al hazina ©؛°¨غرامي جديد¨°؛©

متى راح تنزلي

زهرة الجبل $ ©؛°¨غرامي مشارك¨°؛©

القصة جميلة جدا وأسلوبك رائع متي البارت القادم

زهرة الجبل $ ©؛°¨غرامي مشارك¨°؛©

ياسمين شخصية رائعة

fulla fh ©؛°¨غرامي جديد¨°؛©


البارت الثالث عشر

وافي اشر حق وليد بعينه عشان يطلع من الغرفه وقال باستغراب/شفيك وافي ما تركتني حتي اعطي حق حصه هديتها؟

وافي بضيق/فهد .

باستغراب /شفيه؟

وافي بهدوء/تصاوب بالشغل بس لا تحاتي ما فيه شيء الحين بنروح له بس ما نبي نفجع احد.

وليد بلهفه/وافي ما فيه شيء صدق والا بس...

قاطعه/والله ما فيه شيء .

تنهد براحه وراح يناظر اخوه وش صار عليه.

يوم دخل الغرفه وناظر اخوه علي السرير ناظر حرمه عنده لا امه ولا وحده من خواته/اختي انتي منو؟

ناظرته وقبل ما تتكلم سمعت وافي يقول بحده/طلعي بره .

طلعت لانها خافت من نظراته ليساله وليد بعد ما طلعت/منو ذي يا وافي؟

وافي بغموض/اكيد وحده فضوليه الله ياخذها ان شاء الله.

وليد باستغراب راح عند اخوه وهو يناظره التغذيه بايد وصدره العالي موصوا باجهزه وجهه اللي دوم قاسي نايم بسلام وتعب حط ايده علي راسه وهو يتمني له انه يكون بخير.

رغم الكل يحسبونه قاسي بس احن قلب بالعالم.

وافي بهدوء/وليد انا معي شغل عشان كذا ابيك تظل عنده لا تتركه لحاله لو ثانيه واتصل علي بدر يجيك وانا ان شاء الله برد علي المغرب.

هز راسه بالموافقه وطلع عمه واللي متاكد منه وليد انه فيه شيء مخبيه عمه

@@@@@@@@@@


ياسمين بعد ما ظلت هي ومزون عند حصه سمعت حصه تسالهم/شفيكم ما رحتو معهم؟

مزون/افا ايش الطرده المحترمه ذي.

حصه ببسمه/لا بس ما ابي اتعبكم.

ياسمين ببسمه هاديه/لا بس ننتظر وافي وبعدين ماراح نروح الين يجيك ابووافي.

مزون/فديته.

حصه وياسمين ضحكو ومزون استحت لانه الكلمه طلعت منها بدون وعي وصدت عنهم وجلست تناظر جوالها اهلها بيرحون بعد اسبوع وهي حيل راح تفقدهم تنهدت وحست بدمعه نزلت علي خدها مسحتها قبل ما يناظرها احد.

دخلت وحده بعد ما دقت الباب ورفعت نقابها ومزون ناظرتها باعجاب عيون عسليه وساع ومكحله وشفايف مليانه وبشره صافيه ناصعة البياض قربت من حصه وقالت/الحمد لله علي سلامتك.

حصه اللي تحاول تتذكر وين شايفتها قالت بعد تفكير/ليالي شلونك وشخبارك من زمان عنك من بعد ما تطلقتي من ابو حيدر ما عاد شفناك؟

ليالي ببسمه/الدنيا تلاهي ناظرت اسمك بسجلات وقلت لازم اشوفك واتحمد لك بالسلامه.

حصه تعرفهم/ الدكتوره ليالي كانت مرت صديق فهد...وذولي ياسمين بنت عمي ومزون مرت عمي وافي.

ما فاتت لمعة الحب اللي مرت بعيوون ليالي يوم انذكر اسم فهد وناظرت ياسمين بحده لانه ياسمين تشكل خطر عليها واي خطر لازم تشيله سلمو البنات بهدوء.

