غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 13-07-2015, 04:31 PM
بنت_الياسي بنت_الياسي غير متصل
©؛°¨غرامي مشارك¨°؛©
 
الافتراضي صرت أشتاقلك لو تبعد قليل صرت أحبك فكل ثانية عمر/بقلمي


السلااام عليكم اشحالكم



روايتي اليديدة بعنواان صرت اشتاقلك لو تبعد قليل صرت احبك فكل ثانية عمر
بين الخيال و الواقع .. اتمنى انها تنال على اعجابكم



البارت الاول
يا أول قلب حبيته .. وآخر قلب أنا أهواه ..............يا أطهر وجه في الدنيا .. وأطيب ما رأت عيني .....المعزة حنين .. الحنين حب .. الحب حياة .. الحياة قلب .. القلب أنت .
طبعت بوسة ع جبهتينها و ابتسمت لها ( ااااااااه الحمدلله اخيرا صرتي لي انا انا وبس واخيرا سجلت قلبج باسمي .. فديتج غنااتي .. اوعدج راااح اخليج مستانسه .. و انسيج ايامج اللي مريتي فيها .. حياتي انتي رووحي انتي ..)) رجعت و بستها ... كل يوم احس اني معرس لاول مرة
يلست اتامل ويها الطفولي ملاك منزل من السماء .. احبج و الله اني احبج .. من كثر الونااسة مب مصدق اني معاها الحين و بعيش معاها للابد ااه يالغالية مستعد ابيع الدنيا علشانج ... من يوم ما عرفتج و انا احس اني انولد من يديد .. انتي بسلم جرووحي .. يا احلى حب في حيااتي .....
لحفتها عدل و بست راسها .. بغيت انش و الا اشوف الباب يتطلع يتطل، ابتسمت له و دخل تم يمشي سريع لين ما وصل
قلت : فديت فديت البطل اللي ياي
: بابا انا يوعان
قلت : اول شيء شو يقولون ...
: صباح الخير
قلت وانا اشله احطه في ثباني : صباح النشاط.... الحين بنسير المطبخ وبنسوي لك اكل تمام
: هيه تمام .. ماما ليش راقده ...
قلت له وانا اطلع من الحجرة : علشان ماما تعبانه امس كانت واعيه ما رقدت من وقت ...
طلعنا انا و ولدي سرنا المطبخ وجهزت له الكورن فلكس و قعدنا ناكل لين ما وصلت العروس ...
الولد يربع عند امه : يا مسود الويه الحين انا القمك من شفت امك ع طول سرت عندها اسميك ما فيك مذهب ...
نزلت وشلت الولد ... صارخت عليها : هي هيه هي هي نزليه بسرعه ليش تشلينه ... مينونه انتي ...
نزلته : متوله عليه خلني اشله ...
: ماما شليني ... وتم يصيح
: شفت كيف يصيح ... خلني اشله .
قلت وانا اشل الولد : استريحي الغالية .. وانته اصططلب ماماتك تعباانه ....
وهي مبوزة : سلطان و الله برا الجرح خلاص كملت اسبوع واانا مسويه هاي العملية خلااص وبعدين الولد مب ثجيل ريشة اسم الله عليه خلني اشله ...
اسحبها و ايلسها واحط الولد في حضنها : هيه جي شليه برايه بس مب صوب بطنج .. قربت منها وبست رااسها .. ) صباح الخير يالعروس
رفعت حاجبها : اي عروس .. خلاص صار عندنا ولد ..
سلطان اتقرب منها: دومج بتمين عرووس ان شاء الله لو يكون عندنا درزن يهال ...
دزتني : عيب عليك الولد يطالع ...
غمزت لها : ما عليه دوااج بعدين .. يلا الغلا انا بتوكل الحين بسير الدوام شيء في خاطرج ؟
: لا حبيبي سلامتك بس لا تنسى عشانا اليوم بيت ابوي
ااشار ع خشمي : ان شاء الله ع هالخشم .. يلا البطل انا بسير انزين .. وين بوست بابا .
باسني : اشتر لي حلاوة
سلطان : لا مب زين واايد ... بعدين باخذ لك ... وانتي تحملي ع عمرج و بطنج ... مع السلامة ..
الله يحفظك ..
طلعت من البيت ركبت موتري و الوجهه الى الدوام كانت الساعة تقريبا 6 ونص .. فديته متعود ينش من الصبح مع ابووه .. و كنت احااتي حرمتي واايد لانها من اسبوعين سوت عملية الزايدة و هي الله يهديها كله تبى تشل الولد .. انا وايد احب حرمتي ما اتخيل يمر يووم من دون ما اشووفها لاني تعبت و صبرت وتحملت لين ما ملكتها و صارت حلالي .. هي نفسها ما تغيرت حتى من بعد ما تغربت 3 سنين علشان الدراسة نفس الابتسامة نفس الاسلوب و الرقة ... سحرتي باخلاقها قبل جمالها .. حبيت ثقلها .. صارت لي كل شيء في حياتي .. من عرفتها وهي كله خجولة .. وحيدة امها.. كانت المدللة عند امها وابوها .. ودي ادللها و ادلعها اكثر و الله لو تطلب عيوني ما ابخل عليها .. عرفت معنى الحب معاها عرفت معنى الشوق يوم كنت بعيد عنها ... وربي انج انتي كنز احبج يالغالية احبج .....
طول الدرب كنت افكر فيها و احاتيها .. وصلت الدوام خلصت شغلي الروتيني و شفت انه عندي وقت كانت الساعة 11 و عندي اجتماع الساعة 3 .. شليت بعمري و سرت البحر ... يلست ع السيف .. صح انه الجو كان بارد شوي بس جي حسيت اني محتاج ايلس مع نفسي .. الجو كان مغيم كنا في شهر 12 بداية فصل الشتاء .. نسيم بارد خفيف بس ييبس العظام طول ما انا افكر فيها احس بدفا ما حسيت بالبرد كنت احس اني معاها....... صارخت صرخ ااااااااااااااااااااااااااااااااه يا الغالية عذبتيني ........



