اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
الإشعارات
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 11
قديم(ـة) 22-12-2016, 10:35 PM
صورة نـجــد الرمزية
نـجــد نـجــد غير متصل
©؛°¨غرامي مشارك¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


اقتباس:
المشاركة الأساسية كتبها لامــارا مشاهدة المشاركة
السلام عليكم

يا قلبي روايتك روعة مثلك

بالنسبة للبارت الثاني للحين لم يكشف الغموض اللي محاوط الرواية

ننتظر التكملة

بالتوفيق لك يا رب

دمت بود
وعليكم السلام لمارا
حبيبتي والله تعليقك الأروع
بالنسبة للغموض راح ابدأ ابينه بالتدريج من خلال الأحداث بتفهمون معي
واذا شايفين انه الغموض زايد عن حده انا استقبل الانتقادات


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 12
قديم(ـة) 22-12-2016, 11:54 PM
صورة نـجــد الرمزية
نـجــد نـجــد غير متصل
©؛°¨غرامي مشارك¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


الجزء الثالث
كيف ستكون البداية
لربما هي بدايات يتلو بعضها البعض
لتشرح او لتعتم
لتظهر او لتخفي تلك التفاصيل
من الماضي والحاضر لتلك المشاعر
أحاديث النفس وما يطغى على الكتابة
هي بدايات ولعلها نهايات
هي الأولى ولربما تكون الأخيرة
هي من القلب وأي قلب
قلب مليء بالتناقضات
" قلب انسان "
#ممنوع الاقتباس
أم سلطان : اتصلي على اخوانك يا سما
سما وبيدها الشمعة : يمه وين جوالي ما حصلته
أم سلطان : خواتك وين يا سما
سما بخوف : يمه سمو وعريب ولمى وكادي تركتهم نايمين شادن ما شفتها
أم سلطان بخوف : كيف ما شفتيها هالبنت ما تجلس وين صقر يا سما اتصلي عليه
سما : يمه اقول لك ما ادري وين جوالي وين احصله والكهرباء طافيه بقوم اصحي ابوي صقر مناوب في المستشفى يمه
أم سلطان : قومي قومي صحيه
توها بتصعد تصحي أبوها مرت على المطبخ وشافت ظل شخص صرخت وطاحت منها الشمعه على الفرشه وشبّ النار
سما بخوف : يمه يمه حرامي احترقنا يمه
أم سلطان قامت تركض ونزلوا اللي فوق كلهم الا بدخلة صقر والكهرباء رجعت سحب الطفاية وطفى الحريق بسرعة وهو يلهث
صقر بخوف : وش صاير عليكم
سما راحت له تضمه : صقر والله والله شفت شخص بالمطبخ والله ظله ما اكذب وان اوانا خفت وطيحت الشمعة
أبو سلطان : والشمعة وش تسوي هينا يا سما
سما بخوف : الكهرباء طفت وكنت جايه اصحيك خفنا انا وامي لوحدنا بس شفت ظل في المطبخ خوفني
عريب باستهزاء : لا والله فيلم مافيا حنا خوفي شايفة لك قطو اخت سما
صقر بحده : عريب ولا كلمة ارجعوا غرفكم
أم سلطان : يمه صقر اتصل اليوم اخوك سلطان وقال لي اذا جيت من الدوام اخليك تكلمه
صقر : طيب اشوف وش فيه في المطبخ وبعدها بتصل
أم سلطان : لا يا يمه صقر كلمه الحين صوته ما ريحني لذا الساعة وانا خايفه عليه
ابو سلطان : خلاص انا اشوف المطبخ انت روح شوف اخوك
صقر وهو يتصل على سلطان : طيب يلا هذاي اتصل
سلطان بلهفة : آلو صقر اسمعني اذا عندك أحد اطلع من عندهم
صقر : دقيقه سلطان ، يمه انا طالع أبدل عشان ما تفوتني صلاة الفجر
أم سلطان : طيب طمني على اخوك
صقر بسرعة : اذا نزلت يمه اذا نزلت
أم سلطان تتمتم : الله يهديكم
صقر بخوف : تكلم يا سلطان وش عندك خوفتني
سلطان : اليوم لما جيت من الدوام فتحت جوالي لقيت واحد مصور بيتنا ويهددني بأهلي
صقر بحده : سلطان وش مسوي انت مع مين متعادي
سلطان بعصبية : اضبط حدتك مانيب متعادي مع أحد ولا عرفت مين اللي راسل الصورة اصلًا بس اقول لك انتبه على البنات وامي وابوي لا تخليهم
صقر بعصبية : يعني كلام سما صح
سلطان بخوف : وش فيها سما
صقر بلوم : طفت الكهربا عليهم وشافت ظل في المطبخ طيحت الشمعة لولا ستر الله احترق البيت باللي فيه
سلطان بعصبية : وش هالكلام صقر انتبه بالله انتبه لو تضطر تترك الدوام وتجلس عندهم لين أعرف مين هالـ...... اللي يبي يضرني بأهلي
صقر : وانت منت ناوي تجي السعودية
سلطان : قول ان شاء الله اقدر اجي
صقر : طيب انا بروح اطمن أمي شايله همك من بعد ما كلمتها
سلطان : طمنها ولا تحسسهم بشيء
صقر : ابشر
سلطان : يلا استودعتكم الله
صقر : مع السلامة – بدل ونزل لأمه وخواته
صقر : يمه تطمني سلطان طيب ومافيه حاجه ويمكن ينزل قريب
سمو : ياربي اشتقت لسلطان انت قلت له صقر ؟
صقر : ايه عنده علم
أم سلطان : ليه يا صقر قلت له تخوفه علينا
صقر : لا طمنته انه مافيه شيء
شادن : امم طيب انا بروح استشور شعري قبل لا يتضاربون الفيران عليه
كادي : تبطين والله تبطين انا اللي بستشور امس انتي استشورتي قبلي
صقر بانزعاج : بس انتي وياها يالله صباح خير ولا وحده فيكم بتداوم اليوم روحوا اجلسوا مع سما
لمى بفرح : وه وناسه – ارسلت بوسة لصقر في الهواء – احلى أخو
عريب : صقور عندي اختبار اليوم
صقر : صقور في عينك والاختبار يتعوض
أم سلطان : ليه يا يمه تغيبهم خلهم يداومون
صقر : يمه انا تعبان ومافيه احد يوصلهم بصلي وبرجع انام
عريب : قلنا لك جيب لنا سواق ورفضت
صقر : عريب مابي اسمع لك صوت ولا اسمع هالطلب ثاني مره
سمو : خلاص صقّار قوم المسجد صل وارجع نام عافيه
صقر ابتسم لها : اسمعي يا دكتوره عريب وتعلمي ، يلا يمه انا طالع
عريب بحلطمه : اننن اسمعي دكتوره عريب وتعلمي
أم سلطان : عريب قومي لخواتك
عريب بزعل : ها قامت عريب
أم سلطان : سمو يمه قومي جهزي الفطور قست عظامي من الخوف اليوم
سمو : خلاص ارتاحي يا عيوني الفطور اليوم علي
