انفاس الماضي ©؛°¨غرامي جديد¨°؛©


"قليل من الشجار ينعش ذاكرة الحب، قليل من الشجار ينعش قلب الحب، لكننا شربنا من خمرة الشجار حتى ثملنا و قتل كل منا صاحبه، وعربد على جثته حتى دون أن يلحظ ذلك وأيضاً أغفر لك أنك حولتني من عصفور الرحيل إلى مسمار مثبت في تابوت الغــــــــــــم".غاده السمان

السلام عليكم ورحمة الله..
صباح الورد والفل والياسمين والريحان والجوري وكل شيء جميل..
سجلت هنا كي اتيح لقلمي الحريه بعد صمت دام سنين اضع هنا كتاباتي لعلها تتلقي الاعجاب والنقد وعدم التجريح لا ابيح ولا احلل من ينقل روايتي وينسبها لنفسه فمن يريد نقلها يجب ان ينقل اسمي معها.

لا تلهيكم الرواية عن الصلاه

استلمو البارت الاول وانتظر ارائكم توقعاتكم




قلوب فوق لهيب الشموع



البارت الاول

أُغالِبُ فيكَ الشّوْقَ وَالشوْقُ أغلَبُ
وَأعجبُ من ذا الهجرِ وَالوَصْلُ أعجبُ
أمَا تَغْلَطُ الأيّامُ فيّ بأنْ أرَى
بَغيضاً تُنَائي أوْ حَبيباً تُقَرّبُ
وَلله سَيْرِي مَا أقَلّ تَئِيّةً
عَشِيّةَ شَرْقيّ الحَدَإلى وَغُرَّبُ
عَشِيّةَ أحفَى النّاسِ بي مَن جفوْتُهُ
وَأهْدَى الطّرِيقَينِ التي أتَجَنّبُ
وَكَمْ لظَلامِ اللّيْلِ عِندَكَ من يَدٍ تُخَبِّرُ
أنّ المَانَوِيّةَ تَكْذِبُ
وَقَاكَ رَدَى الأعداءِ تَسْري إلَيْهِمُ
وَزَارَكَ فيهِ ذو الدّلالِ المُحَجَّبُ
وَيَوْمٍ كَلَيْلِ العَاشِقِينَ كمَنْتُهُ
أُرَاقِبُ فيهِ الشّمسَ أيّانَ تَغرُبُ
وَعَيْني إلى أُذْنَيْ أغَرَّ كَأنّهُ
منَ اللّيْلِ باقٍ بَينَ عَيْنَيْهِ كوْكبُ
لَهُ فَضْلَةٌ عَنْ جِسْمِهِ في إهَابِهِ تَجيءُ
على صَدْرٍ رَحيبٍ وَتذهَبُ شَقَقْتُ بهِ الظّلْماءَ
أُدْني عِنَانَهُ فيَطْغَى وَأُرْخيهِ مراراً فيَلْعَبُ. لأن الشوق معصيتي

المتنبئ


تنهد بصمت وهو يقول لامه:يمه واللي يسلمك ابي اي بنت الا ريم بنت خالي يمه .

امه بحده:وليش ان شاء الله يافهد شايف شيء علي بنت خالك عشان ما تبيها والا حاط عينك علي وحده؟

فهد بهدوء:يمه انتي تعرفين علاقة ريم بخواتي وخصوصا ريحال يمه وكلامها اللي ما تحشم بيه احد واولهم انتي عمتهم.

امه بغضب:عيل ريحال معبيه لك دماغك ادري فيها اذا كم من مره تهاوشت معها ما يعني انه...

قاطعها باحترام:يمه والله والله ثم والله لا ريحال ولا شيخه تكلموا عنها بس يمه انا سمعتها تتكلم عنهم بدون ما اقصد ويمه واللي يسلمك انا ولدك الوحيد وابوي الله يرحمه ويغمد روحه الجنه ابي اتزوج وارتاح مو اجيب لي وحده تتهاوش مع خواتي ابي لي وحده تريح راسي وتتفاهم مع خواتي واللي يسلمك يمه.

وكمل بهدوء:يمه خواتي ذولي الهوي ما احبه يقرب لهم فشلون زوجتي يمه افهميني واللي يسلمك شلون اتزوجها وبعدين بوقف معها والا مع خواتي الموضوع ذا يمه منتهي منه وما ابي احكي فيه غير ريم بتزوج بس بنت اخوك السموحه منك.

وقف وهو يبوس راس امه بحنان ويهتف:عندي دوام وبرد مع المغرب اذا احتجتوا شيء دقوا علي يالغاليه.

هزت راسها وهي تقول بقلبها عسي الله يحفظك يمه ويفتح كل الابواب بوجهك ويرزقك ببنت الحلال.

دخلت لغرفة اختها والدمعه بعينها جلست علي السرير وسمعتها تسالها:شفيك شيوخ؟

شيخه بانفعال محزن:ريحال اخوك رفض يتزوج ريم وحكت لها كل اللي صار وهي تصيح بالم.

ريحال مسحت علي شعرها:مالها نصيب تاخذ فهد والا هي تطول تاخذ الدكتور فهد عسي الله يرزقه بوحده تنسيه ريم اللي ما عمره فكر فيها.

