غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 21
قديم(ـة) 02-10-2019, 04:21 PM
صورة هــــدبــــ خــجــلانــــ الرمزية
هــــدبــــ خــجــلانــــ هــــدبــــ خــجــلانــــ غير متصل
©؛°¨غرامي مبدع¨°؛©
 
الافتراضي رد: رواية ياسمح المحيا جر الهجـينية/بقلمي


نزل البارت وين كنت عنه 😍

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 22
قديم(ـة) 05-10-2019, 06:25 PM
صورة هــــدبــــ خــجــلانــــ الرمزية
هــــدبــــ خــجــلانــــ هــــدبــــ خــجــلانــــ غير متصل
©؛°¨غرامي مبدع¨°؛©
 
الافتراضي رد: رواية ياسمح المحيا جر الهجـينية/بقلمي


بارتات تجنن ماشاء الله
يعطيك العافيه
صراحه لحد الان ماعرفت ايشـصاب
عباير واهلها فيه شي كايد وبقوه
متحمسه حدي بجد
بعد قولك غيث هوا الي راح يستحل الساحه
كنت اضنه بتال وقاعده اسوي سيناريوهات
حول التقاءهم


بتــال
ذا البقره هههه حتى بعز وجعه ضحوك
الله يديمها بس
شاكه بوضع اهله صراحه
فيه شي غريب
خصوصا لما كانو يستغربون شفيه
وكانهم خافوا ليعرف شي


ابو غازي
حنوو رغم قسوته
لين رغم صلابته


سعـــود
ونعم الاخ
الله يديم اخواننا وجميع اخوان المسلمين
بس ماعجبني الكف الي سواه لعباير
هذا شكلو خلق يعطي كفوف ههههه



وبعد ذلك
اسفه علــ التاخيرفي الرد صارت
لي ظروف منعتني من الرد رغم تواجدي

تحياتي



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 23
قديم(ـة) 06-10-2019, 09:07 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية ياسمح المحيا جر الهجـينية/بقلمي


اقتباس:
المشاركة الأساسية كتبها هــــدبــــ خــجــلانــــ مشاهدة المشاركة
بارتات تجنن ماشاء الله
يعطيك العافيه
صراحه لحد الان ماعرفت ايشـصاب
عباير واهلها فيه شي كايد وبقوه
متحمسه حدي بجد
بعد قولك غيث هوا الي راح يستحل الساحه
كنت اضنه بتال وقاعده اسوي سيناريوهات
حول التقاءهم


بتــال
ذا البقره هههه حتى بعز وجعه ضحوك
الله يديمها بس
شاكه بوضع اهله صراحه
فيه شي غريب
خصوصا لما كانو يستغربون شفيه
وكانهم خافوا ليعرف شي


ابو غازي
حنوو رغم قسوته
لين رغم صلابته


سعـــود
ونعم الاخ
الله يديم اخواننا وجميع اخوان المسلمين
بس ماعجبني الكف الي سواه لعباير
هذا شكلو خلق يعطي كفوف ههههه



وبعد ذلك
اسفه علــ التاخيرفي الرد صارت
لي ظروف منعتني من الرد رغم تواجدي

تحياتي

حبيبتي عذرك معك💗💗ومشكورة على جمال ردودك اللي تحفز رغم التفاعل السيء

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 24
قديم(ـة) 06-10-2019, 09:08 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية ياسمح المحيا جر الهجـينية/بقلمي


