخوج قاعد..
وديمة:اصلا خالد ماهو موجود..
شيخة:وين راح؟
لما يخلص دوام بوسلمان يرد البيت..يبدل ملابسه ويقعد يتعشى مع ام سلمان....
بوسلمان:باجر اجازة..ليكون البنات بعد راقدين؟
ام سلمان:لا مب راقدين..مريم وعائشة قاعدين يلعبون مع بعض..
بوسلمان:وحمد وينه؟
ام سلمان:ماادري عنه..
بوسلمان:الحمدلله شبعت..(قام)..جيبي الشاي والقهوة..
ام سلمان:ان شاء الله..(استغربت انه ماسأل عن وديمة)
في بيت خالد....عقب ماتعشوا....
خالد:وين رايحة؟
وديمة:بروح غرفتي ابي اخلص ترتبيها..
خالد:خذتي ادويتج؟
وديمة:باخذها عقب شوي..
خالد:خلاص انا بييج عقب شوي علشان الابرة..
وديمة(تغيرت ملامحها وراحت)
خالد:الله يعيني..
وقعدت وديمة ترتب غرفتها وهي مشغلة على اغاني..لين مااتعبت..وقعدت على السرير تفكر في ابوها واشلون بيكون ردة فعله يوم انها محد...يقطع عليها التفكير خالد....
خالد:احم احم..
وديمة:حياك..
خالد(قعد على السرير):خلصتي؟
وديمة:يعني تقريبا..بقى بس آخر شي..
خالد:انزين ممكن ابرتج؟
وديمة(ماتحركت)
خالد:لاتخافين ماراح تتعورين..انت ساعديني وانا بساعدج..ياللا قومي..
وديمة(راحت تجيب الابرة):هاك..
خالد:ياللا قعدي..
وديمة(قعدت)
خالد:لاتخافين..ترى ايدي خفيفة..
وديمة:خالد تكفى شوي شوي..
خالد:ان شاء الله..
بوسلمان راح يرقد..وقبل ليطفي النور..اتصل في خالد...
خالد:هلا وعليكم السلام...بخير.......انا بالصالة.........بغرفتها راحت ترقد........اي عطيتها من شوي.....ان شاء الله.....لاتوصي حريص......في امان الله..
يرن تليفونه...
خالد:هلا عبدالله...بخير الله يسلمك..انت اخبارك؟........ولاشي قاعد اطالع تلفزيون.......فيلم سينمائي....انت شتسوي؟
عبدالله:قاعد على النت.....انزين ايش رايك نطلع نتمشى شوي..
خالد:مااقدر..اختي بروحها في البيت..
عبدالله:واشفيها؟
خالد:تخاف تقعد بروحها في البيت..
عبدالله:انزين متى اقدر اشوفك؟
خالد:بحاول باجر لما ارد من الدوام..متملل حدي..
عبدالله:انزين ليش ماتقعد مع اختك؟
خالد:توني عطيتها الابرة وخذت ادويتها وراحت ترقد..
عبدالله:معليه ياخالد..تحمل هذي اختك..
خالد:أدري..
مرة وحدة تي وديمة وشكلها باين انها قامت من النوم...
خالد(والتليفون بيده):اشفيج تعبانة؟
وديمة(ببراءة طفل):بردانة..ماعرفت اشلون اخفض على الدرجة..
خالد:عبدالله بكلمك عقب..في امان الله...وانا حسب فيج شي..خرعتيني..
وديمة(حست بعطف خالد وابتسمت بداخلها)
خالد:تعالي شوفي..علشان تعلمين..
باجر الصبح في بيت بوسلمان..
قاعدين يتريقون....
عائشة:يمه وين وديمة؟
ام سلمان:محد راحت عند خالد..
بوسلمان:كلوا بسرعة ترى بنتأخر..
ام سلمان(مستغربة من ريلها اللي ماسأل عن بنته)
وديمة تلبس بسرعة وتطلع من الغرفة تحصل خالد قاعد على الكرسي ياكل....
خالد:اشفيج واقفة..تعالي تريقي علشان مانتأخر..
وديمة:ان شاء الله..(حطت اغراضها وراحت تاكل)
خالد:متى يخلص دوامج؟
وديمة:على 2..
خالد:خلاص خلج على ال2 واقفة..
بعد يومين...في بيت بوفهد...ام فهد قاعدة على الساعة 9 الصبح في الصالة تسولف مع أختها كاملة..يدخل فهد....
فهد:السلام عليكم..
الجميع:وعليكم السلام..
ام فهد:حمدلله على السلامة ياولدي..
فهد:الله يسلمج يالغالية..
ام فهد:اشتقنا لك يالغالي..
فهد:انا بعد..
كاملة:أخبارك يافهد؟
فهد:بخير..انت اخبارج؟
كاملة:بخير فديتك..
ام فهد:اشفيك واقف..اقعد..
كاملة:اقعد علشان ابي اقولك شي..
فهد:تعبان من السفر وابي اروح أخذ لي شاور وانام..
ام فهد:معليه انت اقعد شوي..
فهد(قعد)
كاملة:رحنا شفنا البنت..وبصراحة يافهد البنت ماعليها قصور..مااقولك كل المواصفات اللي بغيتها موجودة..بس الاغلبية..وانت روح شوفها وإذا عجبتك خلنا نتوكل على الله..
فهد:ماادري ياخالتي..
ام فهد:شنو اللي ماتدري..هذي خامس وحدة نروح نشوفها وتشوفها وماتبيهم..وانت قايل خلاص بتزوج..
فهد:خلوني ارتاح وعقب بخبركم..(قام)..عن اذنكم..
وراح....
كاملة:اشفيه ولدج؟
ام فهد:مافيه شي..بس هو جذي لما يرد من السفر يكون تعبان ومايتحمل القعدة..
خالد وهو في السيارة...يرن تليفونه....
خالد:هلا يبه..
بوسلمان:أخباركم؟
خالد:الحمدلله..
بوسلمان:أخبار أختك؟
خالد:بخير..والحين رايح اجيبها من الجامعة..
بوسلمان(يشوف الساعة):الساعة خمسة..مو من عادتها تخلص هالوقت..
خالد:تقول تبي تذاكر مع رفجيتها..
بوسلمان:واشلون صحتها؟
خالد:الحمدلله تطمن..الابر تاخذها في وقتها..والادوية بعد..
بوسلمان:وهي اشلون نفسيتها؟
خالد:امس قعدت تصيح ماتبي تاخذ الابرة..
بوسلمان:هي جذي نفسيتها متقلبه وايد..دير بالك عليها..
خالد:ان شاء الله........في امان الله..
يتصل في وديمة وهو ينتظرها في السيارة.....تركب السيارة..
خالد:ها ذاكرتوا؟
وديمة:الحمدلله..بس ان شاء الله يطلع الامتحان سهل..
خالد:متى امتحانج؟
وديمة:باجر..
خالد:انزين تغديتي؟
وديمة:لا والله ماكلت الا شي خفيف..
خالد:انزين وين في خاطرج تتغدين؟
وديمة:اللي انت تحبه ودني..بس بسرعة لأني جوعانة وتعبانة..
الليل....بوسلمان قاعد مع زوجته في الغرفة...
بوسلمان:ام سلمان..أبيج بسالفة..
ام سلمان:خير؟
بوسلمان:أنا افكر إن إجازة الربيع نسافر..
ام سلمان:زين تفكر..على الاقل نغير جو..
بوسلمان:احنا مب رايحين سياحة..
ام سلمان(استغربت):عيل ليش مسافرين؟
بوسلمان:أبي اودي وديمة للعلاج..يمكن تتحسن عن الحين..
ام سلمان:...........
بوسلمان:ليش سكتي؟
ام سلمان:تعتقد وديمة بتتقبل الفكرة؟
بوسلمان:ماادري والله..هذا اللي افكر فيه..
في غرفة وديمة...يدخل عليها خالد....يحصلها غرقانة بالدراسة.....
خالد:أخبار المذاكرة؟
وديمة:زفت ولله الحمد..
خالد:ليش؟
وديمة:تعبت من المذاكرة..أبي أخلص من التأسيسي..
خالد:جيبي التوفل وبترتاحين..
وديمة:الله يسمع منك..
خالد:جهزتي للعيد؟
وديمة:لا..
خالد:ليش؟
وديمة:بروح باجر ان شاء الله عقب الدوام مع شيخة السوق وبشتري..
خالد:ماخبرتيني ان باجر رادة مع شيخة؟
وديمة:توني متفقة معاها..
خالد:انزين إذا جذي انا طالع العصر مع واحد من الربع..
وديمة:بس لاتتأخر..
خالد:انتوا البنات بالكم طويل في التسوق..
وديمة:شنسوي..هذا طبعنا..
خالد:اممم..ممكن اعطيج الابرة؟
وديمة(تغيرت ملامح الفرحة):ممكن اطلب منك طلب..
خالد:قولي..
وديمة:معليه إتأجل الابرة شوي لين مااخلص دراسة..
خالد:بس هذي ابرة انسولين ماهو منوم..
وديمة:أدري..بس احب آخذها لما ابي ارقد..
خالد:على راحتج..(قام)..أنا رايح غرفتي اسوي جم شغلة..لخلصتي خبريني..
وديمة:إن شاء الله..
وراح خالد غرفته وفتح النت وقعد يلف في هالمواقع..لين ماتعب..وشاف الساعة صارت متأخرة..راح علشان يشرب ماي..وتذكر انه ماعطى الابرة حق وديمة..راح لها الغرفة..حصلها منسدحة على السرير وتقرأ من اوراق....
خالد:وديمة..
وديمة(خافت من شافته)
خالد:تبين ترقدين وماخذتي الابرة؟
وديمة:كنت تعتقد اني بييك؟
خالد:وثقت فيج..(عصب)..مرة ثانية لو تحلفين ماراح اوافق..
باجر في السوق..على الساعة ست المغرب....في احدى محلات الجواتي...
وديمة:شيخو خلنا نروح مكان ناكل..تراني ميتة من الجوع..وتعبانة..
شيخة:صبري ألبس جوتيي..
وهم يتمشون...
وديمة:أي مطعم في خاطرج؟
شيخة:ماادري..خلنا نروح ونختار..
وديمة:أبي عصير فرش..أحس اني بموت من العطش..
شيخة:حشى..انت من وين جايه من الصحراء؟
وديمة:حرام عليج من الصبح ماماكلة..زين ان ماغمى علي من الجوع..
يرن تليفونها....
وديمة:مرحبا..
خالد:لاحول لله..في شي اسمه السلام عليكم..
وديمة(انحرجت):السلام عليكم..
خالد:وعليكم السلام..وينكم؟
وديمة:في الستي..
خالد:خلصتوا؟
وديمة:بقى لنا بعد جم شي..
خالد:متى بترجعون؟
وديمة:ماادري..بس انا ميتة من الجوع من الصبح ماماكلة شي..ونبي نروح ناكل..
خالد:نعم؟!!..ماماكلة شي من الصبح؟؟
وديمة:أي..
خالد:وماخفتي يغمى عليج؟
وديمة:شسوي انشغلت وماجى على بالي الا الحين..
خالد(عصب):ياسلام..من متى الجوع مايجي على البال..تبين ابوج يسوي لنا سالفة..انت ماتخافين على عمرج؟؟
وديمة:.........
خالد:الحين تروحين تاكلين عدل..سمعتي؟
وديمة:ان شاء الله.......انزين...انت بتكون في البيت؟.....ان شاء الله مع السلامة..
شيخة:اشفيج؟
وديمة:مافيني..
شيخة:الا فيج..خالد ايش قالج؟
وديمة:عصب علي لأني ماكلت شي..
شيخة:انزين امشي خلنا نروح ناكل..
وديمة:مااشتهي..
شيخة:توج كنت جوعانة..
وديمة:تغير علي المزاج..
شيخة:لاتخليني افضحج جدام الناس..انت ياهل كل ماحد قالج شي تزعلين..خالد كان معاه حق..لو ماهو خايف عليج جان ماعصب عليج..امشي اشوف..
في بيت بوفهد....فهد يرد البيت مع امه وخالته..ويقعدون...
ام فهد:اشفيك ساكت..من وقت ماطلعنا من بيت الناس وانت ساكت؟
كاملة:شنو ماهي عاجبتك؟
فهد:ماادري..هي زينة..وحلوة..بس خلوني افكر..
كاملة:على راحتك..اهم شي تكون مقتنع..
فهد:هي دارسة جامعة؟
كاملة:لا..خلصت الثانوية من هني..واشتغلت من هني..
فهد:وين تشتغل؟
كاملة:في المدرسة..ضابطة..
فهد:وليش ماكملت دراستها؟
كاملة:تقول امها انها تعبت من الدراسة وقالت ماتبي تدرس جامعة..بس تقول امها انها تفكر تكمل..
فهد:قلتي كم عمرها؟
كاملة:25 سنة..
ام فهد:يعني اصغر منك بثلاث سنوات..
فهد:هي حلوة ماشاء الله عليها..بس وايد تستحي..
ام فهد:اكيد يمه بتستحي منك..انت غريب عنها..يعني هي دخلت مزاجك؟
فهد:هي دخلت مزاجي من ناحية جمالها..بس الباقي مااعرف عنها..
كاملة:في اشياء يافهد ماراح تبين الا عقب..
فهد:بس في اشياء اساسية لازم تبين من الحين..اقول خالتي..
كاملة:قول فديتك..
فهد:ايش رايج تروحين المدرسة اللي هي تشتغل فيها وتسألين عنها..
ام فهد:يايمه عيب..هي شافت خالتك..ومب حلوة تشوفها في المدرسة وتسأل عنها..
كاملة:تدرون ايش بسوي..بشوف لي حد اعرفه في المدرسة وبخليه يتكفل بهالشغلة..
اليوم يصادف يوم الجمعة..قبل الصلاة..على الساعة 10...تطلع وديمة من غرفتها...تحصل خالد يقرأ قرآن....
وديمة:صباح الخير..
خالد(وقف من القراية):اكلي لج شي وزهبي عمرج علشان اوصلج بيت ابوي..
وديمة(خافت انه يبي يرجعها):ليش انا ايش سويت؟
خالد:اشفيج انت؟..اليوم الجمعة..وامي متصلة ان نروح نتغدى عندهم..زهبي عمرج علشان اوصلج قبل الصلاة..ابي اصلي في المسجد اللي قريب من البيت..
راحت وديمة تسوي لها شي تاكله..وقعدت في المطبخ تفكر....
خالد خلص القراية وعقب راح يتسبح ويتزهب للصلاة..وديمة دخلت البيت بعد فترة..وسلمت على امها وخواتها..وراحت غرفتها...حصلت كل شي في مكانه..فصخت عبايتها وراحت تساعد امها في المطبخ..وقعدوا يسولفون..لين ماراحوا يصلون صلاة الظهر..وتجمعوا على سفرة الغداء..بوسلمان وجنبه ام سلمان وسلمان ووديمة وعائشة وخالد وليلى ومريم ....والكل تغدى بهدوء...وعقب الغداء قعدوا يسولفون....
سلمان:حمد ليش ماجى يتغدى معانا؟
بوسلمان:ليش هو متى قعد معانا..وين عيالك؟
سلمان:راحوا مع امهم..لأن عمتهم مسوية عزيمة..
بوسلمان:أخبارج وديمة؟
وديمة:بخير..
سلمان:اشلون صحتج؟
وديمة:الحمدلله..
سلمان:تصدقين عبدالرحمن كان في خاطره يي علشان يقعد معاج..بس عيال خالاته متصلين فيه..
وديمة(تهمس لخالد):متى بنرجع؟
خالد:انا بهدج شوي هني..بروح عند واحد من الربع وعقب المغرب بمرج..
وديمة(فجت عينها):نعم؟؟..بس انت ماقلت لي..
خالد:هذاني قلت لج الحين..
وديمة:انزين ودني بيت عمتي..
خالد:قعدي مكانج..انا مابتأخر..إلا إذا تبين اهدج في البيت بروحج؟
وديمة:لا..خلاص بقعد هني..(قامت)
خالد:وين؟
وديمة:عن اذنكم..
راحت غرفتها...
ام سلمان:ماانت قايلها؟
بوسلمان:مب الحين عقب الامتحانات النهائية..ماابيها تحاتي وتفكر..
سلمان:خير يبه..ايش صاير؟
بوسلمان:افكر اودي وديمة للعلاج برع..
خالد:ليش؟
بوسلمان:أبي اتطمن عليها..
سلمان:يبه كلها سكر..والسكر ماله علاج..
بوسلمان:اللي يكون انا ابي اتطمن عليها..بس ماابي حد فيكم يقولها شي..ماابيها تعرف..
خالد(قام):ياللا انا رايح..
ام سلمان:وبتاخذ معاك وديمة؟
خالد:لا..بروح شوي عندي شغل..وعالمغرب بمرها..مع السلامة..
تقعد وديمة على النت..تتملل..تييها أختها مريم....
مريم:وديمة تعالي لعبي معانا..
وديمة:مالي خلق..وين عائشة عنج؟
مريم:عووش موجودة بس انت بعد تعالي..
وديمة:اقول مريوم وين حمد ماشفته اليوم..
مريم:يوم عرف ان خالد بيي طلع..
وديمة:انزين انت روحي انا بييكم عقب شوي..(وراحت مريم)..حتى انتوا الياهال تقدرون تميزون من الزعلان..
راحت تلعب معاهم..جاها بوسلمان..حصلهم يلعبون في الصالة...
بوسلمان:وديمة..
وديمة:نعم؟
بوسلمان:أخبارج؟
وديمة:الحمدلله..
بوسلمان:تهتمين بصحتج؟
وديمة:أي..
بوسلمان:لبغيتي شي خبريني..
وديمة:ان شاء الله..
في الكوفي شوب...
عبدالله:ايش رايك نسافر؟
خالد:وين؟
عبدالله:سمعت عن سويسرا وايد يمدحونها..
خالد:حاليا مااقدر اسافر..خلني اهدي الاوضاع في البيت وعقب يصير خير..
عبدالله:مرتاح معاها؟
خالد:بصراحة مسؤولية..وابوي ماينلام فيها..صج يبيلها واحد يجابلها صبح وليل..لو تهتم بصحتها جان انا بخير..
عبدالله:حاول تساعدها علشان هي تهتم بصحتها بنفسها..
خالد:يبيله وقت ياعبدالله..(يشوف الساعة)..أذن المغرب..خلنا نصلي علشان بروح آخذها..
بعد صلاة المغرب..فهد يدخل البيت مع ابوه ويقعدون.....
ام فهد:ايش قررت؟
فهد:يمه ماابيها..
ام فهد:ليش؟؟
فهد:فكرت وايد..وحسيت انها مو هاذي اللي ابيها..
بوفهد:في وحدة بخاطرك؟
فهد:بخاطري بنت عمي هبة..
ام فهد:هبة؟!!
بوفهد:وليش ماتتحجى؟؟
فهد:سمعت انها كانت مخطوبة وعقب غيرت رايي..بس يوم سمعت منكم امس انها انفصلت عن خطيبها..قلت انا بروح اتقدم لها..ايش رايكم؟؟
ام فهد:ياليتك من زمان تحجيت يايمه..
فهد:ايش رايكم؟
بوفهد:وين بتحصل احسن منها..امش الحين نروح بيت عمك ونخطبها لك..
فهد:مو جنك مستعيل؟
بوفهد:احسن يايبه..أخاف تروح لحد غيرك..قوم..
وتمر ساعة...في بيت خالد..وديمة تحس بملل تطلع من غرفتها...تحصل خالد قاعد يقرأ كتاب....
وديمة:مانبي نتعشى..انا جوعانة..
خالد:لا والله..اشلون الجوع جى على بالج؟
وديمة:ايش تقصد؟
خالد:سألي عمرج..(وكمل قراية)
وديمة(هدته وراحت غرفتها وقفلت الباب):خالد عليه مزاج..أف..وينج شيخو تسليني..بروح افتح النت..
وقعدت تشارك بعدة مواضيع في المنتدى..لين مااندق الباب...
وديمة:منو؟
خالد:ولد الجيران..
وديمة(فتحت الباب)
خالد:عليج أسئلة..يعني من بيكون وراء الباب..
وديمة:سوري..اندمجت مع النت وماانتبهت ايش قاعدة اقول..
خالد:ايش قاعدة تسوين؟
وديمة:ولاشي اسلي نفسي بالنت..
خالد:ماتشبعين من هالمواقع ايش تستفيدين منهم؟
وديمة:يعني تبي تقولي انك مب مشارك في ولا منتدى؟؟
خالد:مايخصج..مب انت جوعانة..ايش تبين نطلب؟
وديمة:خلاص ماابي..
خالد:ودوم عن السخافة..أنا سألتج وانت تجاوبين..
وديمة:صج خلاص شبعت..
خالد(عصب):ماابي اعيد الحجي..امشي للصالة وقولي شنو تبين..

خلونا نعرف شنهي المستجدات اللي بتصير في بيت بوسلمان..وياترى فهد بيتزوج بنت عمه؟

تابعوني في الفصل الثاني..


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 23-12-2013, 03:46 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج




" الفصل الثاني "


في بيت العم بوهبة.....
تكون هبة في غرفتها تسولف ويا أختها هلا....يندق الباب..وتدخل امهم....
ام هبة:عندي لكم سالفة..
هبة:أهم شي السالفة بتعجبنا؟
ام هبة:أكيد..وبتعجبج انت بالذات..
هبة(عدلت قعدتها):خير؟
ام هبة:اليوم جى عمج بوفهد مع ولده فهد يخطبونج..
هبة:يخطبوني انا ؟؟
ام هبة:أي..
هلا:ياسلالالالام..هذي الاخبار الطيبة..مبروك..
هبة:غريبة..ليش ماخطبني من زمان ولا توه تذكر ان له بنت عم ؟
ام هبة:احنا ايش نبي بهالسوالف..المهم انه خطب ويبيج من بين كل هالبنات..
هلا:استانسي بياخذج واحد مليونير وعايش في قصر..
هبة:ليش احنا شنو؟
هلا:هم أكثر منا..على الاقل بيكتب لج جم بيت بإسمج وبتكون لج جم سيارة..وبتسافرين معاه كل فترة البلدة اللي تبينها..
هبة:وابوي ايش قالهم؟
ام هبة:قالهم بشاور البنت وبرد عليكم..
هبة:ماله معنى يشاورني..جان وافق وخلصنا من هالسالفة..
ام هبة:انت موافقة؟؟
هبة:أكيد..هذا فهد ولد عمي..اشلون ارفضه..
هلا(باستها):ألف مبروك..
هبة:الله يبارك فيج عقبالج..
ام هبة:خلاص انا الحين بروح اخبر ابوج..(باستها) مبروك يابنيتي..
هبة:يمه..
ام هبة:خير؟
هبة:لا خلاص ولاشي..
وطلعت امهم..وظلوا يصارخون من الفرح...
باجر الصبح في بيت بوفهد...



تتصل ام فهد في اختها كاملة....
ام فهد:أي راح امس وخطب بنت عمه..
كاملة(مستغربة):خطب بنت عمه؟!!..من بنت عمه؟
ام فهد:هبة..
كاملة:هبة!!..وايش معنى هبة..احنا درنا الديرة كلها علشان ندور له على وحده والحين رد على بنت عمه..
ام فهد:يقول انه من فترة كان حاط عينه عليها..
كاملة:أي بس البنت كانت مخطوبة وعقب انفصلت عن خطيبها..
ام فهد:ادري..بس يقولون ان العيب كان من الريال..
كاملة:أدري ان العيب من الريال سمعت بهالشي..بس غريبة ان فهد حاط عينه عليها..
ام فهد:شكلج ماانت موافقة..
كاملة:ماادري ياام فهد..يوم قلتي لي هبة مااعرف ايش صار فيني..
ام فهد:انت شايفة عليها شي؟
عقب دوام خالد..ركب سيارته واتصل في عبدالله....
خالد:اشلونك؟.......بخير الله يسلمك وينك فيه؟.....انزين ابي اشوفك اليوم ضروري عقب المغرب....ماادري انا بدبر السالفة....خلاص اتفقنا في امان الله..
في الجامعة...توقف وديمة مع شيخة عند البوابة تنتظر خالد.....
شيخة:مو جنه اخوج تأخر؟
وديمة:بلا..بس ماادري ليش تأخر..اذا مستعجلة روحي..
شيخة:بانتظر خمس دقايق بعد..
وديمة:الله يسامحه تعبت وانا انتظره..
شيخة:انزين امشي ركبي سيارتي لين مايي..واذا تبين ندخل داخل..
وديمة:لا بانتظره شوي بعد..
شيخة:وديمة بتروحين عرس يوم الخميس؟
وديمة:لا مااعتقد..
شيخة:ليش؟
وديمة:مالي خلق اعراس..بعدين ابي ادرس حق امتحان التوفل علشان اجيبه..وخالد قاعد يساعدني علشان افتك من التأسيسي..(يرن تليفونها)..هذا خالد..كاهو وصل..ياللا شيخوه مع السلامة..
شيخة:مع السلامة..
ركبت السيارة.....
وديمة:السلام عليكم..
خالد:وعليكم السلام..
وديمة:خست في الحر ليش متأخر..
خالد:أي حر؟..ماشاء الله على الجو..ايش حلاته..
وديمة:انا احب البراد..ليش متأخر؟
خالد:كان عندي شغل شوي..
وديمة:انزين الله يهداك جان خبرتني انك بتتأخر..
خالد:وانا ايش دراني اني بتأخر..
وديمة:خالد أبي اروح المكتبة قبل لنرد البيت..
خالد:بس انا ابي اوصلج بيت ابوي لأن عندي شغل..
وديمة:لا لاتقول..
خالد:ليكون بوديج بيت اهل ريلج؟..بيت ابوج.
وديمة:ادري..بس عندي دراسة..
خالد:متى امتحانج؟
وديمة:السبت..
خالد:يعني انت ماتقدرين تمين بروحج في البيت شوي..بس ساعة وبرد..بعدين احنا الحمدلله عايشين بأمان..من ايش تخافين؟
وديمة:ماادري..بس أخاف..
خالد:لي متى؟..انا عندي اشغال مااقدر اقعد في البيت..اشفيها لو رحتي بيت ابوي؟
وديمة:خلاص نزلني البيت..
خالد:أي بيت؟
وديمة:بيتك..
خالد:وبتقعدين بروحج؟
وديمة:أي..
خالد:شالي غير رايج؟
وديمة:جذي..
خالد:أمرج غريب..
الساعة 7 تنزل هبه واختها...يقعدون عند امهم...
ام هبة:ماخبرتينا عن رايج..
هلا:فيها خير ماتوافق..
ام هبة:خلاص اقولهم؟
هبة:لا يمه..خلنا نشوي نثقل عليهم..علشان مايقولون ماصدقنا..ابوي وينه؟
ام هبة:راح عنده شغل..
هلا:ايشقد بتطلبين مهر؟
هبة:انت ايش رايج يمه؟
ام هبة:على حسب هم ايشقد يبون يعطون..
هلا:يمه هم يقدرون يعطون 10 ملايين..
هبة:تخيلي مهري 10 ملايين؟
هلا:ياليت..
ام هبة:اشفيكم انتوا مب صاحيين..اهم شي ربج يسعدج بحياتج..
وديمة قاعدة تطالع تلفزيون..وملانه..وخايفة في نفس الوقت..يرن تليفونها...
وديمة:هلا شيخة...ولاشي قاعدة اطالع تلفزيون........محد..........شسوي كسر خاطري..وبعدين انا جايه عنده بسي اتشرط عليه..
خالد يدخل البيت...
وديمة:شيخة خالد جى بكلمج عقب..مع السلامة..
خالد:ماشاء الله..من متى الدراسة حولوها للتلفزيون والتليفون؟
وديمة:شسوي كنت ملانة بروحي..فبغيت اتسلى..
خالد:مافي وقت للتسلايه..قومي غسلي يدج خلنا نتعشى وعقب روحي ذاكري..
يوم السبت...وديمة تروح الامتحان..وخالد طلع يتمشى شوي..أما فهد في بيتهم....
فهد:يبه انا مسافر السويد باجر..
بوفهد:ليش؟
فهد:سمعت ان في مشكلة بالفيلا اللي شاريينها..
بوفهد:ايش مشكلتها؟
فهد:يقول ان المستأجر يبي يشتري البيت..وماهو راضي يطلع منه لين مايشتري..
بوفهد:غصب؟
فهد:ماادري عنه..علشان جذي قلت بروح باجر وبشوف شالسالفة..
ام فهد:خلوا المحامي يروح عنك..انت مشغول..
فهد:معليه يمه..هذا حلالنا ولازم احنا اللي نديره..هم في نفس الوقت اشوف راكان..
ام فهد:فديت قلبه..مشتاقة له وايد..
بوفهد:ان شاء الله بيرد لنا بالسلامة..
ام فهد:آمين..
بوفهد:بيت اخوي ماردوا عليج؟
ام فهد:لا ليحين..
فهد(قام):انا طالع..تبون شي؟
بوفهد:وين؟
فهد:بروح الشركة..بوقع على اوراق ومواعد واحد..
في بيت بوسلمان....



