جود joj ©؛°¨غرامي متألق ¨°؛©

المشاركة الأساسية كتبها ضاقت انفاسي اقتباس :
رح اجرب طريقه وانزله انتم وحظكم ^_^
لايروح علينا البارت اهم شي

ضاقت أنفاسي مشـ© الروايات ©ـرفة

.............

ضاقت أنفاسي مشـ© الروايات ©ـرفة

[QUOTE بسم الله


1*
1*
1*
1*
بعد الفطور جلس بالصالة الخارجيه
مع زوجته بروقان
الجده : اي ساعه رح يجون الجماعه ؟؟
ابتسم الجد بغموض : بعد المغرب
الجده بتحقيق : هنا والا في بيت نايف ؟؟
رد بعد ما حط الفنجان امامه : في بيت نايف
صحيح اليوم الكل يتجمع بعد المغرب نروح
نتحمد لنايف بالسلامه
الجده عقدت حواجبها : والجماعه ؟؟؟
الجد بعدم اهتمام : وش عليك منهم
وين صقر ؟؟؟
الجده قوست فمها مو عاجبها تطنيشه لاسئلتها : طلع زمان
الجد وقف وهو يعدل الشماغ : اخوي ابو عبدالرحمن ينتظرني
ما ابغى اتأخر عليه
لا تنسي اليوم في بيت نايف
الجده بدون نفس : ان شاء الله
**
**
**
**
**
**
**
**
بمكتب صقر
صقر يطقطق بالقلم على الطاوله
سليمان بانزعاج : وبعدين ؟؟؟
صقر بدون نفس : كيفي طربان اليوم
سليمان زم شفايفه بانزعاج : ازعجتني
صقر بدون مبالاه وهو يطقطق : مكتبي
اذا انزعجت الباب خلفك يوسع جمل
سليمان لوى بوزه : يا سخفك
خلاص راعي اني منزعج ومتضايق
حط صقر القلم على الطاوله وطالع
سليمان باستهزاء : يا بعد كبدي وش للي مضايقك
سليمان وهو يتثاوب : ناقص علي نوم
صقر مسك القلم ورجع يطقطق فيه : ما حد قال لك
تسهر بالاستراحه لوقت متأخر
سليمان بندم : كله من نواف الزفت
خليك خليك حتى تأخر الوقت
صقر بشماته : تستاهل وحضرته نواف نايم بالبيت اجازه ليومين
سليمان : تقول كذا من غيرتك لانك ما تقدر
تتأخر بالاستراحه
تخاف تنام برا البيت
وغمز له
صقر وهو يقرص عيونه : الظاهر انك البارحه نمت برا البيت
سليمان بانفعال : تخسى
صقر ابتسم على جنب : ما ادري احسك محكوم
لبنت ابو مشعل
سليمان بقهر وقف : تخسى لا تفكرني مثلك خروف
وطلع وهو مو قادر يفتح من النعس وانقهر بزياده من صقر
**
**
**
**
**
**
**
رجعت من الجامعه وهي تحس بالارتياح
نفذت للي براسها
مع انها تأخرت شوي بالانجاز بس انجزت للي تبغاه
وتنتظر النتائج
دخلت من الباب الخلفي كالعاده تبغى بس السرير
تنام عليه من التعب
اخذت احتياطها واكلت بالجامعه
وقفها صوته ينادي عليها ما في غيره
ما انتبهت على وجوده لما دخلت ناظرته بهدوء : نعم
نايف وهو جالس على طاوله السفره ويناظرها يبحث عن الزله : الناس تسلم بالاول
ريم الله يطولك يا روح اخذت نفس وردت بهدوء : السلام عليكم
نايف ابتسم بسخريه : هلا بالعروس
طالعته ريم نفسها تعرف وش يبغى منها ما ردت
نايف وقف وتوجه لها : لا ما اصدق العروس مستحيه وما ترد
وقف قدامها ورفع راسها لفوق وناظرها
وما زالت لابسه النقاب طالع عيونها الوسيعه
لونهم مو موجود عندهم بالعائله
وحتى ساره لون عيونها مو كذا
من وين صاروا عيونها كذا سأل باستغراب وكأنه
اول مره ينتبه للون عيونها كذا : عيونك لونهم لوزي ؟!!!
ريم وهي تطالعه ووجهه قريب من وجهها : مثل جدتي
نايف كشف وجهها وهو يشوف اثار التعب
وشاحب بس اخف من البارحه بالليل
في شي بداخله يدفعه انه يقهرها : ما الومك لو
وافقتي على السكير
لانه اذا حد شافك ما رح يقبل فيك
يعني لازم تشكريني اني ابغى ازوجك
ريم بعدت راسها عنه ومسكت النقاب بيدها وردت
بثقه : واثقه من جمالي
نايف طالعها تتكلم بثقه : تراك ماخذه بنفسك مقلب
لا تنسي اليوم خطبتك
ريم بلامبالاه : مبارك لا تنسى تعزمني على العرس
وتركته وطلعت لغرفتها
كان يناظر زولها وانقهر من برودها كان يبغى
يقهرها صار العكس
رجع جلس مكانه على طاوله السفره وهو
يهز رجله ويفكر بشيء يقهرها
ويطلعها من برودها

