اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
الإشعارات
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 31-03-2017, 03:13 PM
صورة نبض افكاري الرمزية
نبض افكاري نبض افكاري غير متصل
©؛°¨غرامي مشارك¨°؛©
 
الافتراضي روايتي الثانية :تجاعيد الزمن












السلام عليكم ورحمة الله وبركاته


بعد مانتهيت من كتابة روايتي الاولى صيته ظبي النفود

هذي روايتي الثانيه تجاعيد الزمن


ماراح اكتب مقدمه

وراح نبدا في الروايه مباشره









البارت الاول


تجاعيد الزمن

انا وضحى العجوز الي رجل في الدنياء ورجل في الاخره

زي مايقولون الناس عن العجائز قدامي

منول كانو ينادوني وضحى ثم بعد ماصرت ام صارو ينادوني

ام غلاب وهالحين صار كلن ينطل علي اسم من عنده

عجوز قريح عجوز عرعر اعجيزنا ادري ادري بتقولون

هذا الصدق انتي عجوز ايه انا عجوز بس الي اسم والي كنيه

تنادوني ابها وشهوله تقولون العجوز جت العجوز راحت

تراها تجرح وتعور في القلب

واقفه قدام المرايه تناظر نفسها وتمسح على صدرها بيدها

منول كان هالصدر مرتز كنه حب الرمان

واليوم يتدلى مثل قربة الراعي

ثم امسحت على شعرها القليل بيدها منول كان هالشعر

مثل شلال الحرير غزير وناعم واسود سواد الليل

واليوم كنه ليفة دلة القهوه اجمعه كله بين اصبعين

ولونه خليط من لون الحناء ولون الشيب

ارفعت يدها قدام وجهها واحزنها كيف تكرمش جلدها

وامتلت تجاعيد

هذي هي تجاعيد الزمن تعلمني ان الزين اقفى كله

ومابقى الا العمل الصالح والعيال البارين ياعزتي

للي ماعنده اولدن يبر فيه

سمعت صوت باب غرفتها يفتح وابتعدت عن المرايه

بسرعه كأن وقوفها قدامها تهمه

رجساء : يمه تبين شي

ام غلاب : لامبى شي وين بتروحين

رجساء : ماني برايحه مكان بس شفتك ابطيتي
في الغرفه قلت يمكن تبين شي

ام غلاب : ابجي هالحين

لفت على راسها شيله خفيفه والبست من فوقها المروجل
( قطعة قماش سودا مثلثه نفس شكل الشماغ المثلث
بس من اقماش حرير اسود عادي )

اسمعت اصوات اهواش في الصاله واطلعت تشوف
وش فيه رغم كبر سنها مازالت صحتها جيده
طويله تميل لنحف بعكس بنتها رجساء المكتضه بالشحوم

في الصاله
ام ريان ماسكه جبهة ولدها ريان بمنديل وواضح انه مفلوق

وتصيح على الشغاله باعلى صوتها : ياشمس وين شنطة
الاسعافات لمتى وانا انادي

ريان واهو معصب : يمه ترا كلها جرح بسيط فكيني
خليني اروح ادبغ الفقراوي الوصخ

ريماس بضحكه : ياشيخ سلملي عليه الي دبغك
انا اشهد انه جابها صح في الجبهه يالطواقي

ريان بعصبيه :اقول انقلعي لاقوم اكسر راسك

ام ريان : بس انت وياها هذا الي اخذناه من الكوره
الهواش والتخلف

(ريماس تشجع النصر وريان يشجع الهلال
والخرابيط الي قالوها حسب ماشوف واسمع من المشجعين
وانا ماحب التشجيع لاحد يقول انتي مع الفريق العلاني
والاالفريق الفلاني المباريات الي راح يجي ذكرها في الروايه
مالها علاقه في الفريقين مجرد نتايج وارقام من راسي
وابشركم مافهم في الدوري السعودي فتكفون لحد يوجع
راسي ببطولات فريقه )

ادخلت الصاله بخطوات هاديه بطيئه نسبيا وعينها
على جبين حفيدها ريان الي مبين انه مفلوق
حست بألم يعتصر قلبها فهذا اكبر احفادها الذكور
وله معزه خاصه اقتربت منه حتى وقفت قريب عنده
: راسك وش فيه من الي فالقك عسى يده للكسر

ام ريان بقهر على ولدها : هذي ادروب الكوره ياعمه

ريان :اف حسستوني جايكم مصوب من الحد الجنوبي

ام غلاب بحنق : ياليت كان نفتخر فيك ونشيلك على روسنا
ياصويب الكوره والله من الردى

ام ريان تنظف الجرح وتلف عليه شاش بقهر :تخسون انت
والدشير الي افلقوك ترحون للحد الجنوبي

ريان : وشوله نروح اصلا الي هناك يسدون

ريماس : هههههههههههه في الكوره وتفلقتو الله يغني
الوطن عنكم ياشيخ لايروح من كيسنا

رجساء :السلق الثانين وين لايجون مفلقين بعد

ريان ناظرها بقهر : يعني انا سلقه

ريماس : ههههههههههههههههه منذو مبطي

من سؤ حضها ان امها انتهت من لف الشاش على راسه
نقز من جنب امه بقهر وهجم عليها وبدت مضاربه
عنيفه بينهم

ام غلاب : بس انت وياها يالي ماتستحون قرو في الارض
ياورع اترك اختك يابنت فكي شوشته

ام ريان ورجساء يفرقون بينهم على صوت خالد ينادي
: ياهوه ياعرب
اتركو ريماس وريان بعض خوف من عمهم الي جاء
وباقي يتشاتمون
ام ريان طول اليوم طرحتها ملفوفه على راسها وبرقعها
على وجهها علشان حموانها اخوان زوجها ساكنين
معهم في نفس البيت اخذت شرشفها والتفت فيه
:ادخل

خالد قيده سمع اهواش ريماس وريان وبصرخه
: بس انت وياها اذا مانكم قد التشجيع لاتشجعون

ريان : بسخريه جاكم الصحفي الرياضي الي مايفهم
في الرياضه شي

خالد : مفهم في الرياضه شي علشاني ضد التعصب
والهمجيه الي انتم عايشين فيها بزعم التشجيع

ريماس بقهر : عمي تكفى اترك عنك الصحف الرياضيه
وشف شي ثاني تغطيه ياخي ترا عندنا حرب في الجنوب
رح شف الجنود الضعوف وش ناقصهم وتكلم عنهم

ريان بحماس للفكره : اول مره هالفقراويه تقول شي
صح ترا ازعجوني الطلاب في المدرسه عمك ابثرنا
عمك حوم اكبودنا واهو مايفهم في الكوره شي

خالد : هالحين علشاني انقد التعصب الرياضي
والهمجيه في التشجيع صرت ماأفهم في الكوره
وبعدين شف جبهتك كيف صارت كنها طماطه
مفقوعه كله بسبة التعصب الغبي الي انتم
عايشين فيه

