اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
الإشعارات
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 28-08-2016, 12:00 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي مشارك¨°؛©
 
الافتراضي صيته ظبي النفود


السلام عليكم ورحمة الله وبركاته

هذه اول روايه اكتبها واتمنى ان تحوز على اعجابكم

انا راح انزل الروايه على حسابي في الانستقرام وعلى المنتدى في نفس الوقت تقريبا والاولويه للاكثر تفاعل




قبل 30سنه من الأن
انتقل حمدان وعائلته من البر للعيش في محافظة الدوادمي بعد مااقنعوه الجماعه ان الزمن تغير وان المستقبل للي يدرسون ومعهم شهادات
خلونا نروح لبيت حمدان الجديد في الدوادمي
والي اشتراه بقيمة البل (النياق)الي كان يملكها والحين مابقى معه غير 60راس من الغنم النجديه الي يبيع ويشتري فيها ويترزق منها
وهالغنم حطها في شبك في اطراف الدوادمي وحط عندها راعي وكل يوم الصبح يروح الها ويرجع الظهر يتغداء ويصلي العصر ثم يروح للحلال مره ثانيه ويرجع لبيته بعد المغرب وهذا روتينه اليومي
حمدان صارله من يوم نزل الدوادمي اسبوعين وكل يوم عشاه عند واحد من الجيران واليوم انتهى دول الجيران والعشاء عند حمدان نزايل بيته

بيت حمدان الظهر قبل الغداء حمدان توه جاي من عند اغنمه وجالس يتقهوى مع امرته واعياله
صيته :يمه تكفين ابدرس البنات يقولن المدرسه وش زينها تعلم كل شي
زوجة حمدان غزيل وكنيتها ام محمد
غزيل :ياعوق العلم التعلوم للعيال هم الي بيكدون ويتوضفون مهوب لكن يامهات اقرين
محمد :اخو صيته مابقى الى البنات سردادي مردادي في الشوارع يباالفيت بندرس
صيته :وش فيها لادرست وصرت بنتن ضفره وتعرف العلوم كلها يمه انتي ماشفتي كتب البنات والصور الي فيها يفحس تسبدي بس لو ادري وش الهروج الي فيها

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 28-08-2016, 12:02 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي مشارك¨°؛©
 
الافتراضي رد: صيته ظبي النفود


حمدان :ماعليتس منهم وانا ابوك ان قاله الله اني لدرسك ثم مافي البنات الي يدرسن زودن عنتس وانا ابوتس
غزيل :انت تقوله صادق يابو محمد
حمدان :صه يامره محمد واخوه سالم وحتى صيته كلبوهم بسجلهم في المدارس الناس ماعاد تعتاش الى بهاالشهادات والقرايه والكتابه
(محمد ظ،ظ،،سنه صيته ظ©سنين سالم ظ§ سنين)

صيته :ياطيب تسبدي ايه هذا العلم الزين

في اليل والجيران كلهم مجتمعين في بيت حمدان على نزالت بيته الرجال فارشين لهم زوالي في الحوش والحريم في الصاله داخل البيت

الحريم مجتمعات في الصاله يتقهون وام محمد في المطبخ تسوي عشاها وتسوي قهاوي للرجال وللحريم ومعها كم جاره تعاونها الي تغسل المواعين والي تصف الفناجيل في الطوافير والي تدير العشاء
اما عند الحريم الي في الصاله كانت صيته جالسه مع باقي البنات في جهه والحريم جنبهن في الجهه الثانيه وهن قريبات منهن ويسمعن سوالفهن

والبنات اجلوس يلعبن ويسولفن قامت شيخه وهي بنتن في عمر صيته ومير تاقف قدام صيته وتقوم تستبرم قدامها وتوريها ثوبها الجديد وتقول شوفي ثوبي شاريته اليوم جديد وش رايك فيه
صيته :يوم شافت الثوب عجبها وبرق في عينها بس ماحبت تبين لشيخه قالت :ماعليه بس نقشته كنها ذنب خصوي ولونه اشهب لونه خضر تسان ازين

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 28-08-2016, 12:04 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي مشارك¨°؛©
 
الافتراضي رد: صيته ظبي النفود


ام شيخه :لاوالله ياصيته ماصدقتي ثوب شيخه احمرن كنه نقعة الحنى مهوب اشهب والاشي

صيته :اجل بنتس هي الي مشهبتن ابه لاخد ولاقد
شيخه :هالحين انتي تحسبين عمرك مزيونه يوم تقولين شيخه لاخد ولاقد وانتي منتفتن كنتس جربوع مشوي
صيته :تخسين الجربوع انتي واشكالتس انا عيني عين غزال وفمي خاتم احضريه
الحريم اضحكن على هروجهن وقالت وحده من الحريم ياصيته يوم تقولين فمي خاتم احضريه خاتم البدويه وش علمه
صيته :الحضريه عصلا وخاتمها صغير اما البدويه دبيه وخاتمها كبير
ههههههههههههه الحريم دقنها ضحك على علم صيته
في المطبخ
ام محمد نظت الحم من القدر وكبست الرز وام فهد حرمت اخو ام محمد وساكنتن معهم في نفس الحاره جالستن عند القز الثاني تحرك الجريش
ام فهد :يام محمد ليتس خليتينا نسوي مريقيقه مع العشاء
ام محمد :ابدن الجريش يسد بس لاغرفتيه صبي عليه بلية سمن ثم ياسلام
ام فهد :عندتس صبوح نحطه مع العشاء الي يبي يصب على الجريشه والي يشرب الصبوح زين ويجيب العافيه
ام محمد :اي بالله عندي ماني برفلا يخلا بيتي من السمن والمضير والصبوح ياعوق العلم ان قلطت العشاء وماشاف حمدان طوس الصبوح على جنوب الصحن منا ومنا جت علوم
ام فهد :اي بالله صدقتي الحرمه الظفره تخض حليبها وتنقى زبدتها ولاتخلي على بيتها قاصر