،،الــجــزء الــثــامـــن،،
اللهم صَل وسلم على نبينا محمد
استغفر الله العظيم وأتوب اليه
.
.........****..........
بيت عادل
ابو غازي دخل لبيته واستقبلوه امجاد ورهف بقلق مرتسم على وجيههم وعذاري وقفت على مسافة منهم وهي تشوف البنات متجهين لابوهم
امجاد وقفت قباله وبقلق:كيفه يبه؟
ابو غازي وهو يرد الباب وراه:ماعليه الحمدلله طيب
عذاري مشت لهم وهي تزفر براحة
امجاد:يبه تكفى لاتخوفنا زيادة
ابو غازي زفر:طيب اقولش علامش ماتسمعيني!!
عذاري سلمت على راس ابو غازي:الحمدلله على سلامته عمي خطاكم السو
ابو غازي ابتسم:الله يسلم عمرك ياعذاري
امجاد قاطعتهم:وينه يبه ليش ماجا معك اذا انه طيب؟!!
ابو غازي توسعت عيونه وبنرفزة:يابنت اقولك طيب مابه شي شوفيه يهذر برا مع اخوانش مثل الحصان ماتقولين صابه شي
امجاد ورهايف مدوا يديهم للباب بسرعة بيخرجون
ابو غازي سبقهم وحط يده عالباب:هيه هيه انتي وياها راشد برا معهم على وين!!
عذاري ابتسمت:اجل استأذنكم انا تصبحون على خير،،مشت،،
امجاد:ابي اشوفه يبه مااقدر اصبر
ابو غازي بحدة:ولد ابوي انا!!انثبرن هنا مو بطائر اخوكن هذا هو برا يسلم على راشد وبيجي
ام غازي دفت الباب من برا بتدخل استغربت انه مفتوح لكن فيه احد يرده:ياللي ورا الباب ابعد أعجل علي
ابو غازي ترك الباب
ام غازي دخلت وهي مستغربة وقفتهم عالباب:وش فيكم؟!
ابو غازي بحدة:بناتك انهبلت يبن يطلعن وراشد برا
ام غازي زفرت بزعل:وهذا شي تعصب عليه!!راشد مثل أخوهن وربن معه!!وكل يوم وهم طايرين بحلوق بعضهم وش فيها اذا طلعن وهو برا!!
ابو غازي:وسمية!!اجيبك يمين تجيبيني يسار!!ماتطلعن وانتهينا اخوكن يجي الحين وتمقلن فيه مثل ماتبن،،مشى متجهة لغرفته بخطوات سريعة من تعصيبته،،
رهايف ماتحملت واتجهت لشباك المجلس تبي تشوفه بس وتتطمن بعد تهديد ابوها
امجاد بتمشي وراها
ام غازي وقفتها:تعالي معي نجهز لإخوانك شي يأكلونه
امجاد مشت ورا امها وهي مشغول بالها ببتال
ابو غازي طلع جواله من جيبه وفتحه بعد ماكان قافله شاف رقم جذب انتباهه من بين ارقام المتصلين عليه وبنفسه:من اصبح افلح
...عند بتال وغازي..
بتال بابتسامة وتوتر:بِسْم الله وش فيك ياولد؟!!وش العب عليك؟!!
غازي وهو يثني يديه ويمسك وسطه وبنرفزة:بتال شيل قناع جسّار وتكلم
بتّال مد يده يبي يمسك وجه غازي:بِسْم الله عليك
غازي رجع بخطواته لورا مبتعد عنه
بتال سكت ونزل يده وهو يشوفه معصب صدق
غازي نزل يديه عن وسطه تكلم وهو عاقد حواجبه:حتى جسّار شاك بوضعك ماكان على طبيعته وهو يشوفك تمثل شخصيته!!
بتّال ضحك من صدمته:وااااه لهالدرجة يعني؟!!
غازي:ايه لهالدرجة واضح لي وواضح لجسّار ولراشد بعد اللي سحب عمره اول ماشك!!
بتال نزل راْسه وهو يرسم ابتسامة خفيفة على وجهه:اكيد بتلاحظون بالنهاية انتم شلتي!!
غازي توتر:وش فيك تكلم؟
بتال اختفت ابتسامته ورفع راْسه يناظر غازي ساكت
غازي تغير وجهه:ردوا عليك؟!!
بتال ارتسمت على وجهه ابتسامة فرح وهز راْسه بايه
غازي بتوتره:الله لايبارك عدوينك بالخير قل امين!!
بتال كشر بوجهه:ليش؟!!
غازي:ولك وجه تسأل ليش!!ابوي لو يدري قسم ان ماتظل على وجه الارض دقيقة!!
بتال بحدة:خله يدري!!ماني مسوي منكر ولا كبيرة تخرجني من الملة!!
غازي بعصبية:بتال!!!
بتال:وانا الصادق!!علمني وين الغلط اللي مسويه!!عشان تنفجع بدل ماتبارك وتفرح لي!!
غازي:وين ابارك لك وانا ادري ابوي بيدفنك اذا درا!!
بتال كشر بوجهه وهو يناظره بحقد:يعني وش تبيني اسوي هاه؟!!ومتى بيرضى ابوك ان شاء الله ويجيني الفرج؟!!
غازي زفر ومد يده ومسك يد بتال ومشى وهو يسحبه وراه:اول شي تسويه ماتبات الليلة بالبيت هج شف لك اَي مكان اهم شي ماتكون بالبيت اذا درا ابوي!!
بتال سحب يده وبرواق:خل الخوف الزايد عنك بيضربني يعني؟!!عادي هذا انا اكثر واحد مآكل تبن بينكم منه والأمور على احسن مايرام ولله الحمد
غازي:ورب البيت ماانت بصاحي!!كشفوا عليك زين بعد الطيحة؟!!
بتال:انا اخبر بعمري ولا نسيت تخصصي!!
غازي:ودامك اخبر على قولتك انت مستوعب كلامك!!هذا ابوي ماينلعب عليه!!
بتال:الله والمصيبة عاد اللي مسويها الحين!!،،عطاه ظهره واتجه لبيتهم،،امش بس امش ميت جوع،،رجع يديه ورا راْسه وهو يشبك اصابع يده ببعض وبابتسامة،،ولاتنسى اللي صار لي الليلة بيكون عذر بعد لاعصّب ابوي
غازي تنهد وهو يحس بتوتر فظيع:يابردوك يابتال يابرودك
.........****..........
،،بمكان ثاني وعند شلة ثانية،،
طلق جالس قبال شبة النار بمكانهم المعتاد اللي برا الديرة بمسافة لكن مو بعيد ضايقة اخلاقه لانه تكلم مع عمه بهالاسلوب ويضيق اكثر كل ماتذكر سالفة زواجه من شامة مسك راْسه بين يديه وهو يتكي بها على ركبه وكله هم
ناصر جلس جنبه وبابتسامة:حي الله عريس الغفلة اللي جروه وهو مايدري وين الله حاطه
طلق التفت له عن جنب وبغيظ يكتمه:نويصر ورب البيت ماهو بوقتك انكعم عني وخلني بنفسي
هليّل جلس قبالهم بقوة وهو يزفر
،،طالعوه،،
طلق عض شفته بغبنة منه وهو يطالعه بحقد وده يذبحه وتمنى انه كسره قدام عباير الصبح ولاصارت المشكلة ووصل لهالحالة
ناصر:وش فيك بعد انت؟!مايكفيك اللي واجهته الليلة؟!!
هليّل بعصبية:ناصر ماابي كلمة هه هه ولا ربع كلمة يكفيني السم اللي انكت بأذني
ناصر بعيون متسعة:بِسْم الله علامكم علي!!وش عملت بكم!!انا في حالي بوجه الله وتبلوني!!خافوا ربكم فيني انا الضعيف بينكم!!
غيث وقف عندهم وبابتسامة:بذي صدقت والله انك مسيكين
ناصر تبسّم وهو يوقف:الله ينصرك جا جا اللي بيجيرني منكم يالظلومين!!
طلق كشر بوجهه وهو يطالعه
ناصر صافحه وهو يسحبه يجلسه مكانه:حي الله غيث ياحي الله
هليّل ابتسم:نورت الديرة يارجال!!
غيث جلس:منورة باهلها منورة باهلها ياهليّل
طلق وقف:اترخصكم انا
ناصر استغرب:على وين؟!!بعدك ماعلمتنا وش بلاك؟!
طلق:مااقدر أطول الليلة امي محرصّة اعوّد بدري
غيث وقف:اقعد اقعد ياطلق ادري بك عشاني جيت خلك بالعزبة ادري انها هواك وراحتك
هليّل بزعل:وش هالكلام ياغيث!!طلق صادق امه موصياد وهو مايبطي عنها عشان عمه تعيبان هالايام!!اترك الظنون واقعد
غيث طالع طلق بنظرة زعل:للحين ياطلق للحين
طلق زفر وهو يطالعه ساكت
ناصر:انتم ماتوالفون!!متى بتعودون طلق وغيث الأولين!!
طلق وعينه على غيث:اللي انكسر مايتصلح ياناصر
غيث:للحين مابريت؟!
طلق:بريت ياغيث يشهد الله بريت لكن القلب ماعاد صاخي مثل اول
غيث ابتسم لكن الحزن ملا قلبه بعد كلام طلق:ابد متى مابغيت غيث ياطلق تراه موجود ومثل ماهو يحتريك تعوّد يمّه،،خرج،،
هليّل وقف وطالع طلق بتعصيبة:كل مرة كل مرة تعيدون نفس السالفة متى بتركدون انتم الله يسلط عليكم،،لحق غيث،،
ناصر ابتسم من هليّل وطالع طلق
طلق:ناصر
ناصر تنهد:ماني بقايل شي يشهد الله علي بس باقعد واتفرج بهالنار بس
.........****..........
يوم جديد
.........****..........
بيت الجد نشمي
الجدة منيرة:علامك زاهبن وطاير قبل المذن
الجد نشمي وهو يجمع اغراضه بجيبه:البارجات كلمني عادل وقال انه طيب رقدت لكن عويدل ذَا ماينوخذ له منطوق
منيرة بزعل:عويدل يانشمي انت خابره ليش تقول عنه هاللون!!
الجد نشمي تنهد:عادل يامنيرة ماعاد بهو عادل اللي تخبرينه
منيرة:اخز ابليس عادل هو عادل بس أنت ماعاد إتواثقه عقب ذيك السالفة
الجد نشمي كشر بوجهه:امنعينا يامنيرة ابي اروح لبتّال قبل الأذان
منيرة مسكته:طاوعني يانشمي اكيد الولد راقد وانت بتغبش عليه وتقلق نومته
الجد نشمي طالعه وهو مقتنع بكلامها
منيرة:بتال بعافيته يانشمي لو فيه شي مارقدت البارح هني صدقني يانشمي اقعد اقعد تريح واذا خلص الأذان رح لعادل وهو يعلمك هذا اذا ماسبقك هو
.
بيت عادل
،،غرفة ام غازي،،
ابو غازي صحى على صوت الاذان لف بجسمه وهو يمد يده يلمس كتف وسمية قطب جبينه من الملمس اللي يحسه جلس وهو يردد بصوت عالي مثل ماتعود وهو يلف ويفتح نور الابجورة اللي على يمينه:لاااااإله إلا الله أصبحنا وأصبح الملك لله،،التفت على زوجته وفز وهو يشوفه،،بِسْم الله الرحمن الرحيم،،كشّر بوجهه،،اللهم انا نسألك خيرًا من عندك!!،،ضربه على كتفه،،جسّاروه ووجع وش مرقدك عندي!!
جسّار نايم ماصحى
ام غازي نايمة عالارض جنب السرير وبتّال نايم بحضنها صحت من صوته جلست والتفتت تطالعه وبنوم:وش فيك؟
ابو غازي توسعت عيونه وبعصبية:وانتي وش مرقدك بالوادي!!
ام غازي:مايشيلينا السرير كلنا
ابو غازي:كان طردتيه!!
ام غازي وهي تتثاوب:وإذا طردته وش يطّلع الثاني بعد!!
ابو غازي بغبنة:أخص من عيال!!يرقدون امهم بالوادي،،دف جسّار برجله،،قم قم متهني بالنومة وأمك بالوادي قم!!
ام غازي:خله انا بأصحيه لاتصحي بتال طول ليلته مانام زين
ابو غازي زفر:وانتي متحضنتهم كأنهم بالكوفالة!!تراهم رجال ياوسمية رجال!!
ام غازي بهمس:حرام عليك بتال تعبان
ابو غازي رفع يده وضرب جسّار اللي نايم جنبه بكتفه:وهالحمار اللي نايم جنبي ها؟!!
جسّار توجع وهو نايم وكمل نومته عادي
ام غازي بكسرة خاطر وهي تناظر جسّار:ياعيني على عيالي حتى ماصحى لو هو غيره فز وهو منفض قليبه!!
ابو غازي بنرفزة:والله من القلوب الميتة
ام غازي طالعته وهي تتحلطم بنفسها منه
ابو غازي هز راْسه بيأس من جسار وهو يطالعه ثم رفسه بطرف رجله:قم قم لابارك الله بعدوينك
جسّار تأفف وهو يسحب المخدة اللي تحت راْسه ويغطي وجهه فيها
ابو غازي توسعت عيونه
ام غازي وقفت بسرعة:عليك الله تخليه!!رح رح وبتشوفه وراك رح توضأ
ابو غازي زفر وهو يستغفر ومشى يتوضأ ويطلع للمسجد
.........****..........
بيت بادي
الجد بادي صحى من قبل لايأذن الفجر صحى سعود
سعود توجه للبنات وصحاهم ثم اخذ جيكين كبار ويعبيهم من خزان الموية الحلو
عباير جالسة على باب غرفتها مميلة رأسها على الباب ونايمة
حلايا راسها بحضن عباير وبسابع نومة
الجد بادي بنص الحوش ضرب مركوعه بالأرض معصب وهو يشوفها نايمة وبحدة لكن مارفع صوته حتى لايخوف حلايا:عبيّر ياعساك بالغبيّر اَي والله!!
بخوت وقفت جنبه:خلاص ياجدي انا ولمّت الحوايج مابقى الا شين قليل
الجد بادي مشى لعباير وضربها بشويش بمركوعه:غباير انتي غباير يالغبرة قومي!!
عباير تطالعه لكن كلها نوم:جبته ياجدي جبته
الجد بادي قطب جبينه:وش اللي جبتيه؟!!
،،أذن الفجر،،
عباير وهي تمسح وجهها تحاول تصحصح:اللي بغيته مني جبته ووطيته يمك
الجد بادي وهو يدفها بطرف مركوعه من كتفه:خافي ربش تكذبين وانتي تسمعين المذن(الأذان)؟!!
عباير:ماذيت احد ياجدي والله
الجد بادي بعصبية وبصوت عالي:عباااااير!!
عباير صحت هالمرة وحلايا صحت مفجوعة
بخوت شالت حلايا لحضنها وهي تسمي عليها
الجد بادي زفر:لااله الا الله،،طالع عباير بحدة،،قومي ولمي الغريضات مع اخوانش ثم ولمي عمرش نبي نغدي قبل حموة الشمس
عباير وقفت وبصوت مبحوح من النوم:متولمة ياجدي وخالصة لكن انت الظاهر اليوم ماتبي اجر الجماعة
الجد بادي بعصبية:اعقبي!!الاجر نبيه وانا وسعود جماعة ودامش تقولين إنش والمة اذلفي وشغلي الموتر
حلايا نزلت من بخوت وعلى وجهها ابتسامة عريضة اخذت عروستها وسبقتهم للسيارة
بخوت تطالعها بابتسامة
عباير دخلت غرفتها وخرجت وهي تقفل ازارير عبايتها ومشت وهي تتحلطم:يالله من فضلك رضا وصباحن يفتح النفس وش هالطروة بذا الحر!!
الجد بادي:اقصري حسش فضحتينا
عباير وهي تلف طرحتها:خلهم يوحون جعلهم بعاقور كودهم مايغدون يم شعيبنا
الجد بادي مشى وراها وهو يتهاوش معها:ماهو بلش بلحالش هالشعيب ارض الله
عباير:ليه هم يخافون الله!!
بخوت تغير وجهها
سعود شايل الجيك متجه للسيارة انجلط من كلام عباير وبنفسه:تبين تصبّحين على فقشة(فلقة)راس!!
الجد بادي وقف
عباير بلعت ريقها وبصوت عالي وسط خطواتها السريعة:أصبحنا وأصبح الملك لله عفو ورضا وسعادة منك يارب العالمين
الجد بادي تنهد وهو مايقدر يهاوشها حتى
.........****..........
بيت مسفر
شذى دخلت للغرفة وقفلت الباب وراها
جواد متمدد على سريره جلس وهو يطالعها:خير؟!
شذى تطالعه بتكشيرة:ابد سلامتك والله!!من البارح لاصوت ولانفس حتى لك نسمعه!!
جواد:خير وش تبغين مني؟!!
شذى توسعت عيونها:نننعععممم؟!!!
جواد رمش بهدوء من استغرابه منها:نعم انتي؟!!
شذى انغبنت وهي تشوفه مافهم:انت من وش مخلوق؟!!تقتل القتيل وتمشي بجنازته!!
جواد قشعر جسمه من كلمتها:اعوذ بالله منك!!
شذى من قلب:الحمدلله يارب عالاقل تحس!!
جواد بنرفزة:شذى اخلصي ولايكثر!!
شذى تكتفت:دامك صاحي ومرتز من الصبح وراك مارحت تتطمن على ولد عمك اقلها بعد سواتك،،زفرت،،اسكت احسن
جواد من بين اسنانه:شذى قصري صوتك وبعدين احبهم على ذَا الصبح صاحية انتي!!
شذى:هذا هو ابوي راح ليش مارحت معه؟!!
جواد وهو يتمدد:روقينا شذى العصر ان شاء الله بمرّه
شذى:وش هالبرود اللي عندك!!،،عقدت حواجبها،،لايكون خايف انهم دروا!!
جواد طارت عيونه وهو يوقف
شذى جرت خارجة
جواد بصراخ وهو يلحقها:تعالي تعالي قولي لي من الخواف تعالي
سهام بالمطبخ تجهز الفطر وهي تسمع صراخهم:يالله صباح خير!!
ام جواد جالسة بصالة البيت تقرأ قران قفلته:لااله الا الله
شذى بصراخ:يمممممهههه،،دخلت الصالة ونطت ورا امها،،ولدك بيذبحني يمه بيذبحني!!
جواد وقف وهو يشوفها ورا امه:اطلعي تعالي لي اذا فيك خير
شذى بخوفها:مافيني خير بس حل عني
ام جواد:خير وش فيك على ذَا الصبح لايكون تبي ابوك يصبح عليكم اليوم مثل صباحات عمك!!
جواد:يمه علمي بنتك توزن كلامها معي ولا بتجيب اجلها بيوم هذاني علمتكم
سهام وقفت عندهم وهي تسمع كلامه:اكيد قالت لك شي صابك بالصميم وليش كل هالتعصيب كله!!
جواد طالعها وبحدة:انتي مالك شغل خليك برا الموضوع
ام جواد بتهديد:جوادوه ترا للحين مانسينا سواتك اللي البارح اقصر الشر لاتطول السالفة!!
جواد:ماسويت شي ابد واللي صار نصيبها مالي ذنب!!
ام جواد توسعت عيونها بعصبية:ولا عندك ذرة ندم!!وش هالقلب!!ايه لاتحتك فيهم لكن الأذية والتعدي لا والف لا ياجواد!!
جواد:يمه انا ماكنت قاصد واللي صار غصب عني
ام جواد بعصبية:ليش ناوي المرك تذبحهن وبرضه غصبا عنك!!
جواد بصراخ:يمه ليش تقوليني شي ماقلته!!
ابو جواد وقف عندهم وبحدة:من هن اللي تذبحهن ياجواد؟!!
.
.........****..........
بيت عادل
ابو جواد رجع من المسجد مع ابوه اخوه ابو غازي ورجع لبيته اول ماقال ابو غازي ان ترك بتال نايم ماصحاه وهو كان ناوي يسلم عليه وكمل ابو غازي وابوه طريقهم لبيته مع انه يقنع ابوه يروح للبيت يريح وبتّال يجيه يسلم عليه لكن رفض ابد ودخل للبيت ودخل لمكان جلست أهل البيت المعتادة(الصالة)ولقى الكل متجمعين الجدة وعذبة وراشد وبعد السلام
ابو غازي ابتسم:يالله حيهم!!يالله انه تحييهم وين مانزلوا،،قطب جبينه وهو يشوف فيصل بس ثم احتدت ملامحه،،وينهم اخوانك؟!!
فيصل وهو يقهوي راشد:جايين يبه الحين جايين
ابو غازي بحدته:وشو!!
راشد همس لفيصل:افزع لإخوانك لايذبحون اليوم افزع!!
فيصل نزل الدلة والفناجيل:يبه امي تناديني
ابو غازي:شف معك هالمتبطحين وينهم!!وربي لامسحهم اليوم مسح
عذبة:لااله الا الله!!وش فيك انت وش فيك ياابن الحلال وش فيك!!
الجد نشمي:فيصل ياعيني
فيصل:سم ياجد
الجد نشمي:خل بتال يرقد وجسّار وغازي اذا انهم صاحين يجون
ابو غازي بعصبية:طرقن عنهم يجون كلهم ولا ورب البيت لاأصلي بهم شرق!!
الجد نشمي زفر:عادل!!
ابو غازي:سم يبه
الجد نشمي:خل بتال عنك مريض الولد وشو له تقردنه!!والعيال بيجون ماهم متددسين عنا(يتخبون ولايقابلونهم)!!
ابو غازي:يبه
الجدة منيرة قاطعته:عادل خلاص ياعادل لاترادد ابوك!!
ابو غازي طالع فيصل وهو يشد ع قبضته وبعصبية تتطاير من وجهه:وانت علامك واقف وش تحتري!!
فيصل مشى بخطوات سريعة:أبشر يبه أبشر
.........****..........
،،عند بادي واهله،،
سعود شاب النار ويجهز الفطور
الجد بادي جالس بالظل بعيد بمسافة عن سعود والنار وبوسط ابتسامته الهادية يناظر المكان وهو يذكر اشياء بينه وبين نفسه
بخوت جالسة جنبه:وش الطاري ياجدي؟
الجد بادي تنهد:ايه يابخوت مر بخاطري أيام،،نزل راْسه وهو يكتم حسرة بخاطره،،
بخوت شالت عينها من على جدها وهي ماتبي تسأله اكثر وتوسعت عيونها وهي تشوف عباير وحلايا مفترين بالناقة وصرخت وهي توقف:عباااااير!!،،مشت لهم تهرول،،
الجد بادي رفع صوته:خافي الله بهالمخلوق ياعباير خافي ربش لاتنزل بش ظليمته!!
سعود ابتسم وهو عارف حركات عباير
عباير وهي تضحك وتدور حول الناقة تفزعها:ايه ايه تحركي تحركي ابيش تعجّلين علينا ياشهيبا(اسم الناقة)نبي الحويّر متنا وحنا ننتظره
حلايا ورا عباير تقلدها بحركاتها:بسرعة زيبي(جيبي)الحوار جدي قال اسميه عزلي(عجّلي)
بخوت وصلت عندهم وسحبت حلايا بيدها اليسار وهي تبعد فيها عن الناقة وبحدة:جعلها تعقطش(ترفسك)اي والله شايلتن حلايا معش ليش!!خليها تعقطش لحالش!!
عباير شهقت وهي تطالعها:اهب ياقلبش الأسود!!اختش تراني ماني بعدوتش!!
بخوت بعصبيتها:ويومك انك اختي وراش ساحبة الورع معش هاه!!
عباير:راسها معها وهي كبيرة تشاور وتزهلها مامن ظليمة!!
بخوت طارت عيونها:وش تقولين!!وربي منتي بعقلش!!انخبلتي ياعباير انخبلتي!!
عباير طالعت حلايا ببرود:وانا الصادقة اخذت عهد ماامنع نفسي من شي يونسني ولاارد احد يبي يتونس!!
بخوت:بتذبحيني انتي!!ماني برادتش عن شي لكن هالبزر وش ذنبه هاه ياعباير وش ذنبه؟!!
حلايا سحبت يدها بقوة من بخوت وبزعل:بحوت انا مو مو بزل ولا ولع!!
عباير انفجرت تضحك:عاشت عاشت حلاوة البيت عاشت
بخوت طالعت عباير بقهر:لاتثورين الورع علي!!
حلايا صرخت:ماني ولع!!!
عباير تضحك بضحكتها اللي ترددت بالمكان من الصدا
سعود يتدارك الوضع قبل يكبر:يابخوت ادني يمي امسكي لي اللحم
بخوت طالعت عباير وهي ودها تكمل هواش لكن مشت بخطواتها لسعود:لافية يمك أبشر
الجد بادي:سعود باقي اللحم لاتخليه بكبره
سعود طالع جده وهو عاقد حواجبه باستغراب
الجد بادي:وزعه بالكييسات وحطه بالترمس
سعود:أبشر ياجدي أبشر
الجد بادي:ياعباير يابنت
عباير وهي بمكانها:سم ياجدي
الجد بادي شهق:سم وانتي بمقلع وادرين!!ادني يمي ادني!!
عباير مشت لجدها بخطوات سريعة
حلايا جرت وراها تسابقها
عباير جلست جنبه وهي تتبسم
حلايا جلست بحضن جدها
عباير احتضنت يده وتتدلع عليه:سم ياروح عباير ياضحكة عباير ياخاطر عباير!!يالـ
الجد بادي بانزعاج:بس بس بس اصمختيني يامال الصلاح!!
عباير بابتسامة:مانطقت كذب ياقليب عباير ودنياها!!
الجد بادي اخفى ابتسامته وهو مبسوط من كلامها:سمعيني من هلسك(كذبك)يابنت متعب
عباير تركت يده وبزعل:الحين تطلبني وانت تسميه هلس!!!
الجد بادي:اقصدي يابنت اقصدي
عباير طالعته وهي مقطبة وجهها بزعل
الجد بادي:مو تقولين اني قليبك!!،،صدّ بوجهه،،واضح قليبك وينه؟!!بديرتن ماني فيها!!
عباير رفعت صوتها:افا وانا بنت متعب،،وهي تأشر بأصبعها ع طرف انفها،،ابشر على هالخشم!!
الجد بادي وهو يعتدل ويصب له قهوة:سلمتي وسلم لسانش سمّعينا ياعباير ونسينا
عباير وهي تعتدل بجلستها تربعت زين وشدت ظهرها وهي رافعة طرف انفها وبثقة:يقولك ياابو نشمي يابحر لا تعانـ
الجد بادي التفت عليها وهو بتخرج عيونه من مكانها من اللي سمعه
.
.
.


