منتديات غرام

منتديات غرام (/)
-   روايات كامله - يتم نقل الرواية هنا بعد اكتمالها (https://forums.graaam.com/152/)
-   -   أناأنثى ولكن !!/بقلمي؛كاملة (https://forums.graaam.com/605351.html)

الوعد _ ALWAAD 18-01-2016 05:48 PM

أناأنثى ولكن !!/بقلمي؛كاملة
 

بسم الله الرحمن الرحيم

مرحبا يا مزايين كيفكم اخباركم ؟؟.. اتمنى تكونون بافضل حال ..

انا رجعت لكم بعد فتره لابئس بها .. وبعد نجاح اللي لاقته روايتي الأوله ** كل الشباب عشقوها وهي ما عشقت الا ابوها **.. فكرت اني اكتب روايه ثانيه وبعد جهدا جهيد قدرت بحمد الله اني اطلع بفكره يمكن ان تكون جديده وغريبه بنفس الوقت .. واللي هي روايتي او بالأصح مولدتي الثانيه ** انا انثى ولكن !!... ** هذي الروايه راح تكون محاكيه لارض الواقع اكثر من اللي قبل .. وتلامس اشياء كثير انتشرت بمجتمعنا بالوقت الحالي واللي اهمها حب السلطه والمال اللي قد تكون دمرت ناس واحييت ناس .. ولكن تبقى شي يتجدد مع مرور الأزمان وتغير الأجيال .. روايتي راح تسلط الضوء على هذه الفئه بذات .. بخيرها وبشرها ..

وطبعا دائما وابدا راح استقبل اي انتقاد بس بشرط يكون انتقاد بناء يعني يفيدني ويخليني اصحح اخطائي مو نقد يجرح لانه ماراح يفيدني ابد وشكرا ..

وبس ما ابي اهرج عليكم كثير ..واتمنى تعجبكم الروايه ..


الوعد _ ALWAAD 18-01-2016 06:03 PM

رد: انا انثى ولكن !!...
 

يلا نبدا ..

** البارت الأول **
**
**
**
**
**
**
**
**
كان جالس مع زوجته بالصاله الواسعه المزينه بالأثاث العودي الفخم والشاشه الكبيره اللي تغطي واحد من جدران الصاله .. كانو جالسين وفناجين القهوه العربيه بايديهم ..
.. يا ام محمد وراك سرحانه وش تفكرين فيه ..
ام محمد .. احاتي ولدي محمد اليوم بيجون من الشرقيه هو وحرمته وللحين ما وصلو ..
ابو محمد .. وليه تحاتينهم ان شاء الله راح يوصولون ..
ام محمد وهي تحط الفنجان على الطاوله وتلف على زوجها .. بس هو مكلمني من الساعه 2 الظهر وقال لي انهم بالخط والحين شوف الساعه 6 المغرب وهم للحين ما وصلو .. وبين الرياض والشرقيه كلها 3 ساعات بالكثير ..
ابو محمد .. طيب يمكن راحو مشوار هنا ولا هنا .. واذا مره تحاتينه اتصلي عليه ..
ام محمد .. انا كنت راح اتصل عليه بس خفت اشغله عن الطريق .. وجوال زوجته مقفل ..
ابو محمد .. استودعيهم الله ولا تحاتينهم .. تلقينهمشوي وداخلين عليك ..
ام محمد . انا ما احاتي الا مريم الحرمه حامل وولدك ماخذها بخط اكيد راح تتعب ..
ابو محمد يوقف بهيبته .. يا حرمه قلتلك لا تحاتين .. انا بدخل المكتب اقضي لي كم شغله .. وهو ماشي سمع جواله يرن .. طلعه من جيبه وشاف الرقم غريب .. رد بصوته الواثق .. نعم ..
.. انت عبدالعزيز محمد ال ..
ابو محمد .. ايه تفضل ..
.. معك مستشفى ال .. ولدك محمد وزوجته مسوين حادث ولازم تجي لان حالتهم خطيره ..
ابو محمد انصدم وخاف على ولده بس من طبعه ما يحب يطلع احساسه على تعابير وجهه او حتى بصوته .. قال بنفس سوته الواثق .. طيب جاينكم .. قفل ولف على زوجته اللي تناظره بترقب ..قومي البسي عبايتك بسرعه ..
ام محمد وقفت وبخوف . وش صاير محمد فيه شي ..
ابو محمد عطاها ظهره وبلهجه امر .. انا انتظرك بالسياره لا تتاخرين .. وطلع وترك ام محمد حايسه بافكارها ..
طلعو للمستشفى ودخلو على الطوارئ وام محمد عرفت السالفه من زوجها اللي قالها بالسياره وهي من سمعت الخبر وهي تبكي .. سءلو عن ولدهم وزوجته وقالو انهم بغرفه العمليات .. جلسو ينتظرون وبعد ساعه طلع التكتور باين على وجهه الاسى ..
ابو محمد وقف وتوجه للدكتور ..كيف ولدي وزوجته ..
الدكتور .. يؤسفني اني اقول كم هذا الخبر بس عظم اله اجركم فيهم ..
ام محمد اول ما سمعت الخبر اغمى عليها وجاو الممريضات شالوها ودخلوها وحده من الغرف ..
ام ابو محمد انكسر من داخله وحزن جلس على اقرب كرسي لانه ما يقدر يتحمل هذي الصدمه .. ولده الوحيد وراس ماله في هالدنيا توفى وهو بعز شبابه ..
الدكتور قرب لعنده وربت على كتفه .. كلنا لها .. بس في معجزه صارت .. وهذي نادر ما تصير بالحالات اللي مثل هذي ..
ابو محمد رفع راسه للدكتور بامل .. ايش هي ..
الدكتور .. الحرمه كانت حامل في شهرها الأخير .. بس الحمد الله قدرنا نطلع الجنين اللي في بطنها وهو سليم مافيه اي شي وهذا من رحمه ربي فيه .. وربي اخذ وعطى .. اخذ ولدك وعطاك حفيد او حفيده .. وحنا الحين اخذنا الطفل وحطيناه بالحضانه لازم يجلس عندنا اسبوع عشان بس نتاكد من حالته ..
ابو محمد من بين حزنه والمه ابتسم ابتسامه تشع بالأمل .. الحمد الله صدق ربي اخذ وعطى .. الحمد الله على كل حال .. طيب اقدر اشوف الطفل ..
الدكتور .. لا للاسف حاليا ما تقدر بس تقدر بكرا ..
ابو محمد وقف .. ان شاء الله .. وراح لغرفه زوجته دخل وشافها صاحيه وتبكي بصمت .. قرب لها وضمها لحضنه .. استهدي بالله يا ام محمد وهذا يومهم والحمدالله على كل حال .. وبعد عنها .. والحين لازم تكونين قويه عشان تقدرين تربين حفيدنا ..
ام محمد لفت على ابو محمد باستغراب ..
اابو محمد ابتسم .. ابشرك الطفل اللي كان ببطن مريم عايش وهو سليم وله الحمد والحين هم يفحصونه عشان يتاكدون اكثر .. لا تحزنين ربي ما يترك حد خذ منا محمد ومريم وعطانا قطعه منهم .. لازم نحافظ عليها ..
ام محمد ابتسمت من بين دموعها .. وينه ابي اشوفه ..
ابو محمد .. ما نقدر اليوم .. خلينا نروح البيت عشان ترتاحين وبكرا نجي باذن الله ..
وبعدها طلعو من المستشفى ورجعو للبيت وانتشر خبر وفاه محمد ومريم بكل العائله .. ومن بكرا بدا عزاهم ..
............................................