صرااخ من ورى الباب : سلطااااااااااااااااااااااااااااااااااااااااااااااا اااااااااااااااااااااااااااااان قووم
ااتجلب يمين و يسار
: سطاااااااااااااااااااااااااااااااااااااااااااااااا اااااااااااان قووووووووووم و الله ان ما نشيت بخبر عليك ابويه قوووووووووووووووم
انا اتافف ..
تلفت يمين و يسار نفس المكان الحجرة الوسيعة الظلمة ماتعرف اذا الوقت كان نهار و لا ليل يلست ع الشبرية .. كل شيء في مكانه ع اليسار المنظرة معلقة ع اليدار و التسريحة البيضة و ع اليمين كرسي و طاولة علشان ادرس وجدامي غنفة طويلة و طاولة و التلفزون.. ما عرفت الساعة كم ادور ع تلفوني ما حصلته .. شكلي نسيته في السيارة ....
: سلطااااااااااااااااااااان قووم
نشيت بكل كسل سرت فتحت الباب وانا العب بشعري و بصعوبة افتح عيني ..: ها شو تبين ..!!
تتخصر اختي : ويعوووه اول شيء الحمدلله ع السلامة و ثاني شيء ابوي يباك
قلت : الله يسلمج انزين الحين بنزل .. بغيت اصكر الباب بس رديت فتحته بسرعه : اقولج الساعة كم الحين ....
ريم : الساعة الحين 6 شوي و بياذن المغرب ...
سلطان : انزين خلاااص انا شوي وبنزل ...
صكرت الباب و شغلت الليتات سرت خذت شور سريع .. لبست كندورتي و تعطرت ولازم اطيب بدهن العوود ... و لبست الحمدانية ... االلي يشوفني يقول معرس بس وين يا حسرة .. كانت تقريبا الساعة 6 يعني ساعة و بتلاقى مع محمد بس ان شاء الله ابوي ما يطول معاي ...
نزلت تحت وسرت سلمت ع ابوي و امي كانو في الصالة يتابعون تلفزون سلمت عليهم و يلست اتقهوى معاهم
الوالدة: عنبوا انته موول محد يشوفك .. 24 ساعة لابس ة تبى تطلع و لا مسافر
سلطان : شو اسيو فديتج لازم نغير الروتين شوي مب كله في اللبلاد لازم نطلع نستكشف العالم
الوالد : انزين ما خبرتك اباك اتسير المزرعة اتشوف شو موضوع العمال في واحد منهم يقولون انه تعبان سر وده الدختر علشان نعرف شو فيه من يومين يهاذي بطني و بطني
سطاان و يقوم : ان شاء الله بعد الصلاة بمر عليه شوي وبياذن المغرب .. انا و حمود بنسير بنشوف شو فيه .. يلا انا بتوكل ..
طعت من البيت ركبت موتري ..
يا حروف الشعر .................روحي عانقيه
وانثري فوقه ...................ورود وعطريه
وبلغيه اني ......................اعزه بلغيه
وصلت بيت اخوي وربيعي حمود .. قصدي محمد متعود اقوله حموود .. المهم دخلت البيت بركنت في الكاراج لاني متعود اترياه في البيت فباب البيت يكون مفتوح من اوصل انا . بركنت ورى موتر حد ما ادري منو يلست في الموتر اتريا حموود يطلع لازم المعرس دووم يتاخر .. لهيت بالفون اقرا المحادثات كملت خمس دقايق ...ياربي هذا وين سار ... يت وحدة ودقت الجامة ...
سطان نزل الجامة : هلا الغالية امري ؟
: ممكن تحرك موترك لاني بطلع ؟ انته مصكر ع موتري ...
رفعت الجامة و حركت .. هاي فطيم وااايد تشبه محمد .. هي الوحيدة من خواتها اللي تشبه اخوانها و ابوها .. نزلت الجامة ابتسمت لها : انتي وين سايرة هالوقت هاا ؟؟
عطتني نظرة .. ضحكت عليهاا من الخاطر ... دووم احب العوزها .. احب كل شيء فيها سوالفها و ضحكتها حركاتها و كل شيء فيها احب عفوية البنت و الله هاي البنت ع نياتها ... الله يخليها .. اااه متى تحس فيني بس متى ...
اخيرا ووصل الشيخ محمد بعد طول انتظار زين انه اتاخر علشان اشوف الغرشوبة فديتها و الله
حمود : السلام عليكم
سلطان : وعليكم السلام و الرحمة ما بغيت .
حمود : هاي لعوزتني اتحن ع راسي
سلطان وهو مبتسم : فطيم ؟؟!!!
حمود وهو يلبس الحزام : في غيرها حرك حرك ... وين بنسير؟؟؟