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 25
قديم(ـة) 07-10-2019, 06:22 PM
صورة هــــدبــــ خــجــلانــــ الرمزية
هــــدبــــ خــجــلانــــ هــــدبــــ خــجــلانــــ غير متصل
©؛°¨غرامي مبدع¨°؛©
 
الافتراضي رد: رواية ياسمح المحيا جر الهجـينية/بقلمي


سلامـــ

كيفكم
تسلم يمينك علــ البارت الحليوووو
بس ـقصير يخلص بسرعه 😣


بتــالــ
ايش السر الي مخبيه
شكلو راح يسافر برا
درس طب هوا يعني


عبايـــر
لحد الان مابان الحكايه مالتهم
مستغربه حدي منها


مطلق
استنجدت انو يحب عباير
او كان
بس ليه ماشهد معها
فيه لبس في الموضوع
ومشاكله مع هليل وغيث


جواد
ياذ الادمي الي يرفع الضغط
حتا ضميره ما يأنبه

ماافتهم لي موضوع ان بتال بيقلد
جسار مافهمته خالص

نريد بارت باسرع وقت اذا ممكن 😍

تحياتي
😍بانتظارك



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 26
قديم(ـة) 10-10-2019, 12:01 AM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية ياسمح المحيا جر الهجـينية/بقلمي