مزون مستغربه من ياسمين اللي حست بالاحتقار بنظراتها لذي الحرمه اللي يوم سالتها حصه وش مسويه قالت/تزوجت بعد ابو حيدر ...

قاطعتها ياسمين/وافي ييقول انه زوجك هنا عيل نتركك الحين معه.

مزون وقفت تلبس نقابها وطلعو مع ليالي اللي مشت بكل غرور ووصوت كعبها يرن .

مزون بهمس/شفيها ذي بغت تذبحك بنظراتها؟

ردت ببرود/ما عليك منها .

ناظرت وافي جاي مع وسام وبعد ما دخل لزوجته همس لها وافي/منو ذي وليش ساكته كذا؟

بضحكه/الله يعين بس وحده اعرفها اضطريت اني اجاملها والحين تبينا نردها البيت.

هز راسه ومشي جدامهم رصت علي اسنانها/مالت علي ويهك يا غبيه.

ياسمين بضحكه/ابي اتطنز عليه شوي.

وصلو جدام بيت اهل مزون واستغرب بس ياسمين قالت وهي تنزل/بجيب شيء واجي.

ناظرها بصدمه شلون تتركني مع الحرمه وبعد السياره مظلمه الله يهديك بس سمعها تقول بصوت غريب/شلونك؟

استغفر الله رددها اكثر من مره هذي ما تستحي وبعدين ياسمين شلون تعرف اشكال مثل هذي ما رد عليها واخذ جوالها بيدق علي بنت اخوه الغبيه ذي بس التفت يوم سمع ضحكتها وهي توخر نقابها/الحين ما عرفتني.

ناظرها بصدمه وقال/مزون.

بعدها ابتسم قلبه يعني سوتها ولبست النقاب التفت لها وهو يقول/مسويين فيني مقلب.

بضحكه/من يوم ركبت وانا كاتمه ضحكتي حسيت بموت من الكتمه.

مسك كفها وباسه/بصراحه ما توقعت تسوينها.

سحبت كفها وقالت/ولا انا بس ليش نعاند الحياه قصيره حيل.

تنهد براحه/كنت ابي اخذك للعشا ابي اسولف معك بس صار شيء مع فهد وما اقدر اتركيها لوقت ثاني والحين نزلي من السياره قبل ما اسوي شيء راح نندم عليه اثنينا وخلي بنت سعود تجي.

هزت راسها ونزلت من السياره رايحة بيتهم.

@@@@@@@@@@

وقفت عند الكبت ثقلت بلبسها لانه الظاهر التكييف خرب عندها والغرفه صارت مثل الثلج ولبست بنطلون فوق بنطلونها وراحت عند السرير عشان تدفي بس ما كو فايده طلعت للصاله ونفس الشيء

اتصلت علي التصليح وقال لها يوم قالت انها تبي عنصر نسائي راح تتاخر شوي.

انسدحت علي الكنبه وهي ترجف عمرها ما حست ببرد مثل ذا بالذات مع كل اللي صار حاسه انه راح تموت هنا بذا البرد لحالها مو حولها احد

دقايق الا تدق الشركه تخبرها انه الحرمه راح تجيها بعد عشر دقايق وصلت وفتحت لها الباب وهي تشد الروب عليها من البرد

دخلت غرفة النوم وهي تبي تعرف من وين الخلل وهي ظلت واقفه وراحت تسوي لها كوب كاكاو يدفيها بعدها سمعت صوت الباب وكان مشعل

اللي يوم ناظر عدة التصليح زمجر بغضب/انتي ما تستحين صح؟

بلعت ريقها بخوف وهو يقرب منها ويلف ايدها بقوه لدرجة الوجع وصل اعلي دماغها/اترك ايدي عورتني

بحده/عورتك ياللي ما تستحين صايره مثل بنات الهوي

صرخت فيه/جب ولا كلمه ما اسمح لك تهيني اكثر من كذا

طلعت المصلحه من الغرفه وهي تهتف/mdam i fixed the system?

