غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 19-08-2015, 09:29 PM
صورة glaciem الرمزية
glaciem glaciem غير متصل
©؛°¨غرامي جديد¨°؛©
 
الافتراضي رواية / عالم مآب


بسم الله الرحمن الرحيم
السلام عليكم ورحمة الله وبركاته


أهلاً بالجميع
هذي روايتي اكتبه لكم وان شاء الله تعجبكم
وهي عن بنت اسمه ( مآب ) وعن حياته واللي تعرضت له من مواقف
الرواية به عدة مغازي وأنتم استخرجوه من انفسكم وان شاء الله تعجبكم وتستفيدون

( الرواية باللهجة القصيمية )


____________________________________




( كل الناس كذابين )

في صباح شتوي بارد
وبالتحديد يوم الثلاثاء
في شهر ذو الحجة
أنا انولدت
ووووه .. كنت اتمنى أعرف وش صار بهاليوم
احسه كان يوم كئيييب

المهم
أمي كانت ضعيفة
فبيتنا احتاج شغالات
وكل شوي مستاجرين لنا شغالة
أول الشغالات اللي طلعن بحياتي كانت ( رقية )
رقية الله يذكره بالخير كانت مسلمة
امي خلت هالشغالة تمسكنا ادامه تروح لشغله اللي يبدأ من الساعة سبع الصبح
ومن هنا بدت حياتي وبدا تفكيري يتفتح على اللي حولي
هالشغالة تقومنا الصبح الساعة 7 اول ما تروح امي
وانا توي كنت بزر
عمري سنتين يعني المفروض هذا يصير وقت نومي
اذا قومتنا وش تسوي ؟
تبدا تعذبنا وتلعب بنا كأننا لعبه بين ايدينه
شفتوا البزر لمّا ما يعرف يلعب شطرنج ؟
وش تتوقعون يسوي ؟
يخربط بهن ويجدعهن ويكسرهن لما يقول بس صح ؟
هي مثل ما عرفت تستغل اللعبة صح
هي يمكن كانت حاقدة علينا مع اننا ما سوينا شي
لكن انا لو كنت مكانه خليت الأطفال على الأقل يشتغلون ويساعدونن
لا
الغبية كانت بس تضربنا
تاخذ اختي الصغيرة اذا صاحت واختي كانت بالمهاد
وش تسوي ؟ تجدعه على السرير لمين تسكت
انا كنت اشوف هالمنظر
كنت اشوف اختي وهي تتعذب
تحسبونن بدافع عنه ؟
لا
تخليت عنه
بتقولون اني متحجرة
بقول لكم مع ان عمري سنتين الا ان تفكيري تفتح بعد ما شفت هالعذاب
صرت اعرف الصح من الغلط
صرت اعرف اني بزر وما اقدر اسوي شي
الشغالة بالنسبة لي فيل
وانا كنت النملة
وأصلاً انا الحين بلشه بنفسي
وش تبونن اسوي ؟
اروح والبس الرداء الأسود واسوي اني بات مان واروح انقذ اختي ؟
امي المسكينة تجي من الشغل وتلقانا انا واخواتي منظفين ومرتبين
ونبتسم غصبن عنا ( طبعاً الشغالة غصبتنا )
ونقول لأمي ان رقية كانت تلعبنا !!
وامي تمدح رقية عند خالاتي وتأجره لهن
اوف بس
رقية كانت تخربط وما تعرف تلعب تحاول تلعب بس ماش
تكوينا بالمكوى حقت الملابس وتروح واذا امي سألت
تجيب عذر انه كانت تسفط الملابس وحنا رحنا للمكوى ولعبنا به بدون ما تدري

رقية كانت تكذب قدامي على امي
وامي تصدق الكذبة
تذكرت امي
امي بعد كذبت علي
امي قالت لي
ان المسلمين ما يكذبون
لأنهم يخافون ربي
ما يبون يدخلون النار
يبون الجنة
هنا أنا اكتشفت
ان كل اللي يقولونه الناس كذب
الناس ابد ما يصدقون في كلامهم
كل كلامهم كذب
ادام المسلمين اللي يخافون من عذاب ربي يكذبون
اجل الكفار اللي ما يعرفون حتى من هو ربي يكذبون
كل الناس يكذبون
لأني يوم أنا صغيرة كنت مقسمة الناس صنفين
كافر
ومسلم
المسلمين يكذبون اجل الكفار يكذبون لأنهم كذابين
اجل الناس كلهم يكذبون
ليش اصدقهم ؟
من هنا انا فتحت عيوني اكثر
يوم استرجعت الماضي
عرفت ان امي اكبر كذابه بالعالم
حتى انه تعرف تكذب اكثر من رقية الشريرة !
بمعنى آخر امي شريرة
أمي قالت لي ان ابوي سافر
المسافر يرجع
مهما حب المكان اللي سافر له لابد انه يرجع
لأن بيته موجود هنا
لكن ليش ابوي ما رجع ؟
وينه ابوي ؟
اذا كان موب مسافر اجل وينه ؟
اكتشفت بعد هالشي يوم تجسست على محادثة امي مع خالاتي ان امي مطلقة
وش معنى مطلقة ؟
احتفظت بهالكلمة بقاموسي لين ألقى معناه


