بحرانيه.. ©؛°¨غرامي جديد¨°؛©

احممم حبيت انزل روايه بس احس غلط انزلها باللغه البحرانيه يمكن اغلبكم ماتعرفونها ولافي ناس يعرفونها مادري والله

ادا جفت متابعين بنزل اول بارت بارت التعريفاات .....

وشكرااا

بحرانيه.. ©؛°¨غرامي جديد¨°؛©

تبوون انززززل بارتات ولالااا اكنسسل الموضوع ...

وردة الزيزفون
✿ إدارة الإقسام ✿

مساء الخير .. ياهلا فيك بغرام .. موفقة بطرحك .. عزيزتي على ايش تبغي ردود وتفاعل وانتي مانزلتي بارت فيه احداث كيف تبغي ردود عزيزتي ممنوع فتح مواضيع بدون محتوى لذلك نزلي بارت كامل حتى لاتغلق الرواية .. ومنها القارئ يحكم على الرواية هل احداثها تجذب او لا

القوانين / الإطلاع هام و الإلتزام ضروري


وهذا الموضوع راح يفيدك ياليت تطلعي عليه

قضايا

بحرانيه.. ©؛°¨غرامي جديد¨°؛©

(عائلة ابو عبود)
ابو عبود:انسان عصبي بس طيب وكريم وحنون يحب اولاده واجد بس ما يبين شعوره ليهم, طويل حنطاوي وعيونه عسلية شعره ناعم واسود.
ام عبود: حنووونه احن منها مافي تحب اولادها لدرجة الجنون اي شي يصيدهم تلازمهم وما تهدهم اللا اذا صاروا زينين, قصيرة وبيضة عيونها بنية غامقة شعرها نعام وكستنائي.
عبدالله: انسان عاقل هادئ ما يتصرف بطيش ابدا رومنسي وفيه جرأة وشجاعة, متوسط الطول ابيض وعيونه بنية غامقة شعره نعام وكستنائي.
محمد: طايش بس مو لدرجة كبيرة غيووور وااجد ويحب يقعد ويا اهله, طويل حنطاوي الوحيد اللي اخد لون عيون امه العوده زرقا وشعره ناعم بس ويفي واسود.
بتول: عصبية ورومنسية فيها هبالة بس ما تظهرها دائما وتحب الهدوء, قصيرة بشرتها بيضة بس مايلة للحنطية وعيونها عسلية وشعرها ناعم وبني جمييلة واجد.
زهراء: بتتعرفون عليها في الرواية كاتبة ليها تعريف فما ليه داعي التكرار, متوسطة الطول مو ضعيفة ولا متينه سمرة عيونها عسلية شعرها كيرلي ناعم بني.
مريم: بريئة بس مبلتعة شوي, شعرها كيرلي بس ناعم وكستنائي وعيونها عسلية.

(بيت ابو عادل)
ابو عادل: طيب وحنون و واجد يدلع اولاده, طويل اسمر عيونه بنية فاتحة وشعره ناعم وبني.
ام عادل: عصبية وحنونة بس ما تحب الدلع الزايد وما يقهرها اللا ولادها لن تدلعوا, متوسطة الطول بيضة وعيونها بنية غامقة شعرها ناعم بس ويفي واسود.
فاطمة: هبلة وتحب الجنون وفيها حب للمغامرة والاكتشاف بس طيبة وعلى نياتها, قصيرة سمرة بس جميلة وعيونها بنية فاتحة وشعرها ناعم وبني.
سارة: نفس اختها تقريبا بس هادي ما تحب مغامرات ولا هرار خايبة حدها, طويلة حنطاوية شعرها كيرلي بس ناعم و اسود عيونها بنية غامقة.
عادل: بيروح اول اعدادي يحب الهيامة, ابيض عيونه بنية فاتحة شعره اسود وناعم.

(الحين باقي العمات والخالات)
>العمات والعموم<
من العمات عندهم بس ثنتين وحدة متزوجة وما تجيب ولاد اسمه سمية ورجلها اسمه علي, والثانية اسمها أميرة ورجلها اسمه جعفر عندها صبيان ثنين توأم هادي ومهدي بيروحون صف ثاني اعدادي بتتعرفون على شخصياتهم في الرواية اما العموم ما عندهم اللا ابو عادل وابو عبدالله .
>الخيلان والخالات<
عندهم ثلاث خالات اللا هم ام عادل وام عبود وام نوراء, ام نوراء متزوجة واحد عنده ولاد من زوجته اللي توفت ولاد ابو نوراء هم هاشم اللا بيروح خامس وهشام اللا بيرو سادس ونوراء اختهم الفردانية في الروضة.
اما الخيلان مو متزوجين عندهم بس عباس وأحمد, عباس عمره 29 كله يمزح, اسمر متوسط الوزن عيونه عسلية وشعره بني كيرلي ناعم.
أحمد عمره 27 بتتعرفون عليه في الرواية, حنطاوي ضعيف بس فيه عضلات على خفيف عيونه بنية فاتحة و شعره ناعم ويفي بني.

(بيت الجيران)
ابو مرتضى هادئ مرته متوفية ومعنده اللا بنية متزوجة اسمها مها عمرها 26 وعندها صبي وبنية توأم جواد و جود,
ومرتضى: غامض وهو قد محمد ويصير رفيقه بعد بس مو الروح بالروح , طويل حنطاوي عيونه خضرا على المرحومة امه معضل شوي شعره كيرلي ناعم بني وطويل شوي.


