غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 21
قديم(ـة) 11-01-2019, 09:08 AM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي جديد¨°؛©
 
الافتراضي رد: غالبا مايكون الحب قدر لاخيارا


-8-

بعد اسبوعين بكره الاحد اول يوم اختبار للهنوف

الساعه 10 الليل قاعده على سريرها تذاكر
طق الباب ودخل ابوها

ابوعبدالله : هلا بهنوفتي الحلوه
الهنوف عدلت جلستها : هلا ابوي تفضل اجلس
ابوعبدالله : وينك ماشفناك اليوم
الهنوف : والله اذاكر ماده بكره صعبه
ابوعبدالله : الله يوفقك يابنتي ( يسكت شوي بعدين يكمل ) انا جاي اكلمك بموضوع
الهنوف تقفل الكتاب وتناظر ابوها باهتمام : سم
ابو عبدالله : والله ودي أأجل الموضوع بعد ماتخلصين اختباراتك بس
الهنوف قاطعت ابوها : لاعادي عيووني لك تبي اسوي لك شغل ؟
ابوعبدالله : لا بس عبدالعزيز خاطبك رسمي مني وابي اشوف رايك
الهنوف انصدمت لانها قايله لعبدالعزيز خلاص مابيك : هو اللي كلمك ولاعمي ؟
ابو عبدالله : اخوي كلمني وهو كلمني بعده ومستعجل يقول ابي الملكه والزواج بيوم واحد لاني بسافر عندي دوره برا السعوديه وابيها معي
الهنوف تسمع كلام ابوها ومصدومه لان مو هذا اللي اتفقت عليه مع عبدالعزيز
ابوعبدالله : انتظر رايك
الهنوف : مابيه
ابو عبدالله : ليه ؟
الهنوف : بس
ابوعبدالله : ماراح ارفض ولد اخوي عشان ( بس )
الهنوف : يعني بتغصبني ؟
ابوعبدالله : ماراح اغصبك اذا عطيتيني سبب مقنع
الهنوف : اعده اخوي
ابو عبدالله : مو مقنع
الهنوف : مارتحت
ابوعبدالله : فيه شي صاير انا مادري عنه ؟
الهنوف بخوف : لا بس ياليت تقفل على الموضوع وتقول له اني رافضه
ابوعبدالله : بعطيك فرصه تفكرين
الهنوف : لا ماراح اغير رايي
ابوعبدالله : تعاندين انتي ؟
الهنوف : لا بس جد انا مارتحت له ك شخص
ابوعبدالله : عبدالعزيز رجال ومتوظف وعاقل ومتأكد مليون بنت بتحسدك عليه اذا خذتيه
الهنوف بصوت واطي : خل يشبعون فيه
ابوعبدالله ماسمعها وكمل : وانا والله ما ارد اخوي وولد اخوي بدون سبب , اذا اقنعتيني ابشري
الهنوف نزلت دموعها
ابوعبدالله : فكري بالموضوع كم مره وماراح اكلمك الا بعد ماتخلص الاختبارات

طلع وتركها

اتصلت على وجدان
اول ماردت قالت الهنوف : ليه الرجال ماعندهم اسلوب ولايعرفون متى يتكلمون ؟
وجدان : ليه ههههههههههههههه
الهنوف : ابوي جاي يكلمني بموضوع عبدالعزيز
وجدان : ماخلصنا من هالموضوع !!
الهنوف : شوفي بس وش يقول ! خاطبني ويبي الملكه والزواج بيوم واحد
وجدان بصدمه : وششششششششششششو !
الهنوف : لاوازيدك من الشعر بيت بيسفرني على طول عنده دوره برا السعوديه
وجدان : انتي قاعده تتكلمين من جدك ؟
الهنوف : مو وقت مزح
وجدان : طيب ليه ! من كلامك انك قلتي ماتبينه وهو بعد قال مابيك
الهنوف : مو هذاااا اللي ذابحني ! اتفقنا تقريبا ليه فجأه سوا كذا
وجدان : انتي استفزيتيه بشي ؟
الهنوف : لا ماكلمته اصلا ولاشفته الا الخميس اللي فات ببيت جدتي لمحه بعد يعني ماحصل شي
وجدان : غررريبه
الهنوف : انا ماقهرني اكثر الا ان ابوي مكلمني بهالموضوع ليله اختبااري
وجدان : احمدي ربك ماكلمك الصبح وانتي بالطريق للجامعه عشان تنسين المعلومات مره وحده
الهنوف : ماجت على باله ولا اتوقع بيسويها
وجدان : ههههههههههه حرام عليك بس هو يحس الموضوع بيفرحك مايدري يعني
الهنوف : والله مدري بس اللي اعرفه اني نسيت كل اللي درسته
وجدان : لا عاد جد ادرسي بكره بالجامعه نتناقش مع رهف بموضوعه
الهنوف : ياربي الله يعيين بس

سكرو من بعض وكلهم رجعو يذاكرون

من بكرة بالجامعة

رهف بصدمه : من جددددك ملكه وزواج بيوم واحد ؟
الهنوف : للاسف
رهف : طيب تمسكي بالرفض وكلمي امك عشان تكلم ابوك يمكن يحن قلبه
الهنوف : ابوي مستحيل يقتنع بأي سبب وماراح اقول له الحقيقه وحتى لو قلتها ماراح يقتنع
رهف : طيب وش بتسوين ؟
الهنوف : بكلمه
وجدان : واضح انه مقرر خلاص وش بيغير راييه يعني ماتعرفينه انتي !
الهنوف : فيه شي راح يخلصني منه بدون ما اتعب
رهف ووجدان : وشووو !
الهنوف : اني امسك عليه شي يخليني ارفضه
وجدان : مثل وشو ؟
الهنوف : محادثه مع بنت او مكالمه
رهف : ومن وين بتجيبينها ؟
الهنوف : منك انتي
رهف بصدمه : انااااا ؟
الهنوف : ايه ابيك تكلمينه
رهف بحده : لااااا
الهنوف : اول مره اطلب منك شي عشاني بس وافقي
رهف : طيب وش اقول له ؟
الهنوف : ابيك تمسكين عليه شي بس وتعطينياه
رهف : لهالدرجة كارهته ؟
الهنوف : كارهه اسلوووبه وانه يحس كل الدنيا تمشي على كيفه , بكسر خشمه بس
وجدان : حسيتك بمسلسل كويتي
الهنوف : اصبري مابعد شفتي شي
رهف : هاتي رقمه اتصل عليه اقنعه يتزوجني بدالك
الهنوف : الله يهنيييك فيه
وجدان : عاد جد بتكلمينه رهف ؟
رهف : اذا هنوف بخاطرها ماعندي مشكله
الهنوف : ايه لان انتي الوحيده اللي مايعرف رقمها ولايعرف صوتها
رهف : بس مابي اخذ رقمه ابي سنابه
الهنوف : الرقم اسرع
رهف : لا رقمي بأسمي وبيعرفني على طول
الهنوف : يووه من وين اجيب سنابه عاد
وجدان : ياغبيه انتي وياها حاطه بالانستقرام
الهنوف : اماااا
وجدان : والله اشوفه امس وانا فاتحه حساب دحوم اخوي
الهنوف : حاطه بالبايو ؟
وجدان : لامنزل صورة اصبري للان داخله حساب دحوم
وجدان فتحت جوالها
رهف : منزل صورته ؟
وجدان : اييه انتي مابعد شفتيه ؟
رهف : لاااا
وجدان فتحت صورته وورتها
رهف تلف راسها للهنوف : هذااا ينرفضضض ؟
عبدالعزيز كان مصور سيلفي مع سلمان اخوه
رهف : في عيني اليمنى من الورد بستان وفييي عيني اليسرى عجاج السنيني
وجدان : سلمان عجاج السنيني ههههههههههههههههههههههههههه حرام عليك عاد مهو شين
رهف : عبدالعزيز احلى بكثيررر
الهنوف : اتركي الغزل بس واضيفيه
رهف تضحك : غررتي ؟
الهنوف : من جدك انتي ؟ طبعا لا
رهف فتحت جوالها واضافته


