اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
الإشعارات
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 11
قديم(ـة) 10-04-2017, 06:08 AM
afnan20 afnan20 غير متصل
©؛°¨غرامي مشارك¨°؛©
 
الافتراضي رد: روايتي الثانية :تجاعيد الزمن


السلام عليكم
اخبارك
اشتقت لك ولرويتك كثير
اسفة لنى ماكملت رويتك الجميلة (صيتة ظبى النفود)
وان شاء الله استمر معك بهذي الرواية
فكرة الرواية جميلة
وضح انها عن ام غلاب وكيف تحل مشاكل عيالها واحفادها
حبيت مناقشتك لتعصب الرياضي لنى انقهر من اللى يكونو متعصبين با الرياضة لدرجة السب والشتم والقذف يعنى ذنوب على موضوع تافة ولا يفيد لا دنيا ولا اخرة وايضا اللى مثل بدر يصور الهوشات وينشرها ويسبب مشاكل بدون فائدة وبس عشان يزيد عدد متابعينة
ام غلاب
حبيتها كثير
خالد
حبيتة كثير وحبيت انتقادة لتعصب الرياضي
ريان
انقهرت من تعصبة بس ان شاء الله يعقل لنه الا الن مراهق
مازن
قهرنى تصرفات اطفال يعنى لما كان طفل ويعير جوري والعنود ان ماعندهم اخوان مشيتها لنه صغير لكن حتى بعد ماكبر تصرف وقح وطفولي
العنود
ممكن تتصل با احد عمانها او خوالها او اهل مازن لنى مافهمت مازن ايش يقرب لها وايضا ممكن تتصل على ام غلاب اذا كانت جدتها وتخبرها عن تصرفات مازن السخيفة
رجساء وام ريان
حبيتهن لكن الا الان ماظهر دورهن كثير
نايف (سربوت العائلة)
الا الان مافية حاجة تثبت ان سربوت ننتظر ونشوف نهايتة هل هو فعلا سربوت او العائلة ظالمتة
بدر
فى البداية انقهرت منه لنه صور هوشة ريان وسبب له مشكلة وكرهتة اكثر لما ماحترم امه وابوة وجدتها
ابو بدر
الله يعينة على زوجتة وعيالة بس اللى فاهمته انه هو كان مهملهم ومنشغل با شغلة وبعدها الاستراحة
ام بدر
تصرفات بدر واضح انها وقحة بس هي تحاول تبررله
جوري
حبيتها واضح انها مرحة وانا احب الشخصيات اللى كذا
ريماس
الى الان حبيتها وشكلها بعد مرحة مثل جوري بس نشوف ايش بيصير بعدين
روان وجمانه
حبيتهم واهم حاجة انى احب الطبخ والرويات مثلهم
اتمنى اكون علقت على جميع الشخصيات


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 12
قديم(ـة) 10-04-2017, 09:19 AM
صورة غرشوبه نعيميه الرمزية
غرشوبه نعيميه غرشوبه نعيميه غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


السلام عليكم
الله يعطيج العافيه مشكوره على البارت
يا اختي ما تخلص تعصبات الكوره ومشاكلها المفروض يتقبلون الشي بروح رياضيه
مازن مايحس في اللي يسويه مسكينه الجوري لو انه مايقصد ذا الشي بس الواحد يحط في خاطره

سلام،،،،

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 13
قديم(ـة) 12-04-2017, 03:00 AM
فيتامين سي فيتامين سي غير متصل
©؛°¨غرامي متألق ¨°؛©
 
الافتراضي رد: روايتي الثانية :تجاعيد الزمن



حيالله نبض أفكاري ومتابعاتها الغاليات

والله إن عقلي أفتر من الشخصيات وماحفظتهم زين لكن إن شاء الله
مع الوقت بحفظهم فالمعذره لو جبت العيد ولخبطت بينهم

ريان وأمثاله كثير وماراح يتعضون إلا لما يتسببون في مصيبه لنفسهم
أو لغيرهم هالنوع شديد التعصب الله يعينهم على نفسهم أعرف واحد في المباريات
الحساسه لفريقه من كثر ماينفعل ويعصب مايشوف المباره وينتظر يسمع نتيجتها

بدر هذا لا خوف من الله ولا حيا من خلق الله والسبب من البيت بالتحديد والديه
الأب ماهو داري عنهم والأم لو حصل شيء تلتمس له العذر وتدافع عنه ويمكن تخبي عن الأب
بعض أفعاله وفي نظرها تحميه ماتعرف إن تصرفها خطأ
الإثنين الأم والأب غلطانين في أسلوب تربيتهم فكيف يكون اللي تحت تربيتهم
المثل يقول لو ماالمربي ماعرفت ربي

خالد لاترتجي احترام من واحد ما أحترم والديه

نايف صعب الحكم عليه بدون دليل المتهم بريء حتى تثبت ادانته

مازن من النوع اللي يحب يستفز اللي حوله خاصه لو عرف إنهم من النوع اللي سهل أستفزازهم
المفروض جوري أفضل حل للي مثله التطنيش لأن بكذا ماحققوا له رغبته
الجوري تصرفها غلط إنت عارفه مازن وعارفه قوة إحتمالك ماله داعي تحرجين نفسك معه
العنود شكلها متهوره وبتجيب العيد ونصبت نفسها المدافع عن جوري ياترى وش راح تعمل

تسلم يمينك نبض أفكاري منتظرين بقية الأحداث


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 14
قديم(ـة) 13-04-2017, 12:48 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


ياهلا ومرحبا بكل الي ردو

بنسبه لشخصيات مع الوقت راح تحفضونها

والروايه مازالت في بدايتها وان شاء الله راح تعجبكم احداثها

وحياكم الله

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 15
قديم(ـة) 13-04-2017, 12:49 AM
صورة نبض افكاري الرمزية
نبض افكاري نبض افكاري متصل الآن
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن



البارت الثالث

العنود دقت على روان وبسرعه انفتح الخط
روان :هلا عنوده وبمزح اذا متصله تبيني ارسلك من الحلى قيدهم خلصوه