أم سلطان : عسى الله يرزقك ولد الحلال اللي يحطك بعيونه مثل مانتي حاطتنا بعيونك
سمو : يا عمري انتي حق وواجب يا يمه – وراحت تسوي الفطور –
- عند سلطان
دخل عليه بندر وهو يدندن ومروق جاء وانسدح على الكنب جنب سلطان
بندر : السلام لله يا عباد الله
سلطان : وعليكم السلام
بندر باستهزاء : مال الزين مكشر ؟
سلطان : بندر ماني رايق لمصخرتك
بندر اعتدل بجلسته : أفا وش صاير معك
سلطان وهو سرحان : مصيبة يا بندر مصيبة مدري من وين نزلت علي
بندر يجلس قدامه وبخوف : اخلص تكلم وشفيك
سلطان : اهلي يا بندر
بندر بعصبية : اسحب منك الكلام انا تكلم اخلص
سلطان : فتحت جوالي اليوم ولقيت واحد يهددني فيهم مدري مين هذا اللي يبي يأذيني في اهلي انا مالي عداوات مع احد
بندر : من جدك انت يهددونك بأهلك وجالس انزل السعودية وروح الشرطة
سلطان : اروح الشرطة ويطلعون هم مراقبيني ويأذون اهلي
بندر بعصبية : انت صاحي ولا مجنون ذول اهلك ذول روح لهم والله مافيه اصعب من فراق الاهل اسألني
سلطان : عندي مواعيد بكره
بندر بعصبية : وحريقة بالمواعيد انزل لأهلك أهم
سلطان : طيب بحجز بكره
بندر بعصبية : ما تفهم انت انا الحين احجز لك على أقرب رحلة بكره
سلطان : طيب يلا احجز
-عند تركي .. كندا
جاه تنبيه في جواله من مدونة كيان ترك شغله وكل اللي في يده وفتح على المدونة وهو يقرأ آخر ما كتبته حبيبته فيه
– داواني الحب ثم الحب أبكاني
على نصيبي وأقداري وخلاني
مالي سبيل فوا أسفي معذبي
يا قبلة الورد يا توتي ورماني
مالي سبيل إلى ما يبتغي قلبي
قد صاب قلبي في حين الحظ أخطاني
إذ حير الوصف عقلًا عاقلًا فأبى
إلا بدر والماس ومرجاني
ما طاب عيش بدارٍ انت لست بها
في قربكم صار عمري عامرًا ثاني
وما لبثت واذا بالبعد يعصف بي
وأوجع الشوق أوردتي وشرياني
ان لمت نفسي فقد أسرفت في تعبي
لا يجلب اللوم للأحزان نسيانِ
والصبر مرٌ في عين الجاهلين به
لا حرم الصبر في قلبي ووجداني
لو سفّه الحب أحلامي ودمرني
ما بدّل الحب أحكامي وميزاني
ما أعدل الحب ولكن واظليمتنا
وازداد همي بهمٍ دق بيباني
#ممنوع الاقتباس
خلص موضوعها وهو يتذكر كل تفاصيله اللي عاشها معها يتذكر كيف أوهمها انه أعمى عشان ما تحس بنقصها ومثل ما توقع أول ما عرفت انه يشوف تركته
تركي في نفسه : ظلمتي حبنا بحكمتك وعدلك كنت انا الراضي فيك كنت انا الناقص وانتي الكاملة بعيوني يارب الصبر اللي عطيتها ارزقني ربعه حياتي بدون كيان عزله
- في نيويورك
خل بيني وبينك قد بحر الغرام
لا تحاول تخاطر بي وتشتاق لي
قلبي اللي تشوفه ممتلي بالكلام
عايثن به زماني ليت قلبي خلي
#ممنوع الاقتباس
رهف : ريما أمك ستايلش
ريما بحماس : ايه ماما بتسوي دار ازياء
رهف بحماس : واو
ريما : رهف مين هذا اللي يناظر فيك
رهف لفت وابتسمت : ريما هذا خالي فيصل
ريما : اها
رهف وهي تناديه : تعال خالي شوف ريما صديقتي السعودية
فيصل وهو ينزل لمستوى ريما : تشرفنا يا أميرة انا فيصل خال رهوف
ريما ابتسمت : امم الشرف لي
طلال باستغراب يكلم الريم اللي مشغولة بجهاز الرياضة : الريم
الريم وهي مو طايقته : خير !
طلال وهو يناظر فيصل : مين هذا اللي مع ريما
الريم لفت بخوف : ما اعرفه – وقفت الجهاز بسرعة وراحت عندهم – ريما
ريما بحماس : ماما شوفي هذا فيصل خال رهف صديقتي
الريم وهي تناظر فيصل : مرحبا
فيصل وعيونه متعلقة بالريم : مرحبتين سعوديه
الريم : ايه انا أم ريما
فيصل طلعت عيونه : نعم ؟!
طلال بعصبية : قالت لك أمها وش الغريب
فيصل بتوتر : ولا شيء اخوي ، رهف يلا نمشي
رهف : يلا باي ريما
ريما : باي
الريم بعصبية لفت على طلال : هيه ترى ما اسمح لك ابدًا ترد بدالي الظاهر انك عشت ومثلت الدور بقوة
طلال بابتسامة مستفزة : ماني مضطر امثل لأنك قريب بتصيرين زوجتي
الريم وهي تضحك بغرور : بعيد عن خشمك
طلال وهو ينزل لعندها : لا تتحديني يا بنت متعب
الريم بغرور وهي تبعده بطرف اصبعها: منت بقدي يا طلال
طلال بتحدي وابتسامة : نشوف
الريم بنظرة غرور : هذا اللي باقي يلا ريما نرجع البيت قرفت
ريما بعدم فهم : يلا – وهي تأشر لصديقاتها – باي
وطلال اخذ شنطته الرياضة وراح لبيتهم دخل البيت بهدوء كالعادة حط شنطته واخذ له كوب عصير
ابو طلال : ما بغيت تجي
طلال : هلا وش بغيت
ابو طلال : وش كان عندك اليوم
طلال : اتفقت مع شريك جديد للشركة
ابو طلال : من وراي ومن هو هالشريك بعد
طلال : متعب الـ......
ابو طلال بتعجب : متعب الـ..... بيدخل شريك معنا !!
طلال وهو يشرب العصير : ايه نعم متعب بيدخل شريك معنا
ابو طلال ابتسم : منت بسهل يا طلال
طلال بعصبية : يبه كم مره قلت لك اذا صرنا في البيت تنتهي هالتمثيلية البايخة وما تناديني طلال
ابو طلال : فكنا عاد
طلال : لا تنسب انجازاتي لغيري انا مانيب طلال
ابو طلال : قلت لك سكر على الموضوع وروح لأمك في المطبخ ما شافتك من يومين تسأل عنك
طلال : يبه اللي في المطبخ ماهي أمي انا أمي في ....
قاطعه ابوه : اوص وقص انقلع غرفتك لا ابتلي فيك انت وأمك
راح طلال غرفته وهو مبتسم شال العدسات اللي مزعجته وطلع لون عيونه الطبيعي افتح درجات الرمادي اللي يشوف عيونه يفكر عليهم غشاوه تمدد على الكنب وجلس يناظر الصورة اللي قدامه بابتسامة سخرية : ها راضي علينا استاذ طلال جالسين ننجز باسمك عساه يرضيك ضحك بسخرية على حاله ودخل يتروش " سر جديد "
- بيت مشعل
أم مشعل : يا يمه يا مشعل وبعدين ما عاد صرت اشوفك على وجبات اذا عشان حنين انا اوديها بيت اختي ما عندها عيال