**
**
**
**
**
**
ام بدر وهي تمسح دموعها
سلطان : بعدين مع هذي الحساسيه ؟؟
ام بدر بصوت باكي : حرام عليهم
يزوجوها كذا ويظلموها
كان تحركت وعملت شيء
سلطان مد يدينه على الكنبه : انا ما قصرت خطبتها لعبود بس رفضت
وبدر وريان خاطبين
ريان رفع عينه عن الجوال : حتى لو كنت مو خاطب
مستحيل اخذها فخلي البنت تتزوج بحال سبيلها
ام بدر : انت اسكت اصلا هي ما تقبل فيك
اذا عبود للي كانت بصغرها معه رفضته
اكيد رح ترفضك
ريان بقهر : يمه
سلطان بحزم : ريان خلاص اسكت
وخليك بدراستك احسن لك
دخل سامي وهو يدندن
سلطان طالعه : وين عبود ؟؟
سامي : عند جدي راح
ريان : وانت وين داير ؟؟
سامي رفع حاجب : انت وش دخلك ؟؟
سلطان : سامي عيب احترم اخوك الاكبر منك
سامي : وهو يحترم نفسه ويترك اللقافه
ريان بحزم : سامي وقسم بالله اذا ما احترمت نفسك
لامسح فيك الارض
تراك انت وعبود تعديتم حدودكم
سلطان طالع ريان : هدي يا ريان
وبحزم طالع سامي
وانت يا سامي اذا ما احترمت بدر وريان
رح يكون لك حساب ثاني فاهم
بدر طالع سامي بغرور
سامي انقهر : ان شاء الله
وطلع لغرفته بقهر
**
**
**
**
**
**
في مجلس ابو عبدالرحمن
ابو مشعل : يبه اليوم تبغى تروح لبيت عمي ابو سلمان ؟؟
ابو عبدالرحمن عقد حواجبه باستغراب : ليه اروح ؟؟/
ابو مشعل : يقولون اليوم خطبه بنت نايف للرجال للي دهسه
ابو عبدالرحمن : مين قال لك ؟؟
انا سألت اخوي ابو سلمان وقال ما في خطوبه
ابو مشعل عقد حواجبه باستغراب : غريب كيف
قاطعه ابو عبدالرحمن : ما علينا من الاشاعات
ابو مشعل : بس يبه مو اشاعه
قاطعهم دخول ابو مشاري سلم وجلس
مقابل ابو مشعل بجهة اليسار
ابو عبدالرحمن : وش صار على خطبه مشاري ؟؟
ابو مشاري بقهر من مشاري : ما عجبته البنت
ابو مشعل : انا اقترح تروح تفصل له عروس
تفصيل
والله ما صارت
ابو عبدالرحمن : وليه تسكت له يا ابو مشاري ؟؟
ابو مشاري بقله حيله : وش بيدي اعمل ؟؟
والزواج مو بالغصب يبه
يقول ما لقى البنت للي يبغاها ونفس الصفات للي
يبغاها
ابو عبدالرحمن : طيب ليه ما تشوف بنات
فيصل او بنات ابو سليمان
ابو مشاري : اخاف يرفضهن مشاري
بعد الشوفه
وين عيني من عيال عمي والله صعبه
وبتردد
نايف بنته الكبيره كم عمرها
ابو عبدالرحمن بعصبية : وش تبغى فيها ؟؟
وكمل بدون ما يسمع جوابه
اذا في بالك تخطبها لمشاري انسى لو على جثتي
ناسي انه ابو سعد جدها !!
تبغى عيال احفادي يحملون دمهم
مستحيل
ابو مشاري : بس
قاطعه ابو عبدالرحمن : انتهى الموضوع
ابو مشعل : ابوي صادق ما نبغى دم هالعائله
يجري بعروق احفادنا
ابو مشاري سكت كانت مجرد فكره وكنسلها
لما شاف رد فعل ابوه كذا
**
**
**
**
**
**
**
**
**
ام خالد باستغراب : كيف ما في خطوبه ؟؟؟
فيصل بنرفزه ؛ ما في خطوبه وانتهينا بالغصب
تبغين فيه خطوبه
خالد يهدي الوضع : يبه ليه معصب امي مو قصدها
فيصل زفر بضجر : من ساعه فتحت تحقيق
ليه ما في خطوبه
رولا : بس يا عمي انتم قلتم بعد المغرب الخطوبه
وش للي كنسلها
فيصل وقف بضجر : الله يجيبك يا طول البال
كنت بمحقق واحد صرنا بعشره
وبصوت عالي
قلت لكم ما في خطوبه من اصل
سديم وهي داخله الصاله : كيف ما في خطوبه
وابو الرجال خطبها بالمستشفى
فيصل بصوت عالي : لا حول ولا قوه الا بالله
وطلع من الصاله خارج البيت كله
سديم ناظرتهم وهي رافعه كتوفها : علامه هب
بوجهي كذا ؟؟!!
خالد ضحك على شكل سديم المنصدمه : ههههههه
سديم بقهر : وش للي يضحك يا استاذ خالد ؟؟
خالد والابتسامه مرسومه على ملامحه : جيتي بوجه
المدفع
استلمته امي تحقيق وبعدها رولا والحين انت
قرف حاله وطلع من البيت
ام خالد تطالع خالد : تبغى تقنعني انك ما تدري عن شيء ؟؟؟
ابتسم خالد : الظاهر صار دوري الحين لازم
اهرب احسن لي
رولا تطالع خالد بنص عين : اكيد يا خالتي يدري وما يبغى يقول لك
خالد طالعها وهو يمثل البراءه : انا
الله يسامحكم دائما تظلموني
سديم طالعته بشك : اشم رائحه المراوغه ؟؟
خالد وقف : ما شاء الله عندك حاسة الشم عاليه اروح اريح شوي فوق احسن لي
رولا : شفتي يا خالتي قلت لك يعرف وقاعد يتهرب خالد طالعها وهو يتحلف فيها
رولا ضحكت : هههههه شايفه يا خالتي قاعد
يتحلف لي
خالد : يمه لا تصدقينهم
وطلع بسرعه لجناحه قبل ما يفتحوا له تحقيق
**
**
**
**
**
**
**
بعد المغرب
بمجلس الحريم كانت اصوات الحريم متداخله
ومندمجات بالكلام
الجده : وين ريم ما اشوفها ؟؟
ساميا : بغرفتها فوق
الجده بحزم : ليه ما تنزل تسلم على حريم اعمامها وبنات عمها ؟؟
ساميا : اصلا ما تدري بوجودكم
هيفاء : كيف ما تدري بوجودنا ؟؟
ساميا : ما حد خبرها
رولا : سلمى روحي نادي ريم
سلمى : لا استحي
رولا كشت عليها : مالت
هذي اختك كيف تستحين منها
وطالعت لينا : روحي انت
لينا : ما لي دخل
انقهرت رولا : مالت عليك انت الثانيه
وقفت ساميا لما سمعت صوت نايف
طلعت خارج المجلس بهدوء : نعم
نايف : وين سلمى ولينا ليه ما يساعدونك
ساميا بهدوء : مع البنات داخل
نايف : وريم وين ؟؟؟
ساميا : بغرفتها فوق
وقبل ما يعصب او يتكلم ما تبغى المشاكل ترجع تكلمت بسرعة،:
ما تدري انه في جمعه هنا
نايف هز راسه : الحين اطلع اخبرها
ساميا هزت راسها وبقلبها الله يستر
**
**
**
**
**
**
فتحت عيونها بشويش وهي تناظر الشخص
للي واقف فوق راسها
رجعت غمضت عيونها
رجع هزها من كتفها : ريم
فتحت عيونها مو قادره تفتح عيونها من النعس والتعب
وبصوت ناعس : همممم
نايف : قومي حد ينام بالوقت هذا ؟؟؟
ريم فتحت عيونها وهي تناظره باستغراب
ليه جاي على غرفتها
نايف : ريم قومي
نهضت نفسها وهي عافسه ملامحها
مو قادره تفتح عيونها تبغى ترجع تنام مره ثانيه : وش فيه ؟؟
نايف وهو يفكر كيف ينرفزها ويخليها
تصحصح : قومي وقعي على زواجك
ريم وهي مغمضه عيونها مو بوعيها : همممم
نايف: قومي وقعي على زواجك
ريم رجعت راسها على المخده وغطت بالنوم
نايف طالعها وهي نايمه بعمق
ابتسم بخبث وناظر كأس المويه
وخلال ثواني كان فوق راسها
صحيت مفزوعه وتناظر حولها
بعدها ركزت نظرها على نايف
نايف ابتسم بشماته : قومي
سلمي على حريم اعمامك تحت بمجلس الحريم
ريم بنرفزه وهي تمسح المويه عن وجهها : في
الف طريقه غير هذي الطريقه حتى تصحيني
نايف طالع وعرف انها ما كانت بوعيها وما سمعت
لما قال لها توقع على الورقه لوى بوزه : بلا كلام فاضي
وانزلي بسرعه سلمي على الحريم
ويا ويلك اسمع اذا طولتي لسانك على الحريم
فاهمه
وطلع قبل ما يسمع ردها
غمضت عيونها وفتحتهم تأففت بضجر
على مين تسلم ما تدري