سلام اول شي اعرفكم بنفسي اسمي بتول متخرجة من المدرسة اني سنة ثانية جامعة ادرس طب عمري 19 بدخل العشرين شهر ثمانية يعني تقريبا عقب شهر مو تنسون الهدية هههه اني احب الهبالة والجنون وفي نفس الوقت احب العقالة والهدوء ادري سويته لغز هههه عندي اخوين واختين اخويي الكبير متزوج اسمه عبدالله متزوج عن حب زوجته اسمها بيان عندهم ولد واحد صغير اسمه باسم عمره سنتين, واخويي الثاني اكبر مني بسنتين يعني 22 توه داخل ال 22 شهر سبعة وتوه متخرج من الجامعة ويشتغل في البنك , اختي زهراء اصغر مني بسنة يعني 19 هي مواليد شهر ثلاثة مخطوبة وما تحب الدراسة فما كملت جامعة خطيبها اسمه رضا , واخيرا اخر العنقود مريوم بتروح صف الاول كيوت هالاخت , وامي وابويي في نفس العمر 38.

بحرانيه.. ©؛°¨غرامي جديد¨°؛©

اول جمعة من شهر رمضان 10/7. الساعة 5 العصر



كل جمعية نروح بيت ام امي العودة كان الاهل كلهم متجمعين نسوان ورجال السوالف ضاربة التوب اني افتر راسي من الهدرة واجد هدرة ونصها غير مفهومة !
رحت لبنت خالتي وسحبتها وياي المجلس عشان نسولف برونا الثنتين بس قبل لا ندخل انصدمنا يوم سمعت اخويي الكبير عبود يتكلم ويا بنية في التلفون ويقول: اي ماعليه/ انتين خلي كل شي عليي وانا بتصرف/ اي اي الساعة 8 لقائنا / اوكي في أمان الله.


اني استغفرت ربي ما امبي اظن السوء في اخويي قلت بعدين بروح اشوف ويش السالفة ومن دخلنا كان انتهى من مكالمته سلمت عليه فطوم <<<< ( او نسيت اقول ليكم عن بنت خالتي هي قدي وياي في الجامعة بس تدرس بانكينغ) ورد السلام وطلع عنا وكنا ثنتينا مستغربين ومنصدمين من اللي سمعناه بعد عبود العاقل اللي ماخد مرته عن حب يكلم بنية ويخون زوجتة!

بس باعدنا هالافكار عنا وسولفنا شوي بعدين جت اخت فطوم سارة اللي في توجيهي تسألنا اذا بنروح البرادة ردينا عليها بالايجاب وقمنا نلبس عباياتنا واحنا نمشي للبرادة نسولف
فطوم: ما اصدق اني ان هالهبلة بتتخرج من المدرسة عقب سنة! سارة: هي اني مو هبلة , واي بتخرج تبيني اظل في المدرسة طول عمري! اني: هههه فطوم مو قصدها جدي , تقصد انش بسرعة كبرتين توش قبل جم سنة في ابتدائي ترمين علينا الرمل وتلعبين في الالعاب والحين عقب سنة بتتخرجين من الثانوي صدق الزمن بسرعة يمر , عجل من يصدق اني في الجامعة هههه. فطوم: ههههههههه سكتي مو بس انتين القصيرة. سارة: سكتوا ماما ما يضحكون في الشارع عيب. اني: يلا عاد شفتين روحش طويلة سويتينا جهالوا! سارة ماتت من الضحك علينا (اني وفطوم قصار طالعين على عائلة امي بس سارة طويلة على عائلة ابويي <<< على فكرة فطوم وسارة ترى يصيرون ليي بنات عمي بعد)

وصلنا البرادة بس يوم دخلت يبست يوم شفت الصبي اللي من اطلع من بيتنا اشوفه وكله يطالع فيي بنظرة نزارة كأني بايقة حلاله وهو ولد جيرانا ترى , بس اللي استغربت منه ويش جايبنه هني , نزلت راسي واني واني داخلة ما امبي اشوفه بس سمعت احد يناديني رفعت راسي شفت محمد اخويي يقول ليي: تعالي انتين بترجعين بيت امي العودة له اخدي هذا اللبن وديه لامي العودة حق اذا بتفطر انا بطلع الحين, ودخلي شعرش ترى يطلع شوي ها. اخذته من عنده واني ساكته ورحت اخد ليي شي حق الفطور. عقب ما رجعنا ظلوا الاهل سوالف لين اذن الاذان وقاموا يصلون ويبرزون الفطور. عقب الفطور قعدوا يقرأون ادعية وصار الجو خاشع وروحاني. بعد الادعية ظلينا كل ناس يسولفون بروحهم احنا قعدنا قروب بنات بروحنا اني وفطوم وسار وزهراء اختي . سارة: اني خاطري في عرس يلا زهور ما باقي شي ويخلص شهر رمضان متى بتعرسين؟ زهراء: ويش فيش انتنين كل مرة تحنين عليي خلني استانس بخطوبتي!! واصلا تونا بداية شهر رمضان جيف بيخلص؟! شكلش تبين تبين تفتكين مني. فاطمة: هههههههههه صدق من زمان ما صار عندنا عرس !! هادلين خيلاني لمتى بيظلون عزابية خلنا ندور ليهم ونعرسهم عشان نستانس مرتين مو مرة وحدة . اني: اما اللا ما بغيتين اللا عباس وأجمد يعرسون عشان بنات الناس يبتلشون ابهم هادلين مو وجه عرس. زينب: اي خيلاني مو وجه عرس خلهم يعقلون عشان نعرسهم.


قطع سوالفنا صوت عبدالله ينادي ولده باسم رحت اني اخدته من امه ووديته ليه ومرة وحدة انتهزت الفرصة وسألته: عندك شي الساعة ثمان امبي ارجع البيت من وقت احس روحي تعبانة شوي. عبدالله: ثمان عندي شغلة ليش ما تروحين الحين ؟ اهني عرفت صدق ان خاش شي واللي سمعته يمكن يطلع صدق! انزين ويش اسوي؟؟ جمعت جرأتي وقلت ليه: عبود اخويي صارحني ويش بتسوي الساعة ثمان؟!؟!؟! جاوبني ببرود يذيحني : بس عندي شغلة ضرورية بسويها وبعدين برجع باخد بيان وبروح البيت! اني: اني سامعتنك تتكلم في التلفون تكلم وسيده حط ايده على بوزي يسكتني يعني اللي في بالي صح!!! قال ليي روحي الحين واخدي باسم وديه لابيان والساعة ثمان اطلعي بره ومحد يشوفش وبوديش وياي.