اشرت لها بهدوء وهي تحاسبها وبعد ما طلعت قالت بصوت هادر/خمس شهور راح اظلهم علي ذمتك بعدها كلن يروح في حال سبيله يا ولد عمي تفهم ولا تحاول تبرر ولا تقول اي شيء

مشعل بغضب/مسويه فيها شريفه

بحده اكبر/غصب عن خشمك شريفه واذا مفكرني مثل ما قلت بنت هوي قالتها بوجع طلقني الحين طلقني

لاشعوريا هتف/انتي طالق

فتحت عيونها بصدمه وطلعت من الصاله دخلت الغرفه وقفلت الباب وانهارت علي سريرها تبكي الا تنوح علي اللي صار اذا كانت هي حرمه ناقصه عقل فهو بالاساس ما عنده عقل ابد

@@@@@@@@@

قمر اللي كانت تراسل بدر علي الفايبر وتناظر مناير وجوري وهم يضحكون عليها ما اهتمت لهم ولنغزاتهم وهي ترسل له فيس مبتسم علي صورة الدهان اللي يبي يسويه

ما تخيلت بدر يكون كذا حبوب وهادي واكثر شيء اعجبها انه متفهم وياخذ رايها بكل شيء

ريحان اللي كانت حيل بردانه وكانها بتمرض متلحفه علي الكنبه

فله بملل/شفيكم كذا كانه صايرين مملين ريحانو وقمور غزل مع بعولهم وانتم الثنتين صارين مملين

دخل جدهم وهو يقول بحنان/كاني اسمع احد متملل هنا

فله قفزت وهي تبوسه بحنان/جدي نبي نغير جو

همس بحنان/بنروح المزرعه شرايكم؟

الكل صرخ بفرح وهم يبوسون جدهم وريحان اللي عطست وهي تهتف/الحمد لله

جدها بحنان/يرحمك الله شفيك يا يبه؟

بتعب وهي ترد عليه بكلمات صارت غير مفهومه/يرحم.....ك..و

مسك راسها وهو يقول/بنات لبسوها عباتها باخذها المستشفي الظاهر انها اخذت برده وحرارتها مرتفعه الله يهديكم بس تنامون والتكييف ابرد من القطب

فله بهمس/جدي واللي يسلمك تراها تخاف من الاطباء والابر الحين اتصل بمزون وهي تعرف شلون تتعامل معها واللي يسلمك

هز راسه وهو يطلع من عندهم

ريحان بتعب/بموت بطني بتتقطع اول مره تعورني هالكثر

ردت جوري اللي راحت ومعها كاس مويه وحبتين مسكن ساعدتها تبلعهم وهي تهتف/ناس تجيهم وتروح مثل الهوي البارد وناس تذبحها ذبح

قمر بفزع/بسم الله علي من عينك يا ام عيون اعوذ بالله من الشيطان الرجيم

ضحكو الكل عليها وريحان تقول بهدوء/ممكن تطلعون من الغرفه

مناير تكش عليها/الحمد لله والشكر بتكلم قيس بن ملوح ما اقول الا مالت علينا وعلي حظنا بس

ضحكت عليهم وهم يطلعون ويتحلطمون عليها وردت عليها ببسمه/هلا ناصر

ببسمه/ما فيه هلا حبيبي هلا ياعمري

بخجل/ناصر

ضحك عليها وهو يقول/شفيه صوتك كذا تعبانه؟

بهدوء/بس شوي انت شلونك وشلون خالتي عساها طيبه؟

بحنان/الحمد لله طيبين وحتي المهندس خلص اليوم الشغل بجناحنا طالع شيء خيال

بفضول/ودي اناظره

ليهتف بخبث/لا ما راح تناظرينه الا يوم تدخلينه عروس

بخيبة امل/طيب بنتظر وامري لله

@@@@@@@@@@@


دخل فهد مستند علي صقر اللي كان يقوله كان ما طلعت من المستشفي بس هو عيد وراسه يابس وما يسمع حق اي احد/خلاص صقر اكره ريحة المستشفي

وريحة ذيك الغبيه اللي عرف انها دخلت له اكثر من مره

وما يبي مشاكل مع احد

ناظر امه وابوه اللي انفجعو من منظره انسد علي الكنبه وهو يهتف/يمه واللي يسلمك مو اول مره اتصاوب