**
**
**
**
**
**
ليلى بغرور : بصراحه ما عجبني فستانك يا سندس للي اشترتيه الاسبوع الماضي
سندس انقهرت بس ما اظهرت : بالعكس
كل للي شافوه عجبهم
رولا بنغزه : اذا ليلى قالت انه مو حلو
اتوقع انه حلو
ابتسمت سندس
ليلى والشر بعيونها : وش تقصدين ؟؟؟
رولا ببرود : ولا شيء بس دائما الشيء للي
ما يعجبك يعجبني
الظاهر اننا متعاكسات
سديم تهمس لرغد : مستحيل لازم يتناقرن بالكلام
رغد لوت بوزها : ذول الثلاثه نفسي اشوتهم
يرفعون ضغطي
سديم : صادقه
رولا بلقافه : ليه تتهامسن ؟؟
رغد ابتسمت بمجامله : نقول ذوقك انت وليلى
حلو كثير
رولا ابتسمت : مرسي حبيبتي
طالعت سديم رغد وابتسمت
ليلى : انت يا سلمى متى رح تملكين؟؟
سلمى استحت وصار وجهها احمر
الجده : بعدها صغيره
لما تخلص الثانوي وقتها تملك
دخلت ام بدر وسلمت على الموجودين
وجلست جنب ام خالد
مي بدلع : ليلى متى رح تنزلين على السوق ؟؟؟
الجده : وليه تنزل على السوق ؟؟؟
قبل يومين نازله وشهوله تنزل مره ثانيه ؟!!
بعدين صقر ما يحب طلعات السوق كثير
انخطف لون ليلى
استغلت رولا الفرصه : غريب مو قلتي يا ليلى
انه صقر يحب السوق ويترجاك علشان تطلعين معه
ليلى بترقيع : إيه صحيح
بس هو ما يحب السوق بآخر الاسبوع علشان
تكون عطله وتكون الاسواق زحمه
يقول لي اغار عليك
روان : ابوك يالترقيعه
رغد : ما ادري على وش يغار برميل نفط
يمشي بالاسواق
ليلى بقهر : وش قصدك ؟؟
رغد ابتسمت على جنب : ولا شيء
بس علشان لابسه اسود بأسود مو باين منك شيء
لوت ليلى شفايفها بقهر
ام خالد : بعدين مع مناقرتكم ؟؟
شوفوا لينا وسلمى اصغر منكم بس
هاديات وما عندهم مشاكل
سلمى ولينا نزلت كل وحده راسها بحياء
ام سليمان تطالع ام بدر : نيالك بسلمى ما شاء الله عليها
هاديه واخلاق
سندس بقهر وغيره : وش قصدك ؟؟
الجده بنهر : يعني وش قصدها
تمدح بالبنت وانت وش عليك منها ؟؟!!
ام سليمان : ما ادري يمكن تبغى تتدخل
وتتحكم وش اقول
سندس حست على نفسها : مو قصدي يا خالتي
قاطعهم دخولها بهدوء واناقه مع الكعب للي
اعطاها طول زياده
ردت السلام بصوت هادي ناعم
كانت كل النظرات مسلطه عليها
انزعجت من النظرات ما تحب حد يناظرها
تقدمت من الجده بابتسامه وسلمت عليها
وبعدها على حريم اعمامها
بس عند ام بدر كان سلامها مختلف
حضنتها ام بدر وهي تبكي
حست ريم بحضن فقدته من زمان
حضن كله حنان ومحبه
يد حانيه مسحت على راسها بطفولتها
حاولت تعوضها عن فقدان الام
كانت مثل البلسم لها
ابتعدت ريم عن ام بدر وصارت تمسح بدموعها
وكانت ريم اطول من ام بدر
ام بدر بصوت باكي : اشتقتلك كثير
ما شاء الله كبرتي ربي يحفظك من العين
ريم بابتسامة بانت غمازاتها : ربي يخليك
باستها على راسها : وانا اشتقت لك اكثر
الجده لوت بوزها : ليه هالدموع ؟؟
سلمي على بنات عمك
طالعت ريم الجده وبعدها
ناظرت ام بدر وابتسمت : ما شاء الله ما تغيرتي
نفس الشكل قمر
ام بدر ابتسمت : خلي سلطان يسمعك
يالله سلمي على بنات عمك
هزت راسها
وتقدمت من البنات تسلم
ما عرفت الا ليلى
لانها شافتها مع صقر
بعد ما كملت سلام جلست بهدوء
ألقت نظره على الموجودين
كانت كل الانظار عليها
ام بدر بابتسامة مسكت يد ريم : ما شاء الله
كان طولك شبر وانت صغيره والحين
طولك مترين
ابتسمت ريم : لا وش مترين
خليتيني عملاقه
بس الكعب زاد طولي
ام بدر ناظرتها بمحبه : ربي يحفظك
وش اخبارك ؟؟؟
كيف حياتك عند اهل امك ؟؟
ارتحتي ؟؟
ريم وهي تحس كل النظرات والاذان مفتوحه
لجهتها : بخير الحمد لله
بعدها وقفت وطلعت من الغرفه بعد ما استأذنت
من ام بدر
**
**
**
**