بعد ماشفنا لمحه صغيره من حياة عائلة غلاب
نجي لتعريف بالشخصيات
الجده وضحى عمرها خمسه وستين سنه مازالت بصحه
جيده رغم كبر سنها

غلاب اكبر اعيال الجده عمره ثلاثه واربعين سنه مدرس
متزوج من ساره عمرها سبعه وثلاثين سنه
اعيالهم ريان عمره خمسة عشر سنه مشجع متعصب للهلال
ذكي ومتفوق دراسيا يطمح لان يكون دكتور جراح في المستقبل
بنتهم ريماس ثلاثة عشر سنه مشجعه متعصبه لنصر
ذكيه جميله دلوعه تجيد الرسم
واصغر من ريماس ولد ثاني اسمه هاني عمره تسع
سنوات يشجع الهلال
اصغر منه بنت اسمها دانه عمرها ست سنوات

رجساء بنت الجده الثانيه عمرها اربعين سنه
ارمله زوجها له سنتين متوفي في حادث سياره
وحاليا عايشه في بيت اخوها غلاب الي هو اساسا
بيت العائله الكبير ووارثينه عن ابوهم
عندها بنت عمرها عشرين سنه تدرس في الجامعه
اسمها روان

واصغر منها بنت عمرها خمسة عشر عام اسمها
جمانه وريان راضع مع جمانه

ولدها الوحيد فراس عمره تسع سنوات
وهاني راضع مع فراس

سبب ارضاع رجساء لعيال اخوها هو اصرار
بنتها روان على انها ترضعهم علشان لاكبرو ماتتغطى
عنهم ولنفس السبب ام ريان ارضعت فراس

ولد الجده الثاني خالد صحفي في جريده رياضيه
مناصر للاخلاق الرياضيه السويه ويحارب التعصب الرياضي
علشان كذا المشجعين مايحبونه
عمره ثلاثين سنه


ولد الجده الثالث نواف عمره خمسه وعشرين سنه
ميكانيكي شاطر مخلص الثانويه وماقبلته الجامعه
لان معدله منخفض طموح عنيد وصبور واخر شي
يفكر فيه كلام الناس الي ياما سبوه وقللو من قيمته
فقط لانه يشتغل في ورشه تصليح سيارات

جميع هاؤلا يسكنون في نفس البيت

باقي الشخصيات راح تضهر في الوقت المناسب

في العصر ثاني يوم ام غلاب طالعه من بيتها متجهه

لبيت جارتها مزنه ام مسعد

وقبل توصل الباب طلع بدر حفيد مزنه واول ماشاف
وضحى جايتهم اطلق ضحكه سامجه : هههههههه
عجوز اقريح جايتنا اليوم

وضحى الله المستعان هالعيال ماعاد في اوجيههم حياء

: الله انه يصلحك ويهدي قلبك

بدر اطلق ضحكه ثانيه مالها سبب الاان كانت الحماقه احد الاسباب الوجيهه لضحك
:ههههههه ياعساك تدشرين
وضحى السعته بالخيزرانه على ساقه بحنق : تهبي
الله يهبيك
بدر انحاش عنها ووقف جنب سيارته وقام يحك مكان الضربه واهو مازال يضحك : ههههههه ماسويت
شي علشان تضربيني انتي وحده صالحه ودعيتيلي
بالي عندك وانا واحد داشر ودعيتلك بالي عندي
والجود من الموجود عاد كان ادعاتي هي الي
صابت ابشري بعزك التس علي امشيك في
دواعيس الرياض كلها وشيشتس ودخانك على
احسابي سنه كامله انا كريم وانتي تستاهلين

وضحى امسكت راسها من قو الهرجه الي اسمعتها
: لاحول ولاقوة الابالله الله انه يردك لطريق الحق
قالته واهي تدف الباب وتدخل عند مزنه قبل لاتسمع
اعبر من الي اسمعته

اما بدر ركب سيارته واهو حده مبسوط انه شاف ام غلاب
وطقطق عليها شغل سيارته ورفع على صوت الاغاني
اعلى شي وشخط بسيارته واهو حده مروق

وضحى ادخلت حوش بيت ابو بدر واتجهت للمكان
الي تعرف انها بتلقى فيه من تشاركها تجاعيد الزمن

مزنه الي كانت جالسه على قطعة زل قدم غرفتها الموجوده
في الحوش واقهوتها قدمها ورادوها في يدها
اول ماشافت وضحى مقبلتن عليها قامت تهلي وترحب
: ياهلا ومرحبا الساعه المباركه الي شفناك الك
كم يوم غايبتن عني

وضحى : الله يبقيك وشلونتس عساك طيبه

مزنه : الحمد لله مابي الا العافيه

وضحى واهي تشوف ضعف مزنه الي تجاوزت السبعين
وحركتها البطيئه وشحوب وجهها : وينتس ووين العافيه
وانتي طايحتن في هالغريفه لاونيس ولاجليس
والبيت مابينتس وبينه غير خطوه مليان ناس

مزنه بحزن وحسره : الله انه يصلحهم ويخليهم لعييلهم
والاانا ماعاد ابى الاحسن الخاتمه

وضحى : حوفتس ارخمه ورا ماتنطلقين على الثور ابو بدر
ثم تخلينه يسنع حريمه الي يصولن ويجولن في بيت
ولدك وانتي محذوفتن في الحوش كنك اشحيذيذه

مزنه : مالي في الناس لزوم خليني امسك ارضي
عن المشاكل ووجع الراس

في الورشه

وقف صاحب احد السيارات سيارته في الورشه وطلب
من نواف انهم يشوفون العطل الي فيها واهو يظن
نواف مجرد مدير على العمال بس يوم شافه فتح
كبوت السياره وبدى يشتغل عرف انه ميكانيكي
صاحب السياره : انت الي بتصلحها
نواف : ايه انا الي بصلحها وابشرك العطل بسيط
صاحب السياره : وخر بس وخر لاتعدم سيارتي
مابيلك تصليح
نواف : وليه ماتبيني اصلحها ترا شغلتها مره بسيطه

صاحب السياره : شغلتها بسيطه الا مافي راسك
الا الدجه امس موديها الهندي الي دايم اصلح
سيارتي عنده يقول يبيلها قطع غيار وانت تقول بسيطه

نواف : يلعب عليك ماتحتاج قطع غيار والاشي
خلها عندي نصف ساعه وتعال استلمها من احسن مايكون

صاحب السياره : اللعب عندك الله يصلحك مير وخر اهنا
قاله وسكر كبوت سيارته وراح ركب ومشى

نواف لاحول والاقوة الابالله الاجانب طايحين فيهم
غش واكل افلوس على الفاضي والمليان وانا الي
من دمهم ولحمهم مانهم واثقين في المشكله
قايله ماتحتاج قطع غيار اجل لونها تحتاج قطع
غيار وضربة افلوس وش بيقول عني

