هل اطلقها

[mazin helmi]

اخواني اعضاء منتدى غرام
ماراح اطول بالمقدمات
مشكلتي بإختصار كالتالي :
من كم يوم اتصل فيني زوج عمتي يقولي ان الزواج قسمه ونصيب وانه مايبي يقطع بنصيب بنته وهي تستناني اكمل دراستي ( مع العلم اني ملكت عليها من اربع شهور ) الزبده يبني اطلقها وكلٍ بطريق
سكرت منه وكلمت اختي وحكيت لها المكالمه وطلبتها تروح للبنت تسألها عن رأيها في كلام ابوها لاني مابغيت اظلم البنت
وبعد روحة اختي لها ردتلي ان البنت موافقه ابوها وتقول ما تبي تظل معلقه سنتين ولا تبي تتزوج وتسافر في البدايه انا استغربت وشو له يغيرون رأيهم الحين بعد الملكه لكن بعدين قلت هي حره مانيب خسران شئ ولا اقدر اغصبها تظل معي
و بعدها كلمت اهلي وخبرتهم اني بطلقها
الوالده بحياتي ما شفتها فرحانه بشئ كثر فرحتها اني بطلق بنت عمتي مع انها من البدايه لما شاورتها ما اعترضت على البنت اما الوالد الي هو اصلا اختار البنت لانه يبي يقوي علاقته بزوج عمتي لانه شايف انه مبعدها هي وعيالها عن العايله طبعا لما درى عصب وقال ترانا مانلعب وهذا زواج وهم من البدايه موافقين ايش الي تغير الحين وان طلقتها بزعل عليك ومن هالكلام
بعد يومين اخوي كلمني يقول ان البنت تبي الطلاق لان في واحد متقدم لها واهلها يبونه
المهم الي تقدم لها متقدم على اساس تحدي لان من فتره صارت بينا مشكله وانا قلت له ماني متعني ارد على اشكالك وهو رد علي بتشوف ان الي منت متعني له احسن منك يوم ما تبديه بنت عمتك وزوجتك عليك
و الحين والله اني محتار بين اني اطلقها خصوصا اني اصلا مو مستعد للزواج الحين بس مابغيت ارد الوالد وهو يطلبني و خلها تتزوج هالي متقدم لها وبقلعتهم ثنينهم ( والله انهم كفو بعض )
وبين انها بنت عمتي والمفروض ما ارضى لها بواحد هذي نيته فيها والاهم من هذا زعل ابوي علي
وصليت استخاره بس ما احس اني ارتحت لشئ
معلش طولت عليكم بس والله اني بدوامه مدري ايش اسوي

[موسِيقى المطَر~]

السلام عليكم

طيب بنت عمتك هيا ماتدري عن نيته
كلم اختك تقول لها عن اللي متقدم لها
وحتى اذا هي مصره انها تطلق منك
ماتتزوج هذا اللي متقدم لها
وفي النهاية الزواج قسمه ونصيب
ومارح يصير الا اللي كاتبه ربي
وانت كمل دراستك واذا رضت
تكمل معك الله يوفقكم واذا اصرت
عالطلاق الله يعوضك

ودي
faioof

[سلطاانيه]

مو تقول أنت ملكة عليها خلاص كلمها وشوف رأيها في الموضوع من دون ما تدخل بينكم أحد
هذا رأي
وعسى ربي يوفقك ويرشدك إلى الصواب
تحياتي

اللهمْ إني أحُاول..فدلني

[mazin helmi]

المشاركة الأساسية كتبها faioof1999

السلام عليكم

طيب بنت عمتك هيا ماتدري عن نيته
كلم اختك تقول لها عن اللي متقدم لها
وحتى اذا هي مصره انها تطلق منك
ماتتزوج هذا اللي متقدم لها
وفي النهاية الزواج قسمه ونصيب
ومارح يصير الا اللي كاتبه ربي
وانت كمل دراستك واذا رضت
تكمل معك الله يوفقكم واذا اصرت
عالطلاق الله يعوضك

ودي
faioof

اختي اولا هي ماطلبت الطلاق الا لما اهو تقدم لها وإذا حكيت لها سالفة التحدي بينقال اني أألف عشان اخليها تغير رأيها لان السالفه اصلا انا نفسي احسها شي مثل الافلام ولو مو صايره معي ماصدقت ثانيا ماظنتي اقدر اكمل معا حتى لو هي رضت لانها بكل سهوله باعتني هذا واهي على ذمتي تفكر تتزوج غيري احس الموضوع صعب

