غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام

عـودة للخلف   منتديات غرام > منتديات روائية > روايات - طويلة
 
أدوات الموضوع طريقة العرض
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 17-09-2019, 10:57 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رواية ياسمح المحيا جر الهجـينية/بقلمي


السلام عليكم ورحمة الله وبركاته
.
أتمنى هالرواية تحوز إعجابكم وتبقى مواقفها اللطيفة والحزينة على حد سواء بذاكرتكم وتكون من الروايات اللي أخذت مكان بالقلب والذاكرة❤❤
.
ودمتم بحفظ الرحمن
.


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 17-09-2019, 11:05 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية(يـاسـمـح الـمـحـيّـا جـرّ الـهـجـيـنـيـة)


.
روايـة(يـاسـمـح الـمـحـيّـا جـرّ الـهـجـيـنـيـة)
.
بــتّــال(29سنة):إنسان هادي جدا بطبيعته لكن تغير هالشي بسبب شلته وصار جوه يعتمد على حسب الموجودين معه اللي بقلبه عند غازي اخوه بس وسماجته مع شلته(جسّاروراشد)ويحب يتحضن امه ويتدلع عليها كثير يعصب بسرعة لكن يحن ويسامح اسرع يعشق سماعاته جدا ويصبح على صوتها العالي اللي يهز المكان حوله وحاله حال أي شاب يحب الشعر والقصايد وشوي شيلات ويميل كثير اذا ماكان يعشقها للهجينيات بسبب جده وأي شي يسمعه يحفظه من اول مرة حافظ كثير من الابيات ويقلبها للحن خاص على مزاجه لكن تفوز بقلبه سميرة توفيق وأغانيها وهو اطول اخوانه وعريض بعد اللي يشوفه يقول اكبرهم وبوجهه شامتين وحدة فوق حاجبه اليسار والثانية بطرف شفته العلوية مغطيها الشنب
.
عـبـايـــر(25سنة):هادية ولطيفة وماتأذي جنس مخلوق على وجه الارض لا انس ولا حيوان لكن هالشخصية كانت سابقا شخصيتها اما الان فهي سليطة لسان الكل يتحاشاها اما اذا كان الحق معها فهي تاخذ حقها كامل مكمل وماعليها بأحد وماتخاف الا من جدها وسعود بس وتظل قلبها على أهلها وبس والباقي(جعلهم بعاقور)على قولتها اقصر اخوانها وجسمها وسط مو نحيفة ولا سمينة
.


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 17-09-2019, 11:06 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية(يـاسـمـح الـمـحـيّـا جـرّ الـهـجـيـنـيـة)



.
روايـة(يـاسـمـح الـمـحـيّـا جـرّ الـهـجـيـنـيـة)
الشخصيات:
(بيت نشمي)
نشمي(الجد):إنسان كان شديد جدا وسيء الطباع قديما لكن تغير وصار إنسان عطوف جدا رغم ملامحه الشديدة عطوف بكل معنى الكلمة لأحفاده ولازالت بعض الشدة تصاحبه..
منيرة(الجدة):إنسانة حارة لكن قلبها طيب جدا
عيالهم:عادل..مسفر..حصة..عذبة
عذبة اخر عيال نشمي رحيمة وعطوفة جدا ارملة ولها ولد واحد بس وساكنة ببيت ابوها وعادل يلين ويسمع لها اكثر من زوجته حتى
راشد(29سنة):ولد عذبة الوحيد بطبيعته إنسان هادي جدا وغير اجتماعي لكن وضعه اختلف جدا مع شلته ويعتبر واحد من عيال عادل حتى لو ماكان من صلبه
...........
(بيت عادل)
عادل(الأب):إنسان حار عصبي جلف ماعنده تفاهم ابدا عسكري وطبيعة عمله تحكمه حتى في تصرفاته وبيته يمشي على هالنظام..
وسمية(الأم):عكس زوجها تماما كل حنية الدنيا فيها لو تظهر الشدة لحظات تتبدد بسرعة مااقدر تطول ابدا..
غازي(32سنة):اكبر عيال عادل جاف بتعامله شوي مع اخوانه لكن حبيب متزوج من عذاري
جسّار(29سنة):راعي ضحك ووناسة الصديق والأخ والنشبة الحلوة بحياة بتال رغم تسفيل بتال فيه الا انه ناشب ولازق فيه مايتركه
أمجاد(27سنة):إنسانة هادية بشوشة الملجأ اللي يفضفضون له الشباب ويستشيرونها كثير
رهايف(20سنة):ام لسان طويل تحارش الكل وصريحة بزيادة
فيصل(19سنة):اخر العنقود لكن ملطشة لكل البيت مايمر من جنب اخوانه الا ياكل علقة منهم بسبب أو بدون سبب
...............
(بيت مسفر)
مسفر:إنسان متفاهم جدا عكس اخوه عادل دكتور ناجح وله مستشفى مشهور وله افرع منتشرة وابوه جدا فخور فيه صحيح هو اللي مول ولده واعطاه كل اللي يحتاجه باع كل شي يملكه واعطاه مسفر ومسفر رد الجميل أضعاف ماقصر لكن عيون نشمي تنطق فخر وزهو بولده ودايم يمدحه ويثني عليه
عواطف:طيبة لكن تحب تحش وتدق كثير واللي يمنعها خوفها من عمها ابو عادل لانه هددها مرة وبعدها تابت
جواد(30سنة):غثيث وشغله الشاغل يمدح نفسه ويذم عيال عمه
سهام(26سنة):اطباعها تشابه امجاد لكن الفرق بينهم ان سهام صاحبة همة عكس امجاد اللي تستسلم بسرعة
شذى(20سنة):هي ورهايف برووس بعض وكل شي مع بعض

{هالثلاث البيوت كلهم يلمهم حوش واحد بيت نشمي(الجد)بالوسط وعلى يمين هالبيت بيت عادل وعاليسار بيت مسفر خلف البيوت مسبح وجلسة صغيرة للبنات وقدام البيوت بيت شعر للضيوف ووراه مشب وحوض غسيل يشتغلون به عادة الشباب وقت العزايم}
...........
(بيت زامل)
زامل زوج حصة:صديق مسفر رجل يحكمه عقله وطيب جدا
حصة:اهم شي عندها عيالها التوأم اللي مالها غيرهم وحملت بهم بعد معاناة وتعب مع المستشفيات صح تزودها احيانا حبتين لكن تظل مثل اختها عذبة طيبة وقلبها ابيض
رامي وريما(20سنة):التوأم الهادي كل ماعليهم وكل همهم يحققون طموحاتهم رامي اللي يبي يكون محامي وريما اللي تكون عالمة جنائية
.......
(بيت خالد)
خالد(ابو صايل):صديق عادل وزميله بالعمل وخارجه حافظ عادل وفاهمه اكثر من نفسه
زهرة:انكسر قلبها بعد وفاة أهلها وولدها وكلهم بنفس السنة وصارت هادية جدا تتكلم وتضحك لكن قليل
عذاري(29سنة):زوجة غازي مرحة ولطيفة وتحاول تملا جو امها قد ماتقدر
......
(بيت بادي)
بادي(الجد):شايب مثل الشباب القديمين حار وعصبي ومايتفاهم ولايسمح باي نقاش اذا كان يشوفه غلط يبي يقول الكلمة ويسمع تم على طول
سعود(33سنة):متجهم الوجه لكن هو خلقة وجهه كذا لطيف مع أخواته يخاف عليهم من الهوا ومعروف بالقرية انه يأخذ حقه وزيادة
بخوت(32سنة):هادية لطيفة وخجولة وهي تخاف على اخوانها من كل شي ومثل الام بالنسبة لهم وتخاف جدا من أي رجل حتى لو كان ظل فقط ولهالسبب ماتعتب باب البيت ابدا
حلايا(4سنوات):نور البيت كله وحياته صوتها وضحكتها هو اللي مخلي هالبيت متماسك ويتحمل الظلايم اللي تجيه بصمت
......
مزون صديقة عباير وهي الوحيدة اللي ماتغير طبع عباير معها
.....
شخصيات بتذكر:
*الـعـم مصلح
*مناور :زوجته(صيفة)بناته(نوفة & غيثة & شريفة & نايفة)وحيده(غيث)،،هدية(بنت اخو مناور الوحيدة أهلها متوفين)
*طلق & ناصر & هليّل
*هلال(ابو هليّل)
*ابو حمدان،ام حمدان،حمدان(زوجته وضحى وبنته دلال)
*مفلح و ثريا وبنت اخو مفلح الوحيدة هيفاء
........


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 17-09-2019, 11:10 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية(يـاسـمـح الـمـحـيّـا جـرّ الـهـجـيـنـيـة)


بعض مفردات الرواية:
*أوجست:قلت او قالت(اوجس=قال)
*أوحيت:سمعت،أوحى:سمع
*أدني:تعالي
*يمّ:الى،،روح لـ(المكان الفلاني)،عندي>>حسب الاستخدام
*يِرِد: هالكلمة خاصة باللي بيروح يجيب موية من البير
*أكّت أو كَتّيتْ:يعني رحت وغالبا تكون خاصة بالاتجاه اكثر يعني مثلا كتيت يم البير يعني رحت للبير
*جدعته(مجدوع)،طشيته(مطشوش):كلها بمعنى رميته
*الحلال:غنم+ابل...إلخ
*وبا:مرض
*حِسّ:صوت
*علامكم:وش فيكم؟
*قنق:عناد
*صامل،صملت،صملتي:قرر،قررت
*تسيّرين:تمشّين،وبعد تجي للحرمة اذا زارت او بتزور احد
*خَابْر،أخبْر،خبري:ادرى،دريت،عارف،اعرف،عرفت
*أعلمك:اقولك،بعد تجي تهديد
*الهَمْل:الكسلانين
*خُوصْة:سكينة
*خوصى:مدلعة🌚
*غزيّة:ملعقة
*السّحَلة:الزبدية
*الماعون:الصحون حقت الاكل
*الباغة:اي شي بلاستيك
*الصّفْريّة:اي شي مجوف معدني مثلا كوب من معدن وكذا
*الصرايم:مصايب
*تهّولَت:شي صدمني،شي غير متوقع مثلا
*تهولين:تخوفين(تخرعين)
*بحّري:شوفي،ناظري
*طسّ:اذلف
*عوّد:رجع
*نْهجّ:نهرب
*مير:لكن
*طمحت:تركت
*الصرايم:المصايب
*توايق:يختلس النظر
*ياعلّ،ياعلّك:جعلك
*تدحرين:تطردين