،،الـجـزء الـتـاســع،،
اللهم صل وسلم على نبينا محمد
سبحان الله،الحمدلله،لاإله إلا الله،الله اكبر،لاحول ولاقوة الا بالله
.
.........****..........
بيت مسفر
ابو جواد بعصبية:انطق من هن اللي ناوي تذبحهن؟!
ام جواد وقفت:صل ع النبي وتعوذ من ابليس
ابو جواد ماطالعها عينه على جواد
جواد:محد يبه محد!!مين اللي اذبحه وابتلي عمري به!!
ابو جواد بحدة:لاتستغفلني ياجواد!!لاتاخذك أوهامك لبعيد وانت تشوفني على كيفك!!ولاتظن اني غافلن عنك وعن دانة!!
،،الكل التفت يطالع جواد ينتظر تفسير ورد منه،،
جواد:يبه انا ودانة
ابو جواد بصوت عالي وعصبية:اقطع لااسمع لك صوت!!انا ودانة!!هاذي تربيتي اجل!!ياحيف والله!!ليتني رازك عند عمك حتى تعرف ان الله حق!!
جواد:يبه انا ودانة نبي نتزوج على سنة الله ورسوله ماسوينا شي غلط!!
ابو جواد:ابد طال عمرك مامن غلط رايتك بيضا!!الغلط راكبني كلي!!
جواد زفر:محشوم يبه محشوم
ابو جواد:وين الحشيمة وانت تتضحك معها بوسط أسياب المستشفى وانت ماانت بمحرمٍ لها!!
جواد:يبه هي خطيبتي وانا خاطبها من أهلها مافيها شي اسولف واطلع معها!!
ابو جواد اتسعت عيونه وهو يسمع كلامه وكانت الصدمة واضحة على امه وخواته:ياسلاااام!!ودامك خاطب وخالص وشو له تعلمنا رح وتزوج ولاجاك بزر ارفع السماعة وعلمنا انك تزوجت وعيّلت!!
جواد:لاتزعل مني يبه،،التفت لامه،،ولا انتي يمه،،طالع ابوه،،لكن انا ادري بك يبه انت ماتطيق دانة واكيد ماتبيها نصيب لي وامي تبي تزوجني على ذوقها وانا ابي اتزوج عن حب ولقيتها وخطبتها قبل يسبقني احد وكنت ابي أكلمكم البارحة لكن اللي صار خرب كل خططي يبه
ام جواد وهي تناظره بتعصيبة وودها تنفجر
ابو جواد بسخرية:صدق!!تبي تعلمنا!!ليش!!انت خلاص قضيت!!امورك وخلصتها رح توكل!!
جواد:يبه انا ماراح ابدي حياتي وأنتم مو راضيين علي ماراح اتزوج دانة الا بوجودكم
ابو جواد:تبطي عظم والله ماجيته وهي مرة لك
جواد بقهر:يبه!!
ابو جواد:انا ادري هالهرج ذَا كله مو بكلامك ابد وبعد ادري انك تسوقها علي ياجواد لاخطبتها ولا شي هالبنت تبي تجبرني أوافق لكن معصي والله ماتاخذها وان خذيتها ياجواد ماني براضين عنك،،مشى بخطواته السريعة طالع الدرج متجه لغرفته،،
جواد بصوت عالي:يبه حرام عليك!!حرام تحرمني من الشي اللي ابيه حرام!!
ام جواد وقفت قباله وبقهر:يالثور ولاتكفيك بعد حتى حمار قليلة فيك
جواد توسعت عيونه:يمه!!
ام جواد بقهرها:عمرنا مارديناك عن شي تبيه ابد لا انا ولا ابوك!!ولو جيت وتكلمت رحنا وخطبناها لك حتى لو إنا عايفينها هذا اولها ساقتك وراها الله يكفينا شر تاليها،،مشت،،
سهام وهي تعض طرف شفتها وتطالعه بقهر:ماغلطت شذى يوم تقول عنك خايس
جواد بعصبية:سهااام!!
سهام:يالخايس انت استكثرت على امي وابوي يفرحون فيك!!
جواد بحدة:سهام اذلفي عني
سهام بقهرها:قسم حلال فيك اللي بيصير بك لو اقول لعيال عمي بسواتك اللي البارح،،مشت،،
شذى مشت وراها وهي تطالع جواد بنظرات كلها قهر من كلامه
جواد طلع الدرج متجه لغرفته بخطوات سريعة وهو يدف أخواته عن طريقه وأخذ مفاتيحه ومحفظته ثم خرج من غرفته وخرج من البيت كله
.........****..........
،،توتر جو الجلسة والكل التفت عليها يطالعها،،
عباير بلعت ريقها وهي تصرّف الغلطة بكلام من عندها:يقول يابحر جدة وياأهل الطايف عسى
الجد قاطعها وبعصبية وبضيق خاطر:مانبيه شين فيه بحر اقطعي طرياه
عباير بفزعة:أبشر وانا بنت متعب،،غنت بصوتها المتواضع وهي تسحب الطشت وتدق به وسط حماس وضحك حلايا اللي فزت من حضن جدها وبدت تتمايل بجسمها الصغير على انه رقص وأنغام عباير ملت الكل بهجة وسرور لخواطرهم،،
مـريـت بـيـتٍ لـلـمـحـبـيـن مـقـفـول..
وجـابـتـنـي الـقـدرة عـلـى حـد بـابـه..
ونـشـدت جـيـرانـه عـسـى الـبـيـت مـنـزول..
قـالـوا حـبـيـبـك راح لا وأسـفـابـه..
ولـه مـدةٍ بـالـسـوق مـاشـيـف لـه زول..
وبـابـه عـلـيـه مـن الـسـوافـي تـرابـه..
وهـلـت دمـوع الـعـيـن والـقـلـب مـشـغـول..
وعـنـد الـفـراق الـلـي حـصـل فـي غـيـابـه..
وأقـفـيـت والـلـي بـيـن الأضـلاع مـجـهـول..
حـبٍ درسـتـه غـيـب مـاهـو كـتـابـة..
عباير وهي تنزل الطشت بالأرض:وسلامتك ياابو نشمي
حلايا:من زديد يابعاير زديد
عباير ضحكت وهي تطالعها:خلصنا ياحلاوة ياحلوة الخد انتي،،طالعت جدها،،اقول جدي
الجد بادي اللي اخذته أغنية عباير لارض ذكرياته اللي لاعباير ولاإخوانها موجودين فيها بطيف ابتسامة مرتسم على ثغره وهو سرحان بذيك الذكريات صحى على صوتها والتفت يطالعها وبهمس:هممم
عباير:أعلمك من هو راعيها؟
الجد بادي ابتسم وهو عنده علم بصاحب القصيدة:من هو؟!
عباير:خالد عبدالرحمن
سعود اختفت ابتسامته ووناسته بعد ماسمع كلام عباير
بخوت جالسة قباله تساعده بالذبيحة عقدت حواجبها مستغربة منه وقف شغل واستغربت فوقها التفاتته لعباير وجدهم وعرفت ان عباير جابت بهم العيد
الجد بادي قطب جبينه:من هو ذَا؟
عباير باستخفاف لكلامها:خالد ياجدي الشاعر خالد عبدالرحمن ماغيره،،شهقت وهي تبتسم..ماتعرفه؟!!
الجد بادي سكت وهو يطالعها بشك
عباير بوناسة:الحمدلله بعد عَنَى عرفت شاعر ماتعرفه ياجدي!!
بخوت بنفسها:حسبي الله على عدوك ياعباير فضحتينا!!
الجد بادي:وش هو من لحية؟
عباير:يقولون يقولون والعلم عند الله من الدواسر
سعود زفر وهو ينزل السكينة وبنفسه:حسبي الله عليك ياعباير!!
الجد بادي طارت عيونه وانفجر عليهم بصراخ:من الدواسر!!
.........****..........
بيت عادل
،، عند غازي وعذاري،،
غازي واقف قدام التسريحة يقفل ازارير ثوبه
عذاري وقفت جنبه وهي فيها نوم
غازي ابتسم وهو يمد يده اليمين وسحب عطرها اللي تحبه من عالتسريحة ومد لها
عذاري كشرت بوجهها وهي تطالعه
غازي سحبها لقدامه وهو يرجع خطوة وحدة بس لورا مبتعد فيها عن التسريحة وصار وجهها ع مراية التسريحة وظهرها ملاصق صدره وهو يحاوطها من خصرها بيده اليسار ثم ابعد يده عنها بمسافة بسيطة ورش العطر عليها
عذاري تكتفت وهي تطالعه بالمراية وتميل فمها بزعل
غازي ابتسم وهو يضمها له اكثر ويحاوطها بيديه الثنتين ويطالعها بالمراية:للحين زعلانة؟
عذاري تطالعه ساكتة
غازي:قلت لك ابشري بالعوض وانا عند كلمتي
عذاري ماردت
غازي اختفت ابتسامته وهو يكتم نرفزته مايحب هالاسلوب ولا هو متعود يتعامل بلين زيادة معها ضغط عليها بخفة وهو مستقصد يوجعها
عذاري احتدت نظرتها:اااه!!
غازي:قلت لك أبشري بالعوض وش اللي مزعلك!!
عذاري:غازي عورتني!!
غازي:طيب ردي علي
عذاري بحدة:متى هالعوض ان شاء الله؟!!
غازي أرخى يديه وهو يرجع يبتسم:قريب ان شاء الله قريب وجدا بعد
عذاري طالعته وبنفسها:لارضى عمنا الشايب ها ياغازي
غازي تنهد وهو يتركها ثم مشى وجلس ع طرف السرير وهو يقلب بجواله
عذاري بتردد:غازي
غازي رفع عينه عليها يطالعها
عذاري:ابي اروح لاهلي
غازي قطب جبينه:البارح وعمتي عندك!!
عذاري:امس مع اللي صار راحوا بدري وانا اصلا كنت مشغولة ماشفتها زين
غازي تنهد:ان شاء الله بس شوي بالليل وبتباتين عندهم بعد
عذاري شقت وجهها الابتسامة:صدق؟!!
غازي ابتسم لابتسامتها:ايه صدق
عذاري باسته ع خده:مشكور مشكور ياغازي
غازي يطالعه بنص عين:اللي يشوفك يقول حارمك منهم!!
عذاري:ماتقصر ياغازي رايتك بيضا لكن مشتاقة اجلس مع امي بدون ازعاج احد
غازي وقف:باتي عندهم الليلة واشبعي منها مثل ماتبغين،،وهو يمشي بيخرج،،تبين شي؟
عذاري:سلامتك سلامتك ياغازي
غازي خرج وهو يزفر بتوتر وقلق
.........****..........
بيت عوض
ابو فارس:عتيقة عينتيه اليوم؟
ام طلق:لا ماعينته بس هالزعول رقد ومشى قبل تطلع الشمس
ابو فارس تنهد:الله يصلحه خليه لاتطرين له شي
ام طلق:لاتنفخ راْسه ياعوض الولد كبر راْسه من علومك خله يزعل وينرض ثم يرضى
ابو فارس تنهد:ياعتيقة حرام عليش لاتزيدينه الولد ضايقن خاطره وانتي تغبنينه فوق ضيقته
ام طلق زفرت:مشكلتك ياعوض رحوم زيادة انت هاوشه وأنهره الدنيا ماهي بجايتن على كيفه ومايبي!!
ابو فارس:وانتي لاتصيرين عليه انتي امه!!
ام طلق:وعشاني امه ماابي له القهر!!القهر يسوق للمقابر ياعوض!!
.........****..........
،،عند بادي واهله،،
عباير فزت وهربت عن جدها لسعود
الجد بادي وقف:وش عرفك بهم!!ها!!هالقصيدة لسليمان ابن حاذور يالكذوب ثم إنش تمورقينها(تكذب عليه)على كيفش معصية ياعباير معصية!!
عباير من ورا سعود:طيب ياجدي ليش معصب لسليمان لاتزعل علينا لسليمان ابن حاذور هذاني عرفت لاتزعل
الجد بادي بغبنة:ومن قال اني معصب عشان القصيدة لاعادت!!،،طالع سعود بحدة،،من وراي ياسعود!!من وراي؟!!
سعود:ياجدي انا ما
الجد بادي بعصبية وهو يمشي له:معطيهن وانا محذرك!!تعصاني تكسر كلامي ياسعود!!
سعود:محشوم ياجدي محشوم
الجد بادي وقف قباله:كم مرة قايل لك هالبلاوي ماتدخل بيتي ياسعود!!كاني رضيت بهالبلوى اللي تومض(قصده التلفزيون)ذَا كله عشان حلايا وتالي عافته حلايا ماعاد تطالعه،،بقهر،،وعرفت الحين ليش عايفته!!
سعود:ياجدي انا مابغيت اكسر خواطرهن هن ماهن بمعششات عليه(يعني يأخذ وقتهم)شوي وبيتركنه
الجد بادي وهو يدفه من كتفه بطرف سبابته اليمنى:لاصارت الولية وليتك والبيت بيتك سو اللي تبغاه محدن برادك ياسعود لكن هالحين انا الوالي،،طالع بخوت بحدة،،هالمواخيذ(يقصد الجوالات)ماتطب بيتي وأول مانغدي يم البيت تسلمونهن وانتن ماتشوفن الدرب!!
بخوت سكتت وهي تنزل عينها بالأرض
عباير تطالعه بقهر وهي تتشكى بينها وبين نفسها
سعود:أبشر على امرك أبشر
الجد بادي بعصبية:اعجلوا علينا ماصار غدا بنقيّل وأنتم للحين!!
.........****..........
بيت عادل
المطبخ
امجاد ورهايف يجهزون الفطور
ام غازي تصب القهوة اللي جهزتها على ذوق عمها بالثلاجة ثم التفتت عالبنات اللي يجهزون وراها:سريع سريع خلصوا تعرفون أبوكم مايحتاج بروح اتطمن على بتال وراجعة لكم،،مشت،،