سافرت رقية بعد ثلاث سنوات
وبهالثلاث سنوات
أنا لازلت بزر
لأن عمري صار بس خمس سنوات
مع اني كنت بزر لكن عقلي كبر
اكتشفت اني بعالم فاسد
ولأني بزر كان تفكيري محاصر
يعني شفت مسلمتين كذبن علي
قلت ان كل المسلمين يكذبون
وبكذا كل العالم كاذب

( أنا أعيش في عالم مليئ بمحترفي الكذب )


( هديه )


يوم كان عمري خمس سنوات
حاولت امي تدخلن للروضة
وطبعاً أنا رفضت
موب لأني خايفة
لا
لأني كنت انطوائية
من بعد اللي شفته من رقية خلااااص
المهم اني ما جربت المكان اللي اسمه روضة
لا
انا جربت القعدة بغرفتي لحالي
مسكرة الباب على نفسي
امي العزيزة قررت انه تشتري لنا اللي نبي انا وخواتي
العاب
بكلات
شباصات
من هالانواع اللي يحبنه البنات
انا ما كنت احب هالأشياء
امي كانت تغصبن عليهن اذا طلعنا
لكن انا كنت ما احبهن ابد
واذا حطتهن امي امسحهن اذا راحت
المهم اني ماطلبتهن
طلبت كمبيوتر مكتبي
وأمي ما توقعت من هالشي
ما توقعت اني اعرف شي اسمه كمبيوتر أساساً
وانا صحت على راسه وقعدت اونون لمين شرت لي اللعبة وكذبت محترفة الكذب وقالت انه هاللعبة كمبيوتر
وطبعاً أنا كنت ادري وش الكمبيوتر لأني شفته بالتلفزيون
وتعلمت طريقة استخدامه من برنامج يطلع على حدا القنوات يعلم الحاسوب وتسذا
المهم يوم شف اللعبة قعدت اصيح
لا تحسبونه دلع
لا أنا عرفت استغل دموعي
امي هنا ملت واستشارت خالاتي واقترحن انه تشري مستعمل
شرت امي المستعمل
وانا فرحت قوه
لأن الكمبيوتر كان امنيتي
أخذته وخليت سواق خالتي الله يذكره بالخير يشل هالكمبيوتر ويحطه في غرفتي وبالضبط جنب سريري
وانا ما استعملته
شبكته لأني تعلمت الطريقة من التلفزيون
وانتظرت لين يجي الليل
لأن الليل هو الوقت اللي اروق به
احب الليل واكره النهار
النهار فيه الشمس
وانا اكره الشمس
ما اطيق اشوفه
لاتحسبونن احب القمر
لا
لأن القمر يعتمد على نور الشمس
وانا اكره الاعتماد
القمر يستمد قوته من الشمس
وانا احب استمد قوتي من نفسي
ما احب يصير بانجازاتي لمسات من الناس
لا
كل شي من انا
والمشكلة اني اقول هذا وانا اشتريت الكمبيوتر من فلوس امي !!!!
المهم
يوم جاء الليل والكل نيام
انا شغلت الكمبيوتر
يوم ضغطت زر التشغيل
طلع لي شعار ويندوز
ويا فرحتي
شي ما تقدرون تستوعبونه
طلع لي سطح المكتب
كنت اخربط
لأني بزر
واللي تعلمته من التلفزيون ما فهمت منه الا طريقة التشبيك بس
اما اللي يتكلم ويعلم طريقة استخدامه والله كانه يكلم جدار لأني كنت اتخيل نفسي وانا اشبك الكمبيوتر واشتغل به
بس بعدين اكتشفت اني موب من النوع اللي يفهم نظري
لا
يفهم من التطبيق
وانا بعد موب من النوع اللي يفهم من الناس
انا افهم لحالي
لأنه بس بمرور اسبوع
عرفت الأساسيات
عرفت للوورد والبوربوينت بنفسي
مع اني ما عمري سمعت بهالبرامج
حتى عرفت لهن وما عرفت اسمهن لأني ما اعرف انقلش
وعرفت بعد اتصفح النت
اللي يضحك بالموضوع
اني كنت اسأل اسئلة سخيفة
مثلاً افتح على الخرائط واسأل وين اختي ؟
بس ما علينا اهم شي اني عرفت وضيفته


( عالم جديد )