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 17-09-2019, 11:26 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية(يـاسـمـح الـمـحـيّـا جـرّ الـهـجـيـنـيـة)


الـجـزء الأول
.
.
~
الساعة7,30 صباحًا
~
واقف قبال مراية التسريحة وهو لاف على خصره المنشفة بشعره المبلول ابتسم وهو ينطق:صبحتم بالخير ياصبوح ومساي(اسماء سماعاته)،وشغلها بالريموت وهو يلبس ملابسه الداخلية ورفع المنشفة وهو ينشف شعره وبابتسامته يهمهم مع أنغام الموسيقى اللي هزت الغرفة واعتلى صوت سميرة المكان،،
.
شـلـح الـتـوب ولـبـس الـتـوب
مـاخـلت براسـي عـقـل بـنـوب بـنـوب
لاا..لااا..لا و لا..وخـلا و هـلا..
.
بتال جاه زاره واتجه له وهو يهز خصره ويلف المنشفة اللي بيده ويبرمها بكل قوته وقف جنب سريره وسدد له ضربة محترمة بالمنشفة وهو يردد مع سميرة بقية الأغنية بابتسامة ويتمايل ومع كل ميلة يسدد للمسكين اللي بالسرير
.
مـشـيـة مـشـيـة عـنـتـر..وتـمـيـل وتـتـمـخـطـر
وعـقـلـي ضـيّـع أهـلـي..مـن لـمـى قـالـت لـي
.
جسّار فز جالس بسرعة على سريره وهو متصروع من الألم وماسك جنبه وبصراخ:صبحهم بمساكنهم يارب!!!
بتال مستمر يغني بدون أي اهتمام لألم جسّار بالعكس اتسعت ابتسامته بشطانة وهو يتمايل وينحني ويقرب راْسه من جسّار ويرفع حواجبه وينزلها على كلام سميرة اللي تغني
.
حـوّل مـن هـالـصـوب..يـابـا
.
بتال اعتدل بوقفته واشر له بيده بمعنى يقرب وهو يرفع صوته مع سميرة اللي قالت
.
قـرّب مـن هـالـصـوب..
.
جسّار ناظره بتكشيرة:حلفت عليك لاوالله اذلف عني بس!!
بتال وقف تمايل واعتدل بوقفته وهو يطالعه بحواجب مرتفعة:نعم؟!!
جسّار نط واقف عالسرير يقال يبي يضيع بتال بحركاته وهو يرقص ويغني مع سميرة:أم الـشـعـر الأشقر
بتال قفل قبضة يده اليمين وأشر بطرف سبابته يقصد يقرب منه وسط تعصيبته
جسّار:بتاتيل صباح صباح ياعيني!!
بتال توسعت عيونه:وبتاتيل بــعـــددد!!
فيصل فتح الباب مدرعم
بتال فز وهو يلتفت للباب يطالعه
جسّار اللي بالشورت غطّى نفسه باللحاف بحكم انه ينام شبه عاري تقريبا مايغطي جسمه العلوي نهائيا اما بقية جسمه السفلي ينام بالبوكسر واذا سوا خير لبس برمودة يموت اذا غطى سيقانه كلها ورغم تنكيلات ابوه المستمرة فيه لكن ماااتعظ واعتدل باقي على طبعه صرخ وهو يرمي اللحاف:فصيل!!!
فيصل مخطوف وجهه:ابوي ابوي جا!!
جسّار انقلب وجهه:صدق!!
بتال تخصر عاليمين وبيساره المنشفة:ابوي مستلم يومين مابنشوفه
فيصل:اقولكم جا!!وبيت الشعر مزبلة محد سوا به شي!!اكيد مر وشافه
بتال ابتسم بثقة:النفس مروقة وطايبة اليوم توكل مقلبك مقبول مابنلمسك اليوم عيدية لك فصفص
جسّار جلس براحة وهو يشوف ثقة بتال
لكن اهتز البيت بصوت ابو غازي:بتّاااااال جسّااااار
بتال انرعب وهو يسمع صوت ابوه وقفل السماعات بسرعة
جسّار طار للحمام يغير ملابسه ويصلي الصلاة اللي فاتته
بتال وهو يلبس ثوبه بسرعة ويقفل ازاريره
فيصل بخوف:وش اسوي؟!
بتال:انزل له
فيصل بصوت عالي من خوفه:لا والله انا بوجه المدفع لحالي!!
بتال اللي خلص اصلا ووقف جنبه وعطاه ضربة قوية على قفى رقبته:اخص يالرمة اخص!!
ابو غازي بصراخ:ابوك ياعادل ابوك!!شف ذَا الحمير متنقعين بفرشهم محد فزع لك!!
فيصل طالع بتال بابتسامة تحدي وهو يسمع صراخ ابوه:رح انت رح يالقدوة!!خلني أتعلم!!
بتال قطب جبينه وهو يطالعه
جسّار طلع من الحمام وعطى فيصل اللي معطيه ظهره ضربة على قفى رقبته
فيصل توجع:ااااه ارحموني
بتال مشى وهو يدفه عن طريقه
جسّار مشى ورا بتال وتركوا فيصل اللي لحقهم بسرعة
نزلوا الدرج جري انصدموا وهم مايشوفون ابوهم عالباب تحرك بتال وكمل طريقه للمطبخ ومن المطبخ خرج لصالة البيت اللي مقسومة لقسمين جزء طاولة الطعام ومو معترف فيها ببيتهم ملصقينها بالجدار وكراسيها فوقها ومكان الطاولة حاطين سجادة مرتبة بطرفها 3طاولات صغيرة و10خداديات صغيرة فوق هالطاولات للي يبي يجلس عليها وهاذي هي جلسة أكلهم المعتادة والجزء الثاني تلفزيون وقباله كنب حق لمة أهل البيت وقفوا وهم يشوفون ابتسامة ابوهم العريضة وتغيرت وجيههم وخصوصا ان اللي جالسين جنبه رهايف وغازي
رهايف وهي تتدلع على ابوها:ياعيون رهايف اول ماعلمتني امي انك بتجي ماهنت لي سدحة السرير ياعيوني جهزت لك الفطور اللي يحبه قلبك
بتال طارت عيونه وهو يسمع كلامها وهي تدري بجية ابوها ولاقالت لهم ولالمحت حتى!!
امجاد انحنت وهي توطي صينية الفناجيل عالطاولة واخذت فناجيل وهي تقهوي ابوها
ابو غازي جالس بلبسه العسكري عالكنب على يمينه رهايف ويساره غازي ابتسم وهو يأخذ من امجاد الفنجال:ياعساني مااعدم هاليديات أي والله
امجاد حبت راْسه:صبحت بالخير ياوجه الخير
ابو غازي بيرد عليها لكن طاحت عيونه على الثلاث اللي واقفين قدامه واختفت ابتسامته:وين الخير وهالدشير توهم يحضّرون!!
بتال مشى وحب راْس ابوه واتبعوه اخوانه وظلوا واقفين قبال ابوهم كانهم عساكر ينتظرون أمره
غازي زفر
بتال طالعه وكشر وهو يعرف حركات غازي
غازي:والله يايبه مدري وش نسوي بليّاك!!
بتال وجسار وفيصل انخرشوا
ابو غازي التفت وهو عاقد حواجبه:وش فيه؟!!،،احتدت ملامحه،،وش مسوين هالدشير؟!!
غازي:هالسرابيت البارح عجزت عنهم مافيهم طب
ابو غازي وقف وطالعهم بحدة وهو يرمي فنجاله اللي بيده وضرب بصدر بتال وطاح على رجله وتكسر
بتال توجع لكن ماتحرك متعود على تكفيخ ابوه
ابو غازي بحدته:حلت لكم الدّجة!!وين هايتين هالدشير؟وين؟
جسّار توسعت عيونه
غازي حس بذنب لكن كمل:مادجّوا بعيد يبه هم ببيت الشعر لكن اتركوه تقل بهايم رعت به!!
جسّار بنرفزة وهو يدري ان غازي يبي يطلع منها:غويزي ومن اللي شب النار وجاب اللحم وحمّسنا وذلف بعد ماقضى!!
ابو غازي بعصبيته:اقطع واخص تكذب اخوك اللي أكبر منك!!
جسّار بعصبية:واذا يبه وصخنا بيت الشعر هالحين ننظفه
ابو غازي:لأني داري بكم مربّد ميتين مافيكم حيل تأكلون وتتركون وراكم مثل البهايم حتى البهايم اصرف منكم
غازي ندم انه تكلم:يبه ياعيوني خلاص مايصير هذا هم قدامك عرفوا غلطهم لاتصير عليهم
ابو غازي طالعه:انت معهم بعد؟
غازي ارتبك:لاا لاا مانيب معهم
ابو غازي لف عليه:وانت مثل التيس وسطهم عجزت تقضبهم؟!
غازي سكت
جسّار ابتسم برضا ان غازي بيأخذ نصيبه معهم
ابو غازي بشك:علامك انلخمت؟!
غازي عرق وهو يحس انه انكشف:وش لخمته يبه الله يهديك!!
ابو غازي بعصبية:صف صف معهم صف!!
فيصل بيتشقق من الوناسة وهو يشوف ابوه يطرد غازي معهم
غازي:ليش يبه؟!
ابو غازي:انكعم يالسربوت لااسمع صوتك وطس جنب أشباهك
رهايف شرقت بالقهوة من الضحك
ابو غازي ناظرها بحدة:وش بلاك انتي بعد؟!!
رهايف بالقوة تكتم ضحكتها وكحتها بعد:سلامتك يبه
ام غازي دخلت عندهم ووقفت قدام عيالها:يالله من فضلك!!
فيصل تعلق بأمه وبصوت فيه صيحة:يمه
ابو غازي توسعت عيونه وهو يشوف فيصل:ابك هذا وانا ماسويت شي لاتصيح الخير جاي!!
فيصل بلع ريقه وهو يطالع ابوه وشد على يد امه اللي ماسكها
ام غازي لمت فيصل اللي اطول منها لحضنها والباقين وراها:ياصباح الخير والرضا وش فيك؟علامك جاينا بشرك؟
ابو غازي بعصبية:وسمية عيالي وأتصرف بهم بكيفي!!
ام غازي:وعشانهم عيالك تذبحهم!!لاوالله ماتلمس عيالي هذول حيلتي اللي طلعت بهم من الدنيا!!
ابو غازي صرخ:وسمية
ام غازي:اذا هم غلطانين أبشر بسعدك أجلدهم معك أعين وأعاون ياعادل!!
العيال انكبوا بكلمة امهم اللي فازعة لهم
فيصل شد على امه وهمس:يمه
ام غازي:واذا انت ظلمتهم تنفيسة دوامك تعلقها بمقبض الباب برا بيتي ماتدخل معك ابد
ابو غازي رص ع اسنانه
ام غازي:وش قلت؟
ابو غازي:رهايف
رهايف وقفت:سم يبه
ابو غازي:طيري لبيت جدك وجيبي رشيد هو اللي بيقول الصدق
توتروا العيال وهم أخبر وأدرى براشد النكبة
