منتديات غرام روايات غرام أرشيف الروايات المغلقة - لعدم إكتمالها هني للذي لا غض عينه يجيه النوم ولا فكر بدنيا العنا وش تسوي به / بقلمي .
سايقة الخير ©؛°¨غرامي جديد¨°؛©

السلام عليكم ..

ببداء بأول روايه لي في منتدى غرام ، ويمكن تعجب طرف والعكس مع الطرف الاخر !

اتقبل الانتقادات بأسلوب حلو ، والروايه مالها اي دخل في حياتي ولا شيء يخصني ، شيء من خيالي وتفكيري وان شاء الله تنال رضاكم .


بسم الله نبدء



البارت الاول .

في ارقى مناطق الرياض ، وارقى بيوتها تتجمع عايلة ( آل فارس ) بمناسبة انها بداية اجازه الصيف

ابومحمد : تعالوا يا بنات قربوا الله يرضى عليكم .
قربوا بنات اخوه وبنته وقال وهو يحط عينه في عينهم

ابومحمد : تخرجتوا من الثانوي وكلكم نسبكم عاديه وماتعطيكم بعثه يعني للأسف ماتقدرون تروحون لنوره في امريكا .

شهقت دانه وهي تمسك يد ابوها : يبه شدعوه مايصير النوري تدرس برا احنا ندرس هنا ( ناظرت عيون ابوها ومافيه ردت فعل وكملت وهي تحس بتبكي ) يعني تعرف اني اشتقت للنوري ومن زمان كان ودي انا وبنات عمي حمد وسالم ندرس معاها برا .

تكلمت الجازي وهي تناظر عمها ؛ حتى انت مب خبل عشان تخلي انوري هناك لحالها ودك احنا نروح لها بعد

قرصتها ساره وهي تفتح عيونها لانها قالت لعمها الكبير ( خبل ) .

انتبهت وحمر وجهها : ما اقصد بمعنى خبل خبل اسفه بس هو مجازي وانا يعني كنت اقصد

قاطعها عمها وهو يضحك بصوت عالي : فاهمك فاهمك ياحبيبتي والله من يومك ماتعرفين تتكلمين عدل

ابتسمت الجازي بحرج وكمل ابومحمد كلامه : يعني انتوا الود ودكم تروحون لنواري في كالفورنيا ؟

كلهم بصوت واحد : ايي ، اكيد

ابومحمد ببتسامه : قبلوكم وراح تكملون جامعه هناك ان شاء الله

تفتحت عيونهم وراحوا يضمونه وكلهم متحمسين .

نوقف شوي لتعريف العايله .

عايلة ابومحمد ( عامر ) : ابومحمد طيب وفاهم الحياه ومتفتح جداً اكثر من خوانه وعنده معتقدات غريبه واهم شي عنده الدراسه .

ام محمد ( مها ) : طيييبه وحنونه بشكل وماتقدر تكون قاسيه وكل شي عندها ( ايه ، وابشر ) تحترم وتحب ابومحمد واجد وتموت في شي اسمه عيالي .

محمد : عمره 25 متزوج وساكن مع زوجته ف الشرقيه عشان شركات ابوه الي هناك .

نوره : عكس امها ، ماتحب تبين طيبتها ابداً ، شخصيتها قويه وهي في الحقيقه طيييبه وماتطلع طيبتها ع اي شي لان عندها مثل ( الطيب مايعيش ) عمرها 19 سنه والي يسمع سوالفها ومعتقداتها يحس انها اكبر من عمرها .

دانه : اخت نوره ، طييبه وعلى نياتها تصدق اي شيء بسرعه يعني ينلعب عليها ، حالمه وتكره تكون جديه وبشوشه عمرها 18 سنه .


عايلة ابوساره ( سالم ) : مهتم واجد في العمل ونادره شوفته في البيت يجي ينام يقوم ويطلع ونادر تلقونه جالس معهم ، شخصيته بارد ومايهمه شي غير الشركات .