سلطان وهو يحرك الموتر : نسير اول شيء نصصلي بعدين بنسير المزرعة بنودي حد من العمال يقولون تعبان ..
حمود : سر بروححك مب متفيج يا رياال ابغي ارقد ...
سلطان : افا و تخلي اخوك بروحه افا و الله افا
حمود يصد صوبي : متى بنخلص من الافلام الهندية مالتك ... شووف بسير وياك بس اذا طولوا و الله لا اشل الموتر و ارد البيت ... وانته رد بالتاكسي ..
سلطان ياشر ع خشمه : ان شاء الله ع هالخشم ....
سرنا المسيد صلينا و الدرب من بيتنا للمزرعة تقريبا ياخذ ساعة .. طول الدرب ساكتين لانه حمود كان مسطل وماله خلق لشيء حتى ما شغلت الراديو ولا سمعت اي شيء حتى الفون هديته شوي ولا تتصل اخته و يحطه الاسبيكر .. عادي متعود ع فطيم .. ( جنها واحد من ربعي )
حمود : ها شو تبين ؟؟
فطيم : بس عاد حمود لا تصارخ .. اقولك انا برد البيت يوعانه اقوى شيء مالي بارض اسير للمطعم ابغي عشى راقي .. ارقى شيء
حمود : ما جربتي طرااق ع رااسج تستهبلين صح ؟
فطيم : حموود دخيييييييييلك و الله يووعانه ..
حمود : مليوون كفتريا جريب من بيت و بعدين الحمدلله في اكل في البيت
فطيم : بس انا في خاطري من برع حموووود عااد ..
حمود معصب : لا تستهبلين ولا تحنين مب متفيج تبين سيري بروحج ..
سلطان طول الوقت يضحك عليهم ...
حمود : بتصكرين ولا اصكر في ويهج ..
فطيم : عيب بابا ما يعاملون خواتهم الصغار جي عيب ..
حمود : باي بااي .. صكر في ويها
سلطان : هههههههههههههههههههههههههههههههههههههههههههههههههه ههههههههههههههههههههههههههه
حمود : اضحك اضحك اشعليك يا راااسك ...
سلطان : و الله انتوا الاثنين مسلسل من دون الحلقة الاخيرة ..
حمود عطاه نظرة ..
سلطان يشوف جدام : خلاص بنسكت بنسكت ... عنبو العايلة كلها بالنظراات يسكتون الواحد ..
طنشني حمود ... وصلنا المزرعة و شلينا العامل و ووديناه العيادة .. ما طولنا وايد لانه ما كان واايد زحمة . ورديناه المزرعة ..
حمود : ها العامل و خلصنا منه .. وين بنسير..!
سلطان : و لا مكاااااااان بنرد البيت تعببان فيني رقاد ...
حمود : يا سلام احلف انك مطلعني من بيتنا علشان العامل
سلطان : لا لا كنت بنسير نتمشى في المول بس خلاص ما شيء وقت ضااع يومنا في العيادة و المزرعة . الحين الساعة 10 مالي خاطر اسير مكان و باجر دوام و انا امس راد من السفر ومنهد حيلي ما رقدت عدل ع اساس اليوم بطوله انا ر اقد وو
حمود يحط ايده ع حلجه : بس بس ما يسوى علي قسم بالله ابووي ردني البيت وااايد احسن ...
سلطان / انا اليوم اصلا عازم عمري في بيتكم ..
حمود : عكيفك هوو
سلطان : افا ..
حمود : يا رااسك ما شيء اكل في بيتنا الحمدلله
سلطان : افا و من شوي سامع تقول حق اختك شيء اكل في بيتنا .. خللاص خلاص باكل بروحي جني قطو
حمود : انته اييه وايد اتشوف افلام و مسلسلات تعال تعال .. بس لا طول واايد ايلس مال نص ساعة و سير بيتكم انا برقد ..
سلطان : يا ريال اسولف معاك .. شو فيك .. سيسر ببيتكم ارتااح وانا بسير ارقد ..
حمود : عيل و الله اتي عندي البيت و بنتعشى مع بعض ..
ابتسمت له ...
علاقتي مع حمود علاقة جميلة وايد احب هالانسان و الله صدق ما اتخيل يمر يوم من غير ما ارمسه .
وصلنا بيتهم من اوصل بيتهم القلب ع طول يفز حياتي و روحي في هالبيت .. فطيم اااااه يا فطيم بس لو تحسين فيني .. ابغي اعرف بس مشاعرج صوبي تحبيني ولا ..
حمود : اااااااايه انته وين وصلت يلا انزل
نزلت و دخلت الميلس ع طوول و كنت افكر كيف اوصل لفطيم ابغي اعرف مشاعرها اليوم ما عندي اي صبر ابغي اعرف ردها قبل السفر .. الله يستر بس .....


