منتديات غرام أعضاء غرام سكون الضجيج - مملكة العضو ذاك الزمان اللي مضى , ليته يعود ..
منصور الفلاحي ©؛°¨غرامي فعال ¨°؛©

بسم الله الرحمن الرحيم


 
الساعه 10 ص
يرن التلفون ..
... : الو السلام عليكم
.. : هلا
... : اخويه منصور , راقد أنت؟
منصور : هيه راقد , آمريني؟
... : عبادي ، الابله ضاربتنه تروم تسير تتفاهم وياها أنا بالدوام ماروم اطلع وابوه مشغول !!
منصور : ماروم تعبان , ماصار لي ساعتين مخلص دوام وابا ارقد الحين .
ام عبادي : اوك خلاص خلاص مع السلامه
بعد نص ساعه ..
.. : منصور يامي سير جوف ولد اختك الابله ضاربتنه يعل يدها الكسر
منصور : امايه تعبان برقد قسم بالله مب رايم افتح عيني
ام منصور : عشاني يامي قوم , مسكين عبادي الحين بتشوفه ميت صياح واختك اتصلت كانت شايله بخاطرها تقول محد راضي اييبه , قوم لاتزعل اختك

قررت بالنهايه أنش لأن مافيه فكه و ..
بعد مرور ساعه ب مدرسة عبادي ..
الأخصائيه : عبدالله مايسمع كلام الابله ويتمصخر وقت الدرس وهي قررت تعاقبه فمنعت الايباد عنه ..
انا : ؟؟؟؟
الأخصائيه تكمل : عبدالله ضارب ابله ودافنها ورافسنها بكل قلة ادب ..
انا (فيني رقاد ومادري شو ارد عليها وفوق هذا اعرف ان هالولد مشاغب) : الاطفال بهالوقت مشاغبين ولازم نتعامل معاهم ب هدوء , العصبيه ماتييب نتيجه , اكيد جاف انها تعصب عليه هو بالذات وبما أنه ولد ف مايحب احد يعصب عليه جدام ربعه ..
الاخصائيه : نحن من سنين بهالمدرسه ونعرف كيف نتفاهم مع الأطفال بس عمرنا ماشفنا نفس جي , يضرب الابله واكيد هي يحق لها تعصب عليه ..
انا (متوهق وماعرف شو اقول): الافضل انكم تتفاهمون مع امه و ابوه , باجر ان شاءالله امه بتيي المدرسه وتتفاهم معاكم ..
الاخصائيه : المفروض مايطلع من المدرسه قبل انتهاء الدوام بس هالمره مضطره لأن اللي صار مش ممكن ينحل عن طريق المدرسه , لازم الاهل يتدخلون ..
انا : ان شاءالله خير , فمان الله ..

بعد خمس دقايق ..
ماسك يده واسحب فيه وهو يمشي ب هدوء وساكت , ركبته السياره , حاط شنطته بحضنه ويطالع جدام (مادري هو خوف او شي ثاني )

انا فاشل بالتعامل مع الاطفال , كل شوي اطالعه ابا اقول له شي , اشوف ملامح ويهه يكسر خاطري , قررت اخيرا اتكلم ..
انا : ليش ضربت الابله ؟
عبدالله اشوي ويصيح : هي بدت , ابا اخذ الايباد مالي وهاي ماتعطيني وعقب انا قمت وخذيته بالغصب وهي ضربتني وانا رديت ضربتها
ماكنت فاهم شي من كثر الصياح بس اتوقع هذا اللي قاله ..
رن التلفون ..
ام عبدالله : الو , منصور شو صار , تفاهمت معهم؟
انا : لا خذيته وييت وباجر سيري لهم بروحج
سمع هالكلام ويتهه قوه عجيبه , يشاهق ويصيح كأنه ميت له احد , بس لان درى اللي متصله أمه ..
عطيته التلفون يكلم امه وكنت اسمع صوتها من طريقة كلامها دريت ان ؛ ولدها معاه حق والابله هي الغلطانه ومهما كان مايحق لها تمد ايدها ..

