غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 10-04-2019, 06:18 AM
الكاتبه سيلا الكاتبه سيلا غير متصل
©؛°¨غرامي جديد¨°؛©
 
الافتراضي رواية ماتليق الا على قلبي / بقلمي


ماتليق الا على قلبي ( part 2 )
.
.
.

عهود : ازف لكم خبر زواج اخوي نواف
نجد ناظرتها ماصدقت : وعلى مين ان شاء الله
ود بتقرف : على بنت فقر وع
شهقت عبير : نععععم ؟!!
دينا : والله هذا الخبر اللي جانا اليوم من اخوناا
امل بتصديق : بلا مزحكم
البنات مع بعض : والله العظيم هذا اللي صار
عبير بعصبيه : خخخخير نواف يستهبل
عهود تنهدت : انا حاسه وراه شيء لما قرر وبهالسرعه
عبير بصدمه ولعثمه : ذا حطم كل احلامي (( عبير تحب نواف من هم صغار والبنات يدرون ونواف يحبها بس محد يدري )) بعد وفاة ابوه تغير كل شيء بالنسبه له
عبير سكتت تحاول تستوعب الصدمه اللي حلت عليها
امل حاول ترقع الموضوع : فكري فيها بنت فقر وزواج بهالسرعه اكيد نواف وراه شيء كايد
عبير : وليه مايكون يحبهاا ومستعجل يبيها
دينا : كلنا نعرف ان نواف مو راعي حب وخرابيط ووقته كله بالشركه او مع ماجد
لمى : يعني طول الوقت برا البيت اكيد تعرف عليها
نجد : لحظه هو من وين يعرفهاا
ود : بنت خوي ابوي
وجد : خلاص واضحه اكيد بزواحه منها مصلحه
عهود : نواف مو راعي مصالح
دينا : خلاص كل شيء بوقته حلو .
|
|
{ بالشركه }
طلع ابو عريب من الشركه ، واجهه نواف بالمواقف
فسخ نظارته نواف : بكرا بجيب المملك اكتب الكتاب واخذها بدون زواج او حفله
ابو عريب والهم مثقل عليه : بس
رفع نواف اصبعه : بدون اي حرف ولا تعرف مصيرك
تنهد ابو عريب ونزل راسه
لبس نواف نظارته : المغرب
وركب سيارته
ابو عريب لفت وتنهد بضيق ، ركب سيارته وتوجه لبيته .
|
|
{ ع المغرب / ببيت سلمان }
ام عريب : قومي رحمه جددي القهوه لابوك
وعد طلعت من الغرفه تنادي : بنات من شاف تنورتي السودا
نجود : بالغسيل
وعد : يووه وقتها
ام عريب : اغسلي ملابسك كلها
وعد لفت داخله الغرفه : طيب طيب يمه
جات عريب من المجلس كانت تصلي وجلست
امهاا : استخرتي
عريب : ايوه واحسني ارتحت
نجود : مو متسرعه وشلون توافقين على واحد ماتعرفينه
عريب ابتسمت : عادي بغامر بحياتي
رحمه : الزواج مافي مغامره
امها : هي صادقه الزواج مو لعبه
رحمه : احسهم بيقولون ماطمعت توافق تبي النعمه
عريب : اخر همي الفلوس اصلن لكن ودي كذا اجرب شيء جديد دامني ماتوظفت للحين ماوراي شيء
نجود لفت تناظر امهاا : بنتك خبله
دخل سلمان وهو توه راجع من المسجد
جلس بهدوء بدون ماينطق حرف
ام عريب بـ استغراب : شفيك يابو عريب
ابو عريب : نواف يبي يكتب كتابه بكرا وبدون حفله ولا زواج
نجود ورحمه : خير .
وعد توها جايه وسمعت : مو ولد نعمه وراه مسترخص فرحتنا فيها
عريب : عادي مو مهم زواج ، يمكن الله يردني عن شر اذا سويت زواج
ام عريب : بكرا بس البنت ماجهزت
عريب : عادي يمه اجهز حالي مع الايام وخواتي مايقصرون
ابو عريب : بياخذها معه
عريب ناظرت في ابوها : يبه انت مو مبسوط اذا مو مبسوط ارفض واكنسل من الحين
ابتسم : لا والله يابوك فرحان لك بس بفقدك
عريب قامت وباست راسه : نصيب والله جابه راضيه فيه
ابو عريب ابتسم : اللي مطمني اني ماخاف عليك
ضحكت عريب : افا عليك يابو عريب جبت ولد مو بنت
وعد : خبله لاتفضحينا عن الرجال
عريب : جب
ام عريب : الله يكتب اللي فيه الخير
ابو عريب قام : بمر على الربع مبطي عنهم
ام عريب : ننتظرك ع العشاء
ابو عريب : ااي ماراح اطول
وطلع
عريب لفت بحيره : وش البس
نجود : فستاني حق العيد الابيض جديد
