غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 25-08-2015, 03:23 AM
دلعي يكفيني دلعي يكفيني غير متصل
©؛°¨غرامي مشارك¨°؛©
 
الافتراضي روايه أبكتبك في مساء العاشقين إني في هواك لمن المغرمين/بقلمي


صباح الخير اعضا منتدى غرام
بعد نجاح اول روايه
#عشقت ذاك الغرور اللي يحليك#
حبيت انزل روايه ثانيه مختلفه تماما
قصه فيها من الحقيقه نسبه كبيره
دايم احاول ابتعد عن الخيال
لانه بنظري يشتت عقل القاري
متحمسه حيل اويا هالروايه
يمكن لان الفكره مب مستهلكه ححححيل
اتمنى تنال ع اعجابكم
وحسن ظنكككم...â‌¤â‌¤

.
.
.

روايه
ابكتبك في مساء العاشقين اني في هواك لمن المغرمين😴💕

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 25-08-2015, 03:29 AM
دلعي يكفيني دلعي يكفيني غير متصل
©؛°¨غرامي مشارك¨°؛©
 
الافتراضي رد: روايه ابكتبك في مساء العاشقين،اني في هواك لمن المغرمين


-البآارت الآول:
....:ووينكك يارياال!!
......:انا عند الكورنيش.ماشفت سيارتك!!انته وين مبركن!!
.....:اخر سياره .انت امشى وبتشوفني
حميد يتلفت ع السيارات:اهاا.زين احينه بوصل
عبدالعزيز بعصبيه:يلااا ترا مليت من الانتظار
حميد:شفتكك.احينه بنزل لك.يلاا باي
صكر عبدالعزيز الفون بدون لا يرد ع حميد
بركن حميد سيارته حذال سياره عبدالعزيز
نزل له وراح يسلم عليه
عبدالعزيز:ساعه سااااعه لين م توصل
حميد بضحكه:ههههههههههه والله م كنت بتاخر.بس صارت معي سالفه
طنشه عبدالعزيز وقعد ع الكرسي المجابل البحر
قعد حذاله حميد وضربه ع كتفه:اعوذ بالله.م تبغى تعرف شو صار معي!!
عبدالعزيز ببرود:اككيد سخافه
حميد بابتسامه:لاا والله..صدمت شايب بالغلط
التفت له عبدالعزيز وعلامه التعجب ع راسه
عبدالعزيز:تتكلم جد!!
حميد ياشر بايده:هيه والله بس عادي.الحمدالله ع اخر لحظه مسكت البريك
عبدالعزيز:وانا كم مره قايل لك انتبه لما بتسوق!!
حميد ابتسم لعبدالعزيز وقال:شسوي كنت اكلم الحححب
هز عبدالعزيز راسه
والتفت ناحيه البحر
تنهد حميد وقال:قوم قوم خلنا نتعشى.تراني حدي يوعان
عبدالعزيز:قوم.انا من ساعه انتظرك
قامو وركبو سياره حميد
وحركو ع المطعم
،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،
منسدحه ع سريرها وبالها ابد مب اوياهاا
تفكيرها طاير لبعيييييييد
نقزها صوت الباب
...:مهره قومي بنتعشى
مهره:مب مشتهيه.م ابغي عشا
ملاك:شفيج.شكلج متضايقه!شصاير!!
مهره:حححميد
ملاك بملل:بلاه حميد بعد!!
مهره:كان يرمسني وفجاءه انقطع الخط.احاول ادق فيه لكن فونه مغلق
ملاك تمسك ايد مهره وتسحبها:فاضيه انتي.قومي قومي بنتعشا.تعرفينها يدوه.م ترضى تاكل شي بدونج
مهره بضيجه:اووف ززززين بلاج تسحبين جي
دخلو الصاله وقعدو يتعشو
ام سعيد:مهروه وينج كل هالوقت.العشاء برد
مهره:اميه ماعبالي العشاء محطوط
العيوز^ام محمد^:يلا بسم الله
شافت نظرات اخوانها سعيد واحمد
ملاك تساسرها:احمدوه وسعيد معصبين منج.يبغون يطلعون اويا ربعهم بس يدوه حلفت ماحد يتعشا اللين م انتي تنزلين
مهره بنفس الهمس:فديتها يدوه مسويه لي هيبه جدام اخواني
ملاك:تعشي تعشي لا يصفعونج احمدوه وسعيد
مدت ايدها للعشاء وبدت تتعشى
،
،
،
،
،
بعد العشاء
قاعدين فالصاله
ملاك
ومهره
ويدتهم ام محمد
وامهم ام سعيد
ادخلت فطومه اصغر وحده بالبيت
وقعدت فحظن مهره
فطومه:مهااااري عطيني فونج ابغي العب
مسكت مهره فونها عدل وقالت لفطومه:فطومه انا كككم مره قايله لج اذا تبغين تلعبين عندج ايبادج.انا فوني مب لعبه عشان تلعبين به
فطومه تطالع ملاك بغيض:هالسخيفه كسرت ايبادي
ملاك بطوله لسان:مهروه هاي اذا ما صكرت حلجها والله بقوم اصفعها.بروحها كاسره شاشه ايبادها وتتهمني انا
فطومه:هيييييه انتي اللي كاسرتنه
ام سعيد:فطومه انا بقول لابوج يشتري لج ايباد يديد.لا تتناجرين اويا هالملسونه ملاك
ملاك:هيه خلج بعيد عني.شرات ماقالت لج اميه
فطومه تطالع مهره:مهاااري زين عطيني فونج بلعب.اللين م يشتري لي ابويه ايباد يديد
مهره باصرار:لااااااا
يدوه:فديتج مهره عطيها بتلعب خمس دقايق عشان خاطري
مهره:يدوه انتي ع عيني وع راسي .بس فطومه اذا عطيتها فوني بتفرمته لي .م اقدر اعطيها
نزلت فطومه من حظن مهره
وراحت تقعد فحظن امها تصيح
فطومه:احينه ابغي ايبااااااد
ام سعيد:من وين ايب لج احينه ايباااد
فطومه:مااالي دخخخل.احينه ابغي ايبااااد يديد
مسكت ام سعيد الفون واتصلت لسعيد
ام سعيد:انته وين طلعت من عقب العشا!!اختفيت انته واخوك!!
سعيد:هنيه قاعد اويا الربع.ياربي اميه شو هالصوت اللي اوياج؟
ام سعيد:هاي فطومه تصيح
سعيد:بلاها؟
ام سعيد:ملاك اكسرت ايبادها.واحين تصيح تبغي ايباد يديد.
سعيد:قبل لا ارجع البيت باخذ لها ايباد.وقولي لملاك من ارجع البيت بتحصل كف ع ويهاا.ليش تكسر ايباد هالياهل
ام سعيد:يبالهاا هالملسونه نعم.زين فديتك لا تتاخر
سعيد:ان شاءالله الغاليه
ام سعيد:الله يحفظك
صكرت عنه وقعدت تمسح ع شعر فطومه
ام سعيد:لا تصيحين.سعيد قالي قبل لا يرجع البيت بياخذ لج ايباد يديد
فطومه تمسح دموعها:احلفي!!
ام سعيد :وقال بيضرب ملاك لانها كسرت ايبادج
انرسمت ابتسامه كبيره ع شفايف فطومه
قالت:ايوا يضربها يضربها
ملاك بخوف:امممممميه!!والله مب انا كسرته قسم بالله.هاي السخيفه تتبلا علي.احينه انا شو يفكني من ايد سعود الكريهه
يدوه:انتي دواج.تستاهلين الضرب
عظت ملاك ع شفايفها بقهر
وراحت ع غرفتهاا
مهره شافت حميد راسل لها
استاذنت عنهم
وراحت اهيه الثانيه ع غرفتهاا
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
عايله بو سعيد:
-بو سعيد^محمد^:ظابط فالشرطه.
-ام سعيد:اهم شي فحياتها عايلتهاا.
-يدوه^ام محمد^:حنونه ع احفادها.طيبه حيل.حفيدتها المفضله مهره
-سعيد:26 سنه،متخرج من الجامعه عنده بكالريوس فالبزنز.يشتغل فشركه
-احمد:23 سنه،يدرس فالجامعه
-مهره:20 سنه،تدرس فنفس الجامعه اللي يدرس فيها احمد.
-ملاك:18 سنه،ثانويه عامه
-عبدالله:14 سنه
-فطومه:6 سنوات.دلوعه البيت
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
خلصو عشاء ورجعو ع الكورنيش
نزل عبدالعزيز ع سيارته
حرك حميد راجع للبيت
انتبه ع فونه انه مافيه جرج
من بعد الحادث اللي صار اويا الشايب واهوا نسى امر الفون تماما
وصل البيت
دخل ع طول على غرفته
وصل فونه بالشحن
ودخل ياخذ له شور
من بعد خمس دقايق
طلع من الحمام
تعطر واخذ فونه
انسدح ع السرير
ودق لهاا على الواتس آب
حميد:مهااري!!
حميد:سوري الفون فضى من الشحن.
حميد:احينه رجعت البيت ووصلته بالشحن
لما انتبهت مهره على المسجات
استاذنت من عند اهلهاا
وادخلت غرفتهاا
قعدت ع الكنبه وكتبت له
مهره:لا والله!!!!!
مهره:وانا قاعده ع اعصابي احاتيك وانت بكل برود تقولي فضى فونك من الشحن!!
مهره:وين كنت!
حميد:والله سوري ماكان قصدي اخليج تحاتيني.بس شسوي ماعندي شاحن بالسياره
حميد:طلعت اتعشى اويا عزوز
مهره:اهاا
حميد:اتصل لج احينه ولا اهلج بعدهم مانامو؟
مهره:لا تتصل.امي ويدوه فالصاله.لما بينامو بقول لك
حميد:عيايز ليش ماينامن!
مهره:حميد جججب
حميد:يابوي اتغشمر اوياج
مهره:غريبه اشوفك اليوم راجع بوقت.الساعه 11.مب من عوايدك ترجع هالوقت.
حميد:الله يسلمج عزوز انتهت اجازته السنويه.ومن باجر بيبدي يداوم
مهره:الحمدالله.ان شاءالله دوم يداوم .عشان م تسهر انت برع البيت للفير
حميد:ههههههههه هذا اللي يهمج انتي
مهره:رفيجك وداوم.وانت مته بتعتمد ع نفسك وبتدور لك ع وظيفه!!
حميد:الله يعلم
مهره:حميد تراني اتكلم جد..انت م تستحى ع ويهك اما ابوك يعطيك مصروفك!!
حميد:انتي م تستحي ع ويهج لما ابوج يعطيج مصروفج!!
مهره:انا غييييييير.افهم انا بنت وابوي ملزوم يصرف علي.لكن انت ريال المفروض خلاص تعتمد ع نفسك
حميد:زين لا تلوعين بجبدي بموالج ها اللي م يخلص
مهره:انت طول عمرك بتظل جيه بطالي لا شغله ولا مشغله
حميد:مرتاح جيه
مهره:لا والله!!انت تتوقع لو خطبتني اهلي بيرضو يزوجوني واحد م يشتغل!!!؟مستحيل ابوي يرضى
حميد:زين يصير خير لهذاك الوقت
مهره:ححححميد بنام.انت الكلام اوياك ينرفزني
حميد:وين تنامين بعدها الساعه 11
مهره:باجر اوياي جامعه مب شراتك بطاليه لا شغله ولا مشغله
حميد:نامي نامي.صايره م تنطاقين
مهره:تصبح ع خير
حميد:وانتي بخير حبيبي
تنهدت بضيجه من كلامه
هذا حميد
مستحيل يتغير
من يومه جي
مع انه عمره احينه 26 سنه
بس مب راضي يدور له ع وظيفه ويشتغل شرات باجي الناس
فرت فونها ع السرير
فتحت دولابهاا
اخذت لهاا عبايتهاا وشيلتهاا
فتحت باب غرفتهاا
وقفت بالصاله
قالت لامها:اميه وين لكشمي!
ام سعيد:فغرفتهاا تكوي الملابس
مهره هزت راسهاا
ام سعيد:شوه تبغينهاا!
مدت مهره عبايتها وشيلتها جدام امها:ابغيه تكوي لي ملابسي لدوام باجر
ام سعيد:روحي لها قبل لا تنام
مشت مهره وفتحت باب غرفه لكشمي
قالت لها:لكشمي اخذي اكوي لي ملابسي لباجر.
لكشمي:مايقدر
مهره:لا ولله!!
لكشمي:روح روح.انا مايقدر يكوي ملابس زياده
مهره:حبيبتي لكشمي انتي حياتي.اكوي لي ملابسي دخيلج.وباجر بشتري لج رصيد عشان تكلمين اهلج
لكشمي:جين جين.بس مافي نسيان
مهره:اوف منج ززززين.بس تكوينها لي عدل مب اي كلام
لكشمي:جييين يلا اطلع برا
طلعت برا الغرفه
قبل لا تدخل غرفتها
سمعت احمد يناديهاا
احمد:مهور
مهره تكتفت:خير
احمد:تعالي ابغيج شوي
مشى لغرفته ومشت اوياه
قعد ع السرير
شافت الملازم ع السرير
احمد:مهور حياتي انتي
قعدت حذاله ع السرير:خلصني شتبغى.تعبانه ابغي انام
احمد:عندي باجر كويز وابغيج تفهميني هالقواعد
فتح الملزمه واشر ع الصفحه
احمد:هالقاعده مب فاهم فيها شي ابد
مهره طالعت القاعده وعقبها طالعت احمد
مهره:مالت عليكككك.مافي اسهل من هالقاعده.
احمد:انزين فهميني
مهره:انت ما مليت من كثر ماتعيد هالماده!!
احمد:شسوي والله هالماده صعبه
بدت تشرح له القواعد
لانه احمد كان يرسب ف اغلب المواد
احين اهوا ومهره فنفس الكلاسات ف بعض المواد
احمد:اهااا.والله هاي الدكتوره غبيه.تصعب الامور مدري ليش.
مهره:بلعكس اهيه تشرح عدل انت اللي ماتنتبه لها.
قالت بطنازه:انت من تدخل المحاضره وبااك يطير اويا الحبايب
احمد:مهروه شرحي وانتي ساكته لا اصفعج احين
طالعته بغيض وقالت له:وبعدين تعاااال.انت اليوم ليششش تاشر لي جدام ربعك!!لو قلت لسعيد عن سوالفك بيذبحك
احمد يحك شعره:خل عنج لا تقولين لسعوود.مافيني يفتح لي محاضراته.وبعدين انا م اشرت لج جدام احد غريب.ها ربعي اويانا فالكلاس ويعرفون انج اختي.يعني عادي انتي لا تتحسسين وايد
مهره:والله اذا عدت هالحركه بقول لسعيد.وبعد بقوله عن سوالفك اويا بنت العم
احمد:عيل دوري لج حد غيري يوصلج كل يوم للجامعه
مهره:غصبن عنك بتوصلني.جدولنا نفس الشي.مع منو تبغاني اروح!!
احمد انسدح ع السرير وقال:حبيبتي مهور
مهره طالعته بنص عين
احمد:قولي لعواشه بنت عمي باجر نحن بنمر عليهاا.دخيلج مهور
قامت مهره وقفت حذال باب الغرفه وقالت له:انا لازم اوصل سوالفك لسعيد
صكرت الباب ودخلت غرفتهاا
انسدحت ع السرير بتعب
وع طول نامت
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
الساعه خمس الفجر