غازي:يبه ليش مو مصدقني؟!!
ابو غازي:وش اللي ماتفهمه من ا ن ك ع م!!
بتال اللي كاتم ضحكته من فترة ورا تعابيره الجامدة وهو يشوف غازي عنده أمل ان ابوه يصدق ان ماله ذنب بشي
جسّار كتم ضحكته وهو يصد عن بتال مايبي يطالعه لان بتال اذا انلفتت ضحكته مابتكفيهم خيزرانة ابوهم ابد
رهايف:على امرك يبه،،راحت ورجعت وهي تقفل عبايتها،،
غازي:تغطي زين ولاتهرجين واجد
ابو غازي:انت انطم خلك بنفسك مالك شغل بأختك
بتال عض شفته السفلية بكل قوته وهو يشد على قبضة يديه اللي ورا ظهره بقوة مو قادر يكتم ضحكته اكثر وهو يشوف تسفيل ابوه بغازي
جسّار ابتعد عن بتال بعد ماكان جنبه وهو مايطالعه ووقف عند غازي وصار بينه وبين بتال غازي وفيصل خايف لايضحك ووقتها وش يسكت بتال ووش يفكهم من ابوهم
رهايف اللي ماكانت بعيدة عن بتّال وجسّار وهي تتصدد ماتبي تطالعهم وتضحك وتاخذ المقسوم معهم
ابو غازي صحّاها بصرخته:وش الميتة اللي فيك!!اخلصي!!
رهايف تلبس نقابها وهي تجري خارجة:طيب طيب،،خرجت،،
.........****..........
بيت مسفر
على عكس الأجواء ببيت عادل كان الكل ملتم عالفطور وكل واحد على كرسيه المعروف على طاولة الاكل يفطرون بهدوء
شذى بطفش:ياربي وش هالهدوء القاتل!!سولفوا مايصير!!
ابو جواد ابتسم وهو يسمع حلطمتها
ام جواد التفت وطالعتها:اكلي وأحمدي ربك بعدين محد فايق على ذَا الصباح يسولف يالثرثارة!!
سهام:روحي لرهايف هناك بتشبعين سوالف
جواد:مااتوقع تشبع لو تشبع كان من زمان شبعت وهم متقابلين بكل مكان بالبيت بالجامعة وحتى قبل النوم يسولفون!!
شذى توسعت عيونها:الله اكبر عليك!!اذكر الله!!مراقبنا!!وااذا انت غيران رح معهم!!
جواد بشوفة نفس:مابقى امشي الا مع هالاشكال!!،،تغير وجهه وهو يستوعب غلطته،،
ابو جواد توسعت عيونه وبحدة:جواد!!
جواد:المعذرة يبه
ابو جواد بنرفزة:كم مرة قلت لك ان مالك غير عيال عمك!!الله ماعطاك اخوان تشد ظهرك بهم!!واللي بينفعونك هم عيال عمك لو جار الزمن عليك!!
جواد:يبه الله يخليك لي مابيجور الزمن علي وانت معي!!
ابو جواد:الا يجور يجور ياجواد!!لاتامن الزمن ابد!!ولاتامن حتى ابوك!!،،زفر،،حسّن علاقتك بعيال عمك واترك شوفة النفس ذي اللي مايحبها الله ولاخلقه فهمت!!
جواد:حاضر يبه حاضر
ابو جواد وقف بعد ماانسدت نفسه عن الفطور وطالع زوجته:لاتحسبيني بالغدا عواطف بتأخر اليوم
ام جواد:أبشر مثل ماتبي اسنع لك القهوة والحلا
ابو جواد:قهوتي عند ابوي مثل دايم
ام جواد تنهدت وهي تطالع جواد:ان شاء الله فالك الخير ياابو جواد
ابو جواد مشى
ام جواد بنرفزة:ماتعرف تسكت ندري بك ماتدانيهم لازم تجيب الطاري وتذكر ابوك!!
جواد:يمه وش اسوي!!ابوي يرميني عليهم رمي وانا ماادانيهم ولااواطنهم بعيشة الله وش اسوي؟!
ام جواد:انثبر لاتسوي شي اسكت خل العلم ذَا بصدرك وساير ابوك وانت تدري اعز ماعنده اخوانه وعيالهم!!،،وقفت،،:افطرتم كلن يشيل صحنه ويغسله انا وراي فطور ماني فاضية لكم
شذى فزت ولحقتها وهي تتكلم بسرعة:يمه يمه ابي اروح لرهايف
ام جواد طالعتها:عمري قلت لا!!طول عمرك متنقعة عندها اذلفي لها مارديتك!!
شذى:ليش هالعنف اللفظي طيب قولي لا وانتهينا!!
ام جواد طالعتها بحدة
شذى:اسفة يمه تحمست شوي اسفة والله
ام جواد زفرت ومشت
شذى لفت بترجع فزت:بِسْم الله!!
جواد واقف بوجهها بتكشيرة
شذى:سكنهم مساكنهم وش تبي؟
جواد:هذا اللي فالحة فيه تقلبين امي وابوي علي؟!
شذى:وش دخلني انا؟!!انت اللي تورط نفسك!
جواد:كم مرة قايل لك ماتروحين بيت عمي ماابي اَي اتصال معهم مايكفي نقابلهم بالدخلة والخرجة!!
سهام زفرت ووقفت وهي تجمع الصحون وتوديها للمطبخ وتركتهم
شذى:لاتروح من أجبرك!!
جواد:انتي لازم اروح معك كلهم شباب!!
شذى تكتفت:الله اكبر ترا كلهم عيال عمي مثلك مثلهم ويخافون علي مثلك بعد!!
جواد:انا قلت لك لاتعتبين هالباب اليوم مافي روحة لرهايف العلة ذي!!،،مشى،،
شذى بزعل:جوااااد!!
جواد لف وطالعها:عاد اليوم بالذات لاتروحين
شذى قطبت جبينها
جواد ابتسم:اليوم طويل عليهم اااه ليتني اتفرج عليهم بس
.........****..........
بيت نشمي
الجد والجدة وعذبة افطروا من صلاة الفجر والحين القهوة والتمر والزبدة وشريك وراشد اللي جالس جنب امه قدامه صحن فطور بسيط يفطر منه وهو فيه نوم
عذبة تمد اللقمة:كل يمه عساه بالعافيتين
الجد:خلاص ياعذبة رجال وتسوين به كذا لاتزوج بتبلشينه هو ومرته ماتقدرين تتركينه وهي مابتقدر على دلعه
راشد ابتسم:جدي غيران!!،،حضن امه،،اترك امي لي وعندك حبيبتك خلها تدلعك
عذبة ابتسمت وهي تحضنه
الجدة توسعت عيونها:اقضبي ولدك ياعذبة ماعاد به حيا!!
عذبة:وهو الصادق يمه دلعي ابوي اشوف الغيرة تأكله كل مادلعت وليدي!!
الجدة سحبت المركوع(العكاز)ودفتها بطرفه:مات الحيا عندش ماعاد تنتخين(تستحين)!!
ماحسوا الا برهايف مدرعمة عليهم بالصالة وطار شبشبها قدامها وأفزعت جدها وجدتها وعمتها عكس راشد اللي ابتسم وهو يشوفها
راشد:أقبلت أقبلت الخبلة
رهايف طالعته:انطم انت ماكلمتك!!
عذبة توسعت عيونها:عيب عليك ماتستحين انتي!!
راشد:والله اللي ميت على شوفتك الحين!!
الجد كشر بوجهه:راشد!!
رهايف رمت الشبشب الثاني بخبالها المعتاد:السلام عليكم اول!!،،مشت وسلمت على راس جدها وجدتها وعمتها،،
عذبة:تحبين الكعبة يارهيفة
رهايف ابتسمت من كلام عمتها اللي مهما تقسى يغلبها طيبها وحنيتها وجلست بين جدها وجدتها طالعت راشد:انت صد ابي افطر زين
راشد اللي سحب من فطوره كم خبزة وجبنة بسرعة وعطاهم ظهره
رهايف رفعت نقابها وبدت تأكل بسرعة
الجدة وهي تسحب كاسة راشد من قدامه
راشد اتسعت عيونه:جدة!!
الجدة تحط الكاسة عندها:شوي شوي ياعيني لاتغصين مو بطاير
راشد بزعل:ايه جدتي لاشافتها تنساني وانا ياجدة ولا لي الجدران!!
الجدة:اشوا انك دريت
رهايف ضحكت بصوت عالي:من البداية اترك التغلي لاصحابه!!
راشد كشر وحط اللقمة بفمه:انطمي بس ليش جاية؟
رهايف وهي تأكل:ابوي يبيك
راشد غص وكح
عذبة وهي تسحب الموية وتعطيه:الله اكبر عليك يارهايف روعتي وليدي!!
راشد بعد ماشرب:موتي على يديك من اكذابك!!
رهايف:والله اني صادقة ابوي يبيك
راشد بردت أطرافه
عذبة مدت يدها وقرصتها بفخذها:يالكذوب تبين تروعين راشد
رهايف وهي تمسح مكان القرصة بألم:جدي شف بنتك!!
الجد ضغط بمركوعه على يد عذبة:عذييب!!
عذبة:الكذوب كذوب يبه!!
رهايف:والله اني صادقة ابوي يبيه والدليل شبشبي اللي طار قدامك عميمة!!
عذبة:وليش ماتكلمتي؟!
رهايف وهي تنزل نقابها على وجهها:شفت العيشة وانا ميتة جوع وابوي مطول الظاهر،،ابتسمت،،وبعدين ابيهم يتربون زين!!
راشد اللي فز جري لبيت خاله
الجد ضحك وهو يشوف راشد:ياهالعادل مهبل بهم
رهايف وقفت ونطت السفرة وتلبس شبشبها
عذبة حذفتها بفردتها الثانية:اعقبي مافيه احترام للنعمة!!
رهايف لبستها:الله بيسامحني ان شاء الله،،جرت راجعة لبيتهم،،
الجدة:اه منك ياعادل متى تخف بس متى؟
عذبة وقفت:مو بخاف ابد لحد مايطيح اللي براسه
الجد:على وين؟
عذبة:يبه رايحة ألحق الضعوف وانا ادري وسمية مابتقدر عليه!!
الجدة مسكتها من يدها وجلستها:تقهوي ثم روحي لهم
عذبة:يذبحهم يمه
الجدة:متعودين على مهابد عادل مو بميتين تقهوي ثم روحي لهم
.........****..........
بيت زامل
ام رامي تفطر هي وزوجها
ابو رامي:وينهم العيال؟
ام رامي:ماتعرفهم اليوم اجازة ينامون للعصر ثم كل واحد يقعد على كتبه
ابو رامي:وش هالحياة!!يانوم يامذاكر!!خليهم يروحون معك لبيت جدهم!!
ام رامي:ريما هين بتروح رامي وش يلين راْسه؟
ابو رامي:قولي له الكتب اللي طالبها من برا وصلت وعندي مابيشوفها الا اذا تنقع ببيت جده الليلة غيره مافيه
ام رامي:بأقوله وبيروح بس بيطفشني كل شوي بيقول يالله مشينا
ابو رامي:قولي له انثبر اختصري له الموضوع
