منتديات غرام روايات غرام أرشيف الروايات المغلقة - لعدم إكتمالها روايتي و ان ضاق صدري من همومي تنفستك/بقلمي
مجنونه هواك ©؛°¨غرامي مشارك¨°؛©

بــــــارت "59"

{الســـعودية}

صـــباح يوم جديد على ابطالنا..

مثل ما تعرفون عرس سوزان اليوم و اهلها مشغولين كل الحريم عند الكوافيرة و نادية راحت لبيت ابوها لانها راح تتجهز مع اختها سوزان..

فوزية امها صدمتها ان ملجتها راح تكون بعد يومين و انها مجهزة كل شي لان الفترة اللي فوزية كانت فيها مع نادية يجهزون لعرس سوزان امها كانت تطلع تجهز لملجة بنتها و قالت لها انها يابت فستان الملجة و تقيسه بعد عرس سوزان عسب يمديهم يضوقون و يعدلون..


{ بيت ام ريان }


كانت ام عبير و عبير موجودين في بيت ام ريان و الكل عرف ان مر شهر على طلاق عبير و لؤي و هالشي خلا الكل في حزن.. و ام عبير كانت تحاول تبين ان الموضوع عادي عندها و قالت: يا ام ريان الزواج قسمه و نصيب و دامهم حسو انهم ما يناسبون بعض عادي لو تطلقو دامهم على البر و انا اختك..

ام ريان و هي ما تبي تحط عينها في عين اختها: و الله ماني قادرة احط عيني في عينك و ياختي كيف صار كذا الولد نزل راسي و رب البيت ما تمنيت اللي صار..
عبير همست في اذن امها و قالت: تكفين قفلو على الموضوع لاني ماني طايقة هذا كله..
ام عبير همست لبنتها وقالت: لا تلومينها و انا امك انتي طلعي فوق لغرفة البنات ريحي راسك مني و من خالتك يالله..
استأذنت عبير و طلعت لحجرة البنات و قفلت على نفسها الباب عشان محد يزعجها و ام عبير تحاول في اختها انها تهدا و البنات يحاولون يغيرون جو الكئيب..

لؤي دخل الميلس و هو عارف ان امه مب راضية عليه و يلس عند ريلها و قال: الغالية زعلانة علي بس قولي لي كيف ارضيك..
ام ريان ما حطت عينها عليه و قالت: ممكن تفارقني؟!
لؤي و هو يقول: انتي تامري امر يا جنتي بس مابي زعلك يما..
ام ريان: بطلب منك طلب تنفذه؟!
لؤي مسك ايد امه و باسها وقال: امريني الغالية اطلبي و انا انفذ..
ام ريان: ابيك تطلع من بيتي و ما اشوف رقعة وجهك..
ام عبير: ايش ذا الكلام يام ريان هذا الغالي و لا انتي ناسية هالشي؟!
ام ريان و هي تحسم الموضوع: ماني ناسية انه لعب في قلب بنتي عبير و عباله متى ما بغاها خذاها و وقت ما يحس انو ما يبيها يرميها..
لؤي ابتسم و نش من مكانه وقال: انتي تامريني امر يا الغالية الحين بطلع من هالبيت و ماني راجع له لين ترضين انتي عني.. "باس راسها"


بعد هالموقف بربع ساعة نزلت عبير اللي ملت من جو البيت و طلبت من امها انهم يرجعون للشقة و ما عارضتها لانها كانت تبا تتصل على لؤي و تطمن عليه و تتأكد انه ما يحتاج شي خاصة انه طلع من البيت بملابس اللي عليه..


{فـــرنســـا}

كان يوسف في الدوام و هو صاير ينهك نفسه عشان ما يفكر في عبير و اللي صار لها و لا يفكر في اخته اللي نزلت راسهم في الارض بسبب فعايلها.. و في هاللحظة سمع صوت فونه و استغرب من الاتصال كان رقم مجهول و هو ما انتبه للرقم اصلا..

