غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 13-12-2017, 09:29 PM
صورة النويير الرمزية
النويير النويير غير متصل
©؛°¨غرامي جديد¨°؛©
 
Upload4e28175c4a أنت الدوا وأنت ساس الجروح/بقلمي


السلام عليكم
شخباركم
اممم حابه أبدا اكتب روايه هني سبق و كتبت روايات بس ما نشرت اَي وحده منهم وهذي اول وحده بنشرها

امّم بس حبيت انوّه ان كتابتي بتكون من الصفر يعني الأفكار ان شاء الله بتكون في تطور
ان شاء الله نستمتع مع بعض و أتقبل نقدكم لو شو ما كان الرأي
بس نخلي شعارنا نوصل الفكرة اللي نباها بأسلوب محترم و متبادل

صححح اخر نقطه اذا لقيتوا اخطاء كتابيه سلكو لي 😂😂😂 لان أنا اكثر انسانه تخربط الكلام👊🏻😆
وشكرا💕

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 13-12-2017, 10:17 PM
صورة النويير الرمزية
النويير النويير غير متصل
©؛°¨غرامي جديد¨°؛©
 
الافتراضي رد: انت الدوا وانت ساس الجروح


يوم الأحد يوم اكثر يوم حزين في حياة دانه اليوم بدل ما تكون تتجهز لحفل تخرجها تتجهز لدفان خطيبها اللي ما مر على ملجتهم سوى أسبوعين .
<<<نرجع ل ورى شوي >>>>
يوم السبت الساعة تسع المسا
ف غرفه دانه كانت ترمس وَيَا فهد ع الواتس
دانه : فهد خل التلفون عنك انتبه للدرب
فهد : ما عليج الأمور طيبه لاتحاتين ، الا خبريني شو جدولج لباجر عندج شي ؟
دانه : لا والله ما عندي أساسا بتم بروحي ف البيت اميه بتظهر وَيَا يارتها أم احمد و خواتي كل وحده عندها شغله وأبوي مشغول و ذياب و علي عازمين ربعهم يعني ما اقدر اتحرك.
فهد : هيييه الله يعينج ، دوري شي تتسلين فيه يعني بدل القعدة ع الفاضي
دانه : ما عليك ان شاء الله بلقى شي … خلك مني الحين الا انت وين ناوي تسكن ولا حجزت من قبل !
فهد : لا الله يسلمج خليت واحد مِن ربعي يرتبلي كل شي هو له معارف وخبره هناك أساسا السالفة كلها يومين بس بلقي المحاضره ف جده وراجع ان شاء الله
دانه : الله يوفقك وشسمه أخليك الحين انتبه ع الدرب و اول ما توصل المطار رمسني
فهد : تمام مع السلامه
دانه : درب السلامه ان شاء الله
>>>>>>>>>
طلعت دانه من الغرفه و توجهت للمطبخ أدور ع شي تاكله 😂😂👊🏻 يعني كالعاده تسوي نفسها شبعانه ونص الليول تدخل شرات القطو أدور الاكل
وبين ما حبيبتنا تلسس فجأة تحس بشي يدبش ريولها وتسمعنى أقوى صرخة آآآآآ😭😭
شلت البيت بصراخها لدرجه ان أمها فزت من النوم … المصيبه مب ف الصرخة المصيبه لما شافت اللي دبشها طلع ذياب 😂😂😂 شافها وهو داخل البيت وقرر يخوفها
دانه: حسبي الله عليك من اخو شو ها حد يسوي شرات عمايلك نصايف الليل
ذياب : يوم تدرين انه نص الليل شو تسوين هني
دانه: قاعده اسولف مع المواعين يعني ما تشوفني أدور شي أكله
ذياب: الحين تنكتين و لا تنكتين وَيَا ها الشيفه
دانه : هههها لا اضحك اقووول مع نفسك أقوم أسد يوعي أبرك من ها الشيفه
ذياب : احلا عنج يام الدويس الا شسمه احم سويلي وياج مب متعشي انا🙂😊
دانيه : وليشً مب متعشي المطاعم تارسه الدنيا أخطف وخذ لك شي صعبه يعني
ذياب: لا بس كنت مستعيل و نسيت أخذ لي شي خلج من ها يالله عاد سويلي وياج لا اتمنين علي
دانه : كم تدفع واسويلك ؟
ذياب : يالله عاد دنيو بلا مذله بطلعج الأسبوع الياي البقعه اللي تبينها بس خلصيني
دانه : صدق ولااا شو تحسبني مقصه عندك؟ صبر بصورك فيديو عسب ما تنكر عقب😬😎
ذياب : يالله بدت بدت خلصي يالله ميت من اليوع
دانه : اول عيد اللي قلته
ذياب : هااااا بطلعج الأسبوع الياي المكان اللي تبينه خلاص رضيتي و يالله الحين حشااا طلعتي الاكل من روحي طبخي اشوف يالله
دانه : انزين انزين
سوت دانه عشى لها و لاخوها و عقب ما كلوا و شبعوا كل واحد منهم توجه لغرفته منهم اللي رقد ومنهم اللي كمل سهر
>>>>>>>>>
نوقف لين هني
ها شرايكم بأول بارت صح قصير بس السموحه الحين كتبته
بس ان شاء الله بعوضكم دام عندي اجازه الحين بأذيكم من طول البارتات