سكرت باب المجلس وتنهدت براحه
كل العيون مسلطه علي اففففف اكره هذي النظرات التقييميه
ما عرفت احد من البنات الا ليلى
وحريم اعمامي
اما البنات ما حسيت شيء تجاهم
لا كره ولا محبه ما احس في رابط يجمعني فيهم
وما اتوقع اختلط فيهم
قررت ادخل ضيافه لهم وانشغل بذي الامور حتى
تنتهي السهره
توجهت للمطبخ واخذت العصير
ما ادري احب اقدم العصير للضيوف
اخذت صينيه وتوجهت للمجلس
حسيت بنظراتهم استغراب بعد ما وزعت العصير
طلعت من المجلس
ويا ليتني ما طلعت
ناداني : ريم تعالي هنا
اقتربت منه بخطوات هاديه : نعم
طالعني متأكده ما عنده سالفه بس
كذا يدور اي شيء ينرفزني فيه او يقهرني
ما تدري وش السبب
واخيرا نطق : وين الحلويات ؟؟
طالعته وش هالسؤال : بالمطبخ
الحين اجيبهم لك
تركته قبل ما يتكلم
بعد ما أعطيته الحلويات رجعت للمجلس
جلست عند ام بدر اتكلم معاها
هيفاء تكلمت على سمعي : يا اختي ناس ما عندها
ذوق رافضه ابنها وجالسه عندها
طالعت ام بدر اشوف رد فعلها
ابتسمت ومسكت يدي : ما عليك منهم
اصلا انا كنت رافضه الموضوع لانه ما يناسبك
عبود ابد
والفارق بالعمر قليل سنه وحده
يروح عمرك وانت تنتظرينه يجهز نفسه
هزيت راسي بهدوء : عبود مثل اخوي اعتبره
ام بدر : الله يرزقك ابن الحلال للي يسعدك
استغربت معقول ما سمعت. عن خطوبتي
اليوم خبرني انه الخطوبه اليوم
بس ما في شيء يدل
لو صار شيء كان باركت ام بدر لي
ما يهمني الخطوبه اليوم والا بعد سنه
لانه بأحلامهم اتزوج ورح افشلهم قدام الشيخ
والحاضرين
لاني بلغتهم برفضي ويتحملون نتائج تسلطهم
مو صغيره يمشوني على كيفهم
كل شيء له حدود وخصوصياتي خط احمر
ما اسمح لاحد يتخذ القرار بدل عني
ام خالد : وريان متى رح يملك على بنت ابو مشعل؟؟
ام بدر : سلطان يقول مو الحين لساته صغير
وما يبغى ينشغل عن دراسته
تفاجأت لما سمعت انه ريان خاطب وما ادري
قلبي يدق
لا تقولون اني تضايقت بس يمكن تفاجأت
بعده صغير
يا ترى بعده مغرور وشايف نفسه
اتذكر لما عشت عندهم كان متجعرف
وما يكلمني ويطالعني بغرور لكن بفتره قصيره
نرفزته وطلعته من بروده
احس في امور كثيرة متغيره
عمي صقر طلع متزوج وعنده طفل
وسلمى اختي مخطوبه
وهذا ريان خاطب
الله اعلم وش فيه كمان
ام بدر طالعتني : صايره هاديه عكس طفولتك
ابتسمت وما رديت
سألتها : كلهم بنات عمي ؟؟!!
ام بدر بصوت هامس : شوفي
للي جالسه جنب سلمى تكون سديم
بنت عمك فيصل
عمرها تقريبا 20 سنه تدرس بالجامعه تربيه طفل
طالعت سديم وهي تكلم سلمى ورغد
حلوه ونعومه حيل
سالتها مخطوبه ؟؟
ردت ام بدر بابتسامة : لا بعدها
وللي جنبها رغد بنت عمك ابو سليمان
عمرها 19 بالجامعة تخصص لغات
طالعتها فيها شبه من امها
اممم عاديه بس حسيتها حامله نفس
ام بدر تكمل : وللي جنبها روان بنت عمك فيصل
عمرها 18 ثالث ثانوي ادبي
وللي جنبها مي بنت عمك ابو سليمان عمرها
تقريبا اممم 17 سنه ثاني ثانوي ادبي
الجالسه من جهتك زوجه سليمان
عقدت حواجبي وكأني ما سمعت : مين ؟؟
ام بدر : زوجه سليمان ولد عمك
وتكون بنت ابو مشعل ابن عم ابوك
كانت صدمه ما توقعت سليمان يتزوج
لا يروح ذهنكم بعيد
اذكر عبود قال لي انه يحب سديم
بس ليه ما تزوجها ؟؟!!
ارتحت لاني كنت خايفه من سالفه التحيير
بس مين ابو مشعل
اصلا ما اعرفهم ولا اتذكر احد منهم
وقبل ما تكمل قاطعنا
صوت ساميا : ريم نايف يبغاك
هزيت راسي وطلعت بهدوء
**
**
**
**
**
**
ام سليمان تهمس لام خالد : مو مصدقه انها نفسها
ريم
ام خالد : شفتي ما اجملها جمال رباني
مو حاطه شيء على وجهها
ام سليمان :،شفتي شعرها
افكر اصبغ شعري نفس اللون عجبني حيل
الجده : وش عندكن تتهامسن ؟؟
ام خالد : تقول تبغى تصبغ شعرها نفس لون شعر ريم
الجده : لا تصبغيه باكر اذا شافت شعرك
تقول انك غيرانه منها وعملتي شعرك مثلها
ام سليمان : تدرين راحت عن بالي هذي النقطه
بس يجنن لون شعرها
الجده : اسمعي مني وما تصبغيه مثلها
هيفاء : وش عنكن تتهامسن
ام خالد : ولا شيء بس ام سليمان تفكر
تصبغ شعرها
هيفاء : شفت لون صبغه جديد يجنن اذا تبغين ارسل
لك الصوره
ام سليمان : خلاص ارسليها
**
**
**
**
**
**
سديم : مغروره
روان : احسها واثقه من نفسها زياده
مي : انا احلى منها
سديم : اسكتي صحيح انها تحسينها مغروره بس حلوه ما قلت جوكر حتى تكونين انت احلى منها
رغد ضحكت : هههههه تم قصف الجبهة بنجاح
مي بقهر : وش قصدك ؟؟
تراني احلى منك يالعانس
سديم فتحت عيونها باستنكار : عانس بعيونك
يالعصله
الحمد لله خطابي واجد
مو مثلك ما احد طل بوجهك
مي وقفت : انا صغيرة على ذي المواضيع
روان بنغزه : هذي سلمى اصغر منك ومخطوبه
مي احمر وجهها بقهر وراحت تجلس
بمكان بعيد عنهم وبوزها شبرين
لينا : حرام عليكم تقولون كذا لها
سديم : هذا الناقص علي بزران
روحي اجلسي عندها واسيها
لينا قامت وما ردت عليها
**
**
**
**
**
**
**
**

