Shahd_139 ©؛°¨غرامي جديد¨°؛©

السلام عليكم ورحمة الله وبركاته
هذي اول مشاركه لي في منتداكم الجميل واللي صرت الحين من عايلته حبيت ابتدي بروايه بعنوان " اذا مو عاجبك نتف حواجبك"بقلم خالتي ندى وهذي اول تجربه لها واتمنى انها تعجبكم ، ماراح اكثر واتركم مع الشخصيات


الشخصيات:

بيت الجد ( ابو ناصر) :
الجد"محمد" الجده"لولوه"

بيت ناصر ( الولد الكبير ) ابو خالد: صاحب شركه مقاولات
زوجته ام خالد : صاحبه جمعيه خيريه
خالد : 23 سنه يدرس اداره اعمال اخر سنه ابيض طويل ومعضل له هيبه حنون على اهله يحب الكشخه وا[/size][/size]لطلعات والسهره
جنان: 19 سنه تدرس جامعه رياض اطفال في اول سنه بيضه وطولها حلو رشيقه شعرها لحد اكتافها عيونها بني فاتح تعشق البزران ومقرره تجيب عشره اذا تزوجت
مرام:16 سنه تدرس اول ثانوي شعرها قصير لنهايه رقبتها وعيونها واسعه وسوده عربجيه وهبله الي يشوفها يقول ولد

بيت ابو مؤيد ( الولد الثاني) : صاحب سلسله فنادق
زوجته ام مؤيد : دكتوره عظام
مؤيد : 23 سنه يدرس اداره اعمال اخر سنه طويل ومعضل اسمراني عيونه واسعه عسليه رزه وكشخه يحب السفر واغلى شي عنده كاميرته
مي:18 سنه تدرس ثالث ثانوي طويله وبيضه شعرها لنص ظهرها وبني فاتح عيونها واسعه وعسليه ناعمه وحنونه وحبوبه وطموحه
رانيا :15 سنه تدرس ثالث متوسط قصيره ونحيفه شعرها كثيف و طويل لنهايه ظهرها وعيونها واسعه رماديه على اهل امها شاقه الارض وطالعه منها صاحبه مشاكل واكبر شله في المدرسه مقومه قيامه المدرسه
رائد:14 سنه يدرس ثاني متوسط ابيض وعيونه عسليه من عشاق البلاستيشن والكمبيوتر وهالشغلات عدو رانيا اللدود

بيت ام سالم ( البنت الاخيره) : ربة منزل
ابو سالم : صاحب مزرعه كبيره يتاجر فيها
سالم :29 سنه متخرج من جامعه المحاماة اسمراني طويل ومعضل عيونه بني غامق عاقل ومتفهم يفكر قبل ما يسوي متزوج اسيل عمرها 27 سنه وعندهم ولد اسمه ياسر عمره 5 سنين وبنت اسمها ساره عمرها 2
محمد:18 سنه ثالث ثانوي ابيض طويل ومعضل وعيونه بني فاتح عكس اخوه الكبير مغامر ويسوي قبل ما يفكر مزعج درجه اولى
شذى:17 سنه ثاني ثانوي بيضه طولها حلو جسمها رشيق شعرها لاكتافها هادئه ومسالمه خجوله
شهد :15 سنه تدرس ثالث متوسط قصيره ونعومه بس عربجيه من عصابه رانيا ولا يوم ما زارت فيه الاداره
رشا: 13 سنه تدرس في اول متوسط نحيفه كثير وهذاره وتعشق رائد ولد خالها الي معتبرته زوجها المستقبلي

وليد ( اخر العنقود) : 25 سنه دكتور باطنيه ابيض وطويل ومعضل مغزلجي درجه اولى مافيه ممرضه ولادكتوره سالمه منه

بيت الجد (ابو ماهر ):
الجد"راشد" الجده" نوره"

بيت ماهر ( الولد الكبير ) ابو طلال : صاحب شركه هندسه معماريه
زوجته ام طلال:ربة منزل
طلال :24 سنه يدرس هندسه معماريه في كندا اسمر طويل ومعضل جذاب بنات كندا خاقين عليه طبعاً هو متكبر عليهم ومغتر
ندى:17 سنه ثاني ثانوي بيضه ورشيقه وعيونها واسعه ورماديه ناعمه وهادئه وخوافه وصياحه
نور :15 سنه ثالث متوسط قصيره ونعومه وشعرها طويل وعيونها بني من تابع عصابه رانيا وشهد هم يخططون وهي تنفذ
لؤي:14 سنه في ثاني متوسط صديق رائد الروح بالروح

بيت ام فيصل ( البنت الثانيه):
ابوفيصل:صاحب معمل ذهب
ام فيصل: صاحبه دار رعايه المعاقين
فيصل:22سنه يدرس اداره اعمال ابيض ومعضل حركاته من تحت لتحت و دايم يطلع برائه من المشاكل مثل الشعره من العجين
دانه :18 سنه في ثالث ثانوي عاقله وهادئه ونعومه اخوها التوأم عبد لله عكسها ميه وثمانين درجه مزعج ودايم يطقها

بيت ريهام (البنت الثانيه):
ريهام:27 سنه متزوجه وعندها ولد صغير اسمه حمد عمره 4 سنين وحامل بشهر الثامن
زوجها علي : 30 سنه تاجر بشتري من اوروبا ويبيع في السعوديه

سعود( اخر الاولاد) : 25 سنه مسوي شراكه مع زوج اخته علي اسمر جذاب له هيبه بس فكاهي ويحب الضحك والوناسه

سوسن( اخر العنقود): 24 سنه مخطوبه نعومه وجميله رومانسيه بزياده وحساسه اسم خطيبها مشعل

ملاحظه:( بيت الجد ابو ماهر يكون بيت اهل ام مؤيد يعني خوال وخالات مؤيد ومي ورانيا ورائد، ملاحظه ثانيه الجد راشد والجد محمد اخوان)

فطيمآه ©؛°¨غرامي نشيط¨°؛©

ههههههههه العنوآن جذآب أنتظرك بس عندي أقترآح

أن ماتعرفين العوآئل كيذآ مثلآ كل واحده يصير موقف تعرفينه

،

qwert.1 ©؛°¨غرامي مشارك¨°؛©

انتظر البارت .. الاول عشان اقدر احكم .. .علماً اني سحبت على الشخصيات ..
موفقه بروايتك