عند عبدالعزيز اللي كان توه طالع من الدوام وواقف عند بيت عمه ابوفيصل ينتظر فيصل يطلع له

عبدالعزيز يتصل عليه
عبدالعزيز : لي 10 دقايق واقف عند بيتكم دقيقتين وادخل اسحبك من شعرك
فيصل : ثواني بس البس واجيك
عبدالعزيز : بسرعععه
سكر منه على ولف على الشباك وشاف واحد واقف وارتاع
فتح الشباك
عبدالعزيز : سم
علي : اسف روعتك بس كنت انتظرك تخلص مكالمتك
عبدالعزيز : امرني
علي : اذا ماعليك امر تبعد سيارتك شوي
عبدالعزيز يوم شاف استوعب انه موقف بنص الشارع
عبدالعزيز بقلبه : الله يلعنك يافيصل

عبدالعزيز : اسف والله مانتبهت
علي : والله واقف وراك 4 دقايق انتظرك بس ماعطيتني وجه

نزل عبدالعزيز وسلم عليه
عبدالعزيز يحب راسه : وهذي بوسه على الراس عشان تسمح لي
علي بأحراج : لااا وش دععععوى يا .. وش اسمك ؟
عبدالعزيز : عبدالعزيز ال .....
علي : اوووه قرايب ابو فيصل
عبدالعزيز : ايه طال عمرك ابو فيصل يصير عمي
علي : ونععم والله
عبدالعزيز : ماعليك زود
علي : تفضل عالقهوة وش مجلسك برا
عبدالعزيز : انتظر فيصل والله انت تفضل معنا
علي : لا ماتقصر والله بس لازم يوم تشرفنا على القهوة
عبدالعزيز : كثر الله خيرك واسف مره ثانيه لاني قفلت الشارع
علي : حصل خير يالله انا بدخل البيت
عبدالعزيز : الله معك

سلمو على بعض وراح علي

طلع فيصل

عبدالعزيز : بدري اخ فيصل
فيصل وهو ماسك المنشفه وينشف شعره : شف والله مستعجل حتى المنشفه مطلعها معي
عبدالعزيز : اركب اركب فشلتنا
فيصل يركب وهو يضحك : والله اسف بس جد توني صاحي
عبدالعزيز : فشلتنا مع جيرانكم
فيصل : اي ؟
عبدالعزيز اشر على بيت ابو نايف
فيصل : ابو ناييف
عبدالعزيز : هو نايف ! تصدق من الفشيله ماسألته مقفل عليه الشارع كله بسببك
فيصل : لانايف متزوج اكيد اللي شفته علي
عبدالعزيز : مدري والله

بالجامعة

رهف : ياي مارد الاضافه للان
وجدان : اكيد ماشاف الجوال

رن جوال رهف

رهف : هلا تروووك ... ايه خلصت .. مو من جدك وينه ؟ ... طيب تقريبا كم يبي له ساعه عشان يخلص ؟ ... يووووه خلاص اوكي مو مشكله ... لاياقلبي لاتجي برجع مع وحده من البنات
سكرت منه

رهف : وجدان لي مكان بسيارتكم ؟ السواق مودي امي المطار
وجدان : احطك بحضني لو مالك مكان
الهنوف اتصل السواق عليها

الهنوف بعد ماسكرت : بنات انا استأذنكم
وجدان : يلا قلبي نشوفك بكرة
سلمو عليها وطلعت

اتصلت وجدان على السواق وقال لها انه بالصناعيه

وجدان : رهف شكلنا بننام بالجامعه
رهف : هههههههههههههههه انا حيوانه يوم شديت فيك الظهر
وجدان : بتصل على فيصل
رهف : يلا ولو ماقدر اتصلت على تركي
وجدان : لا فيصل ماخذ اجازه هالاسبوع اتوقع بيقدر

اتصلت وجدان على فيصل

فيصل : هلا والله
وجدان : هلا فيصل تقدر تاخذني من الجامعة ؟
فيصل : وين راجو ؟
وجدان : بالصناعيه .. اذا ماتقدر عادي
فيصل : انا مع عزيز وقريبين من الجامعه
وجدان : ترى رهف معي
فيصل : طيب عند اي بوابه ؟
وجدان : بوابه 3
فيصل : خلاص ربع ساعه بس واتصل عليك تطلعين

سكرت منه

وجدان : تدرين من معه ؟
رهف : ميين ؟
وجدان : عزوز
رهف : من جدددك
وجدان : اييي والله
رهف : ليت الهنوف فيه عشان تنسى معلومات اختبار بكره
وجدان : ههههههههههههههههههههههههههههههه تعالي بس خلينا نطلع

طلعو وجلست وجدان تدور سيارة فيصل وماشافتها

وجدان : شكله جاينا بسياره عزوز
رهف : بععد ؟
وجدان : ايييه شوفيها السوداء اللي ورا الكامري تعالي

ركبو
رهف ووجدان : السلام عليكم
عبدالعزيز : وعليكم السلام والرحمه
فيصل : وعليكم السلام
عبدالعزيز : بيتكم ياوجدان ؟
وجدان : لا رهف بتروح بيتها
عبدالعزيز : وين ؟
رهف : حي ... شارع ....
وجدان : اختصريها وقولي قدام بيت جدتك
عبدالعزيز بضحكه : ابشري

وقفو عند اشاره ومسك عبدالعزيز جواله
باللحظه نفسها رهف فاتحه سنابها وجاها رد اضافه من عبدالعزيز
رهف بقلبها : مو وقققتك تقبل الحين
كتبت لوجدان بالواتس اب انه قبل اضافتها
وجدان كتمت ضحكتها

طبعا رهف كانت كاتبه اسمها روفا ف كانت مرتاحه من ناحيه انه مايكشفها
كتب لها على طول

عبدالعزيز : مرحبا مين معي ؟
رهف شافت التنبيه بس مافتحت ولاردت
فتحت الاشاره ومشى عبدالعزيز

وصلو لبيت رهف ونزلوها ورجعو لبيت ابوفيصل

بعد اسبوعين بكره الخميس اخر يوم اختبارات

رهف وعبدالعزيز تطورت علاقتهم وصار يسولف معها بس ماقدرت تاخذ منه لاحق ولاباطل
العمه نورة وصلت للرياض يوم الثلاثاء
بهالمناسبه قرر الجد يسوي عشاء بالمزرعه يوم الخميس ويعزم فيه كل من يعز عليه
كان من ضمن المعزومين ابوتركي وعياله وابونايف وعياله ونايف وزوجته وعيالهم