كانت فسابع نومه
ازعجها صوت الفون
مدت ايدها تحت الوساده
اخذت الفون
ردت ع الاتصال
قالت بغيض:خخخخخخخخير
حميد:ههههههههههههههه قومي قومي صحصحي
مهره طالعت ساعه الفون
فركت عيونها بكسل
رجعت الفون ع اذنها وقالت:ححميد انت شفت جم الساعه قبل لا تتصل!!
حميد:هيه الساعه خمس و13 دقيقه
مهره:شو تبا؟!
حميد:قومي انا احينه راجع من المسيد.قومي صلي وعقبها تجهزي للجامعه
مهره:مب من احينه بعده وقت عن الجامعه
حميد:مته بتبدي محاضراتج؟!!
مهره:اول محاضره الساعه عشر
حميد:زين قومي صلي
مهره تتثاوب:احينه بقوم
حميد:عقب م تصلين.رسلي لي مسج.مشتاق لج.امس ما اتصلت لج
مهره:زين.بخليك احينه
حميد:اوكي
صكرت عنه
قعدت ع السرير تطالع الغرفه
تعبانه تبغي تناام
تنهدت وقامت تتوضا
صلت صلاه الفجر
وطلعت برا غرفتهاا
فتحت باب غرفه احمد بدفاشه
مهره:احمدوه قووووم صلى الفجر
قعدت تهزه الين ما قام
احمد بغيض:ياحيوانه طلعي.اخر مره اخلي باب غرفتي مب مقفول
مهره:قوم قوم صلى
تنهد بعصبيه وقال:قبل شويه راجع من المسيد مصلي.كم مره محذرنج لا تدخلين غرفتي وانا نايم
مهره تضحك:شدراني عنك.مب من عوايدك تصلى فالمسيد
انسدح ع السرير وقالها:الساعه 9 دقي علي الباب عشان اقوم
مهره:ههههههههههههههه بطرش لك يدوه.اعرفك اذا نمت مستحيل تقوم
احمد:برا برا
طلعت برا غرفته
وقفت حذال غرفه سعيد
ودقت الباب بشويش
فتحت باب الغرفه وقالت :سعيد
فتحت النور بس ماشافته
صكرت الباب وطلعت
اكيد بعده فالمسيد
شافت امها ويدتها قاعدات بالصاله
مهره:صباح الخير
باست راسهن وقعدت حذال يدتها
مهره:يدوه عبود نايم ولا قام يصلي الفجر!!
يدوه:صلى الفير ورجع ينام
ام سعيد:عبود عنده يدتج كيف م بيقوم يصلي
مهره:وملاك وفطومه!
ام سعيد:لكشمي رايحه تصحيهن بس ماشي فايده
مهره:فطومه صحوها من احين عشان المدرسه.عشان م تقول شرات امس ماحد صحاني
يدوه:بتروح المدرسه غصبن عنهاا.مدام هالعصا موجوده
ضحكت عليها مهره:فديتج يدوه.
ام سعيد:عيل انتي اليوم مته دوامج
مهره:الساعه عشر
قامت واقفه:بروح انام
طالعت يدتها وقالت:يدوه ع الساعه 9 روحي لاحمد بعصاج عشان يقوم
ضحكت يدتها
دخلت غرفتهاا وانسدحت ع السرير بكسل
غمضت عينها
لكنها فزت لما سمعت صوت فونها
عضت ع شفايفهاا
كيف نست حميد
مدت ايدها للفون وردت عليه
حميد بعصبيه:كل هذا صلاه!!!!!
ضحكت عليه:ههههههههههههههه سوري والله نسيتك.رحت اصحي اخواني لصلاه
حميد:مالت عليججج.
مهره:تريقت!!
حميد:لا بعدني
مهره:اسمع صوت سياره.شوه لا يكون طالع بهالوقت!!
حميد:هيه رايح لعزوز
مهره:عزوز هالوقت!! شو تسوى!
حميد:امس قبل لا ارقد رسل لي انه سيارته تعطلت.ويبغي سيارتي عشان يداوم.عاد احينه بعطيه سيارتي
مهره:وهالعبدالعزيز ماعنده اخوان ياخذ سياره من عندهم!
حميد:عنده.انا وياه متفاهمين.انتي شدخلج!!
مهره:صح انا شدخلني.باي بنام
حميد:وين وين!اعوذ بالله اتغشمر اوياج
سكتت عنه م ردت عليه
حميد:عزوز شرات اخوي.من كنا صغاار.يعني ماشي يغلى عليه.لو انا محتاج سيارته.اهوا اكيد بيعطيني سيارته
مهره:شدخلني فيكم
حميد:ههههههههههههه اونج يعني انتي احينه زعلانه!!
مهره:لا مب زعلانه.انا يوعانه.
حميد:فديتج يوعانه وماتقولين لي.احينه بمر ع مطعم اخذ لج احلى ريوق
مهره:لاااه!!
حميد:هيه بعطيه شغالتكم
مهره:خل عنك.احينه لكشمي بتجهز الريوق وبروح اكل
حميد تنهد:وصلت عند عزوز خليج ع الخط
مهره:زين لا تتاخر اوياه وتنساني
حميد:انسى عزوز والسياره بس مستحيل انساج
مهره:هههههههههه زين
اتصل لعبدالعزيز من فونه الثاني
وقاله انه واقف حذال بيتهم
طلع له
حميد:يلاا وصلني البيت
عبدالعزيز بمزاح :رووح توكل ع الله.اخذ لك تاكسي
حميد:طوف طوف وصلني
عبدالعزيز:بتتريق انزين!
حميد:لاااا م ابغي مشكور
ركب عبدالعزيز السياره
وركب حميد حذاله
عبدالعزيز يتنهد:والله انت مرتاح.لا شغله ولا مشغله تنام ع راحتك
حميد اشر لعبدالعزيز يسكت
عبدالعزيز بشويش:بلاك!!
حميد ياشر ع الفون
سمع حميد مهره تقوله:مالت عليه بدل لا يشجعك
ضحك حميد بقوه
تنرفز عبدالعزيز وقال:بلاكككك تضحك!!
حميد طالع عبدالعزيز وابتسم:اونه يقولون مالت عليك بدل لا تشجعني
مهره ع الخط:حممممميد الله ياخذ بليسك شو هالكلام
ابتسم عبدالعزيز
وسحب السماعات من اذن حميد
عبدالعزيز:تكلمت الين م انبح صوتي.بس حميد ما منه فايده.هذا بطالي وبيظل طول عمره جيه
مهره انصدمت من الحركه
عبدالعزيز طالع حميد وابتسم كمل:ابوي ها يلعب عليج.روحي رقدي.لا بيتزوجج ولا يحبج.يقضي اوياج وقت الين م يحصل وحده ثانيه وبعدين بيكنسلج
سحب حميد السماعات بغيض
قال لمهره:لا تسمعين كلام هالسخيف.
طالع عبدالعزيز بلوم
صكرت مهره ع طول الخط
لما قالها عبدالعزيز هالكلام
بلعت ريجها
تخاف اللي انقال لها صج
بس لا مستحيل!!حميد يحبهاا حححيل
مستحيل يكون يلعب عليها شرات باجي الشباب
انسدحت ع السرير
.
.
.حميد بغضب:ليش قلت جيه
عبدالعزيز يضحك:خلها تستاهل عيل ليش تقول عني جيه!!
حميد بقهرر :اووف احينه هالخبله بتصدق كلامك وبتزعل
عبدالعزيز وقف حذال بيت حميد:انزل انزل.ابغي الحق ع دوامي
نزل حميد معصب من حركه عبدالعزيز
دخل غرفته واتصل لها
مره
مرتين
ثلاث
بس ماشي فايده
مب راضيه ترد عليه
زفر بعصبيه
رسل لها:مهره ردي علي.ترا عزوز يسوي اوياج سوالف.ماله داعي تعصبين وتزعلين