سلمان:أخبار وديمة؟
ام سلمان:الحمدلله..
سلمان:ليش ماجاتكم؟
ام سلمان:عندها امتحان اليوم..الله يوفقها..
بوسلمان لابس ينزل تحت...
ام سلمان:وين؟
بوسلمان:بروح بيت أختي..ولدها فيصل شوي تعبان وبروح اشوفه..
ام سلمان:خير اشفيه؟
بوسلمان:ماادري..ياللا انا رايح مع السلامة..
الجميع:مع السلامة..
سلمان:يمه..لي متى بتظل وديمة برع البيت؟
ام سلمان:ماادري يايمه..هي كيفها..انا مااقدر اقولها شي..هي مريضة ومافيني اكسر بخاطرها خلها تسوي اللي تبيه..
سلمان:بس يايمه ايش تبين الناس تقول عنا..طلعت من بيت ابوها ورايحة تعيش مع اخوها..ليش؟؟..مافي سبب يقنع الناس..
ام سلمان:يايمه اللي يصير مع وديمة بحياتها لها الحق انها تغير جو..وطلعتها من البيت تغيير جو..
سلمان:انزين سفروها..
في السيارة....
وديمة:السلام عليكم..
خالد:وعليكم السلام..هاا بشري..
وديمة:ماادري..
خالد:يعني شنو؟
وديمة:خل تطلع النتايج وعقب يصير خير..تكفى ردني البيت..
خالد:ليش؟
وديمة:ابي اتسبح وابي انام..تعبانة حدي..قد ماذاكرت هالمرة ماذكرت من قبل..
خالد:احسن علشان تجيبين التوفل..وشيخة ايش سوت؟
وديمة:ماادري عنها ماشفتها..
ردوا البيت..تسبحت وديمة وراحت ترقد..وظل خالد يفر بهالقنوات لين مارن جرس البيت وراح يفتح...
خالد:هلا والله حياك تفضل..
سلمان:أخباركم؟
خالد:بخير..حياك..
قعدوا بالصالة..
خالد:انت اشلونك طمنا عنك..
سلمان:انا بخير..ماتوقعت احصلك في البيت..
خالد:رديت وديمة من الجامعة وماكان لي خلق للطلعة..
سلمان:ايش سوت في امتحانها؟
خالد:تقول ماادري..
سلمان:اقول خالد..
خالد:قول..
وديمة:لي متى بتظل وديمة عايشة عندك؟
خالد:ليش هالسؤال؟
سلمان:يعني..مب حلوة بحق بيتنا..ان اختنا طلعت من بيت ابوها ورايحة تعيش في بيت اخوها..
خالد:مافيها شي..
سلمان:الا فيها..انت ماتدري الناس شتقول..
خالد:خلهم يقولون اللي يقولونه لين مايشبعون..انا عن نفسي مرتاح ولاعلي من حجي الناس..انت ماتدري ياسلمان وديمة ايشقد تعاني من مرضها ونفسيتها تعبانة..صج اني عصبي ومرات اعصب عليها..لكن قلبي يعورني على حالها لما تشوف الابرة بيدي..خوفها يكسر خاطري..انت تعرف وديمة عدل ايش كثر هي حساسة وتفكر وايد..وابوي كان مدلعها وايد..والحين تشوف نفسها مريضة وماهي مثل اول..كل هذا وماتبيني اساعدها علشان تغير جو..ولا انا خلاص صرت غريب عنكم؟
سلمان:خالد ماابي اسمع هالحجي مرة ثانية..شنو غريب عنا..انا ماقلت هالحجي الا لأني خايف عليها من حجي الناس..
خالد:الناس طول عمرهم يتحجون في خصوصيات غيرهم..خلهم يقولون اللي يبيونه..لين مايتعبون ويسكتون..
في بيت بوهبة...هبة قاعدة تخطط وياهلا في غرفتها..
هبة:تدرين ايش بسوي..بخلي عرسي بأكبر قاعة في الديرة..واغلاها..وبعزم كل الناس اللي اعرفهم..بخلي عرسي اسطوري بخلي الناس كلها تتحجى عن عرسي..بروح اشتري الفستان من برع..وبشتري لي اطقم الماس..وبطلب طلبية ورود العرس ومسكتي تكون من برع..
هلا:ياسلام عليج ياهبة..والله انج محظوظة..
هبة:شدي حيلج وخذي اخوه..
هلا:ياليت..بس خله يرد..ايش رايج نسافر نتزهب للعرس..
هبة:خوش فكرة..بس خلي امي تخبرهم وعقب نروح..
هلا:بس الاهم يعطونج مهر معتبر..
هبة:أفا عليج..أنا هبة..
في بيت خالد...



كان قاعد ويا وديمة يطالعون مسرحية كوميدية..وظلوا يضحكون ويكسرون حب لين ماصارت الساعة 1 وعشر دقايق...قامت وديمة...
وديمة:تعبت من الضحك..بس صج صج كانت خوش سهرة..
خالد:خلاص ايش رايج نروح باجر السينما؟
وديمة:وانا موافقة..
خالد:ياللا روحي نامي قبل لاتطيحين علينا..
وديمة(تتمغط):مع اني رقدت لكن بعد نعسانة..
خالد:روحي روحي..علشان تقومين للصلاة..
وديمة:تصبح على خير..
خالد:وانت من هله..
راحت غرفتها..وفرشت اسنانها..وسكرت الليتات وفتحت الابجورة..يندق الباب...راحت وفتحت الباب...
خالد:مو جنج نسيتي شي..
وديمة:شي شنو؟
خالد:الابرة..
وديمة:........
خالد:ياللا تعالي قعدي..
وديمة:خالد ماابيها..
خالد:علشاني..
وديمة:ماابي..تعبت منها..
خالد:انت خذيها واللي تبينه بسويه لج اياه..
فهد يسافر السويد ويستقبله اخوه بالمطار...ويردون البيت....
فهد:اخبارك؟
راكان:بخير..انتوا اخباركم..اخبار امي ابوي..
فهد:كلهم بخير..وينتظرون ردتك..
راكان:بقى وايد يافهد..
فهد:معليه تحمل شوي بعد..متى اجازتك؟
راكان:ماعندي لين الصيف..
فهد:لاتقول..
راكان:أي والله..مااقدر ارد البلاد الا في الصيف..ماعليك من هالسالفة..قولي ماتزوجت؟
فهد:تعتقد بتزوج من غيرك؟
راكان:قلت يمكن خطبت ولا شي..
فهد:بيني وبينك انا خطبت بس ليحين ماردوا علينا..
راكان:من بنته؟
فهد:هبة بنت عمي..
راكان:اشوف الريال عشقان..
فهد:ليش؟
راكان:ايش معنى اخترتها بين كل البنات؟
فهد:ولاشي..بس مرة شفتها وعجبتني..
راكان:ياعيني..عقبالنا..
فهد:آآمين..قولي ايش سالفة هالمستأجر؟
راكان:الله يسلمك ماهو راضي يعطي الايجار ولا هو يبي يطلع..
فهد:ليش؟
راكان:يقول ابي اشتري البيت..
فهد:هذا من السويد؟
راكان:لا واحد عربي..
فهد:لاحول لله..لاحقينا بمصايبهم حتى هني..انت قلت له البيت مو للبيع؟
راكان:قلت له..بس عنيد..يقول انا بشتري البيت وبعطيكم الباقي من الايجار..
فهد:الله يعينا..جان انهيت السالفة من غير مااجي..
راكان:مااقدر عليه ياريال..انت روح له وبتعرف ليش ماقدرت عليه..ايش تشرب؟
وتمر الايام ..بعد اسبوعين تقريبا....
دخلت البيت وديمة..وراحت غرفتها وسكرت الباب وقعدت تصيح...رن تليفونها وايد وماقدرت ترد من الضيقة اللي فيها..شوي ويندق الباب..خافت ان خالد يدري..راحت غسلت وجهها بسرعة وفتحت الباب...
خالد(شاف وجهها غريب):وديمة ايش فيج؟
وديمة:مافيني شي..
خالد:انت كنت تصيحين؟
وديمة:انا؟..لا..من قال..(راحت بسرعة قعدت على السرير وخشت وجهها عنه)
خالد(قرب منها):تعبانة؟
وديمة:لا..
خالد:عيل اشفيج؟
وديمة:صدقني مافيني شي..
خالد:وديمة لاتخليني اعصب..تحجي اشوف..
وديمة(رفعت راسها):ماجبت التوفل..
خالد:تدرين لو تنضربين لين الصبح مايكفي..
وديمة(دموعها نزلت):ادري..استاهل الضرب..
خالد:انت تستاهلين الضرب والتكفخ بعد..قسم بالله خرعتيني حسبت صاير لج شي تعبانة ولاشي..الا اتاري السالفة ماجبتي التوفل..صج ماعندج سالفة..(راح)
وديمة(وقفت دموعها واستغربت وراحت الصالة حصلت خالد قاعد يقرأ الجريدة قعدت)
خالد:كم جبتي؟
وديمة:440..
خالد:معليه شدي حيلج في الامتحان الياي..
وديمة:أخاف مااجيب..
خالد: تعرفين اني مااحب اسمع هالحجي..قومي بدلي ملابسج وتعالي شربي هالعصير..لاتقولين مااشتهي..بتشربينه غصب..
وديمة(في بالها..ماادري ليش حسيت اني مستانسة..الله يخليه لي ولايحرمني من طيبة قلبه)..
في شركة بوفهد...في مكتب فهد..يرن تليفونه...
فهد:السلام عليكم....هلا.......بخير........اي شوي مشغول عندي ناس.......إن شاء الله..مع السلامة..شوف ياأستاذ مبارك..أنا ابيك تتبع القوانين في هالمشروع ماابي اجتاز القانون على الاقل في هالمشروع..وشوف لي الموضوع عدل من جميع النواحي كونك محامي..
مبارك:ان شاء الله انت تامر طال عمرك..
فهد:وانت يامهندس عادل..أبيك اليوم تتصل في المهندس اللي خبرتك عنه..وخله يينا باجر الصبح..
عادل:ان شاء الله..
فهد:عيل جذي احنا متفقين وباقي المناقشات بنكملها لكمل العدد..في شي ثاني بعد؟
مبارك(قام):سلامتك..
فهد:نبي همتكم في هالمشروع..
عادل(قام):ان شاء الله..كل شي راح يصير مثل ماتبي..عن اذنك..
مبارك:انا بعد استأذن..
السكرتير:تامرني بشي طال عمرك؟
فهد:جهز لي صفقة بوعلي..
السكرتير:ان شاء الله..
فهد:بس لاتجيبه لين مااخبرك..أبي اتكلم في التليفون شوي..
وبقى فهد بروحه..اتصل على امه....
فهد:هلا بالغالية..أنا آسف كان عندي اجتماع..
ام فهد:مايخالف ياولدي..بس كنت أبي اخبرك ان بنت عمك وافقت..
فهد:صج يمه؟
ام فهد:أي..وسألتها عن الملجة..قالت لي فهد مايبي يشوف هبة..
فهد:لا ماابي اشوفها..انا شفتها مرة وخلاص..
ام فهد:عيل جذي خلنا نحدد يوم الملجة..
فهد:صار..
ام فهد:متى تبيه؟
فهد:خلي الملجة والحفلة بيوم واحد..
ام فهد:على راحتك يمه..عيل جذي بشوف البنت متى تكون زاهبة..
يرن جرس البيت..يروح خالد يفتح الباب...
ليلى:السلام عليكم..
خالد:هلا ام خالد وعليكم السلام..هلا بووليد..(يلمه)..اشلونك؟
خالد:طيب..
خالد:دوم ان شاء الله..حياكم..
ليلى:عيل وين وديمة مااشوفها؟
خالد:بدارها تذاكر..
ليلى:ماطلعت نتيجة التوفل؟
خالد:بلا طلعت..
ليلى:شكلها ماجابت التوفل..
خالد:أي..بس ان شاء الله هالمرة بتجيبها..
ليلى:ان شاء الله صار لها من ايام الثانوية العامة وهي تمتحن ومايطلع معاها شي..
خالد:لعله خير..
ليلى:جبت لكم الخدامة علشان تنظف البيت..
خالد:مشكورة..
ليلى(قامت):بروح اشوف وديمة..
خالد:قولي يالشاطر اخبار الروضة؟
خالد الصغير:مو حلوة..
خالد:ليش؟
خالد:علشان علشان..مو حلوة..انا ابي اروح الجامعة مثل خالتي..
خالد:خالتك!!
خالد الصغير:أي..روضة مو حلوة..خالي..خالي ودني جامعة..
خالد:لصرت ريال ان شاء الله بتروح..
خالد الصغير:انا ريال..
خالد:والنعم..بس اقصد لطلعت لك شنب ولحية..(قام)..تعال معاي..
راح غرفة وديمة...
خالد:بودي خالد الجمعية وبرد..تبون شي؟
ليلى:إذا في خاطركم اكلة قولوا علشان تشتري الاغراض واسوي لكم..
خالد:ها وديمة شنو مشتهية؟
وديمة:خاطري في برياني..
خالد:برياني على العشاء؟
وديمة:اشفيها؟
خالد:بكيفج..ياللا انا رايح..
ليلى:أخبارج؟..اشلون الحياة مع خالد؟
وديمة:زينة..
ليلى:بس زينة؟
وديمة:هو شوي عصبي..بس عليه قلب طيب..
ليلى:هذا خالد..ماتعرفينه..
وديمة:اعرفه..بس ماتوقعت ان ليحين عصبي..بس معليه خله يسوي اللي يسويه..
ليلى:شكلج مب رادة البيت..
وديمة:حاليا لا..
ليلى:حرام عليج..اشلون قدرتي تفارقين امي وابوي..
وديمة:مااعرف..بس خلاص تعودت على هالجو..
ليلى:دام انج قاعدة ويا خالد..قولي له يتزوج..
وديمة:وليش يتزوج؟
ليلى:شنو بعد ليش؟..الريال لازم يتزوج..
وديمة:لاحبيبتي..بدري عليه..خله يستانس بحياته..
ليلى:انت اشفيج؟
وديمة:مافيني..بس ماابيه يتزوج..
ليلى:وليش ان شاء الله؟
وديمة:لأن إذا تزوج ....ولا اقولج خلاص..
ليلى:اشوف كملي..
وديمة:خلاص..ماني قايلة شي..
ليلى:ودوم اشوف تحجي..
وديمة:تليفونج يرن..
ليلى:وين مااسمعه..
وديمة:تكفين لاتسأليني..بعدين بقول..بس الحين لا..
يرن جرس البيت...
ليلى:في حد بييكم؟
وديمة:لا..غريبة..من بيكون؟
ليلى:ماادري..ليكون خالد نسى مفاتيحه؟
وديمة:مااعتقد..قولي حق خدامتج خلها تروح تشوف من..
وراحت الخدامة تفتح الباب..ليلى ووديمة قعدوا يطلون من الدريشة..راحت ليلى تستقبلهم عند الباب....
ليلى:هلا والله..هلا بأمي وابوي..
ام سلمان:انت شيتسوين هني؟
ليلى:جايبه الخدامة تنظف لهم البيت..
ويسلمون على بعض...ويقعدون...
بوسلمان:وين خالد؟
ليلى:طلع وياخالد الصغير الجمعية..
بوسلمان:اشلونج وديمة؟
وديمة:بخير..
بوسلمان:ايش صار على التوفل؟
وديمة:ماجبته..
ام سلمان:ماجبتيه؟
وديمة:لا..
ام سلمان:عيل قومي لمي اغراضج وردي معانا البيت..
وديمة:شنو؟؟
ام سلمان:وانا احسب قعدتج هني بتسوي شي جديد..
بوسلمان:وديمة يبه عطيني الجريدة..
وديمة(قامت):ان شاء الله..
وقعدوا كلهم يسولفون وتعشوا جميع...وكل واحد فيهم رد بيته...خالد راح غرفة وديمة...حصلها منسدحة ومتضايقة..
خالد:كل هذا علشان التوفل؟
وديمة:ابوي ايش كان يقولك قبل ليطلع؟
خالد:قالي دير بالك على وديمة..
وديمة:لا..أكيد قالك شي ثاني..
خالد:الحين انت متضايقة علشان ابوي قالي شي؟
وديمة:لا..بس امي يوم درت اني ماجبت التوفل قالت لي لمي اغراضج وردي البيت..
خالد:هالمرة ان شاء الله بتجيبينها..انا متأكد..بعدين متى ماقدرت بقطج في بيت ابوي..
وديمة:ماقلت ابوي ايش قالك؟
خالد:تبين تعرفين؟
وديمة:أي..
خالد:قالي ان باجر عندج موعد في المستشفى..
وديمة:بس انا مب رايحة..
خالد:ليش؟
وديمة:روحتي مالها معنى..
خالد:بس انا بوديج غصب عنج..ومن غير ماتناقشيني..(سك الباب)
في مكتب فهد على الساعة 9 الصبح....
فهد:ياليت هالمشروع يكون مفاجأة..وماابي حد يدري عنه..يعني طريقة وفكرة المشروع وتنفيذه بينا وبس..حتى الوالد الله يطول بعمره ماابيه يعرف..اتفقنا..
الجميع:اتفقنا..
فهد:عيل جذي احنا ماشيين زين..ومتى ان شاء الله بيبدى التنفيذ؟
مبارك:طال عمرك..هالمشروع له راس مال كبير..
فهد:عندي فكرة..ومسوي حسابي..لاتحاتي..المهم متى راح تبتدى يامهندس عادل؟
عادل:متى ماتامر حضرتك..
فهد:انت ايش رايك يايوسف؟
يوسف:انا اعتقد كل مابدينا اسرع كل ماكان احسن..لأن المشروع فيه شغل وايد وبيطول..
فهد:تعتقد متى بيكون جاهز؟
يوسف:مو أقل من سنتين..
فهد:سنتين وايد..
يوسف:وايد..بس يكون المشروع مبتكر احسن من شي ثاني..
فهد:انا معاك في هالنقطة..متى راح تبتدون؟
يوسف:ايش رايكم نبتدي من باجر..
فهد:خلاص..(قام)..توكلوا على الله..
الكل قام...
فهد:بس الاهم هذا المشروع مايطلع برع..
الجميع:حاضر..
فهد:الاجتماع خلص..وتقدرون تروحون..يوسف..
يوسف:نعم؟
فهد:خلك انا ابيك شوي..
يوسف:ان شاء الله..
وعقب ماالكل طلع...
فهد:خبرني عنك يايوسف..
يوسف:مثل شنو؟
فهد:عنك..
يوسف:انا طال عمرك متخرج من خمس سنين من الجامعة وحاصل على بكالريوس في الهندسة المعمارية..واشتغلت مكان وطلعت..
فهد:وليش طلعت؟
يوسف:لأني حسيت انه مب مكاني وماكنت مرتاح..كل مااقولهم شي يقولون لي ماعندك خبرة..انزين اذا مااشتغلت من وين بتكون لي الخبرة..تميت في البيت وصرت اسوي تصاميم معمارية بنفسي..لين ماقدرت ارسم كم مشروع..
فهد:ماشاء الله زين..الظاهر راح نستفيد منك وايد..اعتبر نفسك يايوسف واحد من هالشركة..راح تتوظف عندنا على طول..وراتبك على قد شطارتك..مع اني احس انك راح تعطيها صح دايما..تقدر الحين تروح لعند السكرتير علشان يدلك وين تروح توقع عقد العمل..
يوسف(قام):تسلم طال عمرك..ماقصرت..
فهد:انت تستاهل..وخلنا نشوف شغلك..
يوسف:ان شاء الله..مع السلامة..
فهد:مع السلامة..
في المستشفى....
خالد:خلج هني واقفة..بروح آخذ لج الدواء من الصيدلية وبرد..لاتحركين..
وديمة:إن شاء الله..
وعقب ماركبوا السيارة...
خالد:وين تبين تتريقين؟
وديمة:وين ماتبي..
خالد:بوديج مكان تتريقين فيه ريوق أجنبي..بس عجيب..
وديمة:ياللا خلنا نجرب..
ولما وصلوا المطعم...وقعدوا ياكلون....
وديمة:ايش رايك فيني؟
خالد:البركة فيني..جان الحين السكر عندج مرتفع..
وديمة:لاتصدق روحك وايد..
خالد:ماادري من اللي كان يشرد من الابر..
وديمة:انزين شسوي أخاف..
خالد:تكفين كملي ريوقج من غير صياح..
وديمة:لا والله..ومن اللي قال اني بصيح؟
خالد:وديمة..انت لازم تهتمين بصحتج..ترى السكر مب هين..
وديمة:ايش تبيني اسوي..
خالد:سمعي كلام الدكتور حرفيا..
وديمة:لي متى؟
خالد(يبي يغير السالفة):ترى اليوم بقطج في بيت اختج..
وديمة:شنو أنا كيس تقطني؟
خالد:اللي هو..
وديمة:ليش وين بتروح؟
خالد:عندي شغل..الربع رادين من السفر وبنروح نستقبلهم..
في بيت بوفهد...وهم ياكلون فواكه....
فهد:يبه اليوم جاني مهندس جديد..وعجبني حماسه للشغل..وشكله واحد شغيل..
بوفهد:مهندس شنو؟
فهد:مهندس معماري..وصار له متخرج من خمس سنين..فأنا استانست عليه وايد وعينته عندنا بالشركة..
بوفهد:دام انه عاجبك خلاص سوي اللي تبيه..ايش عندك اليوم بالشغل مجتمع بالمحامي والمهندسيين؟
فهد:قاعدين نزهب حق المشروع..
بوفهد:وانت لحد الحين مب راضي تقولي عن المشروع؟
فهد(يبتسم):لا..كل شي في وقته حلو..
ام فهد:الله يسعدك ياولدي..
فهد:أي صح ماقلتي لي يالغالية..ماحددوا الملجة؟
ام فهد:بلا..ان شاء الله عقب عشرة ايام..يوم الاربعاء..
بوفهد:ذكريني لرحت فوق اعطيج شيك المهر..
ام فهد:انت خذ الشيك وروح وياولدك بيت اخوك..عطهم وهم تسولفون اذا عندهم شروط ولاشي..
فهد:ليش عندهم شروط بعد؟
ام فهد:ماادري..بس احسن..بعدين هذا عمك ماهو واحد غريب..روحوا لهم..
بوفهد:امك معاها حق..
خالد يرجع البيت مع وديمة..يي جيرانهم يسلم عليه...
خالد:هاج المفتاح ودخلي..
الجار:السلام عليكم..
خالد:وعليكم السلام..هلا فالح..
فالح:أخبارك ياخالد؟
خالد:بخير..انت اشلونك؟
فالح:الحمدلله..هاك..
خالد:شنو ذي؟
فالح:كيكة ملجة أخوي..
خالد:بالمبارك..من من اخوانك؟
فالح:خليل..
خالد:وصل سلامي له..
فالح:ان شاء الله..هاك الكيكة..
خالد:يااخي ليش متعب عمرك..ماله داعي..
فالح.لاوالله تاخذه..
خالد:حاضر..مشكور..
فالح:في امان الله..
خالد:في امان الله..
يدخل البيت...
وديمة:شنو هذا؟
خالد:كيك..
وديمة:كيك!!..من وين؟
ويمة:عندهم حفلة ملجة اخوهم..وذكرونا بكيكة..
وديمة:يحليلهم..انزين خلنا ناكل..
خالد:نعم!!..من يبي الكيك؟
وديمة:انا..
خالد:لاحبيبتي..الدكتور قال السكر عندج مضبوط..مانبي نخرب الصحة..بعدين انا بعد ماابي آكل..
وديمة:عيل ايش بتسوي فيه بتقطه برع؟
خالد:لا طبعا..ليش اقط نعمة رب العالمين..الصبح ليي راعي الزبالة..بعطيه احصل فيه أجر..
وديمة:وانت ليش ماتاكل؟
خالد:جذي ماني مشتهي..
يوم الاثنين....
في بيت بوهبة...
ام هبة:من تحاجين من الصبح؟
هبة:ذولا ربعي..
هلا:ماخلت حد الا وخبرته عن مهرها..ومن بياخذها..
ام هبة:يايمه خلج من هالكلام كله..قومي خلنا نروح السوق نتزهب للحفلة..ترى مابقى وقت..
هبة:ياحلاتني انا اروح اتسوق علشان الحفلة..
هلا:ان شاء الله تبين احنا نتسوق عنج؟
هبة:لاطبعا..انا بروح اتشرى من برع..
ام هبة:وين؟
هبة:اوروبا..
هلا:ياسلام على افكارج..اي يمه خلنا نسافر..نغير جو ونتشرى للحفلة..
ام هبة:واشفيها لو شريتي اغراضج من هني؟
هبة:انا هبة حرم فهد اشتري من هني..لا..لازم ابين للناس اني اقدر اشتري من أي مكان لو اروح القمر.. ها يمه ايش قلتي؟
ام هبة:بحاجي ابوكم وبشوف شيقول..
في بيت خالد...وديمة تطلع من غرفتها تحصل خالد قاعد يقرأ مجلة ومندمج حده.....
وديمة(تقعد جنبه)
خالد:في شي؟
وديمة:لا..
وقعد يكمل قراية...
وديمة:خالد..
خالد:خير..
وديمة:تقدر توصلني بيت عمتي..
خالد:ليش؟
وديمة:أبي اشوف شيخة..ماجات اليوم الجامعة كانت مريضة..
خالد:واشفيها مريضة؟
وديمة:متزكمة..ومسخنة..
خالد:وانت تبين تروحين علشان تمرضين ..ماتعرفين ان مناعتج ضعيفة..
وديمة:تكفى خالد..مابطول..بس ساعة..
خالد:بس!!
وديمة(تبتسم له):تكفى ياخوي..


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 23-12-2013, 03:46 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج



متابعة الفصل الثاني



في بيت العمة.....
وديمة:الله يعينج شيخوه..شكلج وايد تعبانة..
شيخة(بتعب):خلاص احس اني بموت..
وديمة:وليش ماتروحين المستشفى؟
شيخة:مااقدر اوقف على حيلي..
وديمة:افتقدتج وايد اليوم..
شيخة:شسوي..
يندق الباب....
ام فيصل:شيخة يمه خالج بوسلمان بيي يشوفج..
وديمة:ابوي!!
شيخة:بغيت اقولج بس نسيت..
بوسلمان(يدخل):السلام عليكم..
الجميع:وعليكم السلام..
بوسلمان:سلامتج ياشيخة..
شيخة:الله يسلمك..
بوسلمان(يقعد):شتحسين فيه؟
شيخة:بردانه..واحس جسمي متكسر وبلاعيمي تعورني..
بوسلمان:شفتي كم حرارتها؟
ام فيصل:شفته الصبح كان 38..
بوسلمان:انزين جيبيه خليني اشوف حرارته مرة ثانية..
ام فيصل:ان شاء الله..(راحت وعطته)
بوسلمان وهو ينتظر...
بوسلمان:اشلونج وديمة؟
وديمة:بخير..
بوسلمان:واشلون صحتج؟
وديمة:حمدلله..(قامت)..ياللا انا ماشية..خالد شوي وبيوصل..مع السلامة..
الجميع:مع السلامة..
تركب السيارة....
وديمة:ليش تأخرت؟
خالد(فاج عينه مستغرب):نعم؟!!..ليش تأخرت؟..وديمة تقولي ليش تأخرت وهي عند شيخة..غريبة..
وديمة:لاغريبة ولاشي..البنت تعبانة..
خالد:شنو متهاوشين؟
وديمة:لا..بس قلت لك كانت تعبانة وماحبيت تعاديني بالمرض..
خالد:شفت سيارة ابوي عند الباب..هو عندهم؟
وديمة:أي..
خالد:شفتيه؟
وديمة(تطالع الدريشة):أي..
خالد:قالج شي؟
وديمة:لا..
خالد:الظاهر عصبيتج هذي علشان شفتي ابوي..
وديمة(فتحت الراديو)
خالد(قال في نفسه):الله يهداج..
عقب ساعة...في بيت خالد...

