med_awadh ©؛°¨غرامي جديد¨°؛©

( الفصل الاول )
بسم الله الرحمن الرحيم
على بدايات الصبح , و على نغمات فيروز : شايف البحر شوكبير , كبر البحر بحبك
استيقظ منصور ذو الوجه البشوش و الضحكة الرائعة
منصور : صباح الخير يا جنة الدنيا , كيفك ؟
ام منصور : هلا ب روح امك , بخير انت اخبارك ؟
منصور : بخير دامك موجوده بهالدنيا , ها يمه وش مسويه لنا فطور ؟
ام منصور : كل شي انت تحبه روح بس للصاله و تحصل كل شيء تبيه على الطاولة
منصور : اوه ! الوالد هنا , صباحك عسل يابوي كيفك ؟
ابو منصور : هلا منصور صباح النور بخير كيفك انت ؟
منصور : بخير بحسك بهالدنيا
ابو منصور : ها ياولدي جاك رد من البعثه او شيء ؟
منصور : لا و الله يابوي لسى ما ردوا لي خبر باذن الله لصار شيء بعطيك خبر لا تشيل هم
ابو منصور : الله يسهل لك كل خير و يوفقك على كثر تعبك
منصور : اميين , يلا ياجماعه انا طالع مع خالد تبون شي ؟
ابو منصور : على وين ؟
منصور : ابد , تعرف ويك اند و فاضين لا شغله و لا مشغله
ابو منصور : حافظكم ربي , انتبه لنفسك و عن السرعه ياولدي
منصور : ابشر يالغالي ما طلبة شي , و انتي يالغاليه بغيتي شي ؟
ام منصور : لا ياولدي انتبه لنفسك و انا اكلمك اذا بغيت شي , الله يحفظك
خالد : يلا عجل ياخي طولت علينا ماصار نوم
منصور : هذا انا جيت يانشبه ما تخلي احد يفطر على رواقه
خالد : متاخرين عن موعد الاسنان ياخي المفروض نكون هناك الساعه 9 شوف كم الحين يافالح
منصور : هههههه عادي ياخي ماصار شيء كلها 5 دقايق تاخير مافيها شي
خالد : خل يروح الموعد يامنصور و الله تسويه على حسابك
منصور : طيب ههههههه
موظف العياده : can I help you ?
خالد : منصور وش يقول ذا !
منصور : يقول وش يقدر يخدمك يافالح خلني اتفاهم معه وخر
منصور : we reserve the dentist
موظف العياده : one moment please
منصور : take your time
موظف العياده : the doctor is waiting
منصور : thank you for this service
موظف العياده : you are welcome
منصور : يلا يافالح ادخل للدكتور هذا هو ينتظرك
خالد : احمد ربك ماراح الموعد و لا كان لبستها بوجهك
منصور : روح روح لا اخليهم يسوون عمليه لاسنانك كلها
منصور : خالد , جوالك ياخي ازعجني كل ساعه دق
خالد : مين الي يتصل ؟
منصور : ما ادري رقم غريب !
خالد : رد انا مو عارف اتكلم من البنج
منصور : الو , السلام عليكم
المتصل : الو , و عليكم السلام , هذا جوال خالد ؟
منصور : أي نعم جوال خالد مين اقوله ؟
المتصل : قوله ساره
منصور : يبعد الجوال . خالد ذي وحده اسمها ساره تقول تبيك
خالد : قول لها لم يخلص بيكلمك
منصور : ساره ! يقول لك خالد يتصل فيك لم يخلص
المتصل : اممممم طيب قوله يتصل فيني ضروري لان محتاجته على هالرقم الي طالع عندك
منصور : باذن الله , مع السلامه
منصور : مين ذي ساره يا اخ خالد
خالد : بسم الله وش فيك كذا قلب لونك !
