مجنونه_بس_حنونه ©؛°¨غرامي مشارك¨°؛©

فعï»» زي ما قال/ت وميض قلم بس صراحه تفاجئه يوم قلتي انها واقعية تابعي ...

عَبَقْ ©؛°¨غرامي جديد¨°؛©

بالنسبة لهالشي
فأنا واثقة وبإذن الله
انها ما راح تخيب ظنكم
ومثل ما قالت وميض قلم
الخيال شي جميل جداً جداً جداً
ومع ان هالرواية واقعية
إلا انها مبنية على القصة المعروفة الخيالية
انتظروا الفصل الثاني :)


روح تتنفـــس ..~ ©؛°¨غرامي مبدع¨°؛©

ييعطيك العاافية ،،
شوو قصته المارد السحري ؟؟
حمستيني اكثر والله ،،
وبالنسبة لتصنيف الرواية طبعاا م في شي يخلو من الخيال واصلا الخيال هو يلي بيحلي الكتابة طالما هو ف حد المعقول ،،
وكون انك وضحتي انها واقعية فهاد شي مش مستبعد صراحة لان من الاصل م حسيتها خيالية كتير ،،
وانوو الاشي م صار معي مش معناه انوو مش ممكن يصير مع حد تاني ،،
يسسعدك ي الغلا وتسلم اناملك ،،
بانتظارك لا تتأخري ،،
.
.
.

فراقك غريب ©؛°¨غرامي مشارك¨°؛©

المشاركة الأساسية كتبها عَبَقْ اقتباس :
بالنسبة لهالشي
فأنا واثقة وبإذن الله
انها ما راح تخيب ظنكم
ومثل ما قالت وميض قلم
الخيال شي جميل جداً جداً جداً
ومع ان هالرواية واقعية
إلا انها مبنية على القصة المعروفة الخيالية
انتظروا الفصل الثاني :)


السﻻاام عليكم ورحمة الله

شكككل الرووواايه حمااااسسيه وحلووووووه
انا بصرااحه عجبتني واحﻻاا شي اللهجه القصيميه يالبببببيييييه والله بسسسس
احﻻاا لهجه وتضيف لروايه حس كوميدي شوي

بنتظااار الباارت ع احرر من الجمرر...

بسسسس ياليت تحددين موعد
او تنزلين كل يوووم بارت دامها كامله ( طبعا لو مافيها كﻻفه...

وتسلم يدين كاتبتها ويدين نااقلتها لنا

‏.. فِيولـيّت ، ©؛°¨غرامي نشيط¨°؛©






رائع وراقي جدا ..

اسلوب الكاتبة جميل جدا في الوصف وانتقاء الكلمات الترتيب والتسلسل والاحداث
والحوارات التفكير والخواطر وطريقة السرد كل شي مثالي ورائع اهنئها بالفعل ..

اما عن القصة فحمستني كثيرا وشوقتني للباقي
فانا محبة للخيال والخيال شي جدا جميل في الروايات
وانا مع الاخت وميض القلم

لكنني زاد حماسي لما قلتي انها واقعية

حمستيني جدا جدا

اهني الكاتبة على هذا الابداع
ويعطيك العافية عزيزتي عبق
اتمنى ان لا تتاخري كثيرا

--



sh_sh7878 ©؛°¨غرامي مشارك¨°؛©

يالبى قلبس وقسم اني تحمست لك
رجيتس نزلي بارتات كثير والله طفشت من هالروايات اللي ماينزلوا البارتات الا يوم محدد في الاسبوع
وماعليك من احد والله روايتك حلووهه واوعدك اني بغثك بالتعليقات الين ما تنشهر روايتك
**لان في اغلب الناس تنجذب على عدد الردود اللي في الروايه وتشوف تفاعل الناس فتتجرأ تدخل ...ههههههههههه وانا من ضمنهم
{{اتمنى منك تقبل مروري}}