مشعل بسرعة : لا يا يمه حنين ما تطلع من هينا
أم مشعل : وش اللي يخليك حامي هالبنت كذا قل لي وطمّن قلبي
مشعل : يمه وش حاميها البنت مظلومة وانتي تعرفيني ما احب الظلم
أم مشعل : البنت مظلومة وانت ما تحب الظلم والبنت جميله ومافيه احد يكره الجمال
مشعل وهو فاهم قصد امه : يمه تشكين فيني ؟
أم مشعل بانفعال : غصب اشك فيك يا امي جايب لي بنت فجأة مدخلها البيت وما تجلس معانا وما تبي البنت تطلع من البيت وهالبنت عندها صور بنت صغيرة لا تشككني يا مشعل
مشعل بعصبية : لا يا يمه لا لاتفكرين فيني الشينة طالبك
أم مشعل : يا مشعل يا امي طمن قلبي وقل لي سالفة هالبنت
مشعل : يمه البنت هذي تذكرين لما كنت بالمطار رايح اشوف عمي واتكلم معاه عن قضية ابوي لقيت هالبنت طالعه من المطار وكنت بصدمها بسيارتي وهي تبكي وتنوح فكرت انه جاها رعب من انها تسوي حادث نقلناها للمستشفى بس كانت حالتها مثل ما شفتي تبكي وتشاهق وتضم في هالصور وتردد مظلومة مظلومة زوجي وبس هذا اللي صار وجبتها عندك على هالحال اللي شفتيه
أم مشعل بصدمة : يا ويلك من ربك يا مشعل البنت متزوجة وجايبها عندنا وين زوجها
مشعل بهدوء : سألتها وقالت لي انه زوجها توفى
أم مشعل : لا حول ولا قوة الا بالله و اهلها وين يا ابوي
مشعل : أهلها ظلموها يمه وما يبونها ترجع عندهم
أم مشعل : لا حول ولا قوة الا بالله ظلموها بوش
مشعل : خلاص يا يمه هذاك عرفتي السالفة تأمرين على شيء الحين
أم مشعل : شوف يا مشعل بخيريك بين شيئين وواجب عليك تختار
مشعل : يا يمه لا تصعبينها علي
أم مشعل : بتختار غصب عنك تفهم
مشعل : طيب وش هم
أم مشعل : يا انك توافق أودي البنت عند خالتك يا انك يا مشعل تتزوجها
مشعل بصدمة : نعم !! يمه وش هالحل
أم مشعل قامت من عنده للمطبخ : ما عندي غيره اختار يا هذا يا ذاك
- عند حنين
جالسه تتصفح الصور اللي عندها وتبكي وتنتحب من قلب الا دخلت عليها منار بهجوم وضربت الباب بالجدار
منار بعصبية : انتي وش تفكرين نفسك ها تبين تحرقين قلبي بأخوي جالسه هينا تنوحين وأخوي لا ليلها ليل ولا نهاره نهار جالسه تتمسكنين حتى تتمكنين يا سوسه انتي متزوجة وزوجك مات وش تبين بأخوي وش تبين جالسه ببيتنا طلعي برى خربتي حياتنا فوق تحت لين اخوي بينجبر الحين انه يتزوجك اخوي مشعل شيخ الشباب يأخذك انتي اللي مدري أي بلوه ولا مصيبة رمتك عندنا انتي ما تستحين على وجهك مافيك ولا ذرة حيا جالسة في بيت غريبين عليك تأكلين وتشربين من خيرهم صدق مانتي بوجه احسان بس امي ومشعل انغشوا فيك لكن انا لا واسمعي كلام يوصلك ويتعداك انا ما شلتي قشك وطلعتي من هالبيت والله لا أوقف لك عظم في البلعوم ما يمر ما عاد باقي الا هي أخوي انا وحبيبي يتزوج أرملة
مشعل بصراخ وعصبية :منار اطلعي لي برى
منار بخوف : مشعل هي ......
قاطعها مشعل بعصبية : قلت لك تعالي لي برى تسمعين ولالا
منار بخوف : مشعل هي تكذب ....
مشعل بعصبية : منار
منار وهي تعض أصابيعها خوف من عصبية مشعل لين تدخلت حنين
حنين وهي تحاول تطلع صوتها بعد البكي اللي بكته : أخ مشعل كلام اختك صحيح ماله داعي تهاوشها انا لازم أطلع من هينا
مشعل بعصبية : لو تحركتي خطوة وحده برى البيت والله لا تلحقك هي
حنين ومنار ناظروا بعض بخوف
مشعل بعصبية : منار اطلعي لا ادخلك أجرك مع شعرك والله وقتها ماهو بصالحك
منار بحقد : انا انا منار تعصب علي وتهاوشني عشان هالحية تخسي والله
مشعل بعصبية : مين اللي يخسي يا منار مين
منار بخوف قامت تتأتأ توه مشعل بيدخل يسحبها الا تدخلت أم مشعل
أم مشعل : وين رايح يا مشعل وين رايح يا ولدي يا سند ظهري وين رايح ياللي كنت افخر فيك عند الناس واقول اني خلفت رجال رايح تدخل على بنت غريبة وتقول لي لا تشكين فيني هذا انت يا مشعل هذا تربيتي ما ظنيت وينك يا ابو مشعل تجي وتشوف ولدك اللي مفروض يمسك مكانك بهالبيت انا اشهد اني ما ربيت
طلعت منار من الغرفة وهي تروح لأمها : يمه لا مشعل ما كان بيدخل للبنت كان بيدخل يهاوشني انا قلت له تخسي
أم مشعل بصدمة وعصبية : قلتي لمين يا بنت
منار بخوف : قلت لمشعل يمه انا ما كنت اقصد انا كنت مقهورة من هذي الحية يمه انا الغلطانة بس يمه مشعل ما سوا شيء
لفت أم مشعل تبي تكلمه مالقته في البيت رجعت لمنار وعطتها كف : طفشتي اخوك من البيت خليتيني اكلم اخوك كذا كل هذا من حقدك يا منار وش هالقلب الاسود اللي عليك ليه ما تكلمتي من اول وقلتي يمه انا الغلطانه غلطت بحق اخوك وتوك تقولين
منار بدموع : يمه انا مابي مشعل يتزوجها يمه مشعل يتزوج الارمله هذي اللي ما نعرف لها أصل
أم مشعل : اوص وقص انقلعي عن وجهي مابي اشوفك انقلعي خليني اشوف اخوك وين راح حسبي الله عليك من بنت
راحت منار وتو أم مشعل بتمشي الا نادتها حنين وهي شايله شنطتها والصور في يدها
حنين بدموع : خالتي أم مشعل انا ما قصدت افرق بينك وبين عيالك والله ولا لي حق اصلًا أنا اسفه انا بطلع من البيت اعتذري لي من منار واخ مشعل انا أسفه
أم مشعل بسرعة : لا يا بنتي والله ما تطلعين مشعل حالف علي ما تطلعين
حنين بألم : لا يا خالتي معليش انا بطلع يكفي اللي صار اليوم وانتوا ما قصرتوا كثّر الله خيركم
أم مشعل : والله ما تطلعين يا بنتي
حنين بسرعة : لا تحلفين يا خالتي عيالك
أم مشعل : حلفت وعيالي منار هي الغلطانة ومشعل بيرجع ان شاء الله خذي شنطتك وادخلي داخل مافي طلعه انتي صرتي وحده من أهل البيت
حنين شالت أغراضها ودخلت و أم مشعل راحت غرفة منار وقفلت الباب .....