ام رامي شهقت:تبيني اسكته قدام العيال!!لا والله ماني بعادل أنا اللي مايحشم عياله ابد!!
ابو رامي:عالاقل طلعوا رجال ينشد بهم الظهر وبعدين مايحشمهم قدامك لانك عمتهم اهلهم لكن عند الغريب مايفتح فمه بكلمة عليهم!!
ام رامي:حتى ولو يازامل!!ماغير كل حركة والثانية ياانكعم ياولد ياحذفهم بشي مايعرف يقعد!!
ابو رامي:عاد هذا طبعه حار يبي الشي سريع سريع
ام رامي:والله ماورا سرعة عياله الله يحفظهم هبة ريح قلوبهم حية لكن هو الله يهديه مايرحمهم
ابو رامي وقف:المهم خذيه معك عندهم وغصبا عليه يجلس تبون شي؟
ام رامي:سلامتك
ابو رامي وهو يمشي خارج:فمان الله
.........****..........
بيت عادل
راشد واقف معهم قبال خاله بوجه مخطوف
ابو غازي:حيالله راشد حي ذَا الصباح اللي مايكتمل الا باخر السرابيت!!
راشد ابتسم وهو قلبه يرقص من الخوف:حياك الله خالي عسى صباحك كله أفراح
بتّال يهتز وهو يطالع الارض مو قادر يمسك ضحكته اكثر
غازي رجع يده وقرصه بقوة لايضحك وينكبهم
ابو غازي:قاعة أفراح انا؟!!
راشد اختفت ابتسامته:السموحة خالي
وسمية بشرشف صلاة ولافه طرفه متلثمة فيه:يوه منك ياعادل حتى الصباح مستقعد لهم فيه
ابو غازي طنشها:وش صار البارح؟
رهايف دخلت:السلام عليكم
غازي قطب جبينه وهو يطالعها بحدة
ابو غازي:كملي طريقك جوا،،طالع غازي،،وانت وش قايل لك انا؟!!انشغل بنفسك خلها عنك!!
غازي زفر:حاضر يبه
رهايف وقفت عند مدخل الصالة اللي بنهاية المطبخ عند امجاد وعذاري اللي يراقبون الوضع
عذاري:عطوني حل بسرعة خلوني افزع لهم
رهايف:اقول انثبري لايعطيك ابوي نصيبك ثم الحبيب انكشف انه هو راس الحربة مايمديه يلعبها على ابوي
امجاد:اهجدي عذاري مالك شغل خليك بعيدة ابوي كشف غازي خلاص
عذاري:يوووه بيكسرهم على ذَا الصبح
رهايف وهي تطالعهم:اقول اذا ماكسّرهم على اللي سووه البارح بيكسرهم على البقرة الضاحكة
عذاري بتكشيرة:مو وقته يضحك والله
رهايف:عاد هو متعود عالتكفيخ اكثر منهم كلهم مابتفرق معه،،ابتسمت وهي تكتم ضحكتها،،وماينلام اذا ضحك والله!!
،،عند العيال وأبو غازي،،
راشد:ماصار شي البارح!!ليش خالي وش صاير؟!
ابو غازي صرخ:تستغفلني رشيد!!
راشد فز:بِسْم الله شوي شوي خوفتني
ابو غازي:حلفت عليك استأذنك قبل اهاوشك!!
راشد استوعب كلامه وعرف غلطته وهو يدري ان خاله يكره اللي يرادده سكت لايزيد الوضع
ابو غازي:انطق قل وش صار البارح
راشد:والله ماصار شي خالي!!ليش صاير شي؟!
ابو غازي طالعه بحدة ساكت
راشد توتر:وش تبيني اقول!
ابو غازي بنفس نظرته وسكوته
راشد:والله ياخالي ماسوينا شي والله ثم اذا فيه ماادري
ابو غازي صرخ:قول!!
راشد رجع خطوة من صرخة خاله:مدري وش تبيني اقول،،اخذ نفس وهو يكرر بنفسه،،خربانة هي خربانة،،وحتى اذا فيه مااقدر اقولك
بتال طلع عرقه السامج لاشعوريا وغنى:مااقدر اقولك مع السلامة رو،،سكت وهو يستوعب الكارثة،،
الشباب انخطف وجيههم كلهم طالعوا بابوهم ماعدا جسّار اللي طالع بتّال وهو بينفجر من سماجته الغبية بوقت غلط ثم طالع ابوه
وسمية تنهدت ومشت وتركتهم
ابو غازي وهو يسحب طرف الخيزرانة اللي مثبت نهايتها ببسطاره:ماتقدرون تقولون
راشد جرى ووقف وراهم
غازي:يبه لحظة اسمع بالأول
ابو غازي وهو يرجع خيزرانته وراه ظهره:عطيتكم فرصة
جسّار:يبه حنا رجال الى متى هالمعاملة الغير اخلاقية
اتسعت عيونهم من كلام جسّار
ابو غازي:ياسلاااام غير اخلاقية بعد!!
فيصل انفجر:يبه غازي هو اللي جاب العدة وهو اللي جمعنا اذا بتحاسب احد حاسبه
غازي:اااه يالجحود!!ومين اللي امس يحب راسي ويتشكرني على هالسهرة الزينة ها!!
فيصل:لو دريت ان وراها مصيبة ماتشكرتك ابد!!
غازي:اسكت ياابو لسان طويل ترادد اخوك الكبير!!،،طالع ابوه،،يبه يرضيك يغلط علي!!
جسّار:اجل يرضى وانت تتبلى علينا!!
راشد:خالي انا كنت نايم وصحوني غصب
غازي:نعنبوا ذَا الوجيه!!حرام خسارة فيكم واحد يرحمكم مثلي
بتّال وهو يشوفهم ينهارون ورا بعض غنى لسميرة وسط ابتسامته وبرواق:ضربني وبكى..سبقني واشتكى!!..لكن ياخسارة ماعمّر حارة!!
ابو غازي انغبن من برودة بتّال وفوقها يكره سميرة توفيق وأغانيها لأبعد حد وزادت غبنته اكثر وهو يسمع بتال يغني لها صرخ وهو يمشي له بسرعة:بتّااااال!!
بتّال ماتحرك رغم ان الباقين شردوا وانتشروا برا الصالة
ابو غازي طاح فيه ضرب بالخيزرانة
بتال ماتحرك ولاتوجع منزل راْسه بس
ابو غازي انفجر وهو يشوفه ساكت رمى الخيزرانة وشد قبضته ولكم بتال ع وجهه وبصراخ:كم مرة قايل لك ماابي اسمع شي لهالادمية!!لاتغني لها جعلك ماتغتني بعافية!!،،ولكمه مرة واثنين وثلاث وهو يزفر بغبنة،،
بتّال ساكت يدري ان ابوه بيتعب ويتركه
جسّار ماتحمل وهو يسمع صراخ ابوه رجع لبتّال ووقف عندهم وهو يمسك يد ابوه
ابو غازي اتسعت عيونه
جسّار:يبه كلنا سهرنا مو بس بتّال!!
ابو غازي ضرب جسّار كف بكل قوته
جسّار غمض عيونه وهو يحس الدنيا درات
بتّال انفجر يضحك وهو يشوف جسّار:وصلت النجوم!!
ابو غازي أنفقع قلبه من بتال رفع يده بيضربه
عذبة دخلت وانفجعت وهي تشوف وجه بتال جرت لهم وصرخت:عادل!!
ابو غازي طالعها
عذبة وقفت بين بتال وبينه ورجعت بتال ورا ظهرها وهي ماسكته بيديها:ماتخاف ربك!!شوهت وجه الولد!!
وسمية اللي دخلت عندهم وكانت متوقعة يعاقبهم كالعادة تصليب وانتهى الموضوع انصدمت وهي تشوف بتال وجرت له وسحبته من يدين عذبة وهي تطالعه بفجعة:يمه بتال طيب ياعيوني طيب؟
بتال هز راْسه بابتسامة:ماعليك يمه ماعليك
ابو غازي صرخ:اوووه منكن ماكبّر راْسه ورؤوسهم معه الا خوفكن اللي ماله سنع!!
وسمية بعصبية وهي تطالعه:أجرمت بالولد وتقول خوفنا!!
غازي وفيصل رجعوا بسرعة وهم يسمعون هواش امهم وراشد تبعهم ووقفوا يناظرون اللي يصير
ابو غازي:وينه الولد؟!ذا رجال يمشي على كتفه قطيع كامل من كبره!!
بتال طالع ابوه بملامح جدية:ويومني رجال اعتمد يبه وارتاح
جسّار طارت عيونه وهو يسمع كلام بتال
ابو غازي صرخ:وشو!!اعتمد وارتاح!!
غازي جرى لهم وهو يدري ان اليوم ياذابح يامذبوح ووقف عند ابوه وهو يمسكه:تعوذ من ابليس يبه تعوذ!!
ابو غازي يدف غازي عن وجهه
غازي لازال ماسكه بيده
ابو غازي:حتى لو تعوذت مابيطير ابليس وهالتيس واقف قدامي!!
جسّار سحب بتّال وأبعده مسافة عن ابوه
ابو غازي سحب يده بقوة ودف غازي بكل حيله:ورب النعمة اللي تعلفون منها وماتتشكرونه ياقليلين الخاتمة ان مالقيت المجلس يلق نظافة ياويلكم فاهمين!!
غازي:ان شاء الله يبه ابشر انت بس هد أعصابك!!
ابو غازي صرخ:اذلفوا وش تنتظرون؟!!
كلهم تفرقوا من قدّامه وطلعوا
وسمية تطالعه بقهر وهي بالقوة ماسكه لسانها
عذبة تطالعه وهو معصب:ماني بقايلة الله يعينهم عليك لان ربي معاونهم عليك
رهايف تجمدت
امجاد بلعت ريقها وهي تنتظر القيامة تقوم لان اللي صار مع بتال قبل شوي طبيعي ويصير عادةً!!
عذاري طلعت لغرفتها بسرعة ماتبي مشاكل معهم وهي مالها دخل باللي صار اصلا
ابو غازي طارت عيونه بشر وهو يطالعها
عذبة:اللي بقوله الله يعينك على نفسك لاطحت بحيلك وتلفت حولك ومالقيت احد منهم!!
ابو غازي بعصبية:عذبة توكلي للبيت لاقول شي يزعلك ويزعلني!!
عذبة طالعته:تراهم عيالك حيلتك ماهم بعسكر عندك وانت حتى العسكر ترحمهم اكثر منهم!!،،مشت وهي تستغفر،،
ابو غازي زفر:اااه من هالعيال اللي مابهم طب!!
وسمية بغبنة:عيالك من خير الرجال لكن انت مايملى عينك اللي يسوونه!!،،مشت،،
ابو غازي بصوت عالي:الفطور ياوسمية الفطور؟
وسمية لفت عليه وطالعته:انت أفطرت خلاص!!
ابو غازي كشّر بوجهه اكثر
وسمية:الفطور بالمطبخ ازهم(نادي عليهم)بناتك يحطن لك انا بشوف عيالي اللي ماخفت ربك فيهم،،خرجت،،
ابو غازي استغفر وهو جاي من دوامه معصب من اللي صار وحط غلّه بعياله:رهايف امجاد،،صرخ،،بنت يارهايف ووجع
.
.
.


