اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
الإشعارات
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 11
قديم(ـة) 10-01-2017, 02:35 PM
صورة هدوئي كارثة الرمزية
هدوئي كارثة هدوئي كارثة غير متصل
©؛°¨غرامي مشارك¨°؛©
 
الافتراضي رد: روايتي الثانية:عذبني أنينها


انتظروني بروايتي الثانية : عذبني انينها
سيتم تنزيل اول بارت يوم الخميس بالساعه 8:30 كونوا بالموعد


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 12
قديم(ـة) 11-01-2017, 12:08 AM
صورة حِسّ ! الرمزية
حِسّ ! حِسّ ! غير متصل
©؛°¨غرامي مشارك¨°؛©
 
الافتراضي رد: روايتي الثانية:عذبني أنينها




ننتظر أبداعك يَ حُلوةة ..


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 13
قديم(ـة) 12-01-2017, 12:42 AM
صورة Baylisan7 الرمزية
Baylisan7 Baylisan7 غير متصل
©؛°¨غرامي جديد¨°؛©
 
الافتراضي رد: روايتي الثانية:عذبني أنينها


بانتظارك واتمنى تكون روعه 👍👍

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 14
قديم(ـة) 12-01-2017, 09:32 PM
صورة هدوئي كارثة الرمزية
هدوئي كارثة هدوئي كارثة غير متصل
©؛°¨غرامي مشارك¨°؛©
 
الافتراضي رد: روايتي الثانية:عذبني أنينها


💖 الباأإٱآرت الأإٱآول 💖

عآدة سيئة فينآ "نحب إللــــــي يجــــآفينــــــــــــــــــــ آ
وإللي يحبنآ "نجفآه لو هو ميــــــــــــــــــــــــت فيـــنآ"
ندور في البشر قآسي ندور نــــــــــآكر ونـــــــــآســــي
وإللي قآل : خذ قلبي .. نقول : الــــــــــــله يغنينــــــــــــآ
عطآنآ الحب ومآقصر وقآل : إنت آلعمــــــر و أكثــــــــر
وإحنآ ندور لوآحد ولآعمره ســــــــــــأل فيــــنــــــــــــــــآ
أجيله بأصدق أشوآقي وهو ميـــــــــــــت على فرآقـــــــــــي
نحن لنآس مآترحــ ــــ ــــ ـــ ـم عسى الله بس يهدينآ
°•.•°

انا انين عمري تسعطاشر سنه ...للاسف ما كملت ثانوي لان امي ما رضت ...او بصراحه هي مو امي الحقيقية بس هي الي ربتني ...بصراحه اكثر هي تكرهني واجد بس انا احبها وااجد ...عمرها ما حبتني ولا عاملتني زين حتى اكل ما اكل معهم اكل لوحدي ...ما يرضيها شي اسوي ...واليا قلت شي زين هاوشتني وتقولي مامنك فايده وتبدا تكفر فيني ...حتى احيانا توصل للضرب ...ابوي عايش الله يطول بعمره ...وبعمر السامعين والقاريين بس ما يدري عن شي لان ابوي مريض قلب وهو اغلا شي عندي من بعد رب العالمين ...وش بقى ما علمتكم في ...اي نسيت احب اقرا واجد حتى خليت عز يسوي لي مكتبه وكل شي يجيب لي كتب جديدة وضبط لي غرفتي ...تتسألون من هو عز ...اسمه عبدالعزيز اخوي حبيبي ونور عيني هي ثالث قلب لي ههههه قلبي الاول لدحيم والثاني عبود والثالث عز ...اخواني التوأم اكبرهم عبدالرحمن واوسطهم عبدالله والاخير عبدالعزيز ...بس جمالهم تبارك الرحمن ...ياخي ولا شفت بجمالهم جمال مدري لمن طالعين هههه عندي اخت اسمها سارة هي تكرهني ...تصدقون حتى ما اذكر ملامح وجهها لاني ما اشوفها كثير ...ب...
منيرة : انوووون يالزفته نزلي
انين " الله يستر اش صاير بكمل لكم بعدين خلوني اشوف امي " : جايه يممما
منيرة بكره : وصمما ان شاء الله
انين نزلت : آمرييني
منيرة : الخدامه مرضت انقلعي نظفي المطبخ وجهزي الغدا عيالي بجون
انين بابتسامه : من عيووني
منيرة : اقوول انقلعي انتي ووجهك ذا
انين راحت المطبخ وبدأت تنظف " خلوني اكمل لكم " وين كنا ...ااها اختي سارة ما تحبني مدري لي تقول اني موب حلوة ...بصراحه هي تغار مني لاني اجمل بنت بعايلتنا ...اخواني يقولون اشبه ممثله بس مدري وش اسمها بس انا ما اشبه احد لان القمر ماله شبيه هههه امزح معاكم ...يوم جيت البيت ذا كان عمري سبعة اشهر وكنت اصييح بقوة ...طبعا عزوز قالي انا ما اذكر شي وقالي انهم ما سموني فهو اختار لي اسم الين بس دحوم قال لانها تبكي كثير بنسميها انين نفس القافية بس تغير حرف اللام ...تصدقون ان لي بنات عم وعيال عم بس ما قد شفتهم لان امي تقول لا تطلعين برا الغرفه واذا طلعت بنام بالملحق وانا اخاف عشان كذا ابقى بغرفتي ...بس عادي انا متحمله كل هذا لاني عارفه ان رب العالمين مخبي لي شي يفرحني بإذن الله تصدقون اكثر شي اكره تنظيف المطبخ يغث والله -وفجأة طاح الصحن من يد انين - اااه ...يا ربي عز الله رحت فيها الحين بنطق
منيرة جت بسرعه : اااه يا الحيوانه ...تبين تكسرين صحوني
انين : يمما بلغلط والله
منيرة مسكتها من شعرها : لك كم يوم ما انطقيتي والله لربيك يا حيوانه
انين بترجي : يممما اماانه فكييني يمما تكفيين شعرري يوجعني يممما
منيرة تسحبها للصالة : والله ما ينفع معك الا كذا يا بنت الحرام انا اوريك - وقامت تضرب فيها بالخيزرانه وانين تصيح -
انين تصيح بهدوء بدون لا تتكلم
وصلنا باب البيت وكالعادة صوت الخيزرانه هو الي نسمعه حسيت الدم قام يغلي بعروقي وما تحملت
عبدالعزيز دخل وبعصبية : يممممما
منيرة رمت العصا من يدها بسرعه
عبدالرحمن : عزوز اهدا
عبدالعزيز بصراخ : لا حد يتدددخل فاااهمين
عبدالله بهدوء : عزوز
عبدالعزيز راح لانين الي ضامه رجولها وتصيح بهدوء : قومي يا قلبي
انين تصيح : والله كسرته بالغلط
عبدالعزيز بحب : خلاص يا قلبي هدي ما صار شي -ولف على امه بعصبيه - لييي ضربتيها
منيرة بتهرب : بب..قامت تغلط علي
عبدالرحمن : يممما ..
عبدالله ضحك : ههههه انين غلطت عليك ...يمما انين مستعدة تحب رجولك
عبدالعزيز بصراخ : اقسم بالله لو مديتي يدك عليها ليصير شي ما شفتيه
انين مسكت يد اخوها عشان يسكت
عبدالرحمن : يمما لمتى هالحال حراام عليك جسم البنت كله علامات خافي ربك وش ذا
عبدالله : يمما انتي ترضين احد يسوي كذا بسارة ...
منيرة " انا اوريك يا الساحرة ..وش سويتي لعيالي كلهم اقلبو علي " : يمما انا ...
عبدالعزيز قاطع امه : خلااااص عاد ...والله ان صار لها شي بندمكم ...فاااااهمين ...انين تعالي معاي
انين طالعت بامها : ارووح
عبدالعزيز بعصبية : انييييين
انين نزلت راسها وراحت مع اخوها
عبدالرحمن : الله يسامحك يمما الله يسامحك
عبدالله : لا حول ولا قوة الا بالله ...والله موب حاله هذه والله
منيرة : الغدا جاهز ...جهزته لكم
عبدالله ضحك : ههههه انتي جهزتي
منيرة بكذب : اي انا
عبدالله ضحك : هههههه اجل كلي انتي يمما صحه ع قلبك انا انسدت نفسي -وطلع -
منيرة بكره : انا اورييك يا انينو الكلبه ...عيالي انقلبو علي بسبتك صبري بس وانا ا وريك
دخل ابو عبدالرحمن : السلام عليكم
منيرة : وعليكم السلام يا محمد
محمد : دامم قلتي اسمي في شي ...وش عندك
منيرة تتمسكن : يبو عبدالرحمن هذه انين كبرت ...وانا اقول يعني نزوجها
محمد بعصبية : منيييييرة ...من الاخر تبين تتخلصين من البنت
منيرة عصبت : انا ما اخلي بنت حرام عندي بالبيت
محمد بصراه هز البيت : منييييييرة اقسم برب البيت لو قلتي هالكلام مرة ثانيه لطلقك فاااهمه
منيرة قامت وراحت غرفتها
عبدالرحمن " هذه حالتنا من يوم حنا صغار ...ابوي غني وربي عاطي ومقدره وحنا عنده ونسانده اختي ساره سافرت تكمل دراستها بلندن وانين امي خلتها بالبيت طبعا غصبن عليها وكل ما سألنا انين تقول ما احب الدراسه وهي تعشقها بس تخاف من امي ...امي الله يهداها تكره انيييين واجد من يوم ابوي جابها البيت وهي صغيرة ...امي ما رضت فيها بس حنا واخواني تمسكنا فيها لان حسينا بشعور الاخوة معاها مو مع سارة ...للاسف انين عايشه معنا لدرجه انها تلبس زينا كذا وتتصرف زينا بس جمالها سبحان الله طالعه لامها فرنسيه ...ملامحها عجيبه تشبه ممثلاث هوليوود ...بس هي ما تهتم بنفسها ابدددا تكره هالشي ...انين حساسه جدااا جدااا تمسك دمعتها لاخر الليل تحط القرآن وتقرا وتصيح لدرجة اسمع انينها وانا بغرفتي ...بس للاسف مقدر اسوي لها شي حتى وانا اخوها ..."
انين تصيح : تكفى يا عزوز لا تعيدها
عبدالعزيز بعصبية : اقسم بالله بصفقك الحين لك عشر سنين على هالحاله وتدافعين عنها بعد
انين تصيح : انا احببها والله بس مدري لي ما تحبني هي ...
عبدالله : لان مو كل الناس قلوبها مثل قلبك
انين تصيح : والله اني ما اسوي شي يزعلها واحاول اراضيها دايما بأي شي بس هي ما تفرح بالعكس تقلب علي ...
عبدالرحمن : طيب الي يقولك في لك مفاجأة
انين : وش هي
عبدالرحمن طلع ورقه من جيبه : بتعدين الترم من جديد
انين وقفت من الفرحه : احلللف .. جد والله بع...-وحست على حالها - هاا لا انا اكره الدراسه
عبدالرحمن بتفحص : انيين نسيتي اني دكتور علم نفس وكذبك ذا ما يمشي علي ...بتعدين السنوات الي راحت عليك فاهمه
انين بخوف : مددري ...بس يعني ..امي
عبدالعزيز : امي ما لها كلام احنا قررنا وكل يوم واحد بوديك وبجيبك وعندك الكتب كلها وجبتلك كل المواد صح يعني انتي شطورة وبامتياز وبتعدي السنه بسهوله صح ولا لا
انين بابتسامه : صح
عبدالله : عشان كذا يا انين الحلوة بتغيرين من طبعك
انين اختفت ابتسامتها
عبدالرحمن : انين انتي بنت موب ولد ...يعني لبسك ذا يبيله تغيير ولا بيحسبونك بوويه
انين بصراخ : اعووذ بالله
عبدالله : عشان كذا لازم تغيرين من اطبعاك
انين بابتسامه : اخواني الحلوين ...انا ذي اطباعي وما بتتغير ولبسي بحسنه غير كذا مابي
عبدالرحمن : تراني اخوك الكبير
انين بعناد : وانا اختك الصغيرة
عبدالرحمن : انييين
انين بضحك : دحوووم
عبدالرحمن ضحك : هههه كيف تميزينا مدري
انين : احم احم قدرة خاصه
عبدالله : من جد كيف تميزينا يعني حنا نسخ عن بعض كيف تعرفينا ...امي نفسها ما تفرقنا
انين ابتسمت : لا جا الوقت المناسب بعلمكم
عبدالعزيز : اجل يا انوون وش بتغدينا
انين : سويت لكم غدا فاخر اليوم
عبدالله : وش سويتي يا اختي الغالية
انين : سويييت لكم ...سويت لكم
عبدالله : اخلللصي علينا
انين جلست عالسرير : ما سويت شي
الشباب مع بعض : ليييي
انين : كذا ...عناااااد
عبدالرحمن مسكها من جاكيتها
انين تصارخ : دحووووم نزلني تكفى تكفى نزلني يا مجنون
عبدالرحمن : وش سويتي غدا
انين بسرعه : كبسه كبسه كبسه كبسه بس نزلني
عبدالرحمن نزلها : ايووة كذا ما يمشي معك الا العين الحمرا
انين تسوي مصدومه : بس دحووم عينك سمرا كيف تقول حمرا
عبدالرحمن : الحين اصفقك واخليك تشوفنها حمرا
انين تسوي فيها قوية : اقول لا يكثر بس
عبدالرحمن جا بيضربها
انين بسرعه : عزووووز تكفففى احميني منه بيضربني
عبدالعزيز ضحك : انا دايما اخذ الضرب عنك ههههه
انين متعلقه برقبته : عااتي تحمل
عبدالله : انوون تكفين روحي حطي غدا مييت جوع
انين فكت رقبة عبدالعزيز : من عيوووني
نزلت للمطبخ عشان احط غدا لاخواني وشفت ابوي جالس لحاله رحت حبيت راسه
انين : اشتقتلك يالغالي
محمد : وانا اشتقتلك يا بنيتي شلونك
انين جلست جمب ابوها : بخير دامك بخير
محمد لاحظ شي عوجهه انين : وش صاير بوجهك يا انين
انين ارتبكت : ما في شي يبوي ...بروح احط غدا لاخواني
محمد " لي انتي كذا يا بنيتي ...لي تكتمين بصدرك " : روحي يا بنتي
رحت حطيت غدا لاخواني وجهزته لهم وحطيته على الطاولة واخذت صحني وطلعت على غرفتي
عبدالرحمن ياكل : انيين ويين
ابو عبدالرحمن : بغرفتها
عبدالرحمن : تغدت
ابو عبدالرحمن : اي تغدت
عبدالله : يمما يببا انا وعبدالعزيز بنسافر يومين لجدة عندنا شغل
ابو عبدالرحمن : تاخذون اذن يعني
عبدالله : لا قاعد اعطيكم خبر بس ...الحمد الله شبعت
عبدالرحمن : نسيت اقول لكم ...انين بترجع تعيد الترم
منيرة انصدمت : شلووون
عبدالرحمن ببرود : وبتبدا بعد اسبوع وباخذها تشتري الكتب والملابس الي لازمتها ...واذا صار وغيرت رأيها بحرق هالبيت بالي في
ابو عبدالرحمن : دحوووم
عبدالرحمن : الحمد الله شبعت ...انييين ..انيين
انين جت : سم
عبدالرحمن : لبسي عباتك والحقيني معك خمس دقايق
انين استغربت : ويين
عبدالرحمن : قلت لبسي عباتك ولحقيني
انين هزت راسها وراحت لبست عباتها وحطت نقابها وشيلتها ونزلت
عبدالله : يمما اشوفك موب زينه
منيرة بحقد : شفيكم مع هالبنت ااه لي تسوون معها كذا
عبدالله : هالبنت اختنا ولها حق علينا
منيرة بكره : ساحرتكم هالبنت ساحرتكم