في بيت اخر

وفي غرفة النوم شاديه لابسه شورة وبدي ورابطه شعرها
ذيل احصان
: مشعل تكفى خلنا نروح نتعشى في مطعم

مشعل : لا امي ماتحب المطاعم والاتاكل اكلها

شاديه بعصبيه : بس انا احبها وابيها واعيالي يحبونها

مشعل بصرخه : قلت لا يعني لا خلصنا وقومي جبيلي ماء

شاديه انفخت بقهر :اف وش ذا العيشه كل شي لا

واتجهت للباب بتطلع تجيب الما لولا ان صرخة مشعل وقفتها : خير ان شاء الله بتطلعين كذا

شاديه لفت يم الشماعه الي جنب الباب واسحبت
روبها البسته وشدته على خصرها باحزام من نفس القماش واهي تحلطم : اف وش ذا الغثى

في صالة الشقه شهد الي عمرها سبع سنوات تلعب
مع اخوها ثامر الي عمره ثلاث سنوات بالعابهم الي ناثرينها في كل مكان حولهم

اما من زحفت لمحياها تجاعيد الزمن فكانت تتفرج
على قناة بدايه في نفس الصاله واسمها منيره

اطلعت شاديه من غرفة النوم ومرة على الي في
الصاله اشملت منيره بنضرة كره وراحت للمطبخ
افتحت الثلاجه اسحبت منها قارورة ماء وارجعت
واهي ماره مع الصاله التفتت على منيره
وبعصبيه : شهد قصرو على التلفزيون ازعجنا

قامت شهد قصرة على التلفزيون لاخر شي وارجعت تلعب

منيره الله يالدنيا بعد ماكنت انا راعية البيت والقايمه
بكل شي فيه جاء اليوم الي اشوف نفسي فيه شي زايد
عن الحاجه محكوره في هالشقه لاشغل والامشغله
ولاعندي مايونسي غير هالتلفزون وهالشباب الي
يتراكضون فيه ماكنهم الا اعييلنا الله يصلحهم
ويخليهم لعينن ترجيهم ايه الله يصبرني خوياتي
كلهن راحن الله يرحمهن ويغفر لهن ..............
ايه الله يذكر ابويتاتنا
منول بالخير الي الها احوشه ويدخلها الهواء
وتدخلها الشمس مهوب مثل بيوت هالوقت الي كلها شقق
كبر كفي لاحوشن اطلق رجليني فيه ولاسعتن تشرح النفس

طلعها من هواجيسها صوت شهد وثامر يتهاوشن

وجاء ثامر يتخبى ورى منيره بعد ماضرب شهد بوحده
من الالعاب شهد الحقته تبي تضربه ومنيره تفرق بينهم

: روحي وراك خلي اوخيك خلاص يابنت ضربتيه روحي
وراك

شهد اضربت ثامر وبكى وباقي تبي تضربه ازياده

طلع مشعل على صوت اهواش اعياله : بس انت وياها

ثامر ركض لابوه رمى نفسه عليه واهو يبكي ومشعل
بدى يمسح على ظهره ويحاول يهديه : بس حبيبي
انت رجال قوي وماتبكي

شهد تحاول تبرر الي سوته علشان ماتنتعاقب
: يبه هو الي بدا وضربني بالعبه

ثامر يدافع : احسن تستاهل هي ماخذه سيارتي
وراميتها بعيد

شهد : انا قلت وخر عن المكان الي العب فيه ماتفهم

ثامر : مانه على كيفك اوخر انتي الي وخري العابك
عن موقف سيارتي

مشعل : بس انت وياها وكل الالعاب هذي تجمعونها
هالحين وتشيلونها في صندوق الالعاب

شهد : لايبه تكفى نبي نلعب

ثامر : خلاص مانتهاوش

مشعل : مافيه اجمعو الالعاب بسرعه اشوف قبل اقشها
كلها في الزباله

بدو شهد وثامر يجمعون العابهم

ومشعل التفت على امه شافها تفرج على التلفزيون
والصوت مقصر رفع على الصوت وجلس جنبها

وبمزح : كل ماجيت لقيتك اتابعين هالشباب
السامجين الظاهر انك حاطتن عينك على واحد منهم

منيره بابتسامه لولدها واهي متعوده على مزحه معها
: ايه اباخذ واحد منهم مير الي بيخطب انا والاهو

مشعل : ههههههههههههههه والايهمك يمه انا اشتغلكم
خطابه واخطبه لك بس علميني من هالي جازلك
بعد ابو مشعل

منيره واهي تبتسم لذكرى حزينه : محد ياخذ محل
ابو مشعل الله يرحمه ويغفر له ثم اشرت على التلفزيون
والله يامك كانهم انت الله يخليهم لعينن ترجيهم ويصلحهم

مشعل : هالدعوات الزينه ماغير لشباب بدايه وانا مالي
فيها نصيب ترى بديت اغار منهم

منيره تناظره بحب وابتسامه : والله اني ادعيلك
في كل وقت الله انه يخليك لي ولايحمني منك
ويصلحك ويصلحلك اعيالك

مشعل اخذ يد امه وباسها : اللهم امين والله يديمك فوق
روسنا

شاديه اطلعت من الغرفه واهي لابسه بجامه بسروال طويل
وتيشرت جت اجلست عندهم وبلعانه :خالتي ماغير
تفرج على هالطخمان

التفت عليها مشعل بنظره حاره بغيره من الكلمه الي
قالتها يعني هي تشوف انهم طخمان وعلى طول
غير على قناة الصحراء وكانو يعرضون صور
الأبل مصحوبه بشيلة مدح

منيره استانست على صور الأبل : ياحليلها

شاديه لوت بوزها : وينه حلاها

منيره : كلها حلا

ننتقل لمكان ثاني

وبتحديد كوفي شوب شبابي والموجودين اهناك خالد واصدقائه الخمسه

ناصر : شف الكلب ذا وش منزل في قناته على اليوتيوب

خالد : من

ناصر : من يعني بدر الداشر

خالد : وع تكفى الاذا اذا شفته قدام بيتهم تصيبني
اغلقه مابقى الا اتفرج على مقاطعه السخيفه

عادل : هالسربوت ابومقاطع سخيفه ووقحه متابعينه
تعدو المليونين

جواد : المشكله خمه لااخلاق والاذوق مدري على وش
يتابعونه ومقاطعه تارسه برامج التواصل الاجتماعي
كل مافتحت برنامج لقيته في وجهي

يزيد : بالعكس يوسع الصدر انا اتابعه في السناب
والانستقرام واليوتيوب

صالح : يع مالقيت الا هالسلقه اتابعه انا اتصبر عليه
لين اشوفه حاط على راسه طرحه على اساس انه بنت
هنا ودي امسكه واجلده بالعقال لين يتفل العافيه