العنود بجديه /عليكم بالعافيه اسمعي ابي اروح لسوق الحين ضروري

روان شافت خالد قام من الجلسه بيروح يصلي المغرب
فبسرعه تكلمت معه قبل يطلع

:خالي خالد

التفت عليها خالد والعنود باقي معها على الخط واهو
سمع بداية مكالمتها ويعرف ان الي يكلمها العنود

: تودينا السوق انا والعنود

خالد : باطلع اصلي ارجع القاكم مصلين وجاهزين

روان اشرت له براسها علامة الموافقه واهي ترد
على العنود
: خلاص اجهزي خالي خالد يقول بيصلي ويودينا

بعد ماسكرت العنود التلفون راحت تستأذن من امها

لقتها تستعد لصلاة

:يمه ابي اروح مع روان لسوق بنلحق وجد والجوري

ام العنود : ويومنك تبين السوق ليش مارحتي مع اختك
وعيال خالك

العنود : يمه انا ماحب اروح مع اعيال خوالي بذات
هالي اسمه مازن من يومنا اصغار واهو يهايط علينا
علشان ماعندنا اخو وبعدين انا توني اشتهيت
الروحه علشان روان بتكون معي

ام العنود لاحول والاقوة الابالله مازن ملقوف يومنه
اصغير ودايم يعايرهن بس ماهقيت ان اعيره
معورتهن لهادرجه ياليت ابوكن طاعني وتزوج لعل
الله يرزقكن بهالاخو الي تشفقنه
:خلاص يامي روحي ولارجعتن خلي اختك ترجع معك

في السياره

روان : وين الجوري ليش ماجت معك

العنود : الجوري قيدها اسبقتنا مع وجد بنت خالي

روان استغربت : وليش مانتظرت تروح معنا

العنود تذكرة ان عمتها بيصير عندها عزومه وهذا عذر حلو : لاني ماكان عندي نيه اروح بس تذكرت عزومت
عمه ام فواز يوم الخميس فقلت لازم اروح اخذ فستان

روان : اما عمه عندها عزومه ولاقالت لنا

العنود : بنت لاتطلعين اشاعات هي تغدت عندنا اليوم
واتصلت عليها عمت فواز وقالت انها بتجيها يوم الخميس
بس باقي تاكد على ولدها الي راح يجيبها
فعمه قالت بكره راح تتاكد منها اذا بتجي وتعزم
حتى قالت تبغاكي تساعدينها في الطبخ

روان : اجل زين الي عرفت بالعزومه من الحين خل اشتري
انا بعد واذا على الطبخ اكيد راح اساعدها عمتي من لها
غيرنا

العنود : انا بسوي الحلا انتي سويلها الطبخات الاساسيه

روان : موب مشكله بكره الثلاثا يعني معنا وقت ننسق الشغل بينا

بعد هالحوار بين العنود وروان عم السكون في السياره

وارجعت العنود تفكر في اختها
زين الي لقيتلي عذر عند اعيال عمي الحين اذا رحت
لسوق بعدهم مع ولد عمي وارجعت الجوري معنا
راح يفهم ذاك الغثيث ان كلامه هو السبب وانا
مانا بمحدودات عليه وتوبه نركب سيارته بعد اليوم
بس اخ ياني ودي اشوفه واهزئه

في سيارة مازن من بعد الكلمه الي رماها مازن

والصمت يعم السياره وكلها كم دقيقه ووصلو السوق

انزلن البنات ومازن حرك سيارته مشى

اول مادخلن السوق رن جوال الجوري وكانت العنود

اسئلتها عند اي بوابه انزلو واطلبت منها مايبعدون عن
البوابه علشان يلقونهم بسهوله

وجد حست ان كلام اخوها ورى جيت العنود خاصه انها شافت الجوري تطلع جوالها بعد كلامه على طول : تونا ماشين من عند العنود وماكانت تبي تجي

الجوري استجمعت شجاعتها خاصه ان مصدر قوتها
قريبه منها وراح توصل في اي لحظه
: لاتوقعين اني بركب سيارة اخوك بعد الكلام الي قاله

وجد ماستغربت لأنها اكثر وحده تعرف اخوها وشلون
كان يستفز بنات عمتها وتعرف اكثر ضعف الجوري وحساسيتها
:اتمنى بس انكن ماتطلعن هالمشاكل الصغيره قدام
اعيال وبنات عمكم مهما كان حنا اهل

الجوري : محد طلع شي عندنا عزومه يوم الخميس
والعنود قالت لهم توها تتذكر العزومه بعد مامشينا
من عندهم وانها بتجي تشتري فستان
(العنود مخبره الجوري بكل شي على الواتس اب )

راحن يتسوقن في المحلاة القريبه لحد ماوصلتهم
العنود وروان

في مكان ثاني بالتحديد في احد الاستراحات المشبوهه
كان عند رواد الاستراحه احتفال خاص بمناسبه لاتهمنا
لاكنها تهم شخصيات يهمون احد الجهات السريه
كانو متعودين يسوون حفلاتهم في وقت متأخر لاكن
ارتباط بعض هاؤلا الاشخاص المهمين بمواعيد سفر
خلا الحفله الصاخبه تبدى من بدري كانت مزيج
غريب من الاشخاص المشهورين واشخاص غامضين
واخرين مترفين وغيرهم شبه معدمين فيهم من يضهر
للمجتمع كشريف نقي وبعضهم يمارس قذارته علانيه
نساء ورجال وقبيلة شياطين متخمه بالفخر
فمن النادران يوجد اكثر واقذر من الرجس الموجود هنا