بعد مرور سنه
عرفت اغلب الأشياء عن الكمبيوتر
عرفت ان الكمبيوتر ما يشتغل الا بنظام تشغيل
وان نظام تشغيلي كان ويندوز اكس بي
واني لازم احدث لنظام ويندوز 7 لأن اكس بي صار قديم
عرفت بعد ان نظام التشغيل مكون من عدة برامج
والبرنامج ينشئه المبرمج وهو الشخص اللي يقدر يتكلم مع الكمبيوتر ويعطيه الأوامر
والبرمجة هي القدرة على اعطاء الكمبيوتر الأوامر وهي القدرة على انشاء برامج
عرفت انه فيه عدة لغات للبرمجة مثل جافا والسي بلس
هنا صرت ابي أصير مبرمجة
بس لا تخافون
كنت بزر ما اعرف حتى انه اللغة الانجليزية كلماته مختلفة عن كلماتنا
يعني كنت اتعجب من الناس وراه يدرسون الانجليزية مع انه سهله
يعني كنت اعتقد ان كلمة أكل مثلاً تسذا ترجمته بالإنجليزية
akl
ههه شي سهل صح ؟
المهم ان حلم المبرمج كان حلم سخيف جداً
وانتهى بلمح البصر بعد ما عرفت رعب اللغة الانجليزية
ايه صح
بحثت عن معنى مطلقة
وعرفت المعنى وضحكت
اجل امي وابوي تهاوشوا وتزاعلوا
وامي دايم تقول لي ان الهواش للبزارين وأنا موب بزر وما يصلح اتهاوش
وهذي كذبة ثانية من كذبات امي
هي كبيرة وتهاوشت !!

أصحاب سن السبع سنوات لازم يدخلون المدرسة
أنا ما كنت متحمسة لهالشي لأن المدرسة مليانه ناس
وبما ان المدرسة مليانه
فهي ما تناسب وحده تحب العزلة مثلي
ولأن المدرسة بعد
فهي مليانه كذابين
مسكت امي ايدي
ودخلتن مركز الشر
المدرسة المليانه كذابين
وبمعنى آخر
مصنع الكذابين
يوم دخلنا استغربت
بنات يضحكن وبنات يصيحن
امي قالت ان المدرسة تتعلمين به
فيه دورات لتعليم الصياح والضحك ؟
امي اول ما دخلنا ووصلنا للنص
راحت لأبلى نهلة وتكلمت معه شوي ولعدبن تركتن !!
ابلة نهلة كانت سمينة
وماسكتن بإيده الكبيرة
وشعره مجعد
صراحة اول مرة اشوف شعر مجعد فحسبته خربان لأنه كانت صابغته أشقر وانا اول مرة اشوف أشقر بعد !
قالت لي
( يا حلوة أنتِ بأي مكان ؟ )
صراحة حسيت ان هالاستاذة مستصغرتن
ما ادري بس كرهته
رديت عليه من دون نفس لأني بعد ما ابي المدرسة
( بالمدرسة اجل وين ؟ )
الاستاذة سكتت
وكملنا الطريق للفصل



( دخول مفاجئ لشخص رائع )


يوم دخلنا الفصل حسيت بشعور غريب
كل البنات بمثل سني
اللي تصيح واللي تضحك
أنا رحت للزاوية هنآآك بعيد
لأني شفت هالمكان خالي
وابلى نهلة تركتن وراحت
قعدت على الكرسي ونزلت شنطتي من ظهري
وعلقته على الطاولة
أول ما علقته البنات صرخن
وكل البنات تجمعن حولي
وش السالفة ؟ أنا خفت !
وحده أخذت الشنطة وجدعته بالأرض
ليش ؟
قمت وقلت وانا زعلانه
( عطين اياه واعتذري !! )
البنت خافت
بس جت بنت ثانية وداست على الشنطة
قلت وانا بقمة غضبي
( ليش ؟ هي شنطتتس أو شنطتي ؟ )
قال هي بعد وهي بقمة غضبه
( أنتِ ما تدرين ؟ الملائكة ما يدخلن في فصلنا كذا !! )
قلت له وانا مستغربة
( ليش ما يدخلون ؟ أنتن بعد معكن شنطاتكن ! )
شالت البنت شنطتي وأشرت على صورة الشخصية الكرتونية المطبوعة على الشنطة ( فلّه )
صورت فلّه موجودة والصور حرام والملائكة ما يحبون الصور
اييه صح
انا بعد ما ادخل صور لغرفتي
وكلام البنت صحيح
بأي حق أحرمهم انا من الملائكة اللي تحف الناس اللي يقرون قرآن ؟
لأني انا دخلت مدرسة تحفيظ !!
لأني كنت ما اهتم بأي شي حولي امي شرت لي الشنطة
وما انتهبت ابد لهالصورة لأن الشنطة ما أثارة اهتمامي مثل الكمبيوتر
أخذت الشنطة من البنت
( أنا آسفة بس حتى لو بكرى بجيب شنطة جديدة بس الحين ما اقدر لازم آخذ ذي )
سحبت البنت الشنطة
( أنتِ تبين شنطتتس وحنا نبي الملائكة حنا نبي الملائكة ! )
اففف وشلون بتفهم ذي ؟ شنطتي به فسحتي وبه كل شي وشلون أجدعه ؟
فجأه دخلت بنت ثانية داخل دائرة الهواش السخيف واخذت الشنطة ورجعته لي وقالت وهي تبتسم
( نقدر نطمس الصورة بالطامس صح ؟ )