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 28-08-2016, 12:06 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي مشارك¨°؛©
 
الافتراضي رد: صيته ظبي النفود


نرجع لصيته وشيخه
الي رجعن يلعبن ويسولفن ونسن المناقر الي قبل شوي صار بينهن
شيخه :يبنات وش رايكم نلعب حريم
صيته :انا الام
شيخه :وانا الابو
نوير :وانا البنت
صالحه :وانا البنت الثانيه
صيته :اجل خلنا نقوم نلعب في الحجره عن الحريم
البنات كلهم يالله مشينا
صيته :حلتي بالبخنق حق امي وبسجادة الصلاه
البخنق بالبسه والسجاده ابا ابرمها ثم احطها ورعي الصغير
نوير :وانا حلتي بشرشف الصلاه بحطه الي بشت
صالحه :انا باخذ سبحة امتس الطويله واعلقها في رقبتي تسنها قلاده
شيخه :وجع كلكم لقيتو شي تلعبون به وانا وش اسوي
صيته :ابك يالخبله انتي اخذي المكنسه ام عصا وحطيها موتر
شيخه : اي والله انك صادقه ،وراحت تجيب المكنسه ورجعت تلعب معهن
شيخه :حاطه عصا المكنسه بين رجليها ومخليتها تسحب وراها وماسكه كشة المكنسه كنها دركسون شغلت الموتر ياحريم اركبن بنروح نحلب الغنم ونطعمها
صيته :انا مقدر اروح معكم ورعي مشغلني ماغير يصيح ووجهه مصوفر مدري وش علمه

شيخه :اجل بروح يم الغنم انا والبنات وانتي خليتس عند ورعتس
نوير وصالحه ركبن مع شيخه الموتر وراحن يم الغنم الي هي مخاد الحجره
شيخه :يانوير احلبي الشياه
وانتي ياصالحه حطي التبن في المناقل
نوير وصالحه :ابشر يبه وكملن لعب لين حطو العشاء وكلن تعشاء وسرا لبيته

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 28-08-2016, 12:07 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي مشارك¨°؛©
 
الافتراضي رد: صيته ظبي النفود


وصف الحاره
الحاره جايه بشكل تقريبا مربع
البيوت مصفوفه جنب بعض ثم مدخل للحاره ثم صف ثاني ينتهي بمدخل ثاني وهكذا حتى تنتهي بشكل مربع المسجد في وسط هذا المربع
على جنبه من يمين بنسبه لبيت حمدان براحه كبيره وهي عباره ارض فضاء ولا يلتصق بلمسجد مباني اخرى فهو في وسط المربع بنسبه للحي يسار المسجد مع صفة البيوت بيت مزنه البياعه وبنتها مصيونه وولدها مصلح
في الجهه المقابله للمسجد من جهته الخلفيه فيها دكان تابع لاحد البيوت والي يبيع فيه شايب اما الدكاكين الزينه موجوده على الشارع العام بعد هالدكان بصفة ابيوت
مدرسة البنات في نفس الحي ومدرسة العيال في احي او الشارع الثاني
نجي لبيت حمود له بابين باب الرياجيل تدخل منه على حوش كبير وعلى يسارك في نفس الحوش المشب وقدمك باب تدخل منه تلقى على يمناك باب المجلس وعلى يسراك باب المقلط وهي تفتح على سيب وسيع شوي هالسيب تمشي معه تلقى على يمناك مغاسل الرجال وحمامهم وعلى يسراك الدرج الي يودي لسطح
وقدامك باب ثاني يدخل على قسم الحريم امتداد لسيب ثم يسارك المطبخ يفتح على صاله كبيره
ومقابل للمطبخ حجره جنب الحجره مغاسل الحريم وحمامهن ثم حجرتن ثانيه بعد تفتح على الصاله وهذي حجرة البنات والحجره الاوله حجرت حمود ومرته اما العيال ينامون في المقلط ولاقامو شالو فرشهم
اثاث البيت عباره عن فرشه قص على البيت كله طبعا من النوع المشجر والرخيص الا مجلس الرجال زل حمر ومخاد ووالمقلط بعد زل والغرف كلها والصاله معها فيها مخاد ومراكي للجلسه
غرفة حمود ومرته فيها كرفايه تجي على الجدار الي يمين الباب وينامون على دواشق وبطاطين ولاقامو اركوها على الجدار
غرفة صيته بعد فيها كرفايه وتنام هي واخوانها على فرش من السفنج الخفيف والاقامو يطبقونها ويحطونها فوق الكرفايه هي والمخاد والبطاطين
اما الملابس وباقي الاغراض يطبقونها ويحطونها داخل دروج الكرفايه
وفيه مخزن يجي بابه على السيب الي يروح يم الرجال يمينك وانت داخل من يم الرجال فيه ثلاث كرفايات يحطون فيها اغراضهم الي مايحتاجونها كثير زايد فرش الضيوف وقدور الضيفه وخياش الرز والطحين الكبار
اما المطبخ اثاثه عباره عن وظم وهو ليحان تدق في الجدار على شكل ارفوف وبعضها يجي على شكل طاوله كبيره يحطون مواعينهم وعيشتهم فوقها
اما القز عندهم قزين واحد ابو عينين لشغلهم اليومي وواحد عين وحده مربع حديد وقوي هذا لطبخ الذبايح وتنحط مباشره على الارض اما حق الذبايح يشيلونه في المخزين لحين عازته
على جدار الحوش من برا قدام بيت مناحي يمين اعتبت بيته للي ظاهرن من البيت دكه عباره عن مكان يصف على اطرافه بلك على شكل مربع يصب فيه شحنة اتراب وتساوى بحيث تكون مرتفعه عن الارض شوي وهالدكه بين بيت حمود وبيت صفوق ابو شيخه والي مسويها حمود
عاد هالدكه لجلسات اليل البارد يطلعون فيها زوليتين اخفاف حمر ويحطون على الجدار كم مخده مع مراكيها ويجلسون فيها الرجال والشباب ومرات يشاركنهم الحريم الجلسه او يجلسن فيها لاصارو الرجال ماهم بموجودين
نرجع لباب الحريم باب الحريم تدخل معه على سيبن طويل يجي عرضه مترين ونص ثلاثه امتار حولها المهم هالسيب يمتد ثم يلتف ورا البيت وانت داخلن معه تمشي مسافه ثم تلقى باب الصاله يسارك ولا دخلت تصير غرفت حمود على يمناك والمطبخ على يسراك
وكل بيوت الحاره مشابهه لبيت احمود
نسيت اقول انه في نهاية الحاره من يم بيت حمود وبعد بيته بشلقت بيوت فيه بيت خرابه مهدم وبعض الغرف مازالت قائمه لاكنه مليان زبايل ووصخ ويقال انه مسكون
البراحه الي قدام البيوت يمين المسجد يلعبون فيها الشباب كوره
وهي عاده المكان الي يجتمعون فيه شباب الحاره ان ماراحو يسربتون حول المحطه
ويحطون فيها احتفالاتهم الي عنده حفلتن كبيره مثل عرس وكذا لاباس انه يحطه في هالبرحه

