منتديات غرام

منتديات غرام (/)
-   أرشيف الروايات المغلقة - لعدم إكتمالها (https://forums.graaam.com/157/)
-   -   رواية: المارد السحري / للكاتبة: بيلسان (https://forums.graaam.com/604338.html)

عَبَقْ 20-12-2015 03:30 PM

رواية: المارد السحري / للكاتبة: بيلسان
 



بسم الله الرحمن الرحيم


أحبَّت صديقتي بيلسان وضع روايتها هنا لكم
عن طريق حسابي، لذا سترسل لي أجزاءاً من روايتها كل مدة
وسأضعها أنا هنا لكم


"الرواية باللهجة القصيمية"
"الرواية واقعية، وليست خيالية"

**********

(مقدمة)

برد،
والله برد
كنت ماسك المصحف أقرا آيات الرحمن، متكي على عامود من اعمدة الحرم المكي وفوق سجادة من سجاداته الحمراء، كنت انتفض من البرد، قالوا لي ان مكة حر وعرق وزحمة فما يحتاج اجيب معي جاكيت (تخبرون، القصيم وبرده) اثرهم يتسذبون علي، بس لو فكرت بالموضوع انا وش اللي جابن هنا؟ أقدر اقرا بالبيت! دامي ما جبت جاكيت .. بس لا، الطريق للفندق طويل يا اخي ما لي خلق ارجع بعد ما تعبت وانا ادور تاكسي علشان اجي لهنا.
جلست أحك أيدي وانا اتنافض، وش ذا، انا جاي اقرا قرآن واصلي الفجر هنا علشان ربي والا جاي اقول برد برد .. بس يا اخي والله برررد، ما امدان اكمل القراءة إلا واسمع صوت الآذان .. يا الله .. صوت جميييل يدخل القلب، هذي هي مكة، قعدت اناظر حولي، مع انه برد، ولا بعد الفجر الحين، بس المسجد ما خلا من الناس، ملياان وكلن يعبد ربه ويطلب الرحمة، أول ما سمعوا الناس الآذان قعدو بالسجاد الاحمر يتزينون تجهزاً للصلاة، وما قعدنا الا شوي وسمعنا الإقامة.
رجعت المصحف للرف، وصفيت مع المصلين، حسيت بشعور ما ادري وشلون اوصفه، كلن يصف جنب الثاني، متراصين، نستعد للصلاة، انا ما اعرف الشخص اللي صاف بجنبي، والواضح انه جاين من قارة ثانية، رفعت راسي وشفت اللي قدامي، وهذا بعد واضح انه ياباني، اللي وراي، يميني، يساري، كلهم ما اعرفهم لاهم من نفس جنسيتي ولاهم يتكلمون لغتي ولاهم بنفس المستوى المادي، بس جمعنا شي واحد.. عبادة ربي .. ما تحسون بذاك الشعور؟ أنا احس به .. احس اني شي عظيم .. شي عظيم، انا الله اختارن علشان اكون من بين هالناس.. ما اقول الا الحمد لله.
بعد ما خلصت الصلاة، قعدت مره ثانية واسندت ظهري على العامود اللي وراي .. أخذت المصحف من الرف وقعدت أقرا .. وهالمرة ما حسيت بالبرد، ووراه ابحس به وانا الحين عرفت اني شخص اختاره ربي؟ لو ان ربي ما اختارن؟ لازم استغل هالفرصة! .. كنت اقرا بكل خشوع وتدبر، دخلت جو بالقراءة، وما انتبهت للشخص اللي جالس جنبي.. كان يناظرن بكل هدوء، انتبهت له، شكله يبين اخلص من القراءة .. يوم خلصت الوجه اللي انا أقراه، حطيت الحبل الأخضر (الفاصل) علشان ما اضيع الوجه اللي وصلته .. وحطيت المصحف على الرف، تأملت الرجل شوي، كان بنفس عمري، وباين انه سعودي/ السلام عليكم .. بغيت شي اخوي؟
ابتسم/ وعليكم السلام، ايه بس ابكلمك بشي
أنا على طول قعدت ابحلق بروحي، اكيد بي شي والا ما جا وتكلم معي.. لأني ما اعرفه ولا بيننا اي موضوع .. يوم تأكدت ان ما بي شي سألته/ اسمعك
تربَّع ../ أنت تعرف ................ يعني تسذا .............. اذا قال لك احد انه المارد السحري، وانه بيحقق لك ثلاث امنيات .. وش بتكون ردة فعلك؟
استغربت سؤاله .. بس جاوبت .. لأنه من لهجته باين قصيمي .. يا اخي تسذا حسيت بانتماء ../ اكيد ابفرح .. من ما كان يتمنى المارد السحري يجي لمُّه؟
سكت شوي .. ثمن قال بابتسامة/ أجل ... لو قلت لك اني المارد السحري؟

