منتديات غرام روايات غرام أرشيف الروايات المغلقة - لعدم إكتمالها أجيك أنا عاني أدور لقربك تبعد كأن القلب ما قد عرفني/بقلمي
ملاك جهنمي ©؛°¨غرامي جديد¨°؛©

بسم الله الرحمن الرحيم . . .


طبعاً ترددت وايد قبل لا أبدا وأنزل مولودتي الأولى، ،لما قررت أنزلها أول منتدى طرا على بالي هو غرام طبعاً.
روايتي لا تمد لها أي صلة بالواقع كلها من خيالي طبعاً، واذا اي حد عنده تعليق او نقد سوا كان إيجابي او سلبي يقدر يقوله بتقبله بصدارة رحب لان هذي أول مرة لي بكتابة الروايات.
شوي وبنزل البارت الأول واذا عيبكم راح اكملها.


وفحفظ الرحمن . . .


ملاك جهنمي ©؛°¨غرامي جديد¨°؛©

البارت الأول~

هو: قلتلج يا مريم الولد باخذه يعني باخذه دام بنتج هايته ومخلتنه هني لا حسيب ولا رقيب.
مريم: يا بوسيف اذكر ربك وخل عنك هالرمسه بنتي مب هايته ولاشي رايحه العمره مع اخوها، وبعدين وين مخلتنه لا حسيب ولا رقيب وانا هني تراني.
بوسيف: استغفرالله واتوب اليه، شوفي يا مريم الاتفاق الي صار قبل 3 سنوات هو ان من الولد يكمل 4 سنوات اي واشله عنها بس انا خليته سنتين زياده ماودي اطول بالرمسه وياج.
مريم: عالاقل تريا لين ما ساره ترد من السفر.
بوسيف: تريت سنتين زياده ومابتريا اكثر المفروض الولد يتربى بين اخوانه، والحين وين الولد.
مريم يايه بترد بس قطع عليها صوته وهو يصيح: بس انا ابي اتم مع امي.

,

قطع حبل ذكرياته صوت دقة الباب.
هو بصوت متنرفز: اوف منو .
هو: انا سيف.
هو: اوكيه دش.
سيف: يالحبيب لو تلاحظ باب الحجره مقفول ولا جان من زمان دشيت مابتريا الاذن منك.
هو قام عسب يفتح الباب: مابغيت ترد من السفر اشتقنالك ياخي وعقب شاف سيف بصدمه.
سيف وهو داش الحجره: شسوي بعد المهم ليش يالس هني بروحك.
هو يحج راسه: تعرف اني ماحب ايلس وياهم، المهم ما قلتلي منو هالي في ايدك.
سيف وهو يلعب في شعر الولد ويبتسم: ولدي.
هو بصدمه: ولدك؟ لحظه متى تزوجت، وينها ومرتك؟ وشو سميته؟ والاهم من ذلك شو راي ابوك وامك فالموضوع؟
سيف يتنهد: سالفه طويله بقولك بعدين، امي وابوي راضين، وبعدين توقع شو اسم الولد.
هو بكل ثقه وهو يقول الاسم بكره: اكيد سميته محمد.
سيف هز راسه بمعنى لا.
هو: ها عيل.
سيف وهو يبتسمله: الولد هذا اسمه حمدان سمي عمه.
هو بصدمه: مسمنه حمدان على اسمي.
سيف: لا ع اسم يدي، يعني منو اسمه حمدان غيرك.
حمدان وهو يضحك: شسوي صدمتني شوي توقعت اسمه بيكون محمد يعني ابداً ماتوقعت على اسمي.
سيف: من غلاتك سميته على اسمك.
حمدان: زين عطني اياه خلاص من اليوم ورايح انسى ان عندك ولد هالولد بيصير ولدي.
سيف وهو يمدله حمدان: هيه خير ان شاء الله مب مستغني عن ولدي.
حمدان: زين بنشوف.

,

,


في نفس الوقت بس في بيت ثاني دش وهو معصب ويصارخ: جواهر جواهر، لا بركتن فيج من حرمه صد صوب ولده الصغير: عبادي وين امك.
عبادي يهز راسه بمادري.
هو: واخوك الهيس عبدالرحمن وين؟
عبادي: حمني طلع مع ربعه وقال لما بيرد بييب غدا.
بوعبدالرحمن: زين حبيبي روح ازقر اختك.
عبادي وهو يقوم: ان شاء الله.
سار حجرة اخته ودق الباب.
هي مسحت دمعتها على طول وبصوت كله صياح: منو؟
عبادي: امون تعالي بابا يباج.
امون قامت عسب تسير عند ابوها واول ماشافته باست راسه: شحالك ابوي.
بوعبدالرحمن يمسح على راسها بكل حنان: انا بخير انتي شحالج.
امون تبتسمله: الي يشوفك لازم يكون بخير.
بوعبدالرحمن: بعدج متضايقه من امج.
امون نزلت راسها ودمعتها نزلت.
ابوها رفع راسها: ليش حبيبتي ما اتفقنا على جي.
امون وهي تشاهق: بس انا ماسويت شي ها كله لاني رفضت ولد اختها.
بوعبدالرحمن: ماعليج منها تعرفين امج كيف ومردها بتي تراضيج.
امون بضيج: بتصرفاتها بتخسرنا.
بوعبدالرحمن في خاطره ياليتني سمعت كلامج يا امي.
امون وهي تقوم: تامرني بشي ابوي؟
بوعبدالرحمن: انا بمر على امي وقت الغدا جان بتون وياي دقي حق عبدالرحمن وقوليله لا ياخذلكم غدا.
امون: ان شاء الله.