رحمه : اي صح صح مناسب ولايق
عريب : بس عاري
وعد : طيب وش تبينه اكمام طويله مثلاً
عريب لوت شفتهاا : يبلي ملابس جديده امشي حالي فيهاا لين اشتري
رحمه : ملابسي حقت الجامعه اللي مو مقاسي خذيهاا جديده مالبستهاا
نجود : وانا بعد
وعد : الحسنه الوحيده اننا نفس الحجم والمقاس
رحمه ضحكت : من جد
عريب : يلا قومو بجهز
وعد : مستعجله الاخت
عريب : بكرا بننحاس خلوني اجهز الحين دامني مروقه
امها : الله يكتب اللي فيه الخير .
|
|
{ في كوفي "قهوة المساء" }
جالس نواف و مقابل له ماجد
رفع ماجد فنجال قهوته ارتشق منه وعيونه على نواف : وش صار
كانت نظرات نواف على فنجاله وهو يحركه : بكرا بكتب كتابي عليها واخذها
ماجد : بدون حفله
نواف هز راسه : مو لازم الحفله
ماجد : لآ تظلم البنت معك
نواف طنش كلامه : بسافر لـ المانيا
ماجد نزل فنجاله : وش عندك
نواف رفع يده للهواء : شهر عسل
ماجد ناظره : قول وش عندك بس خل شهر العسل
نواف : شغل للشركه
ماجد : وش جاب شغل الشركه لـ هناك
نواف : انا اخذته لـ هناك
تنهد ماجد : الكلام معك ضايع
نواف ابتسم : دامك عارفه هالنقطه ليه تجادل
ماجد طنشه وكمل قهوته .
|
|
{ صباح يوم الاربعاء .. الساعه 8:15 }
بـ بيت عبدالعزيز ، مجتمعين كلهم ع الفطور يفطرون بصمت
قطع الصمت نواف : اليوم بكتب كتابي ع البنت وبكرا الفجر عندي رحله لـ المانيا
امه رفعت راسها تناظر : شعندك بـ المانيا
نواف : شغل للشركه يمه
رفعت حاجبها : من وين طلع هالشغل
نواف : شراكه مع شركه اجنبيه
نياف : كم بتقعد
نواف : شهر
شهقت عهود : شهر
ود : قول شهر عسل
نواف ناظر فيها بحدهٓ
ديناا : شهر عسل شهر شغل بكيفه
نواف اشر لها بيده 👍 وهو يشرب عصير
ابتسمت له دينا
نياف : ومن يمسك الشركه
نزل نواف كاسه : انت طبعاً
نياف : لحالي صعبه
نواف : ليه منت قدهاا
نياف رفع حاجبه : الا قدها
ابتسم نواف : هذا ولد عبدالعزيز
ود : ومتى بتجيب زوجتك
نواف : الليله
امه تفطر وهي غارقه بتفكيرها تحس ورا نواف شيء
قامت من ع الفطور : قبل تطلع للشركه مرني
نواف : ابشري
طلعت لغرفتها ، قام يغسل نواف ولحقها
طق باب الغرفه مره وحده
نطقتت امه : ادخل
دخل وشافها جالسه على مكتبها
وقفت قدامها : هلا يمه
اشرت له يجلس ، تقدم نواف وجلس : امريني
ناظرته بحده : وش اللي يدور براسك
نواف يعرف امه زين تفهمه من نظراته وحركاته مايقدر يكذب عليها : مافي راسي شيء
امه بحده : وش الهدف من ورا زواجك ذا
نواف : هدف لصالح الشركه
امه : منت راعي مصالح ، ومن مين من سلمان
نواف : هو يعرف الشغل زين ويعرف ابوي كيف كان يدير الشركه ، انا عشان اكسبه لصالحي قررت كذا
امه رفعت حاجبها : بزواجك من بنته
نواف يبيهاا تصدقه حك راسه : يمه الصدق كانت زلة لسان والرجال وافق وتورطت استحيت ارده
امه بتصديق : كيف زلة لسان
نواف يمثل : جبنا طاري الزواج وقلت له زوجني بنتك كانت بمزح ، الرجال صدق وقال موافق وانحرجت منه
امه : مو شايف خير وافق على طول
نواف هز راسه : يمكن ، عاد انا قلت اتزوجها كم شهر واطلقها
امه : وهي وافقت
نواف : اي وافقت من يومها
امه بطنازه : بنت فقر ماصدقت
نواف حس ان امه صدقته : عاد ذا كل الموضوع
امه : زين تاخذ لك بيت وتسكن فيه مابي اشوفها عندي لين تطلقها
نواف : بس اول يوم بعدها بسافر وادبر امري
امه : اي شيء بس المهم ماشوفها قدام وجهي
نواف : زين
قام : يلا انا تأخرت ع الدوام
امه : زين انتبهلك
قام وطلع مستعجل
امه : اوففف من سلمان ماراح يرتاح لين يملك كل شيء الله يرحمك ياعبدالعزيز خليت كل شيء بيده .
