اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
الإشعارات
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 91
قديم(ـة) 08-09-2017, 12:00 AM
صورة نبض افكاري الرمزية
نبض افكاري نبض افكاري غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


اقتباس:
المشاركة الأساسية كتبها booony88l مشاهدة المشاركة
سلام

بارت حمااسييي ليتك كملتيي..
اول شيء قلت ان الشخص اللي دخل نايف بس قلت لا مستحيل نايف يدخل بهالطريقهه الهمجييه اتوقع انه مازن اللي دخل؟!!

حصهه
حلوو في شوية احترام بتعاملها مع فواز
وعندي احساس بأن فواز يغير بتال للأحسن وتصير العلاقه بينهم قويهه

العنود و ابن مترك
مدري ليش احس ان الخطبهه ما راح تتم
اتوقع بيتم الرفض بس وش السبب ما ادري

منيرهه
راح ترجع شاديه لنواف
اممم احتمال ان شاديه ما تتحمل وتتصل على نواف وتعتذر منه او انها بتكلم منيرهه بس متأكده ان نواف ماراح يسامحها بسهووله ويخليها تعتذر من امه..

عند اللحظه الحاسمه وقفتي -_-
وشكراً..

وعليكم السلام ورحمة الله وبركاته

ان شاء الله راح يكون البارت القادم اكثر حماس واطول من ذا

وسعيده بتواجدك ومساندتك لروايه وياهلا ومرحبا فيك

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 92
قديم(ـة) 08-09-2017, 09:29 PM
صورة نبض افكاري الرمزية
نبض افكاري نبض افكاري غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


السلام عليكم

Anstgrim OQXIXQO

سناب الروايه Nbfnbf

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 93
قديم(ـة) 10-09-2017, 05:39 AM
صورة wafaa25 الرمزية
wafaa25 wafaa25 غير متصل
©؛°¨غرامي مشارك¨°؛©
 
الافتراضي رد: روايتي الثانية :تجاعيد الزمن


بارت روغ¶ـﮧ

آهنيـعھâ‚° غ¶ـلــﮯ الراغˆ يـﮧ

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 94
قديم(ـة) 10-09-2017, 08:33 PM
صورة نبض افكاري الرمزية
نبض افكاري نبض افكاري غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


اقتباس:
المشاركة الأساسية كتبها wafaa25 مشاهدة المشاركة
بارت روغ¶ـﮧ

آهنيـعھâ‚° غ¶ـلــﮯ الراغˆ يـﮧ

حياك الله وياهلا ومرحبا فيك


حبيت انوه ان سناب الروايه ينزل عليه قبل كل بارت بوح الابطال

وهو عباره عن بث لبعض افكار وهواجس واحاسيس بعض الابطال على شكل

عبارات تعبر عنهم وماراح تكون موجوده في البارت

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 95
قديم(ـة) 12-09-2017, 01:28 AM
ghla3060 ghla3060 غير متصل
©؛°¨غرامي جديد¨°؛©
 
الافتراضي رد: روايتي الثانية :تجاعيد الزمن


انتي شخص فوق الوصف يعني حتى الكلمات ما توصفتس شي جميل وابداع اجمل صرتي من الكاتبات المفضلة عندي يعني مو احتمال انشاء الله اكيد باروح اشوف روايتس الاولى
يعني من الروايات الي اتحمسله بقوة ما تقدرين تتخيلين وشلون متحمسة لدرجة اني قاعدة احك يعني ابدعتي مافيه شي يقدر يعبر عن الي باقوله
استمري وان شاء الله بتابعتس الى الابد

فواز هو اكثر شخص حبيت احط تعليق عليه لاني كرهته وحبيته يعني مع اخوانه وابوه يهبل مع نايف ابي اتفل بوجهه كرهته بشكل ما ينوصف

نايف احسه ينرحم ويقهر ياخي دافع عن نفسك عبر عن غضبك من فواز مو معقولة تكتم كذا انغبن منه اذا سكت واتوقع هو الي دخل ما اتوقع مازن هو قال انه طاحت من عينه وشلون يروح للمجلس ما اتوقع انه مازن

نجلا عجبتني شخصيته يعني حسيت بساطته جميلة هي وعايلته

شريفة قهرتني يعني عادي تخرب بيت اخته عشان تبيه تجلس عند امه حسيت تفكير يقهر عدو مو اخت

وبس طال عمرتس الله يسعدتس ويوفقتس زي ما اسعدتينا

بس سؤال طال عمرتس متى موعد تنزيل البارتات؟


آخر من قام بالتعديل ghla3060; بتاريخ 12-09-2017 الساعة 01:31 AM. السبب: ..
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 96
قديم(ـة) 12-09-2017, 02:19 AM
صورة نبض افكاري الرمزية
نبض افكاري نبض افكاري غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


اقتباس:
المشاركة الأساسية كتبها ghla3060 مشاهدة المشاركة
انتي شخص فوق الوصف يعني حتى الكلمات ما توصفتس شي جميل وابداع اجمل صرتي من الكاتبات المفضلة عندي يعني مو احتمال انشاء الله اكيد باروح اشوف روايتس الاولى
يعني من الروايات الي اتحمسله بقوة ما تقدرين تتخيلين وشلون متحمسة لدرجة اني قاعدة احك يعني ابدعتي مافيه شي يقدر يعبر عن الي باقوله
استمري وان شاء الله بتابعتس الى الابد

فواز هو اكثر شخص حبيت احط تعليق عليه لاني كرهته وحبيته يعني مع اخوانه وابوه يهبل مع نايف ابي اتفل بوجهه كرهته بشكل ما ينوصف

نايف احسه ينرحم ويقهر ياخي دافع عن نفسك عبر عن غضبك من فواز مو معقولة تكتم كذا انغبن منه اذا سكت واتوقع هو الي دخل ما اتوقع مازن هو قال انه طاحت من عينه وشلون يروح للمجلس ما اتوقع انه مازن

نجلا عجبتني شخصيته يعني حسيت بساطته جميلة هي وعايلته

شريفة قهرتني يعني عادي تخرب بيت اخته عشان تبيه تجلس عند امه حسيت تفكير يقهر عدو مو اخت

وبس طال عمرتس الله يسعدتس ويوفقتس زي ما اسعدتينا

بس سؤال طال عمرتس متى موعد تنزيل البارتات؟


ياهلا ومرحبا وياحياك الله

ردك اسعدني جدا اكثر مما تتصورين لان التفاعل مع الروايه اقل بكثير مما تستحق


نايف وفواز ماقدر اقول اكثر من واصلي المتابعه وبيعجبك الجاي ان شاء الله

البارت كل يوم ثلاثا يعني بكره ان شاء الله ينزل

وناديني نبض حاف من غير طال عمرك والالقاب الي مالها داعي

واكيد يسعدني تقرأين روايتي الاولى صيته

وابشرك فيه روايه ثالثه باذن الله في الطريق وبعد ماتخلص هذي راح ابلش

فيها

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 97
قديم(ـة) 12-09-2017, 10:55 PM
صورة نبض افكاري الرمزية
نبض افكاري نبض افكاري غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