ناصر : المهم خلونا من ذا كله شوفو وش منزل عن
ريان ولد غلاب

هنا تناقزو الشباب من كراسيهم والتفو حول ناصر
يشوفون المقطع في جواله وكان المقطع عباره عن
تصوير لهوشة ريان وخويه بعد مبارات النصر والهلال

وبعد ماعرض مقطع الهوشه علق عليه : شايفين البزر
ذا تراه ولد اخو الصحفي العظيم خالد الدهيش
الي فاقع روسنا بالاخلاق الرياضيه ياخي
مدري وش اقول المقطع ابلغ من الكلام صراحه
هههههههههههه وانهى كلامه بضحكه سمجه

اما التعليقات على المقطع كلها سب وشتم وقذف
لخالد واهله كلهم وشرشحو المسكين ريان
والمقطع انتشر بشكل واسع جدا والكل ياخذ
مقطع الهوشه ويركب عليه مقطع من عنده
والي يسب والي يلعن

خالد انقهر : الحقير عديم الاخلاق ريان توه مراهق
وشلون يصوره وينشر عنه كذا

ناصر : المصيبه ان ريان سابن جماهير النصر في
المقطع هالحين النصراويين بينطلقون عليه

خالد : هذا الي انا احذر منه ناس همج مايفرقون
بين الشخص وتصرفاته بدال ماينقدون الفعل
نفسه يهجمون على الشخص الي قام بهالتصرف
ويشوهون سمعته وسمعت اهله

صالح : دق على اهلك خلهم يمنعون ريان لايطلع
ترا ان شافوه هالمسبه في الشارع بيدقون اعظامه

خالد وقف بنرفزه : هذا اذا ماكان اندق وانتهى

اخذ جواله ودق على ريان طول ماجاه رد ثم
انفتح الخط وجاه صوت ريان يلهث بسرعه الحق علي









الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 01-04-2017, 02:15 AM
صورة البدور*** الرمزية
البدور*** البدور*** متصل الآن
©؛°¨غرامي جديد¨°؛©
 
الافتراضي رد: روايتي الثانية :تجاعيد الزمن


بدايه موفقه بأذن الله
واحساسي يقول انك بتطرقين لبعض مايحدث في حياتنا من التصوير بدون اذن من اجل الشهره وسرعة انتشارها بالتواصل الاجتماعي وتصديق الناس لما يحدث

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 01-04-2017, 11:53 AM
صورة غرشوبة نعيميه الرمزية
غرشوبة نعيميه غرشوبة نعيميه غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


السلام عليكم
مبروك على الروايه الجديده
وبدايه جميله واحس هذي الروايه اكثر شي تتكلم عن الامهات والجدات

سلام،،،،،،،،

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 02-04-2017, 05:56 AM
صورة اميرة الغرور الرمزية
اميرة الغرور اميرة الغرور غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


السلام عليكم
مبروك روايتك الجديدة
موفقة ان شاء الله

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 05-04-2017, 03:52 AM
صورة اميرة الغرور الرمزية
اميرة الغرور اميرة الغرور غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


حبيبتي متى موعد البارتات
ولا للحين ما قررتي
بدايتها حلوة كمليها الله يسهل عليك

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 05-04-2017, 12:46 PM
صورة نبض افكاري الرمزية
نبض افكاري نبض افكاري غير متصل
©؛°¨غرامي مشارك¨°؛©
 
الافتراضي رد: روايتي الثانية :تجاعيد الزمن


اقتباس:
المشاركة الأساسية كتبها اميرة الغرور مشاهدة المشاركة
حبيبتي متى موعد البارتات
ولا للحين ما قررتي
بدايتها حلوة كمليها الله يسهل عليك
هلا ومرحبا

عندنا اجازه في السعوديه ومشغوله مع العائله علشان كذا ماقدرت اكتب البارت الثاني الى حد الان

نضام تنزيل البارتات راح يكون بارت كل اسبوع والاسبوع الي يكون عندي فيه

وقت وحماس راح انزل فيه اكثر من بارت

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 06-04-2017, 03:25 AM
صورة اميرة الغرور الرمزية
اميرة الغرور اميرة الغرور غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


معليش حبيبتي خذي راحتك

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 09-04-2017, 06:19 PM
صورة نبض افكاري الرمزية
نبض افكاري نبض افكاري غير متصل
©؛°¨غرامي مشارك¨°؛©
 
الافتراضي رد: روايتي الثانية :تجاعيد الزمن


تنبيه مهم


احب اوضح ان كل المواقف المذكوره في الروايه مالها علاقه بنادي النصر والانادي

الهلال وكل الاحترام والتقدير لجماهير الناديين

ليش اخترت الهلال والنصر لانهم الاشهر في السعوديه

اما ليش تكلمت عن التعصب الرياضي لانه موجود بالفعل وانا انسانه مااتابع الكوره

وكل مافتح برنامج القى اخبار النوادي الرياضيه في وجهي والتعصب الرياضي موجود وواضح للعيان لدرجة

بعض الاحيان ادخل على كومنتات صوره في موقع اخباري على الانستقرام مالها اي
دخل بالكوره والقى التعليقات مليانه سب وشتم متبادل بين الجماهير الرياضيه واذا رجعت
اشوف اصل المشكله القى انه ماكان فيه مشكله اساسا واحد دخل وشاف واحد ثاني حاط شعار ناديه كصوره رمزيه
له فيبدا يمنشنه ويسبه لمجرد انه ينتمي لنادي المنافس طيب ليه كل ذا

عموما الي عنده اي شك في وجود التعصب الرياضي يسوي بحث
سريع عن الشغب الجماهيري ويشوف المصايب

تنبيه ثاني جميع الاسماء والاشخاص في الروايه من خيالي فقط

فان وجد اي تشابه في الاسماء او الاحداث مع واقع اي شخص كان فمن المؤكد انه ليس
له اي علاقه لامن قريب والابعيد بروايتي

موعد البارت ان شاء الله كل يوم احد

وحياكم الله


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 09-04-2017, 06:21 PM
صورة نبض افكاري الرمزية
نبض افكاري نبض افكاري غير متصل
©؛°¨غرامي مشارك¨°؛©
 
