غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 13-07-2019, 07:38 PM
صورة سعد العوجان الرمزية
سعد العوجان سعد العوجان غير متصل
ليل النديم
 
الافتراضي مرثيتي في والدي ابراهيم بن محمد العوجان


قصيدة كتبتها رثاءا في والدي ابراهيم بن محمد بن عبدالله العوجان
والذي وافاه الاجل في يوم السبت 26 / 10 / 1440

من يرغب سماعها بصوتي يجدها بصفحتي عاليوتيوب
بسم الذي أرسى الفلك في مجاريه .. الخالق اللي له حجيجه ملبّين
أطلقت شعري ينتصب في معانيه .. شعرٍ كتبته في فجر يوم ( الأثنين )
ياهاجسي إغرف من الشعر صافيه .. دام القريحة سيلها اليوم سيلين
ملعون أبو شعرٍ يشحّ بقوافيه .. إن ماحضر هالحين مابيه بعدين
البارحة ليلي سهرته أصاليه .. من حر مابي أوجس النار نارين
أقنب قنيب الذيب من حر مافيه .. في موقفٍ مافيه منقذ ولا معين
أو مثْل محتاجٍ خلت كل أياديه .. يطلب سلف والناس حوله شحيحين
وإلا عليلٍ ميّسٍ من مداويه .. موته قريب وشال هم البزارين
ياهم لال الحزن وأسود لياليه .. حزنٍ لك الله يدعي الليل ليلين
مات الذي ماله في الأشباه تشبيه .. مات الذي ماله بعصره شبيهين
مات الذي طيبه مع الناس مغنيه .. ماورّث نخيل وقصور وملايين
وش بس أوصّف في أبويه وأخليه ؟ .. العابد الساجد نصير الضعيفين
الشعْر من أوّلْه لأقصى قواصيه .. مهما وْصفه وصفه رؤوس وعناوين
لازلت أذكر طيحته من أعاليه .. والكل حوله بس ماهم بدارين
أقبل من المسجد وتعبه يباريه .. ننشدْه وش بك ؟ قال كل شي بي زين
سنّد عصاه وكسوة البشت تكسيه .. وطاح متهاوي طيحةٍ تدمي العين
درنا المشافي يمكن إنها تداويه .. يمكن لأمراضه نلاقي مداوين
قالوا كبير دْواه صعبٍ نلاقيه .. وبعلته صرنا حيارى وعجْزين
تسعة شهورٍ كل الأمراض تغزيه .. كني بجسمه تفترسْه الثعابين
رغمٍ عن أوجاعه وكثرة بلاويه .. صابر ومومن مـ أنتمى للجزوعين
هدّ المرض جسمه ولا هدّ مافيه .. من عزم من هيبة من أذكار من دين
وأربع ميه مع الف وأربع عشاريه .. في شهر عشره يوم سته وعشرين
السبت قبل الظهر أقفى لباريه .. وخجّة رحيله خجّةٍ بألف سكين
قالوا توفى من وقف للمكاريه .. اللي بصبره فاق صبر البعارين
أبوي تشهد له نزاهة خطاويه .. لاخجّ دربٍ مألتفت للمنادين
وأبوي له ذكرٍ مع الناس يزهيه .. إن ذكر إسمه قيل نعمٍ ونعمين
لا قال قولٍ صاح فعله يجاريه .. تشهد له أحبابه وكل المعادين
تسعين عامٍ مانثنى عن مباديه .. تسعين عامٍ عاصر الزين والشين
تسعين عامٍ والمروءة تماشيه .. تسعين عامٍ عارك العسر واللين
نام بسلام وعين مولاه تحميه .. العابد اللي مانْخلق مثله أثنين
أستغفر الله أحسبه ما أزكيه .. وأشهِد بيوت الله وكل المصلين
للمغسلة ودّوه والطهْر ماليه .. له شوفةٍ يغتاظ منها الحسودين
ناصر وخالي وإبن ثاقب بدوا فيه .. سدرٍ وكافورٍ ولفٍ وتكفين
وأنا أتأمل وجهه بقولتي إييييه .. راح اللي تفرح به قلوب المساكين
راح اللي مايلْحقْه ذم أو مشاريه .. راح اللي كافل له يتاماً صغيرين
مكتوب والمكتوب للعبد بيجيه .. والحمد لله بالمقادير راضين
إن وزّني شيطان بالذكر أداويه .. وآيات ربي سم كل الشياطين