رهايف وهي تفتح الحافظة وتطالع الفتة اللي بداخلها:اخليها بالحافظة ولا أوزعها؟
امجاد وهي توزع باقي الفطور بالصحون:اتركيها بحافظتها بعدين تبرد ويقوم علينا ابوي
رهايف قفلت الحافظة ولفت متجهة لدولاب المطبخ تجهز أغراض القهوة معطية امجاد ظهرها:امجاد
امجاد قاطعتها بدون لاتطالعها:مايحتاج تقولين شي انا غلطانة بعد
رهايف ابتسمت:اصلا ماكنت بتكلم بذا الموضوع اساسا!!
امجاد:ايه صدقت!!
رهايف:باقي يوجعك مكان الضربة؟!
فيصل دخل:تصافيتوا؟،،ابتسم،،الحمدلله عالسلامة!!
امجاد مدت له من الصحون:يالله يالله بسرعة عند ابوي لايحطك مكان الفطور وتصير الفطور
فيصل أخذ الصحون منها
رهايف التفتت وهي مبتسمة:والله تخيلتك صراحة!!يابتصير مفطح على مستوى ياولد!!
فيصل مد رجله يضربها بشويش
رهايف:وربي لاشكيك لبتّال وتمردغ على يدينه!!
غازي دخل وشال صينية القهوة:فصيل اترك خواتك لاأمردغك الحين
فيصل وهو يمشي:اصلا انا الضعيف بينكم يالوحوش!!
رهايف وهي تضحك:خف علينا يالحشائش يااضعف مخلوق بالسلسلة الغذائية!!
امجاد وهي تدفها:اتركيه عنك والله ينرحم بينكم
رهايف بتردد:امجاد
امجاد عقدت حواجبها وهي تطالعها:نعم!!
رهايف زفرت:خلاص خلاص
امجاد تطالعها بشك:قولي وش عندك؟
رهايف:شفتي بتال البارح؟
امجاد توسعت عيونها:سلامات!!كلنا سلمنا عليه!!
رهايف:قلت لك خلاص،،مشت قدامها،،تعالي بس نفطر
.........****..........
بعد الفطور اللي اعتبره الجد بادي غدا ولاهو فطور حركوا راجعين للديرة وأول مادخلوا الديرة الجد بادي اشر بيده لسعود بمعنى أوقف
سعود وقف بالسيارة على امر جده والتفت ورا يتطمن على بخوت بنظراته
عباير جالسة وبحضنها من اليمين حلايا وبوسط حضنها بخوت
بخوت دافنة وجهها وسط حضن عباير وهي ترجف وتحس قلبها بيخرج من مكانه من خوفها
عباير تسمي وتقرأ عليها كل ماحست برجفتها تزيد
سعود طالع لقدام وهو يزفر بهم من وضع بخوت
الجد بادي طلّع راْسه شوي من القزاز وهو يشوف ولد صغير من عيال الديرة ابتسم:تعال ياباسل تعال
باسل طالعه شوي متردد ثم مشى وتركه
الجد بادي استأنس اكثر ووضح على وجهه
سعود قطب جبينه من ردة فعل جده ثم ابتسم وهو يمر بباله فكرة مو مستبعدة عن جده
الجد بادي:ياولد ياسعود
سعود:سم ياجد
الجد بادي بابتسامته:عجّل علينا خل نلحق القايلة
سعود:ابشر ابشر ياابو نشمي
.........****..........
بــعـــد صـلاة الـمـغـرب
.........****..........
مر اليوم كله على بيت عادل بهدوء الكل مشغول باله مع بتال اللي نايم ولا صحى وهو اخذها فرصة يرتاح وينام نومة الهنا
..بيت الشعر..
،،الجد والجدة وعذبة وأم غازي وغازي وفيصل وأمجاد ورهايف بعبايتهم لان راشد كالعادة معهم وكلهم مجتمعين،،
الجد نشمي:وشلونه بتال ياوسمية؟
ام غازي بنقابها عشان راشد:ان شاء الله انه بخير ياعمي
الجدة منيرة:ماكنه أبطى؟
فيصل وهو يتقهوى:الا عجبته الراحة وماهو ناوي يقوم
غازي جالس جنبه ضربه ع قفاه:وش لك انت؟!!محد كلمك!!ليش اللقافة!!ياشينك
جسّار وهو يضرب صدره:ابشروا بواجبكم ابشروا بسلامة بتال ابشروا بالعشا وانا ولد ابوي
،،الكل انصدم منه،،
غازي باستغراب:وش الطاري؟!!
راشد بسرعة وهو يطالع جده:شاهد ياجدي شاهد تكفى اشهد عليه ياجد تكفى
رهايف:يمه حلفتك اشهدي تكفين قبل يجحد القعيطي(بخيل)تكفين يمه
عذبة:كلنا شهود ياعين امك لاتخافين يارهايف شهود على هالقعيطي
جسّار حط يده ع صدره:اااه جرحتوني مشاعيري تنزف بشدة
فيصل:ماتطيب ان شاء الله اهم شي العشا عليك وخلصنا
حصة دخلت وهي تنزل طرحتها:السلام عليكم
جسّار فز واقف وبابتسامة وهو يفتح يديه يستقبلها وبترحيب حار:ياهلا والله ياهلا عدد الحجر والشجر والجراااااد اذا انتشر بالسنة عيدين واليوم ثالث ياهلا بحصيص ياهلا
حصة كشرت بوجهها وهي تسلم عليه وبشك:الله يحييك
جسّار:ياهلا بحصة ياهلا بام رامي
حصة وهي متجهة لابوها وامها:الله يستر منك الله يستر منك بس،،سلمت عليهم ثم نزلت عبايتها وشنطتها بطرف المجلس ثم رجعت تجلس جنب عذبة،،
بتال دخل بوجهه اللي منفوخ من طول نومته وبابتسامة:السلام عليكم،،اتجه لجده وجدته سلم عليهم ثم امه ثم الباقين وجلس بين جده وامه وبعد السؤال عن الحال والكل تحمد له بالسلامة،،
جسّار:ومثل ماوعدتكم ابشروا بالعشا
راشد مو مصدق ان جسّار بيعشيهم وهاذي الحادثة تدخل ملف انجازاته قرصه بفخذه يتأكد
جسّار توجع:بلا!!وش فيك علي!!
رهايف:تكفى افلقه راشد خلنا نتأكد انه بوعيه مو يجحد اذا خلصنا الطلب
بتال ابتسم وهو يشوفهم
غازي احتدت نظرته وهو يطالعها
رهايف صدت بوجهها عنه
جسّار:مثل ماوعدتكم بأعشيكم الليلة وانا لها مايبقى بخاطركم شي كلن يقول وش بخاطره،،التفت لحصة قبل يتكلمون،،يدك عالفلوس ياحصيص!!
عذبة انفجرت تضحك:لاعز الله عيّنا خير الليلة!!
حصة طارت عيونها:وش هووو؟!!
جسّار وهو يمد يده وبتشديد عالكلمة:الـ.ـفـ.ـلـوووس
حصة بقهر:ياعساك بالفلس اي والله!!
الجد نشمي ضحك بخفة وسط ابتسامات الباقين
ام غازي:اهبي ياحصة حرام عليك تدعين عليه!!
حصة تطالعها:فلسني ولدك ذا ولا يملى عينه!!،،طالعت جسّار،،وبعدين خير خير وش علي منك انا!!ملزومة بحلوفك!!تحلف وانا ادفع عنك!!
رهايف:كنت دارية انك ماانت بوجه عزايم
راشد:وش تنتظرين منه!!باقي امل عندك!!القعيطي قعيطي!!
فيصل:مالي شغل انت قلت ابشر بالواجب وملزوم فيه لو انك مطفّر
جسّار وهو مطنش حصة ويطالعهم:مين اللي قال بيطير واجبكم!!الحق واصل واصل وواجبكم بيجيكم اطلبوا بس
حصة:انا ابي سوشي من***
جسّار طالعها:احسبيني معك وصاحب المناسبة معنا والباقين مفطح ويدك عالقرنقش
حصة:جسّاروه وبعدين معك!!الى متى مبلشني فيك؟!!والله لو انك واحد من عيالي ومضيعته!!!
جسّار:يحصلك انتي ولد مثلي!!انا مافي مني اثنين ابد!!،،غمز لها،،وبعدين نسينا ياحصيص نسينا!!،،ثم طالع الباقين،،المهم عمتي حصة بتدفع العشا الليلة كلن يطلب اللي نفسه فيه حلفت عليكم مايردكم شي
حصة بتنفجر منه:ليش ياالمتبّلي!!وانت مو توك تقول بتعشينا
جسّار:ايه ابي اعشيهم بس شفتك وهونت
60
.
~
حصة:اعوذ بالله منك وليش ان شاء الله؟!!الى متى وانت تهون تدفع كل ماشفتني؟!!
جسّار بنص عين:نسيتي ياحصيص نسيتي!!يوم انك عيدتي على غازي وبتّال واحد بعشرة والثاني خمسة وانا عطيتيني حلاوة البقرة الملونة اليابسة اللي تنشب بالأسنان نسيتي!!
حصة بقهر:لاعاد من عيد اي والله
عذبة:اعوذ بالله منك ياحصة
حصة زفرت:استغفر الله العظيم استغفر الله بس!!جسار يالظالم يالجاحد ذيك العيدية طلعتها مع خشمي ولانسيت!!
جسّار شهق:اههههيييي!!وشو لا والله ماشفتها للحين!!
حصة:اهب يالكذوب!!انت يالمقوي مايضيع لك حق!!طلعت هالعيدية من عيني اول شي سويته رميت الحلاوة بوجهي وقلت خليها لك ماابيها
جسّار:وانا الصادق تعطيني حلاوة وهم فلوس وانا عزيز نفس
بتال شرق بالقهوة وهو يطالعه
جسّار تنحنح وهو يطالعه بنص عين:وعزة نفسي ماتسمح لي اخذ من احد شي!!لو هو ريال مديتيه علي راضي به ماني بقايل شي!!لكن ماخفتي ربك فيني ولا بيوم العيد بعد!!كسرتي برائتي راحت براءة الأطفال اللي فيني صرت في ضياع من ذاك اليوم
حصة:اقول هيه انت العيدية اللي ذالني فيها ذي اخذتها ومو دبل واحد تدبيلات من ظهري مافيه عشا ولا غدا ولافطور ولا أي بلعة بالحياة وانا معك الا تدبسني فيها!!
جسّار:الحمدلله حسيتي!!شفتي وشلون كسر الخواطر شين!!
حصة وقفت وهي معصبة واتجهت لشنطتها واخذت محفظتها منها ومشت له وقفت قباله وطلعت ريال ورمته بوجهه:خذ عيديتك اللي نشبت لي فيها لاعادت!!ولاعاد اشوفك توطوط حولي!!
جسّار رافع راْسه لها يطالعها:ننععععممممم!!!!
حصة:هاذي عزة نفسك مو تقوله!!!لو هو ريال راضي به!!
جسّار:هذاك اول يوم اني بزر!!ولا وقف فيك الزمن بوقت ذيك العيدية!!ماالومك ذابحك الندم اللي سويتيه مو بسيط
حصة تخصرت:كم تبي وتفكني منك؟مية؟
جسّار توسعت عيونه:وش مية!!!
رهايف وراشد وفيصل مركزين بالنقاش لاقصى حد لان السالفة فيها عشا وبالذات رهايف لان اذا مو فيه هي بتطبخ
حصة:اجل كم؟!!!
جسّار:والله انتي تدرين نفسي عزيزة مااقدر احدد
حصة:ياالخراط وربي
جسّار وهو يشد ظهره بجلسته ويعدل ثوبه:بس ابي البطاقة الزرقا بس
حصة تطالعه:أهب ياوجهه!!حاط عينك على فليساتي!!
جسّار:مو تقولين تبينا نخلص موضوع العيدية!!
حصة:معصي!!والله ولاريال يالبخيل انا اعلمك!!
جسّار بتحدي:والله اخذها منك اخذها الله لايعوق بشر
ام غازي بتعصيبة:جسّار!!!
بتال:يكثر خيركم كلكم تكفيني المشاعر اللي وصلت منكم لمى تحمدتوا لي بالسلامة وواجب من وراكم يالاثنين بالذات ماابيه
حصة وهي تطالعه:ياروح عمتك انت وربي قليل اللي نسويه بحقك ياقطعة من قلوبنا
جسّار:ايه ايه اصلا انتي ماتشوفين غيره وانا حتى الريال كثير علي!!
حصة التفتت عليه وبسخرية:ياعزيز النفس ياعيني انت!!
جسّار:الحمدلله انك عارفة
الجد نشمي بابتسامة:هدوا هدوا وش ذَا!!
حصة بقهر:ماتسمعه يبه!!مغسول وجهه ذَا الولد
جسّار:كيفي والله وجهي وانا حر!!
غازي:جسّاروه!!
الجد نشمي بحدة:خلاااص!!الليلة العشا علي كلن يقول اللي بخاطره
جسّار:لا والله ياجدي ان ما
حصة قاطعته:انثبر انت!!،،طالعت ابوها،،كثر خيرك يبه ومعوض خير
الجد نشمي:وواجب بتال محد يقوم به غيري
بتال:يسلم رأسك جعلني فدا وكثر خيرك لكن والله مايكتب لي
الجد نشمي بزعل:استغفر الله!!
بتال بابتسامته:والله مايكتب لي شي عندكم كلكم هذاني بفضل وخير من الله طيب ولله الحمد
الجد نشمي زفر بعدم رضا
غازي ابتسم:خلاص ياجدي حلف وبتّال وتعرفه مايحتاج تزعّل نفسك
الجد نشمي:اجل دامك حلفت انا حالفت عليك بعد
الكل طالعه مستغرب
بتّال:إسلم ياجدي وأبشر
الجد نشمي ابتسم:سمعّني غزل عادل يابتّال
بتّال تغير وجهه وهو يلتفت بسرعة لامه يطالعها وسط الوجيه اللي تغيرت من كلام الجد نشمي
.
.
.


