منتديات غرام روايات غرام أرشيف الروايات المغلقة - لعدم إكتمالها روايتي الاولى : شفتك وعرفت كيف يولد فينا الحب فجأه
Mema_ ©؛°¨غرامي جديد¨°؛©

بسم الله الرحمن الرحيم
- هذي اول روايه اكتبها ان شاءالله تعجبكم
بحاول أكملها اذا لقيت منكم دعم
- اشكر اختي وتوأمي غدير اللي شاركتني بكتابة هالروايه
.
.
.
التعريفات بالشخصيات :-
الجد : عصبي بس بنفس الوقت طيب وعنده شركة ع مستوى المملكة
الجده : حبوبه والكل يلجئ لها بكل وقت تحب عيالها وأحفادها
عيالهم :-
.
العائلة الأولى :
- الأب احمد : طيب حيل عمره 55 يحب زوجته وأولاده خاصة
ريماز م يرد لها طلب وكل شي الا عياله.
- الام منى : عمرها 50 طيبه مع الكل تحب عيالهم ودلوعها اللي
م ترضى عليه ولدها خالد.
- خالد : اكبر عيالهم عمره 25 متوظف بشركة جده طيب وحنون على اخوانه
بس اذا عصب م يعرف أمه من ابوه .
- محمد : عمره 20 مصرقع واهبل م يهمه شي غير وناسته دايم
يتناقر مع ريماز , اصدقاء عمره ياسر وسلطان.
-ريماز : اخر العنقود دلوعة أبوها عمرها 18 مصرقعه وهبله مثل اخوها
م يهمها شي قد وناستها معروفه بالعايله بمقالبها بثالث ثانوي
مع توأم روحها لوران وسمر.
.
العائلة الثانيه :
- الأب علي : اخو ابو خالد الكبير طيب ووقت المزح مزح ووقت الجد
جد عمره 60.
- الام نوره : عمرها 52 طيبه والكل يحبها ويذكرها بالخير تحب عيالها
- سالم : عمره 35 متزوج وعنده ولد اسمه بدر يشتغل بشركة جده
طيف : زوجة سالم عمرها 30 طيبه وتحب زوجها وولدها
بدر : ولد سالم عمره 8 سنوات يدرس بالابتدائي.
- عبدالله : عمره 28 عصبي وغيور بقوه متوظف بشركة جده.
-سلطان : طيب ومن النوع اللي اذا حب حب من قلبه صديق محمد وياسر عمره 20.
-سمر : صديقة ريماز ولوران نفس الشخصية هبله وم يهمها احد عمرها 18.
.
العائلة الثالثه :-
-الام حصه : اخت ابو خالد وأبو سالم صبوره لدرجه مو طبيعية وخاصه على زوجها
اللي متحملته بسبب نظرة أهلها الخطأ عن المرأه المطلقة عمرها 48.
- زوجها مشعل : عصبي يموت بس م يطلع ولا ريال واحد من جيبه متزوج
على حصه وحده لبنانيه .
-ياسر : عمره 20 صديق سلطان ومحمد اذا حط احد بباله م يتركه بحاله.
- لوران : طبعا نفس الكلام معها مثل شخصية ريماز وسمر كأنهم توأم عمرها 18.
-عمر وعدي (توأم) : عمرهم 6 سنوات .

