اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
الإشعارات
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 11
قديم(ـة) 11-03-2017, 10:44 AM
But i am her But i am her غير متصل
©؛°¨غرامي جديد¨°؛©
 
الافتراضي رد: رواية : لبؤة بين اسود الصحراء


‏وجعي بكامل أناقتهِ
وهجرانكِ كربطة عنق
ذمة في الرقبة ...

دخل على غرفتها و لقاها قايمه
توجه لها
تأمل في وجهها بصمت و هي عيونها تبحث عن اي تعابير في وجهه نزلت عيونها و اخذت نفس : انا ...
طاحت دموعها رفعت يدينها تمسح عيونها تبي تكمل : انا
عجزت تكمل الغصه تجمعت في حلقها نزلت يدينها و تركت المجال لدموعها تسيل
عجز يمسك نفسه هو الثاني و تطايحت دموعه ما همه شي
كثر ما همه الجروح اللي في يدينها
و الكدمات اللي غطت ملامحها
هو واثق فيها اكثر من نفسه و يثق ان فيه سبب دفعها تسوي هذا الشيء
انعصر قلبه عليها كيف خلى بنته و اخته و ريحة امه يصير فيها كذا
انتبه لرجفه يدينها اللي تشد على المفرش
و عيونها التايهه شفايفها اللي تهتز شهقاتها الخفيفه اللي تطلع منها خوفها من ردة فعله
مد يده مسك يدينها قعد يمسح عليها
مالك و هو الثاني دموعه تطيح : شفيك كذا يدينك كلها جروح
حط يده على وجهها : شفيه وجهك كذا ذابل و مكدم
مسح على مكان المغذي : ليش ذا مغروس بيدك شصار فيك يا عين مالك
ضمها له بقوه بدا قلبه يستكين  شوي عقب ما ضمها و تأكد ان ما فيها شيء قوي
من ناحيتها انفجرت بالبكاء و كأنها كانت تنتظر يعطيها اشاره عشان تفرغ عن اللي كابتها
ملاك : انا مالك مالك انا و الله ما قصدت اركب معه مالك انا انا على بالي انها سيارتها تعبت شوي و كنت برتاح في السياره شوي انا ما دريت انها سيارته غفيت و ما صحيت الا و هو راكب السياره خفت خفت ارتعبت كثير بعدين صار الحادث مالك لا تزعل مني لا تزعل انا ما سويت شي وربي
ابعدت عنه و هي تحط كفوفها على وجهه
اكيد انت تألمت زي كل مره انا اسفه الله يأخذني دايم اسبب لك الوجع اسفه مالك اسفه
مالك رجع ضمها له بقوه : غبيه لا تدعين على نفسك انا ادري و واثق فيك ادري مستحيل تسوين الغلط بعدين انا ما اوجعني شي كثر خوفي افقدك دامك بخير هذا يكفيني
ابعد عنها : يكفي يالدلوعه ددموع كل هذا عشان ما اهاوشك
مسك يدينها و ابتسم : بعدين كم مره اقول لا تكذبين علي فيه سبب اكبر من انك ما تنتبهين للسياره ما راح اضغط عليك بس انا جنبك و قولي لي انا معك ما راح اكون ضدك بشيء طيب
ملاك هزت راسها : طيب
مسحت دموعه : انت رجال عيب تنزل دموعك شفيك صاير دلوع
مالك ابتسم : نعم من اللي مطير لي عقلي لما لقيته بعدين ما نزلت دموعي على احد غيرك انتي نقطه ضعفي عشان كذا لا تفجعيني فيك
ملاك تمسكت بيدينه : لو فيه امنيه اتمنى تتحقق فهي انك ما تحس بوجعي ما ابي في كل مره يصير لي شي يجيك نفس الوجع
مالك شد على يدينها اللي تشد على يده : مالك شغل انا عاجبني كذا
ناظر المغذي : ييلا شوي و يخلص و نروح للبيت
ملاك : ياليت وربي طفشت
مالك خلها ترخي جسمها على السرير : نامي لما يخلص
ملاك لا ارادي ارخت جفونها : طيب
جلس يتأمل فيها و تنهد في كل مره يصير فيها شي يطير عقله يمكن انا ابالغ لكن هي مهما كان جزء مني كنت و اياها ببطن واحد طلعنا على الدنيا سوى كل شي كنا نسويه سويناه مع بعض
و للحين حنا ما نفترق
كثييير نسهر مع بعض و نطلع كثير اشياء مجنونه كنا نسويها
اذا طلعنا كانت تصر علي اخليها تسوق يمكن غلط اني ما امنعها من شي ابد لكن مقدر يكون فيه شي بخاطرها و ارفضه
الاهم سعادتها
قام من عندها غطاها كويس و باس جبينها
نزل للكوفي القريب يجييب لها دونات و موكا
يعرفها مجنونه تموت فيهم جاب لها و له
حاسب عليهم و رجع للمستشفى
شاف سلطان عند غرفتها متسند على الباب
انتبه له
سلطان : كنت انتظرك مدري وين رحت عموما انت بخير تقدر تسوق
مالك عقد حواجبه : اي وراه بتروح لشيء
سلطان ابتسم : يطلبوني بالدوام بروح له
مالك رد له ابتسامته : اوك الله معاك
سلطان و هو يمد له المفتاح : خذ انا بروح مع تاكسي لان سيارتي الثانيه مخليها هناك صح و هذا جوالك عمي كلم و قلت له انكم طفشتوا و طلعتوا تشمون هواء
مالك و هو يلعب حواجبه : حركات يا عمي ذي من متى صبر يالحبيب توه ما صار عمك
سلطان رفسه مع رجله : شكل جازت لك الجلسه هنا
مالك و هو يمسك رجله : حشى موب رجل اي عاد تصدق وناسه
سلطان : العقل نعمه
وراح لشغله
ابتسم مالك و دخل عندها لقاها تنتظره
ملاك : وينك طولت
مالك رفع الكوفي و الدونات : رايح اجيب ذولي
ملاك قوست فمها : بعد عيني وش انا بدونك
مالك : ادري ادري يلا نمشي
ملاك : يلا بس صبر ما عندي عبايه و لا شي
مالك شافها : جد لحظه
نزل تحت لقى بلوفر اسود له قبع شكله لسلطان اخذه و راح لها عطاها اياه تلبسه طلع واسع عليها سفط اكمامه و حط القبعه على راسها : كذا كنك ولد يلا بسم الله عليك و لا ذره انوثه
ملاك بطرف عين : ما ارد عليك
ضحك عليها و نزلوا ركبوا  السياره
ملاك هي تشم ريحة البلوفر متأكده انه موب لمالك لان ملابسه مستحيل تصير واسعه كذا
استنتجت انه لسلطان من الريحه و الحجم ابتسمت بحرج على تخيلها و كأنه يحتظنها
ملاك : ذا من حقه
مالك و هو يسوق : ايه هذا لسلطان لقيته بسيارته و اخذته
ملاك : يمون الاخ طيب استأذن
مالك بملل : يو مشوار وربي
ملاك: الله يحرسك من العين حيوي