يرن تليفون خالد....
خالد:السلام عليكم...هلا يبه..انا في البيت..
بوسلمان:ليش موصل وديمة عند شيخة؟
خالد:هي اصرت وماحبيت اكسر بخاطرها..
بوسلمان:انت تدري ان وديمة مناعتها ضعيفة وبسرعة تمرض..ماخفت شيخة تعاديها..
خالد:قلت لها بس مارضت..
بوسلمان:وانت بتمشيها على كيفها..الله يهداك..
خالد:شسوي يايبه..تحن على راسي وايد..
وديمة تيي..
خالد:ان شاء الله.....مع السلامة..
وديمة(تقعد):ليحين قاعد..
خالد:بغيت اروح انام..بس غيرت رايي..وانت ليش مانمتي؟
وديمة:بروح بس جيبت اقعد شوي معاك..
خالد(قام)
وديمة:وين؟
خالد:الحين بيي..
وديمة(قعدت تغير القناة لين ماحصلت مسلسل وعلت على الصوت)
خالد(جى وقعد عندها):هاج..
وديمة:شنو هاي؟
خالد:دواء..
وديمة:ليش؟
خالد:علشان ماتمرضين..
وديمة:أي بس انا بخير..
خالد:ولو..لازم تاخذين هالدواء..ياللا..
وديمة:ان شاء الله..
خالد:جبت لج ماي دافي..
عقب ماشربت...قامت....
خالد:وين؟
وديمة:بروح انام..
خالد:توج حاطه هالمسلسل علشان تابعينه..
وديمة:لا خلاص ماابي..تصبح على خير..
خالد:وانت من هله..
بعد يوم..على الساعة 2 ونص..في بيت بوسلمان..يروح بوسلمان علشان يرتاح في غرفته..تيي ام سلمان...
ام سلمان:اشفيك؟..شكلك مب عاجبني..حتى الغداء ماتغديت عدل..
بوسلمان:سكي باب الغرفة وبقولج السالفة..
ام سلمان(سكرت الباب):خير..صاير شي؟
بوسلمان:لا..بس اليوم المستشفى خبروني ان في دورة في ألمانيا..ولازم احضرها..
ام سلمان:احضرها مافيها شي..
بوسلمان:الدورة هذي غير عن اللي قبلها..
ام سلمان:اشلون يعني؟
بوسلمان:يعني هالدورة بتم فيها اكثر من 9 شهور..
ام سلمان:صج؟
بوسلمان:أي..
ام سلمان:انزين ارفضها..
بوسلمان:مااقدر..هالدورة وايد مهمة بالنسبة لي..واللي يحاضر فيها دكاترة معروفين مااقدر افوت مثل هالدورة..وقالوا لي احتمال كبير عقب مااخلص الدورة اتم سنة تدريب عندهم..والمستشفى اختارتني انا وواحد من الدكاترة..وايد دكاترة حاطين عينهم على هالدورة..فصعبة اني ارفضها..
ام سلمان:هذا وايد..احنا من غيرك مانقدر ندبر امورنا..
بوسلمان:هذا اللي قاعد افكر فيه..ماني عارف شسوي..بس انا جاتني فكرة..
ام سلمان:شنو؟
بوسلمان:نسافر جميع..
ام سلمان:اشلون؟
بوسلمان:نسافر انا وانت والعيال..وبسجل البنات في مدارس..ووديمة بدخلها جامعتهم..وجذي بيعطونا بيت..
ام سلمان:وحمد؟
بوسلمان:كيفه اذا بيي حياه..ايش قلتي؟
ام سلمان:ماادري والله..ومتى السفر؟
بوسلمان:عقب شهر..
ام سلمان:زين يعني عقب الامتحانات..
بوسلمان:أي..وهم فرصة اودي وديمة للعلاج..
ام سلمان:فكر اكثر يابوسلمان..احنا جذي بنهد البيت وبنسفر الخدامة وبتتغير وايد امور بحياتنا..
بوسلمان:ادري..انت بعد فكري..بس لاتقولين لحد لين مانقرر..حتى العيال ماابيهم يدرون حاليا..
في الجامعة.....





شيخة:أشوه انه طلعنا بدري..لاعت جبدي منه..ايشقد يسولف..
وديمة:خلينا نروح نشتري لنا عصير..خاطري في شي بارد..
شيخة:ياللا مشينا..
وعقب مااشتروا قعدوا بين الممرات وهم يسولفون....الا شوي تمر وحده من البنات....وتسلم عليهم....
وديمة:هلا حصوه اشلونج؟
حصة:بخير..انت اخبارج؟..مامبينه كلش..
وديمة:شسوي ويا هالتأسيسي ذابحني..ماني قادرة اجيب التوفل..
حصة:ان شاء الله بتجيبنه انت بس شدي حيلج..اتصلت كم مرة بيتكم يقولون لي وديمة محد..استغربت هالبنت وين تروح؟..
وديمة:أي فديتج انا مو في البيت..ساكنة ويااخوي..
حصة:ليش؟
وديمة:جذي تغيير..وهم هو يساعدني علشان اجيب التوفل..انزين ليش مااتصلتي على تليفوني؟
حصة:الله يسلمج غيرت تليفوني..وكل الارقام انمسحت من التليفون..وتوهقت..وتذكرت اني كنت كاتبة رقم بيتج في دفتر محاضراتي..بس زين اني شفتكم هني..انت اخبارج شيخة؟
شيخة:والله حالي من حال وديمة..
حصة:الله يعينكم..عيل عطوني أرقام تليفوناتكم قبل لأروح..لأني مستعجلة ووراي محاضرة عقب ربع ساعة ويالله الحق..
وديمة:وليش ماتحجيتي من الصبح؟
حصة:والله من زود الفرحة بشوفتكم نسيت..
عقب ماراحت حصة...
شيخة:انا برد البيت..امي اليوم رايحة السوق تبي تتشرى حق عرس ولد عمي..وبروح وياها..
وديمة:وبتهديني بروحي؟
شيخة:شسوي..ماصدقت الاستاذ طلعنا بدري..بقى وايد لين مايمرج خالد؟
وديمة:بقى نص ساعة..
شيخة:تبين اوصلج؟
وديمة:لا..ماعندي مفتاح البيت..
شيخة:انزين اتصلي فيه..
وديمة:ماابي..بيقولي متى ماخلصت بمرج..
شيخة:انزين بنتظر شوي وبروح..
وديمة:تسلمين ياقلبي..
الساعة صارت ست المغرب..وبعد صلاة المغرب..وديمة قاعدة مع خالد يسولفون ويضحكون...
وديمة:حرام عليك..لاتقول عنها جذي..
خالد:لاتدافعين عنها..ماادري من اللي كان يسب فيها..
وديمة:ذاك كان اول..
يرن جرس البيت...
وديمة:تعتقد من بيكون؟
خالد:يمكن ابوي وامي..
وديمة(خافت):ابوي؟!!
خالد:أي ابوي..اشفيج؟
وديمة:ولاشي..
خالد:انت مب صاحية..هذا ابوج ليش جذي خايفة..حمدلله والشكر..
وراح يفتح الباب..ودخلوا جميع وجات وديمة وسلمت عليهم....
بوسلمان:أخبارج وديمة؟
وديمة:الحمدلله..
خالد(قام):بروح اجيب لكم شي تشربونه..
بوسلمان:اقعد يبه..أبيكم بسالفة..
خالد(قعد):خير يبه؟
بوسلمان:الصراحة ياعيال..من ثلاثة ايام وانا بالشغل جاتني فرصة حق شغلي..وهالفرصة ماتتعوض..
خالد:شنهي الفرصة؟
بوسلمان:دورة بألمانيا..
خالد:زين ماشاء الله..وين تحصل أحسن من هالمكان..وايشقد بتم هناك؟
بوسلمان:الدورة سنة..وعقب الدورة في تدريب يعني سنتين تقريباً..
وديمة(فجت عيونها):سنتين؟!!
ام سلمان:أي سنتين..وقررنا انا وابوكم إن نسافر جميع..
بوسلمان:فقلت مريم وعائشة بسجلهم في المدارس مناك..وحمد كيفه إذا يبي يي حياه..ووديمة باخذها معاي وتسجل في الجامعة مناك..
وديمة(وقفت):لا..
الكل قعد يطالعها ومستغربين..
وديمة:أنا ماابي اسافر..ولاابي ادرس برع البلاد..ماابي..
ام سلمان:ليش؟؟
وديمة:تسألوني ليش؟؟...عقب كل هالفترة كونت صداقات مع البنات وصرت افهم على قوانين الجامعة ودراستها وتعودت في بيتي وبين هلي وفي دريتي بكل سهولة اطلع من البلاد..مااقدر..ماني رايحة مكان بتم هني..
بوسلمان:يابنتي ياوديمة..مثل ماكونتي صداقات مني كوني هناك..بالعكس هناك احسن لج علشان اللغة..
وديمة:ماابي..اوكي..ماابي..
ام سلمان:أي بس احنا كلنا رايحين..
وديمة:وانا ماابي اروح..انتوا قررتوا من غير ماتاخذون راينا..ليكون تحسبون احنا صغار ومالنا كلمة..(راحت غرفتها وسكرت الباب)
بوسلمان:اشوفك ساكت..
خالد:ايش تبوني اقول..انتوا قررتوا واللي تشوفه بمصلحتكم سووه..
بوسلمان:واختك؟
خالد:خلوها تفكر جم يوم..وعقب يصير خير..متى مسافر؟
بوسلمان:عقب ثلاث اسابيع وشوي..
خالد:خلاص في وقت..يعني عقب الامتحانات..خلوها تفكر على مهلها..
ام سلمان:شكلها معنده..
خالد:بحاول اقعنها..وإذا في نتيجة بخبركم..بس إذا كلكم سافرتوا من بيبقى في البيت؟
بوسلمان:قلنا الخدامة بنوديها معانا..وإذا حمد جى معانا..بخليك انت وسلمان تطلون على البيت بين فترة وفترة..
خالد:ومب رادين حتى في الاجازات؟
بوسلمان:حاليا مامبين شي..
ام سلمان تروح عند وديمة..وتدق الباب وتفتح لها...تقعد عندها وتمسح على شعرها....
ام سلمان:ليش تصيحين؟
وديمة:ماما ماابي اسافر..ابي اتم هني..
ام سلمان:بس احنا كلنا مسافرين..بتمين بروحج؟
وديمة:ماما تكفين ماابي اروح مناك..اللي فيني مكفيني..وبعد اقعد هناك من غير ربعي ولاشي..واظل بهالمرض هناك..ماابي..
ام سلمان:واحنا وين رحنا؟
وديمة:ماما انا بكون محصورة بين البيت والجامعة..لكن هني غير اشوف ليلى خالد جدتي عمتي وشيخة وربعي والجامعة والطلعات..يعني صعبه علي..
ام سلمان:ادري انها صعبه يايمه..بس هذا يخص مستقبل ابوج..انت ماتدرين ابوج ايشقد درس ودرس علشان يصير دكتور..وحلم حياته انه يسافر برع ويتدرب على ايدي احسن دكاترة..علشان خبرته تزيد..وهالدورة اللي جاته هي فرصة وماتعوض..وإذا رفضها يمكن ماتجيه مرة ثانية..وايد دكاترة حاطين عينهم على هالدورة..مو معقولة اخلي ابوج يسافر بروحه سنتين..
وديمة:اوكي انتوا سافروا وانا بتم هني..
ام سلمان:عند من؟
وديمة:بتم ببيت عمتي عند جدتي عند ليلى..عند خالد..اي مكان..يمه افهميني..
ام سلمان:فاهمتج يايمه..وادري انها صعبه عليج..بس شسوي..
في البيت....
ام سلمان:اشفيك يابوسلمان؟
بوسلمان:أفكر بوديمة..
ام سلمان:لو ماوافقت ايش بتسوي؟
بوسلمان:يمكن لغيت السفرة..
ام سلمان:لا يابوسلمان..ليكون تسويها..هذا حلم حياتك وكاهو وصل لعندك..والحين تفكر انك ماتروح..
بوسلمان:ووديمة شسوي فيها؟
ام سلمان:بنحاول نقنعها..
بوسلمان:وإذا مااقتنعت؟..انا ابي اوديها علشان تعالج..بس ماقلت لها علشان ماتتضايق اكثر..وديمة غير عن كل اخوانها وخواتها..ماادري ليش تفكر بهالطريقة..
ام سلمان:وديمة ماكانت جذي..وديمة تغيرت من عقب مامرضت..
بوسلمان:الظاهر يبيلها دكتور نفساني..
عند خالد ووديمة....
خالد يروح يدق الباب...ويدخل..يحصلها مشغله اغنية حزينة وزعلانة..
خالد:انا طالع من البيت..
وديمة(قامت):لا..وين تروح وتهدني بروحي..
خالد:ماتبين اروح؟
وديمة:لا..
خالد:اوكي..وانا بعد ماابي اشوفج زعلانة..سكي هالاغاني..وتعالي نتعشى..مب جوعانة؟
وديمة:بلا..
خالد:اللهم لك الحمد..أخيرا قلتي انج جوعانة..
وديمة(تبتسم)
خالد:أي جذي ابيج..ياللا جدامي..
عقب العشاء...قعدوا يطالعون تلفزيون....
وديمة(بتردد):خالد..
خالد:نعم؟
وديمة:انت ايش رايك؟
خالد:بشنو؟
وديمة:باللي قاله ابوي..
خالد:ابوي ماقال شي غلط..كل اللي قاله هو في مصلحة الكل..
وديمة:مصلحة الكل؟؟..اشلون؟
خالد(لف صوبها وعدل قعدته):شوفي وديمة..انت كنت صغيرة وماتذكرين ابوي ايش كان يسوي..ابوي تزوج وهو يدرس..عاش مع امي سنين برع البلاد علشان يجيب شهادة طب..حتى سلمان وليلى وأنا انولدنا برع البلاد..ابوي تم يكافح علشان يجيب التميز بكل شهاداته..وقعد يتدرب جم سنة لين مارد البلاد ودخل المستشفى واشتغل..وهذا ماكان نهاية طريقه..تم يحاول ياخذ له بعثه من الشغل يكمل دراسته..لين ماسافر وجاب الماجستير..وعقب ردينا البلاد..وكمل شغله..وزاد راتبه واحترامه بين الناس..وكان يحلم انه يروح ألمانيا علشان يتدرب مناك..وطلب من المستشفى هالشي..لين ماجى هاليوم..فصعب عليه يفوت هالدورة..
وديمة:انزين مو مشكلة خله يسافر..بس امي ليش تروح معاه؟
خالد:وديمة..امي ماتعودت تقعد من غير ابوي..من وقت ماتزوجت ابوي وهي تسافر وياه من مكان لمكان..مااعتقد انها راح تخليه يسافر بروحه..هذي سنتين ياوديمة..ابوي محتاج انكم تكونون بجنبه..وهم انتوا بحاجة ابوي يكون معاكم..
وديمة:..........
خالد:ليش سكتي؟
وديمة:أفكر بكلامك..
خالد:فكري عدل..ترى احتمال ابوي يكنسل الدورة بسبتج..
وديمة:ليش ابوي يربط نفسه فيني؟
خالد:لأنه ابوج يالذكية..حمدلله والشكر..قومي جيبي لي ماي..قومي..
وديمة:زين زين..
خالد:وشيلي معاج هالصحون..
وديمة:أشوفك مشغلني خدامة عندك..
خالد:ليش لا..
وديمة:عيل خلي الصحون لك انت ودهم المطبخ..
خالد(على انه عصب):يوم اقولج شي قولي ان شاء الله..
وديمة(خافت):زين خلاص لاتعصب..
خالد:أي جذي ابيج..
وديمة(حست بالاستسلام وراحت المطبخ وجابت له ماي):هاك..
خالد(خذ من يدها):مشكورة..
وديمة:ياللا انا رايحة انام..
خالد:حشى دجاجة..
وديمة:نعسانة حدي..ومالي خلق سهرة الليلة..خلها على الخميس..
خالد:لاحبيبتي الخميس مااقدر..
وديمة:ليش؟
خالد:بروح اسهر مع الربع..وبقطج بيت ابوي..
وديمة:نعم؟!!..شنو تقطين انا كيس؟
خالد:اللي هو..
وديمة:انزين خلاص انا بروح انام..تصبح على خير..
خالد:تعالي تعالي وين رايحة؟
وديمة:بعد ان شاء الله تبيني اودي لك الكلاص المطبخ؟
خالد:ليش لا..بس تراج ماخذتي دواج ولا الابره..
وديمة:يعني ماانت قادر تنساها ليلة؟
خالد:لا..روحي جيبي دواج..
وديمة:ان شاء الله..
في بيت بوفهد...


اضغط على الصورة لرؤيتها بحجمها الطبيعي

فهد وبوفهد يردون من الشغل ويسلمون...
بوفهد:اشلونج ياكاملة؟
كاملة:بخير يابوفهد..انت اخبارك؟
بوفهد:الحمدلله..انا رايح ابدل ملابسي..خلهم يزهبون العشاء..
ام فهد(قامت):ان شاء الله..(راحت)
فهد(قعد):اشلونج خالتي؟
كاملة:بخير..انت اخبارك؟
فهد:الحمدلله..
كاملة:متى ملجتك؟
فهد:مابقى شي بس ننتظر العروس تجهز..
كاملة:العروس ماقصرت باجر الصبح مسافرة علشان تتزهب..
فهد:صج؟..توني اسمع منج..
كاملة:الله يهنيك..
فهد:آآآمين..
كاملة:شكلك مستانس..
فهد:بصراحة أي ..
كاملة:يوم انها في بالك من زمان ليش خليتنا نلف بيوت الناس علشان ندور لك على وحده؟
فهد:مو على اساس كانت مخطوبة..
كاملة:المهم..اخبار اخوك؟
فهد:حمدلله..
كاملة:ماهو جاي علشان ملجتك؟
فهد:مااعتقد..
ام فهد(تيي وتقعد معاهم):حيالله بالمعرس..
فهد:الله يحيج يالغالية..يمه بيت عمي وين مسافرين؟
ام فهد:قالت لي مرت عمك ايطاليا وفرنسا..
كاملة:حق العرس وين بتسافر؟
ام فهد:ماادري والله..
فهد(قام):انا رايح ابدل..
ام فهد:كاملة اشفيج على البنية..على الاقل لاتعلقين جدام فهد..ماصدقنا انه وافق على وحده..
كاملة:ياام فهد فهميني هالبنت ماتنفع حق ولدكم..
ام فهد:كاملة عاد خلاص..البنت مافيها شي..يعني معقولة بنت عمه فيها شي واروح ازوجه..
كاملة(قامت):بكيفج..انا خبرتكم..
ام فهد:بس ياليت ماتقولين شي حق فهد..
كاملة:الله يعين فهد على زوجته..مع السلامة..
ام فهد:مع السلامة..
في غرفة فهد...قاعد يتكلم في التليفون......
فهد:الحمدلله مستانس...بس ماادري ليش خالتي فيها شي..وشكلها مب عاجبها اني بتزوج هبه بنت عمي..
غانم:ليش؟
فهد:ماادري..
غانم:ماعليك منها..يااخي الحريم مايخلون حد بحاله..استانس بتتزوج أخيرا..هلا والله بالمعرس..
فهد:هلا فيك..غانم ايش رايك نطلع شوي ندور بالسيارة؟
غانم:ياللا..بس انا اللي امرك..
فهد:صار..في امان الله..
غانم:في امان الله..
لبس ونزل تحت عند امه...
غانم(يعلي صوته):يمه..
ام غانم:خير يمه؟
غانم:انا طالع ويافهد..تبين شي؟
ام غانم:شنو مااسمعك..
غانم(يعلي صوته):طالع ويافهد..تبين شي؟
ام غانم:أي يمه ابيك تعطيني دواي قبل لتروح..لأن الخدامة ماتعرف شي..
غانم:ان شاء الله..لوسيتا..لوسيتا..
لوسيتا:نعم بابا..
غانم:ساعة لين ماتردين..
لوسيتا:سوري بابا..
غانم:جيبي دواء ماما وماي..
لوسيتا:ان شاء الله..
ام غانم:اقول ولدي غانم..
غانم:لبيه يمه..
ام غانم:ليش فهد مايزورني؟
غانم:تدرين يمه فهد مشغول ويا ابوه في الشركة..مادريتي ان فهد بيتزوج؟
ام غانم:بالمبارك..ومن بياخذ؟
غانم:بنت عمه..
ام غانم:منو؟
غانم(يعلي صوته):بنت عمه..
ام غانم:بنت حسن؟
غانم:أي حسن..بياخذ هبه..
ام غانم:زين مااختار..الله يهنيه..
جات الخدامة..
لوسيتا:بابا..
غانم:هاتي..
وتمر أيام.. هبه تنشغل ويا اهلها بتجهيز حفلة الملجة...وفهد مشغول بين الصفقات التجارية والمشاريع..وخالد مشغول بتدريس وديمة...وبوسلمان مشغول بالتفكير وخايف من قرار وديمة...
وفي يوم السبت...يرن تليفون خالد....
خالد:السلام عليكم........الحمدلله انت اشلونك؟.....وديمة بخير...اي باجر آخر يوم لها...ماادري بس انا ماكلمتها بالموضوع لين ماتخلص امتحاناتها خفت ماتركز في الدراسة..بحاول ان شاء الله باجر....فاهمتك....ادري انا بعد كنت اقول نفس الشي لازم تروح المستشفى.....إن شاء الله سلم على امي..مع السلامة..
وديمة(فاجه عيونها وهي تطالع خالد)
خالد(لف الا شافها واقفة):وديمة!!
وديمة(نزلت منها دمعة وراحت غرفتها وقفلت الباب)
لحقها خالد وصار يدق الباب...
خالد:وديمة فجي الباب..وديمة..
وصار يناديها ويناديها..وماكو امل..هداها وراح قعد بالصالة يفكر اشلون يطلعها من الغرفة...
في بيت بوهبة....هبه وهلا لابسين ينزلون تحت.....
ام هبة:وين رايحين؟
هبة:بروح الصالون يمه..
ام هبة:متطولين؟
هبة:ماادري يمكن..ليش؟
ام هبة:لأن اليوم بيت خالج جايينا..
هلا:صج يمه..ياسلام يعني بشوف سارة وجاسم..
هبة:بنحاول نرد بدري..
ام هبة:ديري بالج وانت تسوقين..وانت هلا موتسولفين وايد مع اختج..
هلا:ان شاء الله..
في بيت بوفهد...تيي الخدامة وتضيف كاملة..وتروح تيي ام فهد وتسلم على اختها....
ام فهد:هلا اختي اشلونج؟
كاملة:بخير الحمدلله انتوا شاخباركم؟
ام فهد:الحمدلله..
كاملة:زهبتوا حق ملجة فهد؟
ام فهد:حمدلله..كل شي زاهب..
كاملة:الحمدلله..
فهد(يدخل البيت ويسلم ويقعد)
كاملة:اشلونك فهد؟
فهد:بخير..اقول خالتي..
كاملة:خير..
فهد:ابي أسألج سؤال..وأبيج تجاوبيني بصراحة..
كاملة:خير حبيبي؟
فهد:انت ليش مب موافقة على هبة؟
ام فهد(تطالع كاملة بنظرات غضب):ماتحملتي تسكتين..لازم تزنين فوق راس الولد علشان يغير رايه..
كاملة:ام فهد اشفيج؟..شنو تنزنين ماتزنين..انا ماتحجيت مع الولد خير شر..
ام فهد:الا..ولا ايش عنده يفكر بهالسالفة..
فهد:يمه اشفيج..خالتي ماقالت شي..انا بس بغيت أسأل..
ام فهد:الا خالتك تبي تخرب عليك هالملجة..وماتبين تتزوج بنت عمك..
كاملة(وقفت):انا؟؟
ام فهد:أي انتي..الظاهر حاطه عينج على ولدي حق وحده من بناتج..
كاملة(فاجه عينها مصدومة):الله يسامحج ياام فهد..لولا انج اكبر مني جان ماسكت..تسلمين على هالكلام..بس قبل لأطلع من بيتج..أبي أقولج شي..
فهد:خالتي تكفين...
كاملة(تقاطعه):معليه يافهد..خلني اكمل كلامي..لو انا كنت ابي فهد حق وحده من بناتي مثل ماتقولين جان من زمان سويت هالشي..ولا ليش رايحة معاج بيوت الناس علشان نخطب حق ولدج..
ام فهد:انا الحين عرفت ليش ماكان يصير نصيب بينا وبين الناس اللي رحنا لهم..الظاهر كنت تلعبين علينا..
فهد:يمه خلاص كافي..
كاملة:مع السلامة..
فهد لحقها..لين ماوقفها في الحوش...
فهد:خالتي تكفين لاتزعلين من امي..
كاملة:انا ماني زعلانة..بس خلاص ماني داخله هالبيت..
فهد:خالتي..خليني اوصلج..
كاملة:السايق برع..دير بالك على نفسك..مع السلامة..
فهد(يدخل البيت وهو معصب):يمه ايش هذا اللي سويتيه..حرام عليج..هذي أختج..
ام فهد:ماعليك منها..الحريم دوم حساد..
فهد:انت تقولين هالحجي عن اختج؟!!!!
ام فهد:فهد يمه..ماابيك تغير رايك في بنت عمك..البنت مافيها شي..تحصل خالتك مزودة حجي من عندها..ولا تعتقد إذا البنت فيها شي بيي انا وابوك نزوجك اياها..ماعليك من خالتك كلها جم يوم وعقب بترضى..
خالد تعب من الانتظار..مرت ثلاث ساعات ووديمة ماطلعت من غرفتها..راح لها..
خالد:وديمة الغداء جاهز..وديمة..وديمة تكفين ردي علي..إذا مارديتي باتصل في ابوي..
وديمة:ايش تبي فيني؟
خالد:اشوه..فجي الباب..
وديمة:ماابي..ماابي..
خالد:انزين معليه بس طلعي شوي كلي لج شي وعقب دخلي غرفتج..
وديمة(صارخت):ماابي..ماابي شي..
خالد:لاحول ولاقوة الا بالله..
هداها وراح يقعد على الكنب..رن تليفونه...
خالد:هلا عبدالله..بخير....انت اشلونك؟.....اليوم مااقدر...باجر آخر يوم امتحان حق اختي..تخلص من هني وان شاء الله بطلع معاك....ياللا في امان الله...(يتصل في ليلى)...آلو..آسف ليلى متصل هالحزة..
ليلى:لاعادي حياك في أي وقت..
خالد:أبي اقولج شي..
ليلى:خير؟
خالد:وديمة سمعتني وانا اتكلم وياابوي عنها..زعلت وراحت غرفتها وقفلت الباب والحين صار لها اربع ساعات وصرت خايف عليها..
ليلى:الله يهديها وديمة..انزين هي ماترد عليك؟
خالد:توها من شوي ردت علي وكانت معصبة..
ليلى:بحاول اتصل فيها..بس لاتحاتي مردها بتتعب وبتطلع..
خالد:أشك..
ليلى:تحصلها بتعطش ولا بتجوع بتطلع ان شاء الله..لاتحاتيها..
خالد:جربي اتصلي فيها وخبريني..
ليلى:ان شاء الله..
وديمة ظلت بضيقتها ودموعها وهي تفكر بكل كلمة سمعتها...علت على صوت الاغنية..علشان ماتسمع شي..قامت من مكانها فتحت الستاير وصارت تتأمل منظر الحوش ودموعها على خدها..يرن تليفونها تشوف أختها ليلى..سكرت التليفون وقطته على السرير ورجعت لهمومها...
في الشركة...على الساعة 6...فهد يروح مكتب ابوه...عند السكرتير..
فهد:في حد عند ابوي؟
السكرتير:لا..
فهد:انزين لادخل حد عنده لين مااطلع..
السكرتير:ان شاء الله..
فهد(دخل المكتب حصل ابوه يتكلم في التليفون)
بوفهد:خلاص انا انتظرك باجر..في امان الله..
فهد:السلام عليكم..
بوفهد:وعليكم السلام والرحمة..
فهد:من هذا اللي تنتظره باجر؟
بوفهد:هذا خميس..
فهد:يبه..أمي ماقالت لك شي اليوم عقب الغداء؟
بوفهد:لا..
فهد:ولاجابت لك طاري خالتي..
بوفهد:لا..ليش صاير شي؟
فهد:اليوم امي وخالتي كاملة تهاوشوا..
بوفهد:لاحول ولاقوة الا بالله..متى صار هالحجي؟
فهد:لما رديت البيت على الضحى حصلت خالتي عندنا.....
غانم يدخل البيت...يحصل امه راقده...
غانم:لوسيتا..يالوسيتا..
لوسيتا:نعم بابا..
غانم:ليش ماما نامت مني؟
لوسيتا:يقول هو شوي ينام وبعد يقوم يصلي..
غانم:سوي لنا العشاء..
لوسيتا:ان شاء الله..
غانم:يمه..يمه..
ام غانم:جيت يمه؟
غانم:أي يمه جيت..شالي مرقدج هني؟
ام غانم:غفيت شوي..ماادري اشفيني نعسانة..
غانم:انزين قومي صلي..
ام غانم:أذن االعشاء؟
غانم:أي يمه أذن وصلينا بعد..
ام غانم:ساعدني يمه علشان اقوم..
غانم:ان شاء الله..
في بيت خالد...راح غرفته..وقعد على النت يفتح إيميله ويشيك على المواقع..لين ماصارت الساعة 9..تذكر وديمة...قام من مكانه وراح لها...دق عليها الباب..
خالد:وديمة..وديمة..ودوم ردي علي..لاحول لله..انزين بس قولي شي..
وديمة:....................
خالد:بروح شوي وبرجع لج..
راح يشرب شاي ويطالع الاخبار..وعقب حط فيلم كوميدي وقعد يضحك ونسى نفسه..لين ماخلص الفيلم صارت الساعة 12 بالليل...بند التلفزيون وخذ الكوب علشان يروح المطبخ..تذكر وديمة..راح لها الغرفة..دق الباب..محد رد عليه..عصب..