شيخه بهدوء:امين يارب...حتي بنات عمك وحده متزوجه والثانيه مخطوبه لولد عمك الثاني والثالثه ما تبي تتزوج والرابعه الله يشفيها والاخيره باول ثانوي هههههههههههههه.

ضحكت وهي تتخيل فهد متزوجها .

ريحال ببسمه:خبله الا متي ترد رسيل من السفر اشتقت لها حيل الدبه.

شيخه بنص عين:اشتقتي حق رسيلو والا اشتقتي حق اللي مع رسيل تري سالفتك انتي وياه طالت واشمخت وانا اختك ردي بيت ريلك بلا فضايح صارلك شهر الحين من جيتي من بيته.

ريحال تنهدت بوجع فهي بالفعل مشتاقه حد الوجع وهذا البعد اضناها كانت ستعود بس فاجاها بسفره مع اخته تمنت تكون معه حتي لو كانت زعلانه منه.

شيخه ببسمه علي سرحان اختها فهي تفعل ذلك دائما حين تاتي سيرة ابن العم عسي الله يصلح بينهم ويجمع قلوبهم علي الخير.

ريحال بهدوء:شيخه تروحين معي المشغل ابي اسوي شعري وبرد بيتي.

شيخه بفرح:ما بغيتي يا بنت منصور كبدي طقت منك .

ضحكت بهدوء.


@@@@@@@@


نزلت جني تركض وهي تجلس جنب امها وببسمه وتبوسها:صدق يمه رسيل بترد اليوم صدق.

امها ببسمه:ايه يمه صدق بترد عسي الله يحيمها.

جني بنص عين:السعاده بتطلع من ويهك وهذي هي مو بنتك شلون لو كانت بنتك.

امها بعتب:لا عاد اسمعك تقولين كذا تراه ما فيه فرق بينكم وبينها .

جني ابتسمت:حاضر يمه الا وين اسيل و فاتن وبنتك سحاب مبلطه عند ريلها ما تقول ازور خواتي اشوفهم.

امها بضحكه:الله عليك مو امس عندك واشوفها جايبه لك وشكثره كاكاو والا تبينها تترك زوجها وتجلس عندك طول الوقت.

جني بضحكه:وش مستفيده منه زوجها ذا تراه مغثه يمه.

امها تضربها بالمخده :قومي عن ويهي الحين تنظلين اختك عسي الله يهنيها.


جني تبوز:ما ابي قولي لولد اختك يرد لنا اختنا خلاص نحنا هونا ماعاد نبيه ابي اختي.

سحاب هي اللي مربيه جني من صغرها وعشان كذا جني متعلقه فيها حيل وتحب ترفع ضغط امها شوي.

دخل يضحك وهو يسمع كلام امه واخته :ذا اللي يجيب عيال علي كبر بيصير بينهم صراع اجيال.

امه بحده:طيب يا نايف ان ما علمت ابوك اراويك صراع الاجيال يا ولد بطني صراع اجيال عيل اراويك صراع الاجيال وشهو انتظر بس يرد نواف من السفر.

جني بضحكه:ليش تنتظرين نواف كاهو مناف بيته جنب بيتنا وضحكت وهي تناظر اخوها اللي يضحك بعد.

ناظرت زوجها وقالت:تعال يا مساعد شوف عيالك.

جلس جنب جني وحضنها بحنان:شفيك يام مناف؟

ام مناف:بنتك ذي بتذبحني وولدك يقول وقالت وهي تقلده:ذا اللي يجيب عيال علي كبر بيصير بينهم صراع اجيال ..

ابوه يكح من الضحك:نايف مو عيب يا ابوك ونحنا نفكر نجيب لكم اخو؟

نايف ضحك بقوه وامه انحرجت وجني راحت تركض حق خواتها ونايف وراها .

هتفت بعتب:مساعد احرجتني حيل.

قال بحنان:وانا اموت اذا احرجتك يا حصه.

ضحكتك وقالت:مساعد ولدك ما تحس انه مصخها مع بنت عمه الناس كلت وجوهنا.


مساعد بهدوء:اليوم انا بروح اجيبها البيت دام انا اللي اخذتها بيت ابوها انا اللي اردها وما انقص من قدر اخوي المرحوم ولا ولد اخوي.

وبعدها قال بحذر:فاتن جايها خطاب.

تنهدت بوجع:شسوي معها مو راضيه يا ابو مناف بنتك ذي تعبت معها اقول لها ذي مو نهاية الدنيا بس شسوي طلعت عليك راسها يابس.

بحب:وانتي ما اعجبك الا ذا الراس اليابس .

ضحكت ببسمه حنون له تحبه رغم كل شيء.

@@@@@@@@@

فتحت عيونها علي رفرفة قبلات علي وجهها ورقبتها وردت اغمضتهم من الخجل رغم مضوي سنه علي زواجهم وهي الان حامل بالشهر الثامن الا انها لازالت تشعر بالخجل.

ببسمه وهو يجلس:صارلي ساعتين راد من الشغل وانتي نايمه يا كسوله.

