منتديات غرام روايات غرام أرشيف الروايات المغلقة - لعدم إكتمالها ما كنت لي عابر ولا عيونك مرتني بسلام / مولودتي الاولى
شيم ال عوده ©؛°¨غرامي جديد¨°؛©

ما كنت لي عابر ولا عيونك مرتني بسلام


مولودتي الاولى ، ها هي بين ايديكم
تنطق اول حروفها معكم ، تمشي اول خطواتها بينكم ،
و ان تعثرت ف امسكو بيدها و دلوها على الطريق الصحيح ...

بسم الله …


+"النصيحه الاولى : جمال البدايات يعميك,انتبه"."





: يا يبه انا ادرى بمصلحتي الى متى بتظل تعاملني كاني طفل ؟!!!!
: لا تناقشني ولا تتعب نفسك كلمه قلتها و لا راح اثنيها ملكتك الاسبوع الجاي على رنا !! وان تبي توطي راسي عند الناس لا تجي !
: ما عاش من يوطي راسك ي الغالي بسس اللي تسويه بيضرني ي ابوي
: يا قرة عيني يا زياد ابغى اشوف عيالك قبل لا تغمض عيني ، و يا ابوك ما بقى من العمر كثر اللي راح هذا انت بتصك الخمسه والثلاثين وللحين ما فكرت تتزوج
: يبه انت اكثر واحد عارف اني شايل فكرة الزواج من بالي ، واذا المساله عشان الاحفاد عندكم خالد زوجوه
: انت الكبير وبعدين خالد لسى ما استقر بوضيفته
فكر يا ابوك بكلامي ولا تنزل راسي بين الناس انا عطيت عمك كلمه
: ابشر اوعدك بفكر بالموضوع
باس راس ابوه وطلع من المكتب
-------------------------------
عيلة ابو زياد
الاب " فهد " الاكبر بين اخوانه ،حنون على عياله بس يحكم تفكيره العادات والتقاليد
الام * حوريه *
زياد * اكبر عيالهم ، عمره 35 ،
خالد * عمره 24
ريم * عمرها 25 متزوجه ولد خالتهم * سلمان * وحامل بالشهر الخامس
نوف * عمرها 20
همس * عمرها 18
---------------------------
عيلة ابو حمد
الاب * سلطان * الثاني بعد اخوه * ابو زياد
الام * نوره *
حمد * اكبر عيالهم متزوج وحده من جماعتهم * امل * ولهم بنتين و ولد
ناصر * عمره 28،
طلال * عمره 24، صديق خالد مرهه
رنا * البنت الوحيده من بعد 3 اولاد ، عمرها 22 .
-----------------------------
هاذي الشخصيات المهمه ب روايتي والباقي بنتعرف عليهم مع الاحداث
* تنويه * ما حبيت اوصف الشخصيات ابغاكم تكتشفونها بنفسكم .
---–--–––---------
طلع زياد من عند ابوه وباله مشغول بالموضوع اللي ابوه حطه فيه ، ماهو متصور ان في انسانه بتشاركه حياته ، بيضطر يلتزم باشياء كثيرر وووو... قطع تفكيره صوت اخته
ريم : زيادد ي مال العافيه صار لي ساعه اتنحنح عندك ومو منتبه لي اعترفف وش اللي مشوش بالك
زياد : هلا بالريمم .. اخبارك واخبار الصغنونن
ريم : الحمد لله زينهه وذا الصغنون اللي تقول عنه بعد بخيرر
رجع زياد يفكر بالموضوع وصحاه يد ريم على يده وتقول : لا تشغل بالك بالموضوع توكل على ربك وان شاء الله بيقدم اللي فيه الخير
زياد : تععببتت يا ريم تعبت ابوي مو راضي يقتنع ان ذا الشي بيعشه طول عمري الانسانه اللي راح ارتبط فيها بتكون معي طول حياتي
ريم : طيب انت ليش رافضض رنا بالذاتت !!!
زياد : المساله ما وقفت على رنا ولا غيرها انا رافض الفكره من الاسساسس
ريم : زياد اسمعني يا اخوي ابوي يضغط عليك عشان يبغى يشوف احفاده قدامه
زياد : عندكم خالد زوجوه
ريم : كلنا عارفين ان خالد توه ما استقر بوضيفته بعدين انت الكبير انت الاولى