كانت وحده من فاتنات ذالك المجتمع القذر والي عرف
عنها انها تنقي مرافقيها بعنايه واهي عادتا ماتختار
الروس الكبيره الي يكحون افلوس بس هالمره
عينها على شاب احرقت فتنته جسدها بلهيب لم تجربه
مع اي واحد قبله رغم اموالهم وعطورهم وترفهم الغير مسبوق تسللت خلسه عن اعين الكبار والي ماكان
من خططهم الليله اي علاقه نسائيه فلديهم ماهو اهم
حاولت كل جهدها انها تلفت انتباه ذاك المغرور
لاكنه ازتاد غرور واهو يتجاهلها صار شغلها الشاغل
احضرت له كأس من الخمر وبدل مايشربه اضهر
بعض التجاوب معها واخبرها انه مايشرب قبل انثاه
وانه يعشق الجسد المتمايل الثمل لمى يطيح بين ايديه
واهو مازال يتمتع ببعض الصحوه كانت تحرص انها
تبقى في كامل وعيها حتى ماتخسر حياتها في
مثل هالمجتمع المليان فخاخ وبلاوي لاكن ذالك
الشاب الي يتفجر جسده رجوله وفتنه قدر انه يغويها
ويسقيها بدل الكاس كؤؤس في هذي لاثناء انتقلت
الفاتنه مع الشاب لجناح خاص كانت تذوب فيه
رغبه وكان يتمنع بتفنن لسبب في نفس يعقوب
كان يرسلها الى ذروة الجنون واذا ضنت انه الان
يقتحم جسدها فاجأها بكلام واسئله عن اشخاص
واشياء هي ماتبي تتكلم عنهم لاكن مجبوره تجاوب
فكل جواب يقربها الى سحر فتنته اكثر وكل تمنع
يبعدها عنه وكلما بدت تستفيق اغرقها في خمر فتنته
من جديد كانت نظراتها له مليانه رغبه وافتتان وكانت
نظراته غير مفهومه ابدا كانت تحاول جره لسرير
لاكنه يتفنن في اشغالها عنه اخيرا مد يده ودخلها
في احد مخابيه وياكثر مايدخل يده في مخباه
ثم اتجه معها ناحية السرير ممداهم يجلسون على
حافته حتى سمعو ضجيج مرعب في الخارج
قام مفزوع واهو يتلفت حوله وش ذا وش صاير اخذ يركض
في الغرفه بفزع واضح ثم ركض لباب الغرفه هارباً بحياته
واهو يسمع صوت الصراخ وطلقات الاسلحه الناريه تتزاحم في المكان والفوضى تنتشر في كل مكان
تمكن من الهرب بسهوله ركب سيارته ومشى بلا مبالاه
بلي قاعد يصير في الاستراحه الي هرب منها
بعد فتره قصيره جاه اتصال اتفق مع احدهم على موعد
سكر الجوال واتجه لبيته مباشره

نرجع للبنات في السوق تسوقو وخلصو وراحو يتعشون
في قسم المطاعم لمى خلصو اكل قامو بيطلعون لأنهم
سبق واتصلو في اخوانهم قبل يوصل طلبهم
العنود كانت مشتريه هي وجود من نفس المحل واهي جالسه جنبها الحين تعمدة تقوم قبل جود ومدة يدها
بخفه واخذت كيس جود بدل كيسها
جود قامت واخذت الكيس القريب منها واهي تعتقد انه
كيسها
اطلعو البنات مع بعض جود راحت لسيارة اخوها
والعنود والبنات راحو لسيارة خالد قبل مايركبن
البنات السياره افتحت العنود كيسها واشهقت
بتمثيل بنات هذا كيس جود شكلي تلخبطت
معها في الاكياس باروح اعطيها اياه واخذ كيسي
صدقن البنات على طول وماشكن في شي ابد
خاصه انهم طول الوقت كانو يتسوقون ويسولفون
وماكان مبين على العنود اي شي
اركبن روان والجوري السياره والعنود راحت لسيارة مازن
اوصلت عندهم ومازن بدي يحرك سيارته ولمى شافها وقف
لفت العنود من قدام السياره لجهة جود واعيون مازن
متعلقه فيها افتحت باب جود ووقفت عليه
مازن ابتسم ماتكون العنود لوخلت في نفسها هرجه
واهو عارف انها جايه مع اعيال عمها وماخذه الجوري
معهم لانه سبق وسئل جود عن الجوري لمى اركبت
وقالتله السالفه وهاوشته على الكلام الي قاله للجوري
وماهو ندمان على الي سواه فطالما كانت الجوري
الطعم الي يصيد فيه العنود
:هلا بنت عمتي

العنود : بحده لاهلا ولامسهلا

مازن : افا ماتوصل لهاذي

العنود : احمد ربك اني خليتها على هذي لاني
قبلها فكرت اجيبلك الي يغير ملامح وجهك ومن غير
مايسئل ليه

مازن فهم انها تقصد ولد عمها المعضل : ماعاش الي
يقرب من وجهي

جود : بس انت وياها بتقعدون تتهاوشون على حاجه تافهه

العنود بغضب : اذا مشاعر اختي شي تافه عندكم
احب اوضح لكم انها كل شي عندي واذا مالي اخوان
ترا مانا مقطوعات من اشجره واعيال عمنا ياكلون اللحم
ني واذا الجوري راحت في سيارتك علشان جود موب
معناته ماعندها احد يوديها ويجيبها وابشرك ان هذي
اخر مره تتعنى فيها علشانا

مازن ماتوقع ان زعلها راح يوصل لذدرجه
: محد قال ان مشاعر اختك شي تافه وبعدين انا كنت
امزح معها وماقصدت شي وانا وسيارتي تحت امركن
متى مابغيتن شي اتصلن على جود وانا برسم الخدمه
واسف اذا كنت زعلت الجوري او زعلتك

العنود : اعطت الكيس الي معها جود واخذت كيسها
وقبل تمشي : الله لايحدنا عليك واذا بغينا شي اعيال
عمي موجودين ومن غير منه
قالته ورقعت الباب الي كانت واقفه عنده وراحت لسيارة
خالد

مازن سكر عيونه مع رقعة الباب بقهر حشى ولد موب بنت
: بنت عمتك هذي ماتفهم والاشلون

جود : انت الي خربت على نفسك طول عمرك تستفز
الجوري وتنكد عليها علشان تلفت انتباه العنود
وهذي هي العنود اكرهتك علشانها

مازن : وش اسوي اذا هي لوح مايأثر فيها شي ولاتعطي
احد وجه وزعل الجوري هو الشي الوحيد الي يخليك
تحس انها مازالت كائن بشري

جود : يااهبل ياعبيط انا لوكنت مكانك كان بدال مانكد
على الجوري واعيفها حياتها ادلعها اشيلها من فوق الارض شيل كذا تلفت نظرها لفت ايجابي ياذكي
بس خلاص الحين قيدها راحت عليك الجوري
كبرت ولو تقرب يمها يطيرونك الدهيش ورا الشمس

مازن حرك سيارته واهو يضرب على المقود بيده بقهر
: وانتي وش فايدتك شوفيلي حل مع بنت عمتك
الخبله ذي