حميد:مهوورر ردي علي.يعني تعرفيني اني احبج.انتي مب واثقه من حبي لج ولا شوه!!

حميد:بتصل لج وردي
تنهد بقوه واتصل لهاا
مهره بحده:خخخير!
حميد:شو هالاسلوب!!انا مب اصغر عيالج عشان تنافخين علي جيه
مهره:لا والله!!عيل كيف تبغاني اكلمك!
حميد:مهوووور لا تصيرين سخيفه وتصدقين اي كلام ينقال.قلت لج عزوز يتغشمر اوياج
مهره:شو يثبت لي انه كلام رفيجك مزاح!!
حميد:مهور وبعدين يعني!!
مهره:...........
حميد:مهور باي بروحي معصب م ابغي اعصب زياده من اسلوبج
صكر عنها الفون وفره ع السرير
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 25-08-2015, 05:49 AM
دلعي يكفيني دلعي يكفيني غير متصل
©؛°¨غرامي مشارك¨°؛©
 
الافتراضي رد: روايه ابكتبك في مساء العاشقين،اني في هواك لمن المغرمين


شرايكم بالبدايه؟!
وشنو تتوقعون بيصير؟؟؟

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 25-08-2015, 04:15 PM
ركاام احزان ركاام احزان غير متصل
©؛°¨غرامي جديد¨°؛©
 
الافتراضي رد: روايه ابكتبك في مساء العاشقين،اني في هواك لمن المغرمين


السلام عليكم بداية موفقة و القصة روعة و القائك اروع
واصلي فيها و متحمسة للبارت الجاي
دمتي بود

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 27-08-2015, 02:04 AM
دلعي يكفيني دلعي يكفيني غير متصل
©؛°¨غرامي مشارك¨°؛©
 