الافتراضي رد: روايتي الثانية :تجاعيد الزمن



البارت الثاني


عند ريان قبل مده من اتصال خالد

كان في البقاله الموجوده في المحطه القريبه من حارتهم

فتح الثلاجه واخذ ماء وراح بيحاسب عليه

في جهه ثانيه من البقاله اربعه شباب مع بعض

الاول : شوفو ذا الفقرواي الي يسب

الثاني : بس ترا الشقرديه الي كانو معه ماقصرو فيه افلعو راسه

الثالث : حتى ولو خلونا نربيه علشان محد يتجرى يسب العالمي

الرابع : شوفوه طلع خلونا نلحقه بسرعه

طلع ريان من البقاله والحقوه الشباب الي في البقاله
واشتعلت بينهم هوشه شباب ثانين من مشجعين الهلال
شافو الهوشه وافزعو لريان لانهم اعرفوه من مقطع
الفديو الي انتشر له الشباب كلهم كانو اكبر من ريان
وبكذا انضرب ضرب جامد ومن حسن حضه ان الشباب
الي افزعوله طلعوه من الهوشه فركض من عندهم وكل
عضله في جسمه تعوره ومع ذالك كان ناوي يجيب
فزعه لشباب الي افزعو معه ويرجع وفي هالوقت
رجع تلفونه يدق طلعه من مخباه ورد واهو يلهث من التعب

واول ماسمع صوت خالد
: الحق علي في شباب اضربوني وافزعولي جمهور
الزعيم تكفى تعال افزع معهم زي مافزعو معي
خالد : وينك فيه انت
ريان : عند المحطه
خالد :دقايق واكون عندك

عند الشباب الي يتهاوشون بدت بسب الانديه ثم اوصلت
للقبايل والاهل وامتدت لحد ماستقرت بابشع صورها
على لعن الوالدين وقذف اعراضهم
والأكثر سوء ان احد الشباب الذي لاينتمي لاي من
الفريقين لقاها فرصه انه يشمت فيهم فنشر الهوشه
على السناب شات مع تعليق ان مجموعه من جمهور
النصر اعتدو على مشجع هلالي وان مجموعه من جمهور
الهلال افزعو مع المشجع الهلالي وطبعا حط شيلة
اخذ حقه بدق اخشوم

في مكان ثاني احد الي وصلتهم سنابة الهوشه
وكان هلالي وشاف واحد ينزل من سيارته الي
معلق في امرايتها الداخليه ميداليه تحمل
شعار النصر مما يعني انه مشجع نصراوي
صاحب السياره دخل السوبرماركت
والمشجع الهلالي اخذ من سيارته بخاخ بويه ازرق
ورسم شعار الهلال على سيارة النصراوي
بصبغ الازرق عشان ينرفزه وطبعا كل شي
موثق ببث مباشر على السناب شات

وضجت وسائل التواصل الاجتماعي بالمقاطع
والسب والشتم والافعال وردود الافعال الي
كل مالها تزداد عنف وطيش وانحدار


في بيت ابو غلاب

هاني وفراس وصلهم خبر هوشة ريان والشباب
بس مانهم متأكدين اذا ريان معهم او لا
ادخلو بيتهم يركضون ولقو امهاتهم في الصاله
هاني وهويلهث : يمه العيال يقولون فيه هوشه
كبيره عند المحطه والظاهر ان ريان معهم

فراس : الا عبد المجيد يقول شفت ريان معهم

ام ريان وام فراس اشهقن بخوف على ريان

ام ريان فزت واقفه وقامت تمشي في الصاله رايحه
جايه والخوف مبين على وجهها واهي تدعي لولدها

ام فراس دقت على خالد مايرد دقت بعده على نواف
ورد

ام فراس / انت وين

نواف : في الورشه ليه

ام فراس / يقولون ريان داخل في مضاربت شباب عند
المحطه تكفى رح شفه وطمنا عليه

نواف : طيب طيب وسكر بسرعه

ام ريان تدق على ريان مايرد

هاني : انا بروح افزع لاخوي والله مجلس معكن مثل الحريم

قاله وقام واقف بيطلع ووقف معه فراس
: امش اصلا حنا المفروض نروح له على طول

ام ريان اصرخت عليهم : اقعد انت وياه ناقصين
قلق

ام فراس : روحو علمو الي تلقونه من اعيال عمكم
انتم ماتقدرون تسوون شي الحالكم

ام ريان : انتي صاحيه واحد وبلشانين فيه وشلون
لاكبرت

ام فراس بعصبيه : خليها تكبر ولا نقعد كذا ماندري
ولدنا حي والاميت من ورى هالسمرمد المتجمعه

كانن يروحن ويجين في الصاله بتوتر وخوف واضح
في نفس الوقت شافن ام غلاب تطلع من غرفتها
التفتن على بعض بصدمه وكأنهن يقولن لامو وقتك ابد

اهمست رجساء : امي لاتدري اخاف يرتفع عليها الضغط

ردت ام ريان بنفس الهمس : كنت باقولك نفس الشي

ام غلاب يالله سترك الحريم هذلي علامهن مختلفات
والله ان البلا بين اضلوعهن قربت منهن بخطوات
بطيئه نوعا ما : العلم ويش وش فيتسن مقبلات مدبرات
كأن طايحن على رؤسكن مصيبه

رجساء بتوتر : ابد ياجعلك سالمه ماهنى شي العييل
الله يصلحهم تأخرو في الشارع ونحتريهم

ام غلاب بعدم اقتناع : وغير هذي

ام ريان : ماغيرها شي انتي خابرتن العيال كل اشوي
نجاهدهم لايبطون في الشارع ومحد معطينا وجه
ابروح اجيب القهوه نتقهوى
وراحت للمطبخ تفرغ توترها وخوفها بعيد عن عيون ام غلاب

اما رجساء اجلست جنب امها بعد مافتحت التلفزيون
على قناة المجد وادعت اندماجها فيما يعرض واهي ماهي
يمه ابد

ام غلاب اه من هالحال كل ماكبرت كل ماصارو يعاملوني
مثل الورع الجاهل ويدسسون عني اعلومهم
يحسبن الي قالنه يمر علي والله ان وراهن مصيبتن
موجعه الله يستر لايكون احد العيال صايرن له حادث
والااحد هالصغيرين مضروب والاوش علتهم
ياليتهم يدرون ان دس العلم عني يعورني ويقلقني
اكثر من المصيبه نفسها ان دريت والا مادريت
مامتغيرن من المصيبه شي بس اقلها اعرف العرب
وش فيهم ثم انا مؤمنتن بربي وماني معترضه على
قضاه بدل ماقعد اضرب اخماس في اسداس
اعرف وش المصيبه الحاصله واتحمد ربي
على ماقضى وادعيه بالفرج واطمن عمري والي
حولي

انتبهت من هواجسها على دخول خالد الغاضب
وريان معه وملابسه مبهذله وشوشته طايره وواضح
انه مظروب لين تفل العافيه دخل بعدهم نواف وفراس
وهاني

فزت رجساء واقفه وام غلاب شدة قبضتها على السبحه
في يدها واهي تحمد الله انها شافت كل اعيالها
سالمين ومبين ان ريان متهاوش
الشباب سلمو وقربو من امهم باسو راسها واجلسو
حولها ام ريان اسمعت صوتهم والتفت بشرشفها
وجتهم مسرعه