تركتهم يتفاهمون وسرحت و بديت افكر بالزمان اللي مضى ..
زمان خيازرين المطوع , المدرس , جدي (رحمة الله عليهم)
وقتها كانت بالنسبه لي ايام سوده بس الحين دريت لو لاهم ماكان وصلت لهنا ..
لما كنت انضرب , كنت اخاف اتكلم مع اهلي عن السالفه , كنت اخاف يكملها علي الوالد ..
تربينا في بيئه , كانوا الاهالي تختصر حياتهم ف حفظ بعض من سور القران ومع هذا كانوا شديدين على عيالهم , لو اني صح بس دام الاكبر مني تكلم وماوافقني الراي مايحق لي اناقش , كنا نخاف نرادد اللي اكبر منا ..



كل مازادت ثقافة بعض الاهالي , زادت وحشية الأطفال
..

منصور الفلاحي ©؛°¨غرامي فعال ¨°؛©

من ذكرياتي مع جدتي الله يرحمها ..
لما تدخل بيتنا و تشوف التلفزيون شغال , كانت تقول : سكت هالصندوق يا منصور
قربت الساعه الله يرحمنا برحمته , اليهود ماخلوا شي حتى الصناديق خلوها تتكلم
ولأن جدتي كانت تقول لي انت ريال البيت بغياب ابوك , لازم تهتم ب اهلك , روح عند الرياييل , تعلم منهم ,
كنت استحي ابين لها اني احب اشوف التلفزيون او اني العب مع ربعي ,
وكنت احاول اثبت لها اني ريال
كنت اقزر وقتي عند الدبش او مع جدي , م كنت احب بس كنت اغصب نفسي
وكنت اتمنى بيوم جدتي ماتيينا حتى اخذ راحتي ..
مر عشرين سنه ع وفاتها وصارت امنيتي العكس ..

منصور الفلاحي ©؛°¨غرامي فعال ¨°؛©

بسم الله الرحمن الرحيم

قبل 3 سنوات ..
الساعه 12:30 م
دخلت البيت ومامداني ايلس الا سمعت صوت
.. : هلا بأخوي الغالي ..
دريت إنها تبا تطلع , تنهدت وقلت : اهلين ..
.. : اليوم ربيعتي بتيي نذاكر ويا بعض , ابا اسير الجمعيه , تعرف بعد محتايه اغراض ومايصير ماحط لها فواله , شوبتقول عني ربيعتي!! , الكل دوام وماعندي احد يوديني , (تطالع ب رجا) : توديني اخويه ؟
(من البدايه عارف انها تبا شي بس مادري ليش تحب تطول السالفه ..)
انا : هالحزه ؟ اتريي العصر وسيري ويا خواتج ..
.. : العصر مابلحق ابا اسوي حلى واصلا هم مابييون اليوم حتى يودوني
انا : يعني اليوم بالذات اللي ربيعتج تبا تيي خلص كل الاكل اللي بالبيت
العنود : اووف , الواحد مايطلب منكم شي ,
راحت وهي تتحلطم ب صوت عالي وماصار كم دقيقه الا سمعت صوتها تهمس ف اذن الوالده وهي داخله الصاله , يعرفون نقطة ضعفي !!
رفعت راسي ومامداني اتكلم
الوالده : منصور يامي اخذ اختك الجمعيه , اختك الصغيره هاي ماعندك غيرها
انا : امايه يعني نحن مانخلص من طلباتها , يوم مكتبه , يوم جمعيه , يوم مدري وين
الوالده : بسك عاد تعود باجر بتعرس وحرمتك تبا تطلع شو بتسوي انت عيل ؟
العنود : هييه ماعليج منه حرمته بيطلعها ويمشيها بس يتمنن علي انا
كنت عارف نهاية حديثهم ف قررت اختصر : قومي تجهزي , بترياج بالسياره
بعد 45 دقيقه , وصلنا الجمعيه
ختمت الجمعيه وماخذت شي , كنت متملل وادري ان مابخلص منها بهالسرعه , رحت صوب العاب الاطفال , شفت طفل يركض و وراه ريال متوسط الطول مروا من يمي وعطوني ظهرهم و وقف الطفل عند لعبه : ابويه , ابا هاللعبه
ابوه : هاي عندك منها خل ندور لك غيره
لف الريال صوبي و وقف عندي , عطاني ابتسامة مجامله ورديتها له , قررت اروح اشوفها مشيت كم خطوه
سمعت صوت يناديني : منصور ؟
لفيت اطالع نفس الريال شايل الطفل : هلا
.. : شحالك , ماعرفتني ؟
انا : لا والله
.. (ب ابتسامه) : انا محمد ال ...
انا ( ابتسمت مجامله , محمد كان زميلي بالثانويه ) : هلا والله محمد , كيف حالك ؟ ..
اخذنا كم دقيقه نسولف مع بعض , كان سؤال يقرقع بقلبي وسالته (بإستهزاء) : الا للحين انت و فهد ربع ؟
تغيرت ملامح ويهه : توفى قبل سنتين , كان فيه الخبيث
صدمه ؟ فهد مات ؟ كيف ومتى ؟
خلاص ماكنت رايم اوقف , قررت انهي حديثي معه , تبادلنا ارقامنا و كلن مشى ف حال سبيله
وصلت البيت وانا كل تفكيري في فهد ..