البارت التاسع عشر

نايف


اليوم احس اني بديت ارجع اركز في شغلي


مدير المتجر طلب مني اجدد ديكورات المحل لاكن انا


حاب اغير المتجر بكبره محلي الحالي داخل مول تجاري


وانا ابي متجر مستقل على شارع عام صارلي يومين


ادور متجر مناسب واليوم لقيت واحد موقعه ممتاز


ومساحته جدا واسعه اتصلت بصاحب المعرض


والحين رايح للبيت ببدل ملابسي واروح اقابله علشان


اتفق معه وان شاء الله يكون هالمتجر من نصيبي


وصلت للحاره واخذت لفت بيتنا واستغربت ان بيت


عمي خالد عنده سيارتين غريبه ماهي من سياراتنا


ياترى من جايه ماكان عندي وقت علشان اشغل


مخي بهالسؤال نزلت من سيارتي بسرعه وطلعت


لغرفتي سيده بدلت ملابسي وتكشخت بالثوب والشماغ


ونزلت مستعجل وصلت السياره وعيني على السيارات


الي قدام بيت عمي مدري ليه قلبي قارصني


من حسن حظي ان هاني طلع مع باب الشارع في


هالحظه ناديته وجاني : عمي من عنده


هاني تكلم بحماس : عنده ولد مترك جاي يخطب


العنود وشكلها وافقت عليه لان عمي خالد نادى


ولد مترك معه في المقلط ونادى العنود عندهم


حسيت جسمي انتفظ غظب من الي سمعته


ولد مترك باي حق يقابل بنت عمي انا


صرخت على هاني بغير شعور : انت متأكد ان العنود

عندهم


هاني خاف بس زاد حماسه لانه فهم ان نايف يبي


العنود : ايه انا شايفها بعيني تدخل عندهم صار لهم


مده داخل


اتجهت لبيت عمي ركض ودخلت مباشره متجه للمقلط


تعمدت ادخل مع الباب الي من جهة داخل البيت


حتى يعرف ولد مترك موقعه عدل


انقهرت وانا اشوف العنود جالسه على الكنب المقابل


لولد مترك وكانو يتكلمون لمى دخلت تعمدت اوقف


مباشره قدام العنود ووجهي لها وسفهت ولد مترك


لازم استفزه علشان يثور ويفقد السيطره على اعصابه


ويبدى يخبص


ولد مترك التفت على الباب واهو يشوف نايف يدخل


معه مثل الاعصار وياقف قدام العنود ووجهه لها


حس بحراره تتصاعد داخل جسمه حتى انه حس


وكان مخه يغلي من الغضب الي اجتاحه وش شايف


نفسه ذا حتى يقتحم عليه مجلسه مع خطيبته


نايف صرخ على العنود : ممكن افهم وش جايبك في


المقلط وفيه رجال غريب


العنود انقهرت من لقافت نايف وانقهرت اكثر من اصراخه


عليها وفي نفس الوقت قربه منها لهادرجه يوترها ويخلي


قلبها يظرب بين اظلوعها كنه طبل ودها تقول مالك دخل


بس ماتقدر ودها تدفه بعيد بس ماتقدر ودها تقوم


تطلع وتترك له المكان وبعد ماتقدر ماتقدر تجرحه


لان جرحه ينزف في قلبها ماتقدر تبعده لان قربه ينعش


روحها ماتقدر تهرب منه لانها تفقد كل قوه لها في حضوره


الا اذا كانت هالقوه له وعلشانه التزمت الصمت وعيونها


متعلقه في عيونه وتايهه فيه وفي فخامة تفاصيله


ابو العنود طاح بين نارين ولد مترك بمكانته وثقله وكونه


ضيف عنده ونايف الي مايقل عن ولد مترك بشي ويمكن


يتفوق عليه زودن على غلاه وقرابته له مد يده ومسك


كف نايف يجذبه يمه يبيه يوخر عن العنود ويجلس


جنبه : تعوذ من ابليس وتعال اجلس هنيا وخلنا نتفاهم


قاله واهو يربت بيده على الكنب جنبه


نايف الي ماتزحزح من مكانه شعره رغم جذب عمه اله


شد على كف عمه بيده يبيه يتركه


: ماني بجالس قلي بس العنود وش جايبها هنا


خالد : ولد مترك خاطبها وانا ناديتها تتفاهم معه


التفت نايف على العنود بغضب : وانا ماني بموافق


على هالخطبه يالله سمعيه الا وقومي ادخلي


العنود استجمعت كل قوتها وقررت تفك عمرها من قيد


نايف واول مافتحت فمها تبي تتكلم اخرسها رد مقبل


الي فز بعصبيه واهو يصرخ على نايف : من انت علشان


ناخذ رايك وخر عن خطيبتي احسلك لاادفنك مكانك


نايف من غير مايلتفت عليه وبصوت عادي ماضهر فيه اي


اثر للعصبيه يقصد منه استفزاز مقبل اكثر : مالك عندي


خطيبه واذا فيك خير جرب تدفني اشوف


العنود هنا انقهرت من ولد مترك كيف يهدد ولد عمها


في بيت عمه


رجع ولد مترك يصرخ بانفعال : خطيبتي وغصبن عنك


هنا العنود وابو العنود فزو مع بعض مما خلى نايف يرجع


خطوه ورا علشان ماتصدم فيه العنود ومن غير مايلتفت


تركيزه كله معها ولها وعيونه مافارقت عيونها من دخل


اسبقت العنود ابوها بالكلام : ياولد مترك خطبتك مرفوظه


دام ولد عمي رافظن هالزواج انا ماتعدى كلمة ولد عمي


كمل على كلامها خالد بنفس الانفعال : دام الامور


اوصلت للغصايب ماعندنا بنات لزواج وماعاش والاكان


الي يغصبنا على بناتنا


ولد مترك ادرك لتو انه طاح في الفخ والعصبيه اعمته


وخلته يرمي كلام يستفز العنود وابوها


ومافاته ابتسامت نايف العريضه واهو يأشر للعنود بيده


علشان تطلع من المقلط واهي تطيعه وتطلع ويشوفه


يمشي وراها بطوله الفارع ثوبه يكاد يتمزق من شدة


احتشاد العضلات تحته مغرور واثق شديد الوسامه


والايختلف على رجولته اثنين لولا انه يمقت الكذب والاكان


ماعترف بكل ذا لنايف والاحتى بينه وبين نفسه استمر


يتابع نايف بعينه واهو مازال يمشي ورى العنود مايفصله


