غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات كامله - يتم نقل الرواية هنا بعد اكتمالها
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 18-03-2014, 04:29 PM
صورة كدوو الرياض الرمزية
كدوو الرياض كدوو الرياض غير متصل
في حضوركك يختلف معنى الحكي ..!
 
11302798202 له ضحكة تنسيني كل الخلق وله اسلوب يضيعني بتفاصيله/للكاتبة :بعثرهَ هَادئهُ ؛كاملة








السلام عليكم ورحمه الله وبركاته
ويسسعد أيامكم بكل خير . .

رواية إماراتيه للكاتبه : بعثرهَ هَادئهُ
له ضحكة تنسيني كل الخلق وله اسلوب يضيعني بتفاصيله









تعديل كدوو الرياض; بتاريخ 18-03-2014 الساعة 04:58 PM.
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 18-03-2014, 04:41 PM
صورة *أمير الرمزية
*أمير *أمير غير متصل
©؛°¨غرامي جديد¨°؛©
 
الافتراضي رد: له ضحكة تنسيني كل الخلق وله اسلوب يضيعني بتفاصيله


يسعدني إني أكون من يرد
على الموضوع إلي بحد ثاته يروي
لنا حكاية
ولكن أقول هدووووووووء قبل العاصفة
مستنين الطرح بفارغ الصبر
تقبلي تحيات أمير


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 18-03-2014, 04:50 PM
صورة كدوو الرياض الرمزية
كدوو الرياض كدوو الرياض غير متصل
في حضوركك يختلف معنى الحكي ..!
 
الافتراضي رد: له ضحكة تنسيني كل الخلق وله اسلوب يضيعني بتفاصيله



~




" الفصل الأول "





دخل البيت و الهم جاثم ع قلبه مشى و عينه ع الارض ما يبي تبان دمعاته . . وقف فوسط الصاله رفع عينه شوي شافها نايمه على الغنفه بكل براءه و طفوله خذ نفس لما حس انه الهوى بدا ينفذ . . طالع بطرف عينه سواد قاعد بعصا بلع ريجه حالته ما تسمح له يسمع منها أي رمسه تجدم كم خطوه و شل الصغيرونه عن الغنفه القديمه و سند راسه ع كتفه و حوطها بيدينه . .
حرمه ابوه : لا عاد تعاود ماابي اشوف ويهك و لا ويه ها الياهل
طلع من البيت القديم و هو مخنوق اليوم خلص غزى اخوه و حرمته و ما بقى بعدهم غير ها البنت بعمر خمس سنين شو يسوي وياها ما يعرف كيف يتعامل وياها !! كانت معامله وياها دلع و حب و لعب . . بعمره ما اكلها و لا رقدها و شربها ولا سوى لها شي !! خذ نفس و طلع من البيت و ركب سيارته المستعمله و رقدها ع السيت الوراني و تحرك من جدام البيت ساير بيت اخوه الله يرحمه ماشي مكان غيره يسكن فيه هو و بنت اخوه " فواغي " . . دخل البيت و هو شايلنها بين ايدينه بيت هب قديم بنى من ست سنين بس بسيط بطابق واحد فيه غرفتين و صاله و ميلس و مطبخ . . دخل حجرتها و سدحها ع سريرها الطفولي و طلع انسدح ع غنفه فالصاله و حط ايده ورى راسه . . باجي له سنه فالجامعه ما بيفرط بها و بيكمل الشغل اللي كان يشتغل به فليل مثل قبل عشان يصرف ع عمره و ها المره عنده شخص ثاني يصرف عليه . . قام دخل المطبخ و جيك ع اغراض صح ما يعرف يطبخ بس يروم يدبر عمره بس الصغيرونه لازم تاكل اكل زين بس . . في مشكله ! فالنهار بتكون فالروضه بس فليل وين بتكون و عند منو بتكون ؟! توتر شو يسوي !! فز اول ما سمع صوت صياحها ركض لحجرتها وفتح الباب شافها يالسه ع سريرها و ايدها ع عينها تقرب منها و يلسها فحضنه . .
عُمر : ليش تصيحين بابا ؟!
طالعته ببرائه : يوعانه
توتر ما عرف شو يسوي شلها و طلع راح المطبخ و يلسها ع الكرسي اللي فالمطبخ و طالعها : شو تبين ؟!
حركت ريلها فالهواء و طالعته : كورلنفلكس
ابتسم شي سهل جدا . . دور فالكبتات و حصل الكورلنفلكس و طلع الحليب من الثلاجه و بثواني كانت طاسه الكورلنفكس جدامها بس ما كلت
عُمر : انتي قلتي تبين ؟!
فواغي : بس هذا هب طاسطي
عُمر : وين طاستج !!
فواغي : لونها احمر
دور فالكبتات عن الطاسه اللي تباها و نقل الكولنفلس من ها الطاسه ل الطاسه الحمره و ياب قبشه حمره و حطها جدامها و بدت تاكل بهدوء و هي تجب عليها من الحليب و من خلصت شلها وداها حجرتها . .
فواغي : ابا اتسبح
طالعها ستغرب ياهل يطلب يتسبح !! : من متى ما تسبحتي !!
مدت ايدها ع رقم اربعه تنهد اكيد محد اهتم بها ب الثلاث ايام بس توهق هب معقوله يسبحها !! يحس باحراج . .
عُمر : فواغ ترومين تتسبحين بروحج !!
فواغي هزت راسها بهيه . . مشت فتحت درج من ادراجها و طلعت ملابسها و دخلت الحمام و طلب منها ما تقفل الباب . . ابتسم و هو يحس بشويه راحه تم يالس فالحجره لين ما ظهرت فواغي من الحمام و هي لابسه ملابسها و شعرها مبلل ماي مشى صوبها و مسك الفوطه و نشف شعرها و مشطه و تم يالس يتاملها بهدوء . . بعده تايه ما يعرف شو يستوي قام اول ما سمع صوت الجرس فطلع من البيت و فتح باب الحوش . . شاف ولد بكبره تقريبا مبتسم و بيده حافظه متوسطه الحجم . .
مد ايده يسلم : وياك عبدالله ولد جارك
عُمر ابتسم : هلا انا عُمر
عبدالله ابتسم : شفتك كمن مره ظاهر من ها البيت و عرفت انك اخو عامر الله يرحمه
عُمر : هيه انا اخوه
عبدالله : الله يرحمه و يرحم حال ها البنت . . اسمع يا اخوي متى ما بغيت تقضي لك مشوار طرش فواغي صوبنا البنات بيهتمن بها و غداكم يوصلكم
عُمر انحرج : لا تكلفون ع عمركم بندرب عماررنا
عبدالله : والله لتسوي اللي اقولك عليه نحن جيران
عُمر : ما اعرف شو اقولك بس مشكورين
عبدالله ابتسم و سلمه الحافظه و راح و دخل عُمر البيت شاف فواغي يالسه فالصاله مشى صوبها و مسك ايدها و دخلوا المطبخ ياب صحون و فتح الحافظه كان " مجبوس دياي " و قبل ما ياكلون طلبت منه فواغي صحنها الاحمر و فهم انه لها طقم صحون اكل خاص فيها بلون الاحمر و غرف لها و لعمره و بدا ياكل و هو كل شوي يتاكد اذا تاكل و لا لا . . و غسل الصحون و شلها يلس فالصاله و فتح التلفزيون و هي ساكته . .
عُمر : فواغ حبيبتي من اليوم و ساير انا و انتي بنعيش مع بعض
طالعته : ليش .!
عُمر ابتسم : لازم جذا حبيبتي
فواغي : يدووه قالت ماما و بابا راحوا عند الله و ما بيرجعون
عُمر بغصه : هيه عشان جذا بنعيش مع بعض
فواغي : بترقدني عندك . . !!
عُمر : هيه
فواغي : و بتقرالي قصه !!
عُمر : هيه
فواغي : بتوديني الروضه !!
عُمر : هيه بسوي كل شي تبينه حبيبتي
فواغي : انزين
قامت يلست فحضنه و تابعت الرسوم اللي ينعرض ع التلفزيون و المكان هادي . . وبعد ما خلص الرسوم قامت دخلت حجرتها و طلعت بيدها دفتر و اللوان حطتها ع الارض و سحبت عُمر ويلسته ع الارض و فتحت دفتر التلوين و طلبت منه يلون وياها وسوى اللي طلبته و هو ابد ماله فها الامور بس لون و هو يخبص فاللون و هي كل شوي تنبه انه ها اللون ما يناسب الرسمه لين ما اخر شي شلها و دغدغها و هي تصارخ و تضحك
عُمر : انا تعلميني كيف الوان هااا
فواغي صرخت : عُمممممممممممر هههههههههههه
شلها و رقدها ع صدره و باسها ع راسها : الله يقدرني و اسعدج اوعدج اوعدج اني اسعدج
فواغي : عُمر تعال
قامت عنه و سحبته لحجره امها و ابوها و يلست عند السرير و طلعت كرتون جيبس و هي تضحك و هو ضحك وياها و بدوا يفتحون وياكلون بس من شافها تفتح الجيبس الثالث منعها و طلعو من الحجره . . و ع العشا سوا لها سندويجات جبن و طماط و اكتفى بها العشى و شلها ودها حجرتها و هي بدلت لبست بجامه عليه صوره باربي و سدحها ع السرير و طلبت منه انه ينام عندها و يقولها قصه و قعد يألف و يألف لين ما حس انه هي ملت و نامت و نام وياها ع نفس السرير الصغير . .