Shahd_139 ©؛°¨غرامي جديد¨°؛©

بيت ابو مؤيد.. ام مؤيد جلست من الصبح الساعه خمس لانه وراها دوام وطبعاً جات اكثر المهام صعوبه يومياً الي هو تجليس عيالها من النوم للمدرسه ، ام مؤيد نادت الخدامه : ميني مني
الخدامه ميني وهي تهز راسها : نعم ماما
ام مؤيد: روحي جلسي العيال للمدرسه
الخدامه ميني وجات لها غصه: لاماما انا مايبي هذا في طوقه انا
ام مؤيد : ماعليه روحي تتعودي مع الايام
الخدامه : حاضر ماما
صعدت الخدامه لفوق عشان تجلسهم من النوم وهي تدري ومتاكده شنو ينتظرها وقفت في وسط الغرف : انا مين يبدا يجلس فيه اهه اجلس مي اول
راحت لاكثر وحده مسالمه في البيت وطقت الباب ودخلت : مي مي قومي للمدرسه يلا قومي
مي : انزين انزين الحين بقوم طلعي وسكري الباب
ميني: حاضر
طلعت وراحت عند غرفه مؤيد طقت الباب : مؤيد مؤيد يلا قومي للمدرسه
وفتحت الباب شوي شوي وقلبها شوي وينط من مكانه دخلت : مؤيد
الي هو طالع من الحمام :قاعد قاعد ظفي وجهك
طلعت الخدامه من الغرفه وراحت عند رائد وقلبها كل ماله و تزيد دقاته دخلت والنور مطفا شغلته وقربت من السرير ماشافت احد : رائد رائد وين انتي انتي في يقعد
ماشافت الا ويد تمسك رجلها فجأه ويطلع صوت غريب ويمممه صرخت صرخه هزت البيت ذيك الساعه طلع رائد من تحت السرير وهو ميت عليها من الضحك اما الخدامه ميني جاتها ام الركب << مسكينه ما تنلام
طلعت ميني من الغرفه وهي تسمح بدموعها وراحت لغرفه رانيا فتحت الباب بهدوء وقربت من السرير شافت البطانيه نصها على الارض والمخده طايحه ورانيا بوضعيه الله لا يوريكم ايها رجل في الشرق ورجل في الغرب وشعرها كشتن قايمه مب قاعده قربت منها ميني بهدوء : رانيا رانيا رانيا يلا قومي للمدرسه >> تطلع منها الكلمه بالغصب
شافتها ما تحركت لمستها بخفيف: رانيا رانيا
رانيا رفعت راسها وشعرها مغطي وجهها وبعصبيه : خير خير شتبين
ميني: مامت يقول يلا قومي للمدرسه
رانيا : مابي اروح خلاص ذلفي
ميني: لا مايصير انت ما فيه يروح مدرسه
رانيا : هي الشغله غصب يلا بس وريني عرض اكتافك
ميني : بسس
رانيا: اووففف
قامت رانيا من على السرير واخذت المخده من على الارض وصفعتها في وجه ميني : قمت قمت ها شوفيني ارتحتي الحين
ودخلت الحمام الخدامه طلعت من الغرفه ما تدري شنو تحس فيه بالظبط تصيح على هالاهانات ولا انتهت المهنه الصعبه هاذي
تجهزوا كلهم ونزلو لتحت للفطور
مي باست راس ابوها : صباح الخير يبه
بو مؤيد: صباح النور
نزل بعدها مؤيد وباس راس ابوه : صباح الخير
بومؤيد: يا صباح النور
دخلت ام مؤيد قامو مي ومؤيد وباسو راسها وصبحو عليها
ام مؤيد : وين رانيا؟
مؤيد: شتبين فيها هالنفسيه خلينا رايقين من الصبح تجي تكدر علينا الجو
مي وافقته الراي : اي والله الحين تلاقينها نايمه في الحمام
رانيا طبعاً مثل عوايدها واقفه ورا الباب تتسمع قبل ماتدخل اذا كانو يتكلمون عنها ولا لا غيرت نفسيتها ودخلت بكل روقان مصطننع متعوب فيه نزلت : قووود مورنييق ، وباست راس امها وابوها
مؤيد بطنازه : اسمع رانيا تتكلم انجليزي انتي ما تعرفي شنو يسبق الالف ولا البا من وين متعلمه قود مورنينق هههههااي
رانيا وهي ماره عطته صفعه اليمه على كتفه كسرته
مؤيد :وجع كسرتي كتفي شاك انك بنت انتي والعيال واحد
رانيا قعدت بهدوء وروقان ووطنشته
نزل رائد ويحاول تصنع التعب : يمه تعبان
ام مؤيد بخوف : شفيك حبيبي فيه شي يألمك
رائد : اي بطني يعورني
ام مؤيد: طيب تجي معاي اليوم المستشفى نشوف شفيك
رائد : لا لا مابي بس بنام شوي وارتاح
رانيا: يمه ترى يكذب بس يبي يغيب ولا هو ما فيه شي
بو مؤيد :لا تقولين كذا عن اخوك شوفي مو واضح انه تعبان؟
رانيا:لا انا ما اشوف شي بس اذا كذا حتى انا تعبانه مابروح ابغى انام ولا هالسوالف ما تمشي عليكم الا من حبيب القلب
مؤيد : مي تشمي شي؟
مي : ها شنو؟
مؤيد : اشم ريحه شي مدري شنو اهه عرفته اتوقع اسمه غيره
مي: ههههههههههههه
مؤيد: روين لا تغاري حبيبتي
رانيا: من قال اغار ..
مؤيد: اي اي واضح
رانيا وشراره طالعه من عيونها ودها تقوم وتذبحه
بو مؤيد: خلاص خلاص قوم يبه مؤيد بتتأخر على اختباراتك
مؤيد قام واخذ كتبه : يلا ادعولي
ام مؤيد :ربي يشرح صدرك ويسر امرك
بو مؤيد: الله يوفقك يبه