★عايلة ابو عبدالرحمن =محمد وزوجته منيره
عبدالرحمن 26 ( شاب طويل موب اسمر ولا ابيض سمارة يجنن ..خشمه حد السيف وعيونه وسيعه كانها مكحله معضل ويهتم بصحته زين وقلبه طيب بس لا عصب يحرق البيت ببرودة اعصاب طبيب نفسي )
عبدالعزيز 26 ( نفس توأمه بس يشتغل بالشركه مع ابوه )
عبدالله 26 ( نفسهم يشتغل مهندس لانهم ما يبون يكونون بنفس المكان عشان ما تصير خربطه )
سارة 20 ( بنت طويلة موب نحيفه واجد ولا سمينه شعرها قصير لين كتوفها ما بيضا شوي وطالعه لامها بكل تصرفاتها )
انين 19 ( بنت فرنسيه بمعنى الكلمة تشبه امها بكل شي جسمها مرسوم رسم وعيونها خيال وشفايفها وردية صغيرة شعرها طويل وااجد ولونه سواد الليل وقلبها طيب )
________________________________
فيصل بعصبية : فهوود خلك من حركات البزران هذه وجبها
فهد يعاند : مابي اول شي وافق
فيصل : استغفر الله العظيم يا ولد وش نوعك انت عطني جوالي
فهد : وافق اول شي
قوت دخلت : شفيكم شفيكم
فهد : شدخلك انتي
فيصل اخذ جواله بسرعه : انقلع برا
فهد بعصبية : انتي ما جيتي غير الحين
قوت : لي شتبي
فهد : بروح لندن وابي فيصل يكلم ابوي بس الكلب موب راضي
فيصل : كنت بقوله بس دامك قلت كلب ماني مكلمه
فهد راح لفيصل : تكففى يا فيصل ..تكفى
فيصل : خلاص رحمتك امش
نزلو الشباب تحت
ابو فيصل : الله يستر ..فيصل وفهد مع بعض
قوت : فهد يبي يسافر وفيصل بقنعك
فيصل وفهد مع بعض : كذابه ييببا
قوت فتحت فمها : انا كذابه الحين سمعتكم
فهد يأشر لها
قوت مو فاهمة شي : لي تأشر شفيك
فهد توهق : هاا لا ما أشرت
ام فيصل : ليي تبي تسافر يا فهد
فهد ارتبك : يمما ..شسمه بنروح رحله ..مع الربع
فيصل يكمل : اي يببا يعني ترفيه
ابو فيصل : هقيت الجيه هذه لاجل طلب ...كم تبي
فهد ابتسم : تعجبني كذا
ابو فيصل : واحد من ربعك انا
فهد بسرعه : لا لا قصدي انت احسن اب كذا قصدت
ابو فيصل : كم تبي
فهد ابتسم : الي يجي منك زيين ييبباا
ابو فيصل مد له البطاقة : خذ البطاقة بس موب تخلصها
فهد حب راس ابو : ربي يديمك لنا يالغالي
ابو فيصل : ياسر ويينه
ام فيصل ارتبكت : ها ..نايم نايم
ابو فيصل : قوت قومي صحي ابي
ام فيصل خافت : يا رجال خله يرتاح شوي تعبان
اريام جت : السلام عليكم
الكل : وعليكم السلام
اريام تصب لها عصير : يمما ياسر وين مريت غرفته موب فيها
ام فيصل راحت فيها : هاا ..هو يمكن ..
قاطعها ابو فيصل : لا حول ولا قوة الا بالله هالولد ما بغير تصرفاته ابد يعني ولا شلون
ام فيصل بهدوء : تلاقي مشغول
فيصل : يمما ياسر عمره ما حط رجله بالشركه
ابو فيصل : وش اسوي في وش
ياسر دخل " لا حوول هذا هنا الحين بيستلمني " : صباح الخير
ابو فيصل لف عليه : قصدك مسا الخير
ياسر : يببا ولي يسلمك ماني برايق
ابو فيصل : سامحني يا استاذ ياسر ازعجتك بس متى تكون رايق عشان اكلمك
ياسر بقلة صبر : يببا شعندك شتبي شصااير
ابو فيصل بعصبية : ربعك الداشرين ذول ما علموك تحترم ابوك
ياسر بنبرة صراخ : ييببا ربعي موب داشرين
فيصل تدخل : ياسر تكلم عدل
ياسر : انت مالك شغل
فهد : ياسر شفيك
ياسر يمسح وجهه : وش مشكلتكم الحين ربعي ...ربعي ذول محترمين مو مثل بعض ناس
ابو فيصل ما تحمل وعطاه كف : قليييل حيا
ام فيصل وقفت
فهد وفيصل منصدمين
اريام وقوت ماسكات يدين بعض
ابو فيصل : اول مرة امد يدي على احد ..والله يا ياسر لو ما تعدلت ما تبقى هنا فاااهم
ياسر طنش ابوه وطلع لغرفته
ام فيصل : لي ضربته
ابو فيصل بصراخ : انتي السبب بكل شي دللتي لين صار كذا
ام فيصل : تقوم تضربه
فيصل : يمما تدافعين عنه فوق كل ذا
فهد : والله لازم ترمونه برا البيت
ابو فيصل : اريام قوت على غرفكم ...
اريام اخذت اختها وطلعت
ابو فيصل : حنا لازم نزوجه ..عشان يعقل
فيصل : يببا وش هالكلام تبي تخرب حياة بنت الناس عشان ياسر ..يببا ذا مستحيل يتغير وبدمر البنت معاه ..
ابو فيصل : انا لقيت له البنت الي تعدله
ام فيصل : ومن هذه
ابو فيصل : انيين بنت اخوي محمد
الكل انصدم
فهد : انين بنت الاجنبية
ابو فيصل بعصبية : فهوود احترم نفسك
فهد توهق : اسف يببا بس قصدي يعني ياسر ما بوافق
ابو فيصل : وانا ما بستنا يوافق
فيصل : يببا البنت بتدمر معاه
ام فيصل : انا مو موافقه عليها
ابو فيصل وقف : ما طلبت موافقتك والزواج بتم رضيتو ولا انطقيتو فاهمين - وطلع -
فيصل : والله انا راحم هالبنت
فهد : بس شلون ..
ام فيصل : لا حول ولا قوة الا بالله