منصور الفلاحي ©؛°¨غرامي فعال ¨°؛©

[ ذكرياتي مع فهد ..
(كان زميل دراسه بالثانويه
هو مع محمد وكم واحد من الشباب كانوا مسوين لهم شله مادري عصابه ويسمون نفسهم العقارب او العقرب شي نفس جي ماتذكر
فهد كان مشاغب وايد وبما انه رئيس الشله كان اشطنهم , طول وقته يستهزئ بالرايح والراد ..
كنت اتنرفز من حركاته وكان ممكن اسكت عن كل شي الا هالنوعيه ماقدر اتحمله)
رن الجرس وكلن شال كتبه حتى يرد البيت
(كنت انا وربيعي خليفه نروح ونرد مشي بما ان المدرسه قريبه من بيوتنا , خليفه كان سمين اشوي و هذا كان افضل سبب حتى فهد يستهزئ فيه , كنت اتضايق لما كنت اسمعه يتكلم عن خليفه بصوت عالي , كنت اشوف الضيقه بعيون خليفه)
كنا نمشي الا شفت سياره مرت من يمنا انرش علينا شي , مادري هل هو ماي او عصير
صرخت ب صوت عالي : لو انك ريال ماكان سويت جي
وقفت السياره ونزل فهد , اتوقع كان ينتظر السبه حتى يسوي مشاكل ..
كم رفسه و ... وخلصت ضرابتنا ومحد درى عن اللي صار
وانتهى يومنا بسلام ..
ثاني يوم رحنا المدرسه , فهد ماكان ياي , ف الفسحه زقرني المدير , وفهمت منه ان فهد ريله مكسوره وان ابوفهد ناوي يشتكي علي , لاني ضربته بالمدرسه وربعه شهود !!
كنت منصدم ؟ انا كسرت ريله ؟ ليش نمله هو تنكسر ريله ب رفستين !!
كنت متوتر , اتخيل جدي , ابوي مب من طبعي اتضارب , افكار توديني وتييبني لين بالنهايه مدرس الرياضيات قرر يتوسط لي عند بوفهد وان ماتوصل السالفه لاهلي و الخ ..
مرت الايام والشهور وانا حتى السلام م كنت اسلم على فهد , كنت حاقد عليه وهو ابد ولا كأن مسوي شي ,
وصلنا لاخر يوم لنا بالثانويه , كانوا الشباب مقررين يصالحوننا انا وفهد ..
ماكنت قادر اغفر له الكذبه , الكل بالمدرسه كانوا يشوفوني مذنب وفهد البريئ !!
مد يده لي ..
مشيت عنه ولا كأني اشوفه !!
طلعت عنهم وانا مقهور , كيف يتجرأ وهو اصلا ماعتذر لي على اللي سواه ]

وصلت لغرفتي وانا للحين افكر , انا اللي كسرت ريل فهد , لا لا مب انا , ماشفته لما يقوم اكيد انا , لا لا ماضربته بالقو , يمكن ماحسيت بعمري لما ضربته , كان مبتسم لي لما مد يده , اكيد انا كسرتها له وقرر يسامحني ..
افكار كانت توديني وتييبني ..
كنت حاس بتأنيب الضمير
كنت اتصل ف محمد بين فتره وفتره , كان ودي اعرف الصدق !! انا اللي كسرت ريله !!
بعد فتره من اتصالاتي ف محمد قررت اسأله وسمعت هالرد منه
محمد : طاح من على الخيل وانكسرت ريله !!

كل حقدي وكرهي له تبخر ب ثانيه , ليتني مديت له يدي ..

