منتديات غرام

منتديات غرام (/)
-   روايات كامله - يتم نقل الرواية هنا بعد اكتمالها (https://forums.graaam.com/152/)
-   -   رواية ياسمح المحيا جر الهجـينية/بقلمي؛كاملة (https://forums.graaam.com/632213.html)

rwuiit28 27-03-2020 10:52 PM

رد: رواية ياسمح المحيا جر الهجـينية/بقلمي
 
اقتباس:

المشاركة الأساسية كتبها مـادلــmadeleinــين (المشاركة رقم 31660473)
روايـــات تأخرتي علينا

ماتعودنا تقطعي 😀

يالله الحين ❤❤❤

rwuiit28 27-03-2020 10:53 PM

رد: رواية ياسمح المحيا جر الهجـينية/بقلمي
 
،،الـجـزء الـتـاسـع والـخـمـسـيـن،،
لاحول ولاقوة الا بالله العلي العظيم،استغفر الله العظيم وأتوب اليه
.
.
..عند غازي وبتّال..
بتال متربع وقباله النار وفنجاله مالمسه وعينه عليه بوسط أفكاره وهو يحاول يلقى حل والحل اللي بباله صعب
غازي جالس على يمين بتال ثاني ركبه ومحاوطهن بيديه زفر وهو قرب يخلص الدلة من كثر ماشرب من القهوة والحين بتال مانطق حرف وبطفشه يقصد من وراه استعجال لبتال:اجهز دلة جديدة؟
بتال التفت له وبشروده:نعم؟
غازي هز راْسه وهو يشوف وضعه:الله ينعم عليك!!
بتال ابتسم:ومن قال
غازي التف بجسمه كله لبتّال وهو يتربع بنفس الوقت يطالعه وبنرفزة:ماينفع الواحد يسكت معك!!اخلص قول وش عندك؟
بتال ارتفعت حواجبه:بالقوة!!
غازي بنبرة عالية:وش اسوي بك!!شفطت الدلة على ابو ان المرارة تجيب راسك وانت ماذقت المرارة وانا احشرتني(يبي الحمام من كثر ماشرب)
بتال ضحك:ارض الله واسعة!!
غازي:حلفت عليك!!
بتال التف بجسمه وصاروا متقابلين بالضبط ويطالعه بشك وسط ابتسامته:شكلك سمعت سالفة راشد
غازي بحدة:قل اعوذ برب الفلق!!خل عنك ماينمزح بهالمواضيع!!
بتال انفلت يضحك
غازي قطب جبينه بشك من هالضحك الغريب
بتال بضحكته الخفيفة:ذكرت راشد يوم اني انسحبت معه وضحك،،اختفت ضحكته وارتسم الوجع على وجهه،،عتبت عليه ليش يضحك والحين عرفت الضحك من قلة حيلة!!
غازي سحب فنجاله من قدامه وهو يكبه بسرعة ويصب اخر الدلة له ويمده له وسط تجهيمة وجهه
بتال بجدية:عمرك استحقرت نفسك؟
غازي نزل الفنجال وسط تقطيبة جبينه وهو يشوف سؤاله الجدي
بتال:طيب عمرك كرهت ملامحك؟
غازي ساكت يسمعه ويفكر بأجوبة لأسئلته
بتال:عمرك تمنيت انك تختفي ومحد يذكرك ولايتوجع بسببك!!
غازي:تسألني؟او تبي تجاوب لنفسك!!
بتال زفر وهو يرجع لوضعه ويطالع النار بهدوءه
غازي:تدري بأجاوبك اول شي ايه استحقرت نفسي وكثير
بتال التفت يطالعه باهتمام واضح
غازي:يوم اقرأ عن السلف الصالح واشوف وش قدموا وانا وش قدمت!!
بتال قطب جبينه بتكشيرة غطت وجهه
غازي:وايه كرهت ملامحي كل يوم
بتال اتسعت عيونه
غازي ابتسم:الى ماتزوجت ولقيت اللي تحب ملامحي على شيانتها
بتال ضحك غصب:معترف يعني بشينك!!
غازي كشر بوجهه:هذاك اول الحين انا متربع على عرش الجمال
بتال زفر وسط ابتسامة
غازي:وايه تمنيت اختفي ولاتذكروني ولاتتوجعون بس رحمتكم ادري ماتعيشون بدوني!!
بتال بابتسامة:اشوفك متقمص شخصيتي!!
غازي كشر:غصب!!ليل ولهب نار يلفح وجهك وانت توك واصل بعد خط لازم اضحك ولا بموت!!
بتال بابتسامة:والله مدري من اللي محتاج يفضفض انا ولا انت!!
غازي بجدية بعد استعباطه شوي على بتال:الشمس وصلت وانتظرت الظلام يتبدد بس اللي محتويه الظلام ماهمه وجود الشمس هالمرة ابد!!
بتال طالع النار:الشمس ماتقدر تسوي شي هالمرة
غازي باستغراب:ليش!!
بتال زفر:لان اللي قبالي نار!!نار احرقتهم وتركت وراها حروق صعبة!!كيف أدوايها وانا شرارة بعيونهم!!
غازي ضاع وسط كلامه ولافهم:يعني ماانت ناوي تقولي وش فيك!!
بتال بابتسامة وهو يلف شماغه على وجهه يذكر نفسه باللي سمعه وهو مانسى للحين وبدون لايطالعه:مافيني الا كل خير ياغازي مافيني الا الخير الحمدلله
.
.........****..........
يوم جديد
.........****..........
..بعد صلاة الفجر..
ابو غازي بصراخ وهو عالباب:بسرعة بسرعة!!وش ذا الميتة!!اخلصوا ولا والله مشيت وتركتكم!!
ام غازي وهي تلف طرحتها:وش فيك مستعجل!!خلنا نصلي وبعدها نمشي
ابو غازي:المغرب وحنا هناك مواعدين الرجال!!
ام غازي وهي تهز راسها:لاحول ولاقوة الا بالله!!يالله هذا احنا جاهزين
فيصل وقف عندهم وبنوم:يبه انا مااقدر اروح ابي أذاكر
ابو غازي اتسعت عيونه وصرخ:وشو!!
فيصل صحصح
ابو غازي:يالكذوب اللي ماوراك!!قل تبي تنام وتلعب ولا المذاكر بجهة وانت بجهة!!
امجاد وقفت وسلمت على راسها:صباح الخير يبه
ابو غازي زفر وبهدوء:صباح النور وين عباتك!!
امجاد:يبه مااقدر اروح عندي دوام والغياب بخصم
رهايف وقفت وهي لابسة عبايتها ومواصلة وبابتسامة:صباحووو
ابو غازي طالعها وهي لابسة:خليك محدن بيروح
رهايف كشرت:ليش!!!ابي اروح معكم!!
ابو غازي بتكشيرته:اخوانك محد بيروح تروحين ليش!!تضيقين المكان على راشد!!
رهايف كشرت بوجهها:طيب،،مشت ومرت من جنبه،،
ابو غازي بنبرة عالية:على وين!!
رهايف:بروح لجدتي!!
ابو غازي زفر:كلكم عند جدتكم ذا اليومين سمعتوا!!
.
.........****..........
أم جـلاجـل
.
..بيت بادي..
سعود جالس عند المشب يستغفر بينه وبين نفسه ويجهز القهوة لجده
عباير وقفت عنده لابسة عبايتها
سعود طالعها باستغراب:يم من غادية على ذا الصبيحة!!
عباير وهي تلف طرحتها وتلبس نقابها:جدي قبل انه يعدي يم الصلاة اوجس لاصكت براسي ريحة دلتك اشغل الددسن واحتريه يم عمي مصلح
سعود باستغراب:بروحش!!
عباير وهي تمشي للباب:ايه ابطيت عنه
سعود:تحرصي
عباير:زين زين،،خرجت،،
نشمي وهو خارج من غرفة سعود ومتجه له: يازين الريحة
سعود رفع عينه وطالع خاله اللي مو مرتاح له للحين
نشمي وقف عنده بابتسامة:ماقدرت انام وهالريحة تصك براسي
،،دق الباب،،
سعود وقف
نشمي:خلك خلك انا براعي اللي يم الباب
سعود:بلكنه ضيفن يريد جدي
نشمي:انا براعيه
سعود بإصرار:محدن يقوم بضيفان جدي غيري!!
نشمي زفر وهو يطالع الشك بعيون سعود وجلس عند المشب
سعود اتجه للباب:طيب طيب،،فتحه وهو يطالعهم باستغراب لكن حيا بالضيوف مثل عادته،،حياكم الله ياهلا يا
فاهد بحدة وهو يقاطعه:بادي وينه ياولد؟
..مـجـلـس الشيخ مناور..
،،بحضور مجموعة من كبار الديرة،،
غيث يطالعه بابتسامة
مناور:خير يابادي وش تريد؟
الجد بادي وهو يطالع مناور:كل خير ان شاء الله كل خير غدا يمي علمن البارحة،،طالع غيث،،انك تريد البنية؟
مناور التفت لغيث وسط وسع عيونه
غيث بابتسامته:ايه بنتي وتربى ببيتي وش لها ببيت الغريب!!
مناور صدع من اللي يسمعه وهو يشوف طيف مصايب جديدة بتجي
الجد بادي تنهد:وتم
غيث اختفت ابتسامته وهو يطالع بادي بصدمة
مناور يطالعه مصدوم مو مصدق اللي يسمعه
الجد بادي ابتسم وهو يطالع غيث:علامك!!البنت بنتك وانت تريدها وهذا حقك!!
غيث بصدمته:بخوت تخبر العلم!!
مناور اتسعت عيونه؛غيث!!!
الجد بادي بحدة:وانت وش عليك من بخوت اللي لك يمّنا حلايا هذا اللي يشغلك مالك بغيره!!
غيث انخرس من الصدمة مو مصدق
الجد بادي بابتسامة رضا وهو يشوف صدمة غيث:مير ان البنت على ماتخبرون اتروع لاأرعت زيلان الغُرب
مناور كشر بوجهه
الجد بادي:اريد غيث يلغي يمّنا كل إعصير(عصرية)يراعي رجل بخوت وبنيته ويتبخر منه بلكن تلين يمّه!!
غيث عض شفته بغبنة
الجد بادي بابتسامة:البنية طايرتن به وهو يريدها تقل انها قطيعة من قليبه مايدنى(مايحب)يراعيها مغتاظة!!
مناور بحدة وهو فاهم نيته:وثمّن؟!!
الجد بادي طالع مناور:على مااوحيتم!!البنية ماهي بغاديتن معه وأنتم خابرين أمورها!!وثمن أريدها تراعيه واتعوده ثمن تلفي معه يمكم وكود تليتوها قدام اهل الديرة وهو معيي عنها من مبطي الله العالم وش يسري بينهم من علوم لاارعوه يتلها وصياحها مالي هالديرة،،بابتسامة عريضة،،وأنت خابر الناس والقيل والقال يامناور وانا مااريد يمك وجسن شين ياشيخ!!
مناور يطالعه بتكشيرة
الجد بادي طالع غيث بابتسامة:اوحيت العلم ياغيث حتى ماتوجس عيّوا يردون يمي بنيتي!!،،مرر نظره عليهم وهو يتلفت،،حنا مانرد شرع الله ابدن الله لايسخطنا وهذاني اوجست العلم يمكم حتى كلن يعلمه ومايوجس اني عملت حرام،،طالع مناور بحدة وهو يرفع صوته،،وعييلي يعملون حرام
مناور عض شفته بغبنة
غيث يطالعه بحقده اللي بقلبه كله
الجد بادي بتشديد:اوحيت ياغيث؟،،بابتسامة،،كل إعصير تراعي بنيتك وشلون تعمل مع عمها؟
غيث بيوقف
مناور مسكه مايقوم وزفر:خير خير على ماتريدون ورايتك بيضا ماقصرت
الجد بادي وهو مالكي فنجاله ابد:عاد ودي اتقهوى معكم مير اني وراي امور العرس يالله نقضيها،،وقف وبابتسامة،،وحياكم الله بوقته جميع،،مشى وهو يرسم ابتسامة عريضة على وجهه،،
.
..بيت الشلة..
عذبة اللي جالسة بالحوش شابة النار البسيطة بس كم عوّد حطب وجالسة قبالها تتدفى عقدت حواجبها وهي تسمع صوت الباب:يالله صباح خير،،اتجهت للباب ومن وراه،،مين؟
غازي:ياعمة افتحي لي بموت من البرد
عذبة فتحت الباب بسرعة
غازي دخل وسلم على راسها وكما طريقه يجري للنار وجلس عندها
عذبة قفلت الباب ورجعت طريقها وجلست قباله:وينه اخوك!!
غازي وهو يتدفى:عند المستوصف اللي مافتح للحين الله لايعذبنا
عذبة باستغراب:ليش ماجا معك!!
غازي وهو يفرك يديه ببعض:يقول يحب يصبّح
عذبة:وعساك صدقته!!
غازي:ادري يكذب وش تبيني اسوي ياعمة!!
عذبة:ماعرفت شي؟
غازي طالعها ساكت
عذبة:ماابي ادري وش السالفة ابي اعرف هو بس طيب
غازي زفر وهو يطالع النار:اللي يثلج صدره وصدورنا ياعمة قولي امين
عذبة زفرت وهي تعرف غازي مستحيل ينطق حرف:امين امين ياغازي
.
..المستوصف..
بتال جالس مكان السواق داخل سيارة الإسعاف متلثم ومتكتف وهو ساند راْسه عالمقعدة غفى بعد تعب وإرهاق من كثر التفكير اللي ماتركه يذوق النوم فز من نومته بفجعة وهو يلتفت عاللي يدق القزاز
الجد بادي بتقطيبة جبينه المعتادة:اندر(انزل)
بتال نزل وهو يتوجع من هالنومة وطالعه بتردد
الجد بادي اتسعت عيونه:وين السلام!!
بتال اخذ نفس وهو يتقدم له ويسلم على راسه:صبحت بالخير ياجد
الجد بادي بقصد:صباح الرضا والتسليم
بتال طالعه ساكت
الجد بادي وهو يعطيه ظهره:اتبعني
بتال ماتحرك:دوامي اليوم ياجد،،بكذبه،،ومايصلح أغيب كثرت غياباتي
الجد بادي التفت يطالعه بتكشيرة:كم يوميتك؟
بتال قطب جبينه:نعم!!
الجد بادي:بأعطيك اليومية حقتك واغد معي
بتال باحراج:السالفة ماهي بفلوس ياجد!!مايصير!!
الجد بادي بقلة صبر وتهديد:بتغدي معي ولا احتري الراس الكبير بالمستاصف واتلّك من اذونك قدامه وهو يراعيك!!
.
..بيت بادي..
،،العشّة الخارجية،،
سعود جالس جنب خاله وضيّف فاهد ويوسف مثل اَي احد يستقبل ضيفه وهو ماعنده علم بهوية هالرجال اللي جالس جنبه
فاهد يتقهوى بهدوء وهو ينتظر بادي
نشمي يطالعه وهو على اعصابه
يوسف يطالع خاله وهو لأول مرة يشوفه بهالحالة:خال
نشمي بحدة وعينه على فاهد اللي قباله:انكعم يايوسف انكعم
فاهد رفع عينه لنشمي بعد ماكان يطالع فنجاله:علامك تكعم ولدي وهو ماعمل شي!!
يوسف اننصدم من رد ابوه
سعود اتسعت عيونه وهو يلتفت لخاله بصدمة من تعريفه المختلف عن يوسف
نشمي:ايه أكعمه(اسكته)دامه غدا بك يمنا!!والبلا انك مطاوعه وغادي معه!!
فاهد نزل فنجاله وبحدة:ماني بوغدن تسريه على ماتريد يانشمي!!
نشمي ضحك:راعوا من يوجس الهرج!!،،بحدة،،توجس هاللون وانت خابرن علومك وسواياك!!
سعود يطالع فاهد بشك وتكذيب لهويته اللي وصل لها
يوسف بصدمة من الكلام:خال!!!
فاهد:هذاك اول مااغدي يم هالديرة مير عقب العلم اللي خبرته معصي كود رجلي زلت عنهم!!
نشمي بصرخة:فااااهدد!!!
سعود طالع فاهد بصدمة من وجوده بعد هالسنين رغم اعتقادهم انه توفى!!
فاهد:ذا النوبة مااخطي برا الديرة الا ورجلي على رجله ولدي يغدي يمي يانشمي!!
نشمي:عّود دربك واقضب ارضك وكب عنك هالعلوم وانت خابرن وش بيعمل ابوي لو يرعيك!!
فاهد بصراخ وسط رجفة صوته:وهالولد؟!!
نشمي زفر وفاهد له الحق يطالب بولده:اصبر الى منّي اتخبر العلم يافاهد اصبر
فاهد بحرقة قلبه:ويظلي وسطهم وهو يوحي كل طارين شين!!
نشمي بقساوة قلبه:الطواري الشينة فعولك يافاهد وانت تجنيت عليه معك وذنبه برقبتك ليوم الدين وثمن لاغديت يمه وش تحتري من وراه!!
فاهد انقلب وجهه وهو ناسي لهالنقطة تماما
نشمي:بيتضحك يمك ويخمك لحضنه وهو مستانس!!
فاهد عض شفته بقهر من نشمي
نشمي:الا زينٍ كود ماتفل بوجهك!!
فاهد صرخ:نشمي!!
نشمي بحدة:هذا الصحيح يافاهد الصحيح ومابه غيره وثمن علامك تراعي ابوي واللي ربى ولدك بينهم بعويناتك!!!
فاهد كشر بوجهه
نشمي:كود انه موجسن يمك قليبك انهم مطعمينه الصرايم فانه راكبك الخطا من راسك لرجولك!!
فاهد عض شفته السفلية بغبنة من نشمي وكلامه اللي بمكانه فعلا
نشمي:الفعول الردية ابدن ماكانت من إشيم ابوي وعمي نشمي وحتى عادل اللي ماتريد توحي طاريه!!وكل ابونا عارفين وينه غادية هالعلوم يمه ومـن من(من مين)!!
فاهد بحدة وقهر:هذاك اول اول يانشمي!!
نشمي:مير الاول مايمحيه تاليك يافاهد!!كودك عودت ذالحين فانها بتغدي صرايمن قشرا فوق الصرايم اللي مابعد احدن خبرها!!
فاهد كشر بوجهه:كبها تغدي البلا يغذي يمي وانا راضين به!!ولدي ولدي مااريد يلفي يمّه لو هو كبر الذرة(النملة)
نشمي بحدة:ولدك محدن عمل به شي اغدا يم بيتك لامني اراعي الدبرة واعلمك
فاهد:ماني بغادين الا وهو معي!!
نشمي بعصبية:علامك ماتوحي الوجس!!اوجست يمك تصبر ثمن علامك متواثق ان الولد بيتخطفك(يتمسك فيه)!!بلكن الولد مايريد يمك شوف!!
فاهد وهو متقبل بهالشي وبضيقة واضحة على وجهه:ماعليه مرده يعود يم ابوه
نشمي عض شفته وهو يطالع فاهد المصر على رأيه زفر:اجل اوح العلم
سعود قاطع نشمي:والله اني منكعم عنك من خبرت العلم!!
فاهد طالعه باستغراب
نشمي قطب جبينه وهو يلتفت لسعود
سعود وقف وهو يتجه لاحد أعمدة العشّة اللي عن يمينه بالزاوية ومد يده للبندقية المثبتة فيها وهو ياخذها ويصوب على فاهد
فاهد كشر بوجهه وهو يطالعه
يوسف وقف بصدمة؛تعوذ من ابليس ياسعود
نشمي وقف وهو مصدوم من ردة فعله
سعود:غادين يمّنا ورا صرايمك اللي تجنت بنا من مبطي
نشمي وهو يتقدم له:سعود
سعود صوب على خاله
نشمي وقف وسط اتساع عيونه
سعود:لاتحسب انك خالي بأنكعم عنك يالكذوب!!
نشمي يطالعه بصدمة
سعود:مردك غريبن عني ماخبرتك الا من كمن يوم!!والشر اللي يغدي يمّنا اجزه من قاعته ولا يشقني هو من!!(يقطع الشر عن اهله مين مايكون)
نشمي سكت وهو يطالع جديته
سعود:مير خذ ربعك وطسّ برا الديرة قبل يعود جدي ولا هـلا ولا مسهلا لا بك ولا باللي معك
.
،،عند حلال بادي،،
عباير وقفت بالسيارة قبال الشبك قطبت جبينها وهي تطالع الغنم المهتاجة داخل الشبك من جديد بنفس الحالة
بتال اللي جالس بالصندوق عقد حواجبه وهو يطالع الغنم ونزل من الصندوق وهو يكلم عباير بدون لايطالعها:خليك بالسيارة،،مشى للشبك وفتح الباب وخرجت الغنم اللي تدافع بجنون تبي تهرب من الشبك باي طريقة وهو يسر لها طريق الخروج ودخل وسط عقدة حواجبه بشك فتح خزان الموية اللي داخل الشبك وتركه وهو يشوف مافيه شي واتجه لخزان الشعير وفتحه واتسعت عيونه وهو يشوف قطعة جلد الذيب الـلـي على فوق الشعير ويتخللها بعض الدم ودخل يده بسرعة وهو ياخذها ويطالعها مصدوم من وجودها بهالمكان ماحس الا بيد ضربت يده بقوة وطاح الجلد من يده عالارض