عَبَقْ ©؛°¨غرامي جديد¨°؛©

بسم الله الرحمن الرحيم
السلام عليكم ورحمة الله وبركاته


*****

"المارد السحري"
(الفصل الثاني)


مارد .. سحري .. خاص .. بي .. ووه، نكتة الموسم .. بس اصبر يا رامي، منتب الحين تتطنز عليه؟ .. لا ما قلت له شي .. الا تتطنز عليه بقلبك .. ضاق صدري مره ثانية .. تأملته شوي .. رحمته .. يعني الحين أنا تضايقت من كلامه وشلون اهله واقاربه وواخوياه؟ .. هذا اذا تسان عنده اخويا .. حطيت المصحف بالرف وعدلت جلستي .. سألته/ اسمك؟
قال لي بابتسامة/ سامي
اوه .. اسمه على وزن اسمي .. سامي ورامي .. يصلح لتوأم ../ وانا رامي .. والحين .. عطن قصتك وانا احكم
عقد حواجبه، شكله ما فهم علي الدبشة ذا .... اووووه هذي المرة الثالثة اللي اسبه ولا أتوب .. استغفر الله/ أقصد يعني وراه انا بالذات اللي جيت لمِّي؟ في ناس بعدد حبات الرز اللي اكلته طول حياتي بهالمكان .. وراه إلا انا؟
رد علي/ موب لازم تعرف
ما اهتميت .. وسألت/ طيب، اذا كنت مارد سحري على قولتك، هذا يعني انك موب بشر؟
سكت .. وما رد .. اوووه شكلي عطيته الحقيقة المرة بسرعة .. أدامه متخلف عقلياً أو شي زي تسذا .. ما ادري .. اهم شي به بلا .. فهذا يعني انه حاط هالحقيقة براسه.. وانا شكلي جبته على الجرح .. يعني تخيل امك تجي لمِّك وتقول لك أنت قرد مهب انسان .. بس حنا ربيناك بيننا .. اف اف اف وش ذا .. وش هاللي سويته؟ .. جرحت مشاعره شكلي (ما احب اجرح مشاعر الناس .. قبي رهيف على قولة اميمتي)/ انسى، انسى السؤال .. طيب .. وشلون بتحقق امنياتي؟
ما رد .. اووووه وش اسوي الحين؟ .. انا صدمته .. قال بهدوء/ وشي أول امنياتك؟
سكت شوي .. الحين انا اذا قلت له امنيتي اللي ما ادري وشي للحين .. موب قادر يحققه صح؟؟ طيب .. لو ما حققه .. يبي يصدم بحقيقتين ؟؟ وبيوم واحد!! .. انا عجزت اتحمل حقيقة ان رائد مات (شخصية رواية) لمدة اسبوع وشلون هو بيتحمل حقيقتين بوقت واحد؟ (كنت احسب الناس مثلي) .. اسكتتت .. سكوووت .. هدوووء .. وهو استغرب هدوئي .. فكرت، وراه ما اروح عن هنا ازين؟ ..
قمت .. وقبل ما اروح قلت له ابحاول ارضي نفسي بس/ آسف .. والله ما قصدت أجرحك
قال باستغراب/ تجرحن؟
اوففف .. هذي الثانية .. ما اقدر اقول له اني جرحته بالحقيقة المرة واللي هي انه بشر موب مارد سحري ../ لالا ما اقصد شي .. اسعدتن الجلسة معك يا سامي مع انه قصيرة .. لكن دور ناس غيري تحقق أمانيهم .. لأني ما استحق هالشي منك