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 28-08-2016, 12:11 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي مشارك¨°؛©
 
الافتراضي رد: صيته ظبي النفود


الشخصيات
عائلة حمود
حمود راعي حلال ورجال طيب راعي نخوه وكرم وعلومه غانمه

زوجته غزيل حرمتن ظفره ومتنوعة المهارات (ماعرفت اكتبها بلبدوي اسعاف ياجماعه )
تسوي المضير والسمن وتخيط الثياب وتخيط البراقع وتطرز الشراشف وطباخه ماهره
محمد اكبر اعيالهم مازال ورع
وصيته بنتهم الي اصغر من محمد متوسطة الجمال بس مملوحه وظحكتها جذابه
تقدرون الكارزما عندها طاغيه على الجمال
سالم اصغر من صيته بسنتين
جارهم صفوق
رجالن اجودي ومحبوب بين الجيران نفس حمود يبيع ويشتري في الحلال
وشريطي سيارات
حرمته جوزاء راعيت بيت ذربه ومزيونه
ولدها نمر في سن محمد وخويه
بنتها شيخه وهي بعمر صيته وازين منها
جارهم الاخر
مضحي اخو حرمت حمود وخال اعياله
وهو راعي الدكاكين الي في المحطه
حرمته قمرا وهي مزيونه وحرمتن سنعه
ولدهم فهد اكبر من محمد بسنه وصديقه
بنتهم ساره كبر صيته وازين بنات الحاره
وهي صديقة صيته وخوياتها
تركي كبر سالم وصديقه
جار اخر في نفس الحاره
مساعد مدرس عربي في مدرسة العيال
زوجته مريم كجميع حريم الحاره ربت بيت
بناته نوير وصالحه
نوير كبر محمد وشينه
وصالحه كبر سالم متوسطة الجمال
اخوهم سعد كبر صيته وشين
مع شلت سالم وربعه وهو اكبر من سالم بسنتين
فيه شخصيات مهمه راح تضهر في وقتها
وشخصيات ثانويه كذالك كلن يتهايق عليكم من دواعيس الحاره في وقته
يوم جديد مع صيته وشلتها
على فكره بيت شيخه يمين بيت صيته لاصق فيه وبيت ساره لاصق في بيت صيته من يسار عشان كذا هالثلاث اغلب وقتهن جالسات على عتبة بيت صيته
بنات الحاره لبسهم المعتاد ثياب بعضها جميل والبعض الاخر لايجد طريقا للجمال ومع ذالك هي في نظرهم مره واو ��ماعليكم من الواو السان يزلق ��
المهم صيته لابسه ثوب مورد لونه ادهم (عناب)وشعرها مظفرته قرنين
ساره لابسه ثوب اشهب (فستقي) مطرز صدره بخيوط بنيه وشعرها جادلته قرن واحد
شيخه لابسه ثوب اخضر ساده وفي صدره ورود حمر وشعرها مجدول قرنين
كانن البنات جالسات على عتبة بيت حمود ويسولفن صيته جالسه بين شيخه وساره :يالوفي لوفاه يابنات عانن الورع الي هناك تشر على ولد يمشي في الشارع راجع لبيتهم من الدكان
شيخه :ايات
صيته :ابو قذيله يبيض الورع بيضاه ابك هو علامه حمر عطر جايه برص ولا وش علمه
ساره :يامهبوله هذا عصام ولد عطيات المدرسه وبوه تختر هذى من ديرتن ثانيه مهوب من ديرتنا حتى هرجتهم تختلف عن هرجتنا
شيخه :صادقه ساره لاهرج مدري وش يبربر فيه بعض هروجه افصحها وبعضها مدري وش يقول
صيته :ياوجه الله ابك بياضه يجهر العين
شيخه :عاد مهوب من زين بياضه تسنه بوية هايلكس جديده
ساره :ايه يع من البياض الي كذا خص على الرجال والله ان الوانا ازين منه مير لو نتخبى كم يوم نطلع تسنا الزبده
صيته :ماتبنا نروح نشتري من عند البياعه

