ايزيس* "جوزاء"


هنا كل حاجة و العكس

بالمختصر المفيد هنا ترجمة تناقضات شخصيتى

اكيد كلكم عندكم تناقضات..ولا انا بس اللى سايكو هنا؟؟

يعنى اللى هيجى ع بالى هكتبو لكم هنا و اشارككم جنونى و هبلى و حزنى و غضبى!

هتعيشوا معايا لحظة بلحظة..و اوقات كمان ما وراء الحدث.

طبعا مش محتاجة افكركم ان اللبيب بالاشارة يفهم!!!



ايزيس* "جوزاء"

سمعت ان حماقى طلق مراته
دة فى حد ذاته شئ مخيب للاماااال

واحد حدق و نبيه هيطلع و يقوللى ,طب وانت مالك؟؟

هى مراته دى خالتك؟

هقوله لا يا خفيف...مهو امثالك اللى جابونا ورا بنظرتهم السطحية دى.

مشفتوش الاغنية اللى كان عاملها لها فى الفرح؟؟

"...و بقالى سنين بغنى للناس.. و من الليلة بس هغنيلها"

و بعد كل دة طلقها!!!

امال احنا بقى اللى محدش غنى لنا حتى كوكو واوا

هيجرى فينا ايه!

ايزيس* "جوزاء"

ايه البرد دة؟؟

اكيد بيهزر ,صح؟؟

دى سميااات يخوانا..

عارفين المقشة؟؟ اللى بنكنس بيها الارض دى

والله شعرها وقف من البرد!!!

و نصايح سريعة كدة عشان تفلت من مجزرة الشتاء السنة دى:

1_بلاش والنبى الدلع الماسخ دة بتاع بنات و عضعضة الشفايف
و تبلى شفايفك و تعملى نفسك مى عز الدين,
قوليلى ليه..اقولك لان دة هيخلى شفايفك تنشف و تقشف
ووقتها هتبقى مقشفة!! مش سكسى خالص يعنى.

2_ الاستحمام..تأكد انك اخدت كل ملابسك و منسيتش حاجة..
واهم ما فى الموضوع الفوطة او المنشفة!!
عشان متضطرش تفتح الباب و كرابيج الهوا الساقع تلسوعك

3-الجوانتى او القفازات و هاتو من النوع اللى من غير صواع عشان الموبايل touch

اه و بالنسبة للناس اللى بتقول بحب الشتا اكتر لانو رومانسى و انيق
والكلام اللى مبيأكلش عيش دة
احب اقولهم ......ولا بلاش الطيب احسن!

ايزيس* "جوزاء"

مسرح مصر..تياترو مصر سابقا

بجد الشباب دول ملهمش حل...و بالذات على ربيع ...

و البنت الكلبوظة دى ....

دة بقى يا جماعة مثال التحدى و الكفاح..ان الناس دى تعمل مسرح فى الوقت دة و
ينجح كدة يبقى بجد برافو...

طبعا الكلام دة للاستهلاك المحلى ...

اصلك مهما اشتغات و طلع عين اللى جابوك

و حظك مهبب يبقى زى ما قال سعد باشا زغلول

(مفيش فايدة)

اتغطى بينى انت و هى و ناااموا فى العسل الاسود و شخروا كمان

ايزيس* "جوزاء"

حد فاكر اغنية الاستاذ هانى شاكر:

"الذكريات المؤلمة"

طبعا محدش فاكر,لأن كل الذكريات منيلة بنيلا و شبه بعض اصلا!

انا مش من هواة هانى شاكر,لكن الاغنية دى بالذات مأثرة فى ذاكرتى

امبارح كنت بسمعها بالصدفة و افتكرت تعليق" احمد" ,عليها .من احمد؟؟

ملكش دعوة من احمد..

المهمالاغنية بتقول: "الذكريات المؤلمة و الجرح و الاحزان ضيوفى"

فجأة احمد قفل الكاسيت و قال كل دول؟؟ استاذ جرح و مدام احزان بنفسهم جايين للاستاذ

شانى هاكر؟؟ دة من ال**~*~* اللى كاتب الاغنية دى!

ايزيس* "جوزاء"

اغنية محمد رشدى (كعب الغزال)

كنت قاعدة مع نفسى و مزاجى رايق ع غير العادة,

و بديت ادندنها ..بصراحة الجلالة اخدتنى و صوتى على

و اندمجت اوى فى الكوبلية اللى بيقول:
"متبطل تمشى بحنية ...ليكون فى ازااااااز,,,ليكون فى ازز"

فجأة لقيت كل اللى فى المكت بيبصولى...و واحد مهم دمه خفيف شويتين

و بيستظرف ,قاللى "ازاز ايه؟؟ هو رشدى كان بيغنى من الحرفيين ولا ايه؟"

رحت عملت جوجل ع كلمات الاغنية,لقيتها (ليقوم زلزال) مش (ليكون فيه ازاز)

مع ان النسخة بتاعتى شاعرية اكتر والله!!

ايزيس* "جوزاء"

[b]بجد, مش عارفة ليه الناس دايما بتربط بين اللى بكتبه و حياتى الشخصية؟
مع انى بكتب حاجات متناقضة..معقول اكون عشت كل الاحاسيس دى؟؟
يا جماعة,الكتابة حياة اخرى..حياة بنتمنى نعيشها
او حياة نخاف تقرب منها...
حياة نحبها من بعيد من غير منلمسها
و حياة بنكرهها و نشمئز منها!!
شفتو بقى انا عايشة كم حياة ع الورق؟؟
و دة ميمنعش ان فيها خيط حرير من الحقيقة!!
[/
b]

ايزيس* "جوزاء"

فارس كرم !!!

الرجل دة من وقت كنت صغيرة و لحد دلوقت

شكلو واحد!!

مش بيتغير ابدا,, بالعكس دة بيحلو!!

يتوب علينا ربنا

ايزيس* "جوزاء"

الجوزاء

دة فى حد ذاتو ابتلاء من ربنا, انك تكون جوازائى

جوزاء باين من اسمو طبعا انو جوز!!

يعنى ازدواجية..

على سبيل المثال محدش ممكن يحس بالحر و البرد فى نفس الوقت

غير الجوزاء!!! ممكن يكره الشخص و يحبو كمان!!

يعنى انا مثلا بعيد عنكم و عن السامعين جوزاء!!

وحالتى الان:

"نصى بيضحك و التانى زعلان"

ايزيس* "جوزاء"

بجد انا مش بعرف افهم الناس الفضوليين دول

يعنى انا لو منهم اخلينى فى خيبتى احسن!!

بصراحة يمكن العيب فيا؟؟

يمكن انا مش من هواة المتابعة

عشان كدة مبحبش المسلسلات التركى

عشان كدة مبحبش الافلام الهندى

و عشان كدة مبحبش اتابع اخبار الناس!!

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1