بعد اسبوع من الحادث ..
طلع من مكتبه مستعجل وقابل زوجته نازله من فوق ..
ام محمد .. وين رايح شكلك مستعجل ..
ابو محمد .. اي اتصلو علي المستشفى وقالو اجيهم عشان الولد ..
ام محمد بفرحه .. خلاص راح يطلعونه ..
ابو محمد .. مدري بروح لهم ..
ام محمد .. لحظه بجي معك ..
وبعد دقايق طلعو واتجهو للمستشفى .. دخلو على الطبيب المسؤول ..
الدكتور .. تفضلو ..
بعد ما جلسو ..
الدكتور .. اول شي ابسالكم انتو من قبل تعرفون نوع الجنين ..
ام محمد .. لا . وبحزن .. مريم الله يرحمها رفضت تعرف نوع الجنين وقالت ابيها تكون مفاجأه مادرت انها بتموت قبل ما تشوف ضناها ..
ابو محمد .. الله يرحمهم ويعوضنا بولدهم .. ولف على الدكتور هو ولد صح ..
الدكتور .. لا بصراحه هي بنت .. ومثل القمر ماشاء الله .. انا قلت للممرضه تجيبها تشوفونها ..
ابو محمد .. كيف ؟!! بنت !!..
امام محمد لفت عليه .. مو مهم بنت ولا ولد اهم شي انها من ريحه الغالي ..
وفي هالوقت دخلت الممرضه وبيدها الطفله ..
ام محمد .. عطيني .. اخذتها وهي تسمي بالله عليها .. البنت كانت غايه بالجمال ماشاء الله ..مثل ما قال الدكتور مثل القمر . بسم الله عليها ..
ابو محمد لف يناظرها وهو يفكر بشي ..
الدكتور بابتسامه .. ايش حابين تسمونها عشان نخلص اجرائاتها وتاخذونها معكم ..
ام محمد بسرعه .. الجازي .. كان ابوها يحب اسم الجازي ..
الدكتور وقف .. خلاس انا الحين اخلص اجرائاتهم واجيكم ..
ابو محمد .. لحظه ..
الدكتور وام محمد لفو عليه ..
ابو محمد .. هذي مستحيل تكون بنت لزم تصير ولد ..
ام محمد .. استغفر الله يا عبدالعزيز وش جالس تقول هذا امر ربي ..
ابو محمد وهو معزم يسوي اللي براسه .. والنعم بالله بس هذي البنت ماراح تتسجل باسم بنت راح تتسجل باسم ولد وابي كل الناس يعرفون ان محمد جاب ولد مو بنت ..
الدكتور رجع جلس مكانه وباستغراب .. اقدر اعرف السبب ..
ابو محمد وقف .. سبب خاص .. راح تسجلها باسم ولد ولا نروح لمستشفى ثانيه ..
الدكتور .. بس هذا ممنوع ويعتبر تزوير كيف نكتب بشهاده الميلاد انها ذكر مو انثى ..ولا مستشفى راح ترضى تسوي كذا ..
ابو محمد لف عليه .. اتوقع تعرف اسمي وش يسوي .. ف اتمنى انك تنفذ اللي قلته لك ولا مثل ما قلت لك المستشفيات كثير .. وغير كذا راح اشكيك للمدير ..
الدكتور خاف كل شي الا وظيفته وسمعته بالمستشفى .. وافق على طلب ابو محمد .. ووقف .. طيب ايش الأسم ..
ابو محمد وهو يجلس .. سلطان ..
الدكتور بقله حيله .. حاضر .. وطلع من المكتب ..
ام محمد تناظر زوجهاباستغراب ..وش اللي سويته ..
ابو محمد .. ولدي الوحيد راح وجاب بنت يعني كذا راح ينقطع اسمي لو رحت من على الدنيا بس لو صارت البنت ولد كذا اسمي ماراح ينقطع ..
ام محمد وهي مصدومه من تفكير زوجها .. طيب وش ذنب هذي المسكينه ..
ابو محمد لف عليها وبلهجه امر .. انا قررت وانتهى الموضوع لا تفتحينه مره ثانيه ..
ام محمد سكتت ماتقدر تقول شي بعد كلام زوجها وصارت تناظر بالبنت اللي بين يدينها وبنفسها .. الله يحفظك ..
........................................