رد على الاتصال و سمع: اخ يوسف الـ.....
يوسف مستغرب من المتصل و قال: نعم معاك يوسف.. من معاي؟!
.....: اسف مضطر اني ما اخبرك عن اسمي..
يوسف خاف: ليه وش فيه؟!
.......: طالبك تجيني السعودية في امر طارئ و اتمنى تجي في اسرع وقت..
يوسف مات من الخوف: لا تخليني على اعصابي انت مين؟!
......: قلت لك انا مضطر ما اقول لك عن اسمي و لا عن اي شي غير انك تجي السعودية لامر طارئ..
يوسف: اعمامي صار لهم شي؟!
.......: لا الحمدلله كلهم بخير و عافية انت بس تعال و ما يصير إلى كل خير.. "سكر الخط"
شاف الساعة و كانت تشير لـ 10 الصبح.. ركض للمسؤول و قال له عنده امر طارئ لازم يترك فرنسا و يروح للسعودية و المسؤول ما عارضه كان متوتر مع توتر يوسف و وافق يعطيه اجازة لمدة اسبوع بسبب هالامر.. ركض يوسف و حجز له اول طيارة للسعودية و بلغ امه انه عنده امر ضروري للغاية و لازم يروح للسعودية و ما تخبر اخته لانها لو عرفت راح تحاتي اخوها و هو مهما زعل منها ما يحب يخلي اخته تحاتيه..

و خلال ساعات وصل للملكة و هو جاهل صاحب الاتصال و لما هبطت الطيارة اتصل على الرقم و ما حصل رد منه فطرش (فـ أرسل) مسج له و كتب: انا وصلت المملكة ممكن تعطيني العنوان المكان اللي راح نتقابل فيه؟!

يوسف وصل المطار و التفت حوله و هو يشوف ارض اجداده و اهله و نزلت دموعه من الشوق و الوله هو خايف من المجهول اللي اتصل عليه و طلب منه الحظور في اقرب وقت.. و لاحظ ان الوقت كان العصر تقريبا الساعة 5 و هو يتنفس الصعداء..

بعد نص ساعة سمع صوت تلفونه و شاف الرقم المجهول رد عليه بسرعة و سمعه يقول له: انا عند البوابة و ما شفتك يا ولد الـ .....
يوسف قام من مكانه و توجه للمجهول و هو يقول: الحين انا جاي.. مع السلامة..

يوسف كمل دربه للبوابة و هو خايف من المجهول اللي يحس انه من بعده ما راح يشم الحرية و راح يخلي امه و اخته عايشين بعاده..


{الامارات}

نشت عواش قبل الكل بسبب اتصال وليد لها لانه متعود يتصل عليها اول ما ينش لدوامه..و هي الضحية تنش قبل الكل و تسولف معاه لين تروح النومه منها و تتنشط..

بعد ما خلصت سوالف مع وليد اللي اخذ منهم نص ساعة لانه كلمها من نش لين وصل دوامه القريب من بيتهم و شافت فيصل لما كانت تنزل من على الدري كان مستعيل متاخر على دوامه و باين عليه انه ما نام عدل مع ان امس الكل رجع من وقت بعد العشا..
ابتسمت و راحت تسوي لها ريوق و توعي حمدة عسب ما يتعودون ع السهر و الكسل لان هالشي مب لصالحهم ابد و خلال ربع ساعة سوت لهم ريوق على كيف كيفهم و وعتها و حمدة تتحرطم لانها ما تنام و تسهر في الاجازة هذا كله لانه اخت عواش تسهر مع وليد و تنش معاه في وقت الدوام..

تريقو و فكرت حمدة انها تطلع لان الجو كان بديع و حتى عواش كانت تبا تطلع بس عارفين شروط فيصل ما يطلعون بدونه و لو بيطلعون يوافق على الجمعية و على بعض الاماكن..

اتصلت عواش على فيصل و قالت له انهم يبون يتمشون في هالجو و ما كان في مزاج يسمح له انه يفكر في ان البنات يطلعون و يتمشون و الشي الاكيد انهم راح يسيرون للبحر و هالمكان ما يحبه ابد بسبب المعاكسات..

عواش لما شافته سكت قالت: طلبتك لا تردني..
تنهد فيصل و قال: انا ما احب اردج يا عواش بس طلبج مرفوض ايلسو في البيت احسن لكم انتو لو في خاطركم الطلعة ما بقول لا بس مب الحين..
عواش بوزت و شافتها حمدة فنشت من مكانها تسير تسوي لها نسكافيه لانها تحس انها مصدعة كملت عواش من شافت حمدة طالعة من الصالة: و لو قلت لك ان هالطلب من حمدوه..
ابتسم فيصل من طاريها و قال: ولو قلت لج اني ما اتأثر مع هالتلميحات ايلسو في البيت احسن و من ارجع ابا اشوف الغدا جاهز و اغراض البحر لاني بشلكم و بنسير نتغدا هناك يالله بسكر لان عندي اجتماع تووووووووووووووووت...
عواش شافت الفون و هي مستغربة لان اخوها قال الجملة كاملة بدون ما يوقف و سكر في ويهها و طلبهم ما رفضه بس اجله و بيكونون معاه ابتسمت لما شافت حمدة و هي تأشر لها شو السالفة..