( ★عايلة ابو فيصل =علي وزوجته فاطمه
فيصل 26 ( طويل ورزة يخقق جماله طبيعي يهتم بنفسه وااجد هادي جدا جدا وفي نذاله مو طبيعيه ويموت يسوي مقالب بعيال عمه واصحابه)
ياسر 25 ( موب طويل ولا قصير متوسط معضل حلو ويهتم بنفسه وصايع بمعنى الكلمة يكلم بنات ويسهر معهم ومن هالكلام )
فهد 23 ( طويل بس موب وااجد فلله ويعتبر نفسه اخر حبه ..في غرور موب عند انسان لانه جميل جمال 😍 بس قلبه طيب وااجد ويحب الضحك والوناسه ويكره شي اسمه زواج ..يعتبره خراب الارض وتقييد للحرية للطرفين )
قوت 22 ( متوسطه الطول ونحيفه تحب تهتم بنفسها حلووة وااجد وتموت على اتباع الموضه وفلله هي وفهد دايما مع بعض واسرارهم عند بعض)
اريام 20 ( قصيرة بس موب وااجد نحيفه وشعرها طويل تحب تهتم بنفسها بس موب زي اختها ما تبالغ بكلامها وما شاء الله على جمالها وتحب تخالط الناس ورومانسيه وااجد)
________________________________
عهود تصيح : نواف تكففى فك شعري
نواف : اعتذري
عهود تصارخ : ماني معتذرة زين
نواف مسك شعرها بقوة : اعتذرري
لين : اعتذري يا بنت الحلال
عهود تصارخ : ماني معتذرة والله ان ما فكيت شعري لاعلم ابوي
نواف خاف بس ما بين : ما تقدرين وان سمعت صوتك بذبحك فاهمه
نايف دخل البيت : شصاير هنا ...
عهود تصيح : تكففى نايف فككني منه ذبحني
نايف : لي تضربها
نواف ارتبك : لسانها طوييل
عهود جت بتتكلم : كذ....
قاطعها نواف : عهوود وش صار على الفستان الذهبي الي شفتي ..للحين ببالك
عهود اختبصت : هاا الذهبي ...اي اي ببالي
ليين ضحكت " وعرفت تجيب راسها يا نواف ههه "
عهود " اجل كذا يا نواف ..مقابل سكوتي الفستان الذهبي ...لي لا عادي انت اخوي واقدر استغلك شوي " : اي نوااف والكعب الذهبي والاكسسوارات والعقد الي شفنا
نواف " عز الله رحت فيها وش ذا كله ...اوريك يا عهود النذله تستغليني " ابتسمت وانا ناوي لها على نية : كله لعيون اختي الحلوة
نايف طالع فيهم : اقوول روميو وجوليوت تراكم مكشوفين ...ونواف رح نظف ريحة فمك من الدخان ابوي بجي ...وانتي يا بنت - يقصد عهود - كفايه استغلال حتى اخوك تستغلينه وانتي يا بشوشه - عن ليين - وجهك بيتشنج من الضحك ...
نواف اختبص : معقول الريحة طالعه
نايف : رح تمضمض بديتول او فيري
ليين فطست ضحك : ههههههههه ديتول ههههه
عهود كاتمه ضحكتها : عندي سبريه تبيه ههههه
نواف مسك ليين وعهود من شعورهم : تضحكون علي
دخل ابو نايف بهدوء بدون ما يحس احد
ليين : اوو شعري يا دووب فككني
عهود تصارخ : تراا بعلم ابووي فكك شعري
نايف ضرب جبهته : بزرااان وربي بزراان
جاهم صوت امهم : هلا ابو نايف
الشباب اختبصو
نواف : ابوووي
عهود وليين : يبببااا
ابو نايف : ما بتتعدلون انتو ااه
ام نايف : يا رجال عيال ويلعبون مع بعض
ابو نايف يأشر على عياله : الحين هالجدران تسميهم عيال ...ما حد فادني بشي ...المهم سمعوني زين
الكل : تفضل
ابو نايف : ابو فيصل بيخطب لولده
ام نايف : من صدق
نايف : فيصل بيخطب
ابو نايف : لا موب فيصل ...ياسر
ام نايف : بيخطب لياسر قبل فيصل شلون
ابو نايف : ياسر مسوي له مصايب ويبي يزوجه ويعقله
نايف : وذا حل يعني يببا
ابو نايف : اي حل يمكن يعقل ويحس بالمسؤولية
نايف : ومن بيخطب له
ابو نايف : انين بنت اخوي محمد
عهود فتحت عيونها : الاجنبيه
ليين : قصدك الفرنسية
ابو نايف : اقول تعدلي انتي واياها وش هلكلام
عهود عضت على شفايفها
ليين : طييب ييببا متى الملكه
ابو نايف : مدري بعدنا ما تكلمنا بالموضوع
ام نايف : والله يبو نايف ما هقيت منيرة توافق
ابو نايف : ومن بياخذ رايها اصلا
عهود ضحكت : هههههه يمكن تجيها جلطه لو ما خذيتو رايها ههههه
ليين ضحكت مع اختها : هههههههههههههههه
ابو نايف ما تحمل وضحك : ههههههههه الله يقلع ابليسك يا بنت
نايف : انا بطلع يببا
نواف : وانا ..مواعد الربع
ام نايف : انتبهو على انفسكم
عهود : يمما وحنا بنروح لاريام وقوت
ليين : اي يمما تكفين تكفيين
نايف : زيين لبسو وانا بوصلكم
عهود : وناخذ ميهاف بطريقنا
نايف طالعها : سوااق عندكم انا
ليين : تكففى يا نايف حراام بنت وحيدة
نايف : قالو لك فاتح مكان لرعاية الوحيدين ولا شلون
عهود تسوي زعلانه : خلاص ما بنروح
نايف تنهد : زين يلا نمرها
ليين وعهود : يااااااااي
ابو نايف : وش ذاا الصراخ
البنات ركضو لغرفهم
ام نايف : وش اسوي بهالعيال
ابو نايف : انا بطلع اصلي وارتاح تعبت
ام نايف : خلني اطلع لك هدومك امش