|
|
لما وصل للشركه الساعه 9:10
شاف ابو عريب داخل قدامه
نواف : ماشاء الله وش هالتأخير
ابو عريب رفع نظره له : زحمة سير
رفع حاجبه نواف
ابو عريب : اقدر امشي
نواف تجاهله ودخل قبله
ابو عريب تنهد : الله من جاهد البلاء
ودخل .
|
|
{ العصر / بأحدى مولات الرياض }
عبير تمشي مع عهود
عبير : مقهوره مانمت زين وانا اللي كنت اظنه يحبني
عهود : يابنت الحلال صدقيني زواجه ماراح يطول متأكده وابصم لك بالعشره
عبير : وش اللي يخليك متأكده
عهود : اولاً بنت فقر
عبير : الخوف من بنت الفقر تلعب عليه ولا تسحره
عهود : عاد نواف مو كذا
عبير : اليوم بيكتب كتابه
عهود : ايه
عبير سكتت مقهوره وكملو مشوارهم .
|
|
الساعه 6:30
دخل نواف البيت ، راح لغرفة يأخذ شاور ويبدل
لبس وتجهز ، وقف قدام المرايه يعدل شماغه
دخلت امهه : خلصت
نواف : اي
امه : بتروح لحالك
نواف : معي ماجد
امه : انتبهلك
نواف : ان شاء الله
رش العطر ولف على امه : كيف شكلي
امه : حلو استودع نفسك الله واقرى الاذكار
ابتسم باس راسها :ارضي علينا
ودعواتك
امه بعدم رضى : الله يرضى عليك ويوفقك .
نواف لبس ساعته : يلا طالع
اخذ جواله ومفتاحه ومحفظته وطلع .
وهو نازل من الدرج قابلة عهود وهي بعبايتها
عهود : اوهوو عريسنا باقي هنا
نواف : طالع
عهود : مبروك مقدماً
نواف : اخيراً سمعتهاا محد قالها لي
ونزل متجاهلها ،، عهود تنهدت وطلعت لغرفتهاا
طلع نواف وهو ماشي متجه لباب الشارع
وقفه صوتهاا : نواف
يميزه بين الف صوت سكر عيونه ماوده يقابلهاا بهاليوم
ماعنده تبرير لقراره
عبير بغصه بانت بصوتها : مبروك الله يوفقك
نواف : الله يبارك فيك
عبير تنتظره يطالع فيها : كان عطيتنا خبر نفرح بعرسك
نواف وهو صاد : ماله داعي
عبير : نواف
حسها قربت بخطواتها منه
اخذ نفس عميق
عبير : ليه اخذتها
نواف تنهد : لـ اسباب تخصني
عبيره بقهر : روح لاتتاخر عليها
ولفت لداخل تركض
نواف لف يطالع فيها لحد مادخلت
سكر عيونه وتنهدت : كل شيء بوقته حلو
وطلع
كان ينتظره ماجد .
|
|
في بـيت ابو عريب
فاتح المجلس ..ريحة العود والقهوه العربيه بالبيت كله
واقف ابو عريب ينتظرهم .
( داخل / بغرفة البنات )
كانت عريب جالسه
رحمه تسوي لها مكياج ، ونجود تسوي لها شعرهاا
و وعد تكوي عبايتها وتبخرهاا
/.
وصل
نواف وماجد والشيخ ومعهم شهود .
البنات من سمعو انهم جو
ركضو لشباك المطبخ بما انه مطل على باب الشارع بيشوفون نواف ‏، رحمه : طفي النور
عريب : بعدي انتي وياه بشوفه
وعد : بتشبعين منه خلي نشوفه حنا
دخلو
نجود : دخل دخل وش ذا
رحمه : لحظه تشوفون اللي اشوفه
نجود : هذا مو جمال وبس هذا اللي بعده
عريب ناظرت دخل نواف : ايات ابو شماغ ولا غتره
وعد : والله ماندري
نجود : بس كلهم مزز
رحمه : والله وقام حظك يَ عريِب .
دخلو للمجلس
الشيخ بعده نواف وماجد بعده الشهود
استقبلهم ابو عريب وقلطهم .
نواف رفع نظره يناظر بالمجلس ارضي -بداخله- هذي اولهاا
جلس حنى رجوله على ورى وجلس عليها
وجلس جنبه ماجد
ماجد بهمس له : اجلس زين مضيع جلسة الارض
نواف : وش
ماجد اللي متربع : المركى جنبك اتكي عليه بيدك
وارفع رجلك اليمين
نواف سوى اللي قاله ، ماجد كتم الضحكه
ونواف عطاه نظره حاده
وقف ابو عريب يصب القهوه
مدهاا على نواف
ناظر فيه نواف واخذ الفنجال .
/
رجعو البنات للغرفه يكملون زينة عريب
عريب : يمه قلبي قام يدق
نجود : مو ذي المغامره اللي تبينهاا
عريب : بس ماتوقعت مع ذا
رحمه : هم اثنين وانتي ماتدرين زوجك وين
عريب : اثنينهم يخوفون جاني انهيار