مساعد بحنان/انت بخير يا فهد

بهدوء/لا تحاتي عيال الراشد ما توقفهم رصاصه

منيره بدموع/سلامتك يمه سلامتك

صقر جلس بهدوء/فهد اخذ كل شيء الحب والخوف و

امه تضربه علي كتفه/اسكت انت ولا كلمه طلعت من البيت وتقولي متعب يبني ما تقول عن اخوك

ببسمه/ما ابي افجعكم وكاهو جدامكم ما فيه شيء ومرينا حصه بعد عشان لا تنفجع اذا سمعت الخبر من احد

منيره بحنان/عسي الله لا يحرمهم منكم يارب

الكل تمتم بامين

امه بحنان/برتب لك الغرفه اللي تحت مو زين تصعد الدرج يمه

هز براسه وهو يحس انه دايخ من التعب ومن ذيك الغبيه الله ياخذها عني ان شاء الله

@@@@@@@@@@@

ياسمين دخلت مع مزون وقفت وهي تناظر رساله من ريفان /ياسو تعالي الحين طلقني مشعل

بلعت ريقها بوجع لتاخذ جوالها وتتصل علي صديقه تحجز لها تذكرتين علي لندن باسرع وقت وقالت انه فيه رحله بعد ساعتين وتقدر تحجز لها

قفلت وراحت وري وافي دقت الباب وهي تقول/وافي بنروح لندن ريفان ما ادري شفيها؟

قال وهو يتنهد/شصاير؟

بهدوء وبصوت خافت/ما ادري شنو اللي صار بس ولد عمك طلقها

نعم/قالها بغضب

لتهتف وهي تطلع/رحلتنا بعد ساعتين ما ابي احد يدري الين نشوف وش اللي صاير هناك انتبه تقول لاحد بس انها تعبانه ومحتاجه لنا او اي مصيبه مع ولد عمك

سلمى سعسع ©؛°¨غرامي مشارك¨°؛©

قصير :-( :-( :-( :-(

سلمى سعسع ©؛°¨غرامي مشارك¨°؛©

وجميل :-)
تمنينا لو أطلت فيه قليلا

Rgd.m ©؛°¨غرامي جديد¨°؛©

من كثر ماني حابه الروايه كل يوم ادخل اشوف نزلتي بارت او لا 😢😢 بليز لاتسحبي عليها كمليها ونزلي بارتات كثيره 💖💖💖

روز حماد ©؛°¨غرامي جديد¨°؛©

وين الباقي الروايه جنان استمري يا مبدعه ولا تقوليلها بالله

fulla fh ©؛°¨غرامي جديد¨°؛©

البارت الرابع عشر

مزون تناظر وافي اللي معصب وهي ترتب له حقيبته وبعد ما خلصت قالت بهدوء/وافي شفيك؟

بحده/وخري عني مو طايق نفسي الحين ما ابي اغلط عليك

ببرود وهي تقفل حقيبته/الشرهة مو عليك الشرهة علي اللي جيتك اتطمن عليك

طلعت من غرفته بسرعه وهي حدها معصبه منه هي وش يخصها بس تعرف زوجها زين عصبي بس ماراح ترضخ لعصبيته راح تعلمه شلون يتعامل معها

ناظرت ياسمين طالعه معها حقيبتها وبهمس/انتبهي حق نفسك ياسمين وبعد ريفان اخاف يصيدها شيء

بهدوء/لا تحاتي اقوي مني ومنك تري بس اعتقد اللي صار بيكسرها شفيك انتي معصبه؟

مزون بهدوء/ولا شيء يلا عشان لا تتاخرون بروح عند ريحان ولا تحاتي بظل معهم

طلعت ركبت السياره وهي تسمع وافي يسال/حقيبتك وينها؟

بهدوء/ما يحتاج كل شيء معي بالحقيبه الصغيره ونحن ماراح نطول هناك؟

صقر بهدوء/شلونك يا بنت العم؟

ردت بهدوء/الحمد لله

حرك صقر للمطار وسط هدوء الا اسئله من وافي يرد عليها بهدوء وصلو المطار انتظر الين اقلعت طيارتهم وركب سيارته بيرجع البيت