(★عايلة ابو نايف =صالح وزوجته حصه
نايف 25 ( شاب طويل وخقققه ..اخلاقه عاليه ومؤدب يدام بالجيم ويهتم باكله وشربه وصحته يشتغل مع ابو بالشركه يطمح انه يكون رجل اعمال كبير يحب خواته وما يرفض لهم طلب وعليه فصلات سامجه بنظر الكل بس يحب يضحك )
نواف 24 ( اقصر من اخو بشوي حلو ..موب صايع بس يحب يجرب كل شي ويموت بالمغامرات ويعشق المصايب ويحب يتناقر مع عهود ويجننها وفللله ما عنده طموح عايش على مبدأ كل شي من الله حلو )
عهود 22 ( بنت طيبه وااجد بس تبين عكس ذلك تحب تلبس قناع الغرور لان بنظرها الطيب ياكلونه حلوة وتعشق شي اسمه سوق وصرف وملابس تحب المشاكل مع نواف )
لين 20 ( شغلتها بالحياة بس تضحك وجهها بشوش دايما حلوة تهتم بنفسها وما تحب الكلام الزايد يا تقول الي عندك يا لا تتكلم معها متسرعه بكل شي ولا بكت تبكي دقيقتين وبعدين تقوم تضحك على مصيبتها )
________________________________
عرفتكم على اعمامي ...هم ما شافوني ابدا ولا انا شفتهم يعني اتذكر اخر مرة شفتهم يوم رحت بيت جدي ...جدي يحبني وااجد وانا احبه بس جدتي ما تحبني ..يعني هي تحبني بس موب باقي حفيداتها وزي ما شفتو ما يقولون انين يقولون الاجنبية او الفرنسيه عاد يعجبني هاللقب احسه فخم هههه باقي عمي ابو راكان ما عرفتكم عليه ..اقول لكم سر ...انا وميهاف كنا دايما مع بعض لين وقفت دراسه تحاول تتواصل معي دايما بس ما في مجال هي توأم روحي بس لي ثلاث سنوات ما شفتها ...اشتقت لها كل يوم اكتب لها رسايل واشكي لها حالي وعشان ما اقدر اوصلهم احطهم بصندوقي السري ...
شفتها سرحانه وكانها تتكلم مع نفسها احس انها تتعذب بهدوء بس ما اقدر اساعدها
عبدالرحمن : انوون وش تفكرين في
انين سرحانه وموب منتبها
عبدالرحمن هز كتفها : انووون
انين فزت : بسم الله الرحمن الرحيم خوفتني
عبدالرحمن : يتهنا من ماخذ عقلك
انين سندت راسها : يا ريت في من ياخذ عقلي مثلك
عبدالرحمن : شقصدك
انين : دحووم ما فكرت تحب يعني او تتزوج
عبدالرحمن ضحك : هههههه وش خطر على بالك الحين
انين : يعني عمرك صك السبعه والعشرين وللحين ما تزوجت
عبدالرحمن : وجععع عمري سته وعشرين
انين : وش فرق يعني ..المهم ما فكرت تحب
عبدالرحمن : لا ما فكرت ...اصلا الحب مامنه فايدة يعذب الواحد على الفاضي ..طبعا الحب الحقيقي
انين ابتسمت : لي في حب كذب
عبدالرحمن ضحك : ههههه في حب كذب ..حب تسليك ...حب انتقام ...حب مذله في انواع كثيرة
انين عقدت حواجبها : كييف يعني ...معقوله ما في حب صادق
عبدالرحمن : صعب تلاقين هالايام حب صادق
انين : طيب الحب الي بالقصص
عبدالرحمن : قلتيها ..بالقصص والي يصير بالقصص صعب يتكرر ...وبعدين حنا بمجتمع ما يصح في الحب ..لان لو البنت لو حبت حب صادق بقولون عنها صايعه ومو متربيه ولو الشاب غلط بقولون البنت هي السبب على الحالتين تطلع هي المذنبه ...عشان كذا انا افضل الزواج والحب يجي بعد الزواج يعني لما تتزوجين موب ضروري تكونين تحبين زوجك بس بعد الزواج وبعد ايام واسابيع بتتعودين عليه وبتحبينه
انين غمضت عيونها : يعني حب عزوز كذب
عبدالرحمن : حب عزوز يختلف ..عزوز ما فكر يسوي شي حرام وهو يحب من يوم كان فالثانويه ولو حبه كذب كان قال حب مراهقه بس هو للحين يحب اريام
انين : نفسي اشوفها ..
عبدالرحمن : ما قد شفتي اريام بنت عمك
انين هزت راسها بالنفي
عبدالرحمن : لا حول ولا قوة الا بالله ...
انين فتحت عيونها وبصرخه : دحووووم انتبه
عبدالرحمن ضرب برييك بسرعه وطلع صوت تفحيط ووقفت السيارة بسرعه
انين ضرب راسها وعبدالرحمن كان حاط حزام الامان وما تأذى
عبدالرحمن بخوف : انيين ..انييين قوومي
انين رفعت راسها : اااه ..راسي ...
عبدالرحمن نزل من السيارة بسرعه : انتتي ما تشوفين اااه
البنت : لا رد !!
عبدالرحمن : كنتي بتتسببين بمووتنا مجنووونه انتي
البنت دموعها طاحن : كساار ويين
عبدالرحمن انصدم
البنت : انت شاب مثلك مثله وش الاسباب الي تخلي يتخلا عني
عبدالرحمن " هذه مجنونه شكلها يا ربي وش بليتني في "
انين نزلت : دحووم شصاير
عبدالرحمن : مدري بنت مجنونه
انين : ما يصير كذا تتكلم عنها ..اختي انتي زينه ...تبين موويه
عبدالرحمن : لااا شرايك ناخذه نغديها بعد
انين : دحووم خلاااص
البنت تصيح : مابي شي ..
انين : طيب وين امك ..يعني لي كذا طالعه لوحدك
البنت : ادور كسار
انين : مين كسار
البنت : كسا...
جاهم صوت حرمة : ملاااااك ...ملااااااك يمما
انين لفت وجهها : خالتي هذه بنتك
الحرمة : اي اي بنتي
عبدالرحمن : دقيقه دقيقه كيف عرفتي انها بنتك وهي متنقبه
_____________________________________
يتبع ←


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 15
قديم(ـة) 12-01-2017, 09:40 PM
صورة هدوئي كارثة الرمزية
هدوئي كارثة هدوئي كارثة غير متصل
©؛°¨غرامي مشارك¨°؛©
 