اقتنعوا البنات أخيراً وجت البنت اللي داست على شنطتي وطمست الصورة
أما البنت اللي ساعدتن كانت تجلس قدامي
أنا صراحة ما حبيته لأني اعتقدت انه تتصنع الطيبة
من صفات الكذابين التصنع
وهي تتصنع الطيبة وتحط قناع الشخص المثالي
لكن أنا كشفته
ومع ذلك لازم اشكره لأنه مع أنه تتصنع الا انه ساعدتن !!
وخزته مع كتفه ثمن التفتن لي وقالت
( وشو ؟ )
قلت له وانا اناظر شي ثاني وما خليت عيني تتصل بعينه
( شكراً )
ضحكت البنت ومسكت وجهي وخلت عيني تقابل عينه
( وراه ما تناظرينن انا مو وحش ! )
ابتسمت وقلت له
( أنا اسمي مآب وأنتِ ؟ )
ابتسمت هي
( اسمي هند )


ومن هنا انا عرفت هند


( ابوي )


مرت ثلاث سنوات وصرت بصف رابع
في رابع مستواي الدراسي انخفض
لأني فعلاً تعلقت بهالشي اللي يسمى كمبيوتر
وخاصة النت
النت فيه كل المعلومات
المدرسة تعطين أشياء انا ما ابي اتعلمه
لكن النت اتعلم الأشياء اللي ابي اتعلمهن
عرفت المنتديات
عرفت الإيميل
عرفت اغلب الأشياء
عموماً المنتديات ما تعلقت بهن لهالدرجة
لأني استخدم الكمبيوتر ككتاب فيه معلومات ما لهن نهاية
عرفت بهالثلاث سنوات أشياء كثيرة عن طريق الكمبيوتر
وبهالثلاث سنوات توسع نطاق تفكيري
صرت افكر وافكر لدرجة اني أبي اوقف
صرت افكر بأشياء ما له داعي
وصرت افكر بأشياء ما يصلح لطفلة مثلي تفكر بهن
لأني صرت أبحث عن جواب لكل شي
مين اللي حدد اساسيات الجمال ؟
مين اللي قال ان هالشي جميل وهذا قبيح ؟
ليش القبيح ما سميناه جميل مثل الجميل ؟
أصلاً من اللي حدد هالمقاييس ؟
ومين اللي حدد الأشياء الجميلة و القبيحة ؟
الله سبحانه قال انه خلق الانسان في احسن تقويم صح ؟
ليش اجل الناس يقولون ان هذي جميلة وهذي بشعة وان هذا بشع وهذا وسيم ؟
ليش الناس كلهم يناظرون الشي بنظرة وحده ان الجمال جمال والقبح قبح ؟
ليش ما يصير القبح جمال والجمال قبح ؟
وصرت بعد افكر بشي غير سالفة الجمال
وشلون احرك ايدي ؟
اذا كنت ابي احرك اصبعي يتحرك بس تفكيري ما مسك الأصبع وحركه
لا
الاصبع تحرك لحاله يوم فكرت بهالشي
رجلي راسي جسمي كلهن وشلون يتحركن ؟
بمجرد اني فكرت بتحركهن تحركن
لكن مثل ما قلت التفكير ما مسكهن وحركهن لأن التفكير ما له يد
صرت افكر كثير لدرجة وصلت لأمور الدين وهذا اللي خلان اخاف من التفكير !!

صرت افكر بابوي بعد
اشوف كل بنات فصلي يتكلمون عن آباءهم حتى هند تتكلم عنه
الأب
لهالدرجة هالإنسان مهم ؟
اذا كان مهم وراه أنا ما احس بهالشي ؟
لأني ما اتذكره ؟
وشلون كان شكله ؟
كان يشبهن ؟
طيب وشي طريقة تفكيره ؟
وشي شخصيته ؟

اعرف انه بيكون كذاب
لأنه لو ما كان كذاب
ما كان تزوج أمي
لأن المتزوجين يحبون بعض
بس هو ترك امي
واللي يحب أحد ما يتركه
لذلك أنا استنتج انه كذب على امي وقال انه يحبه
لكن وراه ؟
وش الغاية من هالشي ؟

هو أي نوع من الكذابين بالضبط ؟


________________________________________________


وبكذا خلص الجزء الأول من الرواية
وانتظر تعليقاتكم واتقبل انتقاداتكم لكن تكون بناءه

^_^


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 19-08-2015, 11:52 PM
صورة نجمة elamar الرمزية
نجمة elamar نجمة elamar غير متصل
©؛°¨غرامي مشارك¨°؛©
 
الافتراضي رد: رواية / عالم مآب


بداية حلوة بالتوفيق


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 20-08-2015, 01:27 AM
الاميرة الضائعه الاميرة الضائعه غير متصل
©؛°¨غرامي مشارك¨°؛©
 
الافتراضي رد: رواية / عالم مآب


واو جميييييييييلة الرواية مرةةةةة

واعجبني تفكير ماب رغم انه غلط نوعا ما لكن واضح عقلها كبيير..