بفزع:ليش ما صحيتني؟؟

بعشق:شفتك تعبانه ما حبيت اصحيك اشوف البزر ذا لاعب بحسبتك ومتعبك ومتعبني معك.

باست كتفه بحب:عسي الله لا يحرمني منك ياقلبي.

ببسمه:من زمان عن كلامك الحلو.

ضحكت بمحبه:خالتي تحت والا راحت بيتنا.

بضحكه:امي تحت مع رعد تحن عليه يتزوج وهو كانها تغني حق فيروز.

سحاب بجديه:كاهو ماجد بيتزوج اسيل وشله ما يتزوج معهم.

ببسمه:وسالم .

ببسمه:وسالم عسي الله لا يحرمني منه.

ضحك ببسمه:تدرين يوم رديت ناظرت فهد ولد عمي معصب حيل نا ادري شفيه حتي سلام ما رده علي تدرين هو ورعد اخوي مثل بعض ههههههههه.

سحاب ببسمه:تدري نواف بيرد مع رسيل عشان كذا ابي انام ببيت ابوي.

بنص عين:لا.

بتذمر:سالم.

بمحبه :عيون سالم تروحين بس تنومين هناك نو وي يا عمري ما اقدر انام لحالي اخاف يا قلبي.

@@@@@@@

جني دخلت لغرفة فاتن وارتمت علي السرير وهي تهتف:رسيل بتجي اليوم شرايكم نزين لها غرفتها ونسوي لها مفاجاه.

ناظرت اسيل اللي تناظر جوالها وسرحانه سالت بفضول:شفيك لا يكون الحبيب يكلمك.

اسيل ترفع شعرها الاسود :اكيد لا بنت اخوك ذي ما ادري وش السواه معها هي واختها.

جني قربت منها:شمسويين بعد ريا وسكينه .

اسيل تناظر فاتن اللي الم كسي ملامحها وهي تسمع سيرتهم.

قالت بهدوء:امس رايحه عيد ميلاد رفيجتها ولابسه لبس اقل ما يقال عنه عاري وراده البيت الساعه 12 واخوك الله يهديه بس.

جني بطفوله:ايه ماله كلمة علي بناته الا علينا احنا مو تاركنا نتنفس حتي ارحمنا يارب بس.

فاتن بهدوء:لا تتدخلين فيهم ولا تنسي ذاك اليوم وش قال لي بسبتهم واني اقولهم ينتبه لهم شوي ما ابيك تتوجعين بعد.

جني باستغراب:وش قال لك؟

بالم:ماله داعي الحين.

اسيل بحده:نتركهم يعني الين ننفضح بين الناس ترانا عيال الشاهر مو اي حد.

جني لوت فمها:عيال الشاهر من عصر الجاهليه استنوا علي ان ما خبرت نواف دواهم عنده ومالكم انتم دخل وانا بزر منو بيشره علي وكملت وهي تناظر فاتن:لا تتركين الناس تخليك ملطشه لانك انتي شخصيتك ضعيفه والا لو انا اللي يقول لي كلمه اردها عشر.

بعيون مدمعه كملت:لا تتركينهم يتشمتون فيك وتري اللي صار معك مو عيب يعني انتي اللي تاركته موقف حياتك.

طلعت من الغرفه تركض لتصدم في اخوها اللي كان صاعد غرفته ويوم ناظر ويهها الباكي قال بحنان مشبع رغم مشاجاراته الدائمه معها:شفيك جنون؟

الدفي اللي بصوته خلاها تنهار وصاحت بوجع والم علي اختها الحنونه والطيبه وهي تشد علي اخوها بقوه.

انفجع بخوف وهو يمسح علي راسها وبكاها مو طبيعي:متهاوشه مع البنات.

هزت راسها بلا.

ابتسم :طيب خلصتي مسح دموعك بدشداشتي.

رفعت راسها وناظرت ثوبه المعفوس وضحكت:فدي جني الشاهر والا ما استاهل.

بعثر شعرها البني وقال:فداها الثوب وراعيه.

رفع راسه وهو يناظر اسيل تصورهم وضحك وسمعها تقول:بصراحه ما يتفوت براويها حق نواف ورسيل ماراح يصدقون.

جني غمزت له وراح لاسيل مسكها واخذ منها الجوال ومسح الفيديو وناظرها اخته ذي خوافه لدرجه غريبه الله يعين ولد العم عليك.

قال بشموخ:شرايكم نروح السوق ؟؟

اسيل وجني فتحوا عيونهم بصدمه وجني تسوي روحها داخت من الصدمه.

ضحك وقال:عندكم ربع ساعه وفاتن معكم.

جني ببسمه نص ساعه لانه يبلنا ربع ساعه نقنع اختك.

@@@@@@@@

نزلت الطياره من نص ساعه وبعدهم ينتظرون عمهم عشان ياخذهم لانه يبي يسوي مفاجاه لاهله ولتلك الشقيه العاتبه والغاضبه.

اشتاق لها نعم اشتاق واضناه هذا الشوق فهي لا تعلم كم يحبها لا تعلم والا ما خرجت من البيت وتركته.