الافتراضي رد: روايه أبكتبك في مساء العاشقين إني في هواك لمن المغرمين/بقلمي


-آلبآارت آلثاآني:
الساعه 9 و33 صباحا..
حرك احمد ع الجامعه
مهره:احمدووه شكلنا بنتاخر فالزحمه
احمد:لا تخافين ما بنتاخر.تصدقين مهور.راسي يعورني
طالعته بنص عين وقالت له:اححححمدوه..مستححيل
احمد:بمر ع كوفي شوب اخذي لي كووفي يعدل لي مزاجي
مهره:قلت لك مستحححيل.بروحنا متاخرين.
احمد:يوه مهور لا تصيرين عنيده.بعد باخذ لج ريوق ع حسابي
مهره:الحمدالله.متريقه فالبيت.والله ي احمدوه اذا مريت تاخذ لك بتصل ف ابوي وبقوله احمدوه مايبغي يحضر اول محاضره
احمد بقهر:زين زين اويا هالويه
ابتسمت بانتصار
رن فون احمد
طالعها بنص عين
مهره:اعوذ بالله.بلاك تطالعني جيه!
سكت عنها ورد ع الفون
ومازالت نظراته ع مهره
احمد:هلاا حميد
بلعت ريجهاا لما نطق هالاسم
التفتت ناحيه الشارع ع اساس انها مب مهتمه
..
احمد:بخير الحمدالله،انته شحالك!!
..
احمد:اليوم مب مشغوول
..
احمد:من ارجع من الجامعه بعطيك خبر
..
احمد:ان شاءالله
اشتغل الوسواس فعقلها
شو يبغي حميد من احمد!!
غريبه
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
من بعد اول محاضره
قعدت مهره وعايشه بنت عمهاا
فالساحه الخلفيه للجامعه ع الكراسي
مهره تطالع نظرات عايشه بنت عمهاا
كانت تطالع احمد قاعد اويا ربعه بس بعيد عنهم
مهره:مالت عليج عواش..شو تحبين فيه!!
ارتبكت عايشه وقالت لمهره:منو تقصدين
اشرت مهره ع احمد:احمدووه
ابتسمت عايشه وقالت بخجل:مهور عااد
مهره:جد جد عواش انصحج نصيحه.احمدوه بغيض وكريهه
طالعته عايشه وقالت:مهور انتي البغيضه
مهره:مالت عليج وعليه.صدق انه الطيور ع اشكالها تقع
سكتت عنها عايشه
بعد فتره شافت عايشه بنتين يتجدمن منهم
عايشه بهمس:مهور تعرفينهن هالبنتين!!
مهره بنفس الهمس:هيه.الطويله حمده اخت حميد.والثانيه بنت خالتها
عايشه:اهاا
وقفن حذالهم وسلمو عليهن
حمده بابتسامه تقعد ع الكرسي:شحالج مهور!!
مهره:بخخير الله يسلمج.شحالج انتي!!
حمده:الحمدالله بخير
التفتت مهره ع البنت الثانيه وقالت:مريم شحالج!
هزت راسها :بخير
قعدو يسولفو خمس دقايق وبعدين استاذنن
عايشه:وويع مهوور.بلاهاا هاي اللي اسمها مريم!
مهره :شفيهاا!!
عايشه:انتي شفتي نظراتها لج ككيف!!حسيتهاا تكرهج من هالنظرات
مهره:عيل انا م انتبهت
عايشه:كيف بتنتبهين وانتي حذالج اخت الحبيب!!
مهره:قوومي قومي.شوفي كيف امتلى المكان بالشباب
عايشه:مهور خلينا قااعدين
مهره طالعتهاا بنظره
ع طول قامت اوياها
اخذو اغراضهم
وراحو
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
عقب صلاه العصر
مر عبدالعزيز ع حميد وطلعو يتمشون
بالسياره
عبدالعزيز:اوووي حميد بلااك.من ركبت وانت مضايج
تنهد حميد وقال:كله منك.م ترد علي
عبدالعزيز:والله انك فاضي.خلهاا تولي.هاي سخيفه تصدق اي كلام
حميد:مب راضيه ترد علي ابد..من الصبح وانا احاول فيهاا لكنهاا عنيده
عبدالعزيز:واحين كيف بتتصرف!
حميد رفع كتفه:مادري
عبدالعزيز سكت فتره وعقب تفكير قاله:عطني رقمها.انا بتصرف
طالعه حميد
عبدالعزيز:لا تطالعني جيه.انا غلطت من البدايه لما قلت لها جيه.بدق وبعتذر لها.هاه شرايك!!
حميد تقبل الفكره:قول لها ترى حميد يحبج ومن هالكلام.واذا سئلتك من وين اخذت رقمي قول لهاا من فون حميد بدون لا يدري.قولهاا لا تقولين لحميد اني دقيت عليج
عبدالعزيز:ههههههههه ياربي كيف مجهز الكذب
حميد:لازم نسلك لاه.خذ ها رقمهاا
وقف عبدالعزيز السياره ونزل اهوا وحميد.وقفو حذال السياره
سماعه ف اذن حميد والثانيه ف اذن عبدالعزيز
.
.
.
كانت قاعده بغرفتهاا
مصليه العصر وقاعده تطالع التلفزيون
رن فونهاا
عبالها حميد
م اهتمت
رجع يرن مره ثانيه
استغربت من الرقم الغريب
حميد محذرنها الف مره ماترد ع ارقام غريبه
لكن عناد فحميد بترد
عبدالعزيز:الو السلام عليكم
مهره استغربت الصوت بس قالت يمكن غلطان
مهره:عليكم السلام..منو؟
عبدالعزيز:انا عبدالعزيز اربيع حميد
استغربت ححيل
هاشو يبغي متصل
مهره:عبدالعزيز!!!!من وين اخذت رقمي؟
عبدالعزيز:من فون حميد بدون لا يدري
مهره:بغيت شي؟؟
عبدالعزيز:هيه بغيت اعتذر لج عن الكلام اللي قلته لج اليوم الصبح.ترا كنت امزح
حست انه السالفه لعبه
مستحيل حميد فونه دايم مقفول
مسوي له رمز
دايم يقولها فونه مستحيل يقدر يعطيه احد يفتحه.لانه فيه خصوصياته
مهره:حميد قالك اني زعلانه؟
عبدالعزيز:لااا.اصلا حميد مايدري اني اخذت رقمج ودقيت لج.حسيته متضايج وحبيت اصلح غلطتي السخيفه
مهره:انا ادري انه حميد عطاك الرقم وادري انه حميد احينه قاعد يسمع المكالمه.حححميد ماله داعي هالحركات انته مب ياهل.
صكرت الفون بغيض
كيف يعطي ربيعه رقمها!!
حتى لو كان اخوه!!
حميد غلط واغلاطه كل يوم تثبت لهاا انه يلعب عليها
تنهدت بضيجه وقامت ع غرفه ملاك اختهاا
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،
عبدالعزيز:اعوذ بالله.هاي كيف عرفت!!
حميد :مادري
عبدالعزيز:خلهاا تولي.قوم خلنا نروح نستانس.وانساهاا.اتركها اسبوع وبتشوف كيف بترجع لك تصيح
حميد:م اظن والله.هالبنت عنيده.مستحيل ترضى بهالسهوله
،،،،،،،،،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،،،،،،،،
بالصاله
ملاك:مهور قوومي خلينا نروح بيت عمي.
مهره:لااا مالي خلق اروح
ملاك:مهووووور بليييز والله اني مليت من جو البيت
مهره:انزين منو بيروح اويانا؟!
ملاك:عبووود
مهره:م اظن بيروح.تعرفينهاا يدوه احين وقت رقادهاا
ملاك تقوم:قومي بنروح.خل عنج هالكلام
قامت اوياهاا مهره بكسل
ملاك:انتي روحي قولي لامي انه بنروح.وانا بروح انادي عبدالله عشان يروح اويانا
مهره:زين
توجهت ملاك لغرفه يدتهاا
لانه عبدالله ينام اويا يدته.من كان صغير واهوا ينام اوياهاا
فتحت الباب
شافت يدتهاا نايمه وعبدالله قاعد ع الارض يلعب بليستيشن
ملاك بهمس:عبووود
التفت لها عبدالله
ملاك اشرت له بايدها:تعال شوي
فر يد البليستيشن واتجهه لملاك
طلعو برا الغرفه
عبدالله:خير شتبغين؟!
ملاك:عبود انا ومهور نبغي نروح بيت عمي.بس مايصير نروح بروحنا فهالوقت.مهوور تقولك امش وصلناا
عبدالله:عندج فلوس!!
تخصرت ملاك:نعم نعم!!ليش ان شاءالله؟
عبدالله:مابوصلكم جي.عطيني فلوس بمر ع البقاله وبقعد انتظركم هناك.لما بتخلصون دقو لي
ملاك:روح قول لابوي يعطيك فلوس
عبدالله:لااااااااا ابغي من عندج انتي ومهور
ملاك تتنهد:زين امش.بقول لمهور تعطيك
.
.
.
دخلت مهره غرفه امهاا
مهره تتلفت بالغرفه:اممممميه..امييييه وينج
دخلت امهاا الغرفه:ها مهره بغيتي شي!!
مهره:هيه.انا وملاك نبغي نروح بيت عمي.عادي نروح!!
دخل بو سعيد الغرفه
باست مهره راسه
بو سعيد:مهره!!اشوفج اويانا بالغرفه.بغيتي شي
طالعت مهره امها عشان تتكلم
تدخلت ام سعيد وقالت:مهره وملاك يبغون يروحون بيت عمهم
بو سعيد:انتي شفتي الساعه احين كم!!
ام سعيد:الساعه تسع تو الناس.خلهم يروحون اويا بنات عمهم.هذوه البيت جريب
بو سعيد يطالع مهره ويتكلم بحزم:ماتتاخرون.قبل لا تروحون خلو واحد من اخوانكم يوصلكم
مهره تكلمت:عبدالله بيروح اويانا
بوسعيد:زين
طلعت مهره من الغرفه وراحت ع الصاله
شافت عبدالله وملاك ينتظرونهاا
مهره:يلا خلونا نروح
ملاك:مهوور
مهره:شفيج!!يلا امشي
ملاك:اممممم عبود يبغي من عندج فلوس عشان يروح اويتما
تخصرت مهره وقالت لها:لا والله...وليش انتي ماتعطينه!!انتي تبغين تروحين بيت عمي.
ملاك:ماعندي فلوس
عبدالله:يلا خلصوني عطوني فلوس.ولا ترا مابروح اوياكم
طالعته مهره بنص عين وقالت له:اوووف زززززين ززين اصبر
دخلت غرفتهاا واخذت من جنطتها فلوس
لما طلعت شافت فطومه واقفه اوياهم
عطت عبدالله الفلوس
طالعت فطومه وتخصرت:خخخخير خخخخير!!انتي وين تبين بعد!!
فطومه ببرائه:بروح اوياكم
ملاك:مهور خليهاا.لو ماراحت اويانا بتقعد تصيح.بعدين ابوي بيحرمنا من الروحه
مهره بعصبيه:اووووووووووف امشو خلصوني لا ارتكب فيكم جريمه
مشو باتجاه بيت عمهم اللي كان يبعد عنهم مسافه مب بعيده وايد
اشر لهم عبدالله:مهور انا بروح البقاله.من تخلصين دقي لي
مهره:اوكك.انتبه ع فونك لا تخلانا ننتظرك وايد
عبدالله:ان شاءالله
قبل لا يدخلون البيت
تجدمت ملاك من مهره وهمست ف اذنها:مهوور
مهره:بلاجج!
ملاك تاشر ع سياره:شوفي هالسياره.كانت واقفه حذال بيتنا.ولما مشينا ظلت تتبعنا
التفتت مهره ع السياره
فجاءتها فطومه لما قالت:انا اصلا هالسياره اشوفها دوم واقفه حذال بيتنا
طالعت مهره بخبث وقالت:مهور ش سالفه هالسياره!!
عصبت عليهاا مهره
استغربت من افكارها
معقوله تفهم لهالحركات
قالت لها مهره:فطوممممه والله اذا عدتي كلامج بصفعج.عيب عليج تقولين عني جيه
ملاك تمسك فطومه من اذنها:قليله ادب.والله اذا عدتي كلامج اقول لامي
فطومه تتالم بسبب اذنها:ايييييي زين م بقول م بقول اوف
تركتها ملاك ودخلو بيت عمهم
قبل لا تدخل مهره التفتت مره ثانيه ع السياره
هذا ححححميد!!!!!
بس شوه قصده من هالحرككككات!!!!!
دخلو بيت عمهم
كانت عايشه واختهاا عهود قاعدات بالصاله
سلمو عليهم وقعدو
عايشه ومهره يتناقشو ف امور الجامعه
وعهود وملاك يتكلمون ع المدرسه وشصار اوياهم
فطومه كانت بروحها
طلعت عنهم وراحت اويا الشغاله فالمطبخ
فطومه:ميري شحالج!!
الشغاله اول ماشافت فطومه راحت لها وشالتهاا فحظنها:فتومه هبيبي وين انتي!ليش م يجي!!
فطومه:ميري وديني البقاله..لكشمي بغيضه ماترضى تاخذني اوياها البقاله
ميري:يلاا امشي
فطومه:ميري يلاا هاتي العلوم.بعد بشتري لج ع حسابي
فطومه متعوده لما تيي بيت عمها تقعد مع الشغاله
والشغاله تقولهاا عن اخبار بنات عمهاا
رغم صغر سنهاا لكنهاا داهيه بمعنى الكلمه
ميري:هذا عواش مافي زين
فطومه تحمست:ليش!!
ميري:قبل يومين كلو نفر روح برا.عواشه يجي من جامعه بعدين ينام.بعدين انا في شوف عواش مع واحد نفر فالمطبخ.عواشه لما يشوف انا في خوف .بعدين هذا نفر يطلع برا بسرعه
شهقت فطومه وظربت ع صدرها:مسوده الوييييييييه!!ماعرفتي منو هذا الي اوياها!!
ميري:نفر واجد حلو.بس مافي معلوم مين هوا
فطومه تفكر:يالخبله يمكن احمد اخوي
ميري:لااااا.نفر اول مره في شوف انا
فطومه:زين انتي لا تقولين لاحد عن اللي شفتيه
ميري بخوف:لااا انا مافي قول.انا في خوف.حتى انتي لا تقولي لاحد
فطومه:ان شاءالله
دخلو البقاله واخذت فطومه ايسكريم لهاا ولميري
وبعدين رجعوو
ع الباب كانت مهره وملاك وعبدالله ينتظرونهاا
مهره:زين انج رجعتي فطومه خانوم
فطوم:يلااا ميري بنتلاقا مره ثانيه
مشو راجعين للبيت
عبدالله:فطومه انتي شو عاجبنج فهالميري.اشوفج صايره صديقتها الروح بالروح
فطومه:انتو ماتعرفون اللي اعرفه.خلكم ساكتين
مهره كانت تمشي بسرعه ماتبغي فطومه وعبدالله ينتبهون ع سياره حميد
اللي رجعت تلحقهم
دخلو البيت
وع طول راحت مهره ع غرفتهاا
اخذت لهاا شور لما طلعت
لقت فطومه قاعده ع السرير تنتظرها