الكل في بيت الجده يوم الخميس العصر يتجهزون عشان يطلعون للمزرعه
ماعدا العيال اللي كانو بالمزرعه من امس يشرفون على العمال اللي ينظفونها وفيصل كان مع وجدان اللي اختبارها يخلص 4
بعد الساعة 4 طلعت من الاختبار وراحت لبيتهم تكمل تجهيزها قبل ماتروح لبيت جدتها


نرجع للبنات اللي كانو ببيت جدتهم

الهنوف وهي تتفقد اغراضها : تصدقوووون اني غبيه ماجبت شوزي الاسوود
ريوف : ماعندك غيره ؟
الهنوف : لاا هو اللي ناويه البسه بعزيمه بكره والله حاطته فوق سريري عشان ما انساه ( وجلست وهي خانقتها العبره) ياربيه وش هالحظ
ريناد : شوزي يفداااك ياشيخه بس لاتزعلين
الهنوف : لااا شكلي برجع مع عبود للبيت اجيبه
بهاللحظه وجدان اتصلت على الهنوف

الهنوف : هلاوالله وجدان وييينك ؟
وجدان : ببيتنا كنت متصله اسألك جا عمي ابوسلمان من الشرقيه ؟
الهنوف : لااا اصبري شوي اتصل على عبود بعدين ارجع لك
وجدان : بتروحون معه ؟
الهنوف : لا برجع بيتنا
وجدان : لييه ؟
الهنوف : نسيت شوزي
وجدان : بجيب لك من عندي وش تبين لونه ؟
الهنوف : لو اقولك وش ابي بتهاوشيني
وجدان : وشو بعد
الهنوف : الشوز اللي لبستيه بزواج عبير بنت خالتك
وجدان : اللي من .....
الهنوف : اييييه بليز
وجدان : احمدي ربك والله امس كنت افكر اني البسه بس على اخر لحظه غيرت رايي
الهنوف : افف احبببك والله فكيتيني من مشوار بيتنا
وجدان : طيب وخري عن وجهي بروح اجيبه فيصل بيدعسني لو تأخرت دقيقتين
الهنوف : ههههههههههههه طيب يلا سي يو

سكرت منها وجدان

بعد 10 دقايق وصلتهم وجدان وسلمت على البنات وجلسو يتقهوون لين يخلصون الحريم

ريوف : عمي ابوسلمان متى بيجووون وربي مشتاقه لهيوف ومشاعل مررره
ريناد : انا كلمت مشاعل تقول رحلتنا المغرب وعلى طول بيمشون المزرعه ماراح يقعدون بالرياض
الهنوف : والله مشتاقه لهم مرره من زمان عنهم
غدي : ااا يعني خوات زوجي اشتاق لهم
البنات كلهم ماتو ضحك باستثناء ريناد اللي ماكانت تعرف
ريناد : زوجك مين ؟
جمانة : عززييييززو
ريناد على وجهها اكبر صدمة : متى مين قال ؟
الهنوف : مابعد صار شي رسمي بس كلام
ريما : وين ماصار شي رسمي والخبر منتشر
ريناد مازالت مصدومه وتحس عيونها امتلت دموع ودها تنشق الارض وتبلعها وتحاول توضح انه عادي
ريوف : ماكنتي معنا ريناد يوم تعلمنا امي امس ؟
ريناد وهي تحارب دموعها : لااا ماتذكر مبروك هنوفه
الهنوف : بنات والله مافيه شي رسمي وانا مابعد وافقت
وجدان حست موقف الهنوف شين مره وغيرت السالفة : تدرووون مين بيجيي ؟
ريوف : مييين ؟
الهنوف وهي تناظر وجدان بأمتنان : ميين ؟
وجدان : رهوووف وبنات ام نايف
ريوف : رهوف وعرفناها بنات ام نايف منهم ؟
وجدان : جيراننا الجدد يجنننووووون مره وبناتهم يجنننون
الهنوف وهي تضحك : وعيالهم يجننون ولا ؟
وجدان : هههههههههههههههه والله عيالهم ثقيلين دم
الهنوف ماتت ضحك
البنات الباقي مو فاهمين السالفه وسلكو

نرجع لريناد اللي انسحبت من المكان وكلام البنات يدور في راسها

اللي محد يعرفه ان ريناد كانت تحب عبدالعزيز من لما كان عمرها 15 سنه وكبر حبه معها بدون ماتقول لأي شخص
ماكانت تنتظر منه شي لانها ماقالت ولا اعترفت لكن ماتوقعت انه يتزوج بهالسرعه !
ومين ياخذ ! الهنوف اللي هي تشوف انها اقل جمال منها بكثيييير !

قفلت عليها الباب وجلست تبكي حبها اللي قاعد ينهار قدام عيونها
مافي يدها شي تسويه
نامت وهي تبكي

بعد نص ساعه قامت على ضرب متواصل على الباب فتحت وكان وجهها اصفر وباين عليه الحزن
كانت وجدان عند الباب

وجدان : ريناد حبيبي وش فيك ؟
ريناد وهي تتغصب الابتسامة : مافيني شي بس نمت
وجدان تدري انها تكذب بس ماحبت تضغط عليها
وجدان بأبتسامه : طيب تعالي تجهزي ترى كل السيارات راحت باقي احنا بس
ريناد : مين اللي باقي ؟
وجدان : البنات بس بنروح مع فيصل اخوي
ريناد :اوكي

بعد 10 دقايق الكل بالسيارة
وجدان والهنوف وريناد وريما وريوف وجمانة وغدي

فيصل يركب السيارة : السلام عليكم
البنات باصوات متفرقه : وعليكم السلام
فيصل : كيفكوون بنات عمي
ريما بجراءه : وبنات عمتك ماتسأل عنهم
فيصل ضحك : اسف والله ماتعودت بس ولاتزعلين كيفكم بنات عمتي
ريما : بخييير نيابه عن خواتي
فيصل : انتي السوسه ريوف ؟
ريوف تشهق : حررام عليك ساكته انا ماقلت شي
فيصل : ههههههههههههههه اجل ريناد ؟
ريناد كانت لابسه سماعتها وماتسمع كلامهم
ريما :لااا ريما
فيصل : والتبن
البنات ميتين ضحك
ريما : وجدان شيلي اخوك عني لايجيه شي مايرضيه
فيصل ضرب بريك ووقف على جنب : ايش عيدي ؟
ريما خافت : اسفففه
فيصل : هههههههههههههه والله لو انك من بنات عمي نزلتك بس احمدي ربك اني ما امون عليك مره
ريما : لاعاد تمون اجل

كملو طريقهم بسواليف وضحك باستثناء ريناد اللي من يوم سمعت الخبر ونفسيتها منقلبه فوق تحت

وصلو المزرعه كلهم

البنات والحريم كلهم بالصاله

الجده : وين عيالك يانوره ماشفتهم للحين
نوره ( ام ماجد ) : الحين اتصل عليهم يدخلون يسلمون عليك
ام ماجد اتصلت على ماجد ومارد عليها واتصلت على سعود
سعود : هلا يمه
ام ماجد : سعود جب اخوانك وسلمو على جدتكم تسأل عنكم
سعود : تامرين امر
الجده : قولي له خل عيال عيالي كلهم يجون يتقهوون عندي
ام ماجد : سمعتها ؟
سعود : اييه قولي لها ابشري شوي بس وجايين