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 15-07-2015, 08:27 PM
بنت_الياسي بنت_الياسي غير متصل
©؛°¨غرامي مشارك¨°؛©
 
الافتراضي رد: صرت اشتاقلك لو تبعد قليل صرت احبك فكل ثانية عمر


البارت الثاني
سلطان : اكرمك الله يالغالي .. نخدمك في الافراح
عطاني النظرة اللي تموتي من الضحك، ينزل رااسه بس يعقد حواجبه و و يرفع عينه ( خير ان شاء الله ) حتى فطيم اتسوي مثله .. اتم اضحك عليهم ..
محمد ينش : ذبحتني هاي فطيم بسير اشوف شو تبى ...
سلطان : شوف فيك فلفل اليوم موول محد يقدر يرمسك .. ؟َ
محمد : اللي يشوف فطيم وين ما تبى يكون فلفل . طلباتها مول ما تخلص .. تتزوجها وتفكني منها ؟.
انصدمت من محمد ؟. ها شو يقول ليش جي يرمس عن اخته . حشى مب رقاد جي مسوي بالواحد .. طنشته ما رديت عليه هو طلع سار عند اخته . . تميت استغفر ربي . لا فطيم مب جي طبعها اعرفها صح انها حشرة بس مب لهاي الدرحة محمد فيه شيء عنده ؟ اليوم بطوله وهو معصب بس يحاول يكون عادي لازم اعرف شو فيه.... شوي و دخل ..
مسكته من ايديه قبل لا يلييس : و ربك يا حموود اليوم انا ما بطلع لين تقولي شو فيك .؟!
محمد يهد ايدي : تراني قلت لك فطيم حشرة وطلباتها ما تخلص ما عرف ليش عندها موتر و بيزات و كله تباني اسوي لها كل شي ؟؟
ما صدفته : حط عينك في عيني وقول هاي الرمسة المخبقة شو فيك ؟
تنهد من الخاطر : ابد و الله بس تعرف اليوم طلقت فلانه .
عقد حواجبي
محمد يلف الصوب الثاني : هيه لا تتطالعني جي .. كنت معرس و طلقتها .
مصدوم من اللي يقوله : متى و كيف و ليش ؟ وانا طول الوقت معاك ؟؟
محمد : من سنة انا معرس تذكر العام في الصيف يوم قلت لك بسافر . مع الاهل انا ما سافرت معاهم تميت في البلاد قبل السفر ب3 شهور تعرفت ع وحدة و رمست الوالدة و قلت اني ابغيها ..
><
ام سالم وهي معصبة : لا يعني لا خلاص لا تعور لي راسي ..
محمد : امي انزين ليش لا ؟ اقنعيني .
فطيم : انا قلت لها انته تبى منو ... و انا اعرف هاي البنت عدل مول ما تناسبك ..
محمد يلس حذال فطيم : و انتي كيف تعرفينها .
فطيم : تراها كانت معاي في نفس الكلاس وجي و اسمع سوالفها و مصاختها تولع بجبدي الصراحة وانا ما ابغيك تاخذ وحدة شينه بالعكس و الله انته انسان تستاهل كل خير ليش مصصم انك تاخذها ترى الجمال و الله مب كل شيء ؟؟
محمد يساسر فطيم : ما عليه انا بخليها تتغير انا بعلمها السنع ؟
فطيم : نصيحة لا تعااااااااااند الوالدة و الله ماا ر اح تتهنى في حياتك.. هي كبيرة و عقلها برااسها و تعرف الصح من الخطا ..
محمد يقوم وهو معصب : باخذها يعني باخذها ...
ام سالم: هاي يمكن مسويه تلك طبوب علشان جي ما تقدر اتفارج عنها .. انا باجر بوديك عند مطوع علشان يقرا عليك .. عافانا الله الحين الطبوب موضة الحين ك من هب دب قام وسوى بس علشان ياخذ اللي مكتوب له ويجلبون الدنيا اعوذ بالله منهم ...
محمد : لا بسير عند مطوع ولا شيء ... نش محمد وطلع من البيت ...ز
><
محمد يتنهد : و بس من طلعت من البيت سرت بيتهم و خطبتها لا تسالني كيف سرت من دون هلي .. حبيتها وايد كنت اسير لها اخر الليل و ساعات اقول لهم انا بايت عند ربيعي ومن هناك ابات عندها عشت احلى ايام عمري معاها .. وكنت اتمنى بنوته جميلة تشبه امها بس الله ما كتب لنا انه يكون عندنا ياهل .. ومن شهرين ..