وصل بيتهم بعد ربع ساعه راح يتطمن علي اخوه بس قبل لا يدق الباب سمعه يقول بغضب/انتي ما تستحين صح عسي الله ياخذني وارتاح منك.....سكت ورد بعدها بحده/لا تقربين من بنات عمي لاني ساعتها بمحيك اكيد ولا همني من احد حشمي سنك يام حيدر حشمي عيالك

دق الباب ما يبي يتسمع اكثر وش المشكله اللي طايح فيها اخوه سمعه يقول تفضل ويوم دخل ناظره يحذف الجوال علي السرير عند رجوله

صقر بهدوء/شفيك فهد؟

زفر بضيق/لا تحاتي مشاكل بالشغل وكمل/ما مشت علي سفرة وافي ذي وانه بنت عمي مريضه وتي احد معها الظاهر انه فيه بلا خالك من يوم الملكة وانا مو مرتاح للي سواه بس ان شاء الله ما مسود ويهنا بس لاني ساعتها ما برحمه ابد.

@@@@@@@@@@


جوري ضحكت وهي مبتسمه/فله متريقه عندنا اليوم دا يوم السعد والله

فله ببسمه/استحيت من عمي والا احسها فشله واخوك بالبيت

بضحكه/عادي وفهد بالغرفه تحت والباقي ما فيه احد الا وليد يمكن نايم لا تحاتي يا قلبي

نزلت طرحتها وهي تصلح بلوزتها الورديه وبنطلونها الابيض/طيب قمر نايمه

هزت راسها/ايه سهرانه ويا بدير

ضحكت/واللي عندي بعد تصلي الفجر وتنام الين قبل الظهر

جوري ببسمه/الله يرزقنا ان شاء الله

فله بضحكه/امين بس الحياه الحين صارت صعبه

ضحكت جوري/ايه يا جدتي

ضحكت فله وبهدوء/اخذت اجازه وحاسه بملل ما ادري ليش احس كاني ماخذه اجازه وضع

ضحكت جوري من كل قلبها وبصوت عالي لدرجة فله قالت بحرج/يالخبله صوتك وصل الجيران شفيك استحي علي نفسك؟

افتح الباب وصوت غاضب/جوري وجع وش ذا الصوت يالخبله

حس بالهوي ينسحب من صدره مره وحده وهو يناظر اللي جالسه علي سرير اخته ونزلت راسها بخجل صد عنهم وهو يهتف/ما دريت احد بالبيت وقصري حسك يا خبله

راح الوليد وفله بغضب/فضحتيني الحين عند اخوك زين كذا يا غبيه زين

جوري تضحك/الولد تنح فيك

رفعت ايدينها للسماء وهي تقول/يارب

وقفت بخجل/وجع وجع جوري تري انا استحي يا خبله الحين ما اقدرحتي اركب معه بالسياره

جوري بخبث/نعتبرها النظره الشرعيه يا قلبي

فله بهدوء/ليش كل واحد ناظر بنت عمه لازم يتزوجها مو شرط تري يا بعدي

جوري /بس نظرات اخوي نظرات معجب

فله بخجل شديد/جوري بس خلاص تري بقول لجدي لا ياخذك باريس معنا

جوري بحماس تحضنها/حلفي بنروح باريس حلفي

@@@@@@@@@@

وصلو الشقه واول ما سمعت ريفان صوت اختها ارتمت بحضنها وصاحت بقهر/طلقني ياسمين بدون ما يسمع قهرني اول وتالي

استمعت لها بهدوء وبداخلها تحترق تحترق علي اختها وبعدها قالت/لبسي عباتك وتعالي الصاله الحين؟

اربعتهم جالسين وافي اللي ماسك اعصابه ويناظر مشعل بحقد لتهتف ريفان/الحين ابي اعرف جدام عمي ليش تشك فيني وطعنت بشرفي الحين؟

وافي بحده/مشعل انت شفيك كذا انت اكثر واحد..