ويش سالفة هاللقاء وليش عبدالله خايف مايبي احد يدري؟
ويش سالفة مرتضى ونظراته؟
تابعوني عشان تعرفون الجاي

بحرانيه.. ©؛°¨غرامي جديد¨°؛©

الجمعة 8:30

احم احم اول مرة ليي استلم المكرفون اني فاطمة اكيد تعرفون تفاصيل حياتي بتول ما قصرت طبعا المهم الحين بتول صار ليها نص ساعة مختفية ما ادري وين راحت واني صاير ليي اسبوع اقول ليها اذا جا يوم الجمعة بقول ليش سالفة بس خونت فيي وما ادري وين راحت قعدت انتظرها بس تمللت واخدت سيارتي ورجعت البيت.

..........................................

حاطة ايدي على قلبي وخايفة عبود يخون بيان لا لا مستحيل ما يسويها هو يحبها

اللتفت ليي عبدالله : ويش فيش خلش ريلاكس مافي شي يخليش تخافين صدقيني!

كلامه نوعا ما هدأني شوي وصلنا المكان المطلوب ونزلت وياه بس ظليت بعيد شوي حسب اوامر عبدالله وهو تقدم لوحدة تقريبا في عمر بيان وقاموا يتكلمون عقب شوي اشر عليي اني اجي تقربت منهم وقام

يكلمها: حوراء اعرفش اختي بتول سلمت عليه وقلت تشرفنا بس حسيت روحي للحين ضايعة في الطوشة طالعت عبدالله بنظرة تساؤل؟

قال ليي: هذي حوراء رفيقة بيان تساعدني عشان اسوي حفلة عيد ميلاد سبرايز لبيان !!

اللحين اتضح كل شي ليي صدق اني هبلة وما اثق في اخويي ارتحت نفسيا وتوني بقعد اللا اتذكر فطوم مسكينة قايلة ليي تبي تقول ليي سالفة بييه الحين بتزعل ويش اسوي ياربي اتصلت ليها ما ترد حوراء وعبدالله لاحظوا عليي اني متضايقة سألني

عبدالله : ويش فيش تبين ترجعين البيت؟

قلت ليه: فطوم زعلانة مني عشان اني نسيتها وخليتها بروحها عبود حسب ان اني قلت ليها ان اني طالعه وياه وهو ما يبي احد يدري بهالموضوع

فرد عليي : ليش قلتين ليها مو انا قايل ليش ما امبي احد يدري ولا يشوفش احد!

قلت ليه بسرعة عشان ما يزعل هو الثاني بعد : لا ما قلت ليها بس اني مشيت ومحد شافني وهي تبي تقول ليي سالفة واني نسيت ان تبي تكلمني وجيت وياك

عبدالله: اها يعني جدي الموضوع سهلة .الحين بنروح ناخد ليها باقة اعتذار وكتبي ليها في البطاقة تتصل ليش

اني : والله انك ذكي .

عبود: ههه ولو ما سويت شي يلا عن اذنش حوراء ومشكورة ما قصرتين ، يلا بتول سرينا .

بتول: مع السلامة حوراء تشرفنا.

حوراء: الشرف ليي.

ومشينا رحنا محل يبيع ورود اخذت باقة وطلبت يسلمونها لبيت خالتي وكتبت بطاقة ليها ومشينا البيت.
يوم دخلنا شفنا اخويي محمد ويا ربعه داخل الصالة! وكانوا يضحكون ويسولفون اني انخشيت ورا عبود لان هناك كله صبيان محمد قام مستغرب يقول

لعبود : حقوي جايبنها؟؟

عبدالله: انت اللي ليش جايب ربعك اختك الحين وين تنام !؟

محمد: انتين روحي السيارة ،امي قايلة ليي ان هي بتبيت في بيت ابويي العود واستأذنت منها عشان بجيب ربعي البيت .

عبدالله : اها يعني جذي السالفة اوكي عجل مع السلامة وتصبحون على خير شباب.

وفي نفس الوقت اللي كانوا يتكلمون فيه اخواني كنت طالعة بدخل السيارة واني مشغول بالي افكر في ردة فعل فطوم شنو بتكون وما انتبهت لروحي اللا واني داعمة في ولد الجيران مرتضى افف ما تتخيلون شكثر كرهت نفسي اي هذا هو اللي يطالعني بحقارة ونفس النظرات ما تغيرت كلمني لاول مرة

قال: مرة ثانية انتبهي للطريق! هذا واجد مغرور اني مثلا ميته عليه بدعم فيه ويع .
طلع عبود ورحت بيت ابويي العود وظليت انتظر اتصال فطوم لين غمضت عيوني ونمت .



توقعاتكم للبارت الجاي

بحرانيه.. ©؛°¨غرامي جديد¨°؛©

السبت .الساعة 10 الصبح

صار ليي ساعة تقريبا قاعدة من النوم حدي متمللة امي وخالاتي وامي العودة طالعين رايحين يتسوقون حق شهر رمضان وما قالوا ليي والسيارة عندهم . وفطوم للحين ما ردت عليي وشكلها لليحن زعلانة ويش اسوي عبدالله اخويي في بيتهم ومحمد ويا ربعه نايم في البيت تسبحت وتريقت وطالعت التلفزيون وللحين ما رجعوا شوي اللا فطوم تكلمني في الواتس

فطوم: ويش عندها الاخت صايرة رومنسية ومطرشة ليي باقة بس عشان ما رديت عليها !

اني: لو ما شفتين الباقة ما رديتين.

فطوم: حرام عليش تدرين اني ما اقدر ازعل منش هذا بس جدي ساعة وارد ارجع طبيعية.

اني: ادري ابش خلف جبدي بس ماعليه لا ورانا رجل ولا حبيب ندلع فيه ما عندي اللا انتين .

فطوم: يعني لو عندش رجل ما بحصل هالباقة!!