وعد : عاد الطول ماشاء الله
نجود : راحت عليك اختي سنفوره
عريب : جب .
/
بالمجلس
الشيخ بدا في كتب الكتاب : نواف عبدالعزيز موافق على عريب سلمانن
نواف وهو بداخله تردد كبير : ايه
الشيخ : وقع
اخذه نواف يوقع
الشيخ اخذ الكتاب : نحتاج نسمع موافقة البنت
قام ابو عريب راح داخل
بعدها رجع واخذ الشيخ معه
الشيخ وقف بين الباب الفاصل بين المجلس والصاله : عريب سلمان موافقه على نواف عبدالعزيز
عريب برجفه : ايوهه
مد ابوها عليها الكتاب توقع .
|
|
{ في بيت الخال احمد }
متجمعات البنات كعادتهم من بيت لبيت
عبير ملازمه الصمت من اخر كلمه قالتها لنواف
وتهز رجلهاا بقوه
نجد : شفيه مستعجل نوافوه كان زفاناه احسن
ود رفعت كتوفها : مدري عنه ، عاد سحبنا ع البيت مانبي نشوفها
وجد : ليه حرام عليكم يمكن تطلع طيبه
عهود : مع نفسها بس ان شاء الله لو هي ملاك ماتقبلنااها بينا
دينا : اصلن ماراح يطول زواجهه منها
لمى لفت عليها : وش دراك
عهود : ارجع واقولها الف مرا بنت فقر
ود : اصلن انا اللي ماراح اخليها بطفشها بعيشتها بنشبلها
وجد : لا حرام عليك
ود : حرمة عيشتها
امل : من جد بكرا تلف ع نواف وتاخد فلوسه
ود : تخسى
لمى : عاد صار وتزوج وش بتسوون
عهود : ماسمعتي بكيد النساء
وجد بخوف : يمه منكمم بس .
|
|
تم كل شيء على خير وانكتب كتابها على نواف
طلع الشيخ والشهود وطلع معهم ماجد
نواف : خلها تجهز حالها انتظرها بالسياره
ابو عريب ممسوك من يده اللي توجعه خايف
تنكشف اعمال عبدالعزير وهو يروح فيها ظلم
هز راسه وراح داخل ،
( بغرفة عريب)
دخلت عليها امها بطقم ذهب سلسال وحلق
حجمه صغير وشكله ناعم وانيق على شكل ورده
مدته لها : هذي هديتي لك
عريب بفرحه : ياعمري يمه
دخل ابوها : جاهزه يبه
رحمه : تطلع له
ابوها : ينتظرها بالسياره
نجود : خخير مو لازم يشوفها بالاول
رحمه : ذا شفيه مستعجل
عريب : انمغصت
ابوها تقدم و باس راسها : مبروك يابوي وانتبهي لك زين ، خليك مثل ماعرفك ماينخاف عليك
عريب اللي دايم تستمد الطاقه والقوه من كلام ابوها لها يعتبرها واحد من عياله اللي ربي مارزقه فيهم ابتسمت : افا عليك انا عريب بنت سلمان مو حي الله
ابتسم :هذي بنتي
طلع من جيبه مبلغ مجهزه لها مده لها
عريب : شذا يبه ماله داعي
ابوها : اصرفي نفسك فيه ، وكل شهر برسلك
رحمه : وحنا بعد بنحولك من مكافاتنا
عريب : ماله داعي والله
وعد : عشان مايقول تزوجت عشان الفلوس مغنيك الله عن فلوسهم
ابتسمت عريب : الله يخليكم لي
ابوها : يلا الرجال ينتظر
لبست عبايتهاا واخذت شنطتها
وقفت عند الباب وودعتهم ، وطلعت
اخذت نفس عميق -بداخلها- اليوم يَ عريب بتبدين حياه جديد مع شخص تجهلينه وتجهلين سبب الزواج ، وعالم ماتعرفين فيه احد ، تحدي نفسك وكوني قويه
ابتسمت بعباطه : الحياه مغامره
تقدمت لسيارته
فتحت الباب اللي ورا حطت الشنطه
نواف جالس مكانه بهدوء طاغي على ملامحه : تعالي قدام
عريب رجفت من صوته الثقيل سكرت الباب -بداخلها- وش ذا حتى ماساعدني يشيل الشنطه عني
لفت ع السياره وفتحت الباب وركبت جنبه
سكرت عيونها من ريحة عطره اللي منتشره بالسياره
تنحنحت : السلام عليكم
نواف : وعليكم السلام
حرك السياره والصمت كان سيد الموقف
وصلو على البيت
نزل : انزلي وخلي اغراضك لاتطلعينها معك بكرا بنسافر
هزت راسها ونزلت ، تقدم ومشى قدامها
مشت وراه وهي توزع نظراتها ع البيت
بيت كبير حيل وحوش كله اشجار وثيل و ورد وممرات ومسبح وجلسات خارجيه بهمس : ماشاء الله الله يهنيهم