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 14-12-2017, 10:23 AM
صورة غرشوبه نعيميه الرمزية
غرشوبه نعيميه غرشوبه نعيميه غير متصل
©؛°¨غرامي فعال ¨°؛©
 
الافتراضي رد: أنت الدوا وأنت ساس الجروح/بقلمي


السلام عليكم
هلا الغلا شحالج
بدايه موفقه وان شاء الله بكون من متابيعنج بس طولي البارت
بالتوفيق

سلام،،،،

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 14-12-2017, 08:26 PM
صورة النويير الرمزية
النويير النويير غير متصل
©؛°¨غرامي جديد¨°؛©
 
الافتراضي رد: أنت الدوا وأنت ساس الجروح/بقلمي


اقتباس:
المشاركة الأساسية كتبها غرشوبه نعيميه مشاهدة المشاركة
السلام عليكم
هلا الغلا شحالج
بدايه موفقه وان شاء الله بكون من متابيعنج بس طولي البارت
بالتوفيق

سلام،،،،
وعليكم السلام حبيبتي

تسلميييين ع الدعم شقد فرحت بتعليقج 😩❤❤و ان شاء الله أكون عند حسن ظنج

بخصوص البارت ان شاء الله اليوم ع الساعه 11 بنزل واكيد بيكون أطول من الاول

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 14-12-2017, 09:42 PM
صورة النويير الرمزية
النويير النويير غير متصل
©؛°¨غرامي جديد¨°؛©
 
الافتراضي رد: أنت الدوا وأنت ساس الجروح/بقلمي


بِسْم الله
نكمل اليوم

امّم ف البدايه برمس عن الشخصيات

اولا نبدا بعايله دانه

الام : عبير بنت احمد امّم شخصيه رحومه محبه لعيالها ما ترضا بالغلط و نعتبرها أخت لهم عمرها 45 سنه بس اللي يشوفها ما يعطيها ها العمر جميييله جدا و عيونها وساع مايله للأخضر شعرها طويل
و لونه بين البني و الاشقر طولها 170 و انسانه رياضيه تقدس الرياضه بشككل لدرجه لما تسافر لازم تضمن وجود جيم ف الفندق😂😂😂😅


الأب : سيف بن مهيّر عمره 47شخصيه قويه قياديه لكن ف نفس الوقت يعتبر صديق لعياله وياهم إنسان مرح لكن برى البيت احم يحب يبرز هيبته نرمس عن شكله طبعا من عاشر قوما صار منهم 😹💪🏻 شرات حرمته رياضي معضل بس جي شوي يعني مب الشكل المقزز المهم شعره اسود عيونه بنيه طوله 185 له غمازتين وحده ف ذقنه و الثانية ف خده اليمين نسيت أقول انه يشتغل ف شركته الخاصه


طبعا دانه : دانه عمرها 22 توها مخلصه جامعه تخصص أمن معلومات *سكيورتي* امّم بنت ذكيه حبوبه شرات اَهلها بس لها طبع غريب بنعرفه عقب طولها متوسط 160 شعرها طويل لين اخر الظهر بني و عيونها مايله للأخضر شرات أمها لها غماره ف خدها اليمين و عليها بياااض ما شاء الله و طبعا محترفه ف التايكواندو حاصله ع المركز الاول على مستوى الاماره