جود ناظرت فيه وارجعت تسترخي في الكرسي وبهدو
: احاول

في بيت ابونايف اخوه ابو العنود وغلاب وشباب العائله
باسطين لهم فرشه في الحوش ومشغلين مكيف صحراوي
يبرد عليهم قيدهم تعشو وجالسين يشربون شاهي ويسولفون
دخل عليهم نايف لابس جنز ازرق وتيشرت ملون
سلم عليهم وكان بيدخل لغرفته مباشره بس استوقفه كلام
عمه
: وشلونك يانايف

نايف : الحمد لله بخير بشرني عن صحتك انت

ابو العنود : ياربي لك الحمد بصحه وعافيه

وقفت نايف خلت الجميع يلاحظ الشفايف المطبوعه
على ارقبته بروج احمر صارخ

ابونايف بغضب : وش الي على ارقبتك يالي ماتخاف ربك

نايف توسعت عيونه بصدمه وغضب ومسح ارقبته بيده بسرعه وشاف اثر الروج في يده وفي لحظه
استعاد سيطرته على نفسه وتحول لقالب ثلج
هز اكتافه بعدم اهتمام : جاي من عند خويتي
ودخل وخلاهم في حالة صدمه هذي اول مره يجيهم
بالحاله ذي هم صحيح كانو شبه متاكدين انه صايع
ضايع بس ماكان عندهم دليل ضده وهذا هو اليوم
جايهم وأثار معصيته ظاهره عليه
اشتعل المجلس بالسب والشتم من الشيخين وتعالت
التعليقات المستنكره من الشباب واحدهم ابتسم بشماته
وقام يزيد النار حطب بطريقه مبطنه يتفنن فيها

راح نايف لغرفته اغتسل بسرعه لبس وتعطر ورجع
نزل مره ثانيه
وهالمره ماكان على الفرشه الا ابوه وعمه وذاك الحاقد
مرهم يمشي بثقه واعتزاز بالنفس تليق فيه

حدق فيه ذاك الحاقد ياه ياقو باسه ماكنه داخل علينا
من اشوي في وضع مخزي اذا مشى كنه يمشي
في السماء من الغرور والغطرسه والقهر ان ثقته
في نفسه دايم في اعلى مستوياتها مهما انسب
او انشتم ثقته هي هي ماتنقص اشعره
رغم اني لي مكانتي واحترامي الي محد يقدر ينكرها
بس اذا جاء هالمتغطرس يكتسح المكان وكأنه الوحيد
الموجود فيه هز راسه بتكشيره وش هالكلام هذا سربوت
مايسوى

في الواقع حس باختناق واهو يسمع هالاعتراف الخطير
بحظور نايف حتى لو كان بينه وبين نفسه


مايدري ليه هالنايف يفقده توازنه النفسي كل ماشافه بعمره ماحس
بكره تجاه اي احد والكل يحبه ويحترمه واهو بعد يحب
ويحترم الجميع طبعا ماعدا عقدة حياته نايف
طيب ليه ليه معطيه اهميه وشايله فوق راسي ليه ماني
قادر اتجاهله وانسى انه موجود زيه زي اي واحد عادي ليه


ابو نايف : وين بتروح

التفت نايف على ابوه بابتسامه وغمز له بعينه
: لخويتي الثانيه

ابونايف حاول يخفي ابتسامته ويظهر الغضب في
وجهه الا انه ماقدر الاانه يبتسم له ابتسامه خفيفه
الله يصلحك ياوليدي انا اشهد انك ملكت قلبي
من بين اخوانك كلهم بس لو تخلي السعسعه عنك
على كثر مادعيلك مدري وين اتروح دعاوي عنك
انتبه انه بدى يعترض على اقدار الله
: استغفر الله العظيم من كل ذنب عظيم
يالله انك تكفيه شر نفسه وتصلحه صلاحن من عندك

في صباح اليوم الثاني

قامت لصلاة الفجر ولاعاد جاها نوم راحت للمطبخ
تدور شي تاكله مالقت الاكيس خبز وكيس صمون في سلة الخبز اتركته وراحت افتحت الثلاجه كانت مليانه معلبات
اجبان منوعه وقشطه ومربى واشياء هي ماتحبها والاتاكلها سكرة الثلاجه وارجعت لسلة الخبز فتحت
كيس الخبز اخذت منه قطعه قد كفها وسكرته ورجعته
مكانه صبت لها كوب ماء واجلست على احد الكراسي
الموجوده حوالين طاولت المطبخ المستطيله حطت
كوب الماء قدامها وبدت تاكل قطعة الخبز بشويش
اه الله يرحم يوم كنت اقوم اعجن اعجينتي
واسوي اخبيزتي واعفكها بشوية سمينه واكلها
مع الحليب يازينها من عيشه ماهيب هالقواطي
الي مالها طعم والافيها خير خلصت خبزتها
واشربت كوب الماء وارجعت لغرفتها الي تتشاركها
مع احفادها عدلت اللحف عليهم واتجهت لسريرها
اجلست عليه بملل وهذا حالها كل يوم الصباح
تقضيه كله الحالها لاعندها شغل تتسلى فيه
ولاحولها ناس تتسلى معهم بدت تسبح وتهلل
وتكبر وتذكر الله لعل وقتها يثمر بدل مايروح
عليها هدر بعد ساعه ادخلت عليها شاديه
: صباح الخير
منيره : هلا صباح النور
شاديه اتجهت لشذى تقومها للمدرسه
: شوشو قومي يالله يابنت مدرسه قومي
وقربت منها وبدت تهزها بكتفها وتناديها لحد ماقامت
: يالله روحي للحمام وغسلي وجهك عبال ماجهز الفطور