ام غلاب تكلم خالد وش فيكم
خالد : ابد طال عمرك شلة شباب متهاوشين مع ريان
علشان الكوره وهذا هو قدامك مافيه الا العافيه

ام ريان التفت على ريان بقهر : الله يقطع الكوره واسنين
الكوره انا لمتى اقول لاشوفك تماشي السرابيت

ريان : يوه يايمه هالحين الكوره هي الي قالت لهم صيرو سرابيت وبعدين انا ماسويت شي كنت اشتري
من البقاله ويوم طلعت التمو علي شلت شباب واستلموني
ضرب وبعدين ترا الي فكني منهم مشجعين الهلال
ومافزعولي الاعلشاني واحد منهم

ام غلاب : وخيبه تخيب العدو ثم شلة الشباب على قولتك
وش جايهم منك علشان يضربونك

تكلم خالد : اضربوه علشان واحد مصوره واهو يسب
فريق كوره

رجساء : كل المصايب من ورى الزفت الكوره

خالد : والله الكوره رياضه نضيفه ومحترمه بس الناس
الي اخلاقهم فاشله شوهوها على بالهم التشجيع
سب وشتم وتعصب احمق

ريان وفراس وهاني تبادلو النظرات بمعنى بدت المحاضره
قام ريان : انا بروح لغرفتي اتروش

قام فراس وهاني : بنروح نلعب سوني في غرفتنا

نواف التفت على رجساء : ولا عليك امر ابي قهوه

التفتت ام غلاب على ام ريان بنظره ذات معنى
: وين اقهوتك الي رحتي تجيبينها

ام ريان انحرجت ماسوت اقهوه والاشي لانها
كانت مشغوله على ريان : هالحين اجيبها
راحت للمطبخ وطلعت ابريق القهوه صبت فيه
ماء وحطته على الفرن وبدت تجهز الفناجيل
والتمر على بال ماتغلي المويه

في الصاله خالد قام ابروح اجيب حلى من المخبز
الي في اخر الشارع عبال ماتخلص القهوه
طلع من البيت وتوجه لسيارته وقبل يركب شاف
بدر يوقف سيارته عند بيتهم توجه له ووصل عنده
واهو ينزل من سيارته
بدر نزل من السياره ووقف مكانه وباب السياره مازال
مفتوح واهو يناظر في اليد الممدوده له بالمصافحه
خالد مد يده لبدر :السلام عليكم
بدر شتت انظره بعيد عن وجه خالد متجاهل يده
: وش تبي

خالد رفع حاجبه وابتسم ابتسامه جانبيه : السلام عليكم
ورحمة الله وبركاته

بدر بنرفزه :قلنا وش تبي

خالد باصرار السلام سنه ورده واجب : السلام عليكم
ورحمة الله وبركاته
ومازال ماد يده لبدر

بدر اطلق ضحكه وقحه : هههههههههه ياانك بزر
ومد يده لامس يد خالد باطراف اصابعه وبعدها بسرعه
وعليكم اتحفنا وش تبي
في الواقع بدر حس بشي من الفشيله والاحراج من مدة
خالد ليده طوال ذاك الوقت وتكراره لسلام مايدري ليه
الرد على مدعين المثاليه ليش صعب لمى يكون وجها لوجه

خالد رجع ايده في مخباه بعد مارد عليه بدر بعدم احترام
: اسمع يابدر انا ماني عجزان لاارد عليك وعلى
المقطع الي نشرته عن ريان وتسببت في انه يكون
عرضه لخطر الهمج الي يدورن اي شي يفرغون
فيه اذاهم وحماقتهم لاكني محترم كونك اول الجيران
والنبي وصى على سابع جار فنصيحه ابعد عن
طريقي وطريق عائلتي بالحسنى حتى مااضطر
اتصرف معك بطريقه ماراح تعجبك

بدر اطلق ضحكه قويه سمجه : ههههههههههههههه خوفتني الي ابيه باسويه والي ماتوصله بيدك
اوصله برجولك

اشمله خالد بنظرة استهجان : مازلت حريص على
الجيره الي بينا واتمنى انك تحترم هذا الشي
وماتجرنا لعداوه مالها اي داعي والابينا اي مشكله
شخصيه تخليك تتعمد اذيتنا

بدر سكر باب سيارته ومشى لباب بيته واهو يمشي
:انا قلت رائيي لااقل والااكثر وباقول الي اكثر منه
دخل البيت وسكر الباب وراه بمنتهى الوقاحه
وهو داخل شاف امه وابوه وجدته جالسين
على فرشه في الحوش يتقهوون
دخل بخطوات سريعه وقبل يوصل للباب
التفت للجالسين يناظرونه باستهجان لانه ماكلف
على عمره يسلم عليهم
: هاه بقايا الزمن مجتمعين

ابوبدر بغضب : عسى مايبقالك عمر يالسربوت
داخلن علينا من غير سلام كانك داخلن على كفار
وزودن عليها قطع كلامه واخذ كاسه من الطوفريه
ورماها على الجدار بقهر لان بدر اسفهه ودخل
داخل البيت قبل لايكمل كلامه
التفت على ام بدر : هذي الربوه الخاربه والدلع الي ماله
سنع

ردت عليه بدفاع : ياوك وش سوى يمزح مير عليك اجنون
ماتعرف المزح

ابو بدر : يمزح ليه اصغر اعياله يمزح معي ماشفتي
كيف دخل من غير سلام لااحترام والاتقدير

قامت بغضب : لاحول كان تنشبون في حلق الواحد
فك عن الولد لاتحشره على كل كلمه بكره يكبر
ويترك هالخرابيط من نفسه بس انت فك عنه لاتعقده
كملت كلامها واتجهت داخل البيت

هز راسه بقل حيله وسرح يفكر لويصيرله شي
من بيسنع امه وبناته واهو ماعنده غير هالسربوت
الي مامنه فود

جدة بدر كانت تراقب الموقف بحسره وصمت
الله يصبرك ياوليدي هالحرمه واعيالها مامنهم
فود واول خرابهم منك انت الي لاهن بشغلك
ولاخلصت من شغلك رحت طحت في الاستراحه
وخليت كلن يسرح ويمرح على كيفه

في بيت ابوغلاب

روان جالسه في غرفتها تنزل صور الحلا الي سوته
بعد الظهر على احسابها في الانستقرام
وروان وحده من اشهر طباخات الانستقرام
تعلمت الطبخ من امها رجساء الي تعتبر شيف محترف
من كثر ابداعها في الطبخ وتفننها فيه وهذا الي
خلا روان تعشق الطبخ من صغرها وتبدع فيه
اما جمانه مهتمه بالروايات وحساباتها
واهي شخصيه حالمه كثير وحساسه
وخجوله