عنها الامسافة خطوه لوتوقف فجأه اصتدم فيها اطلعت


العنود وطلع نايف من نفس الباب الي طلعت


معه وسكره وراه من غير اي اهتمام بوجوده


كذا بكل بساطه وبأقل من خمس دقايق انهى كل شي


وطلع من غير مايعبره والاحتى بسلام اول مره يتعرض


لموقف من هالنوع تعود ان الناس تنظر له كرجل استثنائي


اذا تكلم يسكتون واذا انصت يتسابقون على لفت انتباهه


اشارته امر مطاع وكلمته توزن بالذهب الي يدخل بيته


مره يتفاخر بهالزياره عمر وذا ماظربله حساب من اي


نوع وش هالجرئه الي فيه وش هالغطرسه نحنحت


ابو العنود صحت ابن مترك من ذهوله وخلته يلتفت على ابو


العنود وبمحاولت ترميم مايمكن ترميمه : ماهيب الهقوه فيك


يابو العنود يرضيك سوات ولد اخوك وكيف اقتحم جلستنا


من غير يحسب احساب احد


ابو العنود مهما كانت مكانت ولد مترك عنده ماهو مستعد


يخسر نايف علشانه : انتهت يابن مترتس على مانتهت


عليه وانت مازلت عزيز وغالي واذا تبي اختها زوجتك


مقبل ماهو متخيل انه ينحرم من البنت الي حركت


مشاعره وسلبت عقله من جلسه وحده وياخذ اختها


وتبقى اتذكره فيها في كل وقت : لابالله ان ماخذت الي


ابي مقبل العوض في اطلبي


قاله وفتح الباب المقابل لباب المجلس ووقف على باب


المجلس يودع الموجودين بكلمات قصيره جافه ويطلب من


اخوانه يمشون مشى ولد مترك واخوانه ودخل خالدالمجلس


ووقف يتلفت : وين نايف


استغربو الموجودين محد منهم شاف نايف


صالح : نايف ماجا ولاندري وينه وش صار على


خطبتكم ورى ولد مترتس دخل علينا ووجهه مهوب زين


خالد مشى لين جلس جنب صالح وبضحكه : ولدك


جاء واعترض خطبته


ابو نايف اعتدل في جلسته والفرحه تشع من وجهه


مد يده يشد ابها على كف اخوه : انت تقوله صادق


خالد يبتسم لاخوه : اي بالله صادق


ياسر بوناسه : هههههه بعدي اخوي اجل حجر عنيد


غلاب بسعاده : مبروك هاذي الساعه المباركه


نواف بانفعال ضاحك : هههه يستاهل ابو صالح


راشد توه يستفيق من الصدمه : اخيرن نايف تحرك بغت


تطير من يده البنت


ابو العنود ضحك على حماسهم :هههههههه اصبرو


لاتستعجلون على رزقكم نايف ماحجرها والاخطبها


صدمه عمت الكل

ابو نايف عقد حواجبه باستنكار : اجل كيف اعترض


الخطبه وش قال


خالد : ابد طال عمرك قال انا ماني بموافق على هالخطبه


يوم اسمعه مقبل وتجن اجنونه وينفلت عليه قال مير من


انت علشان نشورك والبنت خطيبتي وغصب عنك


عاد العنود اخذتها الحميا وقالت دام ولد عمي رفضك


انا متعدى كلمت ولد عمي


ابو نايف عقد حواجبه اكثر : وبس وهذي هي ماقال


بنت عمي وانا اولابها منك ..!! ماخطبها


خالد هز راسه برفض : ابدن ماجاب طاري الخطبه


راشد بفزعه لاخوه : خلاص دامه اعترض خطبة


ولد مترك الها معناته يبيها سواته خطبه بحد ذاتها


غلاب بضحكه : ههههههههههههه وزين منه يوم طلع


بهالسوات عاد احتروه سنه والاثنتين لين يجر عمره


ويجي يخطب

دخل عليهم هاني وفراس واهم يسولفون ياسر اول من

لمحهم : انتم شفتو نايف

هاني تقدم لوسط المجلس علشان يكون قدام الجميع


وبحماس : ايه انا شفته كان طالع من البيت مستعجل


ويوم شافني واقف عند الباب ناداني ونشدني عمي


من عنده قلتله ولد مترك خاطب العنود واهو وياها مع


عمي في المقلط قام دخل صاروخ وسيده للمقلط


وماطول اهناك وطلع مره ثانيه ركب سيارته ومشى


ابو العنود بفهم :اها وانا اقول وش دراه انا في المقلط


واثرك معلمه


ابو نايف التفت على خالد : وانا اخطب العنود له


مير شاورها


غلاب بابتسامه : حظرة المحاميه العنود مايبيلها مشاور


في نايف


خالد اتسعت ابتسامته عنيد ماخلت احد مادافعت عن


نايف قدامه : اجل ابشرك انها معيه عن نايف


التفتو على بعض مستغربين وتكلم ابونايف : وليه تعيي


خالد : تقول ولد اخوك معقد ونظرته دونيه للحريم


ياسر ماقدر يمسك نفسه :هههههههههههههههههههه


ودي اشوف وجه نايف واهو يسمع هالكلام من العنود


ابو نايف حس بحرقة ندم داخله يعرف انه السبب


في الحال الي وصله نايف هو كان كل قصده يبعده


عن التعلق في الحريم مايبيه يدشر ويصير ماله هم


غير الحريم واعلومهن مادرى انه كان يبالغ في


فصله عن الحريم لحد مانفره منهن نهائي


التفت على خالد : تخبر ابناخيك ماحوله عرس


هالحين وانت اقنع البنت بطريقتك اعرف العنود ماتخالف

شورك


ابو العنود يهز راسه بموافقه : الله يقدم الي فيه الخير


___________________________________


العنود

طلعت من المقلط واعصابي تشتعل نار من الي سواه نايف


ماأنكر ان قلبي كان يرقص له طرب بس انا ماني


مراهقه والاخبله اتبع قلبي وانا مغمضه ومهما


كان حبي لنايف كبير عقلي يرفضه بشده


الي سواه نايف بتجسسه على جوالي خلاني اتاكد


انه انسان شكاك والشك مثل البخل يدمر الحياه الزوجيه


ويخليها مثل خيوط العنكبوت الي عليها انها تصمد


قدام عاصفه ترابيه ثايره مهما تمددت مع الريح مردها


تتمزق وتنتهي وكأنها مانبنت ابد ..............


