غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 91
قديم(ـة) 07-02-2019, 09:35 PM
ام محمدوديمه ام محمدوديمه غير متصل
©؛°¨غرامي جديد¨°؛©
 
الافتراضي رد: غالبا مايكون الحب قدر لاخيارا


سيف موقفه 🙄
لكن المفروض يخلي روحه رياضيه 🤗

فيصل عجبني 👌انسان معنده وقت اعجب وخطب مباشره بلا تفكير بلا تعذيب

مشاعل يارومانسيه التفتي شوي لتشوفي المعجب الولهان 😉

وجدان الحمد لله على سلامتك وعودا حميدا صراحه حماسها للدراسه حلو

ماجد ؟؟ هل معجب بوجدان ولا يعتبرها اخته 🤔
اتمنى تتوضح الصوره فالبارتات الجايه


تحياتي وودي لك ايتها المبدعه بانتظار ان تسخن الاحداث وتكون اكثر حماسيه ورومانسيه

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 92
قديم(ـة) 08-02-2019, 02:51 PM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


اقتباس:
المشاركة الأساسية كتبها ام محمدوديمه مشاهدة المشاركة
سيف موقفه 🙄
لكن المفروض يخلي روحه رياضيه 🤗

فيصل عجبني 👌انسان معنده وقت اعجب وخطب مباشره بلا تفكير بلا تعذيب

مشاعل يارومانسيه التفتي شوي لتشوفي المعجب الولهان 😉

وجدان الحمد لله على سلامتك وعودا حميدا صراحه حماسها للدراسه حلو

ماجد ؟؟ هل معجب بوجدان ولا يعتبرها اخته 🤔
اتمنى تتوضح الصوره فالبارتات الجايه


تحياتي وودي لك ايتها المبدعه بانتظار ان تسخن الاحداث وتكون اكثر حماسيه ورومانسيه
سيف كان بيااخذها بروح رياضيه لو ماصار اللي صار 😂
مشاعل خبله شوي بس ان شاءالله تنتبه لفيصل ومشاعره 😍😍
ماجد ووجدان صارو مقربين اكثر بعد ماصار هو الطبيب المشرف على حالتها بس 🤔🤔 اعتقد يحبها كأخت مو اكثر

القصص بدت توضح واكيد ان شاءالله البارتات الجايه كلها حمااس وبتعجبك 😍
شاكره لك تواجدك وردودك الجميله


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 93
قديم(ـة) 09-02-2019, 02:01 PM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


للرفع
................

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 94
قديم(ـة) 10-02-2019, 09:55 PM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


للرفع
,,,,,,,,,,,,,,,,

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 95
قديم(ـة) 11-02-2019, 12:31 AM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


-19-

في نفس اليوم
بس في الجهه الثانيه عند البنات بالملحق

رن جوال الهنوف
الهنوف : هلا والله هلااا
رهف : هلا فييك
الهنوف : وييينك ؟؟ بتجين صح ؟
رهف : والله مدري مااتوقع افنان بنت خالتي بتجي اللحين
الهنوف : طيب عادي خليها تجي معاك
رهف : بقولها بس مااتوقع اببداً انها تقبل تجي
الهنوف : ياسخفك انتي وياها
رهف : ههههههههههههههههه طيب شدخلني اللحين اصير سخيفه بسببها
الهنوف : والله مشتاقه لك تعالي .. الجازي والعنود موجودين
رهف : ياحبيبتي والله بحاول .. تدرين اني نسيت ليش انا متصله عليك !! اكلتييييني
الهنوف : هههههههههههههههههه اي والله صدق انتي اللي متصله .. وش عندك ؟
رهف : والله مدري نسييت .. المهم سلمي لي على البنات واذا ذكرت اتصلت عليك
الهنوف : يوصل .. بس حاولي تجين بلييز
رهف : ان شاءالله يلا سي يو
الهنوف : باي

سكرت الهنوف
وجدان : ماراح تجي ؟
الهنوف : لا تقول بتجي بنت خالتها

في بيت ابو تركي

رهف : يممماه تكفيين قولي ايه
ام تركي : طيب وافنان ؟
وعد : انا موجوده عادي
رهف : اييه اساسا يجلسون يضبطون ويصيغون ايميلات واوراق التبن مديرها وانا مالي خلق اجلس معهم صراحه يكرفوني بالترتيب
وعد تفتح عينها بقوه : ياحقيره متى سويت كذا انا !
رهف : وعد لا تنكرين رجاءاً محد يرتب اوراقك الا انا ولا بعد تهاوشيني اذا غلطت بالاماكن .. وظفتيني بدون راتب
وعد : ههههههههههههههههه عاد والله مااقدر اقول شي .. يمه تكفين خليها تروح لا تذلني اكثر
رهف تناظر امها وترمش : هااه ياام تركي وش قلتي
ام تركي تضحك : خلاص روحي بس ياويلك اذا تأخرتي
رهف تضم امها : شكرا يااحلى ام

رهف على طول راحت تلبس
و اتصلت على السواق عشان يجهز السياره

بالوقت اللي كانت طالعه فيه شافت خالد ومعه العيال برا عند بيت الجد
كانت عيونها تدور على شخص محدد لكنه ماكان موجود معهم
ركبت السياره وراحت لبيت ابو فيصل

لما وصلت كان الباب مفتوح
رهف مااتصلت على البنات عشان تسوي لهم مفاجأه ,,,
لكن المفاجأه لما دخلت الصاله وشافتها مليانة حريم

ام فيصل قامت لها
ام فيصل : هلا والله رهف حياك الله
رهف تسلم عليها وهي وجهها منقلب ومرتاعه ومتفشله : هلا بك خالتي
واضطرت تسلم على كل الحريم بالصاله واللي تقريبا كانو نص الجيران موجودين
ام فيصل : ترى البنات بالملحق اللي برا بروح اقول لريتا توصلك لهم
رهف تبتسم : لا لا خالتي الله يعافيك اعرف المكان انا

طلعت رهف وهي تتحسب على وجدان
اول مافتحت باب الملحق بقوه
رهف تناظر وجدان وبعصبيه : ياشييخه انتي اللي تتعبين وانا اللي اسلم على كل الحريم اللي جايين عشانك
وجدان بصدمه : بسم الله وش فيك انتي داخله بشرك
الهنوف : ههههههههههههههههههههههههه دخلتي الصاله !
رهف تمسك راسها متفشله : اخخخخ بنات داخله بكل ثققه يعني بسوي لكم مفاجأه وانا اللي اتفاجأت
البنات كانو كلهم يضحكون
رهف تلف على وجدان : انتي بالذات مو مسموح لك تضحكين
وجدان زادت ضحكتها : ههههههههههههههههههههههههههههههههه
الهنوف : لا لا الحب معصبه مرره وجدان لا تستفزينها خليها تهدأ شوي هههههههههههههههههه
مشاعل وهي تضحك : امانه مين فيه ؟ يوم اروح انا والهنوف ماكان فيه الا ام نايف
رهف : قولي من مافيه والله من كثرهم خدي نمل مااقدر اسلم عليكم اعذروني
ريوف : مايحتاج خلاص عطيتينا كلام يكفي عن السلام
رهف : ههههههههههههههههههههههه لا وش دعوى امزح بس جالسه استوعب الموضوع معاكم

سلمت على البنات
وجدان : وين وعد ليش ماجت
رهف : افنان بنت خالتي بتجي وهي قعدت عندها

كملو البنات سوالف وضحك

الساعه 10 الليل
رن جوال وجدان

وجدان : هلا فيصل
فيصل : هلا بك .. قولي لريتا تفرش بالملعب وتطلع البروجكتر والشاشه
وجدان : ليش وش عندك
فيصل : اليوم مباراة البرشا والريال والعيال بيجوون يتابعونها هنا بعد مايطلعون من الزواج
وجدان : وانت مارحت الزواج ؟؟
فيصل : لا والله مارحت ماصحيت الا متأخر ومالي خلق صراحه
وجدان : اوكي اللحين بقولها

اول ماسكرت
الهنوف بسرعه : فيصل ماراح معهم ؟؟
وجدان تعقد حواجبها وبااستغراب : لا ليه ؟
الهنوف تضحك وتناظر مشاعل : لا ولا شي
مشاعل ارتبكت شوي بس بينت ان الوضع عادي