ام ساره ( جواهر ) : مثقفه وتحب التدريس ، مديرة مدرسه ابتدائي ، طييبه مع عيالها وتلوم ابوهم دايماً انه مايقعد معهم بس مابعد تجرأت انها تتكلم معه في الموضوع .

ساره : راكده مع الاشخاص الي ماتعرفهم ، وبشوشه مع القراب منها وجريئه معهم ، ماتثق بسرعه ، مشكلتها اذا توترت يبين عليها ، عمرها 18 سنه .

عبدالله : عمره 15 سنه ، مراهق مثل اغلب المراهقين دايماً مع ربعه برا ويحب عدم اهتمام ابوه وطيبة امه لانها بالنسبه له تخليه يسوي اي شيء يبيه.

العنود : عمرها 7 سنين ، ملقوفه ومزعجه وهي الي مسويه للبيت جو .

عايلة ابوفهده ( حمد ) : ابو فهده شخصيه عصبيه جداً واذا عصب مايشوف قدامه ، ياكل حبوب نفسانيه ومرات يلتجىء للضرب وبعدها يندم وتوصل لانه يبكي لانه مد يده .

ام فهده ( عليا ) مكسوره وتتصنع القوه ، دايماً تردد على بناتها ان ابوهم يحبهم بس مشكلته مريض عشان كذا لازم يوقفون معه .

فهده : عمرها 24 سنه ، متزوجه محمد اخو نوره وعايشه معاه في الشرقيه ، ماتوقف اتصالات مع انها عشان تتطمن على ابوها وخواتها .

الجازي : عمرها 18 سنه ، بشوشه وماتاخذ المواقف جد ، كل شيء عندها مزح في مزح ، تميل للكره لابوها لانها تشوفه مايهتم وماعنده الا الصراخ والضرب ولا تعطيه اهميه ، تكتم حزنها وتضحك دايم .

غند و هند : التؤام الصغير ، اعمارهم 5 سنين .



نرجع للروايه .

بعد ماجاهم الخبر بأنهم بيسافرون بعد الاجازه لكالفورنيا عند بنت عمهم نوره ، تسحبت ساره منهم وراحت لغرفتها وسكرت الباب ، خذت جوالها وضغطت الرقم الي حافظته عن غيب .

: الو .

ساره وهي تاخد نفس : مرحبا جابر .

جابر وهو عارف وش بتقول : مرحبتين شحالك ؟

ساره : الحمدلله ، جابر انا معاد اقدر اكمـ ..

قاطعها وهو يتنهد بقهر : ماراح تسالين عن اخباري ؟

خنقتها العبره وقالت تبي تفتك : اخبارك؟

جابر : منب ببخير ياساره .

ساره وهي تحاول تكون قاسيه : طيب ياجابر ، تدري وش بقولك وهاذي المره صدق بسكر منك وبتكون اخر مكالمه بيني وبينك ، اذا عندك شي بتقوله تكلم الحين لاني مستعجله ابي اسكر .

جابر بغيض : ساره انا بسافر .

جاها فضول وين بيسافر بس ضغطت ع نفسها وقالت وهي تغمض عيونها : عندك غيره؟

جابر حس انه بينفجر عليها ، وحس ان كرامته راحت بزياده وقال والعبره فوسط حلقه : فمان الله ، ماعاد ابغي منك شي .

ساره : فمان الكريـ .. طوطط طوطط طوطط .

سكر ففي وجهها ورمى جواله بقوه وهو يصرخ : شفيها ذيي !!!

قعد على السرير ومسك راسه وهو يبلع ريقه وعيونه تدور حول الغرفه ( وشلون يعني بتخليني بدون سبب؟ معقوله يجي منها كذا ، قلبها طابوق والله العظيم طابوق ، حتى ماخلتني اقولها اني بخلي دراستي جامعه هنا وبكمل برا ، الله ياخذهـ استغفرالله استغفرالله )

تنهد وطلع من الغرفه ومن البيت كامل .