ذياب: توأم دانه طبعا أطول عنها😅 طوله 180 شعره بني عيونه مايله للأخضر عنده غمازة ف ذقنه و الثانيه ف خده اليمين ابيض بس مب شرات دانه طبعا و مطيح نص البنات بس مب عاطنهم ويه محترم ولدنا😂😂👊🏻 مثل ما تعرفون عمره22 خريج طيران دارس ف لندن و هو مخلص قبل دانه

احم
ننتقل للخوات

ميره: اصغر عن دانه بسنه يعني عمرها 21 باقي لها سنه و تتخرج امّم اقرب وحده لدانه ع كثر استهبالهم لكن ما يرضون على بعض امّم طولها 165 🙂💔 شخصيه مرحه بس تييها هبّات و تسكت ولا ترمس وَيَا حد عقب بنعرف السبب امم هيه عيونها متوسطات لونهم اسود شعرها مائل الاشقر ضعيفه لكن تاكل اكل اليهَد و ما يُبين فيها😎 اييي بعد تدرس هندسة ديكور


لميا : اصغر الخوات عمرها 18 ثانوية عامه شخصيه مستهتره لابعد حد يعني اَي شي تحس فيه اكشن تتحمس وتسويه🙀 بس طيبه ووقت الفزعات محد أحسن عنها😂😂😂💪🏻 امّم تحب السكيت وكل خميس لازم تروح صاله التزلج بس فنااانه > ليتكم تشوفونها 😭😭😭💕> نتكلم عن شكلها امّم شوي قصيره طولها 155😍 شعرها اشقققر من الخاطر وعيونها زرق بس الدرجه الغامجه طالعه ع أم أمها طبعا بيضا شرات دانه


نتكلم عن علي: علي هو الاخو الأكبر عمره 25 إنسان جدي شوي له هيبه شرات ابوه شعره اسود ناعم عيونه سود فيه شوي سمار يشتغل ف الجيش لكن ك دكتور >>خريج طب صحح مقبل ع الزواج عرسه عقب ثلاث أشهر ماخذ بنت خالته ريما >>بنتكلم عنها عقب
______________
طبعا بس للتأكيد العايله كلهم رياضيين بس كلن وله اهتمامه الخاص امّم هم من سكان بوظبي
••••••••••••••••

ننتقل لفهد :
عمره 24 اعلامي طويل طوله 177 شغله يحده ان يتنقل بين الامارات و دول الخليج
ما رح أتكلم عن شخصيته ابيكم تكتشفونها من البارت
••••••••••••••••••••••••••••••••••••••••••••••••••



تعديل النويير; بتاريخ 14-12-2017 الساعة 10:34 PM.
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 14-12-2017, 10:26 PM
صورة النويير الرمزية
النويير النويير غير متصل
©؛°¨غرامي جديد¨°؛©
 
الافتراضي رد: أنت الدوا وأنت ساس الجروح/بقلمي


نروح عند فهد
لما خلص من سوالفه وَيَا دانه
اتصلت عليه ** نسمع المحادثة
*** : شحالك حبي
فهد : و الله الحمد لله ها بشري تجهزتي ولا بعدج؟
***: لا جاهزه يالله مرني بلبس عباتي لين ما توصل
فهد : تمام حبيبتي باي
***: باي
يوم وصل عند الباب دق عليها : يالله تولين انزلي انا عند الباب
رانيا : انزين الحين نازله
يوم وصلت ركبت السياره و ريحه عطرها تسبقها
فهد : شها الزين ها كله لي ، بس انا كم مره قايل لج لا تتعطرين يوم نبا نسافر؟
رانيا : شفيها عاد وين بنروح ترا من نوصل المطار بلبس العباة
فهد : ولو ما أحب حد يشم ريحتج او يشوفج 😡
رانيا : تباني انزل أبدل ؟
فهد : لا خلج ماشي وقت بس مره ثانيه سمعي الكلام
رانيا : ان شاء الله ولا يهمك
سكتوا و شغل فهد أغنيه لين ما يوصلون المطار
عقب فترة اتكلمت : تصدق من جيت هنا ما حكيت سعودي اشتقت للهجتي واشتقت لاهلي و لجده وكل شي …
فهد : ما رد عليها اكتفى بان يسمع شوقها لدارها
كمل مسيره و هو مخطط يتركها لفتره عندههم منها تروي شوقها ومنها يتفرغ لدانه