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 27
قديم(ـة) 11-10-2019, 03:34 PM
صورة هــــدبــــ خــجــلانــــ الرمزية
هــــدبــــ خــجــلانــــ هــــدبــــ خــجــلانــــ غير متصل
©؛°¨غرامي مبدع¨°؛©
 
الافتراضي رد: رواية ياسمح المحيا جر الهجـينية/بقلمي


مساكمــــ عوافــي
شخباركم
وجمعتكم مباركه


بارت حليوووووا
تسلم اناملك
كل يوم اقول راح ينكشف اللغز
بس ماكو فايده هييي
هههه

شي غريب فيها
والاهم القفله مين عادل مو هوا ابو غازي
غريبه والله

بتال
ياذ الي حكايتو معجباني
استغرب شو دا الشي الي
مخبينه ولاعرفت له


جسار
هههه البخيل
عن جد موقفو في البارت
يجنن يذكرني بعمي الصغنون
لا وحكايه الحلوا الي هي حليب
هههه


عباير واهلها
ليش حلايا كانت خايفه
لوين كانو رايحين
فيه شي فيهم كمان هذول

عباير لسانها مفحط ههه
ماتعرف تمسك شي
في لسانها ذا


طلق
صراحه يستاهل
مدري ليه حاقده عليه مع
انو ماسوا الي شي

وبالاخير
سلمتي


بانتظارك


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 28
قديم(ـة) 12-10-2019, 05:06 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية ياسمح المحيا جر الهجـينية/بقلمي


اقتباس:
المشاركة الأساسية كتبها هــــدبــــ خــجــلانــــ مشاهدة المشاركة
مساكمــــ عوافــي
شخباركم
وجمعتكم مباركه