منصور : بالله عليك انا ماني متعود اكلم اشكال هالبنت مثلك انت ما بقى بنت ما كلمتها ههههههه الناس وحده على الاقل انت ما شاء الله ما بقيت شي للناس
خالد : ياخي ذي سالفتها سالفه ما تبي تطلع معي و لا شي الا اذا تزوجتها ! سلامات ياخي طفشتني كل يوم و احنى نسولف تقول تعال تزوجني و لازم يكون الي بينا رسمي عشان نطلع مع بعض
منصور : طيب دامك تحبها و هي تحبك وش يمنع ؟
خالد : هالنوع من البنات ما يبون زواج يبون يلعبون بس , اسالني انا
منصور : خف علينا ههههههه , المهم انا برجع البيت بخلص كم شغل على النت عشان البعثه و المعهد حق الجامعة وصلني يلا
خالد : اوكي بس راح نتقابل بالليل عشان الموضوع الي قلت لك
منصور : أي موضوع يافالح ؟
خالد : الحفله الي قلت لك قبل كم يوم , وش فيك نسيت ؟
منصور : ما ادري ما اقولك ايه و لا لا ما ادري عن الظروف
خالد : المهم لا تنسى يابطل ههههههه
منصور : اوكي ارد لك خبر , تبي شي ؟
خالد : سلامتك يلا سلم لي على خالتي و خالي
منصور : امي انا رجعت بصعد غرفتي و بجلس شوي على النت عشان البعثه
ام منصور : هلا ولدي الحمد لله على سلامتك , اوكي يارب خير
منصور : الو سلام عليكم يبا
ابو منصور : الو عليكم السلام هلا منصور ولدي
منصور : يبا جاني قبول بالبعثه
ابو منصور : ما شاء الله مبروك ياولدي الله يوفقك بالجاي من ايام و يسعدك قد ما اتصالك اسعدني
منصور : الله يبارك فيك يا يبا و الله فرحتي فرحتين بفرحتك بذا الخبر يلا خلني انزل ابشر الوالده , تبي شي يبا ؟
ابو منصور : لا ياولدي الله يحفظك
منصور : يممممممه , مبروككك ولدك قبلته البعثه
ام منصور : مبروك ياولدي , الله يزيد افراحك فرحتني بذا الخبر السعيد و الزين خلني اتصل على خالتك ام خالد ابشرها مسكينه تحاتيك
منصور : الله يبارك فيك يالغاليه , لولا الله ثم دعواتك و رضاك عني ما كنت بالشكل الي تبينه الحين , تستاهل خالتي هالبشاره و سلمي عليها بتصل انا على خالد اقوله
منصور : الو سلام عليكم , خالد الحق ياوحش خويك انقبل بالبعثه
خالد : قول غيرها , هههههه مبروكك ياخوي و الله فرحت لك
منصور : حبيبي و الله ياولد الخاله , الا صح وش صار على حفلتك ؟
خالد : و الله ما ادري ياخي محتار وش البس , انت قولي بتجي و لا ؟
منصور : خلاص انا الحين فاضي ابي احتفل عشان هالمناسبه الي عندي ذي لازم ارقص و احتفل
خالد : أي ياخي هذا الاخبار الزينه , تصدق ان هالخبر اسعد من خبر قبولك هههههههه امزح و الله
منصور : شوف الاهبل ههههههههه و لا اقولك مو رايح خلاص هونت
خالد : لا ياخي خلاص امزح و الله ههههههههه
منصور : اوكي متى تخلص ؟
خالد : عطني ساعه او اقل كذا
منصور : اوكي يلا وخر خلني اتروش و اعين من الله خير و لم تخلص دق علي