.
..غنم مصلح..
الجد بادي جالس قبال شبك الغنم بمسافة بسيطة وهو يحرك طرف مركوعه بالأرض بتفكير وسط تكشيرة على وجهه
العم مصلح اللي يخلص امور حلاله وقف عنده:اوجس العلم يابادي علامك؟
الجد بادي زفر:اوجست علمن شين ماله بدّ ابدن ولاني خابرن شين يرقعه
العم مصلح:مير هذا انت ماوراك غير العلوم الشينة ماهو بغريبن عنك!!
الجد بادي وقف بزعل:اَي بالله استاهل هالوجس!!
العم مصلح بابتسامة:علامك خنفرت!!
الجد بادي بحدة:مخطي من يتشكى يم احد مخطي،،مشى بخطوات سريعة،،
العم مصلح:بادي!!،،شهق،،علامك ياولد!!
الجد بادي بدون لايطالعه:اقض امور حلالك اقضها،،مشى متجه للحلال اللي مايبعد ذاك البعد عنهم،،
.
..عند السيارة بنهاية الديرة..
نشمي واقف عند مكان الراكب يتلفت وهو متوتر:اغد يافاهد وأقصر الشر!!
فاهد جالس بالسيارة ومانع يوسف يحرك ووجهه لقدام ولايطالع نشمي:ماني بغادي لامني اراعي الولد واغدي به يمي
نشمي وهو يفك شماغه اللي رابطه على راسه ويرميها بوجه فاهد
يوسف اتسعت عيونه وهو ماسك لسانه لاينفلت بعد اللي صار كله
فاهد غمض عيونه من ضربة الشماغ والتفت له بحدة
نشمي:يوم انك ناويها صريمتن قشرا دس(يخبي)ذا الوجه لاتغدي صرايم ماهي بصريمتن وحدة!!
فاهد بعناد:وانا غادين أريدها تثور محدن رايد منك معونة!!
نشمي بحدة:هذا انت!!توجس هذاك اول مير هذا انت يافاهد ماتبدلت!!
فاهد وهو يطالع لقدام بدون اهتمام:كود ان حقي بيغدي بعينك هاللون مااشقيتني يانشمي!!
نشمي بغبنة:اقلها كود بك خير كبني اعلم ابوي والولد اللي تطريه ماهو بتغدي يمهم وهم ماخبروا خبرك!!
فاهد سكت مارد
يوسف:يبه صدق خالي اصبر الا منه يعلمهم وثمن تراعي بتال اصبر
فاهد بحدة:انكعم ياولد لاهرجوا الكبارية ينكعمون الوغدان
يوسف كشر بوجهه
نشمي بغيظ وحقد من عناده:اغدا ولااحدن يرعيك من اهل الديرة وثمن نتواجه اخر الليل يم ديارنا اول قبل المنازيل(البيوت)واوجس العلم كل ابوه يمك
فاهد مارد وهو متكتف
يوسف شغل السيارة
نشمي ابتعد عن السيارة
فاهد التفت له وبحدة:اعقب يايوسف!!
يوسف حرك بسرعة بدون اَي اهتمام لكلام ابوه
.
..حلال بادي..
عباير نزلت من السيارة واخيرا فهمت اللي صار مع انها المفروض تفهم من اول مرة حصل معها هالشي وقفت عنده وهي تطالعه ماسك الجلد اللي يخالطه دم وضربت يمينه بيمينها بقوة
بتال طاحت قطعة الجلد من يده والتفت يطالعها بصدمة
عباير اللي واقفة جنبه وبينهم كم خطوة وبعصبية:امهبول!!تقضب جلد الذيب بيدك!!لو انه غدت يمنا السلقات(الكلاب)
بتال كشر بوجهه وهو يطالعها وبحدة:قولي اترك اللي بيدك وشو له تلمسيني!!
عباير انتبهت لنفسها وابتعدت عنه لورا بسرعة وهي تشوف قربها منه اتسعت عيونها وهي تلفت لباب الشبك اول ماوصلخا صوت نباح الكلاب وهالمرة الصوت يدل مو كم كلب والسلام الصوت يوحي بمجموعة كبيرة
بتال جرى لباب الشبك وهو يقفله عليهم اتسعت عيونه وهو يطالع عددها الكثير واللي صدمه اللي تسلق الشبك ودخل عندهم
عباير تجمدت مكانها بانهيار صامت وسط دموعها وهي تطالعه
الكلب اتجه لقطعة الجلد اللي جهة عباير
عباير صرخت برعب وهي تطالعه متجه لها ولاتحركت ابد
بتال جرى بكل مافيه ووصل بذات اللحظة اللي وصل فيها الكلب عند عباير ورغم انه ماوصل تماما الا انه رفع رجله وهو يوقف بينهم وشات الكلب بكل قوته على جنبه وهو فاهم ان الكلب يبي عباير
الكلب ارتمى عالارض وهو يأن بألم من شو بتال اللي طيرته لمسافة عنهم
بتال التفت بصدمة وهو يطالع الكلب الثاني اللي تسلق الشبك بدون ماينتبه له
الكلب الثاني هجم على يد بتال اليسار الأقرب له
بتال عض شفته بألم وهو يمسك راس الكلب اللي غارس لانيابه بيده ويحاول يفكه عنه
عباير جلست من الصدمة وهي تطالع بتال مع الكلب
بتال ماعاد قدر يكتم ألمه وصرخ بصوت وهو يحرك يده بمحاولة منه لعل الكلب يتركه وللاسف مازادته هالحركة الا الم
،،اعتلى صوت طلقات متتابعة بالهوا جفل(خاف)منها الكلب وترك يد بتال ووقف معها نباح الكلاب اللي برا الشبك،،
بتال جلس على ركبه وسط انفاسه المتسارعة ورجفة يده من الالم وهو ماالتفت للشبك ابد
هليّل واقف بصندوق الوانيت اللي واقف عند الشبك ومعه مجموعة من الشباب رمى الطلقات بالهواء يوقف الكلاب عن هجومها وبعد مارمى نزل من السيارة وهو يوقف على باب الشبك ورفع بندقيته يثبتها على كتفه وبوناسة يخفيها:لااله الا الله!!عساها سليمة عساها سليمة عـسـى ماهو بالحيل!!
عباير اللي صحت بالصوت كشرت بوجهها بوسط دموعها اللي ماجفت وهي تفهم ان هالحركة مقصودة منه التفتت تطالعه وكلها حقد
بتال مشغول بنفسه مارد عليه راص ع اسنانه يكتم المه وقف وهو يجر خطواته اللي يخفي رجفتها متجه لخزان الموية وقف عنده وهو يدف غطا الخزان من عليه وطاح الغطا عالارض مد يده اليمين لداخله وهو يمسك الدلو الصغير اللي داخله ويقطف به من الموية ويخرج الدلو من الخزان ومد يده اليسار وسط رجفة يده اللي وضحت باهتزاز الدلو
عباير وقفت عنده وهي تاخذ الدلو من يده
بتال طالعها للحظة وشال عينه عنها وهو يتركها تاخذه وصد بوجهه وهو يمد يده لها وبرجفة صوته:شوي شوي
عباير صبت الموية بشويش على جرحه
هليّل وهو يفتح باب الشبك وبخباثة:لاحول الله لاحول الله الظاهر من دنية(قرب)عباير منك انها كايدة(قوية)!!
عباير التفتت تطالع لهليل بصدمة من هالاتهام الوقح والغير مباشر
بتال رغم الالم مافاتته الكلمة والتفت يطالعه بوسط حدة ملامحه:نعم!!
هليّل ترك باب الشبك وهو واقف برا مادخل بابتسامة:علامك ارتعت!!اكيد مابه بدّ تعاون الضعيفة!!
بتال تقدم بخطواته ومشى باتجاه الباب ووقف قباله بكم خطوة وهو داخل الشبك ماخرج:واذا اني داخل الشبك او برا وش عليك مني!!ووش دخلك فيني اصلا!!
هليّل نزل البندقية من على كتفه وثبتها عالارض وتكى عليها بكف يده وبضحكة خفيفة:علامك اغتظت وخنفرت!!مااوجست شين يمك!!
بتال بحدة:الخبيث مايحتاج يقول شي!!
هليّل احتدت ملامحه:والله الخبيث اللي جوا الشبك والله العالم لو ماغدينا يمكم وش هو العلم!!،،ماخلص كلمته الا وجلد الذيب ضرب بوجهه،،
بتال التفت يطالعها بصدمة من جرأتها
عباير اللي اول مافهمت تلميحاته رجعت لقطعة جلد الذيب وهي تنحني له وأخذته ومشت لهم بخطواتها السريعة وحذفته بوجهه وبحدة:اعقب ياقليل المروة!!
هليّل غمض عيونه من الضربة وثم فتحها وسط تكشيرة ارتسمت على وجهه
عباير بغبنة وقهر:هاذي توالي علومك انت وأربوعك ماهي بعلومنا!!
هليّل صرخ:اعقبي!!
بتال وهو يتعرق بغزارة من الالم اللي يخفيه وبحدة:محد يعقب غيرك يالخسيس!!
عباير بحدة:اجل تجدع قطعة الذيب بشبكنا وتروع الحلال وهولت به ماعاد يدنى مرتعه(الغنم يخاف من مكانه اللي يحطونه فيه)
هليّل بصراخ:اهبي!!الله اكبر عليش اتطشين التهايم!!اتجنين علي!!
عباير بحدة:مااوجسته عبث!!الجلد مقصوص ماهو بمقطوع!!
هليّل تغير وجهه
عباير:ومحدن يعمل هاللون ويغدي يمّه بوسع وجهه غيرك!!
هليّل صرخ:الله اكبر عليش يالظالمة اعقبي!!
بتال يكتم المه وواضح على وجهه:وانت ترمي علينا التهايم وتبي نسكت لك!!اذلف عنا الله لايردك اذلف!!
هليّل بغبنة منهم:هالعلم يومني ارعيكم بروحي واتجنى يمكم مثل ماتوجسون مير تعقبون هالعلم ماارعيته بروحي معي شهود!!،،فز قلبه من الضربة اللي جت على ظهره والتفت وهو يترك البندقية اللي طاحت عالارض،،
الجد بادي اللي من الاساس كان متجه لهم ومن لحظة ماسمع صوت الطلقات جرى لهم وأول ماوصل وهو يطالع هليّل معه سلاحه وبتّال وعباير داخل الشبك جرى له واستلمه يضربه بعكازه بدون لايوقف:اعقب!!أتجنى على عييلي يامال الذيابة اللي تنهشك(تأكلك)!!اعقب يالدني اعقب!!
بتال يطالعه بصدمة من تصرفه اللي منافي لثقله المعتاد
عباير ارتاحت وهي تطالع ردة فعل جدها وأنه معهم ماهو عليهم
هليّل دف الجد بادي بقوة وبصراخ:علامك!!غيّب عقلك!!(خرفت)
الجد بادي بعصبية وهو يحرك عكازه بوجه هليّل:محدن مغيب عقله كود انت وهاللي معك!!
هليّل بعناد:وهالرجل وش يعمل هنيا هاه!!
الجد بادي:يعمل اللي يريده مالك بد طسّ يامال الصريمة اللي تعيث بك(تشغله بنفسه)طس عن حلالي والنفس رضيّة ولا،،اشر على راسه بطرف عكازه وبتهديد،،واللي خلق هالرويس ياالوغيد ان ترعون شين يهول مني!!
هليّل بصراخ:حنا لفينا ندور الذيب
الجد بادي ضربه على جنبه بعكازه بكل قوته
هليّل صرخ:اااااه!!
الجد بادي وبتهديد:هذاني قدامك كود ماكبيت اللي برأسك ياهليّل
هليّل عض ع شفته وهو يفهم هالتهديد الصريح
الجد بادي طالع الكم ولد اللي مع هليّل بالوانيت وبتهديد:وأنتم كبوا هاللي تعملونه عنكم!!محدن بفازع يمكم لا غدا الصحيح!!كلن يوجس روحي يالله من فضلك!!
هليّل كشر بوجهه
الجد بادي صرخ:طسوا عني وش تحترون!!
هليّل انحنى وهو ياخذ بندقيته وطلع بالصندوق وحركوا وهو مابرد قلبه بالعكس اغتاظ اكثر ويتوعدهم بينه وبين نفسه
الجد بادي بحدة:لاعادت من ديرة ولاعادوا من ناس!!اهبوا!! اهبوا!!
بتال اللي ذبحه الالم صد عنهم وهو يجلس عند طرف الشبك يرجع من كثر الالم
عباير التفتت تطالعه بصدمة
الجد بادي اتسعت عيونه وهو يمشي له وينحني شبه جالس عنده وينزل شماغه وسحب يد بتال المجروحة
بتال التفت له وهو مغطي فمه بيده اليمين من زود غثيانه
الجد بادي وهو يطالع مكان العضة زفر وبدا يلف شماغه على يده:يبي لها كم كويتن بالمشعاب(حديدة تتسخن عالنار ويكوون فيها اَي مكان الجسم)وتصبح(الصباح)وانت مثل الذيب
عباير كتمت ضحكتها
بتال اتسعت عيونه من اللي يسمعه وسحب يده بسرعة من جده:وش كويتن ماكويه!!كلها إبرة وانتهينا!!
الجد بادي وقف:اتبعني اتبعني مامثل دواي وانا جدك!!
.
..بيت الشلة..
،،الكل عالفطور>>الساعة 9،،
غازي يطالع جسّار
جسّار يفطر بسرعة
غازي تنرفز:وش فيك محد بياكله عنك اهجد!!
جسّار وفمه مليان:تأخرت ووراي طريق اليوم بالمحافظة دوامي
راشد نزل لقمته من يده:الله يسد نفسك خلص وبعدين تكلم!!
جسّار نزل لقمته وبزعل:وش فيكم مستلميني!!اكل من خيركم!!تراني قاط معكم!!!
عذبة بعصبية:وهو الصادق وش فيكم مناشبينه بأكله!!كلوا مالكم شغل فيه!!،،حطت عنده كوب الشاهي،،
جسّار:الله لايخليني ياعمة
غازي:خل عمتي عنك يوم دوامك بعيد أصحى بدري مثل الخلق!!
جسّار زفر وهو يوقف:ابلعوا لحالكم اعوذ بالله مناشبيني نشبة!!،،انحنى وهو يسلم على راس عمته ومشى،،سلام
غازي:جسار
جسّار التفت؛نعم
غازي:مر بتال معك
جسّار:متاخر انا مره انت ماعندك شي،،كمل طريقه،،
غازي زفر
راشد وهو يوقف:الحمدلله
غازي وقف وهو يتنهد:مشينا
عذبة:وين!!
راشد:بنخلص امور المدرسة يمه
عذبة زفرت وهي ماتبيه يروح لكن غازي معه هالمرة مريحها شوي
راشد انحنى وسلم على راسها ويدها
عذبة:حافظك الله ياعيني
غازي مشى:فمان الله
عذبة:انتبهوا لانفسكم زين حافظكم ربي
.
..مستشفى المحافظة..
،،مرت ساعتين عليهم وهم بانتظار نتايج التحليل،،
بتال من دخل للمستشفى سحب كمامة مو قادر يطالع جده للحين شعور الذنب محتويه متمدد عالسرير بالطوارئ يطالع السقف بملل وهو ينتظر وغلبه النوم
الجد بادي يتردد مابين بتال اللي بداخل الطوارئ وعباير اللي بانتظار النساء تنتظرهم يخلصون
عباير طفشت من وضع حدها وخرجت اول مالمحته:جدي
الجد بادي اللي راجع لبتّال وقف وهو يلتفت لها اول ماسمع صوتها:علامش!!
عباير مشت له:خلك يمّه انا باحتريك هنيا ماني بغادية محل
الجد بادي زفر وبزعل واضح:لو انه طاوعني وكويته
عباير:جدي وش تكوي والرجال دكتور!!
الجد بادي:لو اني كاويه كان ذالحين متريح!!
عباير زفرت بيأس وهي تدري مابتوصل لحل معه:ابشر ياجد لاعودنا يم البيت اكوني محله
الجد بادي كشر بوجهه ونبرة عالية:اهبي من بنية!!
عباير رجعت ورا:علامك ياجد!!ماني بكابتها بقليبك!!
الجد بادي بعصبية:طسي يم الحريم طسي لاتخنفرين بي وثمن تالي اعود يمش
عباير:لاتعود غير لاقضيتم
الجد بادي:اغدي اغدي كبيني اغدي يمه اعجلي علي
عباير بعناد:ماني بغادية لامنك تعلمني ماانت معود تريح ياجد!!
الجد بادي بعصبية:خلاص خلاص ماني بغادي مير إنش اغدي جوا
عباير مشت ودخلت
الجد بادي رجع لبتّال بعد ماتاكد انها دخلت
.
..بالسيارة..
الجد نشمي يطالع الطريق وسط أفكاره وليش بادي وافق بهالبساطة صحى من أفكاره على صوت ابو غازي المتنرفز
ابو غازي بعصبية:ترا ذبحتيني عليتي قلبي ماصارت!!
رهايف مدخلة نفسها بينهم وهي تطالع لابوها:يبه وش فيك زعلت!!ترا بس ابي اعرف متى بنوصل؟
ابو غازي:والله وبالله يارهايف اني لأوقف وأربطك بالتندة وارتاح
رهايف بنص عين وسط ابتسامتها:باتصل عليك وأسألك
ابو غازي:رهاااايف!!
الجد نشمي ابتسم:خلها عنك!!
ابو غازي:قايله لك يبه ماابيها نروح معنا!!مغثة ماتخبرها!!
رهايف كشرت بوجهها
الجد نشمي:والله انها تبرد القليب مونستنا
رهايف طالعت جدها بابتسامة:والله اني احبك،،طالعت ابوها بتكشيرة،،جرحك وصل يالغالي!!
ابو غازي:والله مافكيتني من لسانك بيوصلك شين غير الجرح يارهايف
رهايف رجعت لمكانها ورا ابوها وهي تتكتف وتصد بوجهها عنهم تطالع الطريق
الجد نشمي طالع ابو غازي:علامك اخوياك راكبينك(وش فيهم اباليسك حاضرين معك)؟
ابو غازي سكت مارد
ام غازي بعد سكوتها الطويل زفرت بصوت واضح
رهايف التفتت تطالعها
ام غازي:وش غدا بش ياام جـلاجــل تبدلتي مثلنا ولاظليتي على ماانتي؟
.
..مستشفى المحافظة..
جسّار يقلب بملفات حالات الطوارئ عقد حواجبه وهو يطالع الحالة واستغرب من الاسم كلم الممرضة عن اللقاح المطلوب بعد ماشاف نتايج التحليل واتجه لغرفة المريض دخل واتسعت عيونه اول ماطالع الجد بادي قباله:عسى ماشر!!
الممرضة دخلت وراه ومعها الاغراض
جسّار التفت يطالع السرير بسرعة
بتال متمدد عالسرير ع ظهره ومتكي براسه فوق يمينه اللي ثانيها تحت رقبته وابتسم تحت الكمامة وهو يحسب يمينه ويرفعها ياشر بسلام:بدري!!،،رجع يده تحت رقبته،،
جسّار باستغراب وهو يطالعه:وش فيك!!
بتال رفع يساره:ابد والله إصابة طفيفة ومنها اخذت لي نومة زينة
جسّار باستعباط:مايحتاج يعضك والله تكفي المكلبة اللي فيك
بتال كشر بوجهه
الجد بادي قطب جبينه
جسّار انتبه لبادي:قدامك العافية،،نزل الملف عالطاولة الصغيرة المتحركة اللي قدام السرير وهو ياخذ القلفز ويلبسه ويسحب اللقاح بالإبرة والتفت يطالع بتال،،عموما انت عارف الوضع وكورس العلاج
بتال:اتركها انا بأخذها بنفسي
جسّار:لو الإصابة برجلك بأقول حاضر لكن بيدك
بتال بعناد:تراني يميني!!
جسّار:والله لو انك يساري عاد اخلص خلني اروح وراي غيرك
بتال ماتحرك ويطالعه بتكشيرة
جسّار انحنى وسط ابتسامة وهو قباله وهمس له:بديت تستكلب بسم الله علي منك
الجد بادي:كود ماتريدها غدينا يم البيت اوجست يمك مامثل المشعاب
جسّار انبسط وهو يعتدل بوقفته:اَي والله مامثله ياجد!!
بتال رمى اللحاف من عليه بزعل:اطلعوا طيب خلوه يشوف شغله!!
.
.
<اللهم صل وسلم على نبينا محمد>
.
.


























