منتديات غرام

منتديات غرام (/)
-   روايات - طويلة (https://forums.graaam.com/134/)
-   -   رواية من يقول أن البشر مره تموت/بقلمي (https://forums.graaam.com/632154.html)

سُـهـد 14-09-2019 09:26 PM

رواية من يقول أن البشر مره تموت/بقلمي
 
السـلام عليـكم ورحمة الله وبركاته

اقدم لكم ثـاني روايتي

روايـة :

‏"من يقول أن البشر مره تموت "


____________________

اتمنى من الله نجاحـها كما اتمنى تفاعلكم الجميل وردوركم الموفيه وليسـت
الـمختصره والـهادمه لابـداع الكـاتبه

لسُت مبـدعه بكتابة المقدمـات

ولـكن ارحـب بكل قـارئه لـروايتي


ثانـي بدايـاتي ولـربما النـور الثانـي لكتاباتي حبيسة الملاحظات والـدفاتر

* لاتلهيكم الروايه عن اداء صلاواتكم

* الروايه عباره عن 40 جزء

* موعد تنزيل الاجزاء
* " الاثنين"الساعه10 مساءً
ان حدث مني تقصير أعذروني


__________________
________________________
مدخل الجزء الاول :

"يانجد قولي لهم اني اتوق لهم
‏اليا طرا الشوق ولا ذعذع براده
‏يانجد اني سئمتك بعد ماارتحلوا
‏"كسرت باب الحزن وانفكت جياده"

*منقول

____________________

قبـل سبع سنوات:

السـاعه 1 فجراً

طـريق ام الجمـاجم_ الريـاض:

نطق بذعر : ياوليدي شسوي

فيـاض وهو يحاول يهدي ابوه: اهدا اهدا

ابـوه وعيونه تنطق خوفه: سواها عيال الـ...

فيـاض نطق بغضب وهو يشوف ابوه يبكي: تعوذ من ابليس والله ما اكون فيـاض ان ماعلمتهم شغلهم لاتخاف ماتدخله وانـا حي

ابو فيـاض بقهـر : الله لايبقي فيهم حي

فيـاض وهو يتأمل الطريق وقف عند قرية ام الجماجم : يبه انزل هنا بسرعه

ابو فياض وهو يطالع له: وانت

فيـاض: ادبر عمري بس انت ادخل اي مسجد واجلس فيه ولا طلع الصبح شف لك اي كداد وارجع للبيت

ابو فيـاض ب الـم وهو يطالع لولده: ماراح اخليك انا اسبب يكفي اللي عشته

فيـاض وهو يطالع الئ الوقت وبعجله نزل وهو يفتح الباب وينزل ابوه بسرعه ضمه وهو يهمس له : انتبه لنفسك واقرب فرصه خذ اغراضك وانحاش لاي مكان المهم لاحد يعرف مكانك

ابو فياض انهمرت دموعه: العتب علي يابوك

فيـاض وهو يبعد ويمسح دموع ابوه بشماغه: قلتها وارجع اقولها لك ماتدخل السجن وانا حيي

ابو فيـاض: الله يحفظك

فيـاض وهو ينظر لعيون والده: وداعتك الله


فيـاض ركب سيارته وهو مجزم ان اللي حط لهم هالكم الكبير من المخدرات مبلغ عن سيارتهم وبحركه سريعه مسك المخدرات وبدا يوزع بصماته عليها
حرك سيارته مسرع وهو يعد من الواحد لين خمسين عدى نقطة التفتيش وثواني مثل ماحسبها ولا الدوريات خلـفه
بدا يزيد بالسرعه علشان يوهمهم انه هو صاحب المخدرات والسياره بـ اسمه

الشرطي من خلفه وهو يطالع صاحبه:اطلق على الكفرات

توقفت السياره بعد ما اطلقوا عليها
الرصاصات فيـاض وهو يربط عصابته وهمس: يـارب
نزل من سيارته وبداو يفتشونه