خالد : الو سلام عليكم
ام منصور : الو عليكم السلام مين ؟
خالد : خالتي انا خالد , اخبارك ياخالتي ؟
ام منصور : هلا ولدي خالد , كلنا بخير
خالد : عسى دوم ياخالتي , الا بسالك يا خالتي , منصور وينه ؟
ام منصور : و الله فوق يا خالد لحظه اناديه
ام منصور : منصور , يا منصور تعال التليفون يبيك خالد
منصور : يلا يمه جايك
منصور : ها يالنشبه وش تبي ما تخلي احد يتروش ؟
خالد : ما خلصت حظرتك للحين ؟ انا برا بسرعه اخلص
منصور : شعندك داق على الارضي ما اتصلت على جوالي ؟
خالد : لا و الله روح شوف جوالك يا فاهي و لم تخلص اطلع
منصور : اوكي , امي تبين شي انا بطلع مع خالد
ام منصور : لا ياولدي انتبه لنفسك و لا تتاخر
منصور : اوه ذا الوالد عند الباب , السلام يبا
ابو منصور : هلا ولدي , اوه وش هالكشخه و العطور الزينه ذي , على وين العزم ؟
منصور : نتعلم منك , و الله ابد طالع مع خالد بنفلها شويتين كذا , بغيت شي اجيبه و انا جاي ؟
ابو منصور : لا ياولدي , انتبه لنفسك و لا تتاخر ترا بيتقفل الباب الساعه 12 هههههههه
منصور : ههههههه شدعوه يبا الحين 11 امداني
ابو منصور : هههههه روح الله يسهل دربك
خالد : وش ذا التاخير , بس لا لا كاشخ الاخ , وين هالكشخه من زمان ؟
منصور : حبيت اعلمك بس , و يافالح انا من زمان اكشخ بس ما تلاحظ انت
خالد : هههههه خير ان شاء الله اكذب على واحد ما يعرفك
منصور : خالد انت متاكد من الجو مافيه ذيك المصايب
خالد : ياخي لا تخاف بس تطمن انت و لا يهمك
منصور : خالد انا بطلع اكلم جوال و برجع لك
خالد : اوكي انا بكون هناك انتظرك
منصور : خالد ! وين ماخذينه حظرتك
الشرطه : هذي حفله ممنوعه و فيها اشياء ممنوعه و محرمه
خالد : منصور تكفى لا تخليني
منصور : لا تخاف بلحقك لمركز الشرطه
المحقق : يا خالد انت متهم بقضيه تمس كرامة اهلك ارجوك تعاون معنى
خالد : سعادة المحقق احنى كنا في حفله عادي ما سوينا شي غلط
المحقق : الحفله كانت فيها اشياء فوق القانون و انت تعرف التهمه
منصور : السلام عليكم , حضرت المحقق , معك منصور الابراهيم
المحقق : تفضل اخ منصور كيف اقدر اخدمك ؟
منصور : سعادة المحقق احنى كنا معزومين بحفله من حفلات اصحابنا و كل مافي الموضوع ان تواجدنا هناك كان للاحتفال مع الاصحاب لا اقل و لا اكثر
المحقق : بس يا اخ منصور , خويك خالد لقيناه بوضع مخل بالاداب و القيم الي تربينا عليها و هذا يجري عليه سجن , للاسف يا اخ منصور ما اقدر اسوي شي لازم خويك ينحبس , يا عسكري , خذه
خالد : منصور وين رايح و مخليني !
منصور : ما بيدي شي اسويه ياخالد , بشوف لك محامي يترافع عنك
خالد : انا لله و ان اليه راجعون ..