وابن مترك اثبت انه شخص واثق ومتزن وماانكر


اني ارتحتله وتوقعت ان هذا هو الشخص الي ممكن


ينسيني نايف في يوم من الايام ...........للحظه بنيت حلم


بعيد عن ذاك المغرور ........ولانه


حلم ......انكسر .....وتبعثر


على ارتكازة حظوره الي يشعل اعروقي ويوقد حرايق


النبض في قلبي


ويخليني انساء كل ابناء ادم واختصرهم في ذاته


وقفته شموخه تفاصيل العز في وجهه فخامة صوته


جبل العضلات الراسي على اتساع صدره تفاصيل


الرجوله الثايره فيه كل هالمعاني الساطيه تخليني


انقادله واسلمه كل راياتي بليا حرب وبليا طلب


ماكان يحتاج معي اكثر من اشاره من طرف عينه


حتى اعلن ولاء السمع والطاعه واتنحى عن كل مواقفي


وقراراتي ...هذا ...انا .....كل ماكان الموضوع يخص


نايف ابتدي تفكيري محاربه شرسه متسلحه بلعقل والمنطق


وانهيه اسيره خاضعه لقلبي وحبي وكل ماقلت بابعد


عن نايف اكتشف اني صرت اكثر قرب له ومدري


لوين ناوي يوصلني قلبي ........ صحيت من هواجيسي


على صوت روان والجوري الي كانن ينتظرني في الصاله


وامي معهن : بشري وش صار

جلست على الكنب ببرود ورديت بفخر ايه فخر كون


نايف يجي بنفسه ويعترض على خطبة ابن مترك


كان شي عظيم بالنسبه لي بتقولون وين راح الزعل


والحلطمه الي قبل شوي بقول مدري انا صدق زعلت


لانه خرب خطتي في الخلاص منه بس الحين


ماحس الا بسعاده تتفجر في صدري وماني مصدقه


الي صار بس بعد قاهرني هو جاء وقال انه رافض


زواجي من ابن مترك بس ماقال انه يبيني ماخطبني


وكأنه ماعنده مانع اني اتزوج بس مايبيني اتزوج ولد


مترك بذات ياترى وش قصده من الحركه ذي اف منه


مغرور ومتغطرس


: نايف اعترض على خطبة ابن مترك ورفضناه


صاحت الجوري بوناسه : واو كفو ولد عمي


روان فزت من الكنب واقفه واهي ترفع يدها بحماس


:يس يس طناخة اشيوخ يانايف


ابتسمت ام العنود على رجة البنات والتفتت على العنود


بتسأل : وابوتس عطى نايف


العنود هنا طاح وجهها وتفشلت هزت كتوفها وبصوت


حاولت يكون طبيعي : ماخطبني علشان يعطيه هوبس


قال انه ماهو بموافق على ولد مترك ومقبل عصب


وقام يهايط على نايف ويقول باخذها غصب عنك


عاد انا وابوي مارضيناها على نايف ورفضنا مقبل


ام العنود اعقدت حواجبها باستنكار : تسيف يعترض


خطبة الرجال واهوه ماعنده نية خطبه الي نعرفه


من ضاري ان ولد العم لاعترض خطبة بنت عمه


قال هذي بنت عمي وانا اولابها من الغريب هذي


هي اسلوم العرب الي نعرفها


روان اندفعت تدافع عن نايف بحماس وكل اعتقادها


انه انسب شخص ممكن انه يرتبط بالعنود


: ياعمه انتي تعرفين ان الوقت تغير وردات الفعل


بعد تغير ونايف ماهوب جاين يعترض الرجال عباطه


اكيد انه بيخطب بس تلقينه ماهو مستعد الحين


انا سمعت خوالي يقولون انه يدور له محل بيغير محله


يعني الرجال الحين مشغول واكيد بيجيله يوم ويخطب


ام العنود بعدم اقتناع : هاحتيش لاصار عنده شغل


هي كلمه ينطقها ويرتبط ابها مع عمه والعرس ملحوق


لو تأخر سنه والاحتى اسنتين


العنود : عموما انا مابغى اتزوج خير شر واذا مصرين


اني اتزوج ماعندي استعداد اتزوج قبل اخلص ادراستي


واتخرج


روان بتحليل : تدرون ليش رفض مقبل من غير مايخطب


التفتن لها جميع وانطقت الجوري بحماس :ليش


روان : علشان يصفق ابها ابن مترك يعني شفني طردتك


عن بنت عمي من غير حتى ماخطبها مكايد رياجيل يعني


ام العنود اقتنعت بتحليل روان : ان تسان هذا مقصده


مهوب سهل ويبيها تظهر عن ابن مترتس سالفه ان نايف


اطرده عن بنت عمه بليا خطبه يبيه يندم انه دخل هالبيت


وخطب كنه يقول انت خابرها بنت عمي وش جايبك تخطب

واحدتن ماهيب لك


العنود بعكس الجميع ماهي مقتنعه بهالتحليل وكل


اعتقادها ان المقصود بهالحركه هي ماهو ولد مترك


بس حتى مايطول الهرج في هالسالفه اسكتت


________________________________


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 98
قديم(ـة) 12-09-2017, 11:27 PM
صورة نبض افكاري الرمزية
نبض افكاري نبض افكاري غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن




عند بدر في احدى الاستراحات الشبابيه


الشباب يلعبون كوره في ملعب الاستراحه واهو واقف


ومخليهم ورى اظهره ورافع يده بالجوال بحيث يطلع


في الصوره ويطلعون اخوياه في خلفية الصوره


بدى يصور واهو يتكلم لسناب : واحلا وناسه مع الشباب


اليوم معطيهم فرصه يستعرضون مهاراتهم تابع واهويقهق


ههههه تعرفون لواطب معهم للملعب طاحت فيساتهم


قدام ابداعي بس ماعليه زي ماقلت لكم معطي البزران


فرصه


واحد من الشباب الي يلعبون كوره مقهور من بدر


لأنه ماجاء يلعب معهم وهو مايحب يلعب بدونه لان


بدر صديقه المقرب اوصلت الكوره عنده ومباشره افتر


جهت بدر وشات الكوره


بدر الي مازال يتميلح ويصور اسنابات تفاجاء بلكوره


تضرب يده الي فيها الجوال وتطير جواله في الارض


جنت اجنونه واهو يتحرك بفجعه يشيل جواله من الارض


يتاكد ان مافيه شي ومن حسن حظه ان الجوال طاح


على ثيل علشان كذا ماتأثر بالطيحه دخل جوال في


مخباه بعصبيه واهو يستدير للملعب : من الحيوان


الي سواها من


مطلق بعدم اهتمام رفع صوته واهو يمد يده فوق علشان


يشوفه بدر بوضوح : انا الي شت الكوره هاه وش عندك


بدر انطلق يركض يبي يمسك مطلق ....ومطلق ماصدق


على الله ان بدر ترك السناب راح يركض بواناسه منحاش


عن بدر كان مطلق سريع وهذا الي خلا بدر يطول


واهو يطرده عجز يمسكه حس روحه خلاص بتطلع


من قو التعب شاف مطلق يلف حول المسبح واهو


يضحك بصوت عالي وماهو مبين عليه انه تعب زيه


لف على وحده من الطاولات المنتشره حول المسبح


واهو يلهث من التعب سحب واحد من الكراسي ورمى


جسمه عليه


مطلق شاف بدر يجلس وقف ولوح له بيده وهو يرفع صوته


: دقايق ويكون عندك احلى قهوه وابرد ماء واطلق حلا وش


تبي بعد


بدر ابتسم على اهبال خويه ورفع صوته : اجل احسن


لك اتعجل والاترا ماني مخلي حقي بالي سويته في


جوالي بغا يغدي اقطع


ارتفع صوت مطلق يقهق واهو متجه للمطبخ حتى يجيب


سلة القهوه الي جابها معه من البيت وفيها كل الي قاله


لبدر وزياده عليه شاهي وفطاير : هههههههه ياتسذبك


تسذباه كيف يغدي قطع على الثيل


مطلق هو الصديق الصالح لبدر .......وبدر هوالصديق


الداشر لمطلق ولكل واحد منهم اصدقاء على شاكلته


مالهم علاقه ابدا بالثاني واصدقائه كانو ايام الدراسه


مع بعض طول الوقت وبعد ماكبرو وكل واحد منهم


شق لنفسه مسار مختلف عن الثاني قلت اجتماعاتهم


رغم ان قربهم من بعض مازال هو هو يتواصلون طوال


اليوم بشتى اساليب التواصل الاجتماعي من اسناب


وانستقرام وتويتر وغيره ولان كل واحد منهم عجز


يغري الثاني بمساره الي اختاره لنفسه توقفو عن محاولت


التغيير واتفقو من غير اتفاق ملموس على ان كل


واحد منهم يتقبل الثاني زي ماهو


كلها دقايق وجاء مطلق يشيل السله في يده نزلها


على الكرسي الفاضي جنبه واول شي سواه انه


طلع علبة مويه بارده وعطاها بدر الي كان فعلا عطشان


حده اخذ الماء من مطلق وافتحه وبدى يشرب بهدوء


مطلق طلع زمازم القهوه والشاهي من السله وحطهن


قدامه على الطاوله ثم طلع حافظه بلاستيك مستطيله


مقسمه لثلاث اجزاء كل جزء منها مرتب فيه نوع حلا


مختلف عن الثاني وكلها سوات بيت فتح الحافظه


وحطها بينه وبين بدر على الطاوله وخلى حافظة


الفطاير تقعد في السله لحد مايخلصون من القهوه


سحب الفناجيل من السله وصب لبدر فنجال اقهوه


ومده عليه ثم صبله واحد وحطه قدامه


بدر كان فاتح على الانستقرام يشيك على شئ


اتسعت ابتسامته واهو يشوف الحساب الي كان


مرسله رساله خاصه معطيه حضر ارتفع صوته يقهقه


:هههههههههههه


مطلق استغرب ضحكة خويه : خير وش عندك تكاكي


بدر بحماس : تعرف خالد ولد مخلد الدهيش


مطلق ماهو فاهم وش علاقة خالد بالموضوع : ايه اعرفه


والنعم فيه وفي اهله بس وش دخله


بدر اخذ رشفه من فنجاله واكل معه ملعقة حلى ورجع


يرشف من القهوه واخيرا تكلم : هالانسان فاقع مرارتي


كل مايشوفني يسوي فيها انا المثالي الي مافيه مني اثنين


وادوخني بنصايحه ومثالياته عاد انا قلت اجيب رجل بنت


اخته في الخيه واطى على صدغه بس بنت الكلب طلعت


متربيه


مطلق شهق بفجعه : ياخي حرام عليك تسلط على بنت


مسكينه حاشمه نفسها واهلها ومااذت احد ماسدنك


الدشير الي يجنك برضاهن


كشر بدر بملل : اقول خل عنك النصايح انت الثاني


وبعدين انا ماضربت اي وحده على يدها علشان تجيني


هذي هي بنت حاتم صارلي ثلاثه اشهور اراسلها


وكل مره تعطيني بلوك كبر راسي حتى اني دخلت


عليها باسامي بنات ومافاد معها اول ماتشك في الوضع


او ادخل في اي شي خاص مولمه البلوك ماعندها وقت


مطلق ابتسم واهو يعرف ال مخلد معرفه شخصيه


وعائلته تعرف عايلتهم وبينهم تواصل بمعنى من الجماعه


بعدي والله ياجعل يد ام فراس تسلم الي ربتها


ويكون في علمك لوتعيد هالسالفه والاتقرب من هالبنت


ولا اي وحده غيرها من بنات مخلد تراح اخر مابيني


وبينك وترا ان سكت عنك هالمره بسكت بس لان البنت


ماتضررت ولاتنسى انهم من جماعتي واهلي


بدر يبتسم لخويه ويرفع يده يحط اصبعه على خشمه


: على هالخشم اصلا كنت ناوي اتركها في حالها


من قبل تكلم لانها اثبتت انها بنت محترمه فعلا


بس تدري وشلون اول مره اندم على اني مخرب


العلاقه مع خويلد والاكان اخطبها منه هذي هي


الي تستاهل بدر بحق وحقيقه


مطلق فرط ضحك : ههههههههههههههه حرام عليك


البنت تستاهل واحد يصلي الفجر في الصف الاول


في المسجد مهوب واحد مقطع الدشره رايح جاي


بدر كشر في وجه خويه : هذا وانت خويي تقول


كذا اجل اعيال مخلد وش بيقولون لو اخطب منهم


مطلق بجديه : الي يبي بنات العز يعز نفسه موب


يغرق في الفساد ثم جاء يدور الصالحه الطاهره علشان


يتزوجها


بدر يعقد حواجبه وبقهر : وان شاء الله تبيني اتزوج


داشره علشاني ماخليت من الدشره شي يعقبن مايدخلن


بيتي هالسلق واذا عيال مخلد مايقبلون فيني عندي


خوالي يقولون طب وتخير خاصه وحده من خالاتي


حاطه عينها علي وتربيتها انا واثق فيها ومتى ماقلت


يازواج رحت لها تزوجني


مطلق هز راسه بياس من خويه : ماقول الا الله يصلح


حالك وانا

_____________________________________

في البر عند مخيم ابوسفر واشبوك حلاله


ابو سفر واهو يمشي رايح لوايت الماء وبنته نجلاء


تمشي وراه لابسه طرحتها ونقابها مع عبايه كتف


واسعه وساتره علشان الرعيان موجودين


: اعجلي يانجلاء جيبي لي (خرطوم الماء )الوايت حطيه


في المنقل خليها تمتلي قدم يرجعون الرعيان بالحلال


نجلاء تمشي وتتنهد من ثقل المشي في الرمل وحرارة


الشمس تقدمت للوايت واخذت ليه حطته في اقرب منقل


(حوظ ماء ) لها وافتحت محبس الماء : لاتشيل هم يبه


يمدينا نعبي المناقل قبل يرجعون باقي لهم نص ساعه


ابو سفر واهو ينثر بقايا الماء الملوث من احد المناقل علشان


يعبونه ماء نظيف : انتي شفتي اشبوك الغنم


نجلاء واهي ماسكه طرف الي بيدها حتى ماينفلت


خارج المنقل : ايه تهايقت فيها اول ماجينا لاه


ابو سفر : ماتسنها معبصه (تراكمت فيها مخلفات الغنم )


