اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
الإشعارات
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 31
قديم(ـة) 23-11-2017, 08:08 PM
صورة صمت إحساآس الرمزية
صمت إحساآس صمت إحساآس غير متصل
©؛°¨غرامي مشارك¨°؛©
 
الافتراضي رد: ناظر عيوني وتدري وش كثر أهواك / بقلمي


حس بسكين اخترقت صدره بدون رحمه : لا اكيد تمزحون شوق محد بيأخذها غيري
توسعت عيون ناصر : هيه لا تنسى أن الي تتكلم عنها اختي
خالد تجاهله وطالع أبوه : يبه ليش تزوجها لواحد ثاني وانا اموت فيها يبه ما اقدر أعيش بدونها صرخ أحبها ليش تخلونها تروح لغيري ليش
ناصر بان الغضب بعيونه وضاغط كف يده بقوه هذا اكيد جن يتكلم عن أخته قدامه وبهالطريقه المفروض ما يذكرها لانها مو حلاله ولا من محارمه وقف بعصبية بيروح له ويوقفه عند حده وقبل لا يروح له مسكه فارس وطلب منه يهدأ مع أنه حتى هو معصب دف يد فارس وطلع من البيت لأنه لو تم أكثر ما بيقدر يمسك نفسه وبيتهاوش معاه
الأب بعصبية : خالد وش هالكلام لو كنت فعلا تبيها ليش ما كلمتني أو خطبتها من أخوانها جاي الحين تقول ليش بس خلاص البنت صارت متزوجة يعني أنساها ولا تتكلم عنها كذا فاهم
ترك الصاله وراح بعد ما تنرفز من كلام ولده
خالد مسك المزهريه ورماها على الأرض بقوه
فز زياد بخوف ولحق أبوه للحين مو قادر يستوعب شوق ماهي بحلاله وهي حلال غيره وده يصرخ بأعلى صوته يمكن هالألم والضيق الي فيه يخف راحت عليه حبيبته و عشقه الأزلي قعد على الكنبة و عيونه امتلت دموع بس مو قادر يبكي تربى على مبدأ الرجال ما يبكون ، آه حاس قلبه شاب نار وضلوعه تحترق
حس بيد انحطت على كتفه هو الوحيد الي حاس فيه
بهاللحظه هو فقد حب طفولته ودنياه قعد جنبه
وبهدوء : اذا كنت فعلا تحبها ادعي لها الله يوفقها ويسعدها
خالد لف له : مو قادر استوعب أنها راحت مني
فارس : مو كل شي نبيه نقدر نحصل عليه
وقف وهو يمد يده له : يالله قوم و روح ارتاح توك واصل من سفر وتعبان
مسك يد فارس ووقف وهو يقول بنفسه وين ارتاح بعد الي صار مشى وراح لغرفته خذ المنشفه بياخذ له شور بارد لعل يطفي هالنار اللي شابه فيه

وفي هالليله النوم جافى اثنين واحد يفكر بحبه الي راح منه
والثاني يفكر شلون بتكون حياته مع شخص كل تفكيره الانتقام

*****


اتصلت فيها شوق الي أخذت رقمها الجديد من خلود بعد السلام والسؤال عن الحال فرحت لها وباركت لها على الملكه وتموا يسولفون فتره بعدها قفلت وطلعت لصاله وهي تشوف جراح
يشوف التلفزيون ابتسمت : غريبه ما صرت تروح الاستراحه هالايام
لف لها : اذا رحت قلتي اقعد معانا واذا قعدت قلتي غريبه ما تروح وش تبين بالضبط
ردت بهدوء : ولا شي
طالعها شوي : قومي قعدي بيون وتجهزي بنروح نتقضى لرمضان ونتعشى برى
فاطمه طالعته مو مصدقة
جراح : يالله بسرعه
وقفت بسرعه : دقايق أكون جاهزه
تم يطالعها وهي تمشي ابتسم قعدت بيان جهزتها ولبست وطلعت له وهي جاهزه وقف ولبس ثوبه وخذ مفاتيحه و بوكه ولبس جزمته وطلعوا


*****


جاء رمضان شهر الخير والقرآن والصيام أحب شهر على قلوبنا في المطبخ الي تلف السمبوسة والي تسوي الشوربة كل وحده تشتغل
أم خالد : شوق لا اشوفك على السفرة معنا
طالعتها شوق ورفعت حاجب اصلا هي ما تبي وخالد موجود ما تأخذ راحتها وهي تحس بنظراته لها بس عشان عمها الي يحب يجتمعون كلهم
طالعتها شوق ورفعت حاجب اصلا هي ما تبي وخالد موجود ما تأخذ راحتها وهي تحس بنظراته لها بس عشان عمها الي يحب يجتمعون كلهم تروح : طيب
شهد : أحسن عشان نأخذ راحتنا
شوق ابتسمت وهي تكمل شغلها


*****
في شقة جراح
جراح : فاطمه يالله بيأذن
فاطمة طلعت من المطبخ وفي يدها صحنين : خلاص خلصت قعدت وارتفع أذان المغرب
قالوا دعاء الافطار وسموا و فطروا
ابتسمت فاطمة بحب جراح بدأ يرجع نفس قبل وقفت
تصلي لفت لبيان الي تلعب بالايباد ومشت


*****


نواف قاعد في الحديقة في يده سبحه يستغفر ويسبح
توه رجع من صلاة التراويح في يده الثانيه فنجان قهوة
روان ما صارت تكلمه ولا تهتم فيه متجاهلة وجوده بس تطلع من الجناح تفطر وترجع ولما يدخل الجناح تشغل نفسها بأي شي
زفر بهدوء رفع جواله بحث عن رقم معين واتصل وصل رد انوثي هادئ : الو السلام عليكم
نواف : وعليكم السلام
شوق : متصل تبارك لي بالشهر ولا تبي تسمع صوتي
نواف : ايه ابي اسمع صوتك وابارك لك بالشهر
شوق زفرت بهدوء : اخباري بخير دام انا بعيدة عنك وانت اخبارك
نواف : بخير لأنك قريب بتصيرين عندي
شوق تنرفزت وبلا وعي : طلقني
اندهش نواف وضحك باستفزاز : حسابي معك لسى ما خلص يا حلوه ومو انا الي تتأمر علي حرمه فاهمة
وقفل نزل فنجانه على الطاولة الي قدامه ومسك باكيت السيجارة
وأخذ وحده يدخن و سرح بتفكيره


*****


واقف قدام الشباك وهو يطالعها واقفة في الحوش وتتكلم بالجوال ومركز مع كل حركه تسويها شافها تنزل جوالها وملامح الضيق باينه على وجها رفعت رأسها لفوق شافته واقف يطالعها من شباك غرفته
جات عينها بعينه لف مبتعد عن عيونها الي تأسره خلاص فكره أنها صارت لغيره استقرت في عقله وبدأ يستوعبها بس قلبه رافض هالشي بدل ملابسه لبس بنطلون جينز وفانيله خذ جواله
ومفاتيح سيارته وبوكه وطلع من الغرفة شاف فارس
نازل الدرج : فارس وين رايح
لف له فارس : رايح أسهر مع الشباب
خالد : لحظه جاي معاك
فارس ابتسم : حياك الله
لحقه خالد لبس جزمته وركب مع فارس

فسخت عبايتها وشيلتها رمت الجوال على السرير وقعدت من جدها تبي تتطلق بهالسرعه وش راح تقول لأهلها سبب طلاقها والناس وش راح يقولون عنها مسكت رأسها بقوه ما تبي تفكر بشي وقفت راحت تتوضأ مسكت مصحف تقرأ قرأن وتستغل وقتها بعبادة الرحمن في هذا الشهر الفضيل لانها ما بتستفيد شي من التفكير غير الصداع والألم
سمعت دق على الباب : تفضل
دخل ناصر وسلم : اخباركم
شوق ردت السلام : الحمدلله بخير
ناصر : دوم يارب ، بكرا بعد صلاة التراويح بنطلع السوق طيب
شوق : الله لا يحرمنا منك
ناصر ابتسم : امين ولا منك واشر بيده : هاذي من تكلم
شوق ضحكت : خلود من غيرها
ناصر : اها يالله سلام وطلع
فتحت المصحف وكلمت قراءة لفت لها شهد وهي
تشوفها تقفل المصحف وتستغفر و تسبح : اقول
شواقه
شوق : وش عندك
شهد : اشوفك مو متحمسة لزواج
شوق ابتسمت : يتهيأ لك
شهد : طيب امشي تحت نسهر
شوق : اوكي يالله
سهروا لي سحور دخلت شوق المطبخ تساعد
الشغاله وخذت لها ولاختها فوق يتسحرون
و بعد ما صلت الفجر انسدحت شوق على
السرير بتعب والنوم بدأ يتسلل لعيونها
اما شهد قعدت تقرأ قرآن لين أشرقت الشمس
وبعدها راحت تنام