جالسين بمجلس الرجال
فتح بدر البلوتوث يرسل لنواف مقطع فيديو
استغرب من وجود اسم
ريم بنت سالم
طالع عمر : شوف هذا الاسم
عمر عقد حواجبه : معقول ؟؟!!
نواف طالع بدر : خلصني ارسل المقطع
مد بدر الجوال لنواف وسليمان : شوفوا هذا الاسم
طالع نواف الاسم ورفع حاجب بتفكير : يمكن بنت عمي نايف
بدر : بس ذي كاتبه بنت سالم
سليمان : جد امها اسمه سالم معقول
نواف : تعملها هالزفته متبريه من ابوها
وناسبه اسمها لعدونا
مسك نواف جواله : خلاص يا بدر انسى وارسل لي المقطع يمكن ما تكون نفسها
وبعدها ناظر جواله
سليمان همس له : وش ودك تعمل ؟؟
نواف بنفس الهمس : اصبر دقيقه
ارسل مقطع وتم الرفض
انقهر ارسل مره ثانيه وانقهر لما راح اسمها
يعني طفت البلوتوث
حط الجوال جنبه وطالع سليمان : قلت لك هذي البنت
مو من ثوبنا ولا تستبعد تكون جاسوسه علينا
لصالح عائله امها
سليمان ابتسم : حلوه جاسوسه
نواف ابتسم : سرقت هالمصطلح من الجاسوسات الثلاث ههههه
سليمان ابتسم : تتذكر وحنا صغار كنا نتهاوش مين
يتزوج سام وكلوفر هههههه
نواف : ههههه تتذكر لما ضربتك على انفك ونزل الدم
وقتها قلت لي انه ابوك يبغى يخطب لك كلوفر
ونزلت فيك طق ههههه
سليمان ابتسم وطيف ذكريات الطفولة مر بخياله : ايام مرت يا حلوها
**
**
**
**
**
**
**
طلعت من مجلس الحريم بعد ما قفلت البلوتوث استغربت لما شافت اشعار الاستلام
رفضته بسرعه واستغربت انه البلوتوث شغال
وقفت بالصاله
و شافت العيال
يتضاربون
اقتربت منهم حاولت تبعدهم عن بعض
كانوا عيال اثنين ضد سيف اخوها
مع انها علاقتها مو قويه مع سيف بس حست
الدم تحرك
وابعدتهم عن سيف وجلست ركبه ونص ومسحت على راسه بحنيه : عورك ؟؟
سيف والدمع بعيونه حرك راسه بالنفي
حسته مثلها تكون الدموع بعيونها
بس تحاول تكابر
التفتت على العيال للي يبغون يضربون سيف
اقتربت من واحد منهم : اذا ما رحت للداخل
الحين اضربك
رد : مو خايف منك يالله طيري من هنا
مسكت ريم اذنه وشدتها : مين للي تطير من هنا ؟؟
الولد شغل صفارات الانذار
تركت ريم اذنه وخلال ثواني هرب لمجلس الرجال
ولحقه الولد الثاني وخلفهم سيف
هزت كتوفها بعدم مبالاه
**
**
**
**
**
**
خالد وهو يهدي بابنه : مين ضربك ؟؟
مصعب يبكي ويمسح دموعه
احمد : في بنت طويله اطول من الباب مسكته من اذنه
خالد ضحك : ههههه خابر بنات العيله اقزام
الا بنت العم الجديده طويله
وليه ضربته ؟؟
سيف واقف عند الباب : يستاهل لانه ضربني
جاءت ريم وضربته
خالد بابتسامة : احترمونا ترانا في بيتكم
نازلين ضرب بولدي
نايف : حقك علينا يا ابو مصعب
وطالع سيف
يالله تعال اعتذر من مصعب
سيف بقهر : هم ضربوني بالاول
نايف بهدوء : انا وش قلت ؟؟؟
سيف تحرك بقهر نحو خالد علشان يعتذر لمصعب
مسح خالد على راسه وابتسم : خلاص مقبوله
ولا تتضاربون مع بعض مره ثانيه
وقف الجد بهدوء
نايف طالع ابوه : وين يبه ؟؟
الجد بهدوء : ابغى ارجع انام تأخر الوقت
يالله يا جماعه الخير اشوفكم جالسين
بعد محاولات نايف الفاشله انه الجد يجلس
خرج اخوانه من المجلس
والكل رجع للبيت رجعت ريم لغرفتها بس
تبغى السرير من التعب
وانتهت الليله بهدوء