نطق العسكري بسخريه: ماشاءالله كمية المخدرات تغطي عين الشمس وصرخ : كلبشوه

تكلبش وهو على الصامت ماكان يرد او يتكلم معهم دخلوه التوقيف وبعدها بساعه نادواه للغرفة التحقيق وبدا يحقق معه الشرطي
لازال ملتزم الصمت

المحقق: فيـاض ما انصحك تسكت تكلم دافع عن نفسك

فيـاض ببرود: المخدرات وين لقيتوها

المحقق: انت تسألني

فيـاض وهو يطالع له بنفس النظرات: ايه

المحقق: بسيارتك

فيـاض: اجل خلاص انا المتهم ليش تزيد وتعيد بهالاسئله

الـمحقق وهو يطالع بملفه: الاول على ابتدائيات الـرياض الاول على مستوى المتوسط الاول على مستوى الثانويه بجميع المراحل متخرج بنسبه 99 القسم العلمي وفوق ذا كله حافظ لكتاب الله كامل ودخلت مسابقة حفظ القران وفزت ب المركز الاول
جتك بعثه للخارج على حساب الدوله وب ارقى الجامعات ورفضتـها دخلت جامعة الملك سعود بتخصص طب جراحه كملت بهالتخصص ربع سنه وكل تقاريرك ودرجاتك تقول انك انسان نـاجح ذكـي متفوق وفجاءه فيـاض هنـا مروج مخدرات وبحوزته مايقارب مية الف كيس ويتجول فيهم على طريق سفر وهو عـارف انه بيواجهه نقطة تفتيش ولكن المفارقه لمن نطالع سجل ابوك اللي من قضية نصب واحتيال ورشـاوي لين قضية قبل سنتين تسبب بوفاة عائلة بسبب استهتاره بالسواقه ولولا لطف الله ورحمته ماكان طلع من هالقضيه بس يحمد ربه ان ابو المتوفي عفا عنه الى اول قضاياه واللي تعتبر الاغرب بتاريخ القضايا وخروجه كان من المستحيل عارفها ولا اقولها لك

فيـاض بصوت بارد: قتُلت زوجه على يد زوجها الخبر تصدر الجرايد لمدة اسبوع وبعد الفحص والتحقيق اكتشفوا انها هي اللي قتلت نفسها والفضل يرجع لبصماتها على السكين وفوق ذا الوالد كان خارج المنطقه ولا كيف يطلع منها ياحضرة المحـقق كل اللي قدامك تلفيق بظهر ابـوي

المحـقق بـ استغراب: كيـف لك قلب وتتكلم عن وفاة امك وكانها شي عادي

فيـاض : تبيني ابكي لك ولا انوح علشان موضوع قديم وتسكر

المحـقق وهو ياخذ اوراقه: عموماً انا عارف ان مالك اي ايد بهالقضيه ولكن تحمل نتيجة اقوالك

فيـاض ب ابتسامه: لي يد بهالقضيه وبتحمل اتعابها بعـد

استغفر ربه من هالفيـاض مايقل عن ابوه ذكاء وحدة طبـع

رجع للسـجن دخله وهو حـاس بتعب من طلع من جـامعته لييـن اتصال والده يفزعه يفزع له
انرسمت على ثغرة ابتسامه خيبه وهو متـاكد
كل اللي جـالس يصير لهم بسبب خواله وثارهم اللي حالفيـن مايتركونه بعد ما طلع ابوه براءه وقتها اخذوا التؤام فاطمه وفواز وهم صغـار اللي اعمارهم سنه الا فيـاض اللي كان عمره 10 سنين وقتها وكان رافض يروح ويترك ابوه لحـاله وسبب ثاني نفوره من خواله ...وهو انه شاف كل شي بعـينه حتى سبب انتحار امه اللي ماعلم اي مخلوق فيه