**********

تقول بيلسان:
" السلام عليكم، هذي موب روايتي الأولى، كاتبه قبله روايات، بس تصدقون؟ ما فكرت انزلهن، بس شجعتن عبق .. للآن هذي المقدمة .. وان شاء الله الفصل الاول ابرسله اليوم "


(وميض قلـــــــم) 20-12-2015 03:34 PM

رد: رواية: المارد السحري / للكاتبة: بيلسان
 
اويلاوه

ياعبق اثاريك من القصيم

الظاهر بالرواية بوه حماس وأكشن

ننتظرتس

هههههههههههههههههههههه

مجنونه_بس_حنونه 20-12-2015 03:44 PM

رد: رواية: المارد السحري / للكاتبة: بيلسان
 
شكلها حلوه بس فيها خيال زايد
استمري بكون من متابعينك

روح تتنفـــس ..~ 20-12-2015 04:06 PM

رد: رواية: المارد السحري / للكاتبة: بيلسان
 
يعطيك العافية ،،
حتى واناا بقرأ بالرواية كنت احكي متلوو يخي والله برررررد هههههه
بسس عنجد فيهاا اثارة بشكل مش طبيعي رغم انو البارت جدا قصير كلوو كان برد ههه
ننتظرك ي الغلا ووصلي لصديقتك بيسان سلامنا وخلها م تتأخر عليكي بالتالي عليناا
ومن بعد اذنك ان في مجال تبعتيلي الرابط لما تنزلي البارت ،،
يسعدك ربي ،،
.
.
.

عَبَقْ 20-12-2015 05:52 PM

رد: رواية: المارد السحري / للكاتبة: بيلسان
 
بسم الله الرحمن الرحيم
السلام عليكم ورحمة الله وبركاته

*****

"المارد السحري"
(الفصل الأول)

كنت طالع من الحرم بكل هدوء.. وقفت عند الرصيف أأشر لسيارات التاكسي.. والحمد لله على طول لقيت وحده، لأني وبكل صراحة واااااصلن حدِّي .. أبنااااام .. ركبت قدام، وصكيت الباب، فجأة سمعت صوت الباب اللي بالمرتبة الخلفية يفتح، لفيت راسي ورى ويوم شفت الشخص اللي يركب تنهدت .. كان حاطِّن رجل على رجل ومتكتف .. ولافِّن وجهه عن .. بالعربي معطين خدُّه دلالة على انه زعلان .. عرفتوه؟ هذا هو المجنون اللي قاعد يقول لي انه مارد سحري .. يا اخي وين اهله عنه ذا؟ .. قلت بمل لأنه من يوم قمت وهو يلاحقن/ يا اخي ما مليت؟ اذا كنت ما مليت انا مليت .. منب فاضين لمجنون انا رح دور احد ثاني تعلَّق به
قال وباين انه زعلان .. كأنه بزر استغفر الله .. لافن وجهه ومعطين خده(عرفتوَّه ذيتس الحركة اللي يعني اني انا زعلان)/ انا ما اسمعك .. وما لي دخل بك .. انا مجنون؟ كيفك!
تنهدت/ والمطلوب؟
رجع عيونه لي وناظن بنظرات حادِّه/ المطلوب ثلاث امنيات احققهن لك، وبتسذا ننتهي، انا ما اعرفك ولا أنت تعرفن

ويحسبن ابصدق بكل سهولة؟؟ بتقولون وراه ما تتمنى وتفتك ادامك عارف انه يتسذب .. ابقول لكم اني هنا ابصير مثل الغبي .. تخيلوا شخص مصدق انه معه مصباح سحري ويروح للمصباح ويحكه ويقول ابي مليون ؟؟ بالله انا موب مجنون مثله!