ستووووووووب
خ أتكلم عن رانيا أكيد تحسون بضياع : يا طويلين العمر رانيا زوجه فهد تزوجها لما كان يدرس ف جده يقال انه عن حب عمرها 23 بنت طيبه لكن ما تيي ربع جمال دانه انسانه متواضعة طولها 157 سمرا شعرها طويل عيونها سود خشمها سله سيف تجذب الانسان غصبن عنه بأسلوبها الحلو

التقت بفهد لما كان يغازل بواحد من المجمعات كان يدخل المول بعد ما يكذب ع العيايز بقصه حزينة لدرجه شوي ويتبنونه🙃🤦🏻‍♀ يعني بالمختصر ممثل درجه أولى
تم يلحقها لين ما خذا رقمها وهي المسكينه اللي صدقته بعد ما خلاها تصيح بقصصه اللي لها اول مالها اخر
المهم كانت خطته ان يتسلى بس أنصدم لما ما قدر يفارقها و تزوجها منها يلقى احد يرعاه ف غربته و منها انجذابه لها

نكمل ........
بعد ما سكتت
لفت اطالعه لقتله سرحاااااان ع الاخر وتكلم من بعد صمت : رانيا شرايج أخليج عند اهلج جي فتره أسبوعين ع الأقل يعني تقضين وقتج معاهم بدل القعدة ف البيت
رانيا : صصصصدق واااااي ما اصدق من الفرحه شوي و تنط بحضنه😂😂
لما استوعبت اللي صار لفت تعدل يلستها بسسسسسس صرخت بأعلى صوتها فهههههههدددددد ووووقففففف و غطت ويهها بيدها ………

.
.
.

بعد ما شافت السياره متجهه لهم غطت ويهها و سمعت الضربه
كانت الثواني بالنسبة لها طوييييله كلها خوف و قلق شافت شريط حياتها كله يمر قدامها كانت تتمنى تشوف اَهلها قبل ما تموت تذكرت آخرتها كيف بيكون و ضعها تمت ع حالتها بحدود الدقيقة لكن رفعت رأسها بخوف و هي تشووف فهد مسند راْسه و مغمض عيونه و هم واقفين ف نص الدرب ما كان فيه شي لفت تشوف السياره لقتها داعمه العامود يعني ما صابهم شي بس خافت لما شافته لي الحين ما فتح عينه
نادته و عيونها كلها دموع : ف فهد ف فيك شي ؟
تنهد وقال : لا بس رخيت جسمي شوي
سكتت و ما قالت شي الخوف اللي فيها كان يكفيها لمده و ما راح تنسى ها الموقف

……………
كمل دربه للمطار
لما وصلو ما كان باقي الكثير ع موعد الطياره
دخلوا بسرعة وختموا جوازاتهم و توجهو للطياره بعد ما استقروا ف اماكنهم قال فهد :
ابيج تنسين اللي صار اليوم صح بيكون صعب بس عرفي ان حياة الانسان تجارب و بيتذوق كل شي فيها بس الأهم كيف راح يقدر يتخطى كل المواقف اللي ينحط فيها … وأبيج تسامحيني ع كل شي صار او راح يصير وتعرفين شكثر إنتي انسانه عزيزه فقلبي ما ابيج تخافين من كلامي بالعكس ابيه يخليج قويه وتؤمنون بان المكتوب راح يصير ومحد يقدر يغيره >> ما عرفتك وانت تقول كلام سنع يا فهد😎👊🏻💕
صح حست بالخوف بس ف نفس الوقت حست برااااحه ما تدري ليش يمكن لان كلامه صح او لان
كلامه ذكرها بربها اكتفت بأنها تقول: ما عليك اهم شي ان نحن بخير الحين ها اهم شي بالنسبة لي

••••••••••••••••••••••
السموحه منكم بوقف لين هني اليوم
مب متعودة اكتب بارتات طويله وان شاء الله مع الأيام راح أطول البارتات