[/QUOTE]

....................

ضاقت أنفاسي مشـ© الروايات ©ـرفة

[QUOTE

2*
2*
2*
2*
في اليوم الثاني


الجد وهو يقلب الجريده ويبتسم بشماته
فيصل : اول ما سمعت الخبر جيتك على طول
ابشرك
الجد : الحمد لله طاح بشر اعماله
فيصل : يقولون الحين بالمستشفى صابته جلطه
الجد هز راسه : خساره كبيره وفضيحة لاعمال
النصب
بس كيف تهربت ذي المعلومات ؟؟!!
ابو سليمان : اكيد حد من للي يشتغلون عنده
خالد : يمكن
بس ليه بعد هالسنين يفضحه ؟؟؟
فيصل : يمكن اختلفوا على موضوع
وراح فضحه
الجد : شوف كان يبغى يشوه سمعتنا
جاء مين يشوه سمعته
الا وين بدر وعمر ؟؟
فيصل : انا اقول لازم تفصلهم
او تكون حازم معهم متساهلين بالشغل كثير
الجد : اليوم اشوفهم واحط لهم حد
وش صار على زيد سافر والا بعده ؟؟
فيصل : حسب علمي موعد طيارته اليوم بعد الظهر
خالد : نفسي افهم مو قلتم انه فيه خطبه
بس ما شفت خطبه ؟؟
ابتسم الجد بخبث وناظر عياله : ومين قال انه
في خطبه من الاساس
الموضوع كان .............
**
**
**
**
**
**
**
**
**
حاسه بالراحه انها انتقمت من ابو سعد
بس تحس احيانا بتأنيب ضمير بعد ما سمعت انه
دخل المستشفى
جاء نايف اليوم يزف لها الخبر ويشوف رد فعلها
ما يدري انه كله من تحت راسها
تحسه ريم يحاول بأي طريقه يستفزها ويقهرها
ما تدري وش السبب
بس هي تحاول تسيطر على برودها وما تعصب
مسكت الجوال واتصلت بأمها تتطمئن عليها
وتعرف وش رد فعلهم على للي صار