Mema_ ©؛°¨غرامي جديد¨°؛©

البارت الاول
.
.
.
اخر يوم بالاختبارات بمدرسة التوأم الثلاثي ( ريماز - لوران -سمر )
ريماز طلعت من قاعتها وراحت لمكان تجمعهم المعتاد
وقفت عن المشي وهي تتأمل صديقاتها من بعيد جتها لوران بعد م شافتها
واقفه بعيد ومبين انها سرحانه : ريماز شفيك تعالي هناك شوفي البنات متجمعات
ريماز : قد ايش بشتاق لهم وبفقدهم ماني قادره استوعب انه اخر يوم أشوف ذا الوجيه
بشتاق لكل زاويه جمعتنا كل زاويه لمت سوالفنا وضحكنا ماني قادره ي لوران ماني قادره
لوران اخذتها وقعدتها ع كرسي بعيد عن البنات وهي تخفف عليها لانها عارفه
ان ريماز متوجعه ومتضايقه بقوه والدليل دموعها اللي م تنزل على اي شي
لوران : يابنت شفيك م راح نتفرق ان شاء الله وبنتلاقى بالجامعة والمولات بعدين مفروض
تكونين فرحانه لانه وأخيرا بنفتك من فاطموه (إداريه عندهم)
ريماز تضحك من بين دموعها : فاطموه مافيه اسعد منها الحين لانها بتفتك مننا
لوران تضحك : اي لا تنسين الجمعه عند جداني اليوم وناسه من زمان عن المقالب
واستمرت السوالف لحد م سمعوا صوت الجرس يعلن وقت الطلعه وكل وحده راح لبيتها
.................................................. ......................................
في بيت ابو سالم (علي)
سلطان توه داخل البيت قعد بالصالة وهو تعبان شاف أمه بالمطبخ وراح لها
سلطان يسلم على أمه : يمه وين غداكم جوععاان
ام سالم (نوره) : الحين الحين بس يجي أبوك ونحطه
وتجي سمر تركض وتقعد ع الطاولة وتتكلم بحماس : يمه متى بنروح لجداني
يمه ترا البنات متفقات ننام هناك عادي ؟ طيب يمه (وآلام ساحبه عليها) يمممااه ! ي ام سالم !
ي حرم علاوي ! نوراااااهه
سلطان وهو شوي ويصفقها : هي انتي لا تخليني أقوم اصفقك م تعرفين تتكلمين بدون صراخ !
بعدين حنا متفقين ننام هناك أنتو أجلوا نومتكم لبعدين
سمر تطير عيونها : نععاااممم خخييرر لا حبيبي مافيه حنا اللي بننام هناك وأنتو اجلو نومتكم
ام سالم : بس أنتو وياها بطيتو راسي بصراخكم
سمر : اسفه يمه بس شوفي ولدك حنا نبي ننام هناك
وقطع عليهم دخول ابو سالم : السلام عليكم
الام وسلطان وسمر : وعليكم السلام ياهلا
وقعدوا يتغدون وكل واحد راح يريح قبل الجمعه
.................................................. .................................................. .....
بعد المغرب الكل كان متجمع ببيت الجد
البنات راحو بغرفه لحالهم كالعادة عشان يأخذون راحتهم اكثر
لوران : ونااسسسهه اليوووممم مباراة الهلال جبتو التيشيرتات ؟
ريماز : انا جبت بس ذا الدلخه م عندها
سمر : وناسه بشجع الاتحاد
لوران : هي انتي كل يوم لك فريق ! اثبتي ع واحد وتلف على ريماز : وأنتي