و أتريا رأيكم ف البارت + توقعاتكم للأحداث
وشكراااا💕💕😭😭😭
تريوني باجر 💪🏻💪🏻😂



تعديل النويير; بتاريخ 14-12-2017 الساعة 10:41 PM.
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 15-12-2017, 09:58 PM
صورة النويير الرمزية
النويير النويير غير متصل
©؛°¨غرامي جديد¨°؛©
 
الافتراضي رد: أنت الدوا وأنت ساس الجروح/بقلمي


عقب كم ساعه وصلوا مطار جده
طرش فهد مسج لدانه بانه وصل و سكر تلفونه على طول
عقبها وصل رانيا بيت اهلنا و اتجه هو ع الفندق
طبعا للتنويه بس أهل رانيا ناس يحبون السهر ف ما فرقت معاهم

ما راح أتكلم عنهم لان مالهم دور مهم ف القصه
نروح لفهد
بعد ما وصل الفندق وخذا له غرفه
دخل الحمام عز السامع تسبح و بدل ملابسه و تجهز للنوم
لكن دق تلفون الغرفه
***: سيد فهد في شخص ينتظرك في لوبي الفندق
ومسبب ازعاج ممكن حضرتك تجي تشوفه.
فهد : ما قال منو هو؟
***: لا والله حضر للرسبشن و طلب رقم غرفتك بس ما رضينا نعطيه و طلب منا ان نتصل عليك.
فهد: تمام دقايق و بنزل

يوم نزل أنصدم من الشخص اللي شافه وكن بيشرد لكن لسوء حظه ان الشخص انتبه له .
****: فهههد تعال هني لا تشرد
فهد: هاا لا لا ما كنت بشرد بس تذكرت أني ناسي شي ف الغرفه كنت برد اخذه
****: عليينا ها الكلاام خلنا نطلع من هني بلا شوشره يالله امش قدامي
فهد: ا ان شااء الله ياي ياي

عقب ما طلعوا من الفندق

****: ها يا سيد فهد متى ناوي تسدد المبلغ اللي عليك ترى واايد كبير وانا مب مستعد اتريا اكثر من اللي ترييته وابيك الحين تدفع .
فهد :😳 الحين ككيف ا انا ما عندي ربع المبلغ ما بالك بالمبلغ كامل

****: مالي خص تدفع الحين يعني الحين ولا بس فلوسك جاهزه حق العرس متى ما دخلت بنت ف راسك تزوجتها
ويوم ايي وقت الدفع قلت ما عندي

فهد : ب بسس كيف عرفت عن عرسي ؟ععطني مهله شوي بس لما اخلص العرس عقبها نتفاهم

**** : اسمحلي ما بترياك اكثر المره اللي فاتت شردت مني لكن الحين يا تدفع لي المبلغ كااش .... اوو تدفعه بروحك اختار يالله عندك دقيقه فكر وعطني قرارك ولاااا انا بتخذ القرار.


فهد ف خاطره: شسوي الحين شو الحل اصلا من وين طلعت لي ها المصيبه كيييف بدفع له الحين ان ما دفعت بيذبحني مينون و يسويها .

****: هااا خلصت الدقيقه بتدفع ولااا
سكت فهد ما عرف شو يسوي كان يدور حل لكن للاسف خانه عقله ها المره وكانت السكين أسرع منه وو دخلت ف نص قلبه

****: هه هه خلني اشرد احسن ع الأقل خذت حقي تصافينا يا فهدد بعد ما خذت البنت اللي حبها قلبي ما
قدرت أسوي شي رابعتك و طيحتك ف ها الديون و الحين انت ربحتها لفتره لكن انا خذت روحك و بترجع لي لو أتزوجها غصب بترجععع.

****: ما رح اعطيكم صفاته بس هذا مؤيد ولد عّم رانيا كان ناوي يتزوجها بعد ما يخلص دراسته بس أنصدم لما عرف انها تزوجت وهو اللي كان واعدنها يتخرج ويتزوجها لكن للاسف هي ما تريت لين ما يوفي بوعده...

بعد كم ساعه في شخص بلغ عن شوفته لفهد لكن للاسف لين ذاك الوقت كان ميت و محد لحق ينقذه💔😔

ع الفير وبعد الإجرائت وصل الخبر لأهل رانيا ومن صدمتها اغمى عليها كذا مره .....