منصور الفلاحي ©؛°¨غرامي فعال ¨°؛©

قبل سنتين ..
- تركيا | اسطنبول
( فجأه قرروا الأهل يسافرون وماعندهم غير المغلوب على امره , بما إني اجازه وباقي اخواني دوامات )
وصلنا اسطنبول وضغطي مرتفع , انا تركيا من اسوأ البلدان عندي , اخلاق الشعب قافله وماعندهم اسلوب ابدا ..
ب المطار ..
.. : منصور اوقف اشوي تعبنا , امي مب رايمه تمشي
لفيت عليهم : انتوا من صجكم كل هالاغراض يايبينها معاكم ؟ ولكم عين تقولون تعبنا بعد !!
.. ( تهمس ): اووف انا قايله لكم طول الوقت بيحن على راسنا ..
.. : منصور يامي حنا بنتريا اهنيه وانت ويا اخوك دور لنا على تاكسي ..
انا : لا خليه اهني وانا اشوي وراجع ..
بعد نص ساعه ..
ناديتهم وركبنا السياره ورحنا الفندق ..
إنتهى يومنا بسلام ..
اليوم الثاني ..
( اختي كانت متعرفه على وحده سوريه مقيمه في تركيا , وكانت علاقتهم شبه قويه ,تعرفها تقريبا من ثلاث سنوات ومن نحن ف البلاد كانت مقرره انها تتواعد وياها بمكان وتشوفها )
وصلنا حديقة امير جان ..
انا مادري كيف رضيت انها تروح وتشوفها , مادري من قالت لي السالفه ماهتميت وايد وقلت دام نحن معاها مافيه شي يخوف
رحنا وشفناهم كانت صديقتها مع عائلتها وانا يلست مع ريال كبير بالسن اللي هو ابوها و شاب اصغر مني ب كم سنه اتوقع اللي هو زوجها ..
المهم سولفنا وكانوا ناس بسيطين جدا , الريال الكبير بالسن كان متدين اما الشاب كان عادي مثله مثل اي شاب ..
المهم مر الوقت و ودعناهم وكانوا مصممين اننا نزورهم ف بيتهم ..
كنت رافض الفكره لأسباب كثيره منها : مانعرفهم زين وكنت حاس ان وضعهم المعيشي مب ذاك الزود وحنا عائله كيف بيستقبلوننا , كانت اختي تحاول ويايه ..
.. : منصور البنت كل يوم تتصل فيني وتحاول ويايه , انت ليش جي , لو ان الناس من معارفك كان رديتهم !!
.. : خلييه ماعليج منه , بنروح انا وانتي وامايه و زيود
زيود : هيه انا امشي ع كيفج , مب ياي ورجعوني لاعت جبدي من هالسفره
وبدت الضرابه اليوميه بين منصور و العنود
تركتهم ورحت يلست صوب الوالده اللي توها خلصت صلاة
.. : امي منصور مبين عليهم ناس طيبين خلنا نروح نزورهم نص ساعه وبنرد مابنطول , حتى ام البنت كلمتني وانا استحيت اردها قلت لها اننا بنييكم باجر
انا ( ماودي اردها بس متفشل , ناس مانعرفهم ياربييه بلشه هالحريم ) : خلاص امايه يصير خير لين باجر ..
وصل باجر بسرعه , انا طبعي لما ابا اسير مكان ماودي ، ماروم ارقد واكون متوتر , احسه هم على قلبي لين ارد ..
صلينا العصر وطلعنا وكان نسيبهم يتريانا اول الشارع , طبعا لايخفى عليكم كان باقي نقطه وينجلط راعي التكسي , المهم وصلنا لبيتهم وكان مثل ماتوقعت بيت عادي جدا على قد حالهم ..
اللي مريحني هو وجه الشايب المتدين , كنت حاس ان ويهه منور سبحان الله ..
يلست نص ساعه , ساعه وانا اتوعد فيهم , رن التلفون ..
.. : اخويه منصور , نحن بنروح سوق قريب من اهني مع لين [اتوقع هذا اسمها]
استحي اعصب عليها والعيون علي وانا اسولف بالتلفون : اوكيه , زايد بيي معاكم
مسكين كنت حاس فيه , مايعيبه جي اجواء , ابتسامته شقت الويه من سمع اسمه , ودعهم وطلع
قرب اذان المغرب والشايب راح المسيد , انا طول الوقت كنت يالس اسولف مع الشاب اسمه محمد مدري احمد مب متذكر ..
كل ما احاول اتخلص منه واروح لهم السوق , كان يطلع سوالف ويأخرني , بالنهايه قال شرايك نروح المسيد نصلي و نروح لهم السوق
ياك الفرج ي منصور امش بس ..
انا من طبايعي الشينه اني افكر واوسوس كثير وكنت احاتي اهلي طول الوقت , بلاد غريبه , يارب مايصير لهم شي ..
صلينا المغرب ومشينا نروح السوق ..
كأنه هذا مب طريق السوق , يمكن يعرف طريق مختصر , كنا نتمشى طبعا
قررت اكلمه : هذا مب طريق السوق
جاوبني ب : راح اعرفك ع اصدقائي
ياهي بلشه , انا شو اسوي ب ربعك
قلت له : وقت ثاني ان شاءالله , لازم اروح الدنيا ليل
قال : قربنا ماراح نطول ( ماعرف اتكلم سوري)
فجأه حسيت ب شي على خصري , بسم الله , دخلني ف مكان كأنه صاله كبيره مهجوره وكانوا شابين معضلين , احلم انا ؟؟ , خذوا كل اغراضي اللي ب مخباي وكانوا يتوعدون او شي نفس جي مب فاهم خلاص مخي قفل , بتخبل , حاط سكين على خصري , اهلي بالسوق معاهم , اكيد مخططين لشي , كيف بشرد منهم , يارب ساعدني ..