شلون نتابع المباراة وأمهاتنا بالصالة ؟
ريماز مندمجه بالجوال : ابد ننزل لمجلس الرجال أكيد العيال بيروحون للمقهى كالعادة
سمر : اي صح نسيت أقولكم سلطان يقول انهم بينامون هنا اليوم بس م علينا منهم
ريماز : اخوك ذا وش يبي ناشب لنا حنا من زمان مخططين ننام
لوران : يييسسس يارب ينامون وسكتت لما التفتو لها ريماز ولوران : ليش مستانسه طيب !
لوران : ي غبيات عشان نسوي لهم مقلب يأكلون تبن منه ولا ينامون هنا وحنا موجودين
وقعدوا يخططون ع الشباب
.................................................. .................................................. ....
عند الشباب كانو يلعبون بلوت
خالد : ي عيال ترا الشباب متجمعين بالمقهى اليوم
عبدالله : يوه ليكون بيجي الحيوان ذاك ؟
محمد : اي أكيد بيجي مع الشله بعدين خلاص ماعليك منه
عبدالله : والله اني ناوي عليه نيه بس ابيه هو اللي يبدأ
ياسر : متى بنروح ؟
سالم وهو يدخل : وين بتروحون !
الشباب : للمقهى فيه كلاسيكو الهلال والاتحاد , تخاوي معنا ؟
سالم : لا والله عندي شغل لرأسي بروح إخلصه
الشباب : إها الله يوفقك , الله يعطيك العافيه , الله يعينك ياخوي ...
خالد : يالله شباب عشان يمدي نحجز أماكن
الكل قام الا سلطان قال : انا مانيب رايح بقعد هنا
محمد : سليطين قوم بلا دلع
سلطان : لا والله مو دلع بس تعبان وم نمت زين بحاول أنام
الشباب م حبو يضغطون عليه لانه واضح من ملامحه انه تعبان جد
طلعو الشباب وسلطان انسدح ع الكنب كان يتقلب ويحاول ينام
ويحاول فجأه انفتح الباب واشتغلت اللمبات
حاول يعرف من هالملاك اللي دخل عليه بس م كان واضح منها شي
لانها لافه ع التلفزيون وانصدم لما سمع صوتها المبحوح وهي تغني
هذا مو صوت سمر وسمر شعرها أطول من كذا ! انتبه لها لما لفت
وانصدم لما شاف هالوجه البرئ اللي قدامه
.................................................. ..................................
ريماز وهي تركض للمجلس وعليها تيشيرت الهلال شافت النور طافي وتأكدت
ان الشباب طلعو فتحت الباب بقوه وشغلت النور وم انتبهت للي نايم ع الكنب
قعدت تشغل التلفزيون وتدور القناة وهي تغني : ي هلال تحكي عنك
اجيال لاجيال عشق تناما من سنين الطفوله ... يس لقيت القناة وأخيرا
التفتت على ورى تبي تجلس ع الكنب وانتبهت للشخص اللي يناظرها
حست رجولها انشلت مو قادره توقف ودها الارض تنشق وتبلعها ولا تكون بهالموقف
و سمعت صوت سمر تناديها من المطبخ واستوعبت انها للحين واقفه
وطلعت وهي تركض وتركت وراها سلطان اللي مو قادر يستوعب ان هاذي نفسها
ريماز الخبله ام المقالب والهبال .
*اتمنى تكون أعجبتكم *