><
فطيم ما كانت رااااقده هاك الوقت كنت توني داخل البيت، كانت يالسة في الصالة ما عرف شو عندها سهراانه ..
فطيم تصد صوبي : ها شرفت ما بغيت ..
محمد واقف : مب متفيج لج قولي شو تبين ؟
فطيم تسير صوبه : انته كيف تزوجتها ؟؟ كيف رضيت ع نفسك انك تاخذها ؟.؟
محمد انصدم : وانتي شعرفج ؟
فطيم : خلاص عرفت مب مهم كيف .. من 10 شهور متزوج ومحد يدري .. تعرف لو ابوي درى شو رااح يسوي بك اقل شيء انه رااح يروغك من البيت .. وبيحرمك من كل شيء انته ليش جي سويت ..
محمد يليس : خلاص فطيم انا قررت اطلقها بس اتريا الوقت المناسب .. انا ابغي ياهل بس هي ما تنفع تكون ام لعيالي و ثاني شيء انا شاك انها تخوني ..
فطيم تستهزأ : وليش ما تكون واثق انها تخونك .. ووحدة اهلها ما طلبوا انهم يشوفون اهللك ع الاقل اختك و لا امك . شو تتوقع منهم . تتحرى انك بتعيش بامان و بترتاح ..
محمد يتنهد : خلاص بس غلط وما ر اااح اكرر الغلط بس دخليج دخليج مابي حد يعرف و جريب راح اطلقها ..
><
محمد : واليوم سرت عندها و ما خليت شيء ما قلت لها و طلقتها بالثلاث اليوم الصبح كنت في المحكمة علشان موضوع الطلاق .. مضايج لاني ضعيت سنة من حياتي ع وحدة ما تستاهل بس هاي هي كل السالفة ...
سرت يلست حذاله و طبطب على جتفه : ما عليه يا خوي الحمدلله ع كل حال لا تضايج بعمرك خيره من ربك ..الله يرزقك باللي احسن منها ..
محمد : ان شاء الله بس الحين لا بعدين يمكن بفكر ...
سلطان يبتسم : فطيم تدري انك طلقتها ..
محمد : هيه يوم رديت خبرتها .. ومن قلت لها قالت احسن تستاهل .. يوم اقولك هاي مينونة بداله لا تواسي اخوها جي اتقول ...
سلطان ابتسم : ااااه فديتج يالغالية ...
نشيت لانه خلاص الساعة صارت 9 ونص لازم ارد البيت و ارقد ..
يلا الغالي انا بتوكل بسير ارقد وايد تأخرت ....
محمد : خلاص اوك باجر عقب الدوام بتلاقى .. الله يحفظك و اسمحلي ع اسلوبي ..
سلطان : يا ر يال ما استوى شيء المهم الحين انته سير ريح راسك و لا تفكر في شيء و انسى انك كنت تحب وحدة و تعوذ من ابليس و افتح صفحة يديدة في حياتك و كمل حياتك صح . يلا فمان الله
طلعت من عند حمووود و قلبي معورني عليه و في نفس الوقت اضايجت لاني اانا اخر واحد عرف بالسالفة يلا مب مهم المهم انه افتك منها و الله يعوضه باللي احسن بعده هو توه مكمل 24 الله يحفظه ..
كانت الساعة تقريبا 12 . شفتها يالسة في صوب الحديقة مسوين شرات اليلسة كراسي و طاولات و في يلسة ارضية .. كانت يالسة مترربعة و جدامها دلت الكرك يا موتها حق الكرك ..
سرت صووبها عدلت و قايتها ..
سلطان مبتسم : السلام عليج . اشحالج ؟؟
فطيم منزلة راسها : و عليك السلام .. يسرك الحال علومك .
سلطان : اه يالغالية من عقب ما شيء علوم ..
طنشتني : تبى شاي !
سلطان اااااااه : فطيم دخيلج لا تعذبيي ..
عقد حواجبها : انته ما تفهم اكثر من 3 شهور و انا اقولك لا يعني لا لا تحبني ..
سلطان : ليش يعني عطيني سبب مقنع ؟؟
فطيم تقوم : ما عندي سبب بس انا ما ابي احب و عقب اندم .
سلطان : تندمين ؟!!!! و ليش تندمين ؟؟
فطيم : انا ماعرف شو اقولك بس اني مب مستعدة ..
سلطان : لجل عيونك وش الي تطلبه قلي
من حضرتي كان ما لبيت مطلوبك
لو تطلب الروح انا لك فدوتك كلي
عهد علي الوفا لجلك وماجوبك