ياترى هل فعلا كاملة ماراح تدخل بيت اختها مرة ثانية عقب اللي صار؟؟ وشالي بيصير بينهم؟؟

وفهد هل بيتزوج بنت عمه عقب موقف خالته؟؟

ووديمة ياترى شالي صار لها؟؟

هذي أحداث كلها بنعرفها في الفصل الثالث..

تابعوني..




الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 23-12-2013, 03:47 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج



" الفصل الثالث "




تذكر وديمة..راح لها الغرفة..دق الباب..محد رد عليه..عصب..
خالد:ودوم إذا مافتحتي الباب ترى بكسره..ودوم..وديمة..(مسك مقبض الباب وتبطل الباب استغرب ان الباب كان مفتوح دخل الغرفة حصلها طايحة على الارض..خالد خاف يكون صاير فيها شي..صار يطق على وجهها لكن ماترد...
خالد:وديمة تكفين ردي علي..
قام من مكانه وجاب ماي قعد يكت عليها ماي ماكو فايدة..شالها وحطها على السرير...واتصل على ابوه...
خالد:يبه وينك فيه؟
بوسلمان:انا في البيت..ايش صاير؟
خالد:ماادري..وديمة مغمي عليها وماترد علي..
بوسلمان(قام من على السرير):خذت ابرتها؟
خالد:لا..
بوسلمان:عطها الابرة..انا بحاول اوصل بسرعة..مع السلامة..
ام سلمان:أيش صاير؟
بوسلمان:وديمة اغمى عليها..
خالد عطاها الابره..وحاول يقعدها لين مافتحت عيونها وحاول يشربها ماي..لكن شكلها وايد تعبانة..وخايف ابوه يتأخر..
ظل ينتظر وهو واقف فوق راسها..عقب نص ساعة يرن جرس البيت يفتح الباب..يركض بوسلمان لعند وديمة....
بوسلمان:ليش صار فيها جذي؟
خالد:ماادري..
ام سلمان:اشلون ماتدري انت وين كنت فيه؟
خالد:يبه تكفى سوي لها شي..
وقعد بوسلمان يعالجها...وطلع خالد من الغرفة وقعد بالصالة...يفكر في اخته...لين ماجى....
بوسلمان:قولي شالي صار؟
خالد:يبه وديمة سمعتني وانا اتكلم معاك اليوم..ودخلت غرفتها وقفلت الباب..وتمت تصيح ومنهاره نفسيا..وحاولت معاها علشان تفتح الباب لكن ماكو فايدة..لاتغدت ولاتعشت ولاخذت ادويتها ولا الابرة..ويوم رحت لها حصلت الباب مبطل وطايحة على الارض..هي اشلونها الحين؟
بوسلمان:الحمدلله..بس السكر كان نازل عندها وايد..الظاهر ان سالفة السفر هذي مأثره عليها وايد..
خالد:يبه لاتفكر تغير رايك..
بوسلمان:أغير رايي ولااخسر بنتي..(قام)
ام سلمان(قعدت)
خالد:يمه انت موافقة على اللي يقوله؟
ام سلمان:لا يايمه..بس شسوي..ابوك يحاتي اختك وايد..
خالد:خلاص انا بعطيكم الحل..
ام سلمان:شنو؟
خالد:انتوا سافروا..وخلوا وديمة عندي..
ام سلمان:أخاف تنشغل وماتقدر عليها..
خالد:يمه وديمة صار لها فترة عندي وتعودت عليها..انتوا سافروا وتطمنوا..
بوسلمان(يي):مايصير..
خالد:ليش يبه؟..يبه لاتفكر فيها..انا موجود..وإذا تبون تتطمنون أكثر خلوا جدتي تقعد معانا وليلى بين فترة وفترة بتطل علينا وسلمان موجود..بس يبه لاتفوت هالفرصة..
ام سلمان:ايش قلت؟
بوسلمان:ماادري..
صارت الساعة 2..فتحت عيونها وديمة..حصلت ابوها قاعد عندها....
بوسلمان:حمدلله على سلامتج..
وديمة:بابا!!
بوسلمان:اشلونج الحين؟
وديمة:بخير..
بوسلمان:إذا سالفة السفر متعبة نفسيتج..خلاص بكنسل السفرة..
وديمة:لابابا..لاتسوي هالشي علشاني..انت سافر..
بوسلمان:من غيركم؟
ام سلمان(تدخل):سوي مثل ماقالك خالد..
وبدوا بيت بوسلمان في تجهيز نفسهم للسفر..والجدة جمعت اغراضها وراحت تقعد في بيت بوسلمان..وخالد ووديمة جمعوا اغراضهم وردوا البيت...وليلى جات علشان تودع اهلها....
الكل لابس وجاهز للسفر..والشنط بالسيارة..والكل واقف لحظة الوداع...
ام سلمان:وديمة يمه ديري بالج على نفسج..ولاتعبين جدتج وخالد..واللي يقولونه لج سويه..
وديمة(بدموعها):ان شاء الله..بس ماما لاتطولون علينا..
ام سلمان:بنحاول..إذا بغيتي شي اتصلي..
وديمة(حضنتها وهي تبجي)
بوسلمان:خالد يبه اهتم بأختك وايد..واهم شي عندي صحتها..مع اني كنت ناوي اوديها بس مب راضية..
خالد:معليه يبه..ان شاء الله المرات الجايه..
بوسلمان:إذا نقصكم شي ولا شي اتصل فيني..
خالد:ان شاء الله..
بوسلمان:ياللا ياعيال بنتأخر على الطيارة..
ليلى:وين حمد؟
ام سلمان:راح مع رفجيه المطار..
ليلى:الله يهديه..
وودعوا بعض...وجى دور بوسلمان....
بوسلمان:يبه وديمة تكفين ديري بالج على صحتج..وخذي الادوية أول بأول واهم شي الابرة..
وديمة:ان شاء الله..(حضنت ابوها بقو)
ليلى(مسكتها):ياللا وديمة تراهم بيتأخرون..
وراحوا للمطار...
الجدة:يمه وديمة لاتبجين..ان شاء الله بيردون بالسلامة..
وديمة:بشتاق لهم وايد..
ليلى:هذا احنا موجودين معاج..وشيخة قالت بتمرج بعد عقب المغرب..
عقب ساعة...رد خالد البيت..حصل جدته ووديمة وليلى قاعدين ساكتين ووديمة دموعها على خدها....
خالد:إذا تبين تروحين معاهم قولي..
وديمة(قامت وراحت غرفتها)
ليلى:خالد اشفيك عليها؟
خالد:خليها..هذي وديمة ابوي وايد مدلعها..
ليلى:ايش ناوي تسوي فيها؟
خالد:ولاشي..وين خلود؟
ليلى:قاعد يلعب بلاستيشن..
راح لها الغرفة...
خالد:وديمة...مسحي دموعج وروحي ذاكري مابقى لج شي على امتحان التوفل..ياللا بسرعة..ياللا..
وديمة:زين..
خالد:الحين جدامي..
عقب ماقامت وديمة علشان تغسل وجهها قعدت على المكتب وفتحت الكتب..وراح خالد غرفته علشان يريح....قعد على السرير وحس بشعور غريب من زمان ماقعد في هالغرفة...
أذن المغرب...قامت الجدة علشان تروح تتوضى ينزل خالد...
خالد:رايح اصلي تامرين على شي جدتي؟
الجدة:سلامتك يمه..دير بالك وانت تسوق..
خالد:ان شاء الله..
عقب ماصلت الجدة..قعدت في الصالة تقرأ قرآن...جاتها الخدامة..
الخدامة:ماما شنو تبي يسوي عشاء؟
الجدة:لاتسوين شي اليوم ليلى بتجيب لنا العشاء..
الخدامة:زين ماما..
خالد يدخل البيت...
خالد:السلام عليكم..
الجدة:وعليكم السلام ورحمة الله وبركاته..
خالد(يقعد):عيل وين وديمة؟
الجدة:ماادري عنها يمه..من وقت ماراحت فوق مانزلت..قلت يمكن راقدة..وانا مافيني شدة اركب الدري علشان اشوفها..
خالد(قام):انا بروح اشوفها..
دق الباب...
وديمة:ادخل..
خالد(فتح الباب):شتسوين؟
وديمة:شوفة عينك..
خالد:خلصتي؟
وديمة:لاوالله..تبيني اخلص بهالسرعة..
خالد:امتحانج عقب باجر شدي حيلج..وين كتابج؟
وديمة:هني ليش؟
خالد:عطيني اياه مع ورقة وقلم..
وديمة:ليش؟
خالد:بسوي لج امتحان بشوف صج ذاكرتي ولا لا..
وديمة:ماابي امتحان..
خالد:لاتناقشيني..عطيني..
يرن تليفون وديمة...
خالد:سكري تليفونج علشان ماتردين على حد..
وديمة:مايصير ذولا ربعي..اكيد وحده تبي شي ولا شي..
خالد:انتوا البنات ماتبون شي مفيد غير السوالف ماعندكم..
وديمة:آلو..هلا شيخة..ولاشي ادرس حق التوفل.....انت وين؟.....عيل انا انتظرج.....بايات..
خالد:شنو بايات؟؟..وين قاعدين احنا؟
وديمة:اشفيها؟
خالد:في شي اسمه مع السلامة..حمدلله والشكر..بايات..اشوف عطيني الكتاب خلني امشي..جدتي قاعدة بروحها تحت..
في بيت بوفهد...

اضغط على الصورة لرؤيتها بحجمها الطبيعي

بوفهد(وهو يشرب الشاي):اقول ام فهد اخبار اختج كاملة؟
ام فهد:بخير..
بوفهد:صار لي فترة ماشفتها عندنا..
ام فهد:بصراحة يابوفهد احنا تهاوشنا..
بوفهد:تهاوشتوا؟!!..ليش؟؟
ام فهد:ماادري اشفيها على هبة بنت اخوك..
بوفهد:اشفيها هبة بعد؟
فوق في دار فهد...يكلم راكان على الماسن...
فهد:هذا كل اللي صار..
راكان:والله ماادري شاقولك..انت ليش ماتروح تقعد مع خالتي وتفهم منها السالفة..
فهد:المشكلة ان امي ماهي راضية..
راكان:ليكون امي تعرف شي عن البنت وماتبي تقولك؟؟
فهد:مااعتقد امي تسويها..لا..
راكان:انت روح أسألها..ياريال هذا مستقبلك..
فهد:غانم يقولي حجي حريم..وحجي حريم لايودي ولايجيب..
راكان:والله كيفك هذا مستقبلك وانت حر فيه..ترى ملجتك باجر خلاص مستعد؟
فهد:ان شاء الله..وانت خلاص ماانت جاي؟
راكان:والله في ودي..بس انت ادرى بالظروف..
فهد:كيفك انت الخسران..
راكان:ادري خسران..
يرن تليفون فهد...
فهد:لحظة خلني ارد على التليفون.....هلا...بخير الله يسلمك انت اشلونك؟....انا في البيت قاعد احاجي راكان....راكان غانم يسلم عليك..
راكان:الله يسلمه..سلم عليه..
فهد:يسلم عليك......وين تبينا نروح؟......خلاص عطني نص ساعة وبكون عندك...في امان الله..
راكان:وين رايحين؟
فهد:يقول عنده سهرة في مكان..خلني اشوف وين بيوديني..
راكان:دير بالك وانت تسوق..
فهد:ان شاء الله..وانت بعد دير بالك على روحك..وادعي لي..
راكان:موفق..واستانس بكرة ملجتك..
فهد:ان شاء الله..
تحت...
بوفهد:انت غلطانة ياام فهد ماكنتي المفروض تسوين جذي ايش ماقالت لج اختج تظل هي اختج..انت قطيتي عليها حجي ماينقال..الحين اختج من لحمج ودمج تقولين لها هالكلام..ماهقيتها منج..
ام فهد:شسوي احتريت من كلامها..انا ماصدقت فهد قرر ياخذ له وحده..الحين هي جايه وتقول هالحجي..
بوفهد:انزين انت ماسألتيها ليش مب موافقة على هبة؟
ام فهد:تقول هي ماتناسب فهد..مو هذي اللي فهد يدور عليها..بس فهد ماقال يبيها عقب مافكر فيها..
فهد(يي صوبهم):مساء الخير..
الجميع:مساء الخير..
ام فهد:وين رايح؟
فهد:بطلع مع غانم..
بوفهد:هذا غانم انا مااحاجيه..
فهد:ليش يبه؟
بوفهد:لايي صوبي ولايسأل عني..وكل انت اللي تروح له..
فهد:معاك حق..خلاص لشفته اليوم بقوله..يمه..
ام فهد:عيوني..
فهد:يعني ماكو سبب ثاني يخلي خالتي ترفض هبه غير اللي قالته؟
ام فهد:صدقني يايمه مافي شي..لو البنت فيها شي انا اول وحده ماراح اوافق..
فهد:ريحتيني..مع السلامة..
الجميع:مع السلامة..
الجدة قاعدة تطالع تلفزيون وخالد قاعد يكتب الامتحان تنزل وديمة....
خالد:خلصتي؟
وديمة:لاوين..بقى لي وايد..
خالد:ودوم بسج كسل..ترى مابقى شي على الامتحان..
وديمة:تكفى خلني ارتاح شوي..
خالد:ماكو راحة لين ماتخلصين دراسة..
ليلى(تيي):اشفيكم؟
وديمة:الله يابج..دخيلج خله يعطيني شوية راحة..
ليلى:وين شيخة؟
وديمة:فوق..
ليلى:ألحين بخلي الخدامة تييب لكم العشاء..وقت العشاء هو وقت راحتج..وعقب كملوا دراسة..
وديمة:أي بس انا مو مشتهية..
خالد(يطالعها بنظرة)
وديمة:غيرت رايي..(راحت فوق)
خالد:العشاء جاهز؟
ليلى:أي فديتك جاهز..
خالد:علشان انا مستعجل وابي اروح..
ليلى:وين؟
خالد:بروح عند الربع شوي..
ليلى:مابغيت تطلع..
خالد:شسوي وديمة الله يهداها تخاف تقعد بروحها في البيت..
ليلى:ياللا جدتي حياج العشاء جاهز..
فوق...
شيخة:ودوم تعشي..
وديمة:ماابي..ماني مشتهية..أبي امي..(تصيح)
شيخة(قامت وقعدت عندها):ودوم تصيحين..
وديمة:مشتاقة لها وايد..
شيخة:توها من جم ساعة راحت..
وديمة:.....
شيخة:اروح انادي ليلى؟
وديمة:لا..(قامت وقعدت على السرير)
شيخة:انا باكل انت كيفج..لخالد تهاوش وياج انا مايخصني..
وديمة:يعني الاكل غصب؟
شيخة:أي غصب..ولا اشلون بتدرسين؟
وديمة:انزين ماني جوعانة..
شيخة:كيفج..روحي حق خالد وقولي له ماني جوعانة..إذا قالج كيفج..بعدين تعالي عندي..
تحت...
خالد:ليلى إذا خلصتي شوفي وديمة تعشت ولا لا..لأنها مرات تسويها وماتتعشى..
ليلى(قامت):ان شاء الله..الحين بروح اشوفها..
راحت الغرفة دقت الباب وحصلت شيخة تاكل ووديمة قاعدة على السرير تقرأ مجلة..
ليلى:تعشيتي؟
وديمة:هاا...لا..
ليلى:ليش ان شاء الله؟
شيخة:ترجيتها ياليلى تعالي تعشي تقولي ماابي..ماني جوعانة..عاد قلت ماعلي منها..
ليلى:عليج بالعافية..وانت وديمة ايش عندج ماتبين تعشين؟
وديمة:أبي امي..
ليلى:لوصلوا بالسلامة اكيد بيتصلون وكلميها..
وديمة:أبيها هي ماابي اتكلم معاها..
ليلى:تبين تروحين لهم؟
وديمة:.......
ليلى:وديمة حبيبتي تعشي علشان تاخذين دواج وتكملين دراسة..
وديمة:ماني مشتهية..
خالد وهو طالع من غرفته..يتكلم بصوت عالي....
خالد:وديمة أبي ارد من برع اشوفج حالة الامتحان وماخذه ادويتج..(راح)
ليلى:سمعتي؟
وديمة(بإستسلام):سمعت..
ليلى:ياللا قومي اشوف تعشي..شيخة أكليها الله يخليج..
شيخة:أفا عليج..خليها علي..
عند شاطئ البحر...قاعد خالد وياربعه المقربين...عبدالله ومحمد وأحمد..
محمد:بصراحة فاتتكم سفرتنا..
عبدالله:أي الحين قعدوا انتوا الاثنين حرونا..
محمد:لازم علشان مرة ثانية لما اقولكم تعالوا تييون..
أحمد:ماقالكم محمد إيش صار هناك؟
خالد:ايش صار؟
أحمد:هذا الله يسلمكم..واحنا قاعدين في الكوفي شوب..انا قمت رحت الحمام علشان اغسل يدي..الا تيي وحده وتقعد عند محمد..
عبدالله:طلعت مواعد وحده!
محمد:مواعد وحده..حرام عليك..انا وين وهالسوالف وين..قولهم ايش صار..
احمد:الاخت قعدت تشرب الكوفي مالها وتسولف مع محمد..انا ارد أشوفها مندمجة الاخت..اقعد..تقولي رفيجك ليش مايتكلم؟
محمد:عبالها اطرم..
خالد:يافشيلتنا رايح عندهم وموهق نفسك..
عبدالله:كمل..
أحمد:قلت لها رفيجي مايعرف يتكلم انجليزي..تبين شي؟..قالت لا..قامت وراحت..
خالد:هاذي سالفة الحين..مب اول مرة..
محمد:لا..اشوف تطنزون علي؟؟؟
خالد(قام):لااتطنز ولاشي..مشتهي لطلعاتنا مثل اول..
عبدالله:أي والله..ايش رايكم نطلع البر نخيم هناك اسبوع الجو عجيب..
أحمد:انا وياكم..متى؟
محمد:ليش اسبوع خلها عشرة ايام..
خالد:انا مااقدر..إذا تبون نطلع نطلع بس مااقدر ابات برع..
أحمد:الظاهر المدام ماتعطيك الاذن؟؟
خالد:أي مدام انت بعد..هلي مسافرين ومااقدر اهد البيت..
عبدالله:سافروا اليوم؟
خالد:أي..والله يعيني على المسؤولية..
يرن تليفون محمد...
محمد:هلا...انا ويالربع....ليش؟....صج والله...الله يبارك فيكم...إن شاء الله....مع السلامة..
أحمد:فرحنا وياك..
محمد:احم احم..أخوكم بيتزوج..
عبدالله:من اخونا؟؟
محمد:يعني انا مو تارس عينك؟؟
عبدالله(يضحك):انت؟!!
خالد(يضحك)
محمد:انا الغلطان اني خبرتكم..
عبدالله:مو على اساس انت خاطب بنت الجيران؟
محمد(يطالع أحمد):انت ماتخش سر..ماينقالك شي مرة ثانية..خلاص البنت تزوجت وراحت بحال سبيلها..
خالد:ليش ايش صار؟
محمد:ماداعي اتحجى..الاخ ماقصر..
عبدالله:يااخي يوم انك مب وجه زواج خلي الناس بحالها..
محمد:يااخي شسوي انا استحي من الحريم..
خالد:عن ابو..كل هذا حياء..تروح تخطب ولما تشوفهم تغير رايك بالزواج..
عبدالله:لا وبعد شنو يقول ماتنفعني..يعني كلش تبي تتزوج..
محمد:جذي زين تخلي الاعداء يتشمتون..
خالد:انا مستغرب من هلك..اشلون يخطبون لك مرة ثانية..
أحمد:الا قول ليش لحد الحين مصر يبي يتزوج..
محمد:أبي اتزوج..أكمل نص ديني..وبعدين مااحنا صغار كل واحد فينا بيسك الثلاثين..أبي ياهال..
عبدالله:ايوه..قول من الصبح تبي جاسم..
محمد:أي ابيه فديته..
خالد(يضحك):والله انك مب صاحي..
أحمد:انتوا لو تدرون محمد شنو شاري من هناك..
عبدالله:شنو؟؟
محمد:كنت المفروض اسافر بروحي..
أحمد:تكفى..ماادري من اللي مسافر مع من..
عبدالله:تحجى شنو شاري؟
أحمد:شاري ألعاب ايشكثر..حق عياله..
خالد:اخبارهم عيالك صح..انت امس قلت لي ان واحد منهم مسخن..ان شاء الله تحسنت صحته؟
محمد:أي بخير ويسلم عليك..تطنز حضرتك..محد حاس فيني..
عبدالله:ماقلت لنا البنت وافقت عليك؟
محمد:وليش ان شاء الله ماتوافق..ييلها الشرف تحصل واحد مثلي..
خالد:الظاهر إنك بتجيب عيال وبتقط زوجتك..
محمد:لاعاد انا مو جذي..
الشباب بعد سوالفهم...كل واحد فيهم يرد البيت...خالد يدخل البيت يحصل جدته قاعدة....
خالد:السلام عليكم..
الجدة:وعليكم السلام والرحمة..وينك يمه تأخرت..
خالد(قعد):شسوي من زمان ماشفت ربعي..
الجدة:صرت أحاتيك وماعندي رقمك علشان اتصل فيك..لاتسهر وايد مع ربعك..
خالد:ان شاء الله..انت ليش قاعدة لحد الحين؟
الجدة:ناطرتك..مااقدر انام وانت برع البيت..
خالد:جدتي إذا أنا تأخرت انت نامي..
الجدة:ماعليك مني..أبوك وامك اتصلوا وسلموا عليك..
خالد:الله يسلمهم..أخبارهم؟
الجدة:الحمدلله كلهم بخير..
خالد:الحمدلله...عيل وين وديمة؟
الجدة:وديمة نايمة..شيخة راحت من هني وهي نامت على طول..
خالد:نامت؟!!
الجدة:أي يمه انا خليتها تنام..خلها ترتاح شوي..وباجر الصبح من وهل بقعدها علشان تذاكر..وخلت هالاوراق لك..
خالد:حسبت نستهم..وخذت الابرة؟
الجدة:أي يمه خذتها جدامي..
خالد:مشكورة جدتي..ياللا قومي نامي..
الجدة(قامت):تصبح على خير..
خالد:وانت من هله..
خذ الاوراق...وراح غرفته..بدل ملابسه وقعد على المكتب يصلح أوراق وديمة وشيخة....لين ماخلصهم وراح غرفة وديمة...حصلها نايمة حط الاوراق على المكتب وطلع..
الصبح على الساعة 9...بوفهد يفطر وياام فهد....