**
**
**
**
**
بجناح صقر
ليلى : صدقيني عاديه مو ذاك الجمال
رولا : اسكتي بغيت انجلط
كنت افكر اني احلى وحده بعائلتكم كلها
ليلى لوت بوزها : لا يا حلوه انا احلى منك
تراك ماخذه بنفسك مقلب
رولا : لا والله انت ماخذه بنفسك مقلب
انا ابيض منك واطول منك وانحف
ليلى : بس ملامحي انعم منك
رولا : شوفي ابنك يشبهك طلع جوكر
ليلى باندفاع : تخسين ولدي احلى من عيالك
ملامحهم كبيره ودفشه
اما ولدي كل شيء فيه صغير
رولا : احسن من ابنك الاسود
ليلى بقهر : اصلا رشود اسمر وسماره ناعم وحلو
احسن من ابنك البرميل
انقهرت ليلى وقفلت الجوال بوجهها
**
**
**
**
**
**
في بيت ابو عبدالرحمن جالسات بالصاله
كانت متوسطة الحجم كنبها باللون العسلي
ام خالد : حسيتها سنعه شفتي كيف تقوم
وتقدم ضيافه
ام سليمان : شفت احسن من للي عندي
الكاسه ما يقدرن يقيمونها
ام عبدالرحمن : الحمد لله اعترفتم لوحدكم
ام خالد : هذا للي شفناه انها سنعه
ام سليمان : وتحسيها هاديه ما عندها كثره كلام
ام خالد :يمكن تعمل نفسها سنعه قدامنا
ام عبدالرحمن : ابو طبيع ما يجوز عن طبعه
لا يمكن تتركن البنت بحالها
ام سليمان : حنا وش قلنا ؟؟
ام خالد : لو شفتي يمه شكل ليلى ورولا وسندس
شوي ويطقن من الغيره
ام سليمان : ومي اكلت راسي طول البارحه
وهي تسألني مين اجمل انا والا ريم
ام خالد : وش قلتي لها ؟؟
ام سليمان ابتسمت : ودك الصراحه كذبت عليها
وقلت لها انها احلى علشان تتركني بحالي
ام خالد : يا خوف قلبي تسرق العرسان من بناتنا
ام عبدالرحمن : يا ليل ابو لمبه
هذا كله نصيب
ام خالد : وش صار على خطبه مشاري ؟؟
ام عبد الرحمن وهي عارفه بناتها يحومون حوله
يبغونه لبناتهم : ما عجبته البنت
وحتى تلعب بأعصاب بناتها
يقول يبغاها طويله ونحيفه وبيضاء
قاطعتها ام خالد بقهر : هو شاف ريم ؟؟
ابتسمت ام عبدالرحمن : ما اتوقع انه يعرفها
ام سليمان بقهر تغير الموضوع : ابوي وينه ؟؟
ام عبدالرحمن بهدوء : طلع مع اخوك ابو مشعل
هزت راسها وهي مبرطمه
**
**
**
**
سالم ضرب على الطاوله بقوه : كيف تسربت المعلومات ؟؟
ابو سيف : لو كنا نعرف كان قلنا لك
لا تنسى اعدائنا كثيرين
سالم : ابوي وضعه الصحي ما يسمح له يتكلم
يمكن يعرف احد
او يشك بأحد بس اكيد رح يكون من للي نتعامل معهم
محمد : جدي مستحيل نعرف من خلاله
الدكتور يقول لو عاش ما رح يتكلم
الجلطه كانت قويه وضعه صعب جدا
سالم بقهر شد على قبضه يده : لو اعرف الشخص
والله ادفنه بيدي
ابو سيف : رح نوصل له لو كان بآخر الدنيا
محمد بوعيد : وقتها ما رح نرحمه
**
**
**
**
**
جالسه على السرير وتفكر
معقول اهل امها يشكون فيها ؟؟!!
ما رح يوصلون لي ما خليت اثر خلفي
حتى ابو سعد امها خبرتها انه وضعه صعب
يعني ما رح يشكون فيها
نقزت على صوت نايف : انت وش هذا للي عملتيه ؟؟؟
حطت ريم يدها قلبها بخوف استغربت وش
عرفهم ما تدري وش تقول له
نايف : ليه قاطفه من الورد الجوري ؟؟
ريم طالعته وتنهدت براحه للحظه فكرت انها
انكشفت
طالعته براحه وابتسمت الحين ارعبها
وبالاخير طلع علشان الورده
نايف بحزم : انا منبه على الجميع انه ما حد يقرب
من هذي الورده
طالعته ريم وابتسمت : اسفه ما كنت ادري
وتوجهت نحو الورده للي حطتها بكأس مويه
مسكتها وتوجهت له ومدتها له
نايف طالعها بقهر وطلع وضرب الباب خلفه بقوه
ابتسمت ريم وهي تطالع الباب
ومستغربه ما لقى لها زله جاء يتحجج بالورده
شمت الورده ورجعتها مكانها **
**
**
**
**