الافتراضي رد: روايتي الثانية:عذبني أنينها


البنت تكلمت : يمما لا تخافين انا بخير
الحرمة : يا بنيتي اخووك يدور عليك وابوك ما يصير الي تسوينه فينا
ملاك : انا اسفه يمما ...
الحرمة : مشكورة يا بنيتي وانت يا وليدي مشكور لو ما لقيتوها يمكن تروح من يدينا
عبدالرحمن بهمس : بهالطول ما اظن كانها جدار ...لا يا خالتي لا تقولين كذا ما صار شي ..انين مشينا بنتأخر
انين حضنت البنت : انتبهي ع نفسك ولا تطلعين بلحالك موب زين لك ..
ملاك ضحكت من طريقة كلام انين " تحسبني صغيرة " : هههه انا عمري اربعه وعشرين
عبدالرحمن انصدم : شلووون موب صغيرة
انين ضربت عبدالرحمن
ملاك : يمما نمشي
ام ملاك : امشي يا بنيتي -وراحو -
انين رجعت ضربت عبدالرحمن : انجنيت انت
عبدالرحمن : شسويت انا
انين : تقول لها موب صغيرة
عبدالرحمن ضحك : ههههه حسبتها قدك طولك
انين ضحكت : ههههه تصدق حسبت حالي اكبر منها هههه
عبدالرحمن : باين انها مجنونه
انين : لا حسيت من نبرة صوتها انها مجروحه وجرح كبير
عبدالرحمن : لا يا دكتورة انين وش بعد
انين طالعت في : تستهبل علي اقول متى بنوصل
عبدالرحمن : وصلنا وصلنا
انين : كويس ...
عبدالرحمن ضحك : ههههههههههههههه
انين ما تحملت وضحكت : هههههههههههههههه
________________________________
جالس بغرفتي طفشان ...انين راحت مع دحووم وعبود الكلب مدري وين هج ...وش اسوي الحين اخذت جوالي ودخلت السناب والانستقرام والتويتر وما في شي كله طفش
دخلت منيرة : يمما عبود
عبدالعزيز ضحك : انا عزوز
منيرة : اه اي عزوز ..شلونك يمما
عبدالعزيز : الحمد الله شصاير
منيرة : يمما بكلمك بموضوع
عبدالعزيز : وش هالموضوع
منيرة : انا بخطب لك
عبدالعزيز انصدم : بتخطبين لي ...
منيرة : يمما دخلت السته والعشرين وللحين ما شفت عيالكم
عبدالعزيز وقف : يمما قلتلك مابي اتزوج ما تفهمون انتو وش بلاكم
منيرة : يا يمما عبدالرحمن بخطب له وعبود بخطب له وانت بخطب لك
عبدالعزيز بعصبية : قلتلكم مابي اتزوووج خلاص فكووني من هالسيرة هذه عاد - وطلع-
منيرة : بخطب لك يا عزوز ...بخطب لك
طلعت من الفلله وانا موب طايق نفسي احس كل شي تسكر بوجهي استغفر الله العظيم وش قاعد اقول انا اااه يمما تحسبيني مابي اتزوج تحسبيني مابي اخذ البنت الي اتمناها بس وش اسوي الظروف ما تسمح ...ظروفي يمما ما تسمح ..ما تسمح .....اخذتني رجولي للمسجد فكيت نعالي - عزكم الله - ودخلت بس اول ما دخلت طاحت دمعتي مدري ابكي على حظي ..ولا حظ اختي ولا ابكي على الي يصير قدام عيني وما اقدر اسوي شي ....يا رب انت تعطيني القوة يا الله ساعدني وصبرني واعطيني القوة يا رب - كنت حاط جوالي صامت وحسيت بجيبي يرج اخذته والا دحووم وعبود يدقون - يا ربيي الحين اقلقتهم
عبدالعزيز مسح دمعته : ارححب
عبدالله وعبدالرحمن مع بعض : شفيييك
عبدالعزيز ابتسم : لا تخافون بخير ..اكلمكم بعدين زين
عبدالله : عزوز شفيك
عبدالعزيز : عبود صدقني بخير لا تخاف اكلمكم بعدين انا بالمسجد
عبدالله وعبدالرحمن : زين -وسكرو الخط -
هذه حالتنا من يوم كنا صغار لا بكى واحد فينا كلنا نحس في تحس قلبك دقاته تتسارع ونفسك مقطوع تحس انك مخنوق والمكان ضيق عليك احلا شي بالعالم يكون عندك توأم يحس فيك ويخاف عليك وينشد عن علومك بكل لحظة بس انا محظوظ لان عندي بدل التوأم اثنين .......
________________________________
قاعد بالصاله اطقطق بالجوال العيال ساحبين علي واحس اني بتفجر وابوي زعلان علي وما يبيني اجي معاه للشركة مو ذنبي اذا السربوت ذا ثقيل دم ..انا بقول لكم السالفة وانتو احكمو ...قبل ثلاث ايام كان عندنا صفقه بالشركة ومهمة جدا بعد وابوي كلفني انا اهتم فيها المهم جا صاحب الصفقه وقعدنا نتكلم انا وهو الا وولده تدخل يبي يزود الربح حق ابوه على حساب ابوي وقام يتميلح عندي وان هو جاب صفقات مربحه لابو ومن هالكلام انا ما تحملت وقلت له اطلع برا وظلينا نتهاوش لين كبرت والرجال فك الشراكه ...طبعا ابوي ما خسر لانه ما وقع بس عصب لان لو وقع بتكون صفقه كبيرة ومن يومها ابوي زعلان علي بس..
ميهاف تنادي : راكان ..راااكان تعال رااااكان
راكان "هذه اختي الصغيرة ميهاف" : شتبين
ميهاف بصوت عالي : ابييك شوي تعال
راكان قام وراخ لغرفة اخته : تراني جمبك بالغرفه ماني بالصين كل هالصوت
ميهاف تضبط شيلتها : بجون البنات عندي ولازم اكون مضبطه اموري وحلوة ..اي احلا الفستان الاحمر ولا الازرق
راكان وقف دقيقتين يطالعها
ميهاف بصوت عالي : راكاااااان
راكان بصرخه : وجععع زييين
ميهاف : اي احلاااا
راكان جلس عالسرير : اممم ولا واحد فيهم
ميهاف فتحت عيونها : وشوو
راكان يبي يجننها : الاحمر يخليك متينه والازرق موب حلو على وجهك
ميهاف شوي وتصيح : طيب وش البس
راكان ضحك : ههههههههههه غبيه الاحمر حلو
ميهاف عصبت : يا الدووووب انقلع برا غرفتي
راكان : من بجي
ميهاف ترفع شعرها : كذا ولا كذا ..ام كذا احلا
راكان مسك الروج الي على التسريحه وضربها
ميهاف صرخت : يااا غبي تدري بكم هذا
راكان بصوت عالي : اقوول لا يكثر ومن بجي
ميهاف رجعت تضبط شعرها : عهود ولين
راكان : بس
ميهاف : يب ...
راكان : ما سمعتي الخبر الجديد
ميهاف : اي خبر
راكان : ياسر بيخطب الفرنسيه
ميهاف لفت عليه بصدمه : شلووووون
راكان طالع فيها : بسم الله شفيك كذا
ميهاف راحت له : من من
راكان : اقولك ياسر ولد عمي بيخطب الفرنسيه -قصده انين -
ميهاف عصبت : والفرنسيه الي تتكلم عنها لها اسم انينن ...اسمها انين
راكان : الكل يقول عنها فرنسيه مو بس انا
ميهاف عصبت بزيادة : لو سمحت راكان اطلع برا
راكان طالع باخته : شفيك يا بنت
ميهاف فقدت اعصابها : الفرنسيه ذي احسن منكم كلكم عندها اخلاق وطيبة قلب ما قد شفتها عند احد منيرة تعذبها بس الفرنسيه تقول لها يمما الفرنسيه تحبنا كلنا مع انها ما شافت وجهه واحد فينا الفرنسيه الي تتكلم عنها انحرمت من كل شي الجوال نفسه ما تعرف تستعمله الفرنسيه الي تتكلم عنها لها اسم انين واتمنى تكون تعرف وش معنا اسمها لان معنا اسمها بنطبق عليها والحين ممكن تطلع برا لاني اذا فقدت اعصابي ممكن اغلط بالكلام عشان كذا تكفى اطلع برا يا راكان
راكان طالع باخته منصدم من كلامها وقف وطلع من غرفتها ...وش قصدها يعني شلون متعذبه وو...وش دخل امي انا ...
ام راكان : راكان يمما
راكان : سممي يالغاليه
ام راكان : يا وليدي سلطان وينه
راكان : يمما ما تعرفين ولدك تلاقينه قافل باب غرفته ونايم بالعسل
ام راكان : الله يهدا بس اذن الظهر يوليدي رح صحي يقوم يصلي بجون البنات لاختك موب زين يبقى هنا
راكان : يمما وش هلكلام الي يسمعك ان البنات بيقعدون عنده بالغرفه
ام راكان : رح بس انت صحي
راكان تنهد : الحين بقوم يكفر فيني ناقصني
ام راكان : الي يسمعك ما يقول انت اخو الكبير
راكان طالع بامه : كبير بكل شي الا وقت نومه يدوس ببطني ولا يسأل
ام راكان : رح صحي وما عليك
راكان حط جواله بجيبه وراح لغرفة سلطان : سلطااان ...سلطااان -وبصراخ - سلطاااااااااااان حشى ذا ميت موب نايم ...سلطاااان يا الحمار قم يلا
سلطان بنوم : شتبي
راكان : قممم صلي الظهر وبجون ناس عندنا
سلطان بنوم : راكان انقلع من عندك
راكان : ياخي قم وش ذا النوم
سلطان بصراخ : رااكان انقللع اقوول
راكان " والله بياكلني " : يبببااا جييت
سلطان فزز من نومه وطار للباب وبنوم : يببا والله موب نايم بس تعبان عندي وجع براسي قلت ارتاح شوي ويبا تعرف ضرسي يوجعني قلت اريح شوي
راكان يطالع في وفطس ضحك : ههههههههههه ابوي ههههههههههههه ضرس ههههههههه يمما لحقيني ههههههههههههههه
سلطان يفرك عيونه كانه بزر : ابووي ..ووينه
راكان طاح علارض من الضحك : ههههههههه وتكذب بعد هههههه عيني عينك يالنذل ههههه
ام راكان جت : شفييك يا راكان
راكان فاطس ضحك : ههههههههههه يكذب على ابوي هههههه يقول عنده وجع ضرس ههههههه عشان ما يقوم ههههههههههههههههههههه
سلطان مسك راكان من رجوله وقعد على بطنه : تكذب علي يا حيوااان يا كلب
راكان يقلد سلطان : يببا وجع ضرس ههههه قلت اريح شوي ههههههههههههه قسم بالله مجنون هههههههههه
سلطان ضربه على بطنه : قمم يا النذل
راكان وقف : نسيت اني اخوك الكبير
سلطان لف عليه : نسيت اني اقدر ادوس ببطنك
ام راكان تبي تفك بينهم : يمما سلطان ادخل تروش وصل الظهر وانت يا راكان فك اخوك من شرك
راكان : بروح اشوف عيال عمي
سلطان يلعب بشعره : وانا بلحقك
راكان ابتسم : زين - ويقلده - يببا وجع ضرسي هههههه
سلطان ضحك ودخل للغرفه