هـــدبـــ خــجــلانــــ 27-03-2020 10:55 PM

رد: رواية ياسمح المحيا جر الهجـينية/بقلمي
 
واخيــــــرا ....

تسجيــل حضور


لي عــــووده

ضحكته 28-03-2020 02:33 PM

رد: رواية ياسمح المحيا جر الهجـينية/بقلمي
 
الكلب هليل كنت متوقعه انه هوو
ويلي ع خنقه الكلب
يارب استر على بتال لايحصل له شي
عورني قلبي عليه تكفين روايات
خليهم يتصالحون عشان بتال ويوسف
والله حزنوني 💔💔

بدينا بالحماس والله البارتات صارت حلوه
من رجع فاهد وطلع يوسف لهم 😭♥💙

rwuiit28 28-03-2020 10:06 PM

رد: رواية ياسمح المحيا جر الهجـينية/بقلمي
 
اقتباس:

المشاركة الأساسية كتبها ضحكته (المشاركة رقم 31663720)
الكلب هليل كنت متوقعه انه هوو
ويلي ع خنقه الكلب
يارب استر على بتال لايحصل له شي
عورني قلبي عليه تكفين روايات
خليهم يتصالحون عشان بتال ويوسف
والله حزنوني 💔💔

بدينا بالحماس والله البارتات صارت حلوه
من رجع فاهد وطلع يوسف لهم 😭♥💙

وردك الاحلى والله🥺❤

rwuiit28 28-03-2020 10:07 PM

رد: رواية ياسمح المحيا جر الهجـينية/بقلمي
 
،،الـجـزء الــســتــيــن،،
سبحان الله وبحمده سبحان الله العظيم،لاحول ولاقوة الا بالله
.
.
..بجهة ثانية من المستشفى..
عباير مسرعة بخطواتها وهي تتلفت تدور عليه متاكدة لمحته وهي ماتخطي وكيف تخطي بالمظلوم معهم لفت هالجهة كثير وهي ماحصلته وقفت عند الريسبشن كحل اخير وبوسط انفاسها اللي تحاول تهديها:ابنشدش لاهنتي
الموظفة طالعتها:تفضلي اختي؟
عباير:مرزوق عبري وين به اَي غرفة؟
ضبعان اللي واقف وراها احتدت ملامحه:خير
عباير فزت للحظة ثم التفتت وراها تطالعه
ضبعان:وش تريدين منه؟لافية توكدين موتته!!
عباير قاطعته بحدة:استغفر الله العظيم
ضبعان كشر بوجهه عرفها
عباير:لاتظلمني الظليمة شينة!!
ضبعان ضحك بقهر:أوحوا من يوجسه!!الظالم!!
عباير:لا بالله المظلوم!!عجزنا وحنا نوجسه يمك!!مظلومين مثلنا مثلكم يالعبري!!
ضبعان بحدة:وشو له غاديتن يم مرزوق!!
عباير:ياعل فاله العافية مير اني ماني بغاديتن يمه
ضبعان كشر بوجهه:اجل وشو له تنشدين عنه
عباير:أريدك بعلم
ضبعان بتكشيرة:وش وراش عمركم مالفيتوا يمّنا بخير ياعيال ام جـلاجـل!!
عباير:بخوت بتعرس
ضبعان اتسعت عيونه:وشو!!
عباير:وانا اوجست هالعلم يمك حتى تخبر به
ضبعان بقهر:ياعلها مااتهنى!!ياعلها تفوت بضيقة ولاتغدي الا بضيقتن تهول!!
عباير زفرت:ناصيتك ياعم تكفى
ضبعان احتقن وجهه بدمه وغطاه اللون الاحمر من الغيظ:وتنصيني!!!
عباير تكلمت بسرعة:ماني بناصيتك تكف صرايمك عنا بالعرس لا بالله ابدن
ضبعان قطب جبينه وهو يغلي
عباير:ناصيتك تعاود(تراجع)العلم وتوكد
ضبعان صرخ وهو يشد ع قبضته:اعقبي!!لاترعين الويل ذالحين!!
عباير كملت بدون اهتمام بصرخته وهي ترفع صوتها:وحلفتك بالله وعليك الله لاراعيت بعين الحق وتوكدت من الظالم ومن المظلوم تغدي يم اهل الحق وتوجسه
ضبعان بغبنة:وهي بها حق!!اوجستم هالضعيف اللي عمل هاللون ياعلكم ماإتعقونها(يصيبهم مرض ولايتركهم)
عباير رفعت صوتها:حد الله مااوجسناه ابدن!!
ضبعان بغبنته:تكذبيني
عباير:والله لو انك تذبحني هنيا لازم توحيني هالنوبة اللي اوجس هاللون غيث واخوياه واللي اوجسته بخوت غيث عمل بها!!ليه لذالحين تلوم بخوت وهي مااوجست طارين لولدكم ابدن ليه!!
ضبعان:انكعمي!!
عباير:واوجست يمكم مرزوق ماعمل شي والله انه غدا يثنيهم مير مدري وش اللي انعمل حزتها!!
ضبعان صرخ:انكعمي لاتحسبين إنش مرة ماانوشش(ماالمسك)والله اني لاذكيش(ينحرها)ولاتسوين شعرة!!
عباير:راضية تنحرني
ضبعان انلجم وظل يطالعها
عباير استجمعت شجاعتها:كود عينك تراعي الظليمة انحرني ومسموح عنك مالي بك طليبة(اعتقته من ذنب قتلها)
ضبعان يطالعها مصدوم
عباير زفرت:ياعم الشاهد الله مااوجسنا علمن يم ولدكم وظليمتكم مالنا بها بدّ وترانا مظلومين مثلكم والشكوى لله مير انكم تطشون ذنب ظليمتكم يمنا هذا والله اللي مايرضي احدن ابد اهل بقعا ونحرز نقوم بهم مير انتم وش حيلتنا بكم وأنتم مظاليم مثلنا!!
ضبعان ساكت
عباير:هالوجس بقليبي من مدة ولاراد الله التقيك غير بهاللون وبهالمحل وانا خابرة انه عيبن علي مير هاذي الدبرة وياعل فال ولدكم العافية والله ينصركم على من طشكم باللي مالكم به ذنب،،مشت،،
ضبعان ظل واقف بمكانه وهو يراجع حساباته من جديد
.
..عند الصيدلية..
سويلم مستند على فارس بتعبه
فارس وقف عند كراسي الانتظار وهو يساعده يجلس:تريح ياعم لامني اجيب العلاج
سويلم جلس وهو يهز راْسه بموافقة من تعبه مافيه حيل يرد
فارس وقف ع شباك الصيدلية
،،جسّار وبتّال يمشون باتجاه الصيدلية،،
بتال للحين بكمامته:كتبت لي على منوم
جسّار زفر بطفش:كتبت لك على***(تاثيره خفيف)
بتال اتسعت عيونه وهو يوقف والتفت يطالعه:نعم!!وش اسوي فيه ذا!!
جسّار وقف والتفت له:وش تبي ان شاء الله!!
بتال:***
جسّار اتسعت عيونه:سلامات!!معك ارق شديد لاسمح الله عشان اكتبه لك!!
بتال بنرفزة:ايه ابي انام نومة ابدية
جسّار بنرفزة من كلمته مد يده وسحب الكمامة من على وجهه:تبيهم يفصلوني انت!!وبعدين شيل هالكمامة وتنفس الهواء الطلق وتنام على طول!!
بتال مد يده يحاول ياخذ كمامته بنرفزته:جسّار!!
جسّار يحركها يمين ويسار عنه
بتال بعصبية:بلا بزرنة جويسر مااحنا بالبيت!!
جسّار بابتسامة:وش بتسوي!!
بتال مسكه من يده ومد رجله وعثر جسار وطيحه عالارض
جسّار ضرب راْسه بالأرض:اااه
بتال جلس فوقه
جسّار وهو يطالع نظرات الناس:بتال بتاتيل مااحنا بالبيت تكفى وقف
بتال بعصبية:من البداية ليش هالحركات جيب
جسّار مد الكمامة:خذ خذ باشتري لك عشر فكني
بتال اخذها وقام عنه ومد يده له
جسّار طالعه بتكشيرة وضرب يد بتال عنه:شكرا،،وقف،،
بتال زفر:يعني تشوف وضعي وتستظرف وش تبيني اسوي!!
جسّار طالعه:خلك منفس لاتتكلم الى ماتنفجر!!
بتال كشر بوجهه
جسّار:هذا انت ليش تزعل!!اذا مرضت بيوم مرض شين من كثر سواتك بعمرك لاتلوم احد غيرك،،مد له الروشتة،،خذ
بتال يطالعه بتكشيرة وهو ساكت مد يده وأخذها
جسّار مشى وتركه
بتال زفر بضيق ومشى يوقف بالصف ينتظر دوره
فارس وقف عند عمه وبيده كيس الدوا:غدينا ياعم
سويلم مثبت عينه على بتال بوجه مخطوف
فارس قطب جبينه:عم سويلم عـسـى ماخلاف؟
سويلم:ولد يافارس
فارس:سم
سويلم:الظاهر ان هالزكيمة كايدة ياولد!!يتراعى لي شين يهول!!
.
..بيت بادي..
سعود واقف عالباب متكتف وسط تكشيرة مرتسمة على وجهه
نشمي:علامك!!تردني عن بيت ابوي!!
سعود:ماهو اردك وبس اطردك كود اعتزت
نشمي اتسعت عيونه:تطردني!!
سعود:ايه اطردك من مااكون دامك لافين يمّنا بشرك!!
نشمي تنهد:سعود ياولدي متى ارعيتني غادين بالشر يمكم!!
سعود ميل فمه بابتسامة سخرية من كلامه
نشمي زفر:خابرن اللي غازين راسك من علم مير انه فاهد تغير ماعاد هو فاهدن الاول!!
سعود كشر بوجهه:اول ولا تالي مااريد شروره تلفي يمّنا!!
نشمي:زين وتم على ماتريد مير هالنوبة كف عويناتك عني وانسها وانا خالك
سعود يطالعه ساكت بتفكير
نشمي بهدوء:وثمن عيب عليك تطرد خالك!!وش بتوجس لأبوي لاعود!!
.
.........****..........
الليل
.........****..........
..بيت الشلة..
،،جلستهم المعتادة بالحوش،،
ابو غازي جالس وهو يطالع رهايف بتكشيرة
عذبة تقهويهم بابتسامة:ياهلا وألفين هـلا ياحياكم الله
الجد نشمي:سلمتي ياعين ابيش سلمتي
غازي اعتدل بجلسته وهو ياخذ القهوة منها:عنك ياعمة
عذبة عطته الدلة:سلمت ياعيني
ام غازي جالسة جنب بتال النايم اللي ماحس فيهم نهائيا رافعة راْسه بحضنها تمسح عليه
رهايف بغيرة منه:لنا الله متى متى يمه تسوين فيني مثل عيالك
ابو غازي اللي متنرفز منها:اوص يارهايف اوص لااسمع لك صوت
رهايف:بسم الله وش سويت!!
الجد نشمي نزل فنجاله:علامك عليها!!مااطرت يمك شي!!
ابو غازي:مابي شي مابي شي!!
جسّار سبقته ريحة عطره الثقيل قبل يوصل عندهم ثم وقف عندهم بابتسامة وهو بكامل كشخته ثوبه الابيض غترته البيضا ساعته الجلد البنية وقلم بجيبه يطالعهم بابتسامة عريضة مرتسمة على ملامح وجهه:يالله؟
ابو غازي ميل فمه وهو يزفر بخفة
رهايف اتسعت ابتسامتها وهي توقف:الله الله الله
جسّار تنحنحت وهو يعدل غترته
رهايف:ماشاء الله ماشاء الله ماعرفتك والله وش هالنظافة!!صاير ديتول بريحة داوني!!
عذبة كتمت ضحكتها
غازي ضحك:وانا اقول وش ذا الريحة الجديدة!!
جسّار كشر بوجهه:ليش وش شايفتني!!
رهايف:اول مرة تسبقك ريحة حلوة
جسّار:والله يارهايف ماسكتي مو احسن لك
رهايف:الحمدلله اللي خلاني أجي معهم ولّا كان فاتتني أقوى لحظة نظافة بحياتك!!،،هربت،،
جسّار جرى وراها:رهاااايف!!
عذبة ضحكت
ابو غازي هز راْسه بيأس:البلا ان هالاثنين بيتزوجون قريّب!!الله يستر عليهم!!،،وقف،،جسّار
ام غازي غطت أذن بتال بيدها:اقصر حسك صحيته!!
جسّار اللي يدق على رهايف الباب التفت له:سم يبه
ام غازي:جويسر!!!
ابو غازي زفر وهو يصد عنها وكمل عادي:متى بتعقل هاه!!امش قدامي يالله!!
جسّار اتسعت ابتسامته:ابشر يبه ابشر،،هرول بخطواته وهو يحس نفسه مثل الريشة خفيف من فرط مشاعر السعادة،،
ابو غازي وقف وهو يلبس شماغه ماسك عقاله بين طرف دقنه وبداية صدره مثبته لايطيح،،
ام غازي التفتت وراها وبصوت خفيف وهي تحط يدها على أذن بتال:رهايف رهايف!!
رهايف خرجت:طيب يمّه طيب مانسيت
جسّار وقف عند ابوه وهو يسحب عقال ابوه يمسكه له بابتسامة
ابو غازي طالع فرحته وسكت ماحب يقول شي يخرب فيها فرحته مد يده له
جسّار حط العقال بيد ابوه:وينه راشد؟
رهايف وقفت عندهم وبيدها المبخرة وهي تحط العودة:ومين قالك انه من اهل العريس!!ايه من قده هالرشود الحين ادع ربك لايتشرط عليك يعنني اختي
جسّار:مابقي غـيـر رويشد يتشرط!!
عذبة:كيفه اخته ويحق له يتشرط
رهايف:عمة!!والمسكين ولد اخوك!!جحدتيه وانتي توك تعرفينهم!!
ابو غازي بحدة:بخري جدك بس بخريه قبل تحترق العودة!!
رهايف تقدمت لجدها بتكشيرة وهي تشوف ابوها معصب عليها
الجد نشمي:يم العريس يمه
جسّار امتلى قلبه حِبّ فوق السعادة وهو يسمع هالشي واكتفى بابتسامة خجولة يكبح فيها تصرفات ممكن تخرج منه بالغلط
رهايف وقفت قباله وهي تبخره بابتسامة:مع ان ريحة الديتول بنكهة الدواني فايحة بس ماعليه العودة احلى
جسّار بتكشيرة:وبعدين!!
رهايف بابتسامة:بعدين مبروك ياجسار الله يتمم لك على خير ويسعدك،،رفعت نفسها على اطراف رجولها وهي تبدل المبخرة من يمينها ليسارها ومدت يدها اليمين لورا راسه تبي تسلم على راسه،،
جسّار مسك يدها وهو يحتضنها بين يديه وسلم عليها خد يخد وهو يهمس:حتى لو اني اكبر عيالك يسلمون على راسي ماهو بانتي
رهايف بابتسامة:مبروك الف مبروك الله يسعدك
ابو غازي وقف عندهم وهو يسحب المبخرة من يدها بقوة وبنرفزة وهو يبتعد عنهم يتبخر:مطولين هالمطافيق الله يعني عليهم
ام غازي الـلـي راحت ورجعت بدون ماينتبهون وقفت عندهم وبيدها عبايتها ولحاف انحنت وهي تغطي بتال زين واعتدلت بوقفتها:تأخرنا عالناس ولا ناوينها عشا هناك!!
جسّار بكسرة خاطر:صحيه يمه يمكن يروح معنا
غازي:خلاص جسّار بلا قلق شفته كم حبة اخذ ولو عليه راح لكن وضعه مثل ماتشوف!!
جسّار:بس
ابو غازي:لاتقعد تبسبس امش قدامي تأخرنا عالناس
رهايف بمحاولة اخيرة:يمه
ام غازي زفرت من كثر ماتزن على راسها:رهايف مافيه روحة لاتزعجيني تعوضينها بكرة وجهزي أغراض الطلعة وعينك على اخوك سمعتي
رهايف بزعل:طيب طيب
الجد نشمي وقف:توكلنا على الله،،مشى،،
ابو غازي مشى وراه
جسّار يطالع بتال وهو يتمنى يروح معه
غازي:امش بيعوضك بكتب كتابك امش،،لحقهم،،
جسّار مشى وهو يحس بشي ناقص رغم كل هالفرح اللي محتويه
ام غازي وعذبة مشوا
رهايف وهي تمشي وراهم:مبروك مبروك مقدما ان شاء الله مايكسرون ظهرك بكثر طلباتهم
بتال اللي صحى من لحظة متاثرة رهايف وجسّار غمض عيونه بقوة وهو يتمنى يحضر هالفرحة لكن ماله حق يحضرها بنظره
رهايف قفلت الباب وراهم بابتسامة لفت بترجع فزت:يمّه!!
بتال بوجهها وبصوت هادي بعد النوم:رهايفوه جهزي لي اكل عندي مشوار
.
..بيت بادي..
بخوت منحنية بظهرها قباله شايلة المبخرة بيدها تبخر جدها
الجد بادي اللي جالس عند المشب دف المبخرة عنه وهو يكح:ضيقتني يابنية يسد!!
بخوت ابتسمت من شكوى جدها واتجهت لخالها اللي قبال جدها
نشمي وقف بابتسامة
بخوت وقفت قباله بمسافة ماقربت منه ومدت المبخرة
نشمي اخذها وهو يتبخر بابتسامة:مبروك يابنتي مبروك ياعلي ابخرش بعرسش
بخوت انحرجت ماردت
عباير خرجت من المطبخ تجري لغرفتها بالجهة المقابلة اتسعت عيونها وهي تطالع بخوت عند المشب واتجهت لهم وبوسع عيونها:وش تعملين هنيا!!!
سعود خرج من غرفته ووراه راشد
حلايا خرجت قبلهم وهي تنطنط قدامهم بفستانها الرمادي القصير
سعود وهو يقفل ازارير ثوبه:علامش شايشة يابنت!!
عباير مسكت بخوت من يدها تدفها بعيد:اغدي يم الغرفة ذالحين اتعلقش(تعلق فيها)ريحة النار اغدي!!
بخوت:علامش!!مابه شي ريحة نار
عباير اتسعت عيونها وهي تاخذ كسر العود اللي بيدها وبنرفزة:اغدي اغدي لاتوجسين شين ابد!!
بخوت:طيب طيب لاتخنفرين
حلايا:بعااااير
عباير ابتسمت:ياعين بعاير اغدي ورا بخوت ماني بعازة لهاة(شي يشغلها)يسد اللي وراي يالله يالله
حلايا جرت ورا بخوت
عباير المبخرة من يد نشمي وهي تطالع سعود وراشد وبابتسامة:ياصلاتي عالنبي عين الحسود بها عود الف من ذكره
راشد ابتسم
عباير حركت كسرة العود اللي بالمبخرة عن الفحم وحطت مكانها جديدة وهي تمشي لهم:ياعلّي ابخركم معاريس اوجسوا امين
سعود:ماني بمستعجل
عباير:ماهو بعلى هواك بأتنقى لك بنية الحلال بعرس بخوت
سعود كشر
عباير طالعت راشد:وانت علامك ماتوجس امين
راشد يتهرب:لااعرس خالك اعرست
سعود اتسعت عيونه وهو ماصدق يلاقي مخرج:صحيح!!
عباير التفتت لنشمي اللي ناسيته:اَي بالله صحيح وين تعرسون والرأس الكبير لذالحين مااعرس!!
نشمي قاصد يورطهم:اجل تنقي لنا جميع نغرس مع بعضنا
عباير ارتسمت ابتسامة على وجهها بفرحة:ازين الأمور ابشروا باللي يرضيكم ابشروا
سعود تغير وجهه مايبي يتزوج
راشد تورط وهو متفق مع امه
الجد بادي ضحك:اجل تنقي لي معهم ياعباير
عباير كشرت وهي فهمت انهم يستعبطون وبزعل:مير اني خابرته ماهو بمكتوبن لي أتنقى وانفخ راسي على حريمكم!!
سعود اتسعت عيونه:وانا اوجس علامها شايشة هاللون اوجسيه تريدين اتجنين!!
عباير:حلالكم حلالي اعمل به مااريد!!
،،دق الباب،،
عباير شهقت وهي تلف تجري لداخل:لفوا ولا ولمت شين لذالحين!!
الجد بادي:عباير
عباير التفتت تطالعه:سم ياجد
الجد بادي:العلم اللي علمتش اوجسيه يم امه زين
عباير بابتسامة:ابشر ياجد ابشر لاتحرص وانت خابرني،،كملت طريقها لداخل بسرعة،،
الجد بادي وقف:افزع ياسعود لفوا الضيفان
سعود وهو يمشي للباب:ابشر ياجد ابشر
.
..عند الحريم..
،،بعد اخذ وعطا بالسؤال عن الأحوال،،
ام غازي:ومثل ماتعرفين يابنتي حنا جايين نريد بخوت زوجة لجسّار على سنة الله ورسوله والعلم ان كل شي تمموه لكن نبي نعرف وش شروطكم المهر وتواليه
عباير بابتسامة:مانريد شين ابدن
ام غازي انصدمت:كيف يعني!!
عباير:المهر مانريد ولا ذهب ولاقماشن ولاشين ابد حتى البيت لو انه خيمة كبر يدي بوسط حويشكم راضين به
عذبة منصدمة
عباير:مانريد غيّر حاجتن وحدة بس
ام غازي باستغراب:اللي هي؟
عباير:يبني خيام العرس(مكان الزواج)ويتركها سبيل
ام غازي طالعتها باستغراب من هالشرط
عذبة ساكتة ماتبي تتدخل بشي وهي مالها خص اصلا
ام غازي:شين ثاني!!
عباير:سلامتك ياخالة
ام غازي باستغراب:عاد نشاور الرجال وابشروا بكل خير ان شاء الله
..عند الرجال..
،،تبادل نظرات بين غازي وراشد وجسار وسط ابتسامات وكتم ضحك بين فترة والثانية،،
الجد نشمي:مثل ماانت خابرن يابادي غديتنا يمك رايدين بنتكم لولدنا
الجد بادي برسمية:حياكم الله حياكم الله
ابو غازي:واللي تامرون به حاضرين
الجد بادي ارتاح وهو يسمع موافقته:رايتكم بيضا والولد وخابرينه وياعلهم مبروكين الله يصلح بينهم والعرس متى تريدونه؟الاسبوع الجاي؟
جسّار انجلط والتفت لابوه وجده
الجد نشمي:لا يابادي وش الاسبوع الجاي!!امورنا واجد!!
الجد بادي:اللي بعده اجل؟
جسّار بلع ريقه
الجد نشمي تنهد والتفت لابو غازي:ها ياولد وش علمك؟
ابو غازي زفر:على خير اللي بعده
جسّار اتسعت عيونه
غازي ابتسم وهو يطالعه وعارف انه انكب فعلا
راشد كتم ضحكته
الجد بادي ابتسم:على خير الله يوفقهم،،وقف وعينه على جسّار،،مبروك ياولدي مبروك
جسّار سلم عليه:الله يبارك فيك ياجد
،،بعد السلام وتبادل التبريكات،،
الجد بادي طالع الجد نشمي:اتبعني يارجل
الجد نشمي باستغراب:ابشر
الجد بادي مشى خارج من البيت
الجد نشمي وراه
.
.........****..........
..بيت الجد نشمي..
،،امجاد جالسة عالقهوة مع عمرها وجدتها،،
حصة زفرت وهي تطالع امجاد اللي تتقهوى ساكتة وهاذي عادتها زفرت وطالعت امها:يمه وش فيك ماتركتيها تروح معهم؟
امجاد انصدمت ونزلت فنجالها بسرعة وباحراج:عمة عادي تـرا مو لازم اروح وبعدين تزعل رهايف اذا رحت بدونها
الجدة منيرة:لا ماتروح وهي ماعلمت ابوها وامها
حصة:عادي يمه انتي بدالهم!!
الجدة منيرة:ابدن الله يكفينا صرايم الدنيا انا مسوؤولتن عنها بالبيت مـاهـي العلوم اللي برا
حصة بوسع عيونها:لااله الا الله!!يمه تراها مع عواطف وبناتها وريما معهم بعد!!
الجدة منيرة:اوص لااسمع لك حس محدن نشدش عن ماتراعين!!
امجاد وقفت وهي تبي تقطع هالنقاش:تبين شي ياجدة
الجدة منيرة:وين به!!
امجاد:بروح البيت
الجدة منيرة:ارقدي معي
امجاد:الفجر ياجدة وانا عندك
الجدة منيرة:محدن بالبيت!!
امجاد:فيه فيصل وعذاري وبعدين ياجدة مااعرف انام الا بسريري
الجدة منيرة تنهدت:زين زين مير صكي البيبان زين
حصة:يمه ترا البسوت حولها مامن شر
الجدة منيرة بعصبية:وانتي وش عليش!!
امجاد بابتسامة:ابشري ياام عادل ابشري،،انحنت وهي تسلم على راس جدتها،،
الجدة منيرة:حافظش ربي ياعيني حافظش الله
امجاد مشت
حصة بزعل:يمه ليش كلامك الزين لعيالنا بس!!وحنا الكلام الاقشر!!
الجدة منيرة:وانا عينت من وراكم شين غير القشر!!صبي قهوة صبي وانتي منكعمة صبي!!
.
..بيت الشعر..
فيصل متربع قباله يطالعه بتكشيرة
جواد متربع بينهم متكتف ومتلزم الصمت
يزيد بتجهيمة وجهه:سمعت ان غازي رجع؟
فيصل بتكشيرته:وش عليك بغازي!!متصل علي ومقلقني بحياتي عشان تسألني عن غازي!!
يزيد:ايه!!لان محد بيرجع لي حقي غيره
فيصل اتسعت عيونه:نعم!!