-انتهى


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 13
قديم(ـة) 23-12-2016, 07:52 AM
صورة روزاريو الرمزية
روزاريو روزاريو غير متصل
©؛°¨غرامي مشارك¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


اقتباس:
المشاركة الأساسية كتبها نـجــد مشاهدة المشاركة
يا عمري والله تعليقك مره أسعدني بعد الاحباط من قلة الاقبال على الرواية
باقي اشياء كثيرة ما عرفتوها عن شخصية طلال
حنين بيتضح غموض قصتها في الاجزاء الجاية
بكمل عشان تعليقك الحلو والله

لا توقفين وكل مانزلتي بارتات كل ما زادوا المتابعين وانا بكون اول من ينتظرك 👏🏼❤

البارت خورافي ، ودقت طلال للريم غررريبه اموت واعرف شلون يتزوجها !
بالنسبه لحنين كسرت خاطررري مره و كيف وصلت لبيت مشعل او كيف لقاها !
البارت قصير بس حماسي مره وكل ماله يزيد غموض ، وناصر والبنات غايبين عن البارت ياليت تكثرين مواقفهم ❤


آخر من قام بالتعديل روزاريو; بتاريخ 23-12-2016 الساعة 07:59 AM.
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 14
قديم(ـة) 23-12-2016, 10:57 AM
صورة نـجــد الرمزية
نـجــد نـجــد غير متصل
©؛°¨غرامي مشارك¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


اقتباس:
المشاركة الأساسية كتبها روزاريو مشاهدة المشاركة
لا توقفين وكل مانزلتي بارتات كل ما زادوا المتابعين وانا بكون اول من ينتظرك 👏🏼❤

البارت خورافي ، ودقت طلال للريم غررريبه اموت واعرف شلون يتزوجها !
بالنسبه لحنين كسرت خاطررري مره و كيف وصلت لبيت مشعل او كيف لقاها !
البارت قصير بس حماسي مره وكل ماله يزيد غموض ، وناصر والبنات غايبين عن البارت ياليت تكثرين مواقفهم ❤
حبيبتي انتي ان شاء الله ماراح أوقف
بالنسبة لحنين ومشعل ذكرت في الجزء كيف لقاها
والجزءقصير لأنه ويكند مثل ما تعرفون عشان كذا تأخرت بالجزء وصار قصير
وناصر والبنات بيرجعون لنا بالجزء الجاي


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 15
قديم(ـة) 23-12-2016, 12:17 PM
صورة نـجــد الرمزية
نـجــد نـجــد غير متصل
©؛°¨غرامي مشارك¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