استمري..وارسليلي اذا نزلتي لو سمحتي


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 20-08-2015, 04:33 AM
صورة glaciem الرمزية
glaciem glaciem غير متصل
©؛°¨غرامي جديد¨°؛©
 
الافتراضي رد: رواية / عالم مآب


اقتباس:
المشاركة الأساسية كتبها نجمة elamar مشاهدة المشاركة
بداية حلوة بالتوفيق

أهلاً اختي
شكراً على الإطراء


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 20-08-2015, 04:37 AM
صورة glaciem الرمزية
glaciem glaciem غير متصل
©؛°¨غرامي جديد¨°؛©
 
الافتراضي رد: رواية / عالم مآب


اقتباس:
المشاركة الأساسية كتبها الاميرة الضائعه مشاهدة المشاركة
واو جميييييييييلة الرواية مرةةةةة

واعجبني تفكير ماب رغم انه غلط نوعا ما لكن واضح عقلها كبيير..

استمري..وارسليلي اذا نزلتي لو سمحتي

شكراً أميرة
وان شاء الله أرسل لتس اذا نزلت الجزء الثاني


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 20-08-2015, 05:55 AM
صورة نونه ال ملسونه الرمزية
نونه ال ملسونه نونه ال ملسونه غير متصل
©؛°¨غرامي مشارك¨°؛©
 
الافتراضي رد: رواية / عالم مآب


بالتوفيق حبيبتي
صراحة اسلوبك عجبني و تفكير مآب عجبني بعد
سلاااااام

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 20-08-2015, 10:09 AM
صورة glaciem الرمزية
glaciem glaciem غير متصل
©؛°¨غرامي جديد¨°؛©
 
الافتراضي رد: رواية / عالم مآب




وهذا الجزء الثاني .. انتظر تعليقاتكم

_________________________________________________


( بنت من خلف الشاشة )


بعد سنتين
كانت أغلب أوقاتي اقعد به على الكمبيوتر
لأني أدمنته
ولسبب ثاني بعد
ما فيه شي أسويه غير اني أقعد عليه
يعني بنت بصف سادس ابتدائي
قاعدة ببيته ما فيه احد يوصله ولا يجيبه بالله فيه شي ثاني اقدر أقعد عليه ؟
مرة من المرات
قعدت على الكمبيوتر
كنت مسجلة في منتدى
انا ما كنت لمّ المنتديات ابد
لكن هالمنتدى كان فيه معلومات كثيرة
كان فيه اشياء ابي اتعلمهن
فيه دورات ولازم اسجل بالمنتدى علشان اتعلم معهم من هالدورات
احسن شي انهن مجانيات
فيه بنت مسجلة بالدوره مثلي
اسم البنت هدوء
هدوء هذي كان واضح انه تحاول تتقرب من
يعني مثلاً تقول ابي اصير صديقتتس وتسذا
انا سامعه بالبنات الغبيات اللي صادقن بنات ثانيات بالنت
وارسلن صورهن لهن بحكم انهن بنات بعد
وبعدين طلعوا اولاد يبتزونهن
لذلك انا موب غبية
بس هالبنت فعلاً مزعجة
ترسل ترسل ترسل
وتدري اني اتجاهل رسايله بس تبتل
فكرت
وراه ما اهرج معه شوي
انا موب مرسلة صوري وش يبي يضرن ؟
أنا ما غيرت اسمي بذاك المنتدى
لا
قلت ان اسمي مآب
لأني ما احب اغطي نفسي بشي ثاني
مثل المكياج
انا اعتقد ان المكياج قناع يحطنه الحريم علشان يخفن وجيههن
وانا اذا حطيت مكياج
هذا يدل ان وجهي شين
وانا اعدله بالمكياج
يعني مثل ما قلت من قبل انا ما آمن بمسألة هذا جميل وهذا قبيح
ولأني من صنع ربي
فهذا يعني اني جميلة
اذا حطيت مكياج وقته ابعترف اني شخصة قبيحة حطيت قناع المكياج علشان اخفي قبحي
المهم انه المكياج نفسه نفس الاسم
وراه احط اسم مستعار ؟
ههههه وقته ما كنت اعرف انه فيه ناس ما يبون احد يعرفهم
او فيه ناس يحبون اسماء ثانية
يعني كنت اعتقد ان الناس اللي يحطون اسم مستعار يحطونه لأنهم ما يحبون اسماءهم
هههههههه
قلت لكم تفكيري كان ضيق شوي