Mema_ ©؛°¨غرامي جديد¨°؛©

البارت الثاني
.
.
.
راحت ريماز للمطبخ ولقت البنات موجودات
سألوها : جهزتي التلفزيون ؟
ريماز : لا شفت النور مشغل يمكن فيه احد
نطت سمر تبي تشوف من فيه ! طقت الباب وسمعت صوت سلطان
سمر وهي تدخل : سلطان من متى وانت هنا ! م كنت مع الشباب
سلطان : لا م رحت تعبان ليش تبين شي ؟
سمر : لا بس البنات يبغون التلفزيون
سلطان : إها خلاص سوي لي طريق بطلع فوق وأنتو تعالو هنا
راحت قالت للبنات انه بيمر وجو البنات للمجلس
.................................................. .............................
سمر وهي منصدمه : بنات تصدقون سلطان مو طبيعي
لوران : شلون يعني مو طبيعي
سمر : مادري بس لما قلت له نبي المجلس م عاند ع طول طلع
لوران : غريبه ! ريماز تتوقعين وش فيه ؟ ريماز رررييييمممااازز ! (وتضربها بالمخده)
ريماز نقرت من الضربه : وجع ان شاءالله نعم ! انا اسمع بدون ضرب
( ليش مو راضي يطلع من بالي ) وحاولت تشغل نفسها بالمباراة
.................................................. .............................
فوق عند سلطان
كان يتقلب ع السرير مو قادر ينام : ياربي ليش أفكر فيها انا ! مانيب قادر
أنساها بس والله محلوه غير عن قبل آه ي بحت صوتها استغفرالله انا وش قاعد أقول
ريماز مثل اختي م تنفع للحب .
ونام وهو مقرر يطلعها من باله
.................................................. .............................
الظهر كل واحد راح لبيته
ببيت ابو خالد كانو مجتمعين ع الغداء ويسولفون
ام خالد : أقول ي احمد شرايك يعني نسافر لنا مكان
محمد : اي والله يبه ليش م نروح نغير جو وإلا ي اخواني الاعزاء
خالد : والله فكرة حلوه
ريماز : ايه ايه يبه ليش م نروح ونبي مع عمامي احسن
محمد : اي أكيد تبين مع عمامي عشان الهبلات الثانيات
ريماز : ي الغبي حتى انت بيكونون معك اخوياك الدجه
ابو خالد (احمد) : بتسكتون ولا شلون ! مالي احترام عندكم
الكل : محشوم ي الغالي
ابو خالد يكمل : والله فكرة السفر مانيب شينه بس أقول لأبوي وأمي وإخواني
وإذا وافقوا سافرنا وإلا رحنا للمزرعه
ريماز وهي بتطير من الوناسه : مشكور يبه يارب يوافقون يارب يوافقون
.................................................. .............................
المغرب ببيت العمه حصه
ياسر قاعد يفكر بخطه يسويها لزوجة ابوه فرصه لان ابوه مسافر بدونها
جت بباله فكره وطلع يركض يبي ينفذها
وهو بالطريق كلمه سلطان :السلام عليكم اخبارك وأخبار عمتي
ياسر : هلا وعليكم السلام والله ابد نحمده ونشكره انت اخبارك
سلطان : الحمدلله بخير , وينك ؟
ياسر : رايح لحبيبة ألبي
سلطان : وش حبيبة البك ذي جديده ليكون متزوج
ياسر يضحك : لا وش متزوج رايح لعجوز النار عندي لها خطه يحبها قلبك
سلطان : ي رجال مالك خص فيها اتركها بحالها لو يعرف أبوك بيذبحك
ياسر مستعجل : باي باي أكلمك بعدين وصلت.