[mazin helmi]

المشاركة الأساسية كتبها فداك أروحنا

مو تقول أنت ملكة عليها خلاص كلمها وشوف رأيها في الموضوع من دون ما تدخل بينكم أحد
هذا رأي
وعسى ربي يوفقك ويرشدك إلى الصواب
تحياتي

اختي في تفاصيل ما قلتها للأختصار منها اني حاولت اكلمها اكثر من مره بس ماكانت ترد

[{ خجل أنثى ~]

بالمختصر انت مابتعيش مع وحده مالها رغبه فيك
انت كلمها وقولها أنـآ بأطلق بس الموضوع كيت وكيت
وبعد ماتشرح لها كل الامور طلقها
وقتها بريت ذمتك واعطيتها هي واهلها اللي يبون
وانت الله يعوضك باللي أحسن منها

بس صعبه تمسكها كم سنه وهي تبي واحد ثاني وماتبيك

مجرد رأي وشوف بعايلتك ناس كبار سن ولهم حكمه وشاورهم

[الله يرزقنا الجنه]

كيف يفكرون ذا التفكير وهي على ذمته خلاص

اما طلق عشان واحد ثاني تقدم لها هي على ذمه رجال سلامات

والشور شور زوجها الحين لا ابوها ولا هي
اذا يبي زوجته تمشي معه

واذا انت مافيك شيء ينعاب < البيوت فاضت من البنات والله يدورن الولد ادوره

يمكن ربك كاتب لك الخير

والله يوفقك ويوفقهـــــــــــــــآ

[موسِيقى المطَر~]

المشاركة الأساسية كتبها mazin helmi

اختي اولا هي ماطلبت الطلاق الا لما اهو تقدم لها وإذا حكيت لها سالفة التحدي بينقال اني أألف عشان اخليها تغير رأيها لان السالفه اصلا انا نفسي احسها شي مثل الافلام ولو مو صايره معي ماصدقت ثانيا ماظنتي اقدر اكمل معا حتى لو هي رضت لانها بكل سهوله باعتني هذا واهي على ذمتي تفكر تتزوج غيري احس الموضوع صعب

مالك الا تستخير وتتوكل على الله
الزواج والطلاق ماهو بلعبه
وبعدين تقول باعتك
يعني اكيد ماتبيها
الله يعينك على ما ابتلاك

[سرآب°]

اخي المفروض هذي امور متفقين عليها من البدايه وهي عارفه وضعك واهم شيء انت ماخذها عن قناعه وهي موافقه عليك عن قناعه اهم شيء انتو اذا تبون بعض ومقتنعين ،انا اخوي ملك ع بنت خالتي ومتقين الزواج بعد اربع سوات بسبب الدراسه وامور اخرى وعادي متفقين بس استجدت امور وصار الزواج بعد سنه ونص يعني لايحكمون كذا ما احد يدري ايش اللي الله كاتبه ،واصلا مايجوز اللي سوه اهلها انه تنخطب بنتهم وهي ع ذمه رجل آخر ،اذا الرسول نهى عن خطبه رجل على خطبه اخيه المسلم فيما معنى الحديث فمابالك وانت زوجها يمكن مايدورن عن ذا الشيء ويمكن اهلها ضاغطين عليها انت ماتدري ،ومن ناحيه صعب فهو صعب وبقوه ،بس لازم تفهمها الموضوع يمكن هي صغيره واهلها ضاغطين عليها لاتسبعد بعدها خلاص انت تبريء ذمتك امام الله ، والله يكتب لك ولها مافيه الخير والصلاح ويبعد عنكم المفسدين. تقبل مروري

[الـ شــــموخي999]

مرحبا







بالنسبه لزعل الوالد تروم تدخل واحد يسمع له وخبره أن ها الشيء طلبهم هم وها زواج ما يفيد فيه العناد

أنا معاك إنك اذا خبرتهم بسالفة التحدي فبيعتبرونه شيء ثاني فالافضل بعد ما تطلقها تخبر أحد قريب منكم وبرايهم عقب >> الي عليك سويته وبريت ذمتك





بالنهاية الزواج قسمه ونصيب







بالتوفيج