رن المنبه و قام و قومها راح صلى و بدل ملابسه اللي محطوطه فحجره فواغي و هو مقرر ما يستخدم حجره اخوه . . يلس ع الارض و هو يدور ع قميص و التفت لما حطت فواغي ايدها ع ايده المعضله
فواغي : ايدك كبيييييييير
ضحك عُمر : عندي عضلات
فواغي : شو يعني ؟!
عُمر : يعني انا قوي
ابتسمت و هي تلمس غضلاته اللي حسته شي حلوو بس تذكرت هي ليش يت عنده و لفت و هو سكر سحاب لبس الروضه الوردي اللي واصل لفوق الركب تحت شورت وردي اقصر من البس نفسه و طلبت منه يسوي لها ارنوبه فشعرها و هني توهق ما يعرف !! يعرف كيف شكله بس ما يعرف اذا بيقدر و لا لا و بعد معانى سوا بس ما كان بنفس المتسوى فضحك . . فواغي طالعت عمرها فالمرايه و مدت بوزها و صاحت
عُمر : لا لا حياتي لا تصيحيين الله يخليج خلاص بعدله
ورد فتحته و سواه اكثر من ثلاث مرات لين ما ضبط و سوى ريوق بسيط له و هي كرولنفلكس و شلها و طلع من البيت و قفل الباب . . شاف عبدالله وياه بنت صغيره بنفس لبس فواغي
عبدالله : صباح الخير
عُمر ابتسم : صباح النور
طلع من البيت شاب مراهق يملى ويهه خدوش قديمه صبح و سكت بس اللي فاجأه عُمر صياح فواغي اول ما شافته حاول يسكتها بس ماشي فايده لين ما اختفى المراهق و سكتت
عبدالله ابتسم : شي طبيعي هذا مسبب حتى الرعب لعيالنا
عُمر ضحك و بعدها تنحنح : عبدالله
عبدالله : امر !!
عُمر : ما يامر عليك ظالم . . منو بيمر اختك الصغيره .!
عبدالله : الاهل بيمورنها جان تبا بياخذون فواغي وياها
عُمر : ياريت محاظرتي لساعه خمس
عبدالله ابتسم : ولا يهمك لا تشيل هم جان تبى بوصلها احينه بعد
عُمر : لا لا بس . . بعد الجامعه عندي شغل لساعه 10 ادري بثقل عليكم
عبدالله : و لا يهمك يا ريال لا تشيل هم توكل
عُمر : تسلم تسلم
مشى و ركب سيارته و وصل فواغي للروضه و هو يخبر المديره عن موت ابوها و امها و انه عمها الوحيد و خبرها انه حد ثاني بي ياخذها ويا بنت صغيره بس المصيبه انهم طلبو اسم البنت الصغيره و ما عرف !! فبيطر يظهر من الجامعه يطلعها و يوديها لبيت جيرانهم . . طلع من الروضه بعد ما عطى فواغي مصروفها و راح الجامعه . . ما تكلم مع احد كل همه دراسته و فواغي اللي بدا قلبها يخاف عليها و عقله يفكر فيها حس نفسه انه صدق ابوها بعد ها اليوم اللي عاشه وياها بتفاصيله حس بشعور حلوو البرائه بالنسبه له شي مفقوده فحياته و قبل وافاه اخوه كان يزوره فالوينكد و يشوف فواغي شوي و ما يتخلط وياها بس احينه بتصير جزء من حياته . . ساعه 12 بالضبط كان جدام الحضانه يتريا فواغي تتطلع و طلعت ويا البنت الصغيره و الابله طالعهم و طلبت منهم يهدون بعض و يروحون لاهليهم و شافت بنت متغطيه كلها بالسواد تكلم الابله فتجدمت شويه . .
ابله : ها وصل ولي امرها
تنحنحت البنت : اخويه انا اخت عبدالله يايه اخذ فواغي ويا ميثا
عُمر نزل عينه و عطى نصه لها : تسلمين . . " نزل لمستوى فواغي " حبيبتي روحي ويا ربيعتج و خالوو انزين انا بعدين بي اوك قلبي !!
لوت شفايفها كنتبيه للصياح فحضنها بسرعه : حبيبتي بي باخذج بعدين انزين خليج مؤدبه و العبي و يا ميثا اربيعتج اوك حياتي
بعد عنها بسرعه و ركب سيارته و حرك لجامعه . . طالعت فواغي السياره لين ما اختف و دخلت بنوبه بصياح و موزه تسحبها دخلتها السياره هي و ميثا و ساقت للبيت و نزلتهم و فواغي تشهق كانت اول مره تتدخل بيتهم صح هم جيران بس ام فواغي ما كانت تختلط واايد ويا حد . . بس هم يعرفون ابو فواغي لانهم يشوفون بعض فالمسيد و مرات جدام البيت . .
موزه : نوره نوره تعالي
طلعت نوره : هلا
صرخت اول ما شافت فواغي : يااااقلبي منو ها القمر
موزه ابتسمت : فواغي بنت جيرانا
نوره مسكت ايد فواغي : ياقلبي عليها تجنن شوفيها تخبل
ام عبدالله : سمي بالله . . ماشالله عليها
موزه : قومي قومي حطي لهن غدا
تمت فواغي بلبس الروضه و ميثا يالسه عندها تلعب وياها و نوره يالسه عندهم مستمتعه بتاملها لهم و تلعب وياهم . . و ع العصر طلبت من اخوها المراهق طارق يروح يشتري للصغار حلاوه و من شافت فواغي طارق بدت نوبه صياح خوفا منه بس هو عند و شلها وياه تحت اعتراض الكل و هي تصيح
طارق : بس يا بنت تراني هب جنننني انا ادمي والله
لعب بخدها و خشمها و شعرها لين ما سكتت و وصل الدكان اشترى الحلاو و عطاها اياها و تمت ساكته و هي تمص المصاص لين ما وصلو البيت . . تمت فواغي يالسه وياهم لين الساعه تسعه و رقدت من التعب و ع ساعه 10 وصل عُمر و خذ فواغي و اعتذر منهم و خذ رقم عبدالله لانه احترق اليوم و هو يبي يعرف اخبار فواغي . . سدحها ع سرير و بدلت ملابسها بعد ما اقنع نفسه انها لابسه ملابس داخليه وماله لزمه ينحرج و ها الشي بعد الاحراج عنه و لبسها بجامتها . . قام طلع شنطه صغيره حط فيها كمن لبس لفواغي لانه عبدالله قاله يحط لها ملابس و يعطيها لعبدالله الصبح لانه ما ينفع تم بلبس الروضه طول اليوم . . خلاف قام كل له شي خفيف و تسدح عندها ع السرير و لمها لصدره و رقد . .