منصور الفلاحي ©؛°¨غرامي فعال ¨°؛©

سمعت رنة تلفوني , واحد منهم طفاه , اكيد سوو شي لهم وزايد قدر يشرد او يمكن وحده من البنات , لا يمكن من البلاد متصلين , اتوقع سحبوا تلفوناتهم شراتي ..
وهذا للحين ماسكني وماشال السكين
قلت له : شو تبا مني !
مارد علي , لفيت ريلي لورا احاول اطيحه , كنت متعلمنها بالجيش , بس مسكني واحد ثاني وماقدرت اسوي هالحركه اللي كنت عارف انها ماراح تنجح من التوتر !!
فهمت منهم انهم مايبون شي غير الفلوس , وعندهم دكتور اللي مايعطيهم اللي يبونه يذبحونه ويبيعون اعضائه , كأنه فلم هندي او يتحروني انا هندي , بس اتخيل اهلي اقول يمكن صج السالفه , يارب مايصيبهم شي , قلت : اهلي لاتسوون فيهم شي ولكم اللي تبونه ..
لو احاول اشرد بروم بس اهلي !! , فكر ي منصور كيف تتصرف , قلت : كم تبون !!
قال : 15 الف دولار
احد يروح يزور احد ب 15 الف شو بايع عقلي انا , قلت : ماعندي هالمبلغ !! وانا كل اللي عندي بس حق الرجعه للبلاد !!
عرفت ان مايبون غير الفلوس وماعندهم لادكتور ولا هم يحزنون ف قلت : رجعوني للفندق واعطيكم كل اللي عندي , بعد مشاورات ومدري شو قرر واحد من المعضلين مع محمد مادري احمد يودوني الفندق , هناك كانت بنت تترياهم ياربييه ذي تشبه ربيعة اختي بس مب هي , يمكن اختها !! احاتي اهلي واحاول احل القضيه اللي ماعرف راسها من كرياسها , كانوا يهددوني اني لو شردت مصيري الموت , ماكان ف بالي اشرد اصلا و ماكنت قادر لان المعضل رفسني كم رفسه قبلها وبالغصب كنت امشي ومستحيل اغامر بحياة اهلي , وصلنا الفندق وعطيتهم اللي عندي , الحمدلله ماكان مبلغ كبير , دفعة بلا ع قولت الوالده , زايد كان ناسي تلفونه بالفندق الحمدلله انهم ماشافوه !! خلصت منهم وقلت اهلي وينهم , قال : مالي دخل بأهلك !! وطلع !!
اخذت تلفون زايد ياربييه شو هالرمز اللي عليه حاولت افتحه ماعرفت ومن زود الخبال اللي فيني ناسي ان الفندق فيه تلفون !! ماسك تلفون زيود وادقدق بالارقام عل وعسى يفتح , سمعت صوت الباب , دخلوا !! شايلين السوق معهم ومايدرون عن شي !! قررت ما افاتحهم بالموضوع وبينت لهم ان تلفوني ضاع
كنت خايف انهم يتوترون ونحن ف بلاد غريبه وطلبت من اخويه يحول لي بيزات ثاني يوم ..
طول الليل مب قادر ارقد وافكر باللي صار , اقول يمكن هددوهم انهم مايعلموني بس اسمع شخير زايد ويرتاح بالي !!
طلع الصبح بعد ليله طويله ..
اطول يومين مروا علي , كنت كاره نفسي بس مضطر مابين لهم ..
انتهت السفره الكئيبه , الطويله
ثلاث ساعات قبل طيارتنا كنا ناوين نرد البلاد !!
.. : اووف تلفونها مغلق
العنود : يمكن مخلص الشحن , طرشي لها رساله
.. : فشله والله , شو بتقول عني الحينه , مفتاح بيتهم بقى معاي واكيد بتحتاجه
زايد : اذيتونا ويا ربيعتكم هاي ، خل تولي ماترد شونسوي نحن
انا : أي ربيعه ؟!
زايد : السوريه بعد فيه غيرها , اخيس سفره قسم بالله
انا : عطيني التلفون
.. : ليش ؟؟
انا : عطيني اقول
مدت يدها , خذيته ومسحت الرقم , العنود واقفه فوق راسي
العنود : لييييش مسحت رقمها , والله سخييف
.. : ليش مسحته , دايم تحبون تحرجوني جدام الناس , اصلا انا الغلطانه اللي اسافر وياكم
وصبصبت دموع التماسيح
الوالده كان واضح عليها التعب ف ماحبيت اقول لهم السالفه واتعبها اكثر , قررت امسك عمري لين نوصل البلاد بالسلامه ..
تلفونها كان طول الوقت معاي , كنت اتريا ان احد من صوب البنت يتصل بس ماشفت شي
حتى بعد رجوعنا للبلاد , لما علمتهم عن اللي صار كنت اتريا اتصال بس ماشفت شي !!
قررت اني اروح محل تلفونات وارد الرقم !!
كان اخر ظهور الواتس لها هو اخر يوم من روحتهم للسوق !!
كنت افكر يعني ممكن الرجل المتدين يكون نصاب مثلهم ولا بس نسيبهم النصاب وهم مايدرون عن شي !!