Shahd_139 ©؛°¨غرامي جديد¨°؛©

مؤيد بطنازه ويقلد صوتها :قود باي رانيا
رانيا تنهدت: درب السلامه
ام مؤيد: وانتي قومي يلا
رانيا قامت : ان شاء الله
راحت ولبست عبايتها وشنطتها وطلعت
بيت ام سالم .. شهد مو قادره تفتح عيونها من النوم وفيها غصه ودها تبكي: يمه ما ابغى اروح
ام سالم: لا مافي غياب غبتي كثير هاذي السنه
شهد : نهاية السنه مو مهمه
ام سالم: بالعكس النهايه هي المهمه فيها تأشير و حذف و..
شهد قاطعت كلام امها : ومراجعه وانا من اقول لك بغيب عدتي لي نفس الاسطوانه تراني عارفتها وحافظتها
ام سالم : ومدام تعرفي شنو بقول ليش مزعجتني من الصبح بغيب بغيب
شهد : يمممه
ام سالم عصبت : خلاص شهد قلت لك مافي غياب يعني مافي
شهد يوم شافت امها بدت تعصب انحاشت ماشافو الا غبرت رجولها لانها تعرف اذا امها عصبت شتسوي
نزلت شذى : يمه شفيكم اصواتكم واصله لاخر الشارع ؟
ام سالم: شسوي بعد مع اختك كل يوم بغيب و بغيب
شذى: ووينها الحين؟
ام سالم : طلعت
شذى بصدمه : هاااه طلعت ؟
ام سالم : شفيك تصرخي اي طلعت تنتظرك في السياره
شذى: اي تتظرني الحين تلاقينها مشت عني
طلعت شذى بسرعه لعل وعسى تلحق عليها
شذى : اففف
ام سالم : ها لحقتي عليها؟
شذى: لا مشت الله يهديك يمه يعني ما تهاوشينها الا مثل هالاوقات هي نفسيه الصبح ما تتحاكى
ام سالم: خلاص يمه خلي السايق الثاني يوصلك
طلعت شذى وقالت للسايق الثاني يوصلها مع انه ما تحب تركب معاه لان ريحته خايسه وطول الطريق يا هذره يا يغني بس شتسوي اذا كان الهوى ضدها .. بيت ابو طلال ..
ندى جالسه تجهز شنطتها للمدرسه وامها جالسه جنبها تفطر
ام طلال: ندى وين اختك للحين ما نزلت ؟
ندى: نايمه
ام طلال : للحين؟ ترى بتتأخرون على المدرسه
ندى: شسوي لها حاولت اجلسها بس مو راضيه ما نامت الا الساعه ثلاث الفجر
ام طلال: ان لله وانا اله راجعون مدري شسوي مع هالبنت
ام طلال ما فكرت ولا مجرد تفكير ان تروح وتجلسها لان تعرف بنتها عنيده وراسها يابس واذا قالت ما بتروح يعني ما بتروح
في المدرسه المتوسطه .. المدرسه فاضيه مافيها الا كمن بنت ينعدون على الاصابع
رانيا: هلا شهود
شهد:هلابك حبي
رانيا: شوفي المدرسه فاضيه حتى شلتنا نصهم غاييبين حسبي الله عليهم
شهد: شايفه جميلتي شايفه
رانيا: صايبتي اليوم كآبه حتى بطني عورني
شهد : يا بعد قلبي حتى انا حاولت في امي عشان تخليني اغيب بس مارضت
رانيا : وين نور شفتيها اليوم؟
شهد : لا
رانيا : تعالي نسأل عنها يمكن احد شافها
شهد: لا يكون غايبه
رانيا شهقت: والله لو انها مسويتها لاقبرها
راحو وسألو البنات قالو انهم ماشافوها يعني غايبه الحلوه
شهد: حسبي الله عليها ولا تقول مخليتنا نجي في هالحر وهي متنعمه تحت المكيف
رانيا: ع اساس عمتي بترضى لك تغيبين ها؟
شهد: اهه عاد رانيا لا تزيدينها علي اليوم شوي وتكفخني
رانيا: تعالي بس نسيت كنت بسألك جبتي الي خبري خبرك؟
شهد : شنو ؟
رانيا: شنو الي شنو؟
شهد : شنو الي خبري خبرك؟
رانيا : الي متفقين عليه
شهد: ايي لا تقعدين تكلمين بالغاز مره ثانيه ترى مخي متنح اليوم اي اي جبته
رانيا : وانتي متى تعدل مخك زين اجل موعدنا في الفسحه
شهد : اوك
رانيا: تعالي ندخل الفصل عن الحر