Mema_ ©؛°¨غرامي جديد¨°؛©

البارت الثالث
.
.
دخل ياسر الشقق وهو بيطير من الفرحه
ركب الاصنصير ولبس قناع وعبايه ماخذها من امه بدون م تدري
انفتح وراح الشقه يركض
طق الباب وسمع صوت زوجة ابوه جايه راح أندس
فتحت الباب م لقت فيه احد م اهتمت ودخلت
رجع طق الباب ونفس الحكاية لما سمع صوتها قرب راح أندس
هي بدت تخاف وقعدت تقرأ آيات من القران و المعوذات
ياسر رجع طق الباب وهو ميت ضحك عليها
فتحت له الباب وصرخ بوجهها وسكر الباب
هي بدت تبكي ودقت على ابو ياسر (زوجها)
: حبيبي الحئني
ابو ياسر : بسم الله الرحمن الرحيم وش فيك !!
زوجته : جني جني
ابو ياسر : يابنت تعودي من ابليس شكلك حالمه
زوجته : شو حالمه وماحالمه شو بدي اعمل هلأأ انا بدي روح عند خيي فراس
ابو ياسر : روحي روحي لا بارك الله فيك .
ياسر كان يسمع من ورا الباب دق ع سلطان وهو يضحك
سلطان : هيه شفيك !
ياسر مو قادر يتكلم من الضحك
سلطان : ياسر وجع بتتكلم ولا اسكرها بوجهك
ياسر : لا لا ويضحك
سلطان : أقول انت مطول انا بروح الاستراحه اقابلك هناك وتقولي كل شي
.................................................. .................................................. ..
بعد أسبوع عادي جدا م فيه شي جديد غير خبر موافقة الأهل
ع السفره واتفقوا يروحون لمكه بعدين للكويت
وكالعاده البيت مقلوب فوق تحت وكل واحد خايف ينسى شي
تجمعوا عند بيت الجد والجده والكل ركب بالسيارات وكان الترتيب كذا :
الرجال بسياره مع سالم
الحريم والصغار بسياره مع خالد
البنات بسياره مع محمد وسلطان
العيال بسياره مع عبدالله
انطلقو وبعد فتره وقفو عند محطه
(بسيارة محمد وسلطان)
كانت ازعاج اللي يضحك واللي يسولف واللي واللي ....
نزل محمد للبقاله والبنات لدورة المياه
جاء ياسر وفتح الباب اللي قدام : ي ولد بعد بركب معكم
سلطان : م فيه مكان وين تقعد ياخي
ياسر : مالي دخل وخر لي لو عند البنات م فيه مشكله اهم شي اركب
طبعا السياره كانت تاهو وكان فيه كرسي قدام يرفع ويسفط يصير تكايه
رفعوه ودخل ياسر : ااهه ي الخونه بتحطوني مع ذوليك الحيوانين
ركب محمد : وش جابك انت ليش م رحت معهم !
ياسر يتحلطم : اول ما مشينا كل واحد حط رأسه ونام الكلاب
البنات جو و ركبوا السياره
البنات يخططون يقنعون العيال يخلونهم يسوقون
ريماز : يالله بنات كل وحده تحاول بأخوها
لوران : هلا هلا بأخوي حبيبي
ياسر استانس : هلا فيك ي قلب اخوك انتي
لوران : ياسر طلبتك ؟
ياسر : انا عارف كل هالترحيب عشان مصلحه انقلعي انقلعي
سمر فزت : سلطون حبيبي
سلطان : سلطعون يقطعك ياحيوانه كم مره أقولك اسمي سسسللطططاان
بعدين عارف انك تبغين مصلحه عشان كذا من الحين انا مو موافق لا تحاولين فيني
استسلمت سمر لانها عارفه سلطان اذا عاند تكلمت وهي تهمس لريماز : باقي انتي يالله
ريماز وهي تسمي : مودي قلبي
سلطان لما سمع صوتها لف ع ورا بعدين انتبه ع نفسه وتعدل وانتبه له ياسر بس م قال شي
محمد : أنتم يالثلاثي المرح وراكم شي بس شوفوا وشو عاد
ريماز : حبيب أختك انت ممكن طلب
محمد : لا واسكتي انتي والغبيات اللي معك وإلا بركبكم مع خالد
ريماز : حمود تكفى طلبتك وافق يالله
محمد : وبعدين ! قلت لا يعني لا
ريماز ( مالي الا هالاثنين ) : ياسر
ياسر : لا لاتحاولين مافيه
ريماز ( ياربي باقي ذا يارب يوافق ) : احم سس سلطان
سلطان فز ( ياقلبيه جمال هالصوت استغفرالله شفيني انا ) : هلا هلا
ريماز : شسمه نبي نسوق انا والبنات بس شوي والله
سلطان : انا مالي دخل فيكم
البنات تحطمو وقالو بنحاول بعدين اذا رجعنا
كانت السياره ازعاج كلهم يتكلمون بنفس الوقت والمسجل مشغل وحالتهم حاله
ريماز كانت تحس بصداع بس م اهتمت الا لما زاد عليها : لوران معاك بندول ؟
لوران : لا بسم الله عليك لحظه يمكن مع سلطان دايم معه
لوران تهمس لسلطان : معك بندول ؟
سلطان : ايه كم تبين
لوران : مب انا لريماز رأسها عطني وحده
سلطان : أعطيها ثنتين احسن
خذتها ريماز وكلتها ونامت من التعب
.................................................. .................................................. ..
وصلت كل السيارات للمدينة واتجهوا للميقات
نزلو محمد وياسر والبنات ومن الحماس م انتبهو لريماز
سلطان كان قاعد يلبس جزماته وانتبه لها
قعد يناظر لها كيف نايمه : ياربي هالبنت فيها برائه مو طبيعيه
الحين شلون اصحيها يارب سترك
نزل وفتح الباب اللي عندها وهو متردد : ريماز ريماز
ريماز : يمه بس بنام شوي والله تعبانه
سلطان : ريماز قومي انا سلطان
ريماز استوعبت وين هي فيه ومع مين : هلا وقعدت تتلفت بخوف
سلطان عرف انها تدور البنات : البنات دخلو يحرمون امشي معي ندخل لهم
ريماز تمشي معه وهي تتمايل حاسه بصداع قوي بس م تبي تبين
سلطان انتبه لها وخاف : ريماز متأكده م فيك شي
ريماز : لا لا بس من النوم وصلنا وصلنا شكرا م قصرت
سلطان م أمداه يرد لانها راحت بسرعه
دق ع لوران : هاه هلا توك معي بالسياره وش تبي
سلطان : بسم الله م ابي شي بس انتبهي ع ريماز شكلها تعبانه
لوران تصرف : طيب طيب مع السلامه
سلطان راح للرجال وهو مستغرب من نفسه ليش مهتم فيها
.................................................. .................................................. ..