يومٍ خذوه البيت والكل يبكيه .. أهتز من شوفه كبار وبزارين
وجهه تواهج كالصبح في بكاريه .. تفترشه البسمة من الفم للعين
ولـْ مسجدٍ خذناه ياما سجد فيه .. ممتليةْ صفوفه عبادٍ مصلّين
وللمقبرة حِمّل على أكتاف تغليه .. أبناء وأقراب وخوال وحفيدين
قبّلت - قبل انْزلْه قبره - مواطيه .. والضيق يضغط صدري من قسوة البين
ساعة وضعته في اللحد صحت أناديه .. يابوي عقبك كسْر هالكون نصفين
والوقت عقبك غيّر المر حاليه .. وسدير عقبك كن أهله غريبين
أنا وعبدالله وناصر نواريه .. هذا معه لبنه وهذا معه طين
والناس حول القبر تدعي وتنعيه .. يارب ونّس وحدته قولوا آمين
وهلّوا على قبره ترابٍ يغطّيه .. يالله تثبّت والدي للسؤالين
يالله تجاوز عنْه كامل مساويه .. وإجعل ماصابه راجحٍ في الموازين
وإغفر لعبدك يا إلاهي وجازيه .. باللي تجازي به عبادٍ شهيدين
يارب تغفر له وتشكر مساعيه .. تجعل سعة قبره بفضلك ميادين
يارب إرضه في نعيمك وراضيه .. وإحشره مع أهل التقى والنبيين
ياذا القلم إنزف من الحبر تاليه .. باقي حروفي تنتظر منْك تدوين
طاوع شعوري !!.. خط لي شعرٍ أبغيه .. يوصل لآخر ترثةٍ في العواجين
راح اللي لامن جا مع الناس طاريه .. تذكّروا طيبٍ وجود ومحاسين
ليته يشوف اللي يعزوننا فيه .. ويشوف بيته مزدحم بالمعزين
ليته يشوف ( سدير ) يلمح أهاليه .. ليته يشوف أهل ( القصب ) له معنّين
ويشوفنا فـ فراقه اللي نعانيه .. كيف القدر عض الضماير بنابين
أعزّي أمي قبل مالقلب أعزيه .. يابنية دخيّل مصابك مصابين
يـ أمي ترانا لك بـ سمّي ولبّيه .. لا تنقلي همٍ بيوم أو تحاتين
الله يبعد عنْك حزنك ويجليه .. والله يصبّرْك بفراقه وتسلين
عشتي معه عمرٍ بحلوه وقاسيه .. أنعم بعشرة بل وأنعم بزوجين
وأنتي وأخياتي اذا جت طواريه .. حنّا مكانه ياغلا الروح باقين
وأبوي كانه راح حنّا بواقيه .. حنّا لكم لا ليّل الدهْر مضوين
كنتم وصاتٍ له بكل مايوصّيه .. أمك واخياتك إذا كنت ترضين
لوّ المراثي ترجعه كان أرثيه .. وأخط من شعر المراثي دواوين
الموت دربٍ كل مخلوق ماشيه .. مهْنا مخاليقٍ من الموت ناجين
والموت كم حال الفتى عن أمانيه .. وأفنى البشر أفنى ملوك وسلاطين
والموت ماشيًّ يصدّه ويثنيه .. وين اللي كانوا بيننا أمس حيين ؟
وداع ياللي بُعده اليوم أقاسيه .. وداع ياوجه النقاء والنقيين
وداع ياوجهْ شْحبت لاجله وْجيه .. وداع ياحزْن الأهل والمحبين
وداع ياطيرٍ كفخ في معاليه .. طيرٍ درج من وكر خير الشياهين
وداع ياجودٍ تجوده أياديه .. يوم البخيل يصر ماله ملايين
وداع يانجم أختفى عن لياليه .. أنقطعت أخباره ولا شافته عين
وداع ياذيبٍ نعت له صحاريه .. ولّت به أقداره مع اللي مولّين
وداع ياوقتٍ تلحّف بماضيه .. وأصبح من التاريخ ماضي لماضين
هذي قصيدة قلتها دون تشويه .. ختمتها في الصبح والناس مضحين
صلاة ربي عد دعوات داعيه .. وإعداد ماهد الفقر في الفقيرين
وإعداد مايتعب من الليل صاحيه .. وإعداد ماهلّت عيون المحازين
عد الرعد وإعداد ماعز واليه .. وإعداد مانبْت الورق في البساتين
عد المطر وإعداد سيله وجاريه .. عد البدو واللي سكن في البلادين
عد البحر واللي حيا في غوابيه .. على نبيٍ هادي الناس للدين