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 18-09-2019, 09:03 AM
صورة هــــدبــــ خــجــلانــــ الرمزية
هــــدبــــ خــجــلانــــ هــــدبــــ خــجــلانــــ غير متصل
©؛°¨غرامي مبدع¨°؛©
 
الافتراضي رد: رواية(يـاسـمـح الـمـحـيّـا جـرّ الـهـجـيـنـيـة)


بــــدايــــه موفقــــه
احسنتيـــــ

بانتظارك


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 19-09-2019, 05:07 AM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية(يـاسـمـح الـمـحـيّـا جـرّ الـهـجـيـنـيـة)


اقتباس:
المشاركة الأساسية كتبها هــــدبــــ خــجــلانــــ مشاهدة المشاركة
بــــدايــــه موفقــــه
احسنتيـــــ

بانتظارك
شكرا لمرورك💗💗

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 19-09-2019, 05:08 AM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية ياسمح المحيا جر الهجـينية/بقلمي


،،الـجـزء الـثـانـي،،
.
.........****..........
بمكان ثاني مختلف تماما عن جو المدينة بمكان كل اهله يعرفون بعض مايتعدى تعدادهم200شخص وحتى200كثير عليهم بعد..مانقول عنها مدينة لكن نقدر نقول قرية متطورة شوي بس وعلى بعد من هالقرية فيه مزارعها وكل بيت من بيوت هالقرية تشوف عنده او بعده بمسافة زرايب(او زريبة يعني حظاير او حظيرة)حيواناتهم من غنم او بقر او دجاج او أرانب لكن زرايب الإبل عادةً تكون بعيدة عن البيوت..وبالنسبة لترتيب هالبيوت تشوف كم بيت متلاصقة ببعض وبعدها بمسافة تقريبا نص كيلو وأحيانا اقل بيوت ثانية بعد بنفس الطريقة متلاصقة وغالبا كل اخوان وعيالهم تكون بيوتهم قريبة من بعض..متوفرة فيها اغلب الخدمات مو كلها طبعا.. يسمونها<الـديـرة>...
.........****..........
الــديــرة
.........****..........
بيت بادي
،،كان البيت عبارة عن حوش بالوسط تحاوطه الغرف على عددهم وفيه باب يدخلك بممر صغير جدا لبيت ملاصق لهم بنفس مساحة بيتهم لكن هالبيت وهالباب مقفول من سنين وكان بيتهم قبال بيت شيخ القبيلة ومجلسه وكان برا البيت على يسار الباب وقبال مدخل مجلس الشيخ مبني عشّة متوسطة المساحة(العشّة تقريبا نفس نظام الخيمة لكن مفتوحة من الجوانب وسقفها عبارة عن سعف نخل يستظلون تحته عن الشمس)وتمتد هالعشة لداخل البيت بحيث باقي منها جزء صغير داخل البيت يقعد فيه الجد بادي وأحيانا ينشفون فيه البنات تمر مزرعتهم وبعض الأعشاب اللي يجمعونها وقت نزول المطر وماكانت تاخذ مكان كبير اصلا اخذه زواية صغيرة وشي بسيط جدا..
الجد بادي جالس بالعشّة داخل البيت وهو يقلب بالراديو ويسمع الاخبار
حلايا تلعب بعروستها اللي جابها لها سعود بوسط الحوش
الجد بادي ابتسم وهو يطالعها وهي تلعب:يانوري ياحلايا ياحلوة الخد والعين ادني(تعالي)وانا جدش والعبي يمي(عندي)
حلايا ماطالعته:بس سمايح(اسم عروستها)تقول نلعب هينا
الجد بادي:ادني عن الشمس والله ان شوي ترعفين(يصيبها رعاف)
حلايا طالعته زعلانة
الجد بادي تبسّم لها:يانور عيني وأنوار دنيتي ياحلوة الخد والعين ياللي لاضحكت استهل المزن وأمطرت ادني وانا جدش ادني
عباير طالعة من الحمام بقميص لافة المنشفة على شعرها متجه لجدها
حلايا جرت لجدها اول ماشافت عباير طالعة من الحمام وجلست بحضنه
عباير جلست جنب جدها وبزعلها:ايه الله يرحم ايام كان الغزل بعيون وخدود وضحكت عباير!!
حلايا مدت لسانها ثم تكلمت وهي ترفع حواجبها وتنزلها لعباير:احسن حليك يالعزوز!!
عباير توسعت عيونها:انا عجوز!!
الجد بادي:صدقت زين البنات صدقت!!
عباير سحبت الدلة باستسلام وهي تصب لها قهوة وبصوت عالي:بخوت بخوت جيبي معك تمر
الجد بادي ناظرها بتكشيرة
عباير:معش معش
الجد بادي وهو يبوس حلايا على خدها اليمين:هالوجه لاضحك اسقانا الله مطر به يحيا الحلال(يقصد الحيوانات)ويطيب بعد وبا(أمراض)
عباير ضحكت بضحكتها المعروفة لأهل الديرة
الجد بادي عَصّب وهو يضربها بطرف رجله:اعقبي يابنت فضحتينا قصّري حسش(صوتك)
حلايا نزلت من حضن جدها وجلست جنبه وهي متكية على رجله بكوعها
عباير:والله ياجدي حسّي مقصرته لكن ضحكتي محد له علي كلمة!!
الجد بادي:اخو سارة!!وش تقولين!!
عباير فزت وابتعدت عن جدها وبتضييع للسالفة وزعل:جدي ليش مخلّص الما الحلو تروشت بماا ملح قشّر شعري قشّر!!
بخوت جاية لهم وبيدها صحن تمر ومدته لها
عباير دفت يدها
بخوت تنهدت وكملت طريقها لجدها:لومي روحش!!،،جلست جنب جدها وصارت حلايا يمينه وبخوت يساره،،
عباير بزعل:جدي وش علمكم متفقين علي من الصبح عدوة انا عدوة!!
الجد بادي:صدقت بخوت!!مين اللي المفروض يِرِد يم البير(يروح للبير)؟
عباير:يوووه ياجدي قطع(كسر)ظهري سحبت اللي وتشغيل المكينة!!(اللي خرطوم طويل ويختلف حجمه من بير لبير موصّل ببركة يصب فيها الموية من البير واللي تسحبه المكينة بعد مايشغلونها)
الجد بادي:هذا القنق(العناد)اللي براسش مايطيب ابد ولا نسيتي وش قلتي!!
عباير:خلوا سعود يجيب الماء تعبت انا؟
بخوت:يجيبه سعود لكن ترجعين تشتغلين معي بالبيت
عباير طالعت جدها:جدي!!
الجد بادي:أوحيتي(سمعتي)العلم!!
عباير بزعل:والله تعبت!!
الجد بادي تنهد:ياعباير سعود شغله يم المحافظة ويبي له ساعة مرواح وساعة رجوع وانتي اللي صَمْلَتي(يعني قررتي وإصررتي على رايك)ولاأوحيتي لنا حرف وقلتي وتحلفتي إنش انتي اللي بتجيبين الما مكان الصبي(العامل)اللي بنجيبه وطقيتي الصدر واعتزيتي بسعود وسكتيني!!
عباير:ياجدي ادري والله وللحين معتزية فيه عساه ذخر لنا بس والله سحبت اللي والمشوار يذبح!!
الجد بادي:خلي قنقش ينفعش!!
عباير:يعني اتفقتم وخلصتم وانا صاحبة الشأن مالي راي!!
الجد بادي وهو يرفع يديه ويضم حلايا وبخوت لحضنه طالع حلايا:بعيني اليمنى من الورد بستان،،لف على بخوت يطالعها،،وبعيني اليسرى
عباير سبقته وبزعلها:عجاج السنيني اي والله عجاج!!
الجد بادي بتكشيرة:معروف مكان العجاج وينه؟!
عباير بنرفزة ونبرة حادة:جدي!!
الجد بادي احتدت نظرته لها
عباير بلعت ريقها:السموحة جدي
الجد بادي ماعطاها وجه وطالع بخوت بوسط بسمته وكمل:وبعيني اليسرى من الزين فيّاض
عباير بصوت فيه الصيحة:ايه ياجدي تغزل تغزل بس وانا المسيكينة مالي احد!!
الجد بادي طبع بوستين على خد بخوت وحلايا وهو يتركهم من حضنه:خبزٍ خبزتيه يالرفلا كليه!!،،سحب الراديو ويقلب فيه،،
عباير بنرفزة:جدي اترك الراديو وناظر الاخبار بالتلفزيون اللي مشبك عليه
،،بادي حاط التلفزيون بشبك مثل القفص يعني وله قفل لانه يشوفه من المنكرات واللي خلاه يدخله لبيته حلايا ماتحمل دموعها وهو معطيها ساعة باليوم وبعدها مقفول عليه ماينفتح،،
الجد بادي بحدة:تخابير من وراه مانبيها!!وهالمصيبة ذَا ماينفتح ابد توحين؟!
عباير:ان شاء الله
الجد بادي بحدة ملامحه:لاتحسبين اني صرت مثل الزبدة هاليومين يعني إنش تسيّرين(تمشين)رايش علي!!
عباير بهدوء:ماقلت شي جدي
الجد بادي:لاتكثر علومش وإردي للما(جيبي الموية)!!
عباير دخلت لغرفتها وهي تتحلطم وسحبت عبايتها اللي مرمية عالارض وسط حوسة أغراضها ولبستها وقفت قدام مراية صغيرة مثبتة بالدولاب وهي تعدل نقابها اخذت نفس وهي تذكر الوجيه اللي بتقابلها وبنفسها(لاترتخين لهم ياعباير لاتضعفين )خرجت من غرفتها:وين مفتاح الوايت؟(السيارة اللي يجيبون فيها الموية)
الجد بادي:انتي اخبر!!
عباير مشت بخطوات سريعة خارجة من البيت وهي تزفر
.........****..........