Shahd_139 ©؛°¨غرامي جديد¨°؛©

دخلو شهد ورانيا الفصل وكان فاضي ما فيه الا عشر بنات غيرهم ، و مرت اول ثلاث حصص بملل وطفش وخمول وجات واخيراً الفسحه الي برفهون شهد ورانيا عن انفسهم شوي طلعو من الفصل وراحو بسرعه ورا المدرسه
شهد طلعت جوالها: اه واخيرا تعال ياحبيبي اشتقت لك
رانيا: بفتح الواتس اكلم الزفت نوير
شهد بابتسامه عريضه شاقه وجهها : انا بفتح الانستقرام بشوف الصوره الي امس نزلتها كم لايك حصلت
رانيا: الخايسه شكلها نايمه ما ترد ( تكلم الجوال عند محادثه نور) والله ما اخسر عليك رصيد يا ... استغفر الله العظيم
خلتني اسب اليوم واجد حسبي الله عليها
شهد فجأه انفجرت ضحك: هههههههههههههههههههههههههههههه
رانيا انجلطت في مكانها من هالضحكه الي هزت المدرسه : وجع بسم الله يا الحيوانه وش هالضحكه الي قعدت جده ابوي من قبرها
شهد ميته من الضحك : يوجعك
رانيا سحبت الجوال من يد شهد : اشوف شنو الي ضحكك كذا
شهد : شوفي الجني يسور شمسوي
رانيا شافت شكله وماتت ضحك : شلون كذا
وجلسو شهد ورانيا ضحك وسواليف ومايدرون ان في وحده مراقبتهم من بعيد
في مدرسه الثانوي .. في فصل اولى ثانوي من ناحيه بنات جالسين ياكلون الكتب اكل الي تذاكر رياضيات والي قاعده تحفظ ادب والي قاعده تدرب فيزيا عاد الدفاره خلوهم على جنب اما من ناحيه ثانيه بنات اكل ورق عنب وشيبسات وبيبسي والي تشخبط على الجدران والي تكتب اشعار ورومانسيات و الي تحط مناكير وتسوي شعرها و البويات مع الحب حقهم قاعدين في الزاويه .. مرام قاعده مع شلتها في اخر الفصل على الارض وضحك وسواليف واكل ومطنشين ام الدراسه ولا هامهم ان باقي اسبوع على الاختبارات النهائيه ..
نروح لفصل ثاني ثانوي والتحديد فصل ندى وشذى الي جالسين قدام بعض ويرتبون جدول المذاكره
شذى: ندى حبيبتي شرايك تجين بيتنا ونذاكر مع بعض ؟
ندى : والله فكره حلوه نساعد بعض في الاشياء الصعبه
شذى : خلاص اجل نبتدي من الليله؟
ندى : لا الليله راحه نبتدي من بكره
شذى : اوك ، طيب نرجع للجدول شنو اخلي اول ماده ؟
ندى : انا اقول فقه شرايك ؟
شذى : امم
وجلسو شذى وندى يخططون لجدول المذاكره
اما فصل ثالث ثانوي البنات في حاله توتر وخوف هاذي اخر سنه..
دانه بنبره بكى : مي والله خايفه احس نفسي برسب
مي ودها تنفجر بكى : لا لاتقولين كذا ان شاء الله بننجح
دانه : شوفي هاذي المسأله مو فاهمتها تعرفينها؟
مي سحبت الكتاب : اشوف ، لا معرفها
دانه : لا لا بنرسب بنرسب
مي: دندون خلاص لا خوفيني تعالي نروح عند ميس تفهمنا
وقامو مي ودانه عند ميس دفره الفصل .. نرجع للمتوسط ..
رشا راحت المقصف وشرت لها اكل وبعدين راحت تدور على شهد ورانيا وتوقعت على طول بما ان اليوم اخر يوم اكيد جابو جوالتهم وقاعدين الحين ورا المدرسه ، راحت لورا المدرسه وشافت بنت واقفه بعيد قربت منها
رشا : حصه ؟
حصه : هلا رشا
رشا: وش تسوين هنا؟
حصه: لا لا ولا شي انا رايحه الحين
وانحاشت بسرعه اما رشا راحت ركض للبنات
رشا: بنات بنات
شهد : خير خير
رشا: شفت حصه قبل شوي واقفه من بعيد وتراقبكم
رانيا شهقت: لا يكون تروح وتقول للاداره
شهد : خليها تفكر انها تروح لانسيها حليب امها
وبعد خمس دقايق ماشافو الا الاداره فوق راسهم وسحبوهم للمديره
رانيا برائه:ابله والله ما عندنا جوالات
المديره صرخت: لا تحلفين كذب
رانيا: ابله والله مو كذب
المديره : وترجع تحلف ، لا تحلفي
رانيا بفهاوه : ابله والله حصوه ويه اقصد حصوه كذابه
المديره بشك : وانتي وش دراك ان حصه هي الي اشتكت
رانيا بوهقه ما عرفت شتقول : ااه لان
شهد داخله عرض: لان هي مراقبتها لا لا قصدي مهددتنا ان تطلع علينا اشاعه مثل كذا
المديره : طيب خلصونا طلعو الجوالات
رانيا: ابله ماعندنا
المديره صرخت : يا بنت احسن لكم تطلعون ولا لي تصرف ثاني معاكم
رانيا: شنو يعني بسوين ها شنو؟
المديره عصبت : تكلمي معاي بأدب