سعد إبراهيم بن محمد العبدالله العوجان
صباح الأثنين 28 / 10 / 1440هـ
حقوق الطبع محفوظة إعلامياً


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 13-07-2019, 11:17 PM
صورة *hellen الرمزية
*hellen *hellen متصل الآن
©؛°¨غرامي مجتهد¨°؛©
 
الافتراضي رد: مرثيتي في والدي ابراهيم بن محمد العوجان


'




لوّ المراثي ترجعه كان أرثيه .. وأخط من شعر المراثي دواوين ...


لو لم تسعفنا الكتابه وخذلتنا الحروف ف الوقت الذي نحتاجه فيها حقا
لبلورة احساسنا بالحبر لمن يستحق فعلا لما كانت بان تكون ذا اهميه ...

رحم الله والدك وغفر له واسكنه الفردوس الاعلى ..

تحياتي لك ولقلمك استاذنا ..


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 15-07-2019, 08:55 PM
صورة عابر السبيل الرمزية
عابر السبيل عابر السبيل غير متصل
©؛°¨غرامي ذهبي¨°؛©
 
الافتراضي رد: مرثيتي في والدي ابراهيم بن محمد العوجان


الله يغفر له ويرحمه ويجعل مثواه الجنة ويغفر لمن مات مسلم
احسن الله عزاك وجبر الله لك المصاب
الله يخلف عليه وعليكم بخير
رحمه الله رحمة واسعة

الرد باقتباس
إضافة رد

مرثيتي في والدي ابراهيم بن محمد العوجان

الوسوم
محمد , مربيتي , العوجان , ابراهيم , والدي
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
وعندما رأت عيناي عيناك أدركتُ حينها أنك ستشقيني/بقلمي صَمت المشاعر روايات - طويلة 210 15-06-2019 08:45 PM
برد الجفا ما يرحم ضلوع مغليك/بقلمي؛كاملة Baraem al Saba روايات كامله - يتم نقل الرواية هنا بعد اكتمالها 1356 12-08-2018 06:28 AM
رواية العنيد/للكاتبة: شيموو؛كاملة دقةة قلب روايات كامله - يتم نقل الرواية هنا بعد اكتمالها 62 08-05-2018 01:26 PM
مختلفه / بقلمي فهد بن عبدآلرحمن .. روايات - طويلة 115 26-12-2017 04:57 AM
رواية سعوديات بأمريكا / للكاتبة :المودعة تبغى فراري ولا اح روايات - طويلة 19 21-12-2015 02:01 PM

الساعة الآن +3: 01:55 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1