★عايلة ابو راكان =راشد وزوجته مريم
راكان 25 ( طويل ورززه مملوح في غمازة عليمين هو الوحيد بعيال عمه عنده غمازة ومعطيته جمال زياده مهتم بصحته يحب الفلله والضحك ويحب يجاكر اخو سلطان ويتهاوشون بس يتصالحون بسرعه ويحبون بعض وااجد بس لا عصب الكل يتعوذ منه )
سلطان24 ( موب طويل واجد مملوح ما يهتم ابدا بشي مهمل لدرجة ما يتخيلها احد دايما مقفله معه وعصبي جدا بس لا روق الكل يحبه يكره احد يجبره على شي يسوي بس الي بخاطره )
ميهاف 19 ( البنت الوحيدة والمدلله كل شي تطلبه يجبونه لها قصيرونه شوي ونحيفه شعرها اسود كيرلي وعيونها سود وبشرتها بيضا تحب تحتفظ بكل شي ليها ما تحب احد يشاركها بشي الا شخص تشاركه بكل شي تحبه )
________________________________
هذه حالتي من سنتين ابكي واحرق قلبي وعلى الفاضي ما في شي جديد احببه بكل جوارحي هو اغلا شي بحياتي تزوجته غصب عني بس صار كل شي بحياتي ....
ملاك تصيح : لا حد يتدخل فييني فاهمين
ام ملاك : يبنيتي حنا نبي مصلحتك لي تعذبين نفسك كذا ليي يممما
ملاك تصيح : عشانه اعيش بعذاب لين اخر يوم بحياتي
ام ملاك : يبنيتي انتي بس متعودة عليه هذا ما يسمونه حب
ملاك تصيح : يممما تكفيين خلاص مابي اسمع شي
ام ملاك عصبت : كساااار مااات يا ملاك خلاص اصحي اصحي من الوهم الي انتي في
ملاك حطت يدينها ع اذنها : لا عااايش عاايش كساااار حي ماااا ماتتتت مااا مااااات لللااااااا
ام ملاك خافت : ملااااك يمما ملااااك زين زين خلاص سكت بس اهدي
ملاك تهوجس : ما ماات هو حي حي ..حي ما مات مات لا حي هو حي انا شفته حي
ثامر دخل : يمما شفيها
ملاك تصيح : كسار حي ما مات حي هو هو حي انا شفته ما ماات ما ماتت
ثامر حضن اخته : ملاك حبيبتي اهدي تكفين خلاص اهدي ما يصير كذا اهدي
ملاك حضنت ثامر : ثامر هو حي صح هو ما مات ما مااات صح ..ثامر تكفى قوول هو حي صح ما مات
ثامر حضن اخته بقوة : ملاك خلاص اهدي تعالي صار وقت دواك
ملاك هزت راسها وراحت مع ثامر
ام ثامر رفعت يدينها للسما : يا رب افرجها على بنيتي واشرح صدرها ويسر امرها يا رب العالمين ...
دخل البيت والتعب واضح عليه باين قد ايش هو تعبان ومهموم لييت الي صار يكون كابوس وننتهي منه لييت الي صار ما صار
ام ثامر : شلوون رنيم يبو ثامر
ابو ثامر : مثل ما هي يا مرام
طاحت دمعتي وانا رجال البيت انا سند ابوي بهالدنيا بس موب قادر اساعده ابدا
ثامر : يببا خل ايمانك بالله كبير انت قوتنا يبوي ما يصير الي تسوي اذا انت ضعفت انا اضعف
ابو ثامر : شصار ع ملاك
ثامر : عطيتها دواها ونامت ...يبا عندي اقتراح
ابو ثامر : وش اقتراحك
ثامر : لي ما نشوف دكتور نفسي
ابو ثامر بعصبية : تبينا ننفضح بين الناس
ثامر بهدوء : يبا صحة ملاك اهم
ابو ثامر : هالاقتراح مرفوض يا ثامر
ثامر ببرود يقتل : يببا الدكتور النفسي بيساعدها لي انت رافض هذه الفكرة ويا يبا لا تسنا انك السبب بحالة ملاك هذه
ابو ثامر بعصبية : ثامر قلت لا يعني لا
ثامر بعناد : انا بشوف دكتور نفسي زين وبكلمه لو بكلفني كل شي ...رنيم وملاك انت السبب بكل شي يبا انت ...-وطلع -
ام ثامر ما تحملت وطلعت على غرفتها
ابو ثامر " انا السبب انا السبب بدمار حياة بناتي "
طلعت من البيت وانا تعبان حيل تعبان من كل شي كل شي حولي يخليني احس اني ضعيف لازم اسوي شي اساعد خواتي وبسوي الي اقدر عليه لو وش كلفني .....
________________________________
انين بفرحه : واااو دحووم يجننن ههههه احس اني بزر
عبدالرحمن فرحان باخته : انا فرحان بك والله
انين تلعب بالاقلام : وااااو يجننون
عبدالرحمن دق جواله : ارححب راكان شلونك ..الحمد الله وانت عساك طيب ...دووووم
شخبارك ..لا والله موب بالشغل اخذت انين اشتري لها كتب وكذا للدراسه ...اي بتدرس ...شدخل ياسر ...اي بتدرس يا رجال ياسر شدخله ...-وبصدمة - شلووووون ...شقاعد تخربط انت ...من قالك ...ابوي يدري ...زين راكان اكلمك بعدين ...سلام
انين بخوف : شصاير
عبدالرحمن طالع بأنين
انين خافت بزيادة : عبدالرحمن شصاير تكلم
عبدالرحمن " يا ربي شسوي اقول لها لا اذا قلت لها يمكن تنصدم خلني اتكلم مع ابوي بالاول وبعدين اشوفها " : لا تخافين يا قلبي ما في شي
انين : عبدالرحمن شصاير تكلم انا اعرفك زين
عبدالرحمن ابتسم غصبن عنه : لا تخافين
انين ما حبت تضغط عليه : زين
عبدالرحمن عطاها جواله : اتصلي لي بعزوز
انين نزلت راسها : كيف
عبدالرحمن : حطي الرمز
انين طالعت بالجوال : وشهو
عبدالرحمن ابتسم : اسمك
انين طالعت في : اسمي انا
عبدالرحمن : اي اسمك انتي
انين ابتسم وحطت الرمز : طيب والحين وش اسوي
عبدالرحمن : حطي على اشارة الجوال الي تحت
انين تطالع الجوال : ذا الي عليه صورة الجوال
عبدالرحمن : اي هو
انين حطت عليه وبدت تدور اسم عزوز : لقيته
عبدالرحمن : اسحبي الاسم لليمين
انين سوت مثل ما قال لها عبدالرحمن : وش اقول له
عبدالرحمن : قولي له ينتظرني هو وعبود عند المجلس الحين
انين هزت راسها : الوو ...عزوز ...اي انين ...اسمع دحوم يقول انتظره عند المجلس انت وعبود الحين ...وش دراني انا ...زين سلام
عبدالرحمن : شفيك
انين : مدري خايفه
عبدالرحمن : لي خايفه
انين : يعني بعيد الترم من جديد وناس جديدة علي وما اعرف احد هناك وما احد معاي يعني لو ميهاف معاي بكون احسن بس ما في احد معاي
عبدالرحمن مو معاها
انين طالعت في : دحووم ...دحووم شفيك
عبدالرحمن طالع فيها : هاا لا ولا شي
انين " وش صاير يا عبدالرحمن لي كذا تغيرت فجأة يا رب ما يصير شي يا رب "
عبدالرحمن : وصلنا نزلي
انين نزلت ونزلت معاها الاكياس وعبدالرحمن راح للمجلس
دخلت البيت وانا فرحانه وااجد مو مصدقه اني بدرس بس اختفت ابتسامتي لما شفت امي واقفه قدامي
منيرة بكره : جيتي يا كلبه
انين " يا رب يا رب يا رب " : ييمماا
منيرة ضربتها كف : ماني اممك فاهمه
انين طاحت علارض من قوة الكف
منيرة بحقد : شسويتي بعيالي يا ساحرة ااه شسويتي فيهم اقلبو علي كلهم والله لذبحك يا حيوانه تبين ترجعين للمدرسه اجل انا اوريك يا حيوانه يا كلبه -وتضرب فيها بالعصا-
انين دموعها تطيح : يمما يمما
منيرة تضرب فيها : لا تقولين يمما ماني امك فاهمه ماني امك يا ساحرة والله لاعلمك درس يا بنت الحرام يا بنت الاجانب يا حقيرة عيالي سحرتيهم خليتيهم يقلبون علي ويدافعون عنك يا كلبه يا الي ما تستحين طلعتي منتي بهينه جمعتي عيالي تحت يدينك وش تعطيهم ااه وش تسوين لهم يا ساحرة يا بنت الحرام وشووو قووولي
اسمع كلامها واصيح تضرب فيني بدون رحمه كاني ما احس ابدا كل مكان بجسمي في علامات ضرب كل شي يصير فيني بسببها وانا ساكته احس اني تعبانه ابي اصارخ بس صوتي ما يطلع احس ان صوتي اختفى حتى دموعي ما عاد تنزل صار فيني تبلد احس كل شي فيني متجمد
منيرة تصرخ : انا بربيييك يا كلبه انا بعلمك الادب يا حيوانه يا حقيرة بعلمك الادب يا فاجره
دخلنا البيت منصدمين من الشي الي قدامنا امي ماسكه العصا وتضرب بانين وهي طايحه علارض
عبدالله بصراخ : انيييين
منيرة لف بسرعه عليهم : لا حد يقرب فاهمين
عبدالعزيز جنون الانس والجن قدامه راح سحب انين من تحت يدين امه : انجنيتي انتي تضربيها كذاااا انجنيتي
منيرة ضحكت : ههههه اشوفها ساحرتكم الحيوانه لدرجة تصارخون علي
عبدالرحمن بصراخ : يمممما
منيرة بعصبية : نسيتو اني امكم
عبدالرحمن : لييتك موب امنا يا شيخه
منيرة جت بتضرب عبدالرحمن كف بس مسك يدها
عبدالرحمن بعصبية : لا تحاولين حتى مجرد محاولة
ابو عبدالرحمن دخل البيت : شقاعد يصير هنا
انين مسكت يد عبدالعزيز : ولا شي ييببا قاعده اوري عزوز وعبود الاشيا الي شريتها
ابو عبدالرحمن جلس عالكنبه : يبنيتي روحي حطي هالاغراض موب لازمتك
انين استغربت : ليي يببا
ابو عبدالرحمن ابتسم : بنيتي كبرت وبتتزوج
انين انصدمت
عبدالرحمن طالع بابو : هالزواج ما بتم
عبدالله : اي يببا هالزواج ما بتم
عبدالعزيز بعصبية : لو تم هالزواج بحرق البيت بالي في
من صدمتي مو قادرة اتحرك احس اني تجمدت مكاني موب قادرة احرك رموشي احس بضيقة صدر كبيرة احس اني مخنوقه
منيرة بكره : ومن بياخذها
ابو عبدالرحمن ابتسم : ياسر ولد اخوي
عبدالعزيز بعصبية : قلت هالزواج ما بتم
ابو عبدالرحمن : شقصدك يعني
عبدالعزيز : قصدي ان انين ما بتتزوج من ياسر
ابو عبدالرحمن :ولي يعني
عبدالرحمن : يباا من جدك انت تدري ان ياسر موب زين وتبي تزوجه انين
ابو عبدالرحمن : كذا بيعقل وبتحمل مسؤوليه
عبدالله : واختي تجربه عنده عشان يعقل يببا
عبدالرحمن : وش هالكلام يبا تبون تخلونه يعقل على حساب اختي
منيرة تدخلت : خلوها تزوج وتنستر احسن لها
عبدالعزيز بعصبية : يمما لا تدخلين انتي
ابو عبدالرحمن : انين يبا وش رايك انتي
طالعت بابوي وانا حتى الدمع موب راضي ينزا من عيوني اخواني بدافعون عني وامي تبي تخلص مني وفرحة ابوي كبيرة بس التبلد الي جاني غريب اطالع فيهم كاني غريبه بينهم الكل ينتظر جوابي على احر من الجمر احس اني حمل عليهم بس بطريقه مقدر افسرها ابي اصارخ بس صوتي مو قاعد يطلع .....
عبدالرحمن "كنت انتظر جوابها ابي اعرف وش بتقول هل بتوافق ولا لا احس انها بتوافق بس لا وافقت عزوز بيذبحها اشوف فرحة ابوي بهالخبر واشوف كره امي اشوف عبود كيف متوتر كانه هالخبر بحدد مصيره هو موب مصير انين "
عبدالعزيز " انتظرها تقول لا لانها لو قالت اي بذبحها كيف بخليها تنهي حياتها بقرار مصيري مثل هذا "
ابو عبدالرحمن : ها يا بنيتي شرايك موافقه على ولد عمك
عبدالله " حسيت بجمود انين بهالحظة هي مو قوية كفايه تتحمل الي يصير معاها عذاب امي لها والحين ابوي قاعد ياخذ رايها بزواجها من ياسر وكلنا نعرف من ياسر بس الي صار خلانا نتفاجأ كلنا او بالاحرى صدمنا "