وصلوا للبيت
ملاك : تبي ابوي يدفني شلون بنزل كذا
مالك : يمكن نايم
ملاك قلبت عيونها : تستهبل دبر لي حل بعدين بدخل مكدمه و متجرحه بيفتح لي سالفه
مالك : يوه جد لحظه بنزل قبل اذا الامور تمام بأشر لك تدخلين
ملاك : طيب و الله من وجهك باين بنأكل تهزيئة معتبره
مالك غمزلها : اعتبريها اكشن
ملاك ضحكت عليه و هي تدفه : مجنون وربي
مالك يكمل : احب غيرك انا مجنون
ملاك رفست رجله : زاعق احسن
مالك يمسك رجله : اح وش بلاكم على رجلي
ملاك : تستاهل بلاك سامج المهم انا بدخل على اساس اني انت
مالك قلب عيونه :  طيب و شعرك
ملاك قلدته : سهله هذاي حاطه القبع على راسي
نزلت فصخت جزماته 
مالك : خير خير
ملاك و هي تلبس جزماته : رايك ادخل بجزماتي يعني
مالك : الله يصبرني
ملاك عدلت البلوفر و تحاول تقلد صوته : يلا هذاي بدخل و انت ادخل عقبي
مالك : روحي روحي كل شي على راس مالك الله يعيني عليك مدري ليش انتي اختي
ملاك : اجل وش وظيفتك كاخ تحمل عني
مالك دفها لداخل : خلصي خلي نشوف اخرتها
حاس بنندفن اليوم
ملاك
دخلت للبيت و انا اقرأ كل القران من الخرشه لو ابوي يكشفني بس بأندفن
دخلت و كما توقعت ابوي ينتظرنا في الصاله و هو يشوف التلفزيون
اشرت لمالك يدخل مع باب المطبخ بسرعه
و انا دخلت لداخل و حاطه يدي على قلبي
ملاك تقلد صوت مالك  : السلام عليكم
خالد : و عليكم السلام وين اختك ؟
ملاك بفهاوه ما توقعت تمشي على ابوها : ها اقصد فوق نايمه تعبت و خليتها ترتاح لما اجيب لها علاج
خالد عقد حواجبه : غريبه بالعاده تمرض معها
ملاك بترقيعه : اي تعبان بس موب مره عشان هي مواصله و ما نامت
يلا عاد انا بصعد فوق انام و اتطمن عليها
خالد : لحظه تعال وش ذا اللي بوجهك
ملاك : اي شسمه تهاوشت مع واحد و اكلت كم ضربه
خالد : بزر انت الحمدلله و الشكر رح نام بس
ملاك حطت رجلها ما صدقت يقول لها روحي
دخلت غرفه مالك و سكرت الباب و انفجرت ضحك
مالك : اخلصي وش نكبتيني فيه
ملاك : بس قلت انك متهاوش مع كم واحد
مالك : حسبي الله و نعم الوكيل شغل نكبه انتي
ملاك ضحكت : يلا تصبح على خير