قاطعه/مشعل يوم تتزوج وتناظر زوجتك وتتذكر انك ناظرتها اكثر من خمس مرات تدخل وتطلع من شقة واحد تعرف واجنبي بعد وش بيكون تفكيرك

سكت وكمل/ناظرك ويهك شلون صار الحين؟

ريفان بسخريه/ما تعرف تسال عشان اجاوبك انا وابرر وموقفي اللي كنت ادخل عنده الشقه هو جون واين زوج صديقتي ميري واين اذا تبي تتاكد وبذاك الوقت كانت حامل ومريضه وزوجها مسافر عشان كذا كنت اجيها واطلع من عندها المغرب واذا تبي تتاكد يا عمي اتصل انت الحين عليها عشان ما تقول انه متفقه معها وانت يا زوجي ما تعرف تسال الا تشك ذي تري مو حياه

ومن الحين اقول طلقني خلاص وماراح ارد له واذا ماصار بالطيب بينا المحاكم اذا حشمتك اول مره عشان جدي فهالمره احشم انت عمك بيتم الطلاق مو اول ولا اخر وحده تطلق باسبوع زواجها

راحت وتركتهم وافي وقف مسك مشعل من بلوزته وبغضب/منت كفو يا ولد العم منت كفو

وبصراخ قال/جهزو اغراضكم بنروح الحين بسرعه

ريفان طلعت معها حقيبتها وقالت/هذي اغراضي الباقي ارسلتها مع الشحن من امس

ركبت التاكسي وهي تقول/ما ابي اسمع شيء تسرعت او ما تسرعت اكيد لا انا فكرت زين واستخرت مستحيل اعيش مع واحد شاك فيني انا مستحيل اعيش كذا مستحيل

نزلو حديقه جلسو ثلاثتهم كل واحد يفكر وش راح يصير بالاهل لتهتف ريفان/عمي ما نبي مشاكل نبي اي شيء نقوله عشان ردتي اي شيء

وافي/انتي قويه كذا والا تمثلين علينا

ضحكت رغم كل اوجاع قلبها/لا انا قويه لا يغرك الشكل انا اقواهم يمكن بس شيء واحد يغلبني البرد

ضحك رغم قلبه اللي يتقطع عليها/عشان كذا حجرتك دوم دافيه

هزت راسها بايه

ياسمين/تري فيه رحله بعد ساعتين لازم نروح فيها لندن ذي ما احبها كلش حاسه اني بختنق خلاص


@@@@@@@@@@@@

متعب بصراخ/هبلتي انتي مشاعل وش اللي تقولينه ما تبينه وش اللي جد عليك وش اللي صار الحين وش اقول للريال وش اقول اختي ما عاد لها خاطر فيك

مشاعل بصياح/ما ابيه ما ابيه مو غصب مو غصب يا اخي

متعب بحده/وش اللي تغير تراك وافقتي برضاك ما احد اغصبك

بحسره/هو اللي مغصوب مو انا مو انا انت اللي طلبت منه يتزوجني والله لو ما قلت له كلامي ذا لاذبح نفسي

جلست وهي حاسه بدوخه امها بخوف/بسم الله عليك يمه شصار عليك؟

متعب بغضب/الحين تقول انها ما تبي صقر يمه وش اللي صار ها

امه بارتباك/ما ادري ما ادري قول له ما عنده نصيب عندنا خلاص الله يسهل دربه

ناظر ابوه اللي نزل راسه بصمت

وطلع من البيت بعد ما صفق الباب وراه بغضب

ابتسمت بخبث من وري الباب راح تشعل البيت ذا حريقه

@@@@@@@@@@@@

بعد اسبوع

في طريقهم للمزرعه

ياسمين كانت مع مزون وفله وجوري وام صقر بسياره فهد واللي الصمت كان حال علي جو السياره وشوشه بين جوري وفله بالسيت الخلفي وصوت ام صقر تسال ولدها عن الطريق وعن بعض المزارع وقف السياره عن المدخل نزلت ام صقر وجوري وفله وياسمين توها بتنزل بس سمعت صوت جوالها