بوفهد:شنو مب عازمة اختج؟
ام فهد:اتصلت فيها ماترد..
بوفهد:قومي اتصلي فيها الحين..
ام فهد:بوفهد هي تدري ان اليوم حفلة فهد..هي بكفيها بتحضر حياها الله..وإذا ماتبي كيفها..
بوفهد:الله يهداج..قومي اتصلي..
ام فهد:ان شاء الله..
خالد يطلع من غرفته..يمر غرفة وديمة...يحصلها راقدة.....
خالد:وديمة..ودوم..
وديمة(تفتح عينها وتتثاوب)
خالد:سكي حلجج..قومي بسج رقاد..وشوفي أوراقكم..وعقب نزلي تحت وتريقي..
وديمة:زين..
تحت...خالد يحب راس جدته ويقعد....
الجدة:تشرب حليب؟
خالد:خلج مرتاحة..انا بصب لي..
الجدة:قعدت اختك؟
خالد:أي نعم قعدتها..
يرن تليفون خالد....
خالد:السلام عليكم....صبحك الله بالنور والسرور..ايش عندك متصل هالحزة..ليكون الليلة ملجتك؟......متى؟....ومن اللي عازم؟....زين قلت لي.....علشان افضي الجيب قبل الملجة..(يضحك)....يااخي نتغشمر....ان شاء الله مب ناسي...مع السلامة..(يحط التليفون ويكمل أكل)
الجدة:شنو من اللي بيعرس؟
خالد:هذا واحد من الربع..يبي يتزوج..
الجدة:ماشاء الله عليه..الله يسعده..
خالد:ماتدرين ياجدتي هالريال ايشكثر يستحي من الحريم..ماادري ايش بيسوي لشاف البنت..
الجدة:يحليله رفيجك..ياحلات الرياييل يوم يستحون..
خالد:لاعاد جدتي مب لهالدرجة..
الجدة:هذا يدل إن الريال عينه ماتنرفع عن الارض..
خالد:في هذي صدقتي..ماشاء الله عليه..مايحط عينه بعين وحده..وإذا اتصل مكان وردت وحده على طول يسك الخط..
وديمة(تنزل):صباح الخير..
الجميع:صباح الخير..
الجدة:قعدي يمه تريقي..
وديمة(قعدت)
خالد:شفتي الاوراق؟
وديمة:أي شفتهم..وياليت ماشفتهم..
خالد:باين انج تدرسين عدل..وباجر امتحانج..عاجبتج الدرجة اللي يايبتها؟؟...شيخة احسن منج..
وديمة:أف..تعبت من التوفل..
خالد:تعبتي ولاماتعبتي..بتدرسين له يعني بتدرسين له..
وقعد يكمل أكله...
الجدة:ليش ماتاكلين؟
وديمة:ماني مشتهية آكل الحين..
خالد:نعم؟!!
وديمة:ماني مشتهية..(قامت)
خالد:قعدي مكانج..
وديمة:ابي اروح اتسبح واكمل دراسة..
خالد:والدواء من بياخذه انا؟
وديمة:بتسبح وعقب بتريق..
خالد:بنشوف..
راحت....
الجدة:اقول خالد يمه انت طالع اليوم؟
خالد:أي جدتي..معزوم عند الربع على الغداء..ليش؟
الجدة:بس أسأل..سمعتك تكلم رفيجك..فقلت شكلك بتطلع..
خالد:أي..من زمان ماقعدت مع ربعي..صار لهم شهر مسافرين..
الجدة:دير بالك يمه وانتوا تسوقون..ترى السرعة ماترحم حد..
خالد:ان شاء الله..
وتمت الملجة بين فهد وهبة...ودخل فهد على الحريم...وشاف هبه وانبهر بجمالها..وطولها وشعرها الاسود..وجسمها...ماتخيل ان كل هالجمال منخش تحت العباة...وقعد معاها شوي..وعقب لبسها الدبلة وهي لبسته الدبلة..وعقب لبسها الشبكة...وقطعوا الكيكة..وتم شوي يسولف معاها..وعقب طلع من القاعة....
وركب السيارة....
غانم:هاا بشر..
فهد:يااخي منصدم..
غانم:منصدم!!..ليش؟
فهد:ماتوقعت ان هبه جميلة لهالدرجة..شكلها بالشيلة والعباة شي ثاني..
غانم:وايد بنات جذي..جمالهم منخش تحت الشيلة والعباة..هاا وين نروح الحين؟
فهد:نرد البيت طبعا..ابوي هناك مع المعازيم..
غانم:ياللا ياريال استانس..ومتى العرس؟
فهد:ماادري..بس مااعتقد أكثر من شهر..
غانم:في مفاجأة في البيت في انتظارك..
فهد(مستغرب):مفاجأة!!..شنهي؟
غانم(وهو يسوق):إذا قلت لك ماتطلع مفاجأة..
فهد:حمستني..
غانم:ماتبي رقمها علشان تسولف معاها؟
فهد:عندك؟
غانم:اكيد..أفا عليك..
فهد:بس بالاول استأذن من عمي..سوق بسرعة..أبي اعرف شنهي المفاجأة..
غانم:الاخ نسى زوجته..
في بيت بوسلمان....خالد قاعد في الصالة يدرس وديمة.....
خالد(قام):حلي هالسؤالين لين مااروح اشوف جدتي شتسوي..
راح المطبخ....
خالد:قوة..
الجدة(بإبتسامة):الله يقويك يمه..
خالد:اشم ريحة حلوة..ايش عندنا على العشاء؟
الجدة:كل شي طيب..اشلون وديمة مع الدراسة؟
خالد:لعوزتني وايد..بس ان شاء الله تييب درجة زينة..
الجدة:ان شاء الله..
خالد راح لوديمة....
وديمة:خالد..
خالد:خير؟
وديمة:لو خلصت هالسؤالين أقدر اروح انام؟
خالد:ايش عندج تبين ترقدين بهالسرعة؟
وديمة:نعسانة..قعدت من الصبح بدري والظهر مارقدت..وامتحاني باجر الصبح..فأبي ارتاح شوي..
خالد:خلاص مو مشكلة بس خلصي هالسؤالين وبصلحهم لج وعقب تعشي وروحي نامي..
وديمة:ان شاء الله..
في بيت بوفهد..فهد وغانم يدخلون البيت...
فهد(يفج عينه مب مصدق):انت هني؟؟
راكان:لا مناك..
فهد:شالي يايبك؟
راكان:ملجة أخوي وتبيني مااحضر؟
فهد(بالاحضان):أخبارك؟
راكان:بخير..
غانم:ايش رايك بالمفاجأة؟
فهد:هذي احلى مفاجأة..
راكان:بس مب أحلى من اللي كنت عندهم..
فهد:قولي اشلون جيت وانت تقول مااقدر..
راكان:قاعد يغير الموضوع..
غانم:اقعد على جبده علشان مايغير الموضوع..(وراح قعد عند بوفهد)
بوفهد:اشلونك غانم؟
غانم:بخير..الحمدلله..
بوفهد:واشلون جدتك؟
غانم:بخير..
بوفهد:اشلون صحتها؟
غانم:مثل ماهي..الله يكون بعونها..
بوفهد:غانم إذا محتاج شي ولاشي لاتردد انك تييني..
غانم:تسلم يابوفهد..طول عمرك ماتقصر معاي..الحمدلله..
قاعدين يتعشون...
وديمة(قامت):تصبحون على خير..
الجدة:ماكملتي عشاج..
وديمة:شبعت جدتي..بروح انام..
خالد:خذي ادويتج..
وديمة:إن شاء الله..
خالد:والابرة..
وديمة:الابرة؟؟
خالد:أي..اشفيج؟
وديمة:هاا..ولاشي..
خالد:اشفيج وديمة ليكون تعبانة؟
وديمة:لا..بس انا مااقدر آخذ الابرة..
خالد:ليش؟
وديمة:ماادري من الخوف من الامتحان ماني قادرة امسك الابرة..
خالد:خلاص انا بييج عقب شوي وبعطيج..
راحت فوق وفرشت اسنانها وانسدحت على السرير واتصلت في شيخة....
وديمة:آلو...اشلونج؟....بخير .....اي خلصت خالد استلمني من الصبح لين ماخلصت...ان شاء الله....تعبت احس اني خلاص تشبعت من هالدراسة......لاتأخرين باجر....لا خالد بيوصلني...ماادري....المهم شدي حيلج وخلصي ونامي...(يدخل خالد)....ياللا بسكر انا...مع السلامة..
خالد(يقعد عندها):من تحاجين؟
وديمة:هذي شيخة..
خالد(يجهز الابرة):شنو خلصت دراسة؟
وديمة:لا..بقالها بعد..
خالد:تراني ادري انج ماتعشيتي عدل..شفتج..بس سكت ومشيتج هالمرة بس علشان باجر عندج امتحان..
في العزيمة....
فهد:عمي أقدر آخذ رقم هبة؟
بوهبة:أي تقدر تاخذه..(طلع تليفونه)..أنا ألحين بعطيك..
الصبح من يوم السبت..في بيت بوسلمان...الساعة 9 ونص...
الجدة:يمه ليلى تطمني اخوانج بيكونون بخير..وانت اهتمي بريلج وبيتج..
ليلى:شسوي جدتي احاتيهم..
الجدة:لاتحاتينهم انا موجودة..كلمتي امج وابوج؟
ليلى:امس المغرب وانا في السيارة اتصلت فيهم..
الجدة:اخبارهم؟
ليلى:الحمدلله..خالد ووديمة متى بيرجعون؟
الجدة:قالت وديمة الامتحان ساعتين..الحين صار لها ساعة ونص..بقى لها نص ساعة اتخلص..الله يوفقها في الامتحان ويسهل عليها كل الاسئلة..
ليلى:آآآآمين..
في المطعم....
أحمد:خوش ريوق..تسلم..
خالد:بالعافية..لو سمحت..
الكرسون:تفضل..
خالد:أحمد تشرب شاي ولا شنو؟
أحمد:قهوة لاتيه..
خالد:اوكي عطنا واحد شاي وواحد لاتيه..
الكرسون:حاضر..(وراح)
خالد:قولي..ألحين محمد من صجه بيتزوج؟
أحمد:والله يقول..وأهله حصلوا له على وحده..
خالد:ماني مصدق..
أحمد:بنشوف اشلون بيدبر أموره..
خالد:الله يهنيه..وانت ماتبي؟
أحمد:والله ياليت..بس أنت أدرى بالحال..
خالد:اشفيه حالك؟
أحمد:يااخي الزواج يبيله مصاريف..وسالفة..وانا بصراحة ماعندي..
خالد:انت ابوك عنده خير ماشاء الله..
أحمد:أنا ابي اصرف من فلوسي..
خالد:صار لك سبع سنين تشتغل ماجمعت؟
أحمد:ليش حال السوق يتم مثل ماهو؟..السوق مايقصر برفع الاسعار..والعوايل بعد رفعوا أسعار بناتهم..
خالد(ضحك):حلوة هذي رفعوا أسعار بناتهم..
أحمد:وانا صاج..المهر بروحه يبيله 100 ألف..في عايلة تاخذ مهر أقل من 100؟
خالد:في هذي صدقت..بس في عوائل تاخذ أقل..
أحمد:وين مانشوفهم..وتعال شوف المصاريف البقية من الفندق والكوشة والطاولات وغيرها من مصاريف الحريم..
الكرسون يحط الشاي ويروح...
خالد:عرس الرياييل مافيه مشاكل تقدر تسوي العرس في البيت..بس الحريم اللي مايرضون بالقليل..
أحمد:وتقولي تزوج..
خالد(يشرب):انزين خذ لك وحده من الاهل..
أحمد:والله الاهل أردى من الغريب..
خالد:ايش دعوة؟
أحمد(يشرب):روح انزين..اسمع مين يتكلم..ماادري من متهاوش ويااخوه..
خالد:غير الموضوع..
أحمد:شفت..
خالد:الحين انا ظروفي غير..يعني انت بتناسب اخوك؟
أحمد:لاطبعا..بس أنا اعرف واحد من الشباب ماخذ بنت عمه ومطلعين عينه بالمصاريف..ماابي أعيد الهم اللي عاشه رفيجي..أنا اعرف واحد من الشباب صرف نص مليون على عرس الحريم تخيل؟!!
خالد:والله اسراف..يقطون الفلوس بليلة وحده..اشفيها لو الواحد يصرف النص والنص الثاني يسافر مع زوجته ويتمتع معاها بشي هم يستفيدون منه..
أحمد:الله على الرومانسي..
خالد(وهو يشرب الشاي):اسكت اسكت..
أحمد:انت تزوج..
خالد(يشوف الساعة):أنا تأخرت..بمشي..
أحمد:وأقعد بروحي؟
خالد:شوف عبدالله ولامحمد يقعدون معاك..
أحمد:محمد مستحيل قبل العشر يقوم من النوم..ووعبدالله تحصله يلبي طلبات بيتهم..(قام)..أنا بعد برد البيت..
في بيت بوعبدالله....
ام عبدالله:الله يخليك لي يايمه ولايحرمني منك..وأشوفك معرس..قول آمين..
عبدالله(يبتسم):آمين..
ام عبدالله:وين بتروح؟
عبدالله:بشرب ماي وبيي..
خلود:خلك ياخوي..انا بروح بجيب لك..
عبدالله:مشكورة..(يقعد)..الجو حلو..بس عطشت..خوش فواكه وخضار جبت لج يمه..
ام عبدالله:تسلم ياولدي..الحين بسوي لكم مجبوس سمج اللي تحبه..
عبدالله:تسلمين يمه..عيل وين حسنة؟
ام عبدالله:راقدة..
خلود:تفضل..
عبدالله:مشكورة...(يشرب)
ام عبدالله:خلود يمه روحي قعدي حسنة..
خلود:ان شاء الله..
ام عبدالله:أخبار ربعك؟
عبدالله:الحمدلله..محمد يبي يتزوج..
ام عبدالله:صج؟
عبدالله(يضحك):أي والله..احنا بروحنا ماصدقنا..
ام عبدالله:الله يهنيه..بس ان شاء الله يتغير..ويصير أحسن..
عبدالله:ان شاء الله..
ام عبدالله:وأخبار خالد وأحمد؟
عبدالله:خالد بخير هله سافروا..
ام عبدالله:متى؟
عبدالله:أول أمس..
ام عبدالله:الله معاهم..هو بروحه؟
عبدالله:لا يمه..قاعد مع اخته وجدته..
ام عبدالله:من أخته؟
عبدالله:أخته اللي تدرس بالجامعة..
ام عبدالله:وليش ماراحات وياهم؟
في السيارة....
خالد:ياللا بشريني..ايش سويتي؟
وديمة:خلني اتنفس..
خالد:تنفستي ياللا قولي..
وديمة:سويت اوكي..بس مااعرف..
خالد:شنو مااعرف..ايش سويتي بالضبط؟
وديمة:انت سوق وانا بقولك..
خالد:مافي..ماني متحرك..تحجي..
وديمة:يعني توفل ايش يطلع منه..كل مرة شي..انتظر النتيجة وبس..
خالد:انتظر النتيجة..ومتى النتيجة؟
وديمة:يمكن اسبوعين بعد..
خالد:ماني منتظر..
وديمة:ايش بتسوي؟
خالد:بقول حق رفيجي يطلعها لي..
وديمة:عندك رفيج يشتغل بالجامعة؟
خالد:أي..
أما في بيت بوعبدالله......
ام عبدالله:ايش رايك يمه تعزم ربعك يتعشون عندنا الليلة..
عبدالله:وايش بتطبخين لنا؟
ام عبدالله:اللي تبيه..
عبدالله:خلاص الحين باتصل فيهم وبعزمهم..(يتصل)....هلا خالد اشلونك؟......وينك فيه؟.....أفا عليك أكيد بطلع لها اياه..بس يبيلك تنتظر شوي.........لين مايصلحون الاوراق.........لا ان شاء الله ماراح انسى.....اسمع الليلة انت معزوم عندنا في البيت.........اي طباخ الوالدة.........لاتأخر صلي العشاء عندنا...في امان الله..




الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 23-12-2013, 03:48 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج



متابعة الفصل الثالث



في مكتب فهد....
فهد:اسمعني لاتحولي مكالمة ولاادخل حد لين مااخبرك..
السكرتير:ان شاء الله طال عمرك..تامرني بشي ثاني؟
فهد:لا..
السكرتير:عن اذنك..
وعقب ماراح...
فهد(يتصل):السلام عليكم..
هبة:وعليكم السلام..
فهد:هبة؟
هبة:من فهد؟
فهد:أي..أخبارج؟
هبة:بخير..انت اخبارك؟
فهد:الحمدلله..
هبة:انت في الشركة؟
فهد:أي نعم في الشركة..
هبة:تقدر تتوصت لي؟
فهد:ليش من تبين يشتغل عندنا؟
هبة:أنا..
فهد(استغرب):انت!!
هبة:أي..في خاطري اشتغل عندك واكون وياك..
فهد(ابتسم):قولي لي..متى إن شاء الله بنعرس..ماابي المدة تطول..
هبة:والله انا يبيلي سفرة عدلة علشان ازهب عمري..
فهد:وايشقد بيتطول؟
هبة:يعني يبي لي شهر على الاقل..
فهد:ووين تبين تسافرين؟
هبة:ماادري ليحين مافكرت..
على طاولة الاكل...يرن تليفون خالد....
خالد:السلام عليكم.....الحمدلله احنا بخير انتوا اشلونكم؟.....كل شي بخير وماشي تمام..........تطمن...انت خبرني بديت الدورة؟...........واخبار البنات وامي؟......الحمدلله.......وديمة أي هني..
وديمة(تأشر إنها ماتبي)
خالد:قومي تحجي مع ابوي..
وديمة:آلو....بابا....انا بخير الحمدلله..(قعدت تصيح)..
بوسلمان:ليش تصيحين؟
وديمة:ولاشي..
بوسلمان:حد ملعوزج؟
وديمة:لا..
بوسلمان:عيل اشفيج؟..قولي لي..
وديمة:مشتاقة لكم..
بوسلمان:هاج هذي امج..
وديمة:ماما(تصيح)...ماما ردوا..البيت مو حلو من غيركم...والله مشتاقة لكم...انا بخير...زين الحمدلله....ادعي لي...ماابي انتوا ردوا..بسكم وايد قعدتوا..
خالد(خذ منها التليفون)
الجدة:بس يايمه..
وديمة(مسحت دموعها):مشتاقة لهم ياجدتي.
خالد:صج ياهل..شوي وبحط الحليب بحلجج..ابوي قاعد يحاجيج وانت لا ولاشي..تبين تخوفينهم عليج..صج ماعندج سالفة..ماادري من اللي قال ماابي اروح وياهم..
وديمة(زعلت وراحت غرفتها)
الجدة:يايمه شوي شوي عليها..هي مو متعودة على فراق ابوها وامها..
خالد:خليها ياجدتي..وايد هالبنت مدلعة..
الجدة:خف عليها شوي..
خالد:ان شاء الله..
بيت بوفهد.....وهم يتغدون.....
بوفهد:أقول ام فهد..
ام فهد:لبيه..
بوفهد:أختج أمس جات؟
ام فهد:لا..
بوفهد:ليش انت ماكلمتيها؟
ام فهد:اتصلت فيها كم مرة ماردت علي..وامس الظهر اتصلت بعد ردت علي بنتها وقالت لي ان امها مسافرة وياابوها..
بوفهد:الله يهديج..عاجبج اللي صار..
راكان:فهد أخبار العروس؟
فهد:بخير..
بوفهد:اتفقتوا على العرس؟
فهد:انا قلت لها ماابي اكثر من شهر تطول السالفة..
بوفهد:زين قلت لها..
فهد:قالت انها تبي تسافر علشان تتزهب..
بوفهد:بعد بتسافر..
على الساعة اربع ونص العصر...في بيت بويوسف.....
حصة:يمه متى بيروح محمد يشوف البنت؟
محمد(ينزل):أي بنت؟
حصة:شنو أي بنت..البنت اللي بتتزوجها..
محمد:ومن قال اني بشوفها..
ام يوسف:عيل ماتبي تشوفها؟
محمد:لا ماابي..إذا هي عاجبتكم خلاص..
حصة:انت من صجك..شوفها يمكن ماتعجبك..
محمد:ماابي..
ام يوسف:ليش؟
محمد(قام):بس جذي..
حصة:يمكن يستحي..
محمد:..........
ام يوسف:صج محمد؟
محمد:أي استحي..
ام يوسف:بس يايمه لازم تشوفها..أخاف ماتعجبك..
محمد:هي مثل من؟
ام يوسف:والله ماادري يايمه أقولك مثل من..
حصة:يمه حتى البنت من حقها تشوف محمد..يمكن هي ماتبي..
ام يوسف:ييلها الشرف تاخذ ولدي..
حصة:أدري..بس لازم تشوفه..من حقها..
محمد:بس انا ماابي اشوفها..
حصة:انت اشفيك..هذي بتكون زوجتك..
محمد:لصارت زوجتي يصير خير..
ام يوسف:وين رايح؟
محمد:بشرب ماي..
فهد لابس يروح غرفة راكان...
فهد:شنو راقد؟
راكان:لا..رايح الشركة؟
فهد:أي..تيي؟
راكان:مب ألحين..سك الباب أبيك شوي..
فهد(سكر الباب وقعد عنده):خير؟
راكان:أنا أبي أروح عند خالتي كاملة..تيي؟
فهد:ليش؟
راكان:بصراحة مب عاجبني اللي صاير بين امي وخالتي..وأبي اروح لها مب هي خالتي يعني صلة رحم..جاي؟
فهد:ماادري..بس أخاف تكون زعلانة علشان ماسمعت لها..
راكان:هي قالت لك شي؟
فهد:لا..
راكان:عيل خلاص..
فهد:انزين قوم ألبس..
راكان(قام):ياللا دقايق..
فهد(قام):بانتظرك تحت..
خالد ينزل تحت يقعد في الصالة ويفتح التلفزيون....تيي الجدة....
الجدة:جيت يمه؟
خالد:أي..راحت علي نومه ونسيت احط منبه..
الجدة:مو مشكلة المهم انك ريحت شوي..
خالد:عيل وين وديمة؟
الجدة:ليحين راقدة..
خالد:ليلى ماجات؟
الجدة:لا..انا قايلة لها لاتيي..خلها تقعد عند ريلها وولدها..لفضت خلها تيي..طول الوقت تحاتيكم..
خالد:مشتاق حق خالد..
وديمة(تنزل):السلام عليكم..
الجدة:وعليكم السلام..
وديمة(انتبهت ان خالد مارد ولاشافها قعدت عند جدتها)
الجدة:نمتي عدل؟
وديمة:أي جدتي الحمدلله ارتحت وافتكيت من هالامتحان..إن شاء الله آخر مرة أقدمه..
الجدة:إن شاء الله..
وديمة:خاطري اطلع وياشيخة..
الجدة:وين تبين تروحين؟
وديمة:ماادري أي مكان المهم اطلع..
الجدة:قعدي يايمه في البيت وين تبين تروحين..
وديمة:أبي اغير جو..تعبت من الدراسة..
الجدة:هذا أخوج عندج خله يطلعج..
وديمة:خالد توديني عند شيخة؟
خالد(عل على صوت التلفزيون وماعطاها وجه)
وديمة(عرفت انه زعلانة)
الجدة(قامت):بروح أقول حق الخدامة تييب لكم فواكه..
وديمة:خالد..خالد..
خالد(طلع تليفونه واتصل):السلام عليكم....بخير الله يسلمك انت اشلونك؟.....هاا رايح بيت عبدالله؟......اي رايح دام انه عازمنا لازم اروح....عاد الاهم محمد بيي؟......أبي ألعب على اعصابه شوي...(يضحك)...عادي أسويها......خلاص ان شاء الله عقب المغرب بييك.....في امان الله..
الجدة(تيي وتقعد):الحين الخدامة بتييب الفواكه..وأبيج ياوديمة تاكلين علشان تتقوين..
وديمة(زعلت وقامت):ماابي..
الجدة:وين بتروحين؟
وديمة:بروح داري..
الجدة:والفواكه؟
وديمة(تشوف خالد):مااشتهي..(راحت)
الجدة:خالد يمه..خالد..
خالد:نعم جدتي..
الجدة:اشفيك ليش ماترد عليها..
خالد:ولاشي..
الجدة:ليش متزاعل وياها..هي ماسوت شي..
خالد:خليها ياجدتي علشان تتعلم شوي..
الجدة:الله يهداك ياولدي..قرب وكل..
في غرفة وديمة....
وديمة:تعالي شوفي أخوج ..
ليلى:من خالد؟
وديمة:عيل من؟
ليلى:اشفيه؟
وديمة:مايحاجيني..(تصيح)
ليلى:لاحول لله..لاتصيحين علشان افهم السالفة..ايش سوى لج خالد؟
وديمة:أقولج مايحاجيني..
ليلى:انت ايش سويتي له؟
وديمة:ماسويت له شي..
ليلى:يعني مو معقولة خالد من هني والدرب يزعل عليج ومايكلمج..
في بيت كاملة.....
كاملة:هلا والله براكان وفهد..
راكان:هلا فيج خالتي..وينج ماتبينين..
كاملة:ألحين صرت أنا اللي ماابين..انت وينك ليش ماتسأل عني؟
راكان:شسوي ياخالتي الدراسة ذابحتني..إن شاء الله ماتجربينها..
كاملة:مااجربها..جربتها زين مازين..أخبارك فهد؟
فهد:بخير..
كاملة:مبروك على الملجة..
فهد:الله يبارك فيج..أمس ماشفتج في الحفلة..
كاملة:أي انا ماكنت في الدوحة..
فهد:ليش وين رحتي؟
كاملة:والله أم ريلي كانت تعبانة ورحنا لها أول أمس..وتوني اليوم الصبح رادة..
راكان:اشفيها؟
كاملة:قلبها شوي تعبان..
راكان:الله يشافيها..
كاملة:آآمين..
خالد وهو طالع من البيت...يرن تليفونه..يشوف ليلى ويعرف هي ليش متصله ومايرد..ويركب سيارته ويروح...يرن تليفون البيت ترد الجدة...
الجدة:هلا يمه ليلى....بخير الحمدلله انت اشلونج واشلون خالد وريلج؟
ليلى:الحمدلله كلنا بخير..اخبار خالد اتصل فيه كم مرة ومايرد علي..
الجدة:توه طلع من البيت..تحصلينه يسوق ومايقدر يرد عليج..
ليلى:أقول جدتي ايش صاير بين وديمة وخالد؟
الجدة:ايش صاير؟
ليلى:يعني انت ماتدرين ان خالد متزاعل وياوديمة؟
الجدة:بلا..
ليلى:عيل ايش صار بينهم؟
في سهرة الشباب...وعقب ماتعشوا.....
خالد:تسلم يد الوالدة..خوش أكل..
أحمد:أي والله تسلم يدها..
عبدالله:بالعافية..
محمد:والله ياليت زوجتي تتعلم هالطبخ..
عبدالله:من؟
محمد:زوجتي..
عبدالله:عليك بالعافية..ألحين بييب لكم حلو..بتاكلون أصابعكم وراها..
وراح...
محمد:اشفيه يقولي عليك بالعافية..
أحمد(يضحك):ماهو مصدق انك بتتزوج..
محمد:بتزوج حتى اليوم أمي قالت لي اروح اشوف البنت وانا رفضت..
خالد:ليش ان شاء الله؟
محمد:شنو ليش..وليش أشوفها اصلا..مايصير..
أحمد:من قالك يااستاذ محمد مايصير؟
خالد:تحصله مفتي حق عمره..
أحمد:الا يستحي..
عبدالله(جى وحط الحلو على الطاولة)
محمد(قام):خلني اساعدك عبدالله..
خالد:قول الا شارد من السؤال..
عبدالله:ايش منه شارد؟
أحمد:ليش مايبي يشوف البنت اللي خاطبينها..
عبدالله:وليش ماتبي تشوفها ان شاء الله؟
محمد:عيب اشوف البنت اشفيكم انتوا..
عبدالله:عيب؟..من قال؟
محمد:انا اقول..عطني الحلاوة وفكني من سؤالك..
يرن تليفون خالد بمسج...يقراه...
أنا آسفة..
وديمة
حطاه بجيبه...وديمة انتظرت يرد او يتصل..بس مارد..تضايقت..وبغت تنام..بس تذكرت الابرة....ومو في خاطرها تاخذها...
باجر الظهر الساعة 2 يوصل خالد البيت...يبدل ملابسه ويقعد يتغدى....
الجدة:خالد يمه امك اتصلت وسلمت عليك..
خالد:الله يسلمها..اشلونهم؟
الجدة:الحمدلله..تقول وايد تعبت لين مانظفت البيت مع الخدامة..
خالد:الله يعينها..وخواتي اشلونهم؟
الجدة:الحمدلله..
خالد(قام):تسلمون على الغداء..
الجدة:عليك بالعافية..
خالد(غسل ايده وراح غرفته)
وديمة(لحقته ودقت الباب)
خالد:من؟
وديمة:وديمة..
خالد:تعالي..
وديمة(فتحت الباب):...........
خالد:اشفيج؟..تبين شي؟
وديمة(دمعت عينها):والله آسفة ماعاد اعيدها..تكفى لاتسوي فيني جذي..
خالد(لان قلبه لكن):احسن علشان مرة ثانية تسمعين الحجي..
وديمة:تكفى خالد خلاص سامحني..
خالد:ايش تبين الحين؟
وديمة:أنا آسفة..
خالد:آخر مرة؟
وديمة:ان شاء الله..(بغت تروح)
خالد:وديمة..
وديمة(لفت):نعم..
خالد:امس خذتي الابرة؟
وديمة(بخوف):أي..
خالد(قام وقرب منها):قولي الصج..
وديمة:والله العظيم خذته..
خالد:انزين..تبين شي بعد؟
وديمة:لا..
خالد:ماتبين تروحين مكان؟
وديمة:توديني؟
خالد:اوديج بس مو بيت عمتي..
وديمة:عيل وين؟
خالد:ماادري بشوف..خليني ارقد الحين..
وديمة(استانست):اوكي..(راحت)
على العصر...في شركة بوفهد...يدخل فهد مكتبه..يوقف السكرتير....
فهد:اطلب لي المحامي مبارك والمهندس يوسف..
السكرتير:حاضر..
فهد:وخلهم ييبون لي ماي دافي..
السكرتير:ان شاء الله..
فهد(دخل غرفته وقعد وفتح الكمبيوتر يرن تليفونه):هلا والله هبه.....بخير انت اخبارج؟....اي انا في الشركة...لا توني وصلت....اي عندي شغل مع المحامي والمهندس.....اي مشروع؟....من وين سمعتي عنه؟....ماشاء الله زين........من تقصدين؟.....لا مااعرفه......والله حاليا عندي اكتفاء من موظفي المشروع....بحاول ان شاء الله....قولي لي متى مسافرة؟....حجزتوا؟.....اي راكان سافر اليوم الصبح....(يدخل المهندس يوسف)...ياللا انا بسكر الحين عندي شوي شغل...مع السلامة..
يوسف:السلام عليكم..
فهد:وعليكم السلام..تفضل يوسف..(قعد)..اشلونك؟
يوسف:بخير الحمدلله..
فهد:واشلون الشغل؟
يوسف:الحمدلله كل شي ماشي حسب المخطط..
فهد:الحمدلله..
في السيارة.....
خالد:ياللا قولي شنو تبين تشربين؟
وديمة:خاطري في كوكتيل آيس كريم..
خالد:وتبين شي ثاني بعد؟
وديمة:بس..
خالد(يفتح الدريشة):لو سمحت ابي كوكتيل آيس كريم هذا وواحد كوكتيل عصير مع شغف..
الرجال:شي تاني؟
خالد:لا مشكور..بس ايشقد بتطول علينا؟
الرجال:يعني شي عشر دقايق..
خالد(سك الدريشة)
وديمة:ايشقد زحمة عندهم..
خالد:تبين تروحين تتسوقين مكان؟
وديمة:امممم...لا..خلي التسوق مع شيخة والدوارة معاك..خلنا نروح البحر..
خالد:أخاف الشباب يكونون مناك..
وديمة:تكفى خالد ودني البحر..من زمااان مارحنا..
خالد:انزين..بس نصلي المغرب وعقب نروح..
وديمة:ياسلالام..
في مكتب فهد....
المحامي(يوقف):تامرني بشي ثاني طال عمرك؟
فهد:لا..تقدر تروح وتكمل شغلك..
المحامي:عن اذنكم..
يوسف(قام):انا بعد ماشي..
فهد:خلك يوسف..
يوسف(قعد)
فهد:قولي يوسف انت وين ساكن؟
يوسف:ساكن بعيد شوي عن الشركة..
فهد:انزين أقدر ازورك؟
يوسف:تزورني انا؟!!
فهد:أي نعم..
يوسف:حياك بأي وقت طال عمرك..
فهد:خلاص انتظرني الليلة عقب الدوام بمرك..
يوسف:ان شاء الله..(قام)..عن اذنك..
على البحر...ونسمة الهواء اللي تطاير شيلة وديمة وهي تتأمل بموج البحر وتتمشى بين هالرمال....خالد واقف يتكلم في التليفون...وعقب مايخلص يقرب منها.....
خالد:تغطي..
وديمة:ماكو حد..ايش له اتغطى..الجو فضيع..
خالد:على الاقل دخلي شعرج..
وديمة(دخلت شعرها)
خالد:شتفكرين فيه؟
وديمة:وايد اشياء..ايش رايك ندخل البحر ونلعب بالماي..
خالد:ياسلام علشان نتبلل وعقب اشلون ندخل السيارة؟
وديمة:اشفيها ندخل السيارة واحنا مبللين..
خالد:روحي انزين سيارتي جديدة وتبين اوصخها علشان عيونج..
وديمة(بترجي):الله يخليك..
خالد(يرن تليفونه):آلو...وعليكم السلام...بخير انت اشلونك؟....ولاشي طالع مع الاهل...(وديمة تستغل الفرصة وتكت عليه ماي البحر خالد فج عينه)..أقولك لفضيت بحاجيك..في امان الله..(دخل التليفون في مخباته)..ودوم شتسوين؟
وديمة(تضحك):ايش رايك؟
خالد:صبري ان ماسبحتج وخليتج تتحسفين مب اسمي خالد..
وصاروا يلعبون بالماي...لين ماتعبت وديمة ورقدت على الرمل...
خالد:سبحتي تليفوني زين مايخترب..
وديمة:من كنت تحاجي من شوي؟
خالد:ليلى..امشي خلنا نرد البيت..
في بيت بويوسف....
بويوسف:حيالله بولدي فهد..
فهد:الله يحيك..
بويوسف:ولدي يوسف كلمني عنك وايد وانت ماقصرت معاه..
فهد:ماسوينا شي..ولدك يايبه ماشاء الله عليه واحد يحب الشغل..الله يحفظه ويخليه لكم..عندك عيال غير يوسف؟
بويوسف:أي..عندي محمد وبنتين..
فهد:الله يخليهم لك..
بويوسف:أخبار الوالد؟
فهد:بخير..انت تعرف الوالد؟
بويوسف:أي اعرفه اشلون مااعرف خليفة..
يوسف(يجي):من وين تعرفه يبه؟
بويوسف:كنا عيال فريج واحد..وكنا نلعب بسكة وحده..
يوسف:تفضل طالع عمرك..العشاء زاهب..
فهد:ليش مكلف على عمرك..انا ماجاي اتعشى انا جاي اتعرف على الوالد..
بويوسف:مايصير تيي بيتنا وماتعشى..حياك يبه..
وراحوا يتعشون..
خالد ينزل يقعد في الصالة...تيي الجدة.....
الجدة:تسبحت؟
خالد:أي..
الجدة:انزين شغل الدفاية أخاف تمرض..الجو برع برد..
خالد:مايخالف انا مب بردان..
الجدة:وين أختك؟
خالد:راحت تتسبح..
الجدة:انزين انا رايحة انام تبون شي؟
خالد:سلامتج جدتي..
الجدة:دير بالك على أختك..
خالد:ان شاء الله..
خمس دقايق وتنزل وديمة...
خالد:نعيما..
وديمة:الله ينعم عليك..شتشوف؟
خالد:فيلم رعب..
وديمة:رعب!..لا مانبي رعب..دور فيلم ثاني..
خالد:وانا بمشي على كيفج..
وديمة:تكفى خالد غير والله مااقدر انام..
خالد:لاتنامين..
وديمة(قامت):الله يسامحك..
خالد(عل على الصوت واندمج مع الفيلم)
وديمة(راحت المطبخ تشرب شي بارد فتحت الثلاجة حصلت رمان وراحت قعدت عند اخوها وتاكل رمان)
وتمر دقايق.....
وديمة:خالد الله يخليك غير القناة..حبة الرمان واقفة بحلقي..
خالد:ترى هذا فيلم مب صجي..
وديمة:اللي يكون..غير..انت اشلون تنام؟
خالد:عادي وبالي مرتاح..
وديمة:حط شي ثاني نتابعة..
خالد:انا عاجبني هذا..إذا مب عاجبج روحي نامي..ترى يقولون النوم وايد زين..
وديمة:انزين ايش رايك نطلب بيتزا؟
خالد:ليش جوعانة؟
وديمة:شوي..
خالد:ماني مصدق..وديمة جوعانة؟
وديمة:قول ماشاء الله..
خالد:أي والله لازم اقول ماشاء الله..ماشاء الله ان شاء الله دوم..
وديمة:انزين ايش نطلب؟
خالد:اول شي خلصي اللي بيدج عقب بنطلب..
عقب العشاء.....
وديمة:نعست..(قامت)..بروح أنام..
خالد:تعالي تعالي..
وديمة:شنو؟
خالد:خذتي دواج؟
وديمة:باخذه فوق..
خالد:مافي تاخذينه جدامي..
وديمة:اووه خالد..صدقني مااقدر انزل مرة ثانية..يعني بجذب عليك..باخذه الحين..
خالد:والابرة؟
وديمة:باخذها..
خالد:بنشوف..بمرج عقب شوي..
وديمة:تصبح على خير..
خالد:وانت من هله..
ومع مرور ثلاثة ايام....في الشركة...عند مكتب سكرتير فهد...
يوسف(يوصل):ماقالك ايش يبي؟
السكرتير:لا..
يوسف:في حد عنده؟
السكرتير:لا..تقدر تدخل..
يوسف(دق الباب)
فهد:تفضل..
يوسف(يفتح الباب):السلام عليكم..
فهد:وعليكم السلام..حياك يوسف تفضل..
يوسف(قرب من المكتب)
فهد:اقعد اشفيك واقف..
يوسف(قعد):قالي السكرتير انك تبيني..
فهد:أي بغيت استشيرك في أمر هندسي..ممكن؟
يوسف:أكيد..
في بيت بوسلمان...تنزل وديمة الساعة 12 تحصل جدتها في المطبخ...
الجدة:ظهر الخير..
وديمة:راحت علي نومة..ماحسيت بعمري..جدتي..
الجدة:عيوني..
وديمة:أبي اطلع مع شيخة..
الجدة:وين؟
وديمة:نتسوق شوي حق الجامعة ونتغدى..
الجدة:عندج اخوج اتصلي فيه واستأذني منه..
وديمة:لازم؟
الجدة:أي لازم..
راحت الصالة واتصلت فيه....
وديمة:خالد أبي أروح بيت عمتي..
خالد:ايش عندج؟
وديمة:بروح اقعد مع شيخة من زمان مارحت لهم..
خالد:ومتى تبين تروحين؟
وديمة:عقب شوي..
خالد:من بيوصلج؟
وديمة:شيخة بتمرني..
خالد:بتتغدين عندهم؟
وديمة:أي..
خالد:ومتى بتردين؟
وديمة:ماادري..لخلصت بتصل فيك تمرني..
خالد:انزين روحي..مع السلامة..
وديمة:مع السلامة..أف تحقيق..شنو ذي..
الجدة(جات):ايش قالج؟
وديمة:قالي روحي..(قامت)..بروح اتزهب..
في السيارة...
شيخة:تدرين ودوم مستغربة من شي..
وديمة:شنو؟
شيخة:غريبة ان خالد مارفض طلعتنا..
وديمة:هاا..تدرين انا الحين بروحي وهو مشغول فكسرت خاطره..تراج وايد بطيئة..
شيخة:ياللا كانا وصلنا بس خلني احصل موقف..دوري معاي..
وديمة:ليش هو في موقف..زحمة..الناس كلها هني..
شيخة:وديمة قبل كنت اطلع وياج السوق عادي..ليش الحين اخوج مايوافق؟
وديمة:تدرين الحين ابوي هذيلا محد مسافرين وصاير يراقبني ويحاسب على طلعاتي واايد..يقول انه خايف علي..
غانم يقعد على الارض علشان يتغدى وياامه.....
غانم:اشلونج يمه؟
ام غانم:شنو يمه؟
غانم:اقول اشلونج؟
ام غانم:بخير يمه..الحمدلله..اليوم جات مرت خالك تزورني..وقالت لي انها حصلت لك على وحده..بنت ناس ومتدينة وعاقلة..تمدح فيها..
غانم:من بنته؟
في بيت بوسلمان....وهم يتغدون....
خالد:أخاف وديمة تاكل شي يضرها..
الجدة:أكل المطاعم كلها تضر..
خالد(مستغرب):أكل المطاعم!!
الجدة:أي اكل المطاعم..
خالد:ليش وديمة وين راحت؟
الجدة:ليش هي ماقالت لك؟
خالد:الا قالت لي انها بتروح بيت عمتي..
الجدة:عمتك؟!
خالد:عيل وين راحت؟
الجدة(عرفت ان وديمة قصت عليهم)
خالد:جدتي وديمة وين راحت؟
الجدة:راحت مع شيخة السوق ويتغدون برع..
خالد(عصب وقام)
الجدة:خالد..خالد يمه..
خالد:نعم..
الجدة:تكفى يمه كمل غداك بعدين يصير خير..
خالد:خلني بالاول اأدبها عقب برد..
الجدة:يمه خالد دام انها راحت خلاص..
خالد(معصب):شنو خلاص..هي تعرف رايي في هالموضوع اشلون تتجرأ تجذب علي..(اتصل من تليفون البيت)
في المطعم...
وديمة:تعبت..
شيخة:ليش احنا بدينا..كلها جم محل..
وديمة:شسوي تعودت على الكسل من هالاجازة..
شيخة:ياللا قولي ايش تبين تاكلين..
وديمة(تفتح شنطتها علشان تاخذ المنظرة تشوف تليفونها يولع شافت رقم البيت):تليفوني يرن ومااسمع..تسكر..
شيخة:أكيد مابتسمعين من هالزحمة..من؟
وديمة:البيت أكيد جدتي تبي تتطمن علي متصلة فيني اربع مرات..غريبة..
شيخة:اتصلي..
وديمة(اتصلت):آلو جدتي..
خالد:وديمة وينج فيه؟
وديمة(خافت من صوته):هاا..ليش؟
خالد:أنا سألتج انت وينج فيه؟
وديمة:أنا قلت لك اني....
خالد(يقاطعها):انج بتروحين السوق مع شيخة صح؟
وديمة:.......
خالد:ليش ساكته؟...شوفي وديمة..الساعة الحين 3 الا عشر..3ونص أبي اشوفج في البيت...وحسابج عسير..سمعتي؟
وديمة:سمعت..(سك الخط)
شيخة:وديمة اشفيج؟
وديمة(شوي وبتصيح):شيخوه قومي خلنا نرد البيت..
شيخة:ليش صاير شي؟
وديمة:قومي قبل لأصيح..
شيخة:زين زين..قومي..
وهم يمشون...
شيخة:ودوم قولي شالسالفة..حد فيه شي؟
وديمة:لا..
شيخة:عيل اشفيج؟
وديمة:تكفين لاتسأليني لين مانركب السيارة..
ركبوا السيارة....
شيخة:ماني سايقة لين ماتقولين شالسالفة؟
وديمة(قعدت تصيح)
في البيت....
الجدة:يايمه قوم كمل غداك..
خالد:خلاص شبعت..
الجدة:الله يهداك يايمه..جان خليتها تكمل طلعتها وعقب لردت تفاهم وياها..
خالد:اشلون استهانت فيني وجذبت علي..اشلون سوتها..
الجدة:يايمه وديمة بعدها ياهل..قوم يمه توضى وروح المسجد..
خالد:ان شاء الله..
خالد راح المسجد...وعقب ما ردت وديمة البيت...حصلت جدتها....
وديمة(بخوف):جدتي وين خالد؟
خالد(من وراها):نعم؟