الجده : قومي ياوجدان قولي للشغالات يسوون القهوة
وجدان تقوم : ابشري

عند العيال بالمجلس

سيف : ادخلو لحالكم والله ماتعودت على الصخب والحريم الواجد
سعود : استح على وجهك جدتك وش اللي ماتعودت
سيف : جدتي على عيني وعلى راسي بس تلقى العالم كلهم داخل
ماجد : تصدق اني شايل هم بعد
سعود : يوو جاك الثااني
عبدالعزيز : قومو بس عددنا اكثر منهم تبارك الله
عبدالرحمن : الحمدلله انه ماينشره علينا
سحبه عمه خالد
خالد : انت اول واحد بتدخل ومشيعل انت بعد تعال
مشعل : طيب انا وش دخلني ؟
خالد : اعوذ بالله وش فيكم انتم تقل داخلين على ابليس ؟ تراه جدتكم وحريم اعمامكم وبناتهم بس
ماجد : لاا ؟؟ بس ؟؟ ماقصرت والله
عبدالله : انا عن نفسي ماستحي بدخل اول واحد
خالد : كفو والله
فيصل : يالله قومو

قامو العيال كلهم وتنحنحو قبل مايدخلون عشان الامهات يتغطون والبنات يتحجبون
الصالة كبيرة يمين البنات والحريم جالسين كلهم ويسار جلسو العيال مقابلينهم والجده بالوسط

الجده : حيا الله عيااالي
العيال بأصوات متفرقه : الله يحييك
سيف : اخبارك يمه
الجده : الحمدلله والله بخير جعلك بخير
جلسو يسولفون مع جدتهم
بالجهه الثانيه عند البنات
كانت ريناد عيونها معلقه على عبدالعزيز
شخص واحد بالجلسه كان مركز عليها اللي هو وجدان

خالد يلتفت لبنات اخته

خالد : كيفهم الحلوات اللي فاقدهم خالهم
ريوف : حبيبي خالي والله احنا فقدناك اكثر من لما رجعت الرياض
ريما : ايييه نسيتناااا بالدقيقه اللي ركبت فيها الطياره
خالد : انسى اهلي كلهم ولا انساكم
الهنوف : لناا الله

عبدالعزيز فز لما سمع صوتها بس اختار انه مايهتم

خالد : كلكم عيوني والله
وجدان : انا لي عين لحالي صح ؟
خالد : اكييد
غدي وجمانه بصوت واحد : واحنااا ؟
سيف : ههههههههههه توهق الذيب
ماجد : تشووف انت ههههههههههههههههههههههه
سعود بجراءه : ورا ماتصيرون عيني بعد ؟
خالد يرمي عليه الفنجال : قلنا خلك اوبن مايند بس مو كذاا
البنات ميتين ضحك
عبدالعزيز : انا لحد ياخذ عيوني لو سمحتوو
كان قاصد يقول كذا يبي يشوف رده فعل الهنوف
الهنوف اختفتتتتتت وجهها قلب الوان
خالد : احرجت بنت اخوي حرام عليك
ريناد قامت من عندهم بدون محد يحس بوجودها
ماكانت تقدر تتحمل وهي تشوفه يتغزل في الهنوف كذا قدام الكل

الساعة 9 الليل

العيال كانو فارشين برا وجالسين
والبنات داخل جالسين بالملحق
دخلو عليهم مشاعل وهيفاء

وجدان بحماس : هلااااااااا والله
قامو يسلمون عليهم وجلسو

مشاعل : ياحلوووكم يابنات عمتي والله تغيرتوووو
ريوف وهي تضخم صوتها : للاحلى طبعا صح ؟
مشاعل : نصيحه اسحبي سؤالك مابي احرجك
ريوف رمت عليها الخداديه وهي تضحك
مشاعل : لاوالله جد جد تجننون بالذات ريموووه
ريما : يالبييه يابنت خالي استحيييت
وجدان : انتي تستحين ؟ ماظنيت والله
ريوف : ماتلاحظون انكم مستلمينا طنازه ؟
الهنوف : ماعليش بنات عمي معاقين مايعرفون يعبرون عن مشاعر الشوق الا كذا
هيفاء : وريناااد الحلوه ليه ماتشاركنا السواليف
ريناد تحاول تبين انها طبيعية : اخاف تستلموني طنازه
هيفاء : اللي يقولك شي بضربه
ريناد : حبيبتييي والله هيووف

جلسو البنات يسولفون لين الساعة 11 وراحو ينامون عشان عزيمه بكره



تعديل سحابٍ دنى ..; بتاريخ 11-01-2019 الساعة 09:46 AM.
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 22
قديم(ـة) 11-01-2019, 09:10 AM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي جديد¨°؛©
 
الافتراضي رد: غالبا مايكون الحب قدر لاخيارا


اتمنى اشوف تفاعل ..

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 23
قديم(ـة) 11-01-2019, 01:37 PM
صورة امل النجاح الرمزية
امل النجاح امل النجاح غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


الرواية تجنن وروعة وقصتها كمان بارفاكتو

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 24
قديم(ـة) 12-01-2019, 05:27 AM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي جديد¨°؛©
 
الافتراضي رد: غالبا مايكون الحب قدر لاخيارا


اقتباس:
المشاركة الأساسية كتبها امل النجاح مشاهدة المشاركة
الرواية تجنن وروعة وقصتها كمان بارفاكتو


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 25
قديم(ـة) 12-01-2019, 10:23 PM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي جديد¨°؛©
 
الافتراضي رد: غالبا مايكون الحب قدر لاخيارا


للرفففففع...............

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 26
قديم(ـة) 13-01-2019, 11:14 AM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي جديد¨°؛©
 
الافتراضي رد: غالبا مايكون الحب قدر لاخيارا


-9-


( اليوم الثاني بالمزرعه)

الكل صاحي بدري يتجهزون للضيوف اللي بيجون

المغرب بعد ماجو ابونايف وعياله وابوتركي

العنود والجازي على طول دخلو مع البنات ورهف تعرفهم قبل عشان كذا ماكان صعب الموضوع عليها

بعد المغرب تجمعو اغلب الضيوف

ام فيصل : وجدان روحي قولي للشغالات يجهزون البخور ابوك متصل يقول جهزوه بيجي واحد من العيال ياخذه
وجدان : ابشري
وطلعت وجدان بتروح المطبخ وجت بوجهها الجازي وجلسو يسولفون ونست امها وش قالت لها
بعد 10 دقايق

مشاعل بالمطبخ تاكل حلا وفمها مليان
انفتح باب المطبخ الخارجي ودخل فيصل بسرعه
فيصل شافها من ورا ويحسبها وجدان