يزيد:واذا هو مافيه خير ورجع حقوق الناس اعرف وقتها وين اروح
جواد فك رجله اليمين من تربيعته وهو يضرب يزيد بطرفها
يزيد انصدم وهو يمسك رجله ويطالعه
فيصل يطالع جواد
جواد بهدوء:واللي له حق يتكلم صح!!
يزيد بحدة:وانت وش دخلك!!نهايتك ولد عمهم الحقود!!
جواد زفر بخفة وسط ابتسامة سخرية
فيصل:وانت مين عينك وزير لشؤون الأسرة،،وقف،،توكل توكل عنا بس اذا هاذي سالفتك!!
يزيد وقف:ومستمر تطردني!!
فيصل:ايه اطردك!!لان لو انك صادق رحت لابوك بالاول واشتكيت بس مقيولة ضربني وبكى سبقني وشكى!!
يزيد:ولانك نذل وخاين تقول هالكلام لانك تدري بابوي وطبعه!!
فيصل:والله انت اللي تدري ان مالك اَي حق ومستمر تطلب شي مو لك توكل بس توكل اذلف يالله برا برا
يزيد مسكه من تيشيرته وسحبه
جواد وقف بسرعة وهو يمسك يزيد من يده ويثنيها ورا ظهره
يزيد يحاول يفك نفسه
جواد:لا لا لا انتبه تراني دكتور واعرف من وين أسهل طريقة اكسر بها عظامك
يزيد وقف حركة
جواد:اكرمناك ولا انت بوجه كرامة وسالفتك احمد ربك ماجريناك للقسم ووقتها صدق بتآكل هوا،،دفه لقدام وهو يتركه،،
يزيد تقدم بخطواته وهو يلتفت له وبغبنة:كان جريتوني للقسم بس ماتقدرون،،طالع فيصل،،عارفين انه بينجر معي
جواد:صدقت
فيصل طالع جواد بصدمة
جواد:واذا كملت هالحركات ماعندنا اَي مانع نوديه وبالنهاية بتنجر على وجهك وتاخذ الحكم اللي يحبه قلبك لحالك
يزيد يطالعه وهو بينفجر
جواد اشر بيده عالباب:تعرف طريقك،،لف عنه وهو يتجه للتلفزيون ويشغله وبدون اهتمام ليزيد،،تعال نلعب فيصل
فيصل طالع يزيد بابتسامة:الباب تعرفه،،اتجه لجواد،،
يزيد خرج وهو يغلي من داخل
.
..بيت عادل..
امجاد بالمطبخ تجهز لها كوب شاهي وتوست وهي مثبتة جوالها مابين أذنها وطرف كتفها:ايه وبعدين
شذى بضيقة:طفشت بموت ليتك معي امي وسهام بس يتخاصمون عالاغراض وانا خلاص طقيت
امجاد بابتسامة:عادي انتي رحتي وانتي عارفة ان الثنتين أذواقهم عكس خليك محضر خير
شذى:هاذي المصيبة مااقول شي احسن لاني وقت اقول شي لازم تزعل وحدة منهم تعبت
امجاد ضحكت:الله يكتب اجرك ترا الصلح بين الناس اجر
شذى:تتشمتين هاه!!استغفر الله بس
امجاد:طيب ارجعي وريحي راسك
شذى:والله نفسي ارجع بس وش اسوي ماتوقعت يحددون زواجها كذا بسرعة لازم نخلص أغراضنا وهم مثل ماتعرفين شالوا يدهم من كل شي!!
امجاد:يااختي الحمدلله شي بسيط ومحدود تخيلي لو كبير صدق بتروحون فيها
شذى:مسوية طالعة منها هاه!!حبيبتي تاكدي يخلصون سالفة جسار بعدها رهايف،،سكتت وهي تستوعب وبصوت فيه البكية،،يمه والله بصيح زواج جواد ورهايف اكيد كبيررر!!
امجاد ضحكت:كل شي بوقته وش فيك طايرة!!
شذى بهم:احب الزواجات بس عند غيرنا مو عندنا
امجاد وهي خارجة من المطبخ وبيدها صحن التوست وكوب الشاهي:الله اكبر عليك حتى احنا نبي نفرح بسم الله علينا!!
شذى زفرت:مو قصدي بس
امجاد جلست عالكنبة وقاطعتها بابتسامة:ادري ادري والله وش رايك تجيني بعد ماتخلصين
شذى بابتسامة:اًوك ولاتسوين شي باجيب العشا معي تمام؟
امجاد وهي تطالع عذاري اللي داخلة من الباب:تمام تمام اكلمك بعدين،،قفلت،،
عذاري مرت من قدامها بدون اَي كلمة
امجاد:عذاري
عذاري وقفت وطالعتها
امجاد:وش رايك نتقهوى مع بعض من زمان عن بعض
عذاري تكتفت:صدق!!!وش هالغلا اللي طاح فجأة!!
امجاد كشرت:عذاري!!انتي تدرين اني أعزك مثل رهايف!!وش هالكلام تدورين على مشاكل؟!!
عذاري:على أساس مو انتي اللي بديتي هالمشاكل!!
امجاد وقفت:قولي وش هي المشكلة بالضبط!!لانو ابدا مافي مشاكل بس انتي تدورين حرش!!
عذاري ضحكت:بدينا بقلة الأدب!!
امجاد:وينها قلة الأدب!!وبعدين اذا على سالفة ابوك تراني رديتك باحترام وادب وهذا انتي تجهزون أغراضك الله يوفقه مع اللي اخترتيها له!!
عذاري بقهر:بس انا ابيك انتي ليش ماتفهمين!!
امجاد بعصبية:عذاري السالفة مو غصب وقلت لك انا مستحيل اتزوجه وانا اشوفه مثل ابوي!!
عذاري زفرت وهي تتعوذ من ابليس بينها وبين نفسها
امجاد:وبعدين ياعذاري لوين تبينا نوصل!!
عذاري طالعتها ساكتة
امجاد:انا وانتي صديقات قبل تكونين زوجة لغازي وتغيرتي علي وكثير واحترمت هالشي قلت انه خصوصية لكن بالدخلة والخرجة نظرات وحركات واشياء ماادري وش مقصدها مااحب انا هالشي ولا اعرف اتعامل معه ارجعي ياعذاري!!ارجعي عذاري القديمة للحظة وخليك صريحة قولي اللي بقلبك وعلى فكرة ترا انا للحين شاريتك وجيتك بالوجه ماحطيت بيننا حواجز
عذاري فكت يديها وبهدوء:امجاد ادري اني زودتها شوي
امجاد ارتفعت حواجبها
عذاري:اوك اوك كثير مو شوي لاتطالعيني كذا
امجاد ميلت فمها بوسط تكشيرتها
عذاري:اسفة وحقك علي والله غصب عني مو بيدي
امجاد:ماابي عذاري القديمة ارجعي عذاري الطيبة زوجة غازي اللي ماتاذي احد ولا تضايق احد كافة خيرها وشرها
عذاري برجفة صوت:والله مو بيدي ياامجاد غصب غصب عني انتي تشوفين اللي انا فيه ابوي وفجأة سالفة زواجه وامي وموافقتها الغريبة و،،سكتت،،
امجاد:وغازي وش مسوي بعد؟
عذاري بضيقة:لاتزعلين مني امجاد لاني صدق تمنيت تكون انتي مو وحدة مااعرفها ولااعرف وش ناوية عليه وامي معها اربع وعشرين ساعة وانتي عارفة وضعها
امجاد:عذاري التوفيق من الله ودامك اخترتي سهام ليش القلق والله ان تحطها بعيونها
عذاري زفرت بصوت وهي لأول مرة تفضفض لاحد طالعت امجاد:اسفة والله من قلبي اسفة
امجاد بابتسامة وهي تعيد نفس جملتها:وش رايك نتقهوى مع بعض من زمان عن بعض؟
عذاري ابتسمت وهي تكبح طيف دموع تتجمع بعيونها:ومن يقاوم قهوة امجاد!!
.
.........****..........
ام جـلاجـل
.
،،بوادي شبه خالي يلفه من يمين ويسار على امتداد النظر جبال متفاوتة بالارتفاع ويتخلل هالوادي بعض الأشجار المتباعدة اللي تكسر خلوه من اَي شي لكن علامة هالوادي المميزة جبل كبير ينقسم قمته لثلاث رؤوس وبجنب هالجبل تحديدا موجود ثلاث بيوت طين شبه مهدومة وواضح عليها اثر الهجر الطويل،،
يوسف جالس ووجهه عالجبل
فاهد منحني شبه راكع يفرش فراشه ثم طالعه بتكشيرة وهو يكمل فرش:علامك منكعم من لفينا هنيا؟
يوسف:يبه ليش نزلتم(سكنتوا)هالمحل؟
فاهد اعتدل بوقفته وهو يزفر بابتسامة وطالع الجبل وهو يأشر على القمم الثلاث بالترتيب من اليمين اليسار:ابوي عمي بادي عمي نشمي،،التفت يطالع يوسف،،من اول يوجسون اكذاب علينا يوجس عمي بادي انه كل راس(قمة الجبل)من روس هالضلع من ضرب يديهم والصدق ان هالمحل ازين المحلات للحلال
يوسف بابتسامة:ماشاء الله متوالفين بالحيل!!
فاهد وهو ينحني شبه جالس معطي ظهره ليوسف يعدل الفراش اخر مرة:بالحيل وفوقه زود
يوسف اختفت ابتسامته:ووش له يبه عملت بهم هاللون؟
فاهد وقف ترتيب فراشه وجلس عليه وهو يلتفت له بوجه جامد:وش عملت!!
يوسف:انا أريدك يبه ومن مايريد ابيه!!مير اني يــوم أوحي وجسهم يوجعني قليبي عليهم وثمن اغتاظ لانهم يطرونك بالشينة!!
فاهد يطالعه ساكت
يوسف:صحيح اني ماخبرت فاهد قبل السجن مير اني خبرت فاهد اللي راعيته عقب السجن فاهد ابوي الطيب الحنيّن اللي يذل علي ازود من روحه خابرن علم جميلة وخابرن حسوفتك مير علامهم يوجسون هالحقد بعيونهم قبل فويههم!!وش اللي غدا وانت تريدهم!!علامك عبثت بروحك وعبثت بهم معك!!وش اللي غدا بك يبه وش!!
فاهد:الحال تبدل من ذاك العلم وريدتهم(حبهم)بقليبي غدت(راحت) وحل محلها نارن تكتويني ولااقرّ(اجلس)بمحلي من حرّها
>
>
،،على وقت صلاة المغرب،،
فاهد(17سنة)راجع من الحلال بعد ماقفل عليه الشبك راجع يهرول بخطواته بوسط ابتسامة عريضة
نشمي(ولد بادي)(14سنة)يجري وراه:احترني يافاهد بالهون علامك مطيور!!
فاهد جرى وابتسامة:اتبعني يانشمي اعجل!!
نشمي(2الصغير):هذاني وراك مير مابي حيل عقب سرحتنا بالحلال(شغلهم مثل الراعي يأخذون الحلال الصباح ويرجعون معه الـمـغـرب)
،،بادي ونشمي(1 الكبير)جالسين وعادل(17سنة)ومسفر(14سنة) يجهزون العشا اللي هو عبارة عن خبز عالجمر والثاني يجهز الشاهي والقهوة حول النار اللي بين البيتين وهذا مكانها من سكنوا المكان،،
بادي طالعهم بابتسامة:هـلا هـلا ياهلا لفاهد ونشمي
نشمي1وقف وهو يفتح يديه لفاهد:ياهلا ومرحبا ياهلا فالكم العافية،،ضم فاهد بحضنه،،
نشمي2انحنى وهو يسلم على راس ابوه واتجه عند عادل ومسفر وجلس
فاهد فك عمه ورفع نفسه وهو يسلم على راسه
نشمي1مسك يده واحتضنها وهو يجلسه جنبه بينه وبين بادي:بكرة يتريح فاهد مايغدي يم محل
عادل كشر:حنا وردنا(جابوا موية)يبه حنا اللي نتريح!!
نشمي1:انكعم لا أوحي لك حس!!
بادي طالع نشمي1:علامك خنفرت كبّه يوجس اللي بقليبه!!
فاهد بدون اهتمام للموضوع هذا اصلا:ياعم الظهيرية وحنا نسقي الحلال تواجهت مع عيال مرشد واوجسوا ان يريدون عسّة(مراقبين)يم مكة
نشمي1كشر بوجهه وهو يصد عنه:لا لا مابه غدية بعيدن عن عـيـنـي
فاهد بزعل:وليش!!
نشمي1:لا يافاهد لا اذل عليك وانا عمك أنت عهد ابوك برقبتي مااحرز عليه مااحرز(مايقدر يتركه يروح يخاف عليه)
فاهد:ياعم
نشمي1 قاطعه وهو يدري ان فاهد يبي يترك الـديــرة ويشوف رزقته لكن عمه يشوفه صغير للحين:اطلب ولك مااريد واقطع هالطريا يافاهد اقطعها
فاهد وقف وهو يمسك لسانه ماعمره كسر كلمة لعمه
نشمي1طالعه:وين غادين به!!
فاهد:وسمية تحتريني،،مشى لبيتهم بسرعة،،
بادي زفر:كبّه يغدي يم رزقه يانشمي
نشمي1:والله ماااحرز عليه يغدي من عيالي يم الديار البعيدة مااشقاني مير هو لا والف لا
.
.
<بعد اسبوع>
فاهد قطع السيرة مثل ماطلب عمه تماما رغم عدم الرضا اللي واضح بتصرفاته خلال هالاسبوع
منيرة متلثمة بطرحتها الطويلة اللي توصل لتحت ركبتها وبرجى وسط دموعها واقفة على باب بيتها ممددة تقفل الطريق لااحد يدخل اويخرج
عادل داخل البيت بيده قطعة قماش فيه كم لبس وهاذي هي كل ملابسه واقف ورا امه اللي مانعته يخرج
منيرة:تكفى يانشمي تكفى لايغدي وليدي ياكثرهم غدوا ولاعودوا تكفى تكفى نصيتك يانشمي
نشمي1 بحدة:اعجلي علي يامرة الجماعة يحترونه!!
بادي جالس عند النار وهو صاد بوجهه عنهم
منيرة:مااريد اغد انت وكب وليدي يمي
نشمي1مد يده وهو يدف يدها ويدخل ويسحب عادل معه
منيرة مسكت يد عادل وبصراخ:كبّه محدن عود يغدون ولايعودون لاتذبح وليدي تكفى يانشمي تكفى
فاهد جا من بينهم يجري عالصوت وبفجعة وهو يطالع اللي يصير:علامكم!!
نشمي1انقلب وجهه وهو يطالع فاهد
منيرة تركت عادل وجرت لفاهد ومسكته من يده وهي تدفه قدامها لنشمي
بادي زفر وهو يصب له قهوة الوضع مايحتاج تدخله وهو نصح نشمي عن هالحركة لايسويها بفاهد
فاهد تقدم باستغراب مو فاهم اللي يصير
منيرة:تكفى يانشمي وغلاة فاهد بقليبك تكب عادل كبّه
فاهد فزع لعمته وتقدم وهو يوقف عند عمه:ياعم كبّ عادل واخز(تعوذ)ابليس
نشمي1بعصبية:الا هي اغد يمها(روح)واوجس لها تراه غادين يم رزقته اغد قدامي يالله يالله
فاهد مسك يده:ياعم تعوذ من الشيطان عمتي ماهي براضيتن عن اللي ينعمل
نشمي1 سحب يده وهو يمسك لحيته:واخسارة هاللحسة كود اطاوع مرة!!
منيرة بقهر:كب فاهد يغدي معه كودك صادق!!
نشمي1بصراخ:انكعمي يامرة انكعمي!!
منيرة بصراخ:كبّهم يغدون الاثنين يم مكة وأبشر بانكعم مثل ماتريد!!
فاهد انصدم وهو يطالع عمه كيف رده وترك ولده يروح
نشمي1 ضربها كف وبقهر منها:بيغدي غصبن عنش،،مشى وهو يسحب عادل وراه،،
منيرة انهارت تبكي وبصوت عالي: ياحسرة قليبش يامنيرة!!غدا به يم الصرايم يامنيرة!!اويلي على وليدي اويلي!!
بادي التفت لهم يعد ماطالع نشمي اللي مر قدامه يعاجل بخطواته يلحق عالناس اللي بيروحون لمكة وهي صعب وجدًا بل مستحيل بوضعهم يروحون لها:منيرة اغدي يم بيتش ووادعيه ربش
منيرة:علامك مافزعت يمي!!وليدي غدا يابادي غدا!!
فاهد تقدم بخطواته لعند بادي
بادي:يومش نصيتي فاهد خابرة انه مابيوحي يمي علم!!
منيرة دخلت للبيت:حسيبك الله عليك الله يانشمي حسيبك الله ذبحت وليدي حسيبك الله
فاهد وقف عند بادي:ليش ياعم منعتوني؟
بادي رفع عينه يطالعه زفر:عمك يذل عليك يافاهد
فاهد صرخ بغبنة:ويكب عادل يغدي!!!
بادي:فاهد خيتك مالها غيرك وبنات عمك لهن مسفر لو انه غدا عادل
فاهد برجفة صوته:لا ماهو بهاللون ابدن ابدن!!اوحيت العلوم من اول مير اني اوجس اكذاب وذالحين توكدت!!
بادي قطب جبينه باستغراب واهتمام:وش اللي اوحيته!!
فاهد:الحلال اللي زابينه(جامعينه)بالشبك مالك منه انت وعمي شين ابدن ماغير كم رأس وجدعتوها(طشيتوها)يم حلالي انا وخيتي!!
بادي احتدت ملامحه:اعقب!!توجس يمّنا سروقين!!
فاهد:وذالحين عمي تل(سحب)عادل وغدا به يم الخير ومنعني منه!!
بادي وقف وضربه كف على وجهه
فاهد طالعه بحقد
بادي:هالفعول ماهي طبعونا وعمك رفع قدرك فوق عياله وهاللي يشيشك(يفتن بينهم)هو اللي يوجس يمك اكذاب وانت تطاوعه!!
فاهد صرخ:وليش غدا بعادل وكبني ليش!!
بادي صرخ:اوجست يمك محدن يظلي لخيتك عقبك!!ماحنا بطاشينك يم الصرايم بيدينا!!
فاهد غرقت عيونه دموع وهو يتمنى يترك شغل الحلال والموية لكن محد بيتركه على كيفه لف عنه ومشى بخطوات سريعة لبيتهم وقف وهو يطالعه،،
وسمية(11سنة)لافة طرحتها على راسها وواصلت لتحت ركبتها بيدها صحن صغير فيه شوي تمر متجهة فيه لفاهد ووقفت وهي تطالع وجهه المخطوف وتغير وجهها بقلق:علامك يافاهد؟
فاهد بدموع نزلت غصب:ليتش غديتي مع ابوي بالسيل هاك اليوم
وسمية قشعر جسمها من قوة كلامه
فاهد مرّ من جنبها بخطوات سريعة وهو يتركها
وسمية لفت ولحقته وبخوف وهي ماتدري وش زعله وتمشي جنبه:علامك يافاهد!!وش غدا بك ياخيي؟!
فاهد دفها عنه وبصراخ:طسي عني مااريد لش شوف!!
دخل البيت وقفل الباب وراه بقوة
وسمية وقفت عالباب وهي تبكي بصمت
بادي بصوت عالي:تعالي يابنيتي تعالي
وسمية ماردت عليه وانتظرت عند الباب وسط دموعها
.
.
<بعد سنتين>
،،حول النار،،
بادي:ولد يانشمي الحلال موتّ(مات)من الجوع بهالوادي غدينا يم ام جـلاجـل يوجسون الديرة زينة بها خيرن واجد
نشمي1بهم:وشلون اغدي يم ديرتن ثانية وعادل مالفى لذالحين!!
بادي زفر وهو وده يهاوشه وهو السبب باللي حصل لعادل لكن كبح نفسه:وان ظلينا هنيا موت الحلال وموتنا من الجوع
نشمي1تنهد بضيق:اجل اوح العلم اغد معهم يم ام جـلاجــل وانا باظلي هنيا كود عود عادل
بادي:الى متى؟
نشمي:الى من الله يفرجها
.
.
مرت فترة قرابة الاسبوعين وبادي ونشمي يتناوبون بالرحلة بنقل الاغـراض لديرتهم الجديدة وانجبر فاهد يسكن ببيت عمه غصب عنه بعد إلحاح وصل لاقصى مراحله من عمه
.
.
،،يوم الترحال النهائي،،
منيرة جالسة بالبيت رافضة تخرج
نشمي بعصبية:يابنت الحلال طسّي وخرتي(تأخر)بادي عن الغدية!!اعجلي اغدي معهم
منيرة بعناد:ماني بغاديتن محل الى مايعود وليدي
بادي تنهد:اجل كبها الليلة معك وبكرة اعود يمك
نشمي بحدة:لا بالله تعقب تطس معكم غصبا عنها!!
عادل وقف على مسافة كم متر عنهم وهو يطالعهم بثوبه الابيض وشماغه الأحمر المربوط على راسه بيده أقمشة منفوخة من الاغـراض اللي بداخلها ومربوطة(نفس الكيس)وبابتسامة على وجهه وبصوته العالي اللي ينطق بشوق لهم:حي هالزيلان اللي عودت روحي يوم ارعيتها
،،الكل التفت له بصدمة،،
منيرة جرت له وهي تبكي:يمه عادل عادل عوّد عادل ياعادل
عادل ترك الأقمشة اللي طاحت عالارض من يده وجرى لها اول ماشافها تجري له
منيرة ضمته لحضنه وهي تحس روحها رجعت بعد هالفراق اللي متهم متعودين عليه ولاهم من أصحابه
فاهد يطالعه بصدمة أضعاف صدمة المتواجدين كلهم وهو اللي اعتبره ميت وان عادل راح مكانه خيرة ودفعة بلا عنه يطالعه بصدمة زلزلته بكل معنى الكلمة
.
.
رجع عادل ورجع معه الخير هالوظيفة فتحت باب الرزق على بيت نشمي وكل مردود هالوظيفة بجيب نشمي وعادل يقبل باللي يعطيه ابوه بدون سؤال عن اي شي ثاني
.
.
ام جـلاجــل
..مزرعة بادي ونشمي..
،،فاهد ونشمي2 ينقون الرطب ويجهزونه لبادي،،
بادي ياخذه ويصفه بقدر كبيرة:ها ياعادل وشلونه البحر عسى تبدّل ولا نقص؟
عادل متعلق النخلة يقصص عناقيد الرطب شهق:يااااوك ياعم وين ينقص ياكبره كبراه ماينقص منه شي
فاهد بينفجر من كثر الغيظ اللي بقلبه عليهم ويتحاشى يطالعه لانه مايدري متى بينفجر
بادي ضحك:لذالحين مهول بك!!
عادل وهو ينزل من النخلة:على كثر تهاويله بي الا اني أريده،،وقف وهو ينفض يديه ويطالعه بابتسامة،،
بادي ضحك:ياولد شوقتنا نراعيه عاد علمت وش تزهمك به جميلة؟
عادل يمشي بابتسامة:وشو ياعمي،،حشر نفسه بين فاهد ونشمي وهو يجلس،،
فاهد كشّر بوجهه ماقدر يخفي ملامح كرهه اكثر
بادي بابتسامة:تزهمك بحر من كثر ماتوجس طاريه
عادل ضحك:صدقت ماتوجس اكذاب
مسفر وقف عندهم وهو يلهث:ياعم ابوي يحتريك من اليوم
بادي ترك الرطب:عوذا منه علامه مايقضي شغلته بروحه!!
مسفر:ياعم والله ان ماغديت معي ان ابوي
بادي وقف وهو يقاطعه:خابره ابيك المطيور والله ماتسلم منه غدينا،،يمشي باتجاهه،،غدينا يمه
عادل وهو ينقي الرطب معهم وعينه على بادي الى ماابتعد التفت لنشمي اللي عن يمينه:هاه اوجست يمك شين عن القمر؟
فاهد قطب جبينه وهو يلتفت يطالعهم بفضول
نشمي2اللي مو فاهم الغاز جميلة وعادل او بالاصح مو مهتم وهو يقطف الرطب بتعب يبي يخلص وبس:تراك عليتني انت وهي هماني موجسن يمك انها اوجست مثل مالبحر يكبر يصبر الى مايكتمل القمر!!
عادل رمى العنقود بزعل:وانا وش معلمك!!
نشمي2زفر:بيعود البحر دربه وهو ماتوكد
عادل:اوجست العلم يمها؟
نشمي2بطفش:ايه اوجسته
عادل باهتمام واضح:وثمن؟
نشمي2:اوجست يابحر لاتعاند والقمر فيك بات
فاهد اتسعت عيونه وهو فهم مراسيل الغرام
عادل فزّ واقف من وناسته وهو يصرخ وسلم على راس نشمي وبعده فاهد
فاهد دفه عنه بغيظ واضح على وجهه
عادل ماانتبه من زود فرحته وتوقع مجرد كره منه لمثل هالتصرفات طالع نشمي:اوجس يمّها البحر يحتري القمر يانشمي يحتريه
نشمي2:طيب طيب
فاهد وقف وهو يمشي مبتعد عنهم وهو كله غيظ وقهر وحقد عليهم
>
>
فاهد:وبعد هاك اليوم عين فاهد ماتراعي اللي يمها تراعي اللي يمهم وتحلّفت ونوت تذوقهم ألوان الصرايم هم والديار اللي هم بها بعد
يوسف وهو يحس بقلبه انشحن غيظ وقهر من هالسبب التافه بنظره وكبح هالغيظ وهو يسأل:ماتندمت!!مالفاك يوم وتحسفت على هوايلك بهم!!
فاهد ضحك:الا بالله لفى هاليوم وايامن تلته مير ان الراس يكابر ولاعاد به طب وخوين يوزّه(يحرضه)الى من،،سكت وهو واضح عليه الندم،،
يوسف:الى منك ذبحت جميلة بيدك
فاهد بندم وحسرة:ذبحتها قبله وذبحت عادل معها،،ابتسم بغبنة من نفسه،،وذبحت خيتي معهم
.
.
<اللهم صل وسلم على نبينا محمد>
.
.