*****


شقة جراح
بعد صلاة العصر
جراح : يالله فطوم بنروح
فاطمة وهي بالمطبخ خذت الاكلات غلفتهم وحطتهم بأكياس راحت تتجهز وخلصت خذت شنطتها
مسك يد بيان وطلع خذت فاطمة الأكياس وطلعت و
صكرت الشقة ولحقتهم ركبوا السيارة حرك جراح
الهدوء يعم المكان سواء من سورة الرحمن بصوت
ماهر المعيقلي وصلوا نزلت وخذت الأكياس
أم جراح وقفت تهلي وترحب بهم بعد ما فتحت لهم الخدامه
تقدم جراح بأس رأسها : اخبارك يالغاليه
أم جراح بابتسامة : الحمدلله بخير بشوفتك يمه
قربت فاطمة باست رأسها : كيفك ياعمه
أم جراح : بخير
قعدت وركضت لها بيان فتحت يدينها وضمتها
وباست خدها وشالتها وقعدتها بحظنها : هلا
والله بحبيبتي بيون
بيان بطفوله : اشتقت لك كثيل واشرت بيدينها
هالكثل
ضحكت أم جراح وبحنان : وانا اشتقت لك أكثر
قعدوا يسولفون شوي وبعدها سمعوا دق جرس
الباب فتحت الخدامه ودخلت روان بهدوء : السلام عليكم
ردوا عليها السلام
فسخت نقابها وشيلتها سلمت على رأس أمها
وسلمت على جراح وفاطمة وقعدت جنب أمها
جراح طالع فيها وجها شاحب وهاديه : روان فيك شي
روان هزت رأسها بالنفي : سلامتك مافيني شي
فاطمة وقفت : باروح أساعد الخدامه بتجهيز
الفطور روان تعالي معي
طالعتها روان شوي وقفت ومشت معاها
مشت فاطمه مع روان دخلتها المطبخ وبهمس :
وش فيك تعبانه صاير شي بينك وبين نواف
روان مسكت رأسها ودموعها نزلت
فاطمه انصدمت مسكت روان بيدها طلعتها من باب
المطبخ الخلفي الي يطلع على الحوش : روان وش فيك
روان بضيق : نواف تزوج
فاطمه بصدمة : ايش تزوج
روان هزت رأسها بأية ودموعها نزلت على خدودها
ضمتها فاطمه وهي متضايقه عليها هاذي اول مره
تشوفها تبكي ما عرفت وش تقول لها وتخفف عنها
بعد ما هديت روان بعدت عنها ومسحت دموعها :
يالله ندخل علشان امي ما تشك
دخلت روان وغسلت وجها وخذت صحنين ومشت
تجهز السفرة مع الخدامه لحقتها فاطمه طالعت
ساعتها ما بقى شي على أذان المغرب مشت جهة
جراح وعمتها علشان تقول لهم وقفت مكانها
بصدمة وهي تسمع كلام عمتها
: وش فيك نحفت يمه زوجتك ما تهتم فيك ما
تطبخ لك اكيد مقصرة معاك تزوج يمه وحده
سنعه وتهتم فيك
جراح يطالع أمه بهدوء
الأم : انت بس وافق وانا من اليوم ادور لك على وحده سنعه هبت ريح احسن من فطيم بمية مره
جراح : لا يمه فاطمه ما منها قصور مره سنعه ويا بخت من عنده مثلها لا عاد تطرين الزواج يمه
الأم لو فمها : بكيفك

عضت شفتها بقوة انا مو سنعه ومقصره معاه وتبي تزوجه بعد خذت نفس عميق وكلام جراح ريحها ، دخل أبو جراح وابتسم وهو يشوف فاطمه قربت منه تسلم عليه وباست رأسه وبعدها راحت تفطر مع روان علشان محمد موجود على الفطور


*****


مرت الأيام بسرعه وقرب العيد الشوارع زحمه و الأسواق زحمه يتجهزون للعيد
فاطمه و جراح صاير يهتم فيها وما يروح الاستراحات إلا نادرا بس آخر موعد راحت مع جراح تبين أن حملها ضعيف وتأخذ حبوب تثبيت الحمل
شوق وشهد تقريبا خلصوا كل شي و مابقى شي


*****

في قصر نواف
قعدت ريما جنب خالها : خالو
نواف : هلا
ريما : ابي بروح المول
وقبل لا يرد نواف تكلمت رشا : ليش ما خلصتي و شريتي أغراض العيد
ريما : ماما بليز تعرفين عرس خالو بعد العيد وانا ما جهزت له كل الي سويته فصلت الفستان
نواف فتح بوكه وطلع بطاقه وقبل لا تتكلم رشا
تكلم نواف : رشا وش فيك على البنت خليها تأخذ الي تبي ولف لريما وعطاها بطاقته : ريوم خذي كل الي تبين
ريما باست رأسه وراحت تركض بتلبس بتروح مع خالتها نوف المول
رشا بضيق : نواف لا تدلعها زيادة ترى بتخربها
دخلت روان وسلمت بهدوء وقعدت
أم نواف تمت تطالعها فترة
روان : وش فيك خالتي تطالعيني كذا
أم نواف ابتسمت : لا بس اشوفك سمنانه
روان بصدمة : ايش
كتمت رشا ضحكتها
روان بضيق : جد سمنت لازم اسوي دايت
ضحك نواف : روان الوالدة تمزح معك
روان تنرفزت هي تهتم بجسمها حيل : اووف عاد هذا مزح بالله يا خالتي لا تمزحين ترى مزحك ثقيل
نواف بحدة : روااااان
روان وقفت من عندهم وهي تسب نفسها غبية ليش نزلت كات تميت بغرفتي أفضل
وقف نواف بأس رأس أمه وتوجه للمكتب دخل يكلم جواد : حجزت كل شي
جواد: ايه طال عمرك
نواف ابتسم : حلو الله يعطيك العافيه


*****


يوم العيد
جراح رجع من صلاة العيد شال بيون وباسها : فديت بنتي الحلوه نزلها مسك يدها وهو يمشي للغرفة وقف بذهول وهو يتأملها كم هي فاتنة إلى حد الوجع تجذبه عيونها قرب وهو يتأمل عيونها المكحله : ماشاء الله وش هالزين كله
نزلت عيونها بخجل وهو يرجع خصلات لشعرها لوراء و يمرر يدها على خدها : كل عام وانتي بخير
ردت : وانت بخير وصحه وسلامه
جراح بأس خدها : الله لا يحرمني منك يالله لبسي عبايتك بنروح بيت أهلي وبعدها بيت أبوك
فاطمه : أن شاء الله
خذت عبايتها تلبسها وشيلتها ونقابها
بيان : يالله يالله
جراح : اوكي يالله لف لفاطمة غطي عيونك
فاطمه : طيب


*****


امتلت عيونها دموع وهي تشوف الاسواره الراقيه من الذهب الابيض وباين عليها غالية هدية ناصر لها
ابتسم مد يده ومسح دموعها : ليش البكاء الحين كنت بعطيك إياها بالملكه بس بعد ما جانا خالد وعفسنا نسيت واليوم مناسب اعطيك إياها الله يوفقك ويجعل ايامك كلها سعادة
شوق بكت أكثر حضنها : ما ادري شلون بيكون البيت بدونك تعودت على وجودك وعلى انك كل يوم تصحيني لدوام
شوق تمسكت فيه : ناصر خلاص ما ابي أتزوج ابي اقعد معاكم ناصر : شواقه حبيبتي اهدي كل بنت تتزوج وتترك بيت أهلها وبعدين ودي ازفك لعريسك الي نافش ريشه تقولين طاووس
بعدت عنه وضحكت غصب عنها على التشبيه
ابتسم : وين شهد بتطلع نفتر و نروح أي مكان تبونه
شوق تمسح دموعها : راحت عند الجيران الحين بتصل فيها
ناصر :و هالبنت لازم تروح لخلود
شوق : هههههههه صديقة عمرها راحت تعيد عليها وبعدين خلود ما عندها إخوان كبار
ناصر : اوكي يالله لا تتأخرين