وقف عند الباب الداخلي وانتظرهاا لين وصلت : الحين حنا داخلين بطلع للجناح ماتكلمين احد ولا تتعرفين على احد
ناظرت فيه : فشله امر اهلك وما ارد السلام
نواف اللي ماناظر فيهاا ابد : محد فيه اصلن
عريب : طيب
جاء بيفتح الباب وفتحه نياف
نياف طالع فيهم : اوهه وصل العريس
نواف طالع فيه بصمت
نياف سلم عليه : مبروك اخوي العزيز
نواف : الله يبارك فيك
نياف ناظر بعريب وراه رفع حواجبه لنواف : مبروك زوجة اخوي العزيز
عريب بهمس : الله يبارك فيك
نياف : انا نياف اخوه الصوغنن
هزت راسها : تشرفنا وانا عريب
نياف : عاشت الاسامي
عريب : تعيش ايامك
نواف شد على اعصاب : امشي
ودخل
لف نياف يناظر فيهاا بهمس : الله يعينها
وضحك وطلع من البيت
نواف متوجهه للدرج وعريب وراه
نزلت امه وقفت تناظر فيهم
نواف : سلام
امه : وعليكم السلام
عريب فتحت عيونهاا تناظر فيها : دكتوره اسمااء
لف نواف يناظر فيه : تعرفينها
اسماء ناظرت فيها باستغراب : اكيد درست بالجامعه
عريب نزلت نقابها : كنت بعلم النفس وكنتي تدرسيني
اسماء عقدت حاجبهاا لما عرفتها لكن انكرت
عريب ابتسمت : انا عريب سلمانن
اسماء : سمعت الاسم من عبدالعزيز الله يرحمه ، يقولون لابوك ابو عريب ، بس ماتذكر وجهك بكلاساتي
عريب ابتسمت : متخرجه من سنه وعليها
اسماء نزلت واتجهت للصاله
نواف : امشي
عريب لاحظت تطنيشها وملاحظه ان هالبيت مافي اي فرحه و ولدهم اللي متزوج
طلعت معه للجناح
دخل نواف ودخلت وراه
لف عليها نواف قابض حواجبه : انا مو قلت لاتكلمين احد ولا تتعرفين عليه
عريب هزت اكتافها : هم طلعو بوجهي
نواف كتم غضبه واتجهه لغرفه وطلع جواله يتصل بـ ماجد
عريب نزلت عبايتها ولفت تطالع بالجناح
كانت بفستانها الابيض الناعم وتسريحه شعرها الويفي ومكياجهاا الهادي جداً
|
|
( في بيت ابو عريب )
كانت نجود بالمجلس تنظفه
دق الجوال ، رفعت راسها ناظرت حولها شافته ع الارض
راحت اخذته
شافت الاسم نواف عبدالعزيز
استغربت وطالعت بالجوال : لمين ذا
راحت للصاله : يمه وين ابوي
امها : طلع يصلي العشاء ، ليه
نجود : لقيت جوال بالمجلس مادري لمين
امها : يمكن لزوج اختك
نجود : لا المتصل زوجهاا يمكن لاخوه ولا الشيخ
امهاا : زين خليه مكانه يجي ابوك ويرده لراعيه
نجود زين وراحت متجهه للمجلس بترد الجوال
سمعت باب الشارع يطق
لفت طالعه : مين
ماجد : انا ماجد
نجود وقفت ورا الباب ؛ عفواً
ماجد : ابوك ابو عريب وينه
نجود : طلع يصلي
ماجد : معليش اختي انا ناسي جوالي عندكم يَ ليت تشوفينه لي
نجود ؛ ايوه انت صاحب الجوال
وفتحت الباب مدته عليه
ماجد اخذه : مشكوره واعذرينا على الازعاج
نجود : حصل خير
وسكرت الباب
ماجد اتجهه للسيارته مسرع وشاف مكالمه من نواف
اتصل عليه وركب السياره .
|
|
في جناح نواف .. وقفت تتلفت : افف وين اختفى ذا
اخذت جوالها وانتبهت للوقت : يوهه قد صلو الناس
وين القبله
اخذت عبايتها ولبستها عشان تصلي
اتجهت لغرفته كانت بتطق الباب
سمعته يتكلم
وقفت تنتظره لين يخلص
عند نواف .. نواف : وينك ماترد
ماجد : نسيت جوالي في بيتهم ورحت اخذه
نواف : مرني بطلع
ماجد : ماني توك معرس
نواف : لاترفع ضغطي تعال لا اكفخك
ماجد : بس توك متزوج
نواف : انت عارف انه مو زواج حقيقي كل المساله باخذ حق ابوي
ماجد : وش دخلها هي
نواف : تدفع غلطة ابوها
ماجد : ماني جايك اقعد تعرف ع البنت
نواف تنهد : اللهم طولك ياروح اذلف عني
عريب سمعت هالكلام وتجاهلت
طقت الباب
نواف ناظر للباب : مين
عريب : انا .
|
|
موعد تنزيل البارتات ، حسب نظام المنتدى كل 7 ايام ..
انتظروني 💙💙