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 18-03-2014, 04:51 PM
صورة كدوو الرياض الرمزية
كدوو الرياض كدوو الرياض غير متصل
في حضوركك يختلف معنى الحكي ..!
 
الافتراضي رد: له ضحكة تنسيني كل الخلق وله اسلوب يضيعني بتفاصيله


~




" الفصل الثاني "




نفس البنت نايمه ع السرير بس السرير تغير و اثاث الحجره غير و هي متغيره صايره اطول و شعرها لنص ظهرها . . ابتسم و هو لابس بجامته قرب منها و قومها ف فتحت عيونها الواسعه برموش كثيف و بثواني حضنته و حبته ع خده . . صارت بنت ب 11 سنه صايره كل شي بحياته بدا تجارته بعد ما خلص الجامعه و استخدم ذكائه و هذا هو يصعد . . البيت تحول اثاثه لشي راهي و هي تتمتع بكل شي حولها و لين احينه ينام فحجرتها بس كلن له سرير و لين اليوم تاكل كورلنفلكس الصبح . . بس شخص زاد وياهم " ام رامي " مربيه فواغي حرمه فالاربعين تهتم فيها و تكون وياها فوقت غيابه و تهتم بالاكل و خدامه ثانيه تنظف و تكنس . . طلع من الحجره و هو لابس كندوره و غتره و عقال و يلس فالصاله تعود يتريق و هي جدامه يتصبح فويهها و يمسي فيه . . و بعد ثلث ساعه طلعت فواغي من حجرتها بلبس الابتدائي الرصاصي و شيله بيضه ع جتفها و شعرها مربوط بشكل ذيل و شنطه بلون السكري بيدها . . قام شلها بين ايدينه و هي تضحك و حطها ع الكرسي و يلس تريق و هي تتريق بهدوء تام . . ركب سيارته اللي غيرها بسياره بمديل يديد و وصلها المدرسه يفكر ع بدايه سنتها اليديده ينقلها مدرسه انجليزيه بما انه له امكانيه و راح لشركته الصغيره . . بدا بتجاره فالعقارات و لين احينه و يفكر يفتح مشروع مجوهرات و يكون له شركه و ماركه خاصه . . مسك قلم الحبر الاسود و كتب ع ورقه بيضه بخط حلوو " فواغ " ابتسم بتكون هاي الماركه دلعها . .
و ع ساعه 2 طلع من الشركه و راح لمدرسه فواغي خذها و خذ بنت الجيران ميثا اللي لين احينه ملازمه فواغي و ربيعات . . بدت فواغي تقص له الاحداث اللي صارت فالمدرسه و هو يضحك و متحمس وياها لين ما وصلو البيت و نزلوا وصل ميثا لباب البيت و ماراح لين ما ظهر حد و خذها و دخل البيت و فواغي وياه . . تغدوا و رقدت فواغي فالصاله و هو يلس يطالع التلفزيون بصوت واطي . . تذكر بعد شهر من يلستهم مع بعض يو اهل امها يبون ياخذونها تخبل و حس بوحده غريبه حتى قبل ما ياخذونها حاول يقنعهم انه اتم عنده بس رفضوا لانه عزابي و صغير ع مسؤوليه بنت صغيره و خذوها عنه و ما صار يومين الا وهم مرجعين فواغي اللي ما جفت دموعها ع فراقه و طروا يخلونها عنده و صاروا يزرونها و ايبون وياهم بنت بعمرها تقريبا تصير بنت خالتها و لين احينه ها الزياره . .
ام رامي : ابني عُمر
التفت لها عُمر : خير .!
ام رامي : قبل ساعه اجى حدا يسأل عنك
عقد عُمر حواجبه : منو ؟! خبرج ؟!
ام رامي : أل انوو اخوك
انتفض عُمر اخووه !! شواللي يابهم بعد ها السنين ليش يسألون عنه ؟! : ما قالج شو يبى ؟!
ام رامي : لا يا ابني ما أل شي بس سأل عنك و أل انوو راح يجي مره تانيه طلب مني مكان شغلك بس تحججت انو ما بعرفو
عُمر : زين تسوين موول لا تعطين حد عنوان شغلي و لا تلفوني هب كل من قال انا اخوو تصدقين
ام رامي : حاضر
صارت الساعه خمسه قام عشان يقوم فواغي بس تفاجأه بويهها المحمر حط ايده ع يبهتها تخبل اول ما حس بحرارتها مرتفعه بسرعه راح ياب مفتاح سيارته و ينادي ام رامي . . توتر و خاف شلها بسرعه و حطها فالسياره و ام رامي وياه راح المستشفى و هو مسرع و دخلها لقسم الطوارئ . . صح حراره لكنه يخاف عليه حتى من نسمه الهوى و هاذي هب اول مره اتيلها حراره بس يخاف . . يخاف تودره تم واقف جدام غرفه الكشف فقد اعصابه و الدكتور ما ظهر لين احينه و ام رامي تحاول تهدي و تقوله انه شي بسيط بس ما هدى لين ما خبره الدكتور انها بخير و حراره بسيطه مع الادويه لمده خمس ايام يروح فشلها رجعها البيت و تم يالس فوق راسها . . بس قطع عليه لما خبرته ام رامي انه رجع نفس الريال يسأل عنه فطلع له و تفاجأه انه صدق اخو من ابوه ضيج عيونه و هو يسأل عمره عن ييته بعد ها السنين و طردهم له و لبنت اخوه بس حب يسمع منه و ع اساس كلامه بيحكم . .