ضحكته 29-03-2020 03:15 PM

رد: رواية ياسمح المحيا جر الهجـينية/بقلمي
 
روايات
ليش طلبوا خيام عرس وتكون سبيل
وش السبب مافهمت

يارب تتم الفرحه ولا يخرب عليهم شي
احب فرحتهم احبهاا كثري منهااا تكفين تكفين
شي عجيييب البارت شي عجيب وجمييل😭💜💜

اويلي بسسس قاعد اتخيل عرس رويشد وجسار
يسسسلام بسسسس🥺💜💜

فاهد لما قال قصته حزني حيييل يالله شكثر عمه يحبه وبادي يحبه
مدري مو عارفه كيف اعلق او وين ابدأ البارت عجيييب
روايات تكفين مانبي نخسر احد منهم 😭
روايات احبك احبك احبك

rwuiit28 29-03-2020 08:32 PM

رد: رواية ياسمح المحيا جر الهجـينية/بقلمي
 
اقتباس:

المشاركة الأساسية كتبها ضحكته (المشاركة رقم 31665828)
روايات
ليش طلبوا خيام عرس وتكون سبيل
وش السبب مافهمت

يارب تتم الفرحه ولا يخرب عليهم شي
احب فرحتهم احبهاا كثري منهااا تكفين تكفين
شي عجيييب البارت شي عجيب وجمييل😭💜💜

اويلي بسسس قاعد اتخيل عرس رويشد وجسار
يسسسلام بسسسس🥺💜💜

فاهد لما قال قصته حزني حيييل يالله شكثر عمه يحبه وبادي يحبه
مدري مو عارفه كيف اعلق او وين ابدأ البارت عجيييب
روايات تكفين مانبي نخسر احد منهم 😭
روايات احبك احبك احبك

يحبك ربي وخلقه💚💚..
والخيام بيوضح السبب واذا ماوضح اسأليني من جديد وبأوضحه اكثر🤍🤍..