قعدت اسولف انا والبنت هدوء
بنت عادية كأي بنت تشوفونه قدامكم
تقول انه حبت تتعرف علي
يعني ما لقت الا انا ؟
وراه كانت مصره انه تتعرف علي أنا ؟؟
ما ادري
صارت هالبنت مثل العلك اذا لزق بالشعر
كل ما دخلت المنتدى القاه ترسل لي
واذا ما رديت على رسايله ازعجتن بالرسايل اليين ارد
اف هي موب علك لزق بالشعر
لا
هي صمغ انكب على كل الشعر بعد !!


( ظهور الوالد حفظه الله )


يوم كنت اتصفح النت
طقت علي امي الباب
انزعجت منه
ما لي خلق اروح وافتح
بتلت تطق وتطق الين فتحت
قلت له وانا ما لي خلق شي
( وش تبين يمه ؟ )
دخلت غرفتي وانزعجت من الحوسه
( وش هالحوسه ؟؟ )
انا بنت فوضوية
وما احب ارتب غرفتي
ما احب اشوفه نظيفة أصلاً
لأن غرفتي واسعة
وانا احب الأماكن الضيقة ولا أحب الواسعة
فلذلك احاول اضيق الغرفة بحوستي
غرف خواتي عكسي تماماً
أصلاً أستغرب من خواتي
مع انهن مرن بنفس اللي مريت به الا ان طريقة تفكيرهن مختلفة تماماً عن طريقتي
هن اجتماعيات والكل يحبهن
مرتبات جميلات كل شي
انا احب خواتي
هن الوحيدات اللي اثق بهن
حتى لو كذبن علي مع ذلك احبهن
لأنهن عاشن اللي عشته وساندنن بعدة مواقف
جلست امي على سريري بعد ما وخرت الكتب اللي فوقه
( فيه شخص بيجي ياخذتس انتِ وخواتتس بعد شوي )
انا استغربت
شخص بمعنى رجل
والرجل ما يصلح يروح ما الحريم لحالهن
واصلاً وراه نروح معه ؟
( وراه يمه من هو ؟ )
تعابير امي بدت تتعفس
عرفت فوراً ان امي تكره هالشخص
قالت وهي تقوم من السرير
( تبي تعرفين من هو اذا رحتي معه انتِ وخواتتس خلاص )
امي كانت معصبه
دوامة التفكير تاخذ عقلي وانسى كل اللي حولي وابدا افكر
بما ان امي بتخلي بنات يتغطن يروحن مع رجال
هذا يعني انه محرم لنا
طيب من اللي ما نتغطى عنهم حنا ؟
خوالي ؟
جدي ؟
بس
هذولا هم الرجال اللي نعرفهم وما نتغطى عنهم
اجل من هو هالمجهول ؟
لحظة
لا يصير
ابوي ؟
خلاص هذا شي اكيد
هو ابوي
لأن امي كانت معصبه
ومستحيل تعصب على خوالي وخاصةً جدي
اف لهالدرجة هي وابوي ما يحبون بعض
اجل وراه تزوجوا ؟
لعبه هي ؟
ما لي بهالأمور انا
بكيفهم هم اللي تزوجوا
وبعدين ابوي وش يبي بنا الحين ؟
لا تحسبونن اكرهه
لا
ابوي شخص عادي جداً بالنسبة لي
يعني بالعادة ومثل ما شفت الولد يحب ابوه
بس انا احسه شخص عادي مثله مثل راعي البقالة اللي نشتري منه حلويات اذا جينا من المدرسة
اشتهيت حلاو يوم كنت افكر

المهم انه بعد صلاة العصر جا ذاك الشخص اللي يسمى ابوي
ركبنا السيارة وانا ركبت قدام
سلمنا وقعدنا
كان الجو هاادي
تذكرت هدوء اللي بالمنتدى
فجأه سأل يوم وقفنا عند اشارة
( وش اخباركم ؟ )
واو
هذا الشخص يسأل عن اخبرانا
ولا وحدة من خواتي ردت
كانن مستحيات
خواتي الحياء ضارب بهن
معليش استحي من الرجال بس من ابوي ؟
رديت عليه وانا اراقب الإشارة الحمرا وهي تعد تنازلي علشان يصير لون اللمبة أخضر
20
19
18
17
( مثل ما تشوف بخير الحمد لله )
16
15
14
هو سكت شوي وقعد يراقب الإشارة مثلي
( أنت ابوي ؟ )
13
12
11
10
رد علي بهدوء
( ايه اجل من ؟ )
سكتنا شوي وانا بس اراقب الإشارة
لأني أكره الانتظار
9
8
7
سألن
( تكرهين الانتظار ؟ )
6
5
رديت عليه
( ايه )
4
3
سألته
( تكرهن انا وخواتي ؟ )
هو سكت
2
1
رد علي وهو يمسك الدركسون
( لا )
صفر