بعد مرور 19 سنه ..
امريكا .. نيويورك ..
الساعه 8 المساء...
دخلو لفلتهم وهم مبسوطين ..
دخل للصاله ورمى نفسه على الكنبه .. اوه اليوم تعبت كثير .. ولف لما شافهم داخلين بعده وابتسم .. اشكركم لانكم تركتم اشغالكم وجيتو لحفل تخرجي ..
ام محمد بابتسامه .. اكيد راح نجي مو انت حفيدنا وولدنا الوحيد ..
ابو محمد بنفس الابتسامه .. وهذا انت تخرجت من الثانويه يا سلطان وبامتياز وش الجامعه اللي ودك تدخلها .. انت امر بس ..
سلطان .. امم بصراحه يا يبه انا فكرت كثير بخصوص الجامعه اللي ابي ادخلها وكثير من الأساتذه اقترحو علي جامعات معروفه هنا بس انا ودي بشي غير ابي اغير .. طول عمري من لما كنت بالتمهيدي الى الحين وانا ادرس بامريكا ابي شي جديد ..
ابو محمد .. طيب مو مشكله انت قول وش تبي .. تبي بريطنيا .. فرنسا .. اليابان .. قول اي دوله تبي تدرس فيها وانا حاضر ..
سلطان .. اممم بصراحه كل الدول اللي قلتهم كويسات والجامعات اللي فيهم معروفه بس انا ودي بصراحه اروح لموطني الأصلي .. ودي ارجع للسعوديه اللي ما قد رحتها وادرس فيها ..
ام محمد لفت على زوجها اللي ناظرها ولف على سلطان .. بس يا يبه الجامعات اللي هنا افضل ..
سلطان .. ادري بس انا ابي ادرس هناك سمعت منكم عن السعوديه كثير بس ما قد اخذتوني لها .. ف الحين لما تخرجت من الثانويه ما في شي يمنع اني ارجع ادرس هناك .. ودي اشوفها واعيش فيها ابي اعيش بالمكان اللي عاشو فيه امي وابي ابي اشوف ناس ثانين مثلي مليت من الأمريكين والأجانب .. انا لو انتو ما كنتو معي اتوقع ماراح اتعلم اتكلم عربي وسعودي ..
ام محمد نزلت راسها لما تذكرت ولدها ..
ابو محمد سكت شوي يفكر بعدها رفع نظره لسلطان .. خلاص ابشري يا ولدي راح نحجز للسعوديه ان شاء الله باقرب وقت ..
سلطان بفرحه وقف وراح باس راس جده وجدته .. ربي يخليكم لي .. يلا انا بروح انام .. قود نايت .. وطلع لغرفته ..
ام محمد .. والحين قول لي وش راح تسوي .. البنت كبرت وراح يبين عليها اثار الأنوثه .. والحين هي تبي ترجع السعوديه ..
ابو محمد وقف وبعصبيه .. قلت لك يا حصه لا تفتحين هالموضوع مره ثانيه كم مره اقولك .. وبعدين انا اعرف كيف اتصرف .. والسعوديه راح نرجع وكل شي راح يصير بخير .. وطلع لغرفته ..
ام محمد تنهدت .. الله يهديك بس .. وقامت تلحقه ..
..
..
..
عند سلطان .. دخل لغرفته وهو مبسوط واخيرا راح يحقق حلمه اللي ياما تمناه .. اخذ الروب حقه ودخل للحمام ** الله يكرمكم ** .. ياخذ له شاور .. ومن 3 سنوات وهو يحس ان فيه اشياء بجسمه غير المفروض ما تكون بجسم ولد بس ما قد فتح هالموضوع عند احد وحتى جده وجدته ما قالهم او حتى سالهم ليه .. ومثل كل مره يتروش فيها ينتبه لجسمه ومثل كل مره بس تدور في باله اسئله ولا يلاقي لها اجابه وفي الأخير يطنش ويكمل يومه عادي .. خلص وطلع وبعد ما لبس وجفف شعره راح لسريره جلس واخذ الحبوب اللي كانت على الكومدينه اللي متعود ياخذها قبل ما ينام .. وهي كانت فيتامينات .. اخذها وشرب مويه وانسدح عشان ينام .. وقت المنبه ونام ..
...............................