ردت بهدوء/الو

جاها صوت طفله صغيره مذعوره/aunt yasmine

بخوف غلفته بهدوء قالت/سوزي شفيك شصاير؟

ببكاء/مامي تصيح تصرخ

انتي وينك فيه سوزي وين؟

سوزي/انا بغرفة الامان ماما قفلت علي بس ماما تصرخ انا خايفه

اوكي سوزي لا تفتحين حق احد طيب وخليك معي علي الجوال الحين تكلمك خاله مزون/قالت هالكلام بخوف

اعطت جوالها حق مزون وقالت بهدوء/حاكيها وطمنيها اخاف تنهار او شيء ولا تنسين تراها بالحيل حساسه خليها تاكل شيء

اخذت جوال مزون ودقت رقم وتكلمت بلغه فرنسيه متمكنه لتتحدث لمده خمس دقائق واغلقت الخط.

نزلت من السياره وناظرت مزون اللي كانت تحكي مع سوزان فتحت حقيبتها وطلعت لابتوبها وحطته علي السياره وفتحت الكاميرات ببيت ساره كادت تهوي علي الارض وهي تناظر اللي جدامها ساره كانت مربطه علي كرسي بالصاله وتصيح بصمت ودم ينزل من انفها وذاك ال......واقف بمسدس في ايده .

سمعت مزون تقول بخوف/سوزي لا تفتحين الباب طيب لا تفتحين حق اي احد بس سام يجي ويقولك كلمة السر طيب.

سمعتها تقول طيب وناظرت ياسمين اللي واقفه عند لابتوبها اتصلت علي جوال ساره ليرد عليها بصوت ساخر/اوه ياسمين.

بصوت بارد/اسمعني زين لا تسوي نفسك سبقتنا بشئ لا لا تحسبنا يهال وما نعرف .....

قطع عليها بغضب/انا مسيطر هنا وصديقتك معي ...

قاطعته بصوت مملوء بالحقد/اذا انت معك صديقتي فزوجتك وبنتك تحت عيوني.

بارتباك/هههههه ما عندي لا زوجة ولا بنت.

كيت ويلو و ماي ويلو ما تعرفهم/قالتها بسخريه.

اذا قربتي منهم بذبحك /قالها بصوت هادر.

ناظرت في الكاميرا وصول فريق التدخل السريع/اذا قدرت بس لا تنسي اخر مره تقابلنا وش اللي صار.

صرخ/انتي وحده مريضه ياسمين بذبحكم مثل ما ذبحتو ابني بذبحكم كلكم .......

ما كمل كلامه لانه مسيل الدموع كان اقوي منه وصار يكح قفلت الخط وهي تناظر في الكاميرا اللي يصير دخل الفريق وهو يحاول يهرب من الباب الخلفي بس مو قادر يتحرك من الدخان.

ناظرتهم يساعدون ساره قفلت لابتوبها وتنفست بقوه مو قادره تتخيل السيناريو اللي صار اخر مره مو قادره تتخيل الين متي راح يظل يلاحقهم الين متي.

رفعت الجوال وسمعت صوت رفيجتها بلغه عربيه ركيكه/جاسمين انا بخير لا تقلقي ساحادثك بعد ان تهدا الامور شكرا لك.

ناظرت مزون اللي كانت منهاره علي الارض وراسها علي الارض جلست هي الاخري علي الارض لم تعد قادره علي الوقوف.

كان هالشيء يصير تحت عيون فهد اللي واقف بعيد من يوم سمعها تسولف بالجوال حس انه فيه شيء غريب بالذات يوم حكت بالفرنسيه وطلبت المساعده يا تري شنو اللي وراك يا بنت العم.

راح الاسطبلات عشان يشوف فرسه .

@@@@@@@@@@@@@

روز حماد ©؛°¨غرامي جديد¨°؛©

وين الباقي والله متحمسه حدي كملي يا مبدعه الروايه جنان

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1