عواش: يا طويلة العمر اخوي العزيز رفض الطلعة في الوقت الحالي.. بس عوضنا بـ غدا ع البحر..
استانست حمدة وايد لانها من زمان ما سارت البحر و تغدت او تمشت هناك و هي تحتاج هالتغيير في روتين حياتها..


{السعودية}

يوسف فتح عينه من اللي يالس يشوفه.. كان خالد ولد عمه و اخته جوري واقفين يتكلمون.. يوسف و علامات الاستفهام فوق راسه من الاستغراب وش جاب اخته للسعودية..


تقرب منهم يوسف و هو يشوف جوري بنظرات نارية و هالشي لاحظه خالد و قال له: الحمدلله على سلامتكم يا يوسف و طلبتك لا تسوي لها شي..
يوسف يوايه خالد و قال: انا ماني خبل اعمل فضايح قدام خلق الله.. بس من نوصل للشقة اعلمها كيف تعاند و تكسر كلامي..
خالد وقف بين يوسف و جوري و قال: هي بـ أمانتي يا يوسف.. و لو ماني عزيز على قلبك تمد ايدك عليها يا ولد عمي..
يوسف شاف خالد و هو يمسك ايده و قال: انا اسف ما كنت داري ان جوري جاية السعودية و انا صاحب الرقم المجهول كنت ابيك تواجه ابوي و اعمامي في فرح سوزان اختي..
يوسف وقف و قال بهمس: ايش تقول يا خالد.. انجنيت انت تعرف وش ممكن يسوي فيني اعمامي و ابوك يا خالد و خاصة عمي بو مشاري..
تنهد خالد و قال: انتو امانة برقبتي يا يوسف و وعد مني لو حسيت انو ممكن يأذونك انا راح اوقف في وجيهم و اخليك ترجع مكان ما جيت..
يوسف و هو في قمة الدهشة و الخوف قال وهو يأشر على اخته: و ذي مين يحميها فهمني..
خالد و هو يشوف جوري اللي خافت من كلامهم: هي امانة برقبتي بعد و لا تحاتي محد راح يمس شعره منها و لو انت خايف عليها كذا لا تحاتي راح اخليها عند اختي نادية في فترة الزواج و ما اخلي اي احد يعرف انها بنت عمي..
يوسف و هو متنرفز: شفتي يا جوري انك تجيبي المصايب حتى للسعودية..
جوري تمت تصيح من كلام اخوها لها و قالت: انا ما اقصد كان في خاطري اجي للسعودية و اشوف زواجاتهم و الله ما كنت قاصدة المشاكل و قلت منها ترتاح مني ما تشوفني في فرنسا..
يوسف تكلم بصوت شبه مسموع بس بالفرنسي: En France, je garantis et les paumes de leurs problèmes pour vous garder et pour ma mère quitté, mais ici ne garantit pas que nous ne reviendrons jamais en France. [في فرنسا كنت مأمن عليكم هناك و كنت ما احصل راحة ابد لاجل ابعد المشاكل عنك و عن امي، أما هنا انا مب ضامن اننا نرجع لامي و لفرنسا بـ أمان.]
ردت عليه جوري: Pourquoi toute cette haine Pourquoi ne vivent pas ici en toute sécurité? [ ليه كل هذا ليه ما نعيش براحة هنا و ليه كل هالخوف؟!]
يوسف تنهد و قال: امشي لا نضيع وقتنا بـ هالكلام و راح نكمل كلامنا بعدين..
جوري دمعت عينها ياما حلمت تشم ريحة تراب المملكة مب بس زيارتها و اليوم لما زارتها تفاجأت بخوف و توتر اخوها و خالد.. و تعرف ان وجودها مسبب قلق للاثنين..


بعد ساعة و نص وصلو لبيت بو خالد و خالد اتصل على نادية اخته عشان تاخذ جوري و تكشخها (تزينها) للعرس و امنتها ما تقول اسمها و لا هي وش تصير لهم لابوها او اي شخص في العرس و لين يخلص العرس يحلها ربي..
نادية وافقت و كلمت سوزان على هالموضوع و تكشخو و خلال ساعتين البنات خلصو شعرهم و المكياج و لبسو فساتينهم حتى جوري كانت مجهزة فستان للعرس و بس كانت تبي تكوي الفستان بشي بسيط لانه الفستان تعفس في الشنطة و البنات خلو الخدامة تكوي لها بسرعة و في هالوقت كانو يلبسون العروس ملابسها و يعطرونها..