كان ساكت ويسمعن بهدوء .. كنت ابروح .. بس سمعت سؤاله اللي صدمن/ تعتقدن مجنون؟
التفت له .. قرصن قلبي/ لالا .. ما اقصد تسذا يا اخي لا تفهم غلط .. انا بس
قاطعن بهدوءه الغريب/ تعتقدن ... مجنون؟
ما رديت .. بس بتلت ابحلق به .. كنت محتار .. أروح واخليه؟؟ أو اقعد انتظره يتكلم؟؟ أو أرد عليه؟؟ أصلا هو شخص ما اعرف منه الا اسمه .. ما لنا أي علاقه ببعض .. ولو خليته بيدور غيري .. يعني عادي .. ما بوه مشكلة صح؟ ... مشيت خطوتين .. لكن كلامه وقفن/ أنا ماردك السحري
تنهدت .. للحين مصر على الحقيقة .. زين اني ما قلت له امنيه الحين يصدم نفسه بانه ما يقدر يحققه .. قال وإلى الحين ملزم على الهدوء/ والمارد السحري لازم يحقق ثلاث امنيات
قلت لا شعورياً/ وراه ما يكونن أربع؟؟ ها ها هااا
ابتسم/ هذي أول أمانيك .. أني احقق لك أربع أمنيات .. وهذاي حققته .. اطلب اربع
هاه؟ وش يقول ذا؟ .. تفاجأت .. ثمن رجعت لمكاني وجلست قدَّامه/ وراك واثق تسذا؟؟ يعني افترض افترض افتراضاً انك ما قدرت تحقق الامنيات .. وش بتسوي؟
تهجم وجهه/ وعمرك شفت مارد ما يحقق امنيات؟
سألته/ طيب وراه تبي تحققهن؟
جاوب/ هذا شغل المارد
سألته/ طيب وراه تبي تصير مارد؟
جاوب/ لأني مارد!
انتهت حلقة الأسئلة والأجوبة عند هالجواب .. شكله موب فاهم أبد .. لاحظت شباب كانوا يسمعون هرجنا من البداية .. وما عطيتهم وجه .. لاحظت ابتسامات استهزاء وهمس .. بس ما عطيتهم وجه .. بس يوم خلصت حلقة الأسئلة والأجوبة .. جانا واحد منهم بابتسامة/ طيب يا أخ سامي .. دام أخ رامي ما عنده امنيات ليش ما تحقق أمانينا؟ هو مو الوحيد اللي يتمنى! ..
لاحظت خويه وهو يضحك باستهزء ورا .. باين انهم ما جو الا لمشاكل .. قال اللي يبي المشاكل وهو يحك لحيته/ اممم .. أول شي ابي فلوس .. فلووس يا الحبيب .. اغمض عيني وثلاث ثواني واشوفهن قدامي .. ما دامك .. ال ما رد ال سح ري مثل ما تقول
قلت وانا ماسك اعصابي/ سامي لا تسمع له .. تراه
قاطعن بهدوء/ غاير؟؟
هاه؟؟ ........... انقهرت من كلامه .. انا أغار؟؟
كمل كلامه/ غرت منه لأنك تبين احقق امانيك انت موب هو؟؟
ما رديت .. والرجل يناظرنا ويبتسم بسخرية .. كمل سامي كلامه/ أو ...... انك تحسبن مجنون وانه بهالكلام بيجرحن .. علشان تسذا ما تبين اسمع له .. وعلشان تسذا بعد أنت ما تبي تقول امانيك .. كنت خايف انك تجرحن بحقيقة اني ما اقدر احققهن لك صح؟