نجلاء تنقل الي من المنقل الي امتلى ماء للمنقل الثاني


: الابالعون انها معبصه وإبشر امراحك هذا ابطيت فيه


لين اندقت ارضه وراحت ابركته


ابو سفر يبتسم : لا اما البركه ماشفت مثل ابركة


هالمتسان من يوم نزلت فيه وحلالي مولد ومعينن خير


مير ودي اشدده ولالي طوقتن في الشديد


نجلاء : الا لازم تشدده وان تسان بلاك الشيل والحط


حنا كلنا معك نعين ونعاون والرعيان معنا حتى لو نجيب


كم عامل يساعدونا في نقل الخيام والشبوك لاعزمت


امرك بيسهلها الله وتسهل


ابو سفر : مالها الاتسذا باستاجر لي كم عامل مع


الرعيان ونشددها حتى لوبغينا نعزم ذوي مخلد عند


الحلال لمحلنا نظيف وشرح


نجلاء شدها طاري ذي مخلد وارفعت راسها تحدق في


ابوها : يبه انت من متى تعرفهم ماقط سمعت طاريهم

معك قدم الخطبه

ابو سفر الي كان منحني يلقط كسارين قاروتن منكسره


عن درب اغنمه لاتوذيها فز معتدل في وقفته وكله خوف


ان بنته تزعل لاعرفت انه هو الي عطاها نواف عطيه


وفي نفس الوقت مايبي يخبي عليها اكثر من كذا


مايبيها تدري من اهل الرجال والايبي يخليها على


عماها لين تتم الملكه الي حددوها اخر الاسبوع اول


ماتطلع تحاليل العرسان احسن وقت يعلمها بحقيقة


الامر هو هالحين اقلها لوازعلت وعندت وبغت تتركه


يكون الأمر اسهل منه بعد الملكه : والله يابوتس ماعرفتهم


غير يوم الخطبه


اتسعت عيون نجلاء باستغراب واهي ملاحظه ربكت


ابوها من يوم انشدته : اجل كيف خطب منك


تصدد ابوسفر للحظه ثم حزم امره وركز انظره على


نجلاء : ماخطب انا عطيته


نجلاء استدارة بكل جسمها لابوها واهي تحس بنار


الغظب اشتعلت داخلها لاكن في صدرها صوت قوي


قاعد يقولها لاتنسين نفستس يانجلاء هذا ابوتس ابوتس


اخفظي له جناح الذل والرحمه توكلي على الله وارضي


بلي يقدمه لتس ابوتس وربي بيعطيتس على قد برتس فيه


حست وكأن مويه بارده انكبت على صدرها وطفت حريقته


ارجعت تتلهى بلي الي في يدها : أمنا خديجه عليها


السلام اخطبت لنفسها وش بيظرني لوجوزتني انت


الي تبي وكاد انك ماعطيته مرخصني يبه


تنهد ابو سفر بارتياح من سمع جواب بنته : لابالله


ماني بمرخصتس يابوتس انا ارخص العرب كلهم


والا ارخصتس انتي


نجلاء حست بشئ من الارتياح لكلام ابوها : وش الي


خلاك تعطيه يبه


ابو سفر وقف معتدل بعد مانتهى من جمع القزاز في


شليله وراح يمشي بهدوء وثقل وارجوله تغوص في الرمل


الحار تحته لحد ماوصل للعوشزه القريبه منهم واطلق


طرف الثوب من يده حتى يرتخي للارض ناثرن


كسارين القزاز في قاعة العوشزه نفظ شليله


بيده حتى يتاكد انه مانشب فيه شي من احتات القزاز


ثم رجع وقف قريب من بنته رافعن وحده من ارجوله


على جال المنقل الي هي تعبيه ومثبتن كفه على ركبته


المرتفعه قدامه مميلن جذعه قدام اشوي حتى يكون


اقرب لوجه نجلاء وده يشوف عيونها وش تقوله من هرج


وياخوفه ان الي تهرجبه عينها يختلف عن هرج السانها


: تخبرين هاك اليوم قلتلس اني باودي سيارتي للورشه


وديتها ويوم المكانيكي اليماني بدى يصلحها لاهاك


الولد المشخص الي دخل علينا الورشه وبدى يسولف


مع اليماني ويوم انشده اليماني عن خطبتن له


قال انه جايين من عند خاله مطرود علشانه ميكانيكي


مستعرين منه عاد انا قلبي انشرح له وتوسمت فيه خير


قلتله حرمتك عندي وقبل العطيه والي شفته يوم جو


يخطبون يثبت انهم ناسٍ اجواد وفيهم خير


ومهوب تسذا وبس ولد عمك منيف طلع يعرفهم يقول


انه يتابع اعيالهم على الجوالات ويمدحهم بلحيل


وواحد من اعيالهم يقاله ياسر معه في الجامعه


ويقول انه رجال والنعم فيه


نجلاء هزة راسها بأستسلام : الحمد لله كل الي يكتبه


ربي خير ومحد ياخذ الانصيبه



اعتدل ابو سفر في وقفته وهو ينزل رجله عن المنقل منهي


الكلام في هالموضوع وكله رضا عن بنته .....صكي


( سكري اغلقي المحبس ) الماء صكيه امتلت المناقل


تحركت نجلاء للوايت واغلقت محبس الماء واهي تسحب


لي المويه وتلفه على شكل حلقه وتعلقه مكانه في حديده


بارزه شوي في خلفية الوايت


تحرك ابوسفر حول الوايت يتفقد المكان قبل يرجع الحلال


من المرعى ( في الواقع ماكان في الارض ذاك العشب الي


يسمى مرعى واهم يطعمونها تبن واعلاف يشترونها اهل


الحلال اما رحلت الرعي هذي كانت تمشيه وحركه للغنم


اكثر من كونها رعي ) التفت على جركل ماء متوسط الحجم


طايح بين احواض الماء


: الجركل هذا وش جايبه هنيا


نجلاء : هذا جركل الرعيان جايبينه بيعبونه من الوايت


مخلينه هنيا لين يرجعون


ابو سفر واهو يمشي لمناقل الاعلاف علشان يعبيها


قبل يرجع الحلال : افهقيه وراه لاترثع فيه الغنم ( وخريه


وراه حتى ماتتعثر فيه الغنم )


نجلاء تمشي جهة الجركل واهي تنفظ طرف طرحتها


الملتف على رقبتها بيدها بمحاوله انها تبرد على عمرها


شوي واهي تحس ملابسها غرقت من العرق


انحت على الجركل وشالته بيد وحده وارجعت


للوايت حتى تنزل الجركل في ذراه وتروح تساعد


ابوها في توزيع العلف على المناقل الخاصه فيه


عندهم ثلاثه رعيان كلهم حاليا مع الغنم يرعونها


مع انه راعي واحد كافي انه يرعى الغنم والاثنين


الثانين يبقون يسوون هالشغل الي هم يسوونه الحين


لاكن ابوها يحب الشغل ويحب الغنم ويحب انه يقوم


على علفها بنفسه واهي تحب ابوها وتحب خدمته


وتحب انها تشاركه محبة اغلى شي على قلبه


ابوها عاش طفولته ابدوي ثم سكن المدينه وتزوج


واشتغل وجاه اعيال وكبرو ثم تقاعد وهذا هو يرجع


لعشقه القديم البر والحلال والبداوه



_____________________________________

في بيت ابو بدر


وفي الجلسه الي جنب غرفة الجده مزنه


الجده جالسه ممده ارجولها قدامها ومريحه ظهرها


على المخاد وراها وولدها ابوبدر جالس جنبها تاكي


بجنبه ويده على المركى المحطوط بينهم اما ام بدر


جالسه قدامهم مقابله لابو بدر وقدامها طوفرية القهوه


تقهويهم

ابوبدر متراخي بجنبه على المركى بهم وجه امه كل ماله


يذبل وصحتها كل مالها تدهور حتى نوبات ارتفاع


الضغط قامت تزيد عليها ومايدري وش السبب


الخدامه تقول انها تهذي طول الليل وماتنام عدل


واذا نامت تفز من نومها واهي تنادي المرحوم اخوي


وابوي وحتى ابوها الله يرحمهم جميع ياخوفي ان


ساعت الوداع قربت وانا مدري وش وضعي معها


انا عاق ......انا بار ......انا متهاون .......مدري


........مدري ........انا عشت عمري هارب ......


ايه هارب من مشقة الشغل ومن مسؤلية البيت


ومن هم العيال ........والحين ماعاد فيني ارجع ورى


المسافه طويله والحمول اثقال وعزومي خارت اقواها


مابقى الااني اتشبث ببقايا رضى هالجنه عسى


رِضاها ينجيني من نار الخطايا ..........تاه في اعماق


هواجيسه ومانتبه ان فنجاله فارغ من القهوه ورغم ذالك


مازال يرشف منه مرارة الماضي المنهك !!