بارت حليوووووا
تسلم اناملك
كل يوم اقول راح ينكشف اللغز
بس ماكو فايده هييي
هههه

شي غريب فيها
والاهم القفله مين عادل مو هوا ابو غازي
غريبه والله

بتال
ياذ الي حكايتو معجباني
استغرب شو دا الشي الي
مخبينه ولاعرفت له


جسار
هههه البخيل
عن جد موقفو في البارت
يجنن يذكرني بعمي الصغنون
لا وحكايه الحلوا الي هي حليب
هههه


عباير واهلها
ليش حلايا كانت خايفه
لوين كانو رايحين
فيه شي فيهم كمان هذول

عباير لسانها مفحط ههه
ماتعرف تمسك شي
في لسانها ذا


طلق
صراحه يستاهل
مدري ليه حاقده عليه مع
انو ماسوا الي شي

وبالاخير
سلمتي


بانتظارك
مساء النور والسرور
فعلا عادل هو ابو غازي
وجسّار باقي ماشفنا هباله
وبتّال نشوف وضعه مع الأحداث


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 29
قديم(ـة) 12-10-2019, 10:46 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية ياسمح المحيا جر الهجـينية/بقلمي


،،الـجـزء الـعــاشـــر،،
.
.........****..........
بيت الجد بادي
مجتمعين كلهم بالحوش عالقهوة بدون عباير
عباير طلعت من غرفتها وهي تجري ووقفت عندهم:بخوت قومي بسرعة قومي
بخوت رفعت راسها لها وباستغرابها:خير وش بش؟وش موحية؟!
عباير:مزون تقول الليلة عشا كبير يلم كل الديرة ببيت العلل
الجد بادي ابتسم
سعود لمح ابتسامة جده وميل فمه بشك
حلايا ابتسمت بوناسة وقفت وهي تنط:نلوح نلوح
بخوت بكره للموضوع:لا لا ماني بغادية يمهم انتي اغدي بروحش
عباير:والله ان تمشين ماهو برايش!!
بخوت:عباير فكيني والله ماني بناقصة هروج وبعدين جدي ماشاورتيه
عباير طالعت جدها:جدي نغدي يمهم؟
الجد بادي:روحوا وتونسوا وعودوا بدري لاتبطون
حلايا صرخت بوناسة:هييهههه
بخوت:روحي ياعباير الله يستر عليش
عباير ارتفعت حواجبها:وانتي؟!!
بخوت:انتي تونسي مع مزون وانا بأظلي بالبيت وحلايا معي وبأجهز العشا لجدي وسعود
عباير:وشو!!!!
حلايا كشرت بوجهها وفيها الصيحة
الجد بادي:بخوت ياعيني
بخوت التفتت لجدها:سم
الجد بادي:روحي مع اختش وانتي ادرى بفعولها
بخوت:بس ياجدي
الجد بادي:بخوت ياعيني اللي تنطق لش حرف اكليها كلها،،طالع عباير،،وهي ماهي مقصرتن معش بتاكلها عنش قبل تنطقين انتي
بخوت بصوت يرجف وهي تكبح عبرتها:ياجدي انا تعبت من هالعلوم اللي تغث احسن لي اقعد بالبيت ولااحد يغثني ولااغث احد بشوفته لي
عباير عضت طرف شفتها بغبنة وهي تسمع كلامها
الجد بادي مسك يدها وضغط عليها:انتي ماسويت شين حتى توزّين بالبيت!!هذا هو يمشي ويغدي محدن قاله عينك برأسك،،ابتسم،،ثم انتي يااطهر وأزين قليب تكدرين خاطرش وعمرش عشان حريّم ماهمها الا القيل والقال
بخوت ابتسم وسط لمعة عيونها وهي تطالع جدها:وحلايا؟!
سعود:معكن!!
بخوت:بس حلايا ياسعود ماينفع لها
سعود قاطعها وهو يطالعها عن طرف وهو يهز كاسة الشاهي اللي بيده:تبين تحسرين بها؟خليها تستأنس معكم
حلايا تطالع بخوت برجى لاترفض طلعة لهم مثل كل مرة
بخوت تطالعهم بتردد
عباير ابتسمت وهي تنحني وتمسك يد بخوت وتقومها:يالله يالله قومي مابقى شين عن الصلاة
حلايا ابتسمت ومسكت يد بخوت الثانية تقومها وهي مبسوطة
بخوت قامت بملل بعد محاولات عباير
عباير وحلايا جروا بخوت متجهين لغرفة عباير
سعود نطق اول ماشافهم دخلوا الغرفة وهو يطالع جده:أبشر ياجد
الجد بادي ابتسم:كفو ياولدي كفو
سعود بابتسامة:كفوك الطيب ياابو نشمي تربيتك انا
الجد بادي:اللي يتصدد عنّا وانا جدك
سعود بسرعة:نصدّ عنه
الجد بادي بابتسامة:ايه ايه صدقت لكن هالمرة ماحنا متصددين هالمرة بنسوي فعول عباير ياسعود
سعود قطب جبينه بعدم فهم
الجد بادي ضحك:ماخبرتك فديغ ذهن(يعني قريب من غبي مالقطها بسرعة)ياسعود
سعود:ياجد العلم واحد والمقاصد واجدة
الجد بادي مميل فمه بابتسامة:يتصددون الله لايردهم لكن بيت الله مايحق لهم يصدون فيه قم قم نصلي بالصف الأول لو حنا نزحمهم
.........****..........
بيت الشعر
بتال يطالع امه بوجهه اللي تغير وهو يحاول يسيطر عليه
ام غازي وقفت:امجاد رهايف الحقوني داخل،،مشت،،
امجاد ورهايف لحقوا امهم
الجد نشمي:جـرّ يابتال جـرّ واطربنا
فيصل وقف وطلع يلحق امه
عذبة:الله يهديك يبه بتال مريض
حصة:اَي والله يبه ماتمل من الشعر والهجينيات!!اترك بتال يتريح شوي
الجد نشمي:عاد انا مايطربني ويريح راسي غير بتال صوته عافية ثم انا ماسويت منكر حتى تزعلن!!
عذبة:محشوم ياابو عادل محشوم لكن المقصد بتال مريض
بتال يطالع امه لحد ماخرجت من البيت وهو يحمد ربه ان عماته يماطلون بجده:أبشر ياابو عادل أبشر بغزل عادل أبشر
الجد نشمي:سلمت سلمت ياحصيلة الغزل
بتال تنحنح وهو يسترجع ذكرى هالغزل بباله وغنى:
يـابـحـر لاتـعـانـد والـقـمـر فـيـك بـات..
هـون الـمـوج نـفـسـي زادت طـعـونـها..
يـابـحـر لاتـزيـد الـمـوج مـلا حـسـاب..
لاتـذكـر عـيـونـي بـنـظـرة عـيـونـهـا..
صـرت عـايـش وكـانـي فـوق مـتـن الـسـحـاب..
بـعـد مـالـفـوح فـاح الـحـب مـكـنـونـهـا..
وأنـا تـونـي شـبـاب ولـكـن الـراس شـاب..
صـاب قـبـلي الـهـوى لـيـلـى ومـجـنـونـها..
غـابـت عـيـونـهـا يـابـحـر والـبـدر غـاب..
هـون الـمـوج نـفـسـي زادت طـعـونـها..
يـابـحـر لاتـعـانـد والـقـمـر فـيـك ذاب..
هـون الـمـوج نـفـسـي زادت طـعـونـها..
.
.........****..........
بيت مسفر
سهام نازلة عالدرج وهي لابسة عبايتها وتقفل ساعتها
شذى طايرة وراها تنزل الدرج بسرعة:بعدي بعدي بعدي بسررررعة
سهام وهي تلصق بالجدار تترك لها طريق:خير خير يالمطفوقة وش عندك؟!!
شذى وقفت بنهاية الدرج وبابتسامة:رهايف تقول ان العشا كلن على كيفه يطلب
سهام:الحمدلله والشكر اللي يشوفك يقول مجوعينك!!
شذى:الحمدلله والشكر اَي والله بروح اجهز أغراض سهرتنا الليلة
سهام ابتسمت:سهرة
شذى وهي تطق رقبة بوناسة:سهرتنا الليلة خلوها صبّاحي
ام جواد وهي تنزل عالدرج بتأفف:عشان عمكم كل شوي نقصوا الصوت ولا اجلدكم!!
شذى:يمه يعني ماعرفتي عمي هو عصبي حبتين لكن والله انه عسل
سهام ضحكت وهي تنزل ووقفت عندها:لايسمعك بس
ام جواد:وينه اخوكم؟
سهام وهي تلف طرحتها:بسلامته ماشفته
شذى وهي تلف طرحتها:سيم
ام جواد بضيقة:الله يهديه الله يهديه هذا اللي أقوله
سهام:اتركيه يمه مردّه يرجع لنا ويعرف ان الله حق
ام جواد:لا ياسهام مهما يكون هذا اخوك وخليك معه مهما يصير
شذى بغبنة:حتى وهو غلطان!!
ام جواد بتشديد وسط نظرة حادة:حتى لو هو غلطان ياشذى
.........****..........
واقفة بجلابيتها الرمادي الواسعة بموديلها الطويل وبأكمام طويلة قبال مرايتها الصغيرة اللي بالدولاب وهي تقفل حزام الذهب الثقيل اللي محاوطته على خصرها فوق جلابيتها تكسر من وسع الموديل ثم اخذت عقد الذهب الثقيل هو بعد وكان عبارة عن ثلاث دواير عريضة مصفوفة بشكل طولي ويلامس طرف نهاية العقد الحزام طالعت نفسها وهي تمسح عالجلابية ترتبها ثم رفعت يمينها وهي ترجع شعرها الطويل المجعد بطبيعته ورا أذنها وهي مميلة رقبتها ولبست الحلق اللي بيدها اليسار وكررت الحركة باختلاف الاتجاهات للحلق اليمين زفرت وهي تنحني وتاخذ غوايشها(بناجر او معاضد)وكم خاتم من صندوق ذهبها اللي عالارض واعتدلت بوقفتها وهي تلبسها
بخوت فتحت الباب وحلايا معها:عباير
عباير التفتت عليها وهي ماتطالعها تلبس بخواتمها:ها ولمتي(جهزتي)؟
حلايا بفستان سماوي مناسب عمرها وشعرها الطويل المسدول لآخر ظهرها شهقت وهي تشوفها وجرت لها:بعاير
عباير رجعت خطوة لورا:ياويلش تلمسيني ياحلّوي خليني اتولّم(اتجهّز)زين
حلايا كشرت بوجهها بزعل
بخوت ابتسمت وهي تعرف عادة عباير:ماشاء الله ماشاء الله اشوفش مدّهرة بعمرش(مو مقصرة بشي على نفسها)الليلة؟
عباير طالعت مرايتها وهي تحط روج باللون الموف القريب للأسود اللي مو مناسب ابدا للون بشرتها الحنطية وبصوت غريب لانها تحط هالروج:لازم ادّهر ياعيني لأن العيون اللي ابي أعميها واجد ياعساش سالمة
بخوت كشرت بوجهها وهي تشوف اللون:طلبتك عباير غيريه يهّول(يخوف)
عباير طالعتها وهي رافعة حواجبها:وانا ابي أهّول بهم جعلهم بعاقور يتهولهم(يبهذلهم)
بخوت ميلت فمها مو عاجبها
عباير طالعتها وهي تتخصر:لايكون بتغدين بهاللون(بهالشكل)؟
بخوت ببتنورة سودا وبلوزة سودا ولامة شعرها كله بدون اَي اكسسوار او حتى نقطة مكياج طالعت نفسها بشك من كلام عباير:علامي؟!!
عباير:لابسة هاللون وتقولين وش فيني!!تراش منتي باقل منهم ثم خافي ربش يابخوت لااله الا الله عليش مايحتاج اقول شي وانتي ابخص بروحش
بخوت بابتسامة سخرية من نفسها:الله يرحم الحال ياعباير بس
عباير توسعت عيونها وبقهر منها:وليش ان شاء الله!!جسمش وتبارك الرحمن شعرش وقطعة من حرير وان طالعوش فانهم يطالعون البدر بليلة اربع طعش،،وبتعصيبة وهي تحرك يدها اليمين بوجه بخوت،،وش بش انتي وش بش؟!!
بخوت ضحكت وهي تحبس دمعتها كل اللي قالته عباير صدق لكن هي كرهت نفسها ماعاد تشوف الا السواد والكآبة:الله يقطع سوالفش ياعبيّر
عباير:ماهي بسالفة يابخوت هذا الصدق روحي والبسي القطعة اللي وصيت مزون تجيبها لش يوم انهم غدو يمّ مكة
بخوت توسعت عيونها وتلونت خدودها من خجلها وهي تذكر الفستان:واعيباه ياعباير من جدش تقولينه!!
عباير قطبت جبينها:وليش اشريها وأعطيش اياها ان شاء الله عسى بس تبين ترزعينها(تخلينه)بالدولاب!!
بخوت وهي تمسك خدودها بكفوفها:بس ياعباير
عباير ماانتظرتها تكمل كلامها مسكتها من يدها وسحبتها ومشت لغرفة بخوت وحلايا وراهم ثم دفت بخوت لغرفتها وهي تفتح الباب :يالله البسيه ماني متحركة الا اذا شفتش لابسته،،سكرت الباب بدون ماتعطيها مجال ترد وناظرت حلايا اللي واقفة جنبها:وانتي والمة؟
حلايا هزت راسها بايه
عباير:روحي يم المداسات(الجزم)وولمّي لي الأسود الطويل(تقصد الكعب)ولبخوت اللي يبرق(يلمع)ولش،،سكتت وهي تطالعها شوي،،اللي خاطرش به
حلايا جرت بابتسامة لغرفة سعود وهناك دولاب جزمهم
عباير ابتسمت وهي تطالعها ثم دقت الباب:ها وش علمش؟لبستي؟
بخوت ماردت
عباير فتحت الباب
بخوت اللي كانت معطيتها ظهرها لابسة فستانها الأحمر بقصة دائرية من الظهر باكمام طويلة مخصر قصير فوق الركبة بشي بسيط وباقي موديله كلوش لنص الساق وشفاف مع الجوانب ع خصرها لفت لها بسرعة وهي تمسك جوانب الفستان اللي مخصر عليها وبوجه متغير من الحيا
عباير تنهدت وهي تتجه لها:وش بش فزيتي ماني بماكلتش!!،،وقفت عندها،،
بخوت وهي تطالع نفسها مو مرتاحة للفستان:عباير والله ان يمنعوني مااطى خرسانة حتى(تقصد ماتدخل حتى لحوش البيت)
عباير وهي تلفها تتمعن الفستان بنظرها وقفت بخوت اللي معطيتها ظهرها وقفلت باقي سحاب الفستان ثم سحبت الربطة اللي ماسكة شعر بخوت
بخوت شهقت وهي تمسك شعرها قبل ينسدل ولفت على عباير تطالعها بعيون متسعة:عباير!!
عباير مسكت يد بخوت تفكها عن شعرها
بخوت انسدل شعرها الناعم اللي يختلف عن اختها وغطى ظهرها وهو يوصل لفوق ركبتها بشي بسيط
عباير بابتسامة:خلي الزين يكمل وانا اختش
بخوت بقلق:وش هالعلوم اللي بأغدي بها يم العرب!!
عباير بعصبية:وش عليش منهم!!ضربوا لش حساب!!ماحسبوش منهم وش له تحسبينهم انتي!!،،ابتسمت وحركت حواجبها فوق وتحت بخباثة،،الا الفحي بشعرش وبكل لفحة عطيهم وحدة(تقصد تضربهم بشعرها)
بخوت ضحكت بخفة:ماتمنعينا من سلومش
عباير ابتسمت لضحكتها:دامش بتضحكين ماني بمانعة سلومي عنش
.........****..........
..عند ابو غازي وابو جواد..
،،ابو غازي وابو جواد بزيارة لواحد من معارفهم ببيته مريض ويتحمدون له بالسلامة وطبعا موجود غيرهم ضيوف لنفس الغرض،،
ابو غازي برسميته المعتادة مع الكل:خطاك السو ياابو ياسر اخر الأوجاع ونهاية الاحزان
ابو ياسر:الله يسلمك ويعافيك ياابو غازي،،ابتسم،،الا نقول لك مبروك مبروك الله يجعله فال خير وعقبال اخوانه
ابو غازي عقد حواجبه وأبو جواد ماكان بعيد عنه بالعكس مستغرب مثله:الله يبارك فيك وبحياتك
ابو ياسر:بس هاه ياابو غازي نبي الحق حق الفرحة
ابو غازي:أبشر بعزك حقك واصل بدون هالفرحة انت بس شد حيلك وعلى هالخشم
ابو ياسر:كثر الله خير وتسلم يمينك لكن حنا كل اللي نبيه وقاصدينه ماهو الحق على كثر الفرحة
ابو جواد توتر وهو يشوف مو قادرين يوصلون لشئ من كلامه
ابو غازي:أبشر أبشر ياابو ياسر
ابو ياسر:والله ماظنتي نلحق عليه الظاهر بيسري(يمشي)قبل حتى نلحق عليه ونبارك له
ابو غازي تغير وجهه لصدمة وهو يربط صاحب الاتصال بذيك الليلة اللي مارد عليه ويمكن هو هذا السبب اللي يبارك له عليه الرجّال احتدت ملامحه وامتلى وجهه غيظ شد قبضته وهو يحاول يسيطر على رجفة الغبنة اللي يحس بها ماجا بباله غير شخص واحد ممكن يسوي اَي شي من وراه بدون خوف منه
ابو جواد وقف وهو يشوف ابو غازي وابتسم وطالع ابو ياسر:عاد حنّا نستأذنكم
ابو ياسر:تو الناس يارجال!!عليكم الله تجلسون وتتعشون معنا
ابو غازي وقف وهو يكبح غيظه مارد عليه
ابو جواد:عساك خيرك دايم وافر ياابو ياسر لكن خلها مرة ثانية ثم تركنا الوالد ووعدناه نبكّر برجعتنا له
ابو غازي مانطق حرف وهو كل تفكيره بس متى يوصل البيت
ابو ياسر زفر:الله ييسر لكم الله ييسر بس وعد تتعشون عندي
ابو غازي ماعاد تحمل اكثر ومشى بخطوات سريعة
ابو جواد انصدم منه لكن تدارك الموقف:أبشر بسعدك وقدامك العافية السموحة منك ابو غازي شايل هم الوالد استأذنكم ياجماعة،،اسرع بخطواته يلحق ابو غازي،،
.........****..........
سبحانك ربي استغفرك وأتوب إليك..
اللهم صل وسلم على نبينا محمد..
.
.
.