سمع صوت جواله ووقف وهو يساعد اخته توقف لكن وجدها وقفت بهدوء ابتسم وهو يري عمه الصغير ليحضنه بقوه وهو يهتف:تو ما نورت الرياض.

نواف ببسمه:منوره باهلها يا بدر.

بدر يضربه علي راسه:بدر بعينك قول عمي.

ليلتفت لتلك المتغطيه بالسواد ويحضنها بحنان :الحمد لله علي سلامتك البيت من غيرك ما يسوي تري.

لم ترد عليه ليرفع حاجبه باستغراب ليهمس له نواف:الدكتور قالي انه راح يصير معها شوي تبدلات بالمزاج عشان كذا لازم نتحملها.

بدر:الحمد لله المهم انها عايشه وكل شيء بيكون بخير.

نواف ببسمه وهم يمشون للسياره:شلون الاهل؟

بدر بنص عين:لا تستحي وانا عمك اسال عنها فاضحك الشوق بعيونك.

صد عنه ليخفي شوق اتعب قلبه.

يعلم ان عمته اوجعتها وهو ظل صامت ولكنه كان سيرضيها بينهم ووحدهم فمهما حدث لا يستطيع الرد علي عمتهم فهي اكبر سن ولكن تلك المجنونه تركت البيت وذهبت مع والده وحين اخبره كذب علي ابيه وقال انه سمح لها بالذهاب لا يريد ان يكسرها او يغضب عليها فهد.

بدر يكسر الصمت في السياره ليقول:ها رسوله حاسه انك احسن الحين ولا عاد تفكرين تركبين سياره مع نايف الخبل.

بهدوء:خلاص حرمت.

بدر بحنان مشبع:عسي الله يحفظكم يا عيال مساعد يارب.

رددو بهدوء:امين يارب.

@@@@@@@@@@


قالت وهي تلبس عباتها:عمتكم وصلت ما ابي مشاكل ناظرت بناتها بحده وهي تقول:مشاكل مع جني لا ولا تنسون اخوكم متحلف فيكم بعد حفلة امس ولا تدرون انه جدكم اللي هو خالي ساكت انه ما يقدر يتكلم فلذلك يا عهود وانتي يا وعد انتبهو زين.

عهود تافف:طيب طيب.

وعد تلوي بوزها:حاضر.

امهم ببسمه:وتري هالويكند بنروح دبي.

البنات مع بعض :يس.

امهم بهدوء:عشان كذا ما ابغي مشاكل مع عمتكم وخصوصا رسيل وجني.

عهود ومو عاجبها كلام امها:قصدك ام لسان وام دميعه.

وعد:هههههههههههه.

@@@@@@@@@

وقفت جدام البيت تناظره من زمان ما ناظرته وكانها اول مره تنهدت بوجع وهي تدخل البيت وتناظر اللي واقفات وكل وحده دمعتها بخدها.

ابتسمت بهدوء وهي ترفع نقابها لتتفاجي بتلك الصغيره ترتمي في حضنها وتنحب بالم ظلت ايدها بالهوي مو قادره تمسح علي شعرها او تردها مكانها وتفاجات بها تضحك وتقبل خدها وهي تهمس بمحبه:اشتقت لك.

لتسلم بعدها علي الباقي زوجة ابيها وابيها الذي ارتمت في حضنه وهي تشم رائحته فقد اشتاقت اليها واشتاقت لهذا الحضن وكانه دهر.

نواف ببسمه:وانا مالي من الطيب نصيب.

ليقترب من ابيه ويقبل راسه ليحضنه والده بوجع فقد اشتاق له كثيرا ومن ثم يسلم علي والدته وخواته وكم تمني لو وجدها معهم فقد تعب من الهجر.

جني تهمس لاسيل:ناظري اخوك يدورها والله بنت عمك هبلت فيه اخاف يوم يصعد غرفته يغمي عليه يوم يلقاها جدامه والصبغه مغيرتها حيل.

اسيل تضحك علي اختها اللي لسانها متبري منها:يا لطيف منك قولي ما شاء الله عشان لا تنظلين بنت عمك.

ببسمه:ما شاء الله تبارك الرحمن.

جلس نواف جنب امه اللي حطت راسها علي كتفه وابتسم لجني اللي تساسر اسيل وقالت ببسمه:نواف ما ودك ترتاح.

نواف ببسمه:الا بس مشتاق لكم.

جني:لاحق علينا قم ريح عشان تصحي واشوف هداياي ادري رسول ما جابت شيء لانها تعبانه بس انت يا حظي وغمزت له.

ضحك بقوه :لا والله يام لسان وبعدين رسول اشترت لكم السوق كله .

مسكت ايده وقفته:يلا قوم.

مشي وهو يلوح بيده ويصعد الدرج ثم يعود ليركب المصعد لانه منهك من التعب.

جني تجلس جنب رسيل:ريحال بنت عمك ردت البيت.

هزت راسها وابتسمت.

جني تهمس لابوها:يبه شفيها بنتك لا يكون سو لها غسيل دماغ ذولي الاسبان ينخاف منهم والا اخاف خطف قلبها هناك مدريدي وظل عقلها هناك.

خبطها ابوها علي راسها:ما تبطلين طوالة لسان صح.