Shahd_139 ©؛°¨غرامي جديد¨°؛©

شهد : ابله البنت ما قالت شي بس تسأل اذنبت ولا شنو؟
المديره وطلع الشرار من عيونها : شهد بلى قلة حيا
شهد تكلم رانيا بصوت خفيف : وي شكلها عصبت شوي وبتكفخنا
رانيا:الا بتذبحنا
المديره : يا استاذه موزه بعد اذنك فتشي البنات
استاذه موزه : حاضر
قربت ابله موزه من البنات وكلمت شهد : افسخي المريول
شهد بحركه سريعه حطت يديها على صدرها : ابله وش بتسوين فيني؟
ابله موزه: يا شهد وش هالتفكير الي عليك
شهد : ابله انتي الي تفكيرك منحرف
ابله موزه : عيب يا بنت ادري انك لابسه بنطلون تحت المريول يلا ارفعي اشوف جيوبك
شهد رفعت المريول وابله موزه فتشت جيوبها ما لقت شي وجا الحين دور رانيا
ابله موزه : يلا يا رانيا ارفعي
رانيا:ابله مايصير
ابله موزه : وليه ان شاء الله؟
رانيا: ما وصلك الفيديو في الواتس اب الي يقول جسمي خاص بي لا تسمح باحد ان يسلمه مدري شنو
ابله موزه : ايوه عرفته
رانيا تتبيقر : ايه هذا شسمه عشان كذا ما ابيك تلمسيني عيب الفيديو بس قال امك وابوك والطبيب
ابله موزه : اقول ارفعي وانتي ساكته احسن لك
رانيا رفعت مريولها وموزه فتشتهت بس ما لقت شي
ابله موزه تكلم المديره :استاذه ما قليت شي
المديره : ارسلي بنت تجيب اغراضهم
ابله موزه : حاضر
ابله موزه ارسلت بنت عشان تجيب شنطهم وتفتشهم بعد ما جابوهم مالقت ولا شي المديره هنا طلعت لها قرون
المديره: انتي وياها يا تقولون وين حطيتو الجوالات والا بتصل على اهاليكم
شهد تكلم رانيا بالخفيف: مسكينه تفكر قاعده تخوفنا
ابله موزه : استاذه هم عندهم قريبه هنا في المدرسه في اولى اسمها رشا يمكن عاطينها الجوالات
شهد تكلم رانيا بالخفيف: وي شوي وبينقلبون لنا محقق كونان
رانيا حاولت تكتم ضحكتها
المديره : طيب نادوها لي
وارسلو بنت لرشا وهي مسكينه بعد عمري اول ماسمعت ان الاداره طالبتها جاتها ام الركب
دخلت رشا الاداره وهي ترتجف مو متعوده على هالمواقف
المديره : تعالي يا رشا
رشا وهي تبلع بريقها : نعم استاذه استاذه والله انا ما اعرف شي وقسم بالله انا كنت طول الفسحه في الفصل مع صديقاتي وناكل ونسولف ما طلعت ابد من الفصل الا يوم كنت بروح الحمام والله
المديره بصوت عالي: خلاص يا رشا من دخلتي وانتي مشتغله هذره انا ما سألتك عشان تقصين لي قصه حياتك
رشا وعيونها في الارض : اسفه
شهد بصوت خفيف : حسبي الله عليك حتى اختي ما سلمت منك
المديره تكلم شهد: وش قلتي حضرتك؟
شهد : ها انا؟ لا ماقلت شي
المديره تكلم رشا: يعني انتي ما تعرف شي عن هذا الموضوع؟
رشا: لا ما اعرف
المديره : طيب روحي
رشا طلعت من غرفه المديره وارتمت في حضن صديقتها تبكي >> حسبي الله عليها من مديره
اما رانيا كانت في حاله هستيريا من الضحك بشكل مو طبيعي
شهد : بسك بسك ضحك
ورانيا تسمح دموعها من الضحك: والله احنا طايحين في موقف ولا اروع ههههههاااي
والاداره رايحين وجايين وتحقيق مع فلانه وعلانه بس كل شي راح هباءً منثوراً
رانيا: ابله تعبت رجولي
المديره : عساك الكسر
شهد بصوت خفيف : فيك يا رب
المديره : خلاص روحي انتي وياها على الفصل لا يمين ولا يسار
شهد : ان شاء الله ان شاء الله
وطلعوا من غرفه المديره
رانيا انفجرت ضحك
شهد : وه واخيراً لوعت كبدي وانتي متى ان شاء الله بتخلصي هستيريتك
المديره سمعت اصواتهم طلعت من غرفتها معصبه : بنات ليش واقفين هنا انا موقلت لكم على الفصل
رانيا وشهد طنشوها ومشوا عنها وهي ما خلصت كلامها وراحو لرشا يشوفونها ..
وصلو لفصل رشا شافو عندهم ابله ، رانيا : ابله ابغى اكلم بنت عمتي
ودخلت على طول لرشا
الابله : هي هي انتي وين رايحه
رانيا : ابله قلت لك بكلم بنت عمتي رشرش
الابله : ايوه من سمح لك تدخلي ؟
رانيا غمزت للابله: لا ابله هالحركات مو بينا
الابله عصبت من حركة رانيا راحت لها وسحبت مريولها من كتفها وطردتها بره الفصل
بعد خمس دقايق دخلت شهد : ابله ممكن لو سمحتي ها يعني لو سمحتي عادي اكلم اختي رشرش ااه قصدي رشا
الابله بدون نفس : طيب ادخلي
شهد : لا ابله هي الي خليها تطلع
الابله تكلم رشا: قومي اطلعي لها دقيقتين بس مو اكثر
رشا قامت : ان شاء الله >> مأدبه