اني: يلا عاد الحين قولي ليي ويش السالفة اللي تبيني فيها؟!

فطوم: هذي ما تنقال جدي تنقال فيس تو فيس.

اني: عجل مري عليي اني في بيت امي العودة قاعدة بروحي هم طالعين من الصبح وخاليني بروحي حتى الجهال اخدوهم وياهم مافي احد يونسني.

فطوم: اوكي خمس دقايق واني عندش قومي تبرزي.

اني: اوكي لا تتأخرين.

قمت بسرعة البس عبايتي وحملت شنطتي وتلفوني وقعدت انتظرها لين جت ليي

ركبت السيارة وسلمت فطوم: عليكم السلام تريقتين؟

اني : اي من زمان احارسش!

فطوم : اني بعد من زمان متريقة من جدي بوديش مكان تحبينه!

اني : وينه؟؟!

فطوم: سكتي وقعدي مكانش اذا وصلنا هناك بقول ليش السالفة.
مسافة الطريق بس ووصلنا عند البحر

اني احب البحر في حر في برد بس احب البحر!
ما نزلنا من السيارة بس بركنتها وقابلتني

وقالت : اني ما عندي مقدمات يعني سيدة بدخل في الموضوع ، عادل اخويي عنده ربع كبار ما ادري جيفة متعرف عليهم ! المهم يوم الاربعاء اتصل ليي واحد اسمه حيدر قال ليي ان هو رفيق عادل وشافني كذا مرة وعجبته ويبي يتقدم ليي بس يبي رايي مبدأيا قبل ما يتقدم رسمي اني قلت ليه عطني ثلاثة ايام افكر وبرد عليك قال ليي ما يحتاج تردين يوم السبت الساعة 11 الصبح بتصل ليش وباخد جوابش!

اني: انزين وبعدين؟!

فطوم: بس هذا اللي صار!

اني : جم عمره ويش سمعته بس قال ليش جدي قلتين ليه بتفكرين؟!

فطوم : ويش فيش انتين اني قلت اذا تقدم رسمي بخلي الاهل يسألون عنه وعمره 25.

بتول: عجل نقول مبروك وبتعرس فطوم!!!

فاطمة: اي مبروك اي خرابيط اني الحين هو اذا اتصل بقول ليه رايي موافقة بس بعدين الاهل بيسألون عنه اذا سألوا وطلع الرجال زين وشغلته زينه بوافق!

بتول : اي له بس ما اتوقع واحد سمعته مو اوكي وما عنده شغل بيتقدم لوحدة!

فاطمة: في ناس جدي انزين.

بتول :المهم اني ما سمعت عنهم.

فاطمة : انتين ما سمعتين بس /ورن تلفونها وهي تقول ليي : هذا هو!

بتول: انزين ردي عليه وخليه سبيكر!

فاطمة: ويش سبيكر انتين بعد!

بتول : بسرعة سويه سبيكر وردي لا ينقطع !!

فاطمة: انزين ، الو .

حيدر: الو، سلام عليكم.

فاطمة : عليكم السلام.

حيدر : اتمنى فكرتين زين ؟!

فاطمة : اني فكرت عدل وموافقة بس ما اعطيك رد نهائي ردي النهائي بيكون اذا تقدمت رسمي يمكن وقتها اكون موافقة ويمكن لا والله يقدم اللي فيه الخير .

حيدر : اي ماعليه امي بتتصل لامش العصر وبتحدد موعد عشان نتقدم رسمي .

فاطمة : اوكي مافي مشكلة .مع السلامة.

حيدر: في أمان الله.

بتول: كللللووووووش.

فاطمة: هي سكتي للحين ما صار شي.

بتول : الرجال شكله مؤدب وخلوق ما اتوقع اخوش يرافق جديها صبيان!

فاطمة: تدرين حتى اني شاكة في هالشي!

بتول: المهم ان ما قلتين ليي متى بجون يتقدمون رسمي نحرتش

فاطمة : افا عليش اول وحدة بقول ليش.

بتول: تسلمين عمري.

فاطمة : الله يسلمش، يلا مشينا؟

بتول : اي له.

فاطمة: اوديش بيتكم لو بيت امي العودة ؟

بتول : ما ادري دقيقة بشوف محمد اخويي.

فاطمة : شدخل محمد اخوش؟

بتول : اي ماقلت ليش ! امس عبدالله كان بيرجعني البيت ويوم دخلنا شفنا محمد ويا ربعه في الصالة !

فاطمة: جيفة مدخلنهم الصالة يعني من جدي قعدتون في بيت امي العودة!

بتول: لا امي قايلة لمحمد هي بتبيت واستأذن منها عشان ربعه يروحون وياه البيت وشكله امي نست تقول ليي .

فاطمة: اوكييه!
اتصلت لمحمد سنة التلفون يرن وما رد عليي توني بصكه اللا يرد عليي واحد بس مو اخويي !

اللي على الخط: الو

ما رديت عليه ظليت ساكته واطالع الرقم اتأكد مو هذا رقم محمد؟!

اللا يقول : النمرة غلط وشكله بصكه في وجهي !

قلت : مو هذا رقم محمد ال......؟

رد عليي بعد فترة صمت: دقيقة .

محمد : الوو

بتول: الو انته للحين في البيت ويا ربعك الساعة 11:30 الحين!!

محمد: انتين ما تستحين تردين على الصبي .

بتول: افف محمد يعني كل هذا اللي قلته ما همك ولا رديت عليي ما همك اللا لويش اني رادة على الصبي هو اللي ليش يرد على تلفون مو تلفونه !

محمد : هو يحسب هذا تلفونه لان تلفوناتنا نفس الشي واحنا نايمين ما شاف من المتصل بس رد اخر مرة تردين على صبي فاهمة!!!

بتول: فكني اهو الحين انته ويا ربعك له اني بروح بيت عمي ابو عادل ويا فطوم.

محمد : انزين .تحملوا بروحكم ومو تروحون صوب صبيان مع السلامة.