رجع راسه على الجدار وهو متجاهل أسئلة اللي معه

______________

وصل الرياض بشق الانـفس دخل بيته وهو شبه يركض اخذ اغراضه وحطهم بالشنطه طلع ورقه وبدا يكتب بداخله كل الكلام اللي كان كاتمه بصدره ماحد كان يعرفه الا ولده فيـاض بدا يخط وصيته انتهى من كتابته وهو يحط الورقه تحت الابجوره بغرفة فيـاض تـأمل هالغرفه اللي شارك فياض فيها فيـاض اللي كان له نفس النور بوسط ظلمته وضيقته فيـاض اللي تعب لين طلعه من حالته النفسيه بعد انتـحار زوجته وبدا يستعيد نفسه مع فيـاض وبدا يدرسه ويشد عليه ويعلمه
مسح دموعه اللي انهمرت مره ثانيه من تذكر همس فيـاض : اهخ يابوك اهخ

وقـف وهو ينزل بسرعه ركب سيارته اللي مركونه بالحوش فتح البايكه وهو يطلع
لازم يختفي قبل لايوصل العلم لا اهل زوجته
عض شفته ب الم وهو يشوف زحمة الطريق بدا وجه يتعرق وهو حاس بالخوف من انه ينقتل قبل لايـشوف فياض بدا يتلفت لمح الاشاره صارت حمراء صرخ بغضب : ياالله
لف وهو يشوف على يمينه سيارة واحد من خوال فيـاض وبتهور حرك سيارته وهو يقطع الطريق اصتدمت سياره ب احدى السيارات بدت السياره تتقلب وهو داخلها وانعاد عليه شريط حياته ببطئ واخر ماذكره وهو يعلم فيـاض كيف يصلي وينطق الشهاده نطقها وهو يرددها بخمول وبعدها غابت عييـونه عن الدنـيا تحت اصوات الناس والاسعاف من منظر السياره المفجع

__________

بالـسجـن

فجاءه وهو جالس حس بوجع بقلبه غمض عيونه بتعب وبدا يردد: يارب احفظ لي ابوي

فز اللي جالس بجنبه وهو يسأله: فيك شي

حرك ايده بـلا

رجع راسه وبدا يتمم ب اذكاره اللي كان حافظها عن ظهر غيب من كان صغيير
_________________________

بمستشفـى الريـاض العام:

طلع الدكتور بعد ما اغطاه : جبر الله ما أصابكم

نطـق ابـوه بحزن: اللهم اميين

استند على عصاته والكون كله بعينه ضـاق

ماعنده الا هالولد اللي اصر انه ياخذ ام فيـاض وهو عارف قشر هالعايله وتعاليهم على اللي اقل منهم بس ماسمع كلام ابوه وهذي نتايج عدم رده على والده اللي ياما حذره منهم
وبالاخير هو اللي اكله هو وفيـاض

هز راسه بحزن: ياما حذرتك بس طول عمرك عنيد مرحوم يابو فيـاض مرحوم

_____________________________

بـعد سبع سنوات

واقف وهو يطالع نفس المحقق قبـاله

المحقق وهو ينظر له بريبه من نظراته نطق بهدوء: كمل اجراءات خروجـك

فيـاض لازالت نظراته لو تقتل قتلت اللي قدامه سحب الاوراق وهو يوقع بكل برود وبعدها نطق : وش ممكن يرجعني للسجن عشر سنين؟

طالعـوه بـ استغراب
وبعدها نطق الضابط: رح الله يستر عليك من يتمنى يرجع للسجن عقب خروجه

فيـاض انرسمت على ثغره بسمه ونادراً ما يبتسم: امـين

طلع من أسوار السجـن مشى وهو ينظـرلكل شي قباله مايـحس روحه هي روحه دخل هالمكان وهو متخذ مكان ابوه وهو عارف انه ابوه مظلوم دخله وهو عمره 19 سنه وطلع منه وعمره 25 اي جامعه بتقبله ولا اي وظيفه بتستقبله وهو خريج سجون والادهـى من كذا ابوه غيـاب ابوه اللي دام سبع سنين توقع الاقل يرسل سلامه يحط له محامي بس اختفائه فجاءه طول سبع السنين كان ينتظر بكل زياره يفز قلبه كلما يشوف اهالي المساجين الا هو لا ابوه ولا جده ولا ولد عمته
لهدرجه بايعينه زفر بضيق وهو مو عارف كيف يوصل لبيته وهو مامعه ولا ريـال نطق بمأساه وهو يشوف طـرق الرياض : حتى انتي يانجد العذيه متغيره علي