حمدان : شحالك و شحال بنت اخوي ؟!
ابتسم بسخريه : بخير عايشين الحمدالله
حمدان : قطعت عنا سنين و لا سألت
عُمر : انتو ما بغيتوني فحياتكم و انا ما احب افرض نفسي
حمدان : لا منو قال تعال و فواغي هاتها جان تبى بنخليها عنا اذا كنت مشغول
عُمر : شو تبا بالضبط ؟!
حمدان : ما فهمت !!
عُمر : حمدان تذكر لما يتك و قلت ابي حد يهتم فيها شو قلت !! " صرخ " قلت بنت اخوك و انت دبر عمرك بها قلتلك يا اخوي انا عزابي و ما افهم فها الامور قلت هاذي بنت اخوك و مالنا خص فيها احينه ياي تقول هاتها بعد شو !! خلاص و انا و فواغي مدبرين عمارنا المربيه عندها ما ابي مساعده حد
حمدان : كل ها شايل فقلبك !!
عُمر : واكثر اسمع جانك ياي ترجع كل شي مثل ما كان فهذا مستحيل اطلعو من حياتنا ما عاد نبا نشوفكم اللي يانا منكم يكفينا توكل
قام حمدان و طلع يعرف اكيد سمعو عن شركته الصغيره و يبون شي منها . . حس بألم هو صدق وحيد و ماله حد غير رب العالمين و فواغي الصغيره قام راح لها لانه من يشوفها ينسى همومه بويهها الطفولي . .




الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 18-03-2014, 04:53 PM
صورة كدوو الرياض الرمزية
كدوو الرياض كدوو الرياض غير متصل
في حضوركك يختلف معنى الحكي ..!
 
الافتراضي رد: له ضحكة تنسيني كل الخلق وله اسلوب يضيعني بتفاصيله


~




يتبع للفصل الثاني





كبرت فواغي بدا صوتها ينعم اكثر . . صايره هاديه و انسانه خجوله نوعا ما صايره تحط لمستها فالبيت بالترتيب و مساعده ام رامي فالطبخ و الاهتمام بعُمر و انقلب كل شي صارت هي اللي تهتم فيه و هو مثل الطفل لكن من يكون فالشغل يكون مثل الاعصار اللي يقرب منه يشله و يكسره لانه بدا شغله فالمجوهرات بماركه " فواغ " بدا بتصنيع مجوهرات من الاحجار الكريمه بتصميمات يديده و تصيميم الذهب و الفضه و الالماس . . صارله سنتين على ها الشغل و الدخل زاد و ديونه بتخلص يحس براحه و ويهه فواغي خير عليه يمكن لانها يتيمه و هو اهتم فيها . . ابتسم لما شافها ماشيه و بيدها الفون ترمس ربيعها
فواغي : ميثاني اسمعي انتي تعالي بيتنا و بدرسج
..
فواغي : ياربي منج شعليج من عموور هو فحاله و نحن فحالنا
..
فواغي : ع اقل هو واحد انتي عندج اثنين و انا استحي منهم واايد و بعدين خواتج يعني بيتكم ماشالله ممزور تعالي عنا ومحد بيزعجنا و بعدين عُمر شبيشوف فيج هااا تراج شرا بنته
..
فواغي : ههههه بالعكس انتي تجننيييييين يا عمري يلا تعالي و بلا استهبال . سلام
عُمر : بنته هاا !!
ضحكت نعومه : عشان تسكت و تي
عُمر : انا بظهر
فواغي مسكت ايده : اذا عشان ميثا والله ما تظهر اذا ما بتيب حد الميلس بنفقعد فالميلس مثل كل مره
عُمر : لا محد بي خذو راحتكن
باسته ع خذه و قامت تبدل ملابسها و اول ما دق الجرس راحت الخدامه تفتح الباب و فواغي فتحت باب الميلس ويلست هي و ميثا عشان تشرح لها درس بالانجيلزي لانه فواغي فمدرسه انجليزيه و شاطره فيه . .
ميثا : يختي خلي عمج يدخلج مدرستنا
فواغي : ما ابي اعترض ع شي هو يباه و بعدين الانجليزي احسن لي يعني واايد تحسنت فاللغه و فوق هذا نتعلم فرنسي شوي شي حلوو
ميثا : والله بتسانسين عنا كلنا جذا شله و حركات و هبال و عبط
فواغي بنزعاج : ما احب ها السوالف فالسكول السكول للدرسه هب للعب
ميثا : اوووف تكلمت فيسلوفه زمانها اسكتي و فهميني ابي الحق ع المسلسل
ضحكت و كملت لها شرح الدرس و طلعت ع اذان المغرب و قامت فواغي دخلت حجرتهم و صلت و بدت تذاكر دروسها بكل تركيز عشان تروح تساعد ام رامي فالطبخ . . اندق الباب و سمحت بالدخول بدون ما تلتفت عرفت انه عُمر من ريحه عطره شوي و دخل الحمام و طلع و هو لابس قميص و بنطلون قطني مريح
عُمر : ابي اخذ رايج بشي
ابتسمت و رفعت راسها : امر
طلع من شنطته العمليه اوراق و رواها اياهم كانت عباره عن رسمات لمجوهرات و ملونه و كان الشعار معلق بشكل صغيره ع طرف السلسال و الاسواره باسم فواغ بالعربي بخط حلوو . . عيبها التشكيله اليديده
فواغي : واااايد حلوو خصوصا الطقم الفيروزي
عُمر ابتسم : اول صنع بيكون لج
فواغي : لا لا خلي لغيري تستفيد منه
عُمر : قلت لج يعني لج