منصور الفلاحي ©؛°¨غرامي فعال ¨°؛©

بسم الله الرحمن الرحيم
قبل عشرين سنه ..
الساعه 2ص
.. : منصور ابويه قوم , ماتبا تتسحر !!
بالغصب افتح عيني ياربي مابا اصوم اوفف
.. : صحى ؟
سمعت صوته الجهوري وارتعبت , جدي بيتنا , قمت بسرعه من الخوف !!
نادرا كنا نتجمع على السحور , اقصد جدي وجدتي يكونون معنا !!
كنت امشي وانا مستغرب شو اللي يابهم بهالوقت بيتنا !! ف الليل ماكانوا !!
رحت الصاله ..
.. : جدتك اليوم ماخلتنا نيلس بالبيت تقول الا نتسحر عند فهد وعياله !!
.. : تعال يا ولدي هنا
يلست عند جدتي , كانت هاديه على غير عاده , بالعاده لما جدي يقول لها شي كانت ترد بالمزح عليه بس اليوم متغيره , يمكن ميهوده !!
خلصنا اكل وقمت اغسل , احس تبا تقول لي شي بس ماتحصل فرصه او ماتقدر !!
انا : يدو فيج شي !!
جدتي : ادور شي مب لاقيته
انا : شو هو ؟!
جدتي : خلاص روح ارقد انت بدور عليه الصبح !!
رحت ارقد وانا مب هامتني سالفه جدتي وافكر اووف اليوم جدي موجود , بيقول تعال معاي المزرعه , ياربييه كأن مافي غيري , رقدت وانا اكبر همي روحة المزرعه !!
حسيت اني رقدت خمس دقايق بس !!
.. : منصور , منصور
فتحت عيني بالغصب !!
انا : هاه
قالت ب برائه : يدو ماتت !!