الجزء الرابع
غلابا بالهوى حنا
على شط الصبر نقتات
نعيش أحلامنا كذبه
من أول ماضي الرحلة
إلى آخر حيل بالعبرات
#ممنوع الاقتباس
- في بيت ناصر
أم تركي : رزان يلا دوامك
رزان وهي ماسكه جوالها : يمه انتظري بكلم تركي اصلا صديقتي كلمتني وبتغيب ليه أداوم
أم تركي : يا كثر غياباتك والله يا ناصر بيهاوش
رزان بعصبية : وش دخله فيني ماله داخل ماهو ولي أمري لا يتدخل بشيء ما يعنيه قولي له
تركي بهدوء من سماعة الجوال : رزان ناصر هو اللي مسؤول عنك ما دام اني غايب تفهمين
رزان بدموع : تركي ما ابيه ابيك انت
تركي بهدوء : انا بعيد عنك وناصر قدها بيجي اليوم اللي تتذكرين كلامي فيه عطيني أمي وروحي دوامك
رزان : تركي مابي اغيب نغم ولمى كلهم غايبين
تركي فز قلبه : وشفيهم غايبين
رزان : وحده صاير حريق في بيتهم والثانية مالها خلق تداوم
تركي بخوف : رزان مين اللي محترق بيتهم
رزان بملل : بيت لمى
تركي براحه : طيب لا تداومين بس عطيني أمي
رزان بحزن : هذا هي معك خذ
أم تركي بدموع : يمه حبيبي وينك يا روحي ما تعبت من الغربة أرجع الله يخليك
تركي بهدؤه المعتاد : يمه رجعنا لهالطاري قلت لك انا مرتاح بالغربة اللي تتكلمين عنها
أم تركي ببكاء : انا مانيب مرتاحة يا تركي انا قلبي معك وانت بعيد عني ما تهنى لي الدار وانتم ب فيها
تركي : يمه لا تضغطين علي مانيب راجع
أم تركي بدموع : تهون عليك دمعة أمك يا يمه قسوا قلبك الكفار ما كنت قاسي يا ولد بطني
تركي بحزن : يمه ما قسيت ولا تهون علي دموعك والله لكن لو رجعت السعودية ماراح تطيب لي الجلسة فيها ابد وبرجع مره ثانيه
أم تركي بلهفة : تعال لو زيارة يا تركي لو زيارة اشوفك فيها اشوف وش سوا فيك الزمن ووش غير فيك
تركي بهدوء أكثر : الله يكتب اللي فيه الخير وش اخبار البيت يا يمه
أم تركي : روان وعيالها عندنا وما عاد صرنا نشوف زياد ورند وريناد بس فوق يلعبون مع عيالها
تركي بابتسامة لطاري اخته : سلمي عليهم يمه وابوي وش اخباره
أم تركي : ابوك تعرف حالته لا له ولا عليه ما يقدر يتحرك من سريره ما يتحرك لين يجي ناصر وناصر ابوي هو ما يجي من دوامه الا متأخر بالقوة يمديه يحط لقمه بفمه ويقوم لأبوك
تركي بحزن من حال ابوه : الله يقومه بالسلامة مأجورين ان شاء الله
أم تركي : يلا طولنا عليك روح لشغلك
تركي : مع السلامة
أم تركي : مع السلامة وعطت الجوال رزان اللي تهز برجلها
رزان بعصبية : يا سلام يا سلام وش طول مكالمتكم وهي دولية ما ادري مين بيشحن لي وبعدين ليه ما عطيتيني اياه اكلمه زين
ناصر بعصبية وهو داخل البيت : رزان وقص ان سمعتك مطوله صوتك على أمي مره ثانيه كذا اقسم بالله لا تشوفين شيء ما عمرك شفتيه فاهمة
رزان : يا حيا الله جاء القائد الحين
ناصر تقدم لعندها بعصبية : لا تختبرين صبري وانتي ادرى فيني انقلعي لغرفتك لا اقلعك بطريقتي
أم تركي بخوف : رزان روحي غرفتك – ومسكت ناصر من كتوفه – هد أعصابك يا امي احط لك شيء تاكله ؟
ناصر وعينه على رزان اللي طلعت الدرج : لا يمه تسلم ايدينك اكلت بالمستشفى ، أبوي خذ علاجه
أم تركي : ايه يابوي عطته روان قبل تنوم عيالها
ناصر : وهذي ليه ما داومت
أم تركي : تقول صديقاتها غايبين وكلمت تركي وقال لها تغيب
ناصر : اسمعي يمه بنتك ذي يبي لها قرصة اذن من اول وجديد لو تقول وش تقول مفروض تستأذن مني وان كلمت تركي مره ثانيه واستأذنت منه والله لا أخذ جوالها بلغيها هالكلام – وفز واقف
أم تركي : وين رايح يا امي اتركها عنك
ناصر : لا يا يمه مانيب رايح لها بأخذ عدة التصليح من غرفتي وبطلع
أم تركي : ليه وش عندك يمه
ناصر : بروح بيت جدي وهناك فيه كم شيء محتاج صيانة
أم تركي : يا يمه يا ناصر اترك بيت جدك عنك وروح ارتاح ما نمت زين امس انت
ناصر : لا يايمه تعرفيني ارتاح هناك ولا تخافين اليوم الغدا عندك عاد اطبخي لي شيء احبه
أم تركي بحب : انت تأمر على عيوني
ناصر وهو يبوس رأسها : يا حبي لهالعيون وصاحبتهم يلا دعواتك
أم تركي : الله ييسر لك كل خير ويعينك عليه
طلع غرفته بدل ملابس الدوام واخذ شنطة الصيانة مع جواله ومحفظته وطلع لبيت جده
وصل ورن الجرس وما جاه رد وطول وهو يرن محد رد مسك جواله واتصل على الرقم اللي كلموه منه أمس وما جاه رد عصب وضرب الباب برجله وجلس يروح ويرجع عند الشارع عطا ظهره للباب ومشى الا بصوت من وراه
مشاعر بحده : هيه مين انت وش عندك واقف هينا
ناصر عرف صوتها وحب يلعب بأعصابها شوي ولا لف
مشاعر بحدة صوتها المبحوح : هيه ابعد عن طريقنا
ومافيه ولا رد من ناصر
أجواد مسكت مشاعر عشان لا تتكلم : لو سمحت اخوي وش عندك واقف عند بيتنا
ناصر لف بسرعة وظل ساكت يشوف ردة فعلهم
مشاعر بعصبية : انت وشو وين ما نلف نلقاك فارق عاد ما يسوى بيت وعطيتنا اياه كل يوم طاق دربك وجاي عندنا
أجواد وهي تنغز مشاعر عشان تسكت تحت نظرات ناصر اللي ماسك الضحكة وممثل العصبية والجمود
مشاعر بعصبية : هيه انتي وخري وانت صرت اخرس ان شاء الله
ناصر وهو يمثل العصبية : وينكم فيه بذا الوقت
مشاعر توها بتتكلم قاطعتها أجواد : اخوي احنا آسفين بس كنا طالعين ندور على وظيفة
ناصر ارتخت ملامحه تلقائي : وشنو صار معكم اشوفكم راجعين بدري
مشاعر بحدة : لا تتدخل
ناصر ببرود : عفوًا بس انا ما اتكلم معك
أجواد في محاولة انقاذ للموقف : ابد قدمنا اوراقنا وقالوا بيتصلون فينا
ناصر وهو يناظرهم : كنتوا اربعه
مشاعر بعصبية : هيه نزل عيونك
أجواد بسرعة : شوق وتوق في الجامعة
ناصر برضى : حلو - رفع شنطة الصيانة – هذا اللي جابني
أجواد بسرعة : لا ماله داعي اخوي خلاص دبرنا انفسنا