سكت زياد وكملت ريم
ريم : بعدين لا تكون اناني وتحرم امي وابوي من فرحتهم بحفيدهم اللي من ولدهم الكبيير
تنهد زياد وقال
: يا شيخه ربك يحلها .. يالله انا طالع توصين على شي
ريم : ما ابغى الا سلامتك
----------------
: يا منى انتي ما تعرفين زياد ذا اكثر واحد ف العيله معقد وغريببب بالتفكير والتصرفات
منى : يا رنوو ي حياتي انتي ولد عمك اولى فيك من الغريب وبعدين انتي وش دراك يمكن كل هاذي تطلع اوهام من عندك ويطلع الرجال وش زينه
رنا : مادري ما دري يا منى بس مو مرتاحهه احسس في شي
منى : مثل ايش يعني ؟
رنا : احس مو مرتاحه لزياد
منى : يا ربيهه بتجنني ذا البنت يعني بالعقلل اهلك بيزوجونك واحد ما يدرون وش قاعته ؟ غير انه ولد عمك اكيد الناس تشهد له باخلاقه
رنا : بذي صدقتي زياد اذا دخل لمجلس كلنن يشهد له بطيب اخلاقه
منى : هذا انتي قلتيها بلسانك
رنا : بس برضو مو مرتاحه
منى : انتي هيهه لا تخليني اجن عليكك بيجيني السكر والضغط والسبه ذاا - وتأشر على راس رنا -
رنا : وجعاههه يا دبهه عورتيني انتي واصبعك اللي كانه دريلل موب اصبع انثى رقيقه
منى تنعم صوتها بشكل يقرف : ايوا انا تلوعهه وركيكه .. وانا بنت ابوي قال رقيقه قال حبيبتي حنا ما عندنا الا علوم المرجلهه
رنا: ههههههههههههههههههههههههههههههههههههههه
ضحكت على هبال صديقتها اللي معها من اول ابتدائي وهي نفس طبعها ما تتغير
منى : اي يا شيخهه اضحكي وغيري ذا النكد اللي انتي فيه
رنا : يا حبني لكك .. جت بتكمل قطع عليهم صوت جوالها .. هذا ناصر
رنا : الو .. هلا بالزين هلا باخوي حبيبي
ناصر : يبلغغ يبلغ اطلعي لي انا برا
رنا : يا خي ليه ما عندك احاسيس ومشاعر اللحين انا ارد عليك بذوقق وترد علي كاني واحد من خوياك
ناصر : والله احاسيسي ومشاعري على قولتك تبخرت من الححر
رنا : ههههههههههههههههههههههه يالله طالعه
منى : ها بتمشين ؟
رنا : اي ناصر برا ينتظرني .. وانتي ؟
منى : لسى استنى السواقق غربله الله
رنا : تعالي اوصلك معي
منى شهقت : تبين عبدالله السبع وسلالته يجون يشدوني من شعري لا يخختي روحي انتي الله ييسر لك دربك
رنا : هههههههههههه طيب يالله مع السلامه
طلعت لاخوها
رنا : هاااااايي نويصصرر
ناصر : نويصرر فمخكك اللحين صار لي نص ساعه انتظرك عشان تطلعين يا البرنسيسه
رنا : يا حبني لكك اسفه كنت اسولف مع صديقتي
ناصر: هذا انتو ي الحريم ما تحلى لكم السوالف الا عند باب الجامعه
سكتت رنا لانها تعرف اخوها ما يطيقق الحر ابد ابد
----------------------------
قرب اليوم المنتظر وباقي على ملكة رنا و زياد يومين
نوف : يخختي زياد وش فيه مكبر الموضوع كذا
همس : والله لو يلف الدنيا ما بيلقى مثل رنا ما شاء الله عليها جمال واخللاق
نوف : احيانا احسه مو من عيلتنا احسه كذا غريب
همس : اتحفينا يا ام الاحاسيس كيف وصلتي لذا الاكتشاف العظيم ؟؟
نوف : لا والله اتكلم جد .. يعني اللحين كل شباب عيلتنا بسرعه تكشفين بوش يفكرون ووش شخصيتهم الا زياد غريب بأطباعه وتصرفاته عجزتت وانا احاول اعرف وش نمط تفكيره ولا وش شخصيته
همس : اقول فوزيه الدريعع وخري عني لا تلوثين افكاري بتخصصكك - تقصد تخصص نوف بالجامعه علم نفس -