نرجع لساره .


طالعت في تلفونها وقالت وعيونها تضببت بالدموع : سكر الكلب ، وراحت للسرير وهي تبكي وتتذكر كلام نوره بنت عمها امس في التلفون ( ياساره اذا انتي تشوفين الي تسوينه صح كملي وحبيه ، بس جربي افتحي موضوع انه يخطبك وشوفي اذا تهرب تراه ماراح ياخذك ، واذا سال وكمل معاك عالبركه ان شاء الله تتهنون )

لفت للجهه الثانيه وهي تبكي ( كلمته انا عن موضوع الخطبه ، تجاهلني وتهرب من الجواب ) قامت من السرير ومسحت دموعها وراحت للحمام - وانتوا بكرامه - غسلت وجهها وطالعت عيونها محمره من البكى وبكت زياده ، سندت راسها على حوض الغسيل وبكت .


اما عند دانه الي بتموت انها بتروح لاختها .

اول ماخلص ابوها الكلام راحت ونطت خذت جوالها وركض على غرفتها ، راحت للأسماء واتصلت على ( عُمري )

: الوو .
دانه : نوااري بنجيك في كلفورنيا بنجيك
نوره بضحكة : اي ادري يامرحبا قالي ابوي
دانه بققت عيونها : ياحيوانه ماقلتي لي وانا اختك
نوره : شدراني عنكم ابوي يقول لي لاتقولين شسوي اعصاه عشانك؟
دانه بستهزاء : وييي البنت المطيعه نسيت ، اقول يلا طسي بروح اجهز شنطتي من الحين .

ضحكت وقالت : انتي الي طسي متصله علي

دانه : ههههههههههه طيب يلا يالحب باي ،

نوره تتنهد وهي ودها تطول مع اختها : باي .

كانت الساعه تقريباً 6 الصبح في امريكا .

قامت من سريرها بملل وراحت لبست لها لبس عدل وجاكيت طويل وربطت شعرها فوق وخذت جوالها بسرعه وطلعت برا الشقه .

توجهت لكوفي شوب صغير قريب من شقتها وقعدت في طاوله لشخصين وهي تنتظر وتحرك رجولها بتوتر وتفرك يدها ( خلاص لازم انهي الي بيني وبينه ، البنات جايين ولازم اكون منظبطه عشان يكونون نفسي ، وبعدين ماصارت كله عشانه شريكي في مشروع الاستاذ جون يتقرب مني وتكون بينا علاقة حب ، يعني مب معقولـ )

قطع تفكيرها الشخص الي واقف قبالها

تكلم ببتسامه وهو يشوف في عيونها الحيره : ممكن اقعد .

ابتسمت وهي ماتحط عينها في عينه وتكلمت : اي تفضل

قعد ، وناظرها فتره وقال وهو عاقد حواجبه : وش الموضوع المهم الي خلاتس تكلميني مع هالصبح .

نزلت راسها وقالت والكلام يتدفق بسرعه منها : ماعاد بيني وبينك اي شيء ورقمي امسحه من عندك وانا بعد وكل الرسايل مابينا الا المشاريع بس.

رفع حاجب وبأستنكار : لحظه لحظه ؟ نوره شتقولين انتي ؟ تمزحين ولا جد ؟

رفت راسها وحطت عينها في عينه وعادت كلامها بأختصار : ماعاد بيني وبينك اي شيء ي ناصر ، بينا مشروع لا اقل ولا اكثر طيب؟

ناصر وهو يعقد يدينه قال بغرابه منه : مهب على كيفتس تقطعينها ، فيتس شي احد مضايقتس ؟

خنقتها العبره وهي تشوف اهتمامه فيها وكملت كلامها : رجاء ياناصر لا تضغط كلها شهر وتعرف ليش ، وياليت تبعد مني ولا احد يعرف وش كان بينا ، رجاءً .