منصور الفلاحي ©؛°¨غرامي فعال ¨°؛©

مرت ثواني حتى استوعبت كلامها , كنت اسمع دقات قلبي تزيد , ابا اقوم ريلي مب شايلتني , قمت بالغصب رحت الصاله ..
قلت : يدو ماتت ؟!
كان يطالع التلفزيون ومانتبه لي ..
قلت ب صوت اعلى : يدو ماتت ؟!
لف علي : مادري توني صاحي من رقاد , انا يوعان ؟!
اصلا هو صغير شو عرفه بالموت ..
مشيت صوب الحوش , ادور اي احد كبير اسأله , الفريج هدوء !!
حاس هذا حلم , اصلا هي شعرفها عن هالسوالف اكيد هي حلمانه او تقص علي تبا تصحيني ..
كان بين بيتنا وبيت يدي شارع , كان مجابل بيتنا !!
مشيت لهناك , دخلت الصاله , كنت اسمع اصوات صياح , واقف ادور على الوالده !!
لمحتها يالسه بالزاويه وعندها وحده من عماتي !!
رحت صوبها وللحين ارتجف وقلت ف اذنها : امايه , يدو ماتت ؟
طالعتني وسحبتني برع !!
الوالده : منصور يابويه شو اللي يابك اهني , روح عند اخوانك لاتخليهم بروحهم !!
ردت قالت بصوت حزين : الله يرحمها ؟!
قلت وانا صوت بالغصب يطلع : هي كانت بخير شو صار لها ؟!
مسكت يدي وسحبتني البيت , كنت اسمع صوتها وهي تصيح ب صوت واطي , اول ما دخلنا البيت
شفته رجع لف لورا : امايه انا يوعان ؟!
قالت : قول ل نوره تسخن لك سحور امس !! طف هالتلفزيون امايه مب زين !! ولفت علي : منصور انت الحين ريال البيت , هالله هالله باخوانك , انا بسير بيت يدك الحين , زين ابويه !!
طلعت وقفلت الباب ..
يلست بالغرفه وانا ودي اصيح بس مب قادر !! مخنوق توني قبل كم ساعه يالس معاها , كيف جي خلتنا , تضايقني تصرفاتها بس انا متعلق فيها , بدت دموعي تنزل , خلاص ماراح اشوفها , ليتني تميت معاها ولا رقدت , تذكرت كلامها : الرجال مايبكي يامنصور , بس هالمره محتاج اصيح , كنت منزل راسي والدموع تنزل الا ب دخله الوالد ..
قال ب صوت هادئ : تجهز ابويه , بعد الصلاة بنروح المقبره !!
مرت ثلاث الايام على العزا , للحين متذكر حجم الحزن اللي كنت فيه !!
مع أني كنت ب سن صغير الا ان كانت تيي ف بالي افكار غريبه : هي تحس بالوحده الحين , تشتاق لنا ؟! الحزن كان مخيم على الكل , كنت اطالع جدي كيف مكسور , ماعرفنا قدرها !!
كانت تضايقني تدخلات جدتي فيني انا ب الذات ، ماكنت مستوعب ان كل هذا ممكن يكون خوف او حب , وفاتها ترك فراغ كبير بداخلي !!
ليتها ترجع واقول لها :
منصور الصغير كبر وماعاد يبكي يا جدتي , هو بس مشتاق لج !!
اللهم ارحمها واغفر لها وتجاوز عنها واسكنها فسيج جناتك ..

منصور الفلاحي ©؛°¨غرامي فعال ¨°؛©

ما انجزت شي بحياتك وكل وقتك تهايط وتعرضت للانتقاد
وتيي تقول لاترمى الا الشجره المثمره , أنت فاهم الموضوع غلط !!
أنت الشجره اليابسه اللي المفروض نشلعها من عروقها ,
مجرد مصرف ع الفاضي هه !!

منصور الفلاحي ©؛°¨غرامي فعال ¨°؛©

.










في الوقت اللي الوطن ينزف ويطلب المساعده من ابنائه , يعطونه ظهرهم !!
ف تضطر الجيران تلم كسر الجار وتحاول تخليه يوقف ع ريله !!
وتخلي عيالها تطير بين السحب فداء للجار ..
ثم اييك واحد يقول شيلوا جماعتكم من وطننا اللي يانا ب سببكم !!
هذا بالذات , بالوقت اللي عطى ظهره لوطنه كان يستاهل يكسرون ظهره ..
الام اللي تجاهلوها عيالها مايجبر كسرها جيرانها لو مهما سوو ..

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1