ام بدر انتبهت ان زوجها ساهي وماهو معهم مدت يدها


تخبط فخذه بتنبيه : هيه وين غديت تقهو


مد فنجاله لها واخذته صبت فيه قهوه وردته له اخذ الفنجال


ونزله على الفرشه والتفت على امه واهو يعتدل في جلسته


ويمد يده يمسك فيها كف امه وبنظرات خوف : يمه ياه


ياعيدي انتي وش فيتس وجهتس متغير وصحتس ماهيب


الاوله انتي تونسين شي ناقصن عليتس شي ثم اشر


بيده على مدخل البيت واهو يكمل كلامه هالسلق الي


داخل مزعلينتس بشي


شدة على كف ولدها بحب وخوف مهلك يتعاظم في


صدرها ماتبي من هالدنيا الا سلامة هالولد واعياله


وسعادتهم الي مستعده تدفع حياتها ثمن لها


: مابي الاالعافيه ولاقاصرني شي بوجودك الله يخليك


لي ذخر مير هذا العمر ومايسوي


ناظر في عيونها بلهفه واهو خايف من نتايج افعوله


وتقصيره في حقها: يمه انا ادري اني مقصر معتس


مير تكفين سامحيني وارضي علي


تشبثت بايديه اكثر وادموعها بدت تصب من التأثر


ولدها قليل مايحسسها بلهفته عليها وقربه منها


: مسموح ياوليدي مسموح وانا طول عمري راضيتن


عليك وادعيلك انت واعييلك الله يخليهم لك ويصلحهم


اخذ طرف اشماغه يمسح ادموعها فيه ثم رد الشماغ


لعينه يمسح دمعه غافلته على السقوط بلا رغبته


ام بدر تأثرة بالموقف وبدت ادموعها تسيل هي الثانيه


وسرعان ماخذت منديل وبدت تمسحها


الخادمه كانت في الغرفه مقربه من الباب تحاوال تسمع


وش يقولون وكلها خوف ان الجده تشتكي منها


جاها صوت ابوبدر يطلب ماء لامه وانتفضت مسرعه


لثلاجه تسحب منها علبة مويه وتسرع فيها للجده


واهي ماصدقت ان الفرصه جتها لحد عندها


جت تمشي واهي تفتح علبة الماء ممثله شدة الاهتمام


قدام ابو وام بدر اجلست قريب من الجده ومدة لها المويه


وبتملق : يشرب يامي ياهبيبي انا اهبي انتي كثير ياماما


الجده اخذت علبة المويه واهي كارهه الي جابتها وعارفه


خبثها اشربت منه اشوي ثم مدة يدها لشغاله علشان


تعطيها غطى المويه تسكرها لاكن الشغاله ارفضت


واخذت المويه من الجده تسكرها لها وتحطها جنبها


: خليه ياامي انا سكر انت مافيه سوي شي يبغا حاجه


كلام انا سوي انا هنا علشان انت


ابوبدر صدق الشغاله واعجبه اهتمامها وحنيتها على امه


ابتسم لها ثم رجع يلتفت على امه وكأنه انتبه لشي


مايدري متى صار والاكيف صار : الا انتي منول غرفتس


داخل وراتس نقلتي اهنيا


ام بدر بدى قلبها يضرب بقوه وعيونها طارت في خالتها


منتظره ردها وين بيوديها


الجده بتسامح تطمن ولدها : ياوليدي المكان اهنيا اشرح


منه داخل وبعيد عن الصجه


ام بدر قرصها ضميرها وحبت ترقع افعولن مضت


: ياخاله خليني انقل غرفتس داخل ترا الصجه الي منول


راحت هالحين البنات كل وحده ماسكه جهازها ومتنحتن


فوقه وبدر الله يهديه مايقعد في البيت وماعد هنا احدن


يزعج مير خلينا ننقل اغراضتس لغرفتس الاوله


الجده بطيب خاطر واهي بعمرها ماشالت في قلبها


عليهم والاتبي لهم الاالخير : ياوليدي هنيا انفهلي


واشوف الشمس واروح هوا ربي مالي في ضيقة الجدران


حاجه


ابوبدر رجع يمسح على يدها وضميره بدى يسكن بعد


هالجلسه المطوله مع امه : على راحتس والي تبينه هو الي


يصير ثم رد يده لمخباه وطلع منه خمس مئه وحطها في


يدها


الجده تحاول ترجعها له : ماني بحاجتها خلها معك


ابوبدر حلف انها ماتردها وبكذا انجز مهمته العظيمه


وتأكد ان امه راضيه عليه الحين يقدر يروح لخوياه


في الاستراحه وقلبه مرتاح وماضيع وقت فز واقف


واهو يسلم على راس امه كختاميه لجلسة البر الناجحه

وطلع

ام بدر هي الثانيه قامت لداخل البيت واهي تحس انها


سوت الي عليها حاولت تردها لغرفتها داخل البيت


علشان تكون تحت عينها واهي ارفضت هاوش تسوي


بالخلق كلن يمشي على هواه


الشغاله ماصدقت ان الجو خلا لها على طول مدت يدها


ساحبه يد العجوز يمها بعنف حتى تفتح قبضتها بيدها


الثانيه وتخلص الفلوس منها واهي تبتسم بسعاده


تذكرت ان العجوز كانت بترفض الفلوس انفزت عليها


بعصبيه : مره ثاني فيه احد يعطي انتي فلوس


مافيه كلام لا علطول شيل ويجيب حق انا يفهم


والا انتي يعرف انا ايش يقدر يسوي كله نفر داخل


بيت انا شيل شعر مال هوا ولد انتي بدر كله بنت ام


كله كله انتي مايسمع كلام سوي سحر حق كله جوا بيت


الجده انتفضت برعب : لا لا حرام ماسوولتس شي


وبدت تترجى الشغاله انها ماتأذي ولدها واعياله


الخدامه كانت تكذب ماتعرف لسحر والاتعرف احد يسويه


لاكنها تعرف ان المجتمع بشكل عام يخافون من السحر


فحبت تستغل هالنقطه وجابت نتيجه معها


_________________________________

في بيت عبد الله صديق مشعل


دخل الصاله مصلع بدون اشماغ وثوبه معقود على وسطه


يشيل بين ايدينه كرتون ثقيل واهو داخل شاف امه وزوجته


يتقهوون وولده يزن يلعب بمجموعة سياراة صغير قام


بسعاده واهويشوف ابوه داخل عليهم فز واقف وركض


لابوه : بابا جاء


عبد الله ينبه اولده : رح وراك خلني ادخل الكرتون


يزن الي عمره خمس سنوات تبع ابوه للمطبخ بفضول


عبد الله رمى السلام واهو على مشيته متجه للمطبخ جاه


صوت ام يزن : كنها ذبيحه الي معك


عبدالله نزل الكرتون الي معه في ارضية المطبخ واتجه


لمغسلة المطبخ يغسل ايدينه واهو يرفع صوته مجاوب


: ايه ذبيحه عازمن خويي على العشاء


يزن تهايق في الكرتون وشاف اللحم والدم وتقزز من


المنظر كشر بقرف : وع


التفت عليه عبدالله واهو باقي يغسل : احترم النعمه


ولاتقول عنها وع


يزن هز راسه بعدم اقتناع : بس هي صدق يع شم ريحتها


عبدالله عصب : بلاك داعسن خشمك في الكرتون بعد هنا


وماتشم شي


خلص من غسيل ايديه وسكر الصنبور ثم فك ارباط ثوبه


عن خصره وطلع لصاله ويزن يتبعه جلس في الارض جنب


امه الي جالسه تتقهوى وبينهم المركى اعتدل في جلسته


واهو ياخذ الفنجال من يد زوجته


ويزن رجع يلعب بالعابه


ام يزن : عازمن احد غير خويك


عبدالله : لاماغير خويي وامه


ثم التفت على امه هو : يمه تراي لزمت على مشعل يجيب


امه معه وقلتله انك انتي الي ملزمتن فيها


امه التفتت عليه : الله يحييه ويحيي امه بس وش طارن


عليك تلزم عليه باسمي


عبدالله تنهت بهم : يمه خويي ذا سالفته سالفه حرمته


انكبته وانحاشت من البيت من غير سبب ويوم جت عند


اهلها طلعت في امه بلاوي الدنيا كلها وامه اضعيفه


ماهيب حقت مشاكل والاذت الحرمه بشي


عاد مشعل ماستحمل الكذب الي انقال عن امه قام طلقها


ام عبدالله وكنيتها ام غانم : عساها ماتعود قليلة المروه


ام يزن : ماتدرون يمكن الحرمه جايها شي من عمتها


ماهي معقوله بتهج منا والطريق


عبدالله عصب : عاد هذا نقص العقل ومايسوي والرجال


يحلف ان امه ماتعرضتها بشي والايذكر انه صار بينهم


شي حتى هو وياها كل السالفه انها دقت عليه تباه


يوديها لاهله يوم عزيمة خوينا الي جاء من السفر


قال بكره اوديتس يوم رجع للبيت للحرمه زيد شالت


شلايلها وراحت لاهلها


ام يزن ماتحب السوالف في الخلافات الزوجيه غير


انها لوقالت اي شي في حق ام مشعل بيقلبون السالفه


على راسها واهي ماهي مقتنعه ان الحرمه اطلعت