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 28-08-2016, 12:14 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي مشارك¨°؛©
 
الافتراضي رد: صيته ظبي النفود


صيته :ماتبنا نروح نشتري من البياعه
شيخه : جبتيها ياصيته انا معي ريالين بشري عسكريم اكياس وغوار
ساره :انا معي ثلاثة اريل وبشري مثل شيخه وزودن عليها علك ونتقاسمه
صيته :انا معي خمسة اريل بشري مثلتسن وتزود وبدال العلك بشري حلاو مصاص ونتقاسمه
ابدخل اعلم امي انا بنروح للبياعه وانتن روحن علمن امهاتكن وارجعن بسرعه
قامت صيته وقامن البنات معها وكل وحده راحت تعلم امها صيته دخلت تركض وصدمت محمد وهو طالع من الباب الداخلي بيطلع بغا يطيح من قو الصدمه
محمد عقد حجانه وحتدة نظرته لصيته وصرخ عليها عما يعميك ماتشوفين انتي دايم مربوشه
صيته : انت الي ماتشوف انت ظهرت قدمي مثل الجني وش دراني عنك انا وسفهته ودخلت عند امها ومحمد طلع للعيال
صيته دورت امها ولقتها في المطبخ حاطتن لها مركى قدم القز ومركبتن على القز قدرن وسيع وجنوبه قصار كنه طشت وفي القدر حليب غنم يطبخ وهي تحركه بستمرار عشان مايحترق وتحتريه لين يتبخر ماه ومايبقى غير اللتيحه
وام صيته جالسه على المركى اقبال التيحه تحركها
دخلت عليها صيته :يمه تراني بروح مع البنات للبياعه بنشتري
ام محمد :روحي واعجلن علي لاتبطن
صيته :طيب يمه
وعند البياعه اشترن الي يبنه وعطن البياعه فلوسهن ويوم شيخه عطت البياعه الريالين الي معها ومير والبياعه تعطيها صيته زود الخمسه
يوم شافتها شيخه تعطي صيته اريالاتها ومير تمعط صيته بشوشتها وتقول عطيني اريالاتي والله لتجيبين قروشي الي عطتسيها البياعه وصيته تمعطها بشوشتها مثل مامعطتها والبياعه تفرق بينهن قالت ابك هاتي الريالين ياصيته وهاك الريالين هذي بدالها ومير تاخذ صيته الريالين ويعودن لبيوتهن


يوم اخر من ايام صيته
المدرسه قربت وصار الجميع يستعد لدراسه البنات خيطو لهن مراييل والعيال اشترو ثياب جديده ......الخ
واليوم بتروح صيته واخوانها مع ابوهم للمكتبه عشان يشترون دفاتر واقلام وجميع لوازم الدراسه
داخل المكتبه صيته واقفه قدام ارفف قصص ومجلات الاطفال وهي منبهره بالوان القصص ورسوماتها وقامت تاخذ كل قصه او مجلة اطفال يعجبها غلافها
حمود :صيته رجعي الي اخذتيهن هذي يشترونها الي يعرفون يقرون وانتي توك ماتعرفين شي
صيته :تكفى يبه باخذه المدرسه بتفتح بعد بكره وانا بتعلم القرايه واقراها كلها
حمود ماحب يكسر خاطرها وخلاها تاخذها وهي طارة من الفرحه
ارجعو للبيت وصيته واخوانها نزلو اغراضهم من السياره ودخلو مع ابوهم داخل البيت
ولقو ام محمد جالسة في الصاله تخض صميلها
حمود :السلام عليكم
ام محمد وعليكم السلام اسويلك قهوه تقهوى
حمود: كان عندك سمن تعفكين به بلية تماره ومضير سوي قهوه وكان مافيه لاتسوين شي
ام محمد :ابشر بالعفيكه والقهوه والعلوم الزانه
وقامت تسوي قهوتها
صيته راحت لحجرتها وقامت تتفرج على القصص والمجلات الي شرتها وتوعد نفسها انها بتقراها قريب ثم جمعتها كلها بعد ماخلصت من التفرج عليها ودخلتها درج الكرفايه وقفلت عليها
محمد وسالم تركو دفاترهم واقلامهم في الصاله بعدم مبالاه وراحو يلعبون في الشارع
في الشارع
فهد يسئل محمد هاه بشر عساكم خلصتو من مقاضي المدرسه
محمد :ايبله خلصنا لو تشوف صيته ماخلت من الكتب الي في المكتبه شي ماشرته
فهد ( ظ،ظ¢سنه ويدرس في سادس محمد هذي السنه هو وسالم وصيته يدرسون في اولى ابتدائي لانهم متاخرين عن الدراسه وفي ذاك الوقت كانو يقبلون الي بهالعمر في اولى ابتدائي عادي )
فهد :وش كتبه الي شرتها وهي ماتعرف تقرا
محمد :مدري عنها راعي المكتبه يقول هذي قصص ومجلات اطفال وهي تقول بتعلم واقراها
فهد : بتفكير وتعجب ماهي بسهله هالصيته