من وين طلع هالذكاء بسم الله؟ طلع ذكي .. ما عرفت ارد عليه .. أمّا هو فما احترا الرد أصلاً .. عطان ظهره وناظر الرجل/ أمانيك ما اقدر احققهن .. لأني أول شي مارد رامي .. وثاني شي ...... أنت شخص ما تستحق هالشي أصلاً
انفجر الرجل ضحك/ وش هالمجنون اللي جاي هنا؟؟ وتحسبني مصدق؟؟ اماني؟؟ مارد؟؟ شكلك تتابع مسلسلات كثيرة يا الحبيب .. واجه الحقيقة .. أنت شخص مجنون .. ومجنون بس

قاله الرجل ثمن راح .. أوففف كل هالكلام يصير ببيت الله؟؟ أستغفر الله ... استغفر الله بس استغفر الله .. صدز بديت أخاف .. خفت من ربي .. وخفت على سامي .. كان مسكتتت ويناظر الأرض ولا يتحرك .. من تعابير وجهه باين انه زعلان .. ربت على كتفه بهدوء/ لا تاخذ بكلامه
ناظرن بنظرات له معاني .. فهمته .. نظرات تقول لي (لا تنسى نفسك .. تراك مثله) .. تنهدت .. وقعدت على الأرض .. وقعدته وانا اسحبه/ ابصارحك ............................... ايه .. انا اعتقدك مجنون .. كنت خايف أجرحك لا قلت لك انك بشر موب مارد .. وكنت خايف تنصدم من نفسك انك موب قادر تحقق امنياتي .. مع ان ما عندي امنيات أصلاً
ابتسم/ لو انك قايلن لي من الأول .. تسان قلت لك ان كل اللي تعتقده خطأ .. أنا مارد .. مارد الأماني
ابتسمت .. آويت له .. للحين مصدِّق نفسه انه مارد .. مسك ايديني كله بايدينه .. وقال بصوت هادي/ رامي .. أعرف انك للحين تعتقد اني مجنون .. ويمكن آويت لي بعد .. مع ان هالشي يعتبر اهانة لي .. بس اللي تعتقده خطأ .. أنا جيت لمِّك لأنك طلبت .. أنا هنا لأنك ناديتن .. كنت تبين .. كنت تنادين .. كنت تتمنى جيتي .. فاخترتك علشان أكون ماردك
كنت متفاجئ شوي .. كنت اعتقد ان هالشي جاي من جنونه .. بس عجزت ادخل هالفكرة براسي .. كلامه كأنه جاي من رجل عاقل .. وحتى يوم يتكلم كان يضغط على ايدي .. كأنه يقول لي منب تاركك .. تنهدت .. / من الحين اقول لك .. حنا بنرجع للقصيم بكرى ،، لذلك دور أحد غيري



*****

نهاية الفصل الثاني :)


روح تتنفـــس ..~ ©؛°¨غرامي مبدع¨°؛©

لا لا لا
لييييييييش هيييييك
طيب مشاعري طيب احاسيسي
ليييش خلص هيك بسرعة
البارت قصير قصيييييييير ي الغلا
بااانتظااااارك لا تتأخري
.
.
.

عَبَقْ ©؛°¨غرامي جديد¨°؛©

بسم الله الرحمن الرحيم
السلام عليكم ورحمة الله وبركاته

*****

"المارد السحري"
(الفصل الثالث)

بعد ما قلت له اني ابرجع للقصيم، كنت متوقع انه يتفاجأ، أو يحاول يمنعن (مع اني ما عرفته الا اليوم بس جان هذا الاحساس) بس ما كانت له أي ردة فعل تقريباً .. يعني كان يناظرن ذيتس النظره اللي تقول (طيب؟؟) سكتنا شوي وكلنا كنا هادين.. لمين قال/ من هالناحية ما عليك .. أنا قصيمي مثلك، لا تحسبن ابستسلم على طول علشان هالشي السخيف .. انا ابصير معك .. لييين تحقق امانيك
اوف، وش هالنشبة ذا؟؟/ طيب يا اخي انا ما اعرفك .. تقول اني طلبتك؟؟ من متى طالبك؟؟ أصلاً انت اول واحد أعرفه اسمه سامي ..
سكت .. ثمن قال بعد ما عدَّل جلسته/ صحيح، أنت ما تعرفن .. لكن أنت طلبتن .. وأنا ما اقدر اتركك إلا وأنا محقق الأربع امنيات .. بسيطة .. بس قل لي اللي بخاطرك وانا موجود .. ما به شي... أنت بس جرب .. يعني وش بيضرك لا قلت لي امنية بس من امنياتك؟؟ قل لي علشان تتأكد من كلامي .. أنا مجنون أو لا .. يا الله .. وش تتمنى؟ ولاحظ اني قلت وش تتمنى .. ما قلت وش تطلب .. يعني لا تصير مثل النتفة اللي تو (قعد يقلد صوته) ابي فلووس (ابتسم، كأنه بابتسامته يبي يطمنن)