ياترى شالي بيسويه خالد في وديمة؟؟

وديمة وشيخة بينجحون في التوفل؟؟

وكاملة بيستمر زعلها لي متى؟؟

أحداث كثيرة بنقراها في الفصل الرابع..


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 23-12-2013, 03:49 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج



" الفصل الرابع"


خالد راح المسجد...ووديمة ردت البيت...حصلت جدتها....
وديمة(بخوف):جدتي وين خالد؟
خالد(من وراها):نعم؟
وديمة(طاح الكيس من يدها وحست بخوف)
خالد:ممكن اعرف وين كنتي؟
وديمة:.............
خالد(عصب):أنا قاعد احاجيج ماتسمعين؟
وديمة:كنت مع شيخة..
خالد:وين؟
وديمة:السوق..
خالد:تعترفين بعد..وليش جذبتي علي؟
وديمة:لأنك ماراح تخليني..
خالد:ياسلام..تعرفين وتجذبين..انت متى بتصيرين عاقلة..هااا..
وديمة:.........
خالد:انت لازم تنضربين علشان تتأدبين..
الجدة(قربت من خالد ويودته):خالد يمه هدي اعصابك..ماصار شي..
وديمة(صاحت وركضت وراحت غرفتها)
خالد:وديمة...وديمة..
الجدة:يمه وقف مكانك..خلها تروح دارها..خالد يمه علشاني..اقعد وتعوذ من الشيطان..
خالد:اعوذ بالله من الشيطان..(يرن تليفونه)....هلا عبدالله...بخير..
عبدالله:اشفيك؟
خالد:ولاشي بس شوي مشغول..
عبدالله:مشغول ايش عندك؟
خالد:بعدين..لاحول لله..
عبدالله:معصب..شكله صاير شي..انزين وينك فيه؟
خالد:في البيت..
عبدالله:انزين تعال ابيك..
خالد:مااقدر مالي خلق..
عبدالله:قوم غير جو شكلك اعصابك تعبانة..
خالد:وينك فيه؟.....اوكي في امان الله..
الجدة:وين؟
خالد:رفيجي ينتظرني..
الجدة:لاماتروح وانت معصب..اشلون بتسوق السيارة..
خالد:لاتحاتيني بهدي اعصابي..وبكون بخير..مع السلامة..
الجدة:لاحول ولاقوة الا بالله..
الساعة 10 ونص في الليل يرد خالد البيت...ماحصل حد في الصالة عرف ان جدته نايمة..راح فوق..تذكر وديمة والهوشة اللي صارت..راح غرفتها...دق الباب..ماردت..دخل الغرفة..حصلها مغمي عليها...ركض لها ورفع راسها ويحاول يقعدها...
خالد:وديمة..وديمة ردي علي وديمة..
وديمة(تفتح عينها):خالد..(تسك عينها)
خالد:وديمة...وديمة تكفين ردي علي..
في غرفة فهد....
فهد:حيالله هالصوت...اخبارج؟.....انا بخير الحمدلله....كل شي اوكي...خبريني عنج....واشلون التسوق؟.....متى رادة؟.......كل شي هني جاهز للعرس..انا بزهب بيومين...متى بتردون؟....عقب اسبوع ليش؟
في المستشفى.....يطلع الدكتور......
خالد:طمني دكتور..
الدكتور:الحمدلله جبتها في الوقت المناسب..
خالد:ليش صار فيها جذي؟
الدكتور:فقر دم..
خالد:فقر دم!!
الدكتور:أي نعم..
خالد:وهي اشلونها الحين؟
الدكتور:نقلنا لها دم وان شاء الله بتكون بخير..
خالد:أقدر اشوفها؟
الدكتور:طبعا..
دخل عليها حصلها نايمة ووجهها مصفر...وقعد يفكر فيها.....يرن تليفونه..يطلع من الغرفة...
خالد:السلام عليكم.....الحمدلله هي بخير...تطمني هي بخير...يقول فيها فقر دم....ماادري..بس هي الحين نايمة...ماقال شي عن السكر..........انت نامي لخصلنا بنرد البيت...مع السلامة..(يشوف الممرضة)...لوسمحتي..
الممرضة:نعم؟
خالد:متى راح تقوم؟
الممرضة:يعني مب اقل من ساعة..اذا مشغول تقدر تروح واحنا بنحط بالنا عليها..
خالد:لا ماني مشغول..بقعد وياها لين مانطلع جميع..
الممرضة:أي بس احتمال الدكتور مايطلعها..
خالد:مايطلعها؟!!..ليش؟
الممرضة:الدكتور قالك فيها فقر دم يعني مب اقل من يومين بتم عندنا..
خالد:مشكورة..(دخل غرفتها)
عقب ساعة ونص...تفتح عينها وديمة تحصل خالد راقد على الكرسي...تأملت بشكله..وتذكرت يوم طاحت وجاها خالد وهو يصرخ يناديها وكان خايف عليها وشالها وحطاها على السرير...ماتوقعت ان خالد يملك هالقلب الحنون..ابتسمت..جاتها الممرضة..
الممرضة(تبتسم لها):قمتي..حمدلله على السلامة..
وديمة:الله يسلمج..
الممرضة:أخوج كان يحاتيج وايد..
وديمة:فديته..
الممرضة:اشلونج الحين؟
وديمة:الحمدلله..بس احس بصداع شوي..
الممرضة:ان شاء الله بتتحسن صحتج..بس عقب شوي بيودنج غرفتج فوق..
وديمة:ليش؟
الممرضة:الدكتور ماراح يطلعج لين مالهيموجلوبين يستقر عندج..
وديمة:لا تكفين لاتقولين..
الممرضة:ليش؟
وديمة:مااحب قعدة المستشفى..
الممرضة:هذي اوامر الدكتور..
وديمة:لاتكفين..وين الدكتور خليني اكلمه..
خالد(قام)
الممرضة:جذي زين قعدتي اخوج..
خالد(قام لها):قمتي؟..اشلونج الحين؟
وديمة:بخير..خالد ابي ارد البيت..ماابي اتم هني..
خالد(يكلم الممرضة):بتودونها الحين؟
الممرضة:عقب شوي..
خالد:مشكورة..
الممرضة(حست انها مطرودة طلعت)
خالد:بتمين لين ماتتحسن صحتج سمعتي..
وديمة:بس انا....
خالد(يقاطعها):تراني مانسيت اللي سويتيه..وهذا كان عقاب من رب العالمين..
وديمة(تضايقت وفضلت السكوت)
باجر الصبح..تيي ليلى والجدة عند وديمة في المستشفى.....
الجدة:سلامات يمه..اشلونج الحين؟
وديمة:زينة..
ليلى:حمدلله على سلامتج..
وديمة:الله يسلمج..
ليلى:وين خالد؟
وديمة:راح دوامه..
الجدة:وعليه عليه من امس وهو عندج..
ليلى:ايشقد بتمين؟
وديمة:ماادري..اصلا ماشفت الدكتور..
الجدة:جبت لج معاي ريوق..
وديمة:مااقدر آكل..
الجدة:ليش؟
وديمة:ماني مشتهية..
ليلى:لاتدلعين..لازم تاكلين..بعدين تعالي..شالي سويتيه في خالد..
وديمة:انا ولا هو؟
ليلى:انت الغلطانة..ليش تطلعين من وراه..
وديمة:حرام عليكم تعبت من قعدة البيت..
الجدة:خلاص ليلى البنت غلطت وهي عرفت غلطتها..
ليلى:شفتي وجه خالد الثاني؟
وديمة:وياليتني ماشفته..خلى قلبي يخفق بقو من كثر ماتخرعت يوم عصب علي..
ليلى:علشان يوم اقولج ترى خالد عصبي بس انت ماتسمعين الحجي..
وديمة:ابوي مايعصب كثر خالد..
الممرضة(تيي):الدكتور يبي يدخل..
ليلى:لبسي شيلتج..
وديمة:ليش؟
ليلى:شنو ليش ماتسمعين تقولج الدكتور بيدخل..
وديمة(تلبس الشيلة)
الدكتور(يدخل):السلام عليكم..
الجميع:وعليكم السلام..
الدكتور(يفتح الملف):اشلونج ياوديمة اليوم؟
وديمة:زينة..
الدكتور:حاسه بشي؟
وديمة:أي شوي صداع..
الدكتور:تريقتي؟
وديمة:لا..
الدكتور:ليش؟
ليلى:تقول مااشتهي..
الدكتور:لا ياوديمة مايصير..انت لازم تاكلين علشان تقدرين تطلعين من المستشفى..
ليلى:دكتور متى بترخصونها؟
الدكتور:احتمال باجر إذا شفناها تاكل..
الجدة:لا بتاكل ان شاء الله..
ويمر الوقت...ليلى والجدة يردون البيت...وشيخة توصل......
شيخة:سلامات ياجميل..
وديمة:الله يسلمج..
شيخة:ايش صار فيج امس كنت عادية..
وديمة:انا ادري فقرالدم من وين طلع لي..والله ملانة..لا في لاب توب ولانت ولامجلة ولاحد اسولف معاه..
شيخة:عيل وين ليلى؟
وديمة:راحت تسوي غداء حق ريلها..وجدتي راحت معاها..
شيخة:وخالد بالدوام؟
وديمة:أي..ياليت الجامعة تيي بسرعة وافتك من هالملل..
شيخة:مابقى شي وبنرد للمغثة..
وديمة:معليه اتحمل هالمغثة..
شيخة:ماقلتي لي شالي صار بينج وبين خالد؟
في شركة بوفهد....
فهد:ليش يبه؟
بوفهد:مااحب اتعامل مع هالريال..ماتعجبني اخلاقه..يااخي حياته كلها فلوس في فلوس..خلنا نشوف واحد ثاني..
فهد:بس تراها خوش صفقة..
بوفهد:أدري بس انا ماابي اتعامل معاه مرة ثانية..الله بيعوضنا بغيره..
فهد:على راحتك..
بوفهد:أخبار مرتك؟
فهد:بخير..
بوفهد:متى بيردون؟
فهد:اسبوع الجاي..
الساعة 2...يدخل خالد غرفة وديمة.....
خالد:السلام عليكم..
وديمة:وعليكم السلام..
خالد(يحط الاكياس):عيل وين شيخة؟
وديمة:راحت..
خالد:تغديتي؟
وديمة:كلت شوي من اكل المستشفى ولاعت جبدي..
خالد:انزين انا جبت لج أكل سوت لج اياه ليلى..تراه خوش أكل..
وديمة:انت تغديت؟
خالد:لا..بتغدى وياج..
وديمة(استانست):شنو هذا عصير؟
خالد(يفتح الاكياس):أي جدتي عاصرة لج عصير برتقال..وطبعا بتشربينه..
وديمة:شنو طابخه ليلى؟
خالد:برياني لحم..ماتشمين؟
وديمة:اممم..ياسلام على الريحة..
عبدالله يرد من المسجد من بعد ماصلوا العصر.....
ام عبدالله:تقبل الله..
عبدالله(يحب راسها):منا ومنكم..
ام عبدالله:شكلك تعبان..
عبدالله:أي يمه تعبان من الدوام..اليوم الشغل كان زيادة عن كل مرة..
ام عبدالله:يعطيك العافية..
عبدالله:الله يعافيج يالغالية..عيل وين خواتي مااشوفهم..
ام عبدالله:كل وحده بدارها..
عبدالله(قام):عيل انا بعد بروح انام شوي..صحوني قبل الصلاة..
ام عبدالله:ان شاء الله..
وخلال يومين......
بوفهد وام فهد قاعدين في حديقة البيت وهم يشربون الشاي والقهوة....
بوفهد:أخبار اختج؟
ام فهد:ماادري عنها شي..
بوفهد:ماشاء الله عليج..وايد واصلة بأهلج..
ام فهد:..........
بوفهد:الله يهداج..راسج يابس..روحي لها واعتذري منها..يعني معقولة مابتعزمينها على عرس فهد؟
ام فهد:اكيد بعزمها..
بوفهد:ماابيج تطرشين لها بطاقة العرس..ابيج تروحين لها..لاتنسين انج انت الغلطانة..
فهد(يي ويحب روسهم):ياسلام على الجو وصوت العصافير..ومع الشاي والقهوة..ان شاء الله ماخربت عليكم؟
ام فهد:تعال يمه..
فهد(قعد):ايش تقرأ يبه؟
بوفهد:شوفة عينك..
فهد:في اخبار جديدة؟
بوفهد:لا..قولي محمد ماقالك شي عن الاسهم؟
فهد:من امس ماادري عنه..
بوفهد:شكلها الاسهم مرتفعة..
فهد:حلو..
بوفهد:ابيه يشوف لي اشلون وضع الاسهم إذا زين أبيه يشتري جم سهم جديد..
فهد:اللي تشوفه..بحاول اكلمه باجر..ها يمه جاهزة للعرس؟
ام فهد:انا ليحين ماخلصت.. ان شاء الله كل شي بيكون مرتب في عرسك..
فهد:ان شاء الله..
وديمة تنزل على الساعة 11 وعشر دقايق..تحصل جدتها تقرأ قرآن...تسلم...
الجدة:روحي كلي لج شي علشان تاخذين دواج..
وديمة:ان شاء الله..جدتي وين خالد؟
الجدة:راح المسجد..اشفيج ناسية ان اليوم الجمعة..
وديمة:أي صح..
راحت المطبخ وهي تتصل في شيخة....
شيخة:هلا وديمة...بخير انت اخبارج؟....شكلج توج قاعدة من النوم؟....مثلج..امس كنت سهرانه مع فيصل نشوف فيلم اكشن انما ايه..عجيب..
وديمة:خلج من الفيلم قولي لي تزهبتي للجامعة؟
شيخة:تقريبا..
وديمة:واي على حظي..عاد انا ولاشي..تخيلي في هالايام خالد مافضى يطلعني السوق..الايام مرت بسرعة..
شيخة:مو تسوقنا ويابعض؟
وديمة:بلا بس انت ناسية ان احنا ماكملنا تشري؟
شيخة:أي بلا..انزين تبين امرج؟
وديمة:لاتنكتين..علشان خالد يسوي سالفة..هو بروحه زعلان مني ومايكلمني..
شيخة:ليحين؟؟
وديمة:أي..
شيخة:هذا اخوج زعله جايد..
سوت لها ساندويتش جبن ومربى وراحت غرفتها...فتحت النت وقعدت تلعب بالمواقع...وعقب راحت تتوضى وصلت الظهر ولبست جلابية وراحت غرفة خالد...وقعدت على سريره...عقب عشر دقايق يوصل خالد ويدخل غرفته يحصل وديمة قاعدة على السرير....
خالد:قومي اشوف..
وديمة:ليش؟
خالد:قلت لج قومي..مااحب حد يقعد على سريري..قومي..
وديمة(قامت):زين زين..لاتعصب..
خالد:بعدين ايش عندج في داري.؟
وديمة:شسوي جايه اراضيك..تكفى خالد سامحني..
خالد:رقم كم هذا؟
وديمة:شنو هذا؟
خالد:ماعادة كم مرة قايلة لي سامحني؟
وديمة:عاد خلاص..اعتذر مابعيدها..والله لولا الحاجة جان ماطلعت..الجامعة الاسبوع الجاي وانا ماشريت شي..
خالد:اذا في شي ناقصج تيين تقولين لي..سمعتي؟
وديمة:ان شاء الله..ياللا عاد سامحني..
خالد:بنشوف اذا مابتعيدينها..
وديمة:تسلم يابووليد..انزين متى بتطلعني؟
خالد:وين بعد؟
وديمة:خالد..ايش قاعدة اقول من الصبح..
خالد:اتغدى بالاول وعقب نتحجى..ياللا طلعي من دراي..
وديمة:اوكي..
العصر...الساعة 4ونص...بويوسف لابس وقاعد في الصالة مع ام يوسف...ييي محمد ويقعد عندهم....
محمد:يوسف راح الشركة؟
ام يوسف:أي يمه..
محمد:يمه ماقلتي لي ايش صار على البنت؟
ام يوسف:قلت لك لازم تروح تشوفها..
محمد:يمه انا قلت لج ماابي اشوفها انا واثق من ذوقج..
بويوسف:والبنت مو لازم تشوفك؟
محمد:يعني لازم؟
ام يوسف:أي لازم..
محمد:انزين..بس مااقعد بروحي..
ام يوسف:ايش دعوة بنخليكم تقعدون بروحكم..انا بكون موجودة معاك..
بويوسف:عيل قومي كلمي ام البنية علشان تروحون لهم..
محمد:متى؟
ام يوسف:باجر ان شاء الله..
محمد:بدري..
ام يوسف:توك تسأل عن السالفة..
بويوسف(يقوم):ماعليج منه..اتصلي..
محمد:يبه وين رايح؟
بويوسف:بروح سوق واقف..
محمد:بيي معاك..
بويوسف:بروح عند الشياب..
محمد:أي ادري..بوصلك وانا بتمشى شوي..
بويوسف:تسوي فيني خير..عيل قوم البس..لآني تأخرت عليهم..
محمد:ان شاء الله..
وديمة تدق الباب...
خالد:دخلي..
وديمة(دخلت):قمت؟
خالد:شتشوفين؟
وديمة:علشان مانتأخر..
خالد:على شنو؟
وديمة:اووه خالد..
خالد:زين زين لاتحنين..روحي لبسي..
وديمة:انزين..
خالد:وديمة..
وديمة(لفت):نعم..
يرن تليفون خالد....
خالد(يشوف الرقم):لحظة شوي...السلام عليكم....بخير انت اشلونك؟....شالاخبار؟.........والله زين في تطور....وين بتروح؟.....والله خوش مكان...تبي آيي معاك؟...(وديمة تأشر له بلا)...اعذرني اليوم مااقدر....ولاشي عندي شوي شغل....سلم على الوالد...في امان الله..
وديمة:اشوه ماقلت له أي..
خالد:عادي إذا تبين باتصل فيه وبقوله أي..
وديمة:لاتكفى..انزين ايش بغيت تقول؟
خالد:تراج خذتي التوفل..
وديمة(فجت عينها من الصدمة):اشششششششلون؟؟
خالد(ضحك):اللي سمعتيه...جبتي التوفل...مبروك..
وديمة:صج والله؟؟؟؟؟
خالد:أي..
وديمة:متى طلعت النتايج؟
خالد:يوم اللي طحتي في المستشفى..
وديمة:حرام عليك من ذاك اليوم وانت ساكت..الله يسامحك..
خالد:روحي ياشيخة..الحمدلله خذتيه وريحتينا..
وديمة:أي والله..عاد انا لازم اسوي حفلة عودة..
خالد:بسج حجي روحي لبسي..
راحت غرفتها وهي مستانسة...خذت تليفونها واتصلت في شيخة....
شيخة:هلا ودووم...
وديمة:عندي لج خبر..بمليون ريال..
شيخة:مليون ريال؟..خير؟
وديمة:جبت التوفل...(تصارخ من الوناسة)
شيخة:جذابة؟
وديمة:صدقيني..
شيخة:طلعت النتايج؟
وديمة:لا..بس رفيج خالد طلعها لي..
شيخة:وانا؟
وديمة:ماسألته..
شيخة:الف مبروك تستاهلين يالدبة..
وديمة:عقبالج..
شيخة:يعني انا بانتظر وايد؟
وديمة:بسأل خالد..
شيخة:أي تكفين..
وديمة:خلاص بلبس وعقب بسأله..
شيخة:وين رايحة؟
في ألمانيا.....
بوسلمان:عائشة يبه عطيني تليفوني..باتصل الدوحة مشتاق لهم..
ام سلمان:أي والله من يومين ماكلمناهم..
عائشة(مدت يدها)
بوسلمان(يتصل):...........السلام عليكم.......هلا يبه اشلونك.....بخير طمني عنكم.....الحمدلله هني كلهم يسلمون عليكم....أخبار وديمة؟.....تاخذ دواها؟....إذا صار لها شي ولاشي قولي...لازم اعرف كل شي عن صحتها........متى صار هالحجي؟.....لاوالله.....وليش ماخبرتني؟.....واشلونها الحين؟....والدكتور ايش قالك؟......الحمدلله....هي وينهي؟....ليش وين طالعين؟.....انزين عطني اياها..
ام سلمان:اشفيها وديمة؟
بوسلمان:يقول كان فيها فقردم..
ام سلمان:وعليه عليج يابنتي..
بوسلمان:هلا بابنيتي الغالية.....احنا بخير أخبارج انت؟.....حتى انا مشتاق لكم.....اشلون صحتج الحين؟....الحمدلله......شنو؟.....صج...بالمبارك تستاهلين هذا من جهدج.....الحمدلله....متى دوامكم؟
في شركة بوفهد.....
فهد معصب حده وهو في مكتبه مع السكرتير....
فهد:اسمع أبيك تخبر المهندسين والمحامي ان في اجتماع عقب نص ساعة واللي مايحضر عليه خصم راتب لمده شهرين..
السكرتير:حاضر...تامرني بشي ثاني..
فهد:لا..
في السيارة....
وديمة:أقول خالد..ماسألت عن نتيجة شيخة؟
خالد:بلا..
وديمة:كم جابت؟
خالد:شيخة جابت 490..
وديمة:صج!!...مسكينة...لو تدري بتين..
خالد:الله يعوضها..خلها تشد حيلها في الامتحان الثاني..
وديمة(طلعت تليفونها):خلني اتصل فيها قاعدة تنتظرني..(تتصل).....آلو...إي سألته..
شيخة:كم جبت؟
وديمة:490..
شيخة:مستحييييييييييييل..لاتقولين..حرام عليهم..جات على عشر درجات؟؟
وديمة:معليه حبيبتي شدي حيلج في الامتحان الثاني..
شيخة:ياللا مع السلامة..
وديمة:مع السلامة...شكلها تضايقت..يعني جات على عشر درجات..
خالد:عادي..باجر لدخلتي التخصص بتشوفين العجب في الدكاترة..بتحصلين دكتور يرسب طالب على درجة..
وديمة:على درجة؟!!!
خالد:أي..لاحقة على هموم ومشاكل الجامعة..
وديمة:يعني الجامعة فيها مغثة؟
خالد:لا..بالعكس الجامعة مرحلة وايد حلوة...وبتستانسين فيها..بس بتتعبين وايد..علشان جذي لازم تكونين قوية..
وديمة:اشلون؟
خالد:يعني مثلا..ممكن يوم ترسبين بإمتحان..أكيد نفسيتج بتكون تعبانة..لازم تكونين قوية علشان تقدرين تعوضين عن الامتحان الاول وتشدين حيلج بالثاني..مرة بتحصلين دكتور مايعرف يشرح او عصبي..او مايحب حد يتناقش وياه..يعني بتشوفين اشكال..مو بس الدكاترة..ممكن تكون قوانين جامعة..البنات بتشوفينهم ألوان واشكال في الدراسة..
وديمة:والله الجامعة شكلها مسؤولية..
خالد:فعلا الجامعة مسؤولية ولازم تكونين قدها..
في الاجتماع.....
فهد(معصب):ماجمعتكم الا لأن صاير شي..
مبارك:خير طال عمرك ايش صاير؟
فهد:أنا مااجتمعت فيكم وقلت لكم ان المشروع بتفاصيله يكون سري للغاية؟؟
مبارك:بلا..
فهد:اشلون تفاصيل المشروع تسربت؟؟؟
يوسف:تسربت؟؟؟
فهد:أي نعم...في حد سرب كل المعلومات الخاصة بالمشروع لشركة ثانية..
مبارك:اشلون عرفت؟
فهد:مو مهم اشلون عرفت..المهم اني عرفت وخلاص..ماابي اتهم حد..بس انا قادر اعرف من هالشخص..اعتقد اني خبرتكم ان حتى أقرب الناس لكم ماتخبرونهم..بس للأسف ثقتي في هالشخص انهزت..واحتمال كبير أشيله عن المشروع..أنا قايلكم بعد ان كل واحد فيكم بيكون له نسبة محترمة من وراء المشروع..والحين هالنسبة راحت..
فهد(تليفونه يرن):السلام عليكم...عندي اجتماع.......خلها بعدين......اوكي لحظة شوي...دقايق وراجع..(طلع من غرفة الاجتماع)
طارق:السالفة ماتستاهل كل هالعصبية ولابعد شال النسبة عنا..
يوسف:من حقه..ليش المعلومات تتسرب..هو موصينا ان المشروع يكون سري..حتى ابوه موصينا مانخبره فكيف بغيره..
مبارك:يوسف معاه حق..ماكان المفروض المشروع يتسرب..
طارق:يعني من اللي بيعترف انه سرب المعلومات..هذا ظلم ان هالكلام يمشي على الكل..
يوسف:انت زعلان على النسبة؟
طارق:وليش ماازعل..انت تدري ان كل واحد فينا كم كان بيحصل وراء هالمشروع؟
يوسف:اللي يكون احنا نشتغل لأن نبي نشتغل مب علشان النسب..
طارق:اشوفك ساكت سيف..
سيف:ماعندي شي اقوله..
فهد(يي):طبعا ماكو حد راح يي ويعترف وبيقول انه سوى هالشي..لكن اقدر أعرف من هو هالشخص..
مبارك:لو عرفت هالشخص ايش ممكن يصير؟
فهد:لي معاه تصرف ثاني..على العموم الاجتماع خلص..(وراح مكتبه)
الساعة وصلت 8....خالد ووديمة قعدوا في المطعم.....
خالد:آخر مرة اوديج السوق..ماخليتي محل الا ودخلتيه..
وديمة:شسوي احنا البنات جذي..
خالد:خفوا شوي..حرام عليكم..فضيتوا الجيب وقطعتوا ريولنا..هذا مب حلو وهذا ماادري اشفيه وهذا صار قديم..وهذا....ماتشبعون من التشري..
وديمة:قلت لك اروح مع شيخة احنا البنات نعرف لبعضنا ماانت راضي..
خالد:اقولج لو تسكتين يكون احسن..قولي شنو تبين تشربين..
وديمة:مابنتعشى؟
خالد:لا طبعا..انت ناسية ان بنشتري عشا وبنروح نحتفل مع جدتي وسلمان وليلى؟
وديمة:أي صح نسيت..
خالد:حمدلله والشكر..
عبدالله يدخل البيت....
عبدالله:السلام عليكم..
الجميع:وعليكم السلام..
عبدالله:أخباركم؟
حسنة:بخير..
عبدالله:وين أمي؟
خلود:بغرفتها..
راح لها...دق الباب...
ام عبدالله:دخلي..
عبدالله(فتح الباب):السلام عليكم..(يحب راسها)
ام عبدالله:هلا والله بوليدي..وعليكم السلام والرحمة..
عبدالله:شتسوين بروحج؟
ام عبدالله:قاعدة ارتب اغراضي..
عبدالله(سك باب الغرفة):أبيج في سالفة..
ام عبدالله:خير؟
عبدالله:خير يمه..انت تعالي قعدي..
قعدوا...
ام عبدالله:شالسالفة؟
عبدالله:السالفة ومافيها ان في واحد كلمني اليوم وخطب خلود..
ام عبدالله:من ولده؟
عبدالله:تعرفين سليمان رفيج ابوي الله يرحمه؟
ام عبدالله:أي اعرفه..
عبدالله:ولده عبدالعزيز..
ام عبدالله:انزين واشلون حال الولد؟
عبدالله:الولد مافيه شي..انا اعرفه هو ويانا في الفريج..وأشوفه في المسجد دوم..حتى صلاة الفجر..وأبوه انت تعرفينه..أكيد سمعتي عن بيتهم من ابوي الله يرحمه..
ام عبدالله:أي صح بس ابوك الله يرحمه توفى من عشر سنين يعني الناس تغيرت..
عبدالله:عاد ايش دعوة يمه بزوج اختي من غير ما أسأل عن الريال وهله؟
ام عبدالله:لا طبعا مابتسويها..
عبدالله:يعني انت ايش رايج؟
ام عبدالله:والله يايمه ماادري شاقول..خلنا نسأل عنهم وعقب يصير خير..بس ليش حريمهم ماكلموني؟
عبدالله:مو هو خذ رقم البيت علشان زوجته تتصل فيج..وقالي السالفة مرة وحده..علشان اكون على علم..ماتبين تخبرين خلود؟
ام عبدالله:بخبرها بس مب الحين..عقب بقعد معاها بروحنا وبكلمها..
عبدالله:اللي تشوفينه..
ام عبدالله:الله يكتب اللي فيه الخير..أخبار ربعك؟
عبدالله:حمدلله..
ام عبدالله:واخبار محمد؟
عبدالله:باجر بيروح يشوف البنت..
ام عبدالله:ماشاء الله زين..الله يوفقه ويسعده..
عبدالله:آمين..
في بيت بوفهد...في الصالة....
فهد:حيالله من جانا..
غانم:الله يحيك..
فهد:مابغيت..
غانم:شسوي..عيل وين ابوك؟
فهد:ليحين مارد..
غانم:أخبار هبة؟
فهد:الحمدلله..قاعدة تزهب عمرها للعرس..
غانم:ومتى العرس ان شاء الله؟
فهد:مابقى شي كلها اسبوعين وان شاء الله نتزوج..
غانم:الله يوفقكم..
فهد:عقبالك..
غانم:لحصلنا بنت الحلال..وبعدين خلنا نجمع كم قرش..
فهد:افا عليك..مصاريف عرسك علي..
غانم:روح انزين..مستحيل اوافق..
فهد:ايش دعوة ترفض الهدية من اخوك..
غانم:خلك من هالموضوع..شنو العشاء؟..تراني جعت..
ومرت الايام....وجى يوم الأحد أول يوم دوام جامعة للفصل الجديد...قامت وديمة ولبست ونزلت تحت حصلت جدتها قاعدة تحط الريوق مع الخدامة...
وديمة:صباح الخير جدتي..
الجدة:صباح الخير..ياللا يمه قعدي تريقي..
وديمة:لا ريوق لا..
الجدة:ليش؟
وديمة:انا مااحب اتريق..
خالد(يي):بس غصب بتحبين..صباح الخير جدتي..
الجدة:صباح الخير يمه..
خالد:ياللا جدامي على الريوق..مانبي هواش من الصبح..
وديمة(استسلمت)
وهم في السيارة....
خالد:اشلون جدولج هالفصل؟
وديمة:عندي يومين الصبح لين الظهر ويومين الظهر لين المغرب..ويوم إجازة..
خالد:وشيخة بتعيد التوفل؟
وديمة:قالت بتروح تقدم الايلز..
خالد:الله يعينها..
الاجواء في ألمانيا تختلف...ام سلمان قاعدة تاكل فواكه مع بوسلمان...تيي عائشة...
عائشة:نعم يبه؟
بوسلمان:روحي نادي اختج وكلوا آيس كريم..
عائشة(بوناسة):شريت لنا آيس كريم؟
بوسلمان:أي..
راحت....
بوسلمان:بدوا دوام الجامعة في الدوحة..
ام سلمان:أي قالت لي وديمة..كلمتها امس..
بوسلمان:ياليتها لو سمعت كلامي وجات معانا..
ام سلمان:ياليت..والله اني احاتيها..وافكر اشلون مشية امورها هناك..
بوسلمان:مشكلتها عنيدة وراسها يابس..
في بيت عبدالله...