بيت الشعر
راشد برا البيت يشيل عدة الشوي ويحطها بالحوض ويغسل وفيصل يجمع الاكياس والزبايل جسار يكنس وبتّال ينفض الخداديات ويشيل اللي وراها ويرتبها وغازي يغسل الدلال والفناجيل والكاسات
جسّار قفل المكنسة واتجه لبتّال:كيفك انت؟
بتّال بدون لايطالعه وهو ينفض من قلبه التكاية:الحمدلله
جسّار:صدق صدق
بتّال:صدقين بس كمل شغلك لايمردغنا ابوي
جسّار رجع شغل المكنسة ينظف
غازي اللي يسرق نظرات من فترة وقف وهو ينفض يديه واتجه لبتّال
بتّال واقف ينفض معطيه ظهره
غازي مسكه من يده:أوجعك؟!!
بتّال وهو يدف يد غازي عنه ومكمل ينفض بنفس الوقت وبدون لايطالعه:طيب مافيني شي
غازي لفه عليه:بتّال قولها وانت تطالع فيني!!
بتّال حذف اللي بيده عالارض بقوة وبصوت عالي وهو معصب:ابد طال عمرك طيب طيب مافيني شي كل الموضوع ان الوالد لعن خيري
جسّار قفل المكنسة ووقف يطالعهم
راشد وفيصل دخلوا عندهم على صوته العالي
غازي زفر:اقولك طيب؟تحس بشي؟
بتّال:شي مثل وش؟كسر يدي؟او رجلي؟او حتى خشمي؟!!،،ابتسم،،لا لا طيب،،اختفت ابتسامته،،كل الموضوع ان الفنجال المفروض يشطفني(يمر من جنبي)لكن حلا بعينه يضرب صدري!!والوالد ماتحمل صوتي الشجي وكفخني احلى تكفيخ بس!!
غازي مد يده اليمين لوجه بتّال وهو يدخلها داخل كم ثوبه ويمسح الدم اللي بوجه بتّال ساكت
بتّال يطالعه بقهر:متى تبطل نذالة؟!
جسّار ابتسم وراح يكمل شغل غازي يدري ان بتال مستحيل يقول وش فيه ويتحلطم على احد غير غازي
فيصل وراشد ارتاحوا وهم يشوفونهم يدرون ان بتّال مايفضفض الا لغازي ورجعوا لأشغالهم
غازي:مَن؟!!أنا نذل!!
بتّال يطالعه بحقد
غازي تكتف وهو واقف قباله:وش ذنبي انا اذا انت عملاق!!والفنجال ضرب بصدرك من زود طولك!!المسكين توفى من صدمته توقع يلامس صدر حنون لكن ضرب بجدار!!
بتّال ميل فمه بابتسامة وهو يحاول يكمل زعله
غازي:وابوي لاتلومه يكره سميرة توفيق اللي مبلشنا فيها!!
بتّال:وانت؟!!
غازي بابتسامة:طيب انا ماعلي ولله الحمد مشكور على سؤالك والله!!
بتّال بتشديد على كلامه:اقول وانت؟!
غازي:عاد مالك حق تلومني!!ابوي ذَا!!انت شف وش سوا بك!!مايصير تطير هيبتي انا إنسان متأهل(متزوج)
بتّال بشر:متأهل ها!!
غازي وهو يرجع بخطواته لورا:بتاتيل العن ابليس وخلنا نكمل شغلنا لايجي ابوي ويكمل علينا!!
بتّال وهو يمدد جسمه ويمشي لغازي:دامه بدا خله يكمل!!
جسّار وهو يتنهد ويجمع اللي قدامه بسرعة:انا ماراح احرك شي معكم من الحين أعلمكم،،طلع برا بيت الشعر،،
رهايف جاية لهم بيدها مسحات ولصق ووقفت عند فيصل
جسّار اللي وقف وهو يشوفها:حطي حطي اللي معك مطولين
رهايف:كيف الوضع؟
جسّار ابتسم وهو ينزل اللي بيده عالارض واعتدل وطالعها:بتّال ماتعرفينه!!
رهايف مسكت يده وحطت كرتون المسحات واللصق فيها:وعشانه بتّال المهمل العنيد بتّال تصرفوا معه،،مشت،،
راشد معطيهم ظهره وهو يشتغل يسمع كلامهم ابتسم وهو يحس بمشاعر لطيفة وصلت له خلته يتمنى ان عند اخوان صحيح هم اخوانه لكن تمنى اخوان صدق يعيش معهم 24ساعة
غازي بابتسامة وهو يبتعد عنه ويسحب مخدة ويحطها قدامه يحمي نفسه:بيتو يالحب
بتّال:الله بالدنيا الحين أنا الحب!!توك تقول متأهل!!عرفنا الحب حقك وينه!!
غازي:تظل انت الحب الحقيقي بيتو حياتي
بتّال جرى له
غازي يجري ببيت الشعر عنه:اخو بتّال
بتال:والله بيتوطأ فيك بتال
غازي:اخوك يابتال اخوك!!
بتال وهو يجري وراه:والله لو هو ابوي أوريك انا أوريك!!
وابتدت معركة بتال وغازي المعتادة
.........****..........
عند عباير..
عباير تسوق متجهة لاحد الابيار اللي تبعد مسافة شوي بعيدة عن القرية مشغلة راديو الوايت المتهالك بأعلى صوت له اعتلت وجهها ابتسامة تحت غطوتها(نقابها)وقصرت الصوت وهي توقف بالوايت على مسافة من زريبة العم مصلح وهي تشوفه جالس يفطر بظل شجرة تبعد كم خطوة عن الزريبة رفعت نفسها وخرجت جسمها من قزاز السيارة:صبحت بالخير ياعم
العم مصلح إبتسم:ياصباح النور والسرور وانا اقول علام الهبايب زانت!!
عباير نزلت من السيارة وهي متشققة بوناسة من كلامه:ياربي ياحبيبي وانت اعلم بقليبي انك تزينها لعمي مصلح وين ماأدا(وين ماراح)
العم مصلح ضحك:ادني ادني وانا عمش حياش للفطور والقهوة
عباير:بالعافيتين على روحك بس الطيور طارت بأرزاقها!!
العم مصلح تنهد:خابر يابنتي خابر ان ماهو بوقت فطور هالساع ولاهو حتى بحزة قهوة بس ااه من قلة الحيلة وانا عمش قطع ظهري كيس الشعير(اكل الغنم)من الصبح وانا حزة أشيله وحزة أوطيه لامعين ولا معاون الله يعيني ربي بيعين
عباير بفزعة:افا ياعم وانا وين رحت علامك ماعلمتني بالليل أجيبه لك على هالوايت ولا سعود يجيبه لك وينزله ويزين مكانه لك بالزريبة!!
العم مصلح ماله احد وحيد ومستحي منهم كل شوي يساعدونه وبحياه:خلاص وانا عمش انغسل وجهي وشهّب من كثر ماتفزعون
عباير:وش هالكلام الله يهديك لايوحونك جدي وسعود والله ان يتلّونك معنا بالبيت لاعاد تقول هالكلام ياعم انت من الاهل ماانت بغريب!!
العم مصلح:من طيب اصلش والله!!عسى الله يجود عليش ويغنيش وانا عمش ادني يمي تقهوي!!
عباير ناظرت كيس الشعير اللي بعيد عن الزريبة بمسافة كم متر راحت له
العم مصلح وقف بسرعة ومشى لها:ابك وانا عمش والله ان تتركينه!!
عباير:لاتحلف والله ان مابيشيله غيري ولايعلف الغنم غيري!!
العم مصلح واقف وبينهم مسافة كم خطوة:ياعباير مو بوقت قنقش الله يصلحش!!
عباير:ابعد عني ياعم عاد انت خابر أهل الديرة وعلومهم المايصة!!
العم مصلح زفر:أبريتهم(ماعلي منهم)ذَا حمل ثقيل بيضرش اسمعي لي ولاتعصين!
عباير انحنت واخذت نفس ورفعته وتغير وجهها وكيس الشعير فعلا ثقيل صعب عالرجال ويتعبهم كيف هي
العم مصلح سكت وهو عارف عباير وعنادها وسبقها وفتح لها باب الزريبة وهو يرد الغنم داخل الزريبة لاتطلع
عباير مشت وهي تغالب نفسها ونزلته قريب من الزريبة وسحبته لداخلها ودخلته وحطته بصندوق حديد وقفلت عليه عن الغنم وناظرت العم مصلح وهي منقطع نفسها وتحمد ربها انها متغطية مايشوف وجهها
العم مصلح ابتسم وهو يدري انها ماتت من الكيس اللي شالته:ها عسى طاح اللي براسش!!
عباير ابتسمت وبوسط انفاسها السريعة اللي تقطع بسببها صوتها:اقول ياعم اعلفها الحين ولا باقي
العم مصلح:تيسري(روحي)يم الدلة وريحي ثم روحي للبير ولا جدش بينهبل وهو يشوفش ماعودتي(مارجعتي)
عباير وهي تحس فعلا انها ممكن تتأخر ووقتها وش بيفكها من جدها مشت بخطوات سريعة للوايت:بالعافية بالعافية،،فتحت الباب ولفت عليه تناظره،،ياعم مصلح أمنتك الله وبالله ان مايردك شي عنا عليك الله ياعم لايردك حيا حنا عيالك!!
العم مصلح:الله يزينها لكم ويفتحها عليكم من واسع فضله تيسري ياعين عمش الله يبارك لش بوقتش تيسري
عباير ركبت الوايت وكملت طريقها
هليّل اللي كان واقف بسيارته يشوف اللي يصير كمل طريقه ووقف عند العم مصلح:السلام عليكم صبحت بالخير ياعم
العم مصلح كشّر بوجهه وهو يشوفه:وش تبي؟
هليّل بابتسامة:رد السلام واجب
العم مصلح:وعليكم السلام والرحمة وش تبي؟
هليّل وهو يطالع فطور مصلح وقهوته:اشوفك مزين الفطور والقهوة كل ذَا عشان عباير؟!!
العم مصلح بحدة:الله يسلط عليك ياهليّل
هليّل بفجعته من الدعوة:اعوذ بالله منك
العم مصلح بحرّته:اجل تتبلى علينا ونسكت لك!!
هليّل:نشدت(سألت)ماأوجست(ماقلت)شي!!
العم مصلح:لاتتبلى على خلق الله ياهليّل وانشغل بنفسك الله يشغلك اي والله وفارق فارق الله لايردك يالله!!
هليّل مشى وهو يتحلطم
العم مصلح تنهد:استغفر الله العظيم مابه طب هالولد مابه طب اعوذ بالله!!
.........****..........
بـقـالـة الـديـرة
.........****..........
هالبقالة تعتبر افخم من سوبر ماركت بنظر أهل القرية لان اقرب بقالة لهم تبعد عنهم90كيلو وبهالبقالة مخبز صغير فيه عامل باكستاني يخبز الخبز لكن سوق هالمخبز طايح لأن الحريم يخبزون بأنفسهم مايشترون منه وقبال البقالة محطة صغيرة بس فيها 3مكاين 2بنزين ووحدة ديزل..
طلق محاسب البقالة واللي يعبي للسيارات بنزين بنفس الوقت طالع اللي داخل للبقالة وبنفسه،،يالله من فضلك اكفنا شره،،ابتسم:حياك الله ياعم هلال حياك الله
هلال بجلافة:متى بتقلعون هالباكستاني؟
طلق زفر:مالي شغل ياعم علّم(قول)عمي مناور(شيخ القبيلة وصاحب البقالة والمحطة)انا شغلتي أحاسب مالي شغل بشي ابد
هلال:ايه هذا انت مافيك خير ولا غاريّة(يغار)على محارم الديرة!!
طلق:لااله الا الله ياعم تبي تشري حياك ماانت بشاري فكني شرك!!
هلال:تطردني يالورع؟!
طلق بعصبية:ماني بورع ماتشوف شواربي خاطّة على وجهي!!
هلال:اه بس اه الله يرحم ابوك اللي لو يسمعك الحين وانت توجّس(تقول)هالكلام ان يمردغك مردغة ماله اول من ثاني!!
طلق:الله يرحمه بس اخلص علي!!
هلال بجلافته:أوجس لخويك المتسلت(يتمشى وتارك شغله)يجي يم المزرعة يتمم شغله!!
طلق:ان شاء الله ان شاء الله
هلال مشى
طلق يتحلطم وهو يرتب الاغـراض عالرفوف:استغفر الله ليتك تذلف انت وتترك هالضعيف(قصده الباكستاني)اقلقتنا اعوذ بالله منك!!
ناصر داخل ابتسم وهو يشوفه يتحلطم:السلام عليكم ياصباح الخير وش فيك؟!
طلق بنرفزته وهو يشتغل ولاطالع ناصر:من وين يجي الخير بهالديرة!!
ناصر ضحك:غثك ابو هليّل؟!
طلق التفت عليه وهو يناظره باستغراب:وش فيك تارك المستوصف وجاي يمي؟!!
ناصر توسعت عيونه:هذا والله شر العرب على العرب!!
هليّل وقف بسيارته عند مكاين البنزين ونزل متجه لهم
طلق:وانا الصادق اذا كل يوم بترتز عندي بتنفصل من ذَا المستوصف
ناصر:الله اكبر عاد يَاذَا المستوصف مقطع أهل الديرة من كثر خدماته!!حتى دكاترته مايحضّرون(مايداومون)!!
طلق:وش علي منهم انا!!علي فيك!!اقضب(امسك)مكانك لاتنفصل وانت وراك فويه(يعني افواه بمعنى عايلة)تطعمها!!
ناصر:لاتوصي ياابن الحلال لاتوصي
هليّل وقف عندهم بابتسامة:السلام عليكم
طلق وناصر ردوا السلام
هليّل بضحكة:تجهز ياطلق
طلق عقد حواجبه
ناصر باستغراب وسط ابتسامته:وش يتجهز له
هليّل وهو يلعب بسبحته وبابتسامة وعينه على طلق:اصبر اصبر الخير جاي
طلق طالعه بحدة وهو فاهم حركاته:هليّل ورا ما
ناصر قاطع طلق وهو يحط يده على هليّل من ورا رقبته ويمشي معه مبتعد عن طلق:هليّل ابيك بسالفةٍ عسيرة وجال بخاطري مايحلها الا خويي هليّل
هليّل ابتسم وهم يخرجون من البقالة:ادري بك ماتبيها تولع بينّا!!
ناصر اختفت ابتسامته وهو مكمل طريقه:ودامك عارف وشو له تشب الحطب!!
هليّل:هي شبت وانتهت لكن،،انا للحين شاري العشرة وصاين!!،،بعتاب،،وهو شمّر وتوكل(بمعنى ماعاد يبي صحبته مثل قبل)
ناصر تركه ووقف:وش هالكلام اللي ماله طعم وانا اخوك!!
هليّل:انا ماجيت عشان اللي جال بخاطره انا جيت أبشركم ان غيث خلص
ناصر شقت وجهه الابتسامة
هليّل بابتسامة:وقلت أعلمكم قبل يدرون العربان
ناصر:صادق ياهليّل تقوله صادق؟
هليّل:اَي والله ياناصر اَي والله
ناصر رجع طريقه بخطوات سريعة يبشر طلق
هليّل ابتسم واتجه للسيارة يبي يعبي بنزين
ناصر تباطى بخطواته وهو يشاور نفسه اذا يبشره او لا وقف على باب البقالة وهو ساكت يطالعه
طلق مشغول بالترتيب اعتدل وطالعه:وش فيك؟
ناصر ابتسم وهو يجاري الوضع ويضيع توتره ودخل عنده:ابد بس هليّل يقول غيث خلص دراسة وراجع للديرة
طلق ابتسم وهو حافظ خويه ناصر وكمل شغل:مير الله يحييه قرة عين اهله به عوّد للديرة لمكانه بين اهله وربعه
ناصر حس براحة:ماودك نواجهه قبل يلفي للديرة؟
طلق التفت عليه يطالعه:خل الرجل يتنفس ويستريح!!تراه قاطع ديار وانت تبي تواجهه وهو ماريّح!!
ناصر فهم التصريفة:ايه ايه وصلت وصلت
طلق بتكشيرته:اقول نويصر لاتآول(تفسر)على هواك!!كل اللي،،سكت وهو يسمع صوتها تلعثم وضاعت هرجته فز واقف،،
ناصر ابتسم وهو يشوفه تنهد:لنا الله بس،،عطاه ظهره وهو يطالع اللي يصير،،
طلق وقف ورا مكتبه اللي يحاسب عليه وهو يعدل شماغه ويمسح على ثوبه طارت ربكته واختفت وهو يذكر ان ماله نصيب فيها
،،برا البقالة وتحديدا عند المكاين قبل دقايق،،
عباير راجعة طريقها للبيت وهي مفللة الوايت مويا حلو طالعت البنزين ولازم تعبي زفرت بضيق ثم ابتسمت وهي تذكر حلايا سحبت شنطتها الصغيرة اللي بحجم كف يدها من الدرج اللي قبال مكان الراكب جنبها وهي توقف عند المكاين وطلعت منها فلوس ومسكتها بيدها وفتحت الباب ونزلت وهي كل تفكيرها بحلايا وردة فعلها اذا شافت اللي معها قطع افكارها صوته
هليّل:اشوفش واردة!!يم أيهن كاتّة(نفس معنى واردة يعني وين راحت وتستخدم اكثر عشان تحديد الاتجاه يعني يبيها تحدد له بالضبط وين راحت)
عباير قفلت الباب بقوة وهي تطالعه وبحدة:أكت منين ماأبي!!وان شاء الله أكت يم ترعة(اسم قرية)انت مالك شغل فيني ولاأنت محاسب على فعايلي ولايتعلقك من وراي شي!!
هليّل توسعت عيونه:استحي يامرة!!مابش طب!!احشمي هالغريب عنش وقصري حسش!!
عباير ارتفعت حواجبها:احشمك!!،،ضحكت ضحكتها اللي غطت المكان وهي تفقع قلبه،،والله انت اللي ماحشمت عمرك وجيت يمي تحارشني!!وانت ضربت علي وانا مااسكت لك وأعلمك!!
هليّل بحدة:عباير!!
عباير بشر:اقصر حسك لاترفعه علي واللي سويته قبل سنين مستعدة أعيده الحين ولا تحسب اني بخاف من احد هالمرة!!
هليّل طالعها وهو يحك على اسنانه ببعضها من غبنته
عباير مشت متجه للبقالة
هليّل التفت عليها يطالعها وبابتسامة يبي يطلع غبنته ويقهرها:ايه ماعليش حساب تدوجين من مكان لمكان
عباير التفتت تطالعه بحقد
هليّل بنفس الابتسامة المستفزة:مواليش(ولي امرها)واحد يطارد رزقته حتى يطعمش وهو مايدري إنش تلهين(تلعبين من وراه)والثاني شايب مابه حيل وعلى باب الله مسلمش الخيط والمخيط مستوثقش وانتي بايعة الثقة بهلل!!
عباير صرخت:اقطع واخص تخسى ياعديم التربية والأخلاق!!تخسى هاذي طبايعك انت وش جاب الثرى للثريا!!
هليّل ضحك بخباثة:ايه صدقتي وش جاب الثرى للثريا
طلق واقف جنب ناصر اللي مصدوم بهليّل وردوده ماعاد تحمل وانطلق لهليّل وكله شر
ناصر لحقه
طلق مر من عند عباير
ناصر مسكه
طلق بشر من ورا ناصر:وش قلت ياهليّل عيده عيده كانك صادق عيده!!
هليّل طالعه وبغبنة منه:للحين ياطلق للحين؟!!تبيعنا عـ
عباير قاطعتهم بحدة:ماني بحاجة احد منكم!!
طلق التفت يطالعها بحدة
ناصر وهليّل اللي يطالعونها بتكشيرة ساكتين
عباير وهي تقصد طلق:مافزعتوا وقت الصدقية بتفزعون الحين!!وحتى فزعة من وراكم مانبيها لو هي بقرش!!
طلق وناصر اللي يحسون بالذنب سكتوا بقهر
هليّل يكابر لكنه مثل هالاثنين بالضبط
عباير رجعت للوايت وفتحت الباب:توزّا(تخبى)بحضن امك الليلة ياهليّل والله ماظنتي بتطلع عليك شمس بعد هالليلة،،ركبت الوايت ومشت،،
هليّل بلع ريقه وهو ادرى بسعود وجده
طلق طالعه:أنسى فزعة من يمي بعد علومك الشينة،،رجع للبقالة وهو يكبح نفسه لايجلد هليّل،،
ناصر طالعه بزعل منه ومشى لدوامه
عباير تقاوم عبرتها بكل قوة وهي تحاول تنسى الموضوع ماتبي مصيبة جديدة
.
.
.


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 20-09-2019, 07:55 PM
صورة هــــدبــــ خــجــلانــــ الرمزية
هــــدبــــ خــجــلانــــ هــــدبــــ خــجــلانــــ غير متصل
©؛°¨غرامي مبدع¨°؛©
 
الافتراضي رد: رواية ياسمح المحيا جر الهجـينية/بقلمي


السلام عليكم

♥♥♥♥♥♥♥♥
بــارت حليــوووو تسلم
الانامل ابدعتي صراحه

بس راح اجيب معلومه
صغنونه ركزت عليها اليوم
عمر بتال وجسار اثنيناتهم
29 يعني توام او كيف

وكمان مافهمت عيله العم
مصلح يعني معوووه بنات
بس واولاد مكتوب وحيده
غيث يعني ولده او كيف
ماافتهم لي ذا المقطع


♥♥♥♥♥♥♥♥

نبدأ بــــــ بـــتــــال
شخصيه كتومه للي
يصير له يالله والشراسه الي
في ابووه معقوله في ٱبا۽
يسووا كذا في اولادهم
رحمتووو مرا
لا بيحشم اولاده ولا شي
الله يعينهم عليه

♥♥♥♥♥♥♥♥


راشـــــد
وحيد موجع شعور الوحده
من ناحيه الاخوه مهما كان قربه
من اولاد خاله الا ان الاخ
او الاخت غييييير

♥♥♥♥♥♥♥♥

جـــــواد
شخصيه حقوده جدا لــ اولاد
خالوووه
هل فيه سبب لدا الشي
او جا۽ من فراغ هدا الحقد
♥♥♥♥♥♥♥♥

رهــايف/ وشــذۑ
حليووو في الروايه ادا
كان فيها من هذي النوعيه
المرحه...

♥♥♥♥♥♥♥♥
عبــايـــر
معامله جدها لها غريبه
يمكن صار شي بالماضي
واللحين صرت متاكده اكثر
من بعد مشكلتها مع هليل

♥♥♥♥♥♥♥♥

مــطــلق
مسكين بس ليش قال مافيه
تصيب هل خطبها ورفضت
او كانت خطيبته لانها قالت
مافزع بالبدايه يجي يفزع
اللحين.....

♥♥♥♥♥♥♥♥

يسلموووو علـــ إبــداع



ســﯞال :متــا راح تكون مواعيدِ
البارتات
محدده او لا

♥♥♥♥♥♥♥♥
بــٵ نتظارك ❤


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 22-09-2019, 09:15 PM
rwuiit28 rwuiit28 غير متصل
©؛°¨غرامي مشارك¨°؛©
 
الافتراضي رد: رواية ياسمح المحيا جر الهجـينية/بقلمي


اقتباس:
المشاركة الأساسية كتبها هــــدبــــ خــجــلانــــ مشاهدة المشاركة
السلام عليكم

♥♥♥♥♥♥♥♥
بــارت حليــوووو تسلم
الانامل ابدعتي صراحه

بس راح اجيب معلومه
صغنونه ركزت عليها اليوم
عمر بتال وجسار اثنيناتهم
29 يعني توام او كيف

وكمان مافهمت عيله العم
مصلح يعني معوووه بنات
بس واولاد مكتوب وحيده
غيث يعني ولده او كيف
ماافتهم لي ذا المقطع


♥♥♥♥♥♥♥♥

نبدأ بــــــ بـــتــــال
شخصيه كتومه للي
يصير له يالله والشراسه الي
في ابووه معقوله في ٱبا۽
يسووا كذا في اولادهم
رحمتووو مرا
لا بيحشم اولاده ولا شي
الله يعينهم عليه

♥♥♥♥♥♥♥♥


راشـــــد
وحيد موجع شعور الوحده
من ناحيه الاخوه مهما كان قربه
من اولاد خاله الا ان الاخ
او الاخت غييييير

♥♥♥♥♥♥♥♥

جـــــواد
شخصيه حقوده جدا لــ اولاد
خالوووه
هل فيه سبب لدا الشي
او جا۽ من فراغ هدا الحقد
♥♥♥♥♥♥♥♥

رهــايف/ وشــذۑ
حليووو في الروايه ادا
كان فيها من هذي النوعيه
المرحه...

♥♥♥♥♥♥♥♥
عبــايـــر
معامله جدها لها غريبه
يمكن صار شي بالماضي
واللحين صرت متاكده اكثر
من بعد مشكلتها مع هليل

♥♥♥♥♥♥♥♥

مــطــلق
مسكين بس ليش قال مافيه
تصيب هل خطبها ورفضت
او كانت خطيبته لانها قالت
مافزع بالبدايه يجي يفزع
اللحين.....

♥♥♥♥♥♥♥♥

يسلموووو علـــ إبــداع



ســﯞال :متــا راح تكون مواعيدِ
البارتات
محدده او لا

♥♥♥♥♥♥♥♥
بــٵ نتظارك ❤
وعليكم السلام والرحمة
.
بالنسبة لبتّال وجسار هذا من محاور الرواية اللي بتوضح مع تقدم الاحداث😊
.
تقصدين مناور مو مصلح
مصلح شايب لحاله ماله احد اما مناور فهو عنده بنات وولد واحد بس اللي هو غيث
.
موجود للان هالاباء لكن مهما قسى يظل ابووغازي اب بالنهاية وعطوف لكن يخفي هالشي عنهم حتى ماتتغير صورته بعيونهم
.
الله يسلم عمرك على هالمشاركة اللطيفة💗💗
.
بالنسبة للتنزيل حيكون باْذن الله جزء او جزأين بالأسبوع وان شاء الله ألقى تفاعل جميل يجبر الخاطر بهالرواية


الرد باقتباس
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1