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 11-04-2019, 12:26 AM
وردة الزيزفون وردة الزيزفون متصل الآن
مشـ© القصص والروايات©ـرفة
 
الافتراضي رد: رواية ماتليق الا على قلبي / بقلمي


صباح الخير .. عزيزتي موضوعك مكرر وهالشئ ممنوع اتمنى الالتزام بقوانين القسم واكمال البارتات في نفس الموضوع الاصلي

رواية ماتليق الا على قلبي / بقلمي

للارشيف

الرد باقتباس
إضافة رد

رواية ماتليق الا على قلبي / بقلمي

الوسوم
لاتلحق , بقلمي , رواية , قلبي
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
رواية ليت قلبك فيه من عودك ليان/ بقلمي الكاتبه سيلا روايات - طويلة 14 22-04-2019 12:42 PM
رواية أنتقام العشاق / بقلمي رَحيقْ روايات - طويلة 9 08-05-2018 03:14 PM
رواية غدر الحب بقلمي omnia reda Omnia reda روايات - طويلة 3 21-12-2015 07:15 AM
رواية : قلص ساعتك أيها الليل المنهك خلصني من وحدة اهلكتني/ بقلمي sajarashid روايات - طويلة 26 19-12-2015 09:16 PM
رواية i need y o u / بقلمي eyzo-30 روايات - طويلة 2 01-02-2015 01:44 AM

الساعة الآن +3: 01:16 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1