نوف : اصلن ذا التخصص مهم واهم من كل التخصصات بس انتي وش يعرفك
همس : اقول قومي نروح للسوق ما بقى على ملكت زياد الا يومين
نوف : ي الفالحه من بيودينا
همس : بسمم الله عليك وعلى ذكائك الخارق اكيد بنروح مع السواق
نوف : اي والله صحح
همس : يا ربيهه ترفعين الضغط .. صرختت قومي تحرككي
نوف : بسم الله طيب قايمه .. انتي اصلن المفروض اسمك صواعق انهيارات فياضانات مو همس
همس : هههه ظريفه خلصيني تجهزي
----------
ريم : سلمان حبيبي
سلمان : عيوني وروحي امري
ريم : ما يامر عليك ظالم ممكن طلب ؟
سلمان : وش
ريم : ابغى اروح السوقق
سلمان : سوق لا انتي تعبانه والمشي يتعبك اكثر
ريم : حبيبي انت ابغى اروح اشتري لملكة زياد فساتيني صارت تضايقني من بطني
سلمان حط يده على بطن ريم : وينه البطن ما اشوف شي بذمتكك ذي بطن وحده بالشهر الخامس
ريم : والله مضايقتني بطني
سلمان : من عيوني بس بشرط اول ما تتعبين نرجع
ريم : حبيبي انت وباسته من خده
سلمان : لو ادري كان من زمان وافقت اذا بتبوسيني كذا
ريم باسته مره ثانيه : عشان تفكر فيني لين ما اتجهز
سلمان : ما كذب من سماك الريمم
-----------------------------
ف يوم الملكه
منى : يا بنت اهدي وش فيك ترجفين خلي الكوافيره تكمل شغلها
رنا : يمهه يا منى خايفه خايفه احس رجولي ما تشيليني
منى : استغفر الله واتوب اليه .. هدي ما في شي
دخلو ^ نوف ، همس ، منال ، روان - بنات عمتهم حصه ^
منى : هلا والله جيتو وجابكم الله تعالو شوفو صرفه مع ذا البنت عجزت اهديها
سلمت منى على البنات بحكم معرفتها فيهم ودايم يتلاقون عند رنا
منال : رنوو يا مال العافيه هدي شوي
روان : دقايق بسس انتو اطلعو وخلوها علي تجيكم كانها حصان ما فيها شي
همس : لا واللي يعافيك ي ابو زيد ما نبي البنيه تتحرول قدام اخوي انتي اطلعي من السالفه وكل شي ينحل
ضحكو البنات على حركات روان الصبيانيه
وتبدل جو رنا بجية بنات عمها اللي اكثر من خوات بالنسبه لها
نوف : لو ندري ان ابو زيد على قولت همس بتضحكك كان خليناها تسولف عليك لين بكره
روان : عفوا عزيزتي رنا عندي تفاهم مع الاخوات نوف وهمس ..
رنا : خذي راحتك ي ابو زيد اقصد روان
روان : ابو زيد ف مخكك والله ان ما سكتي لخلي الدبابه اللي لا بستها ف رجلي تردحح على راسك
لفت على نوف وهمس .. وانتو ما شاء الله عليكم وحده ترسم والثانيه تعلق
همس : ههههههههههههههههههههههههههههههههههههههه حبيبتي روان نمزحح معك ي زفتت
روان : شوفي انا ما راح ارد عليك لبعد 5 ساعات
همس : ليه ؟
روان : عشان ما اخرب الحركات اللي انا لا بستها
منال : يختي اعقلي شوي خليك راكده لا ينكسر الكعب
روان : اسمعو ابغى اتدرب على الكعب ابغى وحده تجي معي عشان اذا طحت تساعدني
فجاه كل البنات سوو نفسهم مشغولين الا منى اللي ما فهمت شي
روان : مناوي حبيبتي تعالي معي
منى تتلفت : تناديني انا
روان : اييي
منى : لازم يا روان
روان : اي عشان ما اتحرول قدام الناس
منى : امري لله طالعه معكك
---------------------------
ناصر : هلا ابو خويلد وش الاخبار ؟
خالد : هلا بكك والله تمام بسسس زياد الله يغريل بليسه كاني انا المعرس مو هو