توها بتتكلم بس سكتت وهي تناظر سحاب تدخل من الباب وتوخر نقابها وبطنها قدامها:هلا والله بالقاطعه حرم سالم .

ضحكت وهي تبوسها:هلا والله باللي ناشبه بحلق ولد العم اتركيني اسلم علي اختي .

قربت من رسل ولمتها بحنان وهي تقول :الحمد لله علي سلامتك.

رسيل بهدوء:الله يسلمك شلونك وشلون الحمال؟

سحاب:الحمد لله.

ابوها ببسمه:لو ندري بتتكلمين كان جبنا سحاب من زمان تنامين عندنا يا ابوك.

نزلت راسها باحراج من ابوها والكل ضحك ماعدي هي اللي حاسه بوجع براسها ممكن من الطياره والرحله.

بهدوء:جني ممكن توصليني غرفتي.

ببسمه وهي تاشر علي عيونها:حاضرين للحلوين كم رسو عندي الا هي وحده ردت الحين وبيرد الدلع يا قلبي.

@@@@@@@@

دخل غرفته وريحة البخور اخذت انفاسه رمي حقيبته وهو لم يري بعد تلك الواقفه تلك العاشقه تكاد تدمع وهي تراه الان.

ولسان حالها يقول

رغم المسافة وابتعادك عن الشّوف
الشّوق يرسم لي ملامح عيونك
أموت لك مليون مرّة من الخـوف
يا واحد عيت حياتي تخونـك
يا كيف أخونك وأنت مولود بالجـوف
وبين الحنايا منك نور يصونك

طاح منها جوالها ليقفز بفزع:بسم الله الرحمن الرحيم.

ضحكت بخفه لفزعه وهو يلتفت لمصدر الصوت ليبتسم ثم يعود ليكشر من كثر اشتياقه اصبح يتخيلها هنا اغمض عينيه ليعود ليفتحهما ولاتزال واقفة امامه لون شعرها اشقر ليست هي حلم.

ولكنه حلم جميل ليفيق علي صوتها:نواف.

ابتسم لانه عرف انها ردت لم يستطع الحراك ظل واقفا يناظرها فقد اشتاق لكل ركن فيها لكل تفصيل فيها وهذا اللون الاشقر اعجبه فهو مناسب لبشرتها العاجيه.

وذلك الفستان الناري يظهر تفاصيلها بشكل مغري لا يستطيع النظر اكثر فهو كتائه في الصحراء وجد مائه ليفتح ذراعيه لها.

ركضت له وارتمت في حضنه فقد كانت تنتظر هذا النداء منذ دخل لم تكن تود ان تنتظره بالاسفل فقد كانت تريد ان يكون اللقاء به خاص جدا خاص بهما فقط.

همس في اذنها بشوق موجع:هنت عليك يا ريحال حتي تلفون استكثرتيه فيني.

ردت بوجع علي وجع وهي تقبل خده:واللي يسلمك نواف انا موجوعه اكثر منك ومشتاقه لك مووت وانت سافرت وتركتني كنت برد بس انت سافرت.

لثم ثغرها ليهتف:كنت ابيك تسافرين معنا بس خفتك ترديني وقتها ما فكرت...

حطت اصبعها علي شفايفه ما تبي عتاب ما تبي كلام الحين مشتاقه وكفي فهو زوجها واب اطفالها ان شاء الله.

ضحك من كل قلبه وكان القدر يبتسم له من جديد:بطلع هالشهر من عيونك.

ابتسمت بدلع:هههههههه وانا بعد

@@@@@@@@@

فيتامين سي ©؛°¨غرامي متألق ¨°؛©


السلام عليكم ورحمة الله وبركاته

بدايه رااائعه ومشجعه للمتابعه

فهد كلامه صحيح أمه وأخواته مالهن غيره وبما إنه سمع من ريم
وعرف كرهها لخواته من البدايه يبعد عن وجع الراس
وباب تجيك منه ريح سده واستريح

رسيل وش مرضها اللي مأثر على نفسيتها وهل هو من حادث سياره
تسبب لها في شيء لأن كلام عمها لما قال لها لاعاد تركبين مع نايف
حسيت منه إنه سار لهم حادث تأذت منه رسيل

رحيل تصرفت صح بعودتها

مدري ليه عندي أحساس إن فهد بيرتبط برسيل أو ممكن جنى
وأغلب الظن رسيل

متى مواعيد تنزيل البارتات

منتظرين بقية الأحداث

يعطيك العافيه

انفاس الماضي ©؛°¨غرامي جديد¨°؛©

السلام عليكم ورحمة الله وبركاته

غاليتي فيتامين سي وجودك اسعدني جدا وكلماتك الرقيقه وتوقعاتك اثلجت قلبي والبارت ذا اهداء لكي وان شاء الله مواعيدي بتكون اثنين وخميس اذا يناسب الجميع يا عس
ل...





البارت الثاني


ليت البشر ما يجرحون الاحاسيس

او ليت طيب الناس يغلب رداها

سمعت صوت الباب يدق فتحت عيونها وتناظر جني اللي نايمه جنبها وقالت بهدوء:تفضل.