مشت سيارى ابوي وكملنا الطريق

مع اني كنت اعتقد ان العالم كله كذاب
الا اني هالمرة صدقت ابوي
ما ادري وراه
شعور داخلي
هو يحبن
انا فرحت شوي
اجل هذا هو شعور هند وبنات الفصل
مع اني كنت اعتقد ان ابوي مكانته عندي مثل مكانة راعي البقالة
الا اني فرحت يوم دريت انه يحبن
هذا يعني ان ابوي موب راعي بقالة
لا
ابوي اهم من هذا بالنسبة لي
ابوي اهم


( أنتِ مآب ؟ )
رديت عليه
( ايه )
( يعني انتن ياللي وراه ميساء و سجى ؟ )
ردن خواتي بصوت كله حياء
( ايه )
التفت لابوي ابشوف وجهه
لأني طول الطريق كنت اراقب الشارع
ابوي كان يبتسم
سألته
( وراه تبتسم ؟ )
اتسعت ابتسامته
( مآب .. اعرف تراي .. أنتِ بالنسبة لي شفافة )
ما فهمته
وشلون يعرف ؟
ووشو اللي يعرفه اصلاً ؟
ووشلون انا اصير شفافة بالنسبة له ؟
سألته مرة ثانية
( يعني أنت فرحان لأنك تعرف اسمي ؟ )
ضحك
وقال وهو يغطي اثمه يحاول يكتم الضحكة بس ما قدر
( لالا اقصد شي ثاني )
سألته وانا كلي فضول
( وشو ؟ )
قال وهو للحين يحاول يكتم ضحكته
( هذا لغز .. اذا عرفتيه لتس اللي تبينه )
هنا انا احترت

بعد مرور وقت من دون ما يتكلم أي أحد منا
تذكرت سؤال
سألت
( أنت الحين وين تودينا ؟ )
قال بهدوء
( الحين تعرفين )


( خطأ فادح )


صراحة ما توقعت ابد اننا نروح لهالمكان
يعني توقعت يودينا لبيته
يخلينا نشوف جدي وجدتي
يخلينا نشوف عماني
أما يودينا للملاهي ؟
هههههههه
شكله يبينا نألفه
عموماً نزلنا شوي وخواتي كانن مستحيات اليقالهن
بس الحين لا
صارن يسولفن ويتحركن و يطلبن
ابوي لعب معنا
هههههههه
كان شكله يضحك
لعبنا بالالعاب
أكلنا حلويات
اشترينا فشار
رحنا للمطعم الموجود واكلنا منه شوي
انا اكلت العشق ورق العنب
وابوي اكل مع خواتي بطاطس مع الكتشب
يوم خلصنا من هذا كله
قعدنا على حدا الكراسي
قالت سجى وهي تضحك
العمة مستانسة ههه
( يبه انت شخص مسلي )
ضحك ابوي وقال وهو يأشر على نفسه
( يعني أنا مسلي ؟ بس مسلي ؟؟ )
قالت ميساء
( اشتهيت فشار تسالي )
ههههههه
تحب الأكل هالبنت
ابتسم ابوي وعطاه فلوس وأشر على اللي يبيع فشارات
( روحي أنتِ وسجى واشتروا منه فشار تسالي واللي تبون )
ميساء ما صدقت مسكت يد سجى وراحت
صرت انا وابوي لحالنا
سألن بابتسامة وهو يشوف خواتي يركضن
( أنتِ تكرهينن ؟ )
جاوبت عليه
( لا )
ابتسم وناظرن
( حلو .. والله حلو )
يعني لهالدرجة بيصير فرحان ؟ اجل اذا كان يحبنا ويبينا نحبه وراه تركنا لحالنا ؟
قال لي
( تبين تشوفين عمانتس وبناتهم وجدتس وجدتتس ؟ )
مثل ما قلت انا ما احب الناس
يالله تحملت المدرسة
وشلون ابتحمل مكان لازم اسلم به على الكل ولازم اسولف معهم بعد ؟
بس ما اقدر اقول لا
لأني اذا قلت لا
يبي يحسبن اكرهه
قلت له وانا احاول ابتسم
( ايه )
قال لي وهو يأشر لميساء وسجى اللي راجعين
( الكل بيجتمع ببيت ابوي يوم الجمعة .. ابجي آخذتس أنتِ وخواتتس وقولي لأمتس )
يوم رجعوا خواتي انتبهت
هو قال لخواتي يروحن علشان يكلمن بهالموضوع لحالي
طيب وراه ما تكلم مع ميساء
ميساء هي الكبيرة بالمتوسط
وراه تكلم مع بزر بسادس ابتدائي ؟
ابوي شخص غريب