ادخلت جمانه على روان في غرفتها وشافتها جالسه
على الاب توب مما يعني انها تنزل صور اخر حلا
ابتكرته اليوم
وبصوت هادي : خالي نواف يقول خلي روان تنزل
تتقهوى معنا

روان تتكلم من غير ماترفع راسها عن الاب توب
: طيب دقايق بس اخلص الي في يدي لايكون
اكلتو الحلا الي سويته وخليتوني

جمانه بأبتسامه : لا خالي خالد جاب حلا من المخبز
ويوم عرف انك مسويه حلا حط كل الحلا الي جابه
على طاولت الخدمه قدامنا وقال دام روان مسويه
حلا ذا لكم وحلا روان لي انا وياها وجيت من عندهم
واهم يتهاوشون من ياكل حلا المخبز ومين ياكل حلاك

سكرت روان الجهاز واهي تضحك :فديت خالي
الحين انزل اقدم له الحلا

انزلت تركض مع الدرج وجمانه تنزل وراها بهدوء

نواف شافهم وضحك :هههههههههههههه بناتك بالمقلوب
يارجساء الكبيره مرجوجه والصغيره هاديه

ام غلاب : المرجوج روان بسم الله على بنيتي الازينت
البنات عقل وسنع

رجساء ابتسمت على مدح امها : شفت الي يعرفون
يقيمون الناس صح مابعد راي امي راي

ام ريان تدعي الغيره : عمتي ماتشوف غير رجساء
وبناتها ياعزتيلي انا وبنيتي

ابتسمت ام غلاب : بنتك اخذتن حقها وزود

في هالوقت انزلت ريماس من الدرج تترقص

واهي ماسكه الايباد في يدها وحاطه السماعات
في اذنها

خالد يرحب فيها : هلا والله بفراشة عمها الجميله

ريماس شافت عمها ياشر لها تجلس جنبه انزعت
السماعات من اذنها وجت نزلت الايباد على جنب
وقربت من طاولت الخدمه الي في النص وبدل
ماتاخذ صحن وتحط لها حلا قامت تاخذ من العلب
وتاكل
:يمي لذيذ من جابه

خالد : انا جبته بس طلعت روان مسويه حلا واسحبو
عليه وانا اولهم

ريماس : لاوش نسحب عليه انا باكله حلا روان قيدني
سرقت منه

جت روان تشيل صينية الحلا وجمانه معها القطاعه والصحون

روان : ريمو ليش تاكلين من الحلا قبلنا

التفتت عليها ريماس بنظرة استنكار واهي تاشر على
نفسها : انا اكلت من قال اصلا توني ادري انك مسويه حلا

الجالسين كاتمين ضحكتهم على تمثيل ريماس

جمانه : يمه منها توها تدري والله محد اسرقه غيرك

ريماس بشهقه واهي تخبط بكفها على صدرها
:افا وانا بنت غلاب مابقى الاهي تتهموني بسرقة
الحلا شوفي اخوانك المفاجيع اكيد انهم هم الي ابلعوه
وشافت ريان نازل مع الدرج بعد ماتروش وبدل اثيابه
اشرت عليه اخيك ذا لص درجه اولى

روان التفتت على ريان : ريان انت اخذت من الحلا ذا

ريان ببساطه : لاماخذت حطيلي

روان : ابشر احطلك قبلهم كلهم

نواف بضحكه : ريماسوه توك معترفه قدامنا انك سارقه
حلا روان مسرع انكرتي كل شي

ام ريان تضحك : هههههه توبه ماعاد اصدقك الابشهود

روان بضحك : ههههههه يامسكينه افقدت ثقة العائله في مصداقيتها علشان قطعة حلا

ريان : علشان تعرفون انها دايم تضلمني وتكذب علي

ريماس واهي منغمسه في اكل الشوكلت الي في يدها
وتستلذ فيه كأنها تسوي دعايه :عادي عادي انا اكلت
الحلا وقدرت اقنعكم اني مااكلته مواهب ياعمي مواهب

نطلع برا بيت مساعد بن مخلد الدهيش (ابوغلاب)
ونلقي نظره على البيوت الملاصقه لبيته
بيت ابو غلاب هو اول بيت من بيوت اعيال مخلد
واهو اكبرهم وعن يمينه بيت ابوبدر جارهم
اما عن يساره تتجاور بيوت عيال مخلد ملتصقه في
بعض اول بيت بعد بيت ابوغلاب لاخوه خالد
خالد زوجته مصباح وماله الابنتين العنود والجوري
بعد بيت خالد يجي بيت صالح وزوجته سوير
وعياله نايف الملقب بسربوت العائله وعمره اثنين وثلاثين
سنه غير متزوج عنده محل لبيع الاجهزه الذكيه
وفيه قسم لصيانت اجهزة الجوال والكمبيوتر
هكر محترف احد مشاهير وسائل التواصل الاجتماعي
رياضي طويل وجسمه كتلة عضلات متناسقه وضخمه
وهالعضلات احد الاسباب الي خلت العائله ينظرون له
على انه سربوت لانهم يعتقدون انه ماربى هالعضلات
الى علشان يفتن البنات ويتصيدهم من خلال احساباته
في مواقع التواصل الاجتماعي والبعض يشوف
انه من الحماقه انه يتعب التعب ذا كله ويبني
هالعضلات وهالقوه البدنيه الملفته بس علشان يتميلح
عند البنات باختصار نايف مثار جدل وشكوك العائله
ويكاد يقسم الجميع انه سربوت من الدرجه الاولى
بس محد منهم مسك عليه شي غير الصور الي
ينشرها لنفسه وتجيه عليها تعليقات بالهبل
من البنات مع فشله الذريع في اساليب الاستعراض
بجسمه

اخوه الي اصغر منه راشد عمره سته وعشرين سنه
توه متزوج وساكن مع زوجته في شقه يشتغل
مدير لاحد الفنادق الكبيره
اخوه الي اصغر منه ياسر عمره ثلاثه وعشرين سنه
يدرس في الجامعه اختهم الوحيده اضوى عمرها
سبعة عشر سنه تدرس ثاني ثانوي

بعد بيت صالح يجي بيت اختهم الوحيده نوره مطلقه
ومالها الاولد واحد اسمه فواز

ترتيب اعيال مخلد الكبير مساعد (ابوغلاب) متوفى
يفترض ان يكون عمره الان سبعين سنه

بعده صالح ابونايف عمره اربعه وستين سنه

بعده خالد ابوالعنود عمره سبعه وخمسين سنه

بعده نوره ام فواز عمرها اثنين وخمسين سنه

في بيت خالد الجوري توها مسكره الجوال من
بنت خالها ورايحه لغرفة العنود تركض لقت الباب
مسكر قامت تطبل عليه وتغني :افتح ياقميل
ياقميل افتح ياشبيه الخيل طلبتك افتح