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 27-08-2015, 02:05 AM
دلعي يكفيني دلعي يكفيني غير متصل
©؛°¨غرامي مشارك¨°؛©
 
الافتراضي رد: روايه أبكتبك في مساء العاشقين إني في هواك لمن المغرمين/بقلمي


هره:فطومه!!روحي نامي.شو تسوين فغرفتي
فطومه تاشر ع السرير:تعالي ابغي اتكلم اوياج شوي
قعدت مهره وقالت لها:خخخير
فطومه تقلد الكبار لما يتكلمون:مهور نحن لازم نقول لسعيد عن السياره اللي تلحقنا
مهور تستغبى:اي سياره!!
فطومه:السياره اللي قالت لج ملاك عنهاا
مهور تنسدح ع السرير:فطومه حبيبتي انتي يااهل.لا تدخلين نفسج فهالسوالف
انسدحت فطومه حذالهاا وقالت :مهوور انا صح اني ياهل.بس والله اني اعرف سوالف.م اظن احد يعرفهاا
حبت مهره تستدرجهاا:وشو تعرفين!!
فطومه:مايصير اقولج.مايصير احد يعرف
مسحت مهره ع شعر فطومه:قولي لي واوعدج انه ماحد يدري
فطومه:احلفي انه ماحد يدري!!
مهره بابتسامه:اوعدج والله ماحد بيدري
فطومه:امممممم بشو ابدي لج
هزت راسهاا مهره من ثقه فطومه
اهيه عارفه انه فطومه بتقعد تتسيخف وتتفلسف ع راسها.بس تبغي ترضي فضولهاا
فطومه:تعرفين انه عواش بنت عمي ابد مب زينه!!
رفعت مهره حاجبهاا وقالت بسخريه:لااه!!شفيهاا عواش
فطومه تهمس لمهره:قبل شويه قالت لي ميري انهاا شافتهاا بالمطبخ اويا واحد
وانا جم مره لما اروح بيتهم اسمعهاا تكلم واحد وتقوله حبيبي وحياتي ماتستحي ع ويهه
فتحت مهره عيونهاا بصدمه من هالكلام الككككككبير حيل
فطومه:تصدقين انا عبالي تكلم احمد اخوي .بس قبل شويه اكدت لي ميري انه مب احمد
بلعت مهره ريجهاا!!معقوله فطومه عقلهاا يفهم هالسوالف.
مسسسسسسسسستحيل
ياهل كيف تقدر تفكر جيه
بس صحيح انهاا داهيه
مهره:وشو تعرفين بعد!!
تنهدت فطومه:شقولج وشو اقول
ضحكت مهره ع اسلوبهاا.
فطومه:هييييييييه تذكرت
مهره:شوه!!
تلفتت فطومه ناحيه الباب وبعدين تقربت من اذن مهره حطت ايدهاا حذال اذنهاا وهمست بشويش:ملاك تحب زيود ولد عمي
دفتهاا مهره وقالت لهاا بصدمه:وانتي شدراج!!
فطومه:الصبح كل يوم قبل لا نروح المدرسه انا وملاك يمر زيوود.وعهود دوم تقول لملاك زيود يسلم عليج
مهره هزت راسهاا بغيض
اهيه تقول لملاك كل شي عن حياتهاا
ليش ملاك تخبي عليهاا
مهره بلعت ريجها وطالعت فطومه:انزين وانا!!شو تعرفين عني؟؟؟
فطومه بابتسامه:انتي الوحيده اللي ماصدتج.بس اكيد مع الايام بصيدج.حتى سعوود عندي سوالفه
مهره تبتسم لفطومه وتمسح ع شعرها:فطومه حبيبتي انتي اذا عرفتي اي شي تعالي وقولي لي.وبعدين انتي المفروض تتركين عنج هالسوالف لانهاا عيب.انتي فهالعمر لازم تلعبين وتفكرين شرات باجي البنات اللي فعمرج.لاتهتمين لفلان شو سوا وفلان شو قال
تنهدت فطومه وقالت:شسوي.م تعجبني حركات اليهاال
مهره:اعوووذ بالله.فطومه حبيبتي عيييييييب
فطومه:ززين زززين.مهور عادي انام اليوم اوياج؟
ابتسمت لهاا مهره:اككككيد.بس لا تتشقلبين وانتي نايمه.تسوين لي حركات بهلاونيه
فطومه :انتظريني خمس دقايق.باخذ لي شور وبلبس بجامه النوم وبيج.
مهره:اوكيه
فهالاثناا دق فونها
حميد يتصل
ترددت ترد او لااا
بس فالنهايه لازم يغلبهاا قلبهاا ع عقلهاا وترد
تحس هالفتره وايد صارت بينهم مشاكل
بعدتهم عن بعض
فالعاده اهيه وياه يتواصلون اربع وعشرين ساعه
ردت عليه وظلت ساكته
حميد:..................... يعني بعدج زعلانه؟؟؟؟؟
مهره تنهدت:حححميد انت فاجاءتني بحركاتك!!م توقعتك تكون جي ياهل
حميد:شسووي غصبن عني..انتي تخليني اتهور بتصرفاتج
مهره:اي تصرفات!!انا شسويت؟؟؟؟
حميد:بسرعه تعصبين.وع طول تزعلين
مهره:منك مب مني
حميد:زين انا آسف
مهره:..............
حميد:مهوور وربي احبججج
حميد:يعني لين مته بتظلين جي زعلانه؟؟؟؟
مهره:لما بتعدل تصرفاتك..
حميد:زين شو اهيه التصرفات اللي تبغيني اعدلهن!!!!
مهره:اووول شي لا تعطى رقمي اي حححححد حتى لو كان اخوك
حميد:ان شاااااااااءالله
مهره:وياريت علاقتنا تظل بيني وبينك..مافي داعي احد يدري.
حميد:تقصدين عبدالعزيز!!ترا عزوز حتى اسمج مايعرفه.كل اللي يعرفه اني احب وحده واتواصل اوياها ع الفون.انا مب غبي اقول لربعي اسراري.حتى لو كان عزوز مستحيل اقوله شي يخصج.صج اني واثق فيه ثقه عميا..بس بعد م ارضى اتكلم عنج جدام اححححد
مهره:اذا جيه اتفقناا
حميد:طاح الحححطب؟
مهره بابتسامه:ططططااح
حميد:بعد قلبي مهووور.اححححبج
مهره:حميد بخليك احينه.فطومه بتنام اوياي اليوم
حميد:مسسسسسستحيل.هالياهل خليها تنام بغرغتهاا.
مهره:عااد انا وعدتهاا انهاا تنام اوياي
حميد:وانااا؟
مهره:شفيك انته؟!
حميد:لا يكون عبالج انا مزهريه!!!!!يوومين وانا مشتاق لج واخر شي تسحبين علي عشان خاطر هالنتفه اختج؟؟؟؟؟؟؟؟
مهره:هههههههههههههههه لا والله مب جي.بس يحليلهاا تبغي تنام اوياي
حميد: زين مهور باااي
مهره:حححححححميد!اترك عنك سوالف الياهل.باجر ان شاءالله بنتواصل
حميد:ان شاءالله قلبي ...تصبحين ع خير
مهره:وانته بخخير حبيبي
صكرت الخط بويهه
تستحي لما تقوله هالكلااماااات
واهوا اذا قالت له جيه يتعمد يحرجهااا
انفتح الباب وادخلت فطومه
فطومه:تاخرت عليج؟!!!
هزت مهره راسها:ابد
فطومه انسدحت حذال مهره:مهور تصبحين ع خير
مهره باستها:وانتي بخير حبيبتي
حطت المنبه ع صلاه الفجر ونامت
.
.
.

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 30-08-2015, 04:20 AM
دلعي يكفيني دلعي يكفيني غير متصل
©؛°¨غرامي مشارك¨°؛©
 
الافتراضي رد: روايه أبكتبك في مساء العاشقين إني في هواك لمن المغرمين/بقلمي


-آلبآارت آلثآلث:
عايله بو زايد
بو زايد
ام زايد
زايد:25 سنه.دكتور اسنان
عايشه:21 سنه تدرس فالجامعه
عهود:18 سنه.ثانويه عامه
محمد:16 سنه.
.
.
.
.
.
عايله حميد
بو حميد
ام حميد
حميد:26 سنه
حمد:23 سنه
حمده:20 سنه
شيخه:15 سنه
.
.
.
.
عايله بو عبدالعزيز
بو عبدالعزيز
ام عبدالعزيز:انسانه سليطه اللسان.تحب تتفاخر بعيالها حيل
عبدالعزيز:27سنه.يشتغل مهندس ف شركه.عنده عزبه وفيها حلال يعشقها حيل.
منصور:25 سنه
امل:24 سنه.متزوجه وعندها بنت اسمهاا شهد
شوق:20 سنه.م تدرس
راشد:19 سنه
نوف:13 سنه
عبدالرحمن:10 سنوات




امل:يلاا عزوز مته بتتزوج
عبدالعزيز يبتسم لاخته:جججريب ان شالله
شوق:عزوز مليناا.كل ما سئلناك مته بتتزوج تقول جريب
امل:هيه والله.احين من سنه كل ما قلنا لك مته بتتزوج قلت جريب
عبدالعزيز:شسوي.البنت اللي ابغيهاا بعدهاا تدرس
ام عبدالعزيز:ومنو هاالبنت اللي تبغاهاا.قول لي وبروح اخطبهاا لك.عادي تزوجوو وانت اكيد بتتركها تكمل دراستهاا
عبدالعزيز:لااا احسن تخلص دراستهاا وبعدين بنخطبهاا.ما اوك نتزوج واهيه بعدها تدرس.م ابغي شي يشغلهاا عني
شوق:عددددااال.خف علينااا انته
ام عبدالعزيز:اذا انت تشوف جيه براحتك.بس حط فبالك اختيارك يكون ع مسئوليتك.انا م ابغي اغصبك وازوجك اي بنت.انا ابغيك انت تختاار البنت اللي تشوف اوياها سعادتك
عبدالعزيز يبتسم لامه:من هالناحيه تطمني.انا عند كلمتي.الا منصور وين!!!
شوق:الله يسلمك منصور دومه نايم
عبدالعزيز يهز راسه:هذا شرات حميد بالظبط.انا تعبت منهم من زود ما اقولهم يدورون لهم عن وظيفه بس ااااابد ماشي فاااااااايده
ام عبدالعزيز:الا حميد شحاله!!
عبدالعزيز:بخخخير الحمدالله
ام عبدالعزيز:سلم عليه هالقاطع.
عبدالعزيز:ان شاءالله.