** وقفه تعريفيه **

ابو محمد .. رجل كبير بالعمر بس ما يبين عليه واحد من اكبر التجار بالمملكه .. شديد وعصبي وكلامه لازم يتنفذمهما كانت النتائج .. كان يحب ولده محمد كثير لانه ولده الوحيد والعزيز عنده .. فرح كثير لما عرف ان زوجه محمد حامل وكان متامل انها تجيب ولد عشان نسله واسمه ما ينقطع بس انصدم بخبر وفاه ولده وكمان بان الحفيد المنتظر هو بنت مو ولد .. وعشان كذا هو سوا اللي سواه .. وكمان لانه ما يبي كل حلاله يروح لاحد غريب يبيه لولده وولد ولده .. عنده اخوين وراح نتعرف عليها بعدين ..
**
**
**
ام محمد .. حرمه كبيره بالعمر بس عكس زوجها تماما حنونه وطيبه وطيبتها هي اللي ما خلت لها كلمه قدام زوجها .. كانت تحب ولدها وزوجته كثير وحزنت كثير على فقدانه وكمان حزنت على الي سواه ابو محمد بحفيدتها بس ما تقدر تقول شي ولا تقدر ترفض وكل يوم تشوف سلطان قدامها تتذكر انه بنت وانه انحرم او بالأصح انحرمت من انوثتها بس ضعفها قدام زوجها يخلي حفيدتهاا تتعذب اكثر ..
**
**
**
سلطان .. او بالأصح الجازي .. عمره 19 سنه ..من لما كان صغير والكل كانو يشبهونه بالبنات وهو لانه معتقد انه ولد كان يزعل وما يحب اي حد يقول عنه بنت .. من لما صار عمره 12 سنه بدا يلاحظ على جسمه شويه تغيرات وفي وقتها راح قال لجدته وام محمد قالت لابو محمد وهو بدوره جاب له حبوب فيتمينات وكانت هذي الحبوب تزيد هرومونات الذكوريه في الجسم عشان كذا بد سلطان يتعود على جسمه اللي بدا يكون شبه طبيعي كاي ولد بس فيه بعض الأشياء ما تغيرت اللي هي الحين ينتبه عليها بجسمه وما يقدر يقول لجدته او جده لانه يستحي .. اول ما فطن على الدنيا كان يفكر ان جدته وجده هم امه وابوا بس لما دخل للمدرسه وعرف يقرا ويكتب صار يلاحظ ان اسم ابوه غير .. وصار يسال جدته وقالت له ان امه وابوه توفو بعد ما انولد هو .. كمل حياته طبيعي وكان يشتاق انه يروح للسعوديه من كثر ما يتكلمون عنه جدته وجده .. وكان يستغرب ليه هو يدرس بامريكا مو بالسعوديه .. وقال له جده لانه عنده شغل هنا .. والسبب الحقيقي هو ان ابو محمد يبي يبعده عن الشباب .. لان هنا المدارس كلها مختلطه وماراح يدققون عليها اما بالسعوديه غير .. والحين هو فرح كثير لانه واخيرا راح يشوف السعوديه ويرجع لها .. اما بخصوص شكله .. طوله حلو يعني يناسب يكون طول ولد وجسمه رشيق متناسق .. ابيض عيونه سوده وواسعه وكانها مكحله ماشاء الله ورموشه طويله والا الحين كل من يشوفه يقول ان عيونه عيون بنات .. خشمه صغير ومرتب وشفايفه الزهريه بطبيعتها صغيره .. اما شعره اللي يوصل لاخر رقبته بلونه الأسود وملمسه الناعم وكان يحب يخلي له قصه ويحطها على جنب .. مثل الكوريين ودايم يشبهونه فيهم بسبب تسريحه شعره ..
.............................................








اليوم الثاني ..
الساعه 8 الصباح ..
صحى سلطان وهو مبسوط لان خلاص ارتاح من المدرسه وبنفس الوقت واخيرا راح يرجع للسعوديه قام دخل للحمام ** الله يكرمكم ** غسل وتوضى وطلع .. صلى الصبح .. وبعدها بدل ملابسه ونزل تحت وكالعاده شاف جدته تنتظره على طاوله الأكل .. جلس بعد ما سلم عليها .. وبدا يفطر معها .. وينه جدي ..
ام محمد .. افطر من بدري وراح عشان يخلص اجراءاتك من المدرسه وبالمره يحجز عشان نرجع للسعوديه ..
سلطان بفرحه .. واااو واخيرا ..
ام محمد ابتسمت على فرحته وهي تدعي بنفسها ان ربي يسسرها ..
شوي دخل ابو محمد وسلطان اول ما شاف قام يسلم عليه .. ها يبه حجزت ..
ابو محمد وهو يمسح على شعر حفيده اللي يحبه كثير .. ايه حجزت ورحلتنا على الساعه 3 ..
سلطان .. وااان مره مبسوط .. بروح اجهز شنطتي .. وطلع لفوق من غير ما ينتظر ردهم ..
ابو محمد كان يناظره وهو مبتسم ولما اختفى عن نظره لف على ام محمد .. قومي جهزي شناطنا ..
ام محمد قامت بانصياع .. ان شاء الله ..
.......................................