بتول: وقوم انته وربعك بسكم نوم العصر بترجع امي . الله يسلمك.

صكيت التلفون ودرت لفطوم: بجي وياش بيتكم ما امبي اقعد بروحي
وياش بيتكم ما امبي اقعد بروحي هناك في بيت امي العودة.

فاطمة: اوكي يلا مشينا.

..........................................

صباح الخير ادري الحين ظهر لا تشرهون عليي توني قاعد من النوم لو ما بتول اتصلت ما قعدت اكيد عرفتوني انا محمد وحق اللي للحين ماعرفوني انا محمد
الوحيد اللي في عائلة ابو عبود الجميل خفيف الدم ابو عيون زرقان المتواضع ههههه.

بس بقول ليكم شغلة تقهر بتول مو جان لا ردت على مرتضى هو مسكين ويش دراه ان هذا تلفوني وتلفوناتنا متشابهين كله تحطني في مواقف ويش اقول بس مسكينة اختي واجد حشيت عليها .

المهم قعدت من النوم ودام مرتضى قعد قلت ليه يقعد الشباب وانا بروح اسبح وارجع طلعت ليي فانيلة بيج فيها كتابات بالاسود وبنطلون اسود وتسبحت ونزلت دخلت المطبخ سويت كوفي للشباب عبارة نايمين عقب الاذان جا مرتضى و رفيقي الثاني اسمه حسن يساعدوني وخلصنا ووديناهم شربناه واحنا نسولف لين اذن وقمنا كلنا رحنا المسجد نصلي خلصنا الفرض الاول جماعة اللا مرتضى

يقول ليي: اسف خوك رديت على اختك مو قصدي ترى حسبته تلفوني .

قلت ليه : ادري ،حصل خير.

وقمنا نصلي الفرض الثاني جماعة بعد الصلاة كل واحد رجع بيتهم اللا انا ما ادري وين اروح ما امبي اقعد بروحي في البيت والشباب اعتقد بينامون انا ما اعرف انام هالحزة اللا اذا كنت تعبان رحت البيت اخذت السيارة و رحت بيت امي العودة حسب اللي اعرفه خالاتي وامي هناك وصلت وطقيت الجرس فتح ليي هشام
الباب ودخلت قعدت سوالف وباهم وهم يطبخون .




ويش توقعاتكم للبارت الرابع؟

بحرانيه.. ©؛°¨غرامي جديد¨°؛©

السبت , الساعة 1:00
قاعدة ويا فطوم وحدنا متمللين ما اشوفها اللا
تقول ليي: تدريم مشتاقة لمن؟
اني: في غيره صوت الحب!
فاطمة: هرارش , سكتي لا احد يسمعش.
اني: من بيسمعني امش في بيت امي العودة وابوش في الشغل!
فاطمة: سارة هني وعادل بعد.
اني: دلين خامدين ما يدرون بشي.
فاطمة: لا صدق صدق مشتاقة لايام الثانوي!
اني: ايي صدق ايام حليوة ويلي وحشوني ربع الثانوي , شرايش نعزمهم على فطور؟
فاطمة: مو حليو نعزمهم على فطور, عقب العيد بنعزمهم على عشاء, انتين عندش ارقامهم؟
اني: اوكي, اي له عجل جيفة بنعزمهم!
فاطمة: ويش دراني اني.
اني: افف ملل!!
فاطمة : حده , قومي نطبخ!
اني : ويش نطبخ هالحزة توها ظهر الناس تطبخ من اربع !
فاطمة: ماعليه عن الملل بنسوي حلاوة وبنخليها في الثلاجة.
اني : انزين اي حلاوة بتسوين؟
فاطمة: اني اليوم داق عليي عرق الطباخ, خاطري اسوي حلاوة السنكرز والجالكسي بحطهم في اكواب مو بايركس و كيكة النسكافيه.
اني: انزين خلي عليي حلاوة السنكرز و الجالكسي وانتين سوي الكيكة.
فاطمة: تعرفين تسوينهم عاد؟
اني: اكيد اعرف ويش قالوا ليش ما اعرف اطبخ .
فاطمة: يلا عجل قومي , وفصخي عبايتش عشان ما تتلعوز محد اهني.
اني: وعادل؟
فاطمة: نايم ما يقعد اللا الساعة 4.
اني: اوكي عجل.
وتونا بنطلع اللا سارة في وجهنا ووجهها كله نوم.
سارة: صباح الخير.
فاطمة: اي صباح الخير الحين ظهر.
سارة: اووه اللا اهو, ويش صاير بتول عندنا اليوم.
بتول: ادري منورة البيت ما يحتاج تقولين.
سارة: خفي علينا.
فاطمة: يلا بتول خلها تولي .
سارة: وين بتروحون؟؟
فاطمة: ما بنروح مكان .
بتول: بننزل المطبخ بنسوي حلويات.
سارة: انزين , بقعد وياكم ملل!
فاطمة: انزين امشي.
رحنا المطبخ برزنا المكونات اللي نباهم وبدينا نطبخ
بتول: شنو ابدي اول السنكرز لو الجالكسي؟
سارة: سوي السنكرز اول اني ابه امباه يصير لي بارد بسرعة.
فااطمة: هههههههه كلهم بيبردون بنفس البرودة.
بتول: المهم وين خلاطكم؟
فاطمة: سارة قومي طلعيه ليها.
طلعته وعطتني اياه وبدينا نشتغل
خلصنا تقريبا 3:00 رحت فوق ويا فطوم ولبست عبايتي خفت عادل يقعد وفطوم دخلت تتسبح شوي اللا تلفوني يرن على الحنونة (امي)
اني: الو , هلا اماه
امي: الو , من الصبح طالعة وماقلتين ليي وين بتروحين؟!
اني: انتون كنتون طالعين, واني قلت لحمود اني بروح ويا فطوم بيتهم.
امي: انزين اني برجع العصر الساعة 5 ما بيمديني اسوي فطور روحي البيت سوي ليكم شي!
اني: انزين اني سيارتي عندكم جيفة اروح خلي حمود يمر عليي.
امي : الين بقول ليه, يلا مع السلامة.
اني: الله يسلمش.
وقعدت انتظر محمد يجي ليي تقريبا بس عشر دقايق وجا لان بيت خالتي قريب لبيت امي العودة, سلمت عليهم و رحت ركبت السيارة.
محمد: هلا بأختي الجميلة , شحوالش؟
بتول: اهلين خيي . اني تمام انت شحوالك.
محمد: انا زين له , ويش بتسوين الفطور؟
بتول: بسوي عيش و صالوونة .
محمد: اوكي.
بتول: رتبت البيت قبل لا تطلع؟
محمد: امم لا.
بتول: ايي مو فالح اللا في الوصاخة.
محمد: نسيت سبحان اللي ما ينسى.
اللتفت للدريشة وقعدت افكر في فطوم اي قد بفتقدها اذا تزوجت.
وصلنا البيت نزلت من السيارة و رحت سيدة بس فصخت عبايتي وقعدت اسوي الفطور عشان اخلص بسرعة وارتب المكان.
.................................................. ..