طبعا لين هني وقف دورها و مارح نتكلم اكثر بس اللي راح يصير بيحاول مؤيد يخطبها عقب العده و طبعا بيغصبها ع الزواج بما انه ولد عمها و هو أولى من الغريب وبس ما راح يصير الكثير عسب جي ما راح أتكلم .....
.
.
.
.
انزيييييين نروووح لدانه

طبعا بعد ما كلت هي و ذياب راحت غرفتها عسب تنام لكن للاسف الليله صابها ارق و كانت تحس بخوف ما تدري شو سببه و تقلبت ف فراشها لييين ما اذن الفير

قامت و تيددت و صلت فرضها و قرت شوي من القرآن عسى يخف شعورها و تقدر ترقد عقبها رجعت لشبريتها و غفت على طوول

نروح غرفه أمها وأبوها

قامت عبير و قيمت ريلها عسب يصلون و طبعا ع ما يدخل هو و يتوضى راحت لغرف عيالها عسب تقيمهم للصلاة

و هي راجعه الغرفه شافت سيف يرمس ف التلفون و الصدمة ع ملامحه خلص المكالمه و هو يقول : لا حول ولا قوة الا بالله الله يصبرج يا دانه الحين كيف بنوصل لها ها الخبر
الام: بسم الله شصاير ارمس ؟!😨
الأب: توهم داقيين علي أهل فهد يقولون ان لقوه مجتول قرب الفندق اللي كان ساكن فيه
الام بخوف وحزن: بسم الله منو سواله جي الله يرحمه مات ف عز شبابه ، الحين كيف بنوصل الخبر لدانه شسوي كيف أقول لها شو بيصير ببنتي لا سمعت الخبر!!!

لاب : استهدي بالله خليني اروح المسيد قبل لا تفوتني الصلاة و عقب بنفكر كيف نخبرها

عقبها راح سيف المسيد هو وعياله وكان صدق شايل هم دانه كيف يوصل لها الخبر

عقب ما ظهروا وهم ماشيين قال سيف: تعرفون شو صار اليوم؟
رد علي وذياب ف نفس الوقت: شو؟!
الأب: اليوم دقوا علي أهل فهد و قالوا ن ولدهم انقتل قرب الفندق اللي كان ساكن فيه

ذياب ما تكلم وراح فكره لدانه اللي راقده و ما تدري بشي حاول ما يتالم عسب ما تحس
لكن علي رد : ب كيف؟ شو صار؟ منو مستقصدنه؟

لاب: والله ما ادري ما قالوا لي بس يمكن كانت له عداوه ويا شخص ما اعرف ما اعرف بس الله يرحمه
ردوا مع بعض:الله يرحمه
لاب: المشكله الحين كيف نوصل الخبر لدانه مب عارف كيف اقول لها اخاف يصيبها شي

ذياب : خلونا نجتمع ف غرفه و نخبرها ما نقدر نخش عنها الخبر بس مب الحين لما تقوم ما نبا نفجعها من الصبح
الأب : تمام يالله الحين دخلوا رقدوا
العيال: ان شاء الله

ع الساعه تسع قامت دانه وتلبست و نزلت تحت وهي نازله وصلها مسج قامت تصارخ و تناقز ف البيت : اميييه اميييه وييينج

يت أمها وهي ميته خوف تحسبها عرفت
لكن دانه كانت تناقز من الفرح : باركيلي أمي باركيلي اليوم طلعت شهادتي يعني صرت خريجه رسسمي😎🤓😩❤


••••••••••
سامحوني اليوم بوقف لين هني
وباجر ما بكتب بنزل ف اليوم اللي عقبه يعني لأحد عسب اقدر اكتب اكثر من جي وأجمع لكم احداث اكثر

أتمنى ألقى تعليقاتكم
استمتعوا بالبارت وشكرااا لمتابعتكم💕💕



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 20-12-2017, 09:26 AM
صورة النويير الرمزية
النويير النويير غير متصل
©؛°¨غرامي جديد¨°؛©
 
الافتراضي رد: أنت الدوا وأنت ساس الجروح/بقلمي


سلاااام شخباركم
انتظروني اليوم شي بارت

والسموحه لأجواء كانت حلوه و ما قدرت افوتها عسب جي ما نزلت😅🤦🏻‍♀

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 23-12-2017, 04:02 PM
صورة النويير الرمزية
النويير النويير غير متصل
©؛°¨غرامي جديد¨°؛©
 