ناصر : هههههههههههههههههههههههههههههههههه وش تسوي محسوب عليك اخ
خالد : اي والله .. يالله توصي على شي
ناصر : سلامتك
دخل ناصر البيت ومعه الاغراض وهو كاره نفسه من الصباح وهو يكرفف
قام يصارخ : ماري ماري يمال الماني بقايل استغفر الله فوق انهم مشغليني سواق صرت خدامه بعد
نزل الاغراض وهو يتأفف وقف يسمع صوت غريب صوت اول مره يسمعه
منى : ههههههههههههههههه الله يقطع بليسك يا روانن بجيب مويه تبينن
لف وشاف منى بوجهه من الصدمه ظل واقف بمكانه وعيونه مفتوحه على الاخير
منى : راجوو وجعاه ياللي ما تستحي تناضر اطلع اطلع لا اسوي حق انت جنجال كبير ... انت للحين واقف تحركك - طبعا الكلام هذا من ورا الثلاجه اللي متخبيه وراها -
طلع ناصر وهو مفهي و اول ما طلع منى حطت رجلها تركضض
روان : انتي هي زوجه بباي وش فيك طايره
منى : يختي السواق ما يستحي دخل المطبخ بدون لا يتنحنح والحيوان ظل مبحلق عيونه يا مالهم البط
روان : تلقينه قال وش ذا السيلانيه الجديده
منى : ههههه بسم الله عليك ظريفه
روان : بروح اشوف نويصرر عشان الباقه حقت رنوو ابرك لي - ناصر اخو روان ومنال ف الرضاعه -
راحت روان ولقت ناصر ف الحوش
روان : هلا نويصصرر اخبارك
ناصر : هلا فيك بعدين وش ذي نويصرر ؟
قالت روان وهي ترمش بعيونها : ذا تلع لاسمك
ناصر : الله يلوع كبدك .. هاكك ذي باقه رنا
روان : يعطيك العافيه
ناصر : روانن تعالي بسالك مين اللي كانت معك قبل شوي
روان : منى صديقة رنوو ليه ؟
ناصرر : قولي لها لا عاد تنافخ ماني بسواق عندها
استوعبت روان السالفه وقعدت تضحكك بصوتت عالي
راحت للبنات وهي لسى تضحك
روان : هههههههههههههههههههه بناتتت هههههههههههههههه يماههه بطني ههههههههههههه
منال : روان ووصمخ وش فيك
روان : ههههههههههههههههههههههههههههههههه لحظه خليني اخذ نفس اوههه
رنا : وش فيككك
قالت لهم السالفه ومنى وجها انصبغ الوان من الفشله
رنا : عادي مناوي عدي السالفه
منى : يا فضححي عند العربب وش عدي السالفه
جتهم ريم ببطنها اللي ما ينشاف
ريم : سلامم ي حلوينن
البنات : هلا والله
منال : هلا بالريم اخيرا افرج عنك سلمانوهه
ريم : ما اسمح لك تغلطين على حبيبي
منال : يوههه اسفين اسفين
ريم رفعت اكمامها : عبالي بعد .. بنات ترا المملك بيجي الساعه 7 حاولو تخلصون بدري
رجع المغص والخوف لرنا ورجعت ترجفف
--------------------------
زياد : خلها على ربك يا شيخ والله السالفه ذي كلها ما كنت ابغاها بس عشان خاطر ابوي
وليد : الله يعينك .. يالله قم حلق بالله ذا شكل معرس
زياد : انت مصدق اني معرس ههه
وليد : اقول قم قم وخل عنك حركات البزران
-----------------------------
صار وقت زفت رنا
وقفت رنا بفستانها العنابي الطويل وماسك على الجسم ويتوسع شوي شوي من تحت الركب صارت تعدل شعرها عند المرايه وكان عاجبها اللون البني اللي صابغته
سمت بالله ونزلت وستقبلها صوت الزغاريت
جلست وحولها نوف وهمس ومنى ومنال وروان وريم حست بالراحه لمن شافتهم حولها
جت امها وقربت من اذنها : يالله يا عيوني تعالي وقعي
سمت بالله ووقعت وسلمت على اخوانها اللي هم سند وعزوه لها من بعد ابوها
------------------------------------------