بدا يتلفت وهو يمشي مايدري وين رايح وهو مستغرب من التغير اللي صاير بالرياض لدرجه ماهو عارف كيف يوصل لبيته المباني الكبيره والعماير والاسواق كل شي بالرياض متغيير

اشر بيده لسياره وقفت تقدم وهو يسأله: ممكن توصلني

نطق راعي السياره : تمام اركب

ركب وهو مستغرب من وضعه مدنق على جهاز بحجم الكف وسماعات ب اذنه صد وهو مو عارف وش اللي معه

نطق يزن: وين بيتك

وعطاه العنوان وبعد صمت نطق : هذا من سبع سنين مدري عاد اذ تغيير مكانه ولا

يزن ب ابتسامه: اوه كل شي تغير بالرياض
انت وينك مسافر ورجعت

فيـاض بسخريه: كنت مسافر للسجن بتهمة اني مروج مخدرات تخيـل دخلته بلاش وطلعت بلاش بعد

يزن التفت له بربكه : اها

فيـاض طالع لملامحه كيف قلبت وارتبك: لاتخاف ماني راعي حبوب

يزن لازالت ملامحه فاضحته : هذا الشارع اي بيت بيتكم

فيـاض وهو يطالع لبيوت جيرانه المتغيره

نطق بعد مالمح بيتهم : خلاص وقف

وقف يزن : حسابك20

فيـاض وهو ينزل: ابشر كم حبه تبي

يزن برد وجهه وهو يحرك بسرعه وخوف

ضحك فيـاض وهو مايشوف الا غبرة سيارته: بزر

_________________________
بالشركه اللي اقل مايقال عليها فخمه

جالس بمكتبه الفخم وبهم نطق: طلع

نطق اخوه: ايه طـلع والله يفكـنا من شره

مارد وهو يلعب بسبحته وسرحان يفكر كيف ممكن يبعده عنهم

_______________

الئ هنـا حبيت اعطيكم نبذه بسيطه عن بداية الاحداث شاركونيي توقعاتكم

اختكم: سُـهـد

ضـحكتــي سحـــريّـــه 14-09-2019 10:19 PM

رد: رواية: كسرت باب الحزن وانفكت جيـاده
 
آه قلبي بيوجعني بسبب فياض
المسكين لو يدري بس أنّ أبوه مات ما رح يصير خير وأظنّه بينتقم من اللّي كانوا السّبب في موته
آه يا قلبي آه

أوه نسيت أبارك لك على الرّوايه =)
موفقه إنشاء الله شكلها من البدايه حلوه ومميزه فيها أكشن وانتقام الله يستر بس
أكثر شيء أبغى أعرفه هو سبب انتحار أمّه ومن ذوك اللّي يملكون الشّركه الضّخمه واللّي أظنهم خواله
أنتظر القادم يا جميله ^_^

فيتامين سي 14-09-2019 11:13 PM

رد: رواية: كسرت باب الحزن وانفكت جيـاده
 


السلام عليكم ورحمة الله وبركاته

ألف ألف مبروووووك سهد أو غسق الليل h سابقا

ومبروك اللقب الجديد هههههه

حبيت أرحب وأبارك لك ولي عوده بعد القراءه

وأتمنى لك التوفيق والنجاح اللي تطمحين له


بنت آل تميم 14-09-2019 11:48 PM

رد: رواية: كسرت باب الحزن وانفكت جيـاده
 
سُهد
اهلا و سهلا بيك مره ثانيه بينا....
واضح هل رواية راح يكون بيها من الحزن اضعاف روايتك اولئ...
فياض اهو بطل الرواية ،، كلنا شوق لقلمك...
مبروك علئ روايتك الثانية..