مرن كمن شهر و دخلت فواغي 15 سنه و اول ثانوي . . حسم قراره بعد ما حسب الميزانيه و ضبط كل شي و ما بقى غير انه يشاورها ع اللي ناويه عليه هو تغير ها البيت البسيط لقصر اسطوري و فعلا هذا اللي ناويه عليه و بعد ما خذ منها الموافقه بدا بشغله بما انه الارض هاذي بروحها بتكون صغيره بالنسبه للقصير اللي يبي يبنيه فقرر يشتري الارض اللي ينبها لانه فواغي طلبت منه انها ما تظهر من ها الفريج . . و بدا تخطيط . . و طول فتره البناء بيكونون فشقه ملك له شقه كبيره فيها حجرتين و صاله و مطبخ و كل شي واسع و انفصلو كل واحد فحجره . . و بدا بمشروع الثاني اللي هو " زواج " وده باشخاص ثانين يملون عليه البيت يعرف انه فواغي فيوم بتروح و بتتزوج و بتودره ليش ما يحصن نفسه من احينه قبل ما يعيش الوحده . .
فعلا تزوج من وحده من بنات التجار اللي يعرفهم و كان شرطه " فواغي " بنت اخوه تكون وياهم و فتره شهر العسل اللي كان بالنسبه له شهر قلق ع فواغي اللي كانت فبيت خالتها . . كان دايم الاتصال بشكل مفرط و " مزنه " حرمته بدا ها الشي يضايقها بس تتحمل لانه انسان حنون و طيب و ها الشي كان يشفع لكل تصرفاته . .




الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 18-03-2014, 04:59 PM
صورة كدوو الرياض الرمزية
كدوو الرياض كدوو الرياض غير متصل
في حضوركك يختلف معنى الحكي ..!
 
الافتراضي رد: له ضحكة تنسيني كل الخلق وله اسلوب يضيعني بتفاصيله


~




" الفصل الثالث "