طلعت رشا بره الفصل وعطت كل وحده صفعه اليمه : يا الزفت انتي وياها طيحتوني في مشكله كان رحت فيها بشربت مويه
رانيا ردت لها الصفعه : يلا بس ما عليه مع الزمن بتتعودي

Shahd_139 ©؛°¨غرامي جديد¨°؛©

رشا: طيب والحين شفيكم وش تبغون؟
شهد : بس سلامتك حبينا نطمن عليك
رشا فتحت عيونها بصدمه : بس هذا الي تبغونه
رانيا بابتسامه شاقه وجهها وترامش بعيونها ببرائه : اي
شهد : ليه ان شاء الله شنو منتظره منا
رشا: تعويض
رانيا بصدمه : اسمع ما بقى الا انتي بعد تطلبي منا تعويض طيري بس
شهد تكلم رانيا : سكتي انتي شوي ( لفت على رشا) ايوه وانتي حضرتك شنو التعويض الي تبغينه؟ << قالتها بطنازه
رشا: والله هو يعني المفروض شي ثمين بس بتعاطف معاكم شوي و..
رانيا عطتها صفعه على راسها : بلى مقدمات وخلصينا قبل ما يخصلو الدقيقتين
رشا : افف انزين انزين ابغى من باسكن والبقاله واشياء ثانيه بس بعدين افكر فيها
شهد : اي اجل اذا على كذا عمرنا ما بتخلص
طلعت الابله من الفصل : رشا ادخلي الفصل وسكري الباب
رشا: ان شاء الله ابله
الابله قعدت تطالع رانيا باحتقار وطبعاً رانيا ما تعرف تسكت بمثل هالمواقف
رانيا تطالع في الابله بنفس النظرات وبابتسامه على جنب : خير وش هالنظرات الي على فيسك ؟
الابله تنرفزت بقوه من اسلوب رانيا : قلة حيا( ومشت عنها )
رانيا رفعت صوتها: ومنكم نستفيد << ماخذه راحتها بزياده لانها اخر سنه
رجعو شهد ورانيا لفصلهم واول ما دخلو كان الفصل فيه ابله
الابله: وين كنتو حضراتكم؟
شهد بصوت خفيف : اففف شكلنا مطولين
رانيا تكلم الابله : ابله الله يخليك اذا كنتي بتهاوشينا اجليها والله اليوم انزفينا واجد وانمسحت بكرامتنا الارض
حتى طق انطقينا
شهد : ابله سامحينا اليوم بس وخلينا نقعد والله رجولي تكسرت من الوقفه في الاداره ( وبنبره بكى ) ابله تخيلي ساعه ونص واقفين وتهزأ فينا المديره والله حرام مزلومه انا >>>اما البنات ميتين ضحك بشكل موطبيعي على الاسلوب الحماسي الي يكلمون فيه الابله والي يعتبرون شهد ورانيا نكتت الفصل
ابله : طيب طيب خلاص بلى دراميات اجلسو
رانيا: وي حبيبتي ابله لطوف كم اعشقك
الابله استحت وقالت : خلاص اجلسي
ادخلت اداريه : بنات بوزع الحين جداول الاختبارات عليكم كل وحده تدخله على طول في الشنطه لا يضيع وذاكرو زين ما نبي نشوف ولا وجه وحده منكم السنه الجايه
شهد بصوت خفيف: اشك في هالشي
الاداريه : في غياب؟
رانيا: اي استاذه بنت خالي غايبه
الاداريه : طيب خذي جدولها وصليه لبنت خالك
رانيا : اي افكر في الموضوع وارد لك خبر
الاداريه : بشنو تفكري؟
رانيا: لا لا ولا شي
الاداريه طلعت شوي وتذكرت ورجعت : بنات الخروج اليوم الساعه ظ،ظ،
وقام الصراخ في الفصل والتصفيق والتصفير والي انزلت دموعها من الفرح
اما شهد الي كانت ما غير قاعده وتتحلطم كانت ردت فعلها اقوى شي
نقزت من كرسيها للاداريه : وي ابله احبك احبك والله لاعطيك بوسه على هالخبريه تعالي
الاداريه استحت : لا لا ما يحتاج
شهد : الا لازم ( وعطتها بوسه من راسها ) << مصره مسكينه والله ما تنلام
شهد: رانيا معاك ساعه ؟
رانيا: اي معاي
شهد : طيب كم؟
رانيا: مالي خلق اشوف بعدين ما تمشي الساعه
شهد سحبت يد رانيا :اشوف ، الساعه ظ،ظ  ونص سمعي اجل انا الحين بنام وقعديني بعد نص ساعه مو تخليني مثل عوايدك وتنحاشي من تسمعي طاري روحه البيت يطير عقلك
رانيا: طيب
ويوم صارت الساعه ظ،ظ، ودق الجرس قامو البنات ركض ورانيا اخذت شنطتها وطلعت بسرعه ماشافو الا غبرت رجولها اول ما وصلت للساحه تذكرت شهد نايمه في الفصل رجعت لها
رانيا: شهود شهدان شويهد
شهد : اممم
رانيا: يلا قومي دق الجرس
شهد : ليش ؟
رانيا: عشان نروح البيت
شهد : ها؟
رانيا تصرخ : شهدوه وجع قومي يلا بنروح البيت
شهد استوعبت : ها صار على البيت يوه الفصل فاضي ليش ما قعدتيني؟
رانيا بابتسامه شاقه وجهها: نسيتك
شهد قامت واخذت شنطتها : اي انتي ما منك امان
وطلعو من الفصل وقفو في الساحه يلبسو عباياتهم وشيلهم جات لها ابله
الابله: اتصلتو ؟
شهد: لا
الابله: اجل روحو اتصلو
رانيا : لا محتاج
الابله: ليش ما يحتاج شلون بتروحو البيت ؟
رانيا استوعبت : اهه ايه لان انا اتصلت من قبل بس شهد ما تدري كانت نايمه
الابله : اهه طيب