و على الساعة 8 كانو البنات في قاعة الافراح و يسلمون على الموجودين و جذبوا (كذبوا) على الجميع ان جوري تصير صديقة سوزان و تعرفت عليها ايام دورات التدريبية و هم صدقوها و كانت جوري تتكلم الانجليزي ابد ما كانت تتكلم مع الموجودين عربي.. و لما صار وقت الرقص نادية مسكتها و قالت لها: يالله نرقص بس عملي نفسك انك ما تعرفي و اني انا اعلمك..
ضحكت جوري و قالت: اوكي..

و مثل ما خططو ان نادية تعلم جوري و جوري تعلم حالها ما تعرف للرقص و الحريم يصفقون يشجعون جوري على الرقص و في بعضهن ضحكو عليها..
و وقف الطبل الشرقي جوري لفت خصرها و قامت تتفنن على الكوشة و الكل منبهر منها و قالت نادية: هي تعلمت الشرقي هناك في بلادهم.. "في قلبها": الله يقطع شرك يا جوري ليه ما قلتي لي انك تعرفي للشرقي كان علمتيني شويات ههههههه..

و خلص العرس بـ سلام و جوري كانت ملاصقة لـ نادية و تعرفت على بنات عمها اللي هم (فوزية و هدى).. و نادية كانت طول الوقت تنبه جوري انها ما تقول انها بنت عمهم و ما تسوي مصايب و الحمدلله ان الموضوع عدا على خير عند الحريم بس عند الرياييل كان شي ثاني..

بو خالد و بو مشاري و بو محمد عرفو يوسف من اول ما دخل و بما ان المكان مزدحم فما رامو يقولون شي و بارك يوسف لاعمامه بكل شموخ و كبرياء و هذا طلب من خالد له انه يبين لهم انه مب خايف و ما همه الصراع اللي راح يصير بعدين..

و مر اليوم شبه خير لان بو مشاري و الشواب ما كانو مرحبين في يوسف و جوري اللي كشفو عن هويتها من لما اخذهم خالد معاه لشقته اللي كان مستأجرة ليلسة الشباب..


نهاية البارت


olli ©؛°¨غرامي فعال ¨°؛©

جمميل البارت وحماس
أتوقع يوسف راح يوقف ضد عمامه أو ممكن يسوا خطة ويزوجوا جوري واحد من أولادهم على شان الورث و يوسف راح يعملوا له حاجة تكون ثمنها جوري

عبير و لؤي إحتمال يرجعوا لبعض أو عبير تسافر وترجع لفرنسا أو مكان ثاني

فيصل وحمدة فيصل راح يرجع يتقدم لها بعد رجوع أخوها و ممكن يطيح في مصيبة جديدة من مصايب بنت عمة وليد

لصمتي حكايهه ©؛°¨غرامي مشارك¨°؛©

طوووولتت عليييك كثييير ياعممممري اعتذرر منكك...

البارت يجنننننننن

عندي احساس ان عبير بدأت تميل ل لؤي والحين بعد ما انفصلو حاز بخاطرها... صراحه قد ما كنت اتمنى تكون ليوسف... بس الحين ابغاها للؤي احسهم رح يكونو ثناائي جميل


يوسف عندي احساس انه رح يزوجوه لوحده من بنات عمه عشان يقال انهم يضمنوه مايرجع لامه وكمان يصير خاتم باصبعهم 'حتى ما استبعد انهم يهددوه باخته


نفسسسسييي اعرف المشاكل حقت الاعمام مع ابوه... احسها مشكله تافهه زيهم... مقهههوووره الود ودي اذبحهم



فيصل وعوااش احلى اخوووووين..

حمد يقهر اتزوج وماعاد جاب لاخته بال... قصرر في حقها كثير
بس اتوقع يصير لها شي ويحس انه منجدد قصر معها


فيصل وحمده كانو رايقين في ذا البارت هاادين ويجننو





بانتظاركك عزيزتي


دمتي بود

لصمتي حكايهه

مجنونه هواك ©؛°¨غرامي مشارك¨°؛©

صـــباحكم / مساءكم كل خير يا حلوين..


أدري طولت هالفترة بس لان اللاب توب اخترب و انمسح كل شي منه كـ أنه جديد..
فـ اسمحو لي احتاج وقت ارتب افكاري عشان اكمل البارتات الجاية..


و حابة اشكر اللي ســأل عني.. ربي لا يحرمني منكم..


أختكم: مجنونه هواك..