ناصر : لا ابد ما ينفع البيت ربعه تلفان
مشاعر باستحقار : وذالنا عليه
ناصر بعصبية : يا اختي ما تبين تجلسين ما اجبرتك انا ساعدتكم لوجه الله ويشهد الله اني مانيب قاصدكم ذل لكن انتي حاطتني برأسك وانا ما انصحك بهالشيء ابد
مشاعر بعصبية : هيه تهددني
ناصر وهو يتكلم مابين اسنانه : اسمعي في هالشارع ما ينسمع لك صوت تفهمين لانه طالما انتوا في بيتي محسوبين من أهل ناصر بن وليد وانا ما ارضى يقولون عن اهلي طويلات لسان بالشارع تفهمين
أجواد تنهي النقاش : ايه تفهم تفهم تفضل صلح اللي تبي تصلحه
ناصر زفر بتعب ولحقهم للبيت
ناصر بحرص : اكيد تبون تأخذون راحتكم روحوا المطبخ وقفلوا عليكم ما احتاجه المطبخ زين كل شيء فيه تمام
أجواد : لا عادي اخوي
مشاعر بعصبية : اجواد امشي المطبخ لا اكسر رأسك
أجواد بطاعة : طيب يلا جايه
ناصر ضحك في داخله على مشاعر هو بطبعه ما يحب حدة الصوت عند البنات لكن ذي البنت يضحك من كل قلبه عليها غبية ما تفكر الا كيف تثبت لسانها وتحاول تخبي خوفها منه اللي واضح وضوح الشمس والدليل انها ماتبي توقف او تروح لحالها بدون اختها الثانية توه بيبدأ يصلح اللمبات الا سمع صوت الجرس نزل من على السلم بيشوف مين الا شاف أجواد فاتحه الباب للبنتين الباقي ووحده فيهم جالسه تطق على الباب بحماس وتتمايل
واجواد تحاول تنبههم لكنهم متحمسين ناصر تنحنح وخلاهم كلهم يجمدون حتى أجواد
شوق بخوف : بسم الله مين ذا مشاعر تزوجت ؟
توق : يمه بسم الله يمه
شوق : توق شوفي شوفي ذا احلى من اللي كنتي تتابعينه في التلفزيون وش اسمه
توق : بدر آل زيدان
أجواد بعصبية : شوق توق انقلعوا داخل
شوق : هيه لا انتظري خن نشوف الحلو انت مين انت
ناصر ضحك بقوة عليهم لين بانت غمازاته : انتوا شوق وتوق صح
شوق بفهاوه على الغمازة والشكل : انا غمازة
ناصر ضحك : روحوا ترى الوضع مراقب ولف براسه على مشاعر اللي واقفه عند باب المطبخ وتخز
توق بخوف : يمه مشاعر انا والله ما سويت شيء
شوق : أعوذ بالله وش الفرق هينا غمازة وهناك شوي وتدخّن من راسها
أجواد وهي ماسكه الضحكة عليهم وبصوتها الناعم : يا ويلكم منها تجهزوا
ناصر ابتسم : هي رئيستكم ؟
شوق : هي آنسة منشن حقتنا
كلهم ضحكوا على كلمة شوق الا بصرخة مشاعر
مشاعر بعصبية : تحنطوا بعد عند الباب تعالوا اخلصوا
توق تناظر شوق : الحمدلله شكلها ما سمعت يلا تعالي لا تدخن علينا
أجواد ماسكه ضحكتها وتدفهم للمطبخ : يلا يلا انتي وياها
ناصر ابتسامته بتطلع من اذانه وراح يكمل شغله وهو مبتسم
- في كاليفورنيا
راشد بحماس : استاذ سالم لقيناها
سالم بسرعة : وينها فيه
راشد : في مؤسسة كبيرة موظفة هناك شفتها وهي داخله المؤسسة بالصدفة ولما سألت قالوا لي انها موظفة
سالم بسرحان : حلو حلو طلع لي سجل المؤسسة بالكامل وطلع لي كل المعلومات عنها
راشد : حاضر عن اذنك
سالم اشر له بيده يطلع وهو يفكر : بترجعين لي تزحفين يا مدى وبتشوفين من هو سالم
- عند مدى
يا قاري عيوني كفا
لا تنبش اسراري
وش لك تدور به وفا
تستعلم أخباري
مالك وجفنٍ للسهر
مال وتعدّل وانكسر
كلي صبر
وان بان لك عكس الكلام
مليان في صدري فخر
حاول تشيل الاهتمام
كل السواليف القديمة
والقصيد
كل الاغاني والصور
حبر وكلام
غيم على بالي عبر
عشق وهماليل وسلام
مني على الشعر السلام
#ممنوع الاقتباس
مدى بملل : جون
جون : ماذا
مدى : أين العمل أين الاستاذ بندر
جون : جدول سيد بندر غير ثابت فهو يأتي إلى هنا في الوقت الذي يحلو له
مدى بالعربي : اها وانا لازم انتظر الوقت اللي يحلو له
جون : ماذا تقولين ؟
مدى : لا شيء انا ذاهبة إلى الحرم النسائي
جون : حسنًا
- مدى راحت الحرم وهي تدور اغراضها تتذكر انها حطتها على هذا السرير بس ما لقتهم صارت تتمشى وشافت اغراضها بأخر سرير
مدى بصوت عالي : من التي وضعت حاجياتي هناك
غدير وهي تلعب بشعرها : انا
مدى وهي تحط رجل على رجل : وليه
غدير وهي ما زالت تلعب بشعرها بحركات مستفزه : عجبني السرير واخذته انا
مدى : انا دايم اعرف انه الناس الحقيرة ما تاخذ الا من فضلتي
غدير بعصبية : هيه انتي احترمي نفسك
مدى : صدق تبيني احترم نفسي حبيبتي انا محترمه نفسي بس لكن اشكالك مالهم احترام
غدير بعصبية : اعتذري بسرعة
مدى بضحكة : ههههههههه ضحكتيني اعتذر منك ليه
غدير بعصبية أكثر : قلت لك اعتذري
مدى رجعت تضحك ومشت وتركتها ما حست الا بأحد يسحبها من شعرها بكل قوتها لفت وعطت غدير كف قوي وقامت الحرب بينهم والأجانب اللي موجودين مو فاهمين شيء بس منصدمين من العنف اللي صار قاطعهم صوت بندر اللي معصب
بندر بعصبية : مدى وغدير
غدير وقفت بسرعة وهي ماسكه خدها ودموعها في عيونها : استاذ بندر شوف من اول ما جات سوت مشكلة استاذ بندر اعطتني كف
مدى واقفة متكتفه وهي تشوف غدير كيف تتمسكن عند بندر وتضحك بسخرية
بندر لف على مدى وشافها ورجع لف على غدير
بندر : وش المشكلة اللي بينكم
غدير : استاذ مافيه مكان بالحرم وهذي الا تبي تأخذ سريري
بندر لف على مدى وشافها تضحك بسخرية : مدى صحيح هالكلام
مدى ضحكت بقوة : ليه تسألني اسمع منها كمل عندها مهارة قوية في التأليف وكتابة القصص
بندر بصوت عالي : جون احصي لي عدد السرائر هنا
جون : 14 سرير سيدي
بندر لف على غدير : وانتوا مع مدى 13 موظفة بس
غدير بدموع : استاذ بندر السرير القديم مزعج لأنه قريب من دورات المياه وكلهم يمرون عنده وصار يطلع صوت من الماي اللي يجيه
بندر زفر : مو مشكلة مدى
مدى وهي متكتفه : نعم
بندر : روحي للسرير اللي كنتي فيه أول ما جيتي