نغزن السايق اللي نسيته/ شكل بينكم مشاكل، وراه ما تصلحونه برا سيارتي؟
ابتسمت/ لالا ما فيه شي .. اصلاً انا ما اعرف هالشخص هو لاحقن لهنا .. تقدر تقول له ينزل؟
تركى السايق على الدركسون/ وانا اللي اشوفه غير
كنت ابتكلم بس قاطع المجنون هرجنا/ وانت وش لقفك يوم انك تشوفنا انا واياه تنهاوش؟ تقدر تكمل شغلك وانا ابخلص اللي عندي معه
رفع السايق حواجبه/ لا والله .. برا سيارتي تخلص اللي عندك .. روحوا دوروا لكم واحد ثاني يتحملكم .. أمَّا قلَّت الأدب ذي انا ما اقبل ناس كذا
السايق كان صغير .. مهب كبري ولا هوب كبر المجنون .. لكن يعني موب شايب شباب .. علشان تسذا اسلوبه ما ادري وشلون قايل .. وانا اعذره .. عموماً أنا نزلت .. باين انه خلاص ما يبي يوصلن .. وكله بسبة هالمجنون .. قعدت عند الرصيف احترييي واحترييي واحترييي لين ربي سهله ولقيت سيارة جايه لمنا .. ركبت .. وعلى طول قلت له وجهتي لأن ما ابي يركب هالمجنون .. بس اللي استغربته انه كان عنده فرصة يركب وانا اتكلم مع السايق .. بس ما ركب .. بالعكس اول ما طردنا السايق الأول قعد شوي معي بدون ما نتكلم لمين جت سيارة التاكسي ويوم ركبت راح .. والله يا هو غريب .. مجنون

وصلت للفندق .. دخلت الجناح .. كانوا اهلي للحين نايمين لأننا الصبح .. بس انا عودت نفسي هالاسبوع اسهر بالحرم .. لأننا بكرى بنرجع للقصيم .. ويمكن ما نلقى فرصة ثانية لا قدَّر الله .. المهم، جدعت نفسي على الفراش المريح وغطيت بنووووم عمييييق.







مطر؟ احب المطر .. لكن وراه احس بضيقه الحين .. انا متضايق .. وابي امسحه .. حار .. وراه؟ كنت استانس لا جاء .. فتحت عيوني والاه اختي الصغيرة ترش علي ماء علشان اقوم .. قلت وانا ما لي خلقه ابددد/ بتوول، وخري اولاه
قالت بعناد/ لا، لمين تقوم
افففف استغفر الله، بزر .. وانا اقول وراي متضايق من هالمطر اثره موب مطر .. اثره ماء من ايد اختي بتول .. قمت من الفراش وراسي يوجعننن .. لاحظت ان شناطي وشناط اخواني مرتبة ومحطوطة بالزاوية/ جهزتوا الشناط؟
ابتسمت/ ايه، تقول امي انه ما له خلق تزينهن بالليل .. ما تبي تسهر لأننا بنروح بكرى الصبح
قمت من الفراش وانا احك رقبتي .. سألت بتول/ أذن الظهر؟
قعدت على سريري/ ايه .. علشان تسذا اقومك .. ابوي نسا ويوم جا من الصلاة على طول قال لي
تنهدت .. حسيت بضيق شوي .. رحت وتوضيت وصليت بغرفتي .. كان شعور غريب .. يعني من زمان ما صليت الحالي .. طلعت من غرفتي وانا اشم ريحة الغدا .. اكيد ابوي شراه قبل ما يجي .. الله يخليه لي كنت جوعان والله .. قعدت وتغديت معهم وقلت لابوي عن اللي صار بالحرم .. فقال لي/ اسمع يا رامي .. بوه فئه من الناس ولدوا معاقين عقلياً .. فما يصلح تتكلم معهم تسذا .. أنت بس سايرهم .. لا تصرخ عليهم مثل ما سويت .. وبعدين وشلون تترك الرجل الحاله؟ يمكن هاجِّن من اهله؟؟ يمكن الحين اهله يدورونه بالحرم وانت خليته يطلع منه؟ .. ادعي له بالشفاء يا رامي .. ادعي له بالشفاء