دخل الغرفه بخوف لانه اخر مره صرخت بويهه وقالت له

اكرهك

اكرهك

انت تبي تذبحني

اوجعه الكلام كثيرا

بس كان عارف انها كانت موجوعه وخايفه وهو بعد يعرف انها تخاف من السرعه وما اهتم لها.

وخرت اللحاف وارتمت في حضنه وهي تقبل كتفه:افا ابو مساعد ينزل راسه وانا اخته.

ابتسم وهو يري اشراقة ابتسامتها ويقبل راسها:الحمد لله علي سلامتك يام نايف.

بدلع عفوي:عاد لا تتغلي خلي ولدي لحاله.

ضحك وهي يبعثر شعرها ويقول:لايق عليك الاشقر حيل مع عيونك الزرقاء تذوبين وانا اخوك .

ضحكت بصوت عالي:عسي الله لا يحرمني منك...الا وين طلال ما شفته؟

نايف:تحت بالصاله ولد اخوك مسكته امي ومتي بيتزوج ههههههه.

وكمل كلامه:تري عمتك تحت مع بنتها الله يعينك علي كلامها اللي مثل السم.

دخلت اسيل وهي تهتف:فهد ولد عمي هون عن خطبة ريم بنت عمتي توه شيخه تقولي.

نايف بفزع:واللي يسلمك اسيل انتي اكثر وحده تعرفني ابيك الحين الحين تعطيني مرشحات واختار منهم مابي ابوي يحكرني مع بنت اخته تدرين عمتي شلون تاثر عليه واونها اخته الوحيده تراني موب متحملها كلش.

جني فزت من نومها:انا عندي انا.

نايف بنص عين:عز الله كدينا خير.

ضحكو البنات وجلس هو علي حافة السرير ينتظر اخته اللي تفكر وكل مره تقوله عن وحده وهو يهز راسه بالنفي لا ما تعجبني.

وبعد نص ساعه من المداولات علي قولة جني تنهدت وقالت:شلون انت تبينا نصنعها لك من الصين ما صارت تري كلها علي بعضها حرمه.

رسيل بهدوء:شيخه بنت عمي.

باستغراب:شفيكم تناظروني كاني مسويه جريمه شيخه ما تنعاب وبنت عمنا ومنها خوات وببيت واحد بيتفاهمون واحسها تناسب نايف حيل.

اسيل بصدمه:رسيل انتي نسيتي والا شنو تراه شيخه اختنا بالرضاعه.

ضحكت بقوه:شفيكم امزح؟

جني ببسمه:انا لقيتها مروي.

نايف:وع ما لقيتي الا ام كشه.

جني بايدها:مالت الا مالت تذكرها قبل ما تتغطي الحين وش زينها مثل فاتن اخر سنه بالجامعه وبنت محترمه وبنت خالة الوالده.

اسيل بتاييد:ايه بصراحه حبوبة وطيبه وتمشي مع حضرة الظابط .

نايف بهدوء:خلاص انا الحين بنزل اكلم ابوي ونزلوا انتم بعد ولا تغلطون بالحكي يا مشعوذات.

جني توقف:يلا لبسي ونزلي بروح حق فتون اليوم ما اعجبتني .

اسيل بهدوء:لا تكثرين عليها الهذره.

جني وهي تاشر علي عيونها:من عيوني.

وراحت.

اسيل بحنان صافي وصل لاعماق رسيل:حبيبتي تبين شيء اطلع لك ثياب اساعدك بشيء.

ببسمه:ايه وياريت تطلعين لي بنطلون.

اسيل:طيب بس كانك ضاعفه بهالشهر لو دريت كان رحت معاكم.

ردت عليها بصوت عالي:ولا يهمك قريت عن دايت بسويه لك .

اسيل بترجي: ياريت.

@@@@@@@@@

ان ما دمرته وخليت سمعته بالارض ما اكون ولد ابوي ناظر الاوراق اللي بايده وابتسم بشر يعكس اللي بقلبه من

حقد

وحسد

وانتقام


@@@@@@@@


دخل البيت وما يبي احد يناظره ملابسه مغطيه دم وما يبي امه تتخرع وخصوصا انه الدم مو دمه دم زميل له.

سمع ماجد يهتف بخوف:رعد شفيك؟

وقف عنده بهدوء:اسكت ما ابي الوالده تتخرع ذا دم زميل لي الله يشفيه ان شاء الله.

تنهد براحه:الله يشفيه وقفت قلبي يا اخوك.

ابتسم له بحنان:الحمد لله بتسبح وبعدها تعالي بسهر معك من زمان ما سولفنا.

ماجد ببسمه:اخذ راحتك الحين الين تجي بنت العم ثم بعدها دور من يسولف معك.

رعد وهو يروح غرفته:لو صرت مثل اخوك الله يعين.

ضحك ماجد بخفه وهو يجلس في الصاله يكمل كاس العصير اللي يشربه.

طلع سالم من المصعد وناظر اخوه سرحان جلس وناظره وهو كانه مستغرق بالحديث:حالتك ما تسر وانا اخوك.

ماجد ببسمه:هلا وباخوي الا ما ينشاف من الشغل للبيت او لبنت العم ههههههههههههه.