الافتراضي رد: أنت الدوا وأنت ساس الجروح/بقلمي


احم عذرا ع التأخير

نقول بِسْم الله و نكمل
حست لام براااحه ان بنتها ما درت ولكن اصرت انهم يجتمعون الحين لين متى بيخبون الموضوع لازم نروح نعزي أهل فهد
عطت لأب خبر ان يتوجه هو و الشباب للميلس
و قالت لام لدانه: احم دانه أبوج بياج ف الميلس تعالي نشوف شو عنده
دانه من الزيغه و الخوف ان شي صاير نست ان أمها ما بارك لها كان همهم اكبر من المباركه
وصلو الميلس و دخلت دانه يلست ف الجهله المقابله لاقوها و يمينها ذياب و يسارها أمها و علي يم ابوه
تكلم ابوها بنبره حنونه : دانه إنتي تعرفين ان كل شي قسمه ونصب وان كل شي فيه خير للإنسان
هني دانه من الخوف تحس الدنيا ادووور بالعافيه صالبه عودها
كمل لأبو : انا ما بوترج اكثر بس ترحمي على فهد هو يبي منج الدعاء
والاهم لازم تعرفين ان ها امتحان من رب العالمين يبي يشوف فيه صباح كوني قويه يا دانه و نحن بنكون معاج و عرفي ان كل شي يتعوض الا الصحه
دانه ما تعرف شو تسوي الحين كان المفروض تفرح بتخرجها تتريا هديه من ابوها وإخوتها بس حاله انقلب ف دقيقه من عرووس لأرملة شعورها صعب صعب ينوصف كيف بتعيش وهي مترمله و هي توها ف بدايه العشرين …
سكتت و راحت لغرفتها تحاول تستوعب المصيبه من صدمتها عيونها ما دمعا تبا تصيح بس ما تقدر ها الشي معروف عن دانه لان دموعها ما تنزل بسبب صدمه مرت بها يوم كانت صغيره ف صار اَي شي يأثر ع نفسيتها وتصير عصبيه و ما ترمس حد لفتره
صح تنزل و تقعد مع اَهلها بس بدون ما تنطق ها طبع دانه ما تقدر تغيره مع ان اَهلها عرضوا حالتها عَلى اكثر من طبيب بس للأسف محد قدر يخلصها من ها الحالة
نرجع لها كانت قاعده ف زاويه الغرفه تناظر لارض بنظره حزينة
لكن للأسف ما تقدر تعبر عن شعورها


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 23-12-2017, 04:05 PM
صورة النويير الرمزية
النويير النويير غير متصل
©؛°¨غرامي جديد¨°؛©
 
الافتراضي رد: أنت الدوا وأنت ساس الجروح/بقلمي


بكمل لا تحاتون ما خلص بارت اليوم و بالنسبة لتأخير انا تعمدت أتأخر كان عندي أمل احد يعلق لكن ما عليه بكمل حتى لو محد قرى بكمل
وبس فصلت نص البارت الاول عن الثاني عسب تغير لأحداث
صححح حطولي توقعاتكم عن حياة دانه شو بيصير فيها او كيف بتكمل ابي اشوف حماسكم لو شوي


الرد باقتباس
إضافة رد

أنت الدوا وأنت ساس الجروح/بقلمي

الوسوم
روايه، روايه اماراتيه
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
رواية / فضولي هو السبب Loly.m روايات - طويلة 99 27-12-2017 07:51 PM
ما يجمعنا هو الصداقة / بقلمي احزان متجدده M روايات - طويلة 55 16-04-2017 06:35 AM
ما بعد ماضي الترف مستقبل يغوص في المجهول الكاتبه : Miss Julian /كاملة اسطوره ! روايات كامله - يتم نقل الرواية هنا بعد اكتمالها 226 16-08-2016 05:29 PM
رواية عشقتك لإنك الفتاة الوحيدة التي جعلتني أجري خلفها/بقلمي البلورة المعشوقة روايات - طويلة 7 24-01-2016 03:36 AM
رواية مجنون احب غيرك /بقلمي Krystal روايات - طويلة 2 04-05-2015 07:44 PM

الساعة الآن +3: 05:30 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1