ناصر حس بالوضع جد : نوره تأكدي اني منب مخليتس لين تقولين لي شفيتس ووش جاتس وقلب حالتس ، واوعدتس بعدها اتركتس اذا اقنعتيني .

نوره : وعد ؟

ابتسم وهو يترجى ان يكون السبب سخيف : وعد

نوره تنهدت وقالت وهي تنزل راسها : بنات عمي واختي بيجون يدرسون هنا ، وبما انه سنه ثانيه ما ابيهم يشوفون علاقتي فيك ويتساهلون التعارف مع الشباب وياليت تقدر وضعي .

تغير وجهه وحاول انه يقدر وضعها : ارفعي راستس اول

رفعت راسها وعيونها ممتليه دموع وابتسمت .

كمل كلامه ببتسامه وحاول يهدي الجو : اوهه انوري العوبه تبكي عشان فرقاي

ضحكت وقالت : ناصر صدق بافقدك بس ذا الي بيصير

ابتسم وحط يده على كتفها : مقدر وضعتس ، بس ان شاء الله مع الايام تغيرين رايتس ويكون عادي عند بنات عمتس واختس .

ابتسمت ع جنب : ان شاء الله .

ناصر : يعني عندي شهر افلها معتس لين يجون؟

ضحكت : ايه معاك شهر بس .

وكملوا ودخلوا بين موضوع يجر موضوع .

في الرياض .

عند الجازي ، دقت الباب على امها وما انتضرت شوي وفتحت الباب .

ضمت امها وقالت بعبره : يمه وافقوا نسافر للنوري .

ضغطت عليها امها وقالت بعطف على بنتها : طيب شفيك تبكين ياقلبي استانسي .

رفعت راسها من امها وهي تمسح دموعها : ابوي .

ام فهده : شفيه ابوك ؟

نزلت راسها : من بيشله منك لاضرك وضربك ؟

ام فهده بلعت ريقها وابتسمت لبنتها تخفي انكسارها : ياعمري ابوك طيب ، مب شرير لهالدرجه ياحبي ، لاتخافين انا اعرف اتصرف معاه ، ولا تلومينه ابوك مريض ويحتاج لادويته .

الجازي بعصبيه : يمه شفيك تدافعين عنه !! كلنا عارفين ابوي مايحتاج تسترين عليه والكل عارف انه يضربنا ولحد يسوي شي ! يكرهنا يايمه يكرهنا افهميي ! ابوي مايحبك ! لو يحبك كان ماعاملك نفس الحين لاتقولين تعبـ ..

: بببببببببسسسسسسسسسسسس!!!

التفتت برعب وهي تشوف وجه ابوها المحمر من العصبيه وانفاسه الثايره من الغصب وهو يقرب صوبها .

راحت ورا امها وهي تردد : قلت لك قلت لك قلت لك مايحبنا .

سحبها من يدها بقوه وهو يضمها لصدره ودموعه تنزل غصب عنه ! حاول انه مايبين ضعفه عندها بس ماقدر كان كلامها مثل الخناجر الي تطعن قلبه .

ابوفهده : احبك والله العظيم احبك واحب امك وخواتك ، لاتوجعيني بكلامك تكفين يابنتي .

مبققه عيونها وهي في حضن ابوها وامتلت دموع في ثواني : يـ يـبه

رد وهو يغمض عيونه بقوه : لبيك ياعيون ابوك .

الجازي بكت: اسسسففهه

رد بهمس : ماعليه ماعليه ( شلها من حضنه وطالعها وهو يمسح دموعها ) مايصير القمر يبكي .

ضحكت ونزلت راسها .

يالله تعالي بتنامين عندنا الليله .


نوقف هنا !! بعد مرور شهر ونصص ..

الساعه 6 ونص صباح ..

: سسارره افتحي الباب بسرعه .