ابتسم سالم:الشغل يا اخوك ما يخلص وابوك ذبحني وانت رحت درست صيدله واخوك النقيب وانا مع ابو سالم الله يطول في عمره لاعصب ما يناظر احد جدامه.

ماجد ببسمه:كل واحد طار حق حلمه.

سالم ببسمه:الحمد لله الله يوفقك يارب.

ناظر ماجد جواله وقال:تعال نروح المجلس ولد عمك موجود وابعث لرعد مسج يلحقنا انا باخذ حلي من المطبخ.

سالم:ان شاء الله عمي.

ضحك ماجد علي اخوه وهو يدخل المطبخ سمع صوت رساله توقع من فهد بس كانت من نفس الرقم المزعج

زوجتك الليله طالعه قمر والاحمر محليها


حس بدمه يغلي في عروقه وهالرساله جابت اقصاه فكيف يعرف او تعرف هذا المتصل ما ترتديه الا لو كانت تكلمه لا لا لا اسيل ليست هكذا

او ربما تكون مخادعه من الدرجه الاولي حينها سينهار

لو يكلم نايف راح يدفنها بارضها باكر راح يطلع كشف بكل مكالمتها قبل ما يتهور ويتصرف اي تصرف ارعن بس وش اللي بيصبره لباكر.

اتصل علي جوالها بسرعه لم ترد عليه بعث لها مسج واتصل بعده علي طول لياتيه صوتها الناعم اسمع صوتها هتف بغضب:وش لابسه انتي؟

ردت باستغراب:نعم.

بغضب:اسيل لا تطلعيني من طوري وش اللون اللي لابسته.

اسيل باستغراب مختلط بخوف:فستان احمر.

رمي الجوال علي الطوفه ليتحطم الي اشلاء كم حصل مع قلبه فهو رجل لا يرضي الخيانه واي خيانة من زوجته وابنة عمه.

@@@@@@@

رسيل اللي كانت راده من المطبخ ناظرت وعد بنت اخوها ولمحت كلمة بجوالها واستغربت وسوت نفسها ما انتبهت عشان لا تشك فيها.

جلست جنب جني وهمست لها في اذنها لتبتسم تلك الصغيره بخبث وتاشر لها بالايجاب.

ام مناف تهمس لبنتها العوده:الله يستر من بسمه جني الشريره ذي.

سحاب ببسمه:ياهل يمه خليها اشوفها متعلقه برسيل.

ام مناف:ايه متغيره حيل رسيل وصايره هاديه وقويه احسها مو ضعيفه الحادث قواها.

وهمست بخفوت:عمتك ام فهد كلمتني تخطب فاتن.

سحاب بصدمه:وريم..

امها بهمس:فهد ما يبيها عشان مشاكلها مع ريحال وهو صادق.

بهدوء:الله يستر من بدريه وبناتها عشان خالتهم اقول مو كانه رسيل مو مسويه لهم سالفه هههههه وهو بيموتون قهر.


اخذت الجوال من جني وفتحته وصدمتها كانت كبيره باللي تناظره وقرته.

سوت سكرين شوت لكل شيء وبعثته جوالها بعدها راحت حق جني وطلبت منها تسوي شيء.

بعد ماراحت جني اتصلت وبعد ها سكرت وردت الصاله.

وناظرت جني اللي تطيح جوال وعد بالماي وهي تقول:وي اسفه ما انتبهت .

وعد بحده:عميه انتي جعل ايدك الكسر ان شاء الله.

جني بهدوء:كله جوال بقول لابوي يجيب لك واحد.

ام طلال:خلاص يا وعد كلها جوال يتعوض.

تاففت بحده وقامت اخذت جوالها وطلعت مع امها واختها.

سحاب بحده:جني وش الحركه اللي سويتيها؟

جني بتتكلم بس قاطعها صوت ابوها اللي يسلم رد الكل السلام بهدوء.

جلس جنب اسيل وحط ايده علي كتفها وحضنها بحنان وهو يهتف:عمري زعلتك يبه او غصبتك علي شيء او سويت شيء ما فيه مصلحتك.

هزت راسها بلا.

كمل:يا بنتي ماجد عنده سفره دراسه وشغل ويبي ياخذك معاه.

بخجل كبير:يبه اللي تشوفه.

بهدوء:الليله يبه بيسافر.

رفعت عيونها بصدمه لابوها كانها تبيه يقول انه يمزح شلون بتروح كذا بدون عرس بدون ما تلبس فستان ويشوفونها اهلها وصديقاتها شلون يكسر فرحتها شلون بتصيح خلاص مو قادره.

بالم :حاضر يبه.

وراحت غرفتها ورسيل وجني وراها وسحاب ظلت مع امها تناقش ابوها:يبه شفيه ماجد متي نوي السفر؟

ابوها يتنهد:ما ادري ياابوك من شوي جاني يقول يبي يسافر ويبي زوجته معه.

امها:يا حسرة قلبي عليك يا بنتي .

مساعد بهدوء:حصه واللي يسلمك لا تزيدينها علي انا بروحي قلبي مشلوع عليها.