على الساعه 3 كانو سلطان وجدته وجده بالطياره متجهين للسعوديه .. وبعد عده ساعاتوصلو لارض المملكه الحبيبه .. وكان الوقت الساعه 6 الصباح .. نزلو من الطياره وخلصو اجرائات المطار ..وهم متجهين للبوابه ..
سلطان كان يتلفت يمين ويسار يشوف المكان والوجيه مبسوط انه يسمع ناس كثير يتكلمون عربي وهذا الشي كان فاقده لما كانو بامريكا ..لف على جده اللي توه مقفل من جواله .. جدي انا مره مبسوط . الحين وين راح نروح ودي اتفرج على كل مكان بالرياض ..
ابو محمد ابتسم له .. ان شاء الله راح افرجك على كل مكان بس اول شي راح نروح للقصر نرتاح بعدها اوديك اي مكان تبيه ..
سلطان ورجع يتفرج على الناس .. طيب ..
طلعو من المطار وكانت فيه سياره تنتظرهم .. ركبو واتجهو للقصر ..
وسلطان طول الطريق وهو يتفرج على كل مكان يمر عليه وكانه قد شاف هذي الأماكن من قبل ..
وبعد نص ساعه وصلو للقصر الكبير .. نزلو .. وام وابو محمد كانو يناظرون القصر بشوق من زمان عنه .. وتذكرو ان ولدهم كان عايش فيه ..دخلو للقصر وهم يمحون الذكريات الشينه من بالهم ..
وبعد ما دخلو جاو الخدم يسلمون عليهم وياخذون شناطهم ..
ام محمد .. سلطان تعال اوديك لغرفتك ..
سلطان لف على جدته .. لا لا تتعبين نفسك يمه الحين اخلي وحده من الخدم تدلني انتي ارتاحي ..
ام محمد ابتسمت .. طيب .. روح ارتاح ..
وبعدها طلع سلطان مع وحده من الخدم عشان تدليه على غرفته ..
اما ابو محمد جلس بالصاله ومعه ام محمد .. ترا ارسلت رساله لقروب العايله وقلت لهم يتجمعون عندي اليوم على العشى عشان اعرفهم على سلطان ..
ام محمد لفت عليه .. عبد العزيز انت متاكد من اللي راح تسويه ..
ابو محمد .. اي انا قررت وخلاص .. ومثل ما قلت لك خلي كل شي علي انا اعرف كيف احل الامور ..ووقف .. انا بروح اريح ..
..
..
..
اما سلطان اول ما دخل لغرفته انبهر بكبر الغرفه وجمال الأثاث وتناسقه .. طبعا ابو محمد مكلم الخدم يرتبون له غرفه وياثثونها قبل ما يجون .. رمى نفسه على السرير وغط بنوم عميق حتى من غير ما يبدل ملابسه من التعب ..
...............................................