وجدان : جمانه تكفين روحي قولي للخدامات يفرشون بالحوش ويطلعون البروجكتر والشاشه مالي خلق اتصل على ريتا واجلس اتناقر معها لا تفهمني ولا افهمها
جمانه : والله كان ودي اقول تخسين بس رحمتك عشانك منكسره
وجدان تفتح عيونها بقوه : احترررمي فارق العمر بيني وبينك حتى لو كنت بكامل صحتي المفروض تسمعين كلامي
جمانه : ههههههههههههههههههه ان شاءالله يامدام

راحت جمانه تقول للخدامات ربع ساعه وكان كل شي جاهز

رهف : يالله بنات استأذن انا
وجدان : لا ياسخفك اجلسي الجازي والبنات بيسهرون عندي
رهف : والله مااقدر امي بالموت وافقت ومحذرتني مااتأخر (تناظر الساعه) بعدين الساعه 10 خلاص

رن جوال رهف في هاللحظه
رهف : هلا والله .. اييه .. لا اللحين جايه ... انت بتمرني ؟؟ .. يالله انا جاهزه اللحين ... اوككي .. باي

رهف بثقه : بناات ياحظكم
الهنوف : في ايش بس
رهف : بجلس عندكم لين تخلص المباراة
وجدان بحماس : اخيييييرااا بس وش تغير
رهف : تركي بيجي مع يتابع المباراة معهم وبعدها بروح معاه
وجدان : كويييس
غدي : والله ياوجدان الحمدلله انك انكسرتي وقعدتي هنا
ريما : تفكرين باللي افكر فيه ههههههههههههههههه
غدي : يممكن ههههههههههههههه
وجدان تناظرهم مستغربه : وش تفكرون فيهم وتحمدون الله على مصيبتي انتي وياها
هيفاء : هههههههههههههههههههههه انا فهمتهم الكلبات
وجدان بفهاوه : وش مافهمت انا
هيفاء : عشانهم بيشوفون العيال من هنا براحه
وجدان : اهااا ههههههههههههههههههههههههه
الهنوف : لا تتحمسون مافيه احد جديد الا تركي الباقي كلهم عيال عمي وعيال عمتي خلاص مليتو من وجيههم
وجدان : ووش دراك انتي
الهنوف : مدري كذا حسيت لو انهم كثير اجتمعوا بااستراحه مو هنا
ريوف : وااو ماشاءالله عليك خبره انتي
الهنوف : كلو تبن اللحين اذا جو بتشوفون

الساعه 10 ونص وصلو العيال

نورة : غريبه عبدالله مو معاهم
هيفاء : وانتي تركتيهم كلهم وركزتي على عدم وجود عبدالله اغلبهم مو موجودين
البنات جلسو يضحكون
الهنوف : ههههههههههههههههههههههه مالكم دخل بزوجة اخوي خلوها تفقده على راحتها
نورة : مشكوره يابنت عمي ايه دافعي عني
الجازي : بنات وينه فيصل ؟ هو اكثر شخص ودي اشوف شكله

الهنوف تناظر مشاعل وتضحك
ومشاعل تهز راسها وتعطيها نظرة اللي نعم وش فيك انتي

نورة : شوفي الله يسلمك فيصل هو هذا اللي لابس تيشيرت ابيض وشورت رمادي .. وهذا الطويل اللي جمبه اللي شعره كثير ولابس ثوب سيف ولد عمتي .. والوسيم الجمييل اللي لابس ثوب ومشخص هذا عمي خالد
العنود اخت الجازي : ابو نظارة سييف ؟
وجدان : ايه
العنود : مستعدة اعطيه عيوني اذا فيه نقص نظر
ريوف :هههههههههههههههههههههههههه لا مافيه بس يلبسها اذا جا يقرا او يشوف لاب توب او تلفزيون يعني تحفظ النظر
العنود : عاد تبين الصراحه احسها محليته اكثر قولي له لا يشيلها ابد
الجازي : صرنا ماعاد نستحي يالعنود ؟
العنود : ههههههههههههههههههههههههههههههه اقترح عليهم يعني
الجازي : ههههههههههههههه طيب وهذا الحلو ميين اللي لابس شورت اسود
مشاعل : هذا مشعل اخوي
الجازي : والله ماشاءالله حلو مره
رهف وهي تناظر جوالها : لو سمحتي محجوز ترى
هيفاء : جتنا نورة الثانيه هههههههههههههههههههههه
رهف : انا عادي على الاقل هو اصغر مني نورة قليلة ادب شوي هههههههههههههههههه
نورة تفتح عيونها بقوه : قدامي ببعددد !!!
مشاعل لفت بسرعه : رررهف وين تركي ؟؟
رهف اللي كانت معطيه الدريشه ظهرها لفت عشان تشوفهم : اممممم مو موجود شكله للحين ماجاا
ورجعت لفت على جوالها
مشاعل : متحمسه اشوف شكله صراحه
الهنوف : لا تتحمسين عادي شكله يعني وش بيصير
رهف تعقد حواجبها : ماشاءالله عليك وانتي متى شفتيه عشان تحكمين انه عادي
الهنوف ارتبكت : كم مره المحه عند باب البيت اذا جيتك
رهف تضحك : تلمحينه اهااا اوكي

شوي ودخلو ماجد وعبدالعزيز وتركي

نورة : طبعا هذا ماجد وكلكم تعرفونه بسبب الأخت وجدان
الجازي : اييه اعرفه هههههههههههههههههه
نورة تناظر رهف : اعتقد هذا تركي

رهف اللي كانت تناظر جوالها مو يمهم ماسمعت نورة

الهنوف تقرب : ايه اييه هذا تركي
مشاعل تضحك : هههههههههههههههههههههه ماشاءالله عليك انتي مااخذه وضعية رهف من اليوم
الهنوف : على تبن غبيه انا اصلآ يوم فكرت اعلمكم
الجازي : ايه تركي حفظت شكله من كثر مايجي بيتنا
الهنوف : يجي بيتكم ؟؟
الجازي : اييه صديق علي
وجدان : يالله الدنيا صغيره
الهنوف : مررره
مشاعل تركز شوي على عبدالعزيز : عزييز كأنه محلق شوي
هيفاء تناظر : اي والله .. حبيبي انا اللي كاشخ للزواج

رهف بسرعه لا شعوريا لفت راسها تشوفهم
الوحيده اللي لاحظت حركة رهف هي الهنوف ورفعت حواجبها بااستغراب

الجازي : اللي لابس تيشيرت ريال مدريد عبدالعزيز اخوك ؟
هيفاء : اييه بالضبط
الجازي : ماشاءالله توقعت مشعل احلى واحد وطلع عبدالعزيز اجممل
ريوف تلف على الهنوف : الهنوف اذا تركي بنظرك عادي من الوسيم اجل
الهنوف : هذا وسيييم ؟!!
رهف تفتح عينها بقوه : خيييير انتي تراه اخوي احترميني طيب
ريوف : خليك منها والله يجنن هو طول ؟ ولا شعر ؟ ولا جسم
رهف : جتك الثانيه بعد خيير ماعندكم حل وسط انتم ؟
ريوف تلف عنها : انتي تتغزلين بمشعل محد قالك شي
رهف : انا كيفي اتغزل في اللي ابي انتم لا ههههههههههههههههه

عند العيال
سيف : تشوف اللحين اذا صكيناكم 10 لا تصيح علينا
عبدالعزيز : ياحبيبي هذا الملكي قال ايش قال برشلونه و 10 بعد هههههههههههههههههه
تركي : ههههههههههههههههه سيف حبيبي ياليت تخفض سقف طموحك واحلامك
فيصل يوجه كلامه لعبدالعزيز : والله يالنسيب انا معك صراحه الملكي محد قده
عبدالعزيز عقد حواجبه : وش اللي يالنسيب !
فيصل يبتسم ابتسامه وسييعه وهو يشوف عبدالعزيز
خالد يضحك : وش فيك انت مو صاحي اليوم من اليوم وانت توزع ابتسامات وكلامك مو مفهوم
فيصل بنفس الابتسامه : ولا شي يالعم ادافع عن النسيب
عبدالعزيز يلف على الشاشه : الحمدلله والشكر .. والله الشرهه على اللي ياخذ كلامك جد
فيصل : تمون يالنسيب


عند البنات بعد اكثر من نص ساعه
رن جوال مشاعل : هلا يمه .. ايه عند البنات .. ليه ؟ ... ابشري من عيوني .. خلاص اوكي الحين جايه

سكرت مشاعل وخذت عبايتها
رهف : ويييين ؟
مشاعل بحزن : امي عندها موعد بكره وتبيني اروح معها
الهنوف : طيب نامي هنا وبكره روحي معها للموعد عادي
مشاعل : لا تقول موعدها بدري مره و اذا مارحت معها بسهر معكم وماراح اصحى وقتها .. مو مشكلة اشوفكم بكره ان شاءالله اذا مارحنا الشرقية
هيفاء : جد؟ احتمال بكره نروح ؟
مشاعل : ايه السبت سلمان عنده شغل بس مدري احنا بنروح او نجلس
هيفاء : اووكي
مشاعل : يلا تشاااو ياحلوات

كملو البنات سهرتهم لين الساعه 1 ونص
الجازي والعنود راحو بيتهم

ورهف اتصل عليها تركي
رهف : يالله بنات تصبحون مدري تمسون على خير
ريوف : وانتي من اهله سوا صباح ولا مساء هههههههههههه
الهنوف : لحظظه رهوف بوصلك انا
رهف تعقد حواجبها : وش عندك ادل انا
الهنوف بضحكه : لا لازم اوصلك للباب عيب يكفي الاستقبال
رهف : حقيره لا تذكريني هههههههههههههههه

لما وصلو عند الباب
سلمت رهف على الهنوف : يالله باي ياحلوه
الهنوف : رهف دقييقه
رهف ترجع : هلآ ؟؟
الهنوف : بسألك انتي حذفتي عبدالعزيز من السناب ؟
رهف اللي كانت متنرفزه من هالطاري : ازعجتوني انتو ترى اكيييد حذفته وش ابي فيه يعني
الهنوف : لييه من قالك غيري ؟
رهف : وجدان
الهنوف : لا انا بس بذكرك ماابيك تتوهقين معاه ليش هالعصبيه
رهف : لا مو عصبيه بس كذا مليت من كثر ماتسألوني عن هالموضوع
الهنوف تفتح عيونها بقوه : انا اول مره اتكلم معك عنه ياكذابه
رهف بكذب : ايي انا اقصد وجدان كل شوي فاتحه هالموضوع

تركي كان توه مودع الشباب وطالع من المجلس
شاف اخته ومعها وحده لما جا يصد ركز انها هي اللي شافها

الهنوف تضحك : اوكي خلاص روحي لا تتأخرين ويجي تركي يخنقني انا وياك

تركي وهو يقرب منهم وبجراءه : تركي ماراح يخنق احد
الهنوف ارتاعت وهي تسمع الصوت وتذكرت انها مالبست شيلتها زين
وراحت تركض داخل

رهف تناظر تركي وهي مرتاعه من جرائته : مجنون انت روعت البنت
تركي : لازم ادافع عن نفسي عند صديقاتك
رهف : عاد الهنوف والله تحقد عليك الى يوم الدين
تركي ابتسم بقووه وبنفسه : اخخخخخخخخخيرا عرفتها
رهف : وش فيك فاق الخشه تقل مهبول
تركي حس على نفسه : لالا مافيه شي بس تذكرت وجهها
رهف : لا تضحك على صديقتي
تركي : شكل ودك نفرش بحوشهم ونكمل
رهف استوعبت انهم مابعد طلعو وماتت ضحك


طلعو رهف وتركي

عند البنات
اتصل خالد على وجدان
خالد : هلا والله
وجدان : هلا عمي
خالد : اخبارك
وجدان : تمام انت شخبارك
خالد : الحمدلله .. عندكم احد غريب ولا اجي ؟
وجدان : لا مافيه احد حيااك الله تعال
خالد : اوكي ثواني بس واجيكم

بعد 5 دقايق
خالد دخل عليهم : صباح الخير ياحلوات
البنات بأصوات متفرقه : صباح النوور
خالد يجلس جنب وجدان : اخبارك وجدان وكيف رجلك اليوم ؟
وجدان : والله الحمدلله احسن من الاسبوع اللي فات
خالد : تقدرين تمشين يعني ؟
وجدان : ايه بس على شوي شوي
خالد : طيب عندي لكم بشاره
الهنوف بحماس : وشش هي ؟
خالد : بنروح دبي خلال هالاسبوعين يعني متى ماصارت وجدان تقدر تمشي بدون مساعده

البنات قامو يصارخون وريوف اللي كانت جنبه نطت عليه وخمته

خالد وهو يضحك : ياعمري لهالدرجه مخنوقين ؟
الهنوف : اخخخ اسكت بس وش اقول وش اخلي هالشهر كله اختبارات انهررررت من التعب
خالد : عاد السفره بمناسبه سلامة وجدان
وجدان : ياعمررري ياعمي ماتقصر والله
خالد : اذا ودكم هالاسبوع او الاسبوع الجاي اختارو وعلموني قبلها بكم يوم عشان اضبط الحجوزات
وجدان : لا خلها الاسبوع مو هذا اللي بعده عشان اداوم واختبر كل اختباراتي بعدين نروح
خالد : اوكي الباقي كلكم يناسبكم
البنات : اييييه اكييد
ريوف : الكبار بيروحون ؟
خالد : لا بس انتم والعيال ومو كلهم بيروحون بعد
الهنوف : طيب عمي عادي اطلبك طلب ؟
خالد : تامرين امر انتي ماتطلبين
الهنوف : ياحبيبي والله .. عاادي تقول لتركي ال... يجي معنا ابي رهفف تكفى
وجدان بحماس : اييي والله وانتم تعرفونه مره يعني اكيد ماراح يرفض او يستحي
خالد : اخاف عنده التزامات او شي
وجدان : انت اسأله وشوف يعني لو صار عنده شي خلاص مو لازم
خالد : ابشرو من عيوني
وجدان : الله يخليييك لنااااا ياحظ زوجتك اللي مابعد لقيتها
خالد : ههههههههههههههههههه ياربي انتم وهالزواج انتقلت العدوى من الوالده لكم
هيفاء : عاد ترى جدتي معها حق تكفى عمي نبي نفرح فيك واشوف الميني خالد بسرعه
خالد : الله يكتب الخير .. المهم انا طالع اللحين اكمل السهره مع الشباب

طلع خالد وكانو البنات مبسوطين وصارت سهرتهم كلها تخطيط للسفره ووين بيروحون ووش بيسوون

لما نامو البنات كلهم
الهنوف جت على سرير وجدان بتنام جنبها
وجدان بصوت واطي : البنات كلهم نامو ؟
الهنوف : ايييه واضح دايخيين
وجدان : ياعمررري
الهنوف : فااتك اليوم صار شي
وجدان : خليك من اللي فاتني انتي وش فيك تناظرين مشاعل اذا جا طاري فيصل لاتفضحينا معها للحين ماكلمناهم ولا صار شي رسمي
الهنوف : هههههههههههههههههه اييوه هذا اللي بقوولك عنه طيب
وجدان بحماس : وشوو ؟
الهنوف : اليوم دخلت المطبخ عليها وهي قاعده ترتب الحلا تخيلي من لقيت
وجدان : مييين ؟
الهنوف : فيصل واقف عند الباب
وجدان : من ججججدك ! يتكلمون مع بعض يعني ولا ايشش؟
الهنوف : لااا هي تغني وهو يناظرها واضح ماتكلم ابد لانه يوم شافني ارتاع ورجع
وجدان : اخخخ منه فيصل الله يعيننا بيزعجنا يالله اخطبوها لي
الهنوف : لهالدرجه يعني ؟
وجدان : ميييت علييها كل يوم يقول يقول لأمي تكلم امها
الهنوف : طيب ليه امك ماكلمت امها ؟
وجدان : تقول بكلمها بس ماتدري متى بالضبط انا خربت عليهم ماصار فيه وقت مناسب ههههههههههههههه
الهنوف : اففف يارب بسرعه ابي زواج وخبصه بالعايله
وجدان : اييه اتوقع هالفتره بس اول شي خطبه وملكه وبعدها الزواج متى ماتشافيت تماما
الهنوف : ياحليله فيصل والله ماتوقعتها منه

سولفو شوي لين نامو

في بيت الجده
مشاعل تفكر بكلام امها لها بالسياره

قبل ساعتين
بالسياره اول ماطلعت مشاعل من بيت ابوفيصل وركبت السياره

مشاعل : عزييز يترك المباراه لعيوننا ؟ وش صاير بالدنيا
عبدالعزيز : الشوط الاول ممل والله وماودي اتهاوش مع العيال لين يبدا الشوط الثاني
مشاعل : كل هالصراخ وممله ؟
عبدالعزيز : وش دراك انتي عن الصراخ ؟ تسمعونا ؟
مشاعل تضحك : نسمع ونشوف
عبدالعزيز : مع وين بس تشوفونا تطلطلون من فوق ؟
مشاعل : لا ياغبي الملحق اللي فيه وجدان فيه نقدر نشوفكم منه

قاطعتهم ام سلمان
ام سلمان : مشاعل
مشاعل : سمي
ام سلمان : سم الله عدوك .. اليوم خطبتك مني ام فيصل

مشاعل انكتمت وبنفسها : هذاا مووضووع تفتحينه قدام عبدالعزيز وبهالسرعه بدون اي مقدمات
عبدالعزيز مبتسم : اهااا وانا اقوول وراه مشغلني اليوم يالنسيب ويالنسيب طلع الموضوع كذا
مشاعل : وش فيه ذا واثق اني بوافق عليه ؟
ام سلمان : وش فيه فيصل ؟ يهبل واخلاق ووظيفته زينه
عبدالعزيز بجديه : انتي ماتبينه يعني ؟
مشاعل بسرعه : لاااااا انا ماقلت كذا ( ثم حست انها جابت العيد وسكتت )
عبدالعزيز مات ضحك
ام سلمان : ياربيه من البنات ودلعهم ترى امه تقول الولد طاير يقول بتزوجها الاسبوع الجاي وهاوشته هي
مشاعل وجهها تقلب الواان
ام سلمان : تبينه ولا لا ؟
عبدالعزيز يلتفت على امه ومبتسم من كل قلبه : واضح الرد مايحتاج تسألينها
مشاعل وهي ماسكه جوالها وضاغطه عليه بقوه : اللي تشوفونه
ام سلمان : والله كبرتي يامشاعل وبتتزوجين ( وخنقتها العبره )
عبدالعزيز : وش دعوى يمه ماراح تروح لواحد غريب
ام سلمان : ولو بتبعد عني


جت الساعه 4 ومشاعل مازالت تفكر بالموضوع
دخلت عليها امها

ام سلمان : للان مانمتي ؟
مشاعل : لاا
ام سلمان : لييه ؟ ولاتفكرين بموضوع فيصل
مشاعل : ايه احس اني محتاره
ام سلمان : انتي واضح ان ماعندك مشكله فيه وش اللي محيرك ؟
مشاعل : مابي ابعد عنكم واسكن بالرياض
ام سلمان ابتسمت : بس هذا الموضوع ؟ كل ويكند بتكونين عندنا او حنا بنجي ,, بعدين مو انتي اللي مزعجتنا كل اسبوع تبين تجين هنا
مشاعل : ايي بس ولو السكن غير
ام سلمان : ماراح ارد عليهم لين تستخيرين بعدين تعلميني قرارك الاخير
مشاعل : ابوي يدري بالموضوع ؟
ام سلمان : لاا وماراح اعلمه الا لين توافقين واساسا لو توافقين ترى الملكه الاسبوع الجاي
مشاعل : بهالسرررعه ؟
ام سلمان : ايه
مشاعل : اوكي بستخير وارد عليك بكره
ام سلمان : الله يوفقك يارب ويكتب لك الخير
مشاعل : اميين يارب




انتهى البارت
اتمنى تعطوني رايكم وتوقعاتكم لأبطالنا





الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 96
قديم(ـة) 12-02-2019, 02:29 PM
عروسة البحر1 عروسة البحر1 غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


جميل جداً البارت استمري

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 97
قديم(ـة) 12-02-2019, 07:02 PM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


اقتباس:
المشاركة الأساسية كتبها عروسة البحر1 مشاهدة المشاركة
جميل جداً البارت استمري
شكراً حبيبتي على ردك 😍

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 98
قديم(ـة) 13-02-2019, 02:10 PM
©؛°¨غرامي مشارك¨°؛©
 
21302798094 رد: غالبا مايكون الحب قدر لاخيارا


روؤؤعــهه

يعطـييگ
آلعآآآفيييهہ‏‏. ...

مـآيسـتحي فيصـل يومـ

يقول آللي بيخطـبهآآ لآمـه هههههههه..

آبدعتي يآآ قلبببببي


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 99
قديم(ـة) 13-02-2019, 11:57 PM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


اقتباس:
المشاركة الأساسية كتبها ط¬ظ€ظپظ€ظ† ط§ظ„ط¹ظ€ظ€ظٹظ€ظˆظˆظ†ظژ~ مشاهدة المشاركة
روؤؤعــهه

يعطـييگ
آلعآآآفيييهہ‏‏. ...

مـآيسـتحي فيصـل يومـ

يقول آللي بيخطـبهآآ لآمـه هههههههه..

آبدعتي يآآ قلبببببي
الله يعافيك ياقلبي ❤❤❤

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 100
قديم(ـة) 14-02-2019, 03:21 PM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


-20-

يوم السبت الساعه 6
وجدان صحت على صوت رش خفيف على الشباك وشافت البنات كلهم نايمين ومكان هيفاء فاضي
مسكت جوالها وكلمت هيفاء واتس اب

وجدان تكتب : وينك ؟
هيفاء : بالمطبخ اسوي حليب تبيني اسوي لك معي ؟
وجدان : يلا وخلينا نطلع برا شكل الجو يجنن
هيفاء : تبيني اجي اقومك ولاتقدرين ؟
وجدان : لاشدعوى اقدر بجيك

بصعوبه شوي قامت وجدان من السرير وخذت العكاز وطلعت برا
اول ماطلعت من الباب كان فيه رش مطر خفيف مره والجو جدا جميل
استنشقت الهوا وهي رافعه راسها للسماء ومبتسمه

قاطعها صوت هيفاء : صباح الخير ياجمييل
وجدان : صباح النوور
هيفاء : شرايك نجلس هنا ؟
وجدان : لا لا شرايك نروح للمسبح احسن ؟
هيفاء : اوكي يلاااا

راحو البنات المسبح اللي كان بزاويه البيت

بنفس البيت
في ملحق الشباب
العيال كلهم يستعدون للنوم باستثناء عبدالعزيز اللي يقنعهم يطلعون يفطرون

فيصل اللي كان جنبه : والله انك رايق يالنسيب
عبدالعزيز ابتسم ولف عليه وبصوت واطي شوي : مابعد وافقنا عليك اصبر
فيصل بأبتسامته العذبه : تقدرون ترفضوني ؟
عبدالعزيز : لو انك بتتزوجني مانيب رافضك بس مدري عن اختي عاد
فيصل بقرف : الله يقرفك ياشيييخ سديت نفسي
عبدالعزيز : انتبببه تراني اخوها !!!
فيصل : امزح امزح يالنسيب
عبدالعزيز يبتسم بقوه : اييه خلك كذا مؤددب
خالد يلتفت عليهم : وش فيكم تتساسرون انتم ؟
عبدالعزيز : بتعرفون بعدين

رن جوال خالد بهاللحظه
خالد : هلا ... لامجتمعين ببيت اخوي ابوفيصل ... بتجي الحين ؟ .. عند الباب ؟ اوكي .. الا حنا صاحين

بعد دقيقه دخل عليهم ماجد
وسلم على الجميع
ماجد وهو يشوفهم خاملين : فيه احد ينام بهالجو ؟
فيصل : مواصلين من امس يااخي
ماجد : لاعب بنفسيتكم ميسي للحين ؟
عبدالعزيز : تخسي انت وياه
سيف : من امس خانقتهم العبره بس ساكتين
خالد : كل تبن بس
عبدالعزيز : وتبن مني
فيصل : والثالث مني بعد
ماجد : 3 على النتيجه ياساااتر استر هههههههههههههههههههههههه
سيف : انت رحت بعد الهدف الثاني صح ؟ ماشفت وجيههم يوم جا الثالث والله فاتك
ماجد : ههههههههههههههههههههههههه تدري سمعت الثالث بالراديو وانا تووني ماشي والله انقهرت ليتني جلست خمس دقايق بس


جلسو العيال يسولفون شوي

رن جوال ماجد
ماجد: اسكتو اسكتو السوبر فايزر متصل علي !
سيف : اما عاد
ماجد : والله

ماجد طلع برا
وقعد يتمشى وهو يكلم


عند البنات
جلست وجدان على الكرسي وهيفاء شغلت اغنية لأليسا وقعدت ترقص وهي تشرب الحليب

هيفاء وهي مبتسمه : يالله وجدان الجوو يروووق مره مره
وجدان : طيب شغلي حكايتي معاك
هيفاء : اصبري لما تخلص ذي
وجدان وهي تشرب : حتى الحليب طعمه حلو
هيفاء : اكيد ياعمري عشاني مصلحته
وجدان : والله عشان الجو يخلي كل شي لذيذ

هيفاء ناظرت المسبح ولفت نظرها لوجدان وبحماس وروقان : كم تعطيني واطب ؟؟؟
وجدان تفتح عيونها بقوه : مجججنونه انتي ! الجو بااررد
هيفاء : كم تعطييني بسرعه ؟
وجدان بتفكير : اممم تطبين كذا 200 ريال مع الغوص توصل 500

هيفاء حطت الكوب على الطاوله وطبت بدون ماتفكر

وجدان ارتاعت : بعطيك 1000 بس اطلعي تكفييين مجنونه بتمرضين
هيفاء غاصت وجلست دقيقتين

وجدان حاولت تقوم ويالله يالله شالتها رجلها وهي تصارخ بأسم هيفاء

كان ماجد جالس على الكرسي و قريب من المسبح
سمع الصراخ وحط جواله على الطاوله اللي قدامه وبسرعه قام وراح لمصدر الصوت
لما جا عندهم

وجدان وهي تصيح : نطت ولها 3 دقاايق ماطلعت اكييد مااتت اكيييد

بدون تفكير نط ماجد وشاف جسم تحت المويه
بحركه سريعه طلعها من المسبح وكانت تكح بصوت عالي ومغمضه عيونها وترفس
ماجد حطها جنب المسبح وقعد يضغط صدرها بقوه عشان لو فيه مويه تطلع منها

لما طولت مافتحت عينها قرب هو بيسوي لها تنفس صناعي
فتحت عينها هيفاء وشافت وجهه قريب من وجهها وبدون تفكير صفقته كف

ماجد ابعد وجهه عنها شوي وهو مرتاع
قام وهو يرفع شعره عن وجهه : الحمدلله على السلامة
هيفاء قامت من مكانها بدون ماترد واول ماوقفت وجت بتمشي زلقت
قبل ماتطيح مسكها ماجد بسرعه

وجدان وهي تمسح دموعها : خوفتيني علييك

هيفاء تركت يد ماجد وجت بتمشي عنه واستوعبت الوضع
تذكرت ان لبسها صاير شفاف مع المويه اللي عليه وحجابها مو عليها

هيفاء تلف عليه : لا تشوووف
ماجد ضحك وهو يصد عنها : اسف اسف ,, والحمدلله على السلامة مرة ثانية واذا ماتعرفين تسبحين لاتتفلسفين

هيفاء توها بترد عليه وماعطاها مجال طلع بسرعه
هيفاء : وعععع وعععع وش يبي هذاا !!
وجدان وهي تضحك ضحكه مخلوطه بدموع : اما الكف !!! هذا جزاه يعني
هيفاء خنقتها العبره : وجدااااان شكلي مو حلو
وجدان : تعاالي اتركي شكلك على جنب ياكلبه ليه تغوصين وانتي ماتعرفين
هيفاء : اعرف والله اعررف وكنت بسوي فيك مقلب بس يوم سمعت صوت صراخك من الروعه شربت نص مويه المسبح وصار اللي صار
وجدان : جد موو وقتك والله والله اررررتعت
هيفاء : توني اعرف انك تخافين علي
وجدان طقتها بالعكاز : اجل ما أخاف علييك ؟
هيفاء وهي تتذكر وترجع تتعبر : مااجد شافني كذاا ياوييلي
وجدان : والله قمر والله العظيم قمر

هيفاء ترفع شعرها وتحاول تعصره عشان تطلع باقي الموية
وجدان وهي تضحك : شوفي الحمام هناك فيه مجفف وفوط جففي ملابسك وشعرك وتعالي ندخل عشان مايجيك برد

راحت هيفاء ودخلت الحمام
وجدان جلست على الكرسي تشوف جوالها لين تخلص هيفاء

بعد 4 دقايق جتها رسالة واتس اب من ماجد

ماجد : اذا حسيتي انها تعبانه للان علميني عشان نوديها للمستشفى
ابتسمت وجدان وكتبت : لامافيها الا العافيه الحمدلله

ماجد شاف ردها من الاشعارات وسكر جواله ورجع يسولف مع العيال


العصر
كان المطر مازال موجوود ويرش رش خفيف
صحى عبدالعزيز على صوت جواله يرن

رفع الجوال وشاف مكالمتين من جدته
قام وطلع برا واتصل عليها : هلا والله .. الحمدلله وانتي طمنيني عليك يقولون امس راسك يوجعك ؟ .. الحمدلله يارب .. ايه توني صاحي .. امريني ؟ .. ابشري والله من عيوني الحين بجيب لك عامل يصلحها .. ولاتصدقين مايحتاج عامل اتوقع مشكلتها نفس اخر مره بجي انا اضبطها .. بس بخلص شغله يعني يبي لي ساعتين تقريبا ثم اجي .. ايوووه خلاص ابشري

سكر من جدته وطلع من البيت يخلص اشغاله

بعد ربع ساعه كان مخلص وجاي لبيت جدته
دخل البيت وعلى طول دخل قسم الرجال وعلى غرفه جدته عشان يزين الثلاجه الموجوده بغرفتها

في الصاله كانت ام تركي ورهف جالسين
زايرين ام محمد لانها تعبانه امس

ام تركي : اخبارك اليوم ياخالتي ان شاءالله احسن
ام محمد : ايه والله احسن يارب لك الحمد
رهف وهي تصب القهوه وتمدها لأم محمد : سمي يمه
ام محمد بأبتسامه : يامال العافيه يارهف
رهف : الله يعافييك يارب

وصبت القهوه لأمها وجلست

ام محمد : اجل وين وعد ليش ماجت
ام تركي : والله مشغوله من يوم توظفت وهي ماترفع راسها عن الكمبيوتر من شغله لشغله
ام محمد : الله يوفقها ان شاءالله
ام تركي : اللهم امين جزاك الله خير

جلسو يسولفون
بعد خمس دقايق

ام محمد تتصل على الشغاله وماترد : الله يصلحها ماترد على جوالها
ام تركي : سمي ياخاله تبين شي ؟ خلي رهف تروح تجيبه
ام محمد : لا يمي انا بقوم اجيب لي
رهف قامت بسرعه : لاوالله ماتقومين انا بجيب لك امري
ام محمد : والله بتعبك معي
رهف : مافيه تعب وش دعوة سمي وش تبين ؟
ام محمد : شوفي وانا امك ادخلي داخل قدام بعدين يمينك بتجي غرفتي ادخليها وتلقين بدولابي كيس فيه علاجي وداخله حبوب وجع الراس وبتلقين كرتون مويه جنب الدولاب جيبي منه كاس مويه
رهف : ابشرري من عيوني ,, بس حبوب الراس بنادول ؟
ام محمد : لايمي حبوب صارفها لي الدكتور لان البندول ماينفع لي تلقين علبتها زرقا
رهف : ابشري ,, بس مافيه احد هنا صح
ام محمد : لا وانا امك كلهم في بيت ابو فيصل

دخلت رهف وهي تسمع دعوات ام محمد لها
كانت غرفه ام محمد بأخر الممر

طقت الباب بعدين استوعبت غبائها
دخلت وهي تضحك وتتكلم بصوت عالي : الحمدلله والشكر يارهف احد يطق باب غرفه فاضيه يععع يالغباء

خذت رهف علبه المويه من الكرتون وحطتها فوق الدرج وقعدت تدور العلاج بالكيس ومازالت تتكلم بصوت عالي : علاااج ازرق علاااج ازرق ويينه !! ... فيه اثنين زرقاء ... ولو اوديها كلها بتقول جدتهم وش ذا الغبيه اللي حتى العلاجات ماتعرفها

اللي ماتعرفه رهف ان عبدالعزيز معها بنفس الغرفه
كانت الغرفة مقسومه قسمين بينها فتحه بدون باب وموجود بالقسم الداخلي الثلاجه والحمام ودولاب الملابس
يعني كان فاصل بينها وبين عبدالعزيز جدار

كان عبدالعزيز يسمع كلامها كله وكاتم ضحكته
لما سمع صوت جدته تنادي رهف حس انها صدق توهقت وقام من مكانه وهو ينفض الغبار من ثوبه وطلع عليها

عبدالعزيز : مو ازرق ترى علبته سماويه بس جدتي الله يهديها الالوان مضروبه عندها ( ويناظر لبسها بتفحص ) للمعلومية تراه نفس لون فستانك بالضبط

رهف تجمدت مكانها وطاح منها الكيس اللي فيه الادوية
جا عبدالعزيز وشاله ولما وقف كان قريب منها مره
كان اعلى راسها واصل صدره
وهو ماسك كيس الادويه طلع العلاج وبحركه سريعه مسك يدها وحط العلاج وسطها

رهف تشوف يده الكبيره محتضنه يدها الصغيره وترتجف
عبدالعزيز ضغط على يدها
عبدالعزيز ابتسم وبانت غمازته وهو يشوف رجفة يدينها : ليه ترتجفين ما اكل انا
رهف مازالت متجمده بمكانها ولاقدرت تتحرك

عبدالعزيز قرب اكثر عشان ياخذ علبه المويه : وهذي علبه المويه خذيها مع العلاج ( وضحك ) عشان ماتقول جدتي ان رهف غبيه

يوم حس انه زودها تركها وطلع من الغرفه
رهف ماستوعبت اللي حصل للان
فجأه حست الجو صار حاااار بقووه وحست انها تعرق ووجها احمررر
رن جوالها
ردت وهي ترتجف : هلا ماما الحين جايه بس قعدت ادوره .. لا لا مافيني شي بس حرر شوي

طلعت لهم

رهف : اسفه والله قعدت ادوره ماعرفت وشو بسرعه
ام محمد : لا عادي وانا امك دايم اقول لعيالي يجيبونه ومايعرفونه يقولون موب ازرق وانا عجزت اقول اسم اللون

رهف تذكرت عبدالعزيز وهو يقول سماوي وحست الحر زاااد وقامت تهف على نفسها بيدينها
ام محمد : وش فيك يمي وورى وجهك احمر
رهف : حر والله
ام محمد : هااااو وش حر الا والله برد ينخر العظم
رهف : يمكن لان الغرفه مو مفتوح شباكها مدري انا احس الجو صاير حر مره

ام تركي كانت تخز رهف اللي ماتدري عن نفسها وحتى رهف ماكانت مستوعبه وش قاعده تسوي
ام محمد : تعالي اجلسي جنبي مقابله الدريشه وبتتجمدين
رهف ابتسمت بمجامله
.....
مازالت تتذكر قرب عبدالعزيز منها وريحه عطره اللي دخلت جوفها
وكل ماذكرت مسكه يده ليدها تجيها رجفه
رهف بنفسها : لييه يسوي كذا !! وش يستفييد ؟؟ معقوله لو وحده من بنات عمه او عمته بيسوي نفس الشي ؟ ولايقصدني انا ؟؟ لا لا رهف لاتصيرين محور الكون يعني وش يبي فيك
( وقطع تفكيرها صوت امها وهي تسلم على ام محمد )

ام تركي : رهف يالله بنمشي الحين
رهف : هاه لييش ؟
ام تركي وهي تخزها وتغمز : عيالها بيجونها اللحين
رهف قامت بسرعه عشان تلبس عبايتها
ام محمد : شكل رهف اعجبتها جلستنا
ام تركي وهي متفشله : ههههههههههه والله من حبها لكم
ام محمد : يابعد الدنياا والله ان غلاتك يارهف نفس غلا عيال عيالي وبنتي

رهف قربت منها وحبت راسها
سلمو عليها وطلعو برا

بالحوش
ام تركي بعصبيه : وش فيك انتي من يوم رجعتي وانتي مو على بعضك اناديك لي ساعه ولاتسمعيني وفشلتيني وانتي قاعده تتشكين من الحر و لا بعد ناويه تطولين الجلسه
رهف ارتبكت وبكذب : جتني مكالمه من صاحبتي تقول بكره فيه برزنتيشن وارتعت مدري وش بسوي
ام تركي : لا جد انتي مو طبيعيه ! بكره السبت كيف بتخليكم تداومون بالويكند يعني
رهف زادت ربكتها وبكلام ملخبط : لا لا مو دوام وهو مو برزنتيشن هو مشرووع والتسليم عن طريق الاون لاين ,, بعدين ماما خلاص خلينا نروح البيت لا يسمعونا
ام تركي اللي ماصدقتها بس مشت الموضوع


عند عبدالعزيز اللي طلع من البيت وقعد يتمشى
كان مشغل الراديو
وجالس يتذكر شكل رهف .. كانت لابسه فستان سماوي وصندل قصير ابيض
لبسها كان جدا بسيط بس ذوق

ابتسم وهو يقول بنفسه : انا كل يوم اكتشف في ذا البنت صفة ... اخخ بس يارهف لو ادري انتي ليه مضيفتني واعرف السر اللي وراك برتاااح

وطول على الراديو وكان فيه صوت محمد عبده يغني مذهله
عبدالعزيز يغني معاه : لييه كل شي فيها تظن انك تعرفه تجهله وليه كل لامعقول فيها ورغم هذا تعقله ,, طيييبها قسوة جفاها ضحكها هيبه بكاها روحها حده ذكاها تملأك بالاسئلة


اما عند رهف الوضع ماكان مختلف كثير
وصلت البيت وبسرعه على غرفتها واتصلت على افنان

رهف : افنان ورب الكون انه يستهبل معااي
افنان : وشووو مين بسم الله عليك
رهف : ولد عمهم
افنان : عبدالعزييز !
رهف : ايييه ياافنان اييه ماغيره
افنان : وشوو ؟ وش سوا ؟ لايكون كشفك انك انتي اللي بسناب !!!!
رهف : لااااا بس تخيلي قبل شوي صار لي معاه موقف يروووع
افنان بحماس : وشووو وش صار بسرررعه ؟

رهف علمتها السالفه كامله
افنان : يمممه رهف انتي كيف للان تكلميني ؟ لو مكانك طحت بمكاني
رهف : تستهبليين اساسا خلاص ماعاد استوعب ولا شي .. افناان لو شفتي كيف يدي وسط يده كني نمله ولا طوولي اول مره احس اني قصيره لهالدرجه يوم وقف جنبي
افنان : هههههههههههههههههه انا اكثر شي ضحكني انك تسولفين على نفسك طول الوقت
رهف : اكرره هالصفه فيني من يوم اني صغيره مع ذلك مازلت اسويها
افنان : ايييه امس طلال جالس يتذكرها و يذب عليك
رهف : ههههههههههههه اشتققت له والله .. بعدين كيف له وجه يذب وهو من زمان مازارنا القاطع !
افنان : اللحين احنا اهله الحقيقيين مانشوفه تبين تشوفينه انتي
رهف : لييه وش صاير ؟ وينه ؟
افنان : مسكين متوهق بالجامعه مررره وضاايع
رهف : ياعمرري لييه ؟ وش المواد اللي مافلح فيها ؟

قعدو يسولفون عن طلال اخو افنان واللي يصير اخو رهف بالرضاعة
ونسو سالفة عبدالعزيز ..... او بشكل اصح تناستها رهف

يوم الثلاثاء
ماحصل احداث كثيره بالاسبوع
بس ابو سلمان بلغ اخوه ابوفيصل بموافقه مشاعل
وحددو يوم الملكه الخميس

وجدان تكلم ريوف

وجدان : ماقررتو متى تنقلون ؟
ريوف : اتوقع كذا شهر بالكثير بنكون ناقلين
وجدان : بيتكم احسه شؤم بالنسبه لي عقب الحادث
ريوف : ههههههههههههههههههههه ياعمري يالله تعيشين وتاكلين غيرها
وجدان : وجع ان شاءالله الله لايقوووله ( وكملت ) عاد تصدقين متى حسيت اني صدق مسكينه ؟
ريوف : ايووه
وجدان : بعد بكره ملكة فيصل ومشاعل وماقدر البس كعب
ريوف : هي بالشرقيه صح ؟
وجدان : اييه
ريوف : تتوقعين يجون خوالها وكذا ؟
وجدان : لاااا صغيره مررره قال ابوي خل نعزم اخواني ويجون خوالها وكذا ورفضت امي تقول ماله داعي الكلافه ولما كلمت ام سلمان كانت بعد ماتبي تتكلف يقولون الحفله الكبيره تكون بالزواج
ريوف : تصدقين احسن كذا
وجدان : اي والله
ريوف وهي تضحك : تلقين فيصل مايشوووف احد الحين من كثر ماهو مبسوط
وجدان : هههههههههههههه لو تشوفينه كل شوي يجيني يقول وجدان انا بتزوج مشااعل ويضحك ويطلع
ريوف : امااانه هههههههههههههههههههههههههه
وجدان : والله هههههههههههههههه
ريوف : مجننون قسم بالله ياحظها مشاعل

كملو مكالمتهم


يوم الاربعاء
بالجامعه
ريوف ووجدان ورهف جالسين يفطرون

ريوف : هنوووفه ماخلصت محاضرتها
رهف : لاا باقي لها نصف ساعه ( والتفتت لوجدان ) متى بتروحون الشرقيه ؟
وجدان : بكره العصر رحلتنا
رهف : وش بتلبسين ؟
وجدان : تذكرين فستاني الرمادي اللي لبستيه لخطوبة بنت عمتك مدري بنت عمك
رهف : ايييوه
وجدان : هو اللي بلبسه
رهف : حلووو والله
وجدان : افف للان ضايق صدري لاني ماراح البس كعب
رهف : انتي شيلي الراس اللي برجلك بعدين نتفاهم على الكعب

ريوف اللي كانت تشرب عصير شرقت من الضحك
وجدان تسب رهف وهي تطق ظهر ريوف
ريوف بعد ماقعدت تكح دقيقتين سكتت ورجعت ماتت ضحك : ههههههههههههههههههههههههههه راس .. والله من جد رهف الجبس من كبره صاير كنه راس
وجدان : خير انتي وياها مايضحك .. كلها كم يوم واشيله ان شاءالله

جت الجازي من بعيد

الجازي : هااي وش فييكم ميتين ضحك
وجدان : حيوانات يضحكون على رجلي
الجازي : لييه وش يضحك فيها
ريوف : رهف قالت كنها راس وزعلت وجدان
الجازي وهي كاتمه ضحكتها : والله انكم ماتستاهلونها اجل احد عنده وجدان ويضحك عليها ؟
وجدان تناظر رهف وريوف : تعلمووو تعلموووو


يوم الخميس في الشرقيه
كانت الملكه صغيره مره مافيها الا العايلتين والجده والجد بس

كانو الكل جالسين باالصاله باستثناء مشاعل اللي كانت تلبس

وهم جالسين يسولفون نزلت مشاعل

وجدان قامت وقفت وهي تغني : الشرقيه اليوم غير نجمه الليله مشاعل
مشاعل ابتسمت وهي مستحيييه
وجدان : ياعمررري يالحياااء

سلمت مشاعل عليهم كلهم وجت جلست بين وجدان ونوره

نوره : ياحلووو المستحييين ياربيه
وجدان : هههههههههههههههه انا ودي اصورها للبنات لان اتوقع اول واخر مره نشوفها مستحيه
ام فيصل : لاتضغطون على بنيتي
نوره : اييييه بدينا ندافع يايمه
ام سلمان : بنتها من قبل ماتاخذ فيصل
نوره : ايييه الله يرزقنا بس
وجدان فتحت عيونها بقوه : وش الله يرزقك استحي شوي
نوره : اقصد باللي يدافع عننا
ام سلمان : هههههههههههههههههه ياحلوك يانوره والله اني احبك
نوره : ياحبيبتي ياخالتي ام سلمان والله شعور متبادل

جلسو يسولفون شوي

اتصل ابوسلمان على ام سلمان وقال لها تقول لمشاعل تجي عشان توقع

سكرت وقالت لها مشاعل قعدت ترتجف
وجدان مسكت يدها وضغطت عليها وهي مبتسمه
مشاعل : قومو معي تكفين
وجدان : لا خير اخاف اخوانك موجودين
مشاعل : طيب هيوووف تكفين تعالي
هيفاء وهي تضحك وتقلد وجدان : لا خير اخاف فيصل موجود
ام سلمان : لا مو موجود فيصل سلامات روحي مع اختك بس

قامو ام سلمان وهيفاء مع مشاعل
بالمقلط الفاصل بين الصاله وقسم الرجال
كانو فيصل وعبدالعزيز جالسين
والباقي مع المملك داخل

دخلت مشاعل
كانت تتوقع ابوها اول واحد بيصير بوجهها
وانصدمت لما شافت سلمان وعبدالعزيز ومشعل بدون ابوها

عبدالعزيز : هلا والله هلا بعروستنا الحلوه
سلمان : الله يعين فيصل بس
عبدالعزيز : الا والله ياحظظه بااحلى البنات

مشاعل كانت ماتقدر ترفع راسها من الحياء
هيفاء : ههههههههههههههههه خلاص حرااام عليكم ترى اليوم مشاعل مو مشاعلنا اللي دايم
عبدالعزيز يقبص خدودها : يازين اللي يستحون والله
مشعل : هههههههههههههههههه والله ماتوقعت يجي يوم اشوف مشاعل كذا
مشاعل : خلاص عاد انت وياه ترى والله مااوقع
سلمان : ههههههههههههههههه ايه هذي مشاعل اللي اعرفها

وقعت مشاعل وكلهم قامو يضمونها ويباركون لها
وراحو اخوانها عند الرجال

هيفاء خنقتها العبره : يعني خلاص بتروحين وتخليني
مشاعل دمعت عيونها : خلاااص يمه ماابي اتزوج ابي هيفااء
هيفاء تطقها مع كتفها : استهبل والله وش فييك انتي
ام سلمان وهي خانقتها العبره : قومو بس عند ضيوفنا بالصاله

رجعو للصاله
وبعد 10 دقايق رن جوال هيفاء

هيفاء : هلا عزيز .. اوككي اللحين اقولها .. ابشرر
سكرت هيفاء منه
هيفاء : مشاعل روحي المقلط عبدالعزيز يبيك

راحت مشاعل وانصدمت ان عبدالعزيز مو لحاله كان معه فيصل لفت وجت بتطلع
عبدالعزيز بسرعه : ويين ويين تعالي اجلسي هنا ( واشر على مكان جنب فيصل )
مشاعل انخطف وجهها وجت جلست

كان فيصل مبتسسم والدنيا مو سايعته من الفرحه
وطبعا طول الجلسه ماسلمو من تعليقات عبدالعزيز اللي زادت ربكة مشاعل

فيصل يلتفت لعبدالعزيز : يااخوي ماودك تذلف وتخليني مع زوجتي شوي
عبدالعزيز : اختي لو سمحت اختي
فيصل : اختك زوجتي خلاص وخر ياخي خلني اتهنى بحلالي
عبدالعزيز وهو يمد رجله على الكنبه الثانيه ويفصخ الشماغ : اذا طلعت كرت العايلة وانكتب جنب اسمها زوجه وقتها بقتنع انها صارت حلالك خلاص

قعد يتهاوش هو وفيصل مشاعل يوم شافت مافيه فايده قامت وتركتهم
عبدالعزيز يوم شاف مشاعل رايحه : خلاص يالله سمحت لك تقعد معها
فيصل التفت واستوعب انها راحت : الله ياخذك تركتنا وراحت كله بسببك يالزفت
عبدالعزيز : هههههههههههههههه هذا المطلوب

قام عبدالعزيز وخذ شماغه وطلع وهو يضحك
وفيصل وراه ومنقهر ويتحلطم بصوت واطي

بعد نص ساعه تقريبا دخلو كلهم عشان فيصل يلبسها الشبكه

فيصل يهمس بااذنها : مبروك ياعيون فيصل
مشاعل وهي منحررجه : الله يبارك فيك
فيصل بنفس الهمس : يا ؟؟
مشاعل تضحك : يا فيصل
فيصل يبتسم ابتسامه وسييعه : والله العظيم حتى اسمي من فمك غير
مشاعل تبتسم بحياء

وجدان تقول لهيفاء : وش تتوقعين جالسين يقولون
هيفاء : اناا ابي اتزوج بس عشان هالسبب
وجدان : ههههههههههههههه بس امانه اول ماتعرفين علميني اوكي ؟؟
هيفاء : لا خلاص بسأل مشاعل ماراح اتزوج ههههههههههههههههههه

كانو كلهم مبسوطين ويصورون معهم ويستهبلون عليهم
ومر باقي اليوم حلو مثل بدايته

يوم الجمعه الصباح بالفندق
كل العايله نازلين يفطرون الا وجدان توها تصحى

رن جوالها وهي تشوف اسم وحده من شعبتها
وجدان بنفسها : اللهم اجعله خير

ردت عليها : هلا وريف ... الحمدلله بخير انتي شخبارك ؟ ... ايوه .. ايوووه .. طيب اخر يوم الاحد ؟ .. اوكي خلاص بتصرف .. لاياقلبي مشكوره مابي اثقل عليك والله .. ابشري ياعمري ابشري .. تسلمين .. يالله مع السلامه

سكرت منها وهي ضايق صدرها

وهي بتلبس عبايتها عشان تنزل تلحق عالفطور اتصلت عليها ريوف

وجدان : هلا قلبي
ريوف : صباح الخير ياجميل
وجدان : صباح التبن
ريوف : افاا وش سويت لك انا
وجدان : مو لك للدكتوره السخيفه
ريوف : لييه
وجدان : تخيلي مو انا ساحبه اسبوعين تقريبا البنات سوو برزنتيشن ومشاريع ومدري ايش ولما رجعت ماقررت تعلمني وش اسوي الا يوم الخميس وتقول لازم تسليم الاحد
ريوف : اووف انتي مداومه من اول الاسبوع طيب ليه ماقالت لك بدري
وجدان : المفروض كذا بس مادري عبيطه
ريوف : طيب وش طالبه منك
وجدان : تلخيص رواية ..... لشكسبير
ريوف : ازهليها اببد عندي
وجدان : لاااا والله ماتقصرين انا بشتريها وببدا اليوم وان شاءالله اني بقدر اخلصها
ريوف : لااا مو انا بلخصها لك سيوف اخوي يحب روايات شكسبير مرررره واكيد يعرف هذي
وجدان بسرعه : لاااااا ريوف امانه فشيله
ريوف : خييير وش فشيله ! ولد عمتك
وجدان : انا غلطانه يوم افضفض لك
ريوف : لا يكثر حبيبتي والله ماتلخصين ولاشي عنندي
وجدان : خير واذا صار اخوك مشغول تراه بمستشفى مو لعب يعني يالله يلقى وقت ينوم فيه وانتي تقولين يلخص لك
ريوف : والله ماعنده دوام اليوم وبكره ومشغلنا كل شوي يجي يستظرف علينا
وجدان : زين يسوي فيكم


دخل سيف عليها
ريوف : اذا ذكرت الك..
سيف : الك ؟ ايش كملي
ريوف : الك الكبير ,, الامور الجميل حبيبي والله
سيف : من تكلمين
ريوف : وجدان بنت خالي
سيف : سلمي لي عليها
ريوف : وجدان يسلم عليك سيف
وجدان: ايه سمعته سلمي لي عليه
سيف : اخبار رجلها ؟
ريوف : يقول اخبار رجلك
وجدان : الحمدلله بخير احسن قولي له وش اخباره هو
ريوف : بعطيه الجوال عشان ترتاحين انتي وياه
سيف : ههههههههههه ليه وش تقول
ريوف : اصبر خلك من كلامها تعرف رواية ...
سيف : ايييوه ياقدمك
ريوف : عندك صح ؟
سيف : يسس
ريوف : تقدر تلخصها ؟
سيف : اقدر بس ليه من يبيها ؟
ريوف : وجدان بنت عمي طالبتها منها الدكتوره وتوها اليوم تدري
سيف يأشر على عيونه : من عيوني تامر امر بس متى تبيها
وجدان ورا الجوال مغطيه عيونها من الفشيله وتهاوش ريوف وريوف منزله جوالها
ريوف : الاحد
سيف : قولي لها ابشري

طلع سيف من عند ريوف ورجعت ريوف ترفع الجوال وطلع لها صوت وجدان تصارخ وتهاوش
وجدان : ياربيه الله ياخذك ياريوف
ريوف : والله عادي ياوجدان اعتبريه اخوك وصدقيني لو مشغول ماراح يستحي بيقول انه مشغول ( وغيرت السالفه ) الا ماقلتي لي وش صار امس بالملكه واخبار فيصل وميشو

قعدو يسولفون وقالت لها وجدان كل التفاصيل

يوم السبت
الساعه 3 الفجر ..

وجدان كانت نايمه فوق ملزمتها

رن جوالها وفزت وارتاعت لما شافت الساعه
وشافت اسم المتصل واستغربت بس ردت بسرعه قبل مايقطع الاتصال
وجدان بصوت نايم : هلا سيف
سيف : هلا وجدان وش اخبارك
وجدان : تمام انت كيفك
سيف : الحمدلله اسف صحيتك بس انا قريب من بيتكم معي اوراقك
وجدان فزت من سريرها : خلاص حطها عند الباب وانا باخذها
سيف وهو يفتح الشباك ويطلع يده : فيه مطر قوي اخاف يدخلها مويه
وجدان : اووكي خلاص بطلع لك
سيف : لا اصبري اذا جيت قدام الباب بالضبط دقيت عليك اخاف تطلعين الحين واطول عليك
وجدان : خلاص اوكي

بعد خمس دقايق رن عليها رنه وسكر وعدلت حجابها وطلعت


فتحت له الباب
سيف من ورا الباب مد لها الاوراق وخذتها منه

وجدان : شكررا سيف والله ماقصرت واسفه اذا تعبتك معي
سيف من ورا الباب : وش دعوى يابنت خالي ماسويت شي

وجدان لفت ومشت شوي وزلق عكازها بالمطر وطاحت وصرخت بصوت خفيف
سيف اللي توه ساحب الباب بيقفله سمع الصوت وارتاع

دخل البيت وشاف وجدان طايحه وملتويه رجلها شوي جا بسرعه عندها

سيف : تعورتي ؟
وجدان وهي مغمضه عيونها من الالم : شوي

نزل لمستواها وحط يده تحت كتفها بشوي ووقفها
وكانت الاوراق جنبها طايحه شالها بيد واليد الثانيه مسك فيها وجدان من كتفها وقربها له شوي وهو يمشي

سيف : انتبهي بشويش اذا مشيتي رجلك للان بمرحله التئام اي شي ممكن ينكسها
وجدان وهي مرتبكه من قربه : ان شاءالله

قرب عند الملحق واستحى يدخل

سيف : تقدرين تكملين بروحك ؟
وجدان بسرعه : ايييه اييه
سيف : خلاص اوكي

دخلت وجدان بعدين هو تذكر ان الاوراق بيده
دخل وراها وحطها على الطاوله اللي جنب الباب وطلع

سيف : فمان الله
وجدان : فمان الله وشكرا مره ثانيه
سيف : العفو

وطلع من البيت


انتهى البارت
اتمنى تعطوني رايكم وتوقعاتكم لأبطالنا



تعديل سحابٍ دنى ..; بتاريخ 14-02-2019 الساعة 03:33 PM.
الرد باقتباس
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1