,

,


دش وهو يبوس راسها: صباح الخير امي مريم.
مريم وهي تشوفه بنص عين: اي صباح الحين يا منصور.
منصور: امي شو تبيني اسوي هذا ولدج ميود مايخلي الواحد يرقد ولا فوق هذا كله يايبلي العله خلود حني ناقص انا.
مريم: متأكد ان ميود وخلود هم الي مايخلونك ترقد.
منصور يشوفها برائه: هي امي هم.
مريم: هيه زين صدقت
منصور: امي شو مسوين غدا ترا ميت من اليوم.
مريم: سمج.
منصور وهو يتأفف: يع شو سمج امي تدرين اني ماحب السمج شحقه مسوين سمج.
مريم وهي ترفع العصا عسب تضربه: شو يع نعمة ربك هاي، وبعدين خالك ياي وفي خاطره سمج فقلت بسوي سمج.
منصور: اوه يعني امون يايه مشتاقلها الهرمه من زمان عنها ماقامت تسأل وعقب جان يقول امي شرايج نروح البر.
مريم وهي تقوم: خلني اسير اشوف شو صار عالغدا ابركلي عيل في واحد عاقل يبا يروح البر في عز الحر.
منصور وهو يلحقها: امي يعني بذمتج ما اشتقتي حق البر.
مريم: سير وع ميود وخلود احسن.

,

,

الكل يالس على طاولة الطعام والمكان هادي فحب سيف يقطع الهدوء وهو يسأل اخته: ها مهاري متى عرسج
مهره وهي تلعب بأظافرها: ابوي يقول لازم اخلص الجامعه وعقب يصير خير.
سيف وهو يشوف ابوه: ماتحس ان راشد بيمل.
بوسيف: اذا يباها لازم يصبر ماعندي بنات يتزوجون وهم مب مخلصين دراستهم وعقب صد على حمدان: تراني سجلتك مع حمد فالجامعه ماعندي اولاد يلسون في البيت لا شغله ولا مشغله.
حمدان وهو يعطي ابوه نظره: من وانا صغير وانت تحدد حياتي على كيفك ان شاء الله بس اخترت التخصص الي انت تباه بعد.
بوسيف: كنت ناوي اخليك تكمل ادارة اعمال بس الي عرفته ان في خاطرك هندسه فماحبيت اكسر بخاطرك.
حمدان بمصخره: هه كثر الله خيرك ابوي اول مره ماتكسر بخاطري وقام من عالسفره.
سيف وهو يقوم يلحقه: زين جي زعلته.
مهره بكره: زعل بويهد عله مايرضى.
بوسيف: مهره مهما يكون هذا اخوج.
مهره: ماعندي اخوان غير سيف وحمد.
ام سيف: عيب هالكلام يا مهره.
مهره: لا امي مب عيب ولا نسيتي شو سوا في يوم ملجتي
ام سيف يايه بترمس بس حمد سبقها وبكل برود: كل حد يعرف ان راشد الغلطان وهو الي بدا.
مهره: انت يا تقول شي زين يا تكرمنا بسكوتك وقامت.

,

,

هو: تدرين اني احبج.
هي: بس ماتحبني كثر ما انا احبك.
هو: ماتحسين انج طولتي وانتي تدرسين يلا خلصي
هي: خلاص هالسنه وبخلص.
هو: ياربي شو يصبرني.
هي: شرات ماصبرت سنه تقدر تصبر هالسنه بعد، بس حبيبي لا تنسى اني بكمل فالجامعه.
هو: بتكملينها وانتي عذمتي ان شاء الله
هي بحب: ان شاء الله
هو بصوت متردد: تحسين اهلج بيرضون فيني وانا بعدني ادرس؟
هي: ماعرف بس ابوي مايرفضلي طلب يعني لو قلتله اني موافقه مستحيل يردك.



,

,


وبجذي انهي البارت الاول وادري ان قصير وماتعمقت في الشخصيات بس حبيت منكم تاخذون لمحه بسيطه عن حياة شخصيات الرواية والبارت الياي راح اتعمق في كل شخصيه اكثر.


فحفظ الرحمن~


ملاك جهنمي ©؛°¨غرامي جديد¨°؛©

بما اني ما حصلت اي تفاعل اتمنى حذف الموضوع.

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1