.
.
.
.
بالصاله
كانو احمد وفطومه وملاك ومهره وعبدالله قاعدين
فطومه بحظن احمد


احمد:فطوم حبيبي بلاج اليوم ساكته.ع غير العاده.ماتتكلمين
فطومه:اصلاا انا زعلانه منك
باسهاا ع راسهاا وقال:افااا.فطومه زعلانه مني!!ليش عاد؟؟؟؟
فطومه:انته كم مره وعدتني تاخذني البحر وماوفيت بوعدك!!
احمد:ههههههههههههههه ياربي يافطومه.انا وعدنج قبل جم اسبوع.شو انتي ماتنسين
فطومه:اصلاا انا كنت نسيانه!!بس الابلا اليوم قالت لنا نروح نجمع اصداف من البحر
ملاك:احمدوه حبيبي بليز خذنا للبححر
احمد:انتي ججججب
فطومه:صح انتي جب.من قالج انج بتروحين اويانا!!
احمد:يلاا فطومه روحي لبسي لج بدله خفيفه تنفع للبحر
فطومه:ثواني واكون جاهزه
ملاك:احمدوه حححرام عليكك.والله خاطري اروح البحر
احمد:شرايج مهور!!
مهره كانت سرحانه فحميد اليوم ابد مادق لهاا.رسلت له الصبح ومارد عليهاا ورسلت له من بعد مارجعت من الجامعه وبعد مارد عليهاا
انتبهت ع كلام احمد قالت له:فشوه!!
احمد:بتروحين اويانا البحر؟
ملاك:والله ظلم قسم بالله ظلم.يعني انا ابغي اروح.شدخل مهور
ضحكت عليها مهره وقالت:هيه بروح ليش لا
نطت عليها ملاك:حبيبت قلبي مهور
ركضت ع غرفتهاا تلبس لهاا عبايه
احمد:اعوذ بالله اختكم هالخبله مدري طالعه ع منوه.مهور يلا روحي لبسي عبايتج بنروح
وقفت مهره وراحت ع غرفتهاا
احمد:عبووووووود
عبدالله:لاااااااااااا مب رايح
احمده بحده:قووم قوووم.لا اهفك بكف
عبدالله يتافف:شو هالحاله ياخي مب غصب اروح.انا احين ابغي اروح العب كوره اويا ربعي
احمد:عبداااااالله
قام عبدالله ع السياره:اووف زين زين.شوه هالحاله هاي
اخذهم احمد ع البحر
واهوا بيروح اويا ربعه
قبل لا ياذن المغرب بيمر ياخذهم

وصى مهره ع فطومه وقالها لا تخليهاا تدخل البحر
عبدالله وملاك لما شافو البحر تخبلوووووو
كل واحد يرش ع الثاني
اما فطومه قعدت تجمع لها اصداف
قعدت مهره ع السيف
بعيد شوي عن البحر
مسكت فونهاا ودقت لحميد
تضايقت لماا حصلت الخط مشغول اوياه انتظاار
اول مره تلقى خطه مشغول
فتح الواتس اب
شافت اخر ظهور له قبل دقايق
رسلت له
مهره:حميد انت اليوم شو سالفتك!!ترى جد تقهر
بعد دقايق رسل لهاا
حميد:هلاا مهوور
حميد:كنت شوي مشغول
حميد:اشتقت لج اليوم ححيل

مهره:لهدرجه مشغول!!يووم كامل ماتسال عني.لو صج اشتقت لي جان بترد علي لما ارسل لك.مب تطنشني
حميد:مهور شسوي.قلت لج اشششغال
مهره:انزين ممكن اعرف شو هالاشغال ؟
حميد:لا مب ممكن!
مهره:ليش عاد!
حميد:لانه هالشي مايخصج
عصبت من وقاحته اوياها بالكلام
مهره:ليش تكلمني جي!!
حميد:مهور انتي اليوم شفيج الا تسالين
مهره:يعني احاتيك من صباح الله خير.ارسل لك وماترد.اتصل لك والقى اوياك انتظاار. واخر شي تكلمني بهالوقاحه؟؟؟؟؟؟؟؟؟
مارد عليهاا
مسحت دمعتهاا اللي طلعت من قهرهاا
شافت ملاك تركض باتجاهه
قامت وجابلتها
ملاك :شفيج مهور؟
تنهدت مهره:مافيني شي.انتي اللي بلاج يايه تركضين!
ملاك:مافيني شي بس شفت شباب.وقلت احسن لي اقعد اوياج.


قعدت مهره مكانها
وسرحت لبعيد
ملاك تهزها:مهووووووور انتي اليوم شسالفتج.!
مهره:شفيني!
ملاك ترفع كتفها:سرحانه.واحسج مضايجه
مهرره تنهدت:حميد
ملاك:شفيه؟؟؟؟؟
مهره:الصبح رسلت له ومارد علي.ولما رجعت من الجامعه رسلت له وبعد مارد علي.واتصلت له ولقيت خطه انتظار.قبل شوي لما رسلت له تفاجاءت برده لي
ملاك:شو رد عليج؟

مدت لملاك الفون:اقري المحادثه
قرت ملاك المحادثه:مهور شو هالاسلوب الخايس اللي يكلمج بيه!
رفعت مهره كتفها :شدراني
ملاك بعصبيه:قسم بالله انه حيوان
مهره سكتت
ملاك:لا تسكتين.دقي له وافهمي منه ليش يعاملج جيه؟
مهره:لاااا خليه.مابدق له ولا برسل له
ملاك:وربي كلامه يقههههر.قومي قومي خلينا نروح نتسلى.لا تخلينه ينكد عليج يومج
مهره:ملاك ووين نروح؟
ملاك:خلينا نروح ناخذ لنا ذره.انا حدي يوعانه
مهره:يلا نروح .حتى انا مشتهيه اكل ذره
راحت ملاك ومهره حذال كشك صغير حذال البحر يبيع ذره وايسكريم وعصاير
لما شافوهم فطومه وعبدالله ركضو اوياهم
طلبو لهم وقعدو ينتظرون العامل الين مايجهز طلبهم
رن فونهاا
التفتت للجهه الثانيه وقالت بشويش:هلااا احمد
احمد:تبغوني احين امر عليكم؟
مهره:هيه تعال.عن ياذن المغرب.
احمد:زين عيل احينه بيي
......:لو سمحت جيب اثنين ايسكريم
صكرت من احمد والتفتت جهه الصوت
بلعت ريجهاا لما شافت حميد واقف جدامهاا اويا وحده متغشيه
يطلبون لهم ايسكريم
انتبهه حميد ع نظرات اللي واقفه حذاله
رفع راسه وانصدمممممممم
طالعهاا بتركيز مب مصصدق
اخر شخص توقعه يشوفه هنيه اهووا مهره
حست مهره باحد يسحبهاا من ايدها
ملاك تهمس لهاا:مهووور هالحيوان اكيد بيرد عليج ب اسلوب خايس مدامه مواعد ع البحر
وقفو بعيد
طالعت ملاك واشرت بايدها تجاه حميد:ملاكككك!!اناا صج شفت حميد اويا وحده ولا انا اتوهم؟؟؟؟؟
ملاك بغيض:الله ياخذه الحيوان.ربي كشفه لج .لا تهتمين ابد
مهره حست بدموعها تجري ع خدها بدون سابق انذار
قعدت ع السيف
قالت لملاك:يمكن اخته
صرخت عليها ملاك:مهووووور!!لا تستفزيني.لو اخته مستحيل تتغشا
شافت عبدالله وفطومه يايين جهتهم
ملاك:مهور مسحي دموعج .م نبغي احد يشك بشي
مسحت مهره دموعها واهيه بعدها مب مستوعبه ولا مصدقه اللي صار
عيونها لا اراديا تلتفت للمكان اللي واقف فيه حميد
عبدالله:انتن شو من البشر
ملاك:بلاك تزاعج!!لايكون نحن اصغر عيالك!!
عبدالله بغيض:ليش لما طلب العامل الفلوس تركتنا ومشيتن.فشلتنا
فطومه تتخصر.قالت بعصبيه:احمدو ربكم واشكروه انه كان معي فلوس .الريال اللي كان واقف حذالنا كان بيدفع عنا بس انا ع طول دفعت
عبدالله بقهر:والله جد فشله.الريال مد ايده لنا بالفلوس.عباله طرارين يدفع لنا
ملاك حبت تستغل وضع مهره وقالت:ليش تكبرون السالفه.ماصار شي.واحينه مهور بتدفع لكم
فطومه مدت ايدها لمهره وقالت:هاااتي هااااتي.انا مب مسئوله ادفع عنكم.
مهره طالعت ملاك بنص عين
فتحت جنطتها وعطت فطومه وعبود فلوس
عبدالله:وصل اححمد
ركبو السياره وتوجهو للبيت
غلقت مهره فونهاا
م تبغي حميد يزعجها ب اتصالاته
مب جاهزه للكلام اوياه ابد
وصلو البيت ع اذان المغرب
صلت صلاه المغرب
وانسدحت ع سريرها تصيح
مافي شي اكبر من الخيانه بنظرها
حميد ذبحهاا
تحبه من كل قلبهاا
اهوا اول حب بحياتهاا
تعرفه من سنتين
ليش بعد ماقضت كل هالفتره اوياه يجازيهاا بالخيانه
كانت متغطيه باللحاف ع ويهه وتصيح من كل قلبهاا
تحاول تكتم شهقتهاا بس م تقدر
تحس انها مجروحه بالحيل
حتى انها ماحست لما انفتح الباب وادخلت يدتهاا
قعدت ع طرف السرير وهزتهاا:مهره..مهره راقده؟
رفعت عنها اللحاف وانصدمت لما شافت مهره تصيح
ودموعها مغرقه ويهه
يدتهاا بخوف:مهره امي شفيج تصيحين!!
ماردت عليهاا
قامت ورمت نفسها بحظن يدتهاا
يدتهاا تمسح ع ظهرهاا:مهره حبيبتي يعورج شي!!
كملت مهره صياحها
كانت امهاا ماره
وشافت باب غرفه مهره مفتوح ادخلت وانصدمت بمنظر بنتهاا
ام سعيد تقعد حذال يدوه:عمووه بلاها مهره؟!
يدوه:دخلت عليهاا ولقيتهاا تصيح
ام سعيد رفعت راس مهره ومسحت دموعهاا:اميه مهره بلاج تصيحين جيه..شي يعورج!!
يدوه طالعت ام سعيد وقالت لهاا:روحي شوفي ابوهاا اذا هنيه.اخذوها ع المستشفى.شو صابها البنت فجاءه
تكلمت مهره بين شهقاتهاا:لااا اميه........مافيني شي
ام سعيد والخوف باين ع ملامح ويهه:كيف مافيج شي وانتي حالتج جي
مهره قامت من حظن يدتها
مسحت دموعهاا وقالت:مافيني شي