منصور : يمه , احتاج ابوي وينه بسرعه
ام منصور : ابوك طالع يا ولدي , وش فيك و وش في وجهك قالب لونه ؟
منصور : مافي شي يمه بس لم يجي ابوي خليه يصعد لي ضروري
ابو منصور : منصور ادخل ؟
منصور : أي يبا تعال
ابو منصور : وش فيك يا ولدي امك تقول انك تبيني ضروري , عسى ماشر ياولدي ؟
منصور : يبا خالد ولد خالتي هند بالسجن
ابو منصور : ليه وش صاير له ؟؟
منصور : كنا في حفله لواحد من اصحابنا و داهمتنا الشرطه بالمكان و انمسك و اخذوه الشرطه , يبا انت لازم تتصرف مو معقوله ان خالد يدخل السجن و انت عارف خالتي ما تستحمل معها القلب
ابو منصور : لا اله الا الله , خلاص بكره ان شاء الله اروح اشوف القصه و لا تخاف بكره تنحل ياولدي
منصور : أي تنحل يا يبا و خالد بالسجن ؟؟
ابو منصور : لا تخاف الحين اكلم علي المحامي و نتابع القضيه معه
ابو منصور : الو سلام عليكم
المحامي علي : الو عليكم السلام , هلا عمي بو منصور كيف اقدر اخدمك ؟
ابو منصور : عندي قضيه و ياليت تعطيني كل اهتمامك , ولد قريب لي مسكوه الشرطه امس بقضيه ياليتك تتابع الموضوع
المحامي علي : وش السالفه يا عم بومنصور عسى المانع خير , وش القضيه يا عم ؟
ابو منصور : القضيه و ما فيها ان الاولاد كانوا بحفله و انمسكوا من الشرطه بالبيت و متهمين الولد انه معه ممنوعات
المحامي علي : باي قسم محبوس الولد ياعم ؟
ابو منصور : بقسم 27
المحامي علي : خلاص يا عم باذن الله اتابع الموضوع
المحقق : تفضل يا غالي كيف اقدر اخدمك ؟
المحامي علي : السلام عليكم , انا المحامي علي الفضل جاي اتابع قضية خالد العلي الي انحبس بتهمة المخدرات امس
المحقق : تفضل
المحامي علي : ممكن لو تسمح لي اجلس مع موكلي 5 دقايق
المحقق : أي اكيد , يا عسكري جيب لي خالد العلي من السجن
خالد : ايش صاير و من انت ؟
المحامي علي : انا المحامي حقك يا خالد وكلني العم بو منصور عشان ادافع عنك قدام الجلسه بعد بكره , قولي ياولدي وش صاير
خالد : طال عمرك احنى كنا بالحفله و كل شي كان كويس و الامور تمام الا دخلوا علينا فجاه و شالوا كل الي كانوا موجودين و هذا احنى بالسجن ما ندري باي تهمه
المحامي علي : يا خالد , انت تشرب شي او تتعاطى شي عشان اذا اثبتوها عليك بملف القضيه راح يكون ثبت الحكم عليك
خالد : و الله ما اتعطى و لا اشرب أي شيء ممنوع و الله
المحامي علي : خلاص ياولدي محلوله ان شاء الله
المحقق : استاذ علي اتوقع خذيت وقتك ؟
المحامي علي : انا اطالب هيئة التحقيق بالكشف عن دم المتهم و هذا ينص بنص القانون على ان الجرعه الزائده التي تكون في دم المتعاطي او المدمن تحمل الصفه الاجابيه , لذا اطالب بالكشف عن دم المتهم
المحقق : ساوافيك بالتفاصيل غدا عن نسبة الدم الموجوده في المتهم
المحامي علي : اشكرك اخوي المحقق على تعاملك و تفانيك بالعمل
المحامي علي : الو السلام عليكم
ابو منصور : الو عليكم السلام , بشرني يا علي عسى لقيت للولد حل ؟
المحقق علي : تطمن يا عم , باذن الله الامور كلها بخير و طمن منصور و الاهل انه باذن الله بيطلع مع جلسة الحكم الاولى , و تطمن دام الولد ما يتعاطى و لا يعرف هالاشياء اموره باذن الله محلوله
ابو منصور : الله يسهل الي فيه الخير , و مشكور يا علي تعبناك معنا
المحامي علي : لا شكر على واجب ياعم هذا عملنا
ابو منصور : يا منصور , منصور تعال ابيك
منصور : سم يبا , ها وش صار على خالد عسى بيطلعونه
ابو منصور : ان شاء الله من الجلسه الاولى بيطلع برائه بكره باذن الله بيسوون له تحليل الدم عشان يتاكدون من نسبة الدم الموجوده بجسمه و باذن الله بعد بكره كل شيء بيزين
منصور : الحمد لله
القاضي : بسم الله الرحمن الرحيم نبدا جلستنا لليوم مع القضيه رقم 121
محامي المتهم يتفضل .