ساره : اففف شتبين يالمزعجه ؟

دانه وهي تلبس قميصها وتدخل غرفة ساره : ي بقره نسيت شاحن فوني امس عندك وينه

ساره : شدراني عندك دوريه بنفسك ، المهم بسرعه ماجهزت شي روحي جهزي اغراضك وساعديني قبل لا يجي ابوك يودينا المطار .

دانه : طيب بس الجازي ماشفتيها؟

ساره : بلا جات خذت من عندي شنطه صغيره وراحت ، خلصت تجهيز لشنطتها مابقى الا انا وانتي .

دانه خذت شاحنها وقالت وهي طالعه : طيب طيب بروح اخلص واجيك .

قعدت ع الارض وهي ترتب ملابسها : يلا انتضرك .

دخلت ام ساره ببتسامه : شيسوي الحلو ؟

قامت ساره وضمت امها : ارتب شنطتي ي قلبي

ام ساره انهمرت دموعها : ياعيني على الي كبرت ، الله الله في العقل يابنتي ، بشتاق لك والله ، تعالي ارتب معاك .

مسكت يد امها وناضرتها : يمه لا تتعبين نفسك روحي ارتاحي في الصاله وانا بخلص اغراضي وبجي اقعد معاك .

ابتسمت : لا حبيبتي بقعد ارتب معاك ابي اقعد معك .

ساره : على راحتك .


في كالفورنيا الساعه 9 مساءً

في اكبر المجمعات المتواجده في كالفورنيا .

تمشي وهو ماسك يدها ومنزله راسها وهي تدري انها اخر مره بتكون متواجده معاه .

تنهد وقال بنبره حزن : نوري ، لا تسكتين تكلمي سولفي دامتس تدرين انها اخر مره اواجهتس فيها .

رفعت راسها وقالت تحاول تغير الجو : لا تقول سولفي تضيع السوالف خلني اتكلم لحالي .

ناصر يتكلم ويطالع قدام : انوري صدق بشتاق لتس وبفقد حستس وحكاتس صار لنا سنه تقريباً وش بيفكتس مني .

نوره : ماعليه ان كان فيه نصيب ربي بيجمعنا ويمكن خيره ماتدري .

ناصر : خيره ، هه سكتيني بذي الكلمه .

التفتت للجهه الثانيه عشان ماتبين الحزن الي في عيونها .

وتكلم ناصر وهو يحاول يسعدها في هاليوم : شرايتس نتعشى في ريد لوبستر بدال دير كوين لاعت تسبدي منه .

ابتسمت وقالت بهدوء : طيب

قبل لا يطلعون من المجمع لفت انتباههم طفل صغير عربي يبكي شكله مضيع والي خلاهم يتاكدون انه يقول ( يبه ) ..

وقفت نوره وتكلمت : نصور شف شكله سعودي تسمع؟

لف ناصر عليه وتوجهه له وهو ينزل لمستواه ويرفعه من الارض : لاتبكي لاتبكي بابا بيجي الحين .

استمر البزر في البكى ولا وقف ، تقدمت نوره وسحبته من ناصر وهي تطبطب على ظهر البزر وتردد : انت قوي انت قوي لاتبكي ماما وبابا بيجون الحين حبيبي .

شوي شوي بداء البزر يسكت ويلتهي معهم ، فقرروا انهم يقعدون عنده لين يجون اهله ولا يشوفون حل معاه .

البزر كان قاعد في حضن نوره ويلعب بيدها وهو ساكت

ناصر بملل : شفيهم اهله مافقدوه معقوله؟

نوره : مساكين تلقاهم الحين ولهانين عليه ، وبعديـ ..

قطع عليها صوت رجال من وراها : بدر .

التفت البزر على الرجال : بابااا

نزلته نوره وراح يركض لابوه وامه وهو يضحك .

ابتسم الرجال وسلم على ناصر وسلمت نوره على الحرمه .

: والله مشكورين مادري لولاكم وين كنا بنحصله .

ابتسم ناصر : هذا واجبنا

نوره : ومن كان بيشوف العسل ماشاءالله ويتركه .