*****


مرت الأيام وجاء يوم العرس
لابسه الفستان الأبيض و مكياجها الفرنسي وتسريحة شعرها الراقيه و نقش الحناء الجميل لكتفها تتأمل شكلها بالمرايه رائعة وجميلة
شهد بدهشه : ماشاء الله تأخذين العقل
شوق بابتسامة هاديه: فديتك والله انتي طالعه قمر
جاهم صوت من وراهم : الله يوفقك
لفوا بصدمة لمصدر الصوت وشافو مرت عمهم
شهد : خالتي مع من بتروحين
أم خالد بهدوء : خالد انتظروا فارس بيجي وبياخذكم
شهد طالعت بأختها : لازم احضنك حطت يدها على رأسها
ابتسمت شوق بحب لها
رن جوال شهد باسم فارس
شهد خذت عباية شوق تساعدها تلبسها
شوق : حبيبتي لا تنسين تحصنين نفسك


*****


في مكان آخر بعيد عن الفرح : رائد ترى خلصت البضاعة والشباب ازعجوني
رائد وقف : قوم يالله الزعيم وصل أمس واليوم تسليم البضاعة
وقف وهو يأخذ جواله : بس كيفن هنا ولا بالشرقية
رائد : لا هنا
رد : يالله مشينا ما ابي اتأخر على الأهل
وصلو المكان الي كان قريب منهم
رائد : مالذي حدث
رد بلغته الانجليزية : لاشي إنما تأخرت البضاعة والزعيم غاضب لتأخرها
زفر بضيق : يعني بنتأخر
رائد : الظاهر كذا
رن جوال أحدهم ابتعد ليرد : هلا .. لا بتأخر عندي شغل .. خلاص روحي مع السواق وانا برجعك اوكي بحفظ الله
لف لرجل انجليزي دخل وهو مرتبك وخائف توجه لزعيم كيفن وبتردد : سيدي لقد قبضت الشرطة على البضاعة ، ما أن انهى
البضاعة حتى وقع جثه على الأرض بسبب رصاصة في رأسه من مسدس كيفن وبغضب : حمقاء اغبياء اللعنة عليكم التفت بغضب شديد : انت اذا لم تنهي مهمتك اعدك ستلحق به
عيونه متعلقة بالجثة وفي كلام زعيمهم كيفن وبنفسه " لا بالله رحت فيها اكيد موتي على يدهم انا وش الي خلاني اصير معهم بس"
زفر بضيق ولف لرائد : بتجي معي
رائد : لا الله معك
طلع رن جواله رفعه وابتسم : هلا بالغاليه
سكت وهو يسمع صوت بكائها : وش فيك ليش تبكين
، طيب الحين جايك مسافة الطريق مع السلامه


*****


ضمتها فاطمة بفرحة وهي تبارك لها : الف مبروك حبيبتي
شوق ابتسمت : الله يبارك فيك يالغاليه
شهد و نوف وريما ومعظم البنات يرقصون بفرح
نادوا يروحون للبوفيه
نوف : شهد الحين بيدخل نواف
شهد بسرعه راحت تلبس عبايتها وتروح البوفيه

دخل نواف بخطواته الواثقة وحظوره الطاغي رشا تزغرد بصوت عالي ابتسم وسلم على أمه وخواته وريما مشى وصل للكوشه وقف جنب شوق صورتهم المصوره أكثر من صوره وكانوا يسوون الحركات نواف قرب منها ومسك خصرها وعيونه بنظرتها الحادة تتأمل ملامحها وكل شي فيها ، فجأه لفت نظره مره جايه صوبهم عرفها خالته ابتسم بحب لها

وصلت متأخرة بعد ما قدرت تقنع زوجها ألي بالعافية وافق بس هي ما حضرت زواج نواف الاول وما قدرت تضيع عليها زواجه الثاني فسخت نقابها وسلمت على أختها الي لها فتره ما شافتها و بناتها وريما قربت من نواف الي تقدم منها وباس رأسها
أم اياد : الف مبروك يالغالي
نواف : الله يبارك فيك يا خاله لو تعرفي شكثر فرحتي بشوفتك جايه
أم اياد : الله يجعل السعاده ما تفارقك
لفت لشوق وهي تذكر الله : مبرووك
شوق : الله يبارك فيك يا خاله
ريما مسكت يد أم اياد : خالتي تعالي نتصور معاهم
ابتسمت أم اياد وتصورت معاهم و نوف ورشا والام خذوا صوره جماعية
بعد شوي راحو يلبسون عبايتهم ودخل عمها وناصر وفارس وباركوا لها ناصر باس رأسها وبارك لها وفارس نفس الشي
نواف مسك يدها : يالله نمشي
شوق على أنه اليوم عرسها بس ما كانت مبسوطه هزت رأسها بأيه
أشر لأمه وقال لها
ناصر : نواف جوهره حافظ عليها تراها أغلى انسانه عندي حطها بقلبك قبل عيونك
فارس : انتبه عليها و إذا ضريتها بشي انا اول من بيوقف بوجهك
نواف بهدوء : لا توصون حريص
دخل السيارة وتحركت متوجهه لقصر نواف الوليد


*****


قبل ساعة يسوق السيارة بسرعه كبيره
فاطمه : جراح خفف السرعه وش فيك
جراح بضيق : ليش رايحة عرس نواف
عضت شفتها : هي ما كانت تدري من المعرس ما سألت شوق من وانصدمت لما شافته داخل : عرس أعز صديقاتي لازم اروح
جراح سكت وهو منقهر حيل على روان الي لما شاف حالتها تمنى يذبح نواف
فاطمة بهدوء : جراح وين رايحين هذا مو طريق البيت
جراح : بنروح بيت أهلي
فاطمه بدهشه : ليش الوقت متأخر
جراح : لا هما سهرانين ولازم اطمن على روان
فاطمة تنهدت
وصل بيت أهله نزل وشال بيان النايمه ودخل لحقته فاطمه دخلوا الغرفة نزلت نقابها وشيلتها وبدلت فستانها ببجامه لأن لها ملابس في بيت أهل جراح تنهدت بضيق على روان بس ما تقدر تتجاهل عرس شوق وما تحضره وهي فرحت لها من كل قلبها


******

وصل القصر نزل وتركها نزلت من السياره وهي تجر فستانها الثقيل وتحاول تمشي بخطوات سريعه تلحقه فتحت باب القصر تلفت ما حصلته وين تروح الحين فجأه مسك يدها شهقت بقوة
: انا نواف وسحبها معاه للمصعد انفتح وتوجه لجناح
بعيد عن الاجنحه شوي فتحه وشغل الليتات ، طالعت الجناح بدهشه كبير حيل والاثاث فخم والديكور راقي مشى نواف لغرفة النوم ودخل غرفة الملابس
دخلت الغرفة وهي تطالع بإعجاب سمعت صوت أحد يدق الباب توجهت للباب وشافت شنطتها مع الخدامه ابتسمت : شكرا
سحبت الشناط وطلعت بجامه حرير وراحت للحمام يكرم القارى فسخت الفستان بصعوبة و خذت شور بعد هاليوم المرهق توضت وطلعت شافت نواف الي باين انه توضأ وفرش سجادته ولف يطالعها : تعالي نصلي
لبست جلالها حط يده على رأسها وقال الدعاء
سلم من صلاته وهو يشوفها طولت في سجودها الأخير بعد دقيقه سلمت ما شافته في الغرفة فسخت جلالها وشالت السجاده و توجهت لسرير انسدحت وتغطت تبي تنام قبل لا تشوفه واستسلمت لنوم بسرعه بعد يوم مرهق وجسديا و نفسيا
نواف واقف في البلكونه و هو يدخن بشراهه حقد وكره لهالانسانه القاتله مايدري كم سيجارة دخن من القهر الي فيه
دخل الجناح قرب منها شافها مستسلمه لنوم حس بقهر شديد هي نايمة براحة وهو مو قادر ينام
صحت من النوم على صوت جوالها الي وقتته يرن يوميا لأذان الفجر وقفت وراحت تتوضأ ولبست الجلال وصلت وخلصت قرت الاذكار رجعت تنسدح بجلالها ونامت
صحت على صوته : هيه قومي
شوق فتحت عيونها : نعم
نواف : قومي ترى الساعه 2 الظهر
شوق فزت بصدمة : الساعه 2
وقفت بسرعه علشان تصلي الظهر بعد ما خلصت فتحت الشنطه وطلعت لها فستان لي تحت الركبة راقي وهادي سرحت شعرها و خلته مفرود
وحطت مكياج ناعم ولبست كعب اسود وطلعت من الجناح ونزلت وهي تشوفهم مجتمعين على طاولة الأكل : السلام عليكم ، ردوا السلام
ريما : صباحية مباركة يا عروس
رشا : يا هلا والله بعروستنا
شوق بابتسامة : صبحكم الله بالنور والسرور
ابتسمت أم نواف : اخبارك يا بنتي
شوق : بخير يا خالتي اخبارك انتي طمنيني عنك
أم نواف ارتاحت لشوق و دخلت قلبها : الحمدلله
ريما : وين بتسافرون عاد لا اوصيك يهديه حلوة
ضحكت شوق : من عيوني
نواف : بكرا مسافرين لندن
أم نواف : بحفظ الله
ريما : يمه ترا وعدتيني بسفره هذاني جبت نسبه عاليه ابي اروح وحطت اصبعها على فمها بتفكير : أمممم اسبانيا
رشا : أن شاء الله ولا يهمك بنسافر إسبانيا في أقرب وقت
ريما : الله لا يحرمني منك يا أحلى أم