تعديل دلعي يكفيني; بتاريخ 30-08-2015 الساعة 04:54 AM.
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 30-08-2015, 04:22 AM
دلعي يكفيني دلعي يكفيني غير متصل
©؛°¨غرامي مشارك¨°؛©
 
الافتراضي رد: روايه أبكتبك في مساء العاشقين إني في هواك لمن المغرمين/بقلمي


يدوه:عيل بلاج تصيحين؟
مهره تحاول تالف كذبه:اليوم كان اويانا اختبار.ولما قعدت قبل شوي اراجع الاجابات اكتشفت انه كل اجاباتي غلط.خايفه ارسب
يدتهاا براحه:خوفتينا عليج.الحمدالله انه مافيج شي..واذا ع سالفه الاختبار لا تهتمين.ترا هو الا اختبار دنيا.. انا بدعي لج فكل صلاه انج تنجحين وتتوفقين فحياتج
طالعتها امهاا
كسرت مهره نظراتهاا للارض
يدوه:انا بقوم اصلي.كأني اسمع صوت اذا العشاء
ام سعيد:هيه عموه اذن
يدوه قامت وراحت ع غرفتهاا
صكرت ام سعيد الباب
ورجعت تقعد ع طرف السرير
ام سعيد بحزم:مهره انا مب ياهل عشان اصدق هالكلمتين.قولي لي بسرعه شفيج!!
بلعت مهره ريجها وطالعت امها:قلت لج ترا عن الاختبار
ام سعيد:مهههههره.تكلمي شفيج!
مهره تنهدت وقالت:انا وعواش بنت عمي متزاعلين..انا ما اروح اويا حد فالجامعه غير مع عواش.مب عارفه باجر كيف اتصرف بدونهاا
ام سعيد بعدم تصديق:وليش متزاعلات انتي وعواش!!
مهره بصدق:لانه عواش دايم تحسسني اني مب مهمه اوياهاا.انا اقول لهاا كل شي عن حياتي معتبرتنهاا شرات ملاك واعز بعد...بس اهيه بتصرفاتهاا كل يوم تثبت لي اني م اعرفهاا عدل

هالشي وايد مضايقنهاا غير سالفتها اويا حميد
حبت تفضفض لامهاا
عشان تنصحهاا وتقول لهاا شلون تتصرف
ام سعيد:مب شرط تبين لج انج مهمه فحياتهاا.مهره حبيبتي ترا بعض الاشخاص م يعرفون يعبرون عن مشاعرهم حتى لاصدقائهم...يمكن انتي غاليه اوياها فوق ما انتي تتصورين..بس اهيه مب عارفه كيف تبين لج انج مهمه اوياهاا.
مهره سكتت تفكر
صج اهيه تحس انه عواش ماتعتبرها حتى صديقه
اذا غابت تقدر تستبدلهاا بوحده ثانيه
يمكن علاقتهم قويه عشان الجامعه
واذا انتهت الجامعه بتنتهي علاقتهم
حست انه الافكار مسيطره عليها بقوه
ام سعيد قامت:حبيبتي قومي صلي العشاء ونامي.واكيد باجر انتي وعواش بتتراضون
هزت راسهاا
وراحت تتوضى
صلت العشاء وعلى طول نامت
قامت الساعه خمس
صلت واخذت لهاا شور ينشطها
تريقت وقعدت تذاكر ع السريع
بعدهاا قامت تكشخ ولبست ملابس الجامعه
ع الساعه سبع ونص فالسياره
احمد:مهور امس ليش نمتي الساعه 8!؟
مهره:راسي كان يعورني شوي
احمد:الساعه 2 اتصلت فيج.شاري لج عشاء بس كان فونج مغلق.ليش غالقتنه؟
مهره:بس جي.
احمد:افتحيه..تعرفيني اتصل لج عشان اسالج عن القاعات
مهره بملل:احمد طول هالمده وانت تسالني عن الكلاسات..ياخي احفظ الجدول.انا مليت منك.
احمد:ليش احفظه وانتي موجوده
مهره طالعت احمد:تصدق اليوم مالي بارض للمحاضرات
احمد طالعها وعقب رجع يطالع الطريج:ليش!!
رفعت كتفهاا:بس جي..احس لو حظرت المحاضرات مارح افهم شي ابد
احمد:ليش داومتي عيل؟؟؟
مهره:عشان اسجل حضور
احمد:ترى اذا مابتحضرين حتى انا ما بحظر
طالعته مهره:ليش!!لا يكون انا امك خلفتك ونسيتكك؟؟؟
احمد:ههههههههههه لا..بس مايصير انا احضر وانتي لا
مهره:لا والله..عيل انا احضر وانت ماتحضر احياناا..وما اقول شراتك
احمد وقف السياره بمواقف الجامعه ونزلو
احمد يمشي حذال مهره:المهم...اذا مابتحضرين خبريني..وفونج افتحيه.انا بروح اشرب لي كوفي
مهره:انزين
احمد بتهديد:والله ياويلج لو ماحظرتي وماخبرتيني.والله يامهور اذبحج
مهره:هههههههههه يصير خير.اصلا اليوم ماعدنا غير هالمحاضره من الساعه 8 لساعه 10
احمد:والله!!عيل ليش ماقلتي من قبل.لو ادري جي السالفه والله ما اداوم
مهره:اححححمدوه راسي صدع منك
احمد:لا تنسين اللي وصيتج عليه..
مشت عنه مهره
واهوا قعد ع الكرسي يدق لربعه وينتظرهم عشان يشربون كوفي سوا
راحت ف استراحه البنات
قعدت ع الطاوله اللي تقعد عليهاا دوم
استغربت ماشافت عايشه
تبغي اليوم تفهم منها الكلام اللي قالته فطومه!
بس شكلها مب مداومه