مجنونه هواك ©؛°¨غرامي مشارك¨°؛©

بــــارت "60"

صباح يديد على ابطالنا..
فيصل نش من رقاده متأخر ع الدوام صح انه مدير كبير بس بعد هو ما يحب يتأخر أبد و يحب يكون منتظم في أوقاته.. نشت عواش مع وليد و لاحظت ان اخوها ما نش بعده فسوت له ريوق و لما فتح باب الحجرة ابتسمت له و هو رد الابتسامه لها و ما رام ييلس يتريق ربع باس راسها و اخذ السندويشة اللي بين ايديها كانت مسويه لنفسها هالسندويشة بس فيصل ما ترياها اخذ منها و اكله و هو يأشر لها باي..

عواش يلست تضحك عليه و بعد خمس دقايق شافت حمدة و هي طالعة من حجرتها و هي تحك عيونها و تتثاوب: صـــباااااح الخـــــير..
عواش: صـــباح النور لاحلى البنات..
حمدة يلست يدام عواش و شافت كل اللي تحبه يدامها و غاصت في الاكل و عواش تمت تطالع فيها و تقول في خاطرها: لين متى يا حمدة و فيصل بتكابرون جنه مافي شي في قلبكم على بعض.. و الله ياخوي لو ما تحركت هالبنت بتضيع منك..
حمدة لاحظت سرحان عواش و اشرت يدام ويهها و قالت: يابوووي وين سرحتي.. اللي ماخذ عقلج يتهنى به..
عواش تبا تغايضها فتنهدت و قالت: أميييييييين..
حمدة كشت على ويه عواش: مااااالت اونه اههههه اميييين..
عواش خلصت اكلها و نشت اما حمدة تمت تاكل و هي تطالع في عواش اللي تناقز و مستانسة.. حمدة: دووووم يالبقرة.. بس شوي شوي ع السيراميك..
عواش تضحك و هي تناقز لغرفتها هي و حمدة و ردت على تلفونها كان وليد يبا يطمن عليها و يرمسها دام انه فاضي..
سرحت حمدة لما شافت ان عواش دخلت الحجرة و تنهدت من كل خاطرها تتمنى اخوها ايي بأسرع وقت مب طايقة بعده عنهم و قالت: هالثور من سار هناك ما يتصل علي الا مال كم دقيقة و صار له يومين ما يكلمني ابد.. فقدته الهيس..

{بيت غانم}
كان يالس و هو يسمع كلام الحريم عن الملجة و كيف يبونها و غانم بس يهز راسه و هو بالأساس مب معاهم كان معاه اوراق الشركة و هو مركز على الاوراق و ابد مب عارف البنات و الحريم شو يقولون بس كل ما سمع حسهم هز راسه بالموافقة..

لاحظت عليه سهيلة اندماجه في الاوراق و قالت تتمصخر معاه: شو رايك تكنسل الملجة؟!
غانم منسجم و هز راسه اوكي..
راحت له صفية و قالت: ما تبا تهاني صح؟!
غانم يهز راسه بـ هيه و هو مب معاهم ابد..
ام حامد يلست تضحك عليه و تصوره تبا يكون معاها شي للذكرى و البنات كانو موافقين على هالشي..
بلقيس: ترا الملجة و العرس مصاريف و لوعه جبد صح؟!
غانم هز راسه و هم كاتمين ضحكاتهم..
بعد جملة بلقيس كلهم سكتو لانهم لو تكلمو بحرف زيادة راح يضحكون و يخربون كل شي.. تماسكت سهيلة و قالت: ياخوي بلا هم كنسل كنسل شو رايك؟!
تكلم غانم بس عقله مب معاه: أوكي أوكي..
صفية ماسكة نفسها و قالت: بس البنت بتصيح بعدين.. عااادي!!
غانم: عادي..
سهيلة: مسكينة و الله وافقت عليك اخر شي تصيحها ما يجوز..
غانم: يجوز..
عاد هني ما قدرو يمسكون نفسهم اول من ضحك هي ام حامد اللي سكرت الفيديو و هي تضحك و البنات معاها اما غانم يطالع فيهم و هو يبتسم على اشكالهم..
ام حامد: يبعت لك حمة يابني..
بلقيس و هي ماسكة بطنها المنتفخ و قالت: و الله ما توقعتك جي هههههه..
سهيلة: ههههههه تعيش و تاكل غيرها..
غانم لف على صفية و مسك اذنها و بعدها مسك اذن سهيلة و سـأل صفية: شو مسوين انتو؟!
صفية و هي تتأوه من العوار و قالت: ما سويت شي و الله..
سهيلة تضرب صفية و قالت: تحلفين بعد يالدبة..
صفية: هاي سهيلة مب انا..
غانم ضرب راسهم في بعض و قال: بتقولون و لا اعيد الحركة..
صح انه ضرب راسهم في بعض بس كانت الضربة خفيفة بس بهالحركة خافو سهيلة و صفية و ام حامد و حتى بلقيس..
ام حامد: ابني و حياة الله كنا عن نمزح معاك اتركون..
بلقيس: دخيلك ياخوي اتركهن ترانا نتمصخر وياك و لو تبا تشوف هاك فون ام حامد شوف و تأكد انهن ما سوو شي.. بس الا سوالف..
ام حامد مدت فونها لـ غانم و قالت: اتركون و امسك التلفون بس لا تمحي اي شي بدي احتفز فيه زكرى..
غانم ترك خواته و مسك الفون و هو يطالع في الفيديو كان مبين فيه و يسمع صوت خواته بس لان ام حامد ما بينت البنات لما كانت تصور.. ابتسم و هو يشوف انه مندمج و انصدم من كلام البنات و هو معاهم ما حسوو الى و هو يضحك على نفسه و البنات ضحكو معاه لان كان شكله صدق يضحك و هو مب منتبه لكلامهم..
صفية وهي تحك انها: الحين ارتحت؟!
غانم اطالعهم بنظرة و قال: تلعبون علي اوكي الايام بينا..
سهيلة: وشو الايام بينا انت الحين ريال مقبل ع الزواج ما يصير تقول هالكلام..
غانم اطالعها بنظرة و هي شردت خافت منه وايد..