قامت شذى بكسل راحت تغسل
وشاديه راحت تجهز الفطور في الصاله بيض ونواشف
وحليب
مشعل قيده قام وغسل راح لامه في غرفتها باس راسها
وصبح عليها وطلب منها تقوم تفطر معاه
قامت منيره مع ولدها واجتمعو على سفرة الفطور
منيره ومشعل وشاديه وشذى ماكان على السفره
شي من الاكل الي تحبه واهي تحب بشكل خاص
الاكل المصنوع من البر ومن سؤ حظها شاديه
ماتعرف تسوي لاعصيده والامرقوق والاحتى الخبز
المفتوت والا حتى الجريش تقريبا كل الاكلات الشعبيه
ماتحبها والاتعرف تسويها
اجبرت نفسها على اكل كم لقمه من الخبز والبيض
واشربت كاسة الحليب
شذى افطرت والبست مريولها وجهزتها امها للمدرسه
ومشعل تجهز لدوامه وطلع هو وشذا لدواماتهم
وشاديه ارفعت السفره وارجعت تنام ومنيره بقت
كالعاده وحيده

في بيت ابو غلاب
قامت ام غلاب قبل اذان الفجر توضت وتسننت واجلست
على سجادتها تذكر الله لحد ماأذن الفجر وقامت صلت
فرضها وبعد الصلاه ارجعت تمددت على سريرها
ابوغلاب واخوانه واعياله راحو صلو في المسجد وارجعو نامو رجساء وام ريان صلن واتجهن للمطبخ يجهزن الفطور البنات صلن وارجعن ينامن واهم متعودين يضبطون الساعات المنبهه على اوقات دوامهم فيقومون
قبل الدوام بوقت كافي يلبسون ويتجمعون على طاولت
الطعام
ام غلاب بعد ماسمعت الحركه في البيت اعرفت انهم
قامو قامت غسلت والبست مروجلها على راسها واتجهت
لغرفة المعيشه لقت غلاب وخالد ونواف جالسين
على الكنب وكل واحد جواله في يده ينتظرون
الفطور يجهز اول ماشافوها داخله عليهم
قامو يسلمون على راسها ويهلون فيها اجلست
جنب غلاب واهي سعيده بالعاده الي ازرعتها فيهم
من صغر واهي انهم لازم يبدون يومهم من اول الصباح
ويجتمعون كلهم علهم على الفطور سواء هالعاده
خلت اعيالها يسئلون عن بعض ويعرفون اخبار بعض
ويكونون اسره مترابطه
اول ماجلست وضحى سكرو اعيالها الجوالات وبدو
يسولفون معها ومع بعضهم
رجساء وام ريان بدن يحظرن الفطور على الطاوله
وكل ماجهزت وحده من البنات اتجهت للمطبخ
اتطلع اصحون الفطور معهم كلها دقايق وصار
الفطور كامل على الطاوله مصابيب بالعسل والسمن البري
فول وعدس مراهيف ولبنه وعسل شكشوكه
والمشروبات حليب وشاهي وكبتشينو
رجساء وام ريان يشرفون على الفطور يصبون المشروبات
ويوزعونها ويقربون لكل واحد الصنف الي يبي
ياكل منه وينبهن على الجالسين ياكلون عدل
يعني يمارسون امومتهن على الموجودين
واذا قامو كلهم لدوامات تفرغن هن لانفسهن وبدن
يفطرن على رواقه وسوالف ووناسه وام غلاب
تكون قيدها خلصت فطور بس تكمل جالسه
معهن تسولف وتوسع خاطرها
واذا خلصن اكل وقامن يلمن السفره ويشوفن اشغالهن
اطلعت ام غلاب تمشي في الحوش تمرن ارجولها وتحرك جسمها

في البيت المجاور جدة بدر تفطر مع ولدها يوميا
خبز مفتوت لانه ماياكل الاهالفطور واذا راح
تبقى الحالها محد يسئل عنها غير الخدامه
الي حاطها ولدها لها اما اهل البيت ماتشوفهم
الافي حضوره واذا طلع واهو اغلب وقته برا البيت
اختفت حرمته وبناته داخل البيت وماعاد تشوف منهم احد


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 16
قديم(ـة) 13-04-2017, 09:11 AM
صورة غرشوبه نعيميه الرمزية
غرشوبه نعيميه غرشوبه نعيميه غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


السلام عليكم
الله يعطيج العافيه الغلا
مازن يستاهل اللي جاه من العنود هو الحين يبي يلفت انتباه العنود له يقوم يعاير اختها انهم ماعندهم اخو
وشو دخل اختها فيها << غبي
اللي كان في الاستراحه هو نايف

سلام،،،،

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 17
قديم(ـة) 15-04-2017, 09:18 PM
صورة اميرة الغرور الرمزية
اميرة الغرور اميرة الغرور غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


السلام عليكم
بارت جد رائع حبيبتي
تسلمي
مازن انهبل جا يكحلها عماها
نايف وراه شيء احسه يلعب شيء كبير
ننتظرك

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 18
قديم(ـة) 19-04-2017, 02:48 PM
صورة نبض افكاري الرمزية
نبض افكاري نبض افكاري متصل الآن
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن



البارت الرابع

في بيت ابو غلاب

مجتمعين في الصاله يشاهدون لقاء تلفزيوني مع خالد الدهيش كمحلل رياضي وصحفي مختص بالشؤون الرياضيه

المذيع : اذا ماناقزنا وصايحنا وشلون تسميه تشجيع
اصلا حماس التشجيع في الصيحه

خالد : محد قال لاتصيح يبه صايح وناقز لين تشبع
بس لاتسب لاتشتم لاعبين الفريق الثاني
لاتشتم مشجعين الفريق الثاني انا مااعترض
على انك تعبر عن حماسك لفريقك بالطريقه الي انت تبيها
بس بشرط ماتضر غيرك لانفسيا والاجسديا والاباي صوره
كانت

المذيع : هالحين انت مسوي فيها المشجع المثالي
وكلنا شفنا مقطع ولد اخوك الي كله تعصب

هنا الجالسين في الصاله طغى عليهم التذمر
ابو ريان التفت على ريان بعصبيه
: عاجبك هالكلام

ريان بعد كل الي صار معه من مشاكل بدى يقتنع
بكلام عمه خاصه بعد ماصارو الكل يعايرون خالد
بريان وكلامه
: لا ماعجبني بس عاد خلاص سالفه وانتهت لمتى بتمسكونها علي

نواف : هاذي نتيجة الاعلام المفتوح اذا امسكو على الواحد زله انشبو في حلقه كأن مافي حياته الاهالغلطه
وينسفون ايجابياته كلها