وعيت حسيت بصداع مؤلم . . قمت بثجل من سريري المغطى بشرشف من المخمل بلون السماوي ورحت الحمام تسبحت بماي بارد و طلعت بروب الحمام وقفت جدام المرايه و سحبت البدي لوشن و دهنت به ريلي و ايدي و حطيت كريم واقي للشمس ع ويهي و شسورت شعري المبلل و رحت بدلت لبست برمودا بيضه ساده و قميص سماوي نص كم و رفعت شعري بشكل عشوائي و تعطرت و لبست سلسالي من عُمر مكتوب " فواغي " و النقط عليه حجر فيروزي ابتسمت و انا اتلمسه كانت هديه بسيطه لي البارحه لاني تخرجت من الجامعه بتخصص علم الاجتماع و سوا لي حفله لا صارت و لاستوت و شرالي موتر يديد واااه فديت ها العُمر انا . . هممم افكر اخذ بكلوريوس فعلم الاجتماع بخبر عُمر و بشوف شو بيقول و ما اظن يعترض ابدا . . لبست نعال سماوي و نزلت تحت كانت الساعه ثلاث الظهر سمعت اصوات عيال عُمر تحت نزلت ع الدرج الحلزوني بخفه و مشيت فالممر و دخلت الصاله الكبيره الرئيسيه شفت ناصر و جاسم التوأم يلعبون هم بعمر ست سنوات اما فواغي الصغيرونه بعمر الثلاث سنوات يالسه تلعب بروحها بلعبتها يااقلبي عليه تجنن ها البنوته . .
. . : مسا الخير
فزيت و حطيت ايدي ع قلبي : الله يسسسامحك
ابتسم عُمر و باسني ع راسي : جيف امسيتي ؟!
ابتسمت : الحمدالله . . همم يوعانه بتتغدى ويايه و لا بتتريا مزنه
عُمر حط ايده ع جتفي : ما بفوت الغدا وياج يالغاليه . . حبايبي تغديتو ؟!
جاسم و ناصر : هيييه
فوفو " فواغي الصغيره " تقلدهم : هيييه
راح عُمر صوبها بحركه سريعه و شلها و فرها فالهوا و مسكها مره ثانيه و هي تضحك يا قلبي فديت ها البنت يا ناااس . . رحت طلبت من الخدامه تحط الغدا و رحت لغرفه الطعام كان عُمر قاعد و فوفو فحضنه يلاعبها ابتسمت يا حبه للصغار رحت يلست و الصداع يداهني و يتحكم فيه اووف اكره الادويه ماابي اخذ مسكن . . مديت ايدي للسلطه بس الصداع سد نفسي عن الاكل فودرت السلطه و شليت فوفو عن عُمر
عُمر : ليش رديتي السلطه ؟!
كشرت : مالي نفس راسي يعورني
عُمر ودر القبشه و الشوكه و تنهد : لا تذبحين عمرج قومي خذي مسكن
مديت بوزي : ما اعرف ابلع حبوب
عُمر ضحك مثل كل مره : صدق يااهل روحي اطحنيه و حطيه فالماي و اشربي
: يييع تعرف انه طعمه خاايس مرررر
عُمر : هذا الحل الوحيد قومي يلا ترى اكره ما عندي لما تنسد نفسج عن الاكل قومي
حركت حواجبي بالرفض . . و هو كمل اكل ادري بيسوي اللي براسه بس لا يييع مرتين سواها فيني لما ذبحني الصداع مره و كان عندي امتحان جبرني اشرب الماي و البندول مطحون داخله ياارباه كرهت الادويه و ثاني مره لما كنا ظاهرين للبر و ياني صداع و نفس الحاله شربني غصب . . من شفته قام على طول شليت فوفو و رحت يلستها فالصاله و ركضت لحجرتي و قفلت الباب و ضحكت بتصير معركه ههههههه . . و بعد دقيقتين اندق الباب و كان عُمر طبعا . .
عُمر : فتحي
: نو نو مستحيل ما باخذه عموور والله راسي يعورني مالي بارض للمعارك بلييز
عُمر : فتحي
: ابدا
عُمر : بنظهر و بتسانس يلا فتحي
بنظهر !!! وااا كان شي خيالي بالنسبه لي ما تصير وااايد بسبب اشغال عُمر على طول فتحت الباب و شفت القلاص اللي بيده كان ماي متحول للون ابيض مثل الحبيبات مد لي و ابتسامه ع شفاته . . يارب ساعدني اشربه مديت ايدي حسيت معدتي بدت تقلب عليه انتهت لجاسم اللي ماسك قلاص ماي و ناصر ينبه يترقبون اني اشرب الماي اللي بيد عُمر لانه ها الموقف بالنسبه لهم ممتع و هم يشوفوني اشمئز و تبدا حركات بعد ما اشرب الماي الابيض ع قولتهم . . حطيت شفايفي ع القلاص بس لااا ما اروم اهئ اهئ ياريت اقدر ابلع حبوب ياربي شو الحاله مافي شي ثاني اووف و بسرعه رفعت القلاص و شربته كله و حسيت اني برجع و طعم المراره فحلجي و حركت ايدي فالهواء و طلعت لساني من طعمه الخايس و بسرعه شرب الماي اللي بيد جاسم و هذا كله تحت ضحكات عُمر و التوأم . .
طالعته : يلا وين بنظهر ؟!
عُمر : المكان اللي تبينه
: ماابي خلنا نقعد فالحديقه برع و نغير جوو
عُمر ابتسم : اوك
و نحن نازلين شفت مزنه شاله عامر الصغيرون بين ايدينها بعمر السنه رحت شليته و نزلنا تحت . . طلع عُمر اول شي نبه الزراع انه بنقعد فممنوع انه يقرب من الباحه الاماميه للقصر و طلعنا يلسنا ع الكرسي و شوي قمت لعبت و يا الصغار احس اني استرجع ايام الطفوله ويا عُمر لما لعبنا و ضحكنا فالبيت القديم . . ايام صدق حلووه اذكر ايامي وياه و البعض احسه شرا الحلم لصغر سني آآآه اتمنى تنعاد والله ما بندم اني عشت ويا عُمر . . قررو التوأم انه تلعب كروروك " لعبه الشرطي و الحرامي " و انا طبعا الشرطي و لازم الحقهم غمضت عيوني عديت للعشر و فتحتها التفت صوب عُمر و مزنه كانو يرمسون و التفت للحديقه انتبت لجسم صغير ورى الشيره مشيت بشويش و مسكته بسرعه كان ناصر ضحك و هو يأشر ع مكان جاسم ضحكت و رحت مسكت جاسم . . باجي فوفو هاي ماشالله عليها ذكيه و تختار مكان عدل تنخش فيه بس اكيد ما بعدت عن الحديقه المشكله جسمها صغير تنخش فاي مكان مشيت ع الزرع و انا ادور بعيوني عليها التفت لعُمر كان يطالع النافوره و مبتسم . . ركضت بسرعه لنافوزه ضخمه اكيد بيغطي حجمها و درت صوب الطرف الثاني من النافوره و مسكتها ههههه . . رجعنا يلسنا و الصغار ياكلون من سلطه الفواكه المحطوطه ع الطاوله و توني احس انه صداعي راح . . يت فكره فبالي فجأه و حبيت اطبقها . .
: عُمر
عُمر : امري .!
: ما يامر عليك ظالم . . بصراحه خاطري اسافر
عُمر ابتسم : تامرين وين تبين تروحين ؟!





الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 18-03-2014, 05:01 PM
صورة كدوو الرياض الرمزية
كدوو الرياض كدوو الرياض غير متصل
في حضوركك يختلف معنى الحكي ..!
 