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 28-08-2016, 12:20 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي مشارك¨°؛©
 
الافتراضي رد: صيته ظبي النفود


بيت حمود الوقت العصر حمود ومرته يتقهوون
في الصاله صيته تحل واجباتها في حجرتها
حمود:وين محمد وسالم مالهم حس
ام محمد :محمد وسالم يلعبون كوره مع اعيال الحاره في الشارع
حمود :انا بمشي للحلال هالحين وببات عنده عشان لاصبحت باجلب شلقت روس لسوق الخميس كان عندتس سمينه ومضير عطنيها ابيعها معي
ام محمد :عندي اربع عكك سمن وظ،ظ اخياش مضير وعندي مطبقيتين زبده وعندي عشر سفر خوص مسويتهن بيدي اخذهن كلهن وبعهن بلي يقسمه مقسم الارزاق
حمود :ونعم بالله اجل اعجلي علي زهبي اغراضتس يامره
ام محمد :ابشر وتراني الليله بسمر عند اخوي ابو فهد
حمود :ماهنا خلاف الباب جنب الباب ان رحتولهم وان جوكم كله واحد

المغرب في بيت ابوفهد
ام فهد وام محمد مسويات قرص محموس وحليب وجالسات هن واعيالهن وبناتهن ياكلون قرص ويشربون حليب
ام فهد :ابك شغلو التلفزون ياعيال جت التمثليه البدويه
قام فهد وشغل التلفزيون وكان يبث موجز الاخبار
اول مارفعت ام محمد راسها يم التلفزيون لعينها في عين المذيع الي يذيع الموجز
ام محمد :خمت ملفعها وهي تصيح يفضحي فضحاه ابك الرجال شافني مفرع وتغطى بلملفع
وفهد والعيال يفقعون ضحك
فهد :ياعمه هذي صوره انتي تشوفينه وهو مايشوفك
بعد ثلاث سنوات انتقلت حيات اهل الحاره نقله نوعيه وصار كل البيوت فيها تلفزونات ملونه وتلفونات في البيت وبدل الكرفايه والوظم ركبو غرف نوم صناعه وطنيه ودواليب للملابس
والمطابخ صار تركب فيها دواليب خشب خاصه باالمطابخ وفرن بدال القز وثلاجه وغساله والمهم صيته البنت المتفوقه دراسيا والي ماتنقطع رجلها عن المكتبه والي صار في غرفتها مكتبه صغيره مليانه قصص اطفال ومجلات
الان الطلاب معطلين العطله الصيفيه
صيته واقفه مع ساره وشيخه في حوش بيت ابو فهد ويسولفن قريب من باب الشارع والباب مفتوح
ساره :يوه يابنات طفش وش نسوي
شيخه :ايه زهق بلحيل فكرو في شي نسويه
هنا فهد كان يمشي يم باب بيتهم بيدخل ووقف عند الباب قبل يدخل على كلام صيته
صيته :انا عندي فكره خلونا نروح للبيت المهجور ونشوف وش فيه
شيخه شهقت مجنونه انتي هالبيت مسكون كل الناس يقولون فيه جن كيف نروحله
ساره :صادقه شيخه اهلنا دايما يقولون لاتروحون له عشان الجن مايسرقكم
صيته :عاد انا ماني مصدقه هالسوالف كلها وبروح اشوف بعيني بتجن معي امشن ماتبن تجن كيفكن بس والله ثم والله الي تعلم احد اني بروح للبيت المهجور لاأوكلها تبن
فهد سمع كل شي وسبق البنات للبيت المهجور
ساره :انا دوم معك على السراء والضراء
صيته :بعدي انا فدا هالعيون الي كنها عيون غزال
شيخه : خلاص اجل دامنتسن مصملات حتى انامعتسن في فيه والافي رمضاء
صيته :امش يابو رمش هذا الحتسي الزين وانا دوم قدام قدام على شر والاعلى قداء
راحو البنات للبيت المهجور وقبل يدخلون مع بابه المخلوع اساسا قالت صيته اسمعن قبل اي شي خلونا نقرا المعوذات وسورة الفاتحه واية الكرسي ونستودع الله انفسنا
شيخه :ياويلي ويلاه يعني انتي عارفه انه البيت مسكون صدق وجايبتنا اله تبين الجنون يسرقونا
ساره :صيته تكفين خلينا نهون والله ان قلبي يتنافظ من الروعه
صيته :بس انتي وياها انا داخله داخله بتجن ياهلا ومسهلا ماتبن تدخلن معي قلعتسن تقلعن للبيت وانا بدخل الحالي ويوم اقول اقرن قرآن القرآن حفظ من كل شر وقرنت كلامها بلفعل ودخلت للبيت وشيخه وساره بس شافنها دخلت اندعسن وراها وهن متمسكات في ثوبها من ورى ويرجفن من الخوف اول مادخلت صيته شافت الجدار الخارجي للبيت مهدوم بحيث اصبح مفتوح من احد جهاته على الشارع كانن واقفات في حوش صغير وقذر مليان كراتين وليحان وقراطيس ووصخ اشكال والوان وعلى يسارهن غرفه بابها حديد متقشره بويته ومصدي والباب مفتوح والشباك نفس الشي حديد متقشر ومصدي قدام يمين غرفه ثانيه على نفس الحال جزء من جدارها منهدم والزباله تعم المكان البيت شعبي ويتكون من غرفتين ومطبخ وصاله صغيره وحمام واحد كان خالي من اي شي عداء اكوام الزباله والاوساخ في كل مكان شافن الغرفه الاولى مافيها شي راحن تجاه مااعتقدن انه المطبخ ولم يجدن شي سواء المزيد من القذاره بدن يحسن بالأمان نوعا ماء وبدن يسولفن صيته بظحكه ههههههههههههههههه هاه اشوف الجنون تردح في كل مكان ماقلت لتسن لاتصدقن كل شي تسمعنه ساره صادقه ممدى ساره تكمل كلمتها
الاسمعن صوت قربعه وصوت مثل ظرب الصيجان هنا ساره وشيخه انخلعن من الخوف وقامن يصيحن باقوا ماعندهن من صوت وتغانمن الباب يركضن ومن الربشه والخوف رثعت شيخه في لوح وطاحت وطاحت ساره فوقها لانها في طريقها ومع طيحتهن زادت الاصوات قوه وهذا الي خلاشيخه وساره ينقزن من طيحتهن مثل الغزلان ويركضن للباب وماوقفن الى على عتبة بيت ساره وهن يتنافظن من الخوف شيخه يمه ياويل قلبي الجن بغاء يسرقنا ياويلنا ويلاه اخاف يلحقنا ساره صيته ماطلعت تهقين اسرقوها الله ياخذهم اخاف سرقوها صدق وش نسوي هالحين
نرجع لصيته في البيت المهجور يوم سمعت الصوت وشافت البنات يتصايحن دخلها خوف وصارت تقراء قران وتردد اية الكرسي في صدرها
بس ماقدرة تطلع قبل ماتمشي يم مصدر الصوت وتاكد بنفسها وش هالصوت ومن وين جاي استجمعت شجاعتها وسمت بالله وبدت تمشي اتجاه الصوت اشوي اشوي وتفكر في الصوت وتحاول تحلل في مخها هالصوت وشهو صوته ماكنه صوت حديد يقرع بعصاء معقوله في احد قاصد يخوفهم طيب من وليه وقامت تقدم شوي شوي لين طلت براسها مع فتحت الباب وشافت فهد واقف ومعه عصاء مكنسه طويله ويقرعبها صفايح حديد طايحه على الارض واول ماحس بخطواتها تقرب منه طلع قدامها كان يناظرها بتعجب ودهشه من شجاعتها ومستغرب ثباتها وانها ماهربت نفس البنات الثانيات
اما صيته كانت تناضره بغضب وعصبيه من الي سواه في صديقاتها وكيف روعهن وطير قلوبهن
صيته بغضب :انت صاحي والامجنون يوم تروع البنات تسذا بغت تزوغ عقولهن
فهد ببرود وترقب :انتي ليش ماخفتي والازاغ عقلتس مانتس بنت مثلهن
صيته :(قُلْ لَنْ يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا غڑ وَعَلَى اللَّهِ فَلْيَتَوَكَّلِ الْمُؤْمِنُونَ)
وانا مااخاف الا من الي خلقني قالت كلمتها وطلعت بغضب من تصرف فهد الاحمق والغبي
اما فهد وقف مكانه يتأملها وهي طالعه من عنده بصمت وفي داخله يقول مانتي بسهله ابد ياصيته