ضاق صدري، هذا يعني اني اهنت فئه تحتاج لنا؟؟ .. وصحيح كلام ابوي كانت تصرفات الرجل غربية شوي .. اكيد علشانه مثل ما قال ابوي .. ولا بعد انا كنت اناديه مجنون علشان اتطنز به .. الله يسامحن
اليوم كله حسيت بضيييييق .. ما توقعت هالشي يطلع من .. اني اهين فئة من الفئات .. والله اني حقير .. وش ذا؟




انتظرت لين يجي الليل .. الوقت المحبب دائماً وابداً لقلبي .. يا اخي احب الليل .. يوم ناموا اهلي طلعت من الفندق وركبت سيارة تاكسي .. رحت للحرم .. ورحت لنفس المكان اللي كنت قاعدن به بالضبط .. جايزن لي .. مطل على الكعبة .. فأقدر اشوف اللي يطوفون .. ولا بعد بجنبه ماء زمزم ورف المصاحف والعمود اللي اتكي عليه .. أحسسسن شي ..
قعدت اقراء قرآن، لين شفت رجول وقفت قدامي .. ثمن تربعت .. رفعت راسي من المصحف والاه المجنون .. أوه أفف انت غبي يا رامي .. هماك تقول انك موب قايل مجنون ابد .. أقصد الرجل اللي يقول انه بيحقق امنياتي على قولته .. قال بابتسامة/ توقعت انك بتجي هنا
صكيت المصحف بهدوء .. ثمن قلت/ آسف على اللي قلته لك امس .. ندمت
حسيته تحمس .. قرب من بسرعة وهو متربع وقال/ منب مسامحك الا بشرط
شكلي عرفت الشرط، بس سألته ابتغابى/ وشو؟
تكتف/ احقق لك امانيك الثلاث امنية امنية .. انا المارد السحري! المارد السحري الخاص بك.




*****



نهاية الفصل الأول :)

الكاتبة طلحي نسرين 20-12-2015 05:57 PM

رد: رواية: المارد السحري / للكاتبة: بيلسان
 
حلو اختي بس مثل ماقالوا شكلها خيالية شوي بس الله يوفقك و بتمنى تتابعيني على روايتي جرحني فحبيته و لما عشقني ضميته و ماتركته و تعطيني رايك و انشاء الله بكون من متابعاتك الله يوفقك اختك من الجزائر و انتظر رايك يا حلوة انت

مجنونه_بس_حنونه 20-12-2015 06:19 PM

رد: رواية: المارد السحري / للكاتبة: بيلسان
 
حلوه بجد بس فيها خيال زايد عن الازم بس استمر اكثر وسلميلي على الكاتبه وتحاياتي _Mr FeK

عَبَقْ 20-12-2015 06:23 PM

رد: رواية: المارد السحري / للكاتبة: بيلسان
 
مدري صراحة بس استغربت منكم
يعني على طول قلتوا خيال؟
مع اني ما شفت أي شي خيالي
يعني شفت رجال يقول انه مارد سحري
بس ما سوا سحر للحين ولا طار فوق بساط
ولا حتى حقق الاماني الثلاث بالسحر
يعني اللي اشوفه مجرد كلام ^^
وانا قاريه الرواية كاملة
للتنوية: الرواية ليست خيالية بل واقعية

(وميض قلـــــــم) 20-12-2015 06:24 PM

رد: رواية: المارد السحري / للكاتبة: بيلسان
 
الخيال هو أجمل شيء في الروايات وأنا بصراحة لا أحب الواقعية أبدا


وأصلا معظم الروايات الشهيرة الجميلة هي خيالية

لاتلتزمي بالواقعية أبحري في الخيال ولا أعني أن تتجاوزي حدوددك كأن تصوري الحرام على أنه جميل أعيذك بالله

عن ذلك.

تذكرت السندباد :)

أريد أعرف ماذا سيحقق له من رغبات


في انتظارك ياعبوقه أنتي وبيلسان

(وميض قلـــــــم) 20-12-2015 06:25 PM

رد: رواية: المارد السحري / للكاتبة: بيلسان
 
قرأت ردك في أنها واقعية


لالا لا


لا أريدها واقعية :(


الساعة الآن +3: 12:49 AM.


موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات


SEO by vBSEO 3.6.1