ابتسمت الحرمه وقالت بعفويه : عقبال ماتتهنون بولدكم العسل .

بققت عيونها نوره وناظرت لناصر ، ابتسم ونزل راسه ومسك يدها وقال بتنهيده : آمين

قالت بتوتر : يالله عن اذنكم تاخرنا

: الله معاكم

في الرياض .

ابومحمد : يلاا ي بنات لحد يتاخر بروح اشغل السياره

طلع ابو محمد برا وشغل السياره والمكيفات عشان تبرد ، شاف سياره تدخل البيت وابتسم وهو يشوف محمد وفهده
جايين من الشرقيه عشان يسلمون على البناتويقعدون عند اهلهم شوي .

نزل محمد من السياره والابتسامه ماتفارقه وضم ابوه : ها وين البنات

ابومحمد : جاينن ( التفت على فهده ) يامرحبا يامرحبا منورين الرياض تعالي وانا ابوك

تقدمت فهده وسلمت على عمها بحراره وعلى طلعة البنات برا سلموا على محمد وفهده وتوجهوا للسياره ، ومنها للمطار .

في السياره ،


كان ابومحمد قدام وجنبه دانه وساره والجازي ورا ويسولفون من سالفه الى سالفه .


الجازي : طيب عمي يعني احنا بنسكن مع نوره نفس الشقه ؟
ابومحمد : بتكون شقه فيها ملحقين ، وانتوا وزعوا نفسكم مع بعض .

ساره بسرعه : انا ودانه مع بعض ، والجازي والنوري مع بعض .

ابومحمد : ايه الي ودكم .

الجازي طالعت ساره بطرف عينها : شف شف شكلك ماتبيني ، انا الحين ميته عليك

ضحكت ساره : لا بس تعرفين مزعجه وانا انام بدري

دانه بضحكه: وبعدين انا ابي ساره روحي انتي مع انوري

الجازي : حركات متفقين علي ( كملت بطنازه ) الي يشوفكم يقول اتقطع انام معكم .

وبدت السوالف تسحبهم من سالفه الى سالفه ثانيه .


بعد مرور وقت وصلوا للمطار ، ونزل ابومحمد مع البنات

تقدم العامل وخذ الشنط في العربه وبدا يلحقهم .

خلصت الاجراءات والاوراق .

ابومحمد : يلا بنات ودي تركبون الطياره الحين وبتطير بعد نص ساعه .

ردوا : طيب ، اوكي ، ان شاء الله

تحركوا البنات للطياره والفرح بعيونهم ، وكل وحده تتكلم في نفسها


ساره ( افف اخيراً بقدر اغير جو شوي وانسى شوي من الي صار ، بس اذا مانسيت؟ ياالله لا لا ان شاء الله بنسى يعني من هو ؟ لا هو بـ ابوي ولا احد اخواني يعني اكيد بنسى ، ممم اشتقت للنوري صراحه اخيرا بشوفها .)

دانه ( الله ، اخيراً بعيش مثل الروايات بسافر برا وبحب وحركات ، ههههههههههههههههههه شفيني الحمدلله والشكر ، والله يا انوري اشتقت لها ابي اعرف اخبارها ، الله متى نوصل بس . )

الجازي ( يوووه الحين فيه اجرام هناك ، افف لو الود ودي وديت محمد ولد عمي ولا اي رجال يروح معنا ع الاقل لين نوصل للشقه ويرجع للسعوديه ، مممم مثلاً ابوي ؟ الله يايبه ان شاء الله بتقدر تغير من نفسك )

تذكرت الجازي الليله الي نامت فيها عند امها وابوها .

ابوفهده : خلاص بتنامين عندنا الليله .

ضحكت الجازي وقالت بعياره : شدعوه ياكبرني بينكم .

ضمها ابوها وقال بصدق : والله يابنتي ماتكبرين ف عيني لين اشوف شيب راسك .