Shahd_139 ©؛°¨غرامي جديد¨°؛©

مشت عنهم الابله وجات رشا
شهد : البسي بسرعه
رشا: طيب
ولبست عبايتها وشيلتها وطلعو وكان واقف السايق ينتظرهم ركبو السياره
شهد : سرسواتي وصلني انا البيت بالاول
سرسواتي حرك السياره شوي: حاضر
رشا: لا سرسواتي مو البيت
سرسسواتي وقف السياره
شهد : شفيك نبغى نروح البيت ننام سرسواتي روح البيت
سرسواتي حرك شوي
رشا: لا سرسواتي وقف
وقف سرسواتي : اففف انت فيه يزهق انا سرسواتي بيت سرواتي لا مو بيت سرسواتي بيت سرسواتي لا مو بيت يا بيت يا لا مو بيت والا الحين انا فيه يتصل على ماما ويقول انت في يزعج انا
شهد : انطم انت يا تسمع كلامي ولا والله لاطقك بالجزمه وانتي رشيوه انا موصله معاي حدي فيني النوم اذا ماسككتي صدقيني اقوم افرمك
رانيا تكلم رشا: ليه يعني ما تبغي البيت
رشا : اشوف نسيتوا التعويض
رانيا : اييه
شهد : وانتي حسبي الله عليك ما نسيتي
رشا: لا يلا سرسواتي روح البقاله
سرسواتي : شهد انا في يروح البيت ولا البقاله ؟
رانيا ضحكت عليه :يوه مسكين ياخذ اذنك
شهد ضحكت: شفتي شلون لي هيبه ، روح البقاله
وصلهم لاقرب بقاله ونزلو ، دخلو البقاله واشترو نصها خلصو كل فلوسهم
اما السايق كان ينتظرهم في السياره وجاه اتصال من مي تقول له تعال اخذنا من المدرسه السايق لما شاف انه شكلهم مطولين نزل لهم ودخل البقاله وشافهم عند ثلاجات المشروبات
سرسواتي : يلا بنات احنا لازم نمشي هذا فيه مي يتصل يقول انا يروح يجيب هو والبنات من المدرسه
شهد : رانيا اخذ كاديه ازرق ولا اخضر ؟
رانيا: انا اقول الازرق الززز
جات رشا: شوفو انت محتاره اخد برنقلز ملح ولا حار
شهد : اخذي حار عشان اكل معاك
رشا: اجل باخذ ملح
سرسواتي: انت ما فيه يسمع انا ؟
رانيا: وش تبغى انت واقف على روسنا ساعه تهذر
سرسواتي : انا فيه يقول لازم نروح نجيب بنات من مدرسه
شهد : طيب طيب روح السياره والحين نجي وراك
سرسواتي طلع من البقاله وركب السياره اما البنات راحو يحاسبو وطلعو وركبو السياره
واول ما وصلو للمدرسه كانو البنات ينتظرونهم على الباب
شذى: ليش طولتو كذا متنا من الحر
مي : يا رب لطفك استغفر وش هالحر
شذى: سرسواتي طول على المكيف
دانه : الله الله وش كل هالاكياس شارين نص البقاله
رانيا نقزت في وجه دانه وتهوش في وجهها : الله اكبر الله اكبر من عيونك
شهد : اقول غضي النظر لا يصير فينا شي
دانه: هي وانا وش قلت
مرام ركبت كالعاده اخر وحده : هيي خيانه رحتو البقاله بدوني
وقعدت تفتح الاكياس وتشوف شنو فيهم : اكيد شريتو لي صح حبيباتي انتو
شهد بابتسامه شاقه وجهها: لا كلهم لنا
مرام : وليه ان شاء الله ؟
رانيا: نسيناك
مرام تهوش عليهم : مالت عليكم ثم مالت
ندى: حر يا الله ما عندكم شي بارد يبرد على القلب
رانيا: لا ماعندنا
شهد : اصلا حتى اذا عندنا ماراح نعطيك
ندى :وييه كاني عاد ميته عليكم ما ابغى منكم شي ، رشوي حبيبتي انتي عطيني بيبسي
رشا طلعت من الكيس : تفضلي
ندى عضت على شفتها وقرصت خد رشا : وي قلبي انتي الزينه من بينهم لا تخلينهم يخربونك ها سمعتي ؟
مرام تصرخ فوق راس سرسواتي : سرسواتي
سرسواتي : مرام لا تصرخ انت في يعور اذن مال انا
مرام تصرخ : ودني البقاله
سرسواتي : اولا لا تصرخ في اذني ثانيا هذا فيه يشتري كل بقاله انت فيه ياخذ منه
مرام : ويه وانت وش دخلك ودني البقاله وانت منطم
رانيا تضحك: هههههه صاير يتكلم مثل جدتي
شهد تضحك: من كثر ما تجلس معاه وتسولف
مي بصدمه: عسى جدتي تقعد معاه
رانيا : اي تطلع الحوش وتبسط بالقهوه والشاي وتجلسه جنبها
وصلهم السايق للبقاله ..
رانيا: بننزل معاكم
دانه: وش بتسوون ؟
شهد : بنشتري
دانه : اقول بس اقعدي مكانك انتي وياها شارين البقاله كلها والحين بعد تبون ما خلصت فلوسكم ؟
رانيا: الا خلصت بس مادام انتي يمشيلك مصروف نو بروبلم
ندى : اقول انثبري مكانك فلوسي لي انا بس مو عاطيتكم
شهد تقلد صوتها: ومن قالك ميتين عليك ما نبي فلوسك
ندى طقتها على راسها
شهد : وجع
ونزلو كلهم البقاله ومعاهم شهد ورانيا ورشا سكتو عنهم لان مستحيل يقدرو عليهم
شهد : كاني مشتهيه هذا
رانيا: اخذي اخذي لا تخلي شي بخاطرك
شهد : ايه وكانه هذا بعد عمري يسور يحبه
رانيا : اخذيه اجل
مي : هي شنو اي شي تشوفونه ع طول اخذيه خير
رانيا: وش تبغين انتي ؟
مي : انتي الي وش تبغين؟ من وين لك فلوس بتشتري كل هذا
رانيا: الله يخلي جيبك
مي : موتي بس
وخلصو مشتريات وحاسبو وركبو السياره وكل وحده وصلها لبيتها .. في بيت بو مؤيد ..
دخلو البنات البيت ورمو الشنط على الارض
رانيا انسدحت على الكنب ورمت شيلتها على الارض:حر حررر
مي : اي والله يعني لازم اخر يوم في المدرسه يكون كذا
دخل مؤيد وهو يغني ويرقص اول ما شافته رانيا انسدحت على جنب : خير يا طير اشوفك مبسوط
مؤيد قرص خد رانيا ورانيا بعدت ايده : ايوه يا حلوه سأليني ليش؟
رانيا: ليش؟
مؤيد يحاول يقهرها: اليوم اخر يوم عندي وانا اسف على جرح مشاعرك قصدي مشاعركم تدرين يعني فيه ناس خلصت وناس حتى ما ابتدو
رانيا طنشته
مؤيد ضحك عليها : اوه اوه شارين البقاله كلها شكله ما بقى الا الكاشير وينه ؟
رانيا : شت اب بليز راسي يعورني وميته حر وجوع مو ناقصتك
مؤيد يضحك بطنازه : ها يا عنقليزيه شريتي لي ولا لا
رانيا : لا
مؤيد : ليه؟
رانيا ما عطته وجه
بو مؤيد نزل من غرفته : هلا ابوي مؤيد