طالعت فيهم واحد واحد وكل واحد فيهم ينتظى جوابي بس الي صار انا ما تخيلته " انين : هههههههههههههههههههههههههههههههههههه زواجي ههههههههههههههه
عبدالرحمن " هذا الشي الي كنت خايف منه صار "
ابو عبدالرحمن : يبنيتي شفيك
انين تطالع فيهم وتضحك : ههههههههههههههه
عبدالعزيز مسكها من كتوفها : انين اصحي
عبدالرحمن حط يده ع كتفه : لا تحاول دخلت بصدمة
ابو عبدالرحمن : يبنيتي شفيك ..وش الي يضحكك انتي موافقه ولا لا
انين تضحك وبنفس الوقت دموعها تطيح : تعبت والله تعبت ههههههه انا مالي حق بالراحه ابدا ههههههههههههههههه - وطلعت -
منيرة " لازم اسوي شي واتخلص من هالبنت " : البنت موافقه يا محمد خلاص عطهم العلم
عبدالله بعصبية : يممما انين ما وافقت بعد
منيرة : هذه بنت وانا اعرفها اكثر منك
عبدالرحمن ضحك : ههههه لا والله -وبجدية - هالزواج ما بتم لو بتقلب جهنم هنا
عبدالعزيز : اسمعني يببا لا تختبر صبري هالزواج ما بتم
ابو عبدالرحمن بحدة : انا ابوكم واعرف مصلحتكم واعرف كل واحد فيكم وش مصلحته عشان كذا لا حد يجي ويعلمني وش اسوي مفهووم وجاكم العلم يا عيال هالزواج بتم وبعد يومين وانين بتكمل دراستها اذا ياسر وافق واذا اي واحد فيكم تجرأ وسوا شي خلف الي قلته لا هو ولدي ولا اعرفه فااهمين - وطلع -
منيرة طالعت بعيالها : خلوها تتزوج وتنقلع من هنا مابي نجاسه ببيتي
عبدالعزيز طالع بامه : والله صرت احتار من النجاسه الي بالبيت
منيرة عطته كف وبقوة
عبدالعزيز انصدم واخوانه بعد
منيرة بصراخ : احتتترم نفسك يا قليل الادب انا امككك
عبدالعزيز ضحك بقهر : ههه لا تشوفين نفسك تراني ناسي انك امي وقريبا بمحيك من حياتي ولا تنسين انتي ولدتينا بس جدتي ربتنا واهتمت فينا عشان كذا لا تاخذين وضع الام اووكي وخلك مهتمه بسهراتك وحفلاتك وانسي ان عندك عيال -وباستهزاء - انتي اصلا ما تفرقين بينا وتبين نسميك ام بعيدة عنك هالكلمة والله بعيدة
عبدالرحمن بقهر على اخوه : اقسم بالله قلت الكلام الي بصدري يا عبدالعزيز بس هلكلام الي قلته علفاضي لان الي قدامك ما فيها قلب ابدا عشان كذا تعبت لسانك علفاضي
عبدالله بحزن : بحياتك لا تاخذين دور الام لانه موب لايق عليك ابدا انتي عمرك ما سألتي علينا عشان تاخذين وضعية الام الحنونه الي تخاف على عيالها ...انا بروح لبيت جدي وباخذ انين معاي ما بخليها تموت هنا
عبدالرحمن وعبدالعزيز مع بعض : وحنا معك
عبدالله طلع غرفته ولحقو الشباب
منيرة " عيالي تكلمو معايا كذا وش مسويه لهم يا ساحره عيالي اقلبو علي مرة وحده انا اوريك يا انينو الكلبه انا اوريك عيالي يكرهوني بسببك والله لربيك ان ما زوجتك ياسر وتريحت منك ما اكون منيرة اوريك يا كلبه "
________________________________
ميهاف تسلم على البنات : لي طولتو كذا
عهود : ما طولنا ولا شي جاهزة
ميهاف : يب اكييد
ليين : ترا موب رايحين عرس كل ذي الكشخه
ميهاف : على تبن بس
عهود : ميهاف بروح الحمام -عزكم الله - بسرعه تكفين
ميهاف : يعني منتي خابرته
عهود : الا خابرته بس في احد
ميهاف : لا ما في
عهود : طيب بروح بسرعه واجيكم
لين : لا طولين بنتأخر علبنات
عهود بسرعه : ما بتأخر ما بتأخر
ميهاف : كل ذا
ليين تضحك : ههههههه من اول الطريق وهي تنتظر توصل هههههه
ميهاف ضحكت : هههههههه كويس الي مسكت نفسها ههههههه
ليين : الا ما سمعتي الخبر النار
ميهاف قلبت وجها : اقوول لين شرايك نغير القصه احسن
ليين : بس يعني الاجن...
ميهاف قاطعتها : انين اسمها انين
ليين طالعت فيها : خلاص سكت بسم الله الرحمن الرحيم والله لو متكلمه على توأمك ما سويتي كل ذا
ميهاف طالعت فيها وصدت عنها
ليين تغير السالفه : هذه وراها طولت كذا
دخلت الحمام -وانتو بكرامه - وضبطت شعري ومكياجي وفستاني ولفيت شيلتي زين وجيت بطلع بس شي وقفني شي خلاني اجمد مكاني
عهود بخوف " يا ربي ذا وش جابه ...يمما بيدخل هنا ...لا لا يا رب اذا احد شافني فضيحه ...يويلي وش ذي العضلات ...عهوود يالمجنونه عضلات وشو انتي الحين بتموتين وش اسوي وش اسوي ...قاطع علي صوت "
سلطان : وش تسوين هنا
عهود بخربطه : عضلاتك ..
سلطان رفع حاجبه : وشووو
عهود " يمما يخققق " : اقصد ولا شي ...يعني دورة مياه وش بسوي مثلا بغني
سلطان ابتسم : وراك متوترة
عهود بلعت ريقها " يزينك بس " : موب متوترة بس ابتسامتك لل..." وش اخبص انا "
سلطان ضحك : اقول يا بنت روحي من هنا
عهود فتحت عيونها : بنت ...وشو بنت ذي
سلطان طالع فيها : شوي شوي لا يقرح لك عرق
عهود : على تبن بس
سلطان ابتسم : اقوول لا يكثر وروحي من هنا
عهود مشت عنه ولفت عليه : تراك ويععع مراا
سلطان ابتسم : خليت لك الجمال يا الاثيوبيه
عهود ابتسمت وراحت : غبي
سلطان لعب بشعره : غبيه
نزلت تحت وانا اشوف البنات يطالعوني بنظرات عصبية
ليين بصراخ : لا يا شييخه وراك ما نمتي بالحمام
ميهاف بعصبية : نايف ادوخ ام امنا بالاتصالات
عهود : جيت جيت والله كاني مسافرة المانيا ما صار الي صار
ميهاف : اقول لا يكثر وامشي
طلعنا لنايف برا الي باين انه معصب ووقافله معاه بعد
نايف بعصبية : اخرر مرررة اوديكم انا فاهمين وش ذا سواق ابوكم انا انتظر كل هذا قلتو لي دقيقه شوي بتصير ساعه كل ذا عشان تجيبون ميهاف وش هي عروس ولا وشو
ليين : والله ذي عهود الي اخرتنا موب حنا
نايف : عهود ولا غيرها موب شغلي اخر مرة اوديكم فاهمين
البنات سكتو وفيصل طول الطريق يتأفأف
وصلنا بيت عمي ابو فيصل ونزلنا كلنا نايف راح للمجلس وحنا دخلنا داخل
ميهاف : ادق الجرس
عهود طالعت فيها : لا بروح البلدية اخذ اذن واجي تستهبلين انتي دقي بسرعه
ميهاف دقت الجرس وفتحت لها اريام
اريام بترحيب : حي الله من جانا هلا والله هلا وغلا تعالو تفضلو
قوت جت بسرعه : جيييتوووو - وحضنت عهود بقوة - اشتقتلك يالدووبا
عهود تبادلها الحضن : وانا بعد اشتقتلك مووت اخبارك
اريام : تبادلو العلوم داخل موب على الباب
ام فيصل : هلا هلا تفضلو
رحنا سلمنا على خالتي ام فيصل وطلعنا للغرفه عند البنات
اريام ولين ماسكات يدين بعض كانهم عروس وعريس
قوت بمزح : اخبار الرجال يا دود
عهود بضحك : اسكتي الرجال سحب علي
قوت ضحكت : هههههه اشوف وجهك متغير
عهود ضحكت : هههههه نفسيتي تغيرت
اريام تستهبل عليهم : اقول خفو علينا يا روميو وجولييت
ليين تكمل استهبال : شو هيدا سماجات كتير
قوت تقلدها : لا يشيخه شو هيدا
عهود : اقول انعدلي انتي واياها لاجلدك الحين
ليين : مبروووك يا بنت
اريام : على وشو
ليين : يقولون ياسر بيخطب
قوت تغير وجهها : اسكتي والله البيت مقلوب عندنا امي موب موافقه وياسر بعده ما يعرف
عهود انصدمت : ياسر ما يعرف
ليين : ياسر ما يعرف ان عمي بيخطب له انين قولي وغيري وش ذا
اريام : اي بالله ياسر ما يدري بعد
واقف اسمع كلامهم والدم يغلي بعروقي مدري كيف دخلت الغرفه وانا معصب
عهود ولين تغطن بسرعه
اريام وقفت بسرعه : ياسر انجنيت كيف تدخل بدون لا تدق الباب
ياسر بصراخ : عييدي وش قلتي
قوت تهدي الوضع : ياسر تكفى اطلع برا تكفى
ياسر بعصبية وبصراخ : ابوي بزوجني من
قوت بخوف : ابوي قال بيخطب لك بنت عمي محمد انين
ياسر بعصبية : وانا رجل كرسي عندكم تقررون عني حياتي
اريام خايفه من عصبية ياسر : ياسر حنا ما دخلنا والله انت عارف ابوي لا جزم على شي يسوي
ياسر صفق الباب بقوة
البنات مع بعض صرخن : ااااااه
ياسر بعصبية : بنشوف ...بنشوف -وراح -
عهود حطت يدها عقلبها : احس قلبي بيطلع من مكانه
اريام خايفه : الله يستر في عاصفه جايه
قوت : والله اني خايفه ...شكلي بروح انام عند جدي
ليين جت عبالها فكره : بنات عندي فكره
اريام : وش هي
ليين : شرايكم نروح ننام ببيت جدي ومنها نتسلا مع جدي وجدتي
عهود : والله اشوف انها فكرة حلوة
قوت : وانا عجبتني ...بكلم امي ..
اريام : اجي معك
قوت تستهبل : اي يا رعد الشمال تعالي
اريام لفت عليها : اقوول مابي قرقر واجد زين - وراحت لامها -
نزلت للمطبخ اشوف امي بس وقفني شي
( شلونك ...زين ...اسمعني ابي منك تضبط لي جو حلو تعبان ومفكك الف ...اي اي ...عادي ما تفرق معاي ...لا ابي وحدة صغيرة كذا ...اتفقنا ...ربع ساعه واجيك ...سلام ) رحت بسرعه وتخبيت ورا الدرج استغفر الله العظيم استغفر الله العظيم دخلت المطبخ
قوت : يمما
ام فيصل : هلا يمما
قوت : يمما عادي اطلب منك طلب
ام فيصل : امريني يا عيون امك
قوت حبت راس امها : ما يآمر عليك ظالم ..يما بنروح بيت جدي انا والبنات
ام فيصل : لي يمما شصاير
قوت تستعطف امها : يمما تعرفين المشاكل الي صارت بين ابوي وياسر وبصراحه ياسر عرف بكل شي واحس ان اليوم في عاصفه بتصير عشان كذا قررنا حنا يالبنات نروح ننام ببيت جدي عشان نفسياتنا
ام فيصل : اه منكم يالنفسيات ...زين روحو بس لا طولون
قوت : يمما حنا بنبات هناك كم يوم
ام فيصل : بعد
قوت ابتسمت وهزت راسها
ام فيصل : لا حول ولا قوة الا بالله زين يمما روحو
قوت فرحت : ييسسس احلا ماما -وباست خدها -
ام فيصل ابتسمت : ربي يحفظكم لي يا عيالي
قوت ركضت للبنات تعلمهم : بنات بنات بنات
اريام : جهزنا شنطنا جهزي شنطتك
قوت طالعت فيها : يالنذله ما جهزتي شنطي وبعدين انتو - تأشر على لين وعهود وميهاف - انتو كيف جهزتو شنطكم
عهود ابتسمت : لان يا ماما الحلوة انا وانتي نفس المقاس
اريام : وانا ولين نتشارك
ميهاف : وانا باقي لي ملابس هناك
قوت : اذكياء والله ...اخلصو بسرعه خلونا نروح
________________________________
احداث كثيرة بتصير ببيت الجد ...ومصير اشخاص بتتحدد من هذه الاحداث ...
تابعو الاحداث القادمة وبإذن الله تعجبكم ...
و #شكرا_يا_الله على كل شي