روان : من جد الانسان لازم يسوي كنترول على نفسه
وماينشر اي مقطع يشوه سمعته وسمعت اهله
ياكثر الي ينشرون مقاطع استهبال ويمسكونها الناس
على كل الي يقربون لهم

نرجع للحوار التلفزيوني

خالد : ولد اخوي مازال مراهق واكيد تصرفه كان غلط
واخوي ماقصر معاه وضح له غلطه وكلنا داخل العائله
ناقشنا معه الموضوع وان شاء الله هالتصرف ماراح
يتكرر منه

المذيع : طيب خلنا من الكلام النظري انت تشجع

خالد : اي نعم انا واثنين من اصدقائي نشجع فريق
وثلاثه من اصدقائي يشجعون الفريق المنافس لفريقنا

المذيع : يعني انتم مجموعه من سته اشخاص ثلاثه
يشجعون فريق وثلاثه يشجعون فريق ثاني

خالد : صحيح

المذيع : طيب اذا صار مباراه بين الفريقين كيف يكون
وضعكم

خالد : عادي نجتمع في الاستراحه ونتابع المباراه مع
بعض وكل واحد يشجع فريقه نتحمس نصارخ نتناقش
ننقد ونحترم بعض ونتقبل الهزيمه بروح رياضيه
الكوره لعبه لاكن الأخلاق تربيه ودين واساس
ثابت في حياتنا فماهو منطقي ابد انا نتخلى عن
الثوابت الدينيه والاخلاقيه علشان لعبه

في مكان اخر
شقة مشعل وشاديه
شاديه جاهزه ومجهزه اعيالها بيروحون منتزه نسائي
البست عباتها ومرت عمتها في الصاله
: يالله مشينا مشعل ينتظرنا تحت في السياره

قامت منيره بصمت البست عباتها واطلعت معهم
احس ارجولي تعورني ومالي طوقه في الروحه
بس وش اسوي مشعل مايرضى يوديهم مكان
الاوانا معهم وماقدرت اكسر بخاطر هالضعوف
خلهم يروحون يلعبون ويستانسون
وصلت السياره وركبت جنب اولدي مشعل الله يخليه
لي واشوف شاديه حطت سلة القهوه عند ارجولها واركبت
ومبين عليها مستانسه الله يزيدها سعاده
مشينا شوي وقالت شاديه انها تبي حلويات من المخبز
تقول صديقتها بتجيها توني ادري انها مواعده احد
ماقالت لي الله يصلحها لو قالت لي كان غيرت برقعي
ولبست واحدن اجد من ذا وكان حطيت في يدي
اسواره ولبست ثوبن ازين من الي علي ماودي
انها تشوف لبسي كذا وتحسبن اولدي مقصرن
علي جعلني افداه مايجي منه قصور ابد
مرينا المخبز واخذ مشعل كم سلة حلا واخبوز منتفه
على قولتهن فطاير ياعزتي له تكلف وهن يادوب ثنتين
ماكان له لازمه الخساير هذي كلها
وصلنا المنتزه ونزلت شاديه اغراضها يوم شفت القش
كثير عليها اخذت منها سلة القهوه والبساط الي
بنجلس عليه وهي وبنتها شالن الباقي
بسطنا فرشتنا وجلسنا كلها دقايق وجت صديقتها
سلمت علي وسلمت عليها واجلست معنا على الفرشه
وبنتها كبر ابنيتنا تلعب مع شذى ومعاذ في لعبه
قريبه منا وقامن يسولفن بينهن في سوالفن ياكثرها
شين مسند وشين محدر وشين مدري وشهو
ومرات يتذكرني بهرجه يوم اخلصن من القهوه
قامن وقالن بيروحن يتمشن وانشدني كاني
ابي الروحه معهن مابغيت اضيق عليهن وقعدت
محلي واهن راحن وابطن ماعاد مرن علي
بغيت الحمام ومدري وين محله قمت واقفه اتلفت
حولي الحريم والبنيت في كل مكان الي اجلوس
والي يتمشن والي في المحلات الي اشوفها حولي
واجد ولاادري وش داخلها شفت على الفرشه القريبه
بنتن جذعها زين وفيها ملح وقبله ناديتها وقلت لها اني
ابي الحمام ولاقصرت ودتني له رحت توضيت ورجعت
للفرشه بسطت سجادتي وصليت المغرب يوم خلصت
صلاه لشاديه وخويتها يوم ارجعن صلن واجلسن
يثعلن الاكياس الي جابنها معهن وبين انهن متقضيات
من المحلات الي حولنا بعد ماخلصن تفتيش ارجعن
يتقهون ويسولفن ثم قامن مره ثانيه وهالمره ماقالن لي شي
وراحن ولاعاد شفتهن لين جني لهن كره وقامن يخمخمن
اغراضهن يلمنها يقولن بنمشي وانا ذابحني الجوع
ماذقت شي غير كم حبه من الفطاير ماقالو لها
ومدري هن تعشن والا يوم ركبنا
قال مشعل : تعشيتو
شاديه : ايه تعشينا برقر وكرسبي
مشعل واهو يناضر امه : يمه تعشيتي
منيره خفت اقول لا ماتعشيت يرهج على شاديه يهاوشها
والضعيفه توها مستانسه ماودي اخرب فرحتها ووكاد
ان ماعندها نية ردى لابد انها نستني وبعد عيشتهم
هاذي ماتصلح لي
: الحمد لله اكلت وبنعمه وخير
شاديه اف اشوى بغيت اروح ملح كان فيه ركن شعبيات
بس نسيتها والاكان اخذت لها مناك بس ماعليه
مخلين السلال والصواني عندها مليانه نعمه

اوصلو البيت ادخلو الشقه وفي خلال ربع ساعه كان
الجميع في افرشهم شاديه بدلت لعيالها ونيمتهم
وماسئلت منيره اذا تبي عشاء او لا


منيره بعد مارقدو سرى علي الجوع شق بطني عجزت
انام قمت رحت للمطبخ افتش فيه ادور شي اكله
لقيت صامولي وماقالوله اخذت منه حبه واخذت
من الثلاجه لبن صبيتلي كاس لبن وقمت اغمس
الخبز فيه واكل ثم شربت الي بقى في الكوب من اللبن
وغسلت كوبي ورجعت ارقد