فيصل : وجدان وين البخور
مشاعل علقت اللقمه بحلقها وصنمت بمكانها
فيصل : وجداااان
مشاعل لفت عليه واللقمه بحلقها وتتكلم : مانيبب وجدان
فيصل فيه الضحكه على شكلها بس مو وقت ضحك : طيب لو سمحتي ياللي مو وجدان تعطيني البخور
مشاعل : وش دراني عن البخور انا ( بعدين تذكرت انها مالبست شي يغطي شعرها وطلعت برا تركض )
فيصل بقلبه : بنات عمي ملاحيس قسم بالله بس من ذي ! شكلها من الضيوف لان شكلها مو مألوف ! لاخير من الضيوف وتاكل حلا بالمطبخ ! انا وش دخلني فيها خل ادق على وجدان بس

اتصل على وجدان قبل مايرن دخلت عليه المطبخ
وجدان كانت شاطفتها مشاعل وهي تركض وداخله المطبخ وهي ميته ضحك

وجدان : وش انت مسوي بمشاعل ؟
فيصل : اللي تو مشاعل ههههههههههه ياحليييييلها بنت العم نكدت عليها لقمتها
وجدان : والله وجهها مخطوف روعت بنت عمي
فيصل تركى على الطاوله : والله صارت حلوه
وجدان تطق كتفه : واضح انك نسيت جاي عشان وشو !
فيصل : ايييييه البخور عطينياه بسرعه
وجدان طلعته وعطته : مره ثانيه اذا جيت تدخل طق الباب
فيصل : وش دراني ان مزرعتنا فيها مشافيح
وجدان : هههههههههههههههههه قصر صوتك والله بتموت لو سمعتك
فيصل طلع وهو يضحك

خلصت العزيمه
الكل راح وباقي عايلة ابوتركي

وجدان : خالتي بليز كملو عطلتكم هنا
ام تركي : والله ودنا بس مرتبطين مع اهلي بنسافر
رهف : يمممه تكفين ابي البنات مابي اروح لخوالي
ام تركي : بنات خالك هناك
رهف بصوت واطي : يع والله من النفاق
ام تركي : ووشو ؟
رهف : سلامتك ياقلبي بس بليز خلينا نجلس
الجده : خليها يا ام تركي والله اني اعدها وحده من بناتي
ام تركي : لا يا ام محمد ابوها ماراح يرضى
ام فيصل : عشاني يا ام تركي مسكينه خليها تنبسط مع البنات
ام تركي : خل تستأذن من ابوها ان وافق بكيفها
رهف راحت ترركض لجوالها

بعد خمس دقايق دخلت على الحريم وهي تنطط
رهف : وافق وافق وافق
وجدان ضمتها : الللله اخيرا تعالي نبشرر البنات

راحو يركضون بفرح للبنات

قبل مايدخلون غمزو لبعض ودخلو بحزن

رهف بتمثيل :بنات شفتو عبايتي ؟
ريوف : لااااااا ليه بتروحييين ؟؟؟
رهف : ايه للاسف
وجدان : اقنعت خالتي ورفضت
ريوف : والله قهر للان ماشفنا بعض كويس
رهف : يلا الجايات اكثر ان شاءالله
مشاعل : وربي قهر
رهف ماقدرت تكمل وماتت ضحك : امزززح
ريما طقتها : ياشييييييينك ضاق صدري

جا الفجر والبنات سهرانين وضحك وسواليف

وجدان : بنااات محد جاب مفرحات صح ؟
الهنوف طقت راسها : يوووه صححح ماجا على بالنا
رهف : مافي بقاله او محطه قريبه من هنا ؟
وجدان : الا
رهف : خلونا نطلب
الهنوف : حالمه انك بالرياض ؟
رهف : ليه مايوصلون ؟
وجدان تقلد صوتها : لاامايوصلون
ريوف : شرااايكم بنات نقول لخالي خالد يودينا
الهنوف : يلااا بتصل عليه
البنات تحمسو
بعد ماسكرت منه الهنوف

الهنوف : يقول انا بمزرعه خويي برجع الصبح

مشاعل : بتصل على سلمان
ريوف : لااا استحي ما امون عليه
مشاعل : ليه بنركبك بحضنه يعني ؟
ريوف : ههههههههههههههههه لا بس يعني فشيله
مشاعل : اقول بس عطوني كلمات تقطع القلب عشان يرحمنا
وجدان : ياليت عمي خالد فيييه
مشاعل : ولاتصدقون بتصل على عزوز مجرد ما اقول له هنوف معنا بيجي
الهنوف شهقت : خيرر والله ما اروح
مشاعل : بدت حركات الحياء اللي ماله داعي ( اتصلت على عبدالعزيز )




العيال كلهم بالملحق يشوفون فلم
عبدالعزيز نايم وجواله بيده يرن
كان فيصل جنبه

رن مرتين وانزعجو العيال
خذه فيصل وشاف الاسم ( مشاعل ) بدون شعور رد
مشاعل : حبيبي عزووووزي اخوي ممكن تودينا المحطه انا والبنات احس دقيقتين ويوقف قلبي من الجوع
فيصل فيه الضحكه
مشاعل : عزوز بليييييز من زمان ماطلبت منك شي ووافقت
فيصل مازال ساكت
مشاعل : افهم من سكوتك انك رضيت اوكييي يلا بسكر عشان نلبس
فيصل بصوته الضخم : لا
مشاعل ارتاعت : مين ؟
فيصل : انا فيصل وعزوزك نايم
مشاعل رمت الجوال على وجدان

وجدان بتساؤل : ميييين !
مشاعل : اخووك
وجدان رفعت الجوال : هلاا
فيصل : وينها ؟
وجدان : ماتلاحظ انك مروعها من امس ؟
فيصل : هي تلحقني ماجيتها انا
وجدان : ايييه هين بس اخلص شتبي
فيصل : انتم اللي داقين وش تبون ؟
وجدان : ايييه صح نبيكم تودونا المحطة
فيصل : ملزمين ؟
وجدان : اذا ممكن

مشاعل بصوت واطي : خلصي بسرعه رصيدي بيخلص
فيصل سمعها وضحك : اذا كان واحد من العيال بيجي معي بتصل عليكم تجهزون
وجدان : ليييه يعني بناكلك ؟
فيصل : مشاعل بتاكلني
وجدان : هههههههههههه
فيصل : يالله بسكر
وجدان : رد لي خبر
فيصل : اوك

سكرت منه

ريوف : وش يقول ؟
وجدان : بيشوف واحد من العيال يجي معه


عند العيال

فيصل يدور بعيونه بين العيال يشوف اللي طفشان من الفلم واستوعب ان محد يشوفه

عبدالعزيز وسلمان نايمين وسيف فاتح لاب توبه ومشعل وعبدالرحمن بزاويه جنب بعض على جوالاتهم وسعود برا يكلم وعبدالله وخالد مو موجودين
شاف ماجد يتثاوب

فيصل : مجيييد
ماجد : لبيه
فيصل : تجي معي
ماجد : وين
فيصل : البنات يبون يروحون لمحطه قريبه من هنا
ماجد : كم عددهم ؟
فيصل بملل : والله مدري اخلص علي
ماجد : ايه يالله اصلا ابي دخان حقي خلص
فيصل : لو تاخذ من بقاله سلامه يجيك سرطان رئه على طول كل اغراضه قديمه ومضروووبه
ماجد : هههههههههههههههههههههههههههههه الله لايقوله
فيصل اتصل على وجدان : يالله اطلعو