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 30
قديم(ـة) 13-10-2019, 12:46 AM
Fay .. Fay .. غير متصل
©؛°¨غرامي مشارك¨°؛©
 
الافتراضي رد: رواية ياسمح المحيا جر الهجـينية/بقلمي


أهلين و سهلييين ❤❤
قسم بالله كم مره أدخل هالرواية و اطلع ادخل و اطلع لين صدق قررت اقراها ، الحمدلله اني قررت لانها والله جمييييله جميل جداً 😭❤❤
مادري وين كان عقلي وانا اتراجع يالله يالله قد ايش حبيتها
كملي والله ننتظرك على أحر من جمر يختتييي أهنيك والله على روايتك ❤❤❤

الرد باقتباس
إضافة رد

رواية ياسمح المحيا جر الهجـينية/بقلمي

الوسوم
ط§ظ„ظ€ظ…ظ€ط­ظ€ظٹظ‘ظ€ط§ , ط§ظ„ظ€ظ‡ظ€ط¬ظ€ظٹظ€ظ†ظ€ظٹظ€ط©) , ط¬ظ€ط±ظ‘ , ط±ظˆط§ظٹط©(ظٹظ€ط§ط³ظ€ظ…ظ€ط­
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
مجلس الروايات للإستفسارات و الطلبات فقط [ الإقتراحات ممنوعة ] ؛ روح زايــــد روايات - طويلة 34079 11-10-2019 11:59 PM
رواية مجنونة وجننته الحمد لله/بقلمي فاطمة 2000 روايات - طويلة 47 13-06-2019 02:00 AM
رواية على حافة الانتقام للكاتبة / داليا {أجـمـَلُ إبتسآمـة} روايات - طويلة 9 22-10-2015 05:21 PM
رواية رفقا بي يا اهاتي /بقلمي شيــــ chichi مـــاء روايات - طويلة 61 11-09-2015 10:03 AM

الساعة الآن +3: 05:21 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1