مرت سنه ونص على تواجدي في بيت نايف
كانت متقلبة ما تخلو من عصبية
نايف
تعودت على اجواء البيت واختلطت
بسلمى ولينا اكثر من اول
حتى مع ساميا اجلس واسولف معها
واحاول اتجنب نايف
وبيت جدي سالم ما زرتهم رفض نايف رفض
قطعي حتى بعد وفاه ابو سعد ما خلاني اروح اعزي ولله الحمد ما حد عرف اني انا السبب
امي ما رجعت من السفر مع اني احس انها
كانت تيجي زيارات بس كانت تخفي الامر عني
اتوقع زوجها منعها
وانا ما دققت بالامر كثير ما ابغى اعمل لها مشكله
خلاص يكفيني اني اتصل بها واطمئن عليها وعلى إخواني
حياتي هنا
ما اطلع من البيت الا للجامعه ما ازور احد
حتى جدي ابو سلمان ما ازورهم الا نادرا
امممم بصراحه نايف قصدي بابا ما يرضى
ازورهم كثير يقول ما يحبونك وما في داعي اغث امي
بشوفتك
خلال السنه ونص ما زرتهم الا كم مره وقت الظهر بناء على الاوامر
وما صادفت احد من البنات او من عيال عمي
ما اعرف احد فيهم
اممم الحين كملت الامتحانات النهائية وكملت سنتين
بالجامعه
تغلبت كثير وانا اداري عن نفسي حتى ما حد يعرف
من حسن حظي ما احد مهتم لي ولا مفكر بي
والا كان انكشفت من زمان
بس ولله الحمد ما احد يسألني عن دراستي
للي مفروض الحين ثالث ثانوي
بس ذكائي الخارق خلاني اتقدم سنتين عن جيلي
وخلال دراستي كونت صدقات ثانيه
ما ادري وش اخبركم وش صار خلال هذي المده
امممم
لا تسألوني عن الخطوبه لانه ما احد جاب لي طاري
وانا ما سألت لاني بعدني مصممه اني ما اتزوج
على طاري الزواج
جوري تزوجت والحين حامل
تصدقون منعني احضر زواجها
انقهرت وتضايقت وقتها بس ما اظهرت قدام نايف
فرحت لجوري كثير لانها انسانه رائعه واحبها واحسها مثل اختي
صحيح نسيت اخبركم اليوم رح تملك سلمى على بدر
والحفله هنا
صار عمرها 17 سنه وبعد الثانويه يمكن تتزوج
احس نايف انه من النوع للي يزوج ما يهمه العمر
يعني ما عارض على زواج سلمى
اصلا فهمت من ساميا عنده قاعده او قانون مستحيل يخلي بناته يدرسون بالجامعه الا بعد الزواج
الظاهر انه ما يدري اني بالجامعة الله يستر لو يدري
يمكن يقص رقبتي الله يستر
ما افكر ابد اني اخبره لاني اعرفه ما عنده اسلوب للتفاهم
وما استبعد عنه يفصلني من الجامعه او يزوجني
بناء على قانونه
طالعت جهة الصوت قطع علي : نعم
الشغاله : ماما يقول انت انزل
هزيت راسي لها وناظرت نفسي بالمرايه
ما احب الميك آب كثير
بس بما انها حفله اختي حطيت مكياج خفيف
ناعم وشعري عملت فيه حركات بسيطه
طالعت فستاني ساتر وهذا اهم شيء
وطلعت من الغرفه بهدوء
**
**
**
**
**
**
سلمى على وشك البكاء : ماما خلاص هونت
ساميا ابتسمت وجلست جنبها : وش هونت
كله خوف وتوتر والحين يزول
سلمى بدلع : خايفه
دخلت ريم وابتسمت لسلمى اقتربت منها
وباركت لها وباركت لساميا
كانت سلمى نعومه حيل
دخلت ام خالد والبنات وباركوا لسلمى
ام خالد تطالع ساميا : عقبال لينا ان شاء الله
ساميا : ان شاء الله وعقبال سديم وروان
ام خالد ابتسمت : ربك كريم
سديم : متى الشيخ ييجي ؟؟
ساميا : نايف قال بعد ربع ساعه تجهز نفسها علشان توقع
ام خالد : خلينا ننزل عند المعازيم
طلعت ام خالد وبناتها وما سلموا على ريم
كانت ريم تناظر زولهم باستغراب
اكيد عقلهم ضارب
بعدها
دخلت خالات سلمى وباركوا لها
تضايقت ريم من وحده من خالات سلمى وهي تحصن بسلمى وتعطي
نغزات على ريم
خايفه تحسدها ريم
كانت لاخر لحظه تبغى تطلع بس
قررت تبقى وتثبت لهم انه هذا بيتها
وهم الطالعين
كانت تناظر حولها وتفكر لو كانت مكان
سلمى اكيد ما رح تلاقي حد حولها
ناظرت سلمى وبنات خالها وخالاتها حولها
وينسوها
تذكرت بنات خالها زمان ما شافتهم
تتصل معهم بين كل وقت
سألت نفسها لو كانت مكان سلمى
يا ترى امها رح تحضر ملكتها ؟؟
مستحيل تحضر وتيجي هنا
ما رح تلاقي حد حولها
طالعت الغرفه ما شافت خالات سلمى بس شافت
نايف وصقر عند سلمى طالعتهم بهدوء
نايف بهدوء : يالله يا حبيبتي ما في داع للخوف
سلمى باحراج : خلاص هونت
نايف باسها على راسها : يسعدها حبيبه
ابوها خجلانه
صقر : عجل يا نايف الشيخ مستعجل
طالع نايف ريم وطنش صقر : شفتي الحياء والخجل
مو مثل بعض ناس رايحه تتزوج بدون اهلها
صقر تنهد : مو وقت هالكلام يالله عجل
طالعته ريم بهدوء وما ردت
نايف ترك سلمى
واقترب من ريم مسك يدها ووقفها وتوجه
لجهة الشباك بعيد عن صقر وسلمى
واقترب من اذنها وهمس .........

انتهى البارت ....انتظروني يوم السبت القادم بإذن الله .....دمتم بخير :)
[/QUOTE]

....................

مجنونة لكن عاقلة! ©؛°¨غرامي مشارك¨°؛©

اول رد مالي دخل حجزت

ضاقت أنفاسي مشـ© الروايات ©ـرفة

المشاركة الأساسية كتبها مجنونة لكن عاقلة! اقتباس :
اول رد مالي دخل حجزت
خلص سجلتك الاولى ^_*

مجنونة لكن عاقلة! ©؛°¨غرامي مشارك¨°؛©

[B][B][B][I][I][B][SIZE="5"][COLOR="Purple"]:

dso ©؛°¨غرامي جديد¨°؛©

لالالالالالالالالا حرام عليك وقفتي عند نقطه حماس 😢😢😢

شذى المطر ©؛°¨غرامي مجتهد¨°؛©

اليوم ابارت على مزاجي ..توقعاتي صحيحه
حلو ابرار التسريع ..الاحداث اهم واهم..اتوقع انه اليوم نايف بيقول لريم لما همس لها..انه اليوم بعد ملجتها..او عرف انه هي لها علاقة بالي استوى لجدها..واكثر شي الجد عارف عن ريم كل شي ..حتى دراستها..ليش تباعدي البارت ..ما نلحق نثبت على موعد..الا تغيريه ..وايد بعيد ..قدميه..ابرار والجميع (تصبحوا على خير) الى اللقاء..نوم العوافي للجميع

جود joj ©؛°¨غرامي متألق ¨°؛©

جميييل جميييل جميبيل الباارت


ضحكوني رولا وليلي بغيرتهم قسم ابداع ذولا الثنتين


امممممم شقول
ريم كالعاده جميله واثقه
نايف الله يعينك على نفسك بصراحه مرررريض بمعنى الكلمه
سلمى ي حليلها الخجوله ^_^
ام بدر انساااانه حنونه واو واو

مافي بالي توقعات :-)









بس اقول برررررو السبت القادم
القاادم ..... مكنه بعيد واجد
بس اذا بتنزلينه طويل حلو
اما السبت القادم ويطلع قصيرررر #بصير كلام ثان














بس بصراااحه ابدعتي بهالرورايه وبارتاتك يلي تخقققففففق
























انتظرك بارت طوووووووووووويل ^_^
joj

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1