★ احداث قادمة :
٭ انين بصراخ : ليييييي
٭ ياسر بحقد : والله ما تبقى
٭ عبدالعزيز بحزن : شلوونك
٭ عبدالله بقهر : اختي ما قدرنا نساعدها
٭ الجد بحدة : قررت وانتها

★ ولا تنسو ان الكره والحقد قد يكونون سبب في دمار حياتك فاطردهما من حياتك وكن سبب بإسعاد الناس لان سيكون هذا سبب سعادتك انت وسبب في راحة قلبك ...

دمتم بحب وامن وامان وحب وسلام حتى القاكم في الاسبوع المقبل


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 16
قديم(ـة) 12-01-2017, 09:54 PM
صورة هدوئي كارثة الرمزية
هدوئي كارثة هدوئي كارثة غير متصل
©؛°¨غرامي مشارك¨°؛©
 
الافتراضي رد: روايتي الثانية:عذبني أنينها


السلام عليكم بنات 😃
اخباركم 😘
صلو على النبي ★ اللهم صلِ على سيدنا محمد ★

نزلت لكم اول بارت اتمنى ينال على اعجابكم وتحبونه واتمنى الاقي دعمكم لي 💞

وحابه اعتذر لكم لاني ما بنزل لكم بارت بكرا لاني تعبانه ومريضة وااجد وعندي مراجعات بس اوعدكم اني بعوضكم ببارتات راائعة تحبوها وتعجبكم 💕

وانال على حبكم الي يخليني بإذن الله ابدع
يا حبني لكم استمتعو 💖

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 17
قديم(ـة) 13-01-2017, 03:14 AM
صورة حِسّ ! الرمزية
حِسّ ! حِسّ ! غير متصل
©؛°¨غرامي مشارك¨°؛©
 
الافتراضي رد: روايتي الثانية:عذبني أنينها




اهلاً
بداية حلوة ابدعتي هدوئي

اول قرايتي احاول اخلص البارت بسرعه
عشان اشوف اذا الفكرة مكرره ولا لا , امم الصدف وكذا احسها بتخرب روايتك
لانه شي مكرر ويملل بعض القراء

وشسمه انين ياعمري عليها يارب ما تتزوج ياسر , ولا يمكن يصير زي باقي الروايات ينغصبو ع بعض ويحبو بعض :\
ربي يفكها من شر منيره , وتنقلب حياتها 120 درجه
منيره قلب من حجر جعلها بقابض الاعمار وش هالتفكير بدل ما تتاثر من كلام عيالها هجمت ع انين

التوأم , حنان وعطف وجمال مثال للاخوان والله ,, احس شخصياتهم بتترك اثر بالرواية
البنات مهابيل بس يعملوو جوو ولطيفات
ياسر ما طقته ابد ,, ومن يوم طلع اكدلي التكرار بسالفته

البارت طويل ومشبع وبما انها البداية ما نقدر نحكم كثير
كبري الخط


و ننتظر البارت الجاي يا جميلة


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 18
قديم(ـة) 14-01-2017, 12:35 PM
صورة عناد فلسطينية الرمزية
عناد فلسطينية عناد فلسطينية غير متصل
©؛°¨غرامي جديد¨°؛©
 
الافتراضي رد: روايتي الثانية:عذبني أنينها


بداية موفقة ....والبارت رائع
ننتظر ابداعاتك يا حلوة

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 19
قديم(ـة) 19-01-2017, 01:11 PM
صورة هدوئي كارثة الرمزية
هدوئي كارثة هدوئي كارثة غير متصل
©؛°¨غرامي مشارك¨°؛©
 
الافتراضي رد: روايتي الثانية:عذبني أنينها


انتظرو البارت الثاني اليوم بإذن الله ينزل الساعه سبعه ونص بليل 🌹😘

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 20
قديم(ـة) 19-01-2017, 06:16 PM
صورة آلآميرة آلصغيرة الرمزية
آلآميرة آلصغيرة آلآميرة آلصغيرة غير متصل
©؛°¨غرامي مجتهد¨°؛©
 
الافتراضي رد: روايتي الثانية:عذبني أنينها


بداااية جميلة و موفقة،،، بااارت حلو

اتمنى تكون احداثها جديدة علينا مب مكررة....
احس انو اما زواج انيين و ياسر ما رح يتم .... ويكون لركاان دور كبير فالرواية يمكن يكون هو البطل او تكون مثل الروايات الاخرى ينغثبوا على بعض و يعذبها بعدين ي تغير و يحبها<<< مدري بس اتمنى يصير الاعتقاد الاول لانو مدري ليش عجبني رااكان.....



يااااااي وش كثر عجبوني اخوان انين الثلاثة ...فديتهم😍....ههههه

ننتظر البارت 😘


دمتي بالف عافية😘


الرد باقتباس
إضافة رد
الإشارات المرجعية

روايتي الثانية:عذبني أنينها

الوسوم
أنينهآ , عذبني
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايتي الاولى :الحب بين نيران الحرب الكاتبة طلحي نسرين روايات - طويلة 265 30-03-2017 11:25 PM
روايتي الثانية:من كثر عشقي لك أنعمت عيني عن كل الخلايق/كاملة جنانوهـ روايات كامله - يتم نقل الرواية هنا بعد اكتمالها 370 02-08-2016 12:19 AM
صدفه غيرت مجرى حياتي صدفه بدلت ابطال روايتي عاشقه الشوكلاته روايات - طويلة 11 30-01-2016 11:51 AM
روايتي الأولى : كن لي صديقا فالحب لا يدوم أنفاس الورود. أرشيف الروايات المغلقة - لعدم إكتمالها 18 28-12-2015 11:28 PM
روايتي الأولى : أيام عشناها زمان أمل مستحيل روايات - طويلة 10 21-04-2015 12:21 PM

الساعة الآن +3: 06:05 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1