المحامي علي : سيدي الرئيس حظرات الساده المستشارين , نيابتا عن موكلي خالد العلي اقف امام سعادتكم بالترافع عن هذا المتهم الذي قبض عليه بتهمة زائفه لا صحة لها و هي حوزت كميه هائله من المخدرات التي لا تمس موكلي بشيء , و اقف الان على اعتاب سعادتكم بان تسمح لي المحكمه بالقدوم و الادلال ب ادلة موكلي التي تثبت انه بريئ من التهم الموجهة له , ان الاوراق التي امام سيادتكم تقول بان خالد العلي نسية الدم التي امامكم نتائجها سلبيه , أي انه ليس له علاقة سابقه بالمخدرات ولا صحة لكلام هيئة التحقيق ان موكلي مدمن و بذلك اقف امام سعادتكم و اطلب منكم اخلاء سبيل موكلي و بضمان محل اقامته و شكرا .
القاضي : الحكم بعد الجلسه
القاضي : حكمة المحكمه حضوريا بالاتي / تبرئة المتهم خالد العلي بضمان محل اقامته , رفعت الجلسه
خالد : الحمد لله , ياربي لك الحمد
منصور : مبروك يا خالد مبروك , ها تروح حفله ثانيه ؟
خالد : من انت وخر ماعرفك هههههههه
منصور : يلا روح الحين لعند خالتي هند و بكره لنا لقى
منصور : يمه , مساء الخير ليه خليتيني نايم لذا الوقت ؟
ام منصور : ياولدي لازم ترتاح تعبت انت امس و ما نمت زين , عشان كذا ما صحيتك
منصور : اتصل خالد شي على الارضي ؟
ام منصور : لا يا منصور بس بكلم خالتك هند و بشوفه لك
ام منصور : الو سلام عليكم
الخاله هند : الو عليكم السلام هلا خيتي غاليه
ام منصور : مساكم الله بالخير يا خيتي هند شلونكم و وشلون خالد عسى بخير الحين ؟
الخاله هند : مساك الله بالنور يا خيتي غاليه , ابشرك الحمد لله و كلنا بخير و خالد الحمد لله نايم هو الحين , و الله روعنا عليه امس ياخيتي
ام منصور : لا تخافين يا خيتي دام بو منصور موجود ولدك ولدنا زي ما منصور ولدنا , و لا تنسين المرحوم بو خالد وصانا عليه قبل يموت الله يرحمه و يغفر له , عاد خيتي لا تنسين مرينا بكره
الخاله هند : الله يرحمه و يسكنه فسيح جناته , و يوسع في رزق بو منصور و يغنيه , باذن الله يا خيتي
ام منصور : باذن الله يله يا خيتي حبيت اتطمن عليكم و على وليدي خالد
الخاله هند : الله يغنيكم و سالت عنك العافيه , مع السلامه
منصور : ها يمه ! كلمتي خالتي ؟
ام منصور : أي يا ولدي كلمتها و كلهم طيبين و خالد للحين نايم
منصور : اجل زين انا بطلع بروح النادي , تبين شي يا ريحة الجنه ؟
ام منصور : سلامتك يا يمه , الله يرضا لي عليك
منصور : يا عيال بكره انا رايح المطار عشان اسوي تذكرتي منو يجي معي
معتز : ليه وين رايح يا منصور ؟
منصور : اما يا معتز ما دريت ؟؟
معتز : وش صاير يا خوي عسى خير ؟؟
منصور : جاني قبول بالبعثه و بروح احجز تذكره للسفر
معتز : مبروك يا خوي مبروك فرحتني و الله , صبرت و نلت
منصور : الحمد لله . ها يا عيال مين معي ؟؟
راشد : خلاص منصور انا معك بكره امرك مع عز و نروح نحجز
منصور : خلاص تمام بكره على 5 نروح باذن الله
ابو منصور : الو سلام عليكم
منصور : الو عليكم السلام هلا يبا