لنا لقاء اخر بإذن الله ف البارت الثاني
استودعتكم الله الذي لا تضيع ودائعه

شيم ال عوده ،

لامــارا ©؛°¨غرامي نشيط¨°؛©

ماشاء الله بداية حلوة

ننتظرك يا قلبي

دمت بود

شيم ال عوده ©؛°¨غرامي جديد¨°؛©

البارت الاول : الجزء الثاني

"" اول الضياع ؛ راعيت شعورهم ونسيت نفسي "

انصدمت !! كان احد كب عليها مويه بارده
كل خليه ف جسمها تجمدت من الصدمه
رنا : كككيف .. لحظه يمهه لحظه !! كيف رفض النظره الشرعيه ؟
امها : يا رنا عادي كثير ناس تزوجو من دون نظره شرعيه وهذا هم سعيدين فحياتهم
رنا دموعها بدت تنزل : يمه انتي متصوره كانه رفضنني !! الناس اللي تقولين عنهم هم اللي يرفضون مو ازواجهم بليلة ملكتهم يكسرون شعور الفرحه فيهم
يمه سألتك بالله عمي غاصب زياد عشان يتزوجني ؟
امها سكتت ما تدري وش تقول لبنتها هي نفسها مو عارفه وش السبب اللي خلاه يسوي كذا
مشت رنا لغرفتها وتركت وراها فرحتها وضيوفها وليلة ملكتها اللي ماتت قبل لا تشوف النور

منال : بنات العروس وينها ؟ مو كانها طولت
روان : تلقينها مستحيه اللحين عاد يا شينها نبي نجلس معها قبل لا نمشي للخبر
نوف : لحظه لحظه انتو ما راح تنامون هنا
روان : للاسف لا
نوف : ليييهه يا خايسه
روان : الاخ وليد عنده مؤتمر بكره ما يقدر يجلس ف الرياض
منى : بنات بقوم اشوف رنا
همس : انتبهي لا يطلع لك السواق مرا ثانيه
ضحكو البنات
منى : يا شينكم اقوم اشوف صديقتي ابرك لي