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 28-08-2016, 12:24 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي مشارك¨°؛©
 
الافتراضي رد: صيته ظبي النفود


صيته الحقت البنات ولقتهن للحين واقفات على باب الشارع ينتظرنها والخوف ظاهر عليهن وبس شافنها طالعه من البيت المهجور راحن يركضن يمها ساره وعيونها مليانه دموع خوفتيني عليتس ليه ماطلعتي معنا
شيخه من بين شهقاتها وهي تبكي حنا نحسبن الجن سرقوتس وراتس ابطيتي
صيته :هههههها يالخوافات ترا الصوت مغير فهد يقرع الحديد بعصا مكنسه يبي يروعنا هه حتى شوفنه طلع من البيت
شيخه الله ياخذه المروح روعنا
ساره :يهبي تهبين في وجهتس لاتدعين على اخوي بس فهد وش دراه انا بنروح للبيت المهجور
صيته :يقول سمعنا يوم نتفق في الحوش وسوى سواته يبي يختبرنا حنا خوافات والا
ساره :بلعون انا خريش من دون اختبارات والاشي
صيته :تعقبين انا ماني بخريش وانا بنت ابوي
شيخه :انتي مرات احس انتس رجال من قو باستس
ساره :وانا اشهد صيته ذيبه ماتهاب
عند فهد طلع من البيت المهجور وشاف محمد ونمر يلعبون مصاقيل قدام البيوت وراح الهم وهو يضحك فاتتكم خرشت البنات ياعيال بغت تزوغ اعقولهن في البيت المهجور
نمر :والبنات وش وداهن البيت المهجور
فهد علمهم بالسالفه كلها
محمد :بعدي اختي انا اشهد انها ذيبه
نمر :ياعزي لختي شيخه عزالله انها تذل من ظلها
فهد :وساره اردى من شيخه مير صيته طلعت شيختهن كلهن
بعد الغرب البنات دخلن للبيوت وفهد ومحمد راجعين مع ابوانهم من صلات المغرب
ابو فهد انا بتقهوا عندك يابو محمد لي يومين ماشفت اخيتي
فهد سبق ابو محمد بالرد :اختك واخته مجتمعات على القهوه
ابو محمد جمعتهن في بيتنا ولافي بيتكم
فهد :في بيتنا
ادخلو الرجال بيت ابو فهد ولقو الحريم باسطات الزل في الحوش ومضبطاتن الجلسه
ويوم شافن ابو فهد وابو محمد دخلو عليهم ويفزن واقفات ويهلن ويرحبن وقمرا تسلم على راس ابو محمد وشلونك ياخوي عساك بخير
ابومحمد :بخير من الله
وغزيل تسلم على راس ابو فهد وتنشده عن الحال ثم جلسو يتقهوون ويسولفون
غزيل :اليوم مجتمعين وش عندكم
ابو فهد :لولا جمعتنا ماجتمعتن اذكر يوم اتفق انا وحمود انه كل واحد منا ياخذ اخت الثاني علشان نبقى مع بعض طول العمر مير حمود خونبي من تالي وجازتله قعدة البر مابغى ينزل الديره
ابومحمد :لابالله مارخص قربك يابو فهد مير انت تخبر ابوي الله يرحمه ويغفرله مايداني الديره وبيوتها وانا ملزومن فيه وعلى رايه
قمراء :على طاري ابوي الله يرحمه ماعرفتو وشنهي وصيته
ابو محمد :وصيته عند ابو مرزوق كاتبها ولده مرزوق في ورقه وموقعن عليها ابو مرزوق واخوه عبد الله شهود ومن يومها وهي عنده في ظرف مسكر ويقول مايسلمها الى بحضوري وحضور اخوي ابو وليد بعد عشر سنين على وفات ابوي الله يرحمه وهذا على وصية الوالد
ابوفهد :ابومرزوق ماعلمك وش فيها الوصيه
ابو محمد :يقول الوصيه امانه ومايعلم وشهي عنه لين يجي وقتها ويسلمها لنا زي ماوصاه ابوي والعشر سنين ماراح منها غير ظ¤ باقي ظ¦سنين ان الله احيانا
ابو فهد :ابووليد ماجاك عنه من بعد جيته في العيد
ابو محمد :اكلمه ويكلمني ماعليه طيب والمواجه والله ماواجهته تخبر في الرياض وعسكريه وعياله يدرسون ولاعطلو وداهم عند خوالهم في الجنوب ومن توفي الوالد واهله ماعاد يجون معه اما خلاهم عند خالهم الي في الرياض والاراحو لجدهم في الجنوب
ابو فهد :ايه هو ماله علينا خاطر من اول ويوم توفي عمي قصر رجله مرتن وحده حتى العزيمه مايعزم
قمرا :الله يصلحه من يومه قلبه صاد وقاسي ماكنه اخونا ورابن معنا