من جانب آخر في بيت الجيران مرتضى كان قاعد ويفكر في حياته
: لمتى يعني حياتي مملة!
من الشغل للبيت من البيت للشغل تمللت يا اطلع ويا الشباب يا نايم ويش هالعيشة وانا قاعد لاافكر ما اشوف اللا ايد تضربني على بطني : خالووو
مرتضى: ويش مجيبنكم , الله يغربل بليسك يا جوادو عورت بطني جوف اختك احسن منك تعالي جود حبيبتي.
مها: عاد حدك على جواد هذا الغالي, تمللت من القعدة في البيت بروحي تدري عبدالعزيز مسافر .
مرتضى: اي صحي متى بيرجع؟
مها: باجر الصبح.
مرتضى: يعني بدل ما ترتبين البيت لرجلش جاية بيت ابوش!
مها: طردة مثلا.
مرتضى: لا مو قصدي , اصلا زين جيتين حدي متملل, ابويي ويا ربعه طالع.
مها: ادري اني ما اجي اللا في الاوقات المثالية.
مرتضى : خفي.
مها: ههههههههه.
وقعدوا ضحك وسوالف وشوي يلعب مرتضى ويا الجهال.
............................
: بتوووووووووووووووول
بتول: ويش تبي ؟
: سويتين حلاوة؟
بتول: اي سويت, ليش تسأل؟
: العبد بمر على امي وبجون البيت وياه مرته يعني جدي عشان اذا تفطروا يكون كل شي موجود.
بتول: كل شي موجود واني زيدت شوي العيش وسويت ثلاث حلاوات عشان قلت بوزع, تساعدني حمود؟
محمد: انزين وين بتودين؟
بتول: بس بودي لبيت جيراننا وبيت امي العودة وبيت خالتي .
محمد: انزين , يعني باردة هي الحلاوة الحين؟
بتول: اي من زمان مسويتنها وحاطتنها في الخزان عشان تبرد بسرعة.
محمد: اوكي بجيب مفاتيحي بس.
بتول: لاا اول شي بتسبح بسرعة وبجي ليك.
ظليت احارسها تقريبا اخذت ثلث ساعة ونزلت .
محمد: روحي ودي بيت ابو مرتضى على اما انا اشغل السيارة.
بتول: انزين ليش مو انته تودي ليهم واني اشغل السيارة؟
محمد: روحي هناك بسرعة الحين بتهم تجي جان تسلمين عليها.
بتول: اوه مها جاية من زمان ما اشوفها وحشتني, تعال انته ويش دراك ان هي اخني الحين؟
محمد: توني من مساعة جايفنها تنزل من السيارة.
بتول: انزين عجل روح شغل السيارة عشان نخلص قبل الاذان.
طلعت بتول بتودي ليهم الحلاوة وانا رحت اشغل السيارة
عند بتول
اطق الجرس محد يرد ولا احد طلع بس غريبة سياراتهم اهني!
توني بمشي اللا الباب ينفتح ويطلع ليي مرتضى افف ويش هالحالة ليش ما طلعت مها.
عطيته الصينية وقلت ليه من بيتنا بس واني بمشي لمحتني مها واضطريت ارجع اسلم عليه
: هلا بتول ما تبينين!
بتول: اهلين اني اللي ما ابين لو انتين اللي ما تجين؟
مها: تدرين مشاغل الدنيا!
بتول: ايي الله يساعدش , شحوال التوأم؟
مها: تمام.
بتول: يلا اخليش حبيبتي.
مها: يوو لاويه مستعجلة دخلي تفضلي.
بتول: ما تقصرين , بس لازم اوزع الحلاوة كامل وارجع ابرز الفطور لان امي اليوم مو هني.
مها: اوكي الله يعطيش العافية وتسلم ايدش, مع السلامة.
بتول: وياش, الله يسلمش.
ورجعت السيارة وقعدنا نوزع الحلاوة ما تأخرنا واجد ما رجعنا البيت اللا امي هناك والفطور تبرز وتوه مأذن.