Shahd_139 ©؛°¨غرامي جديد¨°؛©

قام مؤيد وسلم عليه وباس راسه : هلا بك
بو مؤيد : ها شسويت اليوم في الاختبار
مؤيد تنهد : الحمد لله مشى حالي
بو مؤيد: زين الحمد لله
مي قامت : بروح اشوف الخدم شنو سوو على الغدا
رانيا: اي بعد قلبي والله ميتين جوع
نزل رائد ويوم شاف الاكياس راح ركض لها: وش جايبين ؟
رانيا : اتركهم الاكياس لي ومي
بو مؤيد : قومي بابا رانيا شيلي اغراضك واغراض اختك وصعديهم فوق
رانيا قامت : ان شاء الله
مؤيد : وغيري ملابسك المريول يسد النفس
رانيا : بغير ، رويد خذ اكياس الايسكريمات والمشروبات وحطهم في الفريزر
رائد : بعد مو شارين لي ويبوني اشيل اغراضهم مانب شايلهم
رنيا تهوش في وجهه: مالت عليك ، ميني ميني
جات ميني ركض : نعم رانيا
رانيا: اخذي الاغراض وحطيهم في الفريزر
ميني شالت الاغراض ودخلتهم المطبخ ... بيت ام سالم ...
دخل محمد البيت بالسياره واول ما نزل منها شاف البنات نازلين من سياره سايق الجده
محمد : عطلتو ؟
شهد : اي واخيراً
محمد بطنازه : يا فرحتي وانتي شذى ولا بعد بتروحي اسبوع الجاي؟
شهد : الا ذي الدفره عاد
رشا: قولو ما شاء الله لا يصير شي في اختي
شذى : اي عطلت
رشا تسأل محمد: عطوك الجدول ؟
محمد طلع الجدول من جيبه : اي شوفيه
شذى : شنو عليكم اول يوم ؟
رشا: رياضيات وفقه
ودخلو البيت .. بيت بو خالد..
مرام دخلت البيت و هي طايره من الوناسه وشافت جنان جالسه ومدده رجولها قدام المكيف وامها جالسه جنبها
مرام : هلا بالحب شخبارك عساك بخير ؟
ام خالد : الحمد لله بخير انتي قولي لي وش سويتي اليوم بالمدرسه ؟
مرام: خلينا من المدرسه انتي وش سويتي اليوم بالشغل ؟
ام خالد : مثل كل يوم
مرام : وانتي جويج عطلتي ولا لسى؟
جنان تنهدت : لا باقي اخر اختبار يوم الاحد
مرام : اهه وش نقول احنا اجل
ام خالد : ايه يمه الله يوفقكم ويسركم امركم
جنان رفعت ايديها : امين يا رب العالمين
مرام : وخلود خلص ولا لسى؟
ام خالد : ايه خلص اليوم الحمد لله
مرام : اممم زين
ام خالد : طيب يمه قومي غيري ملابسك وصلي ونزلي عشان تتغدي
مرام : ان شاء الله
في بيت ام فيصل ..
دخلت دانه البيت : سلام عليكم
الكل : وعليكم السلام
ام فيصل بخوف : يمه وش بلاك وش فيه صوتك كذا؟
دانه : مافيني شي
ام فيصل : شلون مافيك شي وهو باين على وجهك الضيقه
دانه حضنت امها وبغصه: يمه خايفه ارسب
ام فيصل : لا لا بسم لله عليك لا تقولين كذا انتي كل الي عليك تتوكلي على الله ثم تذاكري زين وان شاء الله باذنه الواحد الاحد بتنجحي
دانه شوي وتنفجر بكى: بس صعب
ام فيصل : لا مافيه شي صعب انتي شدي حيلك وتركي كل شي على رب العالمين قومي الحين غيري ملابسك وصلي وتعالي تغدي بعدين حطي راسك على مخدتك وارتاحي ولا تفكري في شي
دانه وارتاحت من كلام امها شوي وحضنها الدافي : ان شاء الله
فيصل يحاول يلطف الجو ضم امه من ظهرها : يلا بس بلى دلع و قومي عن امي
نزل عبد الله من فوق : هي مسوين حضن جماعي ولا تنادوني
وراح ركض وضم امه ، ضحكت امهم وضحكو معاها ودانه تمسح دموعها الي واقفه على هدب عيونها .. في بيت بو طلال..
دخلت ندى البيت وصادفت نور طالعه من المطبخ وبيدها كاس عصير
ندى : رايقه
نور : اي شلون بعد ما فيه احسن من قعده البيت وش سويتي اليوم بالمدرسه ؟
ندى : ولا شي روتين
نور : طيب والاكياس الي في ايدك
ندى : مرينا البقاله وشريت لي كمن شغله تريح بالي
نور: وشريتي لي ؟
ندى : اكيد مو انتي اختي حبيبتي
نور : اه يا القلب.
طلع لؤي من غرفته وسمع كلامهم : تفكري لله ترى خايفه من لسانك
نور عطته نظره انطم
ندى صعدت فوق ودخلت غرفتها ودخلت وراها نور
ندى: سكري الباب وشغلي المكيف
نور سكرت الباب وشغلت المكيف وجلست على السرير : وش رايك الليله نسوي جمعه في بيت جدتي ؟
ندى تفسخ عبايتها : هذا الي تفكري فيه روحي كلمي البنات وخليهم يرسلو لك الجدول
نور : وييع هذا اخر شي افكر فيه ، ها وش قلتي نسوي ؟
ندى : سوي الي بتسوي ماعليه
نور : اوكي خلاص
ندى : بس انتي الي اتصلي عليهم وخبريهم انا مالي خلق
نور فتحت جوالها : برسل في القروب
ندى : عاد بالاول اتصلي على جدتي وعطيها خبر
نور : طيب
واتصلت على بيت جدتها
الجده نوره : الو
نور : هلا يمه هلا بريحة الجنه كيفك وش اخبارك عساك بخير ؟
الجده : هلا يمه الحمد لله بخير وبصحه انتي نور ؟
نور : اي نور نور نور الله دنيتك واخرتك
الجده : شخباركم يمه وشخبار امك وابوك واخوانك ؟
نور : كلنا بخير الحمد لله ها بشري ولدت العمه ريهام ؟
الجده : لا للحين
نور: اها الله يعينها
الجده : امين يا رب
نور: انزين يمه انا متصله عليك بقولك شسمه ذا الليله بنتجمع عندك احنا البنات
الجده : ايه يمه حياكم
نور : الله يحييك ولا تعبي نفسك احنا بنجيب كل شي
الجده : لا مايصير كذا انا لازم اشاركم بشي
نور : انزين اذا كنتي تبغين سوي لنا كبستك الي ناكل اصابعنا وراها من لذتها يا لذيذ
الجده ضحكت : ان شاء الله من عيوني يمه
نور : تسلم عيونك يا الغاليه يلا تامرين على شي
الجده : سلامتك
نور : الله يسلمك يلا مع السلامه
الجده : الله يسلمك
الجده قعدت تضحك ومستانسه من لسان نور الي ينقط عسل على كثر ما تنزعج منها هي ورانيا وشهد ومرام على كثر ما تحبهم وتموت فيهم وفي كلامهم الحلو
اما نور اول ما سكرت دخلت قروبهم ( اذا مو عاجبك نتف حواجبك ) : بنات بنات بنات
دخلو البنات القروب : هلا
نور : الليله نبغى جمعه بيت جدتي نوره كل وحده تسوي شي وتجيبه فاهمين ؟
دانه : فاهمين
شهد دخلت القروب : يا صباح الخير يا نوير
رانيا : ان شاء الله نمتي عدل
نور رسلت فيس مبتسم شاق وجهه: صباح النور يا شهيدوه ايه نمت عدل الحمد لله
رانيا رسلت يد تهوش عليها : مالت عليك ثم مالت
رشا: اذا بتتهاوشون روحو خاص
جنان: طيب وزعو الاشياء كل وحده تقول شنو بتجيب
مرام : نبغى ورق عنب
رانيا : اي هذا اهم شي
شهد : مي انتي سويه حقك لذيذ وزيدي الليمون ها
مي : طيب علي الورق عنب
جنان : انا علي باستا
شذى: وانا بجيب كفتت بطاطس
دانه : وانا بسوي تبوله
ندى : وانا بجيب روبيان بروستد
نور: وجدتي قالت بتسوي كبسه
مي: ليه؟؟
دانه: لا مانبغى نتعبها
نور : انا قلت لها لا تسوين شي ما رضت قالت بتسوي كبسه
رانيا : اي خلوها والله اشتقت لكبستها اللزيزه
ريهام دخلت القروب : ويه انا وش اسوي ؟
شذى: انتي لا تعبي نفسك جيبي شي حلو من بره
رشا: جيبي كنافه مشتهيتها
سوسن: اجل انا بجيب فطاير والمشروبات
ريهام : طيب
رانيا : وي جعت من كلامكم
شهد : حتى انا
مرام : بطني قام يطلع اصوات
جنان : الا انتو عاد خيش نوم واكل

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1