راحت لغرفتها
غيرت ملابسها و اكتست ملامح وجهها الجديه
وقفت عند النافذه اللي بغرفتها و شدت على الستاير : بكره لاكون دافنتك بيدي يا بنت الكلب

الصباح

قامت افطرت مع ابوها و هي مكمله مسرحيه انها مالك لين راح ابوها لشغله
لبست عبايتها و حطت مكياج يغطي الكدمات مع انها تكره تحطه بس مجبوره
لبست عبايتها و تحجبت و طلعت
متوجهه لبيت عمها
بعد ما دقت الجرس
فتحت لها الخدامه
ملاك : ميعاد موجوده
الخدامه : اي اقول لها مين ؟!
ملاك : قولي لها ملاك
راحت الخدامه و بعد دقائق دخلتها
ميعاد : وش هالصباح اللي ما بارك ربي فيه يوم شفتك
ملاك حطت رجل على رجل : ما الومك انا لو بدخل السجن بقول للي كان السبب نفس كلامك
ميعاد ضحكت : بشريني عساك انجنيتي
ملاك ابتسمت بخبث : لا حبيبي شكلك انتي اللي خرفتي انتظري لاجرك للسجن على بالك اللي سويتيه بأمي بيروح كذا
ميعاد اختفت ضحكتها : ما سويت شي شكلك من جد انجنيتي
ملاك : قبل كم سنه يوم ذبحتي امي هذا بعد بسبب اني انجنيت وربي لاكون حاطتك بالسجن و هذا وجهي
ميعاد : احترمي نفسك وش دخلني بأمك لاحقتني حيه و ميته
ملاك قربت منها و هي تشد على ملابسها : اياني و اياك تجيبين طاري امي على لسانك على بالك بالساهل بتطلعين منها ما اكون بنت ابوي ان ما جريتك برجلك تفو عليك
نفضت يدها منها و جت بتطلع لقت عمها بوجهها
عمر بهدوء : صح الكلام اللي سمعته
ملاك ما فيه فايده من الانكار اكيد بيعرف : اي صح
عمر تنهد : مقدر اقول لك لا تأخذين حق امك اذا هي السبب صدق هذا حقك بس احد غيرك يعرف
ملاك كانت بتقول ان مالك و عبد العزيز يعرفون بس ما تدري ليه غيرت رايها : لا بس انا
عمر : طيب يا بنتي لا تقولين لاحد انا بنفسي بساعدك ما ارضي حقكم يضيع كذا
ملاك : مشكور يا عمي
عمر : يلا عمو تعالي بوصلك
ملاك : لا عمي ما ودي اعطلك رح لشغلك
عمر : لا تعطليني و لا شي يلا تعالي
ركبت معه و وصلها للبيت
ملاك : شكرا يا عمي معليش ازعجتك
عمر : لا عادي يا بنتي لا تنسين اتفاقنا
ملاك : ابشر يلا ربي يحفظك
عمر : و انتي بعد انتبهي على نفسك
نزل من السياره و تتبعها بعينه لين دخلت للبيت
ضرب على باب السياره
لازم ينهيها قبل يدري احد غيرها بس كيف
تطمن من ناحيتها انها ما علمت احد
بس ما يضمن لازم بأسرع طريقه يخلص عليها
طلع جواله و كلم
...: سم طال عمرك
عمر : الحين ابيك تفتح مخك معي فيه شخص ابيك تخلص عليه بدون اي دليل لك مده يومين بس
... : ابشر مين و اعتبر الموضوع منتهي
عمر : ملاك بنت خالد
...انصدم لدقائق : ابشر
سكر الجوال و حرك السياره راجع للشركه
رحمه ربي انه نسى اوراق و رجع يأخذها

تنفس الصعداء حمد ربه انه ما انتبه له
دخل للبيت و هو يركض
دخل غرفتها لقاها على السرير تتأمل السقف