ترددت تفتح فونها او لااا!!
ماتبغي تواجهه حميد ابد
بس اول وتالي بتفتحه.
احسن لهاا تفتحه احين
اخذت الفون من الجنطه
وفتحته
انتظرت ثواني
ووصلتهاا شكثر المسجات
من حميد
متصل لهاا فوق العشرين مره
فتحت الواتس آب
مطنشه مسجاته
وصلهاا مسج من احمد:هاه مهور بتحضري؟؟؟؟
هزت راسهاا بقله حيله
احمد مزعججججحح
كانت تبغي تكتب له مسج
بس قاطعهاا الاتصال
من حميد
قطعت الخط
وكتب لاحمد:انت ليش ازعااااج جي؟؟؟؟واقف لي فالبلعووممم.
رجع حميد يتصل لهاا مره ثانيه
بتشوووف شو اخرتهاا اوياه
حميد بحده:زين انج رديتي علي
مهره بنفس نبره صوته:خير شتبغي؟؟؟
حميد:اناا واقف حذال بوابه الجامعه..اطلعي لي بسرعه.خلينا نتفاهم
مهره:لا والله؟؟؟؟؟؟
حميد بصراخ:والله يامهور اذا ماشفتج فسيارتي خلال دقايق وربي تندمين
مهره:تحسبني اخافك؟؟؟شو يعني بتسوااا؟؟؟
حميد بتهديد:والله وانا ححلفت.اذا ماشفتج احينه بالسياره بتصل لاحمد اخوج وبخبره كل شي
مهره:لا تقعد تهدد...مستحيل اطلع من الجامعه واركب سيارتك..انت شو تحس لما تطلب مني جي
حميد:قسم بالله يامهور اذا ما ييتي اتصل لاحمد والله..تعرفينهاا سيارتي تعالي واركبي ع طول..اذا طولتي تعرفين شو بيصير.تعرفيني متهوور واذا حلفت انفذ اللي اسويه
صكر عنهاا الخط بويهه
بلعت ريجهاا
هذاا متهوور
اهوا ما حلف عبث
اكيد بيتصل لاحمد
مستحيل تسوي هالخطوه
اهيه من لما كلمته لليوم ابد ماطلعت اوياه
متفقين مايشوفها ولا تشوفه الا لما يتزوجون
شافت احمد اخوهاا يتصل لهاا
ردت عليه:شفيك!
احمد:انتي بالاستراحه؟
مهره بتوتر:هيه
احمد:زين تعالي انا انتظرج حذال الباب
مهره:احينه بيي يلاا
صكرت عنه
اخذت نفس وطلعت له
مشو فالممر
احمد:هاه شو قررتي بتحضرين؟
مهره تمسك راسهاا:لااا مابحضر راسي يعورني
احمد:زين.عيل حتى انا مابحضر.شفيه راسج؟؟
مهره رفعت كتفهاا:مادري
احمد:تبغين نرجع البيت او نقعد فالجاامعه..انا ابغي اروح اتريق اويا ربعي
مهره:روح تريق..انا بروح العياده اللي فالجامعه وبعدين بقعد اويا رفيجاتي
احمد:سلامتججج.
ابتسمت له:الله يسلمك
مسك فونه ودق ع ربعه
شافت حميد يتصل لهاا
ردت عليه
حميد:هاه بتيين ولا اتصل لاخوج؟
رصت ع اسنانها وقالت:اصبر احينه بيي
حميد:لا تتاخرين
صكرت فويهه
مشت ورا احمد اخوها بشويش بدون لا يشوفهاا
التقى اويا ربعه
سلم عليهمم
وطلعو من بوابه الجامعه
لما تاكدت انه راح
طلعت من البوابه
وتغشت شافت سياره حميد واقفه مجابلهاا
ركبت
اول ماركبت ع طول حميد حرك السياره
مهره بخوف:وووين رايحح..وقف السياره
سكت عنهاا
وقف السياره بعيد شوي عن الجامعه التفتت لهاا
وقال بجديه:احينه لازم نتفاهم
طالعت مهره جدام وقالت بحده:على شوه تبغانا نتفاهم؟؟؟على خيانتكككك؟؟؟
صرخ عليها حميد:عدلي اسلوبج اوياي
مهره بنفس صراخه:مالك دخل ف اسلوبي....
مسحت دمعتهاا اللي نزلت من انفعالهاا
مسك السكان يحاول يهدي نفسه
حميد وصوت تنفسه واضح حيل:انتي عمرج ماحبيتيني!!
طالعهاا:لو حبيتيني مابتقولين عني هالكلاام
مهره:شوه هالخرابيط....شفتك اويا وحده جداممممم عيني
حميد:اللي كانت اوياي حمده اختي
مهره بسخريه:حمده اختك!!شو عبالك انا ياهل تقص علي بهالكلمتين
حميد:غصبن عنج بتصدقين كلامي..كنا طالعين انا وياهاا للمكتبه.تبغي تخلص بروجكت للجامعه.عقبها مرينا ع البحر...شفت ربعي قاعدين حذال البحر فقلت لها تتغشى..مب عدله يشوفونهاا.وحضرتج لما شفتينا خمنتي انها وحده ثانيه..حتى انهاا لما شافتج كانت تبغي تسلم عليج.بس انتي الغبيه فهمتي السالفه غلطططط
سكتت عنه مهره مب مصدقه كلامه
حميد:حتى تاكدي منهاا
مهره:شو يثبت لي انك مب متفق اوياهاا ع هالكذبه
طالعهاا وقال بشويش:مب واثقه من حبي لج؟؟؟؟؟؟
تنهدت من قلبهاا وسكتت
حميد بجديه:المفروض انا اللي ازعل منج واعصب
مهره طالعته:لا والله؟؟شو سويت انا؟؟
حميد:طالعه من البيت بدون لا تقولين لي
مهره بحده:انت مب فاتح لي مجال اتكلم اوياكك...مطنشني طول اليوم.واخرتهاا لما رديت ردك كان شرات السم!!!!!منو فينا الغلطان؟
حميد تنهد:ادري اني غلططان بس...
مهره تقاطعه وتطالع ساعتها:رجعني الجامعه بعدين بنتفاهم
حميد :لااا مب مرجعنج الين مانتفاهم
مهره:حميد لا تخلاني اعصب.اقول لك رجعني الجامعه
حميد:غلطت لماا رديت عليج جي.ادري انه مالج ذنب
بس انتي ماتعرفين شو اللي صاير اوياي
مهره:ححميد لا تبرر لي..كان بامكانك تقولي عن ظروفكك.مب ترد علي هالرد الخايس
حميد:زين سمعيني وبعدين قرري
مهره ببرود:خخير.اسمعك..
تنهد وقال:الصبح والظهر كنت نايم عشان جي مارديت عليج.ع الساعه 3 اتصل عبدالعزيز وقالي انه سيارتي تعطلت..اخوه منصور متعبث فيهاا
عصبت ححيل
كيف انا عاطنه سيارتي واهوا يعطيهاا اخوه
رحت لهمم وانا حدي معصب
اخذها عبدالعزيز الكراج وصلحوهاا
عقبهاا رجعت البيت واخذت حمده للمكتبه
نزلت وانا ظليت بالسياره
تعطلت علي مره ثانيه
دقيتي لي انتي
وقعدتي تسالين
ادري لو قلت لج عن السالفه بتقعدين تلوميني
ليش عطيته سيارتي
بس بعد عزوز ماله دخل.اخوه اخذ سويج السياره من غير مايدري
ماكنت ابغي اعصب عليج
لانه مالج دخل فكل اللي صار
كنت مشتاق لج حححيل.
ابد ماسمعت صوتج
لكنج فاجاتيني بلي سويتيه
شكيتي فيني وقلتي عني خاااين وانا مالي ابد اي دخل بلي صار
تنهد وطالعهاا:اذا تحسين اني غلطت عليج ف انا اسف
حست مهره بسخافتهاا
عورهاا قلبهاا عليه
كيف قاعد يبرر لهاا
ملامح ويهه
وكانه يطلب رضاهاا
حميد:بعدج زعلانه
هزت راسهاا:لا رجعني الجاامعه
حميد:يعني بعدج زعلانه
مهره:وربي مب زعلانه بس خايفه احمد يحس بغيابي
حرك حميد السياره
وصلهاا الجامعه وقالهاا :لما بترجعين البيت بنتواصل
هزت راسهاا
قبل لا تفتح الباب
قالهاا حميد:احححبج.ديري بالج ع نفسجج
حمرت خدودهاا
هزت راسهاا وانزلت
مشت بسرعه قبل لا احد يشوفهاا
حمدت ربهاا انهاا اوصلت للاستراحه
من سرعتهاا اصدمت ف احد
صابها توتر
طالعت اللي اصدمت فيه
.....:انتي عميا ماتشوفين
تنهدت براحححه
مهره:شدراني ماشفتك
احمد بحده:انتي ووين صار لي فتره ادور عليج
مهره بتوتر:وين يعني رحت!!رحت اشوف ربعي وعقبها رحت العياده
احمد:سالت عنج عواش.قالت لي ماشافتج
مهره تخصرت:لا والله!!شو لا يكون تتحسبني طالعه برا الجامعه.وبعدين انا عبالي عواش مب مداومه.ماشفتها ابد
احمد:لاااا مب جي..
سكتت عنه اهوا عباله معصبه
لكنها فالحقيقه كانت خايفه حيل لا يكشفهاا
احمد:اغراضج اوياج؟؟
مهره:هيه
احمد:زين عيل خلينا نرجع البيت..اليوم داومنا ع الفاضي

مهره:يلااا
قررت بعدين تتصل لحمده وتتاكد منها
حمده رفيجتها ومستحيل تكذب عليهاا
رجعو البيت
وكل واحد اخذ له شور وع ططططول نام

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 30-08-2015, 04:25 AM
دلعي يكفيني دلعي يكفيني غير متصل
©؛°¨غرامي مشارك¨°؛©
 
الافتراضي رد: روايه أبكتبك في مساء العاشقين إني في هواك لمن المغرمين/بقلمي


مارح انزل بارتات زياده
اول شي ابغي اشوف ردودكم
وبعدين بنزل الباجي......

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 30-08-2015, 04:57 AM
دلعي يكفيني دلعي يكفيني غير متصل
©؛°¨غرامي مشارك¨°؛©
 
الافتراضي رد: روايه ابكتبك في مساء العاشقين،اني في هواك لمن المغرمين


اقتباس:
المشاركة الأساسية كتبها ركاام احزان مشاهدة المشاركة
السلام عليكم بداية موفقة و القصة روعة و القائك اروع
واصلي فيها و متحمسة للبارت الجاي
دمتي بود

عليكم السلام ورحمه الله وبركاته
اشكرج جميلتي ع دخولج هاالصفحه
دمتي بخخير وصحه وعافيه❤

الرد باقتباس
إضافة رد

روايه أبكتبك في مساء العاشقين إني في هواك لمن المغرمين/بقلمي

الوسوم
مساء , المغرمين , العاشقين،اني , ابكتبك , روايه , هناك
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايه هو قيسي وانا بالعشق ليلاه نوناه روايات - طويلة 51 25-12-2016 02:41 PM
روايه/ الى الجحيم يا رجل.. Saroooh113 روايات - طويلة 9 06-11-2015 11:34 AM
روايه : فتاه بوجهين . Black ! روايات - طويلة 12 05-09-2015 03:09 PM
روايه احبك وماقويت على فراقك/بقلمي Randy.2244 روايات - طويلة 11 22-05-2015 08:31 PM
ابا روايه فيها اكشن وعصابات وغموض a_alnuaimii_ ارشيف غرام 3 27-02-2015 02:11 AM

الساعة الآن +3: 01:31 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1