فطيم دمعت : بس سلطان كااافي
سلطان : انتي اللي كافي دخليج يالغالية .. اذا تبين تتاكدين اني احبج باجر بيي و بخطج ..
فطيم عطتني ظهرها : لا سلطااان لاااااااااااا ..
سلطان يجابلها : انا قلت اللي عندي و باجر الوالدة بترمس امج و اتريا الرد منج ........
طلعت من عندها قبل لا اسمع اي شيء ......
رديت البيت شفت الوالده كانت يالسة في الصالة ع حظي سرت سلمت عليها و يلست معاها شوي

.............................

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 05-11-2015, 09:47 AM
بنت_الياسي بنت_الياسي غير متصل
©؛°¨غرامي مشارك¨°؛©
 
الافتراضي رد: صرت أشتاقلك لو تبعد قليل صرت أحبك فكل ثانية عمر/بقلمي


وين التفاعل ؟!!

اذا شفت انه ما شيء حمااس ما راااح اكملها ...

الرد باقتباس
إضافة رد

صرت أشتاقلك لو تبعد قليل صرت أحبك فكل ثانية عمر/بقلمي

الوسوم
احبك , اشتاقلك , تانية , تبعي , قليل
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
مرة ثانية مع لمبادا وسحرها ابو شروووق ميكاب - مكياج - عطورات 2 08-07-2015 12:39 PM
صرت اشتاقلك لو تبعد قليل صرت احبك فكل ثانية عمر (l) بنت_الياسي ارشيف غرام 1 24-06-2015 04:54 AM

الساعة الآن +3: 03:16 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1