من بيتها بدون سبب تنهضت واقفه : انا بروح اقطع


اللحم واسنع اشغالي قبل يجون الناس


راحت للمطبخ واهي تفكر في زوجة مشعل ياترى وش


خلاها تترك بيتها وتطلب الطلاق هل عمتها فعلا مشكلجيه


طيب ليه ماتكون هي المشكلجيه موب عمتها انفظت


راسها في محاوله انها تطرد هالافكار من مخها


شافت كرتون الذبيحه وبدت تنفذ اكمام بلوزتها المشجره


الي البستها على بنطال جنز احسن شي اني لابسه


جنز الله يعز الجنز في هلاك الشغل ماينفع الاهو


بس ياليتني لبست معه تيشرت قطن اريحلي من


البلوزه ....... اروح اغير ......لا لا مايمدي انا احسن


شي ابدى بتقطيع اللحم لايجون الناس وانا ماخلصت


اتجهت لدولاب المطبخ واسحبت السكين من حامل


السكاكين الخشبي الموجود على رخامت المطبخ


وبتفكير اشيل الكرتون على الطاوله واجلس على الكرسي


والا اجلس في الارض ............. اف صدق فضاوه


الحين وراي مليون شغله وانا قاعده افكر اقعد على الارض


والا على الكرسي توجهت لكرتون اللحم اجلست عنده


واول ماستوت جالسه تذكرت انها ماجابت صحن كبير


تفرغ اللحم فيه علشان تشوف وش تعزل للعشاء ووش


الي توزعه في اكياس وتدخله الفريزر قامت مره ثانيه


واهي تحس ان زحمت الشغل تشتتها وتفقدها تركيزها


اخذت صحن كبير من الدولاب واغسلته وحطته جنب


الكرتون وارجعت يم دولاب المطبخ افتحت واحد من


ادروجه السحب واسحبت منه مجموعة اكياس اللحم


ورجعت تجلس متربعه الكرتون قدامها مباشره


والصحن جنبه على يمينها وبدت تطلع اللحم من الكرتون


وتنزله في الصحن


في هالاثناء في الصاله ادخلو محمد وسلطان اعيال غانم


واسرعو في مشيتهم متجهين لعمهم الي فتح ايديه


على وسعها مرحبٍٍ فيهم حضنهم مع بعض بيدينه


الثنتين واهو يبوسهم : ياهلا والله بحبايب عمهم


محمد الكبير وعمره سبع سنوات : انا شفت سيارتك


برا وجيت


عبدالله بابتسامه : يازين الي يحتري جيت عمه


سلطان عمره اربع سنوات ربت على كتف عمه يلفت


انتباهه : عمي ترا كورتي انفقعت ابي كوره


يزن ترك السيارات وجاء يمهم : انا عندي كوره ارواح


نلعب في الحوش


عبدالله يلخبط شعر سلطان بيده : ابشر بكره ان شاء الله


اشتريلك كوره هالحين روحو العبو مع يزن في الحوش


العيال انطلقو راكضين للحوش بيلعبون كوره


وعبد الله التفت على امه شافها سرحانه وماهي معه ابد


ام غانم من شافت اعيال ولدها الي مات على الحدود


في حرب الحوثي (نسئل الله ان يتقبل جنودنا الشهداء


قبولن حسن وان يحشرهم مع الانبياء والصديقين في


اعلى جنات النعيم ) واهي فز قلبها وعقلها بدى يشتغل


بكل طاقته يفكر ويرتب ويخطط كانت تنسج خطه محكمه


في خيالها وتدرس كل جوانبها بعنايه فائقه كانت تشوف


الامور تترب في ذهنها بترتيب عجيب ابتسمت اخيرا


واهي لقت الحل الي بيجمع شتات اعيال ولدها


التفتت على عبدالله بحماس : اسمعني زين وفتح مخك


معي لامن خويك جاء اليله قله لقيت لك الحرمه الي


بتشيل امك فوق راسها


قاطعها عبدالله باستغراب : من تقصدين يمه


تكلمت ام غانم بحماس متزايد : اقصد ارملة اخوك ياقوت


توسعت عيون عبدالله بصدمه : تبيني اعرض ارملة اخوي


على الرجال


عقدت ام غانم حواجبها بغضب : اجل اخلي اعيال اولدي


يتيتمون مرتين ماسمعت النعجه اخوها وش يقول اعيالكم


مايمشون معي خطوه انا باخذ اختي وبس واعيالكم

عندكم


عبدالله :هذا انتي قلتيها اعيالنا عندنا وماناقصهم شي


ام غانم كملت بغضب : الاناقصهم كل شي لامن امهم


راحت عنهم مامعوضهم عن فقدها شي يكفي فقدهم


لابوهم وعدت ارملت اخوك مابقى علاها الا اسبوع وتخلص


واخوها راكبتن الشياطين اظهره لاهو مخليها تقعد في


بيتها مع اعيالها وعلى عيونا وتحت مسؤليتنا والاهو


اخذها واخذن اعيالها معها


عبدالله تورط وندم انه عزم مشعل واضح ان امه بتفظحه


معه : يمه انا مستحيل ارمي ارملت اخوي على احد


اصرخت عليه بعصبيه : اسمع عاد اخر الهرج اما


انك تقنع خويك ياخذ ياقوت ونشرط عليه ان اعيالها


يبقون معها ياتاخذها انت اما سالفة ان اعيالي


ينحرمون من امهم بعيدتن عن شواربكم


في المطبخ ام يزن تقطع اللحم وفجأه اقطعت يدها


بالسكين من هول الي وصلها بصوت خالتها الصارخ


انفضت يدها بألم ورمت السكين من يدها واهي تفزواقفه


وتركض لباب المطبخ متجاهله اصبعها الي بدا ينقط


دم اطلعت مع باب المطبخ واهي تصرخ : والله ان سويتها


وتزوجت علي ياقوت والاغيرها اني مقعد في بيتك دقيقه


التفتت عليها ام غانم بعصبيه : ان تسان ماتبينها توقع


على راستس اقنعي رجلتس يزوجها خويه


عبدالله انفجع من الصدمه وتجاهل زوجته واصراخهاالتفت


على امه بقهروصرخ


: يمه من جدتس تبيني انا اخذ ارملت اخوي الي ماكنها


الاوحده من خواتي


اصرخت عليه امه : خلاص اجل تقنع خويك ياخذها واليله


انقهر عبدالله من كلام امه وتفكيرها : يمه انا مستحيل


اكلم مشعل في هالموضوع


انفزت عليه امه : ازهلها انا اهرجه وانا بنت ابوي المهم


لامسكته العلم تشجعه وتخليه يعزم امره


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 99
قديم(ـة) 15-09-2017, 08:26 PM
lolo21896 lolo21896 غير متصل
©؛°¨غرامي جديد¨°؛©
 
الافتراضي رد: روايتي الثانية :تجاعيد الزمن


مرحببااااااا تراحيب المطططططرر
نبض قسم قسمات اني من عشششششاق
وطبعا كنت متابعه روايتك
صيته وادمنتها وماتصدقين نشرتها لصاحباتي هههههههههههههههه من كثر محبيتها وحبيت اسلوووووبك اهنيككككك قسم ع هالاسلوب لاكثر من رائع اعجززز اوصف ابداعك وقسم ماتصدقي وش كثر فرحت يوم شفت ان لك روايه ثانيه وترا تابعتك من اول منزلتيها ودي اعلق بس تو جا۽ قبولي بالستجيل
حطيني من اليوم من متابعينك وترا كل يوم ادخل ثلاث مرات اشوف نزلتي او لا

استمري احلا كاتبه

دمتي بودي ♥

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 100
قديم(ـة) 16-09-2017, 03:33 AM
booony88l booony88l غير متصل
©؛°¨غرامي جديد¨°؛©
 
الافتراضي رد: روايتي الثانية :تجاعيد الزمن


تسسسلممم اناااملكك على هالبااارت الرائع

الرد باقتباس
إضافة رد
الإشارات المرجعية

روايتي الثانية :تجاعيد الزمن

الوسوم
(تجاعيد , الثانيه , الزمن , بقلمي , روايتي
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايتي الثانية: في حطام قلبك هناك أزهارا ستزهر يوما ما حبي الشمـوخ روايات - طويلة 181 12-09-2017 07:19 PM
روايتي الثانية: محبوبي لاتسالني وش اللي طرالي وغير طباعي/كاملة شموخي عزوتي روايات كامله - يتم نقل الرواية هنا بعد اكتمالها 435 16-08-2017 08:04 PM
روايتي الثانية : حتى خفوقن راحت ضلوعه أقسام خذه ان كنت في محله لقيته /كاملة #xrwaiah_81 روايات كامله - يتم نقل الرواية هنا بعد اكتمالها 72 16-08-2017 06:03 PM
صدفه غيرت مجرى حياتي صدفه بدلت ابطال روايتي عاشقه الشوكلاته روايات - طويلة 11 30-01-2016 11:51 AM
روايتي الثانية : وين أيامك وجودك يعنيني روايات - طويلة 61 27-10-2015 08:35 PM

الساعة الآن +3: 10:37 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1