الافتراضي رد: له ضحكة تنسيني كل الخلق وله اسلوب يضيعني بتفاصيله


~




يتبع للفصل الثالث




: مصر . . البنات يقولون حلوه خاطري ازورها جذا مال اسبوع و اسبوع اللي بعده نروح مكه
عُمر : يااريييت خاطري اروح مكه ان شالله من عيوني افضي عمري ها اليومين و ارتب كل شي و نسافر
مزنه : بس عرس اختي بعد اسبوعين ما اقدر اسافر
عُمر : ليش ؟! تراج تقولين عرسها
مزنه طالعت عُمر : حبيبي هي محتاجتيني و باجي لها اغراض ما خلصتهم لازم اساعدها
عُمر طالعها و تحول ملامحه ويهه لجديه اكثر : عندج خواتج يساعدونها و ها السفره يت فوقتها فبنسافر
بلعقت ريجي ماابي اكون السبب لهوشه : خلاص عُمر هب لازم بنروح بعد عرس أ . .
عُمر قاطعتها : لا بنروح بعد يومين
قام و انسحب ياربي عصب . . الله يسامحج يا مزنه
مزنه : ارتحتي !!
طالعته : ما كان قصدي يت فبالي الفكره
مزنه : انتي تعرفين انه مستحيل يرفض لج طلب خصوصا سفر او شي تبينه يعني تعالي اساليني شاوريني بعدين خبري هب جذا تخبرينه لانه مستحيل يرفض يختي قدري اوف
: خلاص خبرته و بنسافر و اختج عندها خواتج
مزنه : بس بعدهن ما تزوجن ما يعرفن فها الامور
سكتت فجاه و هي طالع وراي بصدمه . . طالعت الارض انتبه لظل طويل و عريض ياااربييي عُممممممر !! ياويلي سمع سمع يارب يارب ما تصير هوشه بسبتي ياااربي
عُمر بجمود : خلاص لا تين انا وياها بنسافر روحي بيت اهلج و ساعدي اختج
مزنه وقفت و سكتت ما قدرت تتكلم وانا وقفت و شفت ملامح ويهه عُمر . . معصب ياربي يعصب اذا الموضوع يعلق فيني و مثل ما قالت ما يرفض لي طلب هي هب سيئه بس طريقه معلامه عُمر لي و تفضيلي ع كل شي يزعجها و ها الشي من حقها بس عُمر جذا شو اسوي يعني هب معقوله ما اقوله شي و احشر عمري فالبيت اساسا هو بيشك لانه تعود كل صيف نسافر و هو بيقترح اذا ما تكلمت و تعودت اني اقوله عن أي طلب ابيه و اساسا نسيت عرس اختها راح عن بالي . . تحرك عُمر و مشى بهدوء ما شفت ويهه مزنه بس تحركت ورى و دخلت البيت . .
: عُمر ليش جذا خلاص مافيها شي بعد العرس بنسافر يميع
عُمر التفت لي : نبهتها عشرين مره ما ترمسج بها الطريقه و هي حضرتها ما هتمت للطلعه اختها اهم مني
: لا عُمر لا تفسر الامور جذا بس تعرف خواتها الباجيات هب معرسات ما يفهن فها الامور
عُمر : دخيلج الا هو كم قطعه ثوب هي معطيه الموضوع اكبر من حجمه جذا ولا جذا بنرجع قبل العرس
مسكت ايده : خلاص لا تعصب والله تخوفني
ابتسم و لانت ملامحه : حبيبتي اسف . . خلاص بعد يومين و ع حسب الحجز بنروح
هزيت راسي و حبته ع خدها و هو انسحب و راح لمكتبه . . التفت لما انفتح الباب و دخلت مزنه و هي شايله عامر تجدمت و مديت ايدي اخذه منها بس رفضت ها الشي بحركه مقصوده
قالت : انتي لو توافقين ع الخطاب و تفكينا من مشاكلج يكون ابرك
صعقتني . . بس لا هب انا اللي اسكت مشيت و وقفت جدامها : اسمعي ترى انا عشت ويا عُمر اكثر عنج و محد يعرفه كثري اوك و انا هب يالسه احرضه عليه عشان تتهاوشون انا بس . .
قاطعتني : اقول تبين تتسبين مشاكل نفس هذيج المره !! يلا صرخي و ارفعي صوتج عشان يسمعج
همست : ما بصغر عقلي بس صدقيني والله اقدر بدمعه وحده اقلب عُمر عليج بس هذا هب طبعي و لا من اخلاقي احترمي نفسج ولا تفرين نغزات انا ماابي اسبب لج و له المشاكل و ماابي عُمر يتألم هب عشانج عشانه بس
التفت و صعدت الدرج رحت حجرتي و انا اذكر ذيج الهوشه الكبيره اللي صارت بيني وبينها و رفعت صوتي و لدهشتي كان عُمر فالبيت و صدق ما كنت اعرف انه فالبيت و سمع كل كلمها و تجريحها لي و صارت ضرابه كبيره لدرجه انها راحت بيت اهلها . . اووف ماابي اتذكر هذاك اليوم تميت اترجى عُمر يرجعها لين ما طاوعني بعد كم يوم و رجعها . . فتحت باب البلوكونه الزجاجي و شيلتي ع راسي التفت لبيت ميثا اربيعت الطفوله حتى هم بيتهم تغير صار فله اكبر عن قبل بطابقين و الفله كبيره و حلووه . . الطابق الثاني لعبدالله اخوها اللي بعمر عُمر و متزوج عنده ولدين اكبر عن جاسم و ناصر و الطابق الارضي عايشين هم بس امها و ابوها و هي و طارق باجي خواتها متزوجات اللي هم موزه و نوره و ماشالله عندهم عيال . .
-
-
وعيت المغرب و صليت الصلوات اللي فاتتني سهرتي البارحه فحفله فواغي تعبتني . . طلعت من حجرتي و يلست ع الارض فالصاله و امايه يالسه ع الارض و ابويه عندها يشربون قهوه و طارق ع الغنفه و يطالعون التلفزيون كان مسلسل بدوي اووف شي يملل مديت ايدي و صبيت قهوه لعمري و شربته بهدوء . . شوي و نزلت حرمه عبدالله و عبدالله وراها سلمو و يلسو و بدت السوالف و طارق انسحب لانه ما يحب يكون متواجد ويا ملك حرمه عبدالله فنفس المكان ها الشي يحرجه اما هي و لا هامنها يعني هم فنفس السن يمكن عشان جذا هب مسبب لها أي احراج !! قمت لحجرتي الوضع مُمل اول ما دخلت كان فوني يرن رحت شليته كانت فواغي . .
ابتسمت : هلا والله
فواغي : هلا بج اخبارج ؟!
: تعبانه بعد حفللللتتتتج
فواغي ضحكت : بس ستانسنا لا تنكرين
: هيه اكيد كانت حلووه
فواغي : الحمدالله
: فيني فضول شو هديه عمج ؟!
فواغي : قلاده من ذهب مكتوب عليه اسمي و حروفه من حجر الفيروزي و مووتر يديد infiniti m56 2011
: تستاهلين فديتج
فواغي : ما تهمني الهدايه كثر ما يهمني انه يكون مستانس
ابتسمت : انزين هب ناويه تمشيني بموترج شويه لو فالفريج لزوم الخقه تتدرين
فواغي ضحكت : طبعا متصله لاني عازمتج ع العشا اذا مسموح
: لا لا شو عشا امزح وياج
فواغي : انا اتكلم جد خذي موافقه اهلج و رديلي خبر اترياج . . باي
سكرت و طالعت الفون هههه . . طلعت من الحجره و رحت يلست فالصاله . .
: ابويه فواغي عازمتني ع العشا بنظهر نتعشا و برجع ممكن ؟!
ابويه : روحي بس ديروا بالكم انزين
ابتسمت و حبيته ع راسه : لا توصي
لانهم يعرفون فواغي و عُمر و كيف طبيعتهم مسموح لي اظهر وياها بروحنا و طبعا ما نتاخر عن الساعه تسعه فقمت اتصلت بها و ع ساعه سبعه بتكون جدام بيتنا لانه بنتعشا مبجر و يمدينا ناخذ راحتنا فالعشا و نرجع ساعه تسعه حتى عمها ما يسمع لها تتاخر عن ساعه تسعه . . اخترت لي بنطلون جينز ازرق و تيشرت ابيض عليه رسمه من جدام و لبست عبايته مسكره تتطريزها ابيض و ما حطيت شي ع ويهي كالعاده و لبست شيلتي و شليت شنطتي البيضه و لبست نعال مسطح و ظهرت ستأذنت و ظهرت و انا اسمع صوت هرن الموتر . . طلعت و يلست فالمقعد الامامي و سلمت عليه كانت رافعه غشوتها ولابسه عبايه بكم واسع تتطريزها اسود عُمر ع قد ما معطيها حريه فالروحه و الييه بس شاد عليها فاللبس برع يعني عبايه مسكره و تتطريزها اسود لازم و لازم تكون مغشيه و احس ها الشي حلوو معني ما التزم بالغشوه و لا العبايه السوده بس عبايات الظهره مالتي هب ملفته للنظر . . ظهرنا من الفريج و رحنا لمطعم ايطالي و طلبنا غرفه مسكره كالعاده و يلسنا و طلبنا . . بعد عشر دقايق وصل الطلب و فواغي رفعت غشوتها و بدينا اكل . .
فواغي : انزين شو ناويه تسوين بتشتغلين ؟!
بلعت اللقمه : هيه بقدم ع شغل فمدرسه
فواغي : أي مرحله بدرسين ؟!
: ابتدائي كبدايه و انتي ؟!
فواغي : افكر اخذ بكلوريوس بعدين بفكر فالشغل
: خير ان شالله
فواغي ابتسمت : ايواا و اخبار امج و ابوج و ملك ؟!
: كلهم بخير الحمدالله يسلمون عليج
فواغي ابتسمت : الله يسلمهم
وقفت اكل لاني اكتفيت احس اذا كلت اكثر بنفجر . .
فواغي : بنت كلي خلي ها ع العظم يتغطى
ضحكت : مافيني والله ما اقدر بس شبعت
فواغي : انتي المفروض تمتنين صدقيني شوفي ويههج زيدي من جرعات الاكل شوي
: صدق ما اقدر و بعدين انا مقتنعه اخاف امتن شوي و شوي شوي اصير دووووبه
ضحكت فواغي و شوي و خلصت اكلها هي ما تحس انه اكلها اقل مني بس هي بطيئه فالاكل بس هي تاكل اكلات صحيه و جسمها حلوو ماشالله متناسق غيري انا اللي اذا مر يوم كامل عادي ما اكل شي اذا محد نبهني . . حاسبنا و ظهرنا كانت الساعه ثمان ونص و تحركنا للبيت . .