ابو منصور : منصور وينك يبا ؟؟
منصور : يبا وش فيك صوتك مو عاجبني ؟؟
ابو منصور : انا بالمستشفى مع امك يا منصور , امك تعبانه حيل يا ولدي نقلتها بالاسعاف و هذا احنى بمستشفى 25 شرق
منصور : لا اله الا الله , جايكم يبا
منصور : معتز دق على خالد قوله منصور بمستشفى 25 شرق خله يجيني هناك
معتز : خير يا منصور وش صاير ؟
منصور : بعدين اقولك
معتز : انتبه للطريق و باذن الله كل شي زين
منصور : يبا وش فيها امي , دكتور وش فيها امي ؟؟
الدكتور : هي عندها اعراض سكر و جاها دوخه على شان كذا راح نخليها تحت الملاحظه اليوم و باذن الله بكره نطمنكم , عليها العافيه يا رب
ابو منصور : طيب يا دكتور هل في شي معين لازم تسويه او شي
الدكتور : هي الحين تحتاج الراحه و هي موجوده عندنا الان و بكره حالتها تستقر
منصور : طيب يا دكتور , مشكور
خالد : منصور ! وش صاير ليه انتو هنا ؟؟
منصور : امي تعبانه يا خالد ماني عارف وش صاير لها , يا ليتني ما طلعت و جلست معها بالبيت , يا ليت
خالد : منصور هذي قدرت ربك قل الحمد لله ما فيها شيم و زين باذن الله بكره الفحوصات تكون زينه
منصور : الحمد لله , الله يسمع منك
ابو منصور : منصور ! يا منصور يلا يا ولدي قوم الساعه 7 عشان تروح تخلص اوراقك للفيزه
منصور : طيب بقوم
خالد : الو سلام عليكم
ابو منصور : الو عليكم السلام , هلا يا خالد كيفك يا ولدي ؟
خالد : هلا عمي , بخير جعلك سالم انت طمني عنك و عن خالتي غاليه عسى تحسنت حالتها ؟
ابو منصور : كلنا الحمد لله , باذن الله تصير احسن , امرني يا ولدي خالد شبغيت ؟
خالد : بغيت منصور يا عمي عشان نروح سوا نخلص الاوراق مالته
ابو منصور : الله يقويك , هو يتروش بس يخلص بخليه يكلمك
خالد : الله يعطيك العافيه يا عمي , مع السلامه
منصور : يبا من تكلم ؟
ابو منصور : اكلم خالد يقول يبيك تكلمه
منصور : أي صح بروح معه اخلص الاوراق , خلني اتصل عليه
منصور : الو سلام عليكم
خالد : الو عليكم السلام , ها يا فالح خلصت و لا باقي ؟
منصور : أي يافالح تعال بسرعه لا تتاخر
خالد : يلا حيه يالمبتعث
منصور : اصبر لا تنكب امنا لسى ما صار شي
خالد : هههههههه يلا هذا وصلنا انزل و انا انتظرك بالسياره
منصور : اوكي
موظف : تفضل ! كيف اقدر اخدمك ؟
منصور : السلام عليكم , انا عندي موعد للتقديم على اوراق البعثه و هذا اوراقي و كل شي جاهز
موظف : اوكي اخوي بس لحظه يخلص اوراق المبتعثين هنا و بحط اوراقك معهم
منصور : شاكر لك , يعطيك العافيه
خالد : هاا منصور وش صار معك ؟
منصور : هذا جالس انتظر الاوراق يخلص منها و بجيك
خالد : اوكي اول ما تخلص كلمني
الموظف : اخ منصور الهاجري
منصور : أي نعم انا , تفضل ؟
الموظف : تفضل اخوي اوراقك و بالتوفيق ان شاء الله
منصور : الله يعطيك العافيه اخوي بس بستفسر منك هم باي معهد يختارون لنا و كيف تكون الدراسه ؟