الســــعودية
{بيت بو محمد}

جناح محمد
كانت نادية يالسة في الصالة و سرحانه و هي ماسكه بطنها ما انتبهت الى في محمد داخل عليها و هو متضايق.. قامت له و قالت: وش فيك حمودي؟!
محمد و هو يطالع فيها: يوسف و وجوري اليوم سفرتهم لفرنسا.. و اعمامي مب راضيين يتركونهم في حالهم..
نادية مسكت صدرها دلاله على الخوف: وش الحل؟!
محمد و هو يحط ايده في شعره: الحل انهم يتحركون من اليوم الحين بعد.. البلا في عمي بو مشاري جالس مع ابوي و ابوك و يترس راسهم في الكلام..
نادية ركضت لفونها اللي كان في حجرتها و اتصلت على اخوها: هـــلا خالد وش صار معاك؟!
خالد و هو في المطار: الامور تمام التمام لا تخافين و عطيني محمد شويات..
نادية شبه مرتاحة من كلام خالد و عطت الفون لمحمد: هلا بو الشباب ايش صار معاك؟!
خالد و هو مبتسم: الحمدلله جهزت طيارة خاصة لهم و بعد نص ساعة الطيارة حتطير..
محمد فرح: بالله تتكلم جد؟!
خالد و هو مرتاح: و الله جد الجد بعد..
محمد و هو يتنهد: ريحتني يا شيخ الا وين عيال عمي؟!
خالد و هو يحطه سبيكر: تكلم يسمعونك..
محمد حط سبيكر بدوره و تكلم: hay every body
يوسف و جوري: هايات..
نادية: هلا جوجو حبيبي اخبارك؟!
جوري: طيبة الحمدلله طمنيني عنك و عن حور..
محمد زاد على كلام جوري: وعن حبيب قلبك حمودي و النونو اللي في بطنك..
الكل ضحك عليه ردت عليها نادية: نحن بخير و الحمدلله لا تحاتينا اهم شي انك توصلين بالسلامة و ترسلين لنا عشان نتطمن عليكم..
جوري: من عيوني يا بعدهم لا تقلقين من هالناحية راح اراسلك اول ما اوصل فرنسا..
محمد سمع صوت باب الملحق و سكر السبيكر و اعطا الفون لنادية و هو سار يفتح الباب شاف فوزية و عيونها مليانه دموع..
ما حسو الى هي داخله في حضن اخوها و تصيح جنه حد ميت عندها نادية سكرت من جوري بعد ما ودعتها و ربعت صوب فوزية و هي تقول: بسم الله عليك فوز وش فيك؟!
فوزية و هي تحضن نادية: بككككرة.. بككككرة يا نادية بكككرة..
نادية و هي خايفة شو فيه باجر: وش فيه بكرة يا فوزية وش السالفة؟!
فوزية و هي تشوف محمد و نادية: بكرة كتب كتابي على عقاب يا نادية..
نادية شافت محمد المستغرب بعدها سلكت له و قالت: وش فيك خوفتيني انتي كتب الكتاب و كذا بكيتي اجل في زواجك تسوين عزا؟!
فوزية فهمت عليها و ما حبت تخرب كل شي و بالاخير هي اللي بتاكلها من امها و قالت: وش اسوي يا ندوي كل شي بسرعة بسرعة و انا من الخوف معدتي توجعني و جاتني البكية..