وعلى الساعه 5 المساء .. صحى سلطان على صوت جدته اللي كانت جالسه بجنبه على السرير وتصحيه بهدوء .. رفع راسه لها وابتسم .. صباح الخير ..
ام محمد ابتسمت له .. قصدك مساء النور .. الحين حنا مساء ..
سلطان جلس .. اوه حنا بالليل الحين ..
ام محمد .. لا مو بالليل الحين الساعه 5 مابقى شي وياذن المغرب قوم عشان تصلي الصلوات اللي فاتتك ..
سلطان .. اوه ما حسيت بنفسي كانت النومه مريحه ..
ام محمد . عساك دوم مرتاح ..والحين يلا قوم ..
سلطان نزل من على السرير .. ان شاء الله قمت .. وشاف الروب معلق بجنب الحمام ** الله يكرمكم **اخذه ودخل .. وام محمد طلعت من الغرفه ونزلت لتحت عشان تشوف الخدم جهز للعزيمه او لا ..
اما سلطان بعد ربع ساعه طلع بعد ما اخذ دش ريح فيه جسمه .. راح لشنطته وطلع له تيشيرت عادي وبنطلون .. لبسهم وراح للتسريحه اللي مرتبه ومجهزه من كل شي .. اخذ المجفف وجفف شعره ورجعه كله على ورى .. وبعدها اخذ سجاده الصلاه وصلى الظهر والعصر اللي فاتته وبعد ما خلص قام و لبس ساعته المفضله واخذ جواله ونزل لتحت .. شاف جدته توها طالعه من قسم المطبخ .. هلا يمه .. وش السالفه اشوف الخدم حايسين ..
ام محمد ابتسمت له .. اليوم جدك عازم كل العيله عشان يتعرفون عليك .. وصارت تناظر في ملابسه .. انت وش لابس روح اكشخ العيله اول مره يشوفونك .. والود ودي تلبس ثوب ..
سلطان يحك راسه وهو يناظر لبسه .. اممم .. ورفع عيونه لجدته .. طيب راح اكشخ بس مسأله الثوب انسيها انا ما عمري لبست ثوب كيف تبيني البسه الحين .. خليه بعدين احاول اتعود عليه ..
ام محمد ابتسمت له .. ان شاء الله .. والحين روح تجهز لانهم راح يجون بعد صلاه العشى .. والحين اذن المغرب ..
سلطان .. طيب .. الا وين جدي عشان اروح اصلي معه المغرب بالمسجد انا ما ادل شي هنا ..
ام محمد .. جدك مو موجود عنده شغل الحين صلها بالبيت اخاف تطلع وتضيع ..
سلطان .. طيب .. وطلع لغرفتهواخذ سجاده الصلاه وصلى المغرب وبعد ما خلص فتح شنطته وصار يدور بملابسه لبس حلو .. اممم وش البس الحين اكيد كلهم راح يكونون لابسين ثياب مادامها عزيمه هذا اللي يقوله دايم جدي ان في العزايم الرجال يلبسون ثياب .. امم مالي الا اني البس بدله رسميه .. صار يدور بشنطته وطلع له بنطلون اسود وقميص ابيض وجاكيت رسمي اسود .. وصار يناظرهم .. يوه هذول يبي لهم كوي مره محيوسين .. خليني انزلها للخدم تحت يكونهم .. قام ولف بيطلع وانتبه لتليفون معلق على الجدار .. اوه كيد هذا مثل اللي في فلتنا بنيو نيورك .. وراح للتليفون وطلب وحده من الخدم .. دقايق الا هي جاته عطاها الملابس وقال لها تكويهم وهو رجع لتسريحه يناظر شكله .. امم الحين لما البس اسوي شعري مثل العاده ولا اغير .. يارب في هالحظه حسيت اني بنت ومحتار بنفسي .. هههههههههههه .. انتبه بصوت حد يدق الباب راح فتح وشاف الخدامه جايبه له ملابسه .. اخذهم وشكرها .. ودخل للغرفه وبدا يلبس الملابس .. وبعد ما خلص راح فتح شنطه الجزم وطلع له جزمه سوده مناسبه للبدله ورجع للتسريحه وشاف شكله وشعره مرجع على ورى .. امم كان شكلي كذا كويس .. لا لا ابي اسوي مثل العاده واشوف .. ونزل قصته على وجهه وحطها على جنب ورتب شعره من ورا .. وصار يناظر شكله وابتسم .. كذا شكلي مناسب .. راح لشنطته واخذ عطره المفضل وتعطر فيه .. وبعد ما خلص سمع اذان العشا .. مدري جدي جا ولا لسا .. خليني انزل واشوف .. اخذ جواله ونزل لتحت دخل للصاله وماشاف حد وتوه بيطلع الا يشوف جده توه داخل للصاله .. راح يسلم عليه .. هلا يبه ..
ابو محمد ابتسم على شكل حفيده .. .. اشوف كاشخ ماشء الله ..
سلطان .. ايه جدتي قالت لي انك مجمع العيله كلهم عندنا اليوم عشان يتعرفون علي وكذا قلت اكشخ .. وش رايك فيني ..
ابو محمد .. لا ماشاء الله عليك من عمرك كشخه .. يلا تعال معي نصلي العشى ونرجع عشان الضيوف ..
سلطان .. طيب .. وطلعو يصلون وبعد ما خلصو صلاه رجعو للقسر ..
ابو محمد .. سلطان يبه انت اطلع لفوق لما يجون الضيوف ويكتملون راح ادخلك عليهم كذا احسن ..
سلطان .. من جد احسن عشان مو كل شوي اعرف عن نفسي . يلا انا بطلع لغرفتي ولما يكتملون اتصل علي ..
ابو محمد .. طيب ..
طلع سلطان لغرفته وجلس يحوس بجواله يضيع الوقت ..سمع صوت سيارات وهرنات .. راح فتح الشباك وشاف سيارات كثيره موقفه بمواقف القصر .. وبنفسه .. اوه ماشاء الله شكلهم كثار .. الله يعيني .. سكر الشباك ورجع جلس على السرير .. شوي شاف جواله يرن .. رفعه ورد .. هلا يبه .. ايه جاهز .. ان شاء الله راح انزل الحين .. اي اي عارف .. طيب .. مع السلامه ..سكر من جده وشاف شكله بالمرايا .. ونزل لتحت وسمع اصوات ازعاج جايه من مجلس الحريم .. وبنفسه .. شكل حتى الحريم زحمه .. خليني اطلع قبل ما يطلع احد منهم .. وطلع من الباب الخلفي للفله واتجه لمجلس الرجال .. شاف جده ينتظره برا .. هلا يبه ..
ابو محمد .. خلك شوي هنا اذا قلت لك ادخل ادخل طيب ..
سلطان .. طيب ..
دخل اابو محمد للمجلس اللي كان مليان من الرجال .. احم ممكن تسمعوني شوي ..
المجلس كله صار هدوء لان هيبه ابو محمد تجبر الكل يسكت من اول كلمه ينطقها .. اول شي انا احب كل الموجودين من حريم ورجال يسمعون كلامي عشان كذا انا ركبت شاشه عند الحريم عشان يشوفوني ويسمعون كلامي .. والحين اكيد تتسالون عن الجمعه المفاجأه هذي .. انا جمعتكم لسببين .. السبب الأول لاني رجعت بعد 19 سنه غياب وحبيت اشوفكم والسبب الثاني اني راح اعرفكم على ولد ولدي محمد الله يرحمه .. طبعا كلكم تعرفون ان محمد وزوجته توفى بحادث الله يرحمهم بس ما تعرفون ان زوجه محمد كانت حامل وبفضل الله الجنين اللي كان ببطنها ما تأذى وطلعوه بسلام وانا ما قلت لحد لان وقتها تعرفون كيف كانت حالتنا .. بعد ما صار عمر ولد محمد سنه رحنا لامريكا عشانه عشان ما يحس بغياب امه وابوه وبنفس الوقت عشاننا حنا لان هذا القصر يذكرنا بولدنا الله يرحمه ..