طلعو البنات
مشاعل والهنوف ووجدان ورهف وريوف
ركبو السيارة

مامشى فيصل
وجدان : يالله
ماجد : بس انتم ؟
وجدان : اييه
فيصل : غريبه وين الباقي
ماجد : شكل المعازيم ماكلينهم
فيصل : لا واضح ان مشاعل قايمه بالواجب
مشاعل تدور شي جنبها تضربه فيه بس مالقت
فيصل يسترسل : شف من التخمه سااكته
البنات : هههههههههههههههههههههههههههههه
فيصل : مشاعل زعلتي ؟
مشاعل : لا
فيصل : ليتك قايله ايه عشان اقول احسن
مشاعل مسكت شنطتها ورمتها عليه
فيصل مات ضحك : ههههههههههههههههههههههههههه اسف والله
مشاعل : هات شنطتي
فيصل يلف ورا عشان يعطيها الشنطه : نعتذر يابنت العم بس لازم تتعودين على ثقاله الد.. معنا وجه جديد ؟
وجدان : ايييه رهف صديقتي
ماجد : الله يقلعك يافيصل وانت تتهاوش ماحترمتو ضيفتنا
فيصل يلف على المحطه : بطريق الرجعه بخليها تضربني بشنطتها عشان نفك الميانه مره وحده
وجدان : بذبححك عاد كل شي الا رهف

رهف كانت ساكته ومستغربه شوي من الميانه

نزلو كلهم
البقاله كانت صغيرة

رهف : لو اني عارفه ان هذا حجمها ماتعبت نفسي وجيت
وجدان : لايغرك الحجم فيها كل شي ترى
الهنوف : يخسون الدانوب وكارفور عند بقاله سلامه
ريوف : خذو للبنات عشان ماياكلونا اذا صحو
وجدان : نخلي مشاعل تاكلهم
مشاعل تضربها : اخلص من اخوك تجيني انتي
وجدان : ههههههههههههههه امزح والله
ماجد يجيهم : خلصتو ؟
وجدان : ايه دقايق بس
ماجد : اذا طلعتو خلال خمس دقايق بعزمكم على الفطور
البنات تحمسو وراحو يحاسبون

طلع ماجد وهو يضحك وراح لفيصل
ماجد : تعال بسألك هنا فيه مطعم قريبه ؟
فيصل : فيه
ماجد : وين قريبه؟
فيصل : ايه بس حتى الكلب مايقبل ياكل منها
ماجد : ياويلي بياكلوني البنات
فيصل: ليه ؟
ماجد : قايل لهم خلصو بسرعه واعزمكم على الفطور
فيصل : وهقتنا الله يهديك

ماكمل كلمته الا والبنات جايين

فيصل بصوت واطي : متأكد واعدهم بفطور بس ؟
ماجد : هههههههههههههههه ايه والله

ركبو السيارة
وجدان : يلا خل نروح نفطر
فيصل : عندكم خيارين فقط يالمطعم اللي بالمحطه الثانيه ولا توست وعصير وانا انصحكم بالثانيه
مشاعل : يالله نبي المطعم العوض ولا القطيعه
فيصل : متأكدين ؟
الهنوف : ايييه
فيصل : انا انصحكم نرجع المزرعه وتفطرون هناك عشان ماتكملون باقي الاجازه بالمستشفى
ماجد : وصخ المحل مره ؟
فيصل : اذا تذكرون اجازة رمضان اللي تنوم فيها دحوم بالمستشفى ترا اخر وجبه اكلها من هنا
رهف بحماس : لاااااااا
ماجد : اخيرا صديقتكم نطقت ههههههههههههههههه
وجدان : والله خاطري بفطور
فيصل : عشان تعرفون ان المطعم جد مقرف بقائمه الفطور عنده شاورما
ماجد : وين القرف بالموضوع ؟
فيصل : اصبر تخيل ينزل السيخ من الفجر عشان اذا جا الليل يكون خالص كله
ماجد : الله يقرفك ياوصخ
فيصل : ومايعترف بالقلفز ابدددد
ماجد : خلاص يرحم امك اسكت
فيصل وهو يضحك : والقطاوه بالمطبخ اكثر من العمال
رهف انقلبت كبدها صدق : تكفى خلاص خل نرجع
فيصل مات ضحك
مشاعل بصوت واطي لوجدان : بجيب اخوك عندي اذا قررت اسوي دايت
وجدان : ههههههههههههههههههههههههه والله ينفع مره
ريوف : حرام عليكم جوعانه امس ماتعشيت
فيصل : طيب فيكم النوم انتم ؟
البنات : لاا
فيصل : خلاص نرجعكم المزرعه ونجيب لكم فطور فخم
وجدان : من وين ؟
فيصل : فيه مطعم بس انه بعيد شوي

رجعو البنات للمزرعه وراحو ماجد وفيصل يجيبون لهم فطور

بعد ساعه وصلهم الفطور وافطرو ونامو عشان يقومون العصر


الظهر طفى الكهرب على المزرعة

بعد ساعتين

بالغرفه اللي نايمين فيها البنات

قامت الهنوف من النوم : الحيوان اللي مطفي المكيف يرجع يشغله
مشاعل اللي كانت صاحيه من اول ماطفى : شركه الكهرب الحين اكلمهم يشغلونه لعيونك
ريوف تتأفف : مشاعل بما انك مصحصحه ممكن تهفين علينا
مشاعل : بهفك بالجوال والله
ريوف : ياربيه والله حرر حرام عليكم
وجدان قامت معصبه : الله ياخذ العيال
الهنوف : وش سوو ؟
وجدان : ماسوو شي بس احتياط
ريوف : ههههههههههههه هنوف اتصلي على عزوز اتذكره يشتغل بشركه الكهرب قولي له يشوف لنا حل
الهنوف : ريوف جد مو وقتك
ريوف مافهمت : مو وقتك انتي تستحين اتصلي بس
الهنوف رمت عليها المخده
مشاعل : عزيز مهندس بشركه الكهرب ماله دخل بهالامور


نرجع للرجال

نروح للعيال اللي كانو قايمين من بدري باستثناء ماجد وفيصل اللي مانامو الا الظهر
وكالعاده ماحسو

عبدالعزيز : ياااثقل نووومهم
سيف : مرره اعوذ بالله كنت احسب نوم ماجد اثقل نوم مادريت ان فيصل ينافسه
سلمان : ياحليلك ماشفت شي
سعود : الكهرب يطفي هنا كثير ؟
عبدالعزيز : لا مو كثير بس اذا طفى خلاص انسى يشتغل بنفس اليوم
سيف : لااااتقول !
عبدالعزيز : والله غالبآ كذا
سيف : مافيه نت يعني
عبدالعزيز : للاسف بس اذا محتاجه مره عندي نت محدود خذ استخدمه
سيف : لايابعد قلبي ماتقصر