الموظف : اسم المعهد : معهد انتروانشيت , متعدد الجنسيات راح تكتسب لغه تساعدك على التعامل مع الظروف هناك , بالنسبه للدراسه راح تكون باذن الله سهله راح تدرس 5 سنين هناك , باول سنه راح تكون تدرس جميع المواد كبدايه , بعدين راح تختار التخصص على حسب المعدل , و باذن الله كل الامور مسهله هناك , بالتوفيق لك
منصور : يعطيك العافيه اخوي و ما قصرت
خالد : ها يافالح وش صار
منصور : خلنا بس نروح دانكن بعدها نتكلم بكل شي هناك
خالد : بعد ناوي دانكن الاخ يلاب نروح بس على حسابك ترا هههههههه
منصور: يلا روح روح جات على هالمره هي هههههههههه
منصور : عزيزي , عطني قهوه بالحليب حجم كبير , خالد و انت ؟
خالد : مو طفل انا بالحليب هههههه عطني قهوه ساده
منصور : عزيزي , زيد على الطلب الي قبل شوي قهوه حجم كبير ساده
الموظف : حسابها 12 ريال , تقدم قدام و خذ الطلب , شكرا لك
خالد : أي تقولي شصار ؟
منصور: شرح لي كل الي ابيه من معلومات و اساله انا ما ادري عنها , علمني على اسم المعهد بعد يقول انه متعدد الجنسيات يعني كويس
خالد : الله يوفقك , تعرف على ناس مزز يافالح مو تسوي فيها مثقف و تجلس لحالك يامنفس
منصور : و الله عاد كل شي بكيفي مالك دخل انت هههههههه , الا صح وش سويت بقصه ساره حقتك ؟
خالد : توك وش زينك وش هالطاري ؟
منصور : بس كذا ياخي دردشه و سوالف
خالد : و الله شوف ذي ماني عارف لها كل يوم لها شكل تخيل نفسيه يعني تعرف انت اني اصور و ذا و اسوي مقاطع بالسناب تضحك و انزلها انستقرام و اشوف التعليقات عندي و تعرف انت مواقع التواصل ما تخلى من تعليق البنات و الاولاد تخيل وش تقول ؟
منصور : وش تقول !
خالد : تقول انت تعرف بنات علي و ما ادري وش , بالله عليك وش اقول لها ذي الحين و لم اقول لها ترا بس تعليق و ضحك الكلام يعني مو صدق , تقول خير ان شاء الله و مره تخيل , كنت نايم و لم صحيت فتحت جوالي , القاها تتضارب مع الناس بالتعليقات هههههههههه ملاحظ انت انها عفست ام امي
منصور : ههههههههههه الحمد لله ان مالي بالوضع الي انت فيه
خالد : بنشوف لم ترجع من برا وش بتسوي لم تتعرف على ذيك البيضاء و ذيك السمراء و ذيك الشقراء هههههههههه الله الله لا تنسى خويك
منصور : افا شلون انساك , الا يمكن اسويلك دليت من مخي مره وحده ههههههههههههه
خالد : افا اجل شوف لك احد يرجعك بيتكم ههههههههه
منصور : حبيبي خالد
ابو منصور : منصور ! منصور وينك ياولدي
منصور : هلا يبا , سم ؟
ابو منصور : وش سويت ياولدي , عسى الامور انحلت كلها ؟
منصور : أي يبا كل الامور تمام , علمني كل شي ابيه و عطاني معلومات عن المعهد
ابو منصور : الله يوفقك ياولدي , ترا امك طلعوها
منصور : الحمد لله , امانه يايبا هي بخير ؟
ابو منصور : نقول ان شاء الله تعبانه شوي من الابر و هالشغلات
منصور : الله يشفيها و يعافيها وينها هي ؟
ابو منصور : امك نايمه في غرفتها بكره ان شاء الله لازم تكون هنا طول اليوم الا صح قولي وش صار على التذاكر ؟
منصور : التذاكر لسى ما شفت لها حل , يبي لها وقت شوي بس ان شاء الله عم خالد يشوف لي حل فيها