ملاحظه : سالفه البندول المطحون فالماي ترى شفتها يسوينها هب تقولون بلاها بعثره خرفت ههه





الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 18-03-2014, 05:06 PM
صورة كدوو الرياض الرمزية
كدوو الرياض كدوو الرياض غير متصل
في حضوركك يختلف معنى الحكي ..!
 
21302798094 رد: له ضحكة تنسيني كل الخلق وله اسلوب يضيعني بتفاصيله


اقتباس:
المشاركة الأساسية كتبها *أمير مشاهدة المشاركة
يسعدني إني أكون من يرد
على الموضوع إلي بحد ثاته يروي
لنا حكاية
ولكن أقول هدووووووووء قبل العاصفة
مستنين الطرح بفارغ الصبر
تقبلي تحيات أمير


ياهلا ومرحبا
سعيده بردك أخوي وإن شاءالله الروايه ترتقي لذوقك ؛
نوورت . . .





الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 18-03-2014, 05:27 PM
صورة The flower princess الرمزية
The flower princess The flower princess غير متصل
©؛°¨غرامي ذهبي¨°؛©
 
الافتراضي رد: له ضحكة تنسيني كل الخلق وله اسلوب يضيعني بتفاصيله


بدايه رائعه

بانتظار البارت الجاي

يسلمووو حبيبتي على الطرح

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 18-03-2014, 05:59 PM
صورة *أمير الرمزية
*أمير *أمير غير متصل
©؛°¨غرامي جديد¨°؛©
 
الافتراضي رد: له ضحكة تنسيني كل الخلق وله اسلوب يضيعني بتفاصيله


ما شاء الله قمه في الأبداع
كاتبة ولا فلا
كسرت خاطري فواغي
تسلمين يامبدعة على الطرح
الرائع
وإلى الأمام دائما وأبدا
تقبلي تحيات أمير

الرد باقتباس
إضافة رد

له ضحكة تنسيني كل الخلق وله اسلوب يضيعني بتفاصيله/للكاتبة :بعثرهَ هَادئهُ ؛كاملة

الوسوم
للكاتبه , محبوبي , أنفاس , الخلق , اسلوب , بتفاصيله , تنسيني , يضيعني , ضحكة
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
حسن الخلق ماهيته ومنزلته طيف زاير مواضيع إسلامية - فقه - عقيدة 21 12-05-2011 03:35 PM
ماهو حسن الخلق قلبي رهينك مواضيع إسلامية - فقه - عقيدة 5 01-06-2009 06:00 PM
تيسير الكريم الرحمن في تفسير كلام المنان سورة الفاتحة والبقرة حلومي5555 ارشيف غرام 3 08-05-2009 10:26 AM
ألم الحلق أسبابه وكيفية التعامل معه Sore throat ¦! ΜiЯaCle !¦ صحة - طب بديل - تغذية - أعشاب - ريجيم 12 14-12-2008 01:18 AM
موضوع مهم ومتكامل بالشرح يا رب تلتزمون بيه ابو@حلا مواضيع إسلامية - فقه - عقيدة 12 25-04-2008 03:15 AM

الساعة الآن +3: 03:56 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1