البنات صحو من الحر وطلعو برا
الا الهنوف ووجدان ورهف

رهف : اوووف ماشبعت نوووم
الهنوف : رهف وش جدييد عزيز ؟
رهف : للان على حالته يسولف شوي بس مره رسمي وامس مصور فيلم وسألته شسمه على اساس نبدا سالفه ونمت وهو مارد
الهنوف : والله ماتوقعت انه بهالثقل شهر كامل ماقدرتي تمسكين عليه شي ؟
وجدان : توقعت انا ترى من يوم انه صغير شخصيته كذا
رهف : يعني مشواري طويل
الهنوف : لا احس تمثيل قدامنا بس
وجدان : وين تمثيل وهي تسحب الكلام منه من شهر
الهنوف : يمكن شاك انها تعرفه !
رهف : مسسستحيل ماشك ولا 1% كل معلوماتي عنده غير وغير كذا حتى لو اقول معلوماتي انا ماراح يشك لانه مايعرفني
الهنوف : ماسألك عن تخصصك ؟
رهف : الا قلت له متخرجه من قانون
وجدان : ولو لخمك بسؤال قانوني ياحظي ! وش بتقولين ؟
رهف : شكلك نسيتي ان وعد اختي متخرجه قانون
الهنوف : حبيبي اللي حابكها صححححح
رهف : افاا عليييك اعجبك


دخلو جمانه وغدي عليهم

غدي : تعااالو برا جدي جاب 4 دبابات
وجدان : فيه شمس ؟
جمانه : لا غيم بس دفى شوي والبسو شيلاتكم ترى عيال اعمامي كلهم برا
الهنوف : يلا شوي ونجي

طلعو جمانه وغدي

رهف : روحو انتم انا بجلس هنا
الهنوف : خير تعالي
رهف : لاوالله كلهم مجتمعين فشيله مره ماعرفهم
وجدان : ماراح اطلع اذا ماطلعتي
رهف : احس قطه وجه وانا طالعه واعمامكم وجدكم فيه
دخلت مشاعل على جملتها
مشاعل : جدي واعمامي مو فيه بس عيال عمي وباقي البنات كلنا بنلعب تعالي رهووف
رهف استحت يوم سمعتها مشاعل
جت مشاعل وسحبتها من يدها : تعالي واول من بيركب الدباب معي انتي
وجدان : عاد انتي ماتعرفين سواقه مشاعل
رهف : لايكون ماتعرفين وبتوهقيني معك
مشاعل : عيييب عليك ! لعبتي الدبابات تعالي انتي بس

قامت رهف مع البنات وطلعو كلهم برا

اول ماطلعت هنوف كان عبدالله اخوها راكب الدباب وجا وغبر عليها

الهنوف تصارخ : ياسخييييييييييف عيوووني
عبدالله بصوت عالي : اسف حررم عزيز
الهنوف ندمت انها طلعت
وعبدالعزيز كان واقف وجنبه مشعل ويناظرها بتفحص يبي يشوف ردة فعلها بعد جملة عبدالله وشاف وجهها مكشر
عبدالعزيز بقلبه : كل ذا عشان نايف ! وابتسم باستهزاء
كانت عيون هنوف عليه بهاللحظه واستغربت ابتسامته بس ماعطت الموضوع اهميه

عبدالله رجع ووقف الدباب عندهم : يالله بنات من تبي اول دوره ؟
الهنوف : اناااا بس مو معك ما اثق فيك
عبدالله : افاااا !
الهنوف : والله شكلك نسيت اخر مره ركبت معك شصار
عبدالله : هههههههههههههههههههههههههههههه بعير انتي !
الهنوف تحاول تعلي صوتها : لا ما انسى ومستحيل اسامح
عبدالعزيز انقهر منها بس ماوضح وراح جهتهم وهو مبتسم
عبدالعزيز : ولايهمك يالهنوف انا اركبك معي
البنات قامو يصفرون والهنوف انخطف لونها
عبدالله : يالله زوجك بيقوم بالمهمه ( ويوجه الكلام لعبدالعزيز ) نصيحه بشويش عليها ماله داعي تنتهون بحادث والله ماتثق فيك الى يوم الدين
عبدالعزيز : لا ماعليك بعيوني هي
الهنوف : لالامابي خلاص
عبدالله : تصيحين قبل شوي الحين ماتبين تركبين
الهنوف : الا بركب بس مع وحده من البنات
مشاعل : محد بيركب معك روحي مع عزوز بس لاتذبحين اخوي بكبريائك
الهنوف جتها الصيحه وتشوف عمها خالد جاي من بعيد : عمييييي حبيبي بيركب معي
خالد : وش السالفة شفيكم
الهنوف : بيركبوني مع عزيز غصب
عبدالعزيز ابتسم يوم سمعها تقول عزيز بس بسرعه رجع وجهه جدي
خالد : طيب وش فيها زوجك الا دقيقتين ليه ماتركبين معه
الهنوف : شفيييكم انتم مابعد تملكنا !
عبدالعزيز ابتسم : نملك اليوم وش فيها !
الهنوف ساكته ماتدري وش تقول
خالد : بتركبين معه ان كنتي تغليني

خالد حاط بباله انها زعلانه للان من بعد سالفه الشاليه ماتوقع ان فيه شي اكبر من كذا

الهنوف ودها تصيح بس حاولت توضح ان الوضع عادي
الهنوف : اوكي

استغرب عبدالعزيز انها رضخت بسرعه توقع انها تطول
نزل عشان تركب ويركب وراها

الهنوف ركبت ركب عبدالعزيز
قلبها قامت ترتجف اول مره تكون بهالقرب من شخص وغمضت عيونها بقوه
عبدالعزيز حس فيها وخاف شوي وبصوت واطي : هنوف فيك شي ؟
الهنوف بصوت واطي : عادي انزل ؟
عبدالعزيز رحمها شوي : اوكي بس دوره وحده وانزلك عشان محد يستغرب بس
الهنوف : اوكي

مشى فيها بشويش ولف ورجعها

عبدالله : ويييين التفحيييط والتقلب ولا عشانها زوجتك
عبدالعزيز يضحك : لا خايف تفقد الثقه فيني وش بيرجعها عاد
خالد : حتى حلا ماترضى بهالدوره
عبدالعزيز : انا وزوجتي راضين خلاص
الهنوف : ايه من جد وش فيكم شايلين همنا مره ؟

عبدالعزيز استغرب من ردها بس تجاهل

خالد : عصبت هنوفي خلااص خلاااص بس كنا نبي نقدم شهر العسل لكم بس ماتستاهلون
عبدالله : وخر بس خلني اكمل لعب ليتني مانزلت
عبدالعزيز : لا وخر باخذ اختي . هيفاء ولامشاعل من تبي تحصل على شرف الركوب معي ؟
هيفاء بخوف : لاااااااماحب الدبابات انا بشوفككم من بعيد
مشاعل نطت : اناا بجي معك
وراحت تركض له

خالد : دحيم ومشيعل ماخذين دبابين روحو رجعوهم
عبدالعزيز : دقيقتين ويكونون عندكم

وفعلا دقيقتين ورجعو عبدالرحمن ومشعل

خالد : ههههههههههههههههه وش سوا بكم عزيز ؟
مشعل : قال رجعو الدبابات ويوم قلنا شوي قعد يحددنا لين بغينا نقلب
خالد : ههههههههههههههه كفووو عزيز
عبدالرحمن : ماكنت متوقع والله يسويها ومعه مشاعل بس والله سواها
فيصل توه صاحي من النوم وجايهم : وش السالفه وش تسوون
خالد : صباح الخييييييير
فيصل : صباح التبن والله وموب لك خويلد للتبن شركه الكهرب
ماجد وراه : عجزنا ننوم والله
سيف : ياكذاااااااب حلا تنطط عليكم قبل شوي مادريتو عنها ولاتحركتو حتى
ماجد : بذمتك ؟
سيف : والله
فيصل : حيوانه هالبنت
عبدالله : على اساس حسيتو يعني ؟
فيصل : عورني ظهري يوم علمتوني
سعود : وين الدباابات
خالد : اصبرو لين يخلصون البنات
وجدان : ياعيووني ياعمي اموت بالمناصرين للمرأه بكل زمان ومكان
فيصل : اركبي معي واوريك مناصر المرأه وشو
وجدان : مابعد بعت عمري

بهاللحظه رجعو عبدالعزيز ومشاعل

مشاعل تصارخ : الله ياخذك ياعزيز الزفت انت وسواقتك الخايسه
عبدالعزيز ميت ضحك : انتي غبيه ولا احد يطيح من الدباب لاني لاف بقوه ؟؟؟
خالد : تبيها تطيح وهو متعدل يعني ؟
عبدالعزيز : اوكي ساقي حكت الارض بس بعد غبيه ليه تطيح
مشاعل نزلت وهي تدعي عليه

عبدالعزيز باستهبال : يالله من يبي دوره ؟
ماجد : والله ودي بس شكل اختك مايحمس
مشاعل : كل تبن انت الثاني
ماجد : هههههههههههههههههههههههه الحقيقه ماتزعل
فيصل : لاتتطنزون على بنت عمي
مشاعل : انت بالذات اسكت
خالد : هههههههههههههههههههههههه وش فيك عليهم ؟
فيصل يمثل الحزن : انا ؟ ادافع عنك وتقولين اسكت ؟ يجي منك اكثر يابنت العم
مشاعل : لايكثر ياولد العم
ماجد : انتي مشاعل صح ؟ بحطك بالقائمه السودا خلاص منيب محارشك ابد
مشاعل : يكون احسن
عبدالعزيز : كفوووو اجلديييهم


كملو لعب لين جا الليل بعدين نزلو عشان يجهزون العشاء


الليل

عبدالعزيز ركب السيارة عشان يشغل النت
شاف رساله من روفا ورد عليها
واستغرب انها مافتحت الرساله بالعاده تفتح على طول
بسرعه راح لبرنامج ثاني ونسى موضوعها

الساعه 2 الفجر البنات نامو ومابقى الا رهف
وكان الكهرب طافي للان


جلست شوي تحاول تنام وماجاها النوم وقررت تطلع بس خافت
ودها تقوم وحده من البنات بس رحمتهم توهم نايمين

اشتغل الكهرب وفتحت اللمبات وارتاعت رهف
شافت كل البنات بمكانهم الا مشاعل

قامت طفت اللمبات ومسكت جوالها
وشافت مشاعل مرسله سناب برا
كتبت لها : ويينك ؟

وبنفس الوقت شافت رد عبدالعزيز وردت عليه

برا كانت مشاعل على الدرج حق باب المطبخ جالسه مع عبدالعزيز يسولفون


مشاعل : اخخيرا فتح الكهرب , بدخل اسوي كوفي تبي اسوي لك معي ؟
عبدالعزيز : ياليت والله
مشاعل قامت : طيب

فتح جواله وشاف رد من روفا وتجاهلها بنفس الوقت كانت رهف متصله على مشاعل بسناب يوم ماردت عليها

شاف الاسم وارتاع !
روفا ونفس الرقم !!!
فتح جوال مشاعل على اسمها وفتح جواله

نفس الاسم !!!
عبدالعزيز بقلبه : وش هالصدف !! صديقة مشاعل تكون عندي !! غررريب !!
جا بيفتح رسالتها بعدين حس انه ملقوف وترك الجوال
اتصلت مره ثانيه

عبدالعزيز : مشااعل جوالك يرن
مشاعل تركت اللي بيدها وجت بسرعه : ميين ؟ ( وخذت جوالها بسرعه ) رهوووف ! غريبه صحت
عبدالعزيز : مين رهف !
مشاعل : صديقه وجدان وهنوف
عبدالعزيز ارتاع وجلس يربط الافكار في مخه
عبدالعزيز : وش جابها عندك تعرفك زين ؟
مشاعل : ايييه اعرفها هي الحين هنا
عبدالعزيز : هنا وين !
مشاعل : بالمزرعه
عبدالعزيز : وش جابها !
مشاعل : ماتلاحظ انك تسأل واجد ؟
عبدالعزيز حس انه زودها : استغربت والله صديقتهم وجايه هنا
مشاعل : بيتهم قدام بيت جدتي
عبدالعزيز : اماااا عايلتهم ال... ؟
مشاعل : ايوووووه عليك نور
عبدالعزيز : اخت ترركي .. اهااا !
مشاعل : اتوقع اي
عبدالعزيز : ياالله قومي خلصي الكوفي جاني نوم
مشاعل : بعطيك اياه وبطردك رهف تقول بطلع معك
عبدالعزيز : بيومين صارت اغلى مني
مشاعل : لاوالله بس رحمتها تقول صاحيه من ربع ساعه
عبدالعزيز : خلاص ياعيوني قولي لها تجي بقوم اانا الحين
مشاعل : خذ قهوتك اول
عبدالعزيز : اوكي

خذ قهوته وراح لقسم الرجال وهو يقلب الموضوع براسه
رهف صديقة هنوف ووجدان عندي بسنابي !!
بعدين حاول يتذكر متى شافها : اهااااا هي اللي وديتها لبيتهم مع فيصل ! صحح بنفس اليوم ذاك جتني اضافتها بالسيارة ! حاول يتذكر وجهها بس ماقدر
يالله مردك ياعبدالعزيز تعرف وش عندها وليه مضيفتك
دخل جواله بجيبه ودخل المجلس يكمل السهره مع العيال



تعديل سحابٍ دنى ..; بتاريخ 13-01-2019 الساعة 12:16 PM.
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 27
قديم(ـة) 14-01-2019, 01:58 AM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي جديد¨°؛©
 
الافتراضي رد: غالبا مايكون الحب قدر لاخيارا


اتمنى التفاااعل

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 28
قديم(ـة) 14-01-2019, 11:15 AM
صورة سحابٍ دنى .. الرمزية
سحابٍ دنى .. سحابٍ دنى .. غير متصل
©؛°¨غرامي جديد¨°؛©
 
الافتراضي رد: غالبا مايكون الحب قدر لاخيارا


للرررررفع..

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 29
قديم(ـة) 14-01-2019, 11:47 AM
Besou chan Besou chan غير متصل
©؛°¨غرامي جديد¨°؛©
 
الافتراضي رد: غالبا مايكون الحب قدر لاخيارا


روايتك حلوة يا غلاا

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 30
قديم(ـة) 14-01-2019, 01:11 PM
سديـــم. سديـــم. غير متصل
©؛°¨غرامي مشارك¨°؛©
 
الافتراضي رد: غالبا مايكون الحب قدر لاخيارا


السلام عليكم
البااارت اليوم صراحة جميييل جدااا

عبد العزيز اكتشف روفا او الاصح رهف وبباله أسأله ليه تسوي كدا

يعطيك العافية

الرد باقتباس
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1