بيت ابو عادل, عقب الفطور
االكل كان متجمع يشربون جاي
ام عادل: يا ابو عادل بتك كبرت وقاموا يجون ليها خطاب.
رفعت راسها فطوم وسوت روحها ما تدري بالموضوع.
ابو عادل: هذي الساعة المباركة, بس منهو هذا اللي متقدم ليها؟
ام عادل: رفيق محمد ولد ختي , خوش صبي امه اتصلت وقالت ليي احدد يوم حق المقابلة!
ابو عادل: بس الحين شهر الله !
ام عادل: اي قلت ليها اني بس قالت ليي الحين يتقدم ليها واذا صار في نصيب الخطوبة تصير بعد العيد.
ابو عادل: اي ماعليه قولي ليها المقابلة باجر الساعة 9 زين.
ام عادل: ان شاءالله.
سارة: بتعرس فطووم وبصير عندنا عرس الللاااااي!
عادل: هبلة انتين ؟
سارة: اختي بتعرس ما تباني استانس؟!
عادل: بعدهم ما سوو تحاليل والرجال ما تقدم رسمي.
سارة: ادلف مناك.
ظلت فطوم سرحانة تفكر ليش قال ليها رفيق اخوها عادل وهو رفيق ولد عمها؟
.................................................. ................................
في بيت ابو عبدالله, بعد كلهم متجمعين
محمد و عبدالله يلعبون ويا وباسم
بتول و امها و بيان مرت اخوها و زينب يسولفون
ابوعبدالله يطالعهم ويقول الله يديم فرحتكم و جمعتنا هذي
شوي اللا يرن تلفون البيت وترد ام عبدالله
: هلا خيوه
ام عبدالله: هلا ام عادل , شخبار البيت؟
ام عادل: الحمدلله كلهم زينين
ام عبدالله: الحمدلله.
ام عادل: المهم خيو اني متصلة اعزمكم على بيتنا الساعة تسع متقدمين لفاطمة بتي.
ام عبدالله: ما شاءالله صدق كبروا بناتنا بسرعة توهم في الروضة والحين بيعرسون. على خير ان شاءالله يلا مع السلامة.
ام عادل: ايي, الله يسلمش.
ابو عادل: من متصل؟
ام عادل: هاذي اختي ام عادل تقول معزومين على بيتهم باجر الساعة تسع متقدمين لفطوم.
عبدالله: زين اللا فيه الخير الله يقدمه.
زينب: اختها مستعجلة تباني اعرس اكي اختها بتعرس وبصير عندهم عرس.
بتول: ههههه صدق من زمان لانه ما صار عندنا عرس.
بيان: حارسوا اول يتقدمون ليها رسمي ويكملون تالي اذا ملجوا استانسوا.
محمد رن تلفونه ووجهه ماكان يبشر بالخير : الو / انزين الحين جاينك/ مع السلامة.
ابو عادل: عسى ما شر ولدي.
محمد: ما في شي ابويي بس صارت عندي شغلة.
وطلع وظلينا مستغربين بس ما وقفنا موقفه عن السوالف.
..................................................
عند محمد
تبون تعرفون ويش السالفة ؟
بقول ليكم الصدق محد اتصل ليي سويت روحي اتكلم في التلفون عشان اتهرب من القعدة وياهم تدرون ليش؟ لاني احب فطوم اي احبها ما توقعت اني بخسرها جدي بهالسهولة ادري الغلط مني انا عندي شغل وما بنيت ليي شقة للحين انتظر ويش انا غبي غبي الحين ويش اسوي اذا وافقت عليه انا ما استحمل كل هذا .
ومشى السيارة عشان محد يشوفه عند بيتهم وراح للبحر وقعد يسب حظه و احيانا يصيح كانت حالته مأساة.

بحرانيه.. ©؛°¨غرامي جديد¨°؛©

صباح يوم الاحد, الساعة 9
امس نمنا ومنا ندري اذا حمود رجع البيت او لا

رحت حجرته اطق الباب محد يرد دخلت الجو بارد وهو متلحف باللحاف ونايم وكان عاقد حواجبه كأن في شي يضايقه رحت صوبه لمست جبينه كان حار شكله صخن على عمري اخويي سويت ليه كمادات وقعدت صوبه كل حين ابدل ليه وحدة لين شفته فتح ليي عيونه

محمد بصوت مبحوح ومبين عليه التعب: من متى انتين هني؟

بتول: نص ساعة تقريبا , اسكت وارتاح انته تعبان حرارتك مرتفعة.

محمد: انا مو بس تعبان جسديا انا تعبان نفسيا يا بتول.

بتول: اني وياك حمود قول ليي ويش فيك.

محمد: ما اقدر ما اقدر !

وقام يصيح قدامي انصدمت منه بس كنت حاسة انه تعبان عدل ومحتاج احد يوقف وياه كل اللي سويته ان مسحت على شعره وقعدت وياه.

.................................................. .......

بيت ابو نوراء

ام نوراء: نوراء حبيبتي خليني اشتغل روحي طالعي التلفزيون.

نوراء: انزين ماما متى بيقعد هاشم؟

ام نوراء: ما ادري ماما هم نايمين متأخر.

نوراء راحت حجرة هاشم طقت الباب جاها صوت هاشم: تفضل.

نوراء: صباااااح الخير.

هاشم:صباح النور.

نوراء: هاشم ويش رايك تجي تلعب وياي كورة متمللة اني.

هاشم: انا صايم وتعبان تبين تطالعين التلفزيون؟


نوراء: انزين قوم

ونزلوا على الدرج ويا بعض
وام نوراء تطالعهم وتحمد ربها على العلاقة اللي بين بتها وولاد رجلها.

..........................................

في بيت الجدة:
عباس قاعد ويا امه وابوه ويسولفون

الجده: لمتى بتظل جدي يا ولدي ما تبي تعرس له؟

الجد: هذا مو مال عرس خليه عنش.

الجده: جيف اخليه جدي اني مو صغيرة له امبي اشوفهم معاريس قبل لا اموت.

الجد بسم الله عليش , الله يطول عمرش.

عباس: ابويي نحن هنا .

الجد: استح على وجهك.

طلع اجمد في وجهنا وقال: ويييوووووووووو فشلوه.

عباس: جب.

احمد: انته ما عندك شغل اليوم؟

عباس: امبلى بس اتصل ليي واحد وياي في الشغل قال ما يحتاجون وجودي اليوم الشغل بسيط, وانته استاذ مستانس اجازة له.

احمد: مستانس بس جو المدرسة احلى , القعدة ويا المدرسين والطلاب واجد حليو.

الجد: ويش يا ولدي ويش اخر رسوماتك؟

احمد: للحين ما كملتها ابويي بس راح تكون فن تشكيلي.

الجد: ايي الفن التشكيلي هذا يبي ليه واحد يفهم ليه مو انا ما افهم ليه عدل.