محمد ضرب فوزية على راسها بمزح و قال: بلا ف شكلك.. روعتينا عبالنا فيك شي او جاك شلل اطفال.. بلا ف شكلك..
نادية ماسكة ضحكتها لان شعر فوزية صار حوسة من ضرب محمد و فوزية كل شي و لا حد يخرب شعرها ما حسو الى و هي تلحق محمد و تحاول تضربه في اي شي ايي في ايدها و نادية تلحقها و تحاول تمسكها عسب ما تأذي محمد..
محمد اندس ورا نادية و قال: شوفي شكلك بالاول هههههه..
نادية ضربت ايديه اللي كانت على اكتافها و قالت: انقلع من قدامنا لا اتوطا في بطنك بدال فوزية..
فوزية صفرت و غمزت لمحمد و قالت: واحد صفر لي..
محمد كان يبي يلحق فوزية بس مسكته نادية و قالت: يالله يا نور هالبيت خالد يناديك..
محمد تذكر خالد و باس خد نادية يدام فوزية اللي استحت من حركات اخوها و سار عنهم بعد ما ضحك على شكل فوزية للمرة الالف..
بعد ما طلع محمد نادية لفت على فوزية اللي يلست و عيونها تشوف الفراغ قالت: وش فيك فوزية؟!
فوزية و هي سرحانة: اتمنى تكون حياتي زي حياتك.. حلوة و هادية و الحب مالي المكان و احس بالدفا و الحنان..
نادية و هي تحط ايدها على ايد فوزية و قالت: حبيبتي انتي تحددين هالشي.. انتي تخلين حياتك جحيم او جنه..
فوزية: بدت جدة نادية تتكلم.. افحميني..
نادية ضربتها ع الخفيف و قالت: لسه بدري على هالكلام.. الا ما قلتي لي وش راح تلبسين لبكرة؟!
فوزية وفيها الضحكة: امي ما قصرت راحت للسوق و اشترت كل شي يخطر على بالك..
نادية استغربت و قالت: لا تقولين انها اتفقت من وراك و عملت كل شي علشان ما تكنسلين او تأخرين الموعد..
فوزية صفقت و قالت: كـ أنك عرفتي كل شي..
نادية: هاي مب حالة و الله.. ليه يهمشونك و انتي صاحبة القرار..
فوزية و هي تكمل بغصه: ازيدك من الشعر بيت.. بكرة مب بس كتب الكتاب..
نادية و اطالعها يعني كملي.. فوزية: بكرة راح يلبسني الدبلة مرة وحدة و بس يبقى الزواج..
نادية: ليه ما قالت لهم ان الزواج و الملكة مع بعض دام كتب الكتاب و الدبلة في نفس اليوم وش ناطرة زوجة عمي..
فوزية: فكرتن منتازة اقول لها تسوي العرس مع الملكة و افتك من هالعيشة..
نادية ضربتها ع الخفيف و قالت: حامض على بوزك يالدبة.. نبي نفرح فيك و نسوي لك عرس لا صار و لا راح يصير زيه في المملكة..
فوزية حضنت نادية و هي تصيح..