اضغط على الصورة لرؤيتها بحجمها الطبيعي

ام عبدالله:هايايمه ايش قلتي..من متى وانا مخبرتج عن السالفة هذي..
خلود:اللي تشوفونه يايمه..
ام عبدالله:يعني انت موافقة..
خلود:مااعرف إذا موافقة..بس عادي..
ام عبدالله:والله ماني فاهمة عليج شي..
حسنة(تيي):في ايش تتساسرون؟
ام عبدالله:وانت ايش دخلج..خلصتي دراسة؟
حسنة:جان زين لو اتزوج وماادرس..
ام عبدالله:بس يابنية..ايش هالحجي..إن سمعتج قلتي هالحجي مرة ثانية..
حسنة(سكتت وفتحت التلفزيون)
ام عبدالله:الله يهداج..(قامت)..بروح ازهب العشاء..
خلود(قامت):وانا بروح أذاكر..
خمس دقايق ويوصل عبدالله....
عبدالله:السلام عليكم..
حسنة:وعليكم السلام..
عبدالله:وين أمي؟
حسنة:في المطبخ..
راح المطبخ....
عبدالله:قوة..
ام عبدالله:هلا والله بنظر عيني..الله يقويك..
عبدالله:اشم ريحة حلوة..ايش طابخة لنا؟
ام عبدالله:المحاشي اللي تحبها..
عبدالله:اممم..تسلم هالايادي..(يحب ايدينها)
ام عبدالله:أتمنى من رب العالمين يطول بعمري واشوفك معرس وعندك عيال..
عبدالله:ان شاء الله..دعواتج يالغالية..
ام عبدالله:الله يوفقك..ويسهل دربك..
عبدالله:أقول يمه..خلود ماردت عليج؟
ام عبدالله:كلمتها بس ماني فاهمة عليها تبيه ولا لا..
عبدالله:ليش هي شنو قالت لج؟
ام عبدالله:حجي مب مفهوم..انت اخوها وبحسبة ابوها روح لها وكلمها..
عبدالله:ان شاء الله..
راح لها الغرفة ودخل.....
خلود:حياك ياخوي..اقعد..
عبدالله(قعد):اشلون الدراسة معاج؟
خلود:الحمدلله..تصدق عاد مرتاحة انك تشتغل في الجامعة..
عبدالله:ليش؟
خلود:لأنك قريب مني..وكل مشاكلي تقدر تحلها لي..
عبدالله:المهم..انا جايج بسالفة..
خلود:خير..
عبدالله:اعتقد امي كلمتج بسالفة الريال اللي جى يخطبج..
خلود(هزت راسها بنعم)
عبدالله:وانت ايش رايج؟
خلود:اللي تشوفه ياخوي سوه..
عبدالله:اللي تشوفينه انت مو انا..
خلود:يعني انا عادي عندي..صج عندي جامعة بس ان شاء الله قريب بتخرج..
عبدالله:الجامعة لاحقه عليها..أنا اقول دام ان الريال مايعيبه شي ليش الواحد يرفضه..ولا انت ايش رايج؟
وديمة تنزل تحت ومعاها كتابها.....
وديمة:هلا والله بليلى..ايش عندج جايه عندنا؟
ليلى:لا..شنو ايش عندج..جايه ازوركم..
وديمة(تضم خالد):خلودي فديتك حبيبي..أشلونك؟
خالد:طيب..
وديمة:واشلون الروضة؟
خالد:زينة..انت ليش ماتجين بيتنا مع خالي..
وديمة:شسوي عندي دراسة..تعال معاي فوق بعطيك كافي..
خالد:كافي..أبي وااايد..
وديمة:بعطيك وااايد..تعال..
وهي تروح فوق...خالد يطلع في وجهها....
خالد:ايش تبين تعطينه؟
وديمة(بلعت ريقها)
خالد(بهدوء):ايوه اسمعج انا..
وديمة(بخوف):كنت بعطي كافي حق خالد..
خالد:ومن وين لج؟
وديمة:من الجامعة..
خالد:ومن متى تشترين كافي؟
وديمة:أنا أنا شاريته حق خالد..ولا انا من زمان ماآكل..
خالد:انزين..(ونزل)
وديمة(استغربت هدوءه وانه ماقال شي راحت فوق)


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 23-12-2013, 03:50 AM
صورة اسطوره ! الرمزية
اسطوره ! اسطوره ! غير متصل
©؛°¨غرامي ماسي ¨°؛©
 
الافتراضي رد: حياة ملونه الكاتبة / أميرة الوهج



تابع الفصل الرابع



في شركة بوفهد...عند سكرتير فهد....
طارق:في حد عنده؟
السكرتير:أي نعم..تقدر تنتظره هني..
طارق:إذا مب مطول بانتظر..
السكرتير:لا ماراح يطول..
في مكتب فهد....وهو يسلم....
فهد:في أمان الله..عاد خلنا نشوفك..
الضيف:ان شاء الله..مع السلامة..
فهد(يقعد):مع السلامة..(يتصل على السكرتير)...ماوصل الفاكس؟
السكرتير:بلا طال عمرك..
فهد:جيبه..
السكرتير:ان شاء الله..
طارق:أدخل؟
السكرتير:انتظر شوي..بس أستأذن منه..
دخل...وعطى الورقة لفهد...
السكرتير:طال عمرك المهندس طارق في مكتبي ويبي يشوفك..
فهد:خله يدخل..
السكرتير:ان شاء الله..تامرني بشي ثاني؟
فهد:خلهم يسوون لي قهوة تركية..
السكرتير:حاضر..(راح)
ودخل طارق...
طارق:السلام عليكم..
فهد:وعليكم السلام..حياك تفضل..
طارق(مد يده)
فهد:شنو ذي؟
طارق:تفضل..
فهد(خذ الورقة وقعد يقرأ):إجازة لمدة أربع شهور؟!!
طارق:أي نعم..
فهد:ليش؟
طارق:عندي شوية ظروف ومااقدر أدوام..
فهد:شنو مسافر؟
طارق:يمكن..حاليا مب باين..
فهد:بس إجازتك ماجات في وقتها..انت تدري ان إحنا عندنا مشروع ضخم وكبير..
طارق:أدري..بس أنا مااقدر أكمل معاكم..
فهد:ليش؟
طارق:لأني محتاج هالاجازة..
فهد:انت اللي كنت مشتط لهالمشروع..
طارق:بعد وكل واحد وظروفه..
فهد:يعني راح تنسحب من المشروع؟
طارق:احتمال كبير..
فهد:اوكي..على راحتك..بس طبعا الاجازة بتكون من غير راتب..
طارق:من غير راتب!!..ليش؟
فهد:لأنك ماقدمت أسباب واضحة للإجازة..
طارق:بس انا عندي رصيد اجازات..
فهد:ايش كثر؟
طارق:تقريبا ثلاث شهور..ماقد خذت اجازة..ومجمعهم حق الحين..
فهد:حتى لو عندك رصيد اجازات بس ماتقدر تاخذ الثلاث شهور ورى بعض..
طارق:بس أنا قلت لك طال عمرك ظروف..
فهد:إذا ماانت حاب تقولي شنهو الظرف..بكيفك..لكن روح عند الاستاذ محمود وخبره عن ظروفك إذا يستحق ان ينزلك راتب خل ينزله..
طارق:بس طال عمرك....
فهد(قاطعه):القانون قانون ياطارق..وهالشي انت تدري فيه قبل لتدخل الشركة..
طارق:مشكور..عن اذنك..
طلع....ويرن تليفون المكتب...
فهد:نعم؟
السكرتير:يوسف عندي يبي يشوفك..
فهد:خله يدخل..
السكرتير:حاضر..تقدر تتفضل..
يدخل يوسف....
يوسف:السلام عليكم..
فهد:وعليكم السلام..تفضل يوسف..
يوسف:قلت لازم ألحق عليك قبل لتطلع من الشركة..
فهد:خير؟
يوسف:أبي استأذن منك باجر احتمال ماجي الشركة..
فهد(استغرب):ليش؟
يوسف:طال عمرك الوالدة شوي تعبانة ومضطر أسافر مع الوالد والوالدة..وأخوي شغله مارضوا يعطونه إجازة فاأنا مضطر اتغيب باجر..
فهد:وين مسافرين؟
يوسف:السعودية..
فهد:ليش؟
يوسف:لأن الوالدة كانت تابع عند دكتور في السعودية..
فهد:بس المشكلة باجر في إجتماع مهم مع الوفد الياباني..
يوسف:ادري..بس انا مضطر..لأن الوالدة صج تعبانة..ولازم تروح..حتى لو تبون تخصمون من راتبي..
فهد:محد راح يخصم من راتبك شي..هذي الوالدة لازم تقوم فيها..سلامتها ماتشوف شر..
يوسف:الشر ماييك..
فهد:خلاص يايوسف روح ويالاهل..وطمني عليها..وإذا محتاج شي ولاشي..لاتستحي..
يوسف:ماتقصر طال عمرك..(قام)..عن اذنك..
فهد(يفكر بينه وبين نفسه..الفرق بين طارق ويوسف)
الصبح...في سيارة خالد...
وديمة:خالد انت وين رايح؟
خالد:ليش تسألين؟
وديمة:هذا مب طريق الجامعة..
خالد:أشوف حافظة طريق الجامعة..
وديمة:لازم احفظه من روحتنا له كل يوم..انت وين رايح؟
خالد:ألحين بتشوفين..
عقب عشر دقايق...
وديمة:خالد..ليش جايبني هني؟
خالد(رفع الهاند بريك):ياللا نزلي..
وديمة:ماني نازلة ليش جايبني هني؟
خالد:علشان اجيك على السكر..
وديمة:من غير ماتقولي؟
خالد:واشفيها لو ماقلت لج..
وديمة:بس انا عندي الجهاز في البيت..والسكر عندي اوكي..
خالد:ادري..بس لاتنسين ان عندج موعد علشان تحاليل السكر..بعدين نتأكد أكثر..ياللا..
وديمة(تضايقت):خالد ليش تسوي فيني جذي؟..لهالدرجة مب واثق فيني؟
خالد:الا واثق..علشان جذي جبتج..نزلي..
وديمة:.......
خالد:تسمعين شاقولج؟
وديمة(نزلت)
في الجامعة...شيخة تسلم على رفجيتها وعقب تتصل....
شيخة:آلو..وينج يالدبة؟
وديمة:توني طالعة من المحاضرة..ايش تبين؟
شيخة:شنو شاابي..اشفيج؟
وديمة:ماكو..بغيتي شي؟
شيخة:انزين ابي اشوفج..وينج؟
وديمة:شالي يابج الجامعة؟
شيخة:لييتي بقولج..
في مكتب بوفهد...
فهد:خير يبه..بغيتني؟
بوفهد:شفت هالمناقصة؟
فهد(قعد يقراها):إي شفتها..وصلتني..
بوفهد:ايش رايك؟
فهد:والله هي مناقصة زينة..وربحها مو وايد..بس بتنفعنا..
بوفهد:انا بعد اقول جذي..ايش رايك اوافق؟
فهد:بس المناقصة هذي فيها سفر..ومن يقدر يسافر؟
بوفهد:انت..
فهد:أنا صعبة..اسبوع الجاي عرسي..وعقبها باخذ إجازة..
بوفهد:خلاص انا بسافر..
فهد:وامي اتم بروحها في البيت؟
بوفهد:يعني شسوي؟..أرفض المناقصة؟
فهد:ماادري..خلني أفكر بحل..
بوفهد:قولي وزعت بطاقات العرس؟
فهد:في منهم وزعتهم وبقى ناس ليحين ماشفتهم..انت عطيت حد؟
في الجامعة....
شيخة:انزين طلبي لي شي..انا ضيفتج..
وديمة:دخيلج..انت مب غريبة على الجامعة..عزمي نفسج بنفسج..وإذا ماعندج خذي بوكي..
شيخة:روحي انزين..الله يخلي بوكي عامر ولايحيجني لج..اشفيج انت اليوم نفسج خايسة؟
وديمة:مقهورة..مقهورة وايد..
شيخة:ليش بعد؟..توفل وخذتيه..ليش مقهورة..انا المسكينة..ذبحت عمري دراسة ودراسة وسهر وامتحانات وبالاخر ماحصلت شي..
وديمة(انكسر خاطرها):ربج بيفرجها..
شيخة:ماقلتي اشفيج؟
وديمة:خلاص مافيني شي..
شيخة:ودوم عن المصاخة..توج تتشكين..
وديمة:اليوم خالد وداني المستشفى علشان اقيس السكر من غير مايقولي..بصراحة وايد تضايقت من هالحركة..
شيخة:مافهمت..
في الدوام.....
أحمد:قوم ياريال..مت من الجوع..
محمد:ألحين اصبر شوي..بس أخلص اللي بيدي..
أحمد:أنا ادري انت ليش ماتبي تقوم..تخاف حد من أهل خطيبتك المصونة يي ومايحصلك تشتغل..ترى خلاص الملجة عقب يوم محد بيسأل عنك..قوم..
محمد(قام):زين زين..بعدين تعال انت ايش تبي في أهل زوجتي..
أحمد:لتزوجتها بعدين تعال كلمني..خلنا نروح ناكل شي..
وهم ياكلون....
محمد:ماتصدق ايشقد مستانس ان عقب باجر الملجة..
أحمد:الله يهنيك..
محمد:وانت ماناوي تتزوج؟
أحمد:خلنا ننتطمن عليك عقب يصير خير..تصدق شنو في خاطري..ودي نطلع البحر..
محمد:طلعوا انتوا انا هالجم يوم مشغول..
أحمد:انت الخسران..انا باتصل في عبدالله وخالد..وبقولهم نطلع الاسبوع الياي..
محمد:الله يرد الوالدة بالسلامة..يااخي احاتيها..
أحمد:أي صج شاخبارها؟
محمد:الحمدلله..اليوم سافروا..
أحمد:ومتى بيردون؟
محمد:باجر ان شاء الله..
أحمد:الله يردها بالسلامة..
محمد(قام):قوم خلنا نكمل شغل..قبل ليي ذاك اللي مايتسمى ويخصم من الراتب..
أحمد(قام):أي والله..
في الجامعة...
وديمة(قامت):ياللا انا رايحة..عندي محاضرة وبتأخر..
شيخة:انزين سمعي..انا مسوية عزيمة باجر..
وديمة:شالمناسبة؟
شيخة:من غير مناسبة حفلة شاي..قعدة بنات..
وديمة:من بيي؟
شيخة:وايد بنات..دانة الريم مشاعل..فطوم سميرة..وغيرهم..
وديمة:واو خاطري ايي..
شيخة:تعالي من ميودج؟
وديمة:الامتحان ميودني..
شيخة:عندج امتحان؟
وديمة:أي يوم الاحد..
شيخة:انزين باجر الخميس..بتقعدين تدرسين الويكيند كله؟
وديمة:انت ماتعرفين خالد وقوانينه..
شيخة:حاولي وياه..
وديمة:بحاول..ياللا باي..
شيخة:باي..
عبدالله يرد من صلاة العصر...يحصل امه قاعدة على السجادة...
عبدالله:تقبل الله..
ام عبدالله:منا ومنكم..لاتنسى تروح تييب اختك من الجامعة..
عبدالله:ان شاء الله..
في الشركة....بوفهد يدخل مكتب فهد....
فهد:حيالله بوفهد..
بوفهد:الله يحيك..
فهد:تفضل..
بوفهد(قعد):اشلون الشغل معاك؟
فهد:الحمدلله..الشغل ماشي..
بوفهد:فكرت في المناقصة؟
فهد:انت حصلت حد؟
بوفهد:لا..
فهد:انا فكرت بواحد..واحس ان هو الشخص المناسب..بس محتار شوي..
بوفهد:من هو؟
فهد:موظف عندي جديد هو مهندس..اللي كلمتك عنه اسمه يوسف..
بوفهد:أي واحد؟
فهد:اللي قلت لك اني زرتهم في البيت وطلع ابوه يعرفك..
بوفهد:أي أي عرفته..ايش معنى اخترت هذا؟
فهد:احسه واحد أمين وصادق..
بوفهد:فكر عدل قبل لتختار..
فهد:ليش يبه؟
بوفهد:مرات احساسنا يكون عكس الواقع..
فهد:ايش تقصد يبه؟
بوفهد:الريال مافيه شي..حتى ابوه سمعتهم طيبه..لكن ابي اقولك..لاتحكم على الناس من مجرد احساس..لازم نشوف افعالهم مع احساسنا..
في بيت بوسلمان.....