جلست و هي تناظر فيه مستغربه
ملاك : مالك وش عندك
مالك سكر الباب و توجه لها مسك كتوفها و هزها : وش سويتي تو ببيت عمي
ملاك انصدمت ما توقعت يعرف : نسيت شي و رح
مالك قاطعها بعدم صبر : لا تكذبين قولي الصدق
ملاك : عن امي و ميعاد
مالك توسعت عيونه : كيف دريتي
ملاك لفت وجهها : سمعتك و انت تتكلم مع عبد العزيز بالصدفه ذاك اليوم و هو السبب اللي خلاني اركب لسيارته بدون ما اعرف
ارتخت يدين مالك : عمي عمي قلتي له
ملاك تنفست : لا بس سمع كلامي و قلت له
مالك : قلتي له عن اني اعرف شي و عن عبد العزيز
ملاك : لا هو قال لي اخليه بيننا و انه هو
مالك : غبيه انتي تصدقينه
ملاك : ما فهمتك ليش تهاوشني هذا الشيء اللي مفروض اسويه تبيني اخلي حق امي يعني تبي قلبي ينحرق و انا اعرف انها السبب في هذا
مالك : ما قلت لك اسكتي بس انتي الحين اه تتوقعين عمي بيجر مرته للسجن صدقيني هو بيجرك للموت بيخلص عليك على بالك ما حاولت بس عرفت ان الموضوع موب بيدي عمي له نفوذ و هو اصلا شخص خطير بيذبحك و عيونه ما ترمش ما هميتيه
ملاك معقدة حواجبها : انت شتقول
مالك : اللي اقوله اني كنت بجره قبل مرته غير كذا اي شي بسويه ماراح يفيد
بس انتي الحين اه خربتي كل شي
انتي لازم تختفين عن عينه بأي طريقه مستحيل غير كذا بيذبحك
اسمعيني زين و حطي كلامي حلق بأذنك
انتي مالك و انا ملاك طيب
ملاك : انت شتخربط
مالك : اسمعيني زين شفتي المسرحية اللي امس سويتيها على ابوي سويها على الكل انتي مالك ما تعرفين شي و انا ملاك بطلع من البيت و انحاش على اساس اني انتي هاذي الطريقه اللي اقدر احميك فيها
ملاك : مجنون تستهبل و دراستك و ابوي و غيره تتوقع مني امثل عليهم يعني
مالك و هو يجمع اغراضه بسرعه مسك جوالها من يدها طلع شريحتها و كسرها اخذ الجواز و بطاقة الهويه و بعض ملابسها عشان يوهم انها هربت : تعرفين تسوقين تعرفين اخوياي كل شي تعرفينه بس مثلي على اساس انك انا موب اول مره نسويها مشت على ابوي يعني بتمشي على غيره
ملاك اسمعيني اذا لي معزه عندك اياي و اياك تنكشفين انتبهي على نفسك تحملي هذا الوضع بس مده و اوعدك اني بخلص كل شي لا تقلقين علي
ملاك بتشتت : طيب شكلي
مسكها مالك و دخلها لدوره المياه و طلع المقص و قصص شعرها بطريقه تشبه شعره و نفض شعرها : الحين محد بيفرق بيننا انتبهي اياني و اياك احد يكشفك انتبهي على نفسك
ضمها
شدت عليه : و انت بعد
ودعها و طلع مستعجل و مخه متلخبط بكل شي وش يسوي الحين ذي اسرع شي و اسرع حل جاء بمخه غير كذا بينسفها عمهم ماراح يتحمل فقدها
وش هاليوم المشؤم تذكر يوم كلم عليه سلطان عشان يقابله و علمه انهم نقلوا شغله لديره ثانيه بعيده عن هنا و انه بيودعه يعني الحين هو مسافر
تأفف كل شي كل شي ضده  