الكل .. الله يرحمه ..
ابو محمد .. والحين راح اعرفكم على سلطان ولد ولدي .. ادخل يا سلطان ..
سلطان اللي سمع جده اخذ نفس يهدي توتره .. وبعدها دخل بكل ثقه .. السلام عليكم ..
الكل .. وعليكم السلام ..
الكل كانو مصدومين من شكله ما توقعوه بهذي الوسامه .. واللي يشوفه يقول هذا مليون بالميه انه اجنبي مو سعودي ..
سلطان انتبه لنظرات الكل المتفحصه واللي خلت التوتر يرجع له .. اخذ نفس وابتسم .. اعرفكم عن نفسي .. انا سلطان بن محمد بن عبدالعزيز ال .. عمري 19 سنه وتوي متخرج من الثانويه .. وانا مره مبسوط اني واخيرا قابلت اهلي وعزوتي اللي ياما تمنيت اني اتعرف عليهم ..
ابو محمد ابتسم .. سلطان اعرفك على اخواني .. عمك خالد وعمك سعود ..
سلطان راح لهم وسلم عليهم وباسهم على روسهم ..
ابو محمد والحين يا عيال اخواني كل واحد يقوم يعرف عن نفسه وعن عياله ..
الكل .. طيب ..
وقف واحد وباين عليه انه كبير بالعمر بس مو كثير .. انا عمك سعد بنخالد .. عندي 3 عيال وبنت وحده .. واشر على عياله اللي وقفو .. هذا سعود عمره 32 سنه ومتزوج بنت عمه .. والثاني عبدالعزيز عمره 24 سنه وهو يدرس ماجستير بالجامعه .. واخر العنقود ناصر وعمره 18 سنه يدرس بالثانوي ..
سلطان ابتسم لهم .. وم ردو الأبتسامه ..
سعد يكمل .. وعندي بنت اسمها ساره وعمرها 22 سنه وهي مخطوبه من ولد عمها بعد ..
سلطان .. ما شاء الله ..
جلس سعد وقام اخوه .. انا عمك راشد بن خالد عندي ولدين وبنت .. واشر على عياله .. احمد عمره 30 وهو خاطب بنت اخوي ساره .. وهذا مشاري عمره 23 سنه ويدرس بالجامعه .. وبنتي اسمها ديم وعمرها 20 سنه ..
سلطان .. الله يخليهم لك ..
جلس راشد وقام اخوه الثالث .. انا عمك ماجد بن خالد وعندي ولد واحد وبنتين .. واشر على ولده هذا ولدي البراء وعمره 22 سنه ويدرس بالجامعه .. وبنتي ريما وعمرها 29 سنه وهي زوجه سعود ولد اخوي .. وبنتي الثانيه رهف وعمرها 18 سنه ..
سلطان ابتسم له .. يخليهم لك ..
سعد .. وعندنا اخت وحده اسمها عايشه وعندها ولدين وبنتين .. واشر على عيالها .. هذا ولدها الكبير عبدالله عمره 33 سنه متزوج من برا العيله .. وهذا اخوه مشعل عمره 24 سنه و هو يدرس بالجامعه .. وبنتها الكبيره اسمها عبير وعمرها 28 سنه متزوجه من برا العيله كمان واختها رغد عمرها 22 سنه ..
الجد سعود .. والحين جا دور عيالي ..
وقف اول واحد .. انا عمك سالم بن سعود وعندي ولدين بس .. واشر عليهم هذا سلمان عمره 30 سنه ومتزوج من بنت عمه .. والثاني بسام وعمره 22 سنه ويدرس بالجامعه ..
سلطان اابتسم لهم ..
قام الثاني .. وانا عمك هشام بن سعود وعندي 3 اولاد وبنتين .. واشر على عياله .. هذاا ثامر عمره 33 سنه متزوج من بنت عمته .. وهذا فيصل عمره 23 سنه ويدرس بالجامعه ماجستير .. وهذا اخر العنقود حمد وعمره 15 سنه .. اما بناتي الكبيره سمر عمرها 29 سنه متزوجه سلمان ولد عمها والثانيه ريماس عمره 24 سنه ..
سلطان ابتسم لهم ..
الجد سعود .. وعندي بنتين .. الكبيره عمتك سعاد وعندها ولدين وبنت .. واشر على عيالها .. هذا خالد وعمره 32 سنه متزوج من برا العيله .. والثاني حامد وعمره 18 سنه .. اما بنتها اسمها خلود وعمرها 29 سنه وهي زوجه ثامر ولد عمها ..
سلطان .. الله يخليهم لها ..
الجد سعود .. وبنتي الثانيه اسمها مها وعندها بنتين بس .. الكبيره سحر وعمرها 30 سنه والثانيه اسمها ريوف وعمرها 21 سنه ..
ابو محمد ابتسم .. وبكذا خلصو كل العيله .. ادري كثار ويبيلك فتره على ما تحفظ اسماءهم .
سلطان .. اي اكيد بس ما عليك ان شاء الله راح احفظهم ..
ابو محمد .. ان شاء الله .. والحين يا جماعه تفضلو على العشى ..
وقامو الرجال يتعشون..
**
**
** وقفه تعريفيه **
اكيد ما حفظتو ولا شي من الأسماء اللي قلناهم من شوي .. الحين راح ارتبهم لكم عشان تعرفونهم وبذات ان اغلب الموجودين له ادوار مهمه بالروايه ..
نبدا بالجدان ..عبدالعزيز اللي هو ابو محمد .. سبق التعريف عنه ..
خالد اخوه اللي اصغر منه ..عياله سعد ..راشد .. ماجد .. عايشه ..
سعد بن خالد عنده 3 اولاد وبنت ..
سعود 32 سنه متزوج ريما بنت ماجد ..
عبدالعزيز 24 سنه يدرس ماجستير ..
ساره 22 سنه مخطوبه من احمد وزواجها قريب ..
ناصر 18 سنه يدرس بالثانويه ..
**
**
راشد بن خالد وعنده ولدين وبنت ..
احمد 30 سنه خاطب ساره بنت سعد ..
مشاري 23 سنه يدرس بالجامعه ..
ديم 20 سنه كمان تدرس بالجامعه تخصص تصميم ..
**
**
ماجد بن خالد وعنده ولد وبنتين ..
ريما 29 سنه متزوجه سعود بن سعد ..
البراء 22 سنه يدرس بالجامعه ..
رهف 18 سنه تدرس بالثانويه ..
**
**
عايشه بنت خالد ..وعندها ولدين وبنتين ..
عبدالله 33 سنه متزوج من برا العيله ..
عبير 28 سنه متزوجه من برا العيله كمان ..
مشعل 24 سنه يدرس ماجستير ..
رغد 22 سنه تدرس بالجامعه تخصص اداره
**
**
الجد الثالث .. سعود وعنده سالم .. هشام ..سعاد .. مها ..
سالم بن سعود عنده ولدين ..
سلمان 30 سنه متزوج سمر بنت هشام ..
بسام 22 سنه يدرس بالجامعه ..
**
**
هشام بن سعود وعنده 3 اولاد وبنتين ..
ثامر 33 سنه متزوج خلود بنت سعاد ..
سمر 29 سنه متزوجه سلمان بن سالم ..
فيصل 23 سنه يدرس بالجامعه ..
ريماس 24 سنه تدرس بالجامعه تخصص اعلام ..
حمد 15 سنه يدرس بالمتوسط ..
**
**
سعاد بنت سعود وعندها وولدين وبنت ..
خالد 32 سنه متزوج من برا العيله ..
خلود 29 سنه متزوجه ثامر بن هشام ..
حامد 18 سنه يدرس بالثانويه ..
**
**
مها بنت سعود عندها بنتين ..
سحر 30 سنه متخرجه وجالسه بالبيت ..
ريوف 21 سنه تدرس بالجامعه تخصص احياء ..
**
**
يارب انكم ما تخربطون ... ومع الروايه راح تعرفون مين الشخصيات المهمه منهم ..
..................................