سُـهـد 15-09-2019 06:28 AM

رد: رواية: كسرت باب الحزن وانفكت جيـاده
 
اقتباس:

المشاركة الأساسية كتبها ضـحكتــي سحـــريّـــه (المشاركة رقم 31311868)
آه قلبي بيوجعني بسبب فياض
المسكين لو يدري بس أنّ أبوه مات ما رح يصير خير وأظنّه بينتقم من اللّي كانوا السّبب في موته
آه يا قلبي آه

أوه نسيت أبارك لك على الرّوايه =)
موفقه إنشاء الله شكلها من البدايه حلوه ومميزه فيها أكشن وانتقام الله يستر بس
أكثر شيء أبغى أعرفه هو سبب انتحار أمّه ومن ذوك اللّي يملكون الشّركه الضّخمه واللّي أظنهم خواله
أنتظر القادم يا جميله ^_^


اسعدتيني بتواجدك الله يبارك فيكك❤

كلهم مساكييين الا فيـاض🌝💔

سُـهـد 15-09-2019 06:30 AM

رد: رواية: كسرت باب الحزن وانفكت جيـاده
 
اقتباس:

المشاركة الأساسية كتبها فيتامين سي (المشاركة رقم 31312042)


السلام عليكم ورحمة الله وبركاته

ألف ألف مبروووووك سهد أو غسق الليل h سابقا

ومبروك اللقب الجديد هههههه

حبيت أرحب وأبارك لك ولي عوده بعد القراءه

وأتمنى لك التوفيق والنجاح اللي تطمحين له



مضطرين نغيره ههههههه ، الله يبارك فيك اسعدني تواجدك ومرورك وننتظر رايك بعد ماتقرين ،، امين يارب

سُـهـد 15-09-2019 06:33 AM

رد: رواية: كسرت باب الحزن وانفكت جيـاده
 
اقتباس:

المشاركة الأساسية كتبها بنت آل تميم (المشاركة رقم 31312171)
سُهد
اهلا و سهلا بيك مره ثانيه بينا....
واضح هل رواية راح يكون بيها من الحزن اضعاف روايتك اولئ...
فياض اهو بطل الرواية ،، كلنا شوق لقلمك...
مبروك علئ روايتك الثانية..


هلابك ... تقريبا روايتي الاولى فرق عن هالروايه من ناحية افكارها واسلوب احداثها
وشخصياتها ... وان شاءالله حزنها قليل

الله يبارك فيك يارب

اسعدني تواجدك ومرورك

فيتامين سي 15-09-2019 12:35 PM

رد: رواية من يقول أن البشر مره تموت/بقلمي
 

السلام عليكم ورحمة الله وبركاته

بدايه رااااائعه سهد ومشوقه

فياض ضحى بنفسه حتى ينقذ أبوه من التهمه اللي لفقت له

وتضحيته راحت على الفاضي يمكن لو عرف بوفات أبوه كان ما أعترف

على نفسه وشال القضيه وهو يظن إنه يحمي أبوه


أعتقد فياض لما يعرف بوفاة أبوه بينقهر زياده وأكيد بيحقد على اللي كان السبب
في اللي هم فيه وأعتقد إنهم خواله والله يستر مايضيع عمره في سعيه للإنتقام


أعتقد اللي في الشركه من خوال فياض أعوذ بالله منهم ماحنو على أختهم ولا ولدها

اللي يحير هو سبب إنتحار أم فياض وش راح يكون ؟؟؟؟

منتظرين باقي الأحداث

يعطيك العافيه



الحنين الصادق 16-09-2019 02:03 PM

رد: رواية من يقول أن البشر مره تموت/بقلمي
 
االسلام عليكم ورحمة الله وبركاته
اهلين بسُهد عجبتني البداية و تشوقت للبقية ننتظرك

كفيف مميز 16-09-2019 08:55 PM

رد: رواية من يقول أن البشر مره تموت/بقلمي
 
اهلا بك وبروايتك لا تنسي التشويق لأنه ملح الرواية


الساعة الآن +3: 04:00 AM.


موقع غرام موقع سعودي خليجي عربي يحترم كافة الطوائف والأديان ومختلف الجنسيات


SEO by vBSEO 3.6.1