في مكان ثاني


جالس هو وخويه حمدان في استراحه رايقه وجميله
مزروعه ثيل وفيها نوافير واشجار منسقه ومقصوصه اطرافها بعنايه والجو يفتح النفس
: ياخي بنت الاستراحه انشبت في حلقي الله ياخذها
الحقيره كل اشوي ناطه في اسنابي والاانستقرامي

حمدان :ههههههههههههههههههههههههههه
ياكذاب يامنافق مزعجنا اي عمليه فيها حريم او بنات
ماادخلها ابد اكره هالكائنات الغريبه والااطيقهم
واخرتها تلف مخ البنت في خمس دقايق وتتركها مغرمه
فيك ومجنونه في هواك

نايف بتكشيره : يع تكفى لاتذكرني وبعدين انت عارف
انها ماكانت ضمن الخطه بس الله وكيلك انشبت في حلقي
لصقه فضيعه بشكل قلت خلوني استفيد منها ولولا مصلحت الشغل والا كان ماتت قبل لاطل في وجهها
وصدقني مدري اشلون تحملتها الكم دقيقه الي الصقت
فيني فيها مدري كيف مسكت نفسي لااطلع المسدس
واحطه في راسها الواطيه والاحتى اذكر كيف تعاملت
معها وقتها والي قهرني يوم اضطريت امثل عليها
اني خايف ومربوش من الضجه الي صارت اخ بس
يالقهر

حمدان : ههههههههههههههههههه انت مثلت عليها الخوف
ماعندي شك في هذي بس عاد انت هربت من جد
قعدت احتريك ساعتين مدري وين طسيت

نايف : وش اسوي ياخي احس جلدي تلوث شي
فضيع انا جنس الحريم ماطيقه ماحبه وماعرف اتعامل
معهم خير شر وشلون عاد تبيني اتحمل اقذر نوع من هالجنس الغريب
انا طرت على البيت مثل المجنون
وماارتحت لين تروشت وبدلت ملابسي وذيك الملابس
الي نزلتها رميتها في الزباله والمصيبه الهانم اطلعت
طابعه اشدوقها على ارقبتي جعلها بالحمى الي ماتبرد
خلتني اطيح من عين ابوي جعلها بالعمى في عيونها
الحيوانه

حمدان قام يرفس من قو الضحك :ههههههههههههههههههههههههه
يامسكين عدو المراءه الاول ومتهم في قضية شرف
تكسر الخاطر صراحه بس ترى اكيد ان بنت الاستراحه
شكت فيك بعد الاسئله الي سئلتها اياها

نايف : بطقاق خلها تشك من هنا لبكره على فكره
هي اسئلتني ليش داهمو الاستراحه سويت
نفسي اهبل وخواف قلت اصلا انا هربت سيده
مدري اذا هي مداهمه والا احد من الموجودين متهاوشين
وبعدين قلت انه يمكن الهيئه هي الي مسويه مداهمه
علشان الاختلاط وقعدت اسب الي عزمني واخذني
معه للاستراحه وقلت توبه اروح استراحات ناس ماعرفهم
مره ثانيه

حمدان : وصدقت

نايف : موب لازم تصدق المهم ان ماعندها اي دليل
ضدي والشك مازال قائم عندها ومااعتقد بيجي
في بالها اني من المباحث حتى بعد المداهمه
وترا يوم اسئلها هي محلقه موب في العالم


حمدان : انا مدري وشلون بتتزوج وهذا تفكيرك عن الحريم

نايف : لاياحبيبي الله الغني عن الحريم وعن الزواج كله
ماعندي نيه اتزوج خير شر هذا الي ناقصني
وحده بكايه وجبانه وسربوته

حمدان : ياخي خاف ربك ترا فيه حريم ينحطون على الجرح يبرى وكلهم ذوق واخلاق

نايف : والي يرحم والديك اسكت عني حتى لو فيه
انا هالجنس بعمري ماتعاملت معه والااعرفه والاابي
اتعرف عليه حتى وانا بزر كل وقتي مع ابوي والامع
العيال والاعمري لعبت مع البنات والاقربت لهم
حتى في السلام كنت اسلم على الرياجيل واعيي
اسلم على الحريم اختي الي هي اختي لاشفتها
صديت عنها موب كره فيها بس صدق ماعرف اتعامل
معها احس الي قدامي قزازه لو مديت يدي يمها بتنكسر
فسكر الموضوع هالكائنات الغريبه مابي اتعامل معهم ابداً
والابصدفه

المقرفه ذي اول وحده تلمسها يدي واحس
ودي اصلخ جلدي من مكانه بعدها وشي اكيد راح تكون
اخر مره اسمح لها الشي الغريب يقرب مني


حمدان : نصيحه راجع دكتور نفسي موب معقول نفورك
من الحريم بطريقه ذي وبعدين ترا احساباتك في وسائل
التواصل الاجتماعي اغلب متابعينها بنات

نايف : يع يالقرف كل مافتح تطبيق تنكت علي الرسائيل
الي تحوم الكبد المشكله ساحب عليهم وماعطيهم وجه
وباقي مصرين يردون على كل شي انزله
واحسب عندك هذا سبب اضافي يخليني اكره جنس البنات كله

في بيت ابو غلاب في وقت سابق
وبعد انتهاء البرنامج الرياضي

في الصاله ريماس جالسه ترسم في كراسة رسم وتلون
جتها امها تشيل في يدها متر كامل من ورق التجليد
المستخدم في تجليد الكتب ومعها مقص نحيف ومشرط
حطتها كلها قدام ريماس

وريماس فتحت عيونها في الاغراض باستغراب

ام ريان : ابيك ترسمين لي على التجليد نقشة حناء

حلوه وتقصصينها ابي اتحناء لعزيمة عمتك ام فواز

ريماس : يمه ليش ماشتريتي جاهز انا والامره جربت
ارسم نقشة حنا ويمكن ماتضبط معي

ام ريان : مالقيت شي يعجبني انتي رسمك حلو وبعدين
نقش الحناء يدوب زخارف بسيطه اكيد بتعرفين له
واذا ماتعرفين تخرمينه انتي ارسمي النقشه وانا اقصها

ريماس : خلاص بجرب واشوف وين تبين تحطين النقشه
ووش الحجم الي تبينه

ام ريان بدت تاشر باصبعها على باطن يدها : بحطها
هنا في وسط الكف وابيها وسط لاتخلينها تملى الكف
كله