خالد يدخل البيت ....
الجدة:جبت الاغراض؟
خالد:أي حطيتهم في المطبخ..
الجدة:جزاك الله خير..
خالد:وين وديمة؟
الجدة:راقدة..
خالد:راقدة!!..الساعة صارت 9 وراقدة؟
الجدة:انت جايبها البيت متأخر ونامت على طول..
خالد:ماتغدت؟
الجدة:لا..قالت لي انها تغدت في الجامعة..
خالد راح لها الغرفة ودق الباب ودخل شافها راقده....فتح كل الليتات..
خالد:وديمة...ياوديمة..ودوم..
وديمة(تفتح عينها)
خالد:صباح الخير..كل هذا رقاد؟
وديمة(بتعب):نعسانة..سك الليتات ابي انام..
خالد:مافي شي اسمه نعسانة..ساعتين يكفونج..انت وراج دراسة..نامي في الليل..تبين تسهرين لين الصبح..
وديمة(دخلت راسها تحت اللحاف):ابي انام انزين..
خالد:وديمة..قومي بقولج شي..
وديمة(تحت اللحاف):شنو؟
خالد:انت قومي بقولج شي..
وديمة(قامت):شنو؟
خالد:عندي شغل في الشمال وبوديج معاي..
وديمة(استانست):ياسلالالام..صج خالد..متى؟
خالد:يوم السبت..
وديمة:والامتحان؟
خالد:إذا ذاكرتي عدل من اليوم لين يوم الجمعة..بطلعج..لكن إذا تكيسلتي ماني موديج مكان..
وديمة:اممم..بس في شي..
خالد:شنو؟
وديمة:شيخة عازمتني على حفلة شاي باجر في بيتهم..
خالد:وليكون تفكرين انج بتروحين؟
وديمة:في خاطري..
خالد(قام):خلاص روحي حفلتها وذاكري حق الامتحان..بس مااقدر اوديج الشمال..(سك الباب)
وديمة:شكله زعل..يعني لازم اتحجى الحين..صج ماعندي سالفة..أفف..
وهم يتعشون...الجو هادي...ومحد فيهم يتكلم....
خالد:أقول جدتي..متى بيرد خالي عيسى؟
الجدة:يقول بيرد عقب شهر إن شاء الله..
خالد:طول وايد..
الجدة:أي يايمه طول..وصرت مشتاقة له أكثر وأكثر..بس شسوي..هذا شغله..
وديمة:ليرد زوجيه..
الجدة:ان شاء الله..
خالد(قام):الحمدلله..
وديمة بعد قامت وغسلت يدها وخذت كتابها وسوت عمرها تذاكر..وخالد مسك الريموت وقعد يقلب بهالقنوات...لين مااستقر على الاخبار....
وديمة(راحت عند خالد):خالد شنو معناة هالكلمة؟
خالد:وين؟
وديمة:هذي..
خالد:هذا ماله معنى..هو جذي اسم علمي..
وديمة:ماني فاهمة شي في هالمحاضرة..
خالد:وانت وينج يوم الدكتور يشرح؟
وديمة:انا معاه..بس الدرس شوي صعب..اشرح لي اياه..
خالد:جيبي ورقة وقلم..
وديمة(استانست):الحين..
في بيت العمة....
بوفيصل:روحي سجلي في الدورة علشان تقدرين تجيبين التوفل..
شيخة:ماابي..تعبت من الدورات والجامعة..
بوفيصل:شنو يعني تبين تقعدين في البيت؟
شيخة:لاطبعا..بحاول اشد حيلي في الامتحان الجاي..
بوفيصل:متى الامتحان؟
شيخة:عقب اسبوعين..
فيصل يدخل البيت....
فيصل:السلام عليكم..
الجميع:وعليكم السلام..
شيخة:فيصل لاتنسى باجر الصبح بتوديني السوق..
فيصل:انت ماتشبعين؟
شيخة:لا..
فيصل:روحي بروحج..انت عندج ليسن..
شيخة:انا ماادل..بعدين تعرف صاحب المحل..
فيصل:يعني لازم تسوين عزيمة..
شيخة:أي..
بوفيصل:وانت فيصل ايش بتسوي علشان التوفل؟
فيصل:يبه انا مب قاعد في الديرة..أفكر ادرس برع..
بوفيصل:نعم؟!!
فيصل:بروح ادرس برع بأي جامعة..على الاقل برع أسهل..
بوفيصل:ومن اللي قص عليك؟
فيصل:أخو رفيجي يدرس برع..دخل الجامعة بسهولة من غير عوار راس..
شيخة:فيصل من صجك تبي تسافر؟
فيصل:أي ليش لا..
ام فيصل(تيي وتقعد)
بوفيصل:تعالي سمعي ولدج شيقول..
اليوم هو يوم مهم في حياة محمد..على الساعة 10 يدخل محم المكتب..
محمد:السلام عليكم..
أحمد(منصدم):انت شالي جابك؟
محمد:شنو شالي جابني؟
أحمد:على اساس اليوم اجازة..
محمد:من اللي قص عليك ان اليوم إجازة..شالمناسبة؟
أحمد:محمد ركز معاي..مو على اساس ان اليوم ملجتك..وانت قايل انك بتاخذ اجازة..
محمد:بلى..
أحمد:عيل شالي جابك؟
محمد:أصلا انا من الصبح في الدوام..بس كنت برع البرج..
أحمد:وليش رجعت؟
محمد:رديت أكمل دوامي..
أحمد:محمد لاتبط جبدي..ليش ماخذت اجازة؟؟؟
محمد:قعدت أفكر ان مافي سبب يخليني اخذ اجازة..ولازم اداوم..
أحمد:هذا اللي بيرفع ضغطي..يااخي اقتصاد الدولة ماهو واقف على يوم إجازتك..اشفيك انت..انا مو قايلك بسوي شغلك اليوم..وانت روح رتب روحك..
محمد:مافي شي لازم ارتبه..انا مرتاح جذي وشكلي عاجبني..
أحمد:أقول امش معاي..(مسكاه وطلع من المكتب)
محمد:وين؟
أحمد:ألحين بتعرف..
في الجامعة...وتحديدا مكتب عبدالله....يدق الباب بدقة طريفة....
صقر:ممكن أدخل..
عبدالله(يبتسم له ويسلم عليه):حياك..تفضل..
صقر:شتسوي؟
عبدالله:شوفت عينك..
صقر:شكلك غرقان في الشغل..
عبدالله:وااااايد..اخبارك؟
صقر:قبل لأقولك عن اخباري..ايش رايك تاخذ بريك نروح ناكل شي ونشرب شي ينشط الاعصاب..ايش قلت؟
عبدالله:اوكي..بس اخلص اللي بيدي ونروح..
صقر:ايشقد يبيلك لين ماتخلص؟
عبدالله:خمس دقايق..
صقر(قام):اوكي انا بانتظر برع..بمر على واحد من الموظفين علشان اعطيه هالورقة..
في كافتيريا الجامعة......
عبدالله:هذا احنا طلبنا ريوق قولي أخبارك؟
صقر:الحمدلله..انت اخبارك؟
عبدالله:والله عايشين في هالدنيا..الحمدلله على كل حال..ايش كثر بقى لك لين ماتتخرج؟
صقر:سنة إذا الله أراد..
عبدالله:ان شاء الله بتتخرج..وأخبار عيالك؟
صقر:والله الحمدلله..بس بصراحة وايد تعبان حدي..
عبدالله:ليش؟
صقر:يااخي الزواج مسؤولية..زوجة وعيال وبيت ودراسة..تعبان حدي..اكثر من اربع ساعات لايمكن اقدر انام..
عبدالله:ليش؟
صقر:الصبح انا في الدوام وعقب في الجامعة لين الليل..وعقبها ارد البيت اقعد اذاكر لين 2ونص..وعقب ارقد لي شوي واقوم للصلاة ومرات الصلاة تفوتني..وتعال شوف يوم الياهل يصيح لك في الليل كلش ماتقدر تنام..
عبدالله:الله يعينك..ليش تزوجت بسرعة؟
صقر:حسبت اني اقدر..يوم شفت رفيجي مستانس وقادر يمشي اموره..قلت انا بعد اقدر...وعقب ماتزوجت عرفت اللي ماكنت اعرفه..
عبدالله:ذكرتني بواحد من الشباب..تزوج وهو طالب بالجامعة..بس ماكان يشتغل..ابوه كان يصرف عليه وعلى زوجته..لين ماتخرج..
صقر:يااخي صعبه ان الوالد هو اللي يصرف علينا..اشلون ارضاها على نفسي..حتى لو الوالد موافق بس انا مستحيل اوافق..الابو يستانس ان الولد تزوج علشان يتحمل مسؤولية نفسه..مو يظل يفكر فيه حتى وهو متزوج..ولابعد عنده عيال..صج اني تعبت وايد لكن مرتاح في نفس الوقت ان اللي يتعب هو شخص واحد اللي هو انا..لو الوالد الله يحفظه كان يصرف علي كان بشيل همي معاه..
عبدالله:الحمدلله..اشلون درجاتك؟
صقر:مرات زينة ومرات شينة..
عبدالله:حاول تشد حيلك..مابقى شي..
صقر:ان شاء الله..انت متى ناوي على الزواج؟
عبدالله:الله كريم..بس نحصل بنت الحلال..
صقر:لو بقت وحده من خواتي ماهي متزوجة جان عطيتك اياها..ولا وين بحصل احسن منك ياعبدالله..انت ريال والنعم فيك..
عبدالله:يااخي روح كلنا نفس الشي..وانتوا احسن منا..
صقر:لاوالله ياعبدالله..هذا مو كلامي انا وبس كلام الكثيرين..
عبدالله:خلك من هالحجي كله..قولي..انت زوجتك تخرجت؟
صقر:لا..بقى لها سنة ونص..
عبدالله:زين تتساعدون..
صقر:هو من ناحية نتساعد..اي نتساعد وايد..مرات شنسوي إذا عندنا امتحان مدتيرم ولافاينل..انقط الياهال مع الخدامة في بيت ابوها..ونقد احنا الاثنين نذاكر ويابعض..ونتساعد لين الصبح..نام لنا ساعتين ثلاث وعقب نصحى..
عبدالله:ماشاء الله عليكم..تصدق خوش فكرة..شكلك ماتنصح حد يتزوج وهو يدرس..
صقر:والله ياعبدالله الناس تختلف..يمكن غيري قادر يتحمل أكثر مني..(يفتح الكتاب)..هاك هذي بطاقة عرس اخوي..
عبدالله:ماشاء الله..من من اخوانك؟
صقر:اخوي سيف..
عبدالله:تخرج من الجامعة؟
صقر(يضحك):لاتحاتي تخرج السنة اللي طافت..
عبدالله:مو سيف اللي درس في الاردن؟
صقر:بلا..
الساعة...اربع ونص...خالد ينزل تحت.......
الجدة:ماشاء الله عليك..
ليلى:فديتك والله..كاشخ وين رايح؟
خالد:اليوم ملجة واحد من الربع..
ليلى:ان شاء الله عقبالك..
خالد:أنا طالع..ويمكن أتأخر شوي..عيل وين وديمة؟
وديمة(تنزل):كاني هني..
خالد:ذاكري عدل علشان نطلع يوم السبت..
وديمة:ان شاء الله..
في السيارة.....
خالد:ايش سويت فيه؟
أحمد:خذته ووديته الحلاق ورتبته خليته خوش معرس..
خالد:زين سويت فيه..
أحمد:الله يهينه..تصدق مستانس له وااايد..
خالد:ان شاء الله يتهنى ويتم معاها..
أحمد:ياللا ننزل..
خالد:عبدالله ماوصل..
أحمد:خلنا ندخل..تحصله بالدرب..
يدخلون المجلس يحصلون يوسف وابوه ومحمد واهل العروس قاعدين....
خالد(بصوت واطي):اشلون النفسية؟
محمد:الحمدلله..متوتر..بس مو ذاك الزود..
خالد:عاد بشرنا عقب..
محمد:ولايهمك..
عقب الملجة...الكل يقوم ويبارك له...وربعه يستأذون ويروحون البحر....
عبدالله:يحليله محمد..
أحمد:ان شاء الله تنفك عقدته..
خالد:ايش رايكم عقب صلاة العشاء نروح نتعشى؟
أحمد:وين نروح أي مطعم؟
عبدالله:عندي لكم مطعم يمدحونه وايد..وعنده اكلات متنوعة..
خالد:بعيد؟
عبدالله:لا..
خالد:عيل خلنا نلحق على الصلاة وعقب نروح..
عقب ساعة....وهم في المطعم...يرن تليفون أحمد...
أحمد:هلا والله....احنا في المطعم..
محمد:يالخونة..تروحون من غيري..
أحمد:قلنا انت مشغول ومانبي نزعجك..
محمد:انزين انتوا في أي مطعم؟.....شنو ليش ابي اييكم.....لاماكو شي بس الحريم شوي مشغولين ومااقدر اقعد معاها....اي برد لاتخاف...وين؟....اي دليت....ياللا ربع ساعة واكون عندكم..في امان الله..
أحمد:في امان الله..
خالد:محمد؟
أحمد:أي..
عبدالله:ايش عنده بيي؟
أحمد:يقول الحريم مشغولين ماادري وشو..الحين بيي وبنفهم منه السالفة..يااخي الستيك لذيذ وايد..اول مرة اطلب استيك ويضبطونه لي..
خالد:معاك حق..انا بعد اول مرة يعجبني أكل مطاعم..
شوي ويوصل محم ويقعد معاهم....
محمد(ياكل بطاطا مقليه من صحن عبدالله):انا جوعان..صبروا لاتخلصون عشاكم..أبي آكل معاكم..جرسون..
الجرسون:نعم..
محمد:ممكن المنيو؟
الجرسون:أكيد..تفضل..
محمد(يفكر ايش يطلب):جب لي هذا..بس يكون قطع صدر اوكي؟
الجرسون:حاضر..
محمد:وخلي البطاطا تكون مشوية..
الجرسون:حاضر..وحاجه تانية؟
محمد:أبي عصير ليمون بالنعناع..
الجرسون:اوكي..
محمد:لاتأخر(وراح الجرسون)..انزين شباب ايش هالخيانة؟...تييون تعشون من غيري؟
خالد:انت قولنا شالي جابك؟
محمد:جاي اتعشى معاكم..
عبدالله:وخطيبتك؟
محمد:اشفيها؟
احمد:شفتها؟
محمد:شفتها وبس..الا أقول بيغمى علي..وانا قاعد وسط حريم..
عبدالله:شنو شعورك؟
محمد:والله ماادري شنو شعوري..بس احس براحة..
أحمد:الحمدلله..ان شاء الله دوم..تكلمت معاها؟
محمد:ليش هم خلوني..زين لبستها الشبكة والدبلة وقطعنا الكيكة وطلعت..قالوا لي رد عقب..
خالد:انزين لاتعشى علشان تقدر تتعشى معاها..
محمد:أفا عليك..اتعشى معاكم واتعشى معاها..تبيني افوت العشاء معاكم..مااقدر..جن الريال تأخر؟
أحمد:هو مداه يطبخ لك اياه..اصبر شوي..
محمد:انزين صبروا لاتخلصون عشاكم..
في البيت....الجدة راقدة...ووديمة تشرب نسكافيه وهي تدرس...والتلفزيون شغال...يدخل خالد....
خالد:السلام عليكم..
وديمة:وعليكم السلام..
خالد(يقعد):وين جدتي؟
وديمة:رقدت من زماان..وينك تأخرت وايد..
خالد:انا قايل اني بتأخر..
وديمة:الساعة صارت 11..
خالد:اشلون المذاكرة؟
وديمة:شوفت عينك..
خالد:اشوف التلفزيون شغال..من متى اللي يذاكر يشغل التلفزيون؟
وديمة:صدقني ماقاعدة اتابع شي..هو بس جذي شغال لأني بروحي..ولا إذا جدتي قاعدة مسكر..
خالد:ايشقد بقى لج؟
وديمة:نص الكمية..
خالد:وايد زين..كملي مذاكرة لين 12 وعقب نامي والصبح على ال8 قومي وكملي مذاكرة..
وديمة:ان شاء الله..
خالد:قومي روحي دارج..خذتي دواج؟
وديمة:أي..
خالد:والابرة؟
وديمة:باخذها الحين وانا رايحة..
خالد:قومي اشوف جدامي..انا بعطيج اياها..
يوم السبت...الصبح الساعة 10..في مكتب فهد..يدخل السكرتير.....
السكرتير:طال عمرك في واحد برع يبي يشوفك..
فهد:من؟
السكرتير:مااعرف بس يقول واحد اسمه جابر ويبي يشوفك..
فهد:خله يدخل..
السكرتير:حاضر..
فهد:ماوصل فاكس ولا ايميل من السويد؟
السكرتير:لا..بس بجيك مرة ثانية..عن اذنك..
دخل جابر...وسلم.....
فهد:تفضل..
جابر:استاذ فهد انا سمعت عنك وايد علشان جذي جيتك وطمعان بمساعدتك..
فهد:تفضل..
جابر:انا توني متخرج من الجامعة بتخصص محاسبة..وصار لي شهرين من ادور على شغل لكن ماحصلت..كل مااروح مكان يايقولون لي بنتصل فيك ومايتصلون يا يبون واحد له خبره كم سنة..وانا من وين لي الخبرة اذا مااشتغلت..وجايك تساعدني وتشغلني عندك في الشركة..
فهد(ابتسم):مع اني مااعرف اذا شركتنا محتاجة لموظفين ولا لا..بس ماني رادك ياجابر..معاك اوراقك؟
جابر:أي نعم..(مد يده)..تفضل..
فهد(يقرأ):اوكي خلي اوراقك مني..وباجر ان شاء الله بخليهم يكلمونك علشان نشوف المكان المناسب لك..
جابر:يعني اكيد بتتصلون؟
فهد:لاتحاتي ان شاء الله بنتصل فيك..وانا راح اتابع موضوعك..ولنا جلسه مع بعض ان شاء الله..
في الكوفي شوب...محمد يتكلم في التليفون...
محمد:اشلونج ان شاء الله بخير؟......انا بخير..........اشلون الوالدة؟......لاوالله مب في البيت...(أحمد يي ويقعد)....باتصل فيج عقب مع السلامة..
أحمد:ليش سكرت جان كملت..
محمد:زين مني متصل..ماتشوفني قاعد اعرق..
أحمد:حمدلله والشكر..لازم تتعود..متى بتروح لها؟
محمد:توني امس كنت عندها..
أحمد:يعني ماانت رايح لها؟
محمد:بلا..بس يمكن عقب جم يوم..انا ابي اروح نكشت الخميس..ايش رايك؟
أحمد:كيفكم..انا ماعندي مانع..شوف عبدالله وخالد..
محمد(مسك تليفونه):ألحين باتصل فيهم..
في الشمال....وهم على البحر...
خالد:ايش رايج؟
وديمة:عجييييييب..وايد مستانسة..
خالد:ياللا خلنا ناكل لأني ميت من الجوع..
وديمة:انا بعد جوعانة..طلبت عصير وشو؟
خالد:طلبت حق نفسي موز بالحليب وانت برتقال..
وديمة:اوكي..
خالد(يفتح الكيس)
وديمة:امم ريحته تشهي..حسافة جدتي ماجت معانا..
خالد:كل واحد يكبر في السن يتعايز مثل هالطلعات..بس خلي ولدها يرد..
وديمة:ان شاء الله..
يرد تليفون خالد...
وديمة:حزته؟
خالد:آلو...هلا بوجاسم...بخير.....انت اشلونك؟......الحمدلله أمورنا ماشية....لاوالله انا مو في الدوحة....في الشمال مع الاهل.....أفا عليك ان شاء الله....والله من زمان وانا في خاطري نرد لطلعاتنا.....متى؟....خلاص ان شاء الله باجر اشوفكم ونتفق....سلم على أحمد...في امان الله..
وديمة:ايش يبي رفيجك؟
خالد:شغل..خلنا نكمل غدانا قبل لحد يتصل فينا..
في بيت بوفهد....
بوفهد:خلاص وزعتوا البطاقات كلها؟
ام فهد:أي الحمدلله..
فهد:وخالتي؟
ام فهد:انا طرشت لها البطاقة..
بوفهد:اليوم العصر روحي لها البيت واعزميها..وعزمتي بيت بوسلمان؟
ام فهد:طرشت لهم البطاقة بس هم مش موجودين..
بوفهد:وينهم مسافرين؟
ام فهد:أي بوسلمان جاته دورة في ألمانيا وخذ زوجته وعياله وراحوا..
بوفهد:وانت فهد عزمت ربعك كلهم؟
فهد:أي يبه..
بوفهد:مابقى شي على العرس..رتبت امور سفرك؟
فهد:أي حجزت..
ام فهد:وايشقد بتمون؟
فهد:15 يوم..
ام فهد:شوية..
بوفهد:لاوين شوية..بسهم خله يرد للشغل..انا مااقدر على الشغل بروحي..
وتمر أربعة أيام...وكانت الاحداث عاديه مثل كل يوم...لكن يوم الثلاثاء...كانت هبه في الفندق تزهبها الكوافيرة علشان ليلة الحنة....تدخل عليها هلا...
هلا:أقولج هبة وين السي دي؟
هبة:أي سدي؟
هلا:سي دي زفتج..
هبه:شوفيه في شنطتي..ايش تبين فيه؟
هلا(وهي تدور):يبون يجربونه..
هبة:لايضعونه لي ترى ماسويت له نسخة..
هلا:كاهو حصلته..لاتحاتين انت اهم شي خلج زاهبة وكل شي بيكون اوكي..
هبة:عاد ابي ليلة الحنة تكون شي ماصار ولااستوى بالدوحة..
هلا:أفا عليج..كلها ساعات وبتشوفين..
في بيت العمة....شيخة في غرفتها تذاكر...يدخل عليها فيصل.....
فيصل:هاي..
شيخة:هايات..من وين جاي؟
فيصل:من عند رفيجي..
شيخة:انزين لاتزعجني لأني قاعدة ادرس..
فيصل:والله ماني جاي اسولف..انا بروحي تعبان وابي انام..امي تقولج نزلي تبيج..
شيخة:ياللا الحين نازلة لها..
تنزل تحت....
شيخة:نعم يمه؟
ام فيصل:تعالي ساعديني شوي..جايينا ضيوف..
شيخة:ضيوف؟!!..من؟
ام فيصل:حريم..روحي شوفي الكيكة استوت ولا لا..
شيخة:يمه الله يهداج ايشله مسويه كيك جان شريتي كل شي من برع وريحتي عمرج..
ام فيصل:انا احب كل شي من يدي..روحي قبل للكيكة تحترق..
شيخة:ان شاء الله..
في مكتب فهد...يدخل غانم...
غانم:يعطيك العافية..
فهد:هلا والله..(يسلم عليه)..مرحبا بالقاطع..وينك ماشفتك من جم يوم..
غانم:شسوي انت ادري بالحال..
فهد:اقعد..(يقعدون)..اشفيه حالك بعد؟
غانم:ايش تبي في حالي..قولي انت عن حالك..اليوم مو ليلة الحنة؟
فهد:بلا..
غانم:ياللا عقب باجر عرسك..
فهد:بس انا متضايق..
غانم:ليش؟
فهد:يااخي خالتي ماهي راضية تحضر..
غانم:ليش؟
فهد:شكلها ليحين زعلانة..امي راحت لها ماحصلتها..قالوا انها مسافرة..
غانم:والله هالحريم عليهم حركات..
فهد:لالاتقول جذي عنها..ترى خالتي غير..ووجودها مهم وايد بالنسبة لي في عرسي وجنب امي..
غانم:قولي راكان متى بيي؟
فهد:راكان الليلة واصل..
غانم:صج..ومتى طيارته؟
الجدة تيي الصالة ومعاها الخدامة..
الجدة:عطيها..
الخدامة:ان شاء الله ماما..
وديمة:شنو هاي؟
الجدة:خذي من يدها..
وديمة(خذت):حق منو؟
الجدة:لج..انت محتاجة فيتامينات..فواكه وماتاكلين..وخضار ماتاكلين..قلت اعصر لج عصير جزر..
وديمة:بس انا مااقدر اشرب عصير جزر..
الجدة:ليش؟
وديمة:جدتي انا مااحب عصير جزر..
الجدة:شربيه علشان خاطري..انت جربي وإذا ماعجباج لاتكملين..
وديمة:بجرب..
خالد(يدخل):السلام عليكم..
الجدة:وعليكم السلام..
خالد:هاج هذي الاوراق اللي بغيتي اطبعها لج..(يقعد)..عصير شنو هذا اللي قاعدة تشربينه؟
وديمة:عصير جزر..
خالد:من وين لج؟
الجدة:انا عاصرت لها اياه..تبي؟
خالد:لاجدتي مشكورة..انا طالع عقب شوي..
راكان وصل الدوحة وعقب السلام والعشاء...راح يرتاح في غرفته ودخل عليه فهد...حصلاه منسدح على السرير والتلفزيون شغال.....
فهد:راقد؟
راكان:لا ..حياك..
فهد(قعد):أقول..
راكان:خير..
فهد:خاطري خالتي كاملة تحضر عرسي..
راكان:ليش ماهي حاضرة؟
فهد:لا..
راكان:ايش دعوة!!
فهد:امي راحت لها البيت وقالوا لها عيالها انها مسافرة..
راكان:معقولة مابترجع؟
فهد:ماادري عنها..خالتي غير عن البقية من اهلنا وجودها وايد مهم في العرس وخاصة وقفتها جنب امي..
راكان:وامي ايش سوت؟
فهد:احس ان امي ندمانة على اللي سوته في خالتي..بس هي ماتعترف ولاتحجى..
راكان:امي دايما جذي..ماتحب تنزل نفسها علشان الناس..حتى لو هي كانت غلطانة..
فهد:من عيونها يبين انها تبي اختها..
راكان:لازم..اختها الوحيدة..
فهد:والحل؟
راكان:ايش رايك نروح لها البيت باجر..
فهد:بس هي مسافرة..
راكان:اوكي اتصل فيها وشوفها وين..
فهد:ألحين؟
راكان:لاطبعا الحين الوقت متأخر..باجر الصبح..



ياترى كاملة بتحضر عرس فهد؟؟

وشنهي الاحداث اللي بتصير عقب عرس فهد..

تابعوني بأحداث جديدة في الفصل الخامس


الرد باقتباس
إضافة رد

حياة ملونة الكاتبة / أميرة الوهج؛كاملة

الوسوم
أميرة , ملونه , النهي , الكاتبة , حياة
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
محطات (19)مع أبو رتيل صمت شامخ ديوانية الاعضاء - متنفس للجميع 1287 26-03-2017 05:50 PM
حياتي عذاب / الكاتبة : تكفيني العبرة ، كاملة sandybill روايات كامله - يتم نقل الرواية هنا بعد اكتمالها 59 05-04-2016 09:01 PM
هذا الغرام يا صاحبي اللي يقولون ؟ و إلا هذي لعبته ؟ / بقلمي ●• نورا بنت فهد •● أرشيف الروايات المغلقة - لعدم إكتمالها 537 30-07-2012 11:20 PM
رواية أميرتي / بقلمي , كامله *خجل* روايات كامله - يتم نقل الرواية هنا بعد اكتمالها 91 27-04-2012 02:43 AM
رواية إنت لمين ؟ / بقلمي قلب يآآسر أرشيف الروايات المغلقة - لعدم إكتمالها 8 31-07-2010 09:35 AM

الساعة الآن +3: 05:25 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1