rwuiit28 29-03-2020 08:33 PM

رد: رواية ياسمح المحيا جر الهجـينية/بقلمي
 
،،الـجـزء الـواحـد والـسـتـيـن،،
سبحان الله والحمدلله ولاإله الا الله والله اكبر ولاحول ولاقوة الا بالله،،سبحان الله وبحمده سبحان الله العظيم
.
.
..بيت بادي..
،،حول المشب،،
ابو غازي طالع نشمي اللي من سنين طويلة عنه وهم بيوم كانوا مثل الإخوان وأكثر وسؤالهم لبعض كيف حالك وعلومهم وش اخبارك بوجود نشمي وبادي ماتكفي ولاتشبع عاطفة المحبة وبابتسامة:ولد يانشمي
نشمي ابتسم وهو يطالعه:سم يابحر
ابو غازي كشر بوجهه وهالندا يرجعه لذكريات توجعه رغم انه نسيها
>
>
..يوم زواج فاهد وجميلة & عادل ووسمية..
،،المغرب،،
عادل خارج من بيتهم يجري وقف قبال بيت بادي وهو يسمع اصوات طبول الحريم يستعدون يزفونها جلس عالارض وعيونه تهل دموع بيزفون حبيبته لكن على غيره ماهي بله زادت دموعه وهو يسمع الصوت يقوى ويقرب اكثر طالعهم وهم يخرجون وانتحب بصوت وهو يطالعها تخرج وقف وهو يكتفي بنظراته يوادعها مشى وراهم وهو يزفها معهم يشبع منها نظر يشبع من زولها للمرة الأخيرة وانتزعت روحه وهو يطالعها تدخل لبيت فاهد جلس عالارض وهو يسلّم ويرضى بالواقع القمر مابات بالبحر مثل الوعد والبحر اكتفى يحفظ تفاصيل انعكاسه جالس وعينه عالباب بضياع وكأن الحياة انتهت بالنسبة له بهاليوم
نشمي وقف عنده وهو يلهث وبفجعة:وش العلم اللي اوحيته ياعادل!!جميلة ماهي بحليلتن لك حليلتن لفاهد!!وش هالعلم!!
عادل وقف وهو يتركه مارد عليه جر خطواته بياس راجع لبيت ابوه
.
.
،،بعد يومين من زواجهم،،
نشمي:اخز ابليسك وين غادين وتال(ساحب او اخذ بالقوة)معك وسمية!!
عادل:رزقتي يبه
نشمي:مير طشوك بديرتن قشرا مابها احد!!ليتك ظليت يم مكة!!
عادل التفت لوسمية بدون اهتمام لابوه:تولمي الى مني اعود،،خرج وجرته خطواته بدون انتباه منه لقبال بيت فاهد وهاذي حالته طول هاليومين حط يده على صدره وهو يزم ثوبه ويعاتب نفسه:
يابحر لاتعاند والقمر فيك بات..
هون الموج نفسي زادت طعونها..
يابحر لاتزيد الموج ملا حساب..
لاتذكر عيوني بنظره عيونها..
صرت عايش وكاني فوق متن السحاب..
بعد مالفوح فاح الحب..
صد عن البيت وهو يعاجل بخطواته بخوف خايف يقعد بهالديرة اكثر ويجيب مصيبة له ولها وفضل يتركها وينساها ويقبل مصيره
>
>
ابو غازي:مسمى عادل،،تلفت حوله وهو ينفي هالندا عنه،،وينه بحر ماني بخابرن احدن منا يزهمونه بحر!!
نشمي زفر بابتسامة:سم ياعادل
ابو غازي:علومك ياولد وين غديت؟وين انقطعت؟حتى مسفر ماخبر يمك درب!!
نشمي:صابني ماصابك
ابو غازي قطب جبينه
نشمي بغبنة من نفسه وهو يطالع فنجاله وسط نظرات المتواجدين:مير انت غدر وانا قلة حيلة!!
ابو غازي التزم الصمت وهو يسمع لومه لنفسه
نشمي رفع عينه له وابتسم:مير انك أخير(احسن)مني ياعادل مردك ماكبيت حقك غير وانت مجبورن تكبه وانا،،ضحك بسخرية من نفسه،،تخبر نشمي مايوجس شين ابد ويوم انه أطرى(قال)يمي يريدها انكعمت مااوجست شين يمه ابد مثلي دايم هجيت بروحي وكبيتها تغدي يمه وانا غديت بروحي عقب هالسنين مثل ماهجيت بها(يقصد متعب صارحه يبي عذبة)لاني اللي اخذت اللي أريدها ولاني اللي فزعت لخيتي
ابو غازي زفر بهم:معوض خير يااخوك معوض خير
نشمي ابتسم براحة:وهذا اللي غدا تعوضت بخيرن خير ماوراه
ابو غازي يطالعه باستغراب:صحيح!!
نشمي:الحاية(الرياح العاصفة)اللي عاثت بنا كتفتها(ربطها)
ابو غازي مقطب جبينه ثم اتسعت عيونه بصدمة وهو يفهم قصده
نشمي بابتسامة:كتفته 15سنة سنة تنطح سنة ماارعى الضو وظل بحسرة وهو يحسب ان وغده قضى(ولده مات)
ابو غازي وقف وبعصبية:وش رده يمّنا يامال الصرايم!!معود يريد يعيث بنا ويحوس مريرنا من تالي!!(يقلب الدنيا عليهم)اوجس يمّه يخبرونك مين ظل على ماانت عليه أوجه كود به وجاهة!!
نشمي:مير مادرا بوغده اللي يمك!!
ابو غازي قطب جبينه
نشمي زفر:الرجل زانت اموره وتبدل ياعادل ماعاد اللي انتي خابر
ابو غازي بحدة:والله لو انه يفرش مطاي حرير ماتواثقته!!اوجس يمه لايعود الله لايرده
نشمي:مير ماعود الا انه خبر العلم
ابو غازي يطالعه بحدة:وش خبر هالشري(شرير)!!
نشمي:خير بالوغد اللي يمك
ابو غازي اتسعت عيونه وبعصبية:يعقب ماله وغد عندي!!هذا ولدي انا!!
غازي قطب جبينه بشك من اللي يسمعه ويراجع نفسه هل الكلام هو السبب بوضع بتال الحالي!!
نشمي:عادل!!اخز ابليس تراه وغده ومالك حقن تمنعه عنه!!
ابو غازي بصراخه:على شحم والله مايراعيه ولا يخبر يمّه درب!!وثمن وش يريد من ولدي هاه!!اوجس يمه ماله وغد عندي كود يريد يفاصل(يتهاوش)يغدي يمي وان حاد هه ولا هه غديت انا فاهدن اشر منه!!
نشمي:ياعادل الولد لابد يتخبّر ابوه لمتى وانت تكباه(تخبيه)مرده يعلم العلم ويعلمونه هم بعد!!
ابو غازي:محدن بيخبر شي كوده طاس اوجس كوده صحيح يذل عليه وبه ذرة رحمة يكب بتال عنه ويطس عنّا الله لايرده،،مشى بخطوات سريعة وتبعوه جسّار وغازي،،
نشمي زفر بهم وهو متوقع ردة الفعل هاذي منه لكن المصيبة ابوه وش بيسوي لاعرف
.
.
الجد نشمي يمشي ورا الجد بادي من فترة خرجوا من الديرة وللحين بادي مستمر بمشيه وقف:بادي
الجد بادي وقف والتفت له يطالعه باستغراب
الجد نشمي:اوجس العلم يابادي؟علامك؟
الجد بادي يطالعه ساكت
الجد نشمي:اوجس ماتريد وتم(يقصد شروط زواج جسّار)
الجد بادي:متحسف يانشمي؟
الجد نشمي قطب جبينه باستغراب من هالسؤال
الجد بادي بتشديد على كلامه:اوجس يانشمي بك حسوفة؟
الجد نشمي:من مبطي!!وانت خابرن لفياتي يمك وتردني عنك!!
الجد بادي زفر وبندم:بي حسايفن واجدة يانشمي واجدة!!
الجد نشمي تقدم له وصار قباله والفاصل بينهم خطوة:مافات مات والله يتجاوز عنا يابادي ماظل كثر اللي غدا وانا اخوك!!
الجد بادي بتردده:اذل يانشمي(خايف)ذالن منك!!
الجد نشمي اتسعت عيونه:من وشهو يابادي؟!!
الجد بادي:اذل اتحسف على عملتي اللي ذالحين
الجد نشمي زفر وهو يمد يده ويمسك يد بادي ويحتضنها بين يديه ويضغط عليها وهو يطالعه:ياعلي بصريمتن تقصم ظهري على مراعاتك وتفزع بي ولايخارجوني(يدعي على نفسه)
الجد بادي سحب يده من يدين نشمي وبفجعة:عوذا
الجد نشمي مسك يده ماتركها وبابتسامة:الله يسامحنا باللي مالنا به علينا بالوغدان اللي ذالحين مانريد ينعمل ماانعمل من اول
الجد بادي بحسرة:وجميلة وزاهية ومتعب وعذبة وعادل ووسمية عويناتنا يانشمي عويناتنا واللي انعمل بهم من ورا هالفاهد وورانا وذالحين هالخسيس والضعيفة بخوت وبتّال واشيب عـيـنـي عنه هالضعيف
الجد نشمي شهق:بادي!!علامك!!
الجد بادي قاطعه:قليبي مايدنى(مايتحمل)صريمتن تالية يانشمي
الجد نشمي مشى وهو يسحبه معه راجعين طريقهم وكتفه ملاصقة لكتف بادي:ولت عنا الصرايم وغدت ذالحين مالنا غير الفرح يابادي
الجد بادي بتكشيرة:مير يانشمي
الجد نشمي قاطعه وهو يوقف ويلتفت له:اعلمك وش طرا لي؟
الجد بادي وهو يشوف تهربه الواضح:نشمي
الجد نشمي بابتسامة:طرت لي هاك الهجينية الشينة لزومن اوحيها كود تعود بادي من تالي
الجد بادي بابتسامة غالبها الحزن:مير اني أجرها دايم ولابها حيلتن علي يانشمي
الجد نشمي مشى وهو يسحبه معه:عني ماجريتها بحسك جريتها بروحك!!
الجد بادي زفر وهو يمشي وجرها بصوته:
ياعين هيدي عن العبرات..
‏مافات خليه ياعيني..
‏يوم الغلا ماخذ(ن) سجات..
‏واليوم وينه وانا ويني..
ياشين لاتدور الزلات..
ماصار شي(ن) تجازيني..
‏واليا طرا لي زمان(ن) فات..
‏كنك على الكبد تكويني..،،سكت وهو يزفر،،
الجد نشمي بصوته الثخين كملها:
ماعاد يرجّع زمان(ن)فات..
لو صحت له بالعذابيني..
.
.........****..........
يوم جديد
.........****..........
..بيت بادي..
بخوت فتحت باب الغرفة باستغراب من نومتها الطويلة وهي عادة تصحى بدري مع الصلاة مثلهم
عباير واقفة قدام مرايتها الصغيرة اللي بالدولاب بجلابيتها البيضا الماسكة على جسمها واكمامها الواسعة بذهبها اللي تلبسه مثل عادتها تحط كحلتها تهمهم
بخوت وهي تطالعها من فوق لتحت:يالله صباح خير
عباير ابتسمت بدون لاتطالعها:هـلا بالعروس ياهلا وثمن ذالحين ماهو بصبيحة ذالحين إضحيوية(ضحى)
بخوت كشرت بوجهها:كبي هالعلوم عنش وعلميني وين غاديتن به؟
عباير وهي تحط الروج:غاديتن يم عرب معتلين نتحمد لهم بالسلامة
بخوت تكتفت باستغراب:من هم؟
عباير وهي تنحني لعبايتها اللي جنبها عالارض وتلبسها:ماعليش انتي مير عينش يم جدش وخالش وانا اتحمد عنش يابخوت وكود حلايا وعت(صحت)ولميها تغدي معي
بخوت بشك:وين غادية ياعباير؟
عباير تلف طرحتها وبنرفزة:غاديتن يم عاقور!!علامش!!وين غاديتن به يعني عند مزون
بخوت:ايه ووين بتغدين انتي ومزون؟
عباير:يم صريمة وش عليش مني!!
بخوت بحدة:عباير كبي عنش الصرايم!!
عباير:وينها به حلايا
بخوت:راقدة لذالحين
عباير مرت من جنبها تخرج من الغرفة وانصدمت وهي ماتشوف احد حول المشب:وين الخليقة!!
بخوت:جدي لفى يمّه بعد الصلاة خويه اوجس يمه علمن وثم غدا وعوّد وغدًا جدي معه ولااطرى شين ابد
عباير عقدت حواجبها:جدي وخويه!!
بخوت:ايه جد راشد
عباير ابتسمت:ااااه جد جسّار
بخوت ميلت فمها ماعجبها الكلام وكملت:وخالش غدا يقضي اموره
عباير وهي تمشي للباب:عاد أتوكل يم العرب وماني بمطولة بأعود بدري
بخوت لحقتها ومسكتها من يدها:عباير وش ناويتن تعملين؟
عباير سحبت يدها وبابتسامة:والله خير واختش خيررر
.
..بالسيارة..
جسّار جالس ورا الراكب وبزعل:يمه اسبوعين تدرين وش يعني اسبوعين!!
ام غازي جالسة قدام مكان الراكب تكلمت بنرفزة من كثر زنّه(يحنّ)طول الطريق:لاحول الله ياجسار تراك أزعجتني بهالسالفة مو انتي اللي تبي الزواج!!
جسّار تكى بين كرسي الراكب والسواق وهو يطالع امه بضيقة:يمه اسبوعين مستوعبة اسبوعين!!
ام غازي:اللي يسمعك الحين يقول انت اللي بتلف الأسواق وتختار!!
جسّار بنرفزة:يمه ترا ماني بغازي!!
غازي يسوق اتسعت عيونه:وش دخلني انا!!!
ام غازي:اهجد بس وخل عنك!!وبعدين ترا زواجك بالديرة يعني لاتشيل هم
جسّار:والبيت!!!
ام غازي بعصبية:ابوك يتصرف انت علامك!!
جسّار:وهالشرط اللي ماادري وش يبي بالحياة!!
ام غازي:تتيسر ان شاء الله انت بس فكني منك احنا طالعين نتمشى ولا تنكد علي!!
جسّار تكتف وهو يرجع ورا ويتكي بظهره عالكرسي وصد بوجهه عنهم وواضح عليه الزعل
غازي طالعه بالمراية وابتسم:الحين مو انت تبي تتزوج بسرعة!!
جسّار وهو للحين صاد:ايه،،التفت وهو معصب،،بس السالفة ضيوف من برا ويبي لنا وقت عشان نجهز كل شي زين!!واسبوعين ماتكفي ابد!!
رهايف جالسة ورا غازي وهي تسحب جك الموية اللي فيه موية للنص عند رجولها وتحطه بحضنه:عاد تدري وش ينطبق عليك بهالاسبوعين
جسّار يطالعها بتكشيرة:وش!!
رهايف دقت وهي تغني باستعباط عليه:موجوع قلبي
جسّار بتكشيرة:اوص بس
رهايف مكملة حتى وهو يتكلم:والتعب بيا..من اباوع على روحي ينكسر قلبي عليّا
جسّار سحب الجك من يديها بقوة وهو يرفعه بيضربها فيه:اوص بس لاأهفك فيه الحين
غازي:جسّار!!
جسّار نزله لحضنه وهو يصد بوجهه ويستغفر
ام غازي بعصبية:رهايف ووجع انطمي عن اخوك
رهايف كشرت وهي تسكت:مايعجبكم شي اعوذ بالله!!
ام غازي:احتفظي بأشيائك لنفسك وبعدين ياجسار قلت لك تتيسر!!
جسّار تنهد بصوت
غازي:عاد تدري من المحظوظ صدق
جسّار طالعه وهو ساكت
غازي: اللي جنبك
رهايف وهي تنفث على نفسها:قل اعوذ برب الفلق حولينا يارب ولا علينا!!
غازي بابتسامة وهو يطالعها بالمراية:للحين ماحددوا زواجك احمدي ربك ولا ابوي مايعدي اسبوع
رهايف:بسم الله علي جالسة على قلوبكم ماني بمتزوجة ارتحتوا!!
غازي:وبعدين ياجسار صح اني باسبوع خطبت واثثت واتزوجت وتيسرت وكانت احلى ليلة
جسّار:وبعدين؟
غازي زفر بابتسامة وهو يذكر تفاصيل ذيك الليلة اللي اجتمع فيها بعذاري:وبعدين لاشفتها بذيك الليلة ووصلك صوتها الهادي المرتبك بيطير كل تعبك بثانية وبتقول بوجهها بدون ماتحس بنفسك
حكيها حكمه لو تقول ياليل دان..
لاحكت تقول تمزح وهي من جدها..
كنها ضبي(ن) تذيـر وقفـا مـع طمـان..
في فياض(ن) غاط(ن) العشب الأخضر خدها..
درةٍ ماتطلـع الا بحفـل ومهرجـان..
جسّار ابتسم وهو يسمع شعره ويفك كشرته شوي
غازي مستمر:
من بحور(ن) ماعرف جزرها من مدهـا..
لو لمحها عـادل امـام قـال بعنفـوان..
ايه دا كله يالااااااهووووي وقبّل يدها..
ام غازي ضحكت بخفة
رهايف قامت من مكانها وتكت بين امها وغازي وتطالع غازي وبابتسامة عريضة:ياعيني ياعيني ياغازي قول الصدق قلت لعذاري،،صوتت،،يااااالهووووويي!!!
غازي كشر بوجهه:والله لااهفك رهايف وتعرفيني
رهايف اختفت ابتسامتها وهي ترجع مكانها:اسفة اسفة
جسّار زفر وهو يفكر بكرف هالاسبوعين وبهم:رهايفوه
رهايف طالعته باستغراب
جسّار وهو يدق:صفقي صفقي
رهايف صفقت بحماس وهي تصرخ
جسّار غنى:
انا اللي عذابي من حبيبي ...
وانا اللي همومي من همومه..
سرى الليل ما حي(ن)ٍ فطن لي ..
سرى الليل ودموعي تهلي..
رهايف تصفق وتغني معه
ام غازي ضحكت وهي تلف له تطالع استعباطه وهذا يعني انه اقتنع وتقبل سالفة موعد زواجه
غازي عقد حواجبه وهو يهدي بالسيارة ويطالع السيارات قباله:يمه متاكدة ان ذا الطريق؟
ام غازي التفتت لقدام تطالع المكان واتسعت عيونها وهي تطالع اللي يمشي لجهتهم مبتعد عن السيارات:وقف
غازي وهو يلف يبعد عنهم:المكان فيه ناس يمه!!
ام غازي بصراخ:قلت لك وقف ياغازي!!
جسّار ورهايف سكتوا ووقفوا عباطتهم
غازي وقف بصدمة من صراخ امه عليه
فاهد اللي يمشي مبتعد عنهم يتسمى شوي بعد ماوصل له نشمي كلام عادل يفكر بحل سلمي رغم انه يقدر يقتحم المكان لكن لعيون ولده اللي مايعرفه مايبي يسبب ربكة له خصوصا وهو مايدري وش وضعه معهم زفر وهو يرفع عينه من وصله صوت السيارة عقد حواجبه وهو يوقف يطالعهم
ام غازي نزلت من السيارة وهي مثبتة عينها عليه مو مصدقة وجوده وبشك:فاهد؟
فاهد قطب جبينه باستغراب من هاللي تكلمه:وصلتي؟من؟
ام غازي اخذت نفس وهي تصدق انه قدامها فعلا
فاهد يطالعها بشك ثم اتسعت عيونه بصدمة:وسمية؟!!!
.
..بيت مفلح..
الجد بادي:والعلم واوحيته من الرجل يامفلح ها وش توجس؟
مفلح:ياحيهم والنعم بهم خير من لفى وخير من عنانا طالبن قرابة
الجد نشمي:سلمت سلمت والسبعة انعام بكم يامفلح