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 12
قديم(ـة) 15-03-2017, 02:17 AM
همس الامومه همس الامومه غير متصل
©؛°¨غرامي فعال ¨°؛©
 
الافتراضي رد: رواية : لبؤة بين اسود الصحراء


السلام عليكم البارت مررره جميل بس ارجو منك عدم التسرع في السرد لانها سوف تفقد روعتها اسم الرواية عجبني جدا واتمنى ان تكون ختامها احمل والى اللقاء ان شاء الله

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 13
قديم(ـة) 15-03-2017, 09:46 AM
صورة غرشوبه نعيميه الرمزية
غرشوبه نعيميه غرشوبه نعيميه غير متصل
©؛°¨غرامي فعال ¨°؛©
 
الافتراضي رد: رواية : لبؤة بين اسود الصحراء


السلام عليكم
الله يعطيج العافيه على البارت
روعه اختي وننتظر البارت القادم ونشوف كيف احوال مالك وملاك

سلام،،،،،،،،،،،،

الرد باقتباس
إضافة رد
الإشارات المرجعية

رواية : لبؤة بين اسود الصحراء

الوسوم
لبنت , الصحراء , اسوي , رواية
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
رواية حلفت عليك لا تناظـر بعين غيري/بقلمي memeyah روايات - طويلة 18 03-04-2017 03:49 AM
رواية هناك / للكاتب ابراهيم عباس شرقاوية شيتونة أرشيف الروايات المغلقة - لعدم إكتمالها 7 22-01-2017 09:53 PM
رواية أنا لست سوى عاشق في زمن كثر فيه التلاعب/بقلمي الـكاتبه : إيـم الـعتيبي. أرشيف الروايات المغلقة - لعدم إكتمالها 2 14-05-2016 11:59 PM
رواية عرش السُلطان/ بقلمي. خيال. روايات - طويلة 52 09-05-2016 02:40 PM
روايات نزول الوحي على رسول الله slaf elaf قسم المواضيع المخالفه للفترات الزمنية 1 08-03-2016 08:02 AM

الساعة الآن +3: 03:46 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1