ادخلت عليهم رجساء : وش تسوون

ام ريان : ابي ريماس تسويلي نقشت حنا

رجساء : صدق اجل سويلي انا بعد وزيني نقشتي
ابي ثنتين وحده في داخل الكف ووحده برا

ريماس حطت ايدينها في وسطها وميلت راسها بمزح

: وصرت نقاشتكم ترا باابيع عليكم النقشات

رجساء : ابد بيعي ونشتري منك باغلا من السوق بعد
تشجيع وش تبين بعد

ام ريان : بتشترين انتي منها كيفك انا ابي نقشي بلوشي

ريماس : افا يانبع الحنان ياخساره بس ياليتني انا
الي رضعت من عمه رجساء بدل ريان

رجساه تضحك

وام ريان والاعلى بالها : يمديك الحين طلعي دلدولك
يارجساء خليها ترضع

هنا ريماس ورجساء فرطن ضحك

رجساء : هههههه اخاف تشلع صدري من مكانه

ريماس : هههههه تكفين بس ياعمه لاتكملين يوه يع تخيلو بس اشرب حليب اوادم وانا هالكبر

عند وضحى في الصاله عندها نواف وغلاب

نواف : يمه دوريلي حرمه ابي اتزوج

وضحى استانست :تقوله صادق

نواف : ايه يمه مافي الزواج مزح

غلاب : اخذ من بنات عمك

نواف :بنات عمي لا العنود عنيده والجوري دلوعه

وضحى : اجل نخطب اضوى لاهي عنيده والادلوعه

نواف : الي تشوفينه بتسئلينهم انتي قبل والانخطب
على طول

غلاب : مايحتاج سؤال عمي مابينا وبينه الاخطوتين
يوم الجمعه بعد الصلاة نخطب منه
بس انت مستعد ماديا

نواف :تقدر تقول محتاج اشوية مساعده من اخواني

وضحى : وفلوسك وين

نواف : حطيتها كلها في الورشه حقتي

غلاب : لك سنه تقول ورشتي وورشتي ولهالحين تشتغل
في نفس الورشه القديمه

نواف : خلاص هانت كلها شهر شهرين وافتتحها

هي اخذت وقت لاني مجهزها على اعلا مستوى
ومقسمها لعدت اقسام

قسم تصليح الاعطال

وقسم التعديل على السياره

وقسم متجر لقطع الغيار

وقسم مغسله يعني كل ماتحتاجه سيارتك في مكان واحد

غلاب بدهشه : علشان كذا مساحتها مره كبيره كنت اقول
مبالغ في المساحه الي مسوي عليها المشروع وانت مره
متكتم على مشروعك

نواف : متكتم على المشروع علشان افكاري ماتنسرق
يجي واحد عنده ملايين يشوف افكارك وياخذها
على البارد وينفذها قبلك بقوة افلوسه

غلاب : بنسبه للفلوس ابشر بالي تحتاجه بس انا
من رائيي تأجل فكرة الزواج لين تفتتح مشروعك
على الاقل يوم نخطب نقول عندك ورشتك الخاصه

نواف : وهذا احد الاسباب الي خلتني اتكتم على المشروع
حقي ويخليني اصر على الخطبه هالشهرين بذات
الي ماتقبل فيني وانا مجرد ميكانيكي في ورشه
ماني بحاجتها لاصار عندي مشروعي الخاص

وضحى : بتدس ورشتك عن عمك وتقول ميكانيكي يشتغل
عند الغرب براتبه

نواف : ايه ومليون مره قلت لاتجيبون طاري مشروعي
قدام احد لايكون عمامي يعرفون

وضحى : لامحد يدري بس انت كذا كنك تقول ارفضوني

غلاب : عمي مستحيل يرفض نواف والبنت اذا ارفضته
علشانه يشتغل في ورشه معناته ماتستاهله وانا مع
نواف لاتجيبين طاري الورشه والاحتى لحريمنا الي
معنا في البيت

وضحى : بكيفكم اجل انتم هرجو عمكم ومنكم اله


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 19
قديم(ـة) 20-04-2017, 08:37 AM
صورة غرشوبه نعيميه الرمزية
غرشوبه نعيميه غرشوبه نعيميه غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


السلام عليكم
الله يعطيج العافيه تسلمين على البارت روعه
احب الشاب اللي يعتمد على نفسه ويشتغل اي شغله
الشغل ما هو عيب المهم مصدر رزق وحلال والله بيبارك فيه

سلام،،،،

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 20
قديم(ـة) 21-04-2017, 04:20 AM
صورة اميرة الغرور الرمزية
اميرة الغرور اميرة الغرور غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


السسلام عليكم
تسلمي على البارت الحلو
عحبني تفكير نواف
شاب معتمد على نفسه وفكب في مشروع مربح
لافي من يتامر عليه ولا في من يحاسبه مكون نفسه
نايف انسان ما قدرت افسره كيف يفكر
بس بنشوف تاليتها معاه
ننتظرك حبيبتي

الرد باقتباس
إضافة رد
الإشارات المرجعية

روايتي الثانية :تجاعيد الزمن

الوسوم
(تجاعيد , الثانيه , الزمن , بقلمي , روايتي
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايتي الثانية: في حطام قلبك هناك أزهارا ستزهر يوما ما حبي الشمـوخ روايات - طويلة 163 05-07-2017 12:08 AM
روايتي الثانية: محبوبي لاتسالني وش اللي طرالي وغير طباعي/كاملة شموخي عزوتي روايات كامله - يتم نقل الرواية هنا بعد اكتمالها 433 20-06-2017 05:27 PM
روايتي الثانية : حتى خفوقن راحت ضلوعه أقسام خذه ان كنت في محله لقيته /كاملة #xrwaiah_81 روايات كامله - يتم نقل الرواية هنا بعد اكتمالها 70 22-03-2017 02:20 PM
صدفه غيرت مجرى حياتي صدفه بدلت ابطال روايتي عاشقه الشوكلاته روايات - طويلة 11 30-01-2016 11:51 AM
روايتي الثانية : وين أيامك وجودك يعنيني روايات - طويلة 61 27-10-2015 08:35 PM

الساعة الآن +3: 01:45 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1