Mema_ ©؛°¨غرامي جديد¨°؛©

البارت الرابع
.
.
وصلو لمكه ع الساعه ١٠ىودخلو الفندق اللي كانو مستأجرين فيه قبل لا يروحون
واللي كان بوسط الحرم عشان الجد والجده م يتعبون
( شقه للرجال والشباب - شقه للحريم والبنات والصغار )
طبعا الكل دخل ونام
الفجر قاموا البنات ولبسوا عباياتهم طلعو للصاله لقو الفطور ع الطاوله
أفطروا ونزلوا للحرم ولقوا الحريم راحوا لهم
البنات : صباح الخير
الحريم : صباح النور ترا حنا اعتمرنا روجوا اعتمروا بس قبل أفطرتوا ؟
البنات : ايه الحمدلله اجل بنروح حنا نعتمر
اعتمروا البنات وكان الفجر برد وم فيه زحمه
رجعوا لقوا الحريم بنفس مكانهم
ريماز : آه يازين مكه وجو مكه
لوران : ايه والله راحه
سمر : سبحان الله اول م تدخلينها تحسينك مولوده من جديد
لوران : صادقه صادقه
واستمر اليوم وهم بالحرم بعدين راحوا الفندق وناموا
ومرت اربع ايام كالعاده بس بالحرم صلاة وعباده
الكل نزل يركب السياره عشان ينطلقون الا لوران تأخرت
لوران طلعت ركبت الاصنصير وهي تركض
قبل م يسكر ركب محمد وهو مستعجل
لوران : احم ااء ممكن تطلع
محمد انتبه لها : هاه وين اطلع
لوران : جت بتتكلم بس قطع عليها جوال محمد
محمد يرد : هلا خالد امر
خالد : وينك انت بسرعه وطق ع شقة الحريم شوف وين لوران بنت عمتي للحين م جت
محمد : طيب طيب هذاني جايكم وسكر الجوال
انفتح الباب وتقدمت لوران بسرعه وطلعت تدور السيارات
محمد شافها وقفو واستغرب راح لها وهو يأشر لبعيد : شوفيهم هناك
لوران وهي بتتقطع من الفشيله : اوكك شكرًا
.................................................. .................................................. .
ركبوا السيارات بنفس الترتيب بس الصغار ركبو مع البنات
الرجال مع سالم
والحريم مع خالد
والبنات والصغار مع محمد وياسر وسلطان
والعيال مع عبدالله
مر الوقت وباقي لهم كم كيلو وياصلون
كان الكل نايم بس سلطان اللي كان يسوق
وريماز كانت تلعب بالايباد وبحظنها عمر اللي كان متحمس ويلعب معها
والسياره على غير العاده كانت هدوء بس همس ريماز وعمر
وسلطان كان قاعد يسمع لهم
ريماز تأخذ الايباد : يالله دوري دوري بسم الله
عمر : لا انتبهي لا تحطين هنا
ريماز تعطيه الايباد : يوه خسرت دورك يالله ايوه يابطل كمل للااا هناك
دوري دوري
ريماز قعدت تلعب ولما خسرت جت بتعطيه عمر انتبهت انه نام : يا حياتي نام
وعدلته ع فخذها وكملت لعب
سمر قامت : هي انتي احترمي نفسك انقلعي ورجعت نامت
سلطان ميت ضحك ع اخته : شكل حلمها برعاية mbc اكشن
ريماز تضحك : اي والله صادق
سلطان بدون قصد : تسلم لي هالضحكه
ريماز سوت نفسها م سمعت شي وحطت راسها ونامت .
.................................................. .................................................. .

روعة غلا ©؛°¨غرامي نشيط¨°؛©

بااااااااااااااااااااارت رااااااااااائع
لا تعتمدي على الحوار وكثري السرد والوصف
ياليت تكبري الخط 5 لانه جدا صغير ومتعب في القراءة
ابعدي عن الالوان الفاتحه عشان عندي ضعف نظر
بلييييييييييييييز ننزلي بااااااااااارت

Mema_ ©؛°¨غرامي جديد¨°؛©

المشاركة الأساسية كتبها روعة غلا اقتباس :
بااااااااااااااااااااارت رااااااااااائع
لا تعتمدي على الحوار وكثري السرد والوصف
ياليت تكبري الخط 5 لانه جدا صغير ومتعب في القراءة
ابعدي عن الالوان الفاتحه عشان عندي ضعف نظر
بلييييييييييييييز ننزلي بااااااااااارت
بأذن الله البارت الجاي بصحح الاخطاء اللي قلتيها
شاكره لك نصيحتك حبيبتي
قرائتك لروايتي شرف كبير لي

3bduallahalhajri ©؛°¨غرامي مشارك¨°؛©

استمري ����


واتمنی منج قراءة روايتي الاولي بالنشر بأسم { قصة حياتي } موجودة في هذا القسم

Mema_ ©؛°¨غرامي جديد¨°؛©

المشاركة الأساسية كتبها 3bduallahalhajri اقتباس :
استمري ����


واتمني منج قراءة روايتي الاولي بالنشر بأسم { قصة حياتي } موجودة في هذا القسم
تشرفت بقرائتك لروايتي

روعة غلا ©؛°¨غرامي نشيط¨°؛©

نبغى بااااااااااااااااااااااارت

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1