العنود داخل الغرفه مشغله شيله وترقص عليها
قدام المرايه اسمعت التطبيل والازعاج الي سوته
اختها انفخت فمها بزهق اف ياربي من هالبنت
كل مانسجمت في شي جت خربت علي سكرت
الشيله : ادخلي ياقلق الباب فاتح
الجوري افتحت الباب وارفسته برجلها : ادري بس
استهبل
العنود حطت يدها في خصرها : لاياشيخه ومن قال
اني رايقه لك ولاستهبالك

الجوري ادخلت ونقزت على السرير واجلست عليه متربعه
وحركت يدها قدامها في الهواء وكأنها تمسح سبوره
: خلي كل شي على جنب وركزي معي
بنت خالي وجد بتروح لسوق وتبينا نروح معها هي
كلمت ماماتي واستاذنت منها وبتمرنا الحين بسرعه
اجهزي

العنود اجلست قدام الجوري على طرف السرير
: تعرفيني ماحب اروح مع ولد خالك السامج
وبعدين انتي اكثر وحده تكره مازن ولاعمرك ركبتي
سيارته وش معنى الحين بتروحين ولابعد متشققه من الوناسه

كشرت الجوري وكشت بيدها في الهوا وكأنها تكش
عليه : مالت عليه الحقير الوقح والله مانسى ضربه
لنا وحنا صغار ومعايرته لنا دايم انا ماعندنا اخو
تف عليه الحقير الوصخ

العنود : اشوى انك للحين تتذكرين اجل كيف بتروحين
معه ياشاطره

الجوري بعصبيه : وش اسوي ذبحني الزهق
ويوم دقت علي وجد وقالت امشو معي لسوق حسيتها
نازله علي من السماء وبعدين المقرف ذا يدوب بيوصلنا
لسوق ويطس غير انه من يوم تحجبنا ماعاد شفناه
يعني يمديه نسانا

العنود : انا ماني برايحه وانتي بكيفك دام السالفه
فيها الزفت مازن الزهق اصرف من الطلعه مليون
مره

قطع كلامهن صوت جوال الجوري يدق : هذي هي
وجد

افتحت الخط وردت
: هلا
: طيب دقايق واكون جاهزه

سكرت والتفت على العنود
: انا بروح البس وجد تقول حركو من عند بيتهم
واطلعت من عند العنود بسرعه علشان يمديها تخلص

العنود شخصيه مرحه قويه لامباليه عندها يقين
وايمان عميق بانه لن يصيبنا الاماكتبه الله لنا
علشان كذا اي حدث يصير في حياتها مهما كان
حزين او سعيد تتقبله برضى وتتعامل معاه بسلاسه
وكانه شي عادي وكانت عارفه انه بيصير
فاشنيستا معروفه على الانستقرام بتطقيماتها
الانيقه والاكثر من رائعه لاكنها ماتصور نفسها ابدن
وتكتفي بانها تعرض ملابسها واكسسواراتها
واشياها الي تشتريها وفانزاتها دائما يسئلونها
عن مشترواتهم وش يطقمون معها وكيف ينسقونها

الجوري تشارك العنود في المرح وجمال الروح لاكنها
ضعيفه وغير قادره على المواجهه وتعتبر العنود
الدرع الي تحتمي فيه ادموعها قريبه اكثر وحده
فاقده وجود الاخ في البيت وتنقهر من اي احد
يذكرها بان ماعندها اخو وتكره مازن كره العمى
لانه كان يضربهم وهم اصغار ويعايرهم ان ماعندهم
اخو وكانت تنقهر لمى تشوف بنات خالها يهددنه باخوانهم
او حتى يعلمن اخوانهم اذا هو ضرب اي وحده فيهم
وكانت تشوف كيف الاخوان يفزعون لخواتهم ويضربونه

بعد نصف ساعه في سيارة مازن صارلهم يجي
سبع دقايق محركين بعد ماخذو الجوري
مازن واهو يسوق رفع عيونه للمرايه يناظر الجوري
تذكر اشكثر تعصب وتزعل اذا قال ان ماعندها اخو
حب ينرفزها
: اف مشكله الي ماعندها اخو يوديها السوق المفروض
من اليوم منزلك في السوق وماشي
قال كلمته الاخيره واهو يلتفت على اخته ثم اخذ نظره
خاطفه للي قاعده وراها

وجد : مازن بلا سماجه ماراح يصير شي لو تاخرت عشر
دقايق

الجوري حست بحقد السنين الي راحت كلها يتجمع
في صدرها عليه قامت تفرك ايدينها في بعض بقهر
واهي تحاول تمسك ادموعها اخذت شنطتها من جنبها
وطلعت جوالها منها وافتحت الواتس اب
وارسلت للعنود تعلمها بالي قاله مازن
وختمت رسالتها ب العنود احس بقهر والله اني مقهوره
يالعنود

العنود اول ماقرت الكلمتين الي اختمت فيها رسالتها
انقهرت هي بعد انقزت من السرير
الي كانت جالسه عليه بعصبيه واهي تصرخ بقهر :الله
لايخليني ان خليته يتهنى بقهره لك يالجوري
وبسرعه ارفعت جوالها قدام عينها وافتحت جهات
الاتصال واضغطت الرقم الي تبيه واهي تتوعد
مازن في داخلها


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 10-04-2017, 04:03 AM
صورة اميرة الغرور الرمزية
اميرة الغرور اميرة الغرور غير متصل
©؛°¨غرامي فعال ¨°؛©
 
الافتراضي رد: روايتي الثانية :تجاعيد الزمن


السلام عليكم
بارت حلو غاليتي
تسلمي
الله يستر من العنود ع شو ناوية ههه
ان شاء الله لي تعليقات لما تتوضح الاحداث
ننتظرك

الرد باقتباس
إضافة رد
الإشارات المرجعية

روايتي الثانية :تجاعيد الزمن

الوسوم
(تجاعيد , الثانيه , الزمن , بقلمي , روايتي
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايتي الثانية: في حطام قلبك هناك أزهارا ستزهر يوما ما حبي الشمـوخ روايات - طويلة 128 الأمس 01:58 PM
روايتي الثانية: محبوبي لاتسالني وش اللي طرالي وغير طباعي/كاملة شموخي عزوتي روايات كامله - يتم نقل الرواية هنا بعد اكتمالها 431 08-04-2017 04:15 PM
روايتي الثانية : حتى خفوقن راحت ضلوعه أقسام خذه ان كنت في محله لقيته /كاملة #xrwaiah_81 روايات كامله - يتم نقل الرواية هنا بعد اكتمالها 70 22-03-2017 02:20 PM
صدفه غيرت مجرى حياتي صدفه بدلت ابطال روايتي عاشقه الشوكلاته روايات - طويلة 11 30-01-2016 11:51 AM
روايتي الثانية : وين أيامك وجودك يعنيني روايات - طويلة 61 27-10-2015 08:35 PM

الساعة الآن +3: 10:21 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1