-------------------------------

وليد : مجنون انت !! انت عارف وش سويت
زياد : وليد انا واعي للي سويته ! ي خي مو غصبتوني على الزواج خلاصص بعدها بسوي اللي يريحني
وليد : تفكيرك ذا بوديك فداهيه !! انتبه يا زياد مو كل شي ينحل بالعناد
سكت زياد وصار يناظر لبعيد ، يناظر لمستقبله اللي اعتبره انهدم مجرد ما وقع على ورقة موته اليوم على يد اهله وعمه والاهم بنت عمه اللي بتصير زوجته !!
وليد : اللحين وش بتقول لخالي ؟ وش اللي بتقوله لابوك وناصر وطلال وحمد ؟ والاهم وش بتقول للناس
زياد : وليد واللي يرحم والديك خلاص سكر على الموضوع انا بديت ذا الشي وانا راح اكمله
وليد : الشكوى لله .. قم اوصلك للبيت
زياد : روح انت انا بقعد شوي ف الكوفي ابغى اريح اعصابي
وليد : بكيفك بس لا تقفل جوالك لا تخلينا نقلق عليك
زياد : ان شاء الله
------------------------
منى : رنا ي قلبي افتحي الباب .. رنا رنا
رنا : منى واللي يعافيك اتركني بلحالي
منى : مجنونه انتي اخليك بلحالك .. رنا ي روحي انا مثل اختك افتحي الباب
فتحت رنا الباب وعلى طول ارتمت بحضن منى وصارت تصيحح بقوهه ومنى مو عارفه وش فيها وقامت تصيح معها
منى : رنا خلاصص اهدي اهدي وقولي وش فيك
حكت لها رنا الموضوع
رنا : منى احسني مكسوره من داخل .. متخيله احسه بذي الطريقه يرفضني يرفض علاقتنا اللي لسى ما بدت
منى : رنا انتي فسرتي الموضوع من عندك يمكن هو قصده شي ثاني
رنا : يا منى واضحه مثل الشمس وش بيكون مقصده غير ذا الشي
منى : ما تدري انتي يمكن ما كان يبي يحرجك .. وانا متاكده انه بعد يومين بيزورك ويوضح لك مقصده
رنا : مدري يا منى احس في شي ناقص ف الموضوع
منى : لالا مافي شي بس انتي اللي يهديك من التوتر صرتي تفكرين باشياء مالها داعي .. قطع عليهم صوت جوال منى
منى : ايوهه وذا السواق وصل يالله يا روحي انتبهي لنفسك ولا تفكرين بذي الافكار وريحي بالك يالعروس
رنا : من عيوني
منى : يالله مع السلامه
شكرت رنا ربها فداخلها مليون مره على وجود منى اللي مثل البلسم لجروحها
----------------------------------
تحدد عرس رنا وزياد بعد شهرين !!
والكل مستغرب من استعجال زياد بس حجته كانت " خير البر عاجله "


احبتي نلتقي مجددا متى ما شاء الله
الى ذلك الحين كونو بقربي
دمتم بود ..
شيم ال عوده ،

شيم ال عوده ©؛°¨غرامي جديد¨°؛©

البارت الاول : الجزء الثالث

" سيدي .. وان كان في حبك ذنوب ،
في حظن عينك الاقي مغفره .. "

همس :والله رنا تهبل مشاء الله عليها
بيضاء وطولها حلوو وجسمها يهبل وعيونها وشعرها والله اخوك مو كفوا يستاهل وحده مثل هالشيون الي نشوفهم
نوف : الحين انتي شفيك على زياد
همس :قاهرني على ايش شايف نفسه ولا كأنه فرحان بزواجه وربي لو هو خطيبي كان تحطمت واضح انه مايبي رنا
نوف : بكرا يحبها
همس : هههههههههههههههههههههه والله حلوه نكتتك زياد يحب مستحيل !!
نوف : اقول اطلعي ابغى انام
-------------–---–--------
مرت الايام والبنات مشغولين بالاختبارات و زياد مابين دوامه وتأثيث البيت .

زياد اتصل برنا مرتين وكانت معظم المكالمه عن التأثيث والسفر وقليل ماكانت تتكلم معه عن نفسها او مره فرح قلبها وقال لها كلمه حلوه ولاتتعدى عشر دقايق لكن الي الكل مستغرب منه ان زياد من الملكه ماراح بيت عمه ولا شاف زوجته والكل كان مستغرب ولما جت ريم عند اهلها قالت لها امها وانها خايفه من تصرفات زياد لان البنت مالها ذنب عيب الي يسويه وقالت ريم
انها بتكلم بدر وتتفاهم معه .