عباس: اي جيبها ليي اذا خلصتها بشوفها ليك افهم انا.

احمد: اي انته واجد تفهم الفن التشكيلي يبي ليه واحد عنده احاسيس مرهفة , ماليي الا زهور بت اختي .

عباس : الحين زهرو عندها مشاعر مرهفة على قولتك واننا ما عندي !

احمد: ههههههه , ملل بتجي وياي ؟

عباس: وينه؟

احمد: بطب على محمدوه في بيتهم اكيد نايم.

عباس: يلا انا وراك.

الجد: لاويه تغربلون الصبي خلوه نايم.

عباس: ابويي هذا حبيبك ندري ما يحتاج تخش بس, انا قايل بردها ليه يوم يكت عليي ماي بارد.

الجد: ههههه الله يهديكم يا ولادي.

عباس و احمد: يلا مع السلامة.

الجد: الله يسلمكم.

الجدة: في حفظ الله يا ولادي.

.................................................. ....

الحمدلله تحسنت حالة محمد الصحية بس حالة النفسية للحين يبين هالشي من نظرته المكسورة وحزنة اللي واضح جدا
قمت عنه اشوف من في الباب

اني : من ؟

خالي احمد: انا.

خالي عباس: لا ما عليش هذا انا .

فتحت الباب واني اقول لعباس : ههههههههه والله انك مشموخ!

عباس: جوف جيفه تكلم خالها.

اني: دخلوا.

احمد: وينه اخوش الاهبل اكيد للحين نايم.

اني: مسكين حرارته مرتفعة ومريض .

عباس : مسكين صديقنا مش خلنا نروح ليه.

احمد: يلا مشينا , اختش زهراء نايمة بعد؟

اني: اي كلهم نايمين يمكن لو في احد قاعد بتكون مريم.
عباس: وحشتني هالهبلة.

وراحوا حجرة محمد وطقوا الباب محمد رد: تفضل.
دخلوا راسهم بس كأنهم يتجسسون

احمد: ها يالاخو ما تشوف شر .

عباس: سلامات حمود.

محمد: الشر ما يجيكم, الله يسلمك , دخلوا له.
ودخلوا وهني ما اقدر اقول ويش صار بينهم لان ممنوع الدخول لغرفة محمد عقب عباس واحمد
واجد مقربين لبعض هالثلاثة.

فمن جدي بعطي حمود المكرفون شوي وبروح ارتاح .


احمد: ليش جدي شكلك حزين .

عباس: قلنا مريض بس مو تسوي افلام هندية.

محمد: راحت خلاص!

احمد و عباس يطالعونه باستغراب.

محمد: فطوم راحت بيتقدم ليها واحد ومافي اي سبب عشان ترفضه لان سمعت بتول تقول انه خلوق ومؤدب ومحترم , ادري انا غبي ليش ما تقدمت ليها قبل انا في سن زواج و اشتغل واذا على الشقة بيتساهل وياي عمي وبتصير خطيبتي وما بنتزوج اللا اذا كملت بناي الشقة فوت عليي الفرصة استاهل .

احمد: هدي مو زين ليك جدي انته مريض ارتاح.

محمد: خلني يا احمد اطلع اللي في خاطري احس روحي بموت مجرد افكر ان واحد بيتقدم ليها تذبحني مو يتزوجها بعد وتصير ملك ليه.

عباس: صل على النبي انته ما عندك ايمان بالله , يمكن اهله ما يوافقون عليها لا تسوي في روحك جدي.

محمد: وليش ما يوافقون عليها مافي نفسها !!!!!
وظلوا يحاولون يهدأوني وانا احس انا وعيي مو وياي بس احس بطعنات بألم ما ينوصف.

.................................................. ..............

في بيت ابو عادل بعيد عن الاجواء الكئيبة كانت فطوم متفائلة وتسوي حلاوة لليلة وسارة في التلفون و كالعادة عادل نايم وابو عادل في الشغل وام عادل تقرأ ادعية.
فطوم خلصت من الكيكة وحطتها في الفرن

واخذت التلفون واتصلت لبتول:الو حاجية, شالاحوال.

بتول: هلا, تمام.

فطوم: ليش جدي تتكلمين كأنه ماليش نفس او احد مضايقنش , ويش فيش حبي؟

بتول: مافيني شي بس حمود تعبان ومريض وكنت قاعدة وياه حالته النفسية دمار عورني قلبي
عليه , من امس طلع وما رجع اللا متأخر والصبح قعد جدي.

فطوم: يووو ما عليه شر .

بتول: الشر ما يجيش.

فطوم: قاعدة اسوي حلاوة حق الليلة.

بتول: اممم الله يكتب اللي فيه الخير ان شاءالله.

فطوم: ان شاءالله.

بتول: ملل!

فطوم: متى ما سمعتش قلتين هالكلمة.

بتول: ويش اسوي متمللة كلهم نايمين مافي اللا محمد ووياه خيلاني.

فطوم: وياه خيلاني يعني اكيد في سالفة .

بتول: ايي هذا اللا افكر فيه الله يستر.

فطوم: اي اقول ليش امس العصر كنت طالعة ويا عادل وسارة بالسيارة نفرفر قال ليي عادل اوقف
عند بيت جيرانكم وشفت حبيب قلبش.

بتول: ويييع سدي الموضوع لا تجيبين طاريه حده مغرور وشايف روحه!!

فطوم: ههههههههه صايمة انتين ترى!

بتول: اوه نسيت بجي يوم بعتذر ليه وغصبا عنه يسامحني.

فطوم: و ويش اللي بخليه يسامحش اذا كان هو ما يطيقش على قولتش.

بتول: خله يولي.

فطوم : يلا اخليش حبوب بطلع الكيكة من الفرن وبسوي حلاوات ثانية.

بتول: صايرة واجد تسوين حلاوات هالايام سوي موالح.

فطوم: على امرش عمتي , يلا سي يو تونايت.

بتول: سي يو.

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1