مدى تكتفت : آسفة ما اجلس على فضلة أحد واذا انت ما تقدر توفر لي غرفة هينا بدون ناس دخيلة انا ما راح اجلس هينا لأنه ما فرق عن الشارع كثير
بندر وهو يبتسم : يا مدى الغرفة ما تتوفر في هذا الوقت من اليوم
مدى : معناه انا ما اتوفر للشغل اليوم بعد – ولفت على غدير وبفكرة خبيثة – تبي تقنعني انه ما عندك غرفة هينا
بندر باستغراب : مين قال لك ما عندي غرفة هينا
مدى : غرفتك اتوقع هي الغرفة الوحيدة اللي مافيها ناس دخيلين
بندر باستغراب : غرفتي انا انام فيها
مدى بخبث : مافيها الا سرير واحد ؟
بندر ابتسم بعد مافهم خطتها : فيه سرير يوسعك حياك
مدى ابتسمت بخبث ولفت على غدير اللي بتولع في مكانها وشالت شنطتها ومرت من عندها وتخطتها وقربت من بندر وهمست له : يلا
بندر ابتسم ومشى معها وبعد ما طلعوا من الحرم : طلعتي مانتي سهله والله
مدى ضحكت بقوة : شفت وجهها
بندر قرب منها بجدية : مدى ترى غدير اخبث من اللي تتوقعينه
مدى بجدية : واضح لكن لا تخاف انا لها مافيه شيء ما اتوقعه
بندر ابتسم بخبث : بس ما اتوقع انك بتقدرين تنامين معي بنفس الغرفة
مدى بضحك : لا تخاف استكشفت غرفتك قبل لا تجي وشفت انه فيها سريرين ولا ما غامرت
بندر ضحك : تفتيش من اول يوم صرت اخاف منك ترى
مدى ضحكت : واقدر أدليك على المؤسسة اذا ضيعت بعد
بندر ضحك وهو يفتح الغرفة : تفضلي تفضلي
مدى دخلت : زاد فضلك – حطت أغراضها على السرير ولفت على بندر – انا اللي عند النافذة ترى
بندر وهو ينفخ بايديه : اعترض برد عليك
مدى ضحكت بسخرية : لا تخاف متعودة على البرد انا لو ما بردت يمكن ماراح اقدر انام
بندر وهو يتدفى : وفرتي علي مجاملات لأني شخص ما يحب البرد ابد
مدى ضحكت وهي تطالعه من فوق لتحت : واضح استاذ بندر لابس كل خزانتك
بندر ضحك : صحراوي انا ما احب البرد
مدى : اشش ابي انام
بندر : وهو ينسدح على سريره ماراح تعرفين تنامين معي
مدى : ما عرفتني للحين
- بعد نص ساعة من حالتهم هذي
بندر : ما قلت لك انك ماراح تعرفين تنامين معي
مدى بسخرية : اشوفك انت اللي مو قادر تنام من اول وانت تتقلب
بندر وهو يصد عنها : انا انسان صريح ما الف ولا أدور جذبتيني ولا انا عارف انام قبل لا تنامين انتي
مدى : ما حسبتها صح يا بندر ما دامك للحين تتقلب انا ماراح انام
بندر ضحك : لهالدرجة اخوف
مدى : لا بس مزعج
بندر : خلاص بسكت تصبحين على خير
مدى : وانت من اهله
- شوي ورجع بندر يتقلب
مدى بانزعاج : بببنننددرر
بندر قام من السرير : خلاص خلاص انتي نامي بالغرفة وانا بنام بشقتي
مدى فزت من السرير ومسكت يده : لا تروح
بندر وعينه في عينها : انا مزعج
مدى : بس معك اول مره بنام بأمان
بندر وهو يناظر في عيونها اللي تناظره : مدى تتزوجيني ؟
مدى اللي بعدت عينها عن عينه : بندر خلك أمان ولا تجيب لي الطاري هذا خلك مثل ما عرفتك
بندر وهو يجلسها على سريره ويجلس جنبها : وش مفهوم الزواج بنظرك يا مدى
مدى بحقد : سلطة وكره ومصلحة
بندر وهو يناظرها : انا الزواج في نظري مشاركة وترابط وانسجام فكري
مدى وهي تبعد عنه : لا يا بندر انا انلدغت مره ماراح انلدغ ثاني
بندر بزعل : شايفه اني ناوي عليك بالشر ؟
مدى بسرعة وهي تناظره : لا بس دخيلك لا تجيب هالطاري
بندر : بس مستحيل بنام معك هينا واخلي موظفيني يفكرون فيني بالطريقة اللي خليتي غدير تفكر فيها
مدى وهي ترجع لسريرها : خلاص اطلع روح شقتك
بندر وهو يروح ويجلس جنبها : مو قلتي اني أمان بتقدرين تنامين بدون الأمان هذا
مدى بقوة : لا تأخذ بكلامي انا قلته بعد ما فكرت اني بنام أول مره في مكان آمن لكن اذا انت رحت انا متعودة
بندر من ورى قلبه : خلاص أخت مدى أنا آسف واعتبري نفسك ما سمعتي مني شيء انا طالع خذي راحتك – اخذ اغراضه وطلع من الغرفة ومدى بدموع راحت لسرير بندر وهي تقول في نفسها انها ما تقدر تثق بأحد من بعد ذاك اليوم ونامت مابين دموعها ووسادة بندر بينما بندر كان يتمشى حول المؤسسة ماهو ناوي النوم
- في نيويورك
الريم بعصبية : يبا
ابو الريم : وشفيك يالريم
الريم : مين هذا طلال اللي عندك اليوم
ابو الريم : قلت لك نائب شركة ال..... اللي دخلنا فيها شركاء وشفيه
الريم بتفكير : لا مافيه شيء ، يبه
ابو الريم : سمي يا يبه
الريم بتفكير : انا أبي اشتغل بالشركة
......
- عند مشعل
مشعل : يا أحمد اقول لك أمي شكت فيني وفي البنت وخيرتني بين شيئين وقللت من قدري عندها وش اكثر من كذا
أحمد : يا مشعل لو مهما يصير هذي أمك وبعدين خلاص فك نفسك من البنت وودها تعيش عند خالتك
مشعل : منتوا فاهميني يا احمد محد فاهمني
أحمد : لو وش يصير يا مشعل هذي أمك ما عندها غيرك حرقت جوالك من أول ما قعدت رد طمنها لو صار لها شيء والله انك بتندم
مشعل تعوذ من ابليس وخذ جواله : نعم يمه
أم مشعل : يمه مشعل وينك
مشعل : برى
أم مشعل : ارجع يمه ارجع اتكلم معاك
مشعل : يمه انتي قللتي من قدري قدام اختي والبنت يمه انتي شككتي فيني وش اكثر من كذا
أم مشعل : تعال يا يمه وانا اعتذر منك قدامهم
مشعل : يا يمه لا تعتذرين مني روحي انتي ومنار واعتذروا من البنت اللي طعنتوا بشرفها
أم مشعل : يا يمه انا ما طعنت فيها
مشعل : يمه انتي وبنتك غلطتوا على البنت
أم مشعل بسرعة : ولا يهمك نعتذر بس ارجع البيت انت الله يخليك
مشعل : برجع يا يمه برجع
أم مشعل : انتبه لنفسك
مشعل : ابشري ويمه ترى لي حساب مع بنتك ما قضى
أم مشعل : ذبحتها من الضرب وخذيت منها أجهزتها
مشعل : لا عندي معها تفاهم ثاني
أم مشعل : سو فيها اللي تبي تستاهل
مشعل : مع السلامة يمه
أم مشعل : مع السلامة حبيبي