راحت ريم لغرفة زياد طقت الباب وما طولت لين جاها الرد من زياد : تفضلل
ريم : لا يكون نايم وصحيتك ؟
زياد : لا مو نايم ، وان كنت نايم بصحى لعيونك كم عندنا ريم
ريم : تسلم .. دخلت وسكرت الباب
امم اخبار تجهيزات البيت معك ؟
زياد : الحمد لله ماشيه كويس
ريم : ها تبغى مساعده تراي جاهزه
زياد : لا تسلمين ما ابغى اتعبك .. ريم انا مو غشيم عنك قولي وش تبين
ريم : بصراحه زياد جايه ابغى اتكلم معك بخصوص رنا .. زياد انت مو بزر عشان نعلمك وش الصح والغلط ، صارلك انت ورنا متملكين شهر ونص ومابقى على زواجكم الا اسبوعين ممكن تقولي ليه ما رحت تزورها ؟
زياد : هذا انتي قلتيها ما بقى على زواجنا الا اسبوعين يعني ماله داعي
ريم : زياد الكل مستغرب ليه ما تروح لهم .. بعدين البنت مالها ذنب من حقها تعيش فترة خطوبتها زي باقي البنات !! بعدين مافكرت وش تقول لابوي وعمي واخوانها اذا سألوك ؟
زياد : انتي عارفه اني اصلا ما ابغى الزواج من اساسه ما فرقت اذا مع رنا ولا غيرها !! و وافقت عشان خاطر ابوي
ريم : زياد لا تضحك على نفسك وتاخذ دور المظلوم
انت رجال واعي واتخذت ذا القرار بعدين لا تنسى انك قلت ان رنا بتاخذ كل حقوقها !! ومن حقها انك تزورها لو مره وحده .. انا طالعه يا بدر واتمنى تفكر بكلامي وتاخذه على محمل الجد !
طلعت ريم وتركت زياد بدوامة افكاره اللي مصر فيها ان اللي يسويه صح ولا راح يغيره لاي سبب كان
------------------------
مرت الاسبوعين عاديه بالنسبه لزياد
اما بالنسبه لرنا فكان التوتر والخوف مسيطرين عليها،
توتر من الشخص اللي راح تعيش معه
خوف من المستقبل اللي هي جاهله وين راح يوديها
بيوم العرس كانت رنا متوتره والكل يهديي فيها
منى وعيونها مغرقه : بسمم الله عليك الله يحفظك ويحميك .. رنوو ياروحي طالعه تهبللين
رنا : الله يستر لا اطيح بالزفه والله حيل خايفه
منى : ماله داعي ذا الخوف انتي بين اهلك واحبابك
جتهم روان ومنال
روان : زغرررطيي ب منال دي البتت بتعقد كتتيرر كتيرر
منى : روان انتي اللحين وش تسولفين بالضبط مصري ولا لبناني حددي الله يهديك
روان : ذا يسمونه مكسس الحضرات يا حظي .. يالله يا الغباء اللي فيك بالله رنوو كيف مستحمله صديقتك كل ذي السنين
منى شهقت: هييييييي انتي قولي م ما شاء الله لا اللحين نتحرول انا ورنوو من عيونك
روان : ما شاء الله ما شاء الله
منال : ما شاء الله عليك يا رنوو طالعه تهبلين اكيد بينجن عليك زياد
منى : اكيد حبيبتي ذي رنوو شيخة البنات مو حيالله
صارت الساعه 10ونصص واعلن وقت زفت رنا
انطفت الانوار وما كان فيه الا نور ابيض موجهه للباب اللي بتنزل منه رنا ، وعلى انغام اغنية اليسا عبالي حبيبي انزفت ملكة ذي الليلة
وقفت رنا بأعلى الدرج وانظار الناس عليها ، رجع الخوف يسيطر عليها وناظرت المسافه اللي بينها وبين الكرسي اللي راح تقعد عليه ..
وصلت للكرسي وبدو الناس يسلمون عليها
غرقت عيونها وهي تشوف اهلها وصديقاتها وبالاخص منى يسلمون عليها .. تمنت الزمن يوقف خايفه من اللي راح يستقبلها ..
دخل زياد وعمه ابو حمد وابوه واخوان رنا ناصر وطلال