ابو منصور : انا اكلمه و بشوف وضعه المهم انت ركز الحين على اوراقك و جهز كل شي بدري مو تنسى شي
منصور : ان شاء الله يايبا , يلا اجل دام تطمنت عليك بصعد انام
ابو منصور : نوم العوافي
ابو منصور : منصور , ياولدي قوم افطر امك مسويه فطور تحت ما تقدر تقاومه
منصور : يلا يبا وراك انا
ام منصور : اخيرا قمت , صباح الخير ياولدي وحشتني و الله يا مجنون
منصور : هلا بريحة الجنه , ورب البيت ان تو ترجع فرحة البيت والله اشتقت لك و الحمد لله على سلامتك
ابو منصور :منصور , روح بعد المغرب لعم خالد عشان التذاكر و الفيزه
منصور : ابشر يالغالي , بكلم خالد و بروح
ام منصور : وين بتروح يامنصور , عسى خلصت اوراقك ؟
منصور : أي خلاص يايمه كل شي خلص بعد ما اخلص التذاكر بسافر و بغيب عنك
ام منصور : الله ييسر امرك
منصور : الو سلام عليكم
خالد : الو عليكم السلام , ها يالفالح وش بتسوي اليوم ؟
منصور : اليوم بنروح نخلص مع عمك بعدها بنروح نشتري ملابس
خالد : اوكي بس شويات اصحصح و اكلمك
خالد : الو سلام عليكم يا عمي
عم خالد : عليكم السلام يا خالد , اخبارك يا ولد الغالي ؟
خالد : بخير بوجودك و حسك بالدنيا , الا يا عمي وش صار على اوراق منصور و التذاكر ؟
عم خالد : خله بس هو يروح الاستقبال و يقول جايكم من طرف علي العلي و بيعطونه كل شي
خالد : الله يعطيك العافيه يا عمي نردها لك بالافراح يارب
عم خالد : باذن الله , بس قول لمنصور رحلته الفجر عشان لا ينسى , توصي شي يا ولد الغالي ؟
خالد : الله يعطيك العافيه يا عمي نشوفك على خير
منصور : ها وش صار ترا على اعصابي ؟؟
خالد : لا تصير نشبه هههههههه , تروح بكره تاخذ اوراقك من الاستقبال قول لهم جايكم من طرف علي العلي و يعطونك كل شي , و على فكره رحلتك الفجر
منصور : اما الفجر يعني ما يمديني انام , يله اهم شي نروح و نعين من الله خير هناك
خالد : الا صح وش بتسوي بالسكن هناك و الامور ذي ؟!
منصور : لا بروح عند صاحب ابوي هناك لين يوديني الولايه الي بدرس فيها بعدها ببتدي دراسه و بسكن مع عايله هناك
خالد : ههههههه اتخيل شكلك مع اجانب عاد وجهك ما يساعد ههههههههه
منصور : مالك دخل ودني بس اخذ الاوراق عشان اجهز اغراضي و ارتب ملابسي الجدد
خالد : هذا بالطريق
خالد : يلا انزل هذا الباب
منصور : اوكي
منصور : سلام عليكم , انا منصور الهاجري جايك من طرف علي العلي
الموظف : عليكم السلام , أي تفضل هذا الاوراق , توصل بالسلامه ان شاء الله
منصور : يعطيك العافيه و الله يسلمك
خالد : ها يالفالح , افرح بتروح عن هالبلد
منصور : هالبلد احسن من غيرها من غيرها قول الحمد لله
خالد : الحمد لله , يلا الفجر ترا ماحد موديك غيري لا تخلي احد يوديك
منصور : باذن الله يلا سلام
( لنا تكمله اعزائي بالفصل القادم )

med_awadh ©؛°¨غرامي جديد¨°؛©

اتمنى تعجبكم ..

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1