-انتهى


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 16
قديم(ـة) 23-12-2016, 05:21 PM
اسيرة الهدوء اسيرة الهدوء غير متصل
©؛°¨غرامي مشارك¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


السلام عليكم
بارتات رائعه واحداث مشوقه
معاك باْذن الله للنهايه
بانتظار البارت القادم

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 17
قديم(ـة) 23-12-2016, 09:22 PM
صورة نـجــد الرمزية
نـجــد نـجــد غير متصل
©؛°¨غرامي مشارك¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


اقتباس:
المشاركة الأساسية كتبها اسيرة الهدوء مشاهدة المشاركة
السلام عليكم
بارتات رائعه واحداث مشوقه
معاك باْذن الله للنهايه
بانتظار البارت القادم
وعليكم السلام
تنوريني حبيبتي 💜
الأجزاء بتنزل يومين بالأسبوع
الاثنين ، الأربعاء


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 18
قديم(ـة) 23-12-2016, 09:25 PM
صورة نـجــد الرمزية
نـجــد نـجــد غير متصل
©؛°¨غرامي مشارك¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


بإذن الله الأجزاء بتنزل يومين في الاسبوع
الاثنين والأربعاء
عشان يأخذ كل جزء حقه من الكتابة والتفاعل ��


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 19
قديم(ـة) 26-12-2016, 03:14 AM
ام السووري ام السووري غير متصل
©؛°¨غرامي جديد¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


مشاعر الحارس الشحصي لخواتها هههههههههههههخ حبيتها كثيير . وغرور الريم كريهه بس وراه قصه ومصيرنا نعرفها..وشكررا واستمري واحنا معك بس البارتات مررره صغار ماتعتبر بارتات مقدمه فقط حاولي تطولينها حتى لو صارت مره فالاسبوع بس طويله

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 20
قديم(ـة) 26-12-2016, 02:16 PM
صورة نـجــد الرمزية
نـجــد نـجــد غير متصل
©؛°¨غرامي مشارك¨°؛©
 
الافتراضي رد: كن عيونك ساحة قتال ورموشك جنود وكنّي اللي جا بكيفه يدور مقتله


اقتباس:
المشاركة الأساسية كتبها ام السووري مشاهدة المشاركة
مشاعر الحارس الشحصي لخواتها هههههههههههههخ حبيتها كثيير . وغرور الريم كريهه بس وراه قصه ومصيرنا نعرفها..وشكررا واستمري واحنا معك بس البارتات مررره صغار ماتعتبر بارتات مقدمه فقط حاولي تطولينها حتى لو صارت مره فالاسبوع بس طويله
جدًا شخصية مشاعر حلوه
حبيبتي الجزء الأول والثاني كانوا طوال لكن قلة التفاعل والاقبال على الرواية احبطتني وما ودي ادخل بأحداث الرواية والتفاعل كذا وآخر شيء اقفلها لو فيه تفاعل حلو عادي انزل بارتات طويلة ثلاث مرات في الأسبوع


الرد باقتباس
إضافة رد
الإشارات المرجعية

يدعوني هواك فأتبع /بقلمي

الوسوم
روايه
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
ذنبك ياخوي دمرني /بقلمي كويتيه و روحي المملكه روايات - طويلة 0 12-02-2017 04:31 PM
رواية واكتشفت اني... /بقلمي 88.d.1 روايات - طويلة 32 20-11-2016 05:07 PM
رواية كل شي يتغير في لحظة /بقلمي like_the_moon روايات - طويلة 21 08-04-2016 01:32 PM
حبنا اندفن وهو حي /بقلمي عيوني تحكيلك قصتي أرشيف الروايات المغلقة - لعدم إكتمالها 12 09-02-2016 06:56 AM
بنت عمي ولي حق فيها /بقلمي... مروا؛ميم روايات - طويلة 1 30-08-2015 02:48 PM

الساعة الآن +3: 07:51 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1