سلم عليها بدر وباسها على راسها .. سلمت على عمها وعلى ابوها واخوانها اللي حضنتهم من كل قلبها
ناصر : رناا بسس الله يصلحك خنقتيني
رنا تقاوم دموعها : راح اشتاقلك ي ددبب
طلال : ما نوصيك يا زياد على رنا حطها ف عيونك
زياد : لا توصي رنا جوات عيوني
الكل كان مبسوط وفرحان الا خوات زياد اللي كانو خايفين ان زياد يجرح رنا !!
بعدها توجهو للفندق ونزل زياد مع رنا اللي على طول جلست على الكرسي الموجود بالغرفه
وتم زياد مبهور بجمالها ما كمل دقيقه الا ورجع له تفكيره القديم ..
زياد : انا طالع عشان تاخذين راحتك .. اول ما طلع رفعت رنا راسها تناظر المكان اللي كان واقف فيه حطت يدها على قلبها تهدي من نبضاته السريعه
وقفت وراحت قدام المرايه وفكت الطرحه ونزلت الاكسسوار اخذت ملابسها وراحت تتسبح
تمت تنتظر زياد ساعتين بس ما جى !!
راحت تكلم منى دقت عليها مره .. مرتين .. ثلاث .. بعدين ردت
منى بصوت كله نوم : الوههه
رنا : منى ي الدبه
منى : خيععر مين انتي
رنا : يامالك العافيه انا رنا
منى : رنوو فيك شي طب زياد فيه شي
رنا : هدي هدي وش فيك اكلتيني ما فينا الا العافيه بس زياد طلع وشفته طول قلت خليني اكلملك اضيع وقت لين ما يجي
وعلى كلامها الاخير دخل زياد بس وقف مستغرب من تحاكي بذا الوقت
منى : ليه احد قايل لك اني اهرجج ف اخر الليل
رنا : هههههههههههههههههه الله يقطع بليسك مو كذا قصدي
منى : اقول قصدك ولا مو قصدك طيري عن وجهي ابغى انامم من الصباح وانا على حيلي معك
رنا : طيب مع السلامه ..
لفت وشافت زياد استغربت متى جى وما حست عليه
رنا : زياد متى جيتت
قال زياد وبنبرة استحقار : من لما قلتي للي تكلمينه اني طلعت وطولت
استغربت من اسلوبه بس ما عطته اي اهتمام وظلت تناظره تبغاه يكمل كلامه
زياد : ما شاء الله عليك يا بنت العم من كنتي تكلمين بذا الوقت ؟ صرخخ فيها خلصصيني تكلمي من الحيوان اللي كنتي تكلمينه
رنا : شوف انا ما اسمح لكك تطعن باخلاقي لو مين ما كنت تكون
زياد : لما يكون عندك اخلاق يالمتربيه .. يمين بالله لو ما قلتي من تكلمين .. ولا اقولكك هاتي الجوال
رنا : تدري انك مريضض وافكارك مريضه مثلكك
ما امداها تكمل الا وزياد شد شعرها واخذ الجوال من يدها وقال : اللحين بتشوفين مرضي عدلل انتي والحيوان اللي كلمتيه
اتصل على اخر رقم كلمته رنا وكان مسجل باسم " روححي " جاه الرد
منى : رنوو شكلك ما راح تخليني انام اليوم
حس نفسه ولا شي كل شي صار قدامه ماله معنى بعد اللي سواه ناظر فيها وقط الجوال
منى : الوووهه رنووو
رنا وهي تمسح دموها : منى شوي واكلمك
قطت نفسها على السرير وقامت تبكي
تبكي ليلة زواجها اللي انهدمت
تبكي اخلاقها اللي انطعن فيها
والاهم تبكي حياتها اللي تحولت لجحيم من ذي اللحظه
تمتت تبكي لين اذن الفجر قامت توضت وصلت وصارت تدعي ربها يفرج همها ويصلح حياتها
-------------------------------

احبتي ها هو البارت الاول انهيه لكم
الى اللقاء في موعد قريب بصحبة " البارت الثاني "
استودعتكم الله الذي لا تضيع ودائعه

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1