{ بيت بو ريان }
كانت العايلة جالسة و دخلت عليهم ام عبير و وراها عبير..
ام ريان استقبلتهم استقبال حامي و شوي و تفرش لهم الارض بالورود..
ام عبير حضنت اختها اللي يشوفهم يقول من زمان مب شايفات بعض..
بعد الترحيب و صبو لهم فنجان القهوة مسكت ام عبير يد ام ريان و قالت: طلبتك يا ام ريان و لا ترديني..
ام ريان حست على اللي بتقول لها اختها بس سكتت و بعدها قالت: ما عاش من يردك يا ام عبير بس لؤي لا تجيبين طاريه..
ام عبير: وه يا ام ريان هذا ابنك من لحمك و دمك..
ام ريان: و اللي سواه شي سنع؟!
ام عبير: لا يا ام ريان لا تشيلين بقلبك على لؤي ترا ما ارضى عليه..
ام ريان و هي تناظر في عبير و تقول: وش قولك يا عبير امك ما ترضى على لؤي وانتي اللي اكلتيها..
عبير بـ ابتسامة مجاملة و قالت: مثل ما قالت امي ما نرضى على لؤي.. خالتي امانة لا تردين طلبنا لو لي عندك خاطر ترجعين لؤي لاحضانك..
ام ريان و دموعها تنزل: انتو على بالكم تهنى لي النومه و هو بعيد عني.. بس وش اسوي دامه لعب بقلب البنت و هم حتى ما تعرفو على بعض و بدون سبب هذا اللي قطع قلبي..
عبير: خالتي اكيد ما شافني اناسبه او لما كلمني و تعرف علي ما ارتاح ما تعرفين و دام اننا على البر ليه نزعل و نتضايق..
ام ريان: وين اودي وجهي منكم يا ام عبير عليكم قلب مثل البلسم ما يشيل على احد..ربي يفرح قلبكم دوم..
ام عبير: امين و نفرح في عبير و لؤي و ننسى اللي صار و لا نفتح الموضوع مرة ثانية..
ام ريان شافت ام عبير و لاحظت انها تمد لها تلفون البيت و قالت ام عبير لاختها: امسكي و انا اختك و اتصلي على لؤي حبيبي و خليه يرجع ترا مافي شي في قلبي و لا قلب بنتي عليه و حرام اللي تسويه فيه..
ام ريان خذت التلفون و اتصلت عليه و ياها صوته و هو يقول: هلا بـ أغلى ناسي طولتي الغيبة عني.. و الله اني الغلطان و استاهل بس ما توقعت ان قلبك كذا قاسي و شايل علي..
ام ريان تمت تصيح هالولد الوحيد من عيالها قريب منها و من قلبها.. لما ما سمع ردها تنحنح و دخل الصالة و ام ريان تفاجأت انه موجود يدامها و قالت: انت من متى و انت هنا؟!
لؤي و هو يبوس ايدها: انا كنت مع خالتي ام عبير و نحن جايين لعندك تراها هي اللي اجبرتي اجي معاها..
ام عبير: و انا اشهد اني تعبت و انا احاول فيه يجي معاي و هو مب راضي.. راسه يابس مادري طالع على مين..
ام ريان حضنت لؤي و هي تصيح و قالت: ربي لا يحرمني منك و الله اني نسيت الزعل الله يسامح من كان السبب في دمار حياتك و حياة عبير..
لؤي و هو سرحان و قال: لا تقولي كذا محد تدخل في حياتي و انتي تعرفين هالشي يا ام لؤي..
ام ريان: انقلع تروش و بدل ملابسك و تعال عشان نحط العشا و ناكل مع بعض..
لؤي باس ايد امه و راح ركض على حجرته عسب يتسبح و يرتب اغراضه و يبدل ملابسه و يرتاح..


نهاية البـــارت..


مجنونه هواك ©؛°¨غرامي مشارك¨°؛©

أنا آســـــــــفة..


أعاني من اللاب توب.. رجع اخترب الميموري و الحين يالسة أحاول اكتب و اكمل البارتات اللي كنت كاتبتهم..
السموحة منكم..


لصمتي حكايهه ©؛°¨غرامي مشارك¨°؛©

المشاركة الأساسية كتبها مجنونه هواك اقتباس :
أنا آســـــــــفة..


أعاني من اللاب توب.. رجع اخترب الميموري و الحين يالسة أحاول اكتب و اكمل البارتات اللي كنت كاتبتهم..
السموحة منكم..




حبيبة قلبببي. اشتتتقققتت لككك ولبارتاتكك واخيييراااا نزلتي باارت..... فررحتتت بقوووه...

الباارت جمييييل وغاامض.. للحين ودي اعرف ايش سر كره الاعمام ل جوري ويوسف..خايفين ع الورث؟!

يظل حبايب قلبي دايما حمدة وفيصل يارب يصيرو لبعض.

بانتظاركك غناتي حددي مواعيد للبارتات... او خليها كل نهايه اسبوع عشان تعب الدراسة وغيره..

يالله مرره فرحت بالبارت.. خفت تطوووولي او توقفي الرواية..


دمتي بود

لصمتي حكايهه

لصمتي حكايهه ©؛°¨غرامي مشارك¨°؛©

مجنونتي وينكك طووولتي طمنينا عنكك غلاتي ...عسى المانع خير

اشتقت لكك كثييير ياقلبي لك شهرر نقريبا مالكك حس بالمنتدى

لصمتي حكايهه ©؛°¨غرامي مشارك¨°؛©

كل عام وانتي بخير بمناسبة السنة الجديدة مجنونتي ,عسى اختفائك خير طمنيني

لصمتي حكايهه ©؛°¨غرامي مشارك¨°؛©

مجنوونه هواااكك وينككك خوفتينا عليكك طمنينا. مشتاقين لرجوعكك والرواية بعد..

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1