سحاب وهي مش مطمنه ماجد مو من النوعية المتسرعه يا تري وش اللي صاير الله يستر بس الله يستر الله يستر.


@@@@@@@@@

رعد واقف بغرفة اخوه يهتف بغضب:ماجد لا تجنني من شوي بس كنت تسولف عادي ولا جبت طاري السفر وش اللي صار؟

ماجد ببرود:بسافر يا اخي وباخذ زوجتي عيب يعني.

رعد بعصبيه:مو عيب بس بتسافر ولدبي وانت ناسي انه بعثتك في هولندا يعني صاير شيء لا تستغبي يا ماجد علي.

ماجد بالم:حديتني علي اقصاي يا خوي.

رعد بحده:وشو اللي حدتك عليه ومنو وايش اللي صاير شلي صاير فهمني الحين؟

وش حيلة اللي خذاه الجرح واقفابه
شحت فجوج الوساع ولالقي طبه
يشرب من الضيم دمع وتنطبق اهدابه
ما العن من الجرح غير اللي تسبب به

ماجد موجوع ويحس بالخيانه خيانه الاهل والزوج والاخوان شلون تسوي كذا شلون؟؟

رعد توه بيتكلم بس صوت جواله سكته رد عليه لياتيه صوت نواف الهادر يخبره انه يريد رؤيته.

قفل جواله وبغضب:والله والله والله وهذي ثلاث حلوف انها لو قالت انها ما تبي تروح معك ما تروح وانا اخوها ما تنظام وانا عايش.

ماجد جلس علي حافة السرير وهو يفكر بلاك ما تدري باللي سوته والا انت بنفسك تنحرها.

رعد ظل يناظره بعدها طلع وهو معصب ناظر سالم وفهد ما سوي لهم سالفه وراح لانه معصب حيل معصب.

فهد بهدوء:شفيه ذا شاب نار؟

سالم باستغراب:علمي علمك تعال نشوفو ولد عمك المينون ذا وش مسوي وتري البيت خالي ما به احد.

فهد توه بيتكلم بس صوت طلق ناري جعلهما يركضان مثل المجانين.

@@@@@@@@@@


انفاس الماضي

اسيرة الهدوء ©؛°¨غرامي متألق ¨°؛©

السلام عليكم
رواية رائعة واحداث ممتعه واسلوبك جدا جميل
يعطيك العافية

عاصفة الجمر ©؛°¨غرامي جديد¨°؛©

اعجبتني طريقه السرد

ماجد وش بيسوي مع اسيل
وعد كرهتها
حبيت شخصية جني الطفوليه
فاتن وش سرها
فهد ممكن يتزوج رسيل
ننتظرك

خيوط الرماد ©؛°¨غرامي مشارك¨°؛©

ابداع جميل ورائع
رسيل وراها شي
فاتن وش فيها
اسيل وماجد
ريحال ونواف فديتهم ابداع
سالم يا لبي قلبه

غرشوبه نعيميه ©؛°¨غرامي فعال ¨°؛©

السلام عليكم
روايتج روعه واسلوبج جميل
الله على جنى ام لسان طويل عجتني كثير

سلام،،،،،

انفاس الماضي ©؛°¨غرامي جديد¨°؛©

المشاركة الأساسية كتبها فيتامين سي اقتباس :

السلام عليكم ورحمة الله وبركاته

بدايه رااائعه ومشجعه للمتابعه

فهد كلامه صحيح أمه وأخواته مالهن غيره وبما إنه سمع من ريم
وعرف كرهها لخواته من البدايه يبعد عن وجع الراس
وباب تجيك منه ريح سده واستريح

رسيل وش مرضها اللي مأثر على نفسيتها وهل هو من حادث سياره
تسبب لها في شيء لأن كلام عمها لما قال لها لاعاد تركبين مع نايف
حسيت منه إنه سار لهم حادث تأذت منه رسيل

رحيل تصرفت صح بعودتها

مدري ليه عندي أحساس إن فهد بيرتبط برسيل أو ممكن جنى
وأغلب الظن رسيل

متى مواعيد تنزيل البارتات

منتظرين بقية الأحداث

يعطيك العافيه
وعليكم السلام ورحمة الله

يسعدني مرورك وتوقعاتك

فهد يرتبط بجني صعب لانه جني باول ثانوي وحكايتها لحالها جنون

انفاس الماضي ©؛°¨غرامي جديد¨°؛©

المشاركة الأساسية كتبها اسيرة الهدوء اقتباس :
السلام عليكم
رواية رائعة واحداث ممتعه واسلوبك جدا جميل
يعطيك العافية

وعليكم السلام اسوره
انتي الروعه ومرورك الاروع انتظر توقعاتك وش اكثر شخصيه عجبتك في الروايه

انفاس الماضي ©؛°¨غرامي جديد¨°؛©

المشاركة الأساسية كتبها عاصفة الجمر اقتباس :
اعجبتني طريقه السرد

ماجد وش بيسوي مع اسيل
وعد كرهتها
حبيت شخصية جني الطفوليه
فاتن وش سرها
فهد ممكن يتزوج رسيل
ننتظرك
راح نشوف مع الاجزاء

وانا بعد ما حبيتها
جنون عسل والله

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1