مفلح:الولد والنعم به مابه قصور ودامكم لفيتوا من يم بادي اجل تم ياعلهم مبروكين
راشد اتسعت ابتسامته وهو يسمع الرد الصريح مباشرة بدون انتظار لفترة
الجد نشمي:الله يبارك بك مير ماودك تشاور البنية
مفلح:رايها من رايي!!وثمن مثل ماشريتونا شارينكم عساه بالبركة و عالبركة
الجد نشمي تنهد:يبارك بك وبعمرك
مفلح:عاد نحتريكم بكرة
راشد بصدمة وسط وسع عيونه:ها!!!
الجد نشمي:بكرة!!
مفلح طالع راشد:لالفيت يمّنا بكرة اغد ومعك ذبيحتك وكم واحدن مِن مَن تغليه مع المملك ولاتعشينا اغد مع مرتك يم بيتك والله يفتحها بوجيهكم ويجملها
راشد انجلط من سهولة الوضع اللي يقوله
الجد نشمي:ياابن الحلال الناس ماهم مثل اول ذالحين مهر وزواج و
مفلح قاطعه بحدة:مير حنا مالنا احدن ابد وهذا الصحيح وكودك ملزم على المهر جب معك إغويشتين(2بناجر)وسلسلة وخاتمها وحلقها والذبيحة تعشوا وكلن يسري يم مرقده
راشد طالع جده بورطة
الجد نشمي:ياابن الحلال حنا ماولمنا شين والديار بعيدة!!
مفلح:اجل تدري بـعـد بكرة ولا توجس ماهونتها يانشمي!!
الجد نشمي التفت لبادي
مفلح مسك يد نشمي وبإصرار:ياابن الحلال يسر ولاتعسر اوجس تم
راشد طالع جده وهو يتمنى يرفض لكن خاب رجاه وهو يسمعه
الجد نشمي زفر بقلة حيلة:تم تم
.
..بيت غيث..
هدية فارشة فراشها بزاوية الحوش شبه متمددة ومتغطية وهي ترد عاللي يتحمدون لها بالسلامة بطفش
ام غيث اللي مجبورة تجلس عند هدية رافعة نقابها كاشفة عن وجهها جالسة وسط الحريم اللي يتحمدون بالسلامة لهدية وتسولف
نايفة المغصوبة على الروحة تقهوي الحريم
عباير دخلت والباب متروك مفتوح للي يزورون هدية وبصوت عالي:ياعل فالش العافية ياعله بعدوينش ياهدية
مزون وراها وبهدوء عكس داخلها اللي يتفجر حماس:السلام عليكم
هدية ابتسمت بوناسة وهي تسمع صوتها واعتدلت وهي ترفع نفسها جالسة وممددة رجولها
ام مزون اتسعت عيونها وهي تشوف بنتها ورا عباير
مزون تتحاشى تطالع امها ورغم انها خرجت من البيت بدون علم امها لكن استأذنت ابوها اللي سمح لها مانقدر تفوت اللي بيصير وتسمعه من عباير لازم تشوفه بنفسها وتحضره
ام غيث كشرت ثم بدلت هالتكشيرة بابتسامة سريعة غصب وبقلب زادت غبنته بعد هدية كملت بعباير:يالله ان تحييها ياحياها
نايفة كشرت بوجهها وبهمس:الله لايحييك!!
عباير وهي تنزل طرحتها عكس اغلب المتواجدين بنقاباتهم وتسرع بخطواتها لهدية وانحنت تسلم عليها بعد ماوصلت عندها وبوسط هالسلام نطقت:ياعلّه بعدوينش ياهدية
هدية:امين امين ياعباير
عباير ابتعدت وهي تترك المجال لمزون اللي وراها وجلست قبال هدية بمسافة
مزون سلمت عليها:خطاك السو ياهدية
هدية:يجزيش ربي بالخير يامزون
مزون مشت بسرعة لعند عباير وهي مثبتة عينها عليها ماتبي تطالع امها
عباير:والله انش اسمن على مسمى هدية يعقّب من عمل بش هاللون
هدية وبود:الله يسلم روحش ياعباير مير الشكوى لله
ام غيث انصدمت وهي تسمع تلميحات هدية ومصدومة اكثر من التوافق الغريب بينهم
عباير ابتسمت وهي تسمع رد هدية:مير وانا اختش اللي يهوي يمش هفّيه بيمناش لاعدمت(اللي يجيك ناوي شر اضربيه بيمينك)
هدية:صدقتي صدقتي مااوجستي اكذاب مير وش الدب كود ان هالصريمة ابلى منش!!
عباير شهقت:اغدي صريمتن أقوى منه وتجني به!!
نايفة تتصنع عدم الاهتمام وهي تغلي من داخلها وقفت عندها تصب القهوة لها:الله يعين من هالعلوم البايزة اللي مابها طب!!
عباير بابتسامة:بسم الله عليش اَي بالله صادقة
نايفة كشرت بوجهها ومدت لها الفنجان وهي تطالعها باستغراب
عباير وهي تاخذ الفنجال منها:علمن بايزن يسد النفيسة
ام غيث قطبت جبينها بشك
مزون ابتسمت
عباير بروقان:الله يحفظش دايم توجسين اللي يطري علي
هدية بفضول:وش علمش ياعباير
عباير نزلت الفنجال وهي تطالع هدية وبنص عين:توجسين ماعلمتيه!!
هدية:لا بالله ماعلمت شين اوجسي وش وراش؟
عباير:البارحة لفانا الدكتور واهله
هدية باستغراب:دكتور؟!!
عباير:ايه اللي خاطبن بخوت
ام غيث كشرت بوجهها
هدية:ماشاء الله ماشاء الله ياعله اول الفيد(الخير)
عباير وهي ترفع يديها:امين امين ياهدية
هدية:وثمن؟
عباير:ابدن لفوا اهله وامه ياويحي ياامه!!
ام غيث نزلت نقابها تخفي ملامح وجهها لاتفضحها
عباير:دوا دوا تطيب من عقبه العلل اويلي هو من منطوقن زين هو من نفسن طيبة،،زفرت وسط اااه طلعت من قلبها،،وش اوجس ياهدية ووش اكب ياتبارك الرحمن اللي هاذي اميمته وشلون غادين هو!!
هدية:ماشاء الله تبارك الله عسى الله يزينها بوجهها ياعباير
عباير زفرت بابتسامة:ايه ياهدية العوض ولو انه ابطى مير انه جزيل الحمدالله الف حمد وشكر يااختش،،اتسعت ابتسامتها وبحماس وهي تتربع زين،،مانشدتيني وش اوجس؟
هدية قطبت جبينها:عساه خير وش؟
عباير:عيّا يعمل العرس بخيمة عروس الديرة
هدية باستغراب:اجل وين به!!!
عباير:بيعمّر(يبني)هاك الخيمة خيمة عروسن ماغدا مثلها بالديرة ابدن ولا ماهو برجالن لحالهم وللحريم مثلهم خيمتين ماهي بوحدة
هدية:ماشاء الله ماشاء الله والله وانهل الخير يمكم ياعباير ياعله اوله
عباير:امين امين وفوقها بيكبها سبيل لعيال الديرة من يريد يعرس يعرس بها
هدية ضحكت:وثمن تزهم هاك الخيمة بخيمة رجل بخوت والمغتاظين يموتون من الغيظ
نايفة كشرت بوجهها
ام غيث عضت على طرف شفتها بغبنة
عباير شهقت وهي تستغبي:وش هالوجس الله يهديش ياهدية عيب عيب تزهم بخيمة السبيل
هدية:مرد هالسبيل يزهم هاللون رجل بخوت،،ضحكت،،
نايفة اللي تقهوي الحريم انفجرت تضحك
عباير تطالعها بابتسامة وهي تنتظر اللي بعد هالضحكة
نايفة التفتت تطالع عباير وبابتسامة:وعسى هالدكتور اللي طايرتن به يعلم بسواياها!!
ام غيث ابتسمت براحة وهي تسمع كلام بنتها
مزون كشرت بوجهها
عباير بابتسامة:ايه يخبر!!
نايفة اختفت ابتسامتها بحدة:ويخبر ان عليها بنية!!
ام غيث قطبت جبينها
عباير بابتسامة:قابل بها وببنيتها
نايفة تطالعها بعدم تصديق
عباير:وثمن ايه يخبر!!يخبر الظليمة اللي وقعت بها من ناسن مايخافون الله ياعل الصرايم تحتويهم
ام غيث بحدة:مير انه اخذن جزاه هذا هو راعيه بالمستشفى ماباهله حيلتن به
عباير بحدة:الظليمة مردها إتجلى والمدسوس يطلع
ام غيث بحدة:وش تعنين ياعباير!!
هدية بحدة:عنت الظلوم مرده يكسر طال الوقت ولا قصر!!
ام غيث اتسعت عيونها
نايفة بغبنة وهي تطالع هدية:اعقبي!!
عباير رفعت يديها:يشهد الله وثمن انتوا مااوجست شي
هدية ارتفعت حواجبها وهي تطالع نايفة:علامش!!مااوجست الا الصحيح!!،،ابتسمت،،كود تعلمين شين مانعلمه اوجسيه يانايفة؟
نايفة عضت طرف شفتها بقهر وهي تشد عالفناحيل بيدها اليمين والدلة بيسارها وهي تطالع هدية:عليم الله مابش خير لاهلش لولا الملامة تغدي يم ابوي لاأجدع هالدلة بين عويناتش،،نزلت اللي بيدها ومشت،،
ام غيث وقفت:هاذي توالي علومش يمّنا ياهدية؟!
هدية:محشومة ياعمة وانا مااوجست شين ابد مير انتم اغتظتم والله العالم وش اللي اغتظتوا منه!!
ام غيث:اللي غاظنا ترعينه كبر الشمس(سبب الزعل واضح وضوح الشمس)
هدية:هذا انتي ذالحين ياعمة توقعين بس ظليمة وانتي تغدين يم شين مانويته حتى اوجسه!!
ام غيث عضت شفتها وهي تسمع تهربها
هدية:وكود ان خويطرش تكدر من وراي،،وقفت وهي مالت شوي بدوخة مسكت راسها وهي تحط يدها عالجدار تسند نفسها لاتطيح،،
ام غيث قطبت جبينها وسط تكشيرة ارتسمت على وجهها وهي تطالعها
عباير عضت شفتها تمسك ضحكتها
هدية اعتدلت بوقفتها وهي تجر خطواتها لعمتها اللي قبالها وقفت عندها وهي تمد يدها لورا راس ام غيث وتقربه منها وترفع نفسها على اطراف اصابع رجولها تبي تسلم عليها
ام غيث رفعت يدها وهي تدف يد هدية اللي ورا راسها عنها
هدية رجعت ورا وهي تتصنع الدوخة
عباير شهقت:افااا ياام نوفة!!!
ام غيث طالعت عباير وهي تزم العباية بين يديها من الغبنة
عباير:تردين بنتش وهي اللي ماهان خويطرش يمّها لو انها مااخطت!!افاا افاا!!
هدية قربت وهي تبي تسلم عليها بالقوة
ام غيث تسحب نفسها منها
ام طلق:بنيتش ياام غيث علامش عليها!!اخزي ابليس وكفي غيظش عنها
ام غيث استسلمت وهي تحس الموضوع يكبر وهي ماتبيه يكبر بلعت غصتها من كثر القهر
هدية سلمت على راسها ويدها وماسكة يد ام غيث ماتركتها:والله ياعمة مااريد يمش غيظ يعلم الله يعلمه مير حسيبه الله اللي لفى بينّا بشره
عباير بصوت وهي ترفع يديها:امين امين
ام غيث تطالع عباير بغيظ
عباير وقفت:مير ان يوم انكم كل أبوكم متليمين(مجتمعين)حياكم الله على عرس بخوت الخميس مير ها ماهو بذا تواليه نوبتين حياكم جميع
،،اعتلت التباريك لها من الموجودين ماعدا ام غيث وان مزون اللي مانطقوا كلمة،،
عباير:وياهدية ياعلش للعافية وعسى من عمل بش هاللون
ام غيث قاطعتها بحدة:محدن عمل بها شي
عباير وهي تتصنع الغلط:يوك عـلـي غديت اهذري(تخربط)المهم ياعل فالش العافية ياهدية والله وان ماحلفتيني ياهدية ان اغليش من اول وكل يومن اتفطن غلاش يزود عن اللي قبله
هدية:سلمتي سلمتي
عباير:عاد عليش وجه الله تغدين اريدش تبيضين الوجه قدام اهل المعرس
هدية بابتسامة:ابشري لش اللي يشبه من الزين
ام غيث سحبت يدها من هدية ومشت بسرعة
عباير بابتسامة:ياعلش سالمة ياهدية صحيح انش هدية اَي بالله هدية
.
..بالسيارة..
راشد يسوق بوجه متجهم من اللي صار معه
الجد بادي جالس جنبه
عذبة جالسة ورا راشد ساكتة مصدومة من اللي تسمعه منهم
الجد نشمي جالس ورا بادي زفر:وش علمك يابادي؟
الجد بادي:والله الرجل وذا علمه وكودكم رايدين عرسن يلتمون به الخلق اعملوه بدياركم
راشد اخذ نفس عميق وهو يكتم كلامه اللي يبي يقوله
الجد نشمي طالع راشد:وش رايك ياولد؟
راشد زفر:اللي تشوفونه ماعندي مشكلة
الجد نشمي تنحنح وهو يطالعه بشك:والله مدري عنك!!
الجد بادي:اغد مع سعود شوين يم الحلال وخذ ذبحيتك وزودن عليها ثلاثن بعد
الجد نشمي:وشو له اربع!!قل وحدة عشا عرسه والثانية لأهل البنية والثالثة والرابعة ليش!!
الجد بادي:الثالثة والرابعة مني وحدتن للي بالبيت يتعشون منها ونغدي ببعضها يم جيرانا والثانية لثلاجة العرسان
راشد اتسعت عيونه:يكثر خيرك ياجد لكن ماله داعي ماتقصر مشكور
الجد نشمي:صدق راشد مامن قصور ورايتك بيضا يابادي مير حتى لو انك اوزمته(اصر عليه)وين يغدي بها!!
الجد بادي:هين امرها ماتغدي يم محل تحتريه بالشبك
راشد بورطة:والله ياجد
الجد بادي قاطعه:اوحني ياراشد كودك عييت عنها بتاخذها وفوقها موجابك(عانية او قويدة)
الجد نشمي:بادي علامك!!مامن قصور خابرينك يارجل!!
الجد بادي:ذالحين وش عليك انت!!الوجس ماهو بيمك يم الصبي،،طالع راشد،،ها ياولد وش توجس؟
راشد زفر بضيقة
الجد نشمي:اغد ياراشد يم بيت جدك وثمن نغدي يم المحافظة كود نلحق على السوق نتقضى
.
ام غازي تطالعه بصدمة مو مصدقة وجوده
فاهد تقدم ببطئ وهو مو متاكد تماما انها اخته وهو يطالع الرجال اللي بالسيارة وبشكه:وسمية؟
غازي نزل من السيارة واتجه لامه
جسّار فتح الباب وعينه على امه وهو يكلم رهايف:لاتنزلين خليك،،نزل وهو يقفل الباب وراه،،
فاهد وقف وهو يطالع غازي اللي وقف عند امه:انتي وسمية صحيح؟
جسّار وقف عند امه
ام غازي اخذت نفس:صحيح صحيح مااخطيت وسمية
فاهد اسرع بخطواته بلهفة بوسط ابتسامته العريضة وهو فاتح يديه لها وكله شوق لأخته الوحيدة:ياحياها ياحي خيتي ياهلا ياهلا بوسمية،،وقف عندها وهو يبي يسلم عليها،،
ام غازي رجعت عنه بخطواتها لورا وبحدة:الحمدلله على سلامتك هذا انت حيّن وبنعمة!!
فاهد كشر بوجهه ولا لامها ابدا على حركتها زفر وهو يشيل التكشيرة من ملامحه:ماودش تسلمين على خيش
ام غازي بحدة وسط استغراب عيالها:اوجست يمك ارعيتك بعافيتك يسد ماارعيته ماله لزومن هالسلام
فاهد:علامش ياوسمية ماخبرتش هاللون!!
ام غازي:انا هذا انا ماتبدلت ابدن مير اللي يرخصنا نرخصه
فاهد انكسر قلبه من كلامها:اخوش ياوسمية اخوش!!كود يتبدلون جميع انتي خيتي ماإتبدلين!!
ام غازي بغبنة:خيتك!!ذالحين توجس خيتك!!واللي عملته بخيتك هين!!مير مشكور وجزيت بالخير مرد عملتك لفت يمي بخيرن جزيل
فاهد زفر وهو يطالع عيالها:ولخويطر هالخير اللي لفاش من وراي مامن محنّة(من الحنان)يمي؟
ام غازي بحدة:ابدن،،وهي تمد يدها وتقرب أصابعها السبابة والإبهام من بعض،،ولا هه
فاهد يطالعها بضيق وهو متوقع هالشي
ام غازي:مير اوجس هالنوبة يوم انك عودت وش تريد؟
فاهد:اريد وغدي
غازي احتدت ملامحه وهو يطالعه وفضل يسكت وبالموضوع بيد امه
ام غازي اتسعت عيونها بصدمة:وش تريد!!!
فاهد:اريد بتال وغدي اللي ماعلمته بتال ياوسمية
ام غازي بعصبية:وش تريد به!!ناوين تذوقه الصرايم من وراك!!ابدن مالك وغد يمّنا!!هذا هو ربى عندي عمر ولانشدت عنه ذالحين تريده!!اي بالله رايدن تذوقه صرايمك مير مالك به ابدن يافاهد مالك وغدن يمّنا هاللي تنشد عنه وغد وسمية وغيدي مالك به اوحيت!!
فاهد:ماهو بعلى هواكم ابدن ابد توحين!!لاانتي ولا عادل!!الولد ولدي رضيتوا ولا اغتظتوا ولدي ياوسمية ولدي
ام غازي بقهر:وذالحين يومك توجس هاللون تحسبه بيفزع يمك!!
فاهد انقبض قلبه اكثر وهو يسمع هالكلام ينعاد
ام غازي:لا علم علومك بيغدي يمك!!هو مرض هذيك الليلة يوم علم سواتك بجميلة تريده يغدي يمك وهو متونس بشوفتك!!
فاهد عض طرف شفته بغبنة
يوسف وقف عند ابوه باستغراب وهو يطالع اللي تصرخ بابوه:يبه!!
فاهد التفت ليوسف يطالعه
ام غازي قطبت جبينها وهي تطالعه
جسّار انصدم وهو يطالع يوسف:ابوك!!!
يوسف هز راسه باستغراب:ايه
فاهد رمش وهو يستوعب مسك يوسف من يده وهو يلف وجهه لوسمية:راعيه ولدي
ام غازي:وثمن!!
فاهد:ولدي يعلم العلوم كلها كلها ياوسمية وقابلن بي ورايدني
ام غازي دخل قلبها الخوف
فاهد بحدة:وش يرد بتال عني!!وش يمنعه لايريدني!!وثمن فاهد اليوم ماهو بفاهد امس وانا شاريه ورايدن قربه
ام غازي شدت قبضتها تخفي رجفتها:كودك توجس الصحيح امنعه تالي شرك لايتبعه وطس عنا
فاهد بعناد:ابدن ماني بغادين لامني أوحيه يوجس مااريد لك شوف!!
ام غازي:هذا تالي علمك؟
فاهد بتأكيد عـلـى كلامه:ولا وراه
ام غازي بثقة:ذالحين يغدي يمّنا عادل وولده ونراعي ولدنا يتبع من يافاهد
فاهد كشر بوجهه وخاف من كلامها
ام غازي عطته ظهرها وهي متجهة للسيارة ووراها عيالها
.
.
<اللهم صل وسلم على نبينا محمد>
.
.