في يوم اخر من ايام الحاره
جمعة الحريم في بيت ام فهد
وكل الحريم موجودات ام نمر وام سعد وام محمد واكيد راعية البيت ام فهد الحريم جالسات في الصاله يتقهون ويسولفن ولجتهن واصله لاخر الشارع ام محمد :يام سعد العلم الي سمعناه صحيح
ام سعد :وشهو علمتس يام محمد
ام محمد :يقولون مساعد تجوز عليتس واخذ ورعه
ام سعد :اي بالله صحيح اول الاسبوع جانا شايب يخطب نوير عساه تشيب عينه ويقلعه ربي
ويوم ابوها عيا يعطيه قال بجوزك بنتي وتجوزني بنتك عاد خوينا ماصدق على الله سمع طاري عرس انسعر عساه بساعر الي يحرق تسبده
قال اجل اليوم تملكلي على بنتك وسوي عشاء العرس في بيتك واخذها معي والاسبوع الجاي تجيني املكلك على بنتي ونسويلكم عشين لنا حنا وياكم وتاخذها وتسري لبيتك
ام فهد :عوذه الله يردي نصيبه يوم اردى نصيب البنت
ام نمر : مير هذي زيجتن باطله هذي بدلا والبدلا ماتجوز في الشرع كيف يتبادلون البنات كنها بيعه وشريه
ام سعد :هذى الي صار ياوخياتي والله مادريت الاداخلن علي يقود في يده بنيتن والله ياخواتي انها كبر بنتي صالحه مهيب فود جواز قال هذي مرتي الجديده طلعي البنات في الصاله وحطيها محلهن والله مير اجمع اقشيش بنياتي وافظيلها الدواليب ويندعس هو وياها في الغرفه والله انا كل ليلة نتوحا في صياحها وتغويله الها
ام محمد :ياعيشتن قشرا ابك هي تسم عمرها
ام سعد :حول ظ،ظ،سنه
وبنتي نوير هالسنه تتم ظ،ظ¥مير الشايب الي بياخذها صاكن الخمسين عساه مايتوفق
ام فهد :ابك ابك كيف جت هاذي من مساعد وهو مدرس ومتعلم ويعرف الدين والشرع
ام سعد : مافاده تعلومه معمي بصيره الله لايعمي لنا بصيره ولابصر
وفي الحوش متجمعات البنات على راس نوير ويتكلمن في نفس الموضوع
نوير :يويلي ويلاه يبنات وش اسوي بكره ابوي بجوزني الشايب
صيته :عيي يامهبوله لاتخلينه يجوزتس عودٍ كبر جدتس
نوير :عييت وعيت امي وتهاوش معها وضربها ومصمل انه يجوزني الشايب ابو الخلاقين
ساره : الله ياخذه هالشايب عساه يشرق ويموت
شيخه :خلي خوالتس يهرجون ابوتس يمكن يتوحى منهم
نوير :خوالي يقولون مالنا لزوم بين البنت وابوها ومانا بمهرجينه
صيته :اه يالقهر والله لوني متسانتس انه مايشوفني بعينه واني لاذبحه والاانحاش
صيته قالت هالكلام من القهر وماكانت تعنيه لاكن الكلمه الي رمتها من غير قصد رنت في راس نوير
نوير :يبنات انا برجع للبيت اخاف ابوي يرجع للبيت الحين ومايلقاني وقامت راحت لبيتهم وكلمت صيته كل مالها تكبر في راسها انحاش ايه انحاش والااتجوز هالشايب الي مابينه وبين الموت الى خطوه عساه يموت وافتك منه دخلت البيت وماكان فيه غير مرت ابوها الي كالعاده ملتويه على عمرها في زاوية غرفتها وتنوح ودموعها ماوقفت من دخلت بيتهم نوير فكرت ان مصيرها بيكون اردى من مصير مرت ابوها وشوفتها لها في هالحال وهالتوقيت زاد اصرارها على النحشه
ادخلت غرفت امها وفتحت الدولاب واخذت ثوب من ثياب اخوها سعد واخذت معه سروال طويل وفنيله
وشماغ ثم فتحت الدولاب الثاني واخذت لبستين كامله من ملابسها وحطتهن كلهن في كيس وحطت عباتها وطرحتها ونقابها معهن لانها قيدها تغطت وربطت الكيس زين وراحت لسيب الحريم الي يطلع على الشارع وكان فيه اسطوانات غاز عند دريشة المطبخ دست الكيس بينهن ونسفت من فوق الاسطوانات سفره علشان محد ينتبه للكيس
في الشارع كانو العيال مجتمعين في البرحه ويسولفون في نفس الموضوع
نمر :ياسعد ورى ماتنتخي بخوالك يردون هالزيجه المحقى عن اختك
سعد :خوالي عيو يتدخلون يقولون سيلٍ مجنبن عنا ماننياه
فهد :امحق خوال ابك كيف ماتحركت اشعرتهم لبنت اختهم
سعد :امي منفقعتن تسبدها منهم ومن ابوي هم مافزعو لمي يوم ابوي تجوز عليها هالمره تباهم يفزعون لنوير
محمد :ابوك غادن عقله ماعاد معه عقل دام هذي فعوله