ضحكت وبعدت : يووه يبه لاتفاول يجيني الحين شيب .

لف ابوفهده على زوجته وناظرها بمعنى هي فهمته وطلعت ببتسامه .

لف على بنته وقعد هو وياها على السرير وقال : تحبين ابوك؟

نزلت راسها وهي متفشله من الكلام الي قالته وسمعها : اكيد يبه احبك ، يـ يبه لاتاخذ بخاطرك على الكلام الي قلـ ..

حط يده على فمها قبل تكمل : انسي انسي ترا ماسمعت شيء

نزلت دموعها على يده وضمته بقوه : والله يايبه احبك والله بس لاترجع مثل اول تكفى .

ضغط عليها : لا تتكفيني طالبك ياعُمري .

تنهدت : ابشر .

: الجااااازيي .

توعت من ذكرياتها على صراخ دانه : شفيك انتي تعالي بسرعه اقعدي هنا وانا بقعد هنا .

الجازي عطتها نظره : طيب طيب شفيك مشتطه ؟

دانه : شدراني عنك مفهيه .

ساره بزهق : افف بنات افف لاتتهاوشون خلاص .

سكتوا وكل وحده راحت في عالمها .




انتهى البارت الاول !


توقعاتكم ؟


وردة الزيزفون
✿ إدارة الإقسام ✿

مساء الخير .. ياهلا فيك بغرام .. موفقة بطرحك .. عندي ملاحظات على روايتك تحتاج لوصف مكان الحدث وللشخصيات المففروض ماتعتمدي على الصور يوصفي انتي بخيالك الشخصيات ووضعياتهم وردات فعلهم

وياليت تبتعدي عن العلاقات المحرمة وماتزينيها بعين القراء لانك عارفة ان نورة وسارة الي يسووه معصية ومايجوز وانك راح تتحاسبي على كل حرف راح تكتبيه موضروري تكون في علاقات حب محرمة حتى تنجح الرواية في اكثر من فكرة المهم الواقعية والاقناع حتى ينجذب القارئ ويتفاعل معاك بس اذا افكارك غير مقبولة راح ينفر منك القارئ


القوانين / الإطلاع هام و الإلتزام ضروري


وهذا الموضوع راح يفيدك ياليت تطلعي عليه

قضايا

سايقة الخير ©؛°¨غرامي جديد¨°؛©

شكرا على المرور واتقبل الانتقاد ����.

i won’t ©؛°¨غرامي مجتهد¨°؛©

لــيء عــودهه بــعــد قــراءهـ الــبــارتــ ...


,,,


سايقة الخير ©؛°¨غرامي جديد¨°؛©

المشاركة الأساسية كتبها احلاممْ مبعثرهْ اقتباس :
لــيء عــودهه بــعــد قــراءهـ الــبــارتــ ...


,,,
ياهلا فيك ، شرفتيني ، انتظر

رثآء ©؛°¨غرامي جديد¨°؛©

لا أذكر صدقاً ماهي آخر رواية بالعاميه عجبتني .. لكن روايتك بالرغم من أنها لا تزال في المهد إلا أنني أستمتعت بها جداً .. ولا أخفيك بإن لهجة ناصر جذبتني أكثر ((=
رواية رائعة وممتعه وفكرتها جديدة
أنتظرك


سايقة الخير ©؛°¨غرامي جديد¨°؛©

المشاركة الأساسية كتبها رثآء اقتباس :
لا أذكر صدقاً ماهي آخر رواية بالعاميه عجبتني .. لكن روايتك بالرغم من أنها لا تزال في المهد إلا أنني أستمتعت بها جداً .. ولا أخفيك بإن لهجة ناصر جذبتني أكثر ((=
رواية رائعة وممتعه وفكرتها جديدة
أنتظرك
حبيبة قلبي والله ، هذا من ذوقك وشرفتيني ، ان شاء الله يوم الاربعاء بينزل البارت 💛💛.

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1