وهذي هي البدايه وردودكم هي اللي تحكم اذا اكمل او لا ..

بانتظاركم..

naion97 18-01-2016 11:39 PM

رد: انا انثى ولكن !!...
 
ياهلاا صمتي سلاحي ،والله فرحت لما شفت انك كتبتي روايه ثانية انتي مبدعه ماشاء الله 😍 انا كنت متابعه لروايتك الاولى من خلف الكواليس
ما كنت مسجله فالمنتدى واعجبني اسلوبك فالكتابه .
وتمنيت تكتبي روايه ثانية
والحين ماتصدقي شكثر فرحت بهالروايه 😁
حبيتها وايد حلووه فكره غريبه وجديده مثل ماقلتي ،
بس قهرني ابو محمد كيف سوا كذا بحفيدته 😢
ويعطيها مثل هالحبوب وخلاها تعيش كأنها ولد طول هالسنين و الله انه غبي البنت كبرت واكيد يبين انها انثى واكيد بيكشفها احد انها بنت مب ولد .

متى البارت الثاني
متحمسه ايش بيصير 😊😊
كملي بأنتظارك 🙋

نهى عبد 19-01-2016 11:55 AM

رد: انا انثى ولكن !!...
 
السلام عليكم

الاسلوب والسرد بصراحة رائع
حلوة الرواية وفكرتها غريية زي ما حكيتي

بانتظارك

غرشوبه نعيميه 19-01-2016 03:45 PM

رد: انا انثى ولكن !!...
 
السلام عليكم
روايه عجيبه غريبه وأول مره اقرأ نفسها
ابدعتي مع أني تلخبط شوي بالشخصيات بس مع الوقت ان شاء الله بعرفهم

اسراء بنت احمد 19-01-2016 04:24 PM

رد: انا انثى ولكن !!...
 
البداية روعة ومتى البارت الجاي

بنت الاياويد SH 19-01-2016 04:43 PM

رد: انا انثى ولكن !!...
 
هلاااااااااااااااااوي .. صمتي ** الروايه غاوية كـ غواتش والفكرة ممية أدعوكم لقراءة الروايه العمانية الكوميديه
https://forums.graaam.com/605373.html#post27925431

ذربــة 19-01-2016 08:10 PM

رد: انا انثى ولكن !!...
 
سسسسلام عليكم
عوده قويه ومحمووده ي اختي
سجليني متااابعه معك

(اسير الشوق) 19-01-2016 08:39 PM

رد: انا انثى ولكن !!...
 
ياهلا والله براعية يوم الثلاثاء من ايام فرح وفارس وحنا نتلاقى كل ثلاثاء

فرحتيني والله الف مبروك الرواية الثانية واشكرك على الدعوة

يلا هذرت واجد اقرى وارجع ارد الى ذلك والوقت في حفظ الرحمن

فتى السلآم 19-01-2016 09:36 PM

رد: انا انثى ولكن !!...
 
بدايه موفقه بوركتي
انتظرك لاتتاخري اوكي
الجد بو محمد غلط والجده غلطة انها ماتكلمة
والزبدة ماتنسي انا المعجب النمبري


الساعة الآن +3: 09:53 PM.


موقع غرام موقع سعودي خليجي عربي يحترم كافة الطوائف والأديان ومختلف الجنسيات


SEO by vBSEO 3.6.1