كلامه .. خلَّا صورة تنقز ببسط راسي .. صورة، لشخص منسدح على سرير أبيض، نايم عليه بهدوء .. وجهه شاحب والسواد انخط تحت عيونه .. نحييييف لدرجة اننا نقدر نشوف شكل العظام بجسمه .. هذا خويي سلمان .. مرقد بالمستشفى .. ومن يوم وهو صغير وهو حافظ كل زاوية بوه .. من كثر ما يزوره .. شخص ما ذاق طعم السعادة ابد .. ولدرجة انه بدا يفكر بالانتحار .. لكن الله ستر وقعدوا يمنعونه .. والحين هو تحت المراقبة الشديدة لأنه حاول بدون ما يدرون .. هالشخص مقطعن لي قلبي .. مل من حياته ويبي الموت .. يقول ان الموت ارحم!! .. هالخبل ..... تذكرت .. من ايام الدراسة .. وانا بس ابي اشوف سلمان فرح ... ابي بس اشوف البسمة على وجهه ..

لاشعورياً.. فكِّي تحرك .. نطقت بصوت خافت/ سلـ ـما ن
قال سامي وحس بأمل/ سلمان؟؟؟ وش تتمنى بسلمان؟؟؟
قلت وانا مستسلم .. من بعد ما تذكرت سلمان .. طلعت فكره غريبة جداً براسي يمكن تخلين مجنون مثله .. وهي انه يمكن يكون صادز؟؟ يمكن ما يتسذب .. يمكن ....... يمكن .... يمكن كلامه يكون حقيقة!!

وراه لا؟؟
قلت بخوف مدري من وين جاء .. ورجفة مدري وش تبي/ ابي اشوف البسمة على وجه سلمان

هدووووووووء
كان سامي منزل راسه لدرجة اني ما اشوف تعابير وجهه لأنه شعر قصته مغطيه .. كان شعره طويل شوي .. يوصل لتحت أذنه مباشرة .. كان يرتجف .. أنا استغربت وخفت/ سامي .. وش بك؟؟


فجأة،
نقز علي وضمَّن .. ضَّمن بقوّه .. وهمس بصوت خفيف .. لأنه كان متحمس بصوته انكتم شوي/ شككككككراً .. وان شاء الله ما يمر اسبوع الا وانت شايف البسمة على وجه هالسلمان
بعدته عن/ طيب وشلون تعرفه؟
ابتسم بفخر/ ماردك السحري يعرف كل شي .. وضيفتك انك تتمنى .. هذا اللي ابيه

سألته/ طيب وشلون بتخليه يبتسم؟
قام من مكانه .. وعدل ملابسه .. صراحه توي انتبه .. ما كان لابس ثوب .. جاوب على سؤالي/ ما عليك .. قلت لك انت بس تمنى ...
بعد ما خلص جملته الغامضة بالنسبة لي راح .. انا قمت من مكاني.. وشلت اغراضي .. ولا فكرت حتى انتظر صلاة الفجر واطلع .. مدري وش جان .. حسيت بشعور غريييييب واوله ان سامي صادق .. شكله اعدان..



*****


نهاية الفصل الثالث :)


عَبَقْ ©؛°¨غرامي جديد¨°؛©

من هنا تبدا القصة
(على قولة بيلسان)

يعني من هنا بتصير الفصول طويلة ان شاء الله
ومن هنا بعد تبدا الأحداث .. الثلاث فصول الأولى ما كانت الا مقدمة بس
تتمنى بيلسان انكم استمتعتوا به
وان شاء الله تستمتعون بالباقي لين النهاية
استودعتكم الله


أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1