جاء يومَ الجمعة
خواتي قعدن يتلبسن
وين المشط وين البكلة وين الاستشوار وين التنورة
ما بقى الا يقولون وين راسي
انا ما حسيت بأي حماس نهائياً
قاعده بس اسولف مع هدوء
على برنامج الكيك
فجأة ارسلت لي رسالة خلتن اخاف من هالبنت كثير
( أنتِ متضايقة ؟ )
ايه انا كنت متضايقة
ما ابي اروح لهم
ما لي خلق
ارسلت له وانا متعجبة من قدرته على معرفة شعوري
( وشلون عرفتي ؟ )
ارسلت لي
( سر المهنة )
هنا انا عرفت ان هدوء موب عادية
هي شخصة غاآآآمضة
اجل سر المهنة هآه ؟
صكيت البرنامج يوم سمعت سجى تنادي
( مآب يالله البسي عباتتس ابوي جاء )
لبست العباة وطلعت من البيت
فتحت الباب اركب قدام
لكن فجأة شفت ولد قدامي
الولد كان اكبر من
صراحة ما ادري كم عمره بالضبط لكن اللي اعرفه انه اكبر من


هو تفاجأ يوم شافن
وعلى طول نزل من السيارة
وقال وهو خايف
( والله والله ما دريت انه مكانتس .. آآسف )
انا استغربت
يعني تخيلوا رجل ويقول كذا ؟
لا ويعتذر لوحده اصغر منه !
طبعاً هذا موب مكاني بس ما كنت ادري ان الولد موجود لأن السيارة مضلله
وبعدين وش هالغباء به ؟
اذا نزل ورين بيروح مثلاً ؟
يقعد مع خواتي ورا ؟؟
قلت له وانا اركب ورا مع خواتي
( اركب .. وتراه شكلك يضحك )
اخذت نظره سريعة عليه ابشوف ركب او لا
لكني تفاجأت
تعابير وجهه كانت ممزوجة
بين حزن واحراج
وراه ؟
كان يحاول يغطي نفسه
كان منحرج قوة
وراه الإحراج ؟
يوم تمعنت بالنظر اكتشفت شي
هالولد ما له يد يمنى
له يد وحده بس
هنا عرفت الخطأ الكبير اللي انا سويته !!
قلت له ان شكله يضحك !!
بس انا ما كنت اقصد ايده
كنت اقصد شكله وهو يعتذر يضحك !!
حسيت نفسي انسانة حقيرة لأبعد حد
كنت اتمنى لو تنخسف الأرض وتبلعن وينسى اللي قلته
بس ماش


الولد انجرح



انتهى الجزء
اتمنى يكون اعجبكم
ومثل ما قلت
انتظر تعليقاتكم




الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 20-08-2015, 11:40 AM
لامــارا لامــارا غير متصل
©؛°¨غرامي نشيط¨°؛©
 
الافتراضي رد: رواية / عالم مآب


السلام عليكم

ماشاء الله تبارك الله بادية بقوة

أعتقد إن مفتاح الدخول لقلوب القراء

عندما ذكرتي اللهجة القصيمية

حيث العادات والتقاليد واللالتزام وشدة ورخاء

ننتظر القادم بكل حب وشوق

دمت بود

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 20-08-2015, 01:44 PM
صورة Life is a Dream الرمزية
Life is a Dream Life is a Dream غير متصل
©؛°¨غرامي مجتهد¨°؛©
 
الافتراضي رد: رواية / عالم مآب


السلام عليكم ورحمة الله وبركاته

الرواية واضح انها مشوقه واسلوبك رائع بالكتابة

يا ريت ترسليلي لما تنزلي

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 20-08-2015, 02:20 PM
الحلوة المزيونه الحلوة المزيونه غير متصل
©؛°¨غرامي فعال ¨°؛©
 
الافتراضي رد: رواية / عالم مآب


بدايــه موفقه ....يعطيك العافيه

ماشاء الله مآب عقلــها أبدا ما يبين عليه إنها في صف سادس

بإنتظارك

الرد باقتباس
إضافة رد

رواية / عالم مآب

الوسوم
رواية , عالم مآب
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
رواية أملي / بقلمي اشتقت له روايات - طويلة 10 28-08-2017 05:33 PM
رواية هناك / للكاتب ابراهيم عباس شرقاوية شيتونة أرشيف الروايات المغلقة - لعدم إكتمالها 7 22-01-2017 09:53 PM
رواية على حافة الانتقام للكاتبة / داليا {أجـمـَلُ إبتسآمـة} روايات - طويلة 9 22-10-2015 05:21 PM
رواية عروس البحر/بقلمي Goong روايات - طويلة 9 13-10-2015 01:41 AM
رواية رفقا بي يا اهاتي /بقلمي شيــــ chichi مـــاء روايات - طويلة 61 11-09-2015 10:03 AM

الساعة الآن +3: 03:51 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1