في بيت جديد وفي حاره جديده
الوقت بعد العشاء
شاب في العشرين من عمره واقف في حوش بيتهم الي مليان كراتين مسكره وشناط وبطاطين ومفارش مطواه يمه بقى شي من العفش داخل
امه واقفه على الباب الداخلي للبيت لاياولدي مابقى شي متى بنمشي يامنصور
منصور :هالحين باجدل العفش لصندوق السياره ولاخلصت جبت لنا عشاء ولاتعشينا بريحلي اشوي قبل نمشي ذبحني التعب من اليوم وحنا في جهاد يمكن نمشي حول ظ،ظ،&ظ،ظ¢حولها
ام منصور :ليتك خليت ممشانا في الصبح ازين من مساري الليل
منصور : انتي تعرفيني يمه منام الابعد صلاة الفجر وهذا احسن وقت لممشاي الصبح ويني ووين السواقه وانا ذابحني السهر والنوم
في بيت مساعد الساعه ظ،ظ من الليل
الكل راحو ينامون ماعدا نوير جالسه تتفرج على التلفزيون وام سعد تغسل المواعين في المطبخ
ام سعد خلصت شغلها وراحت بتنام شافت نوير جالسه بلحالها
ام سعد :قومي ارقدي يابنت
نوير :مافيني نوم يمه تكفين خليني اسهر على التلفزون شوي
ام سعد ارحمت نوير وحست انها شايلتن هم الملكه الي بتصير بكره فقررت تتركها على راحتها وراحت تنام
نوير احترت امها تنام ويوم هجد البيت كله وتاكدت ان الجميع ارقدو تسللت لسيب حق الحريم وطلعت كيسها الي مخبيته بين الاسطوانات وهي تلفت وترجف من الخوف فتحت الكيس ونزلت الملابس الي عليها واخذت ملابس اخوها سعد ولبستها وتلثمت بشماغه واخذت ملابسها الي كانت عليها ودخلتها في الكيس وربطته واخذته معها نوير طويله شوي بنسبه للي في عمرها باقي مابلغت نحيفه مره وماظهرت لها معالم الانوثه بعد زياده على انها شينه فبتالي مع لبس الولد تبان كنها ولد فعلا
خلصت لبس وراحت لباب الشارع فتحته وتهايقت معه بشويش ولاشافت احد برا والحاره ساكنه

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 28-08-2016, 02:00 AM
ابتسامة بغداد ابتسامة بغداد متصل الآن
©؛°¨غرامي مشارك¨°؛©
 
الافتراضي رد: صيته ظبي النفود


مبرووك على الرواية مبينة حلوة موفقة حبيبتي

الرد باقتباس
إضافة رد
الإشارات المرجعية

صيته ظبي النفود

الوسوم
النفود , راكان , صيته ظبي النفود , غرام ، رسايل ، قصايد ،حب , فهد , نمر
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
رواية ما شفت مثلك فالبشر حد ثاني إنت الوحيد اللي تحلي سنيني/ بقلمي؛كاملة مزيونة يو آ إي روايات كامله - يتم نقل الرواية هنا بعد اكتمالها 19 29-10-2015 03:20 AM
سيرة النبي محمد صلى الله عليه وسلم على شكل مجموعة حلقات الحنجرة الذهبية(f) حياة - صفات - أخلاق - أقوال - رسول الأمة 82 01-08-2015 11:45 PM
وقفة مع عام الوفود ابو عبدالملك222 حياة - صفات - أخلاق - أقوال - رسول الأمة 6 01-08-2015 11:37 PM

الساعة الآن +3: 12:47 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1