هـــدبـــ خــجــلانــــ 31-03-2020 05:10 PM

رد: رواية ياسمح المحيا جر الهجـينية/بقلمي
 
سلامووو
كيفك رواياات

الــ بارتات الي فاتتني مره واو
ماقدرت ارد عليهم بسبب النت
الي انقطع عندي فجأه صرت
هدي الايام مقصره بحق الروايه مرا مرا
الروايه كل مالها تجنن اكثر
واسلوب ولا اروع
تسلم الانامل الي خطتهم





♥♥♥**♥♥♥**♥♥♥


بتــال
علـ كثر حماسي لمقابلته لابوه
الا انو بدات احتار ايش بيكون
ردت فعله هلـ بيرضا في ابوه او لا
او مثل ماقالت وسميه
والحاله الي هوا فيها وايش اخرتوا


♥♥♥**♥♥♥**♥♥♥

بخـــوت&جســـار

واوو واخيرا قرب عرسهم كثير
متحمسه لهم
فرحه جسار بزواجه ايش بيقابله
من شعور في بخوت نفسها
وايش قصه الشرط حقتها ماافتهم لي


♥♥♥**♥♥♥**♥♥♥

راشـــد&هيــفــاء

ماتوقعت توافق
انصدم ان عرسها خلال يومين
بجد الاحداث صارت حماسيه مــــــراااا

♥♥♥**♥♥♥**♥♥♥

فـــاهــد

كثير شافقه عليه مهما سوا
يضل اب ويريد ابنه ايش
دخلهم يمنعووه منوو


السبب الي خلاه يحقد علـ
اولاد عمه وعمه كثير تافه
مايستاهل هذا كلوووه



♥♥♥**♥♥♥**♥♥♥

عبــايــر

هذي البنت تبرد القلب والله.
تستاهل ام غييث
توي اكتشفت انو المتهم مرزووق
ومبرئين غييث الحقيير

وماتوقعت هديه تستقبلها بكذا تراحييب

كثير حبيت الموقف تبعهن

♥♥♥**♥♥♥**♥♥♥


بــ انتظارك ♥


الساعة الآن +3: 11:43 AM.


موقع غرام موقع سعودي خليجي عربي يحترم كافة الطوائف والأديان ومختلف الجنسيات


SEO by vBSEO 3.6.1