انتهى البارت


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 32
قديم(ـة) 24-11-2017, 02:53 AM
اسيرة الهدوء اسيرة الهدوء غير متصل
©؛°¨غرامي فعال ¨°؛©
 
الافتراضي رد: ناظر عيوني وتدري وش كثر أهواك / بقلمي


السلام عليكم
البارت جميل
شوق ونواف وش بيصير بينهم
خالد بيفكر يتزوج او لا
جراح وفاطمه الله يستر عليها من امه
يعطيك العافية

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 33
قديم(ـة) 24-11-2017, 05:16 PM
صورة Aidah20 الرمزية
Aidah20 Aidah20 غير متصل
©؛°¨غرامي مشارك¨°؛©
 
الافتراضي رد: ناظر عيوني وتدري وش كثر أهواك / بقلمي


البارت روعة في انتظرك 😍

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 34
قديم(ـة) 28-11-2017, 12:59 AM
جسوراحلام جسوراحلام غير متصل
©؛°¨غرامي مشارك¨°؛©
 
الافتراضي رد: ناظر عيوني وتدري وش كثر أهواك / بقلمي


اعتقد جراح مدن ومهرب مخدرات..
وابو نجودكمان
نواف ما له داعي ينتقم كان بلغ عنها وبس...
روان يمكن حامل...
خالد ؟
فيصل مدري متى يبطل لعب باعراض ا لناس
اعتقد بيضر صديقه شهد وشهد بتنتقم منه

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 35
قديم(ـة) 06-12-2017, 06:54 AM
صورة صمت إحساآس الرمزية
صمت إحساآس صمت إحساآس غير متصل
©؛°¨غرامي مشارك¨°؛©
 
01302797233 رد: ناظر عيوني وتدري وش كثر أهواك / بقلمي


البارت السادس

روان في حضن أمها ضايقه
أم جراح : حسبي الله عليه الله لا يوفقه
فاطمة قاعدة وجنبها بنتها الي تأكل كاكاو
أم جراح بعصبية : خل ولد أخوك يطلقها
أبو جراح : تعوذي من إبليس يا مره ولا تخربين بيت بنتك
سمعوا صوت محمد الي ينادي تغطت فاطمه بسرعه
سلم وانصدم من منظر روان مشى بسرعه وحط يده
على كتفها : روان فيك شي
نطت بيان بفرح : عمو
شالها محمد وباس خدها : هلا بحبيبة عمها
لف لابوه : يبه شسالفه
أبو جراح : نواف تزوج الثانيه
محمد بصدمة : نواف تزوج ولف لاخته : و انتي يا غبية ليش تركتي له البيت يأخذ راحته وبعدين هو ما غلط تزوج على سنة الله ورسوله
أم جراح بعصبية : محمد
محمد : وانا صادق يمه ليكون تبي تتطلق
أم جراح لفت لفاطمة الي قاعده وساكته : وانتي وش جابك جايه تتشمتين
فاطمة توسعت عيونها بصدمة
جراح : يمه وش هالكلام
الأم : رايحة العرس ومستانسه اكيد جايه تتشمت
روان لفت بصدمة : فطيم رايحه عرس نواف
فاطمه وقفت وبهدوء : ايه رحت عرسه صديقتي
ليش ما اروح عرسها
روان بصراخ وهي تشوف فاطمه تمشي : الله ياخذك انتي وصديقتك خطافة الرياجيل
جراح وقف واستأذن وطلع من البيت معصب

****

في بيت أبو خالد
شهد بغرفتها تبكي شوق تزوجت وتركتها والله من الحين مشتاقة لها البيت من دونها ولاشي
دخلت أم خالد : قومي ساعدي سيتا في شغل البيت
شهد طالعتها تقوم تساعد سيتا أحسن لها : طيب
وقفت وغسلت وجها ولبست عبايتها وشيلتها وطلعت تساعد سيتا في شغل البيت لأنها حاسة بضيقه وفراغ بعد ما راحت شوق

*****

يسوق السياره وبتفكير غامض متجه للمكان الي يروح له احيانا وقف سيارته ونزل وابتسامة خبث على شفتيه دخل وهو يحرك مفتاح السياره بيده بروقان : السلام عليكم ورحمة الله وبركاته ، ردوا عليه العرب
طالع الزعيم بابتسامة خبيثة وبلغة انجليزيه متقنة : لدي لك خبر سيفرحك
كيفن بترقب : ماهو؟
بابتسامة : وجدت الفتاة
كيفن : انت متأكد
رد : أجل انا متأكد بأنها هي الفتاه التي نبحث عنها
ابتسم كيفن : من هي
رد بهدوء : زوجة نواف الوليد
كيفن بغضب : ماذا اللعنة ولكن لا بأس المهم أننا عثرنا عليها أحسنت

*****


في اليوم التالي
نواف جهزتي كل شي
شوق وهي تحس بتعب : ايه
نواف : وين جوازك
مشت لشنطتها وطلعت الجواز مدته له
نواف وقف وهو يشيل الشنط : يالله
شوق وهي تلبس عبايتها عطست : لحظه
نواف وقف ولف لها : خير
شوق بهدوء : ابي أمر اخواني قبل لا نروح المطار
نواف ببرود كمل مشي : لا مافي وقت
شوق طالعته بقهر وخذت شيلتها ونقابها وشنظة يدها
ولحقته شافته واقف في الصاله سلمت على ام نواف
وسلمت على نوف ورشا وريما طلع وهو يلبس نظارته
الشمسية وهي مشت وراه بهدوء
فتح السواق الباب له وراح بسرعه للجهة الثانيه بيفتح لها بس وقف لما سمع صوت نواف الآمر : خلها هي بتفتح لنفسها السواق رجع لمكانه
فتحته ودخلت وقفلته بغيض الي قاهرها انه ما راح يخليها تشوف اخوانها قبل لا تسافر
طلعت جوالها من شنطتها وأرسلت لشهد على الواتس

*****


قاعد رجل على رجل وبيده كوفي يشرب وينتظر جواد يخلص إجراءات السفر ، سانده رأسها على الكرسي بجانبه متغطيه بالسواد ما يبان منها إلا عيونها متوترة وتحس بخمول بتعب وصداع عطست مرتين وراء بعض تذكرت الي صار أمس بليل
""
خذت شور و طلعت ارتجفت من نظرته الحادة والحاقده قرب منها وهي رجعت لوراء بخوف صدمت بالجدار وراها
نواف : انا بنام على السرير شوفي لك مكان ثاني تنامين فيه سامعه
شوق هزت بأيه
نواف : والي يصير بالجناح ما أبيه يطلع لأي أحد ولا يويلك
طالع بعيونها وتذكر وفاة أخوه غمض عيونه ورص على أسنانه : بس سؤال ابي اعرف جوابه
شوق : و و وشو
نواف : ليش قتلتي فهد وش سوا لك
شوق نزلت نظرها لتحت : انت فاهم غلط
نواف ضرب الجدار بقوه
غمضت عيونها بقوه وبخوف : ن نواف فهد اخوك توفى بيومه الله يرحمه ويغفر له
نواف : لا تذكرين اسمه على لسانك وحده حقيره وقاتله
مسك كتوفها بقوة وهزها : هو تعب كثير لما تعالج من الإدمان بعد ما اكتشف انه مريض بالخبيث تروحين تقتلينه كان خليتيه يعيش الكم يوم الي بقى له
شوق دفته بضيق : هيه أصحى صح اخوك انقتل بس كان بيموت بهذاك اليوم بيموت لا تعترض على قضاء ربك
نواف بحده : مو معترض بس منقهر من طريقة موته والله لادفعك الثمن والله
شوق وهي تأخذ نفس بقوه : انا تعبانه وأبي انام الكلام معك ضايع
مشت وهي ترمي نفسها على الكنبة وتعطيه ظهرها و لما صحت من النوم كانت ترجف ومزكمه وتعبانه فيها خمول ومصدعه نامت بدون غطاء وهي توها خذت شور والتكييف بارد
""

رجعت من سرحانها بعسطه قويه
لف لها وهو يقول : يالله امشي
وصلوا الطيارة الخاصه لنواف ركبت الطيارة قعدت على المقعد ربطت الحزام وسندت رأسها تحس جسمها شاب نار
أقلعت الطياره بعد فتره لف لها وهو يشوفها ترجف مد بعد نقابها ولمس جبهتها حرارتها مرتفعة حيل ، وقف ونادى المضيفة وهو يطلب منها أكل وبنادول وكأس ماء راحت المضيفة بسرعه ورجعت بعربه عليها الأكل وثواني صار على الطاولة
ناداها : شوق
فتحت عيونها بتعب : هاه
نواف بأمر : قومي كلي علشان تاخذين الدواء
فكت الحزام وقفت بتعب ومشت بخطوات ثقيله لطاولة كلت شوي وخذت الدواء وشربت المويه وقفت بترجع مكانها بس وقفها صوت نواف : تعالي نامي هنا
راحت انسدحت طلع غطاء ورماه لها تغطت
تركها ومشى جلس على الكرسي وقدامه اللاب توب يكمل شغله

استقام بظهره وصكر اللاب توب وفسخ نظارته الطبيه
طلب عصير مانجو لف لشباك وسرح بخياله ما يدري كم مر عليه وهو سرحان وقف وهو يلتفت لها مشى لها لمس جبينها خفت حرارتها هزها
فتحت عيونها فزت واقفة : وين انا
نواف تجاهل سؤالها : قومي صلي الصلوات الي فاتك
لف وقعد يشرب العصير
شوق طالعت الساعه وشهقت : وليش ما قعدتني
نواف طالعها ببرود ومارد
شوق بقهر راحت تتوضأ وتصلي الصلوات الي فاتتها
بعد ما خلصت قعدت تستغفر
سمعت الكابتن يقول إن الطياره بتهبط مشت للمقعد
ضبطت شيلتها ومسكت نقابها بتلبسه مسك يدها : ماله داعي
وخرت يده بقوه وما اهتمت لكلامه و لبسته ربطت الحزام استعداد للهبوط بمطار هيثرو

*****


قاعد في شركته سرحان بالبنت الي شافها في بيت بو خالد ما يدري ليش مو قادر يبعدها عن تفكيره من لما شافها هذاك اليوم وقف وطلع من الشركة ركب سيارته ومشى ما حس بنفسه إلا واقف قدام البيت ضرب الدريكسون بيده : وش قاعد أسوي انهبلت
لفت انتباهه بنت طالعه من البيت المجاور لابسه عبايه مفتوحة نصها وشيلتها لافتها باهمال نزل من السيارة وتوجه لها : السلام عليكم
خلود : وعليكم السلام خير وش بغيت
عقد حواجبه من أسلوبها : بغيت أسألك هالبيت الي جنبكم بيت من
خلود بلا مبالاه : بيت أبو خالد وش تبي فيهم
فيصل : طيب عندهم بنات
خلود طالعته وطالعت لسيارته الفخمة : ليش تسأل
فيصل : بس كذا
خلود : وش المقابل وأقول لك كل شي
فيصل طالعها شوي وطلع بوكه وعطاها كم ورقه
نقدية من فئة الخمسميه
ابتسمت خلود بخبث وطمع : ايه بنات أخو بو خالد ثنتين واحده تزوجت والثانيه تدرس بالجامعة
فيصل ابتسم حلو وصل للي يبيه : وش اسمها الثانيه
خلود : شهد
فيصل : عندك رقمها
خلود : ايه تبيه
فيصل رفع جواله : كم وبدأ يسجل الرقم لف ببرود و مشى

*****


في لندن
صحت على صوت نواف العالي تأففت في بيت عمها تصحى على صراخ زوجته وهنا على صراخه وش عنده من الصبح يصارخ بعدت الغطاء نزلت من السرير غسلت وجها اسنانها وبدلت ملابسها وطلعت من الغرفه الي دلتها عليها اول ما وصلت مره اجنبيه في الأربعين من عمرها تشتغل في هالفيلا اسمها فلورا
نزلت الدرج ابتسمت لفلورا : good morning
فلورا : good morning
شافته واقف عند الباب شكله معصب بقوه بلعت ريقها بخوف ودخلت المطبخ صبت لها شاي وارتشفت منه بهدوء
دخل الصالة شافها واقفة في المطبخ : تعالي ابيك
شوق نزلت الكوب على الطاوله وطلعت له
نواف بابتسامة استهزاء : ابيك تنظفين الغرف كلها ورينا شطارتك بالنظافة
شوق بصدمة :هاه
نواف قعد على الكنبة و حط رجل على رجل : من قال هاه سمع ، وترى الغرف لها فتره ما تنظفت أبيها تلمع فاهمة
شوق بقهر : ليش أستاذ نواف قل الخدم في البيت
ولا فلوسك الي تغطي عين الشمس ما قدرت تجيب شركة نظافه
نواف احتدت نظراته : كلمه ثانيه وراح اخليك تنظفين البيت كله
شوق تكتفت : والله انا مو خدامه عندك وما راح انظف شي
وقف نواف بسرعة : شوق احسن لك سوي الي قلته من غير ما اسمع لك حس لأنه غضبي شين
شوق ببرود :لا طبعا ما راح اسوي
نواف مسك يدها وضغط عليها بقوه : انا ما ينقال لا لي فاهمة
شوق ويدها تعورها : طيب فك يدي راح انظف
نواف دفها :كان من الأول بدل هالعناد
شوق تأففت ومشت للمطبخ وهي تشوف فلورا وخدامه ثانيه شكلها طباخه سألت فلورا عن أدوات التنظيف
خذتهم ومشت دخلت اول غرفة قدامها تأملت ديكورها الراقي واثاثها الفخم طالعت المكتب والكراسي الجلد بلون الأسود والتحف واللوحات المعلقه ولفت ومشت لمكتبة ممتلئه بالكتب المتنوعه ابتسمت بحماس تعشق القراءة توجهت لشباك وفتحته لتهوية الغرفه مسكت الفوطه وبدت تنظيف من المكتبه الي كان عليها غبار بس مو كثير مسحت جبينها بارهاق بعد ما انتهت من الغرفة التي يبدو بأنه مكتب لنواف طلعت تتوجه لغرفة ثانيه


*****


قاعد مع زوجته يتقهوى بعد ما راحوا العيال المزرعة مع عمهم في يده فنجان القهوة لف لزوجته :سلمى
أم اياد : هلا
نزل الفنجان وهو يأخذ التمره الثالثه : وش رأيك نسافر
أم اياد بهدوء : براحتك يا ابو اياد بس اكيد اياد و نجود راح ينبسطو كثير
أبو إياد : طيب قومي نتعشى برى ونتمشى
أم اياد : كبرنا على هالسوالف
زفر بضيق لف شافها تطالع التلفزيون باندماج : سلمى طالعيني
لفت له : وش فيك اليوم
طالع بعيونها نظرتها باردة : مافيني شي بس جوعان
وقفت : نص ساعه ويكون العشاء جاهز
طالعها وهي تمشي لما دخلت المطبخ تنهد بضيق
حبها من أول يوم شافها فيه بملامحها الجميله والهادئه
تزوجها بعد ما كانت حالتها النفسيه دمار وقلبها محروق بفقدان أطفالها الأربعه بس مع الوقت بدت تتعود على حياتها وفرحتها كانت ما توصف اول ما عرفت بحملها بإياد حبها وعشق كل شي فيها مره سنعه وربت بيت ماهره تقوم بكل واجباتها وتهتم بعيالها وفيه بس ما عمره سمع كلمة أحبك منها ما يشوف لمعة الحب بعيونها ولا الشوق واللهفه لما يرجع من السفر ولما يعطيها هديتها تبتسم بهدوء وترد :مشكور أبو إياد الله يعطيك العافيه حتى اسمي ما اسمعه منها إلا نادرا طلع من أفكاره على صوت جواله الي يرن

*****


قعدت على الكنبة وهي تتنفس بسرعه وارهاق بعد ما نظفت خمس غرف ما وقفت إلا لصلاة الظهر تحسبت على نواف من قلبها نادت الخدامه الي مرت من قدامها : احضري لي كوبا من الماء
غمضت عيونها تحب تسوي كل شي بنفسها بس لانها تعبانه حيل طلبت من الخدامه تجيب لها مويه حست بأحد جاي فتحت عيونها بتأخذ الماء وفجأة طلعت شهقه قوية من الماء البارد اللي انسكب على وجها الأحمر المرهق
وقفت بعصبيه بتمسح فيها الأرض على حركتها توسعت عيونها وهي تشوفه واقف قدامها وعلى وجهه ابتسامة سخرية قهرتها بقوة : هاه ارتحتي وبليتي ريقك
شوق باستفزاز : ليش تعبت نفسك وجبت لي المويه انا طلبتها من الخدامه إلا اذا أنت تعتبر .. سكتت بخوف من تعابير وجهة الغاضبه
مسك يدها وجرها له : احترمي نفسك وثمني كلامك لا يكون صدقتي نفسك انك صاحبة البيت قاعدة تتأمرين براحتك ترى حالك حال الخدم عندي سامعه دفها بقرف عنه
مشت بسرعه لغرفتها وقفلت الباب تسندت عليه وهي تبكي بقهر خلصت من مرت عمها وجاء لها الي أسوء حست بألم فضيع ببطنها رفعت نظرها لساعة توجهت للكبت طلعت لها ملابس وراحت تأخذ شور بعد ربع ساعه طلعت وهي تنشف شعرها جففته وسرحته وربطته ذيل حصان
فرشت سجادتها ولبست جلالها بدت تصلي العصر بخشوع وبعد ما خلصت انسدحت على السرير وهي تحس بألم ببطنها غمضت عيونها ونامت من التعب
نواف دخل مكتبه بعصبيه بس وقف يطالع المكتب يلمع بنظافته وكأنها نظفته من قلب ابتسم ومشى وقعد على الكرسي لبس نظارته الطبيه وفتح اللاب توب وبعد ما خلص قفله ومسك جواله واتصل لأمه يطمن عليها ويطمنها عليهم


*****


صرخت برعب ولفت حولها تتنفس بسرعه و جسمها يرجف مسحت العرق بجبهتها حطت يدينها على وجها وهي تتعوذ من الشيطان هدت انفاسها ورجفتها
شالت يدينها وحطت يدها على قلبها تحسه يدق بقوه من الخوف لفت تشوف الساعه المعلقة قدامها توسعت عيونها الساعه 3 صباحا وقفت توضت صلت القيام خلصت قعدت تستغفر لما صار وقت صلاة الفجر صلت ولفت في الغرفه تدور مصحف ما حصلت ، طلعت لغرفة نواف فتحت الباب بهدوء دخلت طاحت عينها عليه نايم بدون فانيله طلعت بسرعه
وجها أحمر دقات قلبها زادت صكرت الباب وهي تتنفس
بسرعه وبتوتر ضربت جبهتها لما تذكرت انه اكيد في
بالمكتب نزلت بسرعه ودخلت المكتب دورت ولقت مصحف القرآن خذته ورجعت لغرفتها قعدت عى السرير تقرأ وبعدها صكرت المصحف و صلت الفجر وقفت وراحت لشباك وبعدت الستاره وفتحته تمت تطالع لين أشرقت الشمس المنظر روعه طلت برأسها على الحديقة شافتها فاضية بدلت ملابسها ورفعت شعرها كله وطلعت تركض لتحت فتحت باب الفيلا بهدوء وطلعت استقبلها الهواء البارد بعدت عن الباب وتركض بالحديقة بكل نشاط وحيوية بعد فتره شافت ساعتها ٧:٥٠ لازم تدخل بسرعه قبل لا يطلعون العمال ويبدون الشغل
طالعت جهة البوابة الخارجيه الحراس برى وما يدخلون إلا إذا في شي طارئ هذا الي عرفته من فلورا مشت صوب الباب بتدخل تخبت وهي تسمع صوت ركزت في الصوت وحست براحة لما عرفت انه نواف
واضح انه يتكلم بالجوال بعد عن الباب وهي بسرعه دخلت توجهت لغرفتها بتاخذ لها شور دافي بعد ما خلصت خذت المنشفه ولفت بتاخذ ملابسها وانصدمت شلون نست تأخذ الملابس وهي متعوده تدخلهم معاها لفت المنشفه على جسمها وصلت لركبه خذت نفس
تهدي نفسها اصلا هو ما يجي غرفتها فتحت الباب وهي تشوف المكان هادئ أول
ما طلعت انفتح الباب : قومي سوي لي سكت وهو يشوفها
شهقت بقوه ودخلت الحمام بسرعه وقفلت الباب تسندت عليه :هذا وش جابه الغرفه اليوم الغبي ما يعرف يستأذن قبل ما يدخل
حطت يدها على وجها الأحمر من الاحراج سمعت الباب يتصكر حست بألم ببطنها بقوة فتحت الباب طلت برأسها بعد ما تأكدت أنه محد فيه
قفلت الباب و خذت دواها وطلعت لها ملابس ولبست جففت شعرها و رفعته شالت الكعب بيدها ونزلت قعدت على الكنبه ولبسته ما تحب
تلبس الكعب في الغرفة ولا تعودت تلبسه في البيت بس الحين لازم تتعود شمت ريحة عطر وقفت لما عرفت صاحبها وخدودها صاروا حمر شتت نظرها : وش تبي مني
نواف : روحي سوي لي ريوق نص ساعه وبروح الشركه
شوق : طيب
مشت للمطبخ والخدم يطالعونها سوت الفطور و شالته له الطاولة ورجعت المطبخ
فلورا : سيدتي انتي لم تأكلي شيئا
شوق : فلورا لا تقولي سيدتي وإنما شوق
فلورا صبت لها عصير برتقال : شوك اسمك صعب سيدتي أفضل
شوق خذت الكأس : حسنا
شربت شوي مالها نفس للأكل مشتاقة لاخوانها اشتاقت لناصر عصبيته وطيبته ولفارس الهادي واشتاقت حيل لغرور شهد و سوالفها ودها تسمع صوتهم وتأخذ أخبارهم صحت على صوت الخدامه : أين السيد نواف
الخدامه : لقد ذهب قبل قليل
طلعت بفرحة وهي تمسك تلفون البيت وتدق رقم حافظته جاها الرد : الو السلام عليكم
شوق : وعليكم السلام والرحمة شهوده حبيبتي اخبارك
شهد صرخت بفرحة : شوق يا حماره وينك خذاك نواف ونسيتينا
شوق : لا والله ما نسيتكم كيفك وأخبار نصور وفارس
عساكم بخير
شهد : كلنا بخير ما ناقصنا غير شوفتك
امتلت عيون شوق بالدموع : ياقلبي راح تمر الأيام بسرعه وراح تشوفين أن شاءالله عندكم
سولفوا فترة

قفلت شهد وضمت الجوال لصدرها بفرحة اول ما شافت الرقم من خارج المملكة ردت بسرعه وهي تدعي أنها شوق فزت من رن الجوال وهي تحط يدها على قلبها طالعت الرقم وتأففت هذا ما يمل من كثر ما يتصل صمتت الجوال وحطت بجيبها بتروح تقول لاخوانها عن اتصال شوق


*****


عند ناصر
منسدح على السرير و حاط يده تحت رأسه شوق من لما تزوجت ما اتصلت فيهم قاعد يحاتيها مو لهالنواف أبد تمنى لو انها تمت على رفضها ولا وافقت رجع بذاكرته لوراء لما راح يشوف ردها
""
ناصر : شوق صليتي استخاره
شوق : ايه
ناصر : وش ردك
طالعت وبهدوء : موافقة
ناصر بدهشه : ايش موافقه على نواف وش الي غير رأيك
شوق : صليت استخاره وارتحت
ناصر : شوق متأكدة من قرارك
شوق : ايه وان شاء الله ما بيصير إلا الخير
ناصر تنهد : الله يوفقك ويسعدك

انتبه على صوت طق الباب .. عدل وضعيته وقعد : تفضل
شهد : نصور شوق اتصلت فيني
ناصر : كم مره قلت لك لا تقولين نصـ.. قطع كلامه فجأه
وهو يستوعب كلامها وقف بسرعه : شوق اتصلت
شهد : ايه والله توها مقفلة من عندي
ناصر براحه : أخبارها طمنيني عنها
شهد : الحمدلله بخير

*****


فيصل شكلها عنيدة وصعبه ما راح اقدر لها بسهوله والله كل يوم يزيد إعجابي فيها أخ بس لو ترد وتسمعني صوتها ، غمض عيونه و مر طيفها وهي قاعدة في حوش بيتهم أسرته من هذيك اللحظة ، مسك جواله ودخل الواتس وكتب

يا بخت من شافك وباسمك يناديك
اللي سمع اسمك حشا ما يمله
الله يسامح والدك يوم سماك
سماك اسم زود الطين بله
اسمك ( شهد ) و لا الشهد منك وفيك

نزل الجوال وهو متأكد أنها راح تعطيه بلوك في الواتس دق جواله رفعه وهو يشوف دانه تتصل رسل لها بيكلمها بعدين و طلع من غرفته بيقعد مع أمه وأبوه

*****


روان متضايقه ومقهوره وفيها غيره مو طبيعيه على نواف واللي مجننها انه مسافر معاها ولحالهم ، تنهدت نواف اتصل فيها أكثر من مره بس ما ردت مع أنه مشتاقة حيل تسمع صوته ، أخ بس ودها تشوف هاللي تزوجها الكريهه وتخنقها بيدها وتفتك منها وتندمها على اليوم الي وافقت فيه على نواف فوق ما انها خذت زوجها منها فرقت بينها وبين صديقتها وبنت خالها فاطمه

*****


بعد ما تغدت وقفت بتروح غرفتها بس وقفها صوته : هيه انتي
خذت نفس بقوه ولفت له : تكلمني
نواف : لا الجدار الي وراك
شوق لفت للجدار : ترى يكلمك رد عليه
نواف تنرفز : تعالي شيلي الصحون والساعة خمس ابي قهوه عربيه وابيها كل يوم بنفس الوقت
شوق طالعت بعيونه الي تناظرها باحتقار وحقد وكره قربت وخذت الصحون وودتها المطبخ وقفها صوته مره ثانيه
عضت شفتها وهي تحاول تهدى : خير أوامر ثانيه
نواف : ايه ابيك تسوين لي عشاء تركي
شوق بفهاوه : هاه
نواف ابتسم بسخرية : أظن سمعتي الي قلته
شوق : ما اعرف
نواف وقف وقرب منها : ايش
شوق ببرود : ما اعرف أسوي أكل تركي عندك الطباخه قولها تسوي لك
نواف طالعها من فوق لتحت باحتقار : وش اللي تعرفين تسوينه
تظاهر بأنه يفكر ورد بفحيح وحقد : ايه صح انتي تعرفين تاخذين المسدسات وتقتلين خلق الله
شوق غمضت عيونها وبحقد : انا الحمدلله ما عمري قتلت أحد
فتحت عيونها بصدمه بعد ما حست بحرارة الكف على خدها
نواف : انا ما أحب أحد يستغفلني وأكره الكذب والله لو ما كنتي مره كان دفنتك بمكانك
شوق بعدت عنه : انا ما قتلت أحد هذا الي عندي صدقت ولا بكيفك
مسك كتوفها بقوه حست باصابعه بتدخل بجلدها ونظره عيونه الغاضبة خوفتها نزلت نظرها
نواف : قولي لي وش هدفك وراء موته
هزها بقوة : كم دفعوا لك تكلمي
حست بصداع وغثيان طالعته بعدم استيعاب منهم
جن جنونه وتألمت من مسكته واصابعه بأن الألم على ملامحها
دفته من صدره بس ما تحرك وبألم : وخر عني ما ادري عن وشو تتكلم منهـ توسعت عيونها بصدمه ليكون فهد كان منضم لعصابه وبعدها قتلوه لما تخلى عنهم ، يعني هو يتوقع أنها معهم ارتجفت وهي تتذكر شكله قبل لا يموت صرخت ودموعها تنزل
انصدم نواف وش صار لها
دفته عنها وركضت للحمام يكرم القارئ بعد ما حست أنها بتستفرغ طلعت راحت لها فلورا ومسكتها
شوق بتعب : خذيني إلى غرفتي
كان يطالعها مو فاهم شي وش صار لها فجأة قعد على الكنبة بضيق ما يحب يمد يده على مره بس معها ما قدر يمسك نفسه قدام كذبها وحادثة موت أخوه تمر قدامه كل ما طالع فيها ، بس وش سالفه استفراغها وتعبها حط يده على راسه وشد شعره وليش مهتم عساها بهالحال واردى الله ياخذها
غمض عيونه ومر طيفها بهيئتها الي شافها الصبح فتح عيونه و نفض رأسه يطرد هالافكار وقف وراح لمكتبه بعدين ييتفاهم معاها

انسدحت على السرير بعد ما غطتها فلورا وطلعت وقتت جوالها علشان تقوم لصلاة العصر غمضت عيونها بمحاوله منها لنوم وهي تضغط بيدينها على بطنها ونامت

*****



شهقت وهي تطالع الواتس بصدمه هالرقم هو اللي يتصل فيها من فترة بس وش عرفه باسمها طاحت عينها على صورته الشخصيه متكشخ بالغتره والعقال ولابس نظاره شمسية طاح الجوال من يدها من وين جايب رقمها مسكت رأسها ما تدري وش تسوي : يا ربي اقول لناصر أو فارس عن هالرقم الي ازعجني باتصالاته والحين مطرش لي هالمسج تنهدت قعدت على السرير تفكر وبعدين خذت جوالها وعطته بلوك ومسحت الدردشه وطنشته كالعاده


*****


فتحت عيونها على صوت المنبه وهو يرن بازعاج قعدت وهي تتأوه بألم باكتافها استغربت من ايش هالألم طالعت لبسها نايمة بملابسها الي عليها ما لبست بجامه مسكت رأسها بألم من الصداع اللي فيها فتحت الدرج و طلعت لها باندول وصبت لها مويه وشربتها مدت يدها لساعتها على الكوميدينو وفزت بسرعه تتذكر صلاة العصر توضت وصلت وقعدت تستغفر وتسبح وتكبر وقالت أذكار المساء مسكت اكتافها وفجأة تذكرت الألم من وين
زفرت بضيق قعدت قدام المرايه وهي تشوف الاحمرار بخدها خذت المشط وسرحت شعرها حطت لها مكياج خفيف ولفت لكعبها تلبسه مسكت عطرها ورشته عليها بكثافة طلعت ونزلت ابتسمت : فلورا كيف حالك
فلورا : شكرا لرب انك بخير لقد قلقت عليكِ
شوق : لا تقلقي انا بأفضل احوالي
فلورا ابتسمت وتموا يسولفون مع بعض ، رفعت شوق معصمها تشوف ساعتها بقى خمس دقايق وتصير خمس وقفت وراحت المطبخ وفلورا تطالعها باستغراب فتحت إدراج تدور الي تحتاجه للقهوة وبعد ما لقتهم زفرت براحة وبدت تجهيز القهوه سمعت صوته ينادي فلورا ، ريحة الهيل خلتها تحن لبلادها سرحت بشهد واخوانها لما يتقهون وتعليقاتهم

بعد ما تكلم مع فلورا دخل وهو ناوي يهزأها ويغسل شراعها أنها تجاهلت أمره الساعه صارت خمس وطافت عشر دقايق بعد وقف وريحة القهوه العربيه منتشرة بالمطبخ وهي سرحانه والقهوة تغلي وجهزت مشى بسرعه وصكر على القهوة : ناويه تحرقينا بسرحانك
فزت من صوته متى دخل ما حست عليه لفت على القهوة : الحين بجيبها لك
طلع من المطبخ وقعد في الصالة لبس نظارته الطبيه وفتح اللاب توب

قاعده قدامه بعد ما صبت القهوه و تشرب بهدوء
نواف رفع فنجانه : وش فيك قاعدة هنا
شوق : اتقهوى
ارتشف القهوه وابتسم بداخله القهوه من يدها لها طعم غير
رجع يكمل شغله على اللاب بروقان
شوق : متى بنرجع السعوديه
نواف من غير ما يطالعها : لما نكمل شهر
 شوق بصدمه : شهر
نواف وهو يأخذ تمره : ايه
وقفت بضيق وتركت المكان

*****


جراح قاعد في البيت بعد ما أخذ اجازه شهر من دوامه بيقضي أكثر وقته مع زوجته وبنته ويتكلم بالجوال بانفعال : ما اقدر .. ليش انا أي أحد يقدر يروح .. ادري يوثق فيني بس مالي خلق
سفر ياخي روح انت .. أمري لله بس ترى هو
سكت وهو يسمعه .. تنهد وبمزح : لا انقتلت على يده لا اوصيك ادفنوني بالسعوديه قفل وهو يسمعه يضحك

سمعت آخر جمله قالها قلبها انقبض بقوه و تحس بألم ببطنها من الي راح يقتله ما راح تخليه يسافر بتسوي المستحيل علشان تمنع سفره ما تقدر تتخيل حياتها بدونه
شافها واقفة وجها شاحب ويدها على بطنها قرب منها بقلق ومسك كف يدها : حبيبتي فيك شي تعبانه اوديك المستشفى
هزت رأسها بلا : انت بتسافر
جراح عقد حواجبه : ايه
فاطمه : متى
جراح : للحين ما حجزت بس هالاسبوع اكيد
فاطمة طالعته برجاء : لا تسافر
جراح : فاطمة وش فيك
فاطمه : مافيني شي بس ما ابيك تسافر اقعد معنا
جراح ابتسم بأس جبينها : عندي شغل لازم أسافر اخلصه كم يوم بس وراد ان شاء الله اقول دام بيون عند روان يالله تجهزي بنطلع براحتنا
فاطمة وقلبها مو مرتاح : اوكي

يوم جديد
ارتجفت من نسمة الهواء البارد اول ما فتحت الباب
عدلت الشال على اكتافها و بيدها كوب كوفي دافئ اتنفست بعمق وهي تطلع والهواء يطير شعرها المفرود رجعت خصلات لوراء اذنها
مشت لجهة المسبح قعدت على الكرسي وهي تشرب بعد شوي وقفت ومشت بس فجأه حست بيد تمسكها شهقت لفها له و باين الغضب بعيونه : وش مطلعك برى الفيلا
شوق بهدوء : اتمشى فيها شي
نواف بعصبيه : غبيه انتي شلون تطلعين كذا بذا اللبس أشر على فستانها الي لركبه والشال الي ضامته على اكتافها " واذا شافك أحد من العمال أو الحراس والا انتي متعوده تطلعين بهالشكل قدام الرجال محد مربيك ومعلمك الاخـ..
سكت فجأه من انسكب الكوفي بوجهه ورقبته
ردت بعصبيه : ما اسمح لك تتكلم عني كذا وأبوي معروف بطيبته واخلاقه وتربيت على يده واعرف بديني احسن منك واذا طلعت الحديقة فلأني عارفه أن اليوم أحد والعمال إجازة والحرس ما يدخلون صرخت بألم من التوت يدها وراء ظهرها
نواف بعصبيه : انتي شلون تتجرأين تسوين هالحركه معاي ضغط على يدها بقوه والله لو عدتيها لأكسر يدك ويلي عارفه بدينك ما تعرفين أن القتل حرام والله أعلم وش مسويه غير القتل
شوق بألم وبكاء : فك يدي حسبي الله عليك واللي تتكلم عنه اسمه قذف
نواف فك يدها و دفها بقرف : مره ثانيه اذا بتطلعين الحديقة تعالي قولي قبل وتركها

مسكت يدها بألم وانهارت على ركبها تبكي بقوه كلامه أثر فيها حيل شهقاتها ارتفعت بألم وتعب منه وبعد فترة هدت وبصوت واطي : الله يسامحك يا ناصر ما لقيت إلا هالعايله
مسحت دموعها بيدها اليسار رجعت شعرها لوراء مسكت يدها تحاول تحركها كتمت صرختها من الوجع اللي تحس فيه بيدها
شالت الشال فتحت الباب ودخلت رمت نفسها على الكنبه غمضت عيونها ودموعها تنزل بصمت هي ما غلطت ومو قاتله سمعت صوت
فلورا فتحت عيونها وهي تشوفها قعدت جنبها
شوق : فلورا اريد كأسا من الماء
فلورا نادت وحده من الخدم وجابت المويه بسرعة خذته شوق وشربت
فلورا : سيدتي هل هناك ما يؤلمك لماذا تبكين
شوق مسحت دموعها بسرعه : لا شي
فلورا طالعت يدها آثار حمراء واضحة بقوة : يا إلهي ماذا حدث ليدك لما هي هكذا
شوق : لقد سقطت في الحديقة عليها بقوه
فلورا : يجب أن اتصل بالدكتور حالا
شوق بسرعة : لا لا انا بخير
فلورا : ولكن سيدتي
شوق : أتركيني لحالي

*****


جراح : فاطمه جهزي اغراضك باخذك لبيت أهلك
فاطمه مشت وقفت قدامه :ما بجهز اغراضي ولا بنروح
جراح : فاطمه مو فاضي لهالحركات يالله بسرعة
فاطمة تكتفت : مو متحركة ومافي سفر
جراح : جنيتي انتي هاذي مو اول مره أسافر وما تعترضين وش معنى هالمرة
فاطمه بعصبيه : لأن هالمرة غير من هذا الي راح تنقتل على يده يا جراح
جراح طالعها بصدمة
فاطمه مسكت يده : جراح اذا هالسفره فيها خطر
على حياتك تكفى لا تسافر
جراح : انا كنت امزح مع خويي مو من جد
فاطمه تسندت على الباب : المهم مافي سفر
جراح طالع ساعته : فاطمه بعدي تأخرت خلي بدر يجي يأخذكم طيب انتبهي لنفسك ولبيان
فاطمة ما تحركت
جراح تنرفز مسك يدها ودفها بقوه عن الباب وطلع
وقفل الباب وراه بقوة
صرخت بألم و ظهرها ضرب بطاوله قريبة من الباب
تنفست بقوه وهي تحس أنها بتموت من الألم اللي
بظهرها و بطنها طلعت بيان من غرفتها على صراخ
أمها ركضت وهي تشوف أمها طايحه على الأرض
ودموعها غرقت وجها : ماما ليش تبكين
ماردت عليها فاطمه
بيان بكت : ماما
توسعت عيون فاطمه بصدمه

انتهى البارت


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 36
قديم(ـة) 07-12-2017, 12:00 AM
اسيرة الهدوء اسيرة الهدوء غير متصل
©؛°¨غرامي فعال ¨°؛©
 
الافتراضي رد: ناظر عيوني وتدري وش كثر أهواك / بقلمي


السلام عليكم
البارت يجنن

الرد باقتباس
إضافة رد
الإشارات المرجعية

ناظر عيوني وتدري وش كثر أهواك / بقلمي

الوسوم
أهواك , بقلمي , عيونى , ناظر , وبحري
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايتي الأولى : كادي إيلآيل روايات - طويلة 667 17-05-2017 02:43 PM
روايتي الثانيه:بحر/كاملة *er روايات كامله - يتم نقل الرواية هنا بعد اكتمالها 998 30-08-2015 06:26 PM
لمآ بضمك ع صدري ! شو بحس الدنيآ صغيرة ♥ ! بقلمي Heba A.Daher روايات - طويلة 15 10-05-2015 03:17 PM
لن يسكن الحب قلبك ( بقلمى ) مهيب الركن خواطر - نثر - عذب الكلام 12 11-03-2015 07:42 PM
سلفوني بقلمي جزل المعاني شعر - قصائد - قصايد - همس